27.KA CHANPUAL [A Becky Rafa Story]

27. KA CHANPUAL

Ziaktu: Becky Rafa Renthlei

-B®®

(Recap)

"Zomuanzuali ka lo neih tîr thawt thawt che hi chu ka inchhir ṭan tawh, min han zah loh dan em em te hi..." tia a ṭawng leh chuan, "Inchungah inbe lawk teh ang, kum khat dawn hetia in ánkhum reng hi chu ka ning ve tawh," tiin Thlamuana bânah ka vuan a.

"Bawihpuia hi pawm rawh, lokal rawh chho ang," ka ti ve tlat. 

Ka nu Biakliani runluih nan hrim hrima hetia ṭawng hi ka ni a, an fapate thinlung an thunun sak thei lo a ni tih hre ve rawh se.

U Mapuia a ni emaw, Thlamuana pawh ni sela, nu leh pa thunun theih thinlung an nei lo. 

Kei Zomuanzuali hian an fapate pahnih thinlung ka kawl tlat tih ka inhre tawh a, ka nu Biakliani te nupa an harh chhuahna tur kawng ka dap ve ang...

-B®®

Kan nupa room-ah inbe miah lovin minute tam kan awm tawh a, Angela kha a haw tîr hnuah ka nu leh pa be miah lovin inchungah min zui chho ta kha a ni a, mihring hi ṭhat leh ṭhata in lâwm thei reng kan ni. Mahse, ka nu Biaksakawlhi hi chu a inluling mai piah lamah tuma hmai hi a zah lo ve fahran lutuk a, ka dawhtheihnain a tlin tawh lo a ni ber.

Thlamuana lam hawiin, "He inah hian buaina hlir ka thlen a nih si chuan engah nge ka chhuahsan mai loh ang? Mi dangte tana hnawksak niha ânkhum reng nih hi ka ning ve tawh," ka ti tlang pawp a, a la ngawi reng.

"I u hunlaiin na tak taka ṭawngkhum ka hlawh a, a pantu ka nih avang leh a natna tawrh avang khan ka haider ṭhin, ka pasal tak tak a nih loh zia leh a hmeichhe kawl satliah ang lekah min chhuah ziah a, ka nihna pawh a ni rêng bawk a, tunah chuan i hun a thleng ta a, i tan hian eng nge ka lo nih ve, dan ang maia i nupui ka ni em? I u vanga min nei ang khan i insawi a, tun hi engkim kan sawi fel hun chu a ni, kan inneih rum rumna chhan pawh i nu vang tho a nih kha maw le, inchhungkaw tan hian duh duha sawp theih nautelem ka ni bik em ni?" ka ti leh hlak hlak a.

"Ka neih chhan che chu i hria alawm, dan anga ka nupui i ni ngawt lo a, Pathian leh kohhrante hmaa ka dinpui i ni asin, nizanah pawh nupui diktak i nihna ka nem nghet lovem ni?" A lo ti zawi ruih.

"Chuti a nih chuan i nu leh pa an harh chhuah theih nân he in hi chhuahsan ang, in hlutna an hriat hma loh chuan chhungkua hlim tlâng taka chén a har, Atuni a awm lo a, u Atei nise pasal nei tawh a ni. U Mapuia a awm tawh lo bawka i hlutna an hriat chhuah hi a hun tawh, an duhthusam angin nupa min nih tîr a, mawi-hawih pawh an zawng hek lo, i rilru siam ang che." Ka tih leh chuan min rawn ena ngun taka thil ngaihtuah hmel a pu.

"Novi, ka nu leh pate hi ka neihchhun an ni asin. I hrehawm tih ka hria; mahse, heti reng hi i ni kumkhua dawn bîk lo, fapa awm chhun ka ni tawh a, nu leh pa chhuahsana indang thei ka ni lo," a ti tlang hrâwk.

"A ṭha e, indang thei i nih si loh chuan kum hnih ka nghah kher a ṭul ta lo, i u khan a fapa pawh i enkawl theih tur thu a sawi a, ziak meuhin a dah bawk a, Lalnunfima chu i kutah awm rawh se, keimah ka chhuak ang," tiin ka thawmhnaw dahna lam ka pan a.

Mak ti hmel takin min en a, "Nâno.." a ti sup ringawt.

"U Mapuia lak aṭangin eng thil mah duh leh beisei ka nei lo tih vawi engzat nge ka sawi dawn, hetianga i nu ṭawngkam na tak tak dawnsawn reng ai chuan retheih ka thlang fê, ka fapa pawh i enkawl ṭha ang tih ka hria a, Lunglei lama ka chhungte min tihdan i hre vek bawk a, ka tawrhna hi tawk tawh teh se," dam thlapa tiin, ka thawmhnaw ka lakhawm ṭan a, che lovin a ding reng ringawt.

A hnu lawkah Thlamuana chu room chhungah a vei nghauh nghauh a, ka insiam pawh min dan a tum lo. 'Kal suh' tiin a û lehkha ziah bawk kha a sawi chhuah leh ka ring a nia, a ngawi zui daih si.

"Ka kal aw, min khawngaih ṭhin nate, mittui tla chunga ka awm lai pawh khan min hliahkhuhtu leh ka thlavang vawi tam lo hauh tawhtu i ni, lawmthu ka sawi takmeuh meuh, i u vanga min nei i ni a, i nun ka tichêpin i zalen lo a, ka fapa erawh i thisen zawm ve tho a ni a, u Mapuia khan a lo sawi dik a ni, a châwmna tur eng mah ka nei hek lo, ka tel lovin i kiangah seilian sela a pi leh pu pawhin ka awm loh chuan an ngaihsakin an duat zawk ang," tihpahin ka thawmhnaw tlemtê bag-a ka khung chu ka ban a, rang lutuka rawn che chhuakin, "Khawiah mah ka tel lova i chhuah ka phal lo," a ti leh lawi si.

"Hriatthiam tum rawh, kan inah ka haw dawn alawm, ka nu leh auMami pawh ngaihdam ka dil chuan an rilru a dang vek mai ang, an thisen zawm ka nihna a bo chuang hleinem," tia ka inher tur chu a lamah min pawt hnaiin min kuah a, "Novi, min duhin min hmangaih ve thei ngang lo em ni?" A ti teh daih a. Ka lo hawihai leh si.

"Thlamuan..." ka ti lawi rât.

"Kalsan nei lo leh kalsantu an awm loh chuan keini pahnih hi kan inzawm thei dawn lo a nih hi," a ti nghut a, min vuan nghet hle.

"I sawi awmzia ka hre lo a nia.." ka ti leh tawp.

"Nang ka hnaih theih nan che Mama'n thu min delhkilh tîr a, ka hmangaih che tih hretu awm chhun a ni, a hun tawp dawnah pawh nang leh a fapa venghim turin min la chah lawm lawm asin; tunah ka nu leh pate avangin nangin min kalsan i duh leh ta si a, khawi hmunah pawh awm la, ka hmangaihna che hian a zui zel ang che, chutiang huam chuan a ni Biak in hawnga ka mualpho ngam, mi min demna te hi ka nat pui loh i ring bîk em ni..." zawi ruiha tiin a thaw hawk a, ka khawngaih ru hle.

"Ka u nupui anga kan kawl kha i ni ṭhin; nang nupuia neih che hi ka tan thil awlsam a ni lo, I awm lohnaa awm turin thu ka tiam lova, a nuamah pawh, a hrehawmah pawh tiin dam chhung daih a ni ka tiam ni, i hlimna tur a nih chuan kan chhuak ang," a ti ta hmiah mai.

"Chutiang sawi duah zel suh," ka lo ti tawp a.

"Ka sawi tawh kha, ka Chanpual hi ka thlah thiang lova, nang ngei pawhin i chanpual i hlen chhuaka Mama i thlah liam tawh. Novi...i sawi dik aw, ka hun a thleng ve ta a ni e, tlanchhiat ka tum lo," tiin ka khabeah a rawn dawma amah ka en theih nan min kuai dâk a, a mitmeng thûk ruiha min hmangaihna lo lang chhuak chu a der a ni lo tih ka hrethiam ve.

"Ih..ka hmangaih leh hmangaih loh che ka hre lo a nia, mahse, ka duh che a nih ka ring," ka lo tih chuan insûm hman lêk lovin a nui huk.

"Ûte...hetiang mizia i neih vang hi alawm, ka thinlungah i tlâk nat em em, i nihna ang anga i lan ngamna hi ka duhzawng a ni," a ti ve ngei.

"Vawikhat chiah ka fawp che ang a, inhnuaiah thupui kan vai ang," nui lek lek chunga tiin a rawn kun hniam zui zat a, ka lo dâk ve chiah bawk.

Zak duh map lo hian ka lo fawp lêt mial mial a, ka taksa thlawp zaihin a ding vei nen, a insûm thei lo dawn takngiala ka hriat avangin ka inlahrang ta a.

"Vawikhat fawh chhung a va rei ngat ngat ve le," nui chungin ka lo ti pek a, ka chala pen kawrh chung hian, "I zâm lo sâwt riau mai nang hi..." tih pahin min rawn ban leh a, ka lo ding sawn vat.

"Ka chhun che a nih hi.." ka'n tiah. A nui hawk hawk a, "Ka nu leh pa bula thil ka sawi laiin i lo ngawi tlat thei ang em?" Tiin min zawt teh daih a, ka lo bu nghat.

Chutah bawihpuia muhil chu a pawm kâng a, min puak tîr hnuah, "An inhmuh chhuah theihna tur ni-a ka rin angin chêt ka la anga i lo ngawi tlat dawn nia," tinawn lehin inhnuai lamah min chhukpui ta a.

Diki dawr kal tur chuan inkai riala kan chhuk dun chu min nuih a, chhuak bîk lovin a rawn lêt leh ta a.

Ka nu leh pa ṭhutkhawmna pindanah an lo awm a, ka nu Biakliani tak chuan phone a lo hmang a, min hmuh veleh, a phone hmanlai a off zui hmak.

"Thlate, zin turin inruahman ang che," a lo ti nghat.

Thlamuana chuan ṭhu turin min mitmei a, a nu lam hawi chung hian, "Zin hman ka ni lo, zanin tlaiah he in hi kan chhungkaw bilin kan chhuahsan ang, chuan, Diki hi kan hnena awm tura ka hruai luh a nih angin kan kiangah a lo tel ve bawk ang," pehhel nei miah lovin a sawi tlang pawp a, ka nu a mengphâwk nasa mai.

"Thlate.." tiin ka nu leh pa an ṭawng rual chiah. Kei ka lo ngawi reng thung.

"In hrang aṭang hian chhungkua kan inngeih zawkin ka ring a, ka thlahthlam dawn che u tihna a ni lo, ka huat vang che-u-a indan hi sawi ka ni lo a, in duh thu ngeia min neih tîr Nanovi inrem thei bawk si lo, puitling kan ni tawh a, Mama duhthusam hnuhnung ber kha chhungkua inrem taka awm a ni. Mahse, ka nu, a harsa i ti si a, Mama inah khan indan kan tum tih in lo hre dawn nia," a tih leh chuan ka pa a ding chhuak hluai a.

"Thlate, nangni lehzel chu indang lo e," a ti sup. 

Ka nuin rum tak hian min en a, chutah a fapa lam hawiin, "Nang pawh Zomuanzuali hian i thluak a ei ral ve ṭan a nih hi," ngeiawm taka tiin a nui lui a.

"I ngaihdan dan le. Ka pa, i duh chuan kan hnenah i awm thei ang aw..." a ti ta a, a nu vawikhat pawh melh nawn tawh lovin, "Hawh le, kan in luah tur i va en teh ang, i hmingin Mama khan a dah lehnghal a..." a'n ti chiah chu ka nu a ṭeu nasa mai.

"Zomuani hmingin a awm amaw?" a ti vin tuar.

"Umn...kum hnih a ral leh hunah saw in saw ka nupui hming a nih angin kan duh duha kan tih a rem tawh ang, Sumdawnna bul ṭan nan kan hmang ang nge, Mama account pakhat pawh kan khawih thei tawh bawk ang a, ka u in Nanovi a hmangaihna kha a der a ni lo a, mualpho leh hmingchhiat, chhungte ensan huama pantu a fapa nu hi kut bêngin a dah dawn lo tih i hriat ka lo rin nen," a ti zui nek a, ka nu a hawi lawl lawl mai.

Ṭah aw ṭuau hian, "Thlate, khawngaih takin nangni tal chu indang suh u, heti mai hi kan ni tawh si a," a tih lai mêkin ka pa a rawn ṭawng a, "Ka fapa, innupa khan thutlukna dik tak siam ang che u, ka nawrlui dawn lo che u a, he inah hian Zomuani a hrehawm lulai êm a ni," a ti ve teh mial.

"Bawngkawnah chuan kan va kal phawt ang e, insiam ṭhat nan a la tlai lo a nia," Thlamuana'n a ti dam thlup a, ka nu a inhnit fup fup ringawt. 

"Ka farnute pahnih pawhin mahni ina kal leh haw châkna pawh an nei tawh lo a nia, tu thiam loh nge ngaihtuah zui ve mai rawh u," a ti fak fak a, sawi ve tur a va vâng ngat ngat ve.

Ngawi renga ka nu leh pa ṭhute chu kalpelin pawnah kan chhuak zui ta a, ka thaw huai huai.

"Kan Lalrinkima leh Lalthlamuana hian eng nge an hriat le?" Tia ka nu ṭawng ka la hre pha viai viai.

Bawihpuia a bengchhengin a râk ve chul a, Thlamuana lam hawi hian, "Kan indang dawn tak tak em?" Ka ti a.

"In dan i duh a ni lawm ni?" Tih chiah a sawi.

Chumi hnu chuan u Mapuia in zâwnah car tidingin kan chhuk ta a; a luahtu chhungkaw hnihte an felin min lo be luam a, a chung ber leh a hmaa ka lo luah ve kha a la ruak thung a, chungte chu kan endik hnuah in lam panin kan haw leh ta a.

"Nang pawhin kalsan neiin Mama kiangah i awm a, kei pawhin kalsan ka neih ve a ngai a nih hi.." ti supin ka biangah a rawn tawk a, ka rilru a khawih hle. Ani hi chu a tih tawh lamah mi nghet, rilru lian tak a ni a, a zuzi mai mai dawn lo tih ka hriat vang a ni.

In chhungah kan lut a, Diki'n min mitmei vat a, Thlamuana thusawi zawng zawng kha a lo hriat ve vang a ni. Nu leh pa a neih tawh bîk loh avangin hetah hian a awm char char a, khatia Thlamuana'n a sawi vang khan kan kianga chêng ve turah a inngai nghet hmiah tih a hriat mai.

Tûkṭhuan pawh mumalin kan ei lo, kan boruak a nuam lo vel vek a ni.

Bawihpuia ka bual laiin Thlamuana a rawn lut a, "Tukina kan thusawi vang kha nge ka hre lo, ka pain ka nu a be ṭawng zo lo," a rawn ti a.

"Chuan, engtin nge kan awm dawn? Kan chhuak lui dawn tho em?" Tia ka zawh chuan, "Chhuak tur angin kan awm ang," a ti leh tawp a, a sawi awmzia pawh ka hre lo reng reng.

"Ka nu tan a fapa neihchhun ka ni tawh a, ka indan a phal dawn lo, chuan Bawngkawna in saw a sak hun lai aṭang tawha a ît leh duh a ni a, kan chhuah hi a phal lo ang, lo ngai reng mah rawh a rilru a sawhsawn êm êm ang," inringtawk takin a ti hmiah.

"Atuni pawh naktuk hian a rawn haw dawn a, a hna thila lo haw tur a ni a, a châm rei lo ang," a ti a, ka nui ta var var mai. Atuni leh u Atei hi chu ka ngaina ve chiang alawm.

Nilêngin kan awm ta vel mai mai a, Thlamuana'n hna a thawk a, keini nufa a bulah kan awm ve bawk a, a hmaa kan boruak hrehawm kha a bo vek. Sawifiah thiam chiah si lo hian kan inkâr a nuam ru riau.

"Bawihpuia kha mut la, hetah lokal teh," tiin a tawlh hret a.

Thuawih deuh hian ka mut ve mai a, "Ṭan kan lâk deuh loh chuan bawihpuia'n nau a nei har dawn a nia," nui ruh ruh chunga tiin a malchungah min ṭhut tîr a, "Khatiang kha sawi hlek suh," ka lo ti hlar.

La nui reng chung hian ka kawr chhûngah a kut a zen lut a, "Bawihpuia'n a ti chingpen lo hlauh hi chu ka lawmthu tak a ni," tia a sawi rualin ka âwmbâwr a rawn tawk a, ka ṭang deuh ṭung.

"Inthlahdul rawh, khatia i ṭan ṭung zel te chuan a mood-a chén a har.." a la ti hrâm.

"Ui ui..i zah loh dan hi a, sawi hreh te hi i nei si lo," tiin ka nui ve ta tho a, "Chhunah te, zingah te, zanah leh a remna hmun apiangah ka ta i nihna lantîra nemngheh fo ka duh dawn avangin, inring rengin awm ang che," tia a sawi zawh rualin dam leh ngenngawl tak hian min fawp a, a taksa si chêta min kuahin a nupui ka ni nawn leh dawn ta nge nge e.

Thlamuana zia hi chu a dang bîk a, hnial theih miah loh thuneihna awkâ nei mi a ni. Kei ngei pawh hian 'Ka hmangaih che' tiin hrilh lo mahila; amah hian min duhna leh hmangaihna a thup ṭhen eih lo a, ka rilru put hmang nitin a dang ve hret hret ti ila, ka sawi sual lo ang.

Inbual rual a rawt nain ka fapa a harh zui ta mai si a, "Tlangvalte, muhil leh rih rawh," a'n tiah. A va tiho ṭhin tak.

Chawhnu lamah ka pa a rawn chho ve hlawl a, kan room-ah a vawikhat lo chhohna a ni hialin ka ring.

"Zomuan, Thlate, i nu rilru kâwi satliah hi chu en liam hrâm ula, in dan lam chu ngaihtuah lo phawt ula ka duh, ka dik e, ka thiam e ka ti lo, upat lama chhungkaw boruak ṭha lo neiha inṭhen darh leh te pawh a ṭha ber lo a nia, i nu pawh a inchhir ṭan tawh viau asin, in lo chhuk lawk thei si lo a, amah a lo chho thleng thei lo nen in chhuah a hlau lutuka ka rawn kal a nih hi.." inthlahrung taka tiin kan room a enkual a.

"Kan rawn chhuk dawn nia, ka nu chuan chhuak lo tura min duh a nih chuan ama ṭawngkâ ngei hriat ka duh," Thlamuana'n a ti deuh tlat a, ka pa pawhin a lo hrilh tur thu sawiin a chhuk leh ta rih a, kei ka lo ngawi reng.

Dârkâr chanve hnu velah, ṭhutkhawmna pindanah kan ṭhu ṭhap a, ka nu Biakliani pawh nidang zawng aiin a zawiàwi a.

"Zomuan, i laka ka awm tawh dan te, kan inchhung i rawn rah tirh ni-a ka ṭawngkhum dan che ngaihtuah phei chuan hetia ngên ngam tur che hi ka ni lo tih ka hria. I nu leh pa min ṭawngkhum dan leh kan fapa rilru na lutuka an siam vang khan i lakah ṭhat ka chhuah thei bik lo a," tiin a che sek a.

"Mapuia hun tawp thleng i enkawlnate, damdawi ina min enkawl dan leh ka tupa kalsana i lo riah tepawh khan ngaihdam chea i laka ṭhat chhuah ve ka duh, mahse, sual hi a chak em a, ka chapona hian ka fate pahnih ka hrin ngei te'n annu aia nang an dah pawimawh ziah che hi nâ ka ti a ni," tiin a insût hraih a, a ṭah a chhuah hmel hle.

"In dang lo turin ka ngen ngam lo che u, mahse, vawikhat chauh inngaihtuah nawn leh ula ka duh êm mai. In tel lo chuan kan inchhung hi eng tihna mah a ni lo," tiin a ṭap chhuak hawk a, a insum hleithei lo. 

Ani meuh hetianga a awm a nih chuan a tider lo tawp ang.

Thlamuana a ṭawng dawn emaw ka ti a, a ngawih tâk reng si avangin hrawk ka thian kharh a.

"Nu.." ka ti sap a. Rang takin a rawn dâk chhuak a.

"Nangni lo nu leh pa ka nei hleinem, ka chhiat ber lai pawha min tuamhlawmtu in ni a, a hma thil theihnghilhin hlim taka chenho kan tum dawn lo em ni? kan tlin lohna te in haider sak ila, zilh ka ngaihnaah pawh min zilh mai tur a ni, ka dik vek bik lo a nia..." dam raihin ka ti thei ve ta.

"Zomuan..." a ti hniam raih a, "Hetah hian lokal teh.." ti lehin a bula ṭhutna awl chu a melh zauh a.

"Rilru tluang leh ṭha tak i lo neih vang a nih hi ka fapate pahnih hian an thlah theih loh che. Rinkima âiah Thlatea..." tiin a nui ta a, ka lo nui ve tawp.

Inngaihdam tawnna a awm loh chuan chhungkua a inrem theih loh a, kan dik lohna leh fel lohna inhriatsak reng te hi thil ṭha a ni ngai lo. An fa mo ka nihna a la rei lo a, ka nu leh pa pawh hi dem lutuk chi an ni lem lo bawk. U Mapuia Cancer ka nu leh auMami'n an ṭawngkhum dan te kha a na dawn hian ka hre lutuk a, anmahni hringtu nu leh pa tan chuan paidam a har ve viauin ka ring. Chuvangin, an fapa naupang ber Thlamuana thluak hmanga kan ruahmanna chu a hlawhtling thawkhatah ngai ang. 

Ka pasal hian thluak tihtlâk tak a nei tih ka hria. A hmang thiam hle bawk.

Hemi hnu aṭang hian kan inchhungkhur boruak a inthlâk hlawk a. Atuni pawh Lengpui Airport-ah kan zu hmuak a, bawihpuia a hmuh rual rualin, "Thlate, a sam hi..hetiang ka duh lo," a ti nghal bawrh bawrh a, ka lo nui hak hak.

A patea'n kan kal dawnah a chhîpah a ṭawnsak a, ka ngei a nia. Hmeichhia a ang zo vek. Amah a ngo bawk nen "nakinah ka la mehsak tho tho ang," tiin Thlamuana hnenah ka sawi a, ani lah chuan, "Keimah min chhun vena lai a nia, ka zuahsak zel dawn," tih ṭanin a ṭang kawh tlat. 

U Ropuia pawh nupui nei tur a ni ta a. 

"Mate, in rawn tel ngei a ngai a nia, kan inah in thleng duh lo a nih pawhin, Ruata te ka lo biaksak ang che u, i tel lova inneihna hman ka tum lo," a ti bur.

Thlamuana nen rei ngial an inbiak hnuah, "I u Ropuia te inneihna senso hi aṭhen azar kan tum ve dawn lo'm ni, i tana ding reng leh ṭan tlattu che a ni a, eng emaw tal chu tih ve a ngai ang," a ti a, ka sawi chhuah ngam loh a rawn sawi ta a, "I tihdan dan a ni mai," ka lo ti ringawt.

"Novi..min en teh.." a ti a, ka en ve mai bawk a.

"Ka lakah inthlahrunna tur engmah i nei lo aw, i ngaihpawimawh zawng te, mamawh i neih pawhin sawi hreh suh, ka lakah hian i la hmin zân lo niin ka hria," a ti ta a.

"Chutiang engmah a awm lo," ka tih chuan, "Naktuk hian zankhat riakin Serchhipah ka kal a ngai dawn a, i duh leh Atuni riakah sawm mai rawh," a ti teh daih.

Riahpui kan ngaih loh thu ka lo sawi nain, "In nufa ringawta mut chu ka ngaihtuah ṭhin che u," a ti leh mai a, ka sawi thui ta lo.

Hna thilah zin leh zauh zauh a ngai ṭhin hi ka lo ning ve ringawt. Sawrkârah hna nghet nei lo mah se, min châwm thei tih vawi tam a sawi a, inthlahrung lo turin min hrilh fo ṭhin. Diki pawh a hlawh pangngai bâkah bonus a pe fo tih ka hria; hei vang hian Diki pawhin a ṭan teh a nia.

A zin dawn zan a nih vangin, inla hrethiam zet hian Atuni'n bawihpuia riahpui a tum a, Beer a heh ṭhin êm avangin ka remti lo deuh, zanah hnute pêk a la ngai ṭhin si a, a mangnghilh ka hlau a ni ber.

"Nano, lo chhuk lawk teh.." tiin Atuni'n min ko vak vak a, bawihpuia leh Thlamuana a pi te room-ah an awm sa a, inhnuaia ka chhuk chuan Atunin a room-ah min pawt lut vat a, "Hepa hi hmelṭha i ti em? Min biakna a rei tawha ka yes ve tawp dawn," a'n tiah.

Phone-a mipa thlalâk min en tir sawk sawk pah hian beer a khiat leh zauh a. 

"Khawi ami nge?" Tiin ka zawt a.

"Ka thawhpui thar a nih kha, Lawngtlai lam mi a nia," tiin a nui var var a, eng danga chhâng lo hian, "I duh leh duh loh a ni mai, a hmelchhiat loh kha.." ka lo ti liam puat.

"Tu chu maw chhe lo?" Tih pahin Thlamuana a rawn lut a, Atuni nen kan ngawi hmak.

"Lalthanpui...Novi hi thil ni lo lo i lo hrilh elaw," tiin a nui suk a.

"Kal mai teh, zaninah bawihpuia ka riahpui dawn âiah i car chahbi min kawl tîr ang che," Atuni'n a ti a, Thlamuana a ner nasa mai.

"Motor Company-ah i thawk a, pakhat êm pawh i la hlawh chhuak lo a nia, beer manah i hmang zo zel tihna mi?" tiin Atuni khumah a ṭhu a, "I thil min lo hawn kha Novi hmuh loh laiin min pe ang che," tia a u siai zauh chung hian a nui ruh ruh a, ka lo hrethiam vek.

"Atun, pe miah suh, zu a in leh chuan Beer ka in ve tawh ang," ka lo ti a, "Novi...tun chiah aw..a bâk ka in tawh lo tak tak ang," a tih laiin Atuni lam ka va hawia nui ṭhâ chung hian whisky a rawn phawrh a, "Innu kutah ka dah ang a, i duh leh dîl ve mai rawh," a'n ti chiah chu Thlamuana a che chhuak phat.

Nia, zu in hi thil ṭha chu a ni lo. Thlamuana'n a in leh zeuh ṭhin hi ka haw lutuk tlat. Sim tîr ngei pawh ka tum ruh hle a, tunah vut vut chuan a harsa rih a ni mahna, a u in a lo hawnsak leh kher bawk si a, duh lo teh mahila; ka ṭha en ta vel mai mai.

Ka nu Biakliani te room-ah ka pheisan ta a, bawihpuia a lo mutpui ve ngial a, "Zomuan, bawihpuia birthday kum khatna hi engtia lawm nge i duh?" Tiin min zawt a.

"In duh dan dan a ni mai, lawm pawh ka châk lo, bawihpuia a piang chiah a, u Mapuia a boral zui ta si a, rilru a ti thar," tiin ka rilru dik tak ka sawi a.

"Chutiangin ngaihtuah mah ta che, Mapuia awm tawh lo mah se, Pathian zarah in fapain kum khat a tling ve mai dawna chhungkaw chaw eikhawm kan siam dawn nia, Ropuia te inneihnaah khan in kal duh awm si a..." a tih zawm leh daih.

Kal ve ngei kan tum tih ka sawi chuan, "I u Ropuia ang nuṭa rilru ṭha lutuk i nei hi i vannei hle a ni, eng emaw thil hming hnih khat tal tihsak nachang te kha hria u la, Thlatea ka lo hrilh dawn nia," ṭha tea tiin, bawihpuia muhil a melh zeuh a, "Tun ṭuma in va kal hi chhungkaw inrem nan va hmang thei ula ka duh khawp mai," a ti ta a.

"Ka nu leh auMami ber hi an nia," tiin ka u Mami awm dan leh ka nuin a ṭan dan vel te, ka pa damlo kan tlawh ṭuma min lo tihdan zawng zawng ka hrilh ve ta vek.

Chek tlak tlak chung hian, "Kei aiin an tawhkhirh zawk a nih chu," nui chungin a la ti veleh chhawng a, a hmaa kan inbiak ṭhin dan nen a danglam ta khawp mai. Inpawh takin chhungkaw thil kan sawi dun ve ta chu a nia, a nuam ka ti.

"Atuni leh Ropuia kan lo hmehbel leh ṭâlh lo a ni." Nui kar kar chunga a tih chuan, "A ni em em tawh lo," ka lo ti a, ka pa lehkha chhiar lai a rawn nui chhuak huk.

Hetiang thuartham vel hi kan ni ve tawh a, a nuam êm asin. 

Tlai chaw ei hma aṭangin Thlamuana'n zu a in a, u Mapuia room-ah hnathawk pahin a in tih ka hre ru kar. Ka túm búr a, a sâwt der si lo. Atuni pawh a room-ah a tawm tlat a, anni pahnih hi chu a ngaihna an awm lo, hau eng ang mahila an ngawi daih si a, an in lui tho tho zel. Buaina êm a chhuah loh chuan tiin ngawih ka chuh tawp.

Keimahin kan nupa khumah ka mu rân a, nichin deuhah Thlamuana ka va ko a, naktuka a ken tur a lo la buaipui ngar ngar chu niin. Zû pawh a in hman meuh lo a nih ber kha..

Lalnunfima pawh a ní bulah a mu a, a ruihsan lo turah ngai ang, riahpui a chuh ve tlat bawk si.

Thlamuana rawn mut laiin ka lo muhil sek tawh a ni ang, "Mut duh lutuk mai, zanin chu tlaivar zanah ka puang," tiin ka biangah a rawn fawp a.

"Ka peih lo," ka lo ti nghauh a.

Nui huk chung hian, "Ka nupui tereuhtê hi tlawn lungawi hmasak a ngai leh dawn a ni maw," tia a sawi zawh rualin a bân lum thur thur chuan min rawn kuah a, "Lalthlamuan, a tlai tawh.." ka ti hlak a.

"Novi..." a ti sup a, a thâwk zawnga zu rim nam hak ka hriat chuan ka ner nâng mai. Min lo en ve chiah bawk si a, inthiam lo deuh hian, "Tun chiah ka in tawh ang ka tih kha, Mama'n a in pawhin i sawisel tawp si lo a," a'n ti leh rih.

"Mama i ni hleinem Thlamuana alawm i nih?" Ka tih chuan, "A dik, i pasal Lalthlamuana ka ni, Rinkima nau," a ti leh deuh kher.

"Chhe zet zut siah..i ninawm..." tia ka ṭawng zawh hmain ka hmui a rawn hup a, meng chiai chung hian, "Ka ngai dawn che, zan khat lek pawh nise ka huphurh," a ti zawi sup.

A hnu leha a chêt dan chu Mipa dik tak a ni a, kei pawhin ka thawh hah man têlin ka hnungzâng a thlan dap.

"Khawvar hmain vawikhat dang leh..." a la ti cheu.

Ani hi chu a hrisel ṭha a, tehkhin loh pawh tum ila, a harsa ka ti. U Mapuia nen hlim taka hmangaihna kan chen dun ṭum a awm a, natna nei a nih vang khan chuti luain kan inpawh lo. A hrehawm tihna pawh ni chuang lovin; inveng ru tawn rána kan awm châng a tam zawk. Mahse, Thlamuana erawh a dang zar a, phur chin piahlam thlenga nghawng thei khawpa mipa zei leh inringtawk a ni. 

Khum laizawlah kher hi chuan lungawina vawi tam kan inpe tawn a. Amah ka duhna leh thlâkhlelhna pawh a sâng lo thei bik lo. Hmangaihna nena min dawha min zirtirtu a ni miau alawm.

A tuk zing dar 7 velah kan nufain a patea zin tur kan thlah a, midang an la tho lo.

"Tlangvalte, ânu nen thil ṭha deuh ka lo hawn ang che u," tih pahin Bolero-ah Thlamuana a ṭhu lût a, a lang thar sar mai.

"Novi..lokal leh lawk teh.." tiin min hûi leh zauh a, "Tukin zinga i chêt dan kha ka lo haw hunah chhunzawm ka duh ang," tia kiai suk chung hian ka hmui a tawk zeuh a, ka lo zak leh ringawt tawh.

A tlan liam hma loh kan thlir reng a, tukinah ka duh ang thâla nupui nihna ka hlen chhuah lai khan a hmel lawmnaa khat leh hmangaihna mitmenga min enna kha ka mitthlâa la châm fo tur a ni. Tunah pawh ka'n mitthla nghal ngei a(h) a va buaithlak e.

Kâr thum hnuah.

U Ropuia te inneihna hmang turin Lungleiah kan phei ve ta a, Atuni leh a ṭhianpa thar pawh hna thilah Lawngtlai panin an kal tawh a, inneihna rawn hman hram an tum tih a sawi.

Tun ṭum chu a serious ve deuh a ni ngei ang, a bialpa tharin Beer in a khap a, a in tlêm ve ta.

Thlamuana lo sawi lâwk tawh angin ka u te inneih senso kan tum ṭhen ve a, u Ropuia'n a hnial fê hnuah, "Ka nupui nuṭapa i ni satliah lo a, i nau ka neih theih nana min puitu leh min hrethiamtu i mâkpa ka chêt ve a ngai," a ti deuh tlat.

U Ropuia pawhin a hnial ta bîk lo.

Kan ina thlen a rem lo erawh pawi a tih thu a sawi a, u Ruata te inah bawk kan innghat leh ta mai. Ka nu leh auMami hmel ka la hmu lo a, ka pa hmuh ngei ka tum tlat a, kawng a awm turah ngai ang.

A tawi zawngin. 

Man hlan leh thil dang tih ngaiah Thlamuana leh u Ruata an ṭangkai viau a, ka u in ṭhian atan u Ruata a hmang a, kan in pui pawh ka lut ve leh ngei dawn e.

Inneih inkhawmnaah kan chhungkuain kan ṭhu ve ṭhap a, ka nu leh pa ka hmu a, anni pawhin min hmu bawk.

Veng chhunga min hre ṭha deuhho te'n min chibai nak nak a, u Mapuia boral hre lo leh Thlamuana ko sual tâwk an awm nuk bawk. 

A chenpui chhungkua tih velin thlâ an lâkpui dawnah auMami pawh ka hmu ve ta a, a pawrin a fê chap mai. A chêr bawk si a, ka hai lo chauh.

Kan chhungkua pawhin kan lâkpui ve a, mipui awm lai chuan tumahin kan boruak ṭha lo an tilang lo a, rin âi takin ka nu pawh a insûm thei phian. Ka u Ropuia hlim hmel ka hmuhin ka thinlung takin ka lawm, kan inneihni min hriat chhuah tîr lo thei lo.

Mo lawmna ruai kan inpuiah an siam si a, Thlamuana hnenah, "Kal lo mai ang," ka ti sap a.

"Ni lo e, i u Ropuia hlimna tih chhiat i duh em ni, i kiangah ka ding zel dawn alawm, min ring rawh," a ti sup tak naa ka hlauthawng ru zek zek.

Kan in kawtah mi an lo zi niai niai a, bawihpuia Thlamuana'n a pawm a, a kut lehlamin min kâi thung a, ka thin a phu dep dep.

Ka chhuahsan aṭangin kum a tling tawh a, ka naupan lai leh ka chhuahsan hmaa ka awm ṭhin dan te kha ka mitthlâah a lo lang zut zut a, ka thaw halh.

Ka zâm zia hriain Thlamuana'n ka kut nghet takin a húm a, inchhungah min luhpui ta a.

Eng dang mah ngaihsak lo hian ka hawi kual a, banga kan chhungkaw thlalâk intâr chuan ka mit a la chat. Ka lang chiang hle a, min tuithlar tawh inti siin ka thlalak hmun hnih laia an la târ chu mak ka ti ru hle.

Ka pain chhungkaw âiawhin thu a sawi a, ka rin aiin ka hmu zia lutuk tlat.

"Kan fanu naupang ber Nanovi te chhungkua pawhin a u te inneihna min rawn hmanpui thei a," tiin kan ṭhutna lam a rawn hawi a, mi mit kan chungah a fu ṭhup.

Kan chanchin a sawi thui lo naa ka nu mittui hru zauh zauh chu ka hmu reng. An tân ka thih tawh thu sawiin min be pawp ngai tawh lo mah se, ka hmel leh ka fapa hmel hian a mittui a ko chhuak reng ang chu.

Chaw pawh puar takin kan ei ve tak kha.

Ka pain Thlamuana a ko a, a niin min ko veleh chhawng a, kum khat hnuah ka nu leh pa room ka rap ve leh ta. Khumah ka nu a lo ṭhu ngui nghiai a; en pawh min en lo hian hnuailam a bih deuh tlat.

"Mate, ka tupa kha ka lo pawm teh ang," tiin Lalnunfima ka pain a rawn ban a, a duh lo nasa mai. A patea'n a ti lungawi leh tê tê a, chumi hnuah an inpawm thei chauh. Ka nu a la ṭawng ta lo fo.

"Ka pu, châm rih duh viau mahila, hnathawh tur nei ka ni si a, naktuk chawhnu lam hian kan haw phei mai dawn em mawni kan lo ti a," tiin Thlamuana'n ka pa a bia a. 

Chuveleh ka nu a rawn dâk chhuak a, mittui hru zauh zauh chung hian, "Mate, kan hnenah rei lotê tal in châm thei lo em ni," tiin a rawn ṭap chhuak a, a insûm rei tawh ka ti rêng a ni.

Keimah pawh min en lo hian, "Ka tihsual man ka tuar mêk a nih hi. Thlate, zan hnih khat lek kan inah in rawn awm ve thei ang em?" ka nuin Thlamuana hnenah inthlahrung takin a ti a, kut ka lo húm ruh ngat ngat.

Ka pasal a ngawi vung vung a, a ngawi ral dawn emaw ka tih laiin, "Ka nupui nen inrem in duh chuan kan lo riak ang, mahse, buaina dang ka duh lo," a ti zawi ruih.

Mittui far zawih zawih chunga ka nu leh pain min kuah laiin auMami a rawn lut a, "Zomuan..." a ti sap a, a rui tih hrilh hranpa ka ngai lo.

"AuMam..." ka lo ti ve sep a.

Nui lui chung hian, "Pasal ka neih ve hmain pahnih i nei hman a nia, kan va inang lo deuh ve," a ti sak a, ka nu a ri phat.

"Mami, duh tawk tawh rawh, he ina chen i la duh chuan i u Ropuia thusawi kha zawm la, i nau lakah sual chhuah tawh suh," a ti ta a.

Ner nâng chung hian, "Ka nu, Zomuani leh Ropuia tih velah ka buai lo, pawisa min lo pe lawk..." a ti ham ham a, a khawsak phung tur ka hrethiam uar.

Ka nuin a pek duh loh avangin thinrim insawh tau chung hian a chhuak ta a, kei leh Thlamuana min ánkhum lo teh tlat! Mi mitmei venna chang a la hre ve tala a zia e.

Ka nuin ka fapa a pawm a, thil thui tak a sawi hran lo. Mahse, a hmelah min ngaiin min thlahlel hle tih ka chhiar thiam a, Thlamuana hnenah erawh chuan, "I u Mapuia ngaihdam dil thei tawh lo mah ila, ka fanu hmangaihtu tho i ni a, i hnenah tal ngaihdam ka dil lo thei lo," a ti a, Thlamuana chhanna pawh ngaithla lo hian bathroom-ah ka ṭap nghek.

Ka nu hian keimah vangin a tuar nasa ve a, an ṭanna zawnah dikna an nei tho. Min tuithlar tawh mah se, a rila rah a fanu hi min hmangaihna a kiam thei tak tak lo tih ka hre ve. Lalnunfima nu ka ni a, fate laka nute rilru puthmang ka hrethiam ve tawh atin ni.

Thlamuana hmel pawh a dik ta. A chhan chu ka nu leh pain an mâkpa dik takah an pawm thlap.

"Mama ka ni ve lo, ani duh lo mah ula, kei chu Thlamuana ka ni a, in fanu pasal dik tak ka ni, min duh lo thiang lo aw...." tiin ka nu a hrilh a, an nui ve tawp.

A dik a dik chuan, ka nu hi ngaidam duh lovin be duh lo ta ila, engtikah mah kan inrem lovang, nu zâwk a tlâwm ngama inremna a duh chuan kei a fanu hi ka hel reng tur a ni lo. Hmangaihna ngah tak Zomuanzuali nih ka duh a, chhungte pawt hrangtu leh ṭhen hrangtu ni tawh lova suihkhawmtu nih hi ka duh ber. Ka kianga ding ka pasalin min thlâwp ṭha em em bawk.

Zan lamah kan ina riak turin kan thlen in aṭangin kan phei ve ta a.

U Kimtein, "Eng emawti lai aṭang khan i nu hian i chanchin min zâwt zauh zauh ṭhin a, an laka i rilru ka hriat loh avangin ka hrilh duh lo che a nih kha," tiin a sawi a.

"A hun lai a liam tawh a, u Mapuia nu leh pa an ni emaw, ka nu leh pa pawh nise, inngaihdam tawn hi a hlu ber, khawvela kan inhmangaih hun chhung a rei loh êm hi, u Mapuia pawh khati kha a ni a, kan hma hun kan sawi thei si lo," ka tih laiin ka nu a lo lut ve chiah a. 

"I u Mami rui pawh inhnuaiah a let leh ngût tawh, ka thiam loh vek a ni.." hrehawm ti lutuk tih hriat takin a ṭawng sap a, ka hre pha vek tho.

"Nu, insiam ṭhat hun ala nei em em ang, i rilru tihrehawm duh rêng rêng suh," tiin ka hnem ve tawp.

U Ruata, u Ropuia leh Thlamuana an rawn lut a, an nui ṭhâw a, hrilh nawn ngai lovin an kam nam tih ka hre thei mai. Ka pasal zu in hi a nawi ru ṭhin si a, ka lo íp deuh.

"Novi..." tiin min rawn hnaih a, a nawlpui an haw zo tawh a, chhungkhat hnaivai deuh chauh an awm tawh.

"Eng nge i va in leh kher a?" A beng bulah ka ti sap a. Nui suk chung hian, "I u in show rawh ti miau hek, mâkpa ka nih hi, mâkpa rangkachak aw.." a'n tiah. A ṭawng ring lo hlauh zawk.

"Nawi hlek suh ang che," ka ti hlak a, ka ṭawng ring ṭha ngam chiah bîk si lo.

Ani lah chuan, "Yes, ûte.. ka in belh tawh miah lovang," tiin a sam a tuai puat a, ka u Ropuia te ṭhutna lamah a phei ve ta a.

Vawiin ata tawh mi mit a la a, tunah pawh thingpui lum nula pahnihin an en leh zuk zuk tawh. Kan Thlamuana hi chu ka pasal mah ni se, a iaiawm loh ve thlâwt a ni.

Lunglei lamah an mâkpa rangkachak a ni a, Aizawl lamah an monu rangkachak ka ni ve thung.

U Mapuia kha tawng lo ila, Thlamuana hi ka pasal a ni kumkhua dawn si lo. 

Ka chanpual ka hlenna kawngah inchhirna tur a awm ta lo. Tu emaw Chanpual kha ka lo ni ve tlat si a...

310123

Shadow of the life

B+>[BeckirafARenthleI]<+®®