26.24-89[A Becky Rafa Story]

26.24-89 

Ziaktu: Becky Rafa Renthlei

[Recap]

Nui huk chung hian, "I doctor thluak kha hmang turin ka hrilh ṭhin che a ni lawm ni, min hmangaih tih inhre chhuak zo lo tur khawpin buainain min nangching a, a reh fel rual rual hian min hmangaih tih i hrechhuak thung ang, chumi hun chu ka lo nghâk ang aw..." a tih leh lek phei chuan ka thluak a buai tulh tulh.

Kei hian Laljehomalsawmkima hi ka hmangaih maw, inṭhen tum lai laia hetiang thu âtthlâk sawi chhuah, thil awihawm pawh va ni suh. 

Dr.Nguthantluangi hian ka pasal ka hmangaih leh hmangaih loh pawh ka hre tawh lo chu a nih ber hi, chuta kârah amah ka pasal zâwkin ka hmangaih tih a sawi thei a nia! â..ka â thei takngial dawn alawm maw le.

-B®®

Tunah chuan Lalngurmuana kan hmuh lêt leh aṭangin dârkâr 24 a liam tawh a, ka hmuh phâk lova awm tîr ka tum tawh lo bur. A nihna takah chuan ka fapa min rûksak avanga ka chhungril hliam hi a thûkin a dam mai mai dawn lo tih ka hria; nu ka ni a, ka fapa tuma pawi sawi lo Lalngurmuana laka Dingngheti a ṭuan ta hi en liam emaw palzam mai mai ka tum lo hulhual. Hremna pêk ngei ka tum ruh hle.

A lo sawi lâwk tawh angin Jeho chuan Mawitei pawh Meghalaya Police Station-ah a hruai ta a, lo dan emaw amah dodal zawnga awm ka tum lo a, Bartho nen an kal ta kha a ni a, zanin dâr riatah Mawkasiang-ah Samuel Pamei chenna hmunah thurochhiah chhiar tur a ni a, Jeho berin kal ve tura min phût avangin Aryan kan tlawh zawhah Tleipuii nen kan kal ve dawn a ni.

Arun a lo lut nawlh a, Sameer hruai chhuak tura kal tum a nih vangin a kal daih tawh emaw ka ti nghe nghe.

"Madam, kan lo haw hunah ka unaupa tlawh tur chuan kan kal mai dawn nia, Sameer hian hlawh a la lam ve si lo a, hospital bill tur big boss ka dîl theihnghilh daih," inthlahrun hmel takin a rawn ti a, nui var var chung hian, "Hrehawm ti lo la, ka pasal kan bia ang e," tia ka phone phawrh chhuakin Jeho number ka dial nghal a, a'n la rang mai mai khawp a (h)!

"Aw, Ngurthan, eng nge ni ta?" a lo ti thuai a, tukin zing hma taka chhuak an ni a, Vansangi te chhungkua an kal tel ve bawk a, inpuiah Vansangi te nufa an lo awm rih dawn a ni.

Arun thil rawn sawi chu ka hrilh chhawng a, "Sameer te chuan a hlawh a khâwl zel a, drawer-a Safe-ah khan password chhutna a awm a, secret code hmet rawh," a tih chuan ka bo deuh hû.

"Eng password?" Ka ti leh rih.

"Doctor, helai station aṭang hian a ri-a sawi ka tum miah lo a nia, i lu bûra i thluak kha hmang rawh le," tiin a nui huk a, ka va ngei e. Thluak thâwl hi min ti ve mai siah.

"In mamawh tur ang lo la la, hospital i kal rau rau a nih chuan farm house-a kan mamawh zualpui tur damdawi lam khâwm nghal rawh aw," ti zung zungin, "Super care lamah Aryan bill lo chhût tîr bawk ang che, an pahnih bill kha chu keiman ka peksak ang," ti duahin kan inbiakna a ti tawp a, a dan pangngai ang chiahin a duh duh a sawi a, a dah leh hmak tawh.

Kan nupa passcode te chu 24-89 a nia lawm maw le, ka thluak hi a tlêm tak tak a ni ang, rang deuhin room-ah ka lut a, Drawer chung ber chhunga a bîka siam Safe lo awmah chuan 24-89 ka hmet a, awlsam tein a inhawng mai. A hma kha zawng zawngah khan min hrilh ngai miah lo a, pawisa ka mamawh a nih pawhin min pe mai zel.

Hnathawk ho hlawh sem tur inthliar fel sa vekin a lo awm a, Sameer hlawh pawh a lo dah hrang thlap mai, mahse, amahin peksak a tum vangin keimahni hman tur a dah hran aṭang chuan damdawi lamkhâwmna tur nen ka la chhuak tel nghal a, Jeho nge nge, engkim a tifel thlup mai.

Arun kutah pawisa ka pe a, "Aryan leh Sameer hospital bill tur chu i boss in a tum dawn a, Sameer pawh rilru tihrehawm lo turin i hrilh dawn nia, kan fapa kan hmu lêt tawh tih a hria em?" Tia ka zawh chuan a bu nghat nghat a, "Madam, hmeichhia kha eng tin nge i tih dawn, nangmah i che chhuak hreh a nih pawhin keiman hmâ ka lak theih nan boss min biaksak rawh aw," a ti a, hmeichhia tia a sawi hi Dingngheti a ni.

Arun kal liam tur ka thlîr a, Ka fapa ka hmalamah ka awrh bawk a, Tleipuii Veranda-a ṭhu chu Lalngurmuana ka pawm tîr leh tê tê hnuah Islam te riahna hmun ka pan phei ve ta a. 

Amah tinatu Deepak kha kâr khat chhung atan hrem a ni a, farm house lam kan buai êm avangin a chung thu la ngaihtuah a ni rih lo. Jeho hian a bân dawn nge engtia tih nge a tum ka hriatpui hek lo.

Badrul Islam chu khumah a bawkkhup zawngin a lo mu a, ka thawm a hriat veleh a rawn dâk chhuak a, "Madam," zawi supa tiin ṭhut chhuah a tum a, "Tho duh suh, tihian ka check zawk ang e," tiin a kawr ka hlimsak a, a hliam pawh a hil ṭha phian. Glove ka bun vek hnuah ka dressing thuak thuak a, na dang a neih leh neih loh ka zawt pah bawk a, nui suk chung hian "Ka dam tawh, ka hna ka ṭan thei ang.." inthlahrun hmel takin a ti a. A khawngaihthlâk ang reng.

Damdawi ka pêk fel hnuah ka chhuahsan nghal a, Buatsaiha tlawh ve ngei ngei ka tum bawk; ani hi chu kan hriat duh tam tak kawltu a nih vangin Jeho pawhin enkawlna ṭha tak a pe a, a farnu kutah a dah hmiah bawk. Nipui chawlhbûkah an la khung ta reng a, nâ a ngahin khuaiin a zûkna avanga a hmai vúngte pawh a reh hleithei lo.

Habib a lo awm rân a, ka lut min hmuh veleh ṭhutna tur min lo kawh hmuh sawk sawk a, Buatsaiha khuma mu hmel chu a chhiat ngaiin a la chhe reng, he hmunah hian recorder a awm tih kan sawi tawh kha.

A rawn meng chhuak a, a mit a sen rûm a, nui lui chung hian, "Zawhna min zawt tura lokal i nih chuan ka chhâng dawn lo che, nangmah vanga tun hun hi thleng ka ni, Ngrurthantluang, Samuela'n that tur chea thu min pêk lai khan lo kâp hlum che ila ṭha tur a nia," a ti nghut a, a kamchhuak a pangngai vei fu.

"Min that lo hi ka vanneihpui a va nimai awm ve, kum ruk zet i nupui lo ni tawh Mawitei pawh Police station lamah a liam tâk kha, in fapa kha eng tin nge a awm ang le?" Ka ti ve salh a, a mengphar nasa mai.

"Eng thil nge i sawi, Mawitei hetah a awm a maw?" A ti lêt hû a, ka lo bu nghat.

"Buatsaih, in nupaa Jail bang in zût a nih chuan i fapa khan enkawltu a nei dawn lo, fahrah inah a seilen a ngai ang a, a liam tawh siam ṭha thei lo mah la, i fapa pawi sawi lo hmakhua tal ngaihtuah rawh, Jehomalsawmkima hrechiangtu ber i ni a, i lakah zahngaihna a nei dawn miah lo a nia, a mâkpain a farnu ni lo nupui dang i nei tih a hriat hunah chuan in him tawh hauh lovang," ka lo ti duah a, a ngâwi ta rauh rauh mai.

Rei fê a ngawih hnuah ban zet hian a rawn ṭawng chhuak a, "Samuel Pamei leh Pianmawii ruahmanna bâk eng mah tel vena ka nei lo, an hmanrua mai ka ni," tia a sawi lai chuan ngun takin ka lo en kar a, Habib kawngkhar bula ding chu pawnah min lo nghâk turin ka hrilh leh phawt a, thuawih deuh hian a chhuak ve mai bawk a, koh phâka awm tur erawh chuan ka hrilh thung.

"Ṭha takin engkim min hrilh la, nang mah i tâl chhuak thei lo a nih pawhin ka unaunu Mawitei tal chuan i fapa a enkawl a ngai dawn a, ka theihtawp ka chhuah ang, i boss Samuel Pamei a awm tawh si lova, mitthi tawh na na na thu zawh fiah theih ni hek lo, nangmah hian i tawrh a ngai dawn a nia," ka ti ta a, a hmêl lan dan danglam tial tial chu ka hmu reng.

"Samuel a thi a maw?" A ti heu mai! Tleipuiin a hrilh tawh turah ka ngai a, mahse, a lo hre miah lo a nih ka ring ta.

"Khatam hmunah a in âwkhlum," ka lo ti hmak.

Chu veleh ṭhut chhuah tumin a insiamrem a, a ner leh sawk zel. A nâk ruh a tliak a, hliam dang pawh a nei nual bawk.

"Ngurthantluang, dâwt min hrilh tum miah suh," tiin min melh rum ûl a, ka hlau chhete eih si lo.

"Samuel khan engkim kan hre chhuak vek tawh tih a hria a, a hming Lalsiamthara a ni tih leh Tleipuii pa Ramhmachhuana tûrin a hrâi hlum tih nen lam kan hriat khan tâl chhuak thei turah a inngai ta lo a ni ang, a fapa amah aia luhlul leh huaisen zâwk Jeho malsawmkima phubâ lâkna tur tuar ngam lovin ama siam Khatam inah a in âwkhlum ta a ni," tih pahin hrawk ka thian kharh a.

"I nupui Mawitei pawh Samuel thih lai hian a bulah a awm ve a, Buatsaih, ngun takin ngaihtuah la, ka u Vanlalṭana thih dan chiangkuang taka hriat ka duh, ka duh ang hi min hrilh chuan in fapa hmakhua tur ka ngaihtuah ang, Aryan fapa pawh i fâ angin i en thei tho a, i thisen zawm zawk i fapa i ngaihtuah lovem ni?" Tia ka sawi hmiah hmiah takah chuan a hmel rum ûl kha a dam telh telh a, mak tihna leh awih theih lohna mitin min en ta zâwk.

"I û thihnaa a bul tumtu kha chu Jeho nu a ni, nupaa in insiam tâkah khan a fapain nitin a hlat zel a, i pasalin a hmangaih êm che avang leh a chhungkua ai pawha a ngaihsak tâkah che khan Pianmawii hmeichhe rilru a chhuak a; amah âia nangmah a dah pawimawh zawk kha a thîk a ni ber, Mizorama i haw theih dan tur ngaihtuahin a hmanhlel a, Jeho khan i kal a remti lo bur ṭhin a nih kha," tiin tui tlemtê a in leh rih a.

"Ngurthan, Bamos Farm house-a i kal zan khan Jeho hian Mizoramah i kal emaw tiin nangmah zawng turin min tîr ta a, chumi lai remchang chu chuhin a nu ka va hrilh ve nghal bawk a, i u thah dan tur ruahmanna a lo duang fel diam tawh, tûr chikhat 'Khasi Tharak' tia an sawi ṭhin kha min ken chhoh tîr ta a, rim a nei lo a, taksa tana hlauhawm tâwp a ni, kha mi kha i u zu in turah Mawitein a pawlh ta a, i u Vanlalṭana kha posmortem ta ula a hriat vek mai tur a ni a, mahse, emergency a zai ngai a nih tâk avang leh a boral zui mai avang khan keini kan him ta a ni. 'Tharak' hi zu in mite-ah a thawk chak bîk a, an kawchhungah thipût a siam a, thihpui an tam tawh..." tiin a sawi ta a. Ka ngaihthlâk chhung zawngin ka thaw ṭha meuh lo chu a ni e.

Ka kut ka hum ruh ngat ngat a, Buatsaiha tih nat duhna rilru ka pu miah lo thung.

"Mawitei nen hian in inṭhen tawh em, engvanga ka pasal hi haw em em nge i nih?" tiin zawitê hian ka zâwt leh a, ceiling lam melh vung vung chungin, "Thununna hnuaia awm ka peih tawh lo a, JK farm ah hian Jeho tih lohah engkim inrelbawl dan zawng zawng leh sum dinhmun hretu ka ni. Jeho pa Samuela khan an thuruk Tleipuii pa a thah chungchâng ka sawi chhuak lo a nih chuan JK ram hi ka kuta a awm tur thu a sawi a, aniin Bamos ram neih belh a tum bawka inremsiamna kan nei a, a fahrawn Tleipuii kan lam ṭangah siamin ka ngaizawng der ta a ni. Mawitei chungchangah chuan kan la inṭhen fel lo," tiin a thaw chhuak hawk a, hetiang em ema mihring rilru chhia hi an awm thei dawn em ni?

Buatsaiha ṭawng leh tuma a ân zuau lai chuan ka phone a rawn ri ta a, ka pasal a lo ni a.

"Farm house-ah i awm lo tih Arun hnen aṭangin report ka dawng a nia," a ti hmuk a.

"Islam hliam ka en fel lawk a," tia ka lo chhân chuan, "Insiam ula, Rishan rualin lokal tawh rawh u, Tleipuii pawh hrilh rawh, Mawitei chu custody ah a la awm rih dawn a, inpuiah ka lo nghâk ang che u," a ti ta a.

Buatsaiha lak aṭangin ka hriat duh tam zawk ka hre tawh bawk a, Aryan hmuh ka la tum ve bawk nen Habib ka ko lut a, "Ani hi chaw leh thei tui lo pe rawh aw," tiin ka hrilh a, a lo bu nghut nghut a, a nui suk suk bawk.

Tleipuii pawh a lo insiam peih diam tawh a, ka thang hlanin a vahpa a lo bual diam chu niin! Aryan kan hmuh dawn vang nge a inchei riauin ka hria. Buatsaiha nen inṭhenna mumal tak an la nei lo a, chuti chung chuan Aryan a ngaihsak leh húrh tho a, a ti mak a nia. Mahse, ka sawi ve tur a awm lo a, Jeho khan an chungchâng a ngaihtuah tur thu a sawi kha maw le.

Zonunthara pawh kan hruai tel ve a, Habib ngenin a la ṭap ngat ngat, a va buaithlâk e.

Arun leh Sameer an lo thleng tawh a, Sameer hmel dâng lap chu a khawngaihthlâk ve reuh. A dâr veilam a bânpuam nena inzawmna laiah an kâp kha a ni a, a la tuam vâr lûk mai. 

Min hmuh rual rualin, "Madam, i duh tâwkin min hauin min sawisa thei ang," inthiam lo lutuk tih hriat fahran hian a ti a, ka lo nui hak.

"Nangmah kâptu che kha tu zâwk nge?" Tiin ka zâwt teh daih a, "Pankash.." a ti hmuk.

"Ani kha ka that lo a nih chuan Sameer ka ni lo ang," tih zawm lehin a mitmeng a hriam nghal vek a, "Raitong lamah an dah a, a thi har vak lovang," ka lo tih chuan, "Tuin nge kut thlâk?" Tiin min zawt lêt a, Rishan nen an insual chungchâng ka hrilh thuak thuak a, "Umn..Rishan lawmthu hrilh a ngai a nih chu," tia a la ṭawng mek laiin Gurkha a lo thleng a, amah Rishan Songbet chu driver seat aṭangin a rawn chhuk tharh a, a nui sâng bawk.

Sameer leh Arun a nuih var var hnuah keimah min rawn melh a, "Madam, kan kal nghal mai dawn em ni?" a ti a, Tleipuii ka ko a, ani pawh Zonunthara paw chungin a rawn chhuak a, keiin Lalngurmuana ka hma lamah ka awrh bawk a, muangchâng tawh lovin Super Care hospital panin kan tlan chhuak ta a.

Dârkar khat a liam leh chuan Cabin-ah Aryan khum bulah kan ṭhu ṭhap a, a hmel ka hmuh lohna a rei ta a, a lo inzuah buk ve deuh bawk nen ka hai ṭhelh alawm maw le.

A medical file ka check sak laiin Tleipuii puak lai a fapa Zonunthara chu a melh leh zuk zel tih ka mit sîrin ka hmu ru reng, "Heta lokal tur hi i ni lo asin," tiin Tleipuii a bia a, ani lah chuan, "A kal tur dik tak ka lokal a nih hi, Aryan, damdawi in i chhuahsan hunah sawi dun tur kan nei a nia, Mama pawh engkim ka hrilh vek tawh, i madam hian Zonunthara pa i ni tih a hre bawk aw.." tia a sawi lai chuan Aryan hmai a sen awp awp a, a zak hle tih a hriat mai.

Hospital bill tur a kutah ka pe a, "Lo dam vat vat ang che aw, i dam ṭhat loh chuan a buaithlâk," tiin Rishan tukverh bula ding chu ka hûi zeuh a, "In lama kan kawl tur damdawi kan lâk khawm a ngai a, anni pahnih hi chu tihian lo awm rih rawh se, sawi tur an nei ṭeuh ang," tiin Rishan ka bia a, Aryan a lo phun hluk a, "Madam, Rishan khan Super Care hospital hi nuam a ti thar riau a nia, i ṭhiannu Sangeeta number pe ve rawh," nui kur kur chunga a tih chuan a ngaihna ka hre lo deuh dawn a; mahse, ka hrethiam leh vat tho.

Rishan Songbet leh Sangeeta Kar maw? Â...an va inhmeh lo e..

Dârkar chanve zet damdawi inlam khawm nan hun ka hmang a, Rishan chuan Motor-ah a lo thiar lut zel a, Farm house-ah mamawh kan ngah thei si a, damdawi tlanglawn ka thlang chikim hle.

Jeho lahin min lo call sek tawh bawk si a, tlailam dar li velah Aryan awmna hmun kan chhuahsan ta a, a fapa pawh a pawm ve tâk kha.

Mawkasiang-a Jeho te inpui kan thlenin nu Pianmawii ka hmu lo a, "A sual a chhuah leh tawh a nih kha, Vansangi nen an inhnial leh pek a, tisawn inkhung mai mai rawh se, thurochhiah chhiar chhuah a nih hunah tun ai hian a thin a la rim dawn chauh.." tiin Jeho chuan kan nupa room ni ṭhin inchung lamah min chhohpui a.

Tleipuii leh Vansangin zanriah tur an buatsaih a, Bartho te pafa leh Zonunthara pawnlamah an infiam thung.

Jeho khum zau zetah chuan kan fapa ka mut tîr a, Rishan leh Sangeeta chungchâng Jeho bula ka sawi char char laiin intur a lo dawm a, "Ka nupui Ngurthantluangi dik tak kha ka hmu leh ṭan tain ka hria," tia nui suk chung hian ka ṭhutna lam a rawn pan phei a, "Ka lo call sekna chhan che kha chu nupui ka nei tih inhrilh nawn ka ngai a, i hriat nawn fo ka duh bawk," ti sup chungin ka biang a rawn chûl a, ka lo thaw halh.

"Ngurthan," tia ka hming a lam rualin ka hmai bul chêtah a lo kûn hniam a, "Kan buaina zawng zawng theihnghilhin hun reilote i kianga hahchawlh ka duh, min hnial dawn lo ti raw?" Tiin a mit thim raih chuan khawdang hawi lovin ka mitah tak min en a, hetiang hun hi alawm ka lo thlâkhlelh fo ṭhin kha.

Ka pasal Jehomalsawmkima hian mi hneh theihna riau a nei tlat a, eng anga thinrim leh lungawi lo pawh ni ila, a chhungril aṭanga chhuak min thlâkhlelhna leh min ngaihsakna âwkâ hi hai chi rual a ni lo. Ka thinlung sak a tinêm zel chu a ni e, ka Laljeho hian ka duh a hria a, min hrechiang tawh êm atin ni.

"Jeho.." ka ti zawi raih a.

"Jehomalsawmkima zawk maw le, hmangaihna kan chendun dawn apianga min koh dan ṭhin a nia, tunah pawh hian ka nupui thinlung sak leh luhlul tak tinêm tur hian Malsawmkima'n chêt ka lâk a ngai," tia nui ruh ruh chung hian a fapa khuma mu chu a melh pah zuk a, "I mutna kha kan hmang mamawh asin maw le.." a'n tiah. 

"Tunah kan ti thei dawn em ni? Ka dam a la chiang si lova," ka lo ti nang nang a, kiai suk chung hian, "Ka theih tawpa dîmin chêt ka tum dawn nia, ka nghâk peih tawh lo, a ninawm.." a ti hluk a, ka lo nui tawp.

A taksa rim faisar chu ka hîp vang vang a, a rei tawh a ni. Hetianga kan awm lohna chin hi a rei tawh takzet.

"Nupa chu kan inhau ang a, kan ṭhat lohna lai pawh kan inhrilh tawn tur a ni, ka hmangaih che tia ka sawi a nih chuan a ral ve mai mai thei lo a, ka sût leh thiang lo bawk, min hmangaih tih ka hria asin. Mahse, harsatna leh hun khirh tak kârah kan awm a, min hmangaihna tur hun siamsak i ni ngai hek lo, ka ta i ni tih i theihnghilh châng lah a tam, Ngurthan.." tia ṭawng zawm tawh lovin dam thlap hian min fawp ta a, a nghâwngah ka lo kuah ve vat bawk.

Inṭhen ka sawia kalsan ka tum zawh poh leh a ni hian min hnaih a tum sauh zel. Kalsantu nih a duh lo a, kalsan ngai mipa a nih lai khan ka kalsan lawi si lo. Â..Malsawmkima ze mak lutuk hian min ti â in ka thluak a ei mêk zel chu a nih hi.

Ka nau neih inzai aṭanga thlakhat leh kâr khatna chiahah a nupui ka ni famkim leh ta. "Ka dîm leh lutuk chea ka hah vek," a'n ti hrâm a, ka va ngei e. 

"Khum laizawlah chiah ka nupui nih tum lo la, khawi hmunah pawh awmin kal la, i Laljeho hi i thlah thiang lo a nia aw.." ti sup chungin ka sam chhâwllêng a hui kiang a, "I duh hun hunah farm house hi chhuahsan ang che, ka fapa tel lovin.. tih vawikhat pawh i kâ aṭanga a chhuak leh a nih chuan ka fapa tel ngeiin ka kal tawh ngei ang," thutak zetin ka ti ve ta a.

A mitmeng a danglam hret a, chutah, "Hrehawm tam tak kan paltlangin kan tuar dun tawh a, kan hmaah eng nge awm hre lo mah ila, nghet taka kan invawn tlat chuan kan ban phâk maiah hlimna a awm a nia, kan beidawng tur a ni lo," tia a sawi laiin mut chhuakin min zém a, a ṭawng tawp lam phei chu hla tak aṭanga lo ri chhuak ang mai a ni.

Ka bianga kut dái raihin a rawn deh chuan chiang mang lo hian ka meng chhuak a, ka hmai bul sêtah Jeho chuan min rawn en a, ka harh deuh kâwk. "Jeho, dar eng zat nge?" tiin ka zâwt a.

"A la tlai lo, dârkâr chanve vel bâk i la muhil lo a nia, i duh chuan mu rih rawh," dam thluam hian a ti a, mahse, ka ṭhu chhuak a ni deuh nghal mai.

"Zanriah kan la ei dawn lo em ni?" Tia ka zawh chuan koki san âwk chung hian, "Ka farnute pahnih khu e, titi pahin eirawng an bâwl a, an muang chhâ chhâ em mai, a châng leh Ui leh Kêl thlun pawlh angin an awm a, tunah lêm ei rawngbawl ṭhulh ṭhakin an ṭawng leh a," tiin a nui ta a.

Inbual tura ka lut tur chu min han zui a tum teh ngawt a!

"Jeho, i fapa hi lo awmpui ve la maw le, khatia min zui kâwi tum phêt lo khan," ka lo ti hlak a, a nui suk suk duh chauh. 

A fapa bulah a va bawkkhup a, "I nu luhluli hi chhún hlek suh ang che, a thinchhe ropui si..'' tia a sawi laiin bathroom-ah ka luhsan daih.

Zan dar sarihah zanriah kan ei hman ṭâwk a, Tleipuiin a nu room-a awm a va ko a, a lo chhuak duh chuang lo, Rishan leh Jeho, Bartho pawh tiamin zanriah ei hma lawk khan in tur an dawm leh rih a, Rishan leh Sangeeta ka ngaihtuah chhuah apiangin ka nuih a za tlat zel. 

Dâr riatah chiah Samuel Pamei chenna hmuna a study room-ah kan kim ṭhap tawh a, Samuela Lawyer Jibu Hussin chu file keng chungin a rawn ding chhuak ta a.

"Tunah hian Mr.Pamei thurochhiah kan chhiar chhuak dawn a, mahni chanvo ṭheuh kan lo chhinchhiah dawn nia," tiin a hrawk a thian kharh a, a hmel phakar hmel zet hi ka ngainat zawng a ni lo. A tarmit phên aṭangin min melh rû a, ka lo melh lêt ve ngar bawk.

"Ka fapa neihchhun Laljehomalsawmkima'n Super care hospital-a ka share zawng zawng leh Aizawla ka in hi a chang ang a, ka bank account a mi zaa sawmnga hi a chang thei bawk ang," tiin Jibu chuan a chhiar a, ka lo meng phâwk nasa mai. Jeho ka va melh zeuh a, ngun taka thil ngaihtuah hmel a pu thung.

A chhiar zawm leh a, "Ka fanu Vansangkimi'n Mawkasianga ka in leh ka bank account ami za zela 25 hi a chang ve leh ang a, ka fate nu Batesi (Lalpianmawii) hian ka account aṭang vêkin zaa 25 a chang bawk ang," tia a chhiar zawh meuh chuan nu Pianmawii a ding hliai a, "I pain hetiang khawp hian a duhsak che a, a laka i thil tih leh i chêt dan kha ngaihtuah chuan eng mah rochun tlâk i ni lo," ti hlawih hlawih chung hian Jeho a melh rum âl a, kan ngawi ṭhap.

Muangchângin Jeho a ding chhuak a, "Ani rosum kha eng atan mah ka ti lo, kan laka a chêt dan kha suma thleng theihah a ngai a nih chuan a tisual a ni. A lak aṭangin engmah dawn ka tum lo ve, dere pawh ka dawng lovang," a ti hmiah.

Chutah Vansangi a lo ding chhuak veleh a, "Kei pawh eng mah ka duh lo, ka pa a ni lo, ka pa chu a thi tawh," a  lo ti ve si. Jibu chuan Jeho kutah envelope a pe a, "I chhiar chhuah hunah min hmu turin i lokal dawn nia," tiin tumah ngaichâng lo hian a chhuak zui ta a.

Tleipuii leh Buatsaiha tan eng thil mah a hnutchhiah lo. Tleipuii chu a fahrawn zawk a ni a, Buatsaiha eng emaw tal a pêk ve ka ring deuh kha a ni a, a teuh si lo. A tawpah chuan a fapa Jehomalsawmkima tan a tam ber a dah leh tho si. Samuel Pamei thluakah khan eng nge awm ang aw..

Titau chunga Jeho nu chhuak chu kan en ṭhap a, Tleipuii a vui eih lo, "Ani tel lo khan tun hi ka thleng tawh a, a eng mah ka ît lo," a ti hmiah. Hei pawh hi a û ang chiaha luhlul tho a ni bawk.

Bartho te chhungkua leh Tleipuii te nufa inpuiah riah law law an tum a, keini kan haw dawn thung.

Jeho phone a rawn ri a, Sardar Police Station lam aṭangin Mawitei a inpuang tawh tih an rawn sawi a, ka lo thaw huai mai. Jeho hnenah, "Farm house-ah kîr vat ila, Buatsaiha awmnaa recorder i dah kha Police kutah pe ang che," tia ka sawi chuan min en hû a, "Thil sawi a nei tawh em ni?" Tiin min zawt a.

Buatsaiha nen kan inbiak dan tlângpui ka hrilh chuan "Ka hnuaia thawkte hruai lovin ani hmuh ka remti hleinem, i fing mawh hle mai," a ti nghut a, a lawm chiah lo tih a hriat mai.

Habib a awm ve thu ka sawi chuan tlemin a inthlahdul ta zâwk a, Buatsaiha a ring zo hlawl tawh lo tih a mitmengah a tilang bawk.

Raitong hmuna Omar te chênnaah Jeho chuan Motor tiding turin Rishan a hrilh a, zan dar sawm a hnai kuar tawh.

Omar hnenah Pankash awmna a zâwt a, ngaihsam zet hian, "A hliam tuar lovin nizan khan hremhmun a pan ta a nih kha, a thih thu lo sawi kher ngai ka ti lo a, Police lakah min thup sak a ni ang chu," tiin pawh-lah zet hian a ṭawng a, Jeho pawhin chhân ngaihna vak a hre lo.

Omar bawk chuan, "Dam chhuak mah se, i Asst.Manager Sameer khan a that tho ang, hetia a thih tâkah chuan Sameer tan pawh a ṭha zawk, tual thah thubuai nei turin ka duhsak pui lo, Barua ṭhianpa a nih angin ka duhsak viau a nia," tiin Jeho darah a bêng thuk thuk a. 

"Nunphung pangngai i zawh hunah nupui neih ka rilrûk a nia, Richard anga Gay nih tumna rilru ka put hma hian hmeichhia sengluh ve ka tum," tia nui zui hawk hawkin min rawn melh a, "I nupui anga kawlh a ni lo mai pawh a.." a la ti hrâm. Jeho nen kan inmelha kan nui tawp.

A hnua Jeho sawi leh danin Omar leh Richard-a farnu Shisha kha an lo 'in chu e kha' ve deuh niawm tak a ni. Dingngheti pawh Woodland hospital-ah a la awm a, a dinhmun a ṭha lutuk lo tih a sawi tel bawk.

"Dingngheti kha vawikhat tal chu ka hmu leh duh," ka tih chuan Jeho a rum dut a, "Buainain a hnaih che a nih loh chuan, buaina zawngtu ni suh, dawihzep nun nei turin ka duh lo che a, mahse, ka nupui i nih tlat avangin mahni inthunun zir ang che.." a ti teh daih.

"Ka fapa tan phubâ lâk ka tum ve chauh zawk a ni, min dan i tum em ni?" Ka lo ti ve khá khá a, "Tum lo e, tun atan chuan ani theihnghilh la, i pasal thlazar hnuaia awm zir rawh.." tih chiah a sawi.

Farm house kan thleng a, in chhungah pawh lut lovin Buatsaiha awmna hmun lamah a phei zui daih a, eng tak va ti dawn ni maw?

Samuel Pamei thihna te leh ka fapa rukbo chungchanga kan buaina chu a fel lek lek tawh a, ka u Vanlalṭana thihnaa a bul tumtu Jeho nu zalen taka a awm ka hmuh hian ka thâ a na hle. Han sawi chhuak dawn ila, ka pasal nu a ni a, a fiahna tur ka nei ve si lo. Mahse, Mawitei leh Buatsaiha an inpuana engkim an sawi chhuah tawh chuan ani pawh a him rei lo turah ngai ang aw. 

Nilaini a ni a, hnathawktute a bo a bâng awm lovin thing thiar turin Fâr hmun lamah an kal vek a, kan chhungkaw bilin farm house-ah kan awm a, Jeho pawhin a khât tawkin Buatsaiha leh Islam a tlawh chhâwk sek a, a duh ang chhânna Buatsaiha hnen aṭangin a la hmu lo nge hmel dur khup chung hian a rawn chhuak a.

"Buatsaiha hnenah Samuel thih thu i lo hrilh a ni maw?" Tiin nelawmna tel miah lo hian min zawt ta a, ka lo ngawi reng, "Tleipuii takngial pawhin a hrilh lo a nia, eng rilru pua hrilh nge i nih reng reng, Habib khan va hmu hman lo se chuan ama nunna a la hman ngei ang, kan hriat duh min hrilhtu tur a ni tih i hre reng si a, Samuel thih danah investigation a kal mêk a, ka farm house-ah ani hi thi leh ta se, ka tâl chhuak theiin i ring em?" A ti ta a.

"Chutiang lam ka ngaihtuah thleng lo," ka ti sap a.

"I ngaihtuahna a tâwi ṭhin rêng a ni, Buatsaiha awmnaah vawikhat mah ka thu lovin kal tawh suh," ti hmuk chung hian inbual turin a lut zui daih a, ka va han inthiam lo tak. 

Samuel anga mahni nunna lâk a tum ang tih lam reng reng ka ngaihtuah thleng pha lo tak tak. Jeho thinrimna pawh a âwm hliah hliah zawk.

Khua a thim ṭan a, hnathawktute tumah an lo la kîr lo a, Sameer a la dam chian loh avangin a room ah a mu a, Jeho inbual zo a lo chhuak a, ngawi reng hian zanriah kan kîl a, kan boruak a nuam viau lo. 

"Rei lote an hnathawk ka zuk thlir ve lawk ang, ka rin aiin an zo har daih mai," tiin pheikhawk a bun pah mawlh mawlh a, "Jeho.." zawitea ka tih chuan "Umn" a ti dút ringawt.

"Buatsaiha khan ka u thihnaa a bul tumtu chu i nu a nih thu a sawi a.." ka lo tih chuan, "Ngurthan, khatiang lam kha chu duhtawk rih rawh, eng mah thuchiang leh rin tlâk a la awm lo," a ti hmuk a, ka ṭawng zawm ngam ta lo.

Jeho chhuak tur chu Sameer room-ah a lut kâwi leh rih a, eng nge an sawi pawh ka hriat si loh.

Ka phone a rawn ri a, Vansangi hnen aṭangin a ni. 

"Hello" ka ti hman ṭâwk tihah, "U Ngurthan, ka nu leh Tleipuii an intibuai a, Mama kha ka lo be lawk teh ang, a phone-ah ka call tlang thei lo," a rawn ti ta a. Jeho chhuah thu ka hrilh veleh, "A awmna a hlat loh chuan min kohsak lawk ta mai che, Bartho lahin ka inrawlhna tur a ni tawh lo a ti bur bawk si," mangan hmel takin a ti leh bawrh bawrh a.

Eng thilah tak intibuai leh ang maw!? 

Lalngurmuana muhil sâk sâk chu puan sin ṭhat tîrin ka chhuahsan ta a, Jeho awmna a hlat loh vanga chhuahsan ngam ka ni. Sameer room ah ka va lut a, ka chhuah lawk tur thu leh ka fapa ka kalsan tih ka hrilh a, "Madam, tun ṭum chu ka lo venghim tlat tawh ang," tiin a nui a, ka kal hla dawn lo tih a hriat vang te pawh a ni mahna.

Buhpawl in ka thleng phei a, a piah lawkah chuan hnathawktute mi 30 chuangin thingtum an lo thiar suau suau a, ka awmna aṭanga feet 20 vela hla a ni.

Muangchânga ka kal phei lai chuan Khuai khâwina hmun aṭangin ṭawng ri ka hre ta a, ka pasal Jeho aw a ni bawk.

"Richard kutah dah ula, a awmna hospital sawn bawk ang che u." A tih ri ka hriat chuan tu nge a biak hriat tumin kawngkhar ka pan phei a, a lo inkhar lem lo. Thla êngin in chhung a chhun raih a, chiang vak lo hian Jeho niawm tak pawh ka hmu thei tawh, a pumrua a lianin a sâng a, hai theih ninghal lo chuan.

Chutia ka thlir reng lai chuan, "Che hlek suh, i chêt chuan i thluak ka kâp darh vek ang," tiin tu emaw hian Jeho tukkhumah Pistol a chuktuah a, mipa aw thum lam a ni. Min hnungchhawn zawnga ding ve ve an ni a, hnathawktute zinga mi chu a ni lo phawt.

Jehomalsawmkima a che lo va, a ṭawng hek lo.

Amah tintupa chuan, "Thlamuang takin i thi dawn nia, helai farm house ah hian chhantu tur che pakhat mah an awm lo," tia a ṭawng lai chuan ka dinna bul velah hmanraw chuh tur a awm em tih ka lo melh kual thung. Thawm chhuah ngam a ni lo a, vawikhat lek pawh bengchheng ka siam a nih chuan Jeho nunnain a tuar dawn tih ka hrethiam lutuk tlat.

Kawngkhar bula Suahdur leh Bawngtuthlawh intung chuan ka mit a la hle, mahse, ka chesawn ngam rih si lo.

"Mr.Jeho, Dingngheti awmna hospital sawn i tum kha i sût lo a nih chuan ka sawi ang chiahin ka ti ang," tia a sawi laiin a ri rap a, Pistol hmetpuak mai thei turin a inralring tawh tih hrilh hranpa ka ngai lo.

Jeho chuan, "Tunge i nih?" Zawi fiah takin a ti a, a che sawn eih lo.

Chu pa chuan, "Pankash a thi tawh a, a unaupa ka ni.." tiin a nui lui hawk a, chutia an inbiak lai chuan dimtêin Suahdur zawk chu ka chuh ta a, inngaihtuah kâwi hman ka ni tawh lo, dawihzepa khawmuan hman lah a ni hek lo. Suahdur hum chung chuan ka pan phei ta a, vawilehkhatah chu pa tukkhumah tak chuan ka vaw ta a.

A râk ṭhawt rualin chhuatah Pistol a thlauh a, ka kein ka thaisawn vat.

"Jeho..'' tiin ka ko ṭhawt a, a che nghal vut.

"Ngurthan..nangmah maw?" a aw-a mak tihna lang chhuak chung hian a ti lawi rût a, chhuata mipakhat tlu reng chu ṭhâm tho lawpin pâwnah a hnûk chhuak ta a.

Ka suahdur ken lai paihin chhuata Pistol tla chu rang takin ka chhar nghal a, ka pasal ka zui chhuak ve ta a. Ka thâ a khûr eih lo.

Jeho chuan chu pa chu Farm house lamah a hnûk phei dâwr dâwr a, Mask a vuah tlat avangin tunge a nih ka hre thei chuang lo a.

An hnungah ka zui ve zel a, keimah pawh min rawn ngaihsak chuang lo hian Farm house kawtah chu pa chu a dinpui ta a, a êng ṭha tawh bawka engkim a hmuh chian theih ta.

Jeho chuan a hmai tuamna a phih thlâksak a, ka hmuh vawikhatna a ni. Chutih lai chuan hnathawktute an lo thleng ṭan tawh a, Rishan ka hmu hmasaber.

"Madam, Boss.." tiin Jeho a hnaih ruak a, "Ani hi lo buaipui la Khatam-ah dah ang che," ti hmuk chung hian min rawn en ve ta chauh a, "Ngurthan, hetah hian lokal teh.." tiin nui lek lek chung hian min bia a, ka lo ding khawt at ringawt.

"Lokal teh ka tih chu.." a ti tak nain amah zawkin min rawn pan hnai a, "I thil ken lai kha min pe rawh le," a ti zawi ruih a, ka kut dinglamah ka Pistol hum chu a melh chat bawk.

Che lo va ka la din reng avangin, "Ka nupui hi a lo huaisen ta hle mai," tia nui hawk chung hian, ka kuta awm Pistol chu min lâksak ta a, a la nui reng bawk.

"Lalngurmuana nu hian ka nunna vawihnih a chhanhin ta, ka lawm e aw.." ti sup chung hian ka kâwngah min kuah a, ka lo lâi ringawt.

"Jeho.." ka ti hliai a.

"Khalai hmuna i lokal nachhan kha hre mah suh ila, ka nunna chhanhimtu i ni," tiin ka chhipah a fawp zauh a, "Kan fapa kalsana kei min rawn zawnna chhan kha eng thil pawimawh nge ni ta ang," tiin in chhung lamah min luhpui ta a, Sameer malchungah Lalngurmuana a lo mu meng kar a, kan room-ah awm lovin Sofa-ah a lo ṭhutpui ve ngial.

Jeho chhoh melh hâ chung hian Vansangi thil rawn sawi kha ka hrilh chhâwng ve ta a.

Ner suk chung hian, "Anmahni inchingfel ve rawh se, ka nu hi a thluak lam a dik tâwk tawh lo a, tun aṭanga thla hnih a ral leh chuan mi â dahna hmunah ka thawn liam a ngai dawn," a ti nghet churh.

"Eng a?" Ka lo ti hê-hâw pek a.

"Ka sawi ang kha a ni mai, a chi kawng ṭha lo mai ni lovin, a thluak lam a fel lo a, nitin zual lam a pan zel bawk," tiin a sawi ta a.

Hei vang hi a lo nih chiah hi ka u thahnaa bul tumtu a nu a ni tih a hrereng chung pawha a ngawih tlat nachhan.

Ama thusawi ngei, "Thil tisualtu chu hrem lohvin a chhuak lovang, ka thisen zawmpui pawh ni se.." tia Jeho ṭawng ri kha ka hre thar nawn leh ta.

Nu Pianmawii erawh chu keini tih hah ngai lovin chunglamin ro a rêl dawn tihna a va ang ve.

Ni e, tunah chuan kan insawr zîm ta bawk a, tuma chimbuai lohva kan awm hun leh hlim taka chhungkua kan chênho ni a la thleng ve turah ngai ang.

Nui var var chungin Jeho bulah ka ṭhu a, Sameer pawh eng mah hre lovin a nui ve ruh ruh ringawt.

"Zaninah lawmthu sawina ka lan tîr ngei a ngai dawn a nih hi.." tia Jeho chuan min kuah thoin, Sameer, i pi nen kan inbual chhungin ani kha lo awmpui leh rih rawh aw..." tiin a fapa meng kar chu a thlêk vung vung a, Sameer a zak ringawt nia maw le.

Kan nupain Bathroom lamah kan inzui lut ta a...

020523

B+>[BeckirafARenthleI]<+®®