8.24-89 [A Becky Rafa Story]

8.24-89 

Ziaktu: Becky Rafa Renthlei

[Recap]

"24-89 awmzia chu ka hre thei ang em?" Tiin ka zawt lêt a, nui suk chung hian, "Nakinah nangmah ngeiin hriat chhuah i lo tum dawn nia aw doctor.." tia nui lehin ka kâwngah a rawn kuah leh thuai a, "Reilote muthilh ka mamawh tlat, ka nupui kuah chunga mut ka duh bawk," thunei awkâ taka tiin a maimitchhing nghal daih.

Laljehomalsawmkima muhil hmel chu ka en vang vang a, a tîra ka hriat dan leh tuna a mizia hi ava han inpersan si ve le.

Ka hmangaih em ka hre lo; mahse, ka la hmangaih thuai dawn tih ka thinlung hian a hria a ni. '24-89' tia ngaihtuah chungin ka maimitchhing ve ta a, a awmzia erawh ka hre hlawl si lo....

-B®®

Muhil thei lovin ka inlet sek a, Jeho erawh tui takin a muhil thung a, a nau ni-a a sawi Vansangkimi hmel kha ka ngaihtuah kîr a, Tleipuii nen inanna pakhat mah an nei lo a, vun rawngah Jeho nen inang lo mah se an mitmeng leh hnar velah inanna riau an nei. Samuel Pamei fanu a nihna hian keimahah eng emaw riau ati thung.

Tûkṭhuan ei hunah Vansangi chuan mikhual pindan kawngkhar kik pahin, "U Ngurthan, in harh tawh em?" A rawn ti a.

Dimtea tho chhuakin Jeho muhil lai tihharh hlau tak hian ka dingdihlip phei a, a chau dawn êma ka hriat vangin ka kâi tho duh rih lo.

Ka inphih fai hnuah choka lam ka pan ve ta a, ka luak a chhuak lo teh mial. Buatsaiha pawh a lo tho harh peih a, a mit dinglam a vûng phui vek a, a hmai a khem nasat bâkah a hmui pawh a vûng tel bawk. Keimah vanga hetiang hi tâwk a ni si a, hrehawm ka ti hle.

"Jeho a mutui lutuk a, ka ko harh duh rih lova.." tih pahin dawhkan ka kîl ve a, Vansangi a nui var var a, "Ka û hian nupui a neih ka ring ngai lo kha a ni a, a mak ngawt mai," tiin min melh zeuh a, a hmelṭhat dan a chiang ngawih ngawih.

"Kan innei ang tih hi kei pawhin ka ring pha bik lo," tiin kan inneih chhan chipchiar ka hrilh hran lo. Buatsaiha a ngawi reng a, ani hi chuan engkim a hre naa a sawi chhuak dawn lo tih chiang sa a ni.

"Raguela leh a pa an chhuak a, an lo haw har deuh ang, ka pasal i hmuh hunah nui miah suh.." a'n ti teh ngawt a, Vansangi pasal ka la hmu lo a, a hming pawh ka hre chuang lo. 

An ina chêng zat leh a pasal hming te a sawi a, a pasal hming chu ka hriat tawh hnu ni tlatin ka hria, Bartho Saingurpuia tiin min hrilh a, "Jeho nen unau in lo ni reng a, Tleipuii chiah farnu a nei emaw ka lo ti a," ka tih chuan, tihian a sawi ta a.

"Nia, ka nu leh pa dik takin min enkawl lo a, fa lâk ka nih thu min hrilh zan aṭangin ka nun a inthlâk dâwrh; mahse, Bartho nen kan intawn hnu leh kan inneih hnu hian ka chhungte min zawnpui ta a, Jeho hi ka unaupa a nih thu leh ka pa a thi tawh a, ka nu pawh a thi tawh tih kan hrechhuak ta a ni, unaupa ka nei tih ka hriat hnu lawkah unaunu pawh ka nei tih ka hre leh a, ka nu khan a boral hmain tuna min enkawltute kutah hian min dah ta niawm tak a ni," tia a sawi mêk laiin kawngkhar a rawn inhawng a, mipa naupang hmelṭha zet leh a pa an rawn lut ta a. Bartho Saingurpuia hmel ka hmu chiah chu ka phu zawk.

Ka hmuh hnu a ni a, ka hmelhriat ṭha erawh a ni lo thung, a chhan chu Jorhat-a Scientific officer Mizo pa fel zet Rinnunga sawi ve chhên kha a ni miau alawm. Lalrinnunga kha helai hmunah hian a thawk a, doctor thiam tak a ni. Bartho nen an inhmelhriat tih ka hria a, chu erawh sawi lan ka tum miah lo a, sawi chi lah a ni hek lo.

Vansangi nen an kum a inthlau viau a nih hmel, an fapa pawh kum thum a tling ve ṭêpin ka ring.

Buatsaiha phone a rawn ri a, min melh zauh chungin a tho chhuak a, pawnah a chhuak zui daih. "Ngurthan, inthlahrung lovin i in angah ngai la, naute i neih hma chu kan hnenah awm char char rawh aw.." tia min lo betu Bartho lam ka hawi a, nelawm taka nui chungin a fapa chaw tur a siam a, a nupui en zuk chung hian, "Naktukah Kolkata panin ka kal dawn a, Ngurthani a lo awm thei hlauh tur chu a lawmawm hle mai," ti lehin Vansangi hnenah bawk, "Jeho khawiah nge a awm a?" Tiin a zawt leh a.

"A la mu..." tia annuin a chhân chuan,

"Teh tlat a, nupui a nei dêk dêk a, a inthlahdah ringawt a ni maw?" Tih pahin dawhkan a rawn kil ve a, chutih lai tak chuan Buatsaiha hmanhmawh takin a lo lut a, keimah min rawn pan nghal a, "Madam, Jeho kai tho mai ta che, JK Farm lamah ka kîr a ngai tlat," a rawn ti a.

"Ni hnih khat kan châm ang tih a sawi kha.." ka lo tih chuan, "Nia, ka hria, mahse, kei chu châm thei ka ni lo," a ti ta a, Jeho kai tho turin ka kal ta nge nge e.

A lo bawkkhup leh daih tawh a, a muhil nge a harh tih pawh a hriat loh.

A dârah vuanin, "Jeho..." tia ka koh veleh rang lutuk hian a rawn inlet a, ka chalah Pistol-in min tin rap! Ka lo râk ṭhat a, "Eng, tinge a.." ka tih chuan, "Sorry.." ti supin lukham hnuaiah Pistol a nawr lût a, ka thin ava han phu nasa hman tak.

"Ka mumang vang a nih kha.." inthiam lo deuha tiin a ṭhu chhuak a, ka hamhaih hmel a hmu teh chêk a ni ang chu, "Tihpalh lutuk, hlauthawng suh aw.." tiin min kuah vat a, ka thin a la phu tho. Â lutuk mai.

Buatsaiha'n kai tho tura min hrilh thu ka hrilh chuan min kuahna a thlah a, a tho chhuak vut a, min be zui tawh lovin bathroom-ah a lût ta a. 

Minute 20 hnu velah ṭhutkhawmna pindanah kan ṭhu ṭhap a, kan awm dan tur rel fel a ngai tih Jehoa'n a sawi a, chuvang chuan Buatsaiha pawh a hmanhmawh viau nain a la kal chhuak thei bik lo.

"Bartho, ka nupui hi hun rei lote chhung atan in nupa kutah dah ka tum kha a ni a, mahse, nangmah Kolkata lama kal i tum leh si chuan i nupui leh Ngurthani ringawt heta an awm hian a him dawnin ka hre lo, ruahmanna ṭha deuh zawk kan siam a ngai a ni," tiin Bartho a hrilh a, heti êm êm a Jeho a fimkhur leh min ngaihtuah hi a mak ka ti lo thei lo.

Bartho ve thung chuan, "Kârhnih chiah ka thang dawn a, eng êm an ti bîk nang, ka driver Manosh a awm tho bawk a, ngaihtuah lutuk duh suh.." a lo ti thung.

Midang tumah kan ṭawng ve lo.

"Ka patea nen hnathawh tur kan nei a, nupui fanau neia ka inbenbel hi a remti tlat si lo a, kei chu ka inveng thei, ka nupui leh ka fa himna tur zawk hi ka ngaihtuah a ngai a ni, nizan lamah pawh khatiang thil kha kan tâwk nghal pang a ni a, Ngurthani awmna a hriat chuan amah that lo mah se naute hi a him dawn lo tih ka hriat vang a nia," rilru hah hmel takin a ti a, a mâkpa leh Buatsaiha a ring tawk hle tih ka hre mai.

Vansangkimi a rawn ṭawng chhuak ve ta, "Mam, kan kutah engkim dah la, i tih tur ang ang chu va ti la, u Ngurthani venhim lam pawh kan nupa kutah dah rawh," a lo ti ve bawk a, sawi ve tur ber pawh ka hre lo. Ka lo ngawi rauh rauh mai.

Samuel Pamei hi Jeho leh Vansangi pa a ni tih ka sawi chhuak mai dawn em ni? Ni lo, nu Pianmawii thurûk sawi chhuaktu nih ka duh si lo lai hi a ni. Ka va hah tak. Anni pahnih hi chuan a pa a thi tawh tiin an hre si a, a hun hmaa lo sawi hi ka tih tur niin ka hre thei ngang lo a ni.

Zanin tlaiah Buatsaiha Shillong panin a chhuak phawt ang a, naktukah Bartho Kolkata lam panin a kal thung ang. Ni hnih chhung kan hnenah Jeho a châm rih ang a, chumi hnu chuan min kalsan dawn a ni. 

Vansangkimi bula awm ka hreh hran lo a, Jeho nen kan awm dun thei lo tur hi pawi ka ti a ni ber. 

Bartho Saingurpuia chuan min en leh vung vung zel a, ka va en ve apiangin a hawisawn daih zel. 

Ka rin phâk bâkin Jeho chuan Raguela a duat a, Tleipuii fapa ve lem a ngaihsak der si lo, sâwn a pawm vang kha a ni mahna. Mipa ṭawng tam a ni lo chungin naupang bulah chuan a ṭawng duh hle a, Bartho leh Vansangi te nupa mawlh mai hi an hmuh a nuam; an inhmangaih tih a hriat hliah hliah mai si a, kei leh Jeho nen chuan lei leh van ang vel a ni. Ka chhungril hian a awt lo ka tih chuan dâwt ka sawi tihna.

Buatsaiha thlah turin Jeho leh Bartho te pafa an chhuak tawh a, kei leh Vansangi chiah inah kan awm a, zawh tur tam tak ka neih hi tun huna zawh chhuah ngei ka duh bawk.

"Samuel hi i hmu tawh em?" Tiin ka zawt hmasa ber a, Koki san âk chung hian, "Ka la hmu miah lo, Jeho hian ka hmuh a phal lo a, Tleipuii erawh chu vawikhat ka hmu tawh," a tih chuan mak ka ti ru viau.

"Samuel nen phone ah tal in inbe tawh em?" Tia ka zawh leh chuan, "U Ngurthan, khawiah mah sawi chhuak lo la, Jeho nu hi ka ngaina lo, Samuel hian Jeho nen kan inkungkaihna engmah a hre lo tiin min hrilh a, dâwt vek, Samuel Pamei hi a hming dik tak a ni lo a, Mizo hming a nei," a ti ta a, chu chuan ka beng a verh hlê.

"A Mizo hming chu i hria em?" Tia ka zawh chuan a hriat loh thu leh hriat chhuah ngei a tum tih a sawi a, "In inneih danah felhlel a awm tih pawh ka rin hriat a nia, mahse, zawh chhuah kher che ka tum lo," tia a ṭawng mêk lâiim inhnunglam dârthlalang a rawn keh ri chhuai a, ka phu nasa kher mai, Vansangi pawh chuti tho. 

Kawngkapui lam aṭangin Manosh a rawn lut a, a bânah hliam a nei bawk, "Madam, room-ah lut rawh u.." a ti thâm ṭuak a, a mitmeng a davá ṭan.

Manosh hi Vansangi te driver a ni.

Vansangi zawk a che chhuak phat a, "U Ngurthan, mikhual room ah lut rawh.." tih pahin Choka lamah a tlan phei a, Manosh buaipui a ngai bawk si, mikhual pindan lam pan ta lo chuan Manosh ka hnaih phei ruak a, inhnung lam kawngkhar a rawn inhawng ve chiah bawk.

Hnamdang tih hriat ngawih ngawih pahnih hi an rawn lut a, kei leh Manosh lo awmna lam rawn pan pah hian, "Kan duh ang zât pawisa min pêk loh chuan in nunna khan a tuar ang?" Palian zawk chuan a ti ta a, keimah min thah tuma Samuel rawn tirh emaw ka ti hman tawh a, chutiang ni lovin helai hmuna mi rawk chíng lek chu niin! Ka hlauh dan a nêp ta deuh.

Manosh ṭawng tuma âng zuau chu ka mitmei vat a, Vangsangi a la reh ṭhiap.

Chu mite pahnih hmachhawn zawng chuan ka ding a, "Eng zât nge in duh?" Tiin dam thlap hian ka zawt a, a tê zawk chu a nui huk a, "Duh zât kan nei lo, in neih ang ang rawn phawrh rawh," a ti a, ka kut veilam phar chung hian, "Min en la, tunah hian engmah ka kawl lo, kan room-ah ka dah a, min lo nghak ula ka pe ang che u," tiin hlauthawng duh miah lo hian ka nui lui ngial a, hetiang hi chu a thleng ve fo.

Mi that tak tak turin an huaisen lova, pawisa erawh an duh hle thung.

"Rang takin va la rawh, phakar chhuah i tum vaih chuan i thi ang," Paliana zawk chuan a ti a, Jeho leh Bartho awm loh veleh an lokal hi thil inhmu remsa a ni, a hma aṭang tawhin he in hi an thlithlai reng tih a hriat mai.

Ka dinna aṭanga pensawnin a tê zawk chu ka hûi zeuh a, "I duh chuan min lo zui rawh, pawisa ka pe che u anga in kal ang tiraw, min tina dawn lo tiraw?" ka la ti zel a, a lo bu nghat nghat. 

Nizana kan riahna mikhual pindan lamah khan chu pa chuan min zui lût ta a, silai an nei a, mahse, ani hian a keng lo, chemte chauh a nia a ken. Paliana zawk khan Pistol chu a hum ngei mai a, â..Vansangkimi pawh chu khawiah nge maw a va bibo ni! 

"Khatah khan ding la, ka'n la lawk ang e," tiin khumah ka lawn a, Jeho lukham hnuai ka zen ta a, ka rin dan a dik chiah. Tukina ka kaihthawh lai khan Pistol-in min tin a, keimah ka ni tih a hriat veleh lukham hnuaiah a rawlh lût tih ka hria, Buatsaiha thlah tura an kal khan Raguela a pawm a, a pâi lo tlata ka hriat vang a ni.

Ka ring sual lo ve.

Pistol chu ka phawrh chhuak a, inherin chu pa chu ka tin ve hmiah, "Pawisa kan nei lo, kan neih chhun chu hei hi a ni, i ngam chuan che rawh le," tiin a mitah chiang takin ka en a, a ṭi dui mai.

A ṭûl a nih leh ka hmet puak mai ang.

Jehomalsawmkima nupui ni tur chuan huaisen a ngai a, chhel a ngai bawk tih min hrilh a, ka sahimna tur a nih phawt chuan eng nge ka hlauh bîk ang le?

Chupa hlauhlawp hmel chu a khawngaihthlâk zawk, mikhual pindan aṭangin kan inchhawm chhuak ta a, paliana'n keini pahnih min lo hmuh veleh a meng phar âwk a, "I ṭhianpa hi a thih i duh loh chuan i thil ken kha chhuatah paih rawh," ka ti chang fak a, ka âw a khur ang tih ka hlau kher mai.

Vansangkimi ka ko a, Choka lam aṭangin chawhmeh channa chemte keng chung hian a rawn chhuak a, ka nui teuh kher mai. Pistol hûm chunga ka lo ding a hmuh chuan a mitmeng a danglam nghal vek, "U Ngurthan.." a ti sap a.

"Bartho emaw Jeho pawh ni se tunah rang takin call rawh, hmanhmawhin," tih chiah ka sawi. 

Paliana pawhin ka ti mai mai lo tih a hria a ni ang, a Pistol ken lai a dah thla ruai ruai a, chêt leh dan tur a dap ru reng tih a mitmengah a hriat vek, anni ang hi chu pawisak nei lo ang hian lang ṭhin mah se, thih an hlau lutuk tlat.

A tê zawk tukkhumah ka nawr det a, Manosh pawh a rawn ding chhuak a, eng mah sawi lo hian Vansangkimi nen paliana chu an hnungkhirh ta a, chutih lai tak chuan motor thawm a rawn awm a, khua a thim  ṭan tawh, hmanhmawh lutukin Jeho a rawn tlan lut a, keiniho min han hmu phut chu a ding chawt, a mal tê têin min en chhuak vek ti ila a dik ber ang. 

"Ngurthan..." a ti zawi sup a.

Bartho leh Raguel an rawn inzui lut bawk a, a hnu leh chu sawi thui tur a awm lo. Mipa pahnihte an che chhuak a, ka Pistol ken lai min chhuhsak a tum laia Jeho mitmeng kha a ngainatawm loh, min hua a ang zawk mah.

Misual pahnih chu an phuar hlawm a, Bartho leh Jeho in Police station lamah an hruai ta a, kei leh Vansangin Manosh hliam kan buaipui a, chemtea vit an ni a, a thûk phian avangin hospitala hruai ka rawt ta a, mahse, a lo duh awzawng lo.

"Madam, ka ṭha tawh..." a ti deuh tlat a, ka nawr lui duh ta lo. A na tuartuin an duh miau loh chuan tih theih va awm suh, keimah tak pawh hi ka ni hûih a, ka thluak a nu leh but zel. Dr.Ngurthantluangi kha nitin a bo zel zawng a nih hi.

"U Ngurthan, khawi ami nge Pistol kha?" Rinhlelhna mitmenga min en chungin Vansangkimin min zawt ta chiah a, ka ngawi reng.

"Mawh, khawi ami nge? Ka u nen dan phal loh thil inti dun em ni, chuvang a ni maw helaiah i rawn tlânchhiat?" Tiin min zawt sek sek a, ka lo nui ringawt.

"Eng thil ṭha lo mah ka ti lo, ka nunphung pangngaiah tlanchhiat ngai khawpa thil sual lian tham lah ka ti hek lo, kan himna tur ka ngaihtuah mai a ni." Tiin ka chhâng a.

"Tu chiah nge i nih?" Tiin a ding hliai a, kâwng dawm chung hian zâm miah lovin min en kar a, "Naupai chunga helai thleng thleng i rawn kal dan te, keini chhungkua hian buaina kan duh lo, eng buaina maha inrawlh kan duh lo a nia," tiin min vin khà khá a, min ringhlel hle tih a hriat mai.

Ka la ngawih reng avang chuan, "Buaina tlansanin zankhat in rawn riak dêk dêk a, buaina dangin min nangching leh a, helaiah awm lo ula chuan khatiang thil kha kan tawk lovang, doctor i ni chiah em, nge, ka û hi bumin midang thurualpui i nei zawk?" A ti leh hmarh hmarh a, ka thin a rim ve lek lek.

Mahse, Jeho lo thlen hma chuan thiamthu sawi ka tum lo a, ani pawh khan a Pistol ka lo hûm kha a lungawipui chiah lo tih ka hre thei, hun rei lote chhung hian thil harsa ka paltlang tam lutuk tawh a, pawisak ka nei tlêm telh telh tih ka inhre ve tho.

A zawhna pakhat mah chhâng lova ka ngawih reng avang chuan, "I nihna dik tak hi ka hrechhuak tho tho ang," ti leh nghatin an room lamah a kal tau ta a. 

Kei pawh inbual turin ka lut ve ta rih. Manosh erawh chu nachhawkna ka pêk hnuah a muhil bawrh bawrh a, a hliam kha a na ve thawkhat chuan ka ring.

Bartho fapa Raguel Sainghinglova kha ka mitthlâah a châm rauh rauh a, khatiang naupang hmelṭha leh duhawm kha kei hian ka nei ve ang em aw, Tleipuii pawhin fapa tho a nei a, tluang taka ka pâi ve thei a nih chuan thla riat hnuah kei hian fa ka nei ve dawn chu a ni si a, a pa Jeho ka ngaihtuah a, ka hmabâk a êng lem lo. Ka nuṭapa nen kan unau inkâr a hla duai tawh a, ka nun hi a chêp a ni.

Bartho ṭawng ri ka hria a, mikhual room-ah a rawn lût a ni ngei ang, "Jeho, i farnu saw va bengdai ve teh, i nupui lakah a lungawi lo nasa mai si a, hetiang chuan a dik dawn lo," a ti a, Police station aṭangin an lo kîr tawh tih ka hre mai.

Jeho chuan, "Eng teh vak sawi tur ka hre bik lo, Ngurthani ka be phawt ang a, chumi hnuah ka farnu chu ni rawh se," a ti duh chauh.

Ṭawng thawm a awm tawh lova kei pawh bathrobe nen ka chhuak ve ta a, khumah bawp khawkherh chung hian Jeho a lo ṭhu a, ka chhuak min hmuh veleh, "In thlâk fel la, inbiak kan ngai aw.." a ti sup a.

"Eng thil nge ni ta?" Tiin ka haider lui ve ngat a, "Inthlâk phawt mai teh.." a ti leh a, ngawirengin a sawi ang chuan ka che mial mial a, he mite unau hian eng nge an hriat ni.

Ka inpeih veleh khumah ka ṭhu ve a, Jeho lam hawiin, "Ka lakah lungawi lohna i nei em ni?" Tia ka zawh chuan nelawm vak lo hian min en a, "Khawi aṭangin nge kha Pistol kha i lâk, eng rilru puin nge i khawih reng reng?" Tiin min zâwt ta a, a va ho si e.

"I lukham ami maw le.." ka lo ti hmak a.

"Vawikhat mah i kut hmawr pawhin khawih tawh suh ang che, hmeichhia i ni a, naupai lai i ni bawk, i himna duhin hei leh chen hi ka hruaiin ka vêng che a ni lawm ni?" A ti nghut a.

"Jeho, i hrethiam lo a nih kha.." ka ti sap a.

"Eng chu nge ka hriat thiam ang a, ka nupui leh ka farnu ka chhuahsan che u a, kan lo lêt leh meuh chuan ka nupui Dr.Ngurthantluangi'n ka Pistol dah ṭhat a lo la chhuak a, tual thah inpeih atin i lo awm lehnghal a nia," ti hmuk hmukin lawm lo tih hriat ngawih ngawih hian a ding chhuak a, "Engtin nge khatah khan a awm tih pawh i hriat zawk ni?" A ti leh sup a, a ngaihdan ni lo lutuk hmel avang chuan ka inthiam lo ru hle.

"A nih kha mite pahnih kha vau lovin an duh angin ka chêt tîr ang maw, anmahni zawk khan min that se i duh em ni? Manosha'n hliam a tuar tawh a, in hnung lam kawngkhar aṭanga an rawn luh hnu khan eng mah ti lovin ka lo ding mai mai ang maw.." ka lo ti ve si.

"Ṭawng thei lutuk suh, ka farnu pawh i khawsak phung avangin a lungawi lova a lawm lo, a chhan chu buaina duh mi an ni lova, Vansangi ang khan i biru thei mai lo em ni? Pawisa an duh a, he in chhungah hian pawisa an duh ang zat lâk tur a awm lo tih an hriat theih nan an duh anga chêt tîr mai tur alawm, fing awm tê si hi i â leh tlat zel..." min ti êrh a, ka thin a rim ve hle.

"An duh anga chêt tîr ai chuan ka thih thleng pawhin ka bei mai ang," tiin khum ka thawhsan ve a, kut kuangkuaha ding chungin Jeho ka melh chho a, "Ka dam theih nan, nungdama ka awm theih nana nang hi nei che ka ni, ka duhthlanna a ni lova thih ka la duh loh vang chauha nei che ka ni," thinrim insûm taka ka ṭawng chuan a thaw hawk a, a insangmar ṭawlh ṭawlh bawk.

"Kha thil kha sawi chhuak teivet suh.." a ti hlur a.

"Ka sawi zel ang, ka nun zawng zawng a chhe vek tawh a, hremna leh vauna vawi tam ka tawrh phah a, ka in luah aṭang khan min ko chhuak lo la chuan tun hi ka thleng lovang, Jeho, hre rawh..eng mah pawisak ka nei tawh bîk lo a nia, a ṭûl a nih chuan tual pawh ka that mai ang.." tia ka sawi zawh rualin ka biang a thîp zawk a, min bêng tih ka hre ve chiah.

"Lehlam pawh hi beng leh law law rawh.." mittui tling pam chunga tiin a hmaah tak ka va ding a, "Ka nunah hian eng mah thlâkhlelh ka nei lo, dam chhan ka nei lo tih ka sawi tawh kha, hmangaihtu ka nei lova min hmangaihtu ka û Vanlalṭana nise ka lak aṭangin i pawt hrang tawh bawk, duh tawk tawh rawh, kei chuan ka duh tawk ta e.." tih pahin, khum sir dawhkan chunga ka bag dah chu ka ban vat a, rang lutuka petek chhuakin Bartho Saingurpuia te in chu ka tlan chhuahsan ta a a. 

Jorhat-ah hian vâkvai dawn pawh ni ila pawi tihna pakhat mah ka nei tawh lo. 

Pan lam tur hre lovin ka hmalamah ngîl takin ka kal mawp mawp a, min umzuitu an awm nge awm lo tih en tur pawhin hnunglam ka hawi hek lo.

Ka nun buaichuar ru lutuk chingfel tur tal pawh hian hmun fianriala ka awm a ngai a ni.

Ka kal zel a, ka hah bâkah ka lû a hai chhalh bawk.

Han ngaihtuah ve mah teh u. Thlakhat liam ta khan Rinnunga'n damdawiin min hrâi a, kha vang khan thlakhat dâwn keimaha khunghran ka ni a, chutah nau thlakhat leh kâr hniha upa ka pâi tih hriat chhuah a ni leh a; chu pawh min enchhin tumna avangin titla tura hrilh ka ni.

Chu mai a la ni lo, ka hna ka chân a, nizan maiah beih ka tawk leh a, vawiinah khatiang thil kha ka tawng leh bawk si. Mahni inkhawngaihna avangin ka biangah mittui a luang a, ka khaw hmuh a fiah lo ruai a, ka dinhmun chhiat zia hi sawi ngaihna ka hre lo.

Vansangkimi bula chen te chu khawilamah, kei tih loh an inṭan fai vek a, ka pasal ngei pawhin ka inven venaah min kamkhatin kut min thlâk leh a nia. Nêp taka awma ṭap tur ka ni lo. Ka ṭap tawh tur a ni lo asin.

Khua a thim fel tawh a, kawngsira thingbuk ding tlar ṭhât hnuaiah chuan ka châwl ta rih. Ka phone lah chu vawi tam a ri tawh a, ka ngaihsak nguar ang; mahni inthah êm chu ka duh lova ka huaisen tawk hek lo; mahse, heti ringawta dam ve ai chuan thi ila ka tan a nuam zawkin ka ring. 

Ka sana bun lai ka biha zan dar 7 a ri chiah, ka ril a ṭâm a, chutih rualin ka luak a chhuak tel bawk a, ka phone phawrh chhuakin ka bih ve a, 25 missed call a lo awm hem mai. Jeho hnen aṭangin vawi 20, a bâk chu number hran ve ve a ni.

Ka en reng laiin a rawn ri leh a, Jeho number a nih loh avangin ka pick ve hrâm.

"Ngurthan, khawilaiah chiah nge i awm?" rawn titu chu Bartho a ni.

"Ka hre lo.." ka ti mawl tawp a.

"I awmna lai velah eng thil nge i hmuh?" Tia min zawh leh chuan ka hawi kual a, "Thingbuk tawi tê tê.." tia ka sawi lai chuan, "Aw le, aw le...ka hria e, hmun dangah lo kalsawn suh aw.." tih leh phone dah a rual a, ka ṭhu leh ta a, thosi a tam ropui si.

Jeho leh Vansangkimi ka huatna a inchen reng. Vawiina misual pahnih kha khatiang khan lo ti lo ila chuan kan chungah eng nge thleng ang tih hriat phâk a ni lo.

Minute rei lote hnuah motor thawm a lo ri a, a rawn êng phei pap a, ka zawnah chiah a rawn ding ta a. 

Jeho aw ka hre zui nghal.

"Ngurthan..." tih pahin ka bulah a lo ding a, ka dâk chhuak eih lo.

"Lokal rawh, haw ang.." a ti hmuk a, ka la che chhuak duh chuang lova, Bartho zawkin, "Jeho, motor-ah va lut la, innu hi chu ka lo buaipui ang e," a tih chuan Jeho a rum dut a, ka bulah a la ding reng tho.

"Helai hmuna awm ngawt chu a ṭha lo a nia, misual an tam si a, i tan a him lo," tihpahin min rawn ban a, Bartho kutah ka lo vuan vat, Laljehomalsawmkima hi en pawh ka en peih mai mai lo.

Ngawi rengin in lam panin kan tlan a, inchhunga kan luh hnuah pawh biak hman lêk lohvin mikhual pindan ka pan nghal a, chhunglamah ka kalh hmak. Khumah ka bawk thlawpa ka ṭap chhuak ta nge nge e, 'Ka ṭap lovang' ti mah ila, a chhuah miau te chuan ka insum thei bik si lo.

Ka inhnit hlawp hlawp a, ka chauh hnêp thlengin ka ṭap a ni ber. 

"Ngurthan, kawngkhar hi lo hawng teh.." Jeho aw ka hriat rualin ka ṭap uar sauh a, ka ṭah nasat tawh êm avangin ka hrawkah min hnawh a, ka thaw a sak telh telh bawk. Boruak khamkhawp hmu lo ang maiin ka thaw a dik lova, ka thawm hriat a zawi telh telh bawk. 

Ni e, harhchhuak tawh lo turin thi law law ila, ka nu leh pa hnen ka thleng dawn asin. Boruak hîp tumin vawikhat ka thaw leh kâwk a, ka ral riai riai nimaiin ka hria.

"Bartho, dîm deuh rawh,"

"Ni lo, a mar a la awm.." 

"Hospital kal turin insiam rawh u.." ṭawng thawm a ri nawk nawk a, vawikhat ka thaw kâwk a, boruak hîp tumin ka insangmar leh a.

"Mate, Ngurthantluang..." Jeho hlauthawng aw ri pawh ka hre ta, men chhuah ka tuma ka mit vun a chhah lûk.

Vansangkimin ṭap ṭiau chung hian, "Keimah vang vek a ni, Mam, ka thiam loh a ni," a tih mêk laiin ka meng chhuak ta a.

Bartho hmel ka hmu hmasa ber a, chiâi hmel a pu. Ka pasal hmêl ka en leh a, a mitmeng a dul ruih a, a mit a hnâwng chap. A tawp berah Raguela paw chungin Vansangkimi a lo ṭap a, ka la thi ta lo fo chu a nih hi.

"Jeho..." tiin ka phun sap a.

"Min va ti hlauthawng êm êm ve," tih pahin ka kut a vawnna a hmer nghet sauh a, "Thih ka duh.." ka ti leh a, a rúm nghut ringawt.

Ka harh chian tâk deuh hnuah Bartho te nupa an chhuak ta rih a, chu pawh an fapa a ṭah vang a ni.

Khumah ka la mu reng a, ka zawi ngawih ngawih a, Jeho kun ngur chu biak hmasak pawh ka tum bik lo. 

"Ka hmuh phâk lohvah i himna turin ka hruai che a, i him chuang si lo, ka hlata awm tur atan ka phal lo che a, nang ka chân che âi chuan ka patea nen hmelma kan ni kumkhua mai ang," nghet cherh chawrha tiin Lajeho chuan ka kut a la vuan reng a, ka la ṭawng lo reng reng.

"Ngurthan?" Tia min koh chuan meng hniam raih chung hian ka melh a, "I thi lovang tih min tiam rawh, ka sawi awmzia chu nang hian mahni intihlum turin thutlûkna i siam lovang tih min hrilh rawh," a ti zawi ruih a.

Zâwite hian, "Dam chhan ka nei lo.." ka lo ti a.

"Kha i pum chhunga naute leh Laljehomalsawmkima i pasal hi i damchhante chu kan ni, rilru nêp deuh pu tawh ngai suh ang che.." a ti a, a thinrim leh ringawt em maw ni?

"Min vín vak vak zel suh.." tih chiah ka sawi.

Zaidam deuh zawk hian, "Vawiina i chêt dan Manosh hnen aṭangin ka lo hre tawh a, keima thiam loh a ni, ka thiam miah lo," tiin ani leh ni lo angin a inthiam lo tih a hriat hliah hliah.

"Pistol hum tura min duh loh chuan paih ang che, tharum leh inkahna tel lo pawhin boruak ṭha lo hi a siam ṭhat theih asin.." ka tih chuan, "Eng tik lai aṭang khan nge mahni sahimna tura tualthah duhna rilru i lo put tâk?" Tiin za lo zet hian a nui chhuak hawk a.

"Blackmail hmanga duhthlanna min siam tîrtu leh court hmaa ka pasal lo ni ta, Jehomalsawmkima'n tharum hmanga ka taksa a neih zan aṭang khan.." ka'n ti chiah chu, za zetin a nui ta hawk hawk a, "Ngurthantluang leh..." tiin a la nui reng a, "Ka fâwp hrep dawn che mawni le, i lo va huaisen ta em em ve!" tih pahin khumah a rawn lawn a, hetiang em ema a nui nasa lai hi ka la hmu ngai lo. Thil mak a ni, eng ber nge a nuih lah ka hre dêr lo lehnghal.

"Jeho.." hrilhhai deuhin ka ti sap a.

"Kan doctor hian inzaina chemte kalsanin Pistol hum a tum ta mai em ni, ni lul suh se.." a ti ta a, ka va ngei mai mai e.

"I chhia a nih chu.." ka lo ti hlar a. 

Ka kawr hâk lai hlimin, ka pum puar miah lo chu a thlêk vung vung a, "I pum chhunga mi hian nunna thar a nei a, i pasal hian nunna ka pe thei lo che, mahse, venghim tur che chuan chêt ka la thei, khawi hmunah mah i awm lovang, i awmna tur chu hetah, keimahah hian a ni," ti sup chung hian a thin záwn a khawih a, "Thisena inremna chuan thisen a keng tel ṭhin, kan fa lo la piang tur pawh hi thisen far lovin a piang chhuak dawn lo," tih pahin a rawn kun hniam a, ka pum leh a hmui sîk tîrin, a mit thim raih chuan min rawn en a, phatsanna mitmeng a ni lo, thutiam a keng tel zawk.

"Ka patea rilru hneh turin ṭan ka la ang, chhungkua ka din a phal lo a, a phal loh ngei chu kei hian ka su lui dawn a ni, han awm dam deuh la, i inluahah khan kan khawsa tawh ang, thla thum chhunga inchinfel ka tum ang a, chumi hnuah Mizoramah awm hmun kan bengbel dawn nia," a ti ta a.

"Inṭhen zawk mai ila, i phuba lâkna tur daltu nih ka duh lo," ka lo tih chuan ka mitah tak min en a, "Inṭhen lam kha chu theihnghilh rawh, a thleng dawn lo, i ban phâkah a la awm lo tlat," tiin a kiai suk a.

"Hetah hian ka awm a ngai dawn lo tiraw?" Tiin ka zawt leh a.

"Dawn lo, ka kiangah, ka hnaihah zel i awm tawh ang, vawiina i chêt dan aṭang khan ngaihtuahawm i ni tawh hleinem, hnunglam aṭanga min beitute lakah inven a har a, kan hmalam aṭanga min bei a nih chuan keini pahnih hi kan inveng tawn thei a ni," tia min rinna a tih lanna chuan ka chhungril a tilawm hle.

A laka ka thinrimna te pawh vawmbo ang duak a ni ta. Mahse, Jeho nihna dik tak leh a thil tum ber erawh ka la hre ta chuang lo.

"I ei tur ka siam hmain vawikhat chiah ka fawp ang che," tia a sawi zawh rualin a rawn kun hniam nghal a, vawikhat chiah tak tak min fawp, a inla hrang leh thuai a.

"Zanin tlai ang khan min tihrehawm tawh suh aw doctor?" Tih pahin khum a thawhsan a, "Kut min thlâk leh chuan ka rawn thaw chhuak tawh lovang," ka'n tiah. A nui duh dêr lo lehnghal.

"Ka farnu lakah pawh thinrim suh aw, a inthiam lo lutuka khatia i awm leh lek phei kha chuan hrehawm a ti teh a nia, nang chu hmeichhe rilru puitling leh paukhauh tak i ni a, a entawn theih turin awm la ka duh khawp mai," a farnu thlavang hauh zetin a la ṭawng hrâm. 

"Aw le.." ka ti hmak a.

"Naktuk zan aṭang chuan kan pahnih chiahin khawvel kan hmachhawn tawh ang, midang an tel thiang lova, kan inkârah thuruk a awm tur a ni lo, kei pawhin i lakah zêp neih ka tum lo a, a chin chhuakin kan inhrilh vek tur a ni, kan secret code kha 24-89 a ni a, i thinlung khan hre rawh se, hmaichhana ka hrilh kherna chhan che chu midang hriat ve loh tur a nih vang a ni." Ti leh duahin kawngkhar panin a phei ta a.

Kan nupa Secret code chu 24-89!?

300323

-B®®

B+>[BeckirafARenthleI]<+®®