2.VANSANGTAWLI [A Becky Rafa Story]

2.VANSANGTAWLI

Ziaktu: Becky Rafa Renthlei -B®®

[Recap]

A hmêl, a pumrua ka en a, a nalhin a hmelṭha si. Kei, nupui neih ngaihsak lo leh hmeichhe ngaihven miah lo pathlawi hian ka nêp phal dawn em ni? A îtawm nasa mai si a. 

Tuna a landanah phei hi chuan thisen vawt khang tawh pawh minute khat lek chhunga tilum theia mâwi a ni.

"U Bartho..." a rawn ti chhuak sap a. Ka phu zawk, ka lo suangtuah leh vak pek a, a va ho e.

"Blood test kan nei ang, min zui rawh..." tih chiah ka sawi.

-B®®

Kei hi ka â ta ti dawn ila, mi â ka inti phal dér si lo. Scientific Officer ve meuhin Vansangtawli te ang hmeichhe awm herh satliah, thluak tlêm bawk si inremsiamna ka neihpui hi ka thluak lam fel loh vang ni lovin; a hmelṭhat êm avang leh a taksa itawm zet, mipa te duhzawng neitu a nih avanga hnar phal lo ka ni tih ka inpawm mai a ngai a ni.

Life line, Hospital road-ah blood test nei turin kan inphur chhuak ta a.

"Ka thianghlim vek, mipa ka la mutpui lo.." a ti lawm lawm chungin ka phur chhuak a, a mizia enin hetiang thu a sawi hi ka awihsak duh eih lo. Dâwt bâk va ni suh. 

"Inremsiamna neih i duh takzet chuan ka sawi angin awm tawp rawh," ka lo ti a. 

"Saingurpui, min ring lo vel amaw, i la hre dawn alawm," a ti ve hlak hlak a, a thisen a thianghlim nge thianghlim lo tih en chu tlâwmah a la ve tlat. Keiin test paltlang lovin inremsiamna neihpui ka duh si lo a, rei ngial kan inhnial hnuah min mamawhtu a nih miau avangin min hnial thei ta lo.

Ka hmingpum te chuan min han ko ve khanglâng a, ka nui chhuak teuh kher mai. Kan kum inthlauhna pawh a chhût ve îk lo a nih hmel.

Thisen kan test laiin a tûm búr a, ka be tuitam duh lo. Tin, mi tamna hmuna hnial emaw biak sek kha ka duh lo a ni zâwk mah. A duh loh záwngah zahpah nei lovin a ṭawng ring leh vak zel a, hnar kan hmu lian rauh rauh ang tih a hlauhawm.

Ka rin ang chiahin a thisen an lâk zawh veleh, "Nang pawhin test ve nghal rawh," a ti hmak a, ka lo nui huk.

"Test nachhan tur ka nei lo, nang anga phawhawr leh kawp kual duah mi ka ni lo a nia," ka lo ti a. Ner sak chung hian, "Zonuni te, Ruati te, innu te...u Ma" tia a sawi zawm leh hmain a hmuiah ka hupsak tawp.

Ka bialnu hlui te hming zawng zawng a sawi chhuak leh mai dawn alawm, nurse pakhat chuan min melh tawn sek a, a nuih a zat hmel hle. 

A hmui hupna ka thlah hnuah, "U Bartho pawh hi a thisen lâk ve a ngai aw.." a la ti hrâm a, rum zetin ka melh a, min lo melh rum ve ál a, 'khabe phîr inhmeh pawl tak a ni' tiin ka lo ngaihtuah daih.

A ruangâm awm dan ka'n sawi ve reng reng ang e.

A ngo hle a, a sam a kâwi chiat a, tihkir chawp a ni lo tih a hriat bawk. Hmai bial lam deuh leh khabe phir, biangsum nei a ni a, mitmeng lian lam leh hnar té fel rán a nei bawk a. A sâng ṭha zêk lehnghal! Mipate duhthusam ang âwmbâwr kawh lah a nei a, a cher lo nain 'thâu' tia sawi tur pawh a ni chuang lo.

Ka nau Biaknunga phei chuan thlahpawlh a nih a ring hial kha a ni a, a nu leh pa dik tak te hi an chin hriat ni lo mah se; thil ni thei a ni ve tho. Mipa ka nih angin ka ît a, kan indawr tawn dâwn tihah ka chiang a ni ber. A bâk thu leh hla dang a awm tur a ni lo.

A duhdana kan intest ve ve hnuah result kan nghak ta rih a, ni li hnua kal mai tur kan nih avangin a pa 'biak ve hrim hrim ka duh' tia ka sawi chuan min hnial lem lo. 

"U Bartho.." tiin a kuttin a kheuh niap niap a, a zâm ve deuh a nih ka ring. A áwm ve reng, ani ang tân chuan thinphu dup dup pawh nise thil mak a ni náng. A khawsak tawh dan a ngaihtuah lêt anga a hlauthawng tepawh a ni maithei. Kei erawh ka inhrechianga ka hlauthawng chhete eih si lo.

"U Bartho tiin min ko tawh suh, a elh lutuk, 'û' paih la, Bartho tih emaw Saingur, ti pawhin min ko mai rawh," ka lo ti teh daih a. 

"I upa êm mai, a chi loh.." rang fahranin a lo ti a.

"Bartho, tiin aw.." tia ka sawi nawn leh chuan, "Anih leh 'Sir' ka ti zawk mai ang, a awlsam zâwk" a lo ti ṭâlh a, ka'n melh rum teh ngawt a. 

A phone a kheuh ngar ngar a, min ngaihsak lem lo hian a nui leh hak hak zel a, kan bula ṭhu ve dangte'n an en duh zia te hi a inhre bawk si lo, Ultrasound titupa phei chuan a en ngun hle a, ani Vansangi lahin a lo nuih lêt ve lehnghal a, ka nghawk sawk. 

"Eng nge?" A rawn ti vin hlar a, "Hawi vak vak suh, nang nena midangin min hmu dun hi ka duh viau lo a nia," ka ti sup a, ring ang reng tak hian, "Min zahpui vak duh suh, ka virgin aw...V.i.r.g.i.n" a'n la ti zui a(h). Ka thaw chhuak hawk. A tih ngaihna tak pawh hi ka hre lo ve.

"Bartho Saingurpuia, Vansangkimi," tia kan hming an rawn lam tâkah chuan kan ding chhuak rual chiah a, "Lo ṭhu rawh, keiman ka va la ang e," ka ti a.

"Aih, aih..keiman ka la zawk ang," tih leh kal nghal a ruala a result ka hmuh hmasak a hlau hle tih hrilh hranpa ka ngai lo.

Lehkha pahnih a rawn húm phei a, hawisâng vah chung hian, "I hria maw, test ka ngai lo ang ka tia i awih duh lo vel a," intithei fe-a tiin ka hmai bulah test report a rawn vai a, kan bula tlangval kal ve mek chu a nui ri huk. Heti vel hi kan nih hmel a, a hlimawm phian e.

A result a ṭha tih ka hriatna hian ka thinlung a ti lawm pha ve riau. Tâl duhdahin a nun ho viau pawh nise result ṭha lo nei atan chuan ka ui ru deuh tlat atin ni.

An in lam Zotlâng kan pan ta a, a pa hnena sawi dan tur ka hre mang hlek lo. Ka zâwt ta tawp a.

Eng danga min chhâng lo hian, "I hnuaia training nei tur angin ka insawi, hlawh pawh ka nei ve dawn ka ti," a lo ti awlsam êt nia.

"Kan inremsiamnaah hlawh kan sawi tel lo," ka lo ti hmuk a.

"Sawi tel lo mah ila, nautê ka hlawh chhuak dawn alawm.." a ti hmiah a. Ka nui tawi tak mai alawm maw le.

"Vawikhat lekah i râi lo thei a nia," ka ti ve ngat a, za deuha nui chung hian, "Kum khat chhungte chuan ka râi em em ang, a nih loh pawhin i intifaituah min hmang mai dawn nia, hlawh min pe ang a.." a ti leh ham ham a, ka be zui peih tawh lo, sawi tur a hre si, sawi hreh a nei bawk si lo. Ka ngawi tawp.

An in kan thleng a, inthlahrung miah lo hian a pa a ko zui lâwng lâwng a, room pakhat aṭanga mipa upa lam deuh lo chhuak chu chîk takin ka lo en a, Vansangi pa chu a ni ngei ang.

"Pa, hei hi u Bartho chu a nih hi Saingurpuia Scientific officer," a ti leh deuh kher.

Polite chhuahin a pa chu ka chibai ve a, a mitmeng a dam thluam naa dawihzep hmel a pu.

"Kan Vansangi i lo chhawr dawn a ni awm a, a chanchin a hrilh tawh tho chein ka ring a, mi puitlingah i lo chher chhuak hram dawn nia," a ti chuar chuar a, sawi tur a vâng duh kher mai. Ka bûk khum nghut ringawt.

A fanu tak tak ni lo mah se, eng emaw chenah a ngaihtuah ve viauin ka ring a, ka hnena a lo awm chhan tur leh kan inremsiamna hi hre ta se engtin tak ngai ang maw. Mahse, a nupui lakah a tlatlum ngang si lo a, a fanu hian duhthlanna maksak zet a siam ta pawh hi a awm ve reng mai.

A pa hi Rinliana a ni a, Khamrângah huan a nei a, ran vulh lamah a hmuingil viau niin an sawi. Vansangi kâ aṭanga ka hriat ni lovin ṭhianpa Zuia min hrilh tho a ni. 

Pu Rina chuan a fanu a zilh a, "Helaia i awm ang mai maia awm tur a ni lo a, zu te kha zuk in tawh lo la, puitling takin awm ang che," a ti a. 

Vansangi lah ta pek chuan, "Ka hria, ka hre vek, u Bartho hian zu in mi a chhawr duh lo," a lo ti zawt zawt a, a sawi dik phian lawi si.

A hlawh zât leh a hnathawh tur min zâwt lo hi ka vanneihna a ni. Chhân dan tur ka hre dawn dér si lo. Sawi tawh angin dâwt sawi nghal mai hi ka thiam loh lam tak a ni a, amah têreuh hian a lo sawi fel leh diam turah ngai ang.

Thingpui min pe ve a, ka ngaina lo tih sawi kher lovin ka in ve ta poh a; a nu lo haw hmaa chhuak turin min hrilh ru sap a, a va hahthlâk ṭhin e. 

An in kawt thlengin min thlah a, "Kan kal dawnah min lo sawm dawn nge in inah ka lokal zâwk dâwn?" Tiin min zâwt a.

Ka sawm tur thu ka hrilh chuan a ha var rual ṭhap lang hian a nui a, chimawm a chhuah leh hmaa hawsan vat ka duh ber.

"U Bartho, i nu leh pa hnenah eng tin nge i sawi ve ang?" Tia min zawhna chu ka lo la ngaihtuah leh pek lo. Ka rilru let but khan blood test nei tura hruaiin kawnglakah inremsiamna ka neihpui ta ringawt kha a ni a, ka chhungte hnena sawi dan tur lam reng reng ka lo ngaihtuah tel si lo va, ka ngawi kur ringawt.

Chutah, a mitmeng pawisawi lo zeta min melh kiau chung hian, "Kum khat atan awmpui turin ka la ti ve tawp mai rawh," amah zawkin a ti ta a. Nuam lo ti hmêl a pu ve deuh.

"Khalamah kha chuan buai a ngai lo aw.." ka ti satliah a, Car-ah ka lut zui daih. Sawi tur ka haihchham ve ṭhin êm a ni. 

Nêl taka inbiaa inkáwm turin ka hmuh dan a pelhê ru deuh si, tuilâi rapin ka awm a nih ber hi. Ka biak ṭhat viau chuan a huangtau ang tih a hlauhawm vei nen; atana nelawm lo thei ang bera ka lan a ngai rih tlat.

Ka tlan liam hma loh min thlir reng a, hmeichhe dang ang chu nise ka biak loh tur number one a ni. Mahse, amaha danglamna awm leh min cho chhuak hmasatu a ni a, zak lovin ṭawng puat puat ṭhin mah se, thinlung tawk che dawt thei khawp amahah hian eng emaw mi bîk nihna a awm tih ka hmu si. 

Zan dar sarih velah chhungkua kan ṭhu khawm a, Vansangi ka hruai tur thu ka sawi chhuak ve ta.

"Bawiha, khanu kha a ngainatawm reuh em mai, Mazawni theihnghilhin ani kha ngaizawng hlauh teh," ka pain a ti teh tlat a, ka nuih a za lo ngei mai. Biaknunga pawhin, "U Sai, a fel hmel êm kha," a lo ti ve zauh a, a engah mah hmain min hmehbel an tum deuh ringawt.

"Ka tân a naupang lutuk, ngaihzawng neih ka tum rih lo," tih chiah ka sawi.

A ni lah tak a. Hun kha leh chen hmeichhe lam ngaihtuah ngai reng reng lo ṭhin khan, zankhat thilthu-ah ka chhungte râwn derna pawh awm lovin hmeichhia ka hruai lût a, ka room-ah a la riak zui. Sawi chhuak lo mah se, min ringhlel tih a hriat reng.

"Nangmahin i tâl hrang rei tawha ani i hruai ve chuan i khawhar a hnem phianin ka ring," ka nuin a la ti fo. Ka chhâng buai ta lo.

Ka hnathawhna hmuna Vansangkimi ka hruai ve tur hi ka inchhir loh hrâm ka beisei. Kum khat ka hnena awm tura kan inbiakremna kha a Pathian thu lovin thil tenawm tâwp a ni a, ka hnar phal lohna hi Setana lawm zawng a ni tih ka hre kur tho si. Rilru a dam zân lo chu a ni e.

Mizoram kan chhuahsan hun a thleng ta.

Ka nu leh pate'n min thlah fel hnuah Vansangkimi hruai turin ka tlân chhuak ta a. Motor ka hawn kher kher chu ka inchhir ru viau mai; dârkâr tam tak kan tlân a ngai dawn a, ka driver ka hruai lo lehzel nen a buaithlâk ka ti ta riau.

Khua a vâr fel awrh chauh a, Vansangi ka call lâwk tawh a, a insiam ve diam tawh tih a rawn sawi a, mahni chauha zinkawng thui tak zawh âi chuan a tihchi phian dawn mai.

An inkawtah a bungraw tlêm nen min nghâkin a lo ding ve rân a, a chhungte tumah an la tho lo a nih ka ring. A pa talin a lo thlah ve ka rin tehlul nen tuma hmel hmuh tur an awm lo va; ka nu leh pain ṭawngṭaina nen min thlah thlap laiin a ni hmeichhia zawk si thlir liamtu tur nei lova a ding ka hmuh chuan lainat rûkna ka nei deuh.

A bungrua ka dah luhsak vek hnuah, "I chhungte an tho ve miah nange?" Tiin ka zawt hlawl a, zâwi raih hian, "An tho lovang, nizanah min thlah fel tawh," a ti a, "I pa tal pawh..." ka lo ti hrâm pek a, "Khamrâng huanah a riak," a ti leh tawp. 

"U Bartho, i Motor hian em ni kan kal dawn?" Tiin min zawt a, ka lo bu nghut.

Chumi hnu chuan zinglam dâr nga leh a chanveah Aizawl chhuahsanin Assam ram pan turin kan tlan ṭan ta a, thlawhnaa chuan a lo inbeisei deuh a ni mahna. A huphurh hmel ka hmu hman vuai.

"Lungngai suh, hmanhmawhna chhan tur engmah ka nei lo a, report ka pêk hun tur ni thum hnuah daih a nia," tiin ṭha tê hian ka hrilh ta zawk a.

"Nangmah hlirin i khalh chuan i chau viau ang," a ti sap a, a zia a zâwi ve raih mai. 

Duhthlan tur dang a hriat loh vang leh an in chhung nuam a tih tlat loh vanga min zui chawt niin a lang ta ber. Fa chungchângte kha a sawi ve bawk a, tuna a zia en hi chuan ramropui kan thleng dawn lo tih a lang reng, a phûr sârh lo tlat.

Zun ram thiar leh tûkṭhuan eia kan châwl tih loh kan tlân par par a, a harha a ṭawng duh ṭhin nen a ngawi ngal a, mûk taka thil ngaihtuah hmel a pu. Biak dan tur ka hre mai bik si lova kan boruak a rit churh.

Kan zinkawng hi chu tarlang thui vak lo mai ang, kan 'Táwli' a ṭawng duh mang si lo a, a betu tur kei lah chuti hlauh. A muthlu deuh ngar ngar ti ila dâwt ka sawi tlem khawp ang.

Dârkâr sawmpasarih hnuah Jorhat-a ka in luah kan thleng ve ta hlawl mai. Ka chhungte phone hmangin tluang taka kan thlen tawh thu ka hrilh a, kawng laka kan chawlhin ka nau kan thlen chin ka hrilh zel a, Vansangi erawh kha chuan tumah a call lo a, amah rawn ngaihsaktu a nei lova, nge, a phone a switch-off zawk. Ka hriatpui lo.

"I chhungte i be dawn lovem ni?" Tiin ka zawt a, ka inchhung en kualin kan thlen tirh aṭang khan a la tei char char a, chutia ka biak veleh chuan, "Hrilh an ngai hleinem, ka awm lo tur hi an lawm zawk a, min ngaihven lo," tiin nui mah se, a mitmenga natna niawm tak lo lang chhuak kha ka hmu reng. 

"I inbual hmain lokal rawh, ka en kualpui thuak thuak ang che," ka ti ta a.

Thlasik khua a la nih avangin boruak a lum lem lo a, tuna ka in luah hian bedroom pahnih a nei a, mikhual pindan atana hman theih zau lutuk lo room ruak pakhat a awm bawk a, Choka, bathroom pahnih leh ṭhutkhawmna pindan zau vak lo a ni leh mai, kum 13 lai ka lo awm tawhna hmun a ni a, mipa ni mah ila, a phuisui ve riau a nia.

In hnunglamah Laboratory pakhat a awm bawk a, hei hi chu in lama practical class ka pekna hmun a ni a, private student 15 ka nei.

Chutia ka in leh a vel ka fanpui lai chuan a hâm bái bái a, "U Bartho, rei lotê ka muhil lawk dawn," a rawn ti a, a mit a sen râm a, kawnglakah a mut tam nen Motor a rui lo erawh ka lawmthu tak a ni.

"Inbual phawt rawh," ka lo ti tawi tuk a.

"Aw le, Sir..." tia bu nghatin a kal zui nghal a, kan thawmthaw vel kha mikhual room-ah kan thiar lût a, chulam chu a pan ve mai.

Kei pawh ka room-ah ka lut ve ta a, ka chau lutuka inbual hmasaka mut ka duh ve tho avangin muang khawtlai lovin ka inbual ve ta a.

Bathroom-a ka la awm laiin Vansangin min lo ko vak vak a, "Eng nge ni?" Tiin ka lo chháwn a.

"Khawiah nge ka mut dawn?" A rawn ti heu mai.

"I duh duhnaah mu rawh," ka lo ti a. Min chhâng zui tawh lo.

Fai taka ka inbual zawhah towel vengin ka chhuak ve ta a, ka khumah Vansangi a lo mu zar a, puan a sin naa a mu ngil at at khawp mai. Ka chhuak thawm a hriat ka ringa mit khap fak fak chung hian chunglam a melh a, min en lo hrim hrim.

"Ka khumah khan mu suh.." ka ti teh tawp a. 

Rang taka rawn ṭhu chhuakin, "I duh duhnaah mu rawh i tih kha," a lo ti vin hlar.

"Room chuangah khan va mu la, mutpui ka nei thiam hleinem, keimaha mut ka duh." Ka tih chuan, ring zet hian a nui a, "U Bartho, room hranga mut ka tum lo a nia, ka hna kha ṭan nghal ka duh aw, chuti lo chu.." tih pahin khum aṭangin a rawn chhuk a, ka thawmhnaw hâk tur ka lâk lai chuan hnunglam aṭangin ka kâwngah a rawn kuah a, ka phu zuk a, ka insangmar nghal ṭawlh ṭawlh. 

"Vansang..." ka ti zawi sup ringawt.

Ani lah chuan min kuahna thlah chuang lo hian ka dul leh nâk nem vel a zût kual a, ka thaw chhuak hawk. Amah en turin ka inher ta nge nge a.

Mitmeng fîm leh fiah kâka min lo melhtu chu ka chhuk melh a, a hmel nung sar leh fai hmel takte chuan min hîp takzet.

"Vansang..." ka ti lawi rût a, chu veleh a insaseng nalh a, "Mu ang, i bulah ka mu dawn, kan thleng ve chiah sia muhil phawt ang," ti phawr phawrin a kalsawn a, ka khumah a va mu leh thâna ka nui hul huk.

Ka nupui tih loh kha hmeichhe dang tumah ka hnaih leh tawh lo a, Vansangi nena kan thuthlun bawhpelh ka tum miah thung lo. Mipa ka ni a, pa takin ka thutiamah ka ding mai tur a ni. Helai thleng thlenga min zui ngam chuan a duh a hmu tur a ni tawp.

Ngawi rengin a bulah ka inthawlh ve ta a, min hnaih emaw min kuah emaw pawh a tum hran lo a, kei pawh chuti tho, inngaizawng kan ni lo a, a rûk tak chuan kan inkâr a hla dû-in ka hria.

Ka harh leh chuan khua a la var lo deuh a, ka bula mu ka en hmasa ber. A lo meng kar a, saisir zawnga mu chung hian biang dawm meuhin min lo thlîr a, ka harh tih a hriat chuan a nui ringawt. Keimah zawk ka lâi titih.

"U Bartho..." ti sapin a rawn tawlh hnai a, a mitmeng dam raih chuan chiang takin ka mitah min en a, hawisawn duh lovin ka lo melh lêt ve a. Fawh hrep ka châk zia hria se tihian min enin a la táwi khawmuang lo tur a nia. 

"Kan inremsiamna kha ṭhulh leh i duh em?" Tia ka zawh chuan a mit a khap fak fak a, ka chhungrila tisa châkna inmung mêk chu haider theih ka duh kher mai. 

"Aih, duh lo..ih..ṭan vat vat ka duh," a'n tiah. Zâm lo angin lang mah se, a hmela zahna leh nuam lo tih rûkna lo lang chhuak chu ka hmu reng.

"Ṭan vat vat i duh chuan chêt la rawh le," tiin ka puansin ka thehhlim a, nui hak chung hian, "I va han zei lo tak," tih pahin min rawn hnaih sauh a, a kut lum thar thar chuan ka biangah a rawn tawk a, ka hmai zût kual dan danin ka mitah a en ngar bawk a, a khûr ve deuhin ka hria.

A hmui sen no chek fawh châkawm tak chu tlêma tipawrh deuhin a kiai zui sak a, muangchanga rawn kun hniamin min rawn fâwp ta. 

Dam leh ngenngawl zeta min fawpin a uar tán tán viau. Keipawh ka insiam rem vat a, mipa ka nihna kâr lovah a lang chhuak mai.

A thawmhnaw inbel chhun a hlip a, a ṭawng tawh hek lo. Ka chêt ve ngai lovin ka thawmhnaw min hlihsak ve zui zat a, a nun hlui lamin ka rilru a luah tawh lo a, tuna kan hun hman dun chiah ngaihtuah tumin ka insawrbing ve ta.

Mahse, atana mipa hmasaber ka ni tih ka inhriatna chuan min chêt zawm tîr thei lo a, Vansangi mittui tling kalh leh tum ruh hmel ka hmuh chuan ka thaw chhuak hawk a, "A mak..." tiin keima hriat tham lek hian ka phun sup a.

"Chhunzawm rawh.." a lo ti sap.

Ni e, a mak alawm. A khawsak dan, a nun dan en hian mipa vawi tam mutpuia che khawlo hmeichhia ni turah ka lo ngai a, a lo ni si lo. A taksa mawina leh hmelṭhatna en hian ataka dâi darhtu ni lo ila chuan ka awihsak tawp lovang. Amah ngei pawhin a la thianghlim thu min hrilh lawm lawm kha a ni a, ka awih lo rêng bawk a, mahse, tunah a nihna dik tak ka hre chhuak ta a, ka chhungril a hlim mai piah lamah, amah ngaihsanna rilru ka pu nghal.

Bartho Saingurpuia hian nula thianghlim ka mutpui vawikhatna a ni. A hlut dan ka tehin ka sawifiah thiam lo a, ka nupui ngei laka ka hlawh chhuah loh ani hnen aṭanga ka dawng hi ka lawm loh ring suh u. Amah ka lo ìaina zawng zawng te kha a bo vek a, hlim ru zetin ka kuah hle hle a, ṭawngkaa lawmthu sawi tura kan inpawh tâwk lo erawh pawi ka ti.

Mi hi an pawnlam landan ang vek an lo ni lo tih Vansangkimi aṭang hian ka hriat chhuah phah bawk.

Saisír zawngin a mu a, a muhil em ka hre lo. A hnungzâng sei thlarh leh a vun paw phak te chu ka en kham thei lo a ni ber. 

Motor thawm bengchheng zetin ka mutui lai min tiharh a, sana ka ena chawhma lam dar 11 a lo ri tawh!

Vansangi a tho tawh a ni ang, a mutna a ruak hiau a, bedsheet-a thisen tlem val kalh ka hmuh chuan kan awmdan kha min hriat thar tîr lehnghal, ka nui suk a, thatho zet hian bathroom-ah ka faifúk lut a, ka nupui boral aṭanga ka tûkchhuak fuh ber ṭum a ni hial ang.

Choka lama ka chhuah phei hnuah pawh a hmel ka la hmu ta lo fo. Eirawng a lo bâwl diam a, kawngah khan chawhmeh tur ka lei phei nual a, a lo siam ve tih a hriat mai.

"Vansang.." tiin ka ko pah zel a, pawnlama ka chhuah chuan ka Scorpio a lo ding tawh reng reng lo! Step-ah ka pên thla pâwk pâwk a, a hminga ko chungin ka hawi kuala a reh hian a reh tlawk tlawk. 

Tanky dahna bulah bucket leh surf a lo awm a, a bul vel a huh chiar dup bawk a, Motor ke thlâ ka hmuh leh lek phei chuan ka ngaih a ṭha thei tawh lo. Ka awmna bul velah Mizo hmuh tur an awm lo a, hnamdang hlir an ni si, ani kha an lo ru daih a nih ka ring ta rum rum.

Amah zawnga tlanchhuak turin ka Motor a awm lo lehzel hian ka thin a tirim hlur a, zankhat kan riak dêk dêk a, rilru tihahtu a ni nghal pang a nia, khua a var lo teh e.

Chutia mangang rilru tawt tihngaihna hre lova ka teikual sek lai chuan, motor tlan thawm ka hria a, khawng at-a ding chungin ka lo nghâk tawp. A lo hnai zel a, ka Scorpio ngei mai kan in kawtah a rawn tlân lût ta a, a fai sur a, a la ro chiang lo nain fai taka sil a ni tih ka hmu thiam mai.

'Tu khalh nge, tunge sil' tih ka chhungrila zawhna awm hrechiang turin ka pan hnai ta a, driver seat aṭanga rawn chhuk tharh chu tudang nilovin kan Vansangtawli lek! Mai mai chuan!

"Tho tlai pa...ka hna ka thawk ṭha em?" Nui var var chunga tiin min rawn pan a, ka hamhaih lutuka sawi hmasakber tur pawh ka hre lo.

"Eng, eng thil nge i tih a?" Ka lo ti zawi ruih.

"I hmuh ve reng hi, lungngai suh, ka accident pui lo ang, sawlai thleng lek saw alawm ka tlan," nui ṭhâ chunga tiin min rawn din hnaih a, "I rin loh dan ang hlirin ka awm si a, mak i ti a ni maw," a tih tâkah chuan amah ka en a, a sawi dik lutuka ka nui suk ringawt.

Ka lungphu pawh a pangngai ta deuh.

"Chaw ei ang," a ti leh daih a, ka kutah motor chahbi a rawn hmehbel a, min ngaichâng îk lovin inchhung lam a pan ta a, ka tukkhum thak lo pui ka hiat teh ngawt a, eng ang hmeichhia hi nge maw a nih le? 

Ka va luh ve lai chuan chaw ei a siam mawlh mawlh a, min en chuang lo hian, "Nupui lem lem ka nih hi..." tiin a nui hak hak a, "Ngawi mai mai rawh," ka lo ti hluk.

"Engtikah nge i hna i ṭan ang?" Tiin thutak deuh zawk hian min zâwt a, ni thum hnuah tiin ka chhâng ve mai a. "I hna i ṭan hmain naute siam hna kan thawk char char mai dawn em ni?" A tih chuan ka nui chhuak teuh kher mai. 

"I duh te chuan.." ka lo ti a.

"Duh e, kan kâ kan âng ve tawh a nih chuan tlanchhiat duh miah loh tur, helaia ka awm chhan leh ka zui ve chhan che hi a thlawna luanral tir ka tum lo," a ti hmiah a, ka sawi thui ve duh lem lo.

"Ka hriat lohvin Motor hi khawih ka remti lo a nia, tin, helaiah Mizo an awm lova, a awm chhunte chu remchangah ka la hmuhpui dawn che nia, in hi chhuahsan lo la a him a ni mai," tiin ka hrilh a, hlauthawng hmel pawh pu chuang lo hian, "A ho lutuk, khawiah mah ka kal bo dawn hleinem," a ti zung zung a, a ei siam pawh a tih tlâk vei fú tih ka lo ngaihtuah daih thung.

Kan ei inna a seng fel a, hna ka thawh chhungin ani a insu a, kan bedsheet phah lai a pawh hlìm lai khan a ner nâng a, hlawm tawp tawpin a zakzeha ka lo nui tut tut. 

Min kalpel pah hian, "Nui suh, min ring lo vela kha kha a nimai," hawisâng vah chunga tiin min melh zeuh a, a thianghlimna a hloh a, a chapo zâwk zâwkah te chuan a la ṭang a, nuih a ti za bâng dawn lo a nih hi, a ngaihtuah a tâwi em mai.

Mahni hna ve ve kan thawk mawp mawp a, a sawi ang deuh tak tak khan min tibuaiin min zar buai lo ve khawp mai. 

Ka nupui Mazawni nen ka khaikhin lo thei lo a, ani kha hmeichhe smart leh che fel thlep chi a ni a, sawiselna tur ka hre tam lo khawp mai, mahse, nupa nun kan hman hmasak ber ṭuma min hmakhalhtu an awm tih ka hriatna khan ka nunkhua a ti nuam lo rei viau. Amaherawh chu, ka nupui a ni a, hmangaih leh duh taka ka neih a nih avangin a lakah lungawi lohna ka nei lem lo. Nula fel tia an sawi ni mah se, nula thianghlim chu a ni lo tih kei hian ka chiang bal.

Vansangkimi ve thung chu mi entleu rûk leh hnunglama an nuihzat hmeichhia a ni a, 'A hmelṭhat tehreng nen mahse...' tih a ni zel a, kei pawhin ka hmusit deuh hman kha a ni a, Zu in hrât, rúi nawi ṭhin leh pawisak nei lo tawp angin a lang a, a landan phêna awm hmeichhe dik tak a nihna keiin ka hmu thiam tlat hi ka vannei a ni ber.

Dar hnih velah ka hna ka zo a, inchhungah ka lut a, ka khuma Vansangi lo muhil bawrh bawrh ka hmuh chuan a bulah ka ṭhu thla a, a hmai samin a hliah deuh chu huikiansakin a hmaifang dik zet chu ka thlir vang vang a, kan zinkawng a thui tham si a, tukinah ka chêtpui leh bawk nen a chau ve ngang a nih ka ring.

A hmuiah dimtein ka fawp zauh a, inbual turin ka luhsan ta a.

Hemi zan aṭang hian sawi nawn ngai lovin nupa nun kan hmang ziah a, chhun lamah pawh a remchan dan ang zelin ka che chhuak mai. Kan titi hluah lova, kan inbe zen pawh a ni lo, kan inremsiamna tihhlawhtlin tumin ṭan kan la dun a ni mai.

"U Bartho, hmeichhia engzat nge i mutpui tawh?" Tia min zawh chuan, "Sawm leh pakhat mah," tiin ka khi suk a, ka bânpuama chúm chawrh chung hian, "I dawthei, u Zonuni nen in in ngaihzawn lai pawh khan kan bihthla che u," tiin a nui kar kar a, a chimawm a chhuah leh ṭan dawn a va ang ve.

"Class 8 room-ah intawm reng kha," a la ti hrâm a, ka nui ringawt.

"Kum khat chhunga ka râi leh si loh chuan pawisa min pe ṭeuh ang che, engkim hian man a nei a nia," a ti leh a. 

"Engzat nge i duh a?" Ka tih chuan, "Keimaha sumdawnna bul ka ṭan ve theihna tur a ni mai, fa ka neih loh chuan fa neihna tur midang ka zawng leh tho ang," a ti ta a.

"Vansangtawl," ka lo ti hmuk.

"I upa tawh sia i chi a ṭha lo maithei asin, innu pawh a rai har em kha," a la ti zel a, Mazawni a rawn sawi chhuah tâkah chuan, "Ani chu a hrisel lo êm a, a thih khan kan fa tur a pai a, a thihpui alawm," tiin ka hrilhchiang ta law law a.

Chuveleh, khuma a mu ṭha lai chu a ṭhu chhuak hlawl a, "Ehe, chutianga ka awm ve vaih chuan," a ti hliai a, min rawn enin, "Â, thi pawh ni ila, uitu tur pawh ka nei dawn chuang lo," a tih zawm leh a, a la ṭhu ta reng.

"Ṭawng ṭawng lo khan mu rawh, a ninawm..." ka ti bak hluk a, a thil sawi chhuah erawh chuan ka ngaihtuahna a ti thui hle.

"U Bartho, ka fiamthu hleinem, khawvelah hian hmangaihtu leh lainattu ka nei ve tak tak lo, i hnena kal ve ka dîl nachhan che pawh i hriat vek kha, nang chu hman aṭanga mi rilru ṭha leh fel i ni a, zanin aṭangin ka star leh ṭan tawh dawn che," a ti leh daih a, a thil sawi inpersan lutuk chu ka lo nuihpui tawp.

"Bialpa engzat nge i neih tawh?" Tiin ka zawt teh daih a.

Nui var var chung hian, "Ka nei ṭeuh tawh, mahse, tumah ka mutpui duh lo, an hur thei hlawm si," tihpahin min rawn en a, "Kei kher min thlanna chhan kha thudik tak han sawi tawh teh," tia zawt lehin ka inlet a.

"Ka bialpate chu fa neihpui tlak an ni lo, an puitling lo a, nang chu thluak ṭha tak nei leh lehkha thiam lutuk i ni a, nang nen fa kan neih chuan a chhun che ka ring, i thluak ang nei fâ ka duh," a ti duah a. 

Kei min duha min ngaihven vang pawh ni lovin ka thiamna, ka thluak chauh a lo duh ber a ni hi a, ka hnual nghal rawih thei nia.

Ka hna ka ṭan hma ni-ah Bhutia bazar ka fanpui ta a. 

"Eng nge ka leisak ang che, i duh duh sawi rawh," tiin a kutah ka vuan a, thawmhnaw zawrhnaah ka kalpui ta a, nui var var chung hian, "Eng mah ka duh lo, bâkah a thlawnin mipa hnen aṭangin engmah ka dawng duh lo, beisei leh phût lêt an nei zel," a ti ta a.

"Chutiang rilru ka pu lo, i duh sawi tawp rawh, i lo hriat tawh ṭhin mipate ang kha ka ni ve hleinem, kei chu pathlawi phanchang ka nih hi..." fiamthu pah deuha ka lo tih chuan a nui hak hak a, "Mutnaa hak tur ka duh a.." ṭha tein a ti ve mai.

"Khumah thawmhnaw i mamawh lo aw..." nui kur kur chunga tiin dawr nghâktu ka be zawm zat a.

"Saingurpui, Saruak tangkáwnga min mut tîr reng i tum em ni?" a lo ti ve ngial a, ka va melh zuk a, nisa hnuaia kal kan nih avangin a biang a tâi tâk a, a sam chhawllêngin a hmai a zar bawk, a landan nuzêm chuan min hîp lo thei lo, a hlim hmel hmuh a nuam takzet.

Ama thlan ngei zan mutnaa hak tur kan lei ta a, "Ka lawm lutuk, ka nu leh pa inṭhen hnua thil min leisak hmasabertu i ni," tiin midang mitmei veng miah lo hian a rawn dingdihlîp âk âk a, ka nghawngah kuahin ka hmuiah a fawp zeuh a, lo dan hman pawh a ni lo. 

"Vaiho hian an en duh em che hi, helaiah chuan fimkhur a ngai," ka ti sup a.

"A ho, an châk ve vang a nih kha.." a ti awlsam êt.

Chumi hnu chuan inchhungkhur mamawh tur kan lei kual leh a, ni a sa êm a, a thlan hliam bawk si nen in lamah lêtpui ka tum ta a.

"Kawng chin ka hre bel lo nain haw lam chu ka lo khalh chhâwk dawn che em ni?" a ti ve bawk a, ka ring lo nasa mai si.

"Ngai lo mai rawh se," tiin driver seat-ah ṭhut luh ka tum a, "U Bartho, reilote ka ti ve chhin ang a, i duhthu a sâm loh chuan i khalh leh mai dawn alawm," tia min pawh beh tâk tlatah chuan, a rilru tih nawm nan han khalh ve phawt mai teh se.

A hma lawk pawhin a lo silfaia a tlan chhuah ve tak kha maw le.

Vansangi Motor khalhah ka chuang ve ta a, kawng chin ka lo sawi zel a, "Ka hria, kal lamah khan ka chhinchhiah alawm," tiin confi zet hian steering a tuai a, khawi aṭanga a thiam nge tih zawh ka tum hran lo. A thiama a inringtawk em em tih ka hria a ni tawp.

Ka in luah thleng zakin a khalh a, kan chhuk hmain, ka malpuiah a rawn hmer a, "Thiam loh ka nei lo, thiam êm êm pawh ka nei lo," tiin min siai zeuh a, ka fawp hrep náng a! 

Zanriah kîlpui tur kan neih thu leh eirawng pawh ka bawlpui dawn tih ka sawi chuan min melh hâw chung hian, "Zu kan in dawn em?" A lo ti hmanhmawh. 

"Dawn lo, kan in anih pawhin nang chuan i in ve lovang," ka lo ti a, a tûm nghal bûr ringawt.

"I in chuan ka in ve ang a, i in loh chuan ka in lovang," a ti hmak a.

"Nang leh kei kan inang lo, hmeichhe zu in ka ngaisang lo a nia," ka lo ti hmuk a.

"Ka in ve loh chuan mipa zu in bulah ka mu peih bîk lo a nia," tiin Sangha a sil tau sawk sawk a, a hnunglam aṭangin a chezia ka thlir a, ka nui huk. Rang takin a rawn inher a, "I hre mai ang, zaninah naute 'Ke' kan siam lai kha kan châwl ang, ke a nei dawn rih lo aw..." a tih tâkah chuan za lutukin ka nui chhuak hawk hawk a, a kiangah hian a thutak theih loh.

"I bengchheng," a ti vin ṭhak a, nuihza insûm deuhin a bulah ka ding hnai a, "Chutia ke nei lova awm tîr âi chuan ka bula i mut ngeina tur ka tih a ngai a nih chu," tiin a biangah ka tawk zeuh a, min chhânna pawh nghak lo hian ka room-ah ka luhsan ta a. 

Tukverh bulah dingin ka va nui leh nghek a, ka hnen a lo thlen aṭanga ka nuih tam tawh zia leh, ka rin loh dan zela a chêtna hian min tiphu fo ṭhin mah se, vawi tam nupa nun kan hmang hman tawh a, a sawi dan hmangah kha chuan a ke pakhat kan siam zo der a va ni mai awm ve. Vansangtawli mai mai ṭhin tak hi chu...(h).

A hmingin Officer ka ni ve miau a, zanin tlai hian ka thawhpui Sunita leh a bialpa Vikram te zanriah kan kîlpui dawn a, Vikram hi Chemistry thiam tak a nih bâkah a hnaah a tui a, Sunita nen an inhual thuai dawn niin min hrilh.

An rawn thlen laiin zanriah tur kan peih fel vek tawh a, Vansangi a inbual a, hmeichhia ka chenpui tih ka sawi lêm lo. An hmuh hunah min zâwt ngei dawn a, chhân dan turah ka buai leh ta. 

"Bartho, in tur kan lo keng a nia, Sunita hian i in ngai lo a tia a dik em?" Tiin a nui huah huah a.

Chhân tumin ka âng hman zuau tihah, English mar nalh lutuk hian, "A in ve zeuh zeuh ṭhin, mahse, rui khawpin a in duh lo," tia rawn sawitu Vansangkimi lam kan hawi phei ṭhap a, towel-in a lu a tuam a, Make-up pakhat mah inbel lo leh a landan nalh lutuk avang chuan ka thaw chhuak hawk.

Sunita mitmenga zawhna rawn awm chu ka haider hmiah.

Vansangi a rawn kal phei a, ka bulah ṭhut hmun a rem a, "Bartho ṭhiante in ni maw, Vansangi ka ni e," tiin amah a inhmelhriat tîr a, Vikrama'n mit lasawn lêk lova a en chuan Vansangi pawhin a melh lêt ve ngar a, kei leh Sunita kan hawihai teh a nia.

"Bartho nupui maw?" Tia Sunita phun sap ri chu ka hre reng. Nui chung hian, "Aw, ka nupui hual a nih hi, ka hnenah kum khat a awm ve ang," ka lo ti hmiah.

Vansangi ṭawng tum chu ka mitmei a, a lo man thiam a nih ka ring, nui var var chung hian Sunita hnenah, "Kum khat chauh ka awm thei a..." a ti zeuh a, anni ṭhian dun pawhin hlim hmelpuin an nuih lêt ve ta, "A hmelṭha hle mai," titu Vikram chu ka melh zuk a, Vansangi lak aṭangin a mit a lasawn thei meuh lo. 

"I sam kha va tiro la, zanriah ei hmain no dawm phalna ka pe ang che," ka ti ta a.

Sawi buai nei eih lovin ka room lam a pan nghal a, a lan dan itawm zet kha Vikram hian a hmu thiam tih ka hria, chuvanga kal tîr ka ni. 

Vansangkimi lakah hian thîkthu ka nei ṭan ta pang mai. Kei ni lo mipa dang laka a nui hmêl ka hmuh ringawt pawhin ka chhungrilah chê a awm a, hnamdang pawh ni se, Mizo pawh ni rawh se, ka hnena a awm chhung hi chuan tu mipa mah a biak ṭhat ka remti dawn rêng rêng lo.

A ngaihsam a, a ri puat a, a rilru a tluang si; ka strick ṭhak ṭhak viau ang, a zu in ka phalin ka thlah zalen ta tihna a ni lova; zaninah a kianga ka mut loh âi chuan in ve mai teh se, ka phal lo a nih vaih chuan a sawi angin a awm dawn tih ka hrechiang si a, 'tun ṭum chiah' tiin ka inthiam chawp tawp.

Saingurpuia hian henu hi ka âtchilh lo ang tih hriat a ni ta lo. A duhawm êm a ni.

100223

-B®®

B+>[BeckirafARenthleI]<+®®