28.KA CHANPUAL [A Becky Rafa Story]

28. KA CHANPUAL (Last)

Ziaktu: Becky Rafa Renthlei

-B®®

(Recap)

Lunglei lamah an mâkpa rangkachak a ni a, Aizawl lamah an monu rangkachak ka ni ve thung.

U Mapuia kha tawng lo ila, Thlamuana hi ka pasal a ni kumkhua dawn si lo. 

Ka chanpual ka hlenna kawngah inchhirna tur a awm ta lo. Tu emaw Chanpual kha ka ni ve tlat si a...

-B®®

Ka fapa Lalnunfima pawh Pathian hruainain kum khat a lo tling ve ta a, ka nu Biakliani lo sawi lâwk tawh ang ngei khan chhungkuain chawhlui kan kîlho a, kan kim ṭhep ṭhawp hle.

U Atei te nupa pawhin an ngaihpawimawh êm avangin he hun hmang tur hian Mamit aṭangin an chhungkuain an lo chho vang vang a, Atuni pawh chuti tho. 

"Nano, ka hna aṭangin min bân dawn mah se, ka lo chhoh theihna tur a nih chuan a pawi ka ti lo," a ti hmiah. A vahpa a ngaiin a duat a, an u Mama fapa hi atu ate mahin an thlahthlam lo a, duat rawn a hlawh hle.

Ka sawi hmaih miah loh tur chu Atuni bialpa Lawngtlai ami kha a fel viau a, kan inah chaw vawi hnih a rawn ei tawh a, a nu leh pa pawh an nikhua riau an ti, a pa kha Liansangzuala ni tain ka hria; a nu Naom Lalmuanpuii a ni a, Lawngtlaiah Wholesale dawr lian zet an nei nghe nghe, phirpui mipa a nei bawk. Chu erawh kan la hmu lo thung. 

A tawp a tawpah Atuni (Lalthanpuii) pawhin amah hmangaihtu dik tak a tawng ve ta a nih hmel. Kum tawp lamah 'Tiam tlat e' an tih ka ring a, a bîk takin ka nu leh pa an lawm a, Beer in tawh lo turin an hrilh ngun khawp mai. A sim thei turah ngai ila...

Bawihpuia pian hnu lawkah u Mapuia kha a boral tâk avangin a thih cham kum khatnaah chhungkua kan ṭhu khâwm dawn a, a hma zan aṭangin kan boruak a nuam viau lo.

Thlamuana ka pasal ni mah se, a u thihcham a lo thlen dawn meuh chuan kan inkâr a hla dâwrhin a lang. Inhniala inhau phei chu kan ni lova, a la rei lo lulai ve êm atin ni! Zan lamah nise zan tîr aṭangin mawnga hawlh ang mai hian ka phi sek a; ka thinlung a na thar leh a ni ber. Thlamuana pawhin zu a in leh tâk kha! 

Ṭawngkam khat mahin ka hau lo a, "Novi, Mama kha theihnghilh turin ka duh lo che; mahse..." tia ṭawng zawm lo hian kan nupa room aṭangin a chhuak nulh.

Ni e, atan a û kha thîk a rem ngang si lo a, keilah a khât tawkin ka mittui a tla reng bawk nen awm dan thiam a har ve ngawt ang.

Hemi zan hian ka nu ten bawihpuia an riahpui daih si a, kan nupa tan a nuam lo vel vek. U Mapuia ka hmangaihna leh a thihna hian ka nunah nghawng thui tak a la nei tlat si a, chuti maia tih reh theih ni bîk hek suh; mitmei veng chungin ka ṭap a, zanriah nise tih tham ka ei lo. 

Muhil thei lovin ka tho chhuak ta nge nge a, Thlamuana kalna chin ka hre lo a, u Mapuia chahbi kha phawrh chhuakin a room lamah ka phei ta a, ka mitthlâah a hmel a lang zut zut a, khum kotlangah ṭhuin ka ṭap chhuak ta nge nge a. Ka insûm thei ngang lo chu a ni e.

Min lo dem tâwk in awm pawhin indemawm loh a nia. Ka tana a hmasaber leh ka innghahna mipa a ni ṭhin a, min lo duat tawhna te, min ngaihsakna zawng zawng leh a awm tawh loh hnua ka hrehawm a la hlauh zia te ka ngaihtuah hian insûm a har êm a ni. A nau, a unaupa neihchhun kutah min la dah tak ṭâwk ṭâwk a, ka hlim te kha a duh asin.

A thawmhnaw ka en kual a, ka thinlungah a thar lo thei lo. "Ka hmakhua ka su kaw dawn lo tih hriain, ka hlim theih nan leh nun pangngai ka neih ve theihna turin engkim min ngaihtuah fel sak a, ka tana i hlutna hi nitin ka hre thar ṭhin," tiin ka ṭap leh a, ka mittui a hul thei meuh lo.

Zinglam dâr khat a ri tawh a, u Mapuia khumah ka la awm reng. Chutih lai chuan Thlamuana a rawn lût a, ka ṭhutna bulah kut hnungsuiha ding chung hian min en reng a, zawi sup leh fiah fak si hian, "Mama'n kum hnih hnua i chhiar tur tiin hei hi Atei a kawl tîr a, i awm dan en hian tunah chhiar zawk mai rawh, ka farnute pawh i ti hrilhhai vek chu a nih hi, an duhsak tehreng che nen," ti nghutin lehkha inthlep a rawn theh thla a, ka che map lo.

"Atei'n zanin tlaia i awm dan a hmu veka inrâwn khawmin a hun la thleng chiah lo mahse; chhiar tîr ngei ngei rawh tiin min rawn call a, ka zuk la ta a nih kha," ti leh sup chung hian a chhuak zui nghal a, koh din pawh ka tum chuang lova, ka mâwl húih a ni ber.

Che miah lovin ka la ṭhu reng a, lehkha inthlep chu melhin, eng thu tak inziak leh ang maw! U Mapuia thil tihdan hi ka tan hriat thiam chi pawh a ni zozai lo.

Chhiar châknain min tur et et tho a, la kângin ka chhiar ta a.

"Nano, a hun laia sawi vek a rem si lo a, tihian ziakin ka dah zel a, i u Ropuia'n pakhat pêk tur che a la nei ang, a duh hun leh ṭul a tih hunah a la pe dawn che nia" tih ka chhiar lai chuan, "A va mak teh fo ve aw" ka ti rilru nauh nauh.

"Mi kan hmangaihna hi kan duha reha awm lo thei leh duh loh theih thil a ni lo a, Thlatea enkawlna hnuaia awm tur leh venghim tur chea ka dah hi ka tisual dawn lo tih ka inhria. A chhan chu mi rilru tluang leh hmangaihna ngah tak hmeichhia i ni a, i tleirawl lai ata tawh i nungchang zira hrechiangtu ka ni tih i hriat ka ring," tih ka chhiar thlen chuan ka nu hnenah 'Min neih tir tawh mai rawh u' tia a dil hun lai te leh ka nuin, "A la naupang em mai'' tia a chhân lai kha ka ngaihtuah chhuak iar iar a.

Ka chhiar zawm leh nghal vat.

"Ka nau nen in inhmuh a pianga Thlatea mitmeng danglam ṭhin kha ka hai lo asin. A û min zahin min hmangaih a, nang a lo duh ve che kha hrehawm a ti tih ka hria, zu a in nasat phahin a zin ta sek a nih kha. A danglamna nitin ka hmu a, inthup tumin ṭan a la nain keiin ka hai si lo, ka zawt chhuak ta nge nge a, MSCI -a kan kal hmasak ber ni khan thu ka tiam tîr ta a ni, hun rei ka nei dawn lo tih ka inhriat vang a ni pakhat.

Fapa kan nei ta a, engkim rokhawm leh thil ṭul buaipui ngai pawh amah ka tihtîr ta vek a, nang chu i la naupanga thil kalhmang i hriat loh bâkah inneih certificate nei kan nih loh avangin ka fapa hming ka dah a ngai ta a ni. Thlatea'n a hmangaihna che i hriat thiam hun a thlen ve mai beiseina nen kum hnih a kianga i chén theih nana dan zama ruahmanna siam ka ni a, min dem lutuk suh aw, keimah avanga i tawrhna zawng zawng dah ṭhain ka nau hmangaihna che hi pawm thiam tum la, unau kan nihnaah leh i rilru put hmang chhut thiamsaktu che Lalrinkima hian engtikni-ah emaw chuan ka nau hi i la hmangaih let ve theih ka beiseiin ka ring nghet tlat a ni.

Ka nu leh pa rilru hretu ve ve kan nih angin engkim ka zawh hman tâk loh leh ka âiawh turin ka nau hi ka ring ngam thlap a. Inthiam lohna nei lo turin ka chah nawn leh a che." tih ka chhiar zawhah lehkha chu ka thlep ṭha mawlh mawlh a, a dang chhiar belh leh ka mamawh tawh lo. 

Lehkha thiam, ngaihtuahna sêng zau leh thil chîk mi u Mapuia khan ka hmakhua a ngai mai nilovin a hmangaih êm êm a unaupa a ring nghet tlat a, Lalthlamuana'n a hmangaih dik tak a neih ve theih nan rem a ruatsak tih ka pawm thiam thei ta.

Ka mittui ka hru hul sawk sawk a, u Ropuia hnen aṭangin eng dang nge ka hriat belh leh ang tih ka ngaihtuah duh tawh lo a, ka chhiar chinah hian ka rilru damna tur leh amah phatsan anga ka inngaih tlat lohna tur a ziak tel miau a, lungawi takin ka pasal Thlamuana chauh hi hmangaih lêt theih ka tum ve tawh tur a ni.

Amah u Mapuia khawvela awm tawh lo leh kan tih nat phâk tawh lohna hmuna awm, ngaia mittui far tîr reng âi chuan, min hmangaiha min dawmkángtu ka pasal Thlamuana rilru hliam mêk hi thawidam ka tum zawk dawn lovem ni.

'Thihnain min ṭhen hma loh zawng' tia ka tiampui ngei khan thinlung taka ka pan hun min nghâk reng si a.

Mâwl ka inti lutuk a, ka ṭhutna aṭanga tho chhuakin rang tak hian kan nupa room-ah ka tlan phei a, Thlamuana khumah a lo bawkkhup a, ka lainat thar hle. 

A vawikhat nân, 'Thlamuan' tia ko lovin, "Thlate..." ka ti sap a, a che map lo.

Sawi nawk nawk chungin ka ko nawn leh a, a rawn zangthal a, a mit a hnâwng chap! 

"Ka tihpalh aw.." tiin ka kuah a, min kuah lêt miah lovin a insangmar ṭawlh ṭawlh a, "Duh tawk rawh, Novi..." a ti sup a, min en lo hian sir lam a hawi zui daih. Zanina ka awm dan khan a tina hle tih ka hre mai. 

Ka inthiam loh êm avangin a bulah ka inthawlh sawk sawk a, "Min hnaih suh.." a ti zawi ruih.

"Inbia ang.." ka ti ve tlat a, a che duh ṭhak lo.

"Khawngaih takin inbia ang.." ka tih leh tâkah chuan a rawn ṭhu chhuak a. 

"Mama hmangaihna che ang kha engtikah mah ka pe ve thei dawn lo che, amah ka ni tlat lo a, ka ni ngai dawn bawk lo," a ti nghut a, hnunglam aṭangin a kâwngah ka kuah a, "U Mapuia ni turin ka duh lo che, ka duh ngai hek lo ang," ka tih chuan ka hmel en tumin a rawn inher ve ta a.

"I tan engmah ka ni ve hleinem, ka hmangaihna hrethiam lo tu chu kal rawh se, ka na kumkhua dawn lo a nia, i fapa pawh i hruai thei ang, Mama khan a lo tisual a ni." a ti nghet charh.

"Thlamuan..." tiin ka thaw chhuak halh a, "Min la hmangaih ve mai a ring kha a ni a, a tisual let dèr a ni, ka kal tîr tawh ang che, kum khat, kum hnih..a aia tam pawh nghâk che ila, a tawpah beidawnna bâk ka hmu dawn lo," mittui khap per sawk chunga tiin a ding chhuak hluai a, ṭawng nachang pawh ka hre lo.

Thawmhnaw a inbel zui mawlh mawlh a, ka lo thlir tawp. 

Â... han thléma a thinlung hneh theihna tur ṭawngkam han chhâkchhuah ka thiam bawk si lo, ka va hah tak.

"Thlamuan..." tiin ka ko leh ringawt a, "Umn" a lo ti dút.

"Kal suh, min kalsan suh..ih.. hetiang bâkin chelh dan che ka thiam lo," ka'n ti leh rih. 

Zawimuangin a rawn inher a, "I zalen thuai theih nan ṭawngṭai tawp rawh, hmangaihtu der ka ni lo a, a tak leh a lem thliar thiam lotu chuan a chân ang..." tiin a chhuak zui ta a. Ka hrilhhai zia chu pui tak a ni.

Zankhuain a rawn lêt tawh lo a, ka tlaivar ṭhak. 

A luhlul zia ka hrechianga umzui emaw chelh din chi a ni rih lo. Keimah ber ka pawimawh tawh a, a thinlung sak leh hliam tidam turin ṭan ka lâk a ngai ve dawn ta. Ani leh zel chân ka tum tawh lo bur.

Khawvar tirhteah ka tho chhuak a, muhil lo na na na chu ka mit a bûiin a thial ûrh. Inhnuai Sofa-ah Thlamuana a lo muhil a, tihharh hlau takin thlanmualah ka kal ta a.

Vawiin hi u Mapuia thihcham a ni a, ka hringnuna a tawp nan thlah liam ka tum a ni ber, a duhthusam hnuhnung kha amah avanga intihrehawm tawh lo tur leh Thlamuana hmangaiha a nau tana inpumpêk tura min duhna ka tih hlawhtlin theih nan a thlana kal ngei ṭhaa ka hriat vang a ni pakhat.

A la hma bawka rannung thawm riva hriat tur a la awm zauh zauh.

Thlanlunga a hmêl an nem kái vawi tam ka lo ṭahpui tawh chu ka thlîr vang vang a, "Ka tana ruat i ni lova, kei aiin chunglamin a mamawh tawh zawk si che a, nang nena hun reilote chhunga hringnun kan hmandunah ka inchhir ngai lo ang, min hmangaihtu i nau tana ka tih theih sâng ber ka mawhphurhna hlenchhuak turin ke ka pên tawh dawn a nia, thlamuang takin châwl tawh rawh le, ngaihtuah ka ngai tawh lo a nia aw.." tiin ka phun sap sap a, ka ṭah pawh a chhuak tawh lo rêng rêng.

U Atei'n min rawn koh chuan ka dâk chhuak thuai a, bawihpuia a pua a, "A ṭap nasa lutuka a patea pawhin a thlêm bâng hleithei lo, hetah i kal a nih ka ring rêng a," tiin ka ṭhutna bulah a rawn ṭhu a. Ka fapa ka lo ban vat.

Rei ngial ka thlema ka awih hnuah a muhil ve ta hrâm. Kan nufaa kan inbuaipui chhungin u Atei a lo ngawi reng a, a mittui a hru fap fap tih ka hmu reng. 

"Nano, ka sawi ve phâk a ni lo nain Mama vanga tianga awm zêl tur hi i ni tawh lo, i hmakhua ngaiin engkim a ruahmansak che a, Thlatea i ti khawngaihthlâk lutuk, atan a û a ni a, mipa dang chu nise tuna i awm dan vang ringawt pawh hian an kalsan tawh ang che, inthing harh la, hmalam pan ve tum tawh teh, thil sâwt lova inhambuai reng a ṭha ngai lo ve.." dam thlapa tiin a rawn ding chhuak a.

"Ni e, ka lo â êm a, u Mapuia chu a awm tawh lova a awmna a nuam tawh bik si a, a duhthusam tihlawhtlinga chhungkaw thar din hi ka tih ve tur a ni. A nau leh kei min hmangaihna a hrang hlak a, kan hmakhua erawh a ngai ve ve si, Thlamuana nen kan inkâr pawh ka chingfel ang," ka ti ve ta a.

"Khati tur kha a ni reng a ni. Kan unau tana i hlutna hi theihnghilh lo la, chhungkaw huikhawmtu nih hrâm tum ang che aw," tia a sawi leh hnuah in lam panin kan inzui haw ta a.

Tûkṭhuan an lo ei diam tawh a, tumahin ka kalna chin min zawt lo. An fapa thihcham kum khatna a ni a, u Mapuia hmangaihtu te vek an nih avangin tuar bîk riau leh na bik ni anga ka lo inhriatna te hi ka ât vang a ni. Kei aia an nat lohna chhan tur a awm lo. U Atei nen chaw kan bâr ve luklak a, vawiin hian inah kan awm tawp dawn tih ka pain a sawi.

Thlamuana awmna Diki ka zawt a, inchunga a awm thu min hrilh chuan naupaw chungin ka chho ve nghal a.

Kan nupa khumah lo ṭhuin kan inneih thlalâk Jeru Khiangte Photography-in a bîk liau liaua min siamsak kha a lo en dan dan a, ka thawm a hriat pawhin a rawn dâk chhuak chuang lova; a bulah ka ṭhu thla ve ta a.

"Kan inneih ni khan en pawh ka en ṭha ngam lo che a," tiin bul ka ṭan a, ani a la ngawi ngul.

"En teh, hetah hian i hmelṭhat zia hi..." tiin inneih pawmpuina certificate min hlan lai thlalâk chu ka kâwk a, zawi sup hian, "Ka hmelṭha sa reng alawm," a ti duh chauh.

"Thinrim tawh suh aw, i rilru tur ka lo ngaihtuah phâk lo a ni, ka â em a, ih..sawi dan tur ber pawh ka thiam lo, inṭhen ka duh lo a nia," ka ti sap a.

"Ṭawng ṭawng lo khan en ve mai mai rawh, Mama bâk i rilru luahtu an awm hleinem, kei chu i tan engmah ka ni lo tih ka inhre tawh, a â zawk chu nang nilovin keimah ka ni," tih pahin Album chu ka malchungah a rawn dah a, a ding chhuak zui nghal.

"Thlamuan, inbiak kan ngai.." ka ti leh a.

"A ninawm aw..ka ning tawh, engkim hi ka kham vel vek, i nu leh pa te nen in inrem tawha haw leh i duh pawhin ka dang dawn lo che," a ti hmuk hmuk bawk si.

"Ka haw duh si lo a..." ka ti sap a.

"Engvangin?" tih pah hian chîk zetin min en a, "Pasal tel lova fa dang pawm leh ka duh tawh lo, i tel lova awm ka duh lo bawk," ka ti zawi raih a, "Ka hmangaih che" tia sawia a lung tih awi ka duh tehreng nen ka zak tlat. A va buaithlâk e. 

Ani lah chuan rang fahran hian, "I rai em ni?" a'n ti leh tawp a!

"Tunah te chuan ka la hre hleinem, i chêt tawh dan kha ngaihtuah lêt la ka rái loh i ring bik ami?" Ka ti nghat a, a nui huk.

"Zomuanzual leh..." tia phun hluk chung hian ka bulah a rawn ding a, "Ka hmangaih che, i tel lovin ka awm duh lo, ka duh che, te ti ṭha ve mai ta che, khatianga ka rilru hneh tum te chu a nêp thlâk lutuk," a ti bawrh bawrh a.

"Ka zak alawm, ka zak a ni mai, ka ning...ka kal dawn.." tih leh pên ka rual a, a rawn che chhuak vut a, ka bânah vuanin, "I han nawi dan em em hi, ka lakah zah a ngai em ni, pumkhat kan ni alawm..â lutuk.." tia a sawi zawh rualin min kuah a, ka lo thaw halh.

"I â fe zawk, i hre veka min sawi luih tîr kher i tum.." ka'n ti chiah chu za lutuk hian a nui ta a, "Umn..a ṭha e, a ṭha vek e.." ti leh sup sup chung hian min kuah ta vang vang a, ka thin a lo phu dup dup.

Minute tam fe ding chunga min kuah hnuah, "I naupanna hi ka lo theihnghilh leh ṭhin, bawihpuia kha kan khumah mut la, Mama room-ah puitlin i zir a ngai a nih kha, min hmangaih thu i sawi chhuah theih nan ka pui ang che," a ti ta a, ka lo nui tawp.

A hnuah kan fapa ka puak lai chu lain dimtê hian khumah a mut a, "Ânu nen i nau tur kan siam dawna lo harh rih suh aw.." nui lek leka a tih chuan, "Thlamuan..." ka lo ti chhuak hap a.

"Hawh le, i hriat rengnaah ka hmel, ka hming leh ka engkim a châm reng theihna turin ṭan kan la ang e," tia a sawi zawh rualin min pawm nawlh a, a u room lamah min pawm phei ta a, a nghawngah nghet takin ka lo kuah ve mai.

Ni e, a awm lo zawk ngaia indawm kun reng ai chuan, ka pasal tilawm tur hian thâ ka thawh ve mai tur a ni.

U Mapuia khumah tisa châkna ni lovin, nupa te chauhvin- a an tih tur hmangaihna kan chen dun ta nge nge e. Ka thiam loh min hrilh a, dawhtheihna nena min entu ka pasal mit thim raih chu ka melh chho a, a chêtna avanga a sam kir rawn uai thla chu huikian sakin, "I sam hi chu ka la cut sak ang che maw le," nui chungin ka ti a.

"Inhmeh min tih vang a nih kha aw.." a'n tiah. 

A sawi dik chiah bawk. Sawisel sak fo ṭhin mahila a inhmeh tih ka hria a, amah ti Thlamuana tu a ni miau alawm.

U Mapuia khumah inkuah rialin kan mu a, nichina kan inrem lohna leh kan inkâr hnawk ru zet kha vawm bo ang duak a ni ta. 

"Novi, i hmel ka hmuh hmasak ber ni khan ka duh ang hmeichhia ka hmu tih ka inhria, mahse, Mama ta lo chuhpuia tibuai duh tur khawpa mipa nêp ka nih loh avangin inthup reng renga ka nun a ngai a, a hunlaia ka hrehawmzia kha ngaihtuah lêt pawh ka peih tawh lo," tiin kan inneih zungbun a tuai a tuai a, ka hmuh tirha ka ngei thu leh ka huat thu ka hrilh ve tâkah chuan, "Min hua la tih ka duh ber, sual ka chhuah belh hret a nih kha," a ti duh lek.

"U Mapuia'n ka chungchâng a zawh hmasak ber chein engtin nge i chhân?" Tiin ka hriat châk ber chu ka zawt ta a.

Chal chuar zauh chung hian, "Nanovi i en dan hi ka hai lo a nia, a huat belhchhahna tur chein awm tawh suh, inthup i tum zawh poh leh a hriat telh telh ania, fimkhur ang che, tiin min hrilh phawt a, Gujarat-a ka zin hnu khan ka rilru put hmang thlâk tumin i hmel hmuh loh hram hram tum khan ka hêl rei teh asin. Mahse, Mama a fing êm a, min zawt nawn leh ta a nih kha," tiin a hun lai ngaihtuah niawm tak hian a chhîng vang vang a.

"A thinrim em?" Tia ka zawh leh chuan, "Thinrim e, kut min thlâk alawm," a ti ta a. Ka lo ner sawk.

Tihian a sawi zawm zel a, "Dam chhuak dawn lova a inhriat khan min ko leh a, nang ka hmangaih leh hmangaih loh che min zawt a, zêp awm lovin ka rilru dik tak ka hrilh fai vek a, khata ṭang khan engkim kan sawi pawp a, ka nu leh pa rilru dik lo leh i laka an ṭhat loh thu sawiin ka kutah a hlan ngam ta chauh che a nih hi..." ti lehin a thaw hawk a, nghet takin ka lo kuah ve thung.

"Thlate, Nanovi hi ka tana Pathian ruat a ni lo tih ka pawm tawh a, kan kal kawng harsa zet tawpna tur hi thihna a nih dawn avangin i kutah ka dah ang, a chhungte nen suihzawm ngei tumin ṭan la la, Ropuia be pawpin râwn zel bawk ang che, hlim taka in awm theih nana in kalkawng sial saktu cheah min ngai la, inthiam lohna nei hlek suh ang che, tia min chahin i lehkha tur ho kha a ziak ta a ni, ka sawi i awih dawn lo tih a hriat vang tho a nia; i u ngei pawh phone kaltlangin engkim a hrilh vek," tia a sawi zawh meuh chuan a mit a hnâwng chap a, a lung a chhe ve deuh tih ka hre mai.

U Ropuia'n u Mapuia thu zawm tur leh Thlamuana ring tlat tura min chah fo chhan kha hetiang vel vang a lo nih chiah hi. Ka hrethiam uar uar tawh.

Ka fapa ṭap ri kan hriat tâk avangin, "Intifai hmasa la, ka lo va buaipui ang e," tiin min kai tho a, ka chala a fawh zeuh hnuah bawihpuia ngaihven turin a chhuak ta a.

Bathroom lamah kei ka lut thung a, ka hlimna hian Van tawng êm lo mah se, ka Chanpual ka hlen chhuah avanga hmangaihtu dang ka tawng leh ta hi Pathian remruat liau liau a ni.

U Mapuia vanga kan natna te reh fai vek lo mah se, nunphung pangngai zawhin kan kal chho ve leh ta a. A thih cham kan hman zawh meuh chuan kan nupa boruak a nuamin a hahdam ta. A hma ang chiah khan min ngaihsak em em a, kan fapa pawhin kal a zir ṭan ta bawk nen chhungkua kan hlim tlâng hle.

Ka nu Biakliani pawh a zia chho ve tawha inchhung dungah tiang nen a bâi suih suih a, Atuni leh u Atei a hau ngam ang chiahin ka dik lohnaah min hauin min zilh a, min zilh tamna ber pawh eirawngbawlah ka nikhua lo lutuk hi a ni deuh ber. 

"Diki, Zomuani'n chhuat nawt se, eirawng bawl zawk rawh," a tih châng a tam. Ka ngai haw hran bik lo.

Lunglei lama ka nu leh pa nen kan inbe fo a, auMami vanga zahna an tawng zing lutuk hi ka khawngaih ṭhin. U Ropuia nupui Faki a mil bawk si lo a, Chhawmdawlna inah dah an tum tih an rawn sawi a, ka rilru a kal thui khawp mai.

"A ṭhat phahna tur a nih chuan dah mai rawh u, khatianga a awm zel chuan chhungkua in keh darh hun a la awm ang," tiin ka ngaihdan dik tak ka hrilh tlang hmiah.

Thlamuana pawhin u Ropuia hnathawh tur tlem azawng a ngaihtuahpui a, Sethlunah retaining wall siam tih vel nitain ka hria; ka nu leh pa an lawma Thlamuana pawhin remchangah kan lo zin ang tiin a hrilh ve bawk.

U Ruata leh u Kimtei te nupa nen pawh kan la inpawh tlâng zel a, kum thar lamah an fanu kan hnenah an rawn dah ve dawn a, Johnson college-ah kal tîr ve an tum vang a ni pakhat. An ṭhiante nen in luaha awm hran tîr âi chuan tiin Thlamuana an rawn bia a, kan lo 'Aw' hmak.

Kan inneih aṭangin thla 5 a pum ve tawh a, hna thilah Thlamuana a zin chhuak zing leh ta malh malh khawp mai, bawihpuia nen kan inawm nitin a, Atuni pawh a hnaah a buai bâkah bialpa a inti nei ve tawh a, a hma anga zing khan min call ta lo deuh. U Atei te chhungkua erawh chu Sunday hmanga lo chhoh zeuh zeuh an ching a, kan inhmu zing ang reng.

Ka nu leh pain in leh lo, rosum chungchang an sawi lang ta meuh lo. Bawngkawna kan in pawh miin an luah full vek tawha a luah man erawh chu ka nu leh pa kutah a lut a, "Zomuan, mamawh in neih pawhin ngawi ral mai lo khan sawi ṭhin tur aw, bazar leh inchhungkhur mamawh hi chu i kutah awm tawh rawh se," ka nuin a ti ve ngei a, pawisa min pe mai zel.

Tûkkhat ka zing tho chu ka ni nghulh a, tho chhuak peih lovin dar 10 thleng rak ka mu tawp. Ka nu hi a khêl nâ avang hian a duh angin inchungah a rawn chho thei tawh lo a, Diki a rawn tîr a, ka nuam lo tih ka lo sawi chuan in entîr turin min tur sek a, ka hne leh thut zel.

Thlamuana zin hlan a nih avangin ka nawm loh thu pawh ka hrilh lem lo a, min ngaihtuah leh dawn êm asin. Siaha lamah an kal teh daih a, kar tawp lamah chauh an lo haw ang. Mahse, ka nuin a lo va hrilh thawt thawt chu niin! Min rawn call nghal a.

"Novi, eng tin nge i awm a, ka lo haw mai dawn em ni?" A rawn ti ta chiah bawk.

"Eng mah nâ ka nei lo, min ngaihtuah duh suh," ka lo ti liam puat a, a ngaihdan a lo ni lo deuh nge, "Engah nge ka ngaihtuah loh teh lul ang che, ka rawn haw ang," a ti hmiah.

'A ngai lo' tiin ka hnial ve tak naa lungtum biak ang vel a ni. A ngawi hmiaha phone a off zui daih. Kan Lalthlamuana zia hi chu khati tlat kha a nia, na satliah phei chu sawi rik chi pawh a ni lo.

Ka inrinhlelhna tifiah turin test kit-ah a positive kalh a, tumah ka la hrilh duh lo. A chhan pawh a hmain beiseina nen vawi hnih ka test a, engmah a nih loh avangin rilru a hrehawm, ka thlatin bi ka zawh loh hmasakah Thlamuana'n test turin min nawr sek a, engmah a awm tâk silovah khan, "Ka chi a hût a niang, kan tih tam nen," a'n tiah. Nui chunga sawi ni mah se, ka tan a nuam viau lo.

"I hmanhmawh a nih kha, Zû i nghei phawt loh chuan kan pâi ka ring lo," ka lo ti ve zaih a.

Ani lah ta pek chuan, "Mama nen pawh vawikhatnaah i rai nghal tho alawm, ka hre vek," a ti sup a, a va han tiho ṭhin tak.

"I u-in a sawi em ni," ka lo ti a, a bu nghut.

Puitling angin lang ṭhin mah se, a naupangber a nihna hi a hriat ve tho.

A sawi ang chiahin a tûk zan dar sarih velah Thlamuana a rawn thleng hlawl a, a lo haw dawn tih a sawi naa a hun tur a sawi loh avangin, ka nuin, "I rawn haw dawn te chuan sawi ve ta che, kan ngaihtuah tehlul che nen," a lo ti a.

Ka nu pawh en lo hian, "I va ṭhat hmel si ve," tih pahin ka ṭhutna bulah a rawn ding a, "Ka ngaihtuahawm loh tih ka sawi reng alawm," ka tih chuan ner nawk chung hian, "I ngaihtuahawm reng, nitin ka ngaihtuah che a, ka ngaihtuah zel bawk ang che," midang awm ve laiin zu han ti a, kan lo nui tawp.

Diki'n chaw ei a siam a, a ei kham fel awrh tihah bawihpuia pawm chung hian kan awmnaah a rawn phei a, thutak deuh zawk hian, "Bawihpui, nau i nei ve ṭêp tawh a nia, hetah lokal teh.." ka'n ti chiah chu ka nu leh pa chawp chawpin an meng phâwk hrâ mai.

Thlamuana hmel ka en a, a lái ve deuhin ka hria. Ṭawng nachang pawh hre lo hian min melh reng ringawta a va han nikhua lo e...

Nui var var chung hian, "Damtea kan awma Pathianin rem a tih chuan, tun aṭanga thla riat a ral leh hunah bawihpuia'n nau a nei ve tawh ang," ka ti ta a.

Ka nuin, "Tun ṭum chu hmeichhia han ni hlauh se," a lo ti zauh a, ka pa ve thung chuan, "Thlatea fate kan hmu hman ve dawn a va ang ve," tiin a nui suk.

Chumi hnuah kan room lamah kan inzui chho a, "I râi tak tak em?" Inring tawk lo zeta tiin min dinchilh a, nui hak chung hian, "I zinnaah zu i va in lo a nih ka ring," tih pahin test kit chu a hmuh theih tur hian ka phawrh lang a, nui ruh ruh chung hian, "Ka in lo tak tak," a'n ti ngeiah..

"Novi...ka lawm e aw, i duhdan angin zu pawh ka in tawh dawn lo, ka tifiam lo a nia," a ti zung zung a, bawihpuia melh pah hian, "I patea ka ni a, i naute tan an pa ka ni thung anga, nang chuan 'Âpa' tia min koh ka duh lo, patea tu tur ka nei lo palh ang," tia nui kur kur chung hian khumah min ṭhut tîr a. Hepa tak hi chu (h)

Ka hmai bulah rawn kun hniamin, "Ka lawm lutuka sawi tur ber pawh ka hre lo," a ti tawp.

Zawite hian, "Ka hmangaih che," ka ti chhuak sap a, a lo hre pha tho a ni ang, "Eng nge i sawi, eng maw i sawi kha.." a lo ti sek sek a.

Ka hmangaih thu ka hrilh hun tur a nghahhlelh zia ka hriat hian ka inthiam lo ru hle. Ka hma ka lo sial lutuk tih ka hrechhuak bawk.

"Ka hmangaih che, ka Chanpualah ka lo ngai ve ngai lo che a, tih palh aw.. keimah chauh ka inngaihtuah ṭhin avangin ka lo tihrehawm rei lutuk che a ni," inhnît hraih chunga ka tih chuan min kuah vat a. 

"Novi..khatiang zawngin ngaihtuah suh, ka hmangaihna che hian huam chin a nei lo, i nihna ang anga duha hmangaihtu che ka ni asin..." a ti hniam ruih.

Kuah tuma ka lo ban chuan, chhuata ṭhu toys khal mek bawihpuia chu enin, "A pa hmangaihna ang kha pe thei lo che u mahila, ka hmangaihna che hi chu tiamchin a awm lo aw.." tichung hian amah zawkin min rawn kuah a, ka lo kuah lêt ve nghal vat.

Dam thlapa min fawh hnuah, "Ka hnathawh dan tur ka siamrem tawh ang, a zin tam lo zawnga chêt ka tum dawn nia, i kianga ka awm tam theih nan.." a ti ta a. 

"Ka nu leh pa te va call la, nangmah ngeiin hrilh rawh aw, u Ropuia pawh i hrilh ve dawn nia," ka lo ti teh daih a, a phur nasa mai. A phone phawrhin ka nu a call zui ta a.

Nupa nih hi chuan fa kan beisei ṭhin. Pasal ka neih hmain nau ka pai hmasa a, hetia Thlamuana nen kan inneih tâk hnuah hian ka pai vat lo kha ka chhungrilah nuam lo tih rûkna a awm fo a, bawihpuia awm tho mah se, ka pasal hmai ka zah ve deuh ṭhin. Tunah chuan rilru a dam ta e.

Thlamuana nupui dik tak ka niha a laka ka inpêk hnu aṭang khan mipa dawhthei tak leh hmangaihna ngah mi a nihzia ka hrechiang telh telh a, a hming Lalthlamuana a nih ang ngei hian ka thlamuanpui êm êm bawk. Innghahna tlâk mipa a ni.

'Kum hnih hnuah'

Chhungkua kan hlima kan inngeih tlân hi chuan hun a lo kal ve duak duak zel a lo ni.

Kan fanu phir te pawh a pa bulah an muhil sâk sâk a, bawihpuia a pi te bulah a riak thung a, kan khum pawh a zau ta khawp mai.

Khatia nau ka pai hnu khan rei loteah phir ka pai tih doctor-in min hrilh a, kan lawmna a thuah hnih hle. Ka nu Biakliani'n, "A pa te lam an chhun dawn ava ang ve, in neih leh hunah chuan mipa a ni leh tho ang, Atuni leh Atei an lawm dawn mang e..." nui chungin a ti a, sawi dik tak ang maw.

Atuni pawhin pasal a nei ta ngei a, an inneihni-ah ka mittui a tla hial. Liansangzuala fapa phir te zinga a upa zawk Rinmalsawma amah aia naupang zawk a nei a, an thawhna hmun Delhi-ah an chhuk leh tawh a, nau an la pai lo thung. An ngaihawm ṭhin a nia.

U Atei te chhung Mamitah an la tâng ngar ngar a, helama an in pawh midang an luah tîr ta rih a, an fate zirna avangin an rawn haw khât pharh a, phone hmangin kan inbe fo a, naute thar ena an lokal bâk kha an lo chho ta rih lo, tlêm lai deuh khan u Chhandama a lerh zuk a, an inhau ve deuh niawm tak a ni. Tunah chuan an ṭha leh tawh niin a sawi.

Ka nau neih hmasakah buaipuitu mumal nei mang lo khan ka awm a, tun ṭum chu Lungleia ka nu a rawn phei thei hlauha ka lawm hle, ka nu Biakliani nen an inhmuh hmasak ber zanah ṭawng an inchuh a, thiamthu an insawi siak a ni ringawt. Mahse, an inhaw tawh lo hi a nuam ve hranpa hrim hrim.

AuMami erawh beisei tur a awm lo a, kan inbe ngai hek lo. Chhawmdawlna inah a awm renga vawi hnih a tlan chhuak a, zú leh damdawi a tih pawlh zui bawk a; TNT lamah an sawn ta nge nge e, ka u a ni a, ka lainat lo thei bîk lo. 

Ka u Ropuia ka tana a hlutna a lo lang leh ṭhin, ka ta tur lehkha kha an lo zin ṭumin min pe ve hlawl a, a zêp rei ngar ngar a nia, "Mate, Mapuia khan a boral hmain engkim a chinchhuakin min hrilh vek a, i lehkha tur hi a dahna min hrilh a, a boral hlim khan ka la nalh alawm," tiin a sawi.

Thu tam inziak a awm lo a, a bank account kan khawih theihna tur leh a contract thawhna a nu leh pa a pêk bâng zawng kha kan tan a lo hnut chhiah vek a, "Midang kuta innghat lovin kan chhungkaw khaidinna atan lo hmang ang che u, Thlatea'n tih dan a hre vek a,  in hlim tih ka hria a nia, Bawngkawna ka in kha sumdawnna bul ṭan nan lo hmang ta mai ula, ka nu leh pa, ka farnute pahnih leh Ropuia te tan innghahna tlak nih tum ang che u.." tih a lo ni a, ka mittui a tla leh ta.

Kan hlim dawn tih a lo hre lâwk bik hi thil mak a ni ti dawn ila, a mak lo. Mifing, Lalrinkima a ni a, mí rilru sûkthlêk hrethiama zir mi a ni bawk. A nu leh pa a hua ang te khan ka lo ngai ve ringawta a teuh lo! A nu leh pa te kutah sum leh pai a hnutchhiah hran lova. Mahse, anmahni enkawla kan tuamhlawm theih nan engkim a ruahmana min suihfin a ni ber.

Û ber nihna a hlen chhuak a, lungawi a zir a, a awm tawh loh hnu thleng pawhin midangte tan malsawmna a la ni zel bawk a, "Ka û Lalrinkima kha mi mai mai a ni lo" tia Thlamuana'n min hrilh lai kha ka hrechhuak rauh rauh. 

"Novi...kan in luahtute kha ka hrilh tawh a, in luah tur dang an zawng ve tawh e, an chhuah fel hnuah Mama duhdan angin sumdawnna bul kan ṭan ang," tia ka pasalin min hrilh lai chuan kan fanu upa zawk a rawn ṭe ṭhat ṭhat a, a pain a pawm vat a, hnute pangngai an khamkhawp si lova kan buai thei hle.

Chhungkuain ngun taka kan ngaihtuaha kan sawi khawm hnuah, Bawngkawna u Mapuia in kha tumah luah tîr tawh lovin kan chhungkaw bila sumdawnna din kan tum nghet ta a ni.

Ka nu Biakliani leh ka pa Zoliana pawhin ṭha min tihpui a, sawi buai eih an nei lo.

Khawvelah hian a nuam zawng zawng neih tumin tlân ṭhin mahila, hlimna tluantling a awm lo a, duhâm lutuk te, chintawk awm lova hausak tumna te hian chhungkua a ti darh fo ṭhin.

U leh nau chhungkua inhmangaiha a ṭha lam kawng zawha inṭan tlat te hi an ding chhuak fo a nia.

Ngaihdamna hian mi rilru kawi pawh a siam ṭha thei a, tlâwmna leh hmangaihna dik hian chhungkua a suihkhawmin zahawmna a keng tel bawk. 

"Hei, eng nge i ngaihtuah vung vung a?" Tia min lo pen kawrhtu ka pasal Lalthlamuana ka melh zeuh a, "Nangmah.." ka lo tih chuan nui huk chung hian, "Dawt sawi lo mai teh Novi.." tiin khumah a rawn lawn a.

Kan inhrechiang mah mah tawh a tin ni.

"Bawihpuia hnenah, i pa hi i patea ka nia, i patea hi i pa ka ni tho.." tih ka hrilh a nia. Tiin a nui leh huk a, a va han nawi mai mai tak.

"Thil a hriatthiam hunah chiang takin kan la hrilh dawn nia, tunah chuan i fanu kha hnute pe rawh le..." ka lo ti a.

Kiai suk chung hian, "An muthilh veleh ka Chanpual ka beisei aw, lo muhil hlek suh," tiin a nui kur kur a, ka ngei thei a nia.

Kan Lalthlamuana hi chu a heti tlat zel. 

Chhang zing zetin fâ kan nei lovang tih pawh hriat va ni suh....

Ani hi zawng a 'Chanpual' hlah tum lova ding nghet tlat ṭhin mipa a ni a, hmangaihna avang leh a chhungkua humhim tura a inpêkna te, mualpho huama kê a penna leh a thuawihna hian rah ṭha a chhuah nge nge a, hmangaih loh theih loh Lalthlamuana 'Tiam tlat e' tia ka lo nei hi ka inchhir ngai dawn lo tih ka hria. 

'Pathianin a zawm tawh chu mihringin ṭhen suh se..thihnain min ṭhen hma loh zawng ' tia phun sapin amah kuah chial chung hian ka maimitchhing ve ta a...

 

010223

Shadow of the life

Note:

Ka thawnthu min chhiarsaka min ngaihthlaksak tute inzavaia chungah ka thinlung takin lawmthu ka sawi a.

Thawnthu a nih angin a dik lo deuh leh felhlel tepawh a awmin ka ring, inmi hriatthiamna ka ngen nghal bawk e. 

Min chhiarsaktu Thawnthu lawrkhawm channel neitupa chungah lawmthu sawisen loh ka bâ a, ka ziak aia ṭha leh mâm nalh taka min chhiarsak avangin ka lawm hle bawk.

He thawnthu-a Lalrinkima (Mapuia) tia kan hriat kha, ka ṭhianpa kum 2017 February-a Cancer natna avanga ropuina rama châwl ta; u Mapuia hming a ni a, ama channa leh a chanchin te ni lo mah se; a hming dik tak hawhin amah hriatrengna atana ka ziah a ni e. 

"Cancer natna awm tawh lohna hmun Van in nuamah tlansate nen lêng tawh mah la, i sakhming kan thinlungah a dai ngai lovang..." 

B+>[BeckirafARenthleI]<+®®