23.24-89[A Becky Rafa Story]

23.24-89 

Ziaktu: Becky Rafa Renthlei

[Recap]

Pawn lamah insual thawm a la awm a, Aryan thaw kâwk kâwk chu lainat taka melh lehin, "Jeho, hmanhmawh rawh u.." tiin ka tur a, îhe lovin an che chhuak nghal.

A thi pût tih rehna turin ka jection tawh a, rem lo zeta ka tuam nawk nawk hnuah Gurkha hnung seat-ah an hlang lut a, keimah pawh min be nawn tawh lovin hospital an panpui ta a.

Jeho leh Rishan tlan liam tur chu ka thlir a, "Aryan thi suh aw.." tia phun sap chungin room-ah ka lut ta a.

Buatsaiha leh Arun lam pawh ka ngaihsak tawh lo.

Duh leh lo insual mai mai teh se...

-B®®

Kan hun tawng hahthlâk tak chu Jeho te tlan liam hnu lawkah a reh ve mai.

Arun chuan pawn lam aṭangin min ko vak vak a, Lalngurmuana khum kil lamah ka sawn phei a, pawnah ka chhuak ta a, khua a la thim loh avangin Buatsaiha step nghenga ṭhu kun lup pawh ka hmu chiang hle.

Arun chuan, "Madam, ani hi engtin nge kan tih dawn, ka that ve law law dawn nge?" Tia min zawh chuan, "Phuar hlawm la, Kêl in sira buhpawl dahnaah khan va khung rawh, a bâk chu i boss lo haw hunah ni rawh se," tiin thu ka pe ve hmiah.

Chu veleh, Arun chuan dim lo baksak hian Buatsaiha a phih tho lawp a, a chhip sam buk laiah ṭhâmin a hnûk a ni hrim mai. Kêl in lama an inhruai phei lai chu ka thlîr reng a, tunah chuan an lak aṭanga finfiahna neih chauh hmabâk kan nei ta, Sameer pawhin a boss thupêk angin Mawitei leh Samuel Pamei chu Khatam inah a dah ta bawk a, Saruak tangkâwnga an inmelh tur ka mitthla zâwng ringawt pawhin ka nuih a za a, ka nui chhuak hak.

Jehomalsawmkima hi chu Samuel Pamei enkawlna hnuaia seilian a nih angin a duh lohnaah a sual thiam hle tih ka hria; min thah tuma min vau hun lai ka ngaihtuah kîr a, kum khat dawn kan innei ve ta, a mizia a dang tawh em em a, amah dotute lakah nunrâwng viau mah se; kei, a nupui hi chu min duat ru riau lawi si. 

Khua a thim a, Jeho hnen aṭangin Aryan chanchin ka la hre lo, Sameer leh Arun nen kan pathumin zanriah kan kîl a, "Madam, bike hi ka hmang thei ang em, ka unaupa bulah kal ka duh a," tiin Arun chuan min dîl a.

"I boss in chanchin lo sawi phawt se, chumi a zir chuan i kal dawn nia," ka lo ti ṭha mai.

Sameer a rawn nui chhuak huk a, ka melh vat a, la nui ṭhâ chung hian, "Buatsaiha nupui pakhat zawk kha a kawlh kher mai, madam, unau inni tih hi awih a har e.." a ti a, a nui húi bawk si a.

"A thawmhnaw chu nangman em ni phelh ta," tia ka zawh chuan, "Amahin a phelh, ka kut hmawr pawhin ka tawk lova mahse, ka hmu vek," tiin Arun a melh a, "Zaninah Khatam hmunah duty ila, ex boss leh kha nu kha kan bihthla dawn em ni ang?" dawhkan thawhsan paha tiin a nui chhuak hawk hawk a, Arun pawh a nui ve ta nge nge e.

Ka phone a ri a, Jeho a nih tawh ringin rang tak hian ka pick nghal a.

"Aryan a la harh thei tlat lo, tunah silai mu tâng la chhuak turin an zai mêk a, Arun leh Sameer kha inah riak se kei chu ka lo haw lovang, a dinhmun a ṭha lutuk lo," tia min lo hrilh chuan Arun nena kan inbiak dan kha ka hrilh ve a, "A nih chuan lokal tîr rawh, Rishan a lo haw thung dawn nia, pawn lamah chhuak miah suh ang che," tiin min chah leh thlap tawh.

"Buatsaiha hi engtin nge kan tih dawn?" Tiin Buhpawl ina kan dah thu ka sawi a, "A awmna hmun a la nuam mah mah a nih chu, khuai khâwina hmunah Sameer khan hruai sela, zanin chu khatah khan riak rawh se," a ti leh ta, "Chutiang te chu thiltih chi a ni dawn em ni, Arun nen an insual avangin hliam a nei nual a nia," ka lo ti vat a.

"Ngurthan, atu amah kha i khawngaih tur a ni lo, min tih nat tumtute lainatna rilru pu suh, kan khawngaih an ngai lo ve," a ti hmuk a, Buatsaiha ka lainat êm êm vang pawh ni lovin kan hriat duh kan hriat hma hian a thi hman ang tih ka hlauh vang a ni pakhat.

"Aw le, i thu ang chuan ka lo tih tîr dawn nia," ka ti sap a, "Sameer kha i bulah a awm hnai a nih chuan ka lo be lawk teh ang," a ti a, choka lamah ka phei nghal a, Chemte lo tât mektu Sameer chu phone pek pahin, "I boss.." ka ti a, a lo ban vat.

"Thihpui tham hliam a nei lo, hnuk a hlat lutuk," tia Sameer a ṭawng lai chuan Arun lam ka hawi a, "Insiam la, Super care hospital-ah chuan i kal thei ang, Rishan kha a rang lamin lo haw tîr rawh u aw, i u pawh tunah an zai mek a, hlauthawng rêng rêng suh," tiin a darah ka bêng thak thak a, "Madam, ka lawm lutuk," tia a sawi zawh hnuah a chhuak ta a.

An unau hian ka tan an ṭangkai em avangin Aryan hliam tawrh chungchângah pawh ka chhungril zawng zawngin ka lainat pha ve.

Sameer chuan phone min rawn pe a, "Buatsaiha kan dahna hmun kha sawn a ngai dawn a, Khuai khâwina inah a riak dawn a nih chu," tia nui suk chung hian Chemtê a pâiah khungin a pái leh nghal a, "Khuai chu i chhuah dawn tihna em ni?" Tiin ka lo zawt hê-hâw mai.

"Madam, an vai chuan chhuah lo e, hetiang huna hman tur bîk a hrana dah an awm a, Aryan hian a duatin a enkawl ṭha bawk. 'Aryan Bee' tiin kan sawi mai zel,  Buhpawl dahna in aṭanga a pathumna kha a ni," tiin min hrilh fiah a. 

"GS road aṭanga rawn lut ru misual tepawh Khatam hmuna kan dah luh hmain kan zûk tîr vak zel, tunah phei chuan Aryan kâptu Buatsaiha hian a tawrh ve ngei a ngai ang, 'Aryan Bee' seh nat zia te chu a hrechiangtu ber a nia lawm," tia a sawi zawm leh hnuah, "Va kal rawh le, fimkhur la.." ka ti ta a, thil dang sawi tawh lovin a chhuak zui nghal.

Arun pawh Bike nen a tlan chhuak tawh bawk a, keimahin Farm house chhungah ka tei rak rak a, Samuel Pamei Mizo hming Lalsiamthara tih ringawt ka ngaihtuah, Jeho thluak chak tak hian engkim a hre fiah tawh tih a hriat a, a hmalâk zel dan tur ka hre châk khawp mai.

Kan nufain khumah kan mu a, ka fapa Lalngurmuana hmel ka en a, kei min chhun nge, a pa a chhun tih pawh a hriat loh, a tê fel khar mai a ni.

Ka lo chhing sek a ni ang, ka phone riin min tiharh a, ka pick hman hmain a tawp leh daih. Jeho bawk a lo ni a, zan dar 10 a ri chauh a, choka lamah Sameer a ri rak rak a, zanin chu hetah riah a tum a, Rishan pawh a rawn lêt tawh bawk.

Jeho ka call back vat a, "Mate, Aryan dinhmun a hniam hle, ICU-ah an dah lût tawh a, a vanduai a ni," a ti sup a, ka thaw halh.

"A thi ang em, a dam chhuah i beisei tho em?" Ka ti nawk nawk a, "Ka hre lo le, Pathian thu thu a ni a, Aryan tan ṭawngṭaisak rawh.." a ti teh daih.

"Arun ka khawngaih hle mai.." ka tih chuan, "Ni e, Buatsaiha hian rulh tur a ngah ta, kei chu inrawlh ka tum lo a, Arun zawk hian a duh ang a tih theih nan hun remchang ka siamsak ang, chuan, ka ngai tawh che," a ti sup a, ka lo zak ringawt.

Ka ngawi vang vang a, "Ngurthan, ka ṭawng i hrethei em?" Tia min zawh chuan, "Dah rih mai rawh, sawi tur ka hre tawh lo," ka lo ti a, nui huk chung hian, "A va buaithlâk e, ka Ngurthani hi chu a romantic lo ve ngawt mai," a'n tiah. 

"Malsawmkim, dah mai mai rawh.." ka lo ti hlar. "Aw le, madam.." tiin kan inbiakna a ti tawp ta a.

Romantic lo te chu min ti ve bawk a, ani kha a tlaw fe zawk, a inhre dêr si lo.

Kan inneih zungbun min buntîr hmasak ber ni kha ka hrechhuak nghal a, "Kha, tihian bun tawp mai rawh.." a ti a nih kha, ka thil ngaihtuah a vang chuan ka nui leh a, choka lamah ka fapa pawm chungin ka chhuak phei ve ta a.

Rishan chu Sofa-ah a lo ṭhu thluang duai a, chau hmel pawh a pu chuang lo.

"Madam, Sameer nen intur dawm kan tum a, i rem ti em?" Tiin min lo zâwt var a, bu nghat nghat chung hian, "In ula, rui lutuka awm loh tur aw, Jeho a awm si lova buaina eng emaw pawh tâwk thei reng kan ni," ka tih chuan, "Zaninah eng thil danglam mah a thleng lovang, mahse, woodstock farm lam aṭangin naktuk zanah hian Samuel Pamei chhanchhuak turin tu emaw an lokal ka ring, Omar lak aṭanga hel ta te an ni a, ka sawi sual miah lovang," tiin a ding chhuak a, in tur dahna lam a pan nghal a.

Sameer erawh ama room-ah Assamese ṭawnga an thil puan a ngaithla a, a'n bei ring leh mai mai khawp a! Buatsaiha farm house-a a lokal tâk loh aṭang khan Sameer hi Jeho khan a hnung zui turin a ruat belh a, a tifuh viau chuan ka hria.

Aryan, Arun, Sameer leh Rishan Songbet te hi Jehomalsawmkima hnuaia thawk langsar zualte an ni a, a bâk hi chu ran enkawltu an ni deuh vek. Mahse, an vaiin Silai kah thiam tak an ni deuh vek a, Aryan leh Rishan hi insual lamah an filawr bîk. Jeho erawh sawi ngai lovah dah ta ila. Buatsaiha pawh a nihna dik takah chuan a nikhua hle, mahse, a inthlahdahin a awm lohna tur hmunah a awm a, a ding chhuak zo hian a rinawm tawh loh.

Dingngheti a reh vang vang a, Aryan nen in 'chu e kha' deuh ang khan sawi awm mah se, kan zawh fiah tum ber Aryan tihian a awm zui ta si a, eng mah thu chiang kan hre ta rih lo.

Sameer te pahnihin zu an in lai chuan pawn lamah thawm a rawn awm a, 'Rishan"tih pahin kawngkhar an rawn kik dawt dawt a, room-a luh tum tawh kha ka tâwi khawmuang leh rih.

An zu no an dah ṭha sawk sawk a, Rishan tho chhuakin kawngkhar kalhna a va hawng a, hnathawktute zinga pakhat 'Islam' tia an koh mai ṭhin chu hah hmel tak hian a lo ding a, Rishan hmel a hmuh veleh, "Buatsaiha kha a tlan chhuak" a rawn ti ta mai.

"Eng a?" Kan lo ti rual ṭhawt a.

"Khuai dahna hmun aṭang khan a tlan chhuak a, Fâr hmun lama a tlan thla lai kan ṭhiante'n an lo hmu a ni awm e, a thim si a, ka lo hrilh hmasa che u," tia a sawi zawh veleh Sameer chu a room-ah a tlan lut a. 

Pistol hum chunga lo chhuak leh vatin, "Madam, kan kâp hlum a nih pawhin kan thiam loh a ni lo aw..boss lo hrilh mai rawh," tia a sawi zawh veleh biak zui hman miah lohvin Rishan nen an tlân chhuak ta nghal a, Sameer khan a kut leh ke a phuar lo nge, engtin nge a tlan chhuah theih teh reng ni.

Ka phone lain Jeho number ka hmet chhuak a, ka call zui nghal.

Rang zet hian a lo pick vat a, "Aw, Ngurthan, i la mu na nge?" Tia min zawh chuan kan la mut loh thu leh Buatsaiha chungchâng ka hrilh ta vek a. 

"Tunah khan farm house-ah nangmahin an hnutchhiah che a maw, mâwl hlawm lutuk," tiin a phun hluk a, "Midang koh mai tur an awm lo alawm, tihian chhunglamah kawngkhar ka kalh anga kan ngaihtuah awm loh a nia.." ka lo ti sawk sawk a.

"Ka lo haw dawn, Arun a awm tawh tho a, eng mah tih theih tak tak a awm tawh rih lo," ti zung zungin, "Ka lo thlen hma chuan tupawhin kawngkhar rawn kik se hawng hlek suh ang che,'' tia min chah nawn leh hnuin phone a off daih a, a duh chin a sawi a, a dah leh tawp zel. Hahthlâk thei siah.

Pawnlam a reh tlawk tlawk a, tih theih dang awm chuang hek lo ka mu ve ta a, Buatsaiha bawkin ka rilru a luah leh tawh.

Mawitei pasal a nih chuan engvanga Tleipuii hi nupui atana nei si nge a nih! Mawitei nen hian nupa tak tak an nih rin lohna lian tak ka nei ve tlat a, an inhresa ang a, amah Mawitei nen kan inlaichin dan an hriat hnuah pawisa pein ka u that tur khan an ruai ta a nih ka ring ber. Nupa êm chu an nih ka ring thei lo.

Ngaihtuah tur a tam si, ka thluak a châwl meuh lo chu a ni e.

Dârkâr hnih hnu velah Jeho a rawn thleng ta a, ka la muhil ta chuang lo fo. 

Kawngkhar ka hawnsak rualin a rawn lut nghal a, "An la rawn lêt lo em ni?" Tia min zawh lai chuan hla tak aṭanga silai puak ri kan hre zui zat. Jeho a insangmar a, "Buatsaiha khan pistol a hum ang em aw?" A ti vang vang mai. A naute pahnih a ngaihtuah hle tih a hriat bawk.

"Pistol te chu a keng dawn em ni? Sameer khan eng thil mah a hnutchhiah tawp lovang," ka lo ti ve a, Sofa lo hnai berah chuan a ṭhu thla hnawk a, "Ka nupui duh tak, i thluak kha hmang ta che," a ti sup a, a ngaihna hre lova ka hawihai hmel a hmuh chuan, "Sameer khan Buatsaiha khuai khâwina hmunah a khung a, kawngkhar kalh lovin a kalsan dawn em ni, mahse, engtin nge a tlan chhuah theih? Hliam a nei a, Aryan Bee-in a zûk hrep hnuah a tlan chhuak ang maw, a teuh lo, kan hnathawkte zingah hian amah lainata khawngaihtu an awm a ni, phatsantu kan nei tihna a nih chu," tiin mûk taka thil ngaihtuah hmel a pu.

Jeho thil sawi avang chuan ka meng phar âwk a, "Sameer leh Rishan chu an ni lo phawt a, a chhan chu pawnah an chhuak tlat lo," ka lo ti sap. 

"Anni chu ni lo e, hnathawktute zingah hian an awm ang," a ti nghut a, Coffee siam sak turin ka tho a, "Samuel leh Mawitei kha engtin nge ni dawn, tumahin an va en dik leh tawh bawk si lo a," ka lo ti niah niah a.

"Anni pahnihte chu ni thum leh zan thum a ral hma loh chuan kan ngaihven lovang, phatsantu an awm a nih loh chuan an tân tlan chhuah ngaihna a awm lo a, tisawn awm ve rih phawt rawh se, duh leh khawvar hunah ka va tlawh dawn nia," tiin Coffee a in khalh a. 

Min thlêk vung vung chung hian, "Aryan a thi a nih chuan Arun hian a u phubâ lâk a tum ngei dawn, helai hmunah hian ruang phum tur kan nei thuai dawn a ang tlat," zu han ti a, a sawi awlsam teh puat lutuka a ngeiawm lek lek. 

"Jeho, ṭawng fimkhur rawh.." ka lo ti ṭhat a.

Thle buk chung hian, "Lo ngâi reng mah rawh, ka sawi sual lovang," a la ti cheu.

Rishan te rawn lêt leh hmain a inbual thuak thuak a, a naute a ring tawk viau nge chêt chhuah pawh tum lo hian khumah a mu phar duai a, a bân dinglamin a fapa a khuap bawk a, "Lo mu rawh le, khatia i din reng khan i taksa tan a ṭha lo a nia, chawlh hahdam hun i nei tlem lutuk.." ti supin ka mutna ṭhin lam âwl duai chu a melh zuk a, îhe lovin khumah ka lawn ve mai.

"Nun ralmuang i nei ṭêp tawh a nia, tunkâr chho a liam leh chuan nunphung pangngai kan zawh thei tawh ang, Buatsaiha an hmuh hma loh chuan Rishan leh Sameer pawh an lokîr ka ring lo a, ram chin an hre vek a, an ngaihtuahawm loh," tiin a bân veilamin min kuah a, "Nupui dawihzep deuh ka nei lo hi chu ka vannei ngawtin ka hria," tih pahin ka biang leh a hmui a sîk tîr a, sawi ve tur hre lovin ka lo ngawi rauh rauh thung. 

Malsawmkima hian ṭawngkam thlum leh nêmin min thlamuan lo mah se, ka kianga a awm hrim hrim hian chawplehchilhin ka thlâ a muang ṭhin. A taksa lumna chuan min ur ham ham a, mut chhuakin min zêm a, ka chhing ve ta nge nge e.

Lalngurmuana ṭap riin min tiharh a, nî a lo chhuak uar tawh chu niin! Tûkṭhuan siam tura ka thawh a ngai a, midang rin tur an awm lo tih ka hre ve kar.

Ka fapa hnute ka siam a, thawhphan pawh ka nei lem lo, Jeho a rawn lut a, "Tukṭhuan tur ka peih fel tawh a, Sameer te pawh an lokîr ṭep ang, nichin deuh khan Richard hnen aṭangin phone call ka dawng a, Buatsaiha chu Bamos ramri depah duty in an lo man a nih chu, a taksa a chau tawh a, a biak tlâk vak loh a nih hmel," tiin lukham hnuaia a Pistol dah a phawrh chhuak a, uluk zeta a check hnuah, a kekawr kâwng hnunglamah a zep a, a shirt hak lai a pawt hniam hlek bawk. 

"Vawiin hian indâwpna hun kan nei dawn a, i duh chuan Veranda aṭangin min lo thlir thei ang," a ti sup.

"Tute nge i dâwp dawn?" Tiin ka zawt a, "Buatsaiha tlanchhuah tîrtu hi maw le, amah te chuan a sawi duh tawp náng, thi dawn pawh nise a sawi miah lovang," a ti nawn leh a.

Ka malchunga a fapa muhil hmel chu enin, khum kil lamah dimte hian a sawn a, "Mipa fa min pe hi chu ka lawm ngawt mai, a dawt lehah pawh mipa ni leh se ka la duh," tia rawn kun hniamin ka chalah a fawp zauh a.

"Ka pêk che a ni bîk hleinem, min pe zawk alawm," nui chunga ka tih chuan, "Tharum hmanga siam nge nge mipa a chhuak nalh mai alawm, a lehpekah pawh insual deuh awt awt chungin up down ila mipa tho a piang leh mahna," a'n tiah. A la nui ruh ruh leh ta nghal.

"I zak lo, i lo ṭawng thei ta hle mai," ka ti nghat a, "A hunah ka ṭawng thei a, a hun loah chuan ngawih ka chuh mai, ka nupui i nih tirh laia i ṭawng zet zet ṭhin kha i hre tawh lo em ni, nupa hi chu an inchhun duh riau an tia, ka chhûn ta che a va nimai awm ve aw.." ti lehin khumah a rawn ṭhu thla a.

"Hmeichhe dang chu nise tukina ka lo luh rual khan, 'Jeho' tiin min fawp nghal ngei ang, ka Ngurthantluangi ve chuan a melh pawh min melh ṭha peih lo a nia," a la ti hrâm.

"Malsawmkim, i chhe zet zut.." ka ti tak nain ka nui tho a, "Midang lo thlen hmain infawhna hun kan la nei, a bâk chan tur ka la nei si lo a," tia a sawi zawh rualin a lamah min kuai hnai a, dam thlap leh ngenngawl zet hian min fawp ta a, ka ṭhut dan a rem teh ṭeuh si lo.

"Kâr tharah chuan kan khum hi kan hmang ṭangkai ve thei tawh ang chu maw, mutna ringawt atan chuan a ho tlat," a'n tiah.

"Mut nan ni lova i hman duh chuan ṭhu mai rawh," ka lo ti nghauh a.

"Ṭhu chungin i duh tihna em ni," nui huk chunga tiin min la kuah reng a, "Jeho.." ka ti hliai a, tukin a ṭawngkam leh a khawsak phung hi nidanga ka la hriat ngai loh thil a ni. Rilru helhkam nei hmel lah a pu hek lo.

"I hmui leh Jehomalsawmkim, tih hi chu a inrem ve ngawt mai, i Laljeho hi min ngaizâwng ve deuh la," tia nui suk suk chung hian ka bek leh hmai a chul lawr dan dan a, a mit thim raiha nuihzatna lo lang chhuak chu ka hmu reng, ka kut dinglamin a kut chevel chu ka chelh a, "Ngaihzawnawma i awm hunah ka ngaizawng chauh ang che," tiin ka kuai kun a, dimtein a hmuiah bawk ka fawhsak ve leh ta a, a insiamrem nghal vat, rei ngial kan infawh hnuah a fapa a tâl ṭet ṭet a, kan inthlah ve ta hram.

Tukin ni chhuak chu a mawi ka ti thar deuh thut. A va ho e.

Lalngurmuana pawm chungin kan room-ah a vei kual sek a, a fapa neihchhun hi chu a duat ve hluau hluau êm asin.

Tûkṭhuan kan ei laiin Rishan te an lo thleng ve ta bawk a, Buatsaiha hmel vûng lûk ka hmuh chuan hmun dangah hmu ta ila ka hai thei hialin a nia ka rin. A chhe ngawih ngawih fahran lutuk a, tlem chuan ka khawngaih rilru ve deuh. Tleipuiin han hmu ve ta se a natpui ang em tih ka lo ngaihtuah kâi daih bawk.

Keini nupa kan eikham hmasa a, Lalngurmuana ka bual zuai zuai a, Jeho erawhin hnathawktu pakhat a ko a, "In zavaiin tunah farm house kawtah lokal khâwm rawh u, an vaiin va ko rawh," tiin thu a pe a, chu pa chu a kal nghal nal nal.

Veranda kil sirah Buatsaiha a mu hlawm tawp a, a harh nge harh lo tih pawh a hriat theih loh. "Rishan, ani hi tuiin leih rawh le, a taksa pum khan leih huh vek la.." tiin Jeho chu Buatsaiha mutna bulah a ding khawng luh a, a boot bun lawk zet chuan a chhuih dawn emaw ka lo ti hman kha a ni a, chutia ti lo chuan kut hnungsuihin a ding sawn daih.

A boss thupêk angin Rishan chuan Buatsaiha mu chu tui bucket khat pârhin a leih ta bãwrh a, a rawn khuh nghal bawrh bawrh mai.

Chutih lai chuan hnathawktute an rawn thleng ṭan a, a lo thleng hmasa a piang Jeho chuan a lo dap zel a, an hmela hlauhthawnna lang chhuak chung leh a ṭhente chu a ngaihna hre lo hmel an pu bawk.

Islam leh mipakhat hi a hnung berah an lokal a, anni pawh Jeho chuan uluk zetin a dap vek tho.

Inkâr hlat takin a din tîr vek a, an vaiin mi 18 an ni.

Ran chaw la tura kal mi panga an lo la haw lo a, chu mite bâkah chuan thing kittu pathum an lo la thleng ve lo bawk. Gate duty palite pawh an lo phei ṭhâm ṭhâm a, eng boruak tak thleng leh ang maw.

Rishan leh Sameer, Jeho leh kei Veranda-ah kan awm a, Buatsaiha pawh rem leh rem lo hian bang nghengin an ṭhut tîr a, a maimitchhing tlat. Men tum mah se a thei chuangin ka ring lo.

Jeho chu Step tawp berah a ding a, a hnathawktute lam hawiin, "Ka koh khâwm nachhan che u chu ka Manager hlui Buatsaiha chungchângah a ni a, 'Aryan Bee' inah kalh khum a ni a, inzinga a tu emaw ber hian a tlan chhuah theihna turin in pui a ni, puitu in awm tihna a nih chu.." tiin a ding kâk hlek a, Pistol chuh mai thei turin a kut ding lam a hnunglamah a dah a, vei lam erawh a thlâk thla thung.

A taksa lian leh inkhaithli nalh zet chu en reng tham a tling ve chiang a ni. 

"Buatsaiha hian JK farm min chuhpuiin, ka nupui Ngurthani nuṭapa thihnaah a inhnamhnawih bawk a, ani chhuah zalen tuma ṭanpuitu in awm a nih chuan tunah hian rawn pen chhuak rawh u le.." chiang kelhkawlha tiin a mal tê têin a melh den den a, ka thin a phu leh ṭan tawh.

Tumah an ṭawng lova che chhuak lah an awm hek lo.

"Islam, hetah lokal teh le.." tia nizana Rishan rawn kotu kha Jeho chuan a thur chhuak nalh a, ṭi dui chung hian a rawn pên chhuak ta a, "Nizanah khan Buatsaiha a tlan chhuak tih engtin nge i hriat?" Tiin a zawt ta a.

Hnuai lam bih tlat chung hian Islam chu a ding ngawi reng. "Khuai khâwina hmunah a awm tih i hre lâwk nge, tuin nge hrilh che.." tia a zawh nawn leh tâkah chuan Islam a rawn dâk chhuak a, "Boss...Gate duty in.." tia a sawi zawh hmain Islam chu a eu âwrh a, Jeho chuan a chelh hman bik lo. Lei chârah Islam a bawkkhup thlawrh a, a hnungah Chemte a bûr vâ mai.

Khawi lam aṭanga lokal nge tih ka hmu hman eih lo. 

Ṭawng thawm a ri nuai nuai a, Sameer chuan bengchheng lo turin a hrilh naa a sâwt lo kher mai.

"Rishan, Sameer nen khan Tuizem dahna phêna mi saw va rêk bet rawh u, a tlan chhe thui hman lovang," Jeho chuan a ti vin ṭhawt a, a hnathawkte chu bengchheng siam lo tur leh che sawn lo turin thu a pe nghal bawk a, a reh nghal duk.

"Ngurthan, Islam hi lo buaipui lawk mai ta che," tia min biak chuan a awkâ a dam ta deuh.

Islam hnunga chemte bur chu ka phawi chhuak a, a thì duh ngar ngar khawp mai. 

"JK farm-a la thawh chhunzawm in duh chuan phatsanna a awm tawh tur a ni lo, Buatsaiha a ni emaw atu a pawh nise, helai hmuna buaina thlentu a piang chu 'Thi turin ka inpeih e' in tihnaah ka ngai ang, damin in chhuak tawh hek lovang, amaherawh chu, chhungkaw thil emaw harsatna dang avanga bâng duh in awm chuan ṭha taka sawi zel tur," chang khelkhawla a tih leh hnuah, "In hna thawk tawh rawh u.." a ti ta a. 

Kâr lovah an kal darh thuai a, Rishan leh Sameer te kha khawi lamah nge an kal ka hre zui tawh lova, Tuizêm phena lo awm kha tu tak ni ang maw? Eng tin nge Jeho khan a hriat theih bîk tih zawh chhuah ngei ka tum ruh hle.

Jeho nen Islam kan buaipui a, a hliam thûk lo hlauh. Hmun thumah ka chilh sak a, nachhawknaa ka jection hnuin a ṭhiante pathumin an riahna hmun lam panin an hruai phei ta a, "Dressing ngai leh thil dang chu i kutah ka dah aw.." tiin Buatsaiha chu a kuah tho a, "Ani hi chu inpui lam hovin rawn ngaihsak rawh se," a ti teh daih.

"Eng nge i sawi awmzia?" Ka lo ti hâ a.

"Ka hriat duh ka hriat theih nan a dam a ngai, amah vengtu tur Habib a awm alawm, chuti maiin a dam lawk lovang, a nâk ruh a tliak a, khuaiin a zûkna mai bâkah a ngal ruh a pelh bawk, en ta che.." tia min kawh hmuh tâkah chuan, ka hrethiam ve chiah.

"Tleipuii lo call la, Habib nen heta lokal turin hrilh rawh, nipui chawlhbûkah enkawl rawh se," a ti leh mai a, JK ram chhuahsan tîr a tum loh hmel khawp mai.

Chumi hnu chuan inchhungah a lut zui daih a, a hnungah phone hmang pahin ka zui ve a, Tleipuii thil awmzia ka hrilh thuak thuak hnuah zan lama an lokal tur thu a sawi ve tâk kha.

Buatsaiha pawh Kêl in lamah an zawn phei tawh a, Rishan leh Sameer an lo la lêt lo fo.

Jeho chu khum sirah a ding a, "Sameer te lo thlen hunah Khatam kan tlawh dawn nia, i unaunu pawhin i zawhna a chhang ṭha duh tawh maithei a ni," tiin a nui suk a, thinchhiain rorum viau mah se, a inthunun thei hle tih hi chu ka hriat hnu tho a ni.

"A hla tham si a, ka kal ve thei nâng.." ka lo ti a.

"Motor in alawm kan kal dawn, Km khat vel bak a ni lo, Rishan te pahnihin kan fapa chu an lo awmpui mai ang a, an thei lutuk tlat ang,"  a ti awlsam leh puat a.

Nichina Islam Chemtea rawn vawmtu kha engtin nge Jeho khan a lo hmuh hman tih mawlh ka rilruah a awm a, ka zâwt ta nge nge e.

"Doctor thluak thâwl tak ti ta che ila, i haw awm si a, i thluak sawi zawi tam a ngai a nih kha," a ti kher a, ka lo ter ve at. "Ka thiam ang hi i thiam vek bik lo, i thiam zâwng pawh ka thiam kher lo, thluak chu ka nei aw..." ka ti nghat a, a nui suk duh chauh.

"I thinchhe bawrlawk a chhuah hmain ka hrilh fiah ang che," tiin single chair-ah a ṭhu thla tê tê phawt a, min en vung vung chung hian, "Ka hnuaia thawkte hi a mal  malin ka hre fai vek, Islam leh a ṭhianpa Deepak hi a hma chuan gate keeper an ni ṭhin a, a hna thiam zawk Islam hi duty tir tawh lovin a âiah midang ka dah a, Deepak erawh chuan hna a thawk ngai lo, Gate ven hi a hna pui ber a ni," tiin ṭhu tur hian min mitmei a, ka la ding ngar tho.

"Vawiin khan hmun danga kan tirh chhuah tiam lovin Deepak chiah a kim ta lova, amah aia Islam duhsak zâwkin min hria tepawh a ni maithei; Buatsaiha chhanchhuaktu kha Islam hian a hriat avangin a sawi chhuah loh nan khatiang khan a rawn che ta a ni, nizana gate ka lo paltlang laiin Deepak a duty tlat lo, a ṭhiante chuan a damlo niin an sawi a, mahse, kei chuan ka awih lo, ka ko khâwm dawn tih a hre ngei dawn a, Farm house leh a chhehvelah tuizem phên lo chu chêt lâkna tur leh tawm rûkna remchang a awm lo rêng rêng." A ti duah a. 

Uluk zetin ka lo ngaithla thung, a ram chin leh a hmun hma engkim ani aia hrechiang an awm lo tlat a tin ni.

"Chêt a la dawn tih i hriat te chuan tuizem phenah chân tîr mai ta che," ka lo ti ve ngawt pek a.

"Ni lah lo e, a thil tih dik loh man a têl theih nan chêt lâk tîr a ngai alawm, Silai a hmet puak lul lovang ani khan," inring tawk taka tiin a rawn ding chhuak a, "Deepak hruaiin an lo lêt êm êm ang, hlauthawng suh, an man dawn tih ka hria a ni," nghet churha a tih laiin Rishan aw kan hre zui zat a, sawi fuh inti fahran hian Jeho a chhuak zui ta a.

Kei erawh ka chhuak ve tawh lo a, Deepak tia an sawi pa chu tukverh aṭangin ka hmu thuak ringawt, Jehoa'n a hrem dan tur hriat ka châk lem lo a ni ber.

Zanin hian Khatam hmunah min hruai dawn tih a sawi a, ka huphurh ru hle.

Arun hnen aṭanga chanchin thar kan hriat chhun chu Aryan a la harh chuang lova a thâwk dan erawh a zia ṭan tih kha a ni ringawt a, beisei a bo ang reng. A hmun ngeia va ena check ve hrim hrim ka duh khawp mai; Aryan hlutna hi ka hrechiang a, a thi ang tih ka hlau zek zek bawk. Helama kan buaina hian min delh rit em a, kan duh ang pawhin kan ngaihsak hleithei lo a ni e.

Tleipuii leh Habib an lo thleng tawh a, Zonunthara an rawn hruai tel bawk a, kan ri ve nak nak mai.

Jeho chuan a farnu thil awm dan a hrilh fiah vek a, "Mama, Buatsaiha hi chu thi se atan a nuam zawk ang, dam tlâk a ni lo," Tleipuiin a ti hmiah.

Mahse, Jeho thung chuan, "Thinrim lo ang hmakin awm la, a laka i lungawi lohna tilang lovin enkawl rawh, rei a ngai lovang, ka ring tawk che a, tuna Buatsaiha kan dahna inah hian recorder ka dah vek tawh a, engkim thiam taka zawh chhuah tum ang che, i hria maw.." tia a farnu a hrilh chuan, "A hmel hmuh leh pawh hi ka peih tawh lo, a nupui pawh chu khawiah nge a awm reng reng?" A ti khá khá a, a meng ling leh hlar tawh.

"Mawitei kha chu i u Ngurthani kutah dah rawh, Samuel nen Khatam-ah kan khung dun a, an inhau loh pawhin engtin emaw tak chuan an awm ngei ang, tui leh chaw pêk an ni lova, tisawn an ral raih thlengin ka khung lovang tih ka sawi thei lo," Jehomalsawmkima chuan a ti hmiah hmiah.

"U Ngurthan, i cousin a ni tih ka lo hre miah lova.." Tleipuiin a tih chuan, "Ka u thihnaah a inhnamhnawih tih ka hriat aṭang khan kan inzawmna ka chhu chat tawh, ka ngaidam ngai dawn si lova.." ka lo ti hmak a, Tleipuii pawh hmuh theihin a thaw huai huai a lawm maw le.

Aryan chungchâng te kan sawi kâi a, chu veleh Tleipuii hmel lan dan a dang hlawk mai.

"Eng maw in sawi?" A ti thâm ṭiak a, Jeho chuan, "I pasal Lalbuatsaiha mi dawihzep lutuk hian ka Manager leh ka engkim Aryan a kâp a ni," hniam ruiha tiin a farnu a melh a, "Sâwt tawh lo mah se, Buatsaiha laka fa i lo nei hi chu ka lung a dam thei lo," a ti nghut a, chuta Tleipuii thil rawn sawi chhuah avang chuan ka meng phâwk ngei mai, ka hamhaih a ni ber zawk.

"Mama, min hau suh aw..." tiin a ding sawn daih a, Jeho a rûm dut ringawt.

"Zonunthara hi Buatsaiha fa a ni reng reng lo, Aryan fapa a ni," a ti ta mai. 

Jeho chu a farnu lam hawiin a inher zawk a, "Nang hian eng thu lawi lo nge maw i sawi le," tih pahin Tleipuii a pan hnai ruak a, ka che ve phat. 

An unau inkârah ka va ding a, "I farnu hi sawi zawh tîr ve phawt la maw le.." tiin Jeho nam sawn ka tum a, a ding nghet churh.

"Mihur ang maiin mipa hrang hrang i kawp kual tih sawi hlek suh.." a ti leh khur khur a, Tleipuii hlauthawng hmel avang chuan ka pasal ka bengdaih a ngai tih hriain, "Jeho, tunah chuan a nih tur ang a ni vek tawh a, thinrimin awmzia a nei lo, Buatsaiha fapa a nih loh te chuan i tân chêt a awlsam sawt dawn asin," ka lo ti zung zung a.

Jehomalsawmkima thinrim insangmar ṭawlh ṭawlh chu a kâwngah ka kuah tlat a, thaw hawk chung hian, "Aryan nen in inkârah eng thil nge awm, Zonunthara pa a nih si chuan engvangin nge Buatsaiha pasal atana i neih si..." a ti vin ṭhawt a, tun ṭum chu a insûm thei lo hle mai, a farnute pahnih a hmangaih si a, Vansangi ngaihtuah ngai lo mah se, Tleipuii hi a buaithlâk ve a ni e.

"Mama, Aryan nen hi chuan tihpalh thilthua che sual kan ni a, i lakah a rinawm em avangin kei min neiha nangmah phatsan che hi a duh lo tih ka hria, nasa taka ka thlêm pawhin 'I u hi ka zah a, nang nen kan inneih a remti dawn lo, ka fa châwmna tur chu ka pe ang che' tiin a ṭang tlat a, JK farm chhuahsana inpuia awm a duh lo hulhual bawk, kha ta ṭang khan kan inbe zui tawh lova, Aryan thusawi awih duh lovin, min ngaizawnga min vehthlêm rengtu Buatsaiha hi Aryan runluih nan ka nei ta a ni." Tia a sawi zawh hnuah, tui vawt a in a, tukverh bulah a va ding teh ngawt.

Jeho chuan, "Aryan hi chuan min phatsan ngai lovang, a nu leh pa an boral hnu aṭanga ka hnuaia thawk a ni a, Arun âi mahin ka ngaina zawk, ka farnu laka a khawsak danah ka lungawi hran lo, mahse, ka tana a thil tih zozai avang hian ka ngaidam thei," a ti leh lawi si.

Tleipuii chuan, "Aryan chu a ṭha em?" Tiin min zawt a, a dinhmun dik tak ka hrilh tlang vek.

"Buatsaiha enkawl ai chuan Aryan bulah min kal tîr zawk rawh u," tia chhuah  

a'n tum nghal ringawt a. A u ngaihdan a ni leh ta lo. 

"Aryan chuan amah enkawltu tur nau a nei, a rilru i tihnat sak hrep hnuah hnaih va tum reng reng suh ang che, tun atan chuan ka thusawi zawmin Buatsaiha hi enkawl phawt rawh, chumi hnuah Aryan a thi ta lo a nih leh inchungchang kan ngaihtuah ṭha ang," thu khuh pawh nei lo hian a ti leh tawp.

Tleipuii pawhin a hnial ngam ta bik lo a ni ang, a ngawi zui ve ta a.

Zanriah kan ei ve luklak a, Jeho chuan, "Samuel leh Mawitei hmu turin kan kal dawn a, Lalngurmuana lo awmpui phawt ang che, pawnah i chhuak tur a ni lo a, Arun pawh lo va be hlek suh ang che," tia a farnu a biak zawh hnuah, "Insiam rawh le, Gurkha ka va la chhuak ang e," tiin biak zui hman miah lovin a chhuak ta a.

Khatam-a kal ka va huphurh si êm.

Dârkâr khat a ral leh hnuah misual an dahna hmun 'KHATAM' chu kan thleng ve ta a, a reh duk mai.

Jeho chuan chahbi phawrhin Tala lianpui chu a hawng ta a, thawm riva hriat tur a awm lo a, a reh hian a reh tlawk tlawk.

Inchhung a thim ṭhuap a, light takngial pawh a in on hek lo. Jeho kutah nghet takin ka hmer a, ka hlau ru deuh hial, hmeichhe inhnît fap fap ri ka hriat tâkah chuan tlêmin ka ngaih a ṭha leh ta deuh.

Jeho chuan light a on ta a, inchhung a ên uar takah chuan mit ka khap sak sak a, mahse, kan thil va hmuh avang chuan Jeho nen kan ding chawt a; Jeho kut nghet lutukin ka hmer a, ka thaw a sak titih.

Samuel Pamei chu Saruak ngalngat hian a lo ṭhingṭhi a, a hmel râpawm lutuk chu en nawn ngam chi ziazâng a ni lo. Gamchha-in a lo inâwkhlum chu niin! Tukverh 'Bar' invuahna thir inkham phei a chung berah Gamchha hmâwr suihin a ṭhingṭhi zui ta tih a hriat mai. A lei a seh tut a, a meng kuau bawk si. A kut hnunglamah a la dah tlat zui.

Ka râp êm avangin ka khur dar dar a, ka kawchhung a fan ka ti mai. 

Ka hawi kual leh deuh a, bangkil chêtah Mawitei a lo ṭhu tawm châih a, a hmêl danglap leh a taksa ngo tak chu a dâng vek bawk.

Saruak thova awm a ni a, a ṭap nasa hle tih hrilh hranpa ka ngai lo.

Jeho chuan, "Ani saw i kawr chung zawk khan khuh la, Rishan leh Sameer ka'n call ang e," a ti vawt ruih a.

Khur dar dar chung hian Mawitei meng â vek chu ka kawr chung zawk hlipin ka va khuh a, a saruakna khuh zo lo mah se, a hmuh a ziaawm ta deuh.

Jeho chuan a pa Samuel chu a thlêk vung vung a, chutah, "Dawihzep lutuk.." ti sup chung hian, kawngkhar bula ka ding chu min kuah a, "Mahni nunna la tur khawpa inthiam lo tur chu a ni rêng a ni, lokal rawh, i unaunu pawh a biak tlak rih dawn chuang lova motor-ah midang lo thlen hun kan nghâk dawn nia," tiin min kuah chhuak ta a.

A sawi dik chiah. Mawitei kha mi â ang maiin a awm a, min hmu ang pawhin a lang eih lo.

Samuel Pamei, Lalsiamthara ni bawk chuan thudik haichhuah a hlauh luatah ama nunna a la ta chu a ni a. A râpthlâk lulai êm mai.

Jeho ṭhu kun lup chu ka en a, a pa hua angin lang mah se, a ṭhâwng hle tih a hriat theih a, a kut a hûm ruh tlat bawk.

"Jeho.." ka ti sap a.

Ka ṭawng hre lo ang maiin a ngawi ngul a, a rilru hriatsak lo mahila amah kuah turin ka tawlh hnai a, a taksa khawng leh insangmar ṭeuh chu ka kuah bet ta a.

A khûr ve deuh em maw ni.

Jehomalsawmkima leh Vansangkimi pa Samuel Pamei a 'inâwk hlum' tih hi ka awih thei lo hial zawk. 

Mumang ang mai a nia lawm maw le, a hmel râpawm tak kha mitthla loh hrâm tumin ka pasal âwmah ka bei ta a...  

Super Care hospital neitute zinga mi a ni a, a thi tih hriat a nih hunah Police hmel kan hmu dawn si. Police ngaina ngai lo ka pasal Laljehomalsawmkima hmabâk tur ka ngaihtuah ngam lo.

Ni lo, ka pasal hian Jail bang a zût tur a ni lo tawp...

280423

B+>[BeckirafARenthleI]+®®