25. KA CHANPUAL [A Becky Rafa Story]

25. KA CHANPUAL

Ziaktu: Becky Rafa Renthlei

-B®®

(Recap)

Ka pa leh Thlamuana'n damdawi in lamah ka nu an tlânpui dawn a, kal ve ka tum deuh kha a nia, "Bawihpuia nizan lamah a chiang bîk si lo a, inah lo awm mai rawh u, chanchin ka rawn sawi ang," Thlamuana'n a ti a, ka hnial ta lo.

Hmanhmawh taka an tlan chhuah dawnah ka nu ka va bih hrâm a, a awm ngai rengin a la awm. Nikhua a hre lo tih a lang reng a, ka pa malchungah a lu nghatin ka pa pawh a hmel a buai nak.

Eng vanga khatia awm ngawt nge a nih ang. Nizanah bawihpuia kan tlanpui tawh a, tunah a pi nikhaw hre lovin a awm leh a, a mak hle mai.

Ka nu Biakliani chuan eng êm ati lo turah ngai ang.

-B®®

Kan hmalam hun tur minute 1 lek sawi lâwk thei kan awm lo a, kei ngei pawh hma hun suangtuahna hlimawm tak tak nei ṭhin ka ni. Mahse, tuna ka dinhmun leh ka tawrh zozai te kha hre lâwk ni ila, u Mapuia ka hnaih dawn si lo va.

Damdawi in lam aṭangin chanchin kan la hre lo a, Atuni leh Atei ka hrilh ve ve tawh a, an tan tun chûk chûka lo haw a rem loh avangin a rang lama lo haw theih dan tur an dap tur thu an sawi.

U Ropuia hnen aṭangin auMami chanchin thar ka hre tawh a, PWD a thawk pathlawi zu heh deuh inah a lo awm chu niin! A tîra an han hmuhna tak chu Pûkpui dâiah a ni a, chu pa nen chuan zu an lo in dun a, ka u in hruai haw a tum pawhin a duh lo fithla ṭhak a ni awm e. 

U Ruata ngaihdan ni lo lutukin, "Ropui, hawsan ang, in Zothansangi hi chu mihur zilh ang chauh a ni, a duh chen chen tikhan awm tir la a tawpah a lo haw leh tho ang," tiin u Ropuia a hrilh a, an hawsan ta a nih ber chu.

AuMami hmingpum hi Zothansangi a ni a, kei Zomuanzuali ka ni thung a, kan naupan deuh lai chuan, 'Zothan, Zomuan' tiin min ko a, kan eih rual ṭhin. Mahse, ka nu leh pa min koh duatna ang hi kan pu hlen ta zawk a, 'Nano, Mami' tih a ni mai. 

Tiang êm êma a han che ṭawp ta mai hi a awihawm loh ka ti a. A rilru a buai a nih ka ring rum rum, a sual ropui mai si a, ka khawngaih ru bawk.

Ka fapa paw chungin chanchin ka ngaicháng reng a, Thlamuana te lam an reh vung vung.

Chawhnu dâr hnih a ri ṭêp tihah min lo call ve ta hram a, a nu a harh tih a sawi chuan ka lo thaw huai. Sualin min mil lo viau mah se, khatia a han awm kha chuan rilru a ti hrehawm pha tlat.

"Bp Sâng leh Zunthlum a lo nei a, a zunthlum hi a sâng riau a, engtin nge ni ang aw, ka pa ringawt awm tîr chi a ni si lo a," Thlamuana'n a rawn ti a.

"Tunah engtin chiah nge a awm?" Tia ka zawh chuan, "Step-a a tlûknaah khan a insawh na angreng a, a bp leh zunthlum sawi tel lovin a Khêl a sawh a, result a la chhuak lo, a ṭha vak lo a ni maithei," rilru hah hmel takin a ti a, ka khawngaih ang reng.

"Thil i ei tawh em?" Tia ka zawhin a ei loh thu a sawi a, "Ei tur ka siam anga Diki ka lo thawn dawn nia," ka lo ti a, "Novi, intibuai duh suh, helaiah kan lo inhnawh puar mai dawn nia, ka pa a haw duh si lo a, a buaithlak," a ti nghut a. Bawihpuia a ṭhat leh ṭhat loh min zawt leh a, a dik tak chuan inchhungkhur ngaihsak kawngah u Mapuia hian Thlamuana a tluk lo tih nitin ka hre thar zel.

Ebenezer-lamah an in admit emaw ka lo ti a, BN Hospital Kulikawnah zawk an lo kal daih a, tunah ka hre ve chiah.

A theih ang angin kan room ka thian fai a, sawi tawh angin Thlamuana hi a che pawlawh ve a, a thawmhnaw a zam zul zel. A thawmhnaw ṭhenkhat Delhi lamah a la awm chung pawhin tihtham fê a nei tho. Suk tur te ka thliar a, U Mapuia che fel thlup mah se Thlamuana anga thuneihna âwkâ a nei lo. Mi thunun theihna riau hi kan Thlamuana hi chuan a nei tlat. Zu a in leh keuh ṭhin erawh ka ning.

Zanriah ei turin ka pa a lo haw a, amahin ka nu riahpui a tum thu a sawi.

A khêl ruh a sawh pelh a, a kal thei lawk dawn rih lo tih te, a zunthlum a sâng viau a, a vâi ruai tih report a pe tel a, amah pawh a zawiawi ruih mai. "Pa, Thlamuana lo haw sela keiman ka riahpui mai dawn em ni, mipa âi chuan hmeichhia kan ṭangkai zawk a," ka lo ti a, min en vang vang chung hian, "Bawihpuia a ngaihtuahawm lo'ng maw?" A ti ṭha mai a.

"Thlamuana a awm chuan kei aiin a ti thiam daih zawk," ka ti a, "Thlatea chu keiman ka lo be dawn nia," a ti ta a.

Zanriah kan eikhama ka pain Thlamuana a bia a, ka pa thlen phei hnuah Thlamuana a lo haw rih ang a, kei riak turin ka kal ve thung ang. Hetia ka tih kherna chhan chu a hna khawih zawh loh a la nei si a, ka lo chhâwk ve theihna a nih vang pakhat a nia.

U Atei pawh naktukah Mamit aṭangin a lo haw dawn a, Atuni kan beisei ngam rih lo. A thawhnaah Car loan pek chhuah runpui an nei a, an buai hle tih a sawi. Bâkah, lo haw hi a châk lutuk lo niin ka hre ve mai mai.

Thlamuana rawn thlen laiin Masangi chanchin ka hrilh ve a, ka ṭhian neihchhun a ni miau a, Kulikawnah an awm avangin remchâng dawn riauva hriatna ka nei bawk.

"Novi, ka inthlâkna tur lo dah chhuak teh," tia Thlamuana'n min rawn koh chuan phone dahin a thawmhnaw dahna ka pan nghal a, a thu te hi ka awih sâwt a nia. 

Towel vengin a rawn chhuak a, a taksa huh hluam chu hruk hul pawh tum chuang lo hian dârthlalang hmaah a ding a, ka lo en reng.

Nui suk chung hian, "I mit a tla ang e," a ti a, lehlam ka hawi hmak.

"Damdawi ina riah chu i hreh lo maw?" Tiin min zawt daih a, ka hreh loh thu leh hmeichhia kan ṭangkai zawk tih ka lo sawi a, "Zanin chauh riak la, ka hna hi ka lo ti zo ang a, ka rawn chhâwk dawn che nia," a ti ta a, ka lo bu nghat.

Chumi hnu chuan Diki kutah Bawihpuia kan dah a, kan pahnihin BN hospital lamah kan inphur phei ta a. 

"Ka nu hi hun eng emaw ti chhung chu a kal theiin ka ring lo a, i laka a rilru put hmang hre tho mahila, dawhthei taka kan enkawl a ngai dawn aw," tiin min hrilh a.

"Sual lo se a ṭha a ni mai," ka lo ti nghauh a, ani lah chuan, "A sual tho ang, a mil lo laklawh che a nih hi.." a ti liam puat.

Damdawi in kan thleng a, ka nu hmel ka han hmu chu ka lainat ru viau. A maimitchhing tlat a, a muhil an tih avangin ka be lo.

Thlamuana te pafain min hawsan dawnah, "Zomuan, thil danglam a thleng a nih chuan min lo call vat dawn nia," ka pain a ti a, Thlamuana pawhin, "In lam chu rawn ngaihtuah duh suh," tiin ka chalah a fawp zauh a, ava ṭul lo thei e. Ka pa a awm ve reng si a, nuam ka ti lo.

Damdawi in khuma mu ka nu Biakliani hmel chu ka en vang vang a, an ina ka luh tirh laia min ṭawngkhum dan te, rosum duh avanga pawisak nei lo taka a chêt tawh dan ka ngaihtuah kual zut zut a, amah hi ka haw ṭhin. Mahse, hetia a han mut ve tâkah hian khawngaih thlâ a la a, a thi thut ang tih ka lo hlau ve ringawt. 

Cabin-ah kan awm si lo a, ka ṭhu tlaivar a ni hrim mai. Zinglam hma takah a rawn harh ta a, min hmu thut chu mak a ti hle a ni ang, "Nangman elaw min riahpui," a ti zawi raih a, a zun an siak vek a, buaipui ngai lutukin a awm lo.

"Ka pa leh Thlamuana in lamah an awm a, ka pa tan damdawi in boruak a hrisel lo a, Thlamuana pawh hna khawih zawh loh a nei si a.." tiin ka hrilhfiah a.

"Bawihpuia a ngaihtuahawm lo em ni, i ngaihtuah viau ang tiraw?" A ti leh a. 

"A patea a awm alawm," ka ti sap a.

Thei leh thei lova nui chung hian, "A ni teh tak e a, a patea hi a pa a ni tho alawm," a ti ve ta a, ka lo nui tawp.

A rilṭâm thu a sawi vangin doctor phal chin Diabetis Sorazo ka siamsak a, amah ṭhu chhuaka ei thei ni hek lo, ka barh hial a ngai a, nuam chu a ti vak lovin ka ring.

Ka Pa rawn thlen laiin ei tur kan lo inpe fel tawh a, "Zomuan, mutna ṭha a awm si lo a, i chau ngawt ang," a ti ve ngial a.

Nui chung hian, "Damlo riahpui ka nia mut ṭâlh ka tum lo aw," ka lo ti a, ka nuin min melh zuk a, "I pa a awm tho a, va haw rih ta che, ka harh ṭha tawh alawm," a ti dam thliam a. A hmel a chul ve rupin ka hria.

Mahse, chuti maiin ka hawsan thei bik lo. Test ngai leh X-ray vel tih a ngai a, ka pa ringawt han awm tîr chu thil tih chi a ni lo hrim hrim. 

Thlamuana'n min rawn be miah lo a, Diki zawkin tukinah bawihpuia damdawi pêk dan tur min lo zawt a, a bâk in lama mi te nen kan inbe zui tawh lo.

Damdawi in Canteen-ah ka inhnawh puar ta vel mai mai a, ka pain pawisa min pe ve ngei, ka la duh lo dawna mahse, min pe lui ṭalh a, ka lâk ve tâk kha.

Tlailam dar nga dawnah u Atei a rawn thleng a, zanin min riahchhawk a tum a.

"Nano, in inah pawh ka rawn pêng lo, ka hmanhmawh lutuk a, chaw ka bar sawk sawk a, ka rawn tlang tawp," a ti a. A nu hi an lakah ṭha lua lo mah se, an ngaihtuahzia ka hriatchian phah.

A tlai tawh deuh si a, Taxi a vâng pharh mai. Thlamuana ka call a, a pick thei bawk si lo, zanriah ei hun vel a ni a, Diki pawhin phone a chhâng thei chuang lo. 

A tawpa tawpah Two Wheeler Taxi pakhat ka hmu ta hlauh a, ka haw thei ve hrâm dawn e.

Kan in kawtah ka chhuka u Mapuia Bolero a awm lo a, ka pa khan a keng pawhin ka hre lo. Inchhunga ka lut chu a lo reh diak, Diki ka ko a, nau paw chungin a rawn chhuak a.

"I lo call lai khan bawihpuia ka awi mu laklawh lutuka ka lo chhâng hman lo che a nih kha, en teh ka thin a rim lutuk," tiin a room-a lut turin min pawt nawk nawk a.

Ka ṭawng ve hma hma hian, "U Thlatea ṭhiannu a lokal a, an chhuak daih, bawihpuia lo awmpui lawk rawh a ti a, kha nu kha a zak thei lo si.." a ti hlaih hlaih a, an kalna tur an sawi leh sawi loh ka zawt a, eng mah an sawi lo a ti bawk si.

"Tikhan lo pua la, ka inbual zuai anga chaw kan ei ve dawn nia" ka ti ta a. Ka nu chanchin min zawh pawhin "Nakinah ka sawi ang," tih bâkin ka chhâng lo. 

Kan room-ah ka lut a, awi awi, a hnawk lutuk ringawt. Niminah ka tifel vek si a, ka huat ber zawk chu Beer can ruak leh ei tur bâng nawi tla nuai ka hmuh te chuan ka thin a sa zak.

Vawiin chhun lamah Thlamuana a che hle tih ka hre mai. A zualpui ka tifai thuak thuak a, nizanah ka mu mang si lova ka awm hahdam ang chu tih laiin ka thin a ur takzet.

A nu damlo ka riahpui a, in lam ngaihtuah lo tur te khan min hrilh ve bawk a, a sawi zak lo hi ka tia. Bawihpuia Diki bulah a dah nileng tih hriat reng reng, Phâiah a awm tam lutuk a nunphung a hre lo a nih hi.

Ka inbual zawh meuh chuan zan dar sarih a pel tawh a, ka thinrim êm avangin ka biang a sa vek thei. Ka fapa ka lâk chhawk a, a la harh bik lo. Ka haw hma deuh lawka muhil a ni tih a sawi a, chaw erawh a lo pe fel tawh thung.

"Vawiinah tu nen nge inah an awm?" Tiin Diki ka zawt a, "A hming ka hre bik lo, sânglam deuh a nia, bawihpuia pawh a pawm ve, a hming ka zawt ngam hleinem," a ti bawk si.

"Hna a thawk lo tihna mi?" Ka ti leh a.

"Ka chho lo hrim hrim a, eng nge an tih ka en lova ka buai êm a ni," ṭha takin a ti a. Dâwt min hrilh ka ring lo.

Chaw kan ei kham a, ka nu awm dan leh u Atei a riah dawn thu ka sawi a, "Buaipui ve vak duh suh, bawihpuia enkawl i ngai a, bâkah i lakah a sual em mai," a ti a. Ka nui ve tawp. 

Ka awm hma daih aṭanga lo awm tawh a ni a, an zia a hrechiang ve thawkhat.

Zinglama inbawl tam vak ngai lovin a theih ang ang kan siam lâwk a, Diki bialpa deuh reuh, Tlana a rawn len tâk avangin inchungah ka chhohsan ta rih a, Thlamuana biak tumna ka nei lo a, ka missed call a hmu ṭeuh ang, chuti chung pawhin tun thlengin min call back lova ngaihven vak ka tum lo.

Ka pa nen rei deuh kan inbia a, phone a neih tawh loh avangin u Ropuia phone aṭangin min rawn bia a, a hriselna a ṭhat leh deuh thu a sawi bâkah auMami chungchang te a sawi kâi a, ka sawi thui vak duh lem lo. 

Thla thar tawp lamah u Ropuia palâi an tirhsak dawn tih a sawi tel a, ka lawm rualin ka nu leh auMami ka ngaihtuah a, Faki tan a hrehawm dawn hian ka hre lutuk a, sawi theih lah ka nei ve der si lo.

Ka pa a rawn haw tawh a, chanchin zawt turin ka chhuk leh ta rih a, a chauh hmel khawp mai. Inthlahrung ru deuh tak hian, "Pa, ka nu chu eng nge a an?" Ka ti sap a.

"A Bp chu a zia tawh a, a zunthlum pawh a hniam ṭan. Mahse, a khêl ruh a ti khawlo a, wheelchair a hman rih a ngai mai thei," hniam ruiha tiin khumah a ṭhu a.

"Hrehawm ti miah suh, a ṭha leh em em ang," tiin ka hnem ve ngial a, ṭawngkam te hi ka thiam lo siah. Ka ning.

"Thlatea'n hna a thawk em ni?" Tia min zawh chuan, "A chhuak," ka ti sap a.

"Ani pawh hi puitlin lam pan a hun tawh, zû te hi a duh lutuk a, khak ve la a ṭha ang, " dam thluama tiin inbual a duh thu a sawi a, ka chhuak ta a.

Diki leh Tlana an ṭawng tui angreng si a, inchungah bawk ka chho leh ta daih a.

Ka fapa nen khumah kan mu a, Thlamuana lo chho thawm ka hriat rualin bangkil lam ka hawi daih a, hmeichhe ṭawng niawm tak pawh ka hria.

"Zanin bâk hun kan nei dawn si lo a..." tih vel a ni nawk a, u Mapuia room-ah an lut tlang a nih ka ring. An reh ta vang vang a.

Ka sawi ve phâk awm lo mah se, a nu damdawi inah a awm a, a hnathawh a zawh vat theih nan ka fapa ka riahsan a, a lo ngaihthah leh hle si.

Ka insûm thei ta ngang lo a, khum thawhsanin u Mapuia room-lamah ka phei ta a.

Kawngkhar an khar phui lo a, 'kan in alawm' tih pahin ka pên lut ta a, u Mapuia room phei hi chu ka intitatu em em ṭhin, 'Kan room' tih ngatin ka sawi zel. Couch-ah hmeichhe pakhat nen zu no an lo dawm a, dawhkanah file a let rum bawk a, min hmu ve lem lo.

Chunu chu en chiang lo mahila Angela a ni tih ka hria, Thlamuana thawhna hluia an pu fanu kha a ni a, Mizo dik tak an ni lo a, a pa vâi, a nu Mizo a ni.

Hrawk ka thian kharh a, an lo hawi rang khawp mai.

Angela chuan min rawn nuiha Thlamuana zawkin min en chîk hle.

"Novi...hna kan thawk lawk dawn," a ti sup a, rui ang pawhin a lang lem lo.

"Ka call nasat tehreng che nen i phone kha eng atan nge i tih?" A hmaa min tih ang chiah khan ka ti lêt ve sak a.

Nui huk chung hian, "Vawiin chu phone ka khawih lo," a ti sup a.

"Thlate, i u nupui hi in hnenah a la awm reng em ni?" Tia Angela a ṭawng chuan ka insum thei lo ṭêp a ni.

Dam thlap hian, "Angela i dam maw," ka ti a. Mak tiin min en hau mai.

"Delhi-ah Thlamuana nen ka hmu dun tawh che u alawm, tikhan inkawm rawh u," ka ti a, Thlamuana en chung hian, "I duh chuan khatah khan i riak thei aw, kawngkhar ka kalh dawn a nia," ka ti hmak thung a, a ner nawk.

Ka inhera ka chhuak tur chu, "Novi...ka rawn phei har lo ang," a ti nghut a.

Kei lah chuan khum lam melhin, "Sawtah sawn mu rawh," ka ti nghauh a, ka chhuak zui ta a.

Chhe lutuk. Nupui a nei tawh tih Angela kha a hrilh lo nge khatia ngampa lutuka a ṭawng ni. Zungbun te pawh a bun ve a, nge, ani hian a lo thukru daih zawk? Ka va ensak leh hrâm náng a!

Ka sawi ang chiahin kawngkhar chhung lamah ka kalh hmak a, ka fapa bulah inthawlhin ka maitmitchhing zui daih, Thlamuana nupui ni mahila, u Mapuia ka thinlungin a theihnghilh tlat si lova engtin pawh awm se, ka thikin ka sawisel tur a ni lo.

Ka thil ngaihtuah avang chuan ka meng leh a, 'Thîk' tih ṭawngkam khan min dêng dawt nimaiin ka hria.

Thlamuana ka duh lova ka hmangaih leh min hmangaihtu chu u Mapuia a ni, chutianga hre reng tur chuan ka infuih ru sauh sauh a, kei hian Lalthlamuana hi ka duh tur a ni lo. Kan inneihna hian kum hnih chauh a huam tih ka hre bel em em tur a ni.

Mahse, hmeichhe dang bula zalen taka a awm ka hmuh khan ka chhungrilah che dat a awm. Â...ka duh lo, ani kha ka duh thiang lo a ni tawp.

Muhil thei lova ka men kar lai chuan Thlamuana'n min rawn ko dút dút a, dar 12 a pel thui tawh. 

Che duh lova ka mut ngar ngar lai chuan kawngkhar a rawn chhuih ta bur bur a, bawihpuia a harh ka hlau si. Ka mu lui dawn ngial a, pawisak nei lo lutuka a bengchhen reng avang chuan ka tho chhuak a, ka va hawng ta nge nge.

A rawn luh rual rualin, "Eng nge i hriat a, bawihpuia a mu tih i hre reng sia," ka ti vin ṭhak a.

"Ka rawn mu dawn maw le," a ti nghut a.

"I u khumah va mu rawh.." ka lo ti a.

"Zomuan, hei hi kan nupa room a ni tawh a, Mama khumah ka mu dawn miah lo, hetah, kan khumah ka mu ang," ti hmuk hmukin khumah a ṭhu a, a thawmhnaw a phelh zawm zat.

"I bialnu bulah khan va mu rawh.." ka tih chuan, "A haw tawh, nidangah ka la riak dawn nia," a ti kher a, ka sa phat. "Kal rawh, tunah va riak rawh..hetah kan mamawh lo che," ka ti hlawk hlawk a.

"Ṭawng tam vak zel suh, ka ning a nia," a ti a, zu rim nam mah se, a rui lo tih ka hre mai.

Ṭawngkam khat mahin ka chhâng tawh lo. Khumah ka lawn a, ka fapa kuahin ka mu hmak. En pawh ka en peih lo.

Thlamuana hnaih loh hram hram dan ka zawng tawh ang. A ṭul fe a nih loh chuan ka fapa pawh a kutah dah ka tum tawh lo a, nikhat lek ka awm lohsan pawhin hmeichhe dang kiangah a kalsan duh a nia, a huatin ka haw hlur.

Ni thar kan chuangkai a, damdawi inah bawihpuia nen kan kal nitina zan lamah u Atei a riak ziah a, ka nu pawh wheelchair nen in lama a haw theih tur thu an sawi a, a zunthlum erawh check ngun turin min chah a, ei leh inah a insûm a ngai tih an sawi tel.

Khami zan kan inhnial zan aṭang khan Thlamuana ka hêl char char a, a châng phei chuan zanah pawh khuma mut loh zeuh zeuh ka chîng. Keimah ka nu-tê a, Semi Sofa-ah ka mu mai zel. Mahse, Thlamuana leh bawihpuia muthilh hnuah a ni tlangpui.

Damdawi ina a kal pawhin min sawm ngai lo a, kei pawh a lo haw hnuah Taxi-in ka kal mai zel. 

Kan boruak midangin hrethiam lo mah se, u Atei a fing a, min zawt chat.

Angela lokal thu leh an awm dan, Thlamuana zu in chungchâng ka hrilh vek a.

"U Ate, a luhlul zia ka hria a, u Mapuia vanga min nei a ni bawk a, a duh anga zalenin hun hmang teh se, a duh chuan ngaihzawng pawh nei rawh se," ka ti hmiah.

"Awi, in ninawm hi ka ti lutuk. In inneia ka lawm tehreng nen, insiam ṭhat in tum si lo a, nang pawh mahni pasalte ngaihzawng nei rawh se tih mai mai, a puitlin loh thlâk lutuk, inrem hrâm hrâm teh u, inbuaina pakhat ka nu nise khuti khu a ni a, Mama kha a lo tho leh dawn lo, Thlatea hi i pasal tak tak zawk a ni tih hi pawm thiam tum teh," tiin min zilh hrep.

"Rilru mumal pawh ka pu thei lo.." ka ti tawp.

Damdawi in aṭanga ka nu a lo chhuah ni-ah u Atei te nufa in chaw an rawn ei chho a, Thlamuana'n a va hruai chhuak ta kha a ni a, Angela kan zingah zanriah a kil ve a, ka chaw ei a tui lo vek.

Kei min ngaihsak chu khawilamah, Angela a be sek a, chaw ei hmain rei fê u Mapuia room-ah an inkhung bawk a, an thil tih tur ka rin hriat mai.

Ka nuin dawhkan a kil ve lo a, ka pa nen an room-ah an ei daih bawk si a, a va hrehawm mai mai e.

Diki pawh a túm bûr a, u Atei mi â ni hek lo. Kan nufa min ngaihsak viau. "Nano, bawihpuia kha engtikah nge in hlan dawn kha?" Tiin min zawt a, "Tun Sunday hian," ka ti sap a, Thlamuana'n min en zuk ringawt.

Angela leh Thlamuana Hindi -in an inbe vel a, ka va ei lo tak.

"In hlan hunah ka inkhawmpui dawn che u nia," a ti a, a fanu Dindinin haw a ngen zing si a, chaw ei kham veleh an chhuk ta a.

"Thlate, hei hi maw innu chu?" Tiin Angela chuan Thlamuana a zawt a, "Unm.." a lo ti dút a. 

"I u nupui emaw ka lo ti pek a, Sorry.." a tih laiin ka tho nalh a, Diki mitmei chung hian pawnah ka chhuak daih. 

Ka thaw halh a, Bawihpuia âwi pahin veranda-ah ka tei kual a, "Nano, ka piin a ko che," Diki rawn chhuakin a ti a. Thlamuana te awmna ka zawta inchungah an chho tawh tih a sawi chuan ka lut ve chauh.

Hna an thawk dun tih chu ka hria. Mahse, zu an in tel ziah kher hi ka rilrem zawng a ni lo.

Ka nu leh pa room-ah ka lut a, "Zomuan, Thlatea khan khawia hmeichhia nge a rawn hruai luh?" Tia ka nuin min zawh chuan, ka hriat ang ang ka hrilh a. Thinrim ang pawhin ka lang chuang lo.

"Hna an thawk duh a nih chuan thawk rawh se, hmuh mawh tur a awm ka ti lo a, mahse, Zu nen an chawhpawlh kher hi a ṭul vak lo. A nupui i ni a, khak hreh rêng rêng suh," a ti ta a.

"Thlamuana zu duh lutuk hi ka kham, a in lo thei reng si a," ka ti hlak a.

"Tunah chuan keini sawi aiin i thusawi a zawm zawk, zaninah hau ngei ngei ang che, nupui nei a ni tawha a tlangval lai nun kha chhunzawm tawh suh se," a ti a, Bawihpuia ka puak lai chu melhin, "Zu nam reng bula bawihpuia mut tîr te kha a khawngaihthlak, hrilh ngei ngei ang che, i sawi ngam loh chuan keiman ka hau tho ang," a ti leh a.

Tun ṭum chu min khak lo hlauh. Min ṭan ta tihna pawh a ni chuang lo.

Inchunga ka chho tur leh Thlamuana te pahnih rawn chhuk mêk kan in tâwk a, en pawh ka en lo, ka chho tlang hmiah hmiah. Zanin chu a chelh rei lo ve teh tlat a nih dawn kha.

Ka sawi tawh ang khan tun Sunday hi kan nau hlan hun tur kha a ni a, hetianga Thlamuana nen kan inkâr a awm zel chuan u Atei te ruala kal ka duh daih zawk.  

Ka inbual laiin a rawn chho a ni ang, thlanglam veranda-ah phone a hmang a, a sawi erawh ka hre fumfe lo.

A hnu daihah, "I zo dawn tawh em? Zankhuaa inkhung i tum em ni?" A rawn ti a, "I ṭawng peih mai mai e a," ka lo ti a. A ngawi zui ve mai bawk a.

Room chhunga ka luh chuan Sofa-ah a lo ṭhu a, paper eng emaw hi a keng bawk a, min en lem lo.

"Bawihpuia pa hmingah Mama hming ka ziak a nia," a ti sup a.

"I ziah lovin a pa a nia lawm.." ka ti hmak.

"Ka hre ve reng" a ti leh lawi a.

"Nupa kan ni tawh a, Lalnunfima hian tunge a pa tih a hre lo, a pa emaw ala ti dawn che, chutiang a lo thlen hunah chuan tuna u Mapuia hming kan dah chuan zawhna tam tak kan dawng dawn a hnen aṭang hian, i ngaihtuah thui ve ngai a nih chuan nangman duhthlanna siam rawh," dam thlap leh nghet charhin ka ti ta a.

Rei fe a ngawih hnuah, "Ka fapa a ni a, a patea ka ni tho bawk a...a nu nen nupa kan nih avangin ka fa chu a ni tho a," tia sawi buai nakin a ngawi zui daih.

"Kei chuan atu ve ve hming pawh dah ula, ka sawisel lo, thisen zawm in ni tho alawm," ka lo ti mai a.

"Mama hming kan dah ang?" a ti ta a.

"Eng ati?" Ka lo ti hû...

"Mama khan Lalnunfima lo hi fa dang a nei dawn tawh lo, a hmangaih ber nena a fa neih chhun takmeuh a ni a, a hming luah-lana ka hming ziah ka duh lo hulhual, Pathian zarah nang leh kei chuan fa kan la nei thei a, Mama hming dai tur hi ka phal lo a ni e," a ti hmiah.

Ka lo rindan chuan Lalnunfima pa hmingah ama hming ziah a duh ka ring deuh kha a ni a, ka hmai min zah vang ni lova a u hming luahlan tu nih a duh lohna hian min tilawm hle.

Min nawrin a hming dah duh tlat pawh nise ka hnial dawn lo a, mahse, ka duhthusam ang sawi chhuah ka hreh si a rawn sawi fel ta thlup hi lawm loh chi rual a ni lo.

"Ka lawm e aw.." ka ti a.

"Lawmthu lo sawi sek ṭhin suh, Lalnunfima pa chu Lalrinkima(L) tia ziah mai tur. A pa leh a patea ka nihna angin nakinah nikhua a hriat hunah ka la hrilhfiah ang," inringtawk takin a ti ta a.

"Novi...nang nen hian fa kan nei ve dawn em?" Tiin min zawt thut a.

"I rui em ni?" Ka lo ti a.

"Rui angin ka lang em?" A lo ti puat.

"Nei lo mai ang aw, Angela nen khan nei rawh u," ka ti leh kher a, a nui hawk.

"I rilru lo siam ang che, tisa inzawmna a tel loh chuan nupa kâr a nghet thei lo," thutak zawka tiin chîk zet hian min en a.

"Kum hnih chhungin nghet em ema awm a ngai em ni?" Ka tih chuan, "I duh dan a nih a hnu, ka duh tawk ta e, a hmingin nupa kan ni ang a, i duhdanin awm la, ka duh danin ka awm ang, min sawisel suh ang che," a ti hmiah mai.

Nuam lo ka ti leh si.

"Engtia awm nge i tum a, zu hi chu in tawh suh, a ṭha lo, nangma hriselna atan pawh a ṭha lo," ka lo ti nawn leh a.

"Nupui tak tak nihna dinhmuna i awm dawn loh chuan min sawisel ve tawh suh, hria maw.." ti nghutin khumah a lawn zui nghal a.

Ka nuin zilh tura min hrilh ve te kha chu an thlâwk bo vek tawh. Biak zawm ngam loh khawpin a hmel a dur a, a sual a chhuah hi chuan a heti tlat zel si.

Hemi zan aṭang phei hi chuan kan nunphung a inthlâk dawrh. Kei tih loh a chhungte a ngaihsak em em a, inah a awm tlem khawp mai, a nu enkawl tur daily nurse a la hmak bawk a, ka âwl letling.

Zanlamah ni se khumah a mu a, kei Sofa-ah ka mu tlang parh a, ka fapa a ṭahin ka ngaihven leh tawp a, min be ngai lo tih theih a ni.

Sunday a rawn thleng a, inkhawm turin a vawikhat nan ka insiam ve ta. U Atei khan min inkhawmpui tur thu a sawi a, mahse, ka nu a zia ve deuh tâk avangin Mamitah a chhuk leh si. .

Lalnunfima hlan lova awm ka ngaingam ngang si lova, ka insiam peih vek hnuah pawh Thlamuana a la insiam lova, a la hma deuh tho nain kea kal a ngaih tâkah tiin ka inpeih hma viau.

"Thlamuan.." tia ka koh chuan min en chuang miah lovin, "Umn.." a ti dút a.

"I inkhawm ve dawn lo em ni, insiam tawh la.." inthlahrung lutuka ka tih chuan, "Inkhawm turin min duh em, nangmaha kal chu i zuam leh si nange.." a ti hmuk.

"Chutiang pawh a ni lo," ka tih laiin a ding hluai a, "Nang hian i mamawh hunah chiah min nawrin min be ṭha a, fa neih pawh ngam chuan a pa tel lova din pawh i huam mai tur a ni, Mama a thi tawh, kei chu min mamawh tak tak lo," tinghut chung hian a chhuak zui daih a, ka ṭah a chhuak lutuk.

Ni e, a sawi dik vek. 

A beisei angin a lakah ka awm lo a, mi nêp leh mi tihlawm pawh thiam lo Zomuanzuali ka ni e.

Bawihpuia ka paw lawp a, ka kal tho ang, hlau leh khur chunga din ngai mah se, ka pallui mai ang.

In chung aṭanga ka chhukin a lo reh ruai mai. 

He in hi ka tan ṭahna thlentu leh lungngaihna thlentu mai a lo ni e.

Kein Biak in lam ka pan hnak hnak a, dâr rik a la hun lo deuh a niang ka hmaah pawh kal an awm ve nual.

Hmanni lawka kan inkutsuihna Biak in ka thlen chuan mi an lo zi nak nak a, hmelhriat han biak tur pawh ka nei îk lo.

U Duhsakin min lo hmu hmasa hlauh a, ka va han lawm tak. 

Ṭan a hun tâk avangin ka lut ve ta a, bawihpuia hian thla riat a pum tawh a, a rualpui an awm tawh meuh lo, thla thum, thla nga, tih bawr vel vek an ni a, a hnute hnektîr pahin ka pawm ve rân a, ka hawi chhuak ngam lo hrim hrim.

Ṭan hun an hmang zo a, chutih lai chuan, ka ṭhutna sír aṭangin, "Tawlh rawh," tia rawn ṭawng ri ka hria a, ka tawlh ve mai.

Ka bula rawn ṭhu chu tudang ni lovin Lalthlamuana lek! Thinrim hun a ni lo tih ka hriat ve kar avang chuan ka ngawi ngal a. 

A ṭawngkam khan ka thinlung a tihnat êm avangin melh pawh ka melh peih lo.

Nau hlan programme an ṭan a, ka fapa hming pawh an lam ve ta.

Khur dar dar chung hian bawihpuia ka pawm a, mahse, Thlamuana'n a rawn la vat.

"Ka nau duh tak Lalnunfima. Pathian leh a kohhran te zingah i lo tel tâk avang leh Pathian beramno..." tia an chham lai chuan ka mittui a tling pam mai.

U Mapuia hlir ka rilruah a awm a, ani nen kha chuan inpawh leh inngeih takin he hun hi kan paltlang dun dawn asin. Ka fapa pawmtu Thlamuana ka melh zauh a, rilru ka siam thuai a nih loh chuan ani nen hian engtikah mah inpawh leh inngeih takin kan awm thei tawh hian ka ring lo.

Tluang takin ka lo nghahhlelh leh rinnaa ka lo thlir ve ka fapa hlanna a zo fel a, inkhawm banah pawh Thlamuana ngaichang miah lo hian ka kal lam ang chiahin kein ka haw leh a.

Thui pawh ka la kal hman lo, ka zâwnah Thlamuana a rawn ding a, ama Car a keng teh tlat.

"Novi..rawn chuang rawh.." a rawn ti a.

Ka kal lui zel. 

Zawimuangin ka sîrah a rawn tawlh zel a, ka va ning tak.

"Zomuan, miin min en ṭhup a nia," tiin min rawn be leh a, "Keimahin ka haw thei.." ka lo ti nghat.

Chutah Car tidingin, amah a rawn chhuk ta a.

"Ṭha taka sawia zawm duh lotu chu tihian a ni mai," tih leh min pawm a rual a, ka lo ṭe ṭhat. Bawihpuia chawpin min pawm a, min la zo em em lehnghal! Car kawngkhar bulah min nghat a, kan luh theih nan a hawng a, ka ṭhu lut a ni nghal mai.

Hnunglam ka hawi lêt a, inkhawm bângin min lo thlir nual chu niin, ka va han zak tak.

"Zaninah nang leh kei hi kan inbia ang, tlanchhe hlek suh ang che, tuna i awm dan ang hian i lungawi a nih chuan ka ngaihven zui tawh lo ang che, chuti ni lova keini pahnih inrem leh inpawh taka kan awm i duh chuan i thluak kha hmang la, ka nupui tak tak ni turin i rilru sawrbing ang che," tia a sawi zawh hnuah chak zetin a tlan chhuak a, ka thin a lo phu dut dut.

A nupui tak tak ni tur hian ka inpeih em, nge tihian damlai hremhmunah awmin ka tâng reng zawk dawn. Kum khat leh thla hnih dang  hi hetianga hrehawm hian ka paltlang leh dawn em ni?

Ka pasal, Pathian hmaa ka thutiampui a nih ang hian a lakah ka inpe tawh mai dawn tihna nge?

Mahse, min hmangaihin ka hre si lo. Kei ngei pawhin ka hmangaih thei bik dawn em ni?

280123

Shadow of the life

B+>[BeckirafARenthleI]<+®®