A MAK! A Becky Rafa Renthlei Story

Last episode: A MAK!

Ziaktu: Becky Rafa Renthlei 

-B®®

Shadow of the life

[Recap]

Ka thingpui in turah mut duhna an pawlh tih hriat reng reng. 

Ka nau ngei chu a ni si a, rilru nat luat vangin ka ṭap khur ngat ngat. Min thlêm lova a ṭawng hek lo.

Car a tih nuna a tlan chhuah leh pawhin ka ṭawng tawh miah lo a, ka nu leh pa rilru tur ka ngaihtuah ngam lo. Krismas ka hman ve dan tur chu leh...

'Khawngaihsang, eng thil nge i û chungah hian i tih tâk mai le" ka ti rilru vawng vawng..

Chawngdingpuii, nula virgin hian ka duh thlanna tel miah lovin pasal ka ûm a nih chu..!

&&&*

Mamitah hian kum thum zet ka lo awm ve tawha hmelhriat leh ka thawhpui hlui te pawh an awm nual. Eng tin nge an hmel ka hmuh ngam ang?

Nunhlua kha min rawn tlawhin vawi hnih a lokal ve tawh a, atu khawkháin hre vek lo mah se, hria a mual mual chu an awm vein ka ring. Tin, Zobiaka te ang hnathawh sâng leh mi pangngai chin chunglam, mahni khaw nghet ni bawk si chu an hre fur dawn tih a hriat bawk a; khawi hmun pawh hi ka tân zahna thlentu a ni zel zawng a nih hi.

Kan tlân chak bawk a ni ang, kan chhuah hun dârkar hre lo mah ila, Mamit khawchhung kan lût mek tih ka hria a, zan dâr sawm a ri tawh. Zobiaka ka be tawh miah lo a, ka ṭah chhung zawngin min ngaihsak lova a ṭawng hek lo. Car a khalh par par a, a tlân muang lo hle bawk.

A seat hnungah mu tawh lovin ka ṭhu a, naktuk hi Krismas urlâwk a ni tawh a, ka tum ruh viau chuan hâwnna tur ka la hmu mai thei asin. Ka phone awmna ka hre si lo a, rei ngial ka dap hnuah ka bazar bag chhungah a lo awm mial. Ka nu leh pa missed call vawi 36 zet a awm a, Khawngaihsanga leh Zawmi'n min call lo thung.

Khawngaihsanga number ka hmet chhuak a, ka call nghal a, vawi thum a ring hnuah a pick hrâm. "Hello" pawh ti hmasa lo hian, "I û ka lo ni takzet em? Ka chungah eng thil pawi nge i tih hi.." thinrim awka vîn lutuka ka biak chuan, "Ka tan chuan ka û ka hmangaih êm ém kha i la ni reng, i tana ṭha tur hre lova i tâl kual mai mai âi chuan i hmangaih leh i duh ve ngawih ngawih, nangmah hmangaihtu kutah ka hlan che a nih kha, i inchhîr dawn lo a nia," a rawn ti duah a.

"Engtikah mah ka ngaidam dawn lo che, naktukah ka lo haw tho ang, Mamitah ṭhian hmelhriat ka nei ṭeuh," ka ti ve ngawt a.

"I tan rawn haw loh a finthlâk ang, ka nu leh pa hnenah in inrûk thu ka hrilh vek tawh a, ka pa phei chuan 'Ngaihsak hlek suh u, lo zuk bia emaw ngaihsak in awm chuan a pawi viau ang a ti,'' a ti leh a.

Ka rin dan chiah, ka pa hi mi khirh a ni a, pasal ûm anga min hria a nih chuan min ngaihsak hauh lo ang. Tin, Zobiaka an duh lova chuvangin chuti mai chuan min ngaihvenin ka ring lo bawk. A thu awih lo hi chu a namnùl mai mai lo khawp mai, ka nu rilru tur erawh ka ngaihtuah thiam chiah lo.

Zobiaka te in ni ngei tur kawtah Car a ding ta a, lungawi lo hle mah ila, duhthlan tur chuang awm ta lo chu ka chhuk ve ta a, in chhung a lo êng kalh a, kawngkhar pawh hawn chawp ngai lovin a lo inhawng sa.

Kan thawm hriain nu pakhat a rawn chhuak a, sam kir bap leh upa lam hmel a ni.

"Ka rin aiin in lo thleng hma," tiin kan bungrua a khai lut sawk sawk a, ka bazarna chawhmeh keimahni ta tur atana ka lei zawng zawng te nen lam a lo phur vek! Second hand kawr lum pahnih ka thing tel a, chu lo Biscuit leh lotion tih vel ka lei zawng zawng pawh a ngai ngaiin a awm. 

"Nu Biak, i duh chuan i haw thei nghal aw, kan lo inbuaipui mai ang," tia Zobiaka'n a chhan chuan Veranda zau leh fai zetah ka lo ding a, an che vel ka thlir reng.

"Chaw ei ka siam phawt ang che u, hei tunge a, a va inthlahrun hmel ve.." ka lam rawn hawi paha tiin a nui sâng a, fel hmel ka ti.

"Ka nupui rawn hawn a nih kha, Dingpuii," a ti hmiah.

"Awi awi, dâwt min hrilh duh suh, khawia nupui mah i rawn hawn lovang e, awihawm loh loh.." nui vur vur chunga tiin, "Lokal rawh, Dingpui, a vawt si inchhungah lo lut rawh," a ti leh sawk sawk a. Zobiaka pawh a lut nghal a, min ngaihsak lo hrim hrim.

A pawi pawh ka tih si loh.

'Nu Biak' tia a koh chuan kan bungrua vel room pakhatah a luhpui a, chawhmeh ka bag- a mi erawh Fridge-ah a rem ṭha nghal bawk a, ka sawinawi lo, eng tin nge ka tih chuan ang. 

In chhung ka en kual a, a fel faiin Furniture pawh a changkâng hliah hliah. A zau ṭha hle bawka inchung panna step 'Teak' a siam te chu a hnûm tliang hlurh bawk. Kitchen Cabinet fel fai tak a awm a, luah lum loh tih a hriat miah loh. Nu Biaki hian a awm loh chhungin a en kawl sak a nih ka ring.

Ṭhutkhawmna pindan a awm hrang thlap bawk a, common room pawh a zau tho.

"In lo thlen hun tur ka hre si lo a, chawhmeh eng mah ka tilum lo a nia," tiin a chhuang nghal a, "In intifai hmasa dawn nge in ei hmasa dawn?" Tia min zawh chuan, ka intihfai hmasak tur thu leh chaw ka ei dawn lo tiin ka hrilh a, Zobiaka a ngawi reng. Nelawm taka lan ka tum lo ve hranpa hrim hrim.

Chumi hnu chuan bathroom-awmna min hrilh a, Zobiaka room ami hmang tura min hrilh chuan duh lovin common bathroom ka pan ve hmak. Inthlâkna tur eng mah ka nei lo, towel pawh ka nei chuang lo, ka hmai ka phih anga a tawk. Mahse, bathroom-ah Towel fai ṭha tak tak a lo inrem ṭhap.

Rei tak ka inkhung hnuah ka rilru pik leh tâwt zual a reh a, ka hmai phih sawk sawkin bathroom ka chhuahsan ve ta a, nu Biaki pawh a lo awm tawh lo, Common room ah Zobiaka a lo ṭhu a, ngun taka thil ngaihtuah niawm tak hian a chal a chuar leh zauh a, ka thâwm a hriat veleh a rawn dâk chhuak a. 

A mitmeng hriam hraiha min melhin, "A nih tur ang a ni vek tawh, titau eng ang mah la, pasal ûm thanin i thang vek tawh dawn, Apui, hetiang ka tih a ngai ta hi pawi ka ti lutuk, mahse, i nu leh pa rilru ngaihtuah chuan ka inthiam tho. I nau hian i chhiatna tur a ngaihtuah dawn lo tih hria la, min ring rawh, ka kianga i awm chhung chuan i hrehawm ngai lovang," dam thlupin a ti a.

"Ka ring thei tawh lo che, Nunhlua nen hian in inang reng, bumtu ve ve in ni," ka lo ti a.

"Bumtu min ti ziah lo teh, Nunhlua nen min khaikhin tawh suh, a hmaa ka sawi ang bâk kha insawifiahna tur dang ka nei lo. Mahse, ka duh chea ka nupui ni turin ka duh che," zawi hniam ruiha tiin a tho chhuak a, "Lokal rawh, thil tlem tal ei ang," thinrim miah lova tiin min kalpêl a, Bawnghnute no hnih thli chhuakin Chhangthâwpah Jam a tât mawlh mawlh a, "Ka ril a ṭâm lo" tia kalsawn ka tum chuan, "A harsa zawngin awm suh, khawngaihin," a ti sup.

"Kha...tlem tal ei rawh.." ka kutah no a rawn hmehbel a, ka la ve ta tho. Zankhuaa rilṭama awm ka peih bik teuh lo.

Ka ei ve leh nual tâk hi.

T-shirt lian ve deuh pakhat leh kekawr lum lian vak lo hi a rawn dah chhuak a, "Kha kha inbel rawh, Mami ta a nia, a dang i hâk tur awm ang pawh a awmin ka ring, naktuk lamah kan en dawn nia mu phawt ang," ngaihsam tak hian a ti a.

"Khawiah nge ka mut dawn?" Tih pahin a thawmhnaw min pêk chu ka lo ban ve mai a.

"Khawiah vak nge ni ang, ka bulah a nimai alawm, inrûk tawh ber te chuan mut tlan mai tur," khi suk chung hian a ti a.

"Zobiakmuan, naktukah ka haw dawn a nia, Mamitah hian kum thum lai ka awm tih i hriat ka ring, hmelhriat ka nei nual a nia, chuan, i bulah ka mu dawn lo," ka ti nghat nghat.

"A ṭha e, i duh dan khan han awm phawt mai teh," paper bag ka lamah a rawn theh phei a, ka lo dawng chat. Min en tawh lovin a room ah a lut nghal daih.

A bag min pek chu ka hai rawk rawk a, hnuailam inbel chi vek a ni. A thar vek a ni a, kawnglaka a lei a ni mahna. Ka mamawh tur la chhuakin bathroom-ah ka lut leh ta a, ngaihtuah kim hi ka'n ti mai mai khawp a, ka intleuh thuak thuak a, a vawt ngei mai. Ka inthlak fel vek hnuah ṭhutkhawmna pindan lama Sofa-ah ka mu ta a, motor-a blanket ka sin tho kha sin lehin ka mu kawm ngal a, a kianga mut tumna ka nei lo. A vawt deuh hlek tih lohah chuan a hrehawm êm êm loh hi.

Zinglam dar thum velah vawt tih lutuk vangin ka harh hlawl a, kan in leh ka room ka ngai ngawih ngawih a, ka hna lam phei chu ngaihtuah pawh ka ngaihtuah duh mai mai lo. 

Chutia vawt ti-a ka inkhuh ṭhat mawlh mawlh lai chuan Choka lam a ri rawk a, a êng uar bawk nen ka hlau hran lem lo. Mahse, kawngkharpui zawna hlimthlâ ang deuh phe fua ka hmu, ka hmu sual lo tih ka chiang, thim thama awm ka ni lo tlat alawm. Thin phu dawt dawt chung hian ka ṭhu chhuak a, ka hawikual zek zek bawk. 

Eng emaw chen ka ngaihchân hnuah eng thil danglam mah ka hmuh belh lo bawka ka mu leh ta a. Muthilh tumin ka chhing fel chauh tihin ka blanket sin a intheh hlim dâwrh a, ka ṭê chhuak ṭhawt.

Light a thim pawh a ni si lo, eng mah hmu chuang si lovin ka hlau ru êm êm a, Zobiaka pan lah thih hrehin ka hreh si. 

Khur ru dar dar chung hian ka ṭhu ta reng a, kawngkapui dinglam tukverh parda chu ka en reng laiin tu emaw hian a rawn kêu dêk dêk a, thil mak tâwp a ni. A chhan chu tukverh a inhawng tlat si lova pawn lam aṭangin eng tin nge an rawn keu theih tehlul ang ni. Mahse, dimtea keutu an awm tih ka mitin ka hmu, chutah dârthlalang phen aṭang chuan Ramdini hmel ngei mai chuan min rawn nuih vur vur a, chutah zet zawng tihṭhaihtu ka nei leh ta tih ka hrethiam.

Ramdini hmel pawh ka hmuin ka hre vek tawh bawk a, ka hai thei lo hrim hrim. Vawikhat chiah ka va en leh hram a, hlimthlâ bâk ka hmu tawh lo. Ka hlau lo ka tih chuan dâwt ka sawi tihna. Thâwk pawh ka thaw ṭha ngam tawh lo, Zobiaka room lam panin ka tlân ta chûk chûk a, vanneihthlák lutukin kawngkhar a kalh lo hlauh.

Khumah tui takin a muhil a, zah pawh dawn lo hian khumah ka lawnkâi ve nghal, tih harh kher erawh ṭul ka ti lo a, a puansin keuvin ka inthawlh hmak. Nghet lutukin ka la kuah zui. A harh miah lo hi thil mak a ni, thawm ka dim loh tehreng nen. A rûm ṭuah ṭuaha harh chuang miah lo hian min rawn kuah lêt ve a, ka thlâ ava muang si êm. Ka thil hmuh ngaihtuah duh miah lovin Zobiaka lungphu ka ngaithla lui tlat a, záwi záwiin ka inthlahdul hret hret bawk.

Ka harh leh chuan nî a lang ut tawh a, keimah chiahin khumah ka lo mu tawh, thâwm hriat tumin beng ka chhi hrâ a, a rehin a reh tlawk tlawk. Hlauhna bawkin ka thâuah man lehin ka ṭhu reng a, thim zingah pawh ni lo, current awm lai renga an rawn inlâr ngam a nih chuan khaw en hnuah pawh an rawn lang lovang tih tunge sawi thei?

Zing dar kuaah pawh khum kilah ka la ṭhu reng a, eng dang mah ka ngaihtuah thei lo. Ka chawmawlh vek.

Zobiaka a rawn lût a, ka awm dan min hmuh chuan rang takin khum lam a rawn pan a, ka pangngai hlawl lo tih a hmu thiam a nih ka ring. A kianga ka mut khan thlamuang takin ka muhil kha a ni a, min awm loh san hlek pawh hian hlauhna ka nei nghal zel.

"Apui, i ṭha em?" A rawn ti sup a.

Ka ngawi reng.

Ka chal leh nghawng a rawn dap that that a, "I khua a sik deuh a nih hi, damdawi ei rawh aw," min ngaihtuah tih hriat tak hian a che nghal zung zung a, damdawi min ei tir lai pawhin a tih ang angin ka lo awm tawp. Ka hah, ka chau.

Rei loteah ka mut a rawn chhuak a, ka muhil zui ta a ni ang, ka harh leh chuan ka bulah Zobiaka leh nu Biaki an lo ṭhu reng a.

"I zia deuh em, motor i rawn chuang thui lutuka i taksa a chau a nih kha, Soup sa tawk hâwp rawh aw, i harh sawng sawng mai ang," nu Biaki'n a lo ti a, Zobiaka ve thung chuan mit khap miah lo hian min en a, "Apui, nizanah eng nge i hmuh?" Tiin min zawt chat.

Nu Biaki pawh choka lam panin a chhuak tawh a, ka thil hmuh leh hriat ka sawi nghal vek, "Ramdini tih i chiang maw?" Tia min zawh chuan a ni ngei tih nan lu ka bu nghat a.

"Hahdam rawh le, i taksa a chak lo a nih kha, ka bulah i lo mu ringawt sia mak ka ti teh a nia, i duh lohna hmunah hkir i awm si hi a mak!" tiin a nui suk.

"Lungleiah min hruai haw rawh.." ka ti sap a.

"A theih loh tih i hria alawm, ka nupui rûk hi zan khat lek kawl ka tum lo, palai tirhna chi a ni rih lo a, naktuk Krismas a ni mai tawh bawka nghak leh hlek ila i nu leh pa ka be dawn nia," a ti leh tawh.

"Inneih ka duh lo.." 

"I duh emaw duh lo emaw eng mah a danglam lo aw, i hnaah pawh bânna i pa ngeiin a theh luh tawh kha, a cge rang khawp mai, ka thlazar hnuaiah awm hi i himna ber a ni," a ti hmiah.

"Eng ati nge ka chungah hian i sual êm êm le.." ka lo ti sap a, "Sual angin min ngai mai mai a nih kha," tia rawn tawlh hnaiin, "Apui, ka hmangaih che tih hi sawi kher ngai lovin i hrethiam lo em ni, nang tih loh chuan an hre vek," a sawi zo hman ṭâwk tihah ka chhân hmain nu Biaki ei tur keng chung hian a rawn lut a, "Le, han ei ṭeuh teh, vawiin bak ka lokal tawh rih dawn lo a, intiharh ula bazarah kal ve teh u.." nui ṭhâ chung hian a ti a.

Kan inkár boruak eng mah a hre ve der si lo.

A soup siam a tui bawka ngawi rengin ka hawp zo vek. Artui chhum pawh pahnih ka ei zo a, ka harh sawng sawngin ka hria. Zobiaka thusawi kha ka thil ei chhung zawngin ka ngaihtuah a, 'Ka hmangaih che' tia a sawi kha awih tur nge awih loh tur hriat pawh va ni suh.

Mahse, kei hi chuan ka la duh a, ka ngaia ka thlahlel tih ka inpawm thlap. Inrûk kher ka duh lo mai kha a ni a, chuti tih lovah chuan amah duh lohna ka nei lem lo. Ka nau nen an ruahmannate hre ve vek lo mah ila, ngun zawka ngaihtuah chuan ka thisen zawmpui ngeiin ama kutah min hlan a, ka hriat loh thil dang a la awm tepawh a ni mahna. Tin, Nunhlua fa neih chungchânga a hriat dan a sawi kha ka awih tho. Ka thinrim laklawh mai mai a ni. 

"Insiam la chhuak ve lawk ang hmiang, lei tur neuh neuh a awm ve a," dam duamin Zobiaka'n min bia a, "Nangmahin kal rawh, ka peih lo," ka lo ti.

"Nangmah nen kal dun ka duh a lawm, bâkah nu Biaki a haw dawna mahnia awm i hreh lo em ni?" a tih tâkah chuan chawplehchilhin ka rilru ka thlâk nghal.

Ka inbual sawk sawk a, khumah ka inbel tur thawmhnaw a lo dah leh thlap tawh, u Mami thawmhnaw a nih ka ring. Kei chuan nimina ka inbel bâk eng mah ka nei lo. Lungawi takin a lo chhawpchhuah sa chu ka inbel ve mai bawk a, duhthlan tur ka nei ngang si lo. U Mami nen hian kan intiat viau a ni ang, ka ha tawk ve thei mai zela kekawr erawh a fual lam hret a ni. A lungawi thlâk tho tho e.

Zobiaka pawh a lo insiam peih tawh a, pawisa tih tham ka nei lo. Naktuk Krismas a ni tawh mai si a, a va ho e aw. Ka chan tâwkah lungawi thiam zir a ngai a, ka mualpho fai vek tawh ang. Nunhlua nu leh pain min diriamin min sawi phâr êm lovang chu.

Ramdini te chhungkaw lam ngaihdanah chuan mi pá ngaizawnga tibuaitu ka ni a, mi pa tih hre lova kum thum bum thlûk theih mimawl ka ni bawk. Chu lovah chuan, Nunhlua nu leh pa tân an fapa ṭhian ṭha rûksaka thlêmtu ka ni bawk, ka hmingthan dan a va mawi dawn si lo ve.

Mamit Bazar vengah Zobiaka te hi an awm a, an in aṭangin Bazar a hla lutuk lo nain kea kalna atan chuan a hla deuh. Ka lo awm tawhna hmun a nih vangin ka hrechiang ve hman viau bawk.

Field veng lamah min kalpui hmasa a, ka thlan ve ngai miah lovin a duh zawng thawmhnaw a en miah miah a, ka duh thlan ve chu pathum chauh, a bâk chu pheikhawk leh slipper chenin a thlang a, sunday dress erawh pakhat mah a tel lo. Pawisa ka nei ve miau lo a, ka Atm card ka keng tho nain ka phawrh duh lo law law.

Ama thawmhnaw tur Demin jacket leh kekawr erawh ka thlansak ve a, min râwn vang a ni, mi hmuh laia inrem lo anga awm kha thil mawi a ni miah lo, ka hmelhriat ka la hmu lo a; Zobiaka erawhin betu a nei thei hle, "In nu em ni?' Tia an zawh pawhin nui suk chungin, "A nih ve hi.." a ti liam puat.

Kan inlei hnem ngang mai, "A tam lutuk tawh," tia ka lo inrawlh ve pawhin, "Kan pahnih chiaha hman turin alawm sum ka khâwl, lungngai lo la.." a ti duh lek. 

Field veng kan chhuahsan a, Bazar veng lamah min hruai let lehin chawhmeh vel erawh keimah min thlan tîr a, thei tharlâm deuh deuh ka thlang nual. 

"Krismas tree siam ve ila, i duh em, i thiam ang em?" Tia min zawh chuan ka lungawi lohna te dah ṭhain phur zet hian, "Aw, ka thiam" ka'n tiah. Ka kokiah min kuah a, chutiang vel an zawrhna dawr lamah chuan min hruai ta a, "Pawisa lam chu lungkham vak suh, i lungawina zân tur khan thlang ang che," ka beng bulah a rawn ti sup. Ka lo nui ve tawp.

Ka thawhpui hlui Maenga nen kan inhmu fuh ta, Zobiaka phenah ka ding vat a, min lo hmu hman si. "Dingpui, i lo zin elaw.." a rawn ti hram a, "Ngaihtuah chiang mang hlei lo hian, pasal ka rawn nei a," ka tih chuan mak a ti nasa. 

Zobiaka lam a hawi a, "Ah..Zobiaka hi inpa maw?" A ti a.

"A nih ve hi.." ka ti hmiah. Pasal ûm ka nia lawm, an la hre dawn tho tho.

"Ka lo hre miah lo a, ka lawmpui a che u," nui sângin a ti a, "Lunglei lamah kan awm char char a," tia ka chhân chuan Zobiaka a nui huk. Ka en chho vat a, siai sak chungin, "Helamah Krismas kan lo hmang ve dawn a nih hi.." tiin ṭha deuhin a hrilh.

Maenga kal liam hnuah a hmaa kan boruak nuam vak lo kha a bo daih a, nupa ang chiahin kan bazara kan hlim dun ta viau. A rûka inthlahrunna ka neih tepawh a bo duak a, a va nuam mai mai e.

Ei tur lam kan lei nual bawk a, hmeichhe pakhat sâng thlarh hi kan bulah a rawn ding a, "Zo, i lo haw elaw, zanin chu i inah hmang ila," a rawn ti ham ham a, Zobiaka chuan, "Mahriat, zanin chu a rem loh hmel, kan nupain programme kan lo duang tawh," tiin min duat hmel deuh hian min en a, chu nu hmela mak tihna lo lang chu mak ka ti leh chhawng.

"Nupui i nei maw?" Hriam hraih hian a ti a.

"Apui, Mahriati a nih hi, chuan hei hi kan nu, Dingpuii aw.. Lunglei lam mi," hniam chhaka a tih tâkah chuan, "Inzêp thei ve," tia nui luiin a kalsawn ta a.

Pathian leh kohhrante hmaah 'Tiam tlat e' ti lo mah ila, nupa ni tura inzui haw kan ni tlat si. Ka duh emaw duh lo emaw, ka bialpain min ru a, sawibuai theih ka nei tam lo.

Âr pum puahsa kan lei bawk a, zing lama ka awm nawm lohna te kha chu vawmbo ang vek a ni tawh. Khawsik te chu khawilamah, ka mize pangngai harh tak ang kha ka ni leh tawh a, kan inah pawh awm ila ṭhian em em nei ta lo chu vawiin ni-a ka hun hman dan hi ka duhthusam a ni. Zobiaka'n min duat si.

In kan thlenga inbual lovin rawng kan bawl dun a, kan inbe tui tam lo. 

"Apui, tihdan ka hria.." a rawn ti a.

Ka lo en hâ a.

"Eirawng ka bâwl anga Tree saw lo chei ta che, ka pui thiam ve vak dawn si lo che a," tiin a rawn châwi phei a, "Common room leh Ṭhutkhawmna pindan inkâr awl lâiah khan dah la, a bâk chu ka lo ti ang," ka ti ve mai.

'Super Trio' krismas hla kha a play bawk a, mahni buai buaiin kan buai zawm ta a, kan inpeih meuh chuan zan dar sarih a pêl thuak tawh.

"Inbual tawh ang.." tiin ka thil chei chu a thlêk vung vung a, "A mâwi hle mai, mark 100 i hmu," tihpahin ka biang a tawk zeuh a, ka ngai haw lo.

"I ei siam a tui ve turah ngai ang," nui var var chungin ka ti ve bawk a.

A ruala inbual lam kan sawi dun lo a, common bathroom bawk ka hmang leh mai. Fai taka inbualin ka lu pawh ka su thlap a, ani erawh a room ah a lut a, thawmhnaw kan lei tharho kha a room-ah a dah lut vek.

Ka inbel tur ka la chhuak si lova Towel bih ṭât chungin dimte hian a room-ah ka lut a, Towel vengin khumah a lo ṭhu si, ka lut lui ta tho. Min en vung vung a, chutah, "Ka va han fâwp châk che," a ti sup. Khum a rawn thawhsan zui nghal a, min rawn pan hnai zela bangin min lo dan tâkah chuan, "Vawikhat chauh..Apui.." a sawi zawh rualin a rawn kun hniam a, chetsawn nachang ka hre lo.

Chhân lêt phut fahrana min fawhna chuan ka taksaah danglamna a thlen rang kher mai. A duh thawh tulh tulh a, zu rim a nâm tlata hriatna ka nei, ka thluak tih fîm tumin ka insawrbing ngial a, ani lah a chesawn duh map lo.

Thawchham dawna kan infawh hnuah, "Nupa kan nih lohna chhan tur ka hre lo, ka ta sa, ka ta liau liau i ni," ti supin min pawm nawlh a, "Zobiak..." ka lo ti thâm ṭiak a, "Apui.. min hrethiam rawh, ka tina ngai lovang che.." khumah min nghat a, ka towel bih lai a hlim chho vek, "Ka ta ni rawh aw.." chhâng lovin ka fawp ta zawk a, makti a a menphar âwk chhung a rei lo. Chutih lai tak chuan a phone a rawn ri a, a tír chuan a ngaihsak lo. A rîk zin tak em avangin, "A va han hun lo ber.." ti hawkin a tho chhuak ta nge nge e.

Ka ṭhu chhuak ve nghal a, ka biang a sa hum hum. Zu rim nam ang tlata hriatna ka neih kha ka hre sual miah lo. Dressing table kil sîrah shot glass leh zu bottle a lo awm a, zu chu a in ngei e. Mahse, a la khat ṭha êma a intam lo tih a hriat reng.

Phone a hman chhungin ka inthlâk sawk sawk a, zu hi ka in ngai miah lo. Rinkimi te khuaa loh theih loha ka in bâk kha chu ka pian leh tun inkârah hian ka la tem lova, Zobiaka hian a in ṭhin em tih pawh ka hre chuang lo.

"Mam, in lo chhoh dawn chuan kum thar ni rawh se, palai tur pawh ka be fel thawkhat tawh a, amah i be duh em?" A tih ri ka hriat chuan a dinna lam ka va hawi a, phone min rawn pe zui zat, "Hello" ka tih rualin, "Apui, kan lo chho leh ta si lo a, kum tharah law law kan tum aw, i in a ni tawh tih hria la, kan nauva kha dim hlek suh," tiin a nui a, Remruati hi chu a ngainatawm thlâwt.

"I nu leh pa rilru a na dawna nakinah kan lo haw hunah engkim a fel vek ang, thlamuang deuhin lo awm ang che, lo dam la.." a ti leh a, kan inbiak zawh hnuah Zobiaka phone ka pe a, "Eng ati nge zu i in a?" Ka ti a.

"Ka in ve mai mai, i duh ve mi?" A'n tiah.

"Duh lo mai, in belh tawh suh chaw ei ang," inti thu zeta ka tih chuan a nui ruh ruh a, "Ka zu in min khaptu tur ka nei ve ta," a ti duh lek.

Zanriah kan eikhama tih tur dang awm chuang hek lo. Ka chhungte hnen aṭangin call ka dawng lo a, biak ka tum lui bîk bawk hek lo. Zobiaka nen kan inkâr erawh a ṭang ru at thung. Boruak ṭha lo lam ni lovin nichina kan infawh effect kha a ni tih kan hre ve ve.

Zan dar 10 a pelh pawhin mut zai kan rêl lo a, a hna tlem en tur a chhuanlama a inchhawp hnawk nuai a, keimaha mut ka hreh si. A khuma va mut ngawt lah ka duh bawk si lo, ka va hah tak. 

Fridge ka va hawng a, pudding siam tur ka lei kha siam ka tum ta ringawt, ka mamawh tur ka dap kual lai chuan a hnuai ber tui bottle inremna bulah Beer Can pathum ka hmu ta a. Ka mit a la ngei mai. Hetia inbe mang lova awm ai chuan ka in mai dawn em mawni tiin ka ngaihtuah rauh rauh a, ka ngam chiah si lo.

'A hre chuang lovang' tiin tui khawihna lamah ka keng phei a, ka hawng ri a hriat loh nan tui ka herh haw ve zaih. Ka va rem hre si êm. Tui herh reng chungin tui ti lo zet hian a chanve dawn ka in khawlh khawlh a. Ka ner nasa mai. Ka luak teuh ther ther.

"Apui, eng nge i tih?" A rawn ti dút dút a.

"Pudding ka siam lawk, i zo dawn tawh em ni?" Zangkhai vahin ka lo chhâng a.

"Zo ṭêp, i siam zawhah Bike-in kan tei kual dawn nia" a rawn ti a. Bike a nei tih pawh ka hriat si loh.

A inpeih hma ngeia in zawh tumin ka Beer in bâng zawng ka va in ru leh a, ka in zo ta vek. Ka lû a hai lek lek, a bur ruak paihna turah ka buai leh ta, dustbin-a ka dah chuan a hmuh ka hlau si a, store room kil sirah ka va thukru tawp. Ka va'n ṭhing tak.

"I zawh tawh chuan inha lum rawh le," tiin choka lam pana a pen thawm ka hre zui a, ka thil siam lai ka chhunzawm mawlh mawlh a, ka zo chu a ni mai.

Ka rûi deuh tak tak. Nasa viau lo mah se, lu erawh a hai chhalh. A nuam riau.

"Hawh le.." tiin a room lamah min kâi lut a, "Ka mut a chhuak," ka lo ti daih.

"Ina awm reng i peih loh tâkah ka ti maw le, mu ila a ni mai alawm," a ti ve mai bawk a.

"Hmun danga riah sawn i la tum em?" tia min zawh chuan, rang fahran hian, "Aih" ka lo ti a, a nui huk.

Ka thawmhnaw inbel hlipin shirt leh boxer nen khumah ka lawn hmak. A hamhaih hmel chu ka en duh lo lui tlat a, a ding khawng at a, khuma ka mu chu min thlêk vung vungin, "Kawngkhar vel kan check fel ang e, tikhan lo mu rawh," a ti a, ka maimitchhing daih.

Zun chhuakin min tiharh a, bân lum thurin min kuah bet tlat bawk a, ka mumang emaw ka ti hman. Mahse, Zobiaka hmel ka hmuh tâkah chuan khatia ka mu kha ka muhil nghal tih ka hre mai.

Toilet lamah kalin ka va zung a, ka hmai te ka phih leh rih, "Apui..' min ko ri ka hriat chuan ka chhuak ve nghal mai a, khumah a lo ṭhu a, min zawng a nih hmel.

"I chau viau em ni? A vawt si mu vat rawh," a ti hluk a. 

Thuawih deuhin ka mu ve mai bawk, "I tlan bo ta emaw ka tia lawm," tiin ka lamah a rawn kun hniam a, lo thlêk sawn ka tum chuan a kut pahniha ka biang dawmin, "Min kal hlatsan i tum poh leh i hnaihah min hmu zel ang," tiin min fawp a, ka lo chhâng rang teh e. Ka mipa duh kha a ni miau a.

Ka rui la reh fel lo nen phurnain min fan chiai chiai a, kan duhthawh sâwt hle bawk. Ka taksa chul lawra min khawih kual pawhin hnialna pakhat mah ka nei lo, "Apui... i inchhir loh ka beisei," a sawi zawh rualin a thawmhnaw inbel chhun a hlip fai vek, a taksa lumna ka tem loh rualin a vawt var a, thawmhnaw inbel a bar ka lo nei tawh reng reng lo.

Pasal ûm ka ni a, ka tih tur alawm tiin ka infuih huaisen lui a, zah vak a ṭûlin ka hre lo bawk, ka thluak a fîm lo a ni ber. 

Mipa infit leh mipaah pawh pa tak a ni a, kei hmeichhia hi, Zobiakmuana zún ngah zetin min tawkin min chûl ruai reng a, tisa châknain min bual dun ve ve tih kan hria. A hnu lam tur ngaihtuaha dâwn lêk lovin pumkhatah kan insiam ta der. A thaw hawk a, kei erawh nâ tiin ka lo ner nasa.

"Sorry... mahse, ka lawm.." ti supin ka âwmbâwr a khawih zui leh zat a, nawmna aiin a nâin min fan hneh lutuka ka mittui a parawh ṭeuh. 

Dim leh duat taka ka mit fawpin, "Ka hmangaih ang chiah che hian min la hmangaih lêt ngei ang," dam thlap, thinlung nghawr dat khawpa rilin a ṭawng a, ka va hlim si ve.

"A hmasa ber ka ni a, a hnuhnung ber nih ngei ka tum bawk, Apui...Chawngdingpui," tiin amah en turin min kuai dâk a, a mitmeng thûk leh ril ruiha min duhna, min hmangaihna lang dawt zut chu ka chhiar thiam ve.

"Ka hmangaih che," ti nawn leh supin ka âwmah a hmai a phûm a, "Kei pawhin ka hmangaih che," ka lo ti ve sap.

Rang takin a rawn dâk chhuak a, "Ka sawi avang khan sawi ve kher turin ka phût lo che a nia, i thinlung tak taka min hmangaih hun ka nghâk thei," a ti nghet charh.

A hnu leh lam chu sawi thui vak ka tum lo. Nupain khum laizawla an tih tur dik tak vawi hnih dang kan ti leh a, a nawmna pawh turin zirtirtu ka nei ṭha, engvangin nge zirlai thiam thei lo ang maia ka awm bîk ang le.

Ka nulat thianghlimna ka hlan Zobiakmuana min hmangaihna hi ka ringhlel chhin eih lo. A taksa, a mitmeng, a chezia zawng zawngin a nem nghet tih ka hre si a. Ka ngaih a ṭha hliah hliah.

Beer in ṭhatna ka hria a nih ber hi. 

A hriat chhuah hunah min hau êm lo turah ngai ang. A hmuh lohvin ka nui ver ver.

Inkuah chialin kan mu a, ka harh leh pawhin min kuahtu a la ngai reng e. "Merry Christmas," nui suk chunga tiin ka biang a fawp zeuh a, a mitmeng nung sarh chu hmuh a nuam. Ka hlim chawpchilh nghal bawk.

A hmuiah ka lo fawp vat a, a mita lawmna lo lang ka hmuh hmaih lo, "Ka beisei phâk lohin ka hmangaih nen Krismas kan hmang dun dawn ta," a bâk awm thei lova hmangaihna kan chendun leh meuh chuan Zobiakmuana ta ka ni ngawih ngawihin ka hria. Hmeichhe special, mi bîk ni ang maia inhriatna ka nei a, dâr riatah pawh bathroom lamah kan la nuih tâk chiam hi. A nuamin ava hlimawm si êm.

Tûkṭhuan tur kan siam dun a, nizanah eng tham kan ei lo bawka hautak tur a awm lo. Chaw chhum a ni deuh tawp.

Zêp ṭula ka hriat loh avangin Beer chungchâng kha ka sawi chhuak ta a, "A mak, i inhmeh lo, i mak," a'n tiah.

"Min hau dawn em?" inthlahrung ru taka ka tih chuan, "Tukinah kha chuan Beer i rui lo va, nangmah Chawngdingpuii dik tak ka hmu; mahse, a lehpek awm tawh suh se, hmeichhe zu in ka ngaisang lo aw..." a ti tlang pawp.

"Ka in tawh lo ang, nang pawhin zu in tawh lo la.." ka lo ti a.

"Yes boss," tiin a khi suk.

Inkhawm ka duh leh duh loh min zâwt a, ka duh loh thu ka hrilh chuan, "Kum thar damtea kan thlen chuan kan inkhawm ve dawn nia," a ti ṭha ve mai.

Krismas hlim takin kan hmang dun a, nupa kan nih lohna chu 'Thutiam' chiah a ni ta.

Nupa nun kan duh hun leh phur hun apiangin dîp dáltu awm lovin kan hmang mai zel a, ni thum lek chhungin engkim kan ti dunin kan inbual dun a, Ruai ṭheh ni-ah erawh chuan a nu leh pa thlan kan tlawh zawh hnuah Bike-in Mamit khawchhung kan fang dun a, hmelhriat hmuh kan nei nual.

"Kan inneihna a la rei lo," tiin inthurual takin kan chhâng zel. Zobiakmuana hi a duhawm thlâwt.

31st zan erawh kan tum loh danin thil a thleng ta tlat!

Bazara kan hmuh Mahriati te ṭhian dun rui phûtin an lo lut a, "Zobiak, Kimkimi a lo haw a, hei a vui nasa teh a nia," tiin Mahriati chuan Kimkimi a tih chu a kâwk a, ani lah chuan huat hmel takin min rawn melh a, "Kei min kalsanin ani hi i rawn hruai haw a, i tenawm hle mai," a ti kha fak.

"Buaina ka duh lo a nia, ani i tih hi Dingpuii ka nupui a ni e," nelawm vak lo hian a ti a, ka bulah rawn dingin, "Kan nupaa chhuahna tur kan neia min lo hrethiam ula," a ti leh nghut.

"Zobiakmuan, i nupui aia ka ṭhat lohna sawi rawh," ṭap pûr chunga Kimkimi'n a tih leh chuan, "Ani aia i ṭhat lohna chu tuna i mizia kha maw le, bad manner aw.. bad manner a nih kha.." nui lui huk chung hian a ti a, ka la ngawi reng. An rui ṭawngah ka ngaihsak mai mai a, mahse, ka rin loh dan lutuka a rawn chêt tâkah chuan ka mize kawlh a chhuak ve ta.

Min ben tumin a phar uai a, Mahriatin chelh a lo tum chuan duh lovin a tâl a, Zobiaka an nêk tlu rawk rawk, ani a lo inring bawk si lo nen chhuatah Kimkimi'n Zobiaka a bawh a, Mahriatin Kimkimi a delh chhawng leh a, ka thin a ur ngang mai.

"A tawp nan aw.." tih leh Zobiaka hmui fawh a rual a, ka hmui ka hup tawp. Zahna an zuankahlên ve chiang hi ka tia.

Thinrim inseh ruh ṭeuhin Zobiaka'n a nam sawn dâwrh a, a hamhaih chhung a rei lo. Ka che ve phat. Chhuata Kimkimi ṭhu chu hawi sawk khawpin a hmaiah ka bêng ta a, ka beng na thawkhat a niang ka kut a thîp vang vang.

"Apui, kan room ah lut rawh, he mite pahnih hi ka'n theh chhuak ang e," a ti hem mai.

A thinrim mitmeng chu hlauhawm tak a ni. Room-a lut ta mai lo chuan ka ding ngawi reng a, ka thinrim a la reh lo. 

Zobiaka'n an pahniha a hruai chhuah laiin room-ah ka lut a, khumah ka ṭhu hnawk.

Khatiang êm êma huaisar kha hmeichhia si an awm theih ka ring ngai lo. Ka luak an ti chhuak. Zobiaka a rawn lût a, a tum bûr.

"Ani nen khan in la inthlah fel lo em ni ava rawn huaisen ve," ka ti nghat a.

"Mi beidawng duh lo a nih kha," ti chiahin min chhâng.

"I duh chuan zui rawh.." ka ti a.

"A teuh lo, duh ila nang hi ka hruai haw lovang che," a ti nghut.

"A lo nih tak chu.." ka ti leh hmak a, "Thinrim rawh, mahse, rei deuh lovin aw.." a tih chuan, a hnungah ka chûm awk a, "I hmui kha vawi sawmsarih hmun sarih i sil hma chuan min fawp hlek suh ang che," ka ti leh a, a nui kur kur, ka ngei a nia.

"Ka kal, ka sil nghal... Dingpui, tui sa nen kher sil a ngai em?" A la ti zui a, ka thinrim rei thei ta bîk lo. A inrin loh laia fawp a ni miau a, ka hmu ve vek bawk si nen ka titau thei leh ta lo, ka nuih a za zawk. An chan kha a chau lutuk a ni.

"Zanin chu kum hlui thlah nan tlem ka in ang aw..." bathroom aṭanga a rawn chhuah rualin a ti a, kei ta pek chuan, "Kum hlui thlah nan Beer ka in ve ang aw.." ka ti ngial a, a nui huk.

"Chimawm nu, Khirhi..." a ti a, kan nui leh ta nge nge e.

Kum thar kan chuangkai a, a lo sawi lâwk tawh angin Lunglei lama a hmelhriat te tîrin palâi a va kal tîr a, ka nu leh pa lo chhan dan a tawp chiang hle.

"Chawngdingpuii fanu kan nei lo, fapa pakhat chiah kan nei, a nu leh pa thu zawm lova Zobiakmuana ûmtu chuan a damchhungin kan in leh lo hi rawn rap tawh suh se," tih thu a ni. 

Ka va na si ve le.

Palai te haw hnuah Mama'n min rawn bia a, "Zawmi nen kan lo chhuk ang a, i man ka dawng dawn nia, keimah avanga khatianga awm i nihna chen a awm a, lungngai reng reng suh, i nuṭa ka nih angin i man ka dawng thiang alawm," a rawn ti hmiah.

A tawi zawngin...

January ni 15 ah Zobiaka inah Tual Upain min inkutsuih tîr ta a, mi luhlul ta ngang chuan ka nu leh pa vawikhat mah biak ka tum ta lo. Zobiaka farnute chhungkua leh ka nau Khawngaihsanga leh Zawmi, Zobiaka thawhpui tlem leh ṭhenrual ṭhate nen chawh hlui kan kîl ve ta rawih a, hrehawm ka ti lo. 

Ka nu leh pa ka ngai lo a ni lo a, an fanu tuithlâr duhna tur ema sual turu ka ti bikin ka inhre lo a ni. Mama'n engkimah min hliahkhuhin min tuamhlawma ka nu leh pa tel ve lo pawh a tlip mawi thiam hle. 

U Mami te nupa an fel bawk a, engkimah nu chan chang turin min hrilhin min fuih nasa. 

"Hun a ral anga i nu leh pa rilru pawh i nauin a lo hneh êm êm ang, rilru natah la suh, ka nau hmangaihna che hi an hriatthiam hun a la thleng ngei ang," tia min thlamuanna chuan min ti zangkhai hawk.

Mahse, ka chhungril a na tho.

Sericultura-a ka thawhpui hlui pu Lianzuala chu pa zawnah ka nei a, anni inah Mama leh Zawmi an innghat ta kha a ni a, thil ti rum rum mah ila, engkim a fel fai thung si. Ka sawi hmaih loh tur chu Zobiaka hi kei aiin kum li zetin a lo upa a, Nunhlua nen engtin nge an in kawm theih tia ka zawh khan, "Nunhlua kum dik tak chu 36 alawm, a inziak naupang a nih kha," a ti ta a, ava mak mai mai e.

Lalnunhlua hi a lem vekin a lo nung ṭhin tih ka hriat belh leh ta. A thi ta hi ka lawm a ni lo, mahse, a thihna avangin hmangaihtu dik ka tawn phah a, hmangaihna awmzia ka hriat fiah phah bawk.

Mama te an haw dawn meuh chuan amah kuah chungin ka ṭap a, "Thisen zawm nang chauh ka nei ta," tiin ka inhnît faih faih a, "Mate, lungngai mah ta che, ka nu leh pa ngaihdamna nen kan inah i lo lût leh dawn tih ka tiam a che, i nau Khawngaihsanga hian a thlahtlam dawn lo che tih theihnghilh ngai suh, ka û i ni reng a, i nau ka ni zel bawk ang," tiin min kuah vang vang a.

"Hmangaihtu dik i hriat theih nan i hmangaihte chân hmasak a ngai tih kei chuan hmânah ka hre tawh, i chénpui tam poh leh u Zobiaka lama ka ṭan zelna chhan i hre tam telh telh mai ang, Mipa a nih saw mipa," a ti nawn leh kher.

Ka thingpui in tura damdawi an telh chungchâng kha ka zawt a, "U Zobiaka chuan a duh lo a, mahse, i hmakhua ka thlir a, ka nu leh pain an thlansak che i pasal tur hming an sawi rik ka hria a, Siaha lam mi a ni nghe nghe, khatiang officer zuheh nei tura ka farnu kal tîr ai chuan min haw dawn mah la, i thinlung latu, i himna tur leh thlahthlam ve ngai lo tur che u Zobiaka nen kan ruahman fel ta a nih kha, lo ngai reng rawh, ka nu leh pa hi inchhirin an lo la kal ngei ang," inringtawk lutuka tiin ka chalah a fawp a.

"Chhel takin aw... sis.. ka rawn be fo ang che," tiin kan inthlah ta a. 

An liam chiaha ka mittui a luang zawih zawih. Zobiaka âwm nghengin ka ṭap ta hlap hlap a.

Khawngaihsanga rilru put hmang puitling lutuk kha A MAK! ka nuṭa neihchhun hian min lo hmangaih hle tih ka hriatna hian min la vêl ṭap fo dawn a nih hi...

KUM KHAT HNUAH.

"Apui, a na viau em?" Ka pasalin ka kutah a vuan rân a, ka nau neih hun tur thla hnih lai a la awm tihah ka vei ringawt. Thla sarihah nau an piang ve tho ṭhin tih hre mah ila, ka hlauthawng a ni.

Zobiaka driver Tetea'n motor a khalh a, a hnung seat-ah keini nupa kan ṭhu a, ka thâw a sa phat phat. A na lutuk êm a ni.

Ka pasalin min hnemna pawh ka hre mumal tawh lo. Insawisel zeuh zeuh ṭhin mah ila, ṭhat lohna êm êm ka neiin ka hre si lo. 

Emergency-a zai tur an tih ri ka hre reiruai a, a bâk chu a na lutuk tih chiah ka hriat chhun a ni ta.

Ka kalna kawng a kaw zel a, hnunglam ka hawi erawh chuan lêt lehna tur awm miah lovin a ping zel. Ka hmalamah kawng zau vak lo a awm züi a, ka kal zel a, a thim telh telh bawk. 

Kal ngaihna ka hriat loh laiin ka hmaah mipahnih an lo ding a, "Apui... kîr leh rawh kan hruai lêt ang che, Zobiaka i khawngaih lo em ni?" Tia min lo betu chu Lalnunhlua a ni. 

A hmêl a pangngai thlap a, Ramdini pawh chuti bawk. "I fanu leh i pasalin an nghâk che a nia, kan dah kîr ang che," tiin min lo nawr dat dat a, "Helaiah eng nge in tih?" Tia ka lo zawh chuan, "I hmangaih leh nangmah hmangaihtu hnena hruai kîr tur chein kan lokal," an sawi zawh rualin an inkâi a, min pawt deuh sawkin ka hria. 

"A kut a che a nia, Chawngdingpui harh teh..." chu âw chu hla tak aṭanga lo ri chhuak ang maiin ka hria a, men chhuah ka tum a, a rit lûk. 

"I fanu a ṭap a nia, harh teh.." mipa hlauthawng awri ka hre zui leh a, ka meng chhuak ta riai riai a.

Ka khaw hmuh a fiah tial tial a, ka awmna room var vûk chuan mit men ati harsa. Ka pang leh ka tum a, a mu churh churh. Chutah, "Apui... ka Chawngdingpui.." mittui far fap chunga lo kun hniam ka pasal hmel chu ka hmu ta a.

Ka dang a ro bawk nen "Tui" ka ti sap a, ka khum bula ṭhu te an che suau. 

Tui tlem min intîr hnu chuan ka harh ta deuh. Damdawi in khumah ka lo mu a, ka nu leh pa, Zobiaka, Mama leh u Mami te an lo kim ṭhap.

U Mami chuan naute a pawm a, ka harh chiang ta hle.

"Mate," Khawngaihsanga aw ka hriatin ka va en a, Zobiaka erawh ka khum bawhin ka kut a vuan a, min en ngat ngat.

"Khawnge Nunhlua te kha?" Ka ṭawng chhuah theih hmasak bera ka hming lam chuan ka kianga mite a ti hrilhhai hle.

Doctor a rawn lut a, "Muhil leh lawk rawh se, hlauhthawn tur eng mah a awm tawh lo," a rawn ti a.

An ngawi ṭhap. 

Eng nge ka chungah thleng pawh ka hre mumal lo. Damdawi eng emawin min rawn jection a, ka chhing leh ta a.

***

Naute ṭap riin min ti harh a, ka harh chiang ta kher mai mai. Damdawi in pana kan tlan laite, emergency-a zai tur tih vel chin ka hre chhuak uar uar.

Nunhlua leh Ramdini pawh ka hmuh tak kha maw le. "Kan hruai kîr leh ang che" tia min nawr lai thlengin ka hre chhuak vek.

Ka harh tih hriain ka nu a rawn tho chhuak nghal a, "Mate, i harh tiraw..ka fanu..." tiin a inhnît zui hlawp hlawp a, u Mami'n naute ka bulah a rawn mut tîr a, "I fanu hi en ve tawh rawh le," a ti a, a nui sâng thung.

Naute ngo leh te fel rân mai chu ka en theih turin an rawn dah a, a hmelṭha nge ṭha lo ka hrethiam lo, a ngo em em a ni tawp.

Ni e, kei hian fanu ka nei ve ta a ni e, a pa Zobiakmuana ngei a ni bawk.

Khatia Emergency-a min zai khan ka thi pût an ti tawp hleithei lo a, kârkhat leh ni thum zet nikhaw hre lovin ka lo awm a nih chu. Thisen unit 10 zet min pêk hnuah tun hun hi ka thleng leh ta. 

Nunhlua leh Ramdini kha hre chhuak rauh rauh. Sawi chhuah chi ah ka ngai lem lo.

Zobiaka mangangin ka nau a han bia a, a tîrah chuan ka nu leh pa an hrilh lo. Mahse, ka harh theih tâk si lovah chuan Mama zawkin a vaua vau chungin a hau nek a, an rawn chhuk ta a nih awm hi.

Ka pa phei chuan min hmu hreha a inthiam lo em em a, ka nu pawh chuti bawk. Mahse, an thu awih lotu ka ni ve tho a, an inchhir hmel ka hmuhin ka rilrua helna awm kha a reh hmak.

Ka nu leh pa an ni miau alawm. 

Zobiaka nen kan nupa khumah kan mu a, damdawi inah kâr thum zet ka awm hnuin niminah kan chhuak thei chauh a.

"Apui, thi leh dam kara i han awm chiah kha chu ka tliak vek, ka nâ a ni." A ti thlâwt.

A biangah chûlin, "Nunhlua leh Ramdinin min rawn dah kîr leh a.." tiin ka thil tawn mumang ang ruaia ka hriat chu ka hrilh chhâwng a, awih deuh awih lo deuhin mit a khap sak sak a, "Chutah, kei pawh ka hmu asin, ka mumangah, ṭhiana, keimahni avanga in tawrhna leh Dingpuii mualphona a reh hma loh chuan in kiangah kan awm zel ang, in inhlat a thiang lo aw.." tiin min lo bia a, ka chhân hmain kan naute ṭahbelh hian min ti harh alawm" tiin a sawi ve ta a.

A M@k! 

Kan tana an ṭhat loh teh lul nen keini pahnih kan inrema ka hminghliauna a reh hma loh chuan min hnaih si ang maw? Thlarau mak tak chu an lo ni e.

Dimtea min fawpin, "Khatiang hrepa i tawrha kan tawrh leh âi chuan fâ neih leh chu sîrah hnâwl ngam ang aw.." tiin a fiamthu zui ta a.

Thei leh thei lovin ka lo nuih le ta.

Kan fanu hming atan ka pain Zosangmuani a phuah a, thlakhat zet kan hnena an awm hnuin Lunglei panin an haw ta kha a ni a. Mama leh Zawmi pawh kum tawp lamah 'Tiam tlat e' tih an tum ve ta.

Hnathawh ka nei lo a, ka pasal leh kan fanu hi ka hna an ni mai.

U Mami te chhungkua erawh hna nei ngang an ni a, an châm rei thei lo a, Mama erawh ka nu leh pa haw hnu fe-ah a chho chauh. Ka ngai a nia.

"Ka nupui i ni hi ka lawm, i pasal ka ni thei ta mai hi A MAK thung," tiin min kuah hlu hlu a. 

Zobiakmuana hmangaihna neih hi a nghet charh charh a nia...

Thihna hian inhmangaihte a ṭhen hran rualin inhmangaihte vêk a suihzawm châng a awm ṭhin.

Kan dam chhung hunah hian kan duh miah loh leh tum miah loh sual thûk tak bawihah pawh kan tâng thei. Siam ṭhat theih tawh lova thihnain min tlânkhalh hun tur hre lâwk kan awm lova. Duhthlan theihna khawvela kan awm lai hian duh thlang fel ang aw. Chu chu khawvela kan awm ve hlutna a ni. Duh thlan theihna khawvel a nih vangin.

"I siam ṭhat theih tawh loh tur sual kawng dâi tawh mah la, thih hnu piahlam ram thlir chungin i tun hun uluk rawh. " 

Thlarau khawvelah inchhanhimna tur a awm tawh lo.

     B+>[BeckirafARenthleI]<+®®

  021222

Ka thawnthu min hlutsaka min chhiarsak/ ngaithlaksak tute chungah thinlung takin lawmthu ka sawi e.

Ka châwl rei deuh tawha felhlel leh intuha ho deuh a awm a nih pawhin 'A mak' lo ti ve zêl rih mai rawh u. 

Gracias Amigo

-B®®