9.24-89 [A Becky Rafa Story]

9.24-89 

Ziaktu: Becky Rafa Renthlei

[Recap]

"Naktuk zan aṭang chuan kan pahnih chiahin khawvel kan hmachhawn tawh ang, midang an tel thiang lova, kan inkârah thuruk a awm tur a ni lo, kei pawhinni lakah zêp neih ka tum lo a, a chin chhuakin kan inhrilh vek tur a ni, kan secret code kha 24-89 a ni a, i thinlung khan hre rawh se, hmaichhana ka hrilh kherna chhan che chu midang hriat ve loh tur a nih vang a ni." Ti leh duahin kawngkhar panin a phei ta a.

Kan nupa Secret code chu 24-89?

-B®®

Bartho Saingurpuia pawh Kolkata panin a chhuak ta a, nizana ka thâwk dan a buai chhung khan a lo mangang hle a ni awm e, Vansangkimi pawh a lo kamkhat hman a, "Nang chu i kum a la nau a, Ngurthani hian i unaupa a thlâwp ṭha hle zawk a lawm ta che, i ṭawngkhum dan a mawi lo em mai, doctor dik tak a ni a, General Surgeon a ni bawk, eng vanga a hna hi bansan nge a nih hriat chhuah tum ve rawh, awm hmun aṭanga duh duh sawi loh tur," a lo ti a ni awm e.

Jorhat-ah nikhat leh zankhat kan la châm dawn a, ka nawmsam loh êm avangin ka tho chhuak ve peih meuh lo. Ka rin phâk bâkin Jeho a felin min ngaihtuah a, incheck up ve hrim hrim ṭhaa a hriat vangin Town Clinic-ah min hruai ta a.

"Tun aṭanga hetiang i nih chuan a ṭha dawn lo, doctor ve si i inngaihthah lutuk a, i hriselna hi ngaipawimawh rawh," tiin hmeichhe lam doctor-in min hrilh. Ka dinhmun hian a zir lo vê a ni. Min hriatpui si lo.

Naute a ṭhat thu a sawi a, Jeho hnenah ve thung chuan, "I nupui hian rilru hahdam a mamawh a, amah shock thei thil lakah fimkhurpui ang che, thla thum chhung tal chu khumah muin hahdam rawh se aw," tiin a hrilh a, a lo bu nghut nghut. Ka Bp a hniam viau lehnghal.

Damdawi min chawh ve hlek a, thil danglam a thleng a nih loh chuan thla thum hnua incheck-up leh turin min hrilh a, min admit a tum deuh naa ka duh tlat loh avangin kan haw ta mai.

"I hriselna a ṭha viau khan ka hre si a, naupai i hua nge, i hriselna hi a lo pan ve hrim hrim zawk? Tia Jeho min zawhna chu eng danga chhâng lo hian, "Ka tawn hma che kha chuan ka hrisel ve riau, ka nuna i lo lan hnu aṭang hian ka dam thei lo a nih hi," ka lo ti hmak a, a nui ṭha duh miah lo.

"Ngurthantluang," ati hluk ringawt.

Vansangi pawhin min be leh bawrh bawrh tawh a, kei erawh chuan ka 'chu e kha' vak lo, thil tlem ka ei a, khumah bawk ka mu leh ta a, Manosh chungchâng Vansangi ka zawt a, "A ṭha chuan ka hria, motor a khalh thei dawn chuang lova chawlh ka pe a nih kha," a lo ti a, Bartho a awm bawk si lo, keini nupa kan haw leh si chuan an nufa chiahin an awm dawn a, a hlau lo em maw ni.

"U Ngurthan, nimina ka ṭawngkhum dan che kha pawi ka ti lutuk, kei chu ka dawih miah lo nain Silai lam chi hi ka ngaina lo a; ka lo rindan chuan ka u hriat lohvin tu emaw hnuaiah i thawk anga Pistol i kawl emaw ka ti hman tawh alawm, lo ngai haw lo la maw, tunlaiah chuan a hmei a pain sual tak tak an tam a, mi suam leh rawk tih velah sum tam tak an hûi a, hmeichhia an ni tlangpui, ka u bumin keini nufa hi min tina tur anga hriatna ka nei tlat a..." tiin a insawi fiah ta a.

"I â mai mai em mai, ka pasal nau i ni a, kha mite pahnih khan an duh an neih âi chuan tiin Jeho Pistol ka chuh a nih kha, keima duhthu rêngin vawikhat mah ka la hmet puak chhin lo, i u nen kan inneih aṭangin ka nun a ralmuang lova ka himna tur leh midang ka venhimna tur a nih chuan eng pawh ka huam, doctor ka nih angin mi nunna chhanhim hi ka mawhphurhna a ni," ka ti ve duah a, "In nufa emaw in driver kha tih nat tum ta se chuan Pistol ka hmet puak mahna.." ka la ti zel a, a nui hak.

Khumah ka la mu reng a, zanin chiah hetah kan riak tawh dawn tih Jeho khan a sawi a, a tum ang reng renga thil a kal thei lo chu pawi a tih thu a sawi. Kei lahin nau ka lo pai hman si a, mipa a nih ang leh a nupui ka nih angin a mawhphurhnaah min dah lo thei si lo. A tan pawh a buaithlâk vein ka ring ṭhin.

"I zia deuh em?" Tiin bathroom aṭanga a rawn chhuah veleh min zawt a, nui chung hian, "Ka nêp ngawt mai, buaipui ngai nih hi ka duh lo asin maw le," ka lo ti teh daih a. Nui suk chung hian, "Ka nupui hian huaisen leh tawrhchhel a zir mêk zawk a ni," a ti a, boxer chiah a inbel a, min hnungchhawn zawnga ding a ni a, kan inneih hlimtea an kahna kha a lo ser raih a, a ser nung deuh a ni maithei. Keiman ka zai ta kha a ni a.

"Jeho, hetah lokal teh.." ka tih chuan muangchânga rawn inherin min rawn pan ta a, zaizirin khuma ṭhu turin ka hrilh a, a ṭhu ve mai bawk a.

"Hei hi a la na em?" Tih pahin an kahna ser chu ka kutin ka rin kual a, a lo ṭang mar nasa mai. "A na elaw?" tia ka zawh leh chuan, "Na lo e, i kuta min tawhna zawk kha a ni," a tih veleh rang lutukin ka kut ka lasawn a, a nui hawk.

Ka kutah a rawn chelh a, a âwm zawnah nem betin, "Pawnlam hliam hi chu a dam thei, mahse, thinlung nâ erawh a dam har thung," tiin a thin zawnah rei fê ka kut a nem bet a, ka mitah min en ngun hle bawk. Hetiang êm êma a thutak lai hi ka la hmu ngai lo.

Chutah rawn kun hniamin, "Kan inremna kha tun atan mai a ni lo a, thihna ata nunna a ni tih kan hriat dun kha aw, Ngurthan, i pum chhunga mi kha nunna chu a nih kha, thihnain a chîm pil tur a ni lo," tia a sawi zawh rualin ka kut a vawnna a thlah a, ka biangah a kut pahniha vuanin a lo kun hniam leh zual a, a hmaa a mitmeng nunrawnna leh hriam hrûk ṭhin kha hmuh tur a awm lo, a thim mâk a, ngaihsakna, khawngaihna niawm tak ka hmu tel, "Ka Ngurthantluangi i ni zel ang," ti lehin min rawn fâwp ta a.

Min fawhna a dam thlap a, a hmui chhah tap leh hnawng chap chu ka fawp let ve ta. Nidanga min fawh dan nen a dang daih, a danglamna erawh ka sawi fiah thiam si lo, ka âwmbâwr, ka taksa pengtin a kutin a dap kual a, min tawhna apiang a lum ham ham zel a, "I damlo si a, ka duh hi ka ti thei ang em? Tia min ngaichângin min zawt a, ka lo bu nghat.

Khumah a rawn lâwn a, ka puansin lai hlimin ka mutkawr inbel min phelhsak a, ka lu lamah a phih chhuak daih, a hmanhmawh duh chuang der lo. Kei erawh amah thlâkhlelhna avangin ka lo che sek a, "Ka hmuh tirh phat aṭang che khan ka ta tur i ni tih ka hria, ka neih theih loh tur ka awt ngai lova neih ṭâlh pawh ka tum buai duh lo, nang erawh chu ka ban phâk leh ka hnaih ngam tur hmeichhia i ni.." tiin ka mal leh khêl bâwr a chûl a, ka lo thaw hak.

"I duh sawi ngam lo tur khawpa hmeichhe nêp i ni lo aw, i inpeih chuan i pasal hi min sâwm thei ang," a ti zawi ruih a, ka va han zak tak.

A mitmeng phi chiai, ruih nei ni hauh si lo leh kei min thlâkhlelhna avanga a danglamna chuan ka chhungrilah phurna namen lo a siam a, ka zahna dah ṭhain a kawng hnuai lamah ka kut ka dah thla a, "Jeho..." ka ti fân raih.

"Ka hmingpum ngeiin le.." a la ti zui.

"Laljehomalsawmkim..." tia a hming ka lam zawh rualin mipa a nihna a nemnghet ta. Ka meng ralh a, maimitchhin ka tum leh a, a phal îkhaw lo, "Ka mitah aw...doctor..ka mitah en rawh.." thâm supa tiin a che zawm zel a, damlo ni-a inhria kha ka dam a, ka pawnlam lang theiah hliam ka nei lo miau alawm, ka chhungril a dam chuan ka taksa a dam a ni mai.

A hnungzâng thlan dap chu ka chûl a, hmun khat mai ni lovah ser a nei bawk. A chalsam rawn uai thla hûi kiansak pahin, "Nakinah ka la chhâwk ve ang che," ka ti a. A nui suk suk duh chauh.

Min kuah chungin a thaw hawk hawk a, nupa nih hlutna chu hei ngei hi a ni. Thinlung inhmu tak leh inremna nena tisa nawmna inpek tawn hian chhungril nun a hlim a, ka pasal ṭawngtam lo leh hmeichhe tihlawm nâna ṭawngkam thlum hmang thiam lo tak hian; ṭawngkâ ni lo chêtziain ka hlimna tur min siam si, ka Laljeho kha a ni miau alawm. Mipa dangdai leh mi hneh theihna riau neitu ngei kha.

Ka lo muhil daih chu niin!

"Le, inbual ila kan chhuah a hun dawn a nia," tiin ka hmai bul sêtah min rawn ko a.

Peih lo zeta ka men chhuah chuan Raguel pawmin kan khum bulah a lo ding a, a la inbual bîk lo a ni ngei ang. "Zanin chiah riak leh ila.." ham bâi bâi chungin ka lo ti a. 

"A theih tlat tawh lo, tih turin min hmuak nasa lutuk tawha ka khawtlai thei lo, hrethiam rawh aw.." a ti dam thlup.

Vangsangkimin Raguel a rawn koh tak avangin Jeho pawh a chhuak zui veleh mai a, muangchânga tho chhuakin bathrobe nen inbual turin ka lut ta a, "Ka lo lut ve dawn," tiin Jeho chuan kawngkhar a rawn kik dawt dawt a, ka zak leh tawh. Ka ning, ngaiah ka nei thei lo a ni ber.

"Ka zo ṭêp..." tiin dawt ka sawi a, a nui nasa ngang mai.

"Ngurthan, tui pawhin i la inleih lo aw.." a ti a, kawngkhar ka hawng ta nge nge e.

Towel nen a rawn lut chawpchilh ve a, "Minute thum chhung hian i inbual zo dawn lo tih ka hria alawm," tiin shower a on zui zat. 

Tui vawtin min rawn phuh chuan ka râk hlut a, ka lu min suksak hnuah ka taksaah Gel a hnawih phuan buah a, "Hnunglam en lovin hmalam chauh kan thlir ang, entirnan.." tih pahin amah hmachhawn zawngin min kuaihera ka biang a sa pup pup nimaiin ka hria.

"Zak mah ta che, i hnunglam leh ka hnunglamah hian kan lawmna tur leh kan hlimna tur a awm lo, kan hmalam zêl zawkah hian a ni a awm ni?" Tia min hrilh chuan sawi tum pahnih a nei, ka hrethiam ve ve bawk.

"Jeho..." ka lo ti hliai a.

"Ka sawi dik tiraw, min hnungchhawn apiangin engkim hi a ho ṭhin, keiin ka hmalam thlir mahila i hnunglam chauh ka hmuh si chuan eng mah lo mai a ni a, kan hmalam ve ve aw," tia a sawi zawh rualin min kuah a, tui vawtin min phuh mah se, a lum huam tho. A taksa lumna ka tem apiangin keimahah eng emaw danglam a awm ziah. 

Ni e, kan tan a hun, a hmun a awm ve lo. Pawngsual tâwk tur pawhin a hmun a thliar loh kha maw le. Jorhat-a a farnu te bathroom-ah kan che chhuak leh ta nge nge a. Ka tân thil thar a ni a, ani pawh a lungawi tih ka hria.

Ka Laljeho kiangah hi chuan saruakin awm fo mah ila, ka zah lohna turin min hliahkhuh zêl tho.

Nautê chu ka ni hauh lo. Mahse, dimdawih takin min pawm chhuak a, ka lâi hi a ni tawp, a zei huam lova min duat thiam dan danin a che chhuak ti ila a dik ber ang.

"Keimahin ka inthlâk ve thei reng a nia..." inthlahrung ru deuhin ka ti a.

"I nupui hi duat hle rawh, doctor-in a tih kha aw.." a'n ti ve ngei a(h). 

Kan inpeih vel chiah tihah a farnu Vansangi a rawn lut a, "Bartho lo haw hma chauh te chu kan bulah hahdam ve sela maw le, i rilru i thlâk thut thut zêl a.." tiin a u a bia a.

"Nang pawh fimkhur ang che, ka thisen zawmte an nat hian ka na tel ṭhin, i pasal bia la, nangmah riahpuitu tur tu emaw zawng rawh se, nge, keiman inpa chu ka hrilh zawk dawn?" A lo ti daih a.

"In awm loh chuan midang ka sâwm ang ka lo ti rilru hrim hrim a, dâr engzatah nge in chhuah dawn?" Tiin min zawt a, ka hriat ve loh avangin Jeho ka melh a, "Zanriah eikhamah law law ni rawh se, duh leh kan ei hma deuh mai ang," a ti awlsam leh mai.

"Tleipuii te inneih hun tur kha ka lo hrilh dawn che u nia, in lokal ka beisei aw," tiin Jeho chu a nau bulah a va ding a, "Nang leh kei hi kan pa a thuhmun a, Tleipuii leh kei kan nu a thuhmun thung, chutiang ni mah se ka en dan a hrang lo che u a, ka nau te ve ve in ni," tiin a kuah a, an han din dun tâkah phei chuan inanna an ngah riau. Samuel Pamei fate ve ve chu an ni si a, engtikah tak hrechhuak ang maw.

Ka phone a rawn ri a, ka en vat a, number lâwng ringawt, vawikhat a ring ral hnuah a rawn ri leh a, Jehoa'n chhâng tura min mitmei avangin ka pick ta a, loudspeaker-ah ka dah nghal bawk, chu pawh ka pasalin zaizira ti tura min hrilh vang a ni.

"Ngurthan, Jehomalsawmkima khawiah nge?" rawn titu chu ka hriat ṭhan áw a ni tlat lo.

"Tu nge aw..?" tiin ka zâwt dam thlap a.

"I pasal i bulah a awm nge awm lo, Bamos Farm lam aṭangin a ni a, amah kan biak tlang theih loh avangin a nupui kan rawn bia che," a ti leh a, a aw a dam vei fu. Ka number te engtin nge an neih theih zawk.

Jeho bawk ka melh leh a, a ṭawng lo hrim hrim.

"Ka pasal nen tunah kan awm dun tlat lova ka biak tlang theih veleh ka lo hrilh ang aw.." tiin dawt ka sawi leh ta.

"Naktuk zing dar 11 ah 'Raitong' hmunah meeting nangin lokal rawh se aw," a ti a, phone a off zui nghal, a ṭawng dan aṭang kha chuan a pangngai hmel viau.

"Naute, min lo chhuahsan lawk la, Ngurthani hi ka'n be lawk ang e," tiin Vansangi a kuahna a thlah a, Jeho te unau inkâr hi a ṭha hle tih a hriat mai.

"Ka thusawi tur hi ngun takin ngaithla la, i hriat rengnaah khan khung ang che," tiin ka ṭhutna lam a rawn pan a.

"Tualthahna êm thleng lo mah se, inkahna leh insual, invau, inrîkrâpna kan la tawng dawn chauh, ka nupui i nih chhung hian hmun him a awm tak tak thei lo, chuvangin, tupawhin an lo man che a nih pawhin hlauhna leh zâmna rilru nei ngai suh ang che, phone call aṭang pawhin a ni thei, tuna i awka dam thlap ang kha chhâkchhuak zel la, rîk hluai te, hlauhlawpa awm te kha tih miah loh tur a ni," tiin a thaw huai a.

Ka nghawngah a rawn kuah a, tlêmin a bân a ti chîp leh hlek a, "Hetiang anga tu emawin a vau chea silaia a tin che a nih chuan che miah suh ang che, ka hmel i hmuh hunah ka âwkâ ngaichangin 24 ka lam rîk chuan i kun hniam ang, number tlem zawk a nih vangin a hniam lamah aw, 8 ka lam chuan veilamah i thle sawn ang a, 9 chauh ka lam rik chuan dinglamah a ni tur a ni," tiin zaizirin ka lu a her sawn pah zel a, practical class la ang mai alawm maw le kan nih le. Ka ngai thutak viau lo.

Muangchâng leh uluk zawkin vawikhat a sawi chhuak leh dap a, ka ning hman lutuk, eng nge a hriat teh reng ni.

"Jeho, min tihlau a nia.." ka ti hlak a, "Eng mah hlauh tur a awm lo, thil awm thei leh kan tawn palh theih thil a ni a, ka lo hrilh lawk che a ni e, phone aṭang erawh chuan keimah ka ni tih chhinchhiahna chu 24-89 tho a ni," a la ti hrâm, a sawi thutak mai si a, ka awm a tinuam lo vek.

"Insual ka zir law law dawn em ni?" Fiamthua ka lo tih chuan a nui suk suk a, "Nanga raipuar khan tumah i sual thei lul lo ang, bâkah insual âi chuan Pistol an hmang nasa zawk, chu pawh invauna atan..." a ti ṭha ve mai.

"Pistol chu min pe la.." nui chungin ka ti leh a, ka chalah a tuk kawrh a, "Ngurthantluang, ṭawng liam mai mai suh, i doctor hmanrua kha i hman thiam viau tak kha maw le, min vih lai pawh khan..." tiin a nui huk a, ka ngei a nia.

"Malsawmkim, kut min thlâk hlek suh," tiin ka lo ṭeu hlar a, a nui nasa zual sauh. Kan inhriat tirh laite kha chuan vawikhat mah a nui hmel ka hmu ngai lo mai ni lovin a ṭawng hluk hluk a, a mitmeng a chang thei si; a râpawm hial zawk kha a nia, tunah chuan a inthlâk danglam ve hret hret tawh.

Zanriah ei tura a nauvin min koh tâk avangin kan chhuak phei a, Raguel chuan kan nupa inkâra ṭhut a ngen tlat avangin Jehoa'n a ṭhut tîr a, "Papa, in lokal leh hunah inrualin ka zin ve ang," a ti ve ngei. Jeho hi 'Papa' tiin a ko mai zel. 

"Fimkhur ula, in nun râlmuang lo tak hi kalsan dan dap hrâm rawh u, u Ngurthan, nang pawh indim hle ang che," tiin Vansangin min chah thlap a, chutih lai chuan amah riahpuitu tur, Bartho thawhpui Nubawihi a rawn lût a, "Táwli, chaw min chhum kêp em?" A rawn ti lut a, a nui ṭhâ bawk.

Ani Vansangi lah chuan, "Khatiang khan min han ko leh vaih teh, kanpa ka hrilh ang," a lo ti ve bawk a, an innêl tih a hriat hliah hliah.

Nubawihi pawhin kan rualin chaw a ei ve a, Jeho a melh zeuh zeuh a, kan Laljeho lah chuan ûksák der si lo.

Jorhat chhuahsan tura kan inpeih fel meuh chuan zan dâr ruk a ri thuak tawh a, Raguela'n Jeho a ngen vanga tlai kan ni. "Kan lo kal leh hunah kan rualin Shillong-ah i kal ve tawh dawn nia," tia a thlêm hnuah a lungawi ve hrâm a. 

Vansangin min kuah a, "Bartho ka lo bia ang a, Tleipuii te inneihah lo tel ve ngei kan tum dawn nia, i phone number pawh ka saved thlap a, chanchin kan inhrilh dawn nia," tiin Motor-a ka lut tawh chu min ko leh hrâm a, "Indim rawh aw.." tia min chah leh hnu chuan a fapa pawmin inchhungah an lut ta a.

Gurkha-a ka chuan a piang hian ka in aṭanga min hruai chhuah zan kha ka hrechhuak ve ziah zel.

Shillong leh Jorhat inkâr a hla mai si a, motor chuan leh pawh ka huphurh ngawih ngawih tawh a, ka luak a chhuak sa ringawt, Jeho ka va melh a, mûk taka thil ngaihtuah hmel a pu a, ka be buai duh rih lo, a phone lah chu a'n ri zing mai mai khawp a, mak ka tih ve mai mai chu a nuin vawikhat mah min rawn be ve miah lo hi a ni. A fapa a bia em ka hre lo naa kei chu tumah min betu an awm lo.

"Kawng a thui tham si a, a tam thei ang ber mut i tum dawn nia," tia min biak chuan, "I chau viau lo maw?" Tiin ka lo zâwt daih a, "Chau hmel ka pu em ni, ka mut a chhuah tâk leh kawng lakah kan mu mai dawn nia," a ti dam thlup.

Chumi hnu chuan inbe tawh lovin kan tlan par par a, ka u ka ngai zual kher mai. Kan inbiak tawp berna pawh a rei tawh a, ka inthiam hlawl lo; eng pawh nise, a hma anga zalen ka nih hma chuan biak loh law law ka duh tawh zâwk a, ka insûm ve hrâm hrâm a ni.

A chang leh ka muhil a, a chângin ka phu leh zawk zawk zel bawk a, Jeho lah ṭawng a tum der si lo, zunram thiar tura a din pawhin ka luak a chhuak leh ut ut tawh a, ka insûm buai peih ta lo.

Kawngsir remchângah ka luak ta bawrh bawrh a, ka zanriah ei ve te kha ka luak chhuak vek, ka pum a buai nuai nuai a ni ber.

"Mate...Ngur.." tiin Jeho chuan min rawn hnaih vat a, ka chalah a dawm a, ka luak leh ta, ka hrawk a thîp hlur tawh a, tui min pek pahin, "Kawng a la thui si a, kan chawl rih dawn em ni?" Tiin, ka chal leh hmai vel a hru thuak thuak a, ka thâ a khûr der der. Ka lo bu nghat ringawt.

"Tikhan lo awm lawk rawh aw, motor hi ka'n hung rem ang e," tiin min vawnna a thlah a, kawng sir zau lai deuhah a va dah fel hnuin a hnung seat-ah min ṭhut tîr a, amah pawh a rawn ṭhu lût nghal a, "Darkar khat vel muthilh tum ila, i zia mai ang," tih pahin a malchungah ka lu nghat turin min siamrem a, Gurkha hi chu a hnung seat a chêp vak lo. 

Jeho malchungah muin ka maimitchhing ta a, ka pumah a kut nghatin a zût a, tisa thil lam ni lovin ka pum let but but tih reh a tum tepawh a ni mahna.

"Hrehawmna ka thlen nasa hle mai che," a ti sup a, chhâng lovin a kut ka lo hûmsak vat a, "Ka hmuh hmasak berna hmun che chu Falkawnah a ni a, kum a ral tam tawh," a ti teh daih a, mak ka ti hle.

"Khami hnu khan i hming leh i thil zir te, i zirna hmun thlengin ka hre vek a, inchhungkaw chanchin pawh hriat hmaih ka nei lo, i nu boral khan nangmah hmuh che tumin Mizoramah ka rawn chhuak a, nang erawh i zirlai a laklawh vanga i haw loh thu ka hre leh ta si a, Shillong-ah ka lêt thla leh a, ka ngaihven zui tawh lo che," tiin ka kut a hum nghet sauh a.

"Super Care hospital hi ka patea ta a ni. A hnuaiah kei leh midang paruk an awm a, a neitu tak chu Samuel Pamei hi a ni a, keiin share ka nei ve bawk, JK farm hi chu ka nu ram a ni thung a, mipa awmchhun ka nih angin ka kutah awmin ka enkawl zui a, Mizorama kan in hi ka pa hming a ni veleh a, chupawh ka hmingin kan thlâk fel thuai ang, dan lo angin sum ka thawk chhuak lo a, sum thianghlim vek a ni ka lâk," tiin min hrilhfiah ta a, a hmel ka hmuh theih loh avangin dâwt a sawi nge sawi lo hriat a har. Ka ringhlel phal lo a ni mah zawk.

"Min hrilh vek kher a ngai lo a nia," ka lo ti a.

"Engkim thurûk kan inkârah a awm tawh tur a ni lo, ka ring tâwk che," a ti hmiah.

"I patea hian i pa thattu a hria em ni?" Tiin ka zawt a, chuta min chhanna chuan ka thluak ati buai vek.

"Bamos Farm neitu dik tak hian ka pa chu a that a ni. Min hrilh dan chuan tuna JK ram a duh vang hian a ni a, amah hi a awmna hmun chiah hriat a ni rih lo a, tu nge tih ka la hre thei lo, a Manager kal tlanga inbe zel kan ni a, ka pa thattu a ni ngei em tih hi finfiah a ngai a, thudik ka zawn chhuah hmasak a ngai bawk a, chumi tur atan chuan ka patea hnung ka zui ngei a ṭul bawk," tia a sawi laiin Motor tlan thawm a rawn awm a, a ngawi zui daih.

Nu Pianmawiin min hrilh dan nen ava inpersan ve aw, ka sawi ve tawp dawn nge, â...ka chau bawk si, ka ngawi leh rih zawk mai ang, sawina hun remchang ka hmuh veleh Jeho hrilh tho chu ka tum ruh hle. Thudik a hâi chhuah theih nan.

Ka chauh êm avangin ka lo muhil pek a, "Kan kal a ngai, kan piah lawkah sawn car pathum a rawn ding a, vawi hnih vel min lo en fiah tawh, i harh em?" A ti leh hnuhnawh a.

Ka harh thu ka sawi chuan, "Tikhan a hnungah khan ṭhu law law rawh aw, hmeichhia ka phur tih an hre tur a ni lo, min zui maithei a, kha hei hi la rawh.." tih pahin Pistol bawk a rawn phawrh leh ta a, "Invenna tur a nih kha," tiin dash-board aṭangin Pistol dang pakhat a phawrh chhuak bawk a, a check fel thlap.

"Min tihbuai i ring em ni, i hriat zawng an ni zawk nge?" Chau chung chungin ka lo ti ve a.

"Hre hran lo e, kan haw tur thu midang hria an awm nge awm lo tih hriat kan tum ang e," tihpahin a phone a phawrh chhuak a, "Buatsaih, Shillong panin kan lo chhuak tih tunge hria?" nelawm vak lo hian a ti a.

"Rishan bia la, farm lamah lo awm rawh se, midang pathum kha Ngurthani in luahah duty bawk se la," a ti leh zung zung a, eng chu hria ni maw. Ka lo hlauthawng ve em em ringawt.

"Jeho..." tiin ka ko teh ngawt a.

"Hlauthawng mah ta che, hahdam rawh, i kiangah ka awm alawm," a ti nain a awki a hniam ruih a, hetianga a ṭawng tawh hi chuan rilru a nuam duh viau lo.

Pawnah chhuak tawh lovin motor a tinung a, "Ka tlan chak deuh dawn a nia," tih leh tlan chhuah a rual a, ka bu dâwrh alawm maw le, mai mai chuan!

Side glass aṭangin hnunglam a melh zauh zauh reng a, car pahnihin min zui tih ka hmu ve ta. Kan inhlat viau tho nain min zui tih a hai theih loh. Car pathum kha niin ka hre si a, pahnih chiahin min zui lawi si, thil dik lo chu a awm a ni.

Ka luak lo chhuak ve sek hi ka ning, "Jeho, ka luak a chhuak lutuk, ka.." tih pahin ka uak leh pawp a, loh theih lohvin tukverhah ka dâk chhuak a, ka tui in nen lam ka luak leh puat puat a, Jeho phun hluk ri ka hria, ka insûm thei ngang si lo.

"Motor chhungah khan luak mai rawh, tukverhah dâk chhuak tawh suh," tia a sawi zawh rual chiahin a ri ṭhuai a, ka lu zâwn lawkah a rawn thâwi fua a, ka hlau ngei mai. 

Hmui hup chungin a seat lai takah ka ṭhu a, ka ṭhutna bula Pistol chu ka kut dinglamin ka hum rauh rauh, ka thin a phu naa Jeho kiangah chuan ka hlauhna a nêp deuh. 

"A laiah ṭhu suh, ṭhu hniam tal rawh," a rawn ti leh a, a sawi ang chuan thuawih takin ka ṭhu hniam vat a, min rawn kâp zui lova Jeho pawhin engtin mah a ti lo.

Dârkâr khat chuang kan tlan leh hnuah a hma aiin a tlan chak sauh a, ka luak ta em lo, ka ṭhut dan siam remin front seat leh back seat inkârah ka tawlh thla a, ka awm dan pawh a nuam ta, khua a la var lo deuh a, a vâr ve ṭêpin ka ring. Ka ke dah dan a rem loh êm avangin a mu ṭan a, a seat-ah bawk ka ṭhu leh ta a.

Ka ṭhu fel awrh tihah, a hnung dârthlalang (Dicky glass) a ri leh ṭhawt a, a rawn tlang êm lo.

"Ngurthan, dâk chhuak la, kan hnung chiaha car lo tlan saw kâp rawh," a ti ta hem mai. A vin nasa mai siah.

"Aih" ka lo ti leh tlat a.

"Hlau mah ta che, mipa nge i nih hmeichhia an hre lo tawp ang," a ti leh a.

Ni e, ka pasal thupek zawm leh a thuawih chiah hi helaia ka awm chhan chu a ni rih.

A sawi ang chuan ka dâk chhuak a, a rem leh rem loh lam ka ngaihtuah tawh lo, vawikhat ka hmet puak a, ka phu zawk bawk a, ka tlum lût nghal hmak. A hma anga tha khûr leh zâmin ka awm tawh lo hrim hrim. 

Jeho sawi vang pawh ni lovin vawikhat tal chu ka kâp leh ngei ang, min hrilh hriat kher ngai lovin kan hnunga car pâwl rawn tlan fua fua chu a keah kah fuh tumin ka tin ta a, awmze nei lova pawngpaw kah ngawt zawng a fin loh thlâk lutuk. 

A hma te kha chuan hlauh luat vangin ka ti ve tawp a, tunah chuan chutiang rilru ka pu tawh hauh lo, uluk takin ka tin a, Jeho lah a tlanchak nasa mai si a, ka mit a thip hlur thei alawm maw le. 

Mahse, anni lamin thawm an rawn neih tâk lovah chuan ka ṭhu ṭha leh ta a.

"Khua a var ṭêp, khawvar hunah chuan engkim a reh vek mai ang," tiin min thlamuan a, ka ngawi reng. Tui bottle phawrh chhuakin ka in khawlh khawlh a, ka harh ta huai mai. Kan speed a la ngai reng a, Km300 chuang tlan ngai a nih vangin atira kan muangchàn ang ngawt kha chu a ni tawh lo.

"Le, rawn insawn thla tawh rawh le.." a ti sup a, kâwl a êng ṭan a, kan hnunglama mite pawh kan hlat telh telh tih ka hmu ve reng.

Front seat-a ṭhut thlak pahin, "Zin ve chi pawh kan ni lo, beih kan tawk zel a, inkhung hlum ṭhak ila a ni mai," ka ti hlak hlak a, a nui suk suk duh chauh.

"I sawi dik, inah emaw Farm pawh ni se, inkahna hi chu a thleng khât, hmun fian rial leh puitu an awm lohna hmun apiangah inlambun te, hmelma beihte a rem a, chumi hun chu an châng zel a ni, kan haw tih hrilhtu hi a ni kan hriat chhuah ngai zawk chu," ati a, chulam reng reng ka lo ngaihtuah thleng pha lo.

Rin chhin ngaihna lah ka hre dér bawk si lo a.

Khua pawh a var fel a, kan him taah ngaiin a seat hnung ka ngheng ar ar a, Jeho erawhin muang chhin eih lovin a khalh par par a, ka muhil leh thei mial mahna tiin ka maimitchhing leh ta a.

Motor ding dat thawmah ka meng chhuak a, Sawlad-a ka in luah kawtah kan lo ding reng tawh chu niin! 

Jeho a chhuk hmasa a, hnamdang pathumin kan bungrua tlem a zawng an hlang thla a, Motor hêlin ka ṭhutna lamah a rawn kal a, kawngkhar min hawnsak thlap.

"Hawh le..." tih pahin ka inrin hman hmain min pawm nawlh a, ka in kawngkhar pawh a lo inhawng diam tawh, inchhungah min pawm lut a, "Ka kiangah chuan i him tih ka sawi kha, ka thu i awih avangin ka lawm e," a ti sup a, ka room-ah min pawm lut a, khumah dimte hian min nghat a, "Hahdam nan ni tam tak hun i nei ta, Ngurthan.." tia a sawi zawh rualin ka chalah a fawp zauh. 

A sam a thur chhap a, a mit a sen râm bawk. A chau dawn tih hriatsa a ni nachungin keimah min ngaihven hmasa zel hi ka lawmna a ni.

"Kan nau te hian eitur lo siam se la, inbual zuai i peih em?" A ti a, "Aw" tih nan ka lo bu nghat.

Chumi hnu chuan inlungrual takin kan inbual dun a, ka harh ṭha ta khawp mai, ani pawh a fai sar a, a hmel a lang dam thlup.

Rishan nen phone hmanga an inbiak zawh hnuah breakfast kan ei a, ka rin âi takin ka ei hnem. Tuna ka in luaha lo duty te hi chu ka vawikhat hmuhna vek an ni a, "Tute nge?" tia ka zawh chuan, "Kêl vulh tute an ni a, anni hi chu training chhuak vek an ni bawk, an ngaihtuahawm loh.." a ti ṭha ve mai. 

"Inah lo awm hahdam la, meeting ka nei tih i hriat kha, anni hian englai pawhin an veng dawn che a, thinthiin i mu thei ang, i be duh a nih chuan Hindi leh English an thiam tel aw.." a ti leh zung zung a.

"Aw le, boss..." nui var var chunga ka tih chuan a kiai suk a, "Ka tlai a rem lo a, ka lo haw chin tur ka sawi thei lo aw, biak tlang theihin lo awm ang che," thupe awka taka tiin dawhkan a thawhsan a, ka chhânna pawh a ngaichâng ve îk lo.

Dârkâr 6 hnuah.

Nilengin ka muhil ti ila a dik ber ang, chîmbuaitu awm lova ka mu hahdam thei chu ka lawm kher mai, Jeho kal chhuah aṭangin a reh zui vang vang a, a nau te erawh pawnah an duty tih ka hria.

Ka phone ka bih sek a, Jeho hnen aṭangin eng mah call emaw whatsapp msg pawh a awm chuang lo. Meeting tura kal a nih vangin va tihbuai emaw pawh ka tum chuang lo a. Vansangi erawh chu kan thlen tawh thu ka hrilh thung. 

"Kawng lakah buaina in tâwk em?" Tiin min zawt a, kan tawh loh thu leh him dam takin kan thleng tih ka hrilh a, kan thil tawn sawi vek kher a ṭulin ka hre lem lo a ni.

Ka phone a rawn ri ve ta a, ka pick dawna a tawp leh daih. Jeho hnen aṭanga lokal a nih vangin ka callback nghal a, a busy zui daih.

A hnu lawkah whatsapp aṭangin video ka dawng zui zat a, ka'n en chiah chu ka uak lo chauh. Ka lung a phu dup dup a, vawi thum zet ka en nawn hman, ka âwm dawmin ka thaw halh a, ka nghilh dup thei nia.

Jehomalsawmkima leh Khasi nula tih hriat lutuk hmelṭha zet hi saruak thawthângin khumah an insawngbâwl a, mipat hmeichhiatna an hmang lai tak chu a lang hran lo. Mahse, an awm dan chu a tenawm a ni tawp mai, Jeho hmel lah a lang chiang êm êm mai si a, â...an pahnih hmel a hai theih loh hrim hrim. 

Phone chu khumah ka vawm thla pawp a, toilet lam panin ka tlan chawn chawn a ni ber, chin tâwk awm lova ka luak hnuah ka ṭhu hnawk a, duty zinga pakhat a sâng ber leh naupan hmel ber kha a rawn lut a, "Madam, i ṭha em?" Tia min lo zawh chuan mi â ang maiin ka ngawi ngal a, ka pum dawmin ka thaw leh halh a, ngaihṭha zân lo hian ka bulah a rawn ding a, a kalsawn duh miah lo lehnghal.

"Min lo kai tho ta che.." ka ti zâwi raih a, thuawih tak hian min kuah tho ve mai bawk a.

Chair lo hnai berah chuan min ṭhut tîr a, tui vawt min rawn pe thlap.

Kan Laljehomalsawmkima meeting dan chu a va danglam si ve le! Khum laizawlah eng meeting nge awm ngai? Thinrim luat vangin ka tui bottle ken lai chu kawngkhar lamah ka vawm phei a, "Ngurthan.." tih ri ka hre zui zat.

Kawngka biang vuanin Jeho a lo ding a, a kut lehlamin tui bottle ka vawm tâk kha a keng bawk a, hmela mak tihna rawn lang chhuak chu a ten hian ka ten.

"Chhuak rawh..." ka ti sap a, ani a rawn lût thung.

"Ka kalsan lai che kha chuan khatiang mizia kha i nei lo.." a ti sup a.

"Chhuak rawh ka tih chu.." ka ti nawn ṭhat a.

"Hetah ka riak dawn, ka nupui bulah hahdam ka duha ka lo haw chu a nih hi.." zâm map lovin zu han ti a.

"Jehomalsawmkim...zawnga..." ka ti vin leh ṭhat a.

Ka bulah a rawn ding khawng luh a, a mitmeng chang ta deuh leh a hmel dur khup chu ka hmuh hmaih lo naa ka hlau chhete eih lo.

"Ka hnuaia thawkte awm laiin khatiang ṭawngkam kha hmangin min vin tawh miah suh," a ti chang fuk a, ka lo ter ve at.

"Min rawn zui rawh.." tih pahin min pawt tho lawp a, pindan lamah min hruai phei ta a.

A insawifiahna ngaithla turin ka zui lut rêng ang, eng dâwt phuahchawp nge min hrilh dawn kan la hria ang chu...

310323

-B®®

B+>[BeckirafARenthleI]<+®®