2. 24-89 [A Becky Rafa Story

2. 24-89

Ziaktu: Becky Rafa Renthlei

-B®®

[Recap]

"Hmanhmawh la, kan inpuiah kan kal dawn, i unaupa pawh zaninah chanchin hrilh ang che, hun khawhral zâwnga muangchán ka tum lo a nia," a ti ta a.

"In inah chuan eng nge kan tih dawn a?" Tiin hlau chung chung hian ka zawt a.

"Nupui ka neih tur thu ka sawi ang, inneihna buatsaih rang tura hrilh an ngai a, kawhmawh bâwl suh ang che, a lêt leh tur ka sawi chian tawh kha," tia min vau leh chuan ka ngawi ta rauh rauh a.

Ni e, dam man a awm a, thih man a awm leh si lo. Pasal nei turin ka inbuatsaih poh a ni ang chu.

-B®®

Ka in luaha kan la awm laiin ka thawhpui 'Sangeeta' message ka hnutchhiah a, mimal thil chinfel tur ka neih thu hrilhin ka duty hun inthlengpuiah ka sâwm a, a chhan min zawt thui lo teh mial. Message ka thawn lai pawhin Jehoa'n min vil rûn a, ka thawn chhuah zawh rual rualin phone min chhuhsak leh nghal daih.

A thupêk zawmin an inpuiah kan kal dawn ta a. Kan inneih dan tur chungchâng engmah min la hrilh hre lo a, ka zâwt bik hek lo. A ruahman dan lah ka ngaihvenpui lo a, amah ka hlauh êm avangin ka be ngam lo a ni zâwk mah. 

Engtin emaw a lak aṭanga tâl chhuah dan tur ka la dap ru reng a, pasalah ka nei dawn ti mah ila, tlan bo theihna kawng awlsam ka zawng ru zel dawn tho.

A motor khalh lai chiah ngaihtuah niawm tak hian min ngaihven lo a, a hma ang thovin min be lova nelawmna a la nei chuang hek lo. 

Ka huaisenna zawng zawng sawmkhawmin, "Khawi hmunah nge kan kal dawn tih tal min hrilh thei em?" Tiin ka zâwt tawp a, a chhan pawh 'East Khasi Hills' lam pana kan tlan vang a ni.

"Kan inpui awmna 'Mawkasiang' hmunah kan kal dawn tih ka sawi tawh kha," tiin min chhâng ṭha ve teh tlat.

"In inah chuan tute nge awm?" Tia ka zawh leh chuan, min melh zuk a, "Ka nu leh ka farnu pakhat bâkah kan driver," a ti a.

'Mawkasiang' hi ka inluah aṭangin 37Km vel a ni a, vawi hnih ka kal ve tawh nghe nghe.

Dârkâr khat leh 15 Minutes vel kan tlan hnuah kawt zawl zau fê-ah kan tlân lût ta a, thing ding thelh sung kâra in mawi zet rawn lang chu Jeho te in tih hrilh hranpa ka ngai bîk lo.

"Kan thleng ta e," ti supin Motor aṭangin a chhuk a, nu pakhat la valâi tak lo chhuak mêk chuan min en chîk ngei mai. 

"Ka nu, hei hi Ngurthani, ka nupui tur a nih hi," pehhêl nei miah lova Jehoa'n a nu a hrilh chuan chu nu chu a meng kal ralh a, "Eng maw i sawi?" Tiin a fapa leh keimah min melh tawn sek a, mak a tih hmêl hle bawk, "Ni thum hnuah hian Court-ah kan innei dawna a rang lama inbuatsaihna kalpui tur aw," tiin a nu a melh a. Thu a pe a ni zâwk mah!

"Ka fapa, eng ati rum rum nge, thil dik lo a awm em ni? Nge, nau a pái zâwk?" Tia min rawn thlêk leh hnuah a fapa zuiin inchhungah a lut ta a, atu amahin min ngaihsak lo, pawnah ka la ding reng a, ka tlanchhe daih zawk dawn em mawni. 

Inchhunga lût ta mai lo chuan ka hawi kual vak vak a, ṭhenawm hnaivai an nei lo tih pawh a hriat reng, in bulah thingkung sâng deuh leh hniam deuh te a ding suau a, a ṭhente phei chu tukverh aṭanga lâwn phâk mai niin a lang. Pangpar leh plants chi hrang hrang a awm bawk a, an inhungna Gate erawh a rinawm hmel tlut tlut khawp mai.

"Rawn lut ta che," ram hmuka tiin Jeho ka bulah a rawn ding a, ka kiuvah vuanin inchhungah min luhpui nghal vut a, pâwna a lo chhuah leh lai ka'n hriat miah loh chu le! 

"Nu, ka room-ah ani hi ka chhohpui dawn a, kawngkhar kalh hnan tur aw.." tia a nu a hrilh veleh mak tiin a lo meng phar âwk a.

Chumi hnu chuan inchunga a room lamah min chhohpui hlawk hlawk a, ka ṭang ngam eih lo.

Pindan zau takah min luhpui ta a, han en thuak pawhin mipa room tih a hriat hliah hliah. Inchung leh inhnuai inbiak pawhna te, pawnlam biak theihna line awm zawng zawng ngawi rengin a pawt phawi hmiah hmiah a, "Tlan chhuah i tum a nih leh i tlâkna a sâng dawn tihna aw, a sawhkhâwk i tuar zêl ang,'' a ti ta a.

"Ka phone kha min pe phawt mai rawh," zawitea ka lo tih chuan rum deuh hian min melh a, "Ka vawm chhiat nghal loh," tih leh chhuah a rual a, kawngkhar a thlen dawn ṭêpah, "Pawnlamah ka kalh hnan dawn che, thawm bengchheng siam lo la i nihlawh a ni mai, hnathawh tur ka nei," ti leh zung zungin ka ṭawng hman ve hmain pawnlamah min kalh hnan fel dêr tawh.

A va han sual ngawih ngawih tak. Ka rilru hre vek ang maiin a ṭawng a, kei hian tlan chhuah ka duh tih ka hmêlah ka lo tilang rêng em maw ni. Hnathawh tur nei ang khan a insawi a, mi thah tur a va zawng dawn tepawh a ni mahna.

A nu khan Mizo ṭawng a thiam nâl hle a, mahse, Khasi hmel a pu a, a tê reuh hle bawk, a farnu ka la hmu lo thung.

Ka unaupain min biak a tum tawh ngeiin ka ring bawk a, zan tin call-in inbe lo mah ila, whatsapp ah tal chanchin ka hrilh ve ṭhin. Nikhat leh zan khat ka reh ta hmak mai si a, a ngaih a ṭha lo maithei bawk.

Jeho room chhung chu ka melh kual a, eng thil ropui mah hmuh tur a awm hran lo. Khum lian tak leh thawmhnaw dahna, Sofa pakhat a awm a, a khum khuhna dum fual hnulh te chuan min hîp hlawl lo. Ka râp zawk.

Thlanglam Balcony-ah te ka chhuak chhin vek a, zuan thlâkna tur remchâng pahnih lai ka hmu. Ka zuang thla ngam ang em tih zawk kha a ni.

Jeho tlan chhuak thawm ka hriat aṭangin minute tam a ral tawh a, a nu khan kawngkhar hi min hawnsak duh mial maithei asin.

A nu hming ka hriat miau loh avangin kawngkhar chu chhunglam aṭangin ka bêng dawt dawt a, "Awm in awm em?'' Tiin ka âu vak vak a, tumah rawn dîkdâk an awm lo. Mahse, beidawng duh lova ka âu reng avang leh kawngkhar ka ben rîk nasat êm avang chuan, "Ngurthan, ka fapa phalna lo chuan ka hawnsak thei lo che," tiin a nuin min lo chhâng ta a.

"Khawngaih takin lo hawng hrâm rawh, i fapa hi ka nei duh lo," tia ka ṭawng leh tâkah chuan, "I duh emaw duh lo pawh ni la, Jeho hian a nei lui tho ang che, ani meuhin nupui neih duhna rilru a pu a nih chuan a ti mai mai lo tawp ang tih hrethiam tur i ni asin," a rawn ti ta a, a fapa thu hnial a tum lo tih a hriat mai, an va inchhun nufa deuh ve le. 

Tih theih dang awm tawh hek lo, tukverh aṭanga zuang chhuak turin ka huaisen tâwk bawk si lo, inbual ka tum ta a, thawmhnaw hâk thlâk ka nei chuang lo na a, bathroom-ah ka lût ve ta tho a. 

Rei ngial ka inbual hnuah Bathroom-a towel fai inthlep chu ka hmang ve tawp a, ka thawmhnaw ngai ka inbel leh mai a ni ang chu.

Jeho khum bulah towel-a intuam chungin ka ding a, kawngkhar kalhna a rik rualin in chhungah Jeho a rawn lût chawpchilh nghal a, min rawn thlêk vung vung chung hian, "He ina awm te hi ka lam ṭangte vek an ni, thawm bengchheng siam nawn tawh suh ang che," ti nghutin ka chhip aṭangin min melh thla dan dan a, a mitmeng hriam hruih chu a tizim san a, "Thawmhnaw lei turin kan chhuak ang," a ti sup a, inti vei zet hian room chhungah a tei kual a, ka ngawi reng.

Che lova ka ding reng chu ngaithei lo niawm tak hian, "Keiman i thawmhnaw kha ka hâk tir dawn che em ni?" A ti hmuk a. 

Chu veleh, "Ngawi mai rawh, i awm ve laia inthlâk tumna ka nei lo," ka lo ti hlar a, ṭhen suk chung hian, "Ka intih fai chhungin i thawmhnaw inbel rawh," tiin Bathroom-ah a lût zui nghal daih, rang takin ka thawmhnaw ngai ka inbel sawk sawk a, ani nena bazara chhuah dun ka duh awzâwng lo.

Jeho lo chhuah leh laiin Sofa-ah ka lo ṭhu fel ât tawh a, towel veng chung hian a thawmhnaw dahna a hawng a, chutih lai tak chuan ka phone a rawn ri ta a, aman a kawl tlat avangin a charge zel a nih ka ring teh ngawt.

Phone a phawrh a, a bih vung vung hnuah, "I sawi tur chin hria ang che," tiin phone min rawn pe a, kan Team leader a ni tlat mai.

"Ngurthan, Emergency-a zai ngai kan nei a, i lokal a ngai aw, tun aṭanga dârkâr hnih ral hmain lo thlen i tum dawn nia," a rawn ti ta a.

"Sir, ka awmna a hla viau asin.." ka ti dêk dêk a, "Damlohna i nei a nih loh chuan rawn kal ang che, On Call duty i ni lawm ni?" ngaihdan ni lo tih hriat tak hian a ti hmuk a.

"Sangeeta nen.." tia ka sawi zawm leh hmain, "Private hospital-a thawk kan ni a, Emergency a awm a nih chuan i lokal mai tur a ni, i hna i chân duh zawk a nih loh chuan," a la ti zel a, thaw chhuak halh chung hian, "Aw le, sir, ka lokal ang," tih pahin Jeho ka melh zeuh a, ngun lutukin min lo en reng.

Kan inbiak tawp hnuah, "Jeho, ka thawhna hospital-ah kal ngei ngei ka ngai a, Emergency kan nei a," tiin ka hrilh a.

"Bâng rawh, i hna bansan rawh.." tih chiah a sawi.

"Ni lo, ka thei lo, khawngaihin min kal tîr rawh, ka lo lêt leh ang," ka ti dam thlap a.

Rei fê a ngawih hnuah, "Insiam rawh ka hruai ang che," a ti hmuk a, "Hruai ka ngai hleinem, keimahin ka kal anga ka lo lêt leh êm êm ang," ka ti ve tlat a, rum taka min melh chung hian, "Ka tel lovin khawiah mah i kal dawn lo, ka ring lo che," tih tåwl pahin, min ngaipawimawh lo tih hriat tak hian a towel ven lai a theh sawn a, a taksa ruak kûng chu en duh lovin lehlam ka hawi daih.

Ani inhruai tîr te chu a chi hian a chi loh lutuk.

"Hospital-a ka hruai che i duh loh chuan i kal dawn lo, tun hi i kal tawpna ni bawk rawh se," tiin Motor chahbi leh ka phone a la a, a chhuak zui hmiah.

Lunghnur zetin ka zui chhuak ve ta tho. Hetiang dinhmuna ding hi ni mah ila, ka hna bansan tumna rilru ka la pu chuang lova, ka theihna chin apiangah hnial ve ka tum ruh tlat. Jeho ka hriatna la rei lo mah se, a nunah hmeichhia a mamawh lo tih hi a lang chiang fahran lutuka tlêm chuan ka thlâ a muang ve det. Hmeichhe ît huam ang chi mipa kha a ni tlat lo. 

Super Care Hospital

Jeho nen damdawi in Corridor kan zawh phei a, Motor-ah min lo nghâk ve mai turah ka ngai deuh kha a ni a; mahse, Operation room thleng rakin min zui nia maw le. Êm êm a!

"Helai thleng bâk hi i lokal a rem dawn lo a nia," ka ti sap a.

"Ka hre ve reng, hetah hian ka lo nghâk dawn che a, relh-rûk i tum chuan i unaupa Vanlalṭana damlai hmel i hmu tawh lo ang," tiin min vau zui sup.

"Nang misual hi.." tia ka ṭawng lai chuan, "Lut rawh, ka sawi kha hrereng rawh aw.." a ti nghuta a inher nghal hmak bawk.

Ka nuṭapa Vanlalṭana thleng thlenga a hre tawh a nih chuan min chhui nasa hle tihna a ni mai. Thinrim ṭûnin ka kalsawn ve ta a. Jeho leh a patea te kha mi satliah an ni lo tih ka thinlung hian a hria a, doctor rual tam tak awmna hmunah kei kher min thur chhuak nalh hi tum nei râna chêt la annih a rinawm, ka la hre chho zêl turah ngai ang aw.

Ni e, chuti maia inzai zawh chi ni bîk hek suh. Dârkâr li zet a liam hnuah tluang takin kan zo ve ta hrâm a, kan Jeho khan min lo nghâk tawh lo se ka va duh si êm. Mahse, ka room ka luh rual rualin min zui lût a, "Vawiin atan bazar ngei ngei a ngai a, kan kal tho ang," tiin polite lo zet hian ka dawhkan chungah a ṭhu a, ka chauh bâkah ka mit a thîp lutuka chair nghenchhan nghengin ka maimitchhin san daih.

"Ngurthantluang," tia dawhkan a rawn ben rîk pawp chuan ka phu zuk a, ṭi dêkin ka melh a, "Ka chau êm a ni, bazar kal leh tur pawhin ka tlin tawh lo," ka lo ti zâwi sap a.

"In pu ka bia ang a, bâng ang che." A ti leh ta a. Ka thinin a tuar tawh bîk lo, ka ṭhutna aṭanga dingchhuak hliai chung hian, "En teh, ka mitah hian en rawh, kum engzat nge doctor ka nih theih nana ka zir i hria em, ka thi dawn a nih pawhin ka bâng chuang lovang," ka ti chhuak piap a, min melh rum úl chung hian, "Kan la hria ang chu," a ti duh chauh.

A thin lah hi a chhe satliah lova, eng emaw hlekah a ṭeu hlur zêl te hi misualzia dik tak a ni berin ka hria.

Mi mitmei vêng lêk lo hian ka bânah vuanin min chhuahpui zui dâwr dâwr a, ka hnial ngam si lo. Pawisak a nei lo nasa mai si. Kan kal pelh apiang te'n min en hrek hrek a, chu pawh a ngaipawimawh chuang hek lo.

Bazar hmunpui panin mi kalpui ta, min be lovin a ngawi ngul a, Police bazar-a shopping mall pakhata min luhpui hnuah min vawnna a thlah ve chauh.

"I thawmhnaw inbel tur thlang la, naktip maia innei tur kan ni tih i hriat kha, ṭhian dinpui tur i mamawh dawn lova kei pawhin ka mamawh hek lo, i duh ang thawmhnaw i thlang thei e," tiin ka bengbulah a rawn ṭawng sup a, ka chhânna ngaichâng miah lovin dawr nghaktu chu a be zung zung a, thawmhnaw tam tham fê pawm chunga chu nuin min rawn zui lai pawhin Jeho chuan min ngaihven zui tawh lo hrim hrim, phone a hmang daih.

Room zau vak lo pakhatah dawr nghâktunuin min hruai lût a, "Ka chhuahsan rih ang che," tiin a nui var var a, ka lo bu nghat ringawt.

Chulai pindan zimteah chuan kawngkharpui pakhat leh tukverh pahnih a awm a, thawmhnaw pawh inbel hmasa lovin ka thlithlai hmasa tê tê a, kawngkharpui aṭanga chhuah thlâkin Motor kawngpui a pawh tih ka hmuh veleh ka tum dan chawplehchilhin ka thlâk ta.

Shillong ka chhuahsan thei hlauh a nih chuan Mizoramah ka haw ang a, min rawn zui lo tawp ang. Helaia ani thuhnuaia kúna a nupui nih ngawt âi chuan vawikhat lek tâlchhuah tumin ka bei ve chhin ngei tur a ni.

Dimtêin kawngkhar chu ka nam a, a inhawng ve mai bawk a, pawnlam a thim chhulh tawh a, ka hâk lai nen thil dang pakhat mah la lovin ka chhuak ru ta zâl zâl a, tun bâk hi chance ka nei tawh lo maithei asin. Ani khan min veng reng mai si a, bawhpelh tum miah lovin ka theihpatawpa chakin ka tlân ta a. 

Pathian ka lamah ṭang hrâm se ka va ti êm.

Taxi pakhat lo tlan chu ka phar vat a, a ding hlauh.

Ka hah êm avangin ka kal duhna hmun min zawh pawhin ka chhâng ṭha hleithei lo.  

"Madam, khawilamah nge ni ang?" Tia min zawh nawn leh tâkah chuan, thaw hak hak chung hian 'Dove' Sumo Counter-a ka kal duh thu ka hrilh a, front mirror aṭanga min melh zuk zuk pawh ka hmu reng, ka âwm dawmin boruak ka hîp deuh kâwk kâwk a, ka lungphu a la pangngai hleithei lo a chhâ a ni.

Chêng khat mah ka nei lo tih sawi lan kher ka tum lova, a nih nih ni turin ka chuang ve tawp a ni ber. Ka purse, ka card leh document pawimawh zawng zawng Jeho kutah a awm vek a, kha misual kuta tlûk luh leh âi chuan huaisen takin Aizawl thlen theih dan tur ka dap ve mai a ni ang chu.

Counter kawt kan thleng fel chiah tihin ka chuanna Taxi bulah mipakhat a rawn ding a, Jeho a ni lo tih a hmêl ka hmuh rualin ka hre ve mai.

Khasi ṭawngin driver a bia a, ani lah chuan hnunglam lehhawi paha min melh chung hian, "I ṭhianpa hian a nghâk che a nih hmel," tiin chuan man min dîl zui zat a, pêk tur ka nei lo tih sawi tuma ka ân zuau lâi chuan chu pa zawk chuan, "Ka lo pe ang, lo chhuk rawh," felfai taka tiin min melh zauh a, chhuk ve mai loh chu tih theih ka nei lo.

Mahse, Taxi-a tlan liam veleh ka chuan man petu khan, "I awm lohna tur hmunah i awm a, min zui rawh," hniam ruiha tiin min melh thîp râm a, ka bânah rawn chelhin, "Tlan bo theih inbeisei suh, kan mi leh sate helaiah hian an awm ṭeuh a nia," tiin, kan piah deuha Taxi lo dinna hmun min panpui leh ta a, khua a thim chiang tawh bawk.

"Tunge helai hmunah hian rawn tîr che?" Tia ka zawh chuan, koki sán âwk chung hian, "Nakinah i la hre mai ang," a ti mai a, min vîn hran lo. 

Mahni ram a ni lova, duh lo eng ang mah ila ka zui tho a ngai, a chhan chu Taxi tam tak a ding ṭeuh a, buaina ka siam emaw ka zui duh lo a nih chuan ka chuanna Taxi driver khan engtin emaw min ti dawn ngei ngei tih ka hre ve tlat. Fare pêk tur ka nei lo miau alawm.

Taxi dangah ka ṭhu lût leh ta a, Jeho kaihhnawih a ni lo a nih chuan ṭha takin ka dinhmun ka sawi anga min kal tîr mai ka beisei.

"Ka in luahah min hruai thei ang em?" Tia ka zawh chuan mâwl min tih hmel tak hian, "I pasal turin a nghak reng che," a ti ta mai.

"Tunge i nih?" ka ti vín ṭhak a, hmel danglam pu eih lo hian, "I pasal tur Jeho driver ka ni e," a ti dam thlup, kawngkhar hawna zuanthlâk ka duh rum rum. Mahse, thihna pumpelh tumin hei leh chen ka tuar ve tawha mahni nunna lâk êm chu ni theiin ka hre si lo.

"Engtin nge Counter ka pan tih in hriat?" Tiin ka zâwt ta zâwk a, nui huk chung hian, "I pianna rama kîr leh turin i tlan bo dawn tih kan hriate pawh a ni mahna," a ti a, a driver-in min lo hmakhalh fel hman dêr chu a ni a, Jeho thluak ka lo ngaihtuah tel lo a ni. 

Tlan bosan ka tum te in kan thlen leh meuh chuan zán dar 8 a pêl thui tawh hle. Min hrem dan tur ka ngaihtuah ngam lova ngaihtuah thui pawh ka peih lo. Ka ruahmanna pakhat a fail ta phawt chu a ni a, a dang eng emaw ka ngaihtuah chhuak leh tur a ni.

In chhunga kan luh rualin Jeho nu ka hmu hmasaber a, "Ka fapa lung i tiawi miah lo a nia, a lamah ka ṭang zêl dawn," a lo ti nghat a, inchung pan chhohna step-a rawn chhuk mêk a fapa hmel rum ûl chu en pawh ka en ṭha ngam meuh lo.

"Chaw ei tir ula, ka room-ah kalh hnan leh rawh u," tia a nu a biak lai pawhin min melh chhin eih lo. Thil dang sawi miah lovin room dangah a lut nghal daih a, ka thaw huai mai. 

Tun thlengin Jeho nu hming leh a farnu hming pawh ka la hre lo a nia, nichina min lo hruaitu an driver hming pawh kha ka la hre chuang lo, ani kha chuan Mizo anna a nei lo hrim hrim.

An driver nen ngawi rengin chaw kan ei a, ka ei tam ngang mai. Engkim a tui vel vek a, ka insûm buai peih lo.

Jeho room-a min kalh hnan leh pawhin ṭah emaw lungngaia indawmkun ka tum tawh lo a, ka mutna turah a ni ka buai daih. Sofa pakhat chu a awm ve a, Jeho khumah mut ka duh si lo a, Sofa-ah ka mut mai a ngai dawn a ni.

Tukverh bulah ka ding rân a, kut min thlâk êm chu ring lo mah ila, ka hlauhna hian min kiansan thei tak tak lo a, kawngkhar a rawn in hawng a, amah Jeho pawh a lo lût ta a, khumah ṭhuin a pheikhawk a phelh phawt a, chutah, hriam hrâkin min rawn melh leh ta.

"Kan inneih hun tur kha tlan bo i tum vangin ka sawn hma a, naktuk zinglam dâr 11 ah Khasi Marriage Place ah kan innei ang, i unaupa Vanlalṭana ka be tawh a, i duh thua pasal neih tum i ni tih ka hrilh tawh bawk," a ti hmiah hmiah a, ka lo ter at.

"Jeho, min kal tîr thei ngang lo em ni? Ka unaupa lo hi neih dang ka nei lo asin, a tel lova pasal neih ka duh lo," ṭap lek leka ka ṭawng lai chuan ngêng ngulh hian, "Thisena inremna kan neih kha i theihnghilh tur a ni lo, min nei lo a nih chuan ka patea'n a that tho tho ang che," a ti hmuk a.

"Anih tunah hian i patea chu ko rawh, min that rawh se," ka lo ti a, min melh kâwk chung hian, "Inremsiamna angin aw, ka lak aṭanga tlan bo tum tawh suh, ngaihdamna a awm tawh lovang," tiin khumah thawmhnaw pawh phelh lo hian a mu nghal a. Kei erawh ka dinna ngaiah ka la ding reng a, sawi ber tur pawh ka hre tawh lo.

Sofa-ah ka ṭhu ngar a, rei ngial ka ngawih hnuah khuma blanket pakhat awm chu ka va la ve tawp a, meng chhuak chuang lo hian, "Khumah i mu duh dawn chuang lo a, ka room chhunga i duhna hmun apiangah khan mut phalsak i ni e, chuan, kha i phone hi la rawh, mahse; biak tur chin hria la, Police lam leh tu emaw pakhat tal pawh i hrilh hria a nih vaih chuan, i damchhunga hrehawmin ka siam ang che. I bialpa pawh pasal i nei dawn tih hrilh nghal bawk rawh," tiin, ka phone min pe ta a. Englai pawh hian thu min pe reng a, ka kham ngawih ngawih.

"Zanlamah chiah i kawl thei ang," tia a sawi zawm leh hnuah a maimitchhing zui nghal hmak.

Kei Sofa-ah ka mu ve ta a, sawi tawh angin ani hi chuan hmeichhia ka nihna ang pawh hian min en lo hi ka vanneihna pakhat a ni.

Ka û Vanlalṭana Message a lo awm dal a. "Ka tel lova pasal neih i tum hi ka awih thei lo, dâwt min hrilh tiraw?" Tih te. "Mizoram pawnah i awma i unaupa hi min theihnghilh ta a ni maw?" Tih vel, a tam lutuka ka chhiar thuak thuak ringawt, thudik ka hrilh theih loh avang leh keimah vanga a rilru na tur ka ngaihtuah phei chuan ka mittui a far fap fap reng mai.

Ka lo chhing ve sek a ni ang, phone riin min tiharh a, Jeho mutna lam ka va en hmasa tê tê a, tui takin a lo la muhil a, ka thawhpui kan Team leader Dr.Pankaj Jain a lo ni a, "I hnaa chawlh i dilna kha pawmsak i ni e," a rawn tih chuan ka ṭhu chhuak nghal a, "Eng maw i sawi?" Tiin ka zawt lêt hû a, nui huk huk chung hian, "Kan hospital neitute zinga mi Samuel Pamei meuhin chawlh a dilsak che a nia, kan hnial ngam lovang," a lo ti a.

Tunge chawlh min dilsaktu chu ni ta!?

Phone ka dah hnuah Jeho muhil lai ka va sâwi harh a, "Tunge chawlh min dilsak?" Tiin ka zawt nghal a.

"Ka hre lo," tihpahin a ṭhu chhuak a, "Ka hnaah inrawlh suh," ka lo ti ve hlar a, "Ka inrawlh hleinem, pasal neih chawlh i lâk a ngai a, ka patea hnenah ka sawi a nih kha," zawi ruiha tiin khum a thawhsan a.

"Samuel Pamei hi kha mi nunrawng tualthattu kha maw?" Vin lutuka ka lo ṭawng avang chuan a insangmar ṭawlh ṭawlh a, min hnungchawna ding ni mah se, a lawm lo tih a hriat reng.

"Tualthah chungchâng kha i kâ a ṭanga a ri chhuak leh a nih chuan..." tia sawi zawm tawh lovin bathroom-ah a lut ta a.

Ni e, kha misual hmuihmul ngah zet kha Super Care Hospital neitute zing ami Samuel Pamei lo nirengin! Jeho Patea ngei kha.

A hnu leha kan awm dan chu mumang ang ruai a ni ta. 

Mothuam chu sawi loh, Jeho nu kawr rawn dah chhoh kawr sen no suit inbelin Khasi Hills Marriage Court-ah hriatpuitu tlemte zingah, Jeho nen kan innei dawn ta chu a ni a, hming sign tura ka kun rualin insûm hman lêk lo hian ka nui chhuak ta a. Court chhunga awmte mitmei vêng lêk lova ka nui ri chu a zâwi fahran lo.

Mak tih hmêl taka min enna te chuan ka nuih a tiza tulh tulh, ka â emaw anti tepawh a ni mahna. Jeho a'n rum zeta min melh lai pawhin ka la nui ṭhâ a.

Blackmail hmanga min neih tumtu ka pasal tur hming hi a mak êm alawm, ka hming inziahna sîr veilamah 'LALJEHOMALSAWMKIMA' tih inziak miau hek!

'Jeho' tih ringawt pawh kha mak ka tih tawh sa nen a hming bul lamah 'LAL' a tel kher leh sâp hming pawh nichuang si lova inziak zawm pût Mizo hming chu ka piana hnulama ka vawikhat hriatna. Malsawmkima hi ka tan chuan Malsawmlova a ni si. 

La nui reng chungin hming ka sign fel a, Jeho pawhin ngaih ṭha chiah lo niawm tak hian a sign ve mai a, a mitmeng erawh a thim raih thung. 

Jeho nu Khasi hming hi 'Batesi' a ni a, a Mizo hming erawh Pianmawii a ni. A pa hming ka hre lo a, a thi nge a dam tih pawh ka hre chuang lo. A farnu pawhin Mizo hming dik tak Laltleipuii tih hming a pu a, Jeho pa hi Mizo niin Mizoramah an unauva an pian hnuah Shillong-ah an pêm tih pawh ka hriat belh ve ta e. A patea Samuel Pamei a ni leh daih si a, a ngaihna ka hrethiam lo, thudik nge dâwt tih hriat pawh va ni suh.

"Ngurthan, honeymoon hmang tura hmun hla tak pan âi chuan helai hnai Hotel-ah hun in hmang thei ang," tia Jeho patea'n min biak chuan ka ngawi reng a, he mihring hi ka haw ngawih ngawih a ni tawp mai. Mi a thah vanga ka tawrhna hi a namai lo êm asin.

"Pate, kan kal a nia, Farm lam i kutah awm se, kan driver Buatsaiha erawh kan mamawh ang," tia an pafaa an inbiakna chu ka lo ngaithla liam mai mai. Honeymoon hman kher a ngai lo tiin duh lo mah ila, ka thusawi tumahin min pawmpui dawn lo tih ka hre ve kar. Inrawlh loh law law a finthlak zâwk.

Jeho farnu a lokal ve lo va, Hotel pana kan tlan lai pawhin atu ve ve mah kan ṭawng lo. Dán anga pasal pawmlai nei ka ni ta a, inneih Certificate pawh ka kawl ta. Kâr khat êm a ral hmain ka nun a inthlâk dawrh chu a ni si a, 'Laljehomalsawmkima nupui' tia ka ngaihtuah lêt apiangin ka nui dawn zel. Hei erawh ka hlim vang ni lovin, a hming leh a nundan a inpersan êm atin ni. 

Kan thlenna tur Hotel room kan lut chiah a, Jeho chuan ka bânpuamah manin, "Hming sign dawna i nuih tizatu kha eng nge, keini chhungkua hi min tihzaha min tih mualpho i tum elaw?" Ti khur khurin min thing nawk a, hnuailam bih chung hian ka kein chhuat ka thâi ka thâi a, ka nuihna chhan hrilh chi ninghal lo chuan.

"Ngurthantluang, min chhâng rawh, eng kha nge i nuihzat?" Vin lutuka a tih leh tâkah chuan dâk vah chung hian, "Kan inremsiamna angin i nupui ka ni tawh a, a bâk thuneihna i nei lo," tiin ka chhâng ve ta a. Ka sawi zawhah min nam sawn dâwrh a, "Kan inkarah nupa nun a awm dawn lo rêng a ni, mipat hmeichhiatna a tel lo," tih pahin inbiakpawhna awm ho a tichhe nghal vek a, ka phone pawh a la nghal bawk.

"Engtikah mah ka pasal tak tak angin ka en ngai lovang che," ka lo ti ve sak sak a. 

Min melh rûn chung hian, "Pawnlamah kalh hnan i ni ang, honeymoon a awm dawn lo, i ṭawng tamin i ṭawng thei nasa si," ti supin a chhuak nghal a, a dân pangngaiin min kalh hnan leh ta. 

Vivanta Luxury Hotel-ah ani nena awm dun âi chuan min kalh hnanin chhuak daih mah se pawi tihna ka nei lo zawk. 

Chhuatah rei fê ka ṭhu a, Rinnunga'n min ngaihtuah dawn lutuka pasal ka nei tih engtin nge ka hrilh ngam ang. Ka unaupa erawh chu Jehoa'n a lo hrilh tawh a, a thinrim hle ang tih hriatsa a ni. Amaherawhchu, unau kan ni tlat a, thudik ka hrilh theih hun a la thleng ve turah ka ngai.

Ṭhut rengin awmzia nei hek lo, shower nei turin bathroom-ah ka lût ta nge nge a, kan inneihna hian nupa nun a keng tel dawn lo tih ka hriatna hian tlêmin ka rilru nâ a chhâwk deuh.

Chutia uluk taka ka lo inbual lai chuan min en rengtu an awm tih hriatna mak deuh ka nei leh ta. Ka dâk chhuak a, bathroom chunglam dârthlalang chhah ṭha tak; mahse, lang tlang theia an siam aṭang chuan Laljehomalsawmkima'n mit khap lêk lovin min lo melh reng chu niin! Ka hmai leh nghâwng vel chauh hmu thei mah se, ka thinrimna a kâi tho chiang ngei mai.

Tui hû-chuan dârthlalang a bawh paw chiai a, ka kuta hûi fai pah hian, "I mawl em ni, engvanga min lo bihthla nge i nih?" Tiin bathroom khâwk rum rum khawp hian ring takin ka âu a. Min chhâng lovin a inher nghut ringawt. 

Rang taka ka intleuh fai hnuah bathrobe nen ka chhuak a, Jeho hmaah tak va ding chung hian, "Hmeichhe inbual lai bithla dûk dûk tur khawpa nun hniam nei i ni tih ka hre chiah," ka ti nghal táwn táwn a.

"I inthlakna tur thawmhnaw ka lei a, inbel rang mai teh," a ti zawi ruih ringawt.

"Tenawm khawropa, i khawsak dan ṭhing zet hi sim rawh," ka lo tih leh chuan paper bag ka kutah a hmehbel nawk nawk, "Thu dang sawi belh tawh suh, pawngsual i duh em ni?" Ti nghut chung hian a inher vut a, khum bulah a va ding a, "Tenawm lutuk," tia keima hriat tham leka ka phun ri chu a hre lo a ni ngei ang.

Ama thawmhnaw rawn lei inbel lovin, ka thawmhnaw ngai ka ha lui ve ngat. Doctor ka nihna ang pawh hian min en lova min tham lo salh salh ṭhin khawp mai.

Khum bulah a la ding reng a, engtik lai mai pawh hian Cotton kekawr dum, shirt leh Jacket chenin a dum hlir zu han inbel a, a lum deuh chuan a shirt hlipin tawnzau dum a inbel leh mai a, mi mak tak hi a ni ve hrim hrim.

Ka pên thawm hriain a rawn dâk chhuak a, a thawmhnaw lei ka inbel lo tih a hmuh rualin a ner sawk a; "I kawr âwm a zau mah mah, i hnute a lang lo chauh a nih kha," tih pahin ka kawr hâk nghâwng 'V' shape lai tak chu a rawn zen thut a, a kut vai sawn dâwrh pah hian, "Min khawih hlek suh," ka ti vin hlar a, kiai suk chung leh meng zim san chungin, "I inthlâk dawn nge, khumah hian ka keuh tlu zawk dawn che," a tih leh tâkah chuan ka inthlâk lo ngam ta lo.

Nichina a chhuah khan ka thawmhnaw inbel tur a lo va lei ve ngial a nih hmel. Kekawr dum ṭhui nalh tak leh cotton var deh nuam tak ka inbel tâkah chuan ka dâi sawng sawng mai alawm maw le, ka ha tawk thlap lehnghal a, mak ka ti ru hle.

"Kha hei hi nangin bun la, keiin pakhat ka bun ve ang," zawi supa tiin a kekawr ipte aṭangin Zungbun bâwm a rawn phawrh a, "Jeho, mi tih dan anga tih ve kher a ngai lo, ka bun dawn lo a nia," tia ka lo hnial chuan a meng rum sawt a, "Kan chhungkaw tih dan a nia, i bun a ngai," tih pahin min bun tîr nghal a, hei pawh ka bun tâwk leh thlap, "Engtin nge ka size i hriat zêl theih?" tiin ka zâwt ta a.

A kuta zungbun thawlh pah hian, "Jeho ka nia lawm," tih bâkin min chhâng lo. Ka bun tîr a phût kher lo a, ka lawm ve hrim hrim. Inneih zungbun inbun tîr romantic lo ber kan ni hial ta ve ang. A va ho e.

"JK Farm lamah ka kal dawn a, khawiah mah lo chhuak suh ang che, kan pahniha awm dun âi chuan nangmaha awm i duh zâwk ka ring, tun ṭum chu pawnlamah ka kalh hnan lo ang che," a ti ve teh mial.

"Hotel-a awm kher âi chuan ka inah kal ila," ka lo ti ve zaih a.

"Awm rawh ka tihna hmunah awm la a nimai, ka sawi ang apiang min hnial zêl dawn a nih chuan," tia khum zau zet melh zuk chung hian, "Sawtah sawn ka pawngsual ngei ngei ang che," a ti leh hmiah.

Rum zeta melh bâk tih theih ka nei lo.

Ka phone min pe a, "A ṭûlah chiah hmang la, helai hmun hi i chhuahsan a nih chuan ka sawi ang ngeiin ka awm ang," ti lehin a chhuak zui ta a.

'Pawngsual tih ṭawngkam hi a hmang ve ziah a, kei lahin a thu zawm diak diak ka duh bik si lo. 'Eng emaw thleng palh ta se' tih thuah invenna tur ka mamawh ngeia rinna ka nei ta a. Rang takin ka bag ka hâi rawk rawk a, Chemte tereuh tê, zum leh hriam tak engtik lai pawha ka ah reng ṭhin chu phawrh chhuakin lukham hnuaiah ka thuk ru ve hmak.

Mak lo ti suh u. Hnam dang zinga mahnia in luah ka ni a, chemte hi chu invenna atan eng lai pawhin ka pâi ve rân zel, a lian hran lo nain eng emaw tawh palh thil atan chuan a hman tlâk phian ang.

TV ka en a, ka en tui chuang si lo. Hotel lobby thleng tal pawh Jeho thu lovin ka kal ngam si lo a, ka va ipik ngawih ngawih si êm.

Ka phone a rawn ri ve mial a, Rinnunga a ni tih ka hriat veleh rang takin ka pick a.

"Ngurthan, a va mak êm êm ve, khawiah nge i awm?" A rawn ti nghal a.

"Shillong-ah" tia ka chhân chuan, "I phone rawn pick ziahtu mipa kha i tân eng nge a nih?" Thinrim insûm taka a ṭawng lai chuan thudik hrilha pasal ka neih tawh thu sawi mai ṭhain ka hre ta a.

"A pawi ka ti, nang leh kei hi chu a rem lo a ni ang e, pasal ka nei tawh," tia ka chhân veleh a ngawi ta vang vang a, rei fê hnuah, "Tunah khawiah nge i awm Shillong ka lo thleng tawh a nia, hmaichhanah inbiak ka duh," a rawn tih chuan Jeho awm loh laia inbiak a ṭha phian maithei asin.

Vivanta Hotel-a ka awm thu leh minute 10 vel hun ka nei thei ang tih ka hrilh ta a, pawnlama chhuak tur ka ni lo a, Hotel chhunga inhmuh ringawt te chu Jeho pawi sawina a nih ka ring lem lo.

Minute sawm hnih a ral leh meuh chuan thlaruk chhung rinawm taka ka lo zui ve Rinnunga nen inhmatawnin dawhkan kan kíl ta. Ani hi doctor tho a ni a, Jorhat-ah a thawk thung.

Ka kuta inneih zungbun melh rulh chung hian, "Ka awih thei lo, engtin nge min phatsan theih zawk?" Rilru nat hmel taka tiin min melh tlawk tlawk a, thudik tak hrilh ka châk, a nunna leh ka nunnain tuar dawn lo sela chuan engkim ka sawi mai tur.

"Min ngaidam rawh," zawi sapin ka ti ta zâwk a.

"Ka rinna che leh ka hmangaihna che hi hetiang hian maw min thungrulh dawn?" Thinrim insehruh ṭeuha a tih lâi tak chuan, Jeho leh Buatsaiha ka va hmu thut a, ka hlauthawng ngei mai, chak zet hian kan ṭhutna lam a rawn pan a, "Ka nupui nen sawi dun tur inneih awm ka hre lo," ti chhum hmukin Rinnunga kawr âwmah a ṭhâm zui nghal a, a kut a phe vuai a, chhuatah Rinnunga a tlu thla zui a, a hnar a thi nghal zawih zawih!

"Jeho, kal tîr rawh..." tia ka lo ṭawng ve te chu engah mah ngai lo hian a hnek zui leh mial mial a, "Security," tia midang âu ri a hriat veleh a thlah ve chauh.

"Buatsaih, ani hi lo ching fel ang che, nang kha min lo zui rawh," ti chang fukin ka bânah a vuan a, ka lo ding khur zaih zaih a, "En teh Jeho, ani khu ka buaipui a ngai, doctor ka nih hi min thlah rawh," ka lo ti hlawk hlawk a.

Rum lutuka min melh chung hian a bula Security lo ding chu, "Ka phalna tel lovin ka nupui a lo hmu a, ani kha hruai bo rawh u," a ti hmiah.

Rinnunga mitmenga tawrhna leh natna thûk tak rawn lang chhuak chu ka hmuh hmaih lo. Tupawhin Jeho an zaha an hlau êm êm zel hi a mak a ni! 

Buatsaiha'n Rinnunga a kâihthawh laiin Jeho chuan min kalsawn pui ta a, "Buatsaih, a chungah eng thil mah ti suh, doctor koh sak rawh," ka lo ti ṭâwk ṭâwk a, Rinnunga hmai thi buai kha enkawl a ngai asin, Laljeho erawh a insehruh hlê.

Kan room thlengin min pawt kal dâwr dâwr a ni ber. Min vawnna thlahin min nam lawp a, khumah ka ṭhu hnawk. Din chhuah ka tum rualin a rawn lâwn zui nghal a, "Chuti fakauhva mipa i mamawh chuan i pasal ka awm alawm, kei hian i tisa mamawh chu ka pe ang che," a ti thûm dút a, a mitmeng hriam lutuk leh thim ruih chu ka melh ṭha ngam lo.

"Jeho..." ka lo ti lâwi rât a.

"Rei lotê ka ring ngam chea kha mihring kha i lo hmu hman a nia, i thluakah khan eng nge awm? Sawi teh, ani khan a chhanhim theih che i ring a maw? Sawi rawh," a ti vin ṭhawt ṭhawt a.

"Ni lo, chutiang a ni lo, eng mah ka hrilh lo.." ka lo ti ve a.

"Mipa ka ni a, ka nupui i ni. Ani âia ka ṭhat lohna ka hre lo," chapo awkâ zeta tiin min bawh bet a, a rit ngei mai. Amah a sângin a palian si, ka thâ a khur zaih zaih a, ka kekawr phelh tuma a chêt lai chuan ka thâ neih tawp chhuahin ṭan ka lo khawh ve thung.

"Pasal pawmlai nei i ni tih i theihnghilh leh tawh ngai lovang," tia a sawi zawh rualin ka âwmbâwr a ṭhâm nawk a, ka lo râk ṭhat.

Ka tha neih tawpa sual lêt ka ni ve bawka chuti mai chuan a duh a nei bîk lo. Ka hah lutuk tawh a, ka thà a zawi ṭan, ani misual lutuk laka inpêk âi chuan eng pawh huamin ka che ve mai tur a ni.

A taksa rihna hmangin min delh rûn a, ka kut dinglamin lukham hnuai ka ban chho a, a thil tih lai chiah ngaihtuah tih hriat tak hian a thaw chhuak hawk hawk a, lukham hnuaia ka Chemte dah ka dap fuh ta tihah ka kekawr a phih thla ve chiah bawk.

Ka thianghlimna min lâksak tumtu, Laljehomalsawmkima nâknêmah chuan ka vit ta a. 

Chuta a rawn dâk chhuak hmel chu hlauhawm tak a ni. A mit a sen rûm a, a mittui a hnâm sawk bawk, awih theih lohna, maktihna inpawlh nuai hian min melh a, "Min thah i duh a maw?" a ti thâwp sut a.

Keiin chemtê ka phâwi ve chiah bawk a. A nâk hup chunga a ding chhuak lai chu ka melh reng ringawt. Eng pawi lian tham nge ka khawih tâk?

A kut leh lamin a hliam a hup a, lehlamin khuma ka mu chu min phih tho lawp a, "Min that rawh, vit leh rawh," tih pahin Chemte ka hûmna kut chu nghet tak hian a rawn hum thuah a, a thin zâwnah tinin, "Ngurthantluang, ti ta che, ka thih i duh a ni lawm ni, vit rawh," tia a ṭawng chu ring lo mah se, thihna rim a nam tel.

"Ni lo, Jeho.. ni lo, khatiang ka ti duh lo.." ka ti bah nawk nawk a, chhuata thisen far te chuan ka thâuvah min man a, ka ding khur hlawk hlawk. Ka thluak a fîm telh telh a, ka kuta Chemte thisen kâi leh Jeho na tuar hmel te chuan ka thluak an luh ngut ngut.

Min vawnna a thlah riai riai a, chhuatah a ṭhingṭhi hnawk a, "Min that ta si che," tia a ṭawng chu a zâwi raih raih mai.

A bulah ka ṭhingṭhi ve vat a, ka vihna lai aṭanga thisen tharlâm lo chhuak ṭiam ṭiam chu hup behsak ka tum a, ka kut vaiper lawpin ka hrawkah a rawn rêk a, a thâ a la chak ngei mai.

"Jeho...min ngaidam rawh..." tiin harsa ti zet hian ka ṭawng chhuak a. A rûm dut ringawt..

240223

-B®®

B+>[BeckirafARenthleI]<+®®