26.KA CHANPUAL [A Becky Rafa Story]

26. KA CHANPUAL

Ziaktu: Becky Rafa Renthlei

-B®®

(Recap)

"Zaninah nang leh kei hi kan inbia ang, tlanchhe hlek suh ang che, tuna i awm dan ang hian i lungawi a nih chuan ka ngaihven zui tawh lo ang che, chuti ni lova keini pahnih inrem leh inpawh taka kan awm i duh chuan i thluak kha hmang la, ka nupui tak tak ni turin i rilru sawrbing ang che," tia a sawi zawh hnuah chak zetin a tlan chhuak a, ka thin a lo phu dut dut.

A nupui tak tak ni tur hian ka inpeih em, nge tihian damlai hremhmunah awmin ka tâng reng zawk dawn. Kum khat leh thla hnih dang  hi hetianga hrehawm hian ka paltlang leh dawn em ni?

Ka pasal, Pathian hmaa ka thutiampui a nih ang hian a lakah ka inpe tawh mai dawn tihna nge?

Mahse, min hmangaihin ka hre si lo. Kei ngei pawhin ka hmangaih thei bik dawn em ni?

&&&

Inkhawm bana ina min dah hnu khan Thlamuana a bo zui hmak a, a kalna awm ang tur pawh ka ring chhin thiam lo. Motor a keng bawk si lo. 

Diki kutah ka fapa ka dah a, Thlanmual lam panin ka kal ve ta a. Thlamuana khan a thu lova kal a remti chiah lo naa vawiin a fapa hlan-ni-ah hi chuan a pa thlan tlawh ngei ngei ka duh, inbunruah ka duh ti ila a dik zawk ang. 

Thlana kal an lo awm ve neuh neuh bawk a, u Mapuia thlan bul hnawk te ka then fai hnuah, keima hriat tham lek hian, "I nau kuta min dah chhan hi hre ve tal ila, ngaihngam takin ka awm mai tur, eng ati nge hetiang thil harsa lutuk hi i tih kher kher le?" Tiin ka phun sap sap a.

Thlamuana leh hmeichhe dang ka hmuh dunin ka chhungrilah kertu a awm a, ani hi ka lo duh ve tawh tihna em ni? Â..a ni lo ang. 

"I fapa pawh thlakua a tling ṭep tawh a nia, u Mapui..keini nufa tan hian khawvel hi a hrehawm ngawt mai," tia ka ngaihtuah lai chuan ka phone a rawn ri a, u Ropuia a lo ni.

Thlanmualah ka awm tih ka hrilh a.

"Mate, Mapuia ngaia khatianga a thlan tlawh fo kha thil ṭûl ber a ni lo a nia, Thlatea tan pawh a tha nat thlak ve dawn asin, hmanni lawkah thu in tiam a, i chhungrilah Mapuia dah lian mah la, Thlatea hi ngaihtuah tel ṭhin rawh, i fapa hmangaihpuitu che leh hliahkhuhtu che a nih hi," a rawn ti duah.

"Eng atan nge min lo call a?" Tiin thildang ka zawt daih a.

"Palâi tirh kan tum ta a, kan buaina ber chu Mami bawk hi a nia, hetianga a tâl hiar chho zel a nih dawn chuan kan chengho thei lovang tih ka hlau khawp mai, ka nuin chintawk awm lovin a ṭan bawk si a, ka pa heti hi a ni tawha ruahmanna fel fai tak ka siam a ngai dawn a ni," a rawn ti a, auMami chungchangah a lungawi lo hle tih ka hre mai.

U Ropuia hian a hmain nupui a nei tawh a, an nu a uire tâk hnu khan hmeichhe lam a ngaihsak zui ta miah lo kha a ni a, hetia nupui neih leh hial a duh ve hi chuan Faki kha a hmangaih hle a nih ka ring. 

"AuMami chu vengthawng duh reng reng suh, a nun hi a sim mawh em mai, ka pa thu ngaichang la, chu chu a tawk chiah," tiin ka lo fuih ve a.

Kan inbiak zawhin a tlai ta deuh bawka in lam ka pan ve ta a, Thlanmuala kal hi zawng beisei tur a tlem em mai. A beidawnthlâk.

Ka nu Biakliani wheelchair nen a lo ṭhu chhuak ve mial a, an room a chhuahsan khât khawp mai.

"Zomuan, Thlatea nen in chhuak dun na nge?" min hmuh rualin a ti a.

Kan chhuah dun loh thu leh u Mapuia thlan ka tlawh thu ka lo sawi a.

"I tan Mama theihnghilh tikni a awm dawn lo.Mahse, a nau nupui i ni tawh tih hi inpawm rawh, Mama kha a lo tho leh dawn lo a nia," dam thlapin a ti a, "Thlamuana a lo la haw ve lo em ni?" Tia ka zawh chuan, "A kalna chin sawi lo hian chhuah nulh a ching a, inrem tum rawh u," a ti ve mial a.

Diki leh ka fapa an lo lan tak avangin kan sawi zui ta lo.

Zanriah ei hunah Thlamuana a rawn haw ve a, inchungah a chho tlang nghal daih.

Ka nuin, "Han zui chho rawh, lungawi lohna a nei em ni?" A ti a, sawi thui lovin ka zui chho ve mai bawk.

A thawmhnaw dahna hawngin a lo phawrh mêk a, eng chu hria nimaw! Ka thawm a hre lo nge a thiltih lai a chhunzawm mawlh mawlh a.

"Thlamuan..." tia ka koh chuan min rawn en zawk a, lehlam a hawi leh nghal daih.

"Naktuk hian Delhi-ah chhuk ka tum a, ka rawn lêt leh lawk tawh lo ang," a ti ta a.

"Maw, naktukah i zin dawn maw?" Ka lo ti hú a.

Ka hmazawnah a rawn ding a, "Zanin aṭang chuan in nufain in mu tawh dawn nia, Mama room-ah ka insawn phei dawn," a la ti tak deuh deuh a, sawi ber tur pawh ka hre lo.

"En teh, khatianga riah sawn kher kha a ṭha lo a nia, a mualpho thlâk, kan inneihna a la rei lo si," ka lo ti a.

"A dik chiah. Chuan, mualphona tur engmah a awm lo, ka room-ah pawh kan mu tlâng ngai chuang hleinem, zan reia i mu hrang ṭhinte hi ka hre lo emaw i ti ang e, Zomuan, mi â ka ni lo aw.." a ti chang fak.

"Ih..eng lo..riak sawn lo mai rawh, ih..ka mu hrang tawh lo ang," bah naka tiin hnuailam ka bih zui daih a.

"Lungngai suh, zanin bâk kan inah hian awm ka tum tawh lo, ka nu enkawltu tur Nurse a awm a, Diki pawh a awm bawk a, kan ina i chên chhung hi chu Delhi lamah ka lo awm ang e, tunhma pawhin hetah ka awm ve ngai chuang hleinem," a ti hmiah.

"Thlamuan..eng nge i hriat a?" Ka ti chhuak hliai a, ka ṭah te a chhuak zawk. A tel lovin eng tin nge he inah hian awm thei se min tih, a nu leh pa rilru a hrechiang hle si a.

"Engmah hriat belh ka duh lo a nia, naktukah hian Angela nen kan chhuk ang, i duh dan danin i awm thei aw, amaherawh chu, Mama lehkhaa inziak kha theihnghilh lo la, kum khat leh thla hnih tling lo deuh i la chen ve a ngai tihna a nih chu. I zalen har lo vang.." ti leh kherin a thawmhnaw u Mapuia room lamah a pawm phei a, ka zui ve zel.

"Angela hi i hmangaih em?" Tia ka zawh thut chuan, chîk zetin min en a, "Hmangaih thei ila ka ti khawp mai.." a ti sup.

"I hmangaih lo maw? Chuti si.." tia ka ṭawng mêk laiin, "Hmangaih leh duh dang ka nei a, Mama pawh khan min hriatpui.." a tih chuan ka lo mengphâwk nasa mai.

"U Mapuia pawhin a hriatpui che maw?" Ka lo ti nawn sap a, hmangaih leh midang duh neia a insawi khan ka chhungril hi engtin emawni a awm. Ka inthing nak a.

"Hriatpui e, Mama khan engkim a hre vek, chhuak tawh rawh, mahnia awm ka duh," a ti hmuk a.

"Aih, zanriah ei lova awm tum leh ringawt suh.." ka ti a.

"Ka ei dawn alawm, Angela te inah ka ei dawn," tih pahin towel a la a, ka ner sak.

"Sunday tlaiah ei chhuak lo ang," ka lo ti ve tlat a, mit zimsana min en chung hian, "Ka duh dan dana ka awm a thiang, ka tih tur leh tih loh tur min hrilh tawh suh, sawi dun tur kan nei tawh lo," ti hmuk hmukin min ngaipawimawh lo zet hian bathroom-ah a lut daih.

Angela bulah ka kal tîr nguar ang. Eng tiang pawhin dan ngai mah se, a chhuak tur a ni lo tawp, kei min hlatsan a tuma zin bo a tum a nih chuan ka dang ngei tur a ni.

A thawmhnaw thiar phei ho zawng kha a vaiin kan nupa room-ah ka pawm lêt leh vek a, min hniala min lo dang tur amah ber a inbual daih alawm.

A hnathawh tur inchhawp zawng zawng pawh ka thiar phei fai vek a, u Mapuia chahbi ka kawl kha phawrh chhuakin hawn theih loh tur hian a wardobe leh lehkhabu dahna nen lam ka kalh hmak. Theih phei se chuan a room te hi kalh vek a nia ka duh.

Khuma Thlamuana Jeans dah chu banin ka dap vat a, ka rin ang chiah, a wallet a lo ak ngei a, hmanhmawh lutukin ka chhuahpui ve ta a. A thil pawimawh chu hetah hian a awm nual, a card bakah a Id tih vel pawh, keimahin ka nui ta var var a.

Bawihpuia chaw ka hraisan daih, ṭawng a zir ṭan a, a ri ve nasa thei a nia, sawi theih a la nei lo mai pawh a. A sam hi Thlamuana thu angin vawikhat mah kan la cut lo, a kir kawi kual em em a, suksak a duh lo thei si ka ning a nia. Mahse, a patea thu kan hnial ngam si lova a pu ve rih mai a ni ang chu.

Zanriah kan kil a, ka ei ṭan chiah tihin Thlamuana a rawn chhuk a, ka pain a lo be vat, "Thlate, rawn kil ve nghal rawh, inah te hian awm tam tur, nupui fanau nei i ni tih inhria la," a lo ti a.

"Ka chhuak dawn hleinem, ka inbual lawk a nih kha.." tiin a pa a chhâng dam thlup a, a va han dawthei tak. Angela te ina chaw ei a tum tih a sawi reng si a.

"Zomuan, inpa chaw ei siamsak ve nghal rawh le," tia ka pain min tirh chuan Thlamuana ka va melh zeuh a, min lo en ve kur. 'Inpa' han tih kher kha ka lo zak. 

Chumi hnu chuan pangngai takin zanriah kan kil a, hmun hnawk kan tihfel laiin Thlamuana'n bawihpuia a pawm a, a pite room-ah a kalpui tain ka hria, Diki thleng sil sa ka rempui a, nichin khan a zin tur thu a sawi lang leh miah si lova a va hrilh dawn tepawh a ni mahna.

Dik tak chuan Thlamuana tel lova he in chhunga awm hi ka duh lo, ka nu Biakliani ka ngam lo nasa mai si a, Thlamuana zin tur dan ngei ngei ka tum bur. 

Min zin san fo a, tuna a zin tum dan erawh lungawi loh vanga awm bo tum ni-a ka hriat vangin ka theihtawp chhuaha dan beh dan ka dap a ngai. Ni e, hmangaih a nei a, duh pawh a nei a, kei min neih tâk avang hian a nunkhua a buai ve vek tih ka hria, a khawngaihthlak ve tho.

Kan nupa room-ah ka chho a, ani pawh nau pawm chungin a rawn chho ve thuai a, "Ka wallet khawiah nge i dah?" Tiin min zawt chat.

Lu thing nar nar chung hian ka hriat loh thuin ka lo chhâng a, ka thuk ru ve chauh a, chutia pêk lêt leh mai ka tum teuh lo.

"Zomuan, min pe ṭha hle hle mai teh," a ti nghut.

"Aih.." ka lo ti tlat a.

Min nin hmel zet hian, "Ka chhuak duh a nia, min pe rawh," a tih leh lai chuan, "U Mapuia room-ah i riak dawn lo aw, i thawmhnaw pawh ka sawn phei vek tawh a nia, chuan, naktukah i zin dawn lo bawk," intihuai luiin ka ti ve hmak hmak a.

Za lo zeta nui lui chung hian, "Kan hria ang chu, min dan han tum chhin la.." a ti duh chauh.

Bawihpuia khumah a ṭhut a, "A hming chauhvin nupa kan ni tih i hriat kha, kan room-ah hi chuan mitmei ven tur pawh a awm hleinem," tih leh Jacket ban a rual a, a phone a ri ve chiah bawk.

"Angie, ka lo chhuk dawn aw, rawn chho duh suh.." tiin phone a off a. Chhuah luih ṭâlh a tum tih a hriat mai.

"Ka kal a nia, i duh chuan kawngkhar hi chhunglamah kalh rawh, ka lo haw lo maithei," ti leh puatin, bawihpuia ṭhu chu a biangah a fawp a, "Tlangvalte, thu lo awih rawh aw.." tiin a wallet pawh min dil lo hian a chhuak ta a. Ka va han ngei mai mai tak. Kha nu bulah khan ka kal tîr dawn lo hrim hrim.

Ka fapa ka paw sawk sawk a, Thlamuana kal hmaa nan hman ngei ka tum.

Kan in kawtah Angela nen an lo ding dun a, Angela car-a chhuah an tum tih a hriat mai.

"Thlamuan..." tia ka koh chuan a rawn inher ta a.

"Kal lui suh.." ka ti sap ringawt. Nui hawk chung hian, "Zomuan, inchhungah lut rawh.." a ti ram hmuk.

"Kal lui suh ka tih chu, i kal lui a nih chuan Masangi te inah kan riak ve ang," ka ti ve ringawt a, Angela zawk a rawn ṭawng chhuak ta a, "Thlatea nen tih tur kan nei," a ti nghat a, min melh no viau lo.

Ka thin a sa ve phat.

"Tih tur in neih leh neih lohah ka buai lo, ka pasal a ni a, a nupui ka ni bawk, kal lo tura ka hrilh a nih chuan a zawm mai tur a ni, Sunday zanah eng hna mah thawh tur in nei lo," ka ti ta hrep a, Thlamuana insangmar ṭawlh ṭawlh chu ka hmu reng. Mahse, ka ngaipawimawh zo tawh lo.

"Zomuan...inchhungah lut rawh ka tih chu..." thinrim insûm taka a ṭawng chuan, "I ngam chuan kal lui rawh, eng nge ka tih dawn i hre mai ang," ti nghauh chung hian Angela rum zetin ka melh a, nuam lo ti hmel a pu ve deuh chuan ka hria.

An kal lui ta nge ta lo pawh ka hre lo, inchhungah ka lut daih a, ka mittui vangin ka khaw hmuh a phê vek. Tlawm ka inti a, khatiang khan tu mipa mah ka la ti ngai lo. U Mapuia ka rilruah a lo awm a, hmeichhe dang ka tan thîk tur an awm ngai lova, kei pawh atan rinawm takin ka awm tawp a, Lalthlamuana ve hi chu, zu leh hmeichhia nen a tâl a, ka haw hluah hluah.

Ka nu leh pa an room-ah an awm tih ka hriat avangin Diki room-ah ka phei a, min hmuh veleh, "Masangi te inah riah i tum em ni?" tiin min zawt a, pawna ka thusawi kha a lo hre ve tih ka hre mai.

"Hetianga Thlamuana a awm zel chuan Lungleiah ka la hawsan daih ang," ka ti ve ngial a, ka haw thei lo tih ka inhre ru reng tho.

"Nangmah pawh hi insiam ṭhat i ngai, u Thlatean a duat tehlul che nen tinge in inkâr hi hla deuh dú a ka hriat tlat ni, in inpawh lo ka ti," a ti chhuak phawng. Ka nui ringawt.

"U Vanlalthara te inah rei lote kan va leng zawk ang a, i lokal ve duh em?" Tia Diki ka sawm chuan, "Duh lo e, va kal rawh u, mahse, pi emaw hrilh la," a ti ṭha mai. Bu nghat chung hian ka nu leh pa awmna lamah ka pheisan ta rih a.

Ka nu pawh khumah a lo mu fel leh ât tawha hetia a damloh hnu hian a zia a paih ṭhen hlek hleka kei pawh min ânkhum khât ta deuh. Sum leh pai chungchang pawh a sawi ri khât a, Bawngkawna in luah man a hui thung.

U Vanlalthara te inah ka leng dawn tih ka sawi dêk dêk a, "Zana chhuah a ṭul lo, inah awm mai mai rawh u, Thlamuana chhuak pawh eng tih thu loh," a ti hluk hluk a, ka sawi nawn ngam ta lo.

Kan nufain inchungah kan chho leh ta hna hna a, Thlamuana a chhuak lui ta tho a nih hmel.

Masangi ka call a, rei fe kan inbiak hnuah, "Inpa leh hmeichhe pakhat vawiinah ka hmu a," a rawn ti ta a, eng ang hmelpu nge tih ka zawh chuan, a sawi ve mai. Mahse, a sawi dan hmangah Angela a nih loh hmel, Aizawlah hian a hmeichhe duh a sawi kha a awm tihna em ni dawn? Â..ninawm ka ngaihtuah thui peih lo.

"School chawlh hunah ka rawn leng dawn nia," a ti a, kan inbiak zawhah pawh zan dâr kua a la ri lo. Tih tur hre lovin ka tei kual a, ka fapa a muhil tawh bawk si.

He in lo hi 'ka in' tia sawi ve tur ka nei der si lo. Kum khat ka awm tling ve ta ṭêp mai. Atuni leh u Atei ka ngai a, Thlamuana chungchang han sawipui ka duh nen vui peih lutuk anga min hriat ka duh bîk si lo, anni chu thisen inzawm an ni a, an inṭan ru ṭhêm tho.

Thlamuana lehkhabu dahna hawngin ka en kual a, u Mapuia lehkha hnutchhiah a hmaa ka chhiar tawh kha a lo awm a, rang taka lain ka chhiar nawn leh vek. Mahse, eng nge ka hmuh tel hi!

Envelope pakhat zawk chhungah chuan ka hminga inziak lehkha dang a la awm tel cheu a, hei kher hi chu ka la chhiar miah lo tih ka hria, ka ta tur leh Thlamuana ta tur kha chu ka chhiar ngei; ka phawrh chhuak sawk sawk a, khumah ṭhuin uluk deuh hian ka chhiar ta a.

"Nano, he lehkha i hmuh hi chuan kan inpuiah kum hnih i awm tling tawhin ka ring." Tih ka chhiar hmasa phawt a, kum hnih hnua ka dawn tur a va nih hmel.

Mahse, ka hawng ta sa sa, ka chhiar lui ta tho a.

"Ka nau Thlatea'n zana a fawh ṭum che kha i la hria ang a, kha thil kha ka hre lo emaw i ti ang e, engkim ka hria aw. Tihpalh thilah i ngai tih pawh ka hria a, a ni lo a nia. Ka nau Lalthlamuana hian a duh che a, inthup tum eng ang mah se, mipa ka nih angin leh ka nau mizia ka hriat chian êm avangin damdawi ina i lokal ve loh ṭumin ka zawt ta a ni.

Nang chuan min hmangaih a, ka nau lakah rilru kâwi i pu lo tih ka hria. Chutiang chiah chuan Thlatea pawhin a û lakah hian rilru chhia leh kâwi a pu hran lo a. Nang a lo duh ve che hi pawi a tih thu a sawi bawk. 

Thlatea thlazar hnuaiah ngaihngam taka ka dahna chhan che chu, ka hmangaih ang chiah chea hmangaihtu che a nih vang a ni. 

In nufa hmakhua ka thlir a, hun rei ka nei tawh si lo. Nano, kan fapa leh a nu mihrang kuta rethei taka an kal hran âi chuan ka nau kutah ka dah ta zawk che a ni. Ka lakah inthiam lohna nei lo la, a mawhphurhna hlen chhuaka i hmangaiha i duh ve hun tur nghâk chhuak turin ka nau ka hrilh asin. Inhmangaih nân hun rei a ngai lo, kum hnih chhungin a thleng vek hman..." tih ka chhiar thlen lai takin, "Zomuanzual..." tih leh ka lehkha ken lai Thlamuana'n min rawn phih thlâksak a, ka phu nasa lutuka ka âwm ka dawm tawp.

"Tu thuin nge he thil hi i chhiar?" Thinrim lutuk hian ka hrawkah a rawn rék a, a mitmeng rum úl leh hriam hrâkah chuan min that duh hmel a pu alawm maw le.

Thei leh thei lo hian ka lo tâl a, min vawnna a thlah thut rualin khumah min nem ṭhu hnawk!

"I kuang lo i nawr mah mah tawh a ni, he lehkha i chhiar hian man a nei aw, Zomuanzual, a man i pe dawn khawp mai," ti leh supin khuma ka ṭhu chu min pawt ding leh nawk a.

Ka hlauh êm avangin ka thâ a khur ru dar dar thei nia.

"Nichinah khan Angela hnenah ka nupui i nih thu leh i pasal ka ni tih i sawi tiraw, nupa chu nupa anga awm tur, i duh emaw duh lo emaw ka nupui tak tak i ni dawn zaninah hian," thinrim awki hniam ruiha tiin bawihpuia mu chu a thlêk zuk a, chutah, min pawm nawlhin min chhuahpui ta a.

"Thlamuan..." ka lo ti thâm ṭiak a.

"I cho chhuah liau liau a ni e," ti sup chung hian u Mapuia khumah min nghat chawrh a, ka lo râk ṭhat.

"Hetiang chuan ka duh lo, tilui suh," tiin ka lo indang ṭâwk ṭâwk a, "Ni lo e, nupa kan nihna hi ataka nem ngheh a ngai a nih hi," tih pahin khumah a rawn lâwn a, ka kut pahnih chunglamah a hmer kawp a, a hmuiin ka hmui a rawn sîk rual chuan hawisawn tumin ka lo thle kual sek a, a rûm dut ringawt.

Theihtawp takmeuha ṭang ka ni bawka a duh angin a che thei bik lo. Ka mitthlâah Delhi-a u Mapuia chêt dan kha a rawn lang a, insûm hman lêk lo hian ka ṭap chhuak ta phawng a.

Ka awm dan teh thut avang chuan ani pawh hrilhhai zetin a awm thung a, a che zawm tawh lo. Ka ṭap khur ngat ngat a, chesawn lo hian khum sîrah a tawlh phei a, min khawih emaw pawh a tum tawh chuang bik lo niin a lang.

Ka ṭah chhuak zualpui a reh hnuah khumah ka ṭhingṭhi a, Thlamuana lam hawiin mit bui châk chung leh inhnit faih faih chung hian, "I duh ang chuan che rawh le," ka ti sap a, ka kawr hâk lai hlipin rang zet hian ka kekawr hâk pawh ka pawt phelh zui nghal a, a thaw hawk ri hre mahila ka haider lui tlat.

"Novi..." a ti sup a, mitmeng dul ruih hian min en a, "I nupui dik tak anga ka awm theih nan chêt la rawh le," tiin a ṭhutna lamah ka tawlh phei hret a, ka ṭah pawh a chhuak tawh lo.

"I thawmhnaw inbel rawh.." a ti hluk a, ngawi ngal chung hian, "I duh ang chu ti rawh, ka dâl dawn hleinem che," luhlul takin ka ti ve tlat si a, chalsam tuai puat chung hian, "Zomuanzual...min va han tihrehawm ṭhin tak," tiin a lamah min pawt hnai sauh a, ka ṭang der eih lo.

Ngun lutuk hian min en a, dam thluamin, "Eng ang hmeichhia chiah hi nge i lo nih le, heti em ema ka duhna chhan che hi, ka hrethiam bîk lo, ka thiam loh a ni lo," ti buai nukin ka âwmah a hmai a rawn phûma a mittui a tla thânin ka hria.

"Thlamuan..." ka ti sep a, min chhâng lo hian nghet takin min kuah a, nichina ka lehkha chhiar ami kha thudik tihna a ni thei mai ang em? Thlamuana hmeichhe duh leh hmangaih hi ka ni tak tak ang maw!

Min la kuah reng chung hian a rawn dâk chhuak a, "Mama hmeichhia keiin ka lo duh ve thiang si lo, Novi..ka tan hian a khirh asin. Mahse, ka chanpual chauh ni turin ka duh che.." zawi ruihin a ti a, a tukkhumah dimte hian ka lo chûl a, chu veleh uar leh duhthawh lutukin min rawn fawp ta a, ka lo maimitchhing tawp.

Min fawh dan a dam telh telh a, phût lêt a nei bawk.

"Ka ta ni rawh, midang tan ka phal lo che," tia insiamremin min pawm nawlh a, kan nupa room lamah min pawm phei leh si, ka thawmhnaw inbelna hun pawh a awm tawh lo, a nghawngah ka lo kuah chial a, a nui lek lekin ka hria.

A hnu leha thil thleng chu ka rinphâk bâk a ni ta.

Lalnunfima muhil a pawm sawn a, Sofa-ah ṭha te hian a va muttîr a, ka lo nui hak hak a. Tun huna ka tlanchhe leh a nih chuan Thlamuana hi ka ban phâkah a awm tawh dawn lo tih ka thinlungin a hre tlat a ni. Pathian hmaa ka thutiampui a ni a, inthiam loh chhan tur ka nei hek lo.

Kan nupa khum ngeiah tisa châkna ni lovin rui lo hai lo hian Thlamuana nen pumkhatah kan insiam ta, u Mapuia ngaihtuah loh hrâm hrâm ka tum ve tlat a, Thlamuana hmel thim mãk chu chhoh melhin lái zet hian ka nui sak a.

"Ka nghâk rei êm che asin Novi...Mama tana Pathian ruat i ni lo a, ka Chanpual i nih theih nan Mama kha a lo lang hmasa zawk a ni. Ani kha ka thîk lova ka u ni mah se, a boral hmain engkim kan sawi dun hman. Lehkhaah i chhiar kha," tiin duat tih hriat lutuk hian min kuah a, min hmangaih thu a sawi lo nain min kuahna ringawt pawh hian ka thlâ a ti muang si.

Zinglam dâr khatah kan inbual dun a, ka zak tih hriain, "I engkim ka hmuin ka hre bel tawh, i thinlung ka neih theih nan eng chena rei pawh nghah ngai mah la, ka nghâk zel ang che,'' nghet charhin a ti ta a.

"Ṭawng reng suh.." nui chunga ka lo tih chuan, "Ka ṭawng loh chuan ka duh che a ni tih i hrethiam thei ngai si lo alawm, chêtzia pawhin ka lan tîr tam tawk, i â chhi chhe êm a ni..." an tiah. Za deuhin ka nui ta hak hak a.

Khuma kan mut leh hnuah, "Delhi-ah i kal dawn si a, Lunglei lamah kan lo va zin khawthawng ve ang aw.." ka ti zauh a, a ner nasa mai.

"Ka awmna hi i awmna tur a ni a, i awmnaah pawh ka awm ve zel tur a ni, tunah min duhin min hmangaih nghal rawh ka ti lo, Mama dam lai aṭang tawha dawhtheihna nena entu che hian i inpeih hun ka nghâk thei a nia," tisup chungin ka mitah a rawn fawp a, ani hi chu a caring ṭhin rêng a ni.

"U Mapuia khan min duh a ni tih engtin nge a hriat chhuah?" Tiin ka zawt ta a.

"Ka hre mai bik lo. Atuni nen inchhuah ni khan min zawt a, zêp awm lovin ka hrilh ta a nih kha, i la hriat reng chuan khami tlaiah pawh Garage-a ka awm nangman min rawn koh kha, a tîr chuan Mama thin a ur hle a, hun rei fe kan inbe hleithei lo," tia a sawi lai chuan a hun lai ka lo ngaihtuah lêt ve a.

Delhi- kan chhuahsan dawn hnaiha u Mapuia te unau inkâr ṭha lo kha ka hrechhuak ve mai. Mizorama min hruai haw tur pawhin Atuni leh Thlamuana'n an duh lo fithla ṭhak a, u Mapuia nen kan haw ta zawk a nih kha.

"Engtik aṭangin nge min duh ṭan?" Tia ka zawhna chu min chhâng dawn tawh lo emaw ka tih hnuah, "A hun chiah ka sawi thei lo, Gujarat-a ka zin khan niin ka hria, Mama ta i nih tlat avangin ka inthunun a ngai a, eng mah ka tilang thiang si lo, a hrehawm a ni," a ti deuh tawl.

"U Mapuia hi ka tana mipa hmasa ber a nihna angin ka theihnghilh dawn lo, Lalnunfima pa a ni tlat a, mahse, nang hmangaiha duh tur che hian ka pasal tak tak zawk i ni si," dam thlapin ka lo ti ve a, mut chhuakin min zêm ṭan deuh nen, "Ka mut a chhuak lutuk," ka ti teh daih a.

"Muhil rawh, kan dam anga hun thawl nitin kan la nei dawn chauh alawm," tihpahin a tho chhuak a, bawihpuia mu kha a va pawm leh rih. "Khum hrana muttir atan chuan a la tê si a, ka duh angin ka che ṭha thei dawn lo ava ang ve," a ti zauh pek a, "I tenawm..." ka ti ṭhat, a nui kur kur duh chauh.

Ka harh rualin nghet taka min kuahtu ka pasal Thlamuana ka hmu hmasa ber. A muhil tui ngang mai.

Ka fapa pawh a mutui viau, nizana kan awm dan kha ka ngaihtuah lêta ka biang a sa vek. 

Thlamuana a rawn rúm ṭuah ṭuah a, ka lo en reng. A hmel lang dam ta thlup te, a kuta kan inneih zungbun a bun ve ran te chu ka en kual zel a, a sawi ang khan a u damlai aṭanga min duh ru tawh a lo ni tak tak a nih chuan mipa inthup thei tak a ni tihna. Kei hian ka hre thâwi miah lo a nia, a mak a ni.

Ngaihbel tur ting chuan min ngaihsak em em a, Aizawla kan hawsan hnu pawh khan min rawn call ve ringawt a nih kha. Hun rei tak u Mapuia nen inbe hleithei lova an lo awm chhante kha keimah vang lek lo niin! 

Engkim hrethiam vek lo mahila, u Mapuia'n a nau kuta min dah tlat chhan leh dan khirh zet zet a zamna chhan kha ka hrethiam chho ṭan, Atuni leh u Atei pawhin an hriatpui a nih rinna ka nei hial. A chhan chu Thlamuana nen kan inneih kha min duhpui ngawih ngawih a, hnialna eng mah an chhâk chhuak lo. Ka nu Biakliani te nupa rilru erawh a dang thung.

Bawihpuia a rawn harh a, hnute ka siam laiin Diki'n Thlamuana a rawn ko ve chiah bawk.

"Nano, Angela inhnuaiah a awm reng tawh a nia, u Thlatea biak a duh," a rawn ti a, Thlamuana a rawn harh ve chawpchilh.

"Novi.." a ti sup a.

"Tho rawh, inhnuaiah Angela'n a nghak che a nia," ka ti hmak a.

"A va rawn bei hma ve..." a ti sup.

"A duh hun hunah a rawn lut a, a duh hun apiangah hmuh chea biak che a tum a, tun ang zingkarah eng nge sawi dun tur in neih?" Ka lo ti hmarh hmarh.

Kiai suk chung hian, "Thîkna aw a tel em?" A'n tiah.

"Tel lo, i duh leh Delhi-ah chuan hruai rawh.." ka lo ti tán tán a, za zeta nui chung hian, "I thin bawrlawk a chhuak ṭan elaw, nge nizana kan chêtna khan thinchhiatna a keng tel zawk," a ti deuh kher.

"Thlamuan lukir i chhia," tih pahin lehlam ka hawi hmak a.

"Kan zia ṭan a va nih hmel ve, thîk ve hrâm teh..chuti lo chu ka hmalâkna a thlâwn vek dawn asin," a ti duh lek.

"I sawi awmzia ka hre lo.." ka lo ti a.

"Angela hi ka hmanrua atana ka chah chhuah a nih hi, Atuni pawhin min hriatpui," a ti ta mai.

"Mama leh bawihpuia chiah i ngaihtuah a, kei min ngaihthah êm avangin ka mangang ṭan a, Atuni ka be tawp a, ani remruatna hnuaiah Angela hi a lo lang ta a nih hi, hrethiam maw? I tân thik buai a ngai lovang, i lo lan ve hma pawha ka kalsan tawh a ni a, nang ka nei chung che hian tu hmeichhia mah ka pan lovang, i thluak i hmang tlêm ṭhin hi ka ti," tih pahin a tho chhuak a.

"Atuni chu a va han phakar.." ka ti sap ringawt.

"Ni lo e, ka farnute pahnih leh i u Ropuia pawhin i laka ka rilru puthmang hi an hria a, nangmah chiah hian a ni hre lo, Nâno..Mama boral hnu aṭang phei kha chuan nang lo tu hmeichhia mah ka biain ka ngaihsak lo tih i hre dawn nia, chunglamin a hria e," a ti leh mai a.

"Ka ning, in lo ṭang rual vek a nih ber hi..." ka ti tawi tak a.

"Inhnuaiah chhuk ila, Angela chu kan be fel ang e," tiin bawihpuia a pawm a, "Ânu hi chhuksan daih ang aw..." tiin an inpawm chhuak ta a.

Atuni, u Atei, ka u Ropuia, u Mapuia pawh tiamin min lo bum fai vek ni berin ka hria. Thlamuana ring tur leh amaha innghat tlat turin min hrilh chamchi a, a â ber leh thil hrethiam lo ber chu keimah ka ni.

Inhnuaiah ka chhuk ve ta a, inhnial thawm ka hre zui zat bawk.

"Ka ruala lo chhuk i intiam vek tawh kha, nangmah vangin thla khat aia tam ka châm tawha hetiangin min ṭhulhsan thei ngawt lo," tia Angela a ṭawng laiin an bul ka thleng thla a.

Thlamuana'n, "Zing zingah buaina lo siam suh, ka hrilh chiang viau chein ka hria, Delhi chhukna chhan tur ka nei lova, hetah ka nupui leh ka fapa, ka chhungte an awm tih i hriat kha, nangmahin lêt leh rawh," a ti hmuk hmuk a.

Angela chuan Thlamuana en tawh lovin min rawn en a, a mitmeng thîp râm chu ka lo melh lêt ve ngar.

"Henu vanga min thlauhthla hi i ni tiraw..?" A ti ta a. Ka lo ner nasâ.

Ka pa a rawn inrawlh ve ta a, "Thlamuan, he in chhungah hian buaina ka duh miah lo a nia, hmeichhia vanga buai hi thil mawi pawh a ni lo, i nu damlo khum betin a awm a, boruak dang siam hlek suh u," a ti khur khur a, ka ngawi reng.

"Angela, lokal rawh ka thlah ang che, Novi...nakinah kan sawi ṭha dawn nia, henu hi kan thlah lawk ang e," tiin a pa pawh chhâng chuang lo hian Angela bânah a vuan a, ani a lo ṭang ve si.

"Lalthlamuan, ka chhuak dawn miah lo a nia, i duh duha min tihkawi tum suh.." ti vin hlar chung hian ka dinna lamah a rawn phei fua a, step tawpa ding ka ni a, vawilehkhatah min rawn nam dawt a, "Nang hian engkim i ti khawlo vek, Mapuia kha duh tawk ve mai ta che, Thlatea hi chu ka chanpual a nih hi.." tiin min nam leh sawk a, step-ah ka ṭhu thla hnawk.

"Zomuan.." tiin ka pa zawkin min rawn ngaihven a, Thlamuana ka va en a, hmel dur khup chung hian keimah pawh min ngaihven lovin Angela a chhuahpui ta a. Ka ṭawng ve hman îk lo. A thleng rang lutuka ka hamhaih a ni ber.

Ka pain nâ ka neih leh neih loh min zawt a, chutih lai chuan wheelchair nen ka nu a rawn chhuak ve chiah a, "Keimahni zir loh nge khati em ema a rawn ngampat chu le! Zomuan, Thlamuana rawn luh hunah kan room-ah rawn lut ang che u, i pasal pawh inah an rawn chuhpui ngam che a nia," a ti hlawih hlawih a, keimah bawk min dem leh ta.

Pawr lutukin, "I fapa zilh rawh, nupui nei chunga hmeichhe dang rawn hruai luttu chu amah a nia lawm, kei ka ni lo," ka ti ve hmiah.

"Nangni pahnih hi chu in innei rei lo ang, Mapuia ang turah Thlamuana hi ngai suh, Lalrinkima te chu hmeichhe thu thua awm ṭhin a nia, kan thu awih lovin nang pawh hetah a chentir chea i lo awm aṭang hian buaina hlir buaina hlir.." zu han ti a. 

Ngaihthlak pawh ka peih tawh lo. Ka pa lah hi a nêp si. Zoliana hi mi nêp a nih zawk hi.

Diki pawm lai ka fapa ka ban a, chaw pawh a la ei lo.

Ring deuh hian, "He inah hian buaina hlir kan thlen si a, i pa in Bawngkawnah kan la awm daih dawn nia, i patea pawhin awm a duh a nia," ka ti ve salh.

Thlamuana lakah thinrimna ka nei hran lo. Angela chungchang leh a lo chhoh chhan min hrilh chiang êm a, chuti a nih rualin ka nu ber hi a ni sual ka tih chu. A ṭha ve dawn tawh emaw ka tih laiin a ze ngai bawk a chhuak leh zel.

"Zomuanzual, Thlamuana han pawt hrang vaih teh, nangmah vanga ka fapate pahnih chân ka tum miah lo a nia," a tih laiin Thlamuana a rawn lut a.

"Pawn aṭang pawhin in ṭawng ri kha a hriat vek a nia, ka nu, insum ve deuh ṭhin rawh..." tiin a nu a khak a.

"Zomuanzuali ka lo neih tîr thawt thawt che hi chu ka inchhir ṭan tawh, min han zah loh dan em em te hi..." tia a ṭawng leh chuan, "Inchungah inbe lawk teh ang, kum khat dawn hetia in ánkhum reng hi chu ka ning ve tawh," tiin Thlamuana bânah ka vuan a.

"Bawihpuia hi pawm rawh, lokal rawh chho ang," ka ti ve tlat. 

Ka nu Biakliani runluih nan hrim hrima hetia ṭawng hi ka ni a, an fapate thinlung an thunun sak thei lo a ni tih hre ve rawh se.

U Mapuia a ni emaw, Thlamuana pawh ni sela, nu leh pa thunun theih thinlung an nei lo. 

Kei Zomuanzuali hian an fapate pahnih thinlung ka kawl tlat tih ka inhre tawh a, ka nu Biakliani te nupa an harh chhuahna tur kawng ka dap ve ang...

300123

Shadow of the life

B+>[BeckirafARenthleI]<+®®