3.VANSANGTAWLI [A Becky Rafa Story]

3.VANSANGTAWLI

Ziaktu:Becky Rafa Renthlei -B®®

[Recap]

Vansangkimi lakah hian thîkthu ka nei ṭan ta pang mai. Kei ni lo mipa dang laka a nui hmêl ka hmuh ringawt pawhin ka chhungrilah chê a awm a, hnamdang pawh ni se, Mizo pawh ni rawh se, ka hnena a awm chhung hi chuan tu mipa mah a biak ṭhat ka remti dawn rêng rêng lo.

A ngaihsam a, a ri puat a, a rilru a tluang si; ka strick ṭhak ṭhak viau ang, a zu in ka phalin ka thlah zalen tihna a ni lova; zaninah a kianga ka mut loh âi chuan in ve mai teh se, ka phal lo a nih vaih chuan a sawi angin a awm dawn tih ka hrechiang si a, 'tun ṭum chiah' tiin ka inthiam chawp  tawp.

Saingurpuia hian henu hi ka âtchilh lo ang tih hriat a ni ta lo. A duhawm êm a ni.

-B®®

Sunita leh Vikram te nen zanriah kan kîl hmain no kan dawm dun ta ngei a, amah Vansangi ka venthawn ruk ber lah chu English a thiam nâlin bahlah pawh awm lo hian a dak zet zet mai si a, a rûk tak chuan ka chhuang a ni.

A tlângpuiin Mizote hi chuan ṭawng dang hman hi kan harsat ṭhin a, kei ngei pawh ka bâng chuang lo. Mahse, hnamdang zinga ka tâl tam tâk hnu hian ka zia chho ve ta chauh a, kan Vansangtawli mawlh mai hi a ni. MA (English) ni mah se, hetianga a ṭawng thiam hi ka ring lo, a tîra ka hmuh hniam ang ngawt kha chu a lo ni lo tih nitin a tharin ka hre chho zêl a ni ber.

Ka beng bulah min rawn be sap a, "U Bartho, no engzat nge ka in dawn?" Tia min râwn der ve ringawt pawh hi ka lâwmna tâwk a tling.

Nui suk chung hian, "I duh zât zât, mahse, i dose hria la.." ka lo ti a, dâr san zeuh pah hian, "Ka dose ka hre lo, a awm chhung ka in thei," a'n tiah. 'Tâwli' ni awm reng a ni.

Vikram pawhin a be suam suam a, Sunita nen an titi ve luam bawk. Ka tân zahpuiawmin a awm lo tluan ṭhak.

Hlim takin zanriah kan kîl ta a, an haw dawnah Veranda thleng kan thlah a, a kâwngah ka kuah a, min rawn kuah lêt ve zat.

"Inhualna kan neih hunah lokal ve tum ula, kan sawm nghal che u," tia Sunita a nuih var var lai chuan a pasal hual la nimai tur Vikram erawhin Vansangi a thlîr reng a, a melh danah ka lawm lo ru deuh tlat a, haw thuai thuai se tih ka duh ber.

Inchhunga kan luh leh dawnah a pai deuh nak a, ka lo dawm vat. Nui hak hak chung hian, "An haw har lutuk a, ka incontrol thei lo ṭêp," tiin a meng chiai a.

"Kan mu vat dawn nia," tihpahin ka pawm nawlh a, hetia kuaha hnaih hi ka châk et et tawh, a nui ar ar a, "I bulah hian ka him dawn tih ka inhria, ka him a ni," a ti sap sap a.

Khumah ka nghat a, a mitmeng mawlh hi tawrh a har, a thawmhnaw inbel hlih a tum chuan ka lo pui vat a, ka thil in vang kha nge a hma zawng aiin amah ka thlahlel zual a, a tisa lumna tem tura kuah ka châk a ni tawp mai.

"Bartho, zanin chu naute ke lehlam aw..." tiin min melh chho hâ a, nui suk chung hian ka fawp ta nge nge e. 

A hmui nél thep chu fawh a nuam takzet, thisen kal lai châwl dat khawpa chêtpui ka duh rum rum. Êm êm hian! 

Thaw hak hak chungin min kuah chial a, a hnungzâng thlan hliam chu ka hrûksak a, tisa thil chu thuhran ni se, a tîra a laka ka rilru leh tuna amah ka duhna hi chu sawi fiah thiam chi a ni lo. 

Ka mu meng reng a, ka rûi ve lêm lo. Ani erawh chu tui takin a muhil a, zanin atan ngat hi chuan ka thlah phal lo a ni ber mai. Naktuk maiah hna ka ṭan san dawn si a, kan chenna aṭang hian ka thawhna hmun hi minute 15 dawn tlan a ngai a. Practical class kan ṭan hun erawh a la hla deuh.

Ka awm loh san hreh nghal pang a, helai velah amah chauha a tâl a nih chuan tawhsual a tâwk palh ang tih ka hlau thar ta riau. A hmelṭha mah mah hi atan a la hlauhawm ang tih ka hlauhthawnpui a ni deuh ber.

Amah kuah chungin ka maimitchhing ve ta a.

"Tho rawh le.." tia min lo sâwi harhtu an awm avangin peih lo zet hian ka meng chhuak a, hnai zetah ka Vansangin min lo en a, thawhphan awm miah lovin ka kuai kun nghal hmiah.

Mipa ka ni, ani hmeichhia a ni bawka zingkarah 'Seol' kan dai dun leh zuai tâk kha.

Tûkṭhuan kan ei dun mawp mawp a, "Eng nge i lo tih ve ang aw," tiin chal ka chuar zauh a.

"Driver i nei tiraw?" Tiin min zawt daih thung. Ka neih thu leh vawiin aṭangin a lokal ṭan dawn tih ka hrilh a, chutih lai tak chuan ka phone a rawn ri ve zat bawk.

Chaw ei laia phone call chhân hi ka tihdan phung a nih loh avangin ka pick duh rih lo. Nakinah ka call-back mai ang.

"Inchhung hi ka lo tifai vek ang aw," tiin chaw a bâr a, eng emaw chenah inthlahrunna chin a nei tih ka hria; nupa anga khawsa ni mah ila, thuthlun kan neih tlat avangin zing khua a lo var hi chuan zan lam boruak nen a dan a dang daih zel.

"Vawiin chu lo awm mai mai rawh, chawlh ka pe ang che," ka lo ti a, "I driver chu bân la, keimah min chhawr mai rawh, nitin i rualin ka kal anga ka lo nghâk mai dawn che alawm, chuan, kan haw rual leh thei dawn bawk a," tia a sawi chuan ka ngaihtuah vung vung a, hmeichhia mah ni se, motor khalh thiam tak a ni tih ka hria.

"Ka bân ngawt thei hleinem, kum tam tak rinawm taka min zuitu a ni a," tiin dam thluam hian ka chhâng a.

"Rinawm takin ka zui ve ang che," tia a sawi zawh rualin a tho tharh a, kei insûm thei lovin ka lo nui huk thung.

"Naupai i duh si a, motor i khalh chuan i tan a ṭha lo ang, tikhan hahdam takin lo awm la, rinawm tak khan in lo nghâk mai rawh," tiin ka tho chhuak ve nghal a, min chhâng tawh lem lovin thleng a sil mawlh mawlh a, nichina min lo call tu kha tunge tih hriat tumin phone ka en san ta rih.

Ka nu a lo ni a, tun ni hnih khat lek chhung hian ka be tlem lutuka min ngaihtuah viau tak ang chu.

"Bawiha, Vansangi chuan nuam a ti dawn awm em?" A rawn ti a, Vansangi melh zuk chung hian, "Ti ve mai ang," ka ti liam puat a.

"Duat hle ang che, a rilru a ṭhat ka ring tlat.." a rawn ti leh a, ka biak khât thu leh chanchin sawina châng hre ve tura min hrilh hnuah kan inbiakna ka ti tawp ta a, a sawi kual thui leh dawn em asin.

Ka driver a rawn thleng ta a, ani hi Manosh niin chêr sâng deuh, hmul ngah tak a ni a, kum sarih zet kan inchhawr tawh a, Dispur lama awm ṭhin a ni a, ka hna a thawh hnu hian kan awmna aṭanga hla vak lovah in a rawn luah a, a ṭawngtam lem lo khawp mai.

Vansangi a hmu thut chu a hawihai hman viau. Hmeichhia ka kawl ngai tlat lova mak ti viau pawh ni se thil awm lo a ni hran lo. 

"Ka nupui hual a nia, hetah a cheng ve rih ang," tia ka hrilh chuan a nui vur vur a, ka hnampui a nih leh nih loh min zawt a, a nih thuin ka lo chhâng a, "A hmelṭha hle mai," a ti ve ngial. 

Ani hian anmahni ṭawng bakah Hindi a thiam nal hle a, English pawh a thiam ve sawlh sawlh. Vansangi nen inbe tam lo se a ṭha a ni mai.

Motor-a ka ṭhut luh hnuah Vansangi inchhung lut tur ka ko lêt leh a, "Pawnah chhuak lo la, chhunglamah kawngkhar kalh ang che," tiin ka chah thlapa a lo bu nghat nghat.

Nichin deuh aṭang khan a hlim hmel a reh daih a, min be lumlam vak lo. Amaha awm a hreh vangah ka puh sak deuh ngawt a, side glass aṭangin ka in lan theih chhung ka thlir a, hun rei lotê chauh chengdun ni mah ila, ka ngaiin a bula awm ka thlahlel zual. 

Mak ka tih ve mai mai chu a phone a khawih ngai miah lo a, ṭhian a kawm tam tehlul nen Mizoram kan chhuahsan aṭangin vawikhat mah phone a khawih lai leh mi a biak awm ka hre lo!

Ka thawhna hmunah pawh amah hlir ka rilruah a awm a, lunch break kan neih laiin ka call ta nge nge a. Mahse, switch-off a inti tlat a, ka rin dan sa ni tho mah se; biak tlang theiha awm tura ka hrilh hriat a ngai. 

Hetiang êm êm hian ka ngaihsakin ka buaipui dawn tih ka inhre der si lo a, nupui neih lam rilruin a ngaihtuah rum rum ta mai. Ka hmangaih tihna a ni lova, tisa inthlâkhlelhna vang chauh pawh hian ka hlata a awm ka remti lo. Kum khat chhung kan cheng dun dawn chu a ni si a, hma hun kan sawi thei lo nain tun atan chuan amah bak ka rilruah thildang a leng lo a nih tâk ber hi!

Kan bân hun pangngai aia hma hretah ka chhuak ta nghe nghe a, in lam pana kan tlan lai pawhin ka ṭawng lo reng reng, ka hmuh nawn leh hmasak ber ni te ka ngaihtuah kual a, ka nuna a rawn intah luh dan thleng khan hmaih nei miah lovin ka ngaihtuah chhuak dap.

In ka thleng a, kawngkhar ka pawt chhina chhunglamah a inkalh ve thlap. 

Doorbell ka hmeh hnu aṭanga rei vak lovah kawngkhar a rawn hawng ta a, min hmuh rualin a nui a, kuah tuma ka ban chuan tawlhsawn deuhin, "Lo lut phawt rawh, i driver mit a pâwng mah mah," a ti sap a.

A sawi awmzia ka hria. Manosh a'n min enzui reng tih a sawina a ni.

Inchhungah kan inzui lut ta a.

Thil mak a thleng leh ta! Ka inchhung a faiin a lang thar sur a, chhuat pawh chuti bawk. 

"I va thawk nasa ve aw" tiin ka hawi kual a, "Tih tur awm hek lo, ka mu peih hleinem," tiin a nui var var a, a la inbual bik lo tih a lang reng.

"Vawikhatah chet vak loh tur, zan lamah..." tia ka sawi zawh hma hma chuan, "Zan lamah te chuan i che thung dawn alawm," a lo ti vat.

"A dik, inbual rual ila," ka lo ti daih a. 

"A teuh lo, ka duh teuh lo, a tenawm thlak," a ti vin hlar a, ka lo nui kur kur.

Ka thlêm ngial pawhin inbual rual tur kher chuan ka sawm chhuak thei dér lo. A dangdai ṭhin teh e.

Kan tâl nek nek a, keini pahnih pawh chimbuaitu awm lovin thlakhat pum ṭhak kan cheng dun ta. Vawikhat mah kan compound pêlin a chhuak ngai lo a, Mizo awmnaa inkhawm ve a duh leh duh loh ka zawh ṭumin, "Duh teh nang, Aizawlah pawh ka inkhawm ngai lo, ka nun dan ka hria a, hetiang nun nei chung hian ka tel ve ngam lo," a ti hmiah. Ka sawi nawn leh ta lo.

Nitin ka chhuahsan a, biak tlang theia awm tura ka hrilhna erawh a bengkhawn eih lo. Ka sawi awmzia chu phone nei lo ang chiahin a awm a, a duh lohnaah a nawr luih theih loh reng reng.

Practical class zan lamah dârkâr hnih ka nei leh ta a. Hei hi chu keima mimal hna a ni a, Sciene Centre lam aṭangin zirlai 15 zet ka nei ka tih tawh kha, an thla fee pawh a tlem chhe lo. Ka duhâm vang em em pawh nilovin, Mazawni boral hnu khan ka khua a har a, zan lamah tih tur ka nei si lova hun khawhral nan ka hmang ta kha a ni a. Ka ziapui viau.

Mizo pakhat Hruaii a awm ve, ani hi Khawzawl khua niin kum hnih Jorhat-a a awmna a ni awm e. Mizo ve ve ni ta chu min nêlin ka duhsak ve a, zaninah pawh an class bân hnuah kan ding khawtlai a. 

"Sir, nupui i la nei lo tiraw?" Tiin min zawt a, "Nei náng, kan hmu zo ve lo a nih hi," tia ka chhân laiin Vansangi a rawn khuh kharh a, Hruaii a meng phâwk nasa hle.

Ngun deuh hian Vansangi a melh a, "Khi khi tunge a?" Tia min zawh chuan, "Vansangi," ka lo ti mawl tawp.

Chu veleh kan 'Tâwli' chu inchhungah a lut daih a, Hruaii lah chuan chîk zetin min en a, "I nau nge, i bialnu zawk?" A la ti hrâm.

"Kal tawh rawh le, a tlai tawh.." ka ti nghut a, ngaihdan ni vak lo chunga a kal phei chu ka en zui vung vung ringawt.

Vansangi nen kan room inṭâwmah ka lut phei a, amah ka hmu mai si lo a, a intifai a nih ringin ka mutsan ta a. Dârkar khat hnuah pawh a la rawn mu chuang lova; ngaihven turin ka tho chhuak leh ta nge nge.

Ka inchhung zau vak lo chu a reh ṭhiap a, room chuang pakhat zawk ka en a, a awm lo, mikhual room ka va en leh a, khumah ngil zetin a lo mu thluang zar a, Ceiling melh chung hian a khap fak fak a, hetia a awm tawh hi chuan eng emaw rilru kamtu a nei tih ka hrethiam ve tawh.

"Vansang..." tia ka koh chuan a che map lo a, pan hnaiin khumah ka ṭhu a, a hmai khawih tuma ka va ban chu, ka kut a lo vaisawn hmak.

"Min khawih suh, i duh leh kha nu kha va khawih rawh," a lo ti hlar. A thinrim chhan ka hre lo a, Hruaii nen engtin kan va awm pawh a ni si lo.

"Lo mu rawh le, helai chu a vawt êm mai, ka lo kuah lum ang che," dam deuh zâwka ka tih chuan rum âl hian min melh a, "Ka lo mu dawn lo, ani kha va mutpui rawh," a ti leh a, ka nui suk ringawt.

"I thinrim chhan ka hre lo a nia, ani bula ka mutna chhan tur lah ka hre hek lo," ka ti ve ta nghut a, a rawn ṭhu chhuak a.

A sam huikiang pah hian ka mitah chiang takin min melh ngar a, "I hnamdang ṭhiante lakah chuan min zahpui lovin i nupui hual tiin min sawi a, kan Mizopuite hnenah erawh chuan Vansangi ka ni leh si, min zahpuitu bulah ka mu dawn lo," a ti hmak hmak a. 

Nichina Hruaii zawhna leh ka chhânna kha a lo hre ve tih hrilh hranpa ka ngai lo.

"Khatiang mai maia thinrim rual i ni lo, ka bula i mut lohva kan hna kan chhunzawm loh chuan helaia i awmna chhan hi a thlâwn dawn asin," tiin ka ṭhut hnaih sawt a, ani a tawlh hla thung.

"U Bartho, kei chu mi fair tak ka ni, nang leh kei kan inzawm dan pawh ka hria, i duh chuan kha nu kha ngaizawng rawh, kan inremsiamnaah khan ngaihzawng neih loh tur tih kan sawi tel hleinem," a ti leh zel a, ka lo thaw huai ringawt.

"Lokal mai mai teh, sawi duah zel suh," ka ti a, han thlêma insawifiah vel ka thiam zawng a ni lo.

Kan room lama hruai phei ka tum chuan a ṭang kawh tlat a, ka zaidamnain a tlin ta lo. "Ka inah i awm a, i duha min zui i ni a, thil ho têah lungawi lohna tur i zawng bawk a, i duh chen chen chu tikhan awm rawh," ka ti ve hmiah.

Min chhâng lovin ka awm lai reng chuan a mu leh nghal daih a, thinrim ru zetin ka chhuak ve ta a.

Hmeichhe titau han thlêma han tlawn vel hi ka thiam zawng a ni hrep lo e.

Ka khumah ka mu meng kur a, Jorhat kan thlen tirh aṭanga mu dun nghal kan nih avangin thlakhat chuang ka kiangah Vansangi a mu tawh a, a tel lova ka vawikhat mutna a nih vang nge ruak deuh huaiin ka inhria a, ka let kual sek a, ka mut a chhuak hlawl lo.

A tawp a tawpah tho chhuakin a mutna lamah ka va phei a, kei ang lo takin lungkham nei lo zet hian a muhil sâk sâk a, a puansin a tlawh hlim a, a mal mum nalh zet te chu en reng a nia ka duh ni. Lalhruaii kha a thík ve deuh tihna nge? Tihian a mut phah chu a ni si a, thîkthu tepawh kan nei ṭan ta a va ang si ve. Ka nui ru leh suk a.

Dimtêa pawmin ka khumah ka sawn phei ta daih a, vanneihthlâk takin a harh miah lo. A taksa lumna tema ka kuah tâkah chuan ka kim ta chiah e. Muthilh tum hian ka maimitchhing ve ta a.

Uak pap pap riin min tiharh leh ta a, ka mit a thial ûrh mai. Ka mu tlêm fahran lutuk a ni.

Vansangin bathroom lamah thawm a nei reng a, rang taka tho chhuakin ka ko zui a, min chhâng lem hlei lova, minute nga dawn hnuah pawr phanga lo chhuak chung hian, "U Bartho, ka lu a hai lutuk.." tih leh min kuah a rual a, ka lo kuah lêt vat.

"I eng nge na?" Ka aw-a hlauhthawnna rawn lang chhuak chu hai theih a ni lo.

"Engmah nâ ka nei lo, ka lu a hai," tiin a bek leh mit bul vel a nuai nawk nawk a, a pang ka khawih a, a dai dak bawk si.

"Tikhan lo mu hahdam la, i intur bawnghnute kan siam ang e," tiin khumah ka mut ṭhat tír a, a mitmeng a fîm kâk lo tlat. 

Ka dah ang ang chuan a mu tawp a, puan ka sintir leh hnuah choka lam ka pansan ta rih a, damdawi in kan hlat vak lo a, darkar chanve tlan vel a ni, ka hruai mai dawn nge, ka hnaah kal ngei ngei a ngai bawk si. 

Bawnghnute no-ah thli chhuakin ka keng phei a, hetianga han inbuaipui vel hi ka khawr deuh ṭût.

"In rawh le," tia kaih thawh ka tum chuan a maimitchhing tlat a, ka harh hmain a lo inbuaipui fe tawh a nih ka ring, a hmaia tisen awm ṭhin kha a dâng ve deuh a, ani leh ni lo angin a sam pawh a pawr khawp mai.

"Vansang.." ka ti sup a.

"Umn..insiam rawh, i tlai ang," zawi raih hian a ti a.

"Nangmahin i awm thei ang maw, i ngaihtuahawm loh tak tak maw," ka tih chuan a rawn meng chhuak a, "Nizanah hmeichhe dang i be vel a, ka damloh phah vek," a rawn ti ta a, ka nui huk.

"Nui reng reng suh, helaiah nangmah bâk tumah min ngaihsaktu ka nei lo a, midang min ngaihven san chuan tihian ka damlo zel ang a, ka damloh miau chuan atawpah ka thihsan ang che," thutak zeta tiin a nui duh miah lo lehnghal a.

"Vansangkim.." ka lo ti nghut.

"Saingurpui, ka hmingpumin min ko ve ziah suh," tiin a rawn ṭhu chhuak a, khum bula bawnghnute ka dah chu banin a in a, "Zu a nih loh hi chuan thil tuiril ka ngaina lo," a'n tiah.

"Zú i in dawn tawh lo, kei pawhin ka in tawh lo ang, tukin chu chaw ei lovin ka kal anga nangma ei tur i insiam thei ang em?" tia pangngai deuh zawka ka biak chuan a bu nghat nghat a. 

"Kha nu kha va hnaih hlek suh, chuti lo chu i ṭhianpa Vikram kha ka be ṭha nghal a ni mai," tiin min vau ve khà khà a; ka chhâng duh ta lo, a zia ta a niang a ṭawng thei leh tawh em mai.

Ka insiam laiin a rawn tho chhuak a, boxer nen ka la din lai a ni a, ka hma zâwnah tak dingin, "Kum khat chhung chauh atan kan inremsiama hemi chhung tal hi chu rinawm ang che," ti sapin a kut pahnihin ka biang a dawm a, a mitah ka lo en lêt ve chat.

"Ka tan pakhat a tâwk.." tih chiah ka sawi.

"U Bartho.." a ti leh sap a. "Umn.." ka lo ti dút ringawt. 

Min thlakhlelhna a mita lang chhuak chu ka hmuh hmaih lo. Kun hniamin ka fawp ta a, ani pawhin min fawp let ve mial mial tho. Mahse, ka kal a hun tawh si a, ui ru tak chungin ka thlah ta a.

"Ka lo haw hunah kan chhunzawm ang aw..ka Vansangtawl..." ka ti a, nui hak chungin ka khêlah a bêng hman hrâm.

Tuktin min thlah ziaha tukin erawh chu thlahtu ka nei ta lo. Amah pawh a rawn chhuak lo hrim hrim a, a nuam lo satliah ni turah ngai ang.

Nilêngin ka buai a, ka laka thikthu a nei ve ringawt pawh hi lawmawm deuh asin. Ani aiin ka upa fê a, keimah ang ni ve tura ngaihna ka lo nei leh ṭhin hi ka insiamrem vat a ngai. Chuti lo chu a titau nitin mai ang; a tihtauh apiangin riah hran a tum thla zen lehnghal a, a tel lova zan khat lek pawh mut ka harsat êm kha maw!

Ni dang zawng aiin kan haw tlai a, zanlama class kal tur pawh dâr riata ṭan turin ka hrilh ringawt a. 

Kan in kawtah Taxi pakhat a lo ding a, atu chu ni maw. Ṭhian inlêng ka nei a nih ka ring mah zawk.

Veranda ka rap kâi chiah tihah ṭe ṭhat ri ka hre ta a, rang takin kawngkhar ka pawt a, chhunglamah a lo inkalh tlat. Vansangi ko pahin ka sawi vak vak a, Vansangi awrâwl ring tak ka hre chhunzawm leh nghal zat.

Inhnung lamah ka tlankual leh rih a, vanneihthlak takin kawngkhar a lo inkalh lo hlauh. Ka hmanhmawh lutuk avangin ka petek lût nawk nawk ni maiin ka hria.

Mikhual room lam aṭanga thawm rawn ri chhuak chu mipa thinrim inhrosa thawm a ni! 

Ka va lût nghal rawk rawk a, khumah Vansangi thawmhnaw inbel mumal lo hian a lo awm a, a hnar a thi luam a, a bula mipa ṭhingṭhi hniam mêk chu thei leh thei lo hian a lo sual lêt ve a, engtik laiin nge ka hnek hman ka hre lo. 

Chhuata mipakhat mu hlawm reng chu a hrawkah ka rêk a, a ri bawrh bawrh a, "Ka that khawp ang che" ti supin a hma aia nghetin ka rêk leh chawt chawt a.

"U Bartho..." ṭap ṭiau chunga Vansangin a tih lai mekin ka driver Manosh an min rawn pawt tho a, chhuata chu pa let reng chu a biangah a bensak, "Sir, a la thi lo aw, Police ka be dawn em?" Tia min zawh chuan ka lo bu nghut.

Khum kilah Vansangi a ṭhu tawm chaih a, a mittui luang ngiai ngiai te, khur hlak hlak chunga min rawn melh meuh chuan ka chhungril a na vawng vawng thei. A hnar a thi bawk si, a hlauhlawp hmel ka hmuh rualin chhuata amah khawih tumtupa let reng chu ka chhuih leh chawrh a, a rum dut ringawt.

Khumah ka láwn a, aniin min lo ban vat bawk a, ka kuah rualin a inhnît chhuak ta hlap hlap a; Vansangkimi ṭap ri hian ka chhungril a nghawr che dawt a, ka lo na ve ngut ngut. Thil awmzia zawh fiah theih pawhin a awm lo.

Manosh leh police an inbiak lai pawhin ka ngaihvenpui lo a, kan misual erawh anhnungkhirh diam tawh tih ka hmu. 

Police lo thlen laiin Vansangi ka kâi chhuak a, ka thawmhnaw hmuh hmasak ang ang ka inbel tîr tawp a, a mitmenga tawrhna, natna rawn lang dawt zut chu ka hmuh hmaih hek lo. Ka kutah nghet takin a hum a, a la inhnît faih faih bawk a, kha mihring ka that lo kha a mak a ni. Manosh awm lo se chuan ka that ngei ang.

Jorhat Sadar Police Station pana kan kal lai pawhin Vansangi ka kuah zel a, engmah a sawi lo. Ka zawt duh rih lo.

FIR ka thehlut nghal a, kan misual hming kha Pratab a ni a, Assamese tho a ni. Taxi driver niin kan awmna piahah School naupang a rawn thlah a, Vansangi Veranda-a lo ding chu biain inchhung lamah a nawr lut nghal mai niawm tak a ni. 

Ni e, Mipa mit pangngai nei chuan Vansangkimi an hmuh hian an ennawn leh châwk zel, hetia ka sawi ai hian a nalhin a hmelṭha a, mipa thisen tilum nghal thei taksa a nei tlat atin ni.

Inspector-in zawhna tam tham fe Vansangi a zawt a, helai bialah kum tam ka lo awm tawh a, min hre ṭha vur lo mah se, ka hming leh ka hna vangin min lo welcome ṭha hle. 

Dârkar khat a liam leh hnuah Station kan chhuahsan ta a, Pratab erawh an khung hrang a, kutthlâk leh hrâm ka tum naa min lo dan tak avangin ka ti ta êm bîk lo. A thiltih man phu tâwk hremna ka pêk hma loh chu kei Bartho Saingurpuia hi ka ngawi ral mai mai dawn lo.

"Hospital-ah kal ang aw.." tia Vansangi ka biak chuan a lo bu nghat a, Manosh pawhin ngawi rengin motor a khalh mawp mawp a, keini pahnih a hnunga ṭhu te chu front mirror aṭangin min lo thlêk leh zauh zauh zel.

Khatia mipa kut tuara ka hmuh chiah khan Vansangi lakah ka rilru puthmang pawh sawi ngai lovin ka hrethiam nghal. Kei hian tihtakzetin ka duhin ka hmangaih a ni. 

A mittui tla khan ka thinlung a tawk chê a, a nat ka phal lo a ni tawp mai.

Pawngsual hlawhtling êm lo mah se, Rape Case a nih tlat avangin chuti maia ngawih bopui chi a ni lova; ka thinrimna bengdai tur hi chuan hun a duh rei ve khawp ang.

Zan dar ruk velah Manosh-a te chhung Dr.Bimal Saha Clinic kan thleng ta a. Appointment kan nei hran lo. Mahse, ka driver zarah muangchâng lovin kan lut thei ta a.

Vansangi ngawi ngal chu uluk takin a check a, keimah zawk min rawn enin, "Kum engzat nge in inneih tawh?" Tia min zawh chuan rang deuh hian, "Thlahnih a tling ṭep," ka lo ti hmiah.

Makti hmel taka min melhtu Vansangtawli chu ka haider lui tlat.

Zanin tlai bika a thil tawn kan sawi lang tho a, chumi hnu chuan insawiselna a neih leh neih loh min zawt teh daih a, zinglama a awmdan kha ka lo hrilh vat.

Chumi hnu chuan test tur pahnih a sawi a, Coffee no dawm tur min pek pah hian, "I nupui hian nau a pai a ni lo maw?" Tiin min zawt hlawl a, ka ngawi vung vung ringawt.

Vansangi erawh chu nurse pakhat nen room lehlamah an inzui lut daih tawh thung.

Chuti maia a râi ka ring lo ve ringawt a, a taksaah na dang a neih leh neih loh te, kha pa khan a taksa pawimawh lai a khawih na hman em tih en tura hruai kan ni a, nakinah Medical report kan la mamawh dawn tho bawk nen tia a rang lama kalpui ka ni, a naupai leh pai loh chungchang min zawt daih chu ka hrethiam nek lo e.

A hnu dârkâr chanve a ral leh meuh chuan kei hian Vansangkimi lakah naute thlakhat leh kar hnih bâwr vel ka lo siam fel der tawh chu niin! Ka nui chhuak hawk a, ka chhungril a nui a ni ber.

Medical report felfai tak nen in lam kan pan a, ka bula ṭhu ngawi reng ka Vansangtawli chu ka melh zuk zuk a, a tawhsual tawh zârah a naupai thu kan hrechhuak ta hi a lawm nge lawm lo tih a hmelah engmah a hriat theih loh.

In kan thleng a, Manosh pawh eirawngbawl turin ka tîr zui a, ani hi chu ka engkim a ni mai. 

Vansangi kan room-ah ka hruai phei a, khumah ṭhuin a melh ngai a melh ngat ngat a, a biangah ka kut pahniha dawm chung hian a mitah tak ka en a, "Tuman an tihnat che hi ka phal lo, ka thlahthlam hauh lovang che," tiin ka kuah leh ta a. 

Chhuak lutuka a ṭah leh tâkah chuan a samah chûlin, "I tan ka awm reng dawn tih hria la, kan nautê hi nu leh pa kârah a piangin a seilian ang," inringtawk leh nghet charha ka ṭawng chuan a mittui kâr aṭangin min rawn melh a, "U Bartho.." ṭap ṭiaua tiin nghet zet hian min kuah leh a, ka hmangaih a ni. Ani hi ka kal tîr dawn lo, ka hlatah ka awm tîr dawn reng reng lo.

A ṭah chhuak zualpui a reh hnuah, tihian a thil tawn kha a sawi ta a.

"I kal hnu khan rei fe ka la mu a, ka ril a ṭâm tâk avangin ei tur ka siam a," tiin a thaw halh a.

"Ka in eipuar hnuah Veranda-ah ka ṭhu phei a, naupang school bâng rawn haw ka thlir reng laiin Taxi a rawn ding a, driver khan tui in tur min dil a nih ka ring, a ṭawng ka hrethiam si lo a, English a hmang bawk si lo," tiin min melh zeuh a.

"Kha pa khan zaizir hian tui a duh thu min hrilh chuan ka lo hrethiam ve mai, tui in tur la tura ka kal chu min zui lûtin ka hnunglam aṭangin min rawn kuah a," tia a ngawih reng takah chuan a samah ka lo chûlsak a, "Sawi duh tawh suh, a damchhunga a inchhirna turin a nia hma ka lâk dawn," tiin ka ṭawng thlamuan a. 

"A tîrah chuan ka sual lêt ve a, mahse, ka biangah bengin ka samah a ṭhâm a, u Bartho, vawikhat tal ben lêt ve ka duh," a ti ta a.

"Shh..khatiang sawi suh, nautê khan a lo hre palh ang," ka ti sup a.

Chutah min en hâ chung hian, "Naute neih chu i duh em?" Tiin min zawt ta a.

Kiai suk chung hian, "Ka duh vang alawm le, ka hnenah ka hruai che, zankhat mah âwl lova thawh hah man a awm kher mai," ka lo ti pek a.

"I tenawm em mai aw.." a'n ti ṭha leh a, lungngai hmel a pu lutuk ta bik lo.

Zanriah ei hmain inbual turin ka nawr lui tlat a, kan inbual dun ve tâk hi. Bathroom chhunga chêt la lo turin ka insum nasa viau. Nichin maia a thil tawn ngaihtuahin ka beisei ngam ngang lo a ni ber.

A hma ang kha chuan min zah lutuk ta bik lo a ni ang. A sawi dan takah Saruak tangkâwnga ka inbual lai pawh min melh ngam ve ta. Ka Vansangtawli tel lo hi chuan ka famkim tlat tawh lo.

Manosh te nen kan pathumin zanriah kan kilho a, Vansangi nen pawh an inbe ve zeuh zeuh a, 'Madam' tiin a ko mai.

Ka student te rawn thlen lai pawhin ka bulah zel a awm a. 

Hruaiin, "Sir, zanin chu ei tur kan lo keng a nia," kan boruak hre miah lovin a rawn ti bawrh bawrh a, Vansangi ka va melh zeuh a, engah mah ngai lo niawm tak hian a hawisâng vah a; chutah, "Inah hawn let leh rawh, zanin chu kan mu hma dawn," a lo ti hmak. Ka nui chhuak teuh kher mai.

Hruaii lah chuan, "Nangmah ka be lo che.." a lo ti ve nghat a. Ka la ngawi reng.

"Min be lo mah la, keiin ka chhâng thung che alawm, u Bartho nen kan mu hma dawn.." a ti nawn leh ngat a.

"Sir, ani hi tunge? I nau em ni?" Tia Hruaiin min zawh chuan, "Ka nupui hual a nih hi," ka lo ti hmiah. 

Hruaii makti hmel en duh lovin Vansangi lam ka hawi a, "Naute, ṭan a hun tawh si a, ka kal aw.." ka ti sup a. A lo bu nghat nghat ringawt.

A tihtauh tawh loh hram ka beisei.

Insawitheihna pawh ni hran lovin hmeichhia min ngaihven ve tak taktu ka tawng nual, hnamdang nula ka thawhpui te an ni nawk hlawm. Mahse, atu amah ka ngaihven ngai lo. Vansangkimi ka hmuh khan min hîp chat a, inngaihtuah chiang lêk lovin thu ka thlunpui rum rum a nia. Ani tluk tu tur hmeichhia mah ka hmu lo a ni ber e.

Belhchian dâwl, nula thianghlim ngeiin ka fâ a pai hi a rukin ka nui leh suk suk zel.

Pratab-a chungchâng kha chu Manosh kutah ka dah a, aniin a lo ngaihven zui ang.

Khatiang boruak kan tawn aṭang khan kâr khat a liam leh tawh a, Vansangi a nuamsam thei meuh lo. Zingkar nawm loh a neih bâkah a thil tawn khan a shock deuh nge a hma anga hlim hmel kha a pu thei vak lo.

"I kawm tur leh nangmah enkawltu tur nula ka zawng ang aw..." tia ka hrilh zan chuan, "Mizoramah ka haw mai dawn em maw ni?" Tiin min chhang daih a, ka lawm lo kher mai.

"Ka hnena awm hi a hrehawm viau em ni?" Tiin ka zawt nghut a.

Min melh zeuh chung hian, "Kan inremsiamna angin nau ka pai ta a, i fa ka pai duh vanga zui che ka nia," a ti ṭha mai a.

"Vansangkim.." ka lo ti vin hluk.

"U Bartho, dam ṭha pangngai chu ni ila i hnena awm ka pawiti lo, i duh ang ka pe thei lo che a, ka nuam lo reng bawk si a," a ti zawi sap a.

"Ka duh ang zawng zawng ka nei thei lo, eng nge i lakah duh ka neih ka sawi em ni? Ka dil ngai che em ni?" Tiin ka tum loh deuhin ka ṭawng chhuak ta a.

"Dil lo ve, mahse, i hnenah kum khat ka awm anga ka hrawk chawm la, i tisa mamawh ka pe ang che tiin ka intiam a, tihi ka ni leh si a, kârkhat lai i nghei tawh.." a'n ti chiah chu nuihza ni miah lo hian ka nui lui ngial a. Mipa hurherh tak angah min chhuah a ni ringawt alawm maw le.

A koki-ah ka kut pahnihin ka vuan a, "Vansangkim, englai pawhin sex hmang reng turin thu ka thlunpui lo che, i damlo leh i naupai vanga i nawmsam loh lai pawha mutpui duh tur che mipa ka ni lo, chutiang êma hmeichhe mamawh ka ni hek lo, i ngaihtuahna tenawm tak kha paih bo hmiah rawh," ti khur khurin ka thing deuh nawk a.

Kár khat erh awrh nupa nun kan hmang lo a, chu pawh ama lam nawm lohna vang a ni a, hrethiam lo tura min ngai leh tisa thil chiah ngaihtuah anga min puh hi nâ ka ti ru tlat. 

"Ka lu a hai dawn min thlah phawt teh," a tih tâkah chuan rang takin ka ding sawn a, rum deuha melh chung hian, "A nuam zawng zawng chu ka pe thei lo che, ka laka i duh ber nau i pai tawh a, i duh tawk ta tih ka hrethiam e," ti zawi ruihin kan room ka chhuahsan ta a. 

Ka hmangaih thu hrilha inrem taka awm ve ka duh. Ani erawh chuan ka lakah eng rilru mah a pu ve lo a, nautê chiah a duh. Kei min duh lo a, a duh neih nan hmanruaah min hmang a nih ber hi. A fin ka chelh lo zâwk a va ni mai awm ve.

Ṭhutkhawmna pindanah ka ṭhu ngawi reng a, min rawn ngaihsak hek lo.

Minute 20 dawn ka ṭhut hnuah a rawn chhuak phei a, ka bulah rawn ṭhuin, "U Bartho, lokal rawh mut a hun.." a ti sap a.

"Va mu rawh.." ka lo ti hmuk.

"Nangmah nen alawm mut ka duh..." tih pahin ka kutah a vuan a, rang takin ka lasawn daih.

"I duh neih nan kei hi hmanruaah min hmang a, ka fa i duh a, i duh ang i hmu bawk a, i tan engmah ka ni lo, nih pawh ka tum buai lo ang, mahse, hei hi lo hria ang che, kum khat a ral hma loh chuan ka in hi i chhuahsan lovang, i chhuahsan dawn miah lo..." ka ti ve ta a.

"Saingurpui..eng nge i hriat a, i duh duh i sawi ve ngawt le..?" A lo ti hlar a.

"Ka duh duh ka sawi lohvin ka duh loh em ni sawi se min tih? I duh neih nan min hmang tawh a, ka duh ka neih ve theih nan hmâ ka la ve thung ang," ka ti hmiah hmiah a, ka ṭawng dím vak tawh bik lo.

"I â tawh a nih kha, eng mah i tana huat tur ka sawi lo," tiin a la ṭang ve khanglang a. Chu chuan ka thin a tirim sauh.

"Kum khat chhung atan nangin thu i tiam a, kei chuan ka fa leh a nu enkawl turin ka dam chhung ka tiam ve ang; i duh emaw, i duh lo emaw fahrah siam tumna rilru ka pu lo a, chutiang rilru pu tura min ngai a nih chuan Saingurpuia hi min la hrechiang tawk lo hle tihna a ni mai," vei nghut nghut chunga ka ṭawng lai chuan a ding hliai a.

"En teh, i thil sawi kha ka hrethiam ve lo a nia, tunah nautê ka pâi dêk dêka lo inhniala inhau vak a ṭúl em ni? I nupui pawhin a neih dawn ṭêpah a thihsan che kha, khatiang kha ka chungah a thleng ve thei, nge, nang hian thi se min ti zawk?" Tia a rawn ṭawng chhuah tâkah chuan ka insûm theihna a bo zo ta.

Vansangkimi hmaah tak ka va ding a, "Ka nupui leh ka fa chungchang vawikhat mah sawi ri leh tawh suh," tih pahin a biangah ka bêng ta a. A hawi sawk.

Ni e, ani kei âia naupang daih hian min hmusit a ni. Ka nupui leh ka fa thi tawh, koh kîr theih loh ngaia ka hun tam tak mittui nena ka lo hman kha ka tuarchhuak ṭan chiah a, ka beng hriatah ngei min han chhamkhum leh kher hi kei Sailo lunglian mipa hian ka pâidam thei ṭhak lo.

"Saingurpui..." tia Vansangkimi phun sep chu ka melh kâwk a, mittui luang ngiai ngiai chungin a kut hian a biang a dawm a, tawrhnaa khat mitmenga min melhna chu ka en rei duh lo.

"I duhna hmun apiangah kal la, he in chhung hi chhuahsan suh ang che, ka compound i pêl a nih chuan, a lêt leh tur chu i rin phâk bâk a ni ang," ti hniam ruihin ka room-ah ka lut ta a.

Hmeichhe kutthlâk hi ka duh lo. Ka hmangaihna hian a ṭhatna tur a duh a, puitling rilru puin ṭawng liam puat puat ṭhin lo se tih ka duh ve. Ṭawngkam ka thiam lova, ka huat vanga bêng ka ni hek lo. 

Ka tihnat phal loh hmeichhia a ni a, midangin an tihnat pawh ka phal chuang lo. 

Ka khumah ka ṭhu hnawk a, ka hmai hupin ka tuai puat a, kum tam tak hnua ka hmeichhe duh leh hmangaih ber kher hian min duhna chhetê mah a nei ve lo hi ka natpui a ni ber.

Ni e, ka nâ a ni.

Vansangi a rawn lût lo va, kei pawhin ka va ngaihven eih lo. 

Khumah mu lovin ka ṭhu reng a, dâr hnih rik dawnah a rawn pen lut ve ta a. 

A mit a bûi lâk a, a biang ka benna lam kha a sen ṭân bawk. 

Ka hmaah a rawn ding a, "Lehlamah hian i bêng leh duh em?" a ti chang fak a. Ka lo thaw huai ringawt.

"Khawi hmunah pawh awm ila, tu pawh pan ila, ka tan khawi hmun mah a nuam lo. Min duhin min hmangaih lo mah la, kut êm min thlâk duh tur mipaah chuan ka lo ngái ngai lo che, u Bartho.. " a ti zawi fiah kalh a. Tlêm chuan nuam lo tihna ka nei ve deuh.

"Sawi chhuah leh ka duh lo a nia, ka thinrimna tawngbaw hlek suh," ka ti nghut ringawt.

"I thinrimna te chu a baw sa renga i rût thiam lo a nih kha, Saingurpui.." a tih chuan ka ding leh hluai a.

"Vansangkim, ka ning a nia..ngawi tawh rawh.." ka lo ti vin hlur.

"Aw le, Sir..Mahse, ka hmangaih che aw..." a ti ta a.

A thil sawi avang chuan ka phu zawk a, amah ka en vat a, min melh kar chung hian, "Ka duhna che leh ka hmangaihna che avang chauh hian min benna kha ka ngaidam ang che, a lehpek awm tawh suh se.." tia min rawn ban chuan ka ding khawng luh ringawt.

Min kuah a, a biang leh ka biang sîk tîrin, "Ka tleirawl lai aṭanga ka âtchilh mipa kiangah hian ben ngaiin ka awm ta a nia, i thiam loh a ni lo aw, keima thiam loh zawk a ni." Tiin min fawp ta a.

A chêt danin min ṭhâwng leh ta. Hei chu a ṭha lam a ni lawi si. Ka Vansangtawli hian zia engzata tam nge a neih ang le..? 

Ka hmangaih miau mai si a.

110223

-B®®

B+>[BeckirafARenthleI]<+®®