4.VANSANGTAWLI [A Becky Rafa Story]

4.VANSANGTAWLI

Ziaktu: Becky Rafa Renthlei -B®®

[Recap]

"Aw le, Sir..Mahse, ka hmangaih che aw..." a ti ta a.

A thil sawi avang chuan ka phu zawk a, amah ka en vat a, min melh kar chung hian, "Ka duhna che leh ka hmangaihna che avang chauh hian min benna kha ka ngaidam ang che, a lehpek awm tawh suh se.." tia min rawn ban chuan ka ding khawng luh ringawt.

Min kuah a, a biang leh ka biang sîk tîrin, "Ka tleirawl lai aṭanga ka âtchilh mipa kiangah hian ben ngaiin ka awm ta a nia, i thiam loh a ni lo aw, keima thiam loh zawk a ni." Tiin min fawp ta a.

A chêt danin min ṭhâwng leh ta. Hei chu a ṭha lam a ni lawi si. Ka Vansangtawli hian zia engzata tam nge a neih ang le..? 

Ka hmangaih miau mai si a.

-B®®

Min hmangaih thu a sawi zo chiaha kan infawp a, khuma ka mut tîr hnuah a bulah ka inthawlh ve nghal a.

"Vansang, nichina i thil sawi kha i rilru tak taka sawi i ni em?" La ringhlel ru deuh chunga ka zawh chuan ka lam hawiin a rawn inlet thak a.

"Hmangaihna min chenpui phawt la, chumi hnuah ka hrilhfiah vek ang che," a'n ti ve ngei a, ka lo nui hawk. Min han sâwm ve ngial hi thil mak a ni.

Chumi hnu chuan ṭawngkâ ni lovin chêtzia zawkin kan inhmangaihna kan nem nghet a ni ber mai. Nidang zawng aiin a duhthawh a, khum laizawlah na na na hi chuan mipa dik tak ka ni a, ani erawh experience nei a nih lohna a lang ve deuh ṭhin a, zirlai thiam thei tak a nih vangin a hmasawnna erawh a hmutu leh a dawngtu ka ni thung.

Ka pumah a kut a nghat a, "Class 10 kan nih lai aṭang tawh khan kei chuan ka duhin ka âtchilh che a, nangpawhin i hriat vek kha," tiin bul a rawn ṭan a. Ka lo nui suk ringawt.

"U Zonuni nen in inngaizawng tih ka hriat zanah khan ka ṭap tawp," tiin a hunlai ngaihtuah niawm tak hian a chhing vang vang a, kei pawhin khang hun lai kha ka lo ngaihtuah ve tho.

"Ka ṭhiante bulah, ka nulat tak tak hunah chuan kan Sir hi ka bêm ve ang tiin ka sawi nghe nghe, mahse, kan kum a inthlau a, Matric ka pass khan hmuh tur i awm ta si lova a rûkin ka zawng nasa thei lutuk che," tia a sawi lai chuan ka lo melh zuk a, a thutak vei phian si.

"Chuan..." ka lo ti leh ringawt a.

"Nangmah vang hian lehkha ka zir nasa a, ka nu leh pa an inṭhen hma loh kha chuan a ti ṭha pawl ka ni zar zar, hmuh leh che ka tum ruh hle, mahse, falâk ka ni tih ka inhriat aṭang khan ka nun a buai zo vek a, ka nundan chu i hriat kha aw," tiin ka mitah min rawn en a.

"Kum eng zât nge i nih?" Tiin ka zâwt teh daih a, "29" rang takin a lo ti ve mai. Ka rin âi tak chuan a upa ve reuh. Mahse, kei nen chuan la inthlau tak kan ni tho.

"Nupui i nei tih pawh ka hria a, a boral erawh pawi ka ti, eng lo, boral lo se chuan tihian kan awm thei dawn bawk si lova," inthlahrun hmel deuh hian a ti a, ka nupui chungchâng sawi tawh lo tura ka tih vang a nih ka ring.

"Sir Dinpuia thihni-a ka hmuh leh che khan hmana ka rilru ang, ka duhna che a rawn chhuak leh ka ti mai, nangpawhin min duh tih ka hrethiam ve a nia, i mitmengah a lang vek," tia nui var var chung hian ka biang a tawk a, "Min duh ve tiraw?" Tiin min zawt ta a.

Zêp buai lovin ka duh thu ka hrilh ṭha mai.

"Pathlawi i ni tih leh i hnathawh zawng zawng, i kum zât thlengin nithum chhung khan ka hre nghal vek bawk, chhuah leh che emaw, chân leh che ka duh tawh lo, chuvangin, ka hnaih theihna tur kawng che ka dap ve ngar ngar a, ka tum rêng vanga hnaih che ka ni, i fâ ka pâi duh miau a," a ti hmiah. Vansangtawli insawifiahna avang chuan ka nui suk suk a, ani angin min han âtchilh tih hriat hi a nuam dangdai ve êm asin.

"Ka hmuh nawn leh hma che khan i piang ve tih pawh ka hre tawh lo," nui chungin ka lo ti a, ka khabe hmula pawt zeuh chung hian, "Saingurpui, daw daw lo mai rawh, min hmuh khan min duh a, min ît tih ka hria, i inthup thiam lo si," a ti leh tawp.

"A dik alawm, ka nupui boral aṭanga ka hmeichhe hnaih hmasak ber i ni a, tumah midang an awm lo," tia ka hrilh ve tâkah chuan maktiin a meng phar âwk a, zinglam dâr hnihah kan la ṭawng tui ngar ngar viau, mut a chhuak lo a ni ber.

"Nangmah ka nghah vang chein mipa tumah ka mutpui duh lova, engtikah emaw i bulah ka la awm ve dâwn ang tlata inhriatna ka neih vang a nia, khatiang thutlukna ka siam kha mâwl min ti mah la, i demawm loh, mahse, ka tan chuan ka mipa duh hmasak ber tan engmah ui ka nei lova, min kalsan loh nân khatiang hmanrua kha ka hmang ta a ni.." tiin ka mitah min en kalh a.

"U Bartho, kum 16 lek ka la nih lai khan ka ta ni turin ka duh tawh che a, fahrah ni mah ila, ka hmangaih ber fa pai tura rilru nghet ka pu hi ka inchhir lo, nupui atana min neih kher ka phut lo a, kum khat tê chauh i kiangah awm dawn pawh ni ila maw, ka lawm tho tho," tia a sawi zawh meuh chuan ka khawngaih reuh lutuka ka kuah ta ringawt a.

"Ka hmangaihzia che hi engtin nge ka tih lan ve ang," ka lo ti zawi ruih a, chu veleh, "Min hmangaih lo ang, min ît ringawt a nih kha," a lo ti hmanhmawh a.

Ka kuahna thlah dul deuhin, "Ka hmangaihna che i hriat thiam theih nan hun tam tak kan la hmang dun dawn alawm, min ring rawh, i Saingurpuia ni kumkhua thei turin ṭan kan la ang e," ka tih meuh chuan lawm avangin biangsum khuar kalh hian a nui var var a.

"Tuna i thu sawi vang khan lawmman i hmu ang," tiin a bra hâk lai a phelh a, chutiang zelin a dang pawh. 

"Dawngtu nih reng bik hi ka duh lo a, pe chhuaktu ka nih ve theih nan leh kan nautê hian a nu leh pa inhmangaihna a hriat chian lehzual ka duh," tih pahin ka chungah a rawn lâwn ta a, hei chu ka rin phâk bâk a ni ta.

Dâr thum vel bawrah 'Hei mah mah Lei' kan tih leh meuh chuan atu ve ve pawh che chhuak tur kan awm tawh lo. Kan inkuah hle hle a, min hmangaihtu hmangaihna hrethiam lo tura mipa mâwl ka ni lova, ka hmangaihna chak zia man thiam lo tura thluak thâwl Vansangkimi a ni hek lo.

Thluak tihtlâk kan nei ve ve a, kan fa tur hi damtea a lo piang chhuak a nih chuan a nu leh pa ṭhatna lai lai chhun mawlh teh se.

Vansangkimi nen thlaruk zet kan chêng dun ve ta a. Ka hmangaih thu nitin hrilh lo mah ila, chetziain ka lan tír tam zawk.

Jorhat-a min hretu leh ka thawhpuite chuan ka nupuiah an ngai nghet hmiah tawh a, a pum pawh a puar lian ve ṭan a, a ze ngai phawsawlh leh ri puat puat ṭhin kha a bansan ṭhen hlek hlek ti mai teh ang.

Eng emaw lai aṭang khan min û duh ta miah lo a, 'Bartho' tih emaw Saingurpui tiin emaw min ko ve hmiah. Mahse, ka duh daih zâwk.

"Bartho, lokal teh," tiin min ko lâwng lâwng a, kei room chuangah hna ka thawk a, vawiin hi inrinni a ni nghe nghe.

Khumah underwear leh bra chiah inbelin a lo ṭhu a, îtawm tîktêk tak a ni. Ka fa thlaruka upa a pâi mek a, a tih ṭhin dan angin a pum a lo teh kual leh chiam tawh.

"Kâr hmasa aiin a lian leh tawh a nia," tiin a nui hak hak a, dik tak chuan nitin kan inhmua kan mu dun zantin a, ka kham thei chuang lo reng reng.

"A ṭhang ve bawk ang chu, ka thun belh zing e.." nui kur kur chunga ka tih chuan, a rawn ding chhuak a, "Mizoramah naute nei turin kan haw dawn em?" Tih min zawt daih a, a hma aṭanga ka lo ngaihtuah tawh a ni a, helaiah khawsa mah ila, a hmaa a thil tawn tawh avang khan a rilruah hlauhthawnna a la nei fo tih ka hria.

"Kan la innei ṭha si lo a, Mizorama kan lêt chuan kan awm hran te a ngai rih ang a, i duh em ni chutiang chu?" Ka lo ti a.

"Duh lo, ka duh teuh lo mai," a ti leh lawi si.

"Pathian zarah kan dam ang a, naute i neih fel hunah man leh mual kan tifel dawn nia, a hmain ropui takin nupui ka nei tawh a, tunah chuan khatiang kha ṭul ka ti ber lo, keimahni kan pawimawh zawk," tia ka hrilh chuan thawmhnaw inbel mawlh mawlh pah hian, "Min ngaihsaktu tur chhungte ka nei chuang lo a, tihian kan innei a ni mai," a lo ti awlsam êt.

"Mizo dan a awm ve alawm, nangmah enkawl seiliantu che nu leh pa i nei a, an ngaihsak che emaw ngaihsak lo che pawh ni se, palai kan tirh vena tur a nia," ka lo ti duah a, ngaihdan ni vak lo tih hriat takin, "Innei ṭha lovin tihian chengdun reng mai ang, i pension hma loh chuan hetah kan awm ang a," a ti ve zel a.

Ka sawi thui duh ta lo. A rilru tur ka hrethiam a, kan chungchang ka chhungte ka la hrilh hre si lo hian ka rilru a tinuam lo ru khawp mai. Naute pian hunah ka la sawipui mai ang chu.

Zanriah kan eikham hnuah hna ka thawhsan a, ani kan room lamah a awm a, khami zan, ka ben zan aṭang khan vawikhat mah kan inhau leh tawh lo a, nitin hnaah ka kalsan a, ṭhian a kawm ngai hek lo, bazar tur takngial pawhin ka hruai chhuak khât khawp mai. Amah khawih tumtu Pratab pawh khan Jail bang a zût tawh a, Vansangi duh dan angin kan court ni-ah vawikhat a ben ve tâk kha.

Zan lamah class ka la pe kal zel a, Vansangi dul puar a hmuh aṭangin Lalhruaii pawhin min be tuitam ta vak lo. 

Zan khat erawh chu Lalhruaiin a ṭhianpa Mizo ve tho a rawn hruai a, Thanpara a ni nghe nghe a, a bialpa a ni nge ni lo ka hre lo a, Hruaii practical tih laiin inchhungah a lo va lût a ni awm e.

Kan bân tawh hnuah ka va lût ve a, Vansangi leh Thanpara chu an lo inbe bawrh bawrh a, an vawikhat inhmuhna chauh a nih hmel si a, mak ka ti ve deuh.

"Bartho, Thanpara a nih hi, ka College kalpui ṭhin a nia," tiin min lo hrilh vat a, Thanpara lah chuan kei min en lovin Vansangi hlir a melh a.

Lalhruaiin a rawn koh tâk avangin, "Tâwli, weekend ah kan lo leng dawn nia," tiin keimah pawh min be lo hian a chhuak a, Vansangin thlah a tum chuan ka lo dang vat a, "Ṭhian a neia va thlah kher a ngai lo," ka lo ti hmuk a, a ner sak mai.

Khuma kan awm tawh hnuah, "I bialpa hlui a ni maw?" Tiin ka zawt a, "A teuh lo lutuk, ka ṭhianpa a nih kha," a lo ti vat a.

"Mipa hrim hrim biak tlângnel vak loh tur, nula i nih tawh loh kha.." ka tih chuan, "I thîk chiang, thîk duh suh, Thanpara te chu a hming aṭang ringawt pawh hian ka duh chi a ni lo," tia nui hak hakin a pumah oil a chulh a, ka lo nui ve ringawt. 

A che phawsawlh riau emaw ka tih kha a lo ni bîk awzawng lo, inchhungkhur chêtah a fel em em a, awmpui tur pakhat lâk ka rawt pawhin min hnial fithla ṭhak a, "Nakinah nau neih zawh lamah duh leh kan ngaihtuah dawn nia," a ti duh chauh. 

Zingtin exer ka lâkpui a, hmun hla deuhah phei chuan ka kalpui ngai lo nain atana ṭha tur a nih vangin ka chauh ve deuh châng pawh hian khêl lovin ka kalpui tûktin. 

"Keimah pawhin ka kal thei reng a nia," a ti ve ziah a, mahse, a thusawi ka bengkhawn lem lo. Incheck-up zeuh zeuh a ngai a, a theih hrâm chuan keiman ka hruai zel a, ka theih loh ṭumah Manosh nen an kal ve mai zel. English a thiam êm a, ama doctor nen pawh an innel ve tawh riau chuan ka hria.

Nunphung pangngai kan zawh chho ve bek bek a, a nau neih thla a ni tawh a, a inzo ṭha ta meuh lo. Kei pawhin thlakhat chawlh ka dîl ve a, tumah min buaipuitu tur chuang an awm lo bawk nen kan pahnih hian kan tlei ve lutuk tlat.

Mak ka tih ve mai mai chu a chhungte hnen aṭangin call a la dawng ta lo fo hi a ni. Ka thu zawmin phone pawh a khawih ve lehna a rei tawh a, Mizorama a ṭhiante takngial pawh a be ngai lo a, keimah leh a doctor, Manosh tih loh a biak ngai pawh ka hre lo.

"I ṭhiannu Tetei tal kha i awmna te hrilh ve la," ka tih ṭumin, "Ho mai mai, ka hmangaih ber leh min hmangaihtu kiangah ka awma midang ka mamawh lo," tiin min chhâng a, ka sawi zui tawh lo.

"Bartho, Saingurpui.." tia Vansangin min koh vak vak chuan phak zetin ka meng chhuak a, a pum dawm chung hian a lo vial nasa mai. A nau neih nan kâr khat aia tam a la awm a, kan mamawh inlamkhawm vek tawh mah ila, chuti teh thuta a vei ka lo beisei si lo.

Manosh ka call vat a, zanrei lam a nih tawh avangin a pick thei lawk lova, vawi thum ka call hnuah a rawn chhâng ve hrâm.

Thil awmzia ka hrilh a, Hospital kan pan tur thu leh Taxi hmanga lokal ve turin ka hrilh ta a.

"Naute, tikhan lo tuar hram hram la, motor-ah kan mamawh tur kan dah lawk ang e," tiin ka che chhuak nghal a, a dik a dik chuan ka hamhaih lutuka tih hmasak ber tur pawh ka hre lo. Ka nupui hmasa Mazawni nau neih dawn ái pawh khan ka lâktlâk loh zawk.

Vansangi a hnung seat-ah ka mut tîr a, motor khalh a ngai bawk si. Ani natuar lah a inpet fan fan a, ka khawngaih a nia.

Sawi tawh ang khan ani hi chu engkimah a chhel a, han pangchan leh no dìaia awm pawh hi a nei lem lo. A nihna ang ang hian a lang tawp zel.

Dâr hnih velah Hospital kan thleng a, Manosh pawh a rawn thleng chawpchilh ve mai.

Vansangi ka pawm a, a chal leh hmai vel a thlan dap bawk. 

Nurse pahnih duty in an lo buaipui vat a, keini erawh luh ve an phal loh avangin Corridor-ah kan lo nghâk ta a. Mazawni ka hrechhuak lo thei lo, ani kha chu a neih dawn ṭêpah a thi a pût a, tikhan nauchungah a boral zui ta kha a ni a, ka Vansangi hian khatiang kha a tâwk ve ang tih mawlh ka hlau.

Mazawni boral aṭang khan ka ṭawngṭai ngai ta lo. Vûi nun ka nei char char a, Pathian a awm tih ka hria, ka ring ve ṭhin. Mahse, ka nupuiin min kalsan hnuah Pathian lam hawi lovin keima ṭhat ṭhat hian ka ṭha ve tawp a. Vansangkimi nen thu kan thlun theihna chhan pawh Pathian lam ka ngaihsak loh vang a ni pakhat.

Ringtu dik tak, mi piangthar chuan khatiang sual lian lutuk kha an ti dawn lo. Nupa angin kan khawsa a, kum khat chhung atan kan inremsiam a nih kha, khatiang kha ringtu dik tan thiltih thiang a ni lo tih ka hrerenga ka hnar phal si lo.

Kum riat chhunga a vawikhat nan ka rilruin ka ṭawngṭai ve ta. Ka hmangaih Vansangkimi min lâksak lo tura ka dil a ngai alawm.

Hna ṭha tak leh zahawm tak neiin ka nun nuam viau mah se, ka hmangaih tak min laksak theitu Pathian kan hriat si loh chuan Vansangkimi pawh hi min lâksak leh thei tho. Chu chu ka hrechhuak chawpchilh. Mi puitling kum lamah pawh naupang chhe tawh lo ka ni a, khatia a na tuar lai ka hmuh te khan Mazawni anga a awm mawlh ka hlau a, ka lung pawh a phu pangngai hleithei lo a nia.

Rilru ṭawngṭaina ka neih zawh hnuah tlêmin ka thlâ a muang ta deuh. Mizo inkhawmnaa inkhawm a duh leh duh loh ka zawh ṭuma Vansangi min chhânna kha ka hrechhuak rauh rauh a, "Hetiang nun nei chung hian ka kal ngam lo," tih a sawi a.

Ni e, pumkhata kan insiam danah Pathian duhzawng a ni lova. Nunna neitu, thihna leh damna kawltu kan Pathian duhdana kan awm a ngai tih te thlengin ka ngaihtuah kâi a, mi ramah ngaihtuahtu mumal pawh nei lovin kan tâl ve nawk nawk a, a chhe ber thleng ta ila, kan mualpho turzia tepawh ka ngaihtuah lo thei bîk lo.

Nautê nen ṭhatea an dam chhuak a nih ngat chuan Pathian duhdana Kristian chhungkua dinpui ngei tumin rilru ka siam nghet nghal bawk.

Mak lo ti suh u. Vansangkimi ka hmangaihna hi a satliah lova, nun kawng dik kan lo zawh dun thei reng alawm maw le. Bartho Saingurpuia hi ka harh chhuak har lutuk mah mah a ni.

Khua a var fel a, fapa ka nei tih nurse in min rawn hrilh chuan lawm avangin ka nui suk suk reng mai. Kan 'Tâwli' pawh a ṭha a, a inhliamna tih loh harsatna em em a nei lo tih min hrilh chuan atana vawikhat lek ka ṭawngṭaina chhânin a awm tih ka hrechiang a ni.

Kan hmangaih ngawih ngawihte chu an nat te, an hrehawm te kan phal lo a, ṭawngṭaisaktu pawh nei ve lo a nihnate ka thinlungah a tharin a rawn lang a, kei chuan nu leh pa Pathian ṭih mi ka nei a, ka tan bâng lovin an ṭawngṭai ṭhin. Vansangkimi tana ka pawimawhna ka hriat belhchhah bawk.

Hmeichhe lu chu mipa a ni a, Mipa lu chu Krista a ni.

Nupa dik taka insiama chhungkaw thar kan din ve theih nan a rang lama hma ka lâk a ngai tih ka hria a, Vansangi ka sawipui phawt anga chumi hnuah ka nu leh pa kan bia ang.

Damdawi in khuma Vansangkimi muhil bâm chu ka en a, a hmelṭhatna min hîp bertu a nih rualin ka fapa nu a nihna hi ka tan a hlu zawk. A thianghlimna min hlan hun nghâkin kum kha leh chen a lo invawng ve chu a ni si a, ka ngaisang lo thei lo. Min hmangaihna hi a der a ni lo tih ka hrechiang êm asin.

Naute ṭap thawmah a rawn harh a, khum bulah kei ka ding a, "Tâwli, fapa kan nei a nia, ka lawm e aw.." tih pahin a chalah ka fawp zeuh a. Nui var var chung hian, "Saingurpui, nang kher hi chuan 'Tâwli' tiin min ko suh, ka duh lo aw.." a rawn ti a. 

"Ka Vansangtawl" ka lo ti leh hrâm a, a tum bûr. Chutah min rawn en hâ chung hian, "Kan fapa chuan tunge a chhun?" Tia min zawh chuan, "A nu angin a hmelṭha a, a pa ang thovin a hmelṭha bawk.." ka lo ti a, thei leh thei lo hian a nui a, "I thluak ang nei kha ni lul teh se," a ti sap. Ka nui ruh ruh ringawt. Ka hnathawh hi a ngaisâng êm alawm.

Ka fapain a chhun zawk a la hriat loh. 

Manosh pawh a lawm ve vur vur khawp mai, ka thawhpuite phone kualin fapa kan neih thu ka hrilh hlawm a, min lawmpui hle tih an sawi.

"Ka nu leh pa kan chanchin hi hrilh ila, kan haw thei rih dawn chuang lova palaite lo tîr ve ta se eng nge i ngaihdan?" Tia Vansangi ka zawh chuan rei fê a ngawi a, min chhâng dawn tawh lo emaw ka tih hnuah, "Bartho, nupui atan min duh tak tak maw, fapa nei lo ta ila min neih i duh tho ang em?" Tiin min zawt lêt a.

"Vansang, ka thu sawi tur hi ngun deuhin ngaithla ang che," tiin a kutah ka vuan hmasa tê tê a. Min lo en lêt kar thung.

"Kei hian ka hmangaih che a, i tel lova hringnun hman ka duh lo, kan thuthlun kha sûtin damchhung atana ka nupui ni turin ka duh che a, kan fapa vanga neih tum che ka ni hran lo, ka hmangaihna che hi kum khat daih chauh a ni lo a, ka damchhung a daih dawn tih ka hriat vang a ni, nangnen chhungkua din a, Kristian chhungkua min dinpui turin ka sawm a che," nghet charha tiin a mitah ngun takin ka en a, a khap fak fak ringawt.

"Bartho.." a ti chhuak sap a.

"Min hmangaih tih i sawi lai khan kum khat aia rei ni turah ka ngai a," ka lo ti zauh a.

Nui hak chung hian, "I damchhung daih aia reiin ka hmangaih che," a lo ti ve ngei.

Kan fapa hnute a pêk laiin Sunita leh Vikram an rawn lut ta a, kan sawi chhunzawm ta rih lo. 

Inkan hun chhungin ka thawhpui te an lo kal neuh neuh a, min lawmpui ve khawp chuan ka hria.

Damdawi inah zan hnih kan riak a, in lama in enkawl turin kan haw ve ta a, private nurse pakhat Vikrama nau kan hruai haw tel a, ani hian nau-awm leh a ṭul apiang thla thum chhung min thawhsak anga a hlawh pawh a sáng viau. Awmpui satliah a ni lova nurse a nih vang pakhat a nia. Nula tê lam ngo var leh hmel pangngai tak a ni.

Vansangi pawhin ka nu leh pa hrilh a duh ve ta bawk a, ka nu leh pa annih tlat avangin sawi dan turah ka buai ru deuh a; mahse, kan inremsiam dan sawi lang lovin kan inhmangaiha inneih kan duh thu leh fapa kan nei tawh tih chin chiah ka hrilh ta a.

"Bawiha, ka rindan vel chiah a nia, Mazawni boral hnua i hmeichhe rawn hruai kha i tan eng emaw tak a nih ka ring rêng a ni," ka nuin a ti a, Vansangi chanchin leh a nu leh pa chungchang zawng zawng ka hrilh fai vek a, "Kan tana Pathian min pêkah kan pawm hmiah a nia, chhungkua kan lo inrawn anga palai tirh dan tur kan lo ruahman ang," ka pain ṭhatein a ti a. Ka thawveng huai mai.

Kan awmna a hla bawk si a, kan fapa hming an rawn phuah tur thu an sawi a, "Zinpui tham a nih veleh rawn haw ula, hetah inkutsuih ve ula ka duh khawp mai," ka nuin a ti leh a, video call in Vansangi nen an inbia a, kan fapa hmel pawh râlkhat aṭangin an hmu ve a, an lawm em a, ka nau Biaknunga a lawm lehzual. 

"U Sai, nupui i neih zawhah ka nei ve ang, neih khalh che ka duh si lo a," a rawn ti a, ka nui huk.

Ni e, ka pathlawi rei ve tawha ka chhungte hian min pawmpui dawn tih ka hria alawm. 

Vikrama nau hi Alpana a ni a, Vansangi nen an inrualkhat mai thei.

Nurse kher kher ka duhna chu ka hnaah chawlh ka nei rei dawn lova; Vansangi hi a zei lo chi a nih ve avangin damloh leh eng emaw palh thuah awmpui kan nei dawn rau rau a nih chuan nurse ni thei se ka duh. A hlawh lamah chuti luain ka buai dawn chuang lo a, an inngaina thuaiin ka ring.

Khumah ṭhuin khawr zet hian ka fapa ka pawm a, upat hnua fa neih chu an duat duh tih zawng zawng kha ka nei zo a ni ber. A ṭê hleka ka bih sek a, ka pawm nghal a, "Bartho, khatiang chuan i tikhaw lo vek ang," Vansangi pawhin a ti ve a, ka mu hman meuh lo chu a ni e.

Kâr thuma upa a ni ve ta a. Ka nu leh pa hnen aṭanga chanchin thar kan hriat chuan min tilawm hle mai.

Palai an tirh tawh thu a rawn sawi a, a hun tur an sawi kha kan lo hre fuh pek lo a, Vansangi pain, "Anmahni haw thei an nih si loh chuan a man rawn hlan ula, tikhan innei nghal mai rawh se, keini lam aṭang chuan mawihnaia tih vena tur sum leh pai kan nei lo," a rawn ti a, Vansangkimi rilru na deuh mah se, keimah ka lawm thung.

Chhungkaw thar din ka duh avangin aman kan pêk fel chuan ka rilru a dam huai ang.

"Palai tirh kher pawh a ngai lo, ka pa âi chuan a nupui khan insenso a hreh zawk ang, ka mualpho tam mai mai," a ti hmak hmak a.

"Khatiang zâwngin ngai mah ta che, dan anga kal a ṭha a, ka nupui tak tak i nih chuan a dan a dang zak mai ang," ka lo tih chuan, ner nâng chung hian, "I bula ka awma kan hlim chuan a tawk, anni khan min hmangaihna chhete mah an nei lo," a ti hmarh hmarh a, ka hriatthiampui ve reng.

Alpana a rawn lut a, naute a rawn pawm a, Vansangi melh zauh chung hian, "Madam, inbual tawh la, i inbualna tur ka dah tawh," a rawn ti ta a, inneih chungchâng kan sawi zawm tawh lo.

Alpana hnenah, "Tikhan lo awmpui la, ka nupui hi kan bual ang e," ka lo ti a, Vansangin min lo melh hâ a, a zak tih ka hre mai.

Min rawn melh leh kâwk a, Alpana nau pawm chunga a chhuah hnuah, "Ani awm lai khan khatiangin ti tawh suh, a zahthlâk," a ti ta chiah a.

Khi suk chung hian, "Ani lo awm hma pawhin kan inbual dun tho alawm," ka lo ti ve tlat a, "Anih min pawm phei rawh," a'n ti ve ngei a, a pangchan ve thiam dan ber a nia, ka pawm phei ta nge nge e.

A ruangâm dik thlarh ka hmuh hian ka ît leh ṭhin.

"Saingurpui, i mitmeng kha aw.." tiin a nui a. Ka lo nui huk ringawt. A âwmbâwr ka tawk leh hrâm. 

"I inthunun ṭhat loh chuan tar lam fa i nei ṭeuh mai ang," tiin a nui kar kar a.

"Tâwli, ka tar leh tar loh kan fiah dawn em ni ang," ka tih chuan, "I putar hunah ka la nula dawn chauh si a, min duat viau loh chuan min chân lovang tih a sawi theih miah lo a nia," a ti ham ham a.

"VANSANGTAWL" ka ti hluk a, "Saingurpui.." ti lêt ve zatin tui vawtin min rawn leih a, ka phu zuk. 

"Han dam fel la, putar ka nih hmain ka che na khawp ang, Jorhat kan thlen tirh âi khan i rim zawk dawn a nia," tiin ka nui kur kur a. Ka hnungah min chúm a, "Tenawm thei siah.." a ti taknain a nuih a za ve tho tih ka hria.

Ka pain kan fapa hming atan Raguel Sainghinglova a rawn phuah ta a, a mawi kan va han ti tak. Vansangi phei chuan, "I pa hian hming mawi a hria a nih hi, i hming pawh hi a nalh ka ti, i inhmeh si.." a tih ve kha. 

"I hming pawh a mawi alawm, Vansangtawli.. i inhmeh si..." nui chungin ka lo ti a, a titau leh ta. Mahse, rei a awh dawn chuang lo tih ka hre ve tawh a, ka nuih liampui ta vel mai mai.

Tunah chuan dan angin man leh mual kan tifel ta a. Inkutsuih lo mah ila, Vansangkimi man ka pe fel ta e. 

Inneih zungbun tur Rangkachak simple takin ka chher tîr a, ka thawhpui leh ṭhiante nen zanriah kan kilho zanah kan inbun tîr ta bawk a, naute thar lawmna erawh thla thum a tlin hunah buatsaih kan tum a, zan lama practical class ka pêk ṭhin pawh 'Term' awm leh tur aṭangin ka cancell ta vek a.

Ka nupui fanaute kianga a tam thei ang ber hun hman ka duh vang a ni. Bâkah, ka hlawh a tam tawh a, khatiang hunawl hnawhkhahna kha ka mamawh ta vak lo. Ka Vansangi leh ka fapa hi in lama awmpui tama chhungkaw awmzia leh hlutna hriatfiah tir ka tum ruh tlat.

Thla li hnuah.

Nipui chawlh hmang turin Aizawlah kan thlâwk thleng ta a. Ka nu leh pain an tupa Raguel Sainghinglova pawm an inchuh titih a, a va buaithlâk e. Fapa pahnih min nei a, tú hmel an han hmu ta hi an lawm êm a ni.

Vansangi pawh, 'Bawihi' tiin an ko thei nghal a, ka nau Biaknunga'n, "A hmelṭha ve chiang e, innu hi chu..ka thîk rum rum che," tih pahin kan room- thlanglamah zial a zu ru a, ka nu leh pa hmuh laia zûk kha a inthlahrung ve tlat.

"I nupui tura i hual deuh chu rawn lenpui ve la," ka ti a.

"Ka ti mai mai a nih kha, College a la rap dêk dêk chauh," a tih chuan ka nui huk a, "Vansangi hi ka student hlui alawm," tiin a chin chhuakin ka hrilh ve ta a, "A tleirawl laia a star kha min nei ta si a, nuam a ti ngawt ang," ka tih lai mêkin Vansangi a rawn lut a, kan ṭawng a hre pha a ni tehchêk ang chu, "Bartho, min ît hlum lo chauhtu i nih kha aw.." tiin a rawn nui var var a, Biaknunga pawh a nui tut tut ringawt.

Ka nu leh pain remruatna fel tak siamin sawm bîk mi tlemtê te nen Kohhran hall-ah kan inkutsuih a, amah enkawl seiliantute hmel erawh an rawn lang ta lo. Nakinah hun te han kal deuh se a nu leh pa tak tak zawn chhuahsak ngei ka tum. An la dam emaw an chin hriat hrim hrim hi ka hna a ni.

Kan inneih zanah ka fapa muthilh hun ka nghak a, a muhil duh malêk a.

"Duatte, muhil ve tawh la, i nu hian putar pasalah a nei nge nei lo a inhriatchian a ngai tlat," ka ti sup a.

Vansangin, "Ṭawng loh loh hian ṭawng ṭhin suh," a ti hlak a, "Kum 29 leh kum 42 te chu kan inthlau vak hleinem, min ngai upa mah mah.." ka lo ti a.

"Kum 60 pawh ni la, Bartho Saingurpuia i nih chhung hi chuan ka hmangaihin ka duh zel ang che," tiin min rawn hnaih a, "Ka duh neihna i ni ringawt lova, i duh i neih ve theih nan i thawmhnaw inbel hlip rawh," fiah faka tiin kan fapa muhil chu khum kil lamah a sawn phei a, ka phur lo ka tih chuan dâwt ngialngan a ni.

A vun paw phak leh a biang sen ṭân te, a awmbâwr kawh lah te hian min la tiphurin min la hîp reng a, ka hmangaihna leh min hmangaihna hian chintawk bithliah a nei lo a, ramri a kham hek lo.

Ka nu leh pa pawhin an duat a, a ze ngai ri huat huat ang kha chu a la bansan thei tak tak bik lo chu a ni e. Mahse, kei min zah ang chiahin ka nau pawh a zah a, "B-te' tiin a ko mai zel. 

Zan khat kan mutnaah "Zu ka in leh chhin châk e" a ti mauh mai a, ka ngaihdan a ni lo lek lek.

"Tunah chuan nu i ni tawh a, zu in lam sawi ri tawh suh, i nulat lai anga tâl mai mai kha mahni intheh derena a ni a, a tawpah zahna leh natna bâk hlawh chhuah tur a awm lo. Pathianin nupa kan nih theih nan kawng min ruatsak a, kei hi awm ta lo ila i chan tur han ngaihtuah teh, a ṭha lo kawng zawh hmasa mah ila, Kristian chhungkua dik tak kan din theih nan hun ṭha min pe tih hi kan nupaa kan pawma kan hriat chian a ngai aw," tiin ka hrilh ta a.

Min melh zeuh chung hian, "I puitling bik si, i thil ngaihtuah ang hi ka ngaihtuah thleng ve phâk ngai si lova min vaw mai rawh," a'n tiah.

A chala pen kawrh chung hian, "Râk puat puat lo la, ka awkâ ngaichangin ka thu awih la, i nihlawh ang," tih chiah ka sawi.

Ni e, Vansangkimi leh Bartho Saingurpuia khualzin kawng hi Pathian zarah a la tawp mai dawn lo. Kan nupaa midangte tana malsawmna kan nih ve theih hun tur ka thlir ran a, hnunglama an nuih ṭhin VANSANGTAWLI a ni tawh dawn lo a, a hun liam tawh nuai bo thei lo mah ila, mite entawn tlâk nupui ṭha taka chher chhuah hi ka tum ber a ni bawk.

A mawi lohna leh fahrah a nihna theihnghilh a, pa nei lo te pa, nu nei lo te nu; Pathian a awm a ni tih a hriat fiah theihna turin kei a pasal hi ka pawimawh a, ka hmangaihna hian nun kawng dik a zawhpui ngei tur a ni.

Tui taka a muhil hmel chu ka thlir reng a, nui suk chung hian, "Tâwli, ka hmangaih che" tiin a biangah ka chûl a, a landan phena a chhungril nun hre vek lo mah ila, hmeichhe rilru ṭha tak a ni tih ka hrechiang ve êm a ni.

Ka fapa a rawn ṭê ṭhat ṭhat a, a nu a harh ka hlau si a, dimtêa pawmin tukverh bulah ka âwi a, ka nupui tan pasal innghahna tlâk ka nih theih nan chunglam ami duhdana nun hman hi ka tih tur dik tak a ni.

Vansangkimi muhil melh zauh chung hian, "I nu Tâwli tiharh lo zawngin chê ang aw..." tiin ka fapa ka bia a.

Jorhat-a kan lêt leh hunah pasal ṭha tak ka nihzia ka hmuh tîr ngei ang. Helaiah chuan duh angin ka duat thei lo tlat.

Note: Vansangtawli thawnthu tlangpui chu a zo ta a; mahse, ka thawnthu thar 24-89 ah anni hi an rawn lang tel leh turah ngai ang aw. Pathianin rem a tiha kan dam chuan Long Story thar '24-89' nen inhmuh kan tum leh dawn nia. Min chhiarsak, ngaihthlaksaktute inzavaia chungah lawmthu ka sawi e.

130223

-B®®

B+>[BeckirafARenthleI]<+®®