24.24-89[A Becky Rafa Story]

24.24-89 

Ziaktu: Becky Rafa Renthlei

[Recap]

Jehomalsawmkima leh Vansangkimi pa Samuel Pamei a 'inâwk hlum' tih hi ka awih thei lo hial zawk. 

Mumang ang mai a nia lawm maw le, a hmel râpawm tak kha mitthla loh hrâm tumin ka pasal âwmah ka bei ta a...  

Super Care hospital neitute zinga mi a ni a, a thi tih hriat a nih hunah Police hmel kan hmu dawn si. Police ngaina ngai lo ka pasal Laljehomalsawmkima hmabâk tur ka ngaihtuah ngam lo.

Ni lo, ka pasal hian Jail bang a zût tur a ni lo tawp...

-B®®

Jeho khan helai hmunah hian ruang phum tur a awm thuai dawn tih kha a sawi a,  tu ruang ber nge sawi lo mah se, a thusawi a dik leh ta. A mak ka ti lo thei lo.

Jehomalsawmkima taksa lian leh khauh ṭung chu ka la kuah bet rân a, a ṭawng lo va a thaw chhuak leh kâwk zel.

"Jeho, i nu te lam i phone dawn lovem ni?" Tia ka biak chuan, "Tleipuiin hrilh rawh se, Bartho ka'n call ve nghal ang e," ti sup chung hian a inlahrang ta nghal a.

Vansangin a hriat hunah engtin tak awm ang maw, eng anga sual leh tawrawt pawh ni se, kan thisen zawmpui te an nihnaah hian eng emaw riau a awm lo thei lo tih hrechiangtu ka ni.

Minute rei lote hnuah Rishan leh Sameer an lo thleng a, Jeho chuan thil awm dan chipchiar taka a hrilh hnuah, "Mawitei zawk kha va pawm chhuak ula, thu zawh fiah tlâka a harh theih nan farm house-ah kan dah phei dawn nia, ka nu chanchin ka hrilh hmain, East Khasi Hills Meghalaya Police station lam ka be dawn a, zawhna an zâwt ngei dawn che u, thu dik chiah insawi ka beisei," a tih zung zung hnuah motor aṭangin a chhuk a, keimah pawh min ngaihven tawh chuang lovin Khatam chhungah a lut zui ve leh ta a.

Kei mi nikhua lo hian Mawitei ka lo mangnghilh leh pek tawh. Ani harh ṭha se, Samuel Pamei inawhhlum dan kimchang a sawi thei ngei ang. Mahse, a sawi duh kher ang em tih zâwk kha a pawimawh ta a ni.

Jeho chuan phone a hmang char char a, nichina a awm dan ang khan a awm tawh lo hrim hrim, inringtawk takin a tei nghut nghut a, Rishana'n Mawitei a lo pawm chhuah lai pawhin a mit sîr pawhin a melh duh lo, Gurkha hnung seat-ah an rawn dah lut a, an tih ang angin a awm tawp, a thawmhnaw Sameer chuan ka kutah min pe a, "Madam, a biak tlâk loh lai hian inbel tîr mai rawh, nakinah zawhna a tam mai mai," a ti a, ka pawm zâwng tak a ni.

Samuel Pamei ruang erawh khawih chêt chi a nih loh avangin Sardar Police Station lam an lo thlen hma loh chuan Rishan leh Sameer hian an lo vêng dawn a ni.

Harsa tizetin Mawitei chu thawmhnaw ka inbel tîr a, a phu leh zawk zawk zel, a hnu deuhah,"Ngurthan.." fiah zeta tiin a rawn meng chhuak thut a, hnai zetah kan inmelh rân mai.

"I harh tiraw?" Ka ti sap a.

"Buatsaiha min biak tîr rawh ka be duh," zawite hian a ti a, "I thawmhnaw hi inbel fel phawt la, farm house lamah kan lêt dawn nia," tiin ṭha tê hian ka chhâng a, a pang dai dak chu a ngainatawm fahran loh.

Thuawih deuh hian ka tih ang angin a awm tawp a, chumi hnu chuan Jeho pawh driver seat-ah a rawn ṭhu lut a, "Farm house-ah ka dah phei che u ang a, Police lam ka lo nghâk ang e," tiin a tlan chhuak a ni deuh mai.

"Ngurthan, zan thil a ni tawh a, Tleipuii hetah a riak dawn tho a, eng mah hlauh tur a awm lo a nia, Aryan pawh midang awmpuitu tur ka biak sak tawh a, Arun a lo haw mek bawk, chuan, Mawitei kha mikhual pindanah i mut tîr dawn nia," ti leh zung zungin chak fahran hian a tlân a, kâr lovah farm house kawt kan thleng der.

Jeho a chhuk vut a, Tleipuii leh Habib an rawn chhuak nghal a, Tleipuiin Mawitei a hmuh veleh a ding chat a, "Ani nena in khata riah dun ka duh lo," a ti hmak mai, ṭawng tuma ka âng zuau chu Jeho mitmei ka hmuh vangin ka ngawi leh rih a, a farnu lam hawi chung hian, "A khirh zawnga awm tum hlek suh, tunah chinfel tur tam tak kan neih lai lehnghala i mimal lungawi lohna lo tih lan ve sek a ṭul lo," a ti hmuk hmuk a, Tleipuiin Mawitei a melh râm râm hnuah, "Ani kha ka hmu peih lo," ti hmak chung hian inchhungah a lût zui daih.

Mawitei ka kuah chhuak a, inchhungah ka luhpui ve ta a, Jeho pawhin min zui lut ve nghal a, "Ani hi ṭha i tih ang khan lo enkawl tawp mai rawh, Police lamin thu zawh fiah turin min hruai ka ring a, Sardar Police Station ka pan a ngaih hmel, a hmaa ka sawi tawh ang khan, 24-89 tia ka rawn sawi a nih loh chuan ka hnuaia thawkte emaw ka number pangngai tih loh chu tumah chhângin be suh ang che, lock up-ah pawh ka riah a ngai maithei a nia," tiin ka darah nghet takin a vuan a.

"I tih a ni lo tih kan hrechianga chutiangin an hrêng ngawt thei lovang che," ka lo tih chuan, "Ngurthan, i thluak hmang ṭhin rawh tih ka sawi tawh kha, Samuel thih danah kei hi rinhlelh hmasak ber tur ka ni a, ka farm-ah Khatam hmuna inawkhlum a ni a, Posmortem a ni bawk ang a, investigation tih ngei ngei ngai a ni. A chin chhuaka hai chhuah tur Samuel hian a hnutchhiah miau alawm, hun duh rei chi a nih hi.." a ti leh a, a kutah ka vawn sak a, "Eng pawh nise, Mawitei hi ṭawng chhuah tîr dan ka lo dap dawn nia." Ka ti ve ta zawk a.

Khuma a fapa muhil biangah a fawp zauh a, "Islam hliam kha lo ngaihthahsak suh aw, Buatsaiha pawh Tleipuii kutah awm se, ka awm loh  chhungin i kutah engkim ka dah a nia," tih pahin ka hmuiah a fawp zeuh a, "Ka kal, ka sawi zawng zawng kha hrereng ang che," ti nawn lehin a chhuak zui ta a.

Tleipuii, Mawitei leh Habib, keimah tiamin farm house-ah kan awm ta a, "Kan room-ah naupang lo buaipui la, Mawitei hi kan check lawk ang e, i u thu a kâwi a ngilin zawm ang che," tia ka sawi lai mekin ka phone a lo ri a, Vansangkimi a ni, "U Ngurthan, kan lo chhuak dawn chiah a, Mama a ṭha em?" A rawn ti a, a ṭhat thu sawiin Khatam hmunah a lêt leh tawh tih ka hrilh nghal a.

"Samuel Pamei fanu ka ni lo a nia, ka ni duh hek lo.." naupangchhia taka a tih chuan ka nui lui hak a, a pa thihna a tuar eih lo tih a hriat mai, tawrh ngaihna pawh a awm lo rêng bawk a, an tan chuan a pa a thi tawh tlat atin ni.

Mawitei kan mut tîrna room-ah ka lut a, Venflon kawlsa kan neih loh avangin direct-in drip ka khaisak ta a, Samuel Pamei inâwkhlum lai kha mit ngeia hmutu chu amah chiah hi a ni, ka u a thah dan ngaihtuah chuan hlauhlawpa awm tur a ni lo asin le. Mi that tura a huaisen tehlul nen a mit hmuhah thihna a thlen meuh chuan biak tlâkin a awm dêr si lo a, mai mai chuan.

Police Gypsy pathum farm-a a rawn tlan luh laiin tukverh bulah Tleipuii nen kan ding dun a, Samuel ruang en dik tura lokal an ni tih hrilh hranpa kan ngai lo, "Mama hian fiahna a kawl si loh chuan a tâlbuai mai thei a ni," a ti sap a.

"Chuvang chuan alawm Buatsaiha i enkawl a ngaih nachhan, Mawitei hi haw hle mah ila, a harh chhuah ngei ngei a ngaih avanga heta rawn hruai hi kan ni, kan enkawl peih vang a ni bîk lo," ka lo ti nghat a, min hmachhawn zawngin a rawn inher a, "Eng mah a sawi duh chuang lovang, a luhlul hmel em mai," a lo ti vei hmak.

Zan dar 11 bâwr velah Police te chuan Samuel Pamei ruang chu Posmortem turin an phur chhuak ta a, Rishan leh Jeho pawh an kal tel a, Sameer a rawn let thung.

Sameer a lo luh veleh chanchin ka lo zawt vat a, "Madam, lungngai suh, i pasalin thil awmzia chiang takin a hrilh tawh a, hlauhthawn tur a awm lo, mi kut tuara thi a ni lo a, thudik haichhuah a ni thuai ang; bâkah Khatam-a kan dah luh hnu hian Jk farm-a thawktute tumah kan inrawlh tawh lo a, chanchin thar kan hre vat mai dawn alawm," tiin chauh hmel zet hian Sofa-ah a ṭhu hnawk a. 

Kan piah lawka Habib lo ding ngawi reng chu biain, "Sameer tan hian intur lo siamsak ta che," tia ka tirh veleh thuawih deuh hian in tur dahna lam a pan ve mai. A ṭawng tlem ve ngawt chuan ka hria.

Mawitei mutna lam aṭangin thawm a rawn awm a, rang takin ka tlan lut nghal a, meng buai nak chung hian, "Min kal tîr ringawt mai rawh u, min thlah rawh u," tia ṭawngvai nawk nawk chung hian khumah a tâl but but a, chelh beh pawh ka tum chuang lo, drip ka khaisak pawh a zahve dawn a kal tawh a, bur thum a khai zawh meuh chuan a harh lutuk tlat ang.

Arun a rawn lang hlawl a, Sameer pan hnai chung hian, "Kan misuala chu a thi ta nge nge maw, dawihzep lutuk," a ti hluk a, "A thih dan a la nuam mah mah a ni, a ral raih thlengin Khatam-ah awm se ka tih vei nen, a hrehawmzia a hrechiang lutuka thih a thlang tawh zawk a ni mahna," tiin Sameer chuan a chhâng a, an thusawi ka lo ngaithla ve reng. 

"Aryan eng nge a an?" Tiin Arun ka zawt a, "A la ngai reng, a harh lo hrim hrim, madam, nangmah ngei hian test report en ve thei la ka duh khawp mai," a ti a, "Kan buai zualpui a reh hunah ka la tlawh ve dawn nia," tia ṭha taka ka chhan chuan a lawm hle tih a hmelah a lang thei.

Lalngurmuana a ṭap a, a hnute tur siam tumin room lam ka pan vat a, zan a rei ṭan tawh a, boruak a vawt sûk mai. A lo zung huh dup chu niin! ka thlâk hmasa leh tê tê a, "Bawiha, keini nufa tan hian hlim taka awm tikni a thleng ve lo ang a, kan nun dan a hrehawm em mai tiraw," tia be sap sap chungin hnute ka pe a, "Madam, ka lo lut lawk thei ang em?" tia Room pawnlam aṭanga Sameer ṭawng ri ka hriat chuan lut turin ka hrilh a.

Inthlahrung deuh hian khum bulah a ding a, "Hmeichhia saw kan ven a ngai dawn em, kan muthilh hlanin a tlanchhuak mai lovang maw,'' a ti ta a.

"I ven theih chuan a lawmawm viau ang, drip ka khaisak mek a, a zawh hunah min lo hrilh la, a harh ṭhat rual ruala thu zawh fiah tur a ni, Arun erawh chu mu hahdam rawh se," tia ka hrilh hnuah ka fapa muhil lu-ah a tuai zeuh a, a chhuak ta a.

Aryan leh Arun hi an hmelṭhain an pumrua pawh a ṭha a, Khasi tlangval tih takah an fai vang mai a ni. Rishan leh Sameer hi chu hmelṭha tia sawi vul chûk tur an ni lo a, mahse, an huaisen ru phian a, an sâng ṭha hle bawk, a bîkin Sameer hi a pa ru riau. An vaiin an ṭawng tam lo vek a, tunah chuan ka ngaina ve vek tawh bawk.

Jeho hnen aṭangin chanchin eng mah kan la hre lo a, mak ka tih ve mai mai chu, nu Pianmawii a rawn lang miah lo hi a ni. Jeho khan a hrilh lo a; mahse, Tleipuiin a hrilh tawh tih a sawi tho si, khati khawpa ṭan a, hliahkhuh ngar ngartu ni si kha a pasal hlui thihna hian a nghawng ve vak lo nge, a inrawlh tam lutuk tawha a hlauthawng zâwk tih hriat pawh va ni suh.

Ka mut a chhuak lutuk a, ka lo chhing ve sek hman, zinglam dar 4 ah ka phone riin min tiharh a, Jeho a lo ni ve ta hrâm e.

"Mate, ka rawn haw thei dawn rih lo a, nihnih khat chu East Khasi hills lamah ka awm a ngai dawn a, Bartho te nupa an lo thlen hunah khalama awm lovin inpuiah i rawn lêt tir dawn nia, phone ka hmang thei rih dawn lo aw.." hmanhmawh hmel takin a ti sawk sawk a.

"Posmortem an zo tawh em?" Tia ka zawh chuan, an la zawh loh thu a sawi a, "Rishan nen zawhna chhan ngai tam tak kan nei a, Bartho kan mamawhna a sâng khawp mai, ama chenna hmunah Samuel hi vui tur a ni a, nang tih loh chu kal vek rawh se, Sameer nen farm house-ah in lo awm dawn nia," a ti ta a.

Vansangin min lo bia tih ka hrilh chuan, "Tleipuii leh Vansangi kha an lo inbakkaih palh hlauh ang e aw, ka nupui i nih angin engkim kha i kuta awm a ni," a ti a, rei tak inbiak a theih loh avangin phone a dah ta rih.

Muthilh leh ka tum pawhin ka thei tawh si lo a, ka tho chhuak ta nge nge a, Mawitei room ah ka va dâk a, nizana ka mut dawnah khan drip bur khat a zo hman a, a thar dang ka khai zawm leh ta kha a ni a, Sameer chu chair pakhatah tui tak hian a muhil a, amah Mawitei ber pawh a muhil sâk sâk mai. Tleipuii leh Habib kha Buatsaiha awmnaah an riak thung a, Zonunthara hruai ve zel a ngaih avangin kan chhangchhe viau.

Khua a vâr dêt dêt a, Samuel Pamei vuinaa ka kal lo tur chu ka lawm hle, a hmel hmuh nawn emaw a chanchin hriat belh hrim hrim hi ka kham thawkhat tawh.

Zinglam dar ruk bawr vel niin ka hria, farm house kawtah car pakhat a rawn ding a, kan room tukverh aṭangin ka thlir reng a, driver seat-aṭanga lo chhuak hmel ka hmuh chuan buaina hmachhawn tura ka inbuatsaih a ngai tih ka hre mai.

Nu Pianmawii hmel rum lutuk leh a mitmeng thíp fahran ka hmuh chuan choka lamah ka chhuak phei ve ta a.

"Ngurthantluang, Laltleipui," vin zeta tiin kawngkhar a rawn bêng dawt dawt a, chhunglamah kan la kalh tlat. Arun a rawn tho chhuak a, "Ka hawnsak dawn em?" Tia min zawhna chu, 'Aw' tih nan ka lo bu nghat.

Arun chuan kawngkhar a hawng a, Jeho nu a rawn lang zui nghal, tumah zuitu a nei hran lo.

Ka hmel a hmuh veleh, "Uichonu, Samuel that tur hian Jeho i fuih vel a maw, lo ngawi tak rawh, Samuel thlarau i zui ve vat dawn tih lo inhria ang che," a ti ṭhawt a.

"I fate hian an pa hi an lo hlut vak lo a nih hmel, chutiang chiah chuan nang pawh an ngai hlu lo che a ang riau mai," ka lo ti ve sak a.

"Khanglang che chuan, i mitmu ka kher chhuah hunah chuan tuna i awm ang kha chuan i awm hauh lovang," tih pahin ka sama pawh tum hian min rawn ban a, ka lo tawlh sawn vat.

Arun chuan, "Madam, hetah buaina kan duh lo.."a lo ti ve nghut a, nu Pianmawii a melh ngur bawk.

"Lo inrawlh reng reng suh, JK ram hi ka ta a ni, ka duh chuan ka bân thei che a nia, i boss in Jail bang a zut hunah chuan invaiin in bâng vek ang," a ti leh phiar phiar a, ka lo nui hak. Arun ka melh a, lo inrawlh lo turin ka mitmei pah bawk, mahse, a kalsawn duh chuang lo. Min venpui vang a ni pakhat.

"I fapa neihchhun Jehomalsawmkima nupui ka ni a, i la hre reng te a nih ngai chuan Court-a innei kan ni, amah a awm lo a nih pawhin a nupui kutah engkim a dah tih lo hre ve mai mai rawh, i fapa hian amah hringtunu aiin a nupui  hi min ring zawk tihna a nia," zawi hniam raiha ka tih chuan meng ling hlar chung hian min rawn pan hnai a, min ben tumin a kut a rawn lek kâng a, ka lo man chat.

A tâl phat a, chu veleh a kut chu hnunglamah ka herh sak ta a, "I pasal hlui vuinaa kal tur i awm lo palh ang e, a ṭah te pawh i ṭap duh lo em ni, i rila rah te aia i thlan Lalsiamthara ruang chungah khan va ṭap rawh," thinrim hmaisen ṭânin ka ti ve ta.

Chu veleh, a kut ka herhsak loh lamin ka samah keh a tum a, ka lo vaiper lawp. "I fanu Laltleipuii pa thattu Lalsiamthara a ni tih hi ka hriat loh i ring em ni? I fate hian an ngaidam duh dawn lo che, an ngaidam ngai lovang che," ti nawn leh ngatin ka nam sawn dâwrh a.

"Ka u i thah theihna tura i hmanrua pahnih kan kawl bawk a, i him rei tawh dawn lo," tiin Arun kan piaha ding chu ka melh a, "Ani hi Buatsaiha hmu turin hruai rawh, va hmuh tîr rawh, fin kherek chhuah a tum chuan dím hlek suh ang che," ka ti ve hmiah.

"Aw le, madam." Nui lek lek chunga tiin Jeho nu bânah nghet zetin a hmer a, a duh lo chung a hruai chhuak lui ta a, ka inhersan hmak.

Ni a chhuak uar tawh a, Sameer pawh kan thawm hriain a rawn tho chhuak a, "Hmeichhia kha a harh tawh aw, a biak theih tawhin ka ring," zawi sup hian a ti ta a, "Intifai la, tûkṭhuan tur lo buatsaih ta che, vawiin hian nang leh kei tih loh Samuel Pamei vuinaah kal vek tur a ni a, i boss thupêk a ni," ka lo ti a.

"Hnathawktute pawh maw?" a ti hû a, mak a tih hmel em avang chuan, "Helai hmuna thi a ni a, Jeho pa a ni bawk, midangin Jeho patea angin an hria a, an kal ngei ngei a ngai," tia ka hrilhfiah takah chuan, "Barua khan a lo sawi dik a nih dawn hi" a ti zawi sup a.

"Barua maw, ani chuan eng nge a sawi?" Ka lo ti vat a.

"Wood stock farm aṭanga a tlan chhuah tîr che avang khan Samuel leh Barua an inti thiam lova, Samuel thinrim insum zo lo ṭawng chhuak khan a sawi loh tur a sawi ta a ni. Barua hnenah, 'Jeho patea ka ni lo, ka fapa a ni a, ka fapa hian ka chan âi min chhuhsak avangin engti zawng pawhin JK ram hi neih lêt leh ka tum a ni' tiin a sawi a, chu chu Barua khan Omar a hrilh a, Omar leh Boss hi inṭhian ṭha tak annih ṭhin avangin JK ram MAP original kha Barua kutah a pe ta a ni." Tiin a sawi duah a, thil inthup leh neuh neuh a tam lutuka ka thluak a buai vek.

Sameer bawk chuan, "Bamos ram leh JK hi an inrem fel chuan buaina dang a awm tawh lo ang, Samuel ber a thi ta si a, Buatsaiha tih vel te chu eng thamah ka ngai ve lo, Aryan erawh a thi ang tih ka hlau thung," a ti ve ta a.

Mawitei ṭawng ri niawm tak ka hriat avangin Sameer pawh chhâng tawh lo hian Mawitei room ka pan ta a. Khumah a lo ṭhu a, a hmel a pangngai viau tawh, "Tui ka duh," a ti sep a, a hmui a liak zeuh bawk.

Sameer ka ko a, tui la turin ka tîr nghal bawk a.

"Mawite, i harh ṭha tawh em?" Tia ka zawh chuan, "Khawiah nge Samuel?" Tiin min zawt a, chhân mai dan tur ka hre lawk lo, a thi tawh tia han hrilh deuh tawp ka hreh si. Ani hi a la harh chiang lo nge a tider zawk tih hriat a har hle mai.

"Samuel nen in awm dun lo em ni?" ka ti ta zawk a, chu veleh, a meng buai nghal a, a hmel a dâng sâwp sâwp bawk.

"Mu leh rawh," ka tih lai mekin tui keng chung hian Sameer a rawn lut a, Mawitei kuta hmehbel nawk nawk chung hian, "A harh tawh, a tider a nih kha, kan veng reng hman dawn lova nikhaw hre lo turin Jection la a ṭha lo maw madam?" A ti hmiah.

Mawitei ka melh vat a, a mitmeng danglam zawk chu ka hmu hman, min va han bum hman teuh ve le, hetia a awm ka hmuh avang leh zawh duh ka ngah êm avangin ka lo lainat hman ṭhelh alawm.

"Lainatna leh khawngaihna i nei tur a ni lo" tia ka pasalin min hrilh lai ka hrechhuak vang vang mai. 

Sameer hnenah, "Lo vuan bet la, vawiin nilenga a muthilhna turin ka'n jection ang e," ka ti ta a, Mawitei hmel a danglam nghal vek a, "Ngurthan, ka lak aṭang hian eng thil mah i hre dawn lo, Buatsaiha ka hnena i rawn hruai loh chuan ka thil hriat eng mah ka sawi chhuak dawn lo a nia," a ti ta chiah, ani ang te chuan min bum nan lem a chang thiam lutuk dawn tih lo hre tur ka ni asin. Ka va han nikhua lo tak.

"Eng mah i sawi duh lo a nih leh tihian harh hman lêk lovin i thih thleng kan vit mawlh mawlh mai dawn che a ni" tia tho chhuakin, "Sameer, a drip khai lai kha pawt phawi rawh," tiin ka chhuak zui nghal a, damdawi dahna ka hawng rak rak a, damdawi hmang sual tur ka ni lova, a hmanna tur dik takah a ni ka hman dawn ni.

Mut duhna darkâr 6 zet daih chu Syringe ah ka draw a, inthiam lohna pakhat mah ka nei lo; ka u phubâ ka la dawn tak tak a nih chuan eng mah tih hreh ka nei thiang hek lo. Dr.Ngurthantluangi kha ka la ni reng bawk.

Chumi hnu chuan Sameer puihnain Mawitei ka jection leh ta a, ni thum a ral leh chuan a ṭawng chhuak duh em em tawh ang.

Choka lamah Tleipuii leh Arun chuan tukṭhuan an siam a, nu Pianmawii a haw tawh tih an sawi. Habib pawhin a dan pangngaiin Zonunthara a paw leh hnûp hnûp tawh a, nau awmtu ṭha tak a ni. Zonunthara mipa fa a lo ni ve kher bawk nen an in awm thei phian.

"U Ngurthan, Samuel vuinaah i kal ve dawn em?" Tiin min zawt a, ka kal dawn lo tih ka lo sawi chuan, "Kei pawh ka kal peih lo, min pawngsual tumtu va thlah liam kher kha thil ṭul a ni lo bawk," a ti nghat a, "I u in kei leh Sameer tih loh kal vek turin thupek a chhuah a, in kal a ngai.." ka lo ti ve si.

Ner nâng nâng chung hian, "Mama pa a nia, ka pa a ni ve lo, ka nu pawhin ka hmel hmuh a duh tawh lova kal kher a ṭul em ni, u Ngurthan, Mama chu nangman min hrilhsak mai rawh," a la ti ṭalh a, ka ngaihdan a ni ta vak lo.

"Nangmah avanga Jeho talbuai zia hi i hria tiraw, a thusawi vawikhat lek zawm chu a harsa viau em ni?" Ka ti vin ṭhat a, hnuailam bih chung hian, "Ka kal hreh êm a ni," a ti thlâwt.

Chhâng duh tawh lovin, Arun ka be zui daih a, hnathawktute ko khawm tur in ka tîr a, a kal ve mai bawk a.

An vaia an lokal kim vek hnuah, "Vawiin hian Samuel Pamei vuinaah in kal a ngai dawn a, ka pasal Jehomalsawmkima thupek a ni. Tumah a bo a báng awm lovin kal vek tur.." tiin ka sawi ta a, an ri nghal nak nak a, Arun melh chung hian, "An kal dan tur ruahman la, motor engzat nge in mamawh dawn tih leh in kal hun tur dar zat chu i kutah ka dah aw.." tia ka hrilh hnuin inchhungah ka lut ta a.

Ka phone a lo ri ve chiah bawk. Jeho kha chuan min lo call theih tawh loh tur thu a sawi a, mahse, amah Jeho tho a ni.

"Ngurthan, tunah ka lo haw dawn chiah, Samuel ruang pawh ama in thlenpui tawh a ni a, vuinaa kal turin lo insiam rawh aw, ka lo hruai ang che," a rawn ti leh lawi si.

"Kal turin ka lo inruahman tawh hleinem, Lalngurmuana hruai a ngai dawn a, khatiang mipui tamna hmuna awm chi a ni lo," tiin ka lo hnial ve tlat a.

Phun hluk chung hian, "In hnial turin hun ka nei lo, ka thusawi zawm la a ṭha a nimai. Kan fapa chu inah a awm ang, kan hruai dawn lo," a la tih zel avang chuan ngaihdan ni lo lutuk hian phone ka off ta a.

A thluak a buai a ni ang. Farm house-ah nau awmtu tur pakhat mah an awm lova Sameer tih loh an kal vek dawn lehnghal, ani kutah hian ka fapa ka dah lul lovang. A sual e tihna ni lovin Rishan âi pawhin a zeihawi lo zawk.

Thinrim ru ṭûnin ka fapa ka bual a, Tleipuii a titau bawk, Jeho te chhungkua hian min ti â thei takngial dawn alawm maw le.

Dârkar hnih hnuah Gurkha a rawn thleng a, Jehomalsawmkima pawh pawr fap chung hian inchhungah a rawn lut a, Arun leh midangho te pawh chhuak mai turin an inpeih vek tawh, gate duty tih loh an kal vek dawn a nih hmel.

Min be miah lovin Jeho chuan bathroom a pan ding nghal a, biak ka tum bik lo.

Lalngurmuana pawm chungin khumah ka ṭhu a, chawhma dar 11 a ri thuak tawh.

"Insiam rawh," bathroom aṭanga Jeho lo chhuak chuan a ti nghut a, ka che eih lo.

"Ngurthan, ka sawi i hre lo em ni?" a ti leh a.

"En teh, Samuel vuinaah ka kal kher a ngai em ni, i fapa pawh a khawngaihthlak zo zai lutuk, mi tamtak an awm ngei dawn a, boruak danglam hip tîr reng hi a hriselna atan pawh a ṭha lo, ka kal dawn lo," luhlul zetin ka ti ve hmak a.

Chek hluk chung hian, "Ka farnute pahnih leh nangmah bâk tu hmeichhia mah ka ring zo lova, nau awmtu tur atan hmeichhia lâk tumna rilru ka pu hek lo, kan nun dan hi en la, naupang pakhat enkawl ringawt aia pawimawh a tam lutuk, chuvangin ka hnuaia thawkte hi i rin ngam a hun tawh, Sameer kha Bawiha hnute hnêk tur siam dan hrilh la, a tawk a ni mai, an thiam lutuk ang, Pistol hmeh puah ai pawhin a awlsam zawk," ti nghut nghut chung hian thawmhnaw a inbel pah mawlh mawlh a, ka la che duh ta chuang lo fo.

A ngaihdan a ni ta ngang lo a ni ang, "I kal dawn khawp mai, i pasalin kal tura ka ti che a nih chuan i kal mai tur a ni," tih pahin ka malchunga kan fapa muhil chu rawn lâk a tum a, ka lo pawm nghet sauh.

"Ngurthan, luhlul hun a ni lo, Samuel vuinaa kan lang lo a nih chuan tun aia thil ṭha lo zawk hian min tlâkbuak leh ang e, Sardar Police station-ah ka inreport a la ngai bawka, Shillong chhuahsan lo tura thupek ka ni, awm hran i duh em ni, Jail-ah awm se min ti zawk nge?" Ti leh khur khurin kawng dawm chung hian rum zetin min melh a.

"Jeho, kal rawh ka dal lovang che, mahse, kan nufaa kal ve tur chuan min nawr lui tawh suh," ka la ti zel a, pawnlamah hnathawktute an ri mam mam a, an kal chhuak tawh dawn tih a hriat mai.

"Ngurthantluang, ka sawi tam tawh lovang, min zui dawn khawp mai," ti sup chung hian Lalngurmuana lâk tumin a rawn ban leh a, ka lo ṭang kawh tlat chu mitmeng hriam hrûka min melh chung hian, "Tuna min zui lo a nih chuan nang leh kei hian inzawmna kan nei tawh lovang," a ti ta a.

A sawi zawh rualin a kal sawn a, tukverh bulah a va ding a, pawnlam thlir vung vung chungin, "I him nan theih tawp ka chhuah a, ka himna tur chuan i pên chhuak thei si lo, min lo hmangaih ngai reng reng lo tih ka hriat phaha ka lawm e. Samuel hi thih dan pangngaia thi a ni lova, ka pa dik tak a ni bawk, a thih niah keini nupa kan lang lo a nih chuan min ringhlel zual dawn tih pawh i hre tawp lovang, fin fiahna chhawpchhuah mai tur ka la neih kim loh avangin enthlâk mek ka ni," tia thaw hawk chung hian a rawn inher a, "Min zui dawn lo a nih chuan, zanin tlai ral hmain he farm house hi chhuahsan ang che," zawi ruih hian a ti ta a. 

Amah ka en vat a, min lo melh ve reng bawk.

"Lalngurmuana kalsan ai chuan ka zui lo mai ang che," ka tih chuan, "Farm house i chhuahsan dawnah pawh ka fapa kha i hruai tel dawn lo, Tleipuii ka bia anga ani kutah awm rawh se, eng atan maha min ngai lotu nupui ka mamawh lo," nghet churha tiin Sameer a ko zui zat a. 

Rang takin Sameer a lo lut a, "Ka fapa i lo awmpui thei ang em?" Tiin a zawt a, kan pahniha min melh tawn sek hnuah, "Madam hian rem a tih chuan awmpui thei e," a ti a, Sameer ka melh vat a, nui chung hian, "Ngaihtuah duh suh, ka enkawl thiam lutuk tlat," tiin kan nupa boruak hre lo ang mai hian a nui suk a, ngawi reng chung hian Lalngurmuana chu Sameer ka pawm tir ve ta nge nge e. Jehomalsawmkima vawikhat pawh ka melh lo.

Ni e, farm house ka chhuahsan dawn rau rau a nih chuan ka fapa tel lova chhuah ka tum lo a, vawiinah Malsawmkima rualin Samuel Pamei vuinaah chuan ka tel ang. Mahse, kan haw leh hunah Lalngurmuana hruaiin he hmun hi ka chhuahsan hlen bawk ang. Kîr leh tawh ngai lo turin...

Ka fapa aia hlu eng thil dang mah ka tan a awm lo. Jehomalsawmkima thlazar hnuaiah ka him tih ka hria; ani erawh chuan kan nufa himna aiin amah a lo indah pawimawh ta zawk tih ka hriatna hian min tinâ a ni.

Sameer hnenah 'Nan' siam dan ka hrilh zung zung a, Jeho ding ngawi ngul chu ka kal pêl a, bathroom-ah ka lut ve ta.

Tleipuii pawh titau mah se, a u thu a hnial ngam tawh loh avangin anmahni car in an kal tawh a, Buatsaiha nipui chawlhbukah kalh hnan a ni bawk. 

Mawitei ngaihtuah ngai a ni lo a, darkar ruk a ral hma chuan a harh dawn lo bawk.

"Hmanhmawh rawh, a tir aṭang khan ka thu awih ni la, kan kal daih tawh ang," tiin Jeho chuan min tur sek sek a, "Malsawmkim, ngawi reng khan min lo nghâk ringawt rawh," ka lo ti ṭhat a, a ngawi zui ve mai.

Minute sawmhnih hnuah, ka fapa biangah ka fawp zauh a, "Ka lo haw leh hma loh chuan thu awih takin lo awm rawh aw, uncle Sameer tibuai lutuk lo la..." tiin Jeho pawh ngaichâng lo hian ka chhuak ta a. Ka hnungah min rawn zui ve nghal vut bawk. Chhe lutuk mai.

Gurkha seat hnungah ka ṭhu lui ve ngat a, Jeho a meng rum úl a, ṭawngkam khat mahin min be lova ka be bik hek lo.

Bamos farm house kawtah Richard leh Omar te car a lo  ding a, Jeho chuan, "Kan tlai ta viau mai, min lo zui ve nghal mai rawh u," tia a biak zawh hnuah chak zet hian Mawkasiang lam kan pan ta a.

Samuel Pamei hi Mawkasiang-ah tho a chêng a, Jeho te inpui thlen hma deuh khan in nuam leh changkâng zet a nei a, pawnlam aṭang chiahin ka la hmu.

Traffic Jam nen kan thleng har lutuka Jeho phone vawi tam a ri tawh bawk. Vansangi te nupa an lo la thleng bik lo a, an lo thlen dawnah min lo hrilh a tum tih a sawi avangin ka be nawn tawh bîk lo.

Samuel Pamei in kawtah mi tam tak an ṭhu nghûk a, Super care hospital pawh vawiin ni atan an khar rih niawm tak a ni.

Mi hriatah chuan Jehomalsawmkima patea a ni tlat si a, an boruak hre ve lo tan chuan Jeho lainat pawh a awl khawp ang.

"Ruang kan kîl ve zawk dawn nia," tih chiah a sawi a, ka kutah nghet zeta hmerin inchhungah min luhpui ta a.

Kuangah an lo dah diam tawh bawk a, vanneihthlâk takin a hmel hmuh theih loh turin an lo chhin thlap. Khatiang thi hmelchhe lutuk te chu mipui hmuha dah lan chi ninghal lo chuan.

Nu Pianmawii chiah a ṭap a,  a bâk tumah kan ṭap lo. Arun leh Tleipuii an ṭhu dun a, Aryan chanchin eng mah ka hriat belh tawh loh avangin ka rilru a khingbai hle.

Super Care hospital lam aṭangin an director in thu a sawi a, amah hi Roman Catholic a lo ni a, ka vawikhat hriatna a ni bawk.

Samuel Pamei vuina hunserh hi chu ka sawi thui peih lo. 

Posmortem result ka hre lo a, Jehomalsawmkima pawhin ṭawngkam bahlah hlek lovin ruang kan va hmuh dan a sawi mâm purh a, Mawitei chungchâng erawh a sawilang eih lo. Tin, Khatam hmuna thi a nih vangin ṭhenkhat chuan Jeho an ringhlel hle dawn tih a lang sa ruak a, hei vang hian a nia kal tura min nawr sek sek nachhan. A ruang hmu hmasabertute kan ni a, kei ka lan ve loh chuan an ringhlel zual sauh dawn tih a hria tepawh a ni mahna.

Dârkar hnih a liam leh hnuah thlalâkna hun kan hmang zo a, Jeho kiangah zel ka ding a, ka kutah nghet taka vuanin, "Ka thusawi dik zia i hre tawh ang chu maw, mi mit kan la hle tih te hi i hriain i hmu ve êm ang chu," a ti sup a.

"I pa thattu kan ni lo a, amaha inthat a ni. Tupawhin min ringhlelin min dem tum mah se, thudik kan hre dun alawm," ka lo ti hmak. A ner suk ringawt.

Chutia kan lo inbiak lai chuan Bartho Saingurpuia te chhungkua an rawn thleng a, ruang nang tura lo tlân an nih avangin kan lo nghâk ta kha a ni a, Vansangi hmel ka hmuh tâkah chuan tlemin ka inthlahdul thei ta deuh. An chhungkaw bila thla an lâkpui ve hnuah, thlanmual lam panpui turin motor-ah an hlang lut ta a. Buaina pakhat a kiang ta angah ngaiin ka lo thaw huai mai.

Sangeeta Kar leh Pankaj Jain tepawh ka hmu a, inbiakna hun erawh kan nei ngang lo. Ka thawhpui hlui vek an ni a, ka ngaihbel nge min en hrek hrek nimaiin ka hria.

Inspector pakhat kan dinna bulah a rawn kal hnai a, "Mr. Jeho, thurochhiah in chhiar chhuah zawhah station lamah min hmu turin i lokal dawn nia," dam duam hian a ti a, Jeho a bu nghut ringawt.

Samuel Pamei rokhawmtu tur chu tu tak ni ang maw.

A nawlpui an haw zo tawh a, Shillong te chu Mizoram ang ni ve hek lo, in lenpui tih vel te a awm ve lova, ruang a kal tawh a nih chuan an haw mai zel. Mizo ka hmu nual bawk.

Thurochhiah chhiar a nih tawh dawn avangin Samuela lawyer a rawn ding chhuak a, Keini nupa, Tleipuii leh a nu, Vansangkimi te nupa bâkah Angelika te, midang pathum ka la hmuh ngai loh an awm bawk a, Samuel Pamei study room-ah kan ṭhu ṭhap tawh a, Lawyer chuan file sen a kutah a keng a, thil ropui tak a awm ka ring hran lo. Rishan kawngkhar bulah a ding a, a phone a ri sek mai.

Ka en reng lai chuan a phone phawrh chhuakin a bih zuk a, a hmel danglam nghal vek chu ka hmuh hmaih lo chiang kher mai. Chumi hnu lawkah Jeho phone a rawn ri leh ta a. 

A phone phawrh chhuakin Veranda lamah a chhuahpui a, Lawyer chuan, "Tun aṭanga minute 10 hnuah Samuel thurochhiah chhiar ṭan a ni ang," tiin a ṭhu leh rih a, Jeho hmanhmawh lutukin a rawn lut a, "Kan kal nghal a ngai, nidangah tuna kan tih tur hi chu kan ti mai dawn nia," ti ram hmukin midang pawh ngaichang eih lo hian min pawt tho a, ka la tawi khawmuang hram.

"Ngurthan, kan hmanhmawh a ngai, Bartho min lo zui chhuak rawh u..." ti leh puatin pawnah min kâi chhuak dawr dawr a, Bartho te nupa leh Tleipuiin min lo zui bawk.

Veranda zau laiah min dinpui chawt a, amah si chêtin min kuah hnai a, "Ka tihpalh a ni, ka thiam loh a ni, keima thiam loh vek a ni," ti tham ṭuakin a mittui a khap per sak a, a ngaihna ka hriat loh êm avangin, "Jeho.." tiin ka phun chhuak sap ringawt.

"Sameer an kâp hliam a, Lalngurmuana pawh an hmu zo lo..." tia a sawi veleh, "Eng a...eng maw i sawi..." Vansangi nen kan ti rual ṭhawt.

"Kan hnathawktute kha Arun te nen an haw hmasa a, Farm house chhungah Sameer nikhaw hre lovin a lo awm a, Mawitei chu a la awm, Buatsaiha pawh a la awm a, kan fapa Lalngurmuana zawk an hmu zo ta lo a ni." Tia Jeho a ṭawng lai chuan ka khaw hmuh a fiah lo a, ka âwmah hnawhtu a rawn awm nghal a, boruak khamkhawp ka hip thei lo titih...

"Ka fapa..." tiin ka phun sep a, ka mit sulh a, ka fapa mitthla chungin ka chhing ta riai riai a....

290423

B+>[BeckirafARenthleI]<+®®