7.24-89 [A Becky Rafa Story]

7.24-89 

Ziaktu: Becky Rafa Renthlei

-B®®

[Recap]

Kan Laljeho hian eng nge a hriat tâk? A thluakah eng nge awm tih hriatsak lo mahila, naute hi a lo duh ve tak tak tihna em ni dawn?

Â..ngaihtuah dan pawh ka thiam mai mai lo e a..thudik erawh ka hrilh ran a ngai dawn a, ka hrilh hriat hmain a rilru ka enchhin ve phawt tur a ni dawn lo'm ni?

-B®®

Zan dar sawm velah kan nupa room panin kan chho a, Tleipuii fapa pawh ka pawm chho ve ngei a, keima chhar kha a nih vang nge ka thinlungah duatna, ngaihsakna leh lainatna a awm tih ka hria.

Kan khumah ka ṭhutpui a, Jeho lam hawiin, "Khatiang thutlûkna âtthlâk kha siam lo la chuan tihian keini pahnih hian naute duhawm tak kan nei ve mial maithei asin, mahse..." ka la tih mêk laiin, "I titla tak takin ka ring lo, dâwt min hrilh tlata hriatna ka nei reng a ni," thinrim pawh ni chuang lo hian a ti a, ka nui chhuak teuh kher mai.

"Englai pawhin thu min pe reng a, thupêk zawm loh chu thihna," tia ka lo sawi chuan a nui huk a, kei erawh ka thil eiah ka ngeih loh a awm nge ka luak a chhuak leh ṭan. Hmui hup chung hian, "Jeho, naute hi lo pawm lawk teh.." tih pahin ka thle bak a, ka uak zui tuar. A va han zia lo tak. Naupai ka haw dawn a ni chiang mai.

"I ṭha em?" Tiin ka malchunga a farnu fa a kut hmawr pawha a la khawih chhin loh chu a pawm ta a, a khawr ṭût, toilet panin ka kal phei a, an pu-tu khan lo inpawm ve teh se, ka tih luih pawh nihlei lo.

Chau hnêpa ka uak hnuah ka ṭhu hnawk a, ka hah hluah hluah, chhuak ta mai lo chuan cement bang dái raih chu ka chal sîk tîrin ka thaw hak hak a, thlakhat deuhthaw min khung chhung khan engmah mumalin ka ei lo, ka ei tam theih loh chu thuhran ni se, mahni inkhawngaihna hlira ka khah avang leh Rinnunga damdawi pawlh effect kha ka tuar lo ni berin ka hria; naute tan erawh thil pawi a thlen loh hrâm ka beisei takzet. Rinnunga ka ngaihtuah chhuah apiangin ka thin a rima kha lai hunah khan Jeho khan that mah se pawi tihna ka nei lo reng reng.

"I zia thei meuh nange?" Ka bulah Jeho a rawn ṭhu hniam a, naute kha a dah thla tawh a nih ka ring.

"Ka chau lutuk.." tia thaw halh chung hian din chhuah ka tum a, ka pai dat, aniin min lo dawm thuai a, "Hawh le," tia a sawi zawh rualin min pawm a, ka zawi hnawk thei alawm maw le.

Dimtein khumah min nghat a, ka chal huh dap chu min hruksak ve ngei a, ka khaw hmuh a fiah lo telh telh a, men luih ka tum pawhin ka thei lo a chhâ chu a ni e.

Ṭawng nak nak thawmin min tiharh a, ka khum bulah nurse leh Jeho an lo ding a, "Tunah hian nau a pai a, thil a ei ṭhat loh avang leh a taksa chak loh vang a nih hi, eng mah hlauhthawn tur a awm lo," tia Jeho a hrilh ri chu ka hre ve vek. 

"Naute a awm a maw? Tunah a la dam i tihna em ni? a ṭha tak tak maw?" Rinhlelhna nena Jehoa'n nurse a zawh mawlh mawlh lai pawhin ka la ṭawng chhuak lo.

"Innu hi damdawi chikhat hmanga hrai ruih a ni a, engtin nge nau hi a chhiat loh theih zawk, in vannei hle a ni, i nupui hi duat la, enkawlna ṭha a dawn a ngai a ni." Tia a hrilh dap dap lai chuan, Samuel Pamei aw ka hre zui zat a, "Tuin maw naupai, Jeho, Ngurthani kha a rai a maw?" A rawn ti lût a. Ka meng dere vat a, Samuel hmela lawmlohna leh lungnih lohna lo lang chhuak chu ka hmu ve vek.

Jehoa'n nurse chhuak rih tura a hrilh hnuah ka harh tih hre miah lovin a patea nen an ṭawng ta a.

"Ka fapa, henu lakah hian i intât lût thuk mah mah tawhin ka hria, duh tawk rawh, i pa thattu phuba lâk kha i duh a ni lawm ni, chhungkua din thei i la ni lo," tia Samuel a ṭawng chuan ka lo ṭawng chhuak teuh kher mai. Nu Pianmawii khan dâwt min hrilh lo a nih chuan Jeho bumtu dik tak chu Samuel Pamei hi a ni si a. Mahse, a hun hmain ka sawi chhuak thei si lo.

"Ka nupui a ni a, ka fa a pai hi a sualna leh a dik lohna a awm lo," Jeho chuan a ti ve nghut a.

"Ka thu i zawm dawn lo a nih a, tâl hran i tum a nih vaih chuan eng mah ka lak aṭang hian rochun tur i nei lovang, kan tum ber Bamos ram pawh kan la nei lo a nia, Ngurthantluangi hi i that hreh a nih pawhin thawn bo a hun tawh, ni thum hun ka pe ang che, chuta i che chhuak lo a nih chuan nang leh kei hian hna kan thawk dun thei tawh lovang," tia a sawi lai chuan kut ka lo hum ruh ngat ngat. 

Keimah hmangin Jeho pawh a blackmail duh a nia, pa sual leh duhâm tak a ni.

"Ka pate, Ngurthani hi chu ka thunun thei ka tih kha, tina hlek suh ang che," tih chiah Jeho kâ aṭangin a chhuak. 

Pen thawm a awm a, kawngkhar inhawng riin a zui leh a, ka meng chhuak ta nge nge e.

"Jeho..." tiin ka phun sap a. Rang takin ka bulah a rawn phei a, a mitmenga min duatna leh duhna lang dawt zut chu ka lo chhiar thiamin ka hre ve.

"I ṭha tiraw? Min ti mangang nawn tawh suh aw, kan naute kha i that dawn lo tih ka hria asin," tiin a nui suk a, ka kut veilama kan inneih zungbun kha her kualin, "Nang nen fa kan nei dawn chu a ni si a, he zungbun ka bun tîr lai che khan tisa thil a tel lo; mahse, kei hian ka duh che a, nang pawhin min duh, puitling kan nih angin phat buai tur engmah a awm lo aw.." tih pahin ka mitah tak min en chat a, lâi zetin ka lo khap fak fak ringawt.

"Naute chu i duh ve takzet em?" La ringhlel ru deuh tak chung hian ka zâwt nawn a, ani lah chuan awlsam têin, "Ka fa a ni tih ka hrechianga tumah puh tur an awm lo, i bialpa hlui hnaisai lo zet ka that lo kha Pathian min venna a ni, chuti ni lo se chuan ka fa hi 'tualthattu fa' tia koh a ni dawn si a.. tin, nang pawhin lo titla ta la, 'tualthattu pasal' ka ni dawn asin,'" tia a sawi lai chuan a hmel a rum leh sawt.

A sawi dan hmangah tumah la that ngai lo niawm takin a'n ṭawng vel a, awih tur nge awih loh tur pawh ka hre lo; mahse, ka zawt duh rih lo. Jehomalsawmkima chhungril nunah hian nunrawnna a awm lo pawh a ni thei, ka la hre zel ang chu.

Rinnunga chungchâng a rawn sawi chhuah tâkah chuan, "Ani kha engtin nge i tih tâk?" Tiin ka zawt a, a chanchin engmah ka hriat zui loh vang a ni.

Ner suk chung hian, "That rawh, tia i ṭawng kha zâwi hle mah se ka hria, ka that lo, a thawhna hmunah mit veilam chiang lovin a va kal ta a ni mahna, surgeon ṭha tak chu a ni tawh lo phawt ang, a chhan chu, kei hian hma ka la miau alawm," inringtawk taka tiin ka kut a la vuan reng.

"Rinnunga chungchâng sawi chu duh tawk ang aw," ka lo ti a, a lo bu nghut.

Nu Pianmawii a rawn lût a, Tiffin a rawn keng bawk a, "In pahnih khan ei mai rawh u, Ngurthan, i zia em?" Tiin chîk zetin min en a, ka ṭhat thu ka lo sawi chuan, "Bawiha, sawipui tur che thil hmanhmawhthlâk a awm a, kan inbe lawk dawn em ni ang?" Tiin a fapa a melh a. Kher kher chuan a.

"Ka farnu chungchâng a nih chuan ka sawi vek tawh kha, thla tharah Buatsaiha nen chuan innei rawh se, an fapa hming tur erawh kha chu ka patea'n phuah a chuh tlat a, kha kha chu an thu nise," tiin a nu a hrilh a, Tleipuii leh Buatsaiha inneih a remti tih ka hriatna ringawt pawh chuan min tilawm hle, min khung bo chhung khan a thutlûkna a lo siam fel hman pawh a ni mahna.

"Mami chungchâng a ni lo, i nupui hriat laia sawi i duh zawk chuan tihian ka sawi thei reng a nia, Samuel hian chhungkua i din a remti lova, Ngurthani leh ka tû lo la piang tur an him theih nan hmâ i lâk a ngai aw," zawi sapin a ti ta a, Jeho chuan ngun taka thil ngaihtuah hmel a pu.

"Ka nu, Mizorama kan inah khan naute a neih hma chu kan dah chho rih mai dawn em ni?" Tiin a nu a râwn a, "Damdawi in chhuahsan phawt ula, ka fapa, ro hran kan rêl dawn nia, Samuela thil tum chu i hria alawm," tih pahin a nui lui hak a, chutah kei min rawn melh leh a, "Jeho nupui ni tur chuan, tumruh, huaisen leh michhel tak nih a ngai dawn, ani nen in inneih danah ka buai lova, pumkhat in ni tawh tih theihnghilh suh ang che u," a ti ta a. 

Nu Pianmawii zia hi a mak ve ngawt mai, a thil tum hriatsak lo mah ila, a fate pahnih a hmangaih hle tih erawh ka hria.

Jeho nen tûkṭhuan kan ei ve ve luklak a, ka taksaah ṭhat lohna dang em em ka neih loh avangin rei awm kan tum lo. Chu chu ka pasal duhdan a ni.

Kan eina vel a tihfel vek hnuah, khuma ka mu chu min en vung vung a, kiai suk chung hian, "I naupai zêp i tum vei nen i duh aia hmaah ka hrechhuak leh ta si a, ka thinlungin a dik, a ṭha tia a ngaihtuah hi chu ka tisual mawh khawp a nia," tiin ka chalah a fawp zauh a, "Nang leh ka fa himna tur chauh ka ngaihtuah ang," zâwi hniam ruiha a ṭawng chhuah chuan min thlamuan ngawih ngawih. 

"I patea hnaihah ka him si loh chuan i duhna hmun apiangah ka awm ang, ka nuṭapa erawh ka pan a rem dawn lo tih min hriatsak dawn nia," ka lo ti ve a.

"Kha lam kha chu ka kutah dah rawh, Bamos leh JK kan inrem hma chuan Shillong ka chhuahsan thei dawn lo a, ka awm lohna hmun himah ka dah ang che," tiin a rawn kun hniam a, ka hmuiah fawp zauhin, "Insiam ang le, Buatsaiha'n Vairengte thleng a thlah che anga zanin tlaiah in chhuah nghal a ngai dawn a nia," ati leh tu tu tawh.

"Eng lo, zaninah min kal tîr dawn maw?" Ka lo tih chuan, "Ni thum hun min pe a, chumi ka bawhpelh chuan i nunnain a tuar thei, kei lo pawh ṭhuihhruai dang a nei a, Samuel lakah hian tum nei lo ila chuan ka zui ve tur che a nia," a ti ve zel a, engkim a chipchiarin min hrilh lo mah se, min ring ṭan tih ka hria, ka lawm tawk em em a ni.

Dârkâr thum hnuah kan chenna hmun kan thleng ta a, kalkawnga kan buai loh nan leh Mizorama a in awmna min hrilh vek a, Vairengte check gate aṭangin Motor dang leh driver dangin Aizawl thleng min thlah chho dawn tih a sawi bawk.

Zanriah kan kîl lai chuan atu amah kan ṭawng lova ka naupai thu an hre vek tawh bawk. "U Ngurthan, min duhsakna leh min khawngaihnaah lawmthu ka sawi takmeuh a, i tan tih theih ka nei tlem lutuk hi hrehawm ka ti," Tleipuiin a ti a, a ṭah a chhuah hmel hle.

Nia, ani tan chuan ka hlu a, doctor hna nei lo ni tawh mah ila, rilru hrehawm phah nan pawh ka hmang tawh bik lo. Nakinah nunphung pangngai ka zawh theih hun a la awm ka beisei ve fan.

Tleipuii hnenah thung chuan, "Khatiang zawngin ngai mah ta che, i fapa tan nu ṭha ber nih tum la, i pasal neih laia ka awm lo tur erawh pawi ka ti ve det," tiin ka nui a, Rishan a lo nui ve vur vur ringawt. Jeho erawh chu phone hmangin pawnah a awm a, tun aṭanga darkar thum hnuah Shillong ka chhuahsan tawh dawn a, ka sa himna ka duh anih chuan ka pasal thu ka zawm mai a ngai a ni.

"Ngurthan..." tia min lo koh tâk avangin Jeho chu inchungah ka zui chho a, hun rei lotê zum leh hriam kâra ka lo chênna hmun hi ka lo ngaina ṭan der a nih hi.

Thla tam pawh ni lo ka lo mut vena khumah chuan ka ṭhu a, ka hawi kual ngial, Jeho pawh ka bulah a rawn ṭhu thla ve a, a kekawr kâwng hnunglam zenin Pistol a phawrh chhuak a, eng teh vakah ka ngai tawh lo; a nunah a bet tel miau alawm.

"Ka zui thei dawn si lo che a, i dam ṭha lo chung ka kal tîr a ngai che hi thinrim suh aw, Ngurthan, thil tam sawi ka tum lo a, ka ngai ngawt ang che," tiin ani leh ni lo angin a ngui ve ruih a, a nghâwngah ka kuah a, "Ka hrethiam alawm, i rilru ti hrehawm duh suh, mahse, kan inbiak pawh theih nan ka sim card kha min vuahsak la, chanchin ka lo sawi thei ang," ka tih veleh, harh chhuak thut ang mai hian a tho vut a, ka phone dawhkana awm chu lain sim card a vuah nghal mawlh mawlh a, a charge leh rih. A chezia chu ka lo en reng a, thil sawi duah mi a ni lo ka tih tawh kha aw..

"Nâ i nei em?" Tiin min zawt leh a, ka neih loh thu ka hrilh rualin min rawn hnaih ruak a, "Vawikhat chauh ka ta i nihzia ka lan tîr thei ang em?" Tiin dam thluam leh inthlahrung ru deuh hian min zâwt a, ka khawngaih angreng. 

Damdawi inah zankhat chiah ka riak a, na em em sawi tur ka nei lo, ka tana mipa hmasaber leh ka pasal min mamawhna hi a beidawnna tura chhân ka tum bîk hauh lo. 

Khum lamah a rawn phei a, a hmel dam thlup chu nidanga ka la hmuh ngai loh a ni. A Kamis hak lai phelhin tawnzau nen a awm a, a taksa hrisel hmel tak te chu ka vawikhat hmuhna ang maiin ka lo en ngar ngar a, khuma ka ṭhu chu min pawt thovin, "Ka ngai dawn che.." tia a sawi zawh veleh min fawp a, a tîrah dam thlap mah se a duhthawh telh telh a, keipawh ka chuti tho.

Hun kan nei tam lo tih kan hre dun ve ve a, ka thawmhnaw inbel lai min hlihsak a, a mitmeng thim raih chuan ka saruakna a en chhuak vek, nui hak chung hian, "Ka zak.." ka lo ti a.

"Chutiang a ho lutuk, ka mitthlâah, ka hriatrengna hian ka nupui ruangâm leh taksa mawina a theihnghilh loh nan ka en che a ngai alawm," tiin ka âwmbâwrah a hmai a phum a, a mipa rim fai sar chuan ka hnar a verh zar mai. 

Nupa te chauh lo chuan tuna kan awm dan ang hi an ti thiang lova, Pathian pawi sawina a ni. Keini erawh chuan hetianga zalen taka chêt theihna dan hi kan nei a, tu pawi mah kan sawi hek lo, kan inthlâkhlelhna tilanga nupa kan ni ngei a ni tih fiahna atan pumkhatah kan insiam leh ta. A thaw hawk a, a bâk duh belhna a mitah ka hmu. A kut phah hlai ṭha tak chuan ka pum a chûl a, "Ânu nen in nat ka phal dawn lo," tia a sawi lai chuan ka hnuk a ulh titih.

"Jeho, ka kal kher a ngai em ni?" Tiin ka'n zawt ṭha leh a(h)

"I kal a ngai a ni, i kal bo hlen dawn lova hun rei lote chhung atan mai chauh a nia, a him chinah ka rawn hruai leh ang che, tualthattu leh mi nunrawng tak angin min hria a ni thei; mahse, tumah ka la that lo," tiin a vawikhat nan a insawi fiah ve ta. Thudik a ni emaw ni lo pawh nise ka hahdam huai huai tho.

Minute sawm dawn inbe lovin kan inkuah a, mahni rilru ve ve kan kawm a ni ber. 

"Ngurthan, ka phone aṭang hian hian ka rawn biak theih loh hun che pawh ala awm mai thei a, chumi hun a lo thlen chuan keimah ka ni ngei a ni tih i hriat theih nan Password ka rawn sawi ang, tunah chuan thil ṭul ber a ni lo nain ka hrilh lâwk che nih hi.." tiin ka hnungzâng ruak kâng chu a chûl a chûl a, zawh zui ka châk viau rualin a hun a tih hma chuan min hrilh leh duhin ka ring chuang lo a, ka ngâwi ta zâwk a.

Zan dar 10 ah chiah 'Mawkasiang' hmun ka chhuahsan a, Tleipuii leh nu Pianmawiin min kuah ve ve a, "Indim la, i hna i ngainat em em pawh i thawh leh theih hun a her chhuak em em ang," tiin min hrilh ve thlap.

Ka pasal Laljehomalsawmkima ve thung chuan min kuah tawh lova Car-a ka ṭhut luh theih nan kawngkhar min hawnsak a, "Vairengte check gate i thlen hunah driver in i kal lehna turah a dah dawn che nia," tihpahin ka kut a hmer vang vang a, a bâk thu dang a chhâk chhuak tawh lo. 

Buatsaiha ṭhutna lam panin a kal kual a, "Ka nupui himna hi i kuta awm a ni a, châwl khawmuang hlek suh ang che u, Ngurthani a him hma chuan thinthiin ka awm dawn lo tih i hriat kha," tiin a hrilh ve thung.

Kan tlân chhuak ṭêp tihah Buatsaiha chu min lo nghak leh lawk turin ka hrilh a, Car kawngkhar ka hawng a, Jeho in chhung lam pana kal tawh chu ka va ûm a, a hnunglam aṭanga a kâwngah kuahin, "Ih..in enkawl ṭha la, thi suh aw.." ka ti teh tawp a, a nui huk. 

Amah ka kuahna ka bân pahnih a chelh kawp a, a kut dinglamin ka khabe a dawm thung a, "Ka thi a nih pawhin i kiangah ni rawh se," ti supin min fawp leh a, ka thlah phal lo, eng chen nge kan inhmuh dawn loh tih hriat a ni lova, damin kan inhmu leh kher dawn em ni? Ka thil ngaihtuah avang chuan ka mittui a hnâm sak. Mahse, ṭah ka tum hran lo.

A hmui lasawnin, "Kal rawh le, Mate, kal rawh.." tiin Car awmna lam min panpui a, a va harsa si êm.

Ni e, Jehomalsawmkima kalsan hi a har êm a ni.

Hnunglam hawi tawh lovin kan tlân chhuak ta a. Ka mittui a far ve ta, amah vang hian ka mittui vawi engzat nge a la far dawn le?

Buatsaiha hi ka haw hran lo naa ka ngaina tehchiam lo. 

"Madam, i rilru ti hrehawm duh suh, Jeho hian a thlahthlam hauh lovang che," tiin min hnem ve a, ka ngawi rauh rauh.

Dârkar khat vel kan tlan tawh tihah, ka in luah an lo hriat chat dan leh kei kher min koh chhuah chhan kha hriat ka duh ta a, Buatsaiha hi khami zana lo kal ve kha a nih vangin a sawi thei ngei dawn tih ka hria.

"Buatsaih, doctor tam tak an awm a, kei kher min koh nachhan kha han sawi teh?" Tiin ka zawt ta a.

Rei fê a ngawih hnuin tihian a sawi chhuak ta a, "Kha damlo, nangmah kan koh chhuahna hmanrua kha Bamos Farm Manager a ni a, Ram pass original awmna hretu a ni, Bamos leh JK ramri hi a fel lova anni lamin min nêk nasain kan farm lam an nawr chêp nasa tawh a, keini lamin a MAP kan nei tlat si lo lai hi kan buaina chu a ni ta a ni. 

Tihian ram inchuhin kan buai reng a, Boss in a thah tâk kha, kha pa hnen aṭang khan neih dan kan dap a, a sawi duh miau si lo," tiin ngun takin kawng a en a, "A taksaa hliam siamsaktu kha chu Jeho a ni a; mahse, thih tîr kher a tum lo, chuvangin amah kan enkawl dama kan thuhnuaia a awm theih nan doctor thiam tak kan mamawh a, engtin nge Jeho khan nangmah a hriat che ka hre lo nain, ama ruahmanna a lokal kan ni," a ti duah a.

"Jeho hian a hmain min hresa tihna a ni em?" Tia ka zawh chuan, "Ka hre lo, eng mah ka hriatpui lo, Samuela'n manager a that lai kha hmu lo la chuan tuna i awm dan ang hian i awm lo ang, chu erawh chu ka sawi thei, tualthah hi a namai lo a, zanin chûk chûka i pasalin a kal chhuah tîrna chhan che hi Samuel Pamei in a tihbuai che a hlauh vang a ni, i pasalin humhim a tum che a, a thu i zawm tlat hi i finna a ni bawk," a ti ve ngial.

"Eng ati nge Samuel chuan min huat tlat le?" Zawitein ka lo ti a.

"Jeho hi a mamawh alawm, amaha pumbilh a duh a, Silai kah thiam tak a nih bâkah a huaisen a, insual a thiam em em bawk, putara tih theih loh apiangah Jeho zel a kal ṭhin, a kut leh ke a ni a, a naupan lai aṭangin hetiang mipa ni tur hian a train a, a hlawhtling a nih hi, Jeho tan a patea a hlu tho bawk si..." tia a sawi lai chuan mut chhuakin min zém a, ka lo chhing leh sek sek zel.

"Rawn chhuak rawh u, Car aṭang khan rang takin rawn chhuak rawh u.." tih ri ka hriat chuan ka meng chhuak vat a, ka lo muhil tui hle a ni ngei ang.

Hmai tuam pakhat hi ka ṭhutna lamah a lokal a, Buatsaiha awmna lamah hmai tuam tho pahnih an awm ve thung, kan awmna lai hmun ka hre thei mai lo a, Car head light-in a chhun en chin bâk eng mah ka hmu pha lo, a thim mup a ni mai.

"Hmeichhia zawk kha hruai hrang ula, driver kha chu motor awmnaah hruai phei rawh u," tia an ṭawng thawm chu ka ngaithla reng a, ka thâ a khur der der, Mizoram pan kan tum tih Jeho te chhungkua bâkin an hre si lo a, a mak hle mai.

Car aṭangin mipakhat hian min pawt chhuak a, ka samah a ṭhâm a, ka lo ṭê vak.

"Bengchheng hlek suh," a ti nghut a, ka ngawi nghal hmak. Buatsaiha an hruai hrang hmasa a, kan piah deuhah chuan Gypsy pahnih a lo ding reng chu niin! Min zuitu an awm leh awm loh te chu Buatsaiha khan a hre ve awm si a, nge, ani hian Jeho bumin kei min tâl awh tir a tum tih pawh hriat va ni suh.

Min nam kat nawk nawk a, an ṭawng tawh lo hrim hrim.

"Madam..." tia Buatsaiha'n min lo koh chuan a ri sawk a, kut an thlâk tih hriat reng reng.

Kei erawh chu hmeichhia ka nih vang nge kut min thlâk lova min nam dawt dawt ringawt.

Ka huaisen chhuahin, "Khawiah nge min hruai dawn?" Tiin ka zawt ve tawp a, "Thi turin kan hruai che maw le.." tih chiah a sawi. 

Buatsaiha Gypsy chhunga an nawr luh dawn lai chuan a che phut a, amah hnaih bertu chu a hnek thal tawp nia! an au ṭhawt ṭhawt a, an insual chu a ni deuh der, kei erawh nghet takin min chelh a, tâlchhuah ngaihna a awm lo hrim hrim.

Buatsaiha mipa pahnihin an sual rawn lai chuan Motor thawm a rawn awm ta a, a rik dan aṭangin a tlan muang lovang tih a hriat theih.

Kan lo dinna bul lawkah chuan Force Gurkha dum a rawn ding dawt a, driver hmu lo mah ila, Jeho a nih rinna ka nei nghal.

A hnu leha thil thleng chu ka rin phâk bâk a ni. Min vuantu ke a thlep hnawk a, Pistol hum chungin ka Laljeho a rawn kal hnai a, a kut veilamin min pawt sawn a, lehlamin lei chara mipakhat rum dut dut chu a chhuih pawp a, a thal chiang kher mai.

Engtin nge a nih theih? Jeho kuah ran chungin ka ding a, a âwm nghêngin ka ṭap khur dar dar a, "Ka motor-ah sawn lo va ṭhu rawh aw, ka venghim dawn che tih ka sawi lovem ni?" a ti sup a, Gurkha a dahna lamah min hruai phei a, thuawih takin ka kal ve mai. Front seat-a min ṭhut fel tir vek hnuah, "Ṭap suh aw, ka thlêm thiam lo che a nia, i mittui hru hul rawh," a ti leh deuh tawp. A va buaithlâk e.

Ani erawh chu Buatsaiha ngaihven turin a phei leh ta a, Pathian thil mak tih a thleng a ni ngei ang.

Jehoa'n mipa pahnih te dim baksak lova a sawisak lai chuan Buatsaiha motor lam panin a rawn vâk phei a, a hmai thisenin a bual nuai a, a mit lehlam a meng mang tawh lo. Ka khawngaih êm avangin motor kawngkhar ka hawng sawk sawk a, pui turin ka chhuk thla ta a.

Jeho te lam pawh ka ngaihsak tawh bik lo. A ri dawt dawt zel a, a thim ve êma hmuh chian a har. Insual, invau leh inkahna ka tawng ta zauh zauh a, a hma anga hlauhlawp kha chuan ka awm tawh bik lova; ka hlau lo tihna ni lovin insiamrem thiam ka zir zel zawk a ni. 

First Aid box phawrh chhuakin a theih ang ang leh a rem dan dan hian Buatsaiha ka lo buaipui a, silai vawikhat a puak a, ka phu dawrh. Jeho an kâp a nih ringin ka thin a phu zaih zaih a; mahse, a hnu lawka dârthlalang rawn kik kauh kauhtu hmel ka hmuh chuan ka thaw huai huai.

Jeho pawh motor chhungah a rawn lut a, hah hmel leh na tuar hmel a pu duh eih lo.

"Buatsaih, tikhan a hnung seat-ah mu la, car saw ka va en fel lawk ang e, an tina lo che tiraw?" Tiin min ngaihtuah hmel tak hian min en leh a, bu nghat nghat chung hian, "Eng tin mah min ti lo," ka lo ti ve sap a.

A phone phawrh chhuakin a hmang zui nghal a, "Rishan, rang takin driver pakhat lo hruai la, location ka lo thawn ang che, kan car pakhat zawk hi in khalh hawn a ngai dawn a, Buatsaiha a hliam tlat mai," ti leh zung zungin a chhuak vut a, kan chuanna car lam a pan a, a va lock vek hnuah nichina mi pathumte kha a endik leh tê tê a, an thi nge an dam tih ka hre lo. Keimah min chelhtu kha chuan a keah hliam a nei ngei mai a, Jehoa'n a kâp miau alawm.

"Jeho, engtin nge helai hmun hi i lo thlen theih?" Mak ka tih êm avangin ka zâwt ta nge nge a, hrawk thian kharh chung hian, "Thil harsa a ni hleinem, i nunna humhim turin ni thum hun min pe a, keiman ka hruai che an rin laiin Buatsaiha ka tîr ta si a, in hnungah ka tlan zel alawm, a ni lawm ni Buatsaih, hetiang thil hi a thleng dawn tih ka hre lâwk a, i pum chhunga ka fa kha a hlu teh a nia, ka patea hmelma in ni." Zêp buai map lovin a ti hmiah.

"Kei chu min tina dawn lo, min mamawh a, ka patea a ni bawk, kei min lâk hran tumtu emaw a chan âi chhuhsak tumtu apiang a zuah dawn lo tih ka hrechiang lutuk tlat," tiin ka sam pawr phang chu a hui mâm a, a kut a pilh phung a, a khabe a duk ve raih bawk.

"Nangmah an tina dawn lo che tih i hriat te chuan eng ati nge min hruai mai loh," ka lo ti ṭâlh a, "Tih nat che an tum tak tak nge tak tak lo fiah ka duh a ni, Vairengte thleng ka kal tel ve a nih chuan an thil tum ka hre chhuak thei dawn si lo a, Buatsaiha ka hrilh sa vek," tiin a hnung seat-a mu a mâkpa la ni mai tur chu a melh zuk a, a rin dan anga thil a thleng chu a lawm emaw tih mai awl tak a ni.

"Kan awmna hmun hi a him lo a, khang ho kha midangin an rawn ngaihven dawn;chuvangin, keini chu Shillong lama lêt lovin Jorhat-ah kan kal ang, ka farnu te nupa kiangah i chêng rih anga i him berin ka ring," a ti ta a.

Vansangkimi hnenah kei hi ka awm ang maw? Jeho hian a farnu hi a sawi teh fo a, a fel viau a nih loh pawhin amah anga luhlul leh ngawhngawl, hmeichhe huaisar tak pawh a ni maithei.

Buatsaiha tan motor khalh chi ziazâng a nih tâk loh avangin kan chuanna Car zawk kha Rishan leh driver dangin an rawn lam ang a, keini pathumin Jorhat kan pan dawn a nih hmel.

Jeho kianga ka awm leh thei ringawt pawh hi ka lawm tâwk em em a, min be tuitam lo mah se, a mi uap a nat mai bâkah a bula awm ka thlahlel ngawih ngawih a ni ber.

Hnehsawh zetin motor a khalh a, Buatsaiha a awm ve bawk si a, ka hriat duh thil tam tak pawh ka zâwt ngam rih lo. 

Ka mut chhuak a reh vek a, rei kan tlan dawn tawh lo tih min hrilh chuan ka ui lâwk ang reng. 

"I bialpa hlui Rinnunga kha Jorhat khawi hospital berah nge a thawh?" Tiin min zâwt thut a, ka hamhaih deuh avangin ka chhâng mai lo.

"Eng chena rei nge i awm a ngaih dawn ka hre lo a, kha pa kha lo hnaih hlek tawh suh ang che," a ti leh a.

"Ka dam chhungin ani kha ka hnaih nguar ang," uar takin ka lo ti vat a, nui huk chung hian, "Hmeichheho hi chu heti hian inti zuah zuah a, a hnu lawkah in pan leh dáw dáw zel," a ti ve ngei ah...

"Lungngai suh, ka pan hauh lovang," ka ti nghet charh.

"Tlem tal muthilh tum la, kan thlen hunah ka kâi tho dawn che nia," tiin ka malchungah a kut veilam a rawn dah a, ka lo humsak vat, min duatna a tih lan thiam ve dan a nia, a bâk ka phût lo.

"Bengchheng suh u, Raguela kha a pa hnenah va dah rih rawh?" Tia ṭawng hlut thawmah ka meng chhuak riai riai a, ka awmna hmun ka hai ṭhelh, ka pum a let nasain luak chhuak bawkin min hnawh leh up up a, khua a vâr lek lek tawh a, khum dûp nuam zetah ka lo mu reng chu niin! 

Ka hawi kual a, ka awmna hmun ka la hre thei chuang lo reng reng. 

Thawh chhuah tumin ka inbeng kang dawn a, ka uak nghal pawp a, ka khuh zui bawrh bawrh bawk.

"I lo harh tawh elaw?" Tia ṭawng thawm ka hriat rualin ka mutna khum bulah hmeichhe pakhat hmelṭha fahran mai hi a lo kal hnai a, a hmelṭha a ni tawp mai; a ngo sar a, nui sâng chung hian, "Vansangi ka nia, Jeho nau.." tih pahin khumah a rawn ṭhu a.

Chhân ka tum lai takin ka uak leh ta, a va hrehawm ngat ngat ve maw le.

"Mama, innu hi..." tiin Jeho a ko chûl a, a buai phili nghal ringawt.

Rei vak lovah Jeho hmanhmawh deuhin a rawn lut a, "Ngurthan..." a ti lawi rût a, a nau melh lehin, "Nau a pai a, zinglam nawm loh a nei nasa deuh a nih hi.." a ti ve ngial. A thil sawi hi amah nen a inhmeh hlawl lo.

"Biscuit leh thingpui ka siam ang a, a zia mai ang," Vansangi chuan a ti sawk sawk a, a chhuak zui nghal a, Jeho erawh khumah a rawn lawn a, zan hnih lek chu i kianga awm dan ka ngaihtuah dawn nia," a ti a, ka lawm ru hle.

Min kuah hlu hlu a, "Nizan khan an tina che emaw ka ti hman tawh a, ka tlai ṭhelh a nih kha.." tia ṭawng pahin ka puansin a rawn keu a, a kut dah lutin ka pum a chûl a, "He thil tinatu chuan kei min tina a ni, a nu tinatu pawhin kei min hmachhawn duh tihna a ni bawk, ka hmangaih che tia sawi ka tum lo, ka sawi dawn lo bawk a; mahse, ka tan in hlu hle a ni," a ti ve duah. 

Kei ve thung chu luak lo turin ka lo insûm ngat ngat a, chhân pawh ka chhâng lo. Chutih lai tak chuan Vansangkimi tray chawi chung hian a rawn lut a, "Hei hian inhnawh puar la, i zia mai ang, Raguel ka pâi tirh pawhin tiang khan ka awm alawm," a ti a.

"Ka lawm e..." ka ti sap a.

Ka pasalin min kuah tho a, Vansangkimi sawi ang deuhin ka inthun puar chu ka zia hawk hawk mai.

Kan nupa chauha kan awm leh tâk hnuah, Buatsaiha ṭhat leh ṭhat loh ka zawt a, a ngaihtuahawm lo tih chiah a sawi, a duh tê a nih loh chuan biak thui a har ve hranpa hrim hrim.

"Helai hmun ka chhuahsan hunah ka patea'n min ringhlel ngei dawn a, ka phone hman lai pawh hi a him dawn lo tih ka hrilh tawh che kha, chuvangin, whatsapp emaw Sms-ah eng thu pawh dawng la, number ka rawn dah hmasak loh chuan keimah ka ni lo tih i lo hre dawn nia," thutak zetin a ti teh daih a.

"Eng number maw?" Tiin ka lo zâwt lêt hû a.

"Call a nih chuan ka aw aṭangin keimah ka ni tih i hre mai dawn a, a bâk ka sawi ho aṭang khian midang, ka patea emaw tu pawhin eng emaw an rawn thawn thei che, chumi hunah chuan 24-89 tih a tel a nih loh chuan keimah ka ni lo tih lo hria ang che aw," tia a sawi zawh rualin a phone a phawrh a.

"24-89 awmzia chu ka hre thei ang em?" Tiin ka zawt lêt a, nui suk chung hian, "Nakinah nangmah ngeiin hriat chhuah i lo tum dawn nia aw doctor.." tia nui lehin ka kâwngah a rawn kuah leh thuai a, "Reilote muthilh ka mamawh tlat, ka nupui kuah chunga mut ka duh bawk," thunei awkâ taka tiin a maimitchhing nghal daih.

Laljehomalsawmkima muhil hmel chu ka en vang vang a, a tîra ka hriat dan leh tuna a mizia hi ava han inpersan si ve le.

Ka hmangaih em ka hre lo; mahse, ka la hmangaih thuai dawn tih ka thinlung hian a hria a ni. '24-89' tia ngaihtuah chungin ka maimitchhing ve ta a, a awmzia erawh ka hre hlawl si lo....

290323

-B®®

B+>[BeckirafARenthleI]<+®®