6.KA CHANPUAL [A Becky Rafa Renthlei story]

6.KA CHAN PUAL

Ziaktu: Becky Rafa Renthlei

-B®®

Shadow of the life

[Recap]

"Náno, Mate.. chho ila.." u Mapuia aw ka hriat tâkah chuan ka thaw huai a, a rang thei ang bera incheck-up tura ka hmin a ngai.

U Mapuia nen kan room lam pana kan chhoh laiin, "Mám, intur kan dawm dawn lo em ni?" Tiin Thlamuana'n a u a rawn bia a, ka lo melh rum nghal.

"Dawm dawn chiang e, lo chho rawh, kan room-ah aw.." tiin a nau a chhang a, ka túm hmak. Mahse, hmun danga an awm duna an in dun ai chuan an kianga awm ve ka duh si avangin ka hnial duh ta lo a, Thlamuana'n min rawn zui chho ve ta a, he pa hmelṭha vawr hi ka ring hlawl lo. 

A zu in turah damdawi a pawlh lovang tih tu'nge sawi thei? 

A û lakah hian rilru ṭha a puin ka hre ve tlat lo.

Min melh dan leh min en dan hi ka rilrem zawng a ni miah lo bawk. Amahah hian mi hîp theihna leh hneh theihna riau a awm tih ka hriatna hian min tilawm lo. Ka pawi a sawi êm êm lo nain ka hmelhuat a ni deuh ber.

Thlamuana lakah hian 'fimkhur a ngai' tih Diki min hrilh kha ka hrechhuak chiah.

-B®®

In chung Veranda-a ka ṭhut laiin an unauin an titi a, u Mapuia hi pa ṭawng tam a ni lo na a, Thlamuana nen an han awm dun zet zawng a ṭawng tuitam ve khawp mai, an sawi zawng zawng hre mah suh ila; thil huatthlala leh ngeiawm a chhâkchhuak lem lo a, an nui dun hawk hawk a, mak ka ti ru deuh.

"Náno, a vawt tawh lo lût rawh le," tia u Mapuia'n min koh chuan thuawih deuhin ka lût ve mai. Mahse, room chhung rim chuan ka luak a pawt a, zu rim tak zetin ka hnar a verh a, ka uak tuar.

"Thlamuan, i û natna i hre reng sia eng tin nge zû i inpui theih!" ka ti nghál bawrh bawrh a. A hmingin ka ko lawl lawl, ka û peih lo.

"Ka û nupui ni mah la nang aiin ka upa a nia, 'Thlamuan' tia min koh leh vaih chuan," meng sí sap chungin a ti daih a, u Mapuia a nui huk.

"Nang pawh eng nge i lo in ve ngawt a," tiin u Mapuia ka en leh a, "Hnuk a hlat em mai, hlauthawng suh," a ti duh lek.

"Lutuk che u hian," tih pahin khumah ka mu tau a, ka ep chiahah an ṭhut dun vangin bang chhak lam hawiin ka mu a, ka inkhuhphui hmak bawk. Engtin min ti zui bîk lém lo.

An titi ka ngaithla kar a, "Nanovi hi kum eng zat nge?" Tia Thlamuana'n a û a zawh chuan, "Kum 22 a pum fel awrh a, 23 na a kal mek," a lo ti ṭha ve mai, "A leili a hriam deuh tih lohah chuan a ṭha reuh vingveng em mai, Khasi nula a ang," tiin a nui kur kur a, u Mapuia'n, "A kumah naupang mah se a puitling riau a nia, nang aiin a la nau fê nain i tluk lo," nui chungin a ti ve a.

Ka inkhuhna puan phih hawngin, "Min rêl reng suh u.." ka va ti pek a, min rawn en hû. Thlamuana zawk a khi suk a, "Mu mai mai teh û-te" tih pahin min siai zauh a, ka ngei leh pek.

Titau chunga mu ka ni a, ka naupai vang nge muthilh ka awlsam sâwt viau. Kâr lovah mut chhuakin min zem a, an unau pawh ngaihven tawh lo hian ka maimitchhing ta a.

Ka harh leh chuan a tlai tawh ngei mai, rang lutuka thovin ka intifai sawk sawk a, u Mapuia pawh ka hmu lo, eirawngbawlah hi chuan a châng châng chauhin ka pui ve a, Diki hian ka puih a duh vak lo; inhnuaiah ka chhuk a, tûkṭhuan an lo kîl ṭhap. Min ko tho miah lo chu mak ka ti a, mihrang ka nih zia ka inhre rauh rauh.

"Lo kal rawh Nano, Mama'n mut tam i mamawh a tia kan kai tho duh lo che a nih kha," Atuni'n a lo ti thuai thuai a, u Mapuia ṭhutna bula chair pakhat âwl chu a kâwk vâ bawk. Midang erawh ṭawng lovin an ei mial mial a, ka va inthlahrung mai mai e.

Atuni sawi anga awmin u Mapuia bulah ka ṭhu a, min en zauha a thil ei lai a ngaihven zui lehnghal daih. Ka tân hi chuan tlângnel ngaihna a awm lo, an mûk run hlawm mai si a.

Pa ber a rawn ṭawng a, "Naute pian hma chuan tihian man leh mual tifel lovin han inkawl phawt ila, i chhungte rilru pawh a lo dam ve hman tawh mial thei asin, nakinah damtein kan awm anga inneihna pangngai tih theih hun a la awm mai ang," dam thlapin a ti ta a. Kan ngawi ṭhap.

Nu berin, "Atuni leh Bawiha pawh kârleh lamah chhuk law law ula, Mapuia te nupa hi in rualin chhuk ve ta se, incheck-up a hun thuai dawn tho a," a lo ti ve a.

"Zemabawk lamah insawn ka duh tawh zawk," u Mapuia'n a ti khauh.

Pa ber ngaihdan a ni leh ta lo, "Hmunpui pan theih reng laia a hrana insawn la sawi, puitling ve deuh teh Mapui, Nánovi i hruai ve anga nuam inti phian maithei asin," dam deuh zawkin a ti a.

Kei ka ngawi renga Thlamuana'n min rawn melh zuk. Chuta karah u Mapuia chuan, "Hetianga chenho dul dul hi a ṭha ber lo a nia, upa ber ka ni a, indan hi a hun ve tawh, ka kum a tam ve telh telh a, puitlin lam ka pan in duh chuan kan indan hi phal rawh u," tiin ro hran a rêl leh daih. A va buaithlâk tak.

"Awi awi, i nupui kum 22 vel a ni a, nau a la pai zui bawk a, nangin khatiang damlohna kha i neia eng tia khawsak nge in tum?" Ka nu Biakliani'n a ti hluih hluih.

"Thil harsa vak a awm hleinem, awmpui tur mipa pakhat leh hmeichhia kan la anga kan tâl thei lutuk ang," u Mapuia'n a la ti fo a. Thlamuana a rawn ṭawng ve ta chauh, "Mama, eng pawh nise kan rualin Delhi-ah lokal ve ula, Chemotherapy te pawh ṭan ve tawh la, hetia ei reng tawh lovin i doctor Ibrahima kan be dawn nia, a hmaa a sawi tawh ang khan i tân a ṭha zawkin ka ring tlat," a rawn ti ve mial.

Kei tih loh an inhnial bap bap hlawma a tawpa an thu tlûkna chu, u Mapuia nen Delhi-ah kan chhuk ve anga a doctor Ibrahima thawhna Rajiv Gandhi Cancer Institute hospital & Research Centre-ah hmaichhan ngeiah kan be dawn a ni. Ka duhthusam a thleng dik dawn ta. Mahse, amah ber hian a duh lo leh thut thei bawk. A 'Cancer 'lo tia sawi buai ka tum miah lo. A chhan chu Chuap Cancer a ni ngei tih ka hre tawh a, Biopsy result leh investigation hrang hrang report-in a nem nghet thlap. 

Amaherawh chu, a Cancer Stage a sâng tawha tuna a lan danah hian last stage a ni tawh. Khawvel thiamna aṭangin beisei tur a awm lova nimahsela, Pathian kuta tluk luh a him ber tih ka thinlungin a hriaa beiseina nasa tak ka la nei ve fan.

A tawi zawngin, Thlamuana leh Atuni châm chhungin chhungkaw boruak a nuam a, u Ateii te chhungkua pawhin chaw an rawn ei chho zeuh zeuh a, ka tana hrehawm leh ngaihthlâk nuam lo ṭawngkam atu amahin an chhãk chhuak ngai ta vak lo. 

An rilru chhungril hre vek lo mah ila, a hmaa kan boruak uap leh pik churh kha a awm tawh lo a, ka chhungte lam aṭangin thawm riva hriat tur pawh a awm chuang lo, min tuithlâr tawh miau alawm. Nâin ṭap ru fo ṭhin mah ila, tawrh dam ka tuma ka haider lui a ni zawk mah.

Thlamuana tih loh midang zawng nen hi chuan kan inpawhin kan innêl ve sâwt viau a, pu Zoliana leh pi Biakliani (u Mapuia nu leh pa) pawhin ṭhat an chhuah ve ta viau. A chhan ni bera lang chu kan indan an hlau. An hlauh chhan pawh an sum hlawm lian lakluhna hi an fapa Rinkima nimiau hek. Duhâm hi ka'n ti mai mai khawp a, mahse; ka sawi ve theih a awm si lo.

U Mapuia nen nupa dik tak angin kan khawsa a, nitin a kianga chênga tâl tam ta chuan a ṭhat loh dan ka hre chiang telh telh. Zan lamah pawh thawhah zeuh zeuh a ching a, mahse; hlauhthawnawm lutuk angin a awm lem lo a, a thawhah a lo chhuah apiangin damdawi hîp chi leh ei chi ka pe mai zel. 

Sunday zankhat erawh chu hma takah kan nupain kan room-ah kan chho a, u Mapuia a ṭawng tlêmin min en leh zeuh zeuh ṭhin a, "Nano, kan fa lo piang tur hi ka hmu hman lo mai ang a," zawi ruiha a rawn tih chuan amah ka va en vat a, chung lam melh vang vang chung hian a thaw hawk a, "I nuam lo deuh em ni?" Tia ka zawh chuan, "Ka ṭha, lo mu rawh le," tiin min chhâng leh mai a, ka ngaih erawh a ṭha chiah lo.

"Thi turah indah nghal mai ṭhin suh, kan thih leh dam hi kan thu a ni lo tih vawi eng zat nge ka hrilh dawn che, naute nen kan pathumin hlim taka kan awm hun hi a la thleng em em ang," tih pahin khumah ka lawna min lo kuah vat.

"Chemo han khai leh pawh chu ka châk lem lo khawp mai, tihian a nih nih ni ila, lungawi tum ila a ṭha maiin ka hria," a ti leh a.

"Ni lo ve, in enkawl i ngai alawm, treatment pangngai taka i lak chhunzawm chuan hmâ kan sawn em em ang, lungngai miah suh, i kiangah ka awm zêl dawn tih ka sawi tawh kha," ka lo ti a. A hmain Chemo khái a lo duh miah lo tih hi ka hriatna a la rei lo, Atuni'n min hrilh hnuah ka hre chauh a, a rilru hneh turin min ngen nasa.

Min kuah hlu hlu chung hian, "I rilru ṭhatna ka hriat chian vang hi alawm ka umzui duan duan zel che," tiin a nui vei suk.

Nghet takin ka kuah lêt ve a, hmangaihtu tân chuan a natna tawrh hi hriatthiam a harsa lam hret a ni. Na vut vut leh tawrh hrehawm khawpa a awm ngai lo hi a vanneihna leh Pathian malsawmna liau liau a ni; piangthar ṭha leh ṭawngṭai hluah hluah mi ni lo mah ila, kan nupa tân hian Pathian ka ko zing. Amah luhkhungtu niin sual lian tak ti ni-a inhriatna nei ru ṭhin mah ila, thiam ka inchantîr zut zut a ni ber.

A muhil hmêl ka en a, a biangki lang lian leh chêr ta deuh te, a vun thú deuh that chu nitina hmutu ka ni chung pawhin a danglamna hai rual a ni si lo. Mipaah pawh inti mipa chi kha a ni a, ka hriat leh hmuh laia na nei anga lan a duh miah lo. Mahse, a thawhah hi chu zêp theih nihek lo, a lo chhuahin a buaithlâk ka tiru takzet.

Muhil ve thei lovin ka tho chhuak ta nge nge a, raino ei châk ngah tih takah ka ril a ṭâm raih raih a, inhnuaiah thil ei turin ka chhuk thla ta a, an in hi ka in angin ka la ngai thei meuh lo. Fridge ka hawng a, Apple pum hnih la chhuakin ka sil thuak thuak a, kan room lam panin ka chho leh ta a, step thumna ka rap ṭan chiah tihah ṭawng thawm ka hriat vangin ka ding chat.

"A rang lama chhuk kan tum dawn nia, hniam lam a pan zel a, a luhlul lutuk hi alawm.." tia Atuni ṭawng ka hre ta thut. 

Atuni room kawngkhar a rawn inhawng a, Thlamuana leh a nu leh pa an rawn chhuak a, min hmuh hlau takin dim lutuk hian ka chho ṭhêm ṭhêm a, "I û hian hun rei a nei tawh lo, engkim rang takin ti ang che u, ka fapa han khawngaihthlâkzia hi chu aw.." tia pi Biakliani a ṭawng mawlh mawlh laiin step tawp ka rap thleng ve chiah. U Mapuia chungchâng an sawi a, "Hun rei a nei tawh lo," tih hi eng ati nge an sawi reng mai le? Mak ka ti takzet. 

Anmahni room lam ṭheuh an pan hnu pawhin ka la ding reng, inchungah hian kan nupa chiah kan riak a, Thlamuana room chu a awm tho; mahse, inhnuaiah a mu daih zel a, hman zana a lo chhoh bâk kha inchung a rawn rap leh tawh pawhin ka hre lo. 

Apple pawh ei ta lo chuan kan room-ah ka lut a, ka rilru a nuam thei reng reng lo mai. Ka hriat loh thil an hre tam si a, zawt turin ka huaisen tawk bawk si lo, Delhi kan kal a nih chuan engkim chiang takin keimah ngeiin ka la hre turah ngai ang. 

Khawvar dawnah ka lo chhing sek a, uak tuar tuar riin min tiharh leh nghal! U Mapuia mutna lam ka en a, a lo ruak hiau, bathroom lam aṭangin thawm a rawn awm a, thawhphan awm miah lo hian ka va pan nghal a, Bathroom kawngkhar ka nem hawng rawk a, wash basin bulah chauh hmel zetin u Mapuia a lo ding a, a mit a hnâwng chap.

"I ṭha em?" Tih pahin ka pan ruak a, dingdihlip chungin a chal ka ban a, a biang a hit thlar, bu nghut chung hian, "Ka pum lam a chiang lo deuh alawm maw le, hawh le.." tiin ka koki-ah min kuah a, bathroom kan chhuahsan ta a, chau ang em em pawhin a lang leh miah lo. A inthunun thei hi ka ti ṭhin, a tuarchhel tih a hriat hliah hliah.

Khumah a mu leh thân a, "Nano, Diki tih loh midang zawng zuk ko lawk ta che," tia min hrilh chuan thuawih deuh hian zawhna dang zawt buai lovin ka chhuak nghal nal nal. 

Ka nu leh pa an lo tho tawh mial a, min hmuh veleh, "In mu ṭha em nizan lam?" Tiin ka pain min lo zawt a, (Ka nu, ka pa tiin ka sawi ve zel tawh ang,)

Thudanga chhâng ta lo chuan u Mapuia'n ko tura min tirh thu ka sawi daih a, "Atuni ka koh chhungin Thlatea va kai tho ta che," tiin ka nuin min tîr zui zat. Ka va hreh tak. Thlamuana biak hi ka châk lo a ni, a dik a dik chuan. Hnial ka tum ûk a, Atuni room lam pana a kal nghal daih vangin ka ngawi leh rih, ka pa in chung lamah a chho nghal bawk si.

Corridor zawh pheiin Thlamuana mutna lam ka pan a, kawngkhar ka kik ve ngial, vawi thum ka kik hnuah pawh chhânna ka la dawng ta chuang lo a, 'Thlamuan' tia ko chungin kawngkhar ka nem a, a lo inkalh loh avangin ka lut a ni nghal mai. A Bawkkhup a, kawr pawh a ha lo, a kâwng achin hnuailam puanin a khuh tho a, dimtea pan hnai chung hian ka ko leh a, ring deuha ka koh chuan min vin nek ka hlau ve deuh si. 

A lu-ah sâwiin ka ko nawn leh a, inlet thawk chung hian, "Bengchheng reuh mang e," a ti sup.

"Lo tho rawh, u Mapuia'n a be duh che a, midang pawh an chho tawh, ka kal a nia," tia inher ka tum chuan ka bânah rawn manin min pawt deuh sawk a, ka inring lo nen ka rin loh dan lutuka a rawn chêtna chuan min ti hamhaih bawk si a, ka pai nawk. Chutah, khumah min pawt ṭhu a, "Ka û chuan eng atan nge min tih a?" Tiin min zawt ta a.

"Ka hre bik lo, ka nu leh pa pawh an chho tawh," ti nghatin thawh chhuah ka tum a, "Ka u hi kalsan rawh, Lungleiah haw rawh, i in enkawlna tur zawng zawng ka tum vek ang," a ti hmuk a, ka thin tertek a chhuak leh ta, a âwma nam dawtin, "I inrawlh lohna turah inrawlh tawh suh, nang nena inbiak fo hi ka peih lo," ka ti ve ngat a.

"I duh dan danin i awm dawn lo tih ka sawi kha hre reng ang che," a ti a. Ka chhâng buai peih tawh lo, Thlamuana bula ka awm apiang hian engtin emawni ka awm ziah, ka sawi fiah thiam mai mai lo e a. Thinrim deuhin in chungah ka chho leh ta a.

Kan nupa room-ah Atuni, ka nu leh pa, u Mapuia tiamin an lo awm ṭhap a, min hmuh veleh, "Thlatea chu a lo chho em?" tiin ka nu'n min zawt vat a, "A lo chho ang," ti ringawtin ka chhâng. Rawn chho ve miah lo mah se pawi ka ti tawp lo. Ka ngei a nia kha pa kha.

Khum lu lamah ka ṭhu a, u Mapuia lukham nghengin a ṭhu âwn duai a, "Ka koh chhan che u chu, a rang lama ka doctor hi hmuh ka duh e, Chemo khái min lo chawh ta a nih pawhin ka khai ve mai a ni ang chu," a'n ti chiah chu lawm avangin ka thaw halh. 

Kei ang chiahin midangho pawh an lawm tih ka hria a, an hmêlah a lang vek. Thlamuana lo chhoh thlen hmain engkim an ruahmanin an sawi fel hman vek a, tun aṭanga ni hnih hnuah Delhi pan an rêl tlu der. Sum lamah an buai lo bawka a rang lama Dr.Ibrahima hmuh thuai thuai ka duh ve bawk, u Mapuia'n min ngaihtuah tel vanga he thutlûkna hi siam a ni tih ka hre ru kar. 

A beng hriatah a hun neih rei chhung leh a chipchiar eng mah an sawi lo tih ka hre ve a, beiseina thar kei leh kan nautê vang hian a nei ta tih ka hrethiam mai.

Thlamuana a rawn chho a, thil awmzia an hrilh ve nghal sawk sawk a, eng danga chhâng lo chuan, "Mipa chuan khatiang thutlûkna kha a siam tur a ni rêng a ni," a ti duh chauh.

Inhnuaiah kan chhuk ta vek a, tûkṭhuan kan kîl laiin u Atei a lo chho a, ani pawh an hrilh ve nghal bawk a, a lawm hle. Heta ka hriatchian tâk leh ka hriat chhuah tâk chu, u Mapuia an hmangaihzia hi a ni. An hun liam tawha an inenkawl dan leh an thil tih dan hre si se lo mah ila, kei min neih an phal loh chungchâng chu thuhranah dah ta bawk ila, amah ngau ngau hi an hmangaih a ni tih ka hmu thiam ve tlat. 

"Nano, lokal lawk teh.." in chung aṭangin u Mapuia'n min rawn ko a, kei inhnuaiah Diki thawmhnaw sûk ka thlehpui lai a ni a, "Nano a ti deuh chhen zel mai a," tiin Diki'n min fiam a, ka nuih a za hle. 

"I thil pawimawh ho i document leh passbook te i keng kim em?" Tia min zawh chuan ka ken thu ka hrilh a, "A ṭhat chu, i chhungte kan tân va dil a nuam dawn lo a, khu lamah mamawhna te kan neih tâkah tih thilthu maw le, vawiinah Atuni nen bazar ula, thil ṭul leh tih ngai chu ama'n a buaipui vek ang, ka pum a nuam chiah lo a, ka hruai lo mai ang che aw," u Mapuia'n a ti a.

"Eng mah lei ngai ka nei lo," ka lo ti hmanhmawh a.

"Nautê a ṭhat leh ṭhat loh ka hre duh a, damdawi ei belh ngai a awm em tih te pawh hriat vek ka duh bawk," hnial theih miah loh hian a ti ta a. 

"Yes, boss" tiin ka lo nui ṭhâ.

"Naute nen hrisel leh dam ṭha taka in awm a nih loh chuan Delhi-ah kan kal lovang," a la ti hrâm.

Rang deuh hian, "Kan ṭha, kan dam, eng mah insawiselna ka nei lo," ka ti leh zawt zawt a, "Nangnu tak hi chu aw.." tiin a khi suk.

Mahse, Atuni zawk a hman leh ta si lo. 

An ṭhianho chaw ei khawm an lo tum ve si a, "Mam, i sawi tlai ê, ruahmanna kan siam vek tawha Thlatea tîr mai rawh, tiraw Nano..?" Tiin ka hriatthiam beisei deuhin min rawn melh a, ka haider tlat. Thlamuana hruai ka duh lo hulhual.

U Mapuia chuan, "Chuti a nih leh Thlatea ko rawh le," tiin Atuni a tîr zui zat.

A hnu lawkah Thlamuana a rawn phei a, "Vawiinah Nanovi hi i va hruai a ngai ang aw, ka nuamsam lo deuh a, Ultrasound tih a ngai a nih pawhin rawn nghâk vek la, a fit loh emaw ṭhat lohna a neih chuan Delhi-a kal ka remti dawn lo a nia, i hriatthiam ka beisei.." tiin a nau a hrilh leh zung zung a, Thlamuana'n ner suk chung hian, "Monu rangkachak man nei lo ka hruai dawn a va nih hmel ve," ngeiawm taka tiin a nui huk a, fiamthua sawi ni mah se, ka huat tâwk ava tling si êm. U Mapuia erawh a nui ruh ruh a, "Râk râk lo khan insiam tawh rawh u, in tlai ang," dam thluamin a ti a.

"Eng lo, keimahin ka kal thei reng, a nih loh pawhin u Atei ka sawm mai ang," ka lo ti ve ṭâng ṭâng a, "Nano, Thlatea nen aw, Atei tihbuai tel zel loh tur," u Mapuia'n a ti ṭha leh mai a, ka lo ner sak. "Û te, ka duat viau ang che, i duh duh kan lei dawn nia," chimawm taka Thlamuana ṭawng pawh ngaithla zo tawh lovin in chungah ka chho tau daih. Ka titau a ni tih an hre kher chuan ka ring lo.

Kan room ka thlenga ka hâk tur ka phawrh tau sawk sawk a, u Mapuia hnial ka duh lo, a rilru natna tur leh nuam lo a tih tur anga a nau nen kan boruak hrilh hriat kher ṭûl ka ti lova mahse; Thlamuana nen khera kal dun ka va châk si lo ve.

Kawr fual dum, a vara pâr ka khup hnuai thleng chang chang ka inbel a, khua a lum lem loh avangin a chungah kawrlum hmaphel a dum tho ka ha leh tawp a, ka sam erawh duhdah angreng takin ka ṭâwn thung. Inchei vul chûk chhan tur ka nei lem lo, Sandal cream rawng ka bun leh tawp a, ka pum a puar ṭan tawh avangin thawmhnaw mar hâk ka peih lo. 

Raino luak chhuak leh insawiselna ka nei lo lutuk hi ka vannei hle, zinglam luak chhuak vawi hnih khat ka nei ve zauh a, chuti tihlohah danglamna eng mah ka nei hran lem lo, ka ril erawh a ṭâm zinga ei ka thei phian. Zanriah, tûkṭhuan leh chhun lamah pawh ka taksa phu lovin ka ei hnem ziah a, ka pual a tê bawk si nen Atuni hian vawikhat pawh, "Khatiang anga tam i ei ziah chuan exer lâk taima ang che," tiin thinrim ni lovin min hrilh. 

In hnuai berah hian Gym an nei a, vawikhat chiah ka la lût, u Mapuia pawh a kal ngai meuh bik lo.

Kan room-ah u Mapuia a rawn lut a, dârthlalang hmaa ka ding chu hnunglam aṭanga min rawn kuahin, "Kan naute nu tur chu a va chhe lo ve," tih pahin ka chhipah a fawp zauh a, inherin a kâwngah ka kuah lêt a, "Nangman min hruai thei la ka duh asin le.." ka ti ve nang nang a, nui suk chung hian, "Ka hruai ngai lovin nau tihmawh zet ka nei alawm, kei chu min hnial zet zet zela ani chu i hnial ngam lo ang," a ti ta a, ka va ngei mai mai e.

"Suala, i chhia...khu pa khu ka nêl lo," ka'n tiah.

"A rilru a ṭha a nia, ka naute an nih vang ni lovin atu amah an rilru a chhe lo a nia, nakinah chuan 'Thlate, Thlate' tiin i la ko zut mai ang," fiamthua tiin a nui ruh ruh a, pawnlâng zetin ka nuih ve leh tâk hi.

Pawisa ka kutah min pe a, "I ei châk zawng leh i duh zawng lei nan hmang la, thawmhnaw emaw thil dang lei duh i neih pawhin inthlahrung miah suh," tiin duat tih hriat takin ka kokiah min kuah a, a zât ka zawt lo nain a tlem chhe lo tih ka hria. Lawm takin ka la a, min duata min ngaihsakna hian ka nu leh pa in min ngaih tîr nêp ka ti lo thei lo. Min hmangaihtu leh ka hmangaih kianga ka awm thei hi ka hlim a ni tawp.

Min kuah chungin kawtzawl thleng a lo kal ve a, "Thlate, bazar a duh pawhin i hruai zel dawn nia, thlahthlam miah suh," tiin a nau a la chah hrâm. 

A nau lah ṭawng thlawn ba duh bîk hek lo, "Beraw tlângah kan fawrpui ang e, in nu tetakte hi.." khi vur vur chungin a û a chhâng a, ka nui peih vel lo e a.

Thlamuana nen kan chhuak ve ta poh e.

A chhip sam kir bup chu a ṭâwn bo daih a, a bekah hmul tlem a ṭo siar siar a, a zuah kual vek, Vai a ang deuhin ka hria, u Mapuia nen an hmaitlâng inang mah se, a nihna takah chuan Thlamuana hi a hmelṭha zawkin ka hria, a mizia ka ngainat loh avang leh a ngeiawm thiam êm avangin ka hmu khawlo laklawh a, hmeichhe duh chi hmel a pu. A lerh hmel bawk. Â, a ho, ka thil ngaihtuah hi...

Inbe miah lovin Dr.Linda Clinic- kan thleng a, ka kal duhna hmun a û in a hrilh sa a ni ang, min zawt lem lova a hriat danah. 

Min zui zel a, Doctor-in min en dawn chuan chhuak turin ka mitmei ngiala a hre lo der tlat, "Thlate, i duh chuan a awm theih aw, i û in Ultrasound tih ngei ngei kha a duh a, awm ve law law rawh," Linda chuan a ti sawk sawk a, ka lo inrawlh ve hman îk náng.

Min check uluk hle a, ka mutna piahah Thlamuana a ṭhu kur a, min la en chîk em em zui. 

Ultrasound kan tih laia min hrilh fiah pawhin kei ai aiin a ngaithla uluk emaw tih turin a awm nia! Zawhna a zâwt zeuh zeuh bawk a, a hmuh laia ka pum han hlim lan vel ka hreh teh reng nen zah pawh a sawi theih loh. An inhre ṭha êm a, sawi buai loh law law a finthlâk.

Ka Bp a check laiin ka phone a rawn ri a, vawi hnih lai a rîk nawn tâkah chuan Thlamuana'n ka bag chhung a hai rawk rawk a, "Û te, ka pick aw..." tih leh "Hello" tih a rual a, a ngawih vang vang hnuah, "Rawn ngaihven duh tawh suh u, kan enkawl thei e," ti hmukin phone a off hmiah. Atu chu ni maw!?

Doctor awm laia zawh ka duh loh vangin ka ngawi ran a, "Thil ei ṭha la, mut tam i mamawh bawk, thil ngaihtuah ngut ngut loh tur aw, rilru hahdam hi naupai laia thil pawimawh ber pakhat a ni a, awm âwl lutuk pawh a ṭha ber chuang lo a nia," tia doctor-in min hrilh lai chuan, "Kan lo chhawr hrep ang," tiin Thlamuana a rawn inrawlh leh hram. Doctor nen an nui hawk hawk a, damdawi min chawh belh hnuah ṭhat lohna êm em ka nei lo tia sawiin a clinic kan chhuahsan ta a. 

Step-a kan chhuk ṭan tihah hmanhmawh zet hian mipakhat hi a rawn kal a, a kal ti ila a rawn tlan chho a ni zawk mah; ka dárah min su sawk a, ka ṭê ṭhat. Rang lutukin ka hnunga kal Thlamuana'n min rawn dawm a, "I ṭha em?" Tiin min kuah vat. Ka thin a phu nghal dawt dawt. 

Harh chhuak thut niawm tak hian min vawnna a thlah a, min sutu pa kal liam tur chu, "Nang kha lo ding teh," pawr fe-a tiin chu pa ûm tum chuan a inher a, a kutah ka lo vuan vat. "Kal tîr rawh, eng tin mah ka awm lo," ka lo ti thuai a, "Mâwl lutuk, a hmanhmawh viau a nih te chuan niminah te khan kal daih tur alawm," a'n tiah. Ka nui tawp.

"A chêp si a, lokal rawh chhuk ang," tiin ngaihtuah chiang mang hlei lo hian ka kâi a, a lokal ve mai bawk a, kan kal pelh apiang te'n min en zui zel. Nia, ka tê ve bawk si a, Thlamuana a sângin a lian bawk si, a taksa a inphut êm êm a, a tê zawkin ka kâi kal dat dat a, min hmutu tan a nuihzatthlâk ngawt ang. Bus stand kan thlenin ka vawnna ka thlah ve chauh. 

"Kal kâwina tur i nei em, i duh leh kal rih la, bazarah ka teikual duh a, Taxi-in ka lo haw mai dawn alawm," inthlahrung deuh taka ka ṭawng chuan, "Min hnar bo phêt tum suh, bazarah phei chuan mi an tam a, an su thlu tawp mai ang che i tê si," tih pahin a nui huk. 

"Thlamuan..." ka ti nghat a. 

"Lokal rawh, eng nge i lei duh chu..." tiin ka kutah a rawn vuan a, thin thlâk ka tum lahin, "Nichinah pawh min kai renga tuna duh loh thar leh vel a ho," tiin bazar lam panin min penpui a, inhnial hman pawhin kan khawsa zui ta lo. 

Mipui zi nuai nuai karah chuan ka kut nghet takin a húm a, amah a kal hmasa zawk a, thei lam leh zana ei tur eng emaw ka lei laiin ka bulah a ding run a, ka lei sa a lo ban vata ama'n a khai zel bawk a, bazar bag-tê deuh ka ken tel chu pein a ak ve hmak. A phunnawi lo reng reng. Teh tlatin!

Thawmhhnaw dawr lian ve deuh pakhat zâwnah a ding ta a, thawmhnaw lei duh a nei ni-a ka rin vangin, "Han en rawh, ka lo nghak ang che," ka ti a. Min en chuang lo hian, "Kan pahniha en a ngai," tih chiah a sawi. Ani pawh hi a ṭawng bung hmuk hmuka ngei ru viau ṭhin mah ila, a lehlamah chuan fel ve riauna a nei tho.

Min luhpuina dawr chhungah chuan hmeichhe thawmhnaw hlir alawm maw le an zawrh le!

"Raipuar inbel chi thawmhnaw zangkhai lam kan lo en lawk thei ang em, Bra leh underwear pawh," a'n ti chiah chu ka hmai a sen awp awpin a nia ka rin. Ka biang ka dawm vat a, a sa hat hat.

A kutah ka sik a, inlâk hran ka tum ngial pawhin a hre duh dêr lo lehnghal. Dawr nghaktunuin min melh tawn sek hnuah Thlamuana thil duh sawi chu a rawn phawrh zung zung a, "Hey, eng mah ka mamawh lo, keima ta tur a nih chuan, leisak ka ngai lo a nia," ka lo ti sawk sawk a.

"Ngawi mai mai teh, Mama thu hnial ka duh lo a nia," tia rawn kun hniamin, "Zan mutnaah i inbel sexy lo viau a ni ang, a thar rawn en turin min ti," tiin ka beng bulah a rawn phun sup a, ben pawp ka châk lutuk. Midang hmuh laia bêng lo turin ka va insûm nasa tak. Ka haw ngawt mai he pa khawsak phung hi chu. Nge, u Mapuia'n a lo sawi tak tak tih pawh hriat va ni suh.

A duh duh a thlang khâwm a, ṭawng thei lo ang maia awmin ka ngawi ngal. Ka thin a rim ru lutuka u Mapuia lakah pawh ka lawm lo hulhual, a nau mah ni se hetiang leh lutuk sawi chhuah hi thil tih chi a ni lo hrim hrim. 

Thawmhnaw dawr kan chhuahsan laiin ka phone a ri leh a, u Mapuia a ni. Ka thinrimna beng daiin ṭha tak hian ka chhâng a, thil kan ei tawh em tih leh kan haw hun tur min zawt a, kan ei loh thu te, kan la rei deuh tur thu ka hrilh ṭha ve mai. 

Nichina doctor Clinic-a kan awm laia lo call tu kha tu dang ni lovin u Ropuia a lo ni a, Thlamuana'n khatia a lo chhâng kha a zia lo ka tih êm avangin ka call back a, rang takin min lo chhâng a, "Mate," zawi supin a ti a.

"Bazarah kan kal a, nichina ka phone lo chhângtu kha u Mapuia nau a nih kha," ka tih chuan, "Ka hria alawm, ka thinrim hleinem," dam duama tiin, ka ṭhat leh ṭhat loh min zawtin min ngaih thu a rawn sawi a, "U Mapuia Delhi-ah kan hruai dawn a...kei pawh.." ka la tih mêk laiin ka phone Thlamuana'n min phih thlâksakin a off zui hmiah.

"Ka û a nih kha..." ka ti vin ṭhat.

"Anni kha biakna chhan tur i nei tawh lo, an duh tawh lo chea inzawmna in nei tawh lo tih theihnghilh suh," ti nghutin ka phone a ak daih.

Ṭawng ring ṭha ngam si lo hian, "U Ropuia nen engkim kan inhrilh vek ṭhin, aniin min tuithlar ve lo, khawi ka phone kha.." ka ti a. Ka phone a ri mêk bawk.

"Zomuanzual, ka û ang ka ni ve lo aw, kan inchhungkhurah i chhungte be ngai lo angin i awm a, vawikhat i chhuak tih an hre dêk dêk a, an rawn be nghal che a nia, i tum dik tak ka hriat chhuah hunah chuan i nuamsa lovang," sehchilh nawka tiin a kal nghal vut. 

Thlamuana han sual zia em em hi mak ka ti. U Ropuia nen kan inkâr a hre miah lo niin a lang a, inbiak a harsat tehlul nen kan inbiak theih ve chhunah tikha a ni leh si a, ka thin a rim ngei mai. 

Ka zui duh ta bík lo a, a kal lohna lama kal tumin bazara tlereuh zawrhna hmun ka pan a, lei tur ka neih vang ni lovin Thlamuana bula awm ka peih tawh loh vang a ni ber. 

Ka ril a ṭâm ṭan bawk a, bazar chhunga Restaurant pakhatah chuan ka lût ve ta ngawt a, ka pum a ri raih raih, Thlamuana lam ngaihsak lêk lovin ei tur ka chah a, ka ei tam ngang mai; min rawn zawng pawhin ka ring mai mai lo. Taxi-in ka haw ve mai ang ka ti rilru rân a.

Dârkâr chanve dawn ka teikual leh hnuah Israel point lam pan bawkin ka chhuak chho leh ta a.

"Zomuanzual, min tihah hle mai," tia min rawn betu chu Thlamuana niin rum zet hian min melh a, "I tê sia, i luhlul bawk si a, i eng lai hi nge maw Mama hian a duh le?" Mi tamna laiah zu han ti a. 

Ka chhâng duh lo, miin min en duh angreng si, ka bânah a rawn vuan chut a, "Min hnial hlek suh," a la ti zui. A Car dahna kan thlen thlengin min kâi dâwr dâwr a, mi mit kan chunga fu ṭhup te chu engah mah ngai lo hian a kal miah miah! Kei ka lo zak êm êm thung, a rual hian vawikhatmah ka chhuak leh tawh lovang tiin ka intiam hial.

Khawiah mah pêng khawtlai tawh lovin in lam panin kan tlan a, traffic jam-ah kan tâng rei si, inbe lovin kan awm ngar ngar a, a pawi pawh ka ti lo.

"Mama sum leh pai hi chan i lo inbeisei a nih chuan theihnghilh rawh ka tih kha, i chhungte ruahmannaa rawn luhkhung i ni hial lo maw," diriam zeta min tih chuan, "I ṭawng tam em mai.." ka ti sap a, inhnial ka peih lo, ka chau tawh, kein ka kal nasa lutuka ka châwn a kham ut ut vei nen mut hahdam aia châk tun dinhmunah hian ka nei lo.

"Kan thleng a nia," tia min sawitu an awm vangin ka meng chhuak a, kan in kawtah kan lo awm reng tawh a, Thlamuana'n hnai zetah min bih a, ka lo muhil hman chu niin!

"Chhuk rawh, i thil lei ho hi ka rawn keng lut ang," a ti nghut a, nichina a hmel nelawm lo deuh kha chu a bo duak tawh, mahse, a ngainatawm tihna pawh a ni chuang lo.

Hám bái bái chung hian Car aṭangin ka chhuk ta a, ka in lo ni ta, u Mapuia te inah chuan ka lut a, a lo reh ruih.

Diki takngial pawh hmuh tur a awm lo a, Thlamuana ka lo nghâk ta a, ka thil leite dah fel a ngaih vang a ni. Ka phone min pêk pah hian, "I chhungte i be leh a nih chuan ka nu leh pa ka hrilh ang, phakar lutuk mai..ka û i bum thei a ni mahna, kei erawh chu min bum theih inring suh," ti hmukin dawhkanah ka thil lei a nghat chawrh a, a room a pan hmak. 

"Nano, in lo thleng tawh maw?" In chung aṭangin u Mapuia a rawn chhuk a, mu tho hlim hmel a pu nain ka kalsan lai ai kha chuan zangkhai hmel a pu zawk.

Nui var var chung hian, "Kan lo thleng chiah," ka ti a.

Ani hi zawng min hmangaihtu ka pasal a ni a, a hmêl ka hmuh ringawt pawhin ka hahdam sawng sawng thei.

Kan nupa room lamah kan inzui chho a, ka inentir chungchang leh doctor sawi te ka hrilh chhawng a, "Delhi kal tura i fit ṭha chu ka lawm, i tel lo chuan kal ka tum miah lo a nia," tiin ka hmuiah min fawp a, ka lo chhâng rang a nia. Rei lote chauh tak tak min fawp a, "Hahdam tawh rawh, i chau ang," tiin a inlahrang thuai a, "I lo ṭha em?" Tia ka zawh chuan, "Ka ngai che," tiin min chhâng daih. 

Thawmhnaw leh eng ilo vel ka phawrh darh a, Ultrasound result ka pe a, en vung vung chung hian, "Ultrasound i tihna hmasaberah ka hruai thei lo chea a pawi ka ti," a ti sup. Inthiam lo hmel a pu deuh bawk.

"Lungngai mahta che, hun a la tam lutuk tlat," tih pahin Thlamuana thawmhnaw lei ho chu ka phawrh a, "I indaih em? I pawisa kenin a daih em?" Tia min zawh chuan, "Thlamuana lei a nih hi, ih... hetiang vel hi lei a ngai tih tinge i hrilh kher a, keimah min hrilh mai tur a nia," lawm lo awkâ a ka ṭawng chuan, "Eng maw lei tura ka hrilh?" Tiin min zawt let hû.

"Kha, en la," tih leh underwear, bra leh rai kawr pali chu khumah ka theh phei a, a mal tê têa a en vek hnuah, "Lalthlamuana mai mai chu," tiin za lutuk tih hriat deuh hian a nui hawk hawk a, a ngaihna hre lovin ka lo en tawp.

"Nano, hetiang lei tur hian ka nau chimawm khu ka tîr lul lovang, i mamawh ni-a a rin vangin min puh mai mai a nih chu," tiin a la nui kur kur a.

"Dawt sawi suh, a sawi chiang ngei alawm," thinrim ṭeuhin ka lo ti a.

"Nautê, i â ṭhin em mai, mipa puitling ka ni tawh, i mamawh chu ka hre bawk, hetiang hnuailam thil leisak tur che hian ka nau mipa ka tîr dawn lo tih hrethiam tur i ni asin, a chimawm a chhuah pek a nih hi," tia la nui reng chung hian, "In lei lai vel hmuh a châkawm hle mai," a la ti tak deuh deuh a.

"I nau i ṭan a nih chu.." ka ti hmak a.

Bathrobe lain inbual turin ka luhsan daih a. A nui ri ka la hre pha reng, u Mapuia nge dawt sawi a, Thlamuana zawkin tih pawh ka hre mai mai lo. Thlamuana ka ngei a ni tawp mai ni.

Thinrim ru ṭûnin ka inbual a, u Ropuia nen kan inbiak dan leh Thlamuana chhan dan kha ka sawi ang nge sawi lovang tihah ka buai. A nau nen vawikhat kan chhuak dun dêk dêk a, phunnawi reng erawh nuam ka ti chiah lo. A pantu leh luhkhungtu zawk ka ni si a, vuivaina thlen fõ pawh a ṭha ka ti viau bîk lo.

"Nano, i lo chhuak dawn tawh em, nge ka rawn zawm ve dawn che?" Tiin u Mapuia'n min rawn bia a.

"Ka zo ṭêp," tiin ka chhâng ṭha ve mai a, ka pum tlema puar ve ṭan chu chûlin, "I pa hlimna tur leh dam khawchhuah nan hian engtin nge ṭan ka lâk ang le?" Tia phun sapin bathrobe ka ha a.

Nia, hlim angin lang ṭhin mah ila, ka pum chhunga awm naute hian a pa hmel a hmu hman lovang tih ka hlauhna hian ka chhungril a ti ṭap leh ṭhin.

Kan inhmangaih chhung rei lo têah hian a hlimna tur chauha awm hrâm hrâm ka tum dawn lo em ni? A naupang zawk niin hmeichhia ni mah ila, ka fâ pa hlimna thlentu nih ka tum ruh hle. 

Thlamuana tih vel avanga kan nupa kâr a chhiata inhnial phahna tur eng thil mah a thlen ka phal lo. Thleng lul suh se.

-B®®

Shadow of the life

B+>[BeckirafARenthleI]<+®®