27.24-89 [A Becky Rafa Story]

27. 24-89

Ziaktu: Becky Rafa Renthlei

[Recap]

Ni e, tunah chuan kan insawr zîm ta bawk a, tuma chimbuai lohva kan awm hun leh hlim taka chhungkua kan chênho ni a la thleng ve turah ngai ang.

Nui var var chungin Jeho bulah ka ṭhu a, Sameer pawh eng mah hre lovin a nui ve ruh ruh ringawt.

"Zaninah lawmthu sawina ka lan tîr ngei a ngai dawn a nih hi.." tia Jeho chuan min kuah thoin, Sameer, i pi nen kan inbual chhungin ani kha lo awmpui leh rih rawh aw..." tiin a fapa meng kar chu a thlêk vung vung a, Sameer a zak ringawt nia maw le.

Kan nupain Bathroom lamah kan inzui lut ta a...

-B®®

Nunphung pangngai kan zawh chho ṭan a, Farm house lamah buaina dang a thlen belh tawh rih lo. 

Hman zana Jeho thah tumtu kha Pankash unaupa niin Raitong wood stock farm aṭanga hel ta leh GS Gang mi leh sa a lo ni a, a unaupa hliamtu Rishan Songbet thah tuma lokal a ni; mahse, hna a lo thawk si a, hun remchâng a hmuh mai loh avangin Jeho zâwkah a ṭuan ta ringawt kha a ni a. Tunah hian Khatam-ah hrên a ni a, ka pasal thupêk angin thlakhat khung phawt tur a ni a, a inlam lêt emaw JK farm tibuai tawh lo tura thu a tiam chuan chhuah zalên a ni maithei thung.

Ka pasal Jehomalsawmkima hian amah thah tumtute pawh nise tual thah kher hi chu a duh lo tih ka hrechiang thawkhat tawh. A hnuaia thawkte an ni emaw keini nufa thlenga min tih nat tumtute erawh chu hremna a pe ngei ngei bawk.

Samuel Pamei thihnaah chhui zui viau tur a awm hran lo a, investigation hrang hrang leh Posmortem result aṭangin mahni duh thu rênga intihluma ngaih a ni a, Samuel vui ni-a lokal ve Inspector Ramos khan Jeho hnenah, "A hmuna rawn en diktu ka ni a, i nupui unaunu  inpuanna aṭangin i patea hian thih a lo tum ruh hle zâwk a nih kha," tiin a hrilh a.

Ani Jeho thung chuan, Samuel kha Tleipuii pa Ramhmachhuana thattu a nih vangin a lakah Case file a tum a, Inspector Ramos vêkin, "Mahni inthat a nih angin eng case mah file lo la ka duh, mitthi tawh khin hi thil buaithlâk tak a ni a, a ruang kan hmuhna hmun chu i hriat kha, nakinah i tan thil a buaithlâk zawk thei a nia," tiin duhsak takin a hrilh a, Jeho pawh hmin zân lo mah se, Inspector Ramos thusawi zawmin a patea lakah a kut a sil ti ila a dik ber ang.

Mawitei erawh ka u Vanlalṭana thihnaah a inhnamhnawih ngei tih a chiang tawh a, "A office bâng zu lam turin a kal a, u Ṭana unaunu ka nih angin duh duhin a room leh an inah ka lut kual ngam a, khatia zu in tur nena a haw kha a bula zanriah ei tur angin ka insawi a, ani chu tlai aṭangin zu a tauh ṭan tawh a, zanriah ei hmain hun remchang ka hmu ngang si lo a, tlêma a ruih tâk deuh hnu leh in tur a neih mang tawh loh avang khan a dang  lâksak leh tumin ka chhuak a, khata a in turah khan 'Tharak' tia an sawi, ka pasal Buatsaiha lo ken chhoh kha ka pawlh sak ta a ni," tiin inthiam lohna lutuk pawh nei lo hian a sawi mâm purh. Kei chuan ngaithla ve lo mah ila, Jeho hmel hriat amah dâwptu kâ aṭanga kan hriat leh dan a ni. 

Khumah ka ṭhu a, ka û ka ngaihtuah chhuah apiangin ka mittui a far lo thei lo. A farnu neihchhun Ngurthantluangi hi ka indem ngawih ngawih a, a tîra ka sawi ang deuh khan ka thisen zawmte pakhat mahin ka thiamna an chhawr hman lova, hei hi ka ṭahna titamtu ber a ni; nunna ka pe thei lo, mahse, anmahni enkawl tur takngial pawha ka che chhuak thei lo kha nêp ka inti êm a ni.

Jeho a rawn lût a, "Mittui ngah lutuk loh tur tih ka sawi tawh kha, i tawrhna tinêp thei se chuan ṭap hawm hawm mah la pawi ka ti lova, mahse, i mittui far khan i hmangaihte a ko kîr tawh dawn si lo; ṭap tawh suh aw, i ṭah hian awm dan tur ka hre lo a nia," tiin min kuah a.

Ka mittui parawl ṭeuh chu a kut hnunglamin min hrûksak a, "Nang ka neih theih nan che kalsan ka nei a, ka kianga i chen reng theihna turin kalsan i neih ve a ngai a ni," a ti duah a, ka mittui khap per sak chung hian, "Keimah ngei hian that ve thei ila ka dam mahna.." ka lo ti ve ngawt a.

"Khaih khaih, insûm deuh la, hmeichhia i nih kha, ka nupui venghim zo lo tur khawpa mipa nêp ka ni lo tih i mit leh i beng khan a hriain a hmu a ni lawm ni, nunna a hlu a, nang ngat phei chu mi nunna chhanhim duhna avanga mahni in lum kalsan meuha zir i ni alawm, khatiang rilru pu mah ta che, Ngurthantluangi i ni satliah lova; damdawi inah i thawk emaw thawk lo pawh ni la, doctor Ngurthantluangi i la ni reng," tiin kan inneih zungbun ka bunna lam ka kut chu la kângin a hmui nen a sîk tîr a. 

"I hlutna i hriat chian hunah ka thusawi dik zia hi i la hre chho zel mai ang," a ti ta a, sawi ber tur pawh hre lo hian ka ngawi rauh rauh ringawt.

Ka Lajeho mi thil chîk mi leh hawiher zau tak hian ka tana ṭha tur hlir a ngaihtuah ṭhin tih ka hre tawh miau atin ni.

Vawiin hian Aryan pawhin hospital a chhuahsan dawn a, hruai turin Rishan leh Arun an kal tawh a, Buatsaiha pawh Police venhimna hnuaiah tho hospital-ah admit a ni tawh bawk, ka pasalin a lo sawi lâwk tawh angin a lakah zahngaihna a lan tîr dawn ta lo.

Dam ṭhaa hospital a chhuahsan theih rual rualin Jail-ah dah tur a ni a, a nupui Mawitei pawh chuti tho, Mawitei phei chu naktuk chawhma dâr sawmpakhatah Shillong district Jail ah dah tur a ni a, atan Mizoram ban phâk ngaihna a awm lo, mahni thisen zawm te ngei nunna hlut lotu chuan a tuar ve mai tur a ni. 

Chuta kârah Buatsaiha nupui a la ni tlat a, Aizawlah awm hmun nghet pawh an lo nei reng reng hleinem. GS Rd  aṭanga hla loteah Buatsaiha'n in a nei a, Tleipuiin a lo hriatpui miah lo chu niin! An hahthlâk a nia. Mahse, Jeho hian engkim a lo hre leh vek tawh.

Mawitei fapa erawh chuan ka rilru a luah lo thei lo. Nu ka ni a, a nu leh pa tih dik loh avanga naupang pawi sawi lovin a tuar tur hi ka khawngaih êm a ni. Jeho ka sawipui ta nghe nghe a, "A pi leh pute an la dam a, an niin an ngaihtuah mai ang, thisen a luan tawh chinah hi chuan inkhawngaih a har lam deuh chu a ni e," a ti hmiah a, ka sawi thui duh ta bîk lo.

Tleipuii te nufa leh Habib pawh Mawkasiang lamah an lêt phei tawh a, nu Pianmawii erawh biak tlâk a ni meuh lo, kan buaina tawh zozai leh Samuel Pamei thihna te, a ruahmanna engkim a fail tâk si-ah chuan a thluak a buai telh telh a, biak rei deuh chi pawh a ni lo, a thin a chhe em em bawk a, Jeho phei chuan, "Thla hnih nghah kher pawh a ngai ka ti ta lo, enkawlna ṭha a dawn vat loh phei chuan a zualkai zel dawn a, Tleipuiite nufa tan pawh a hlauhawm thei tlat," a ti nghe nghe.

Kei ngat phei chu min haw hlum lo chauh a, thurochhiah chhiar a nih zan aṭang khan ka hmuh theihah a rawn inlan duh tawh lo hrim hrim, a pawi pawh ka ti tawp lo ve.

Khumah a zangthal zawngin Jeho a mu a, a fapa a âwmah a kuah bei tlàn a, kei khum sîr têah ṭhuin Sangeeta nen kan inbia a, "Rishan Songbet chu i duh takzet amaw?" Tia ka zawh chuan nui kar kar chung hian, "In driver nupui ka ni lovang tih a sawi theih miah loh," a ti a, ka nui nasa ngei mai.

"Ngurthan, Farm house-ah inchêng hlen tawh awm si a, Sawlad-a i inluah kha min kian ve tawh la.." a rawn ti a, Jeho ka sawipui tur thu ka hrilh a, kan buai chingchivêt lutuk a, Sawlad lama ka in luah reng reng ka hre chang tawh lo.

Sangeeta nen kan inbe zo deuh chiah tihah Aryan te an lo thleng ta a, Jeho a tho vut a, a fapa pawm chungin a Manager hmuak turin a chhuak phei a, ka zui ve nghal.

Aryan chuan nui var var chungin a boss a kuah a, keimah min rawn melh chung hian, "Madam, i lo ṭha em?" Tiin min zâwt a, ka lo bu nghat, Jeho chuan, "Aryan dam taka a lo chhuah lawm nan zanin tlaiah chaw ei khawm kan buatsaih ang, Beram pakhat talh ula, bazarah Arun leh Sameer hian chawhmeh dang va lei belh rawh se, Gurkha in hmang thei ang," a ti ta a, Rishan a nui vur vur mai. Ani hi zawiawi hle e ti lo hian zu in rûk a hrât phian a, chaw eikhawm nuam tiber te zinga mi a ni bawka a inhmeh viau lo. Sangeeta bialpa ṭhin hi a...

Kan nupa room-ah ka lut phei leh tawh, Rishan leh Jeho an rawn inzui teh tlat.

Khumah Jeho a ṭhu a, single chair-ah Rishan a ṭhu thung a, thil pawimawh tak sawi dun tur an nei a ni ngei ang.

Rishan chuan a phone a phawrh chhuak a, "Boss, boruak dang kan hîp leh hmain Dingngheti kha ching fel thei la ka duh khawp mai, in fapa laka a chêt dan kha ngaihzam chi a ni lo a, Richard kuta dah atan chuan ka ui deuh a ni, kha le, hetah hian video a awm tih ka sawi tawh kha," tiin a phone chu a boss kutah a pe a, Jeho chuan uluk zetin a en chhuak dap.

"Ni e, i sawi dik a ni, ani kha hremna tluantling kan pêk ngei theih nan he thil hi Inspector Ramos ka thawn dawn nia, Samuel, Mawitei, Buatsaiha, ka nu leh Dingngheti pawh tiamin an vaiin atu amah khan hremna an pumpelh dawn lo a, a thi tawh chu hremna pêk ngaihna a awm lova; Dingngheti erawh chu Woodland hospital a chhuahsan fel hmain vawikhat a hmel hmuh leh ka tum," a ti ta a, Rishan phone-a video chu a inthawn nghal a, Jeho hmalak dan tur ka rin hriat mai.

Rishan hnenah Jeho chuan, "Kan tana i thil tih zozai hi kan rûl seng dawn lo che a, Aryan leh nang hi chu a bîkin ka unau ang hialin ka en che u, nupui i nei duh a nih pawhin kan hnen aṭangin ni rawh se," a ti teh daih a

Rishan zak hmel chu a nuihzatthlâk ngei mai, "Boss.." tiin a phar hluai a, ka lo nui var var hmel a hmuh leh lek phei chuan, "Madam, nang pawhin i hria maw?" lai zetin a ti a, "Sangeeta Kar hi ka ṭhiannu a ni tih i theihnghilh êm lovang chu maw," ka lo ti a, a nui suk suk ringawt.

Rishan chhuah hnu lawkah Jeho leh a mâkpa Bartho Saingurpuia an inbia a, anni nupa fel ka tih nachhan em em chu Vansangi tan Jeho nu hi a nuhrawn a ni a, Tleipuii nen phei chuan thisenah inzawmna pakhat mah an nei lo. Chuti chung pawh chuan, a nuṭapa thu hnial duh lovin Mawkasianga-an inpuiah an la thleng ve hrâm hrâm a, Bartho hi Scientific officer a ni a, chawlh a nei rei tawh si lo nen tuna an hun awl neih ve chhung hian Jeho tan enthlâk hna an thawk a ni ber. Nu Pianmawii an vil chawt ti ila a dik awm e.

Kan kianga awm an thlahlel viau nain Jeho an zah der hle. 

Deepak kha ka sawi hmaih thiang lo. Islam chemtea vawmtu gate keeper pawh khan Jeho ngaihdam dîlin a dam chhunga JK farm tana thawk tura a intiam hnuah chhuah zalen a ni a, pa sual tak niin ka hre lo leh tlat. He lai hmunah hian kum tam Buatsaiha kha a lo thawk ve tawh a; khatia hliampui tuara let reng ta chu Deepak khan a lo lainat viau a lo ni. A demawm hran lem lo ve.

Vansangkimi te chhungkua leh Tleipuii te nufa, a driver Habib nen Beramsa chhim turin ka pasalin a sâwm a, an lo thleng thuaiin ka ring bawk.

Jeho room tukverh bulah a ding a, ka fapa a muhil fel ve chiah a, kâr hnih a ral leh hunah Vaccine lâk a hun ve tawh dawn a ka huphurhpui ngang mai, ani tluka nau ṭap khât hi an vâng ve khawpin ka ring.

"Richard nen naktuk hian tih tur kan nei a, ramri kan la teh zawh loh kha chhunzawm kan tum aw, kan nun ralmuang angin lang ṭan mah se, engkimah fimkhur em em zel tur," tiin pawnlam a thlir zui vung vung a.

"Bamos ram nen buaina in nei tawh dawn lo tihna em ni?" Tia ka zawh chuan, "Samuel khan Bamos ram kan lam hnaih zawng hi JK rama khung luh a lo tum ṭhin tih tun hnu hian ka hre ta chauh, MAP kan neih hma loh kha chuan kan ram min chuhpui angin min hrilh char char a, Richard nen pawh kan inhmel huat hman kha a ni a; kan naupan lai aṭang tawha inkawm ngeih ni mah ila, ka patea'n ka thluak min sûksak miau avang leh Richard-a farnu Shisha kha a ngaihzawn avangin kan boruak a ṭha thei ta lo a..." tiin drawer a hawng zui rawk rawk a.

Ram pass original leh MAP chu ka kutah min pe a, ka lo ban ve mai.

"Helai hmun i lo thlen tirha Samuela'n a kah hlum tâk kha Richard-a Manager a ni tih i la hriat ka ring, MAP awmna ber kan hriat loh avangin ani kha a awmna hretu emaw tiin kan dâwp a,  a lo hre îkhaw si lo. A nihna dik takah chuan original MAP nuai bo kha Samuela tum ber a ni, Omar kutah a lo awm daih si a.." tiin min hrilh fiah ta a, ka hrethiam uar.

Samuel khan MAP a nuai bo chuan Richard hi nawrin a ram chhim lam zawng hi neihsak theih a inbeisei tihna a ni a, a hmanrua atan a fapa Jehomalsawmkima a hmang bawk a; mahse, tihian a duhâm lutuk avangin a fapa nen an in hmelma ta chu a ni a, thih dan pangngai lovin a thih phah a, eng ram mah neih belh chuang lo leh khawvel hmachhawn ngam lovin ama nunna a la ta a nia, a râpthlâk lutuk deuh a ni.

Mawitei sawi dan phei chuan, Khatam hmuna an awm dun chhung khan a inhrosa nasain ṭawngkam bawlhhlawh pui pui a chhâkchhuak reng a, Buatsaiha leh Tleipuii anchhia a lawh thul, a kawchhungah ramhuai a lut emaw tih mai turin a khawsa a ni awm e.

Saruak tangkâwnga khung dun an ni a, mipat hmeichhiatna lam hawi chuan chêt a thawh lo niin a sawi a, a inawhhlumna tur Gamchha kha darkâr thum ngawt a hrual a, "Samuel eng atan nge i tih?" Tia Mawitein a zawh chuan, "Hremhmun panna tur hruihrual a nih hi..." tiin a chhâng. Tichuan, Mawitei hmuh lai rengin a thi ta a ni. 

A ruang kan va hmuh tirha a hmel landan kha ngaihtuah lêt leh pawh ka duh tawh mai mai lo.

"Ka farnute an lo thleng tlat mai, Aryan leh Tleipuii kha i lo mitmei deuh dawn nia, kan Laltleipuii hi ven ṭhat deuh a ngai a ni," ti sup chung hian Jeho chuan kawngkhar lam a pan a, Tleipuii lakah hian a lung a la dam zân lo niin ka hre deuh.

Arun leh Sameer pawh bazar aṭangin an lo lêt tawh a, an thil lei an thiar zawh fel hnuah zanriah tur buatsaihin an buai leh nghal a, mipa vek mah ni se an nikhua em em a, a bîkin ei siamah chuan Arun hi a lâk tlâk leh zual.

Vansangi a rawn lut a, a hmel a pawr fap mai.

"U Ngurthan, an chawhmeh siam rim saw ka tei thei thlâwt lo," tia a sawi zawh rualin a uak zui pawp a, bathroom lam panin a tlan chawn chawn a, ka zui vat.

Chhuatah ṭhuin a lo uak pap pap a, a sam a pawr phang bawk si a, a khawngaihthlâk reuh. A chalah thlan fîm a bawl ṭak ṭak a, "I ṭha em?" Tia ka zawh chuan a nui lui hak a, a hmai a phih bawrh bawrh hnuah, "Bartho vang vek, indanna ei a phal tawh lo a, nau ka pai a nih ka ring, Raguel ka pâi tirha ka awm dan nen a inang tlat," ti sapin min rinchhan chung hian kan room-ah kan inzui lut a, a zawi hmel ngang mai.

Kan khumah ka mut tîr a, "Zanriah atan eng nge i ei duh ang, an chawhmeh siam rim i ngaihtheih si loh chuan.." ka lo ti a.

"Bartho khan ka duh zawng a hria a, min lo koh sak mai teh.." a ti teh daih.

A sawi ang chuan Bartho ko turin ka chhuak phei ta a, Jeho nen zu no an lo dawm dun a, Vansangin a ko tih ka hrilh veleh, "Jeho, i farnu hian zu rim a hriat vaih chuan in ve a tum ringawt mai ang," a ti a, Jeho a nui huk. 

"Vansangkimi zia te chu i hria alawm, a hnaihah va ding hlek suh ang che, ka farnute hian zu an in ka remti miah lo a nia," tiin a nui a, Bartho hi a upat ve tawh tehreng nen amah aia naupang daih a nupui hi a la zahder ve hrama a fel ka ti.

Kan paliin kan room-ah kan inzui phei a, a nupui hmel a hmuh rualin Bartho chuan a hnaih ruak a, "Tâwli..." a'n tiah. Jeho nen kan lo nui tawp.

Ani lah chuan, "Saingurpui, khatiang khan min han ko leh vaih teh, zu rim i nam a nia," a ti zui nghal zat a, a pasal a melh râm râm bawk.

"Indanna ei tawh lo turin min hrilh a, tunah rang takin ka ei tur min siamsak a ngai, a nih loh chuan ka pum chhunga mi hi Tequila-in ka hrai rui ang," a ti hlak hlak a, Bartho hmel ka va en a, a nuih a zat hmel khawp mai, Jeho chuan a farnu a melh zuk a, "Beramsa kan siama i duh zawng a ni lo em ni?" Tiin dam duam hian a zâwt a.

"Awi awi, Mama, a rim ringawt pawh sawn ka luak a pawt," a ti nang nang a, Bartho leh Jeho inmelhin an nui suk suk a, ka rilruah, 'Tâwli' tih a lo awm daih, an nupa hi an lawmawm dangdai riau.

Chumi hnu chuan Vansangi ei tur siamin a pasal Bartho a buai zui ta a, Jeho chuan ka dâra min kuah pahin, "Vansangi hi chu a duat loh theih loh, a nihna ang ang hian a ri chhuak phawng zel a, Bartho hian a hmangaih bawka a vannei reuh ngawt mai," a ti ta a.

"Ka ngaina alawm, Raguela'n chhang a neih chuan an buai ve deuh dawn a ni," ka lo ti a, khi suk chung hian, "Nang pawh i kum a tam tak tak hmain kan siam deuh zung zung ang, a siam lam hi han hmanhmawh em em phawt mai ila, a na zawk zawk bawk si lo," a'n tiah, a va han chhe tak.

"Malsawmkim.." ka lo ti hlak a, "Tak takin, zai chhuah zel a ngai tawh dawn si a, i taksa kan duat dawn nia, ka fiamthu a nih kha," ti leh lawi siin, ka kâwngah a rawn kuah a, "Ka Ngurthani leh ka fapa Lalngurmuana ka kianga in awm chhung hi chuan thil dang ka mamawh belh tehchiam lo," a ti nghet churh. 

Hlim takin zanriah kan kîl ta a, Vansangi ei atan a pasalin Sangha a fry sak a, Rishan, Aryan leh Arun, Sameer tepawhin no an dawm far a, tumah rui buai an awm lo. Kan Laljeho pawh a ṭawng ve luam a, Bartho nen a hma aṭang daih tawh khan an lem dun a, an han polite dun leh mai mai khawp a(h).

Aryan bulah zel Tleipuii a awm a, Habib leh Zonunthara inchhaih lai chu Aryan chuan a en reng a, a fapa hian a rilru a luah thar ta deuh a nih ka ring. Buatsaiha ber a awm tawh bawk si lova nakinah Jeho la sawipui ngei ka tum bawk.

Tleipuiin a u hnenah farm house-a riah a dîl a, "Hetah chuan riak lo e, tun hma anga tâl mai mai kha ka rem ti tawh lo a nia, Aryan pawh ka hnuaia thawk a ni a, zar buai chhên ka rem ti lo, Buatsaiha nen inṭhenna mumal tak inneih hunah chauh Aryan nen inchungchâng chu ka ngaihtuah ang," a ti hmiah. 

A farnu a thinrim ngam tawh teuh lo. Eng mah thawh chhuah a nei lo a, a nu Pianmawii lah a chiangkuang tawh si lova, a innghahna neih chhun chu Jehomalsawmkima chiah hi a ni. A nuṭapa thu a awih lo a nih chuan aman a tuar zel dawn tih a hrethiam ve tawh tepawh a ni mahna.

An vaia an haw tâk vekah chuan a reh ve ruih mai, Rishan leh Aryan farm house ah an riak leh ta a, Arun leh Sameer mikhual pindanah an riak thung a, anni hi chu Jeho hian a kal hlat tir meuh tawh lo.

A tûk hma zetah ka harh a, an pafain an lo inbuaipui a, vawiin hian Bamos leh JK ram an teh fel tawh dawn a, Omar pawh an sawm tel vein ka hria.

Khua a vâr fel awrh chauh a ni a, "Ngurthan, Mizorama min hawsan duhna rilru te i la pu em?" Tia min zawh thut chuan hamhaih zetin ka pasal ka en vat a, a hmel a thutak ropui si.

"Eng lo, kal turin min duh em ni?" tiin ka zawt lêt a, ner suk chung hian, "Ka zawhna che kha chhâng phawt la maw le, min kalsan duhna rilru hi i la pu rêng em, kan inneih dan leh pumkhata kan insiam danah rilru natna tur hlir ka siam si che a, a châng chuan min hmangaih ve angin lang mah la, i mit menga khawharna leh hrehawm tihna lo lang ṭhin hi ka hmuh hmaih lo a nia," a ti ta a.

Ka ṭhu chhuak hlawl a, "Jeho, kal tura min duh chuan ka kal ang," tih chiah ka sawi.

"Ka nun aṭanga kal tîr hlen che hi ka la tum chhin ngai lo, ka hmuh hmasakber ni aṭang che khan ka ngaihven nghal che tih ka sawi tawh kha, chuan, hmana min zawhna kha ka chhang tawh ang che aw.." a ti teh daih a, tukin hi eng nge maw a hriat ni. Nizana a zu in kha a la thawk zawk nge, a meng fiah em em lawi si.

"Zawhna tam tak ka zawt tawh che a, eng ber nge min chhân dawn ka hre lo, ka ngaihtuah thiam lo," tia ka ṭawng mek laiin a fapa a sawn leh rih a, a veilamah mut tîrin min hnaih thei ang ber hian a rawn tawlh a, a kut dinglam ka thin zawnah a nghat a, chîk zetin ka mitah a en tlat bawk.

"Kan passcode kha eng nge ni kha?" Tiin min zâwt thut a.

Rang fahran hian, "24-89" ka lo ti a, a nui suk.

"A awmzia min zawt leh dawn lovem ni?" a tih chuan a mitah ka en rân a, "I phuahchawp mai maiah ka ngai, eng thil ropui vak a nih ka ring lo," ngaihsam zetin ka lo ti a, "I â siah.." tiin a nui huk a, chutah za lutuk hian a nui ta hawk hawk a, hrilhhai zetin ka lo en hâ ringawt.

"Ka nunah 24 hi a lo pawimawh hle a ni ang, nang ka tawn ni che a nih mai bâkah ka pian ni hi 24 a ni a, August-a piang ka ni. Nang pawh September 24 ah tho i piang a, i pian cham theihnghilha hrechhuak zo lo khawpin ka siam che chu a ni si a," tiin a meng hnuai ruih mai.

"August hi thlariat a ni a, September thlakua a ni thung. Chuti a nih chuan 24 ka tawn ni che leh ka hmuh hmasak ber ni che kha a ni a, i ina kan lo hruai chhuah zan che kha ni 24 a ni bawk, 24-89 awmzia chu kan pianni leh thla, ka nuna ka seng luh ni che ka chhinchhiahna a ni e," tiin chiang leh fiah tak hian min hrilh ta a.

A birthday kha ni 24/8 a ni a, kei hi ni 24/9 a ni thung. Chumi kaihkawp chu kan nupa secret-code atan a lo hmang chu niin! Â kan thluak hman dan a va inang lo thei tak.

"Sawi belh tur i la nei mial em?" A tih chuan chal chuar nâng chung hian ka ngaihtuah ngial a, Lalngurmuana pian ni ka hrechhuak chawpchilh.

Ka neih hun pangngai aia hmaa zai chhuah a ni a, khawvel êng a hmuh ni chu ni 24 tho a ni. Mak ka tih êm avangin Jeho ka melh teh ngawt a.

"Kan bul ṭan danin a zir lo a, nun ralmuang leh hahdamin kan awm ngai hek lo, kan nuna ni chhinchhiah bîk tur awm te theihnghilh ṭhakin buaina leh harsatna kan tâwk a, kan chhungkua, kan nupa nunah 24 hian hmun pawimawh tak a luah a ni," tia a sawi zawm leh hnuah, min rawn kuah a, "24-89 hi awm lo ta se, ka Ngurthantluangi i ni ngai dawn si lo a, chutiang chiah chu i Laljeho ka nih theihna chhan a ni bawk, a chiang em?" A ti leh deuh kher.

Ka lo bu nghat a, min fawh tumin a rawn kun hniam zui nghal a, a nghâwngah ka lo kuah ve thuai, "Zingkar aṭanga ṭan hian ni a rei duh lo," nui suk chunga tiin ka hmuiah a fawp ta a, ka lo dawngsawng ṭha mah mah.

Zing dar ruk bâwr velah nupa te chauhin-a an tih tur chu dîm leh thawm neih hlau takin kan tih leh tâk hi. Kan fapain eng mah la hrethiam lo mah se, ka inthiam lo rilru deuh tlat. Jeho hmel pa leh hriam hrâk chu ka melh chho a, "Hetianga kan chêt tuktin dawn chuan ka inzaina hi a dam fel mawh khawp ang," tiin ka fiam zauh a.

"Nâ ang tlata i inhriat chuan a na zel ang a, na lo anga i ngaiha i palzam theih chuan a dam hma ang, ka nupui natna tura chêt fo ka tum lo a nia, min hmangaih lo anga i inhriatna kha paih bo la, ka hmangaihna che i hriat fiah zel theih nan ka chhiatna lai nilovin ka ṭhatna hmuh thiam i tum dawn nia, Malsawmlova ni lovin Malsawmkima ka nih kha aw.." tia a sawi zawh rualin a tho chhuak a, min pawt tho ve nghal bawk.

"Tukin chu kan hnathawk te chawlh hahdam tîrin tûkṭhuan kan siam dun ang," a ti ta a, ka hnial loh zawng tak a ni.

Dârkâr thum hnuah Jeho, Rishan leh Aryan te Bamos Farm-ah an kal ta a, Cadastral lam an rawn thlen thu sawiin Richard khan a rawn phone a, ram ri-ah buaina a awm tawh dawn lo tih ka hriatna ringawt pawh hian min ti thâwl hawk thei alawm maw le.

Sameer leh Arun ka ko a, Farm house tihfai hna an thawk a, Arun chuan, "Madam, Islam hi kan zingah awm ve thei se kan duh khawp mai," a ti a, Jeho hnena an sawi ngam loh hi ka hnenah an thlen hmasa phawt zel tih ka hre tawh a, keiin Jeho ka lo sawipui leh ṭhin.

"Badrul Islam te chu training chawp ngai a ni lo em ni?" Ka lo ti a.

"Teh nang, ani tluka chemte vawm thiam an awm lo, hmanni pawh khan amah hian Deepak kha vawm ta zawk se a thih loh pawhin a hliam thûk viau ang," a ti bawrh bawrh a. 

"Ka pasal ka lo sawipui dawn nia," ka lo ti ṭha mai.

Ka rilru kam deuhtu pakhat a la awm a, chu chu Dingngheti a ni, Woodland hospital-ah a la awm reng a, a video khan Inspector Ramos kut a la thleng lo nge Dingngheti chungchângah sawi a la awm miah lo a, eng tin emaw tala chêt chhuah dan tur ka dap a ngai dawn a ni. 

Tleipuiin min lo call teh mial a, "U Ngurthan, Aryan biak ka duh hle mai, a number ka hre si lo a," a rawn ti a.

"I u te nen Bamos lamah an kal a, a lo haw hunah ka lo biak tîr dawn che nia," tiin ṭha tak hian ka chhâng a. Tleipuii hian Aryan hi chhuah a tum loh hmel khawp mai, an inneih chuan kan hnenah a awm thei awm si lo a, ka lo huphurh lâwk ve ringawt.

Tlailam dar nga velah Fâr hmun lam aṭangin Riffle puak thawm a rawn awm a, vawi hnih lai a ni lehnghal. Arun a che chhuak vat a, Sameer eirawngbawl lai chu kovin, "Boss te kalna lam a ni si lo a, kan en fiah ngei a ngai ang," tiin Pistol hum chungin Sameer nen hmanhmawh takin an tlan chhuak a, Islam a rawn lut ve thung.

"Khu lamah hnathawk an awm em ni?" tiin ka lo zawt a.

An awm loh thu leh a tam zawk ran chaw laa an kal thu a sawi a, ka ngaih a ṭha lo nghâl ringawt.

"Islam, helaiah hian kum engzat nge i thawh tawh?" tia ka zawh chuan, "Kum li" a ti a.

Chutia kan lo inbiak lai chuan Jeho a rawn lut nawlh a, min be lo hian room-ah a lut tlang a, Islam pawh be leh tawh lovin Jeho ka zui lut ve nghal a, Pistol khumah a dah a, a thawmhnaw inbel lai a lo thlâk mawlh mawlh a.

"Jeho, thil dik lo a awm em ni?" Tia ka zawh veleh a ding khawng luh a, chiang zeta min en chung hian, Dingngheti an hmu zo lova zawng tura kan kal a ngai," a ti ta mai.

"Sawi chiang deuh la maw le, ani te chu hospital-ah a awm a ni lawm ni," ka lo ti a.

"Nizan thleng kha chuan a la awm ngei alawm, amaha tlan chhuak thei a ni lo a, puitu an awm a ni," sehchilh nawka tiin boot a bun leh mawlh mawlh a.

"Riffle puak ri kha in hre ve em?" tia ka zawh leh chuan, "Ngurthan, kan fapa kha ṭha takin enkawl la, a bâk chu ka kutah dah rawh, Rishan leh Aryan tepawh Far hmun lamah an kal tlang nghal a, chanchin thar a awm veleh ka lo hrilh ang che, Islam tih loh midang inchhungah tumah luh tir loh tur," ti leh zung zungin a fapa bianga a fawh zeuh hnuah, ka biangah dawmin ka hmui a fawp veleh zauh bawk a, "Ka kal a nia, Dingngheti kan hmuh ngei ngei a ngai," tiin biak zui hman miah loh hian a tlan chhuak a ni hrim mai.

Atu chuan nge pui ta ang, Richard hian a pui ti dawn ila ka ring chiah si lo. Shisha ka ngaihtuah chhuak nghal a, Shisha tan Dingngheti kha a unaunu tho a ni a, a lainat vang te hian a lo pui em mawni dawn le, ka thil ngaihtuah avang chuan Richard number ka hmet chhuak a, ka call ve tawp.

Vawi thum a ring ral ṭhak ṭhak a, a tawp nan vawi khat ka call nawn leh hram a, min rawn chhâng ve mial.

"Ngurthan, eng nge ni ta?" zawi ruihin a rawn ti ta a. 

"Shisha a awm em?" Tia ka zawhna chu mak a ti deuh nge a ngawi vung vung mai.

"Richard..." ka ti leh a.

"Shisha awm leh awm loh ka hre miah lo, eng atan nge i tih, amah i be duh kher em?" zaidam deuh hian a ti a, ka biak duh thu ka hrilh veleh, "Tikhan lo nghâk rawh aw, kan ko ang e," a ti leh mai a.

Minute reilote hnuah, "Ngurthan, Shisha a awm lo reng reng, a room-ah pawh a awm lo," a tih tâkah chuan ka thaw huai a, ka rin dan a dik dawn a va ang ve.

"Dingngheti hospital aṭangin a tlan chhuak a, i farnu kalna chin i hre lo bawk a, rang takin ka pasal Jeho phone nghal rawh," ka ti sawk sawk a, "Dingngheti a tlan chhuak a maw?" A rawn ti heu mai.

Chu veleh ka hriat ang ang ka hrilh ve nghal vek a, thaw hawk chung hian, "Shisha chuan a pui lovang, Dingnghetin hmanruaah hman a tum zawk a nih ka ring," chang faka tiin, "Jeho leh Omar kan be nghal ang e," tiin kan inbiakna a ti tawp ta rih a.

Khua a thim chiang hle tawh bawk.

Richard sawi dan kha ka rilru puthmang dik tak a ni ve tho. 

Zanriah ka bâr ve luklak a, Jeho hnen aṭangin chanchin thar eng mah hriat tur a la awm chuang lo a, nau paw chungin kan room ah ka teikual sek ringawt. 

Kha nu kha zalen takin a nung tur a ni lo tawp. Shisha nen an ṭan rual rinna ka nei lo a, amah a nalhin a chhe lo ve bawk si a, Richard hnuaia hnathawk zinga tu emaw ber thawhpui a nei a nih ka ring mah zawk.

Zan dar kua a pel tawh a, Islam chuan, "Madam, mu hahdam rawh, eng emaw a awm a nih leh ka lo kai tho mai dawn che alawm," tiin chhuata ka vei sek lai chu min lo bia a, ner sak chung hian, "I boss a lo thlen hma loh chuan mut ka tum lo, thin thiin ka mu thei chuang lovang," ka ti teh tawp a, min chhâng zui ta bîk lo. 

Veranda a ri rawk a, a ri leh dawt a, ka phu nasa lutuk a, chêt mai nachâng pawh hre lo hian ka ding mar at ringawt. Islam chuan tukverh aṭangin a va bih dûk dûk a, "Room-ah lut rawh, pawnah sawn hmeichhia an awm," a ti ta mai.

Chutih lai tak chuan, Veranda lam aṭangin, "Ngurthantluang, kawngkhar hi second sawm chhunga i hawn loh chuan Shisha hian a tuar ang," rawn titu chu Dinngheti a ni. Mak ka tih êm avangin ṭawng ngaihna ka hre lo a, damdawi inah awmin a din hmun a ṭhat loh thu an sawi a, tunah JK ramah ngam pa taka rawn lutin min vau leh der chu a ni si a, a ngaihna hriat thiam a har ta.

Islam chuan, "Madam, kawngkhar hi ka hawng ang a, keimah inlan lovin i va chhuak mai dawn em ni?" Ka beng bulah a rawn ti sup a, ka fapa ka hmalamah ka awrh a, khuma mut tîrna hman a awm tawh lo hrim hrim.

Dingngheti lah chuan zawi fiah tak hian min ko sek sek a, Islam kawngkhar hawng tura ka mitmei hnuah ka chhuak phei ve ta a.

Veranda chhuatah hmai thi hnuangin Shisha a lo mu a, a bulah Dingngheti Pistol hum chungin a ding bawk a, "Tun ṭum chu i fapa nen hremhmun lamah ka thawn liam tawh ang che u," nui lui ngial chung hian a ti a. Ka lo ner nawk.

Rishan khan a malpuiah a kâp ngei a, tuna ka hmaa ding hi chuan na nei hmel a pu tlat lo, zam map lo hian, "Chân loh khânah ka chhuak ṭhin tih i pasal Jehomalsawmkima'n a hre lo tlat a tin ni. Fâr hmunah buaina ka chhuah tír a nih chuan Farm house-ah duty an awm dawn lo tih ka hria a lawm," tiin tifuh intifahran hian Shisha mu zawi reng chu a ke veilamin a tlawh sawk a, ka thin a sa ve zak.

"Dingnghet.." tia ka la ṭawng mek laiin a ri fua a, Dingngheti Pistol kenna lam bân chu a zawi thla hnawk mai, Farm house bangah chemte fawng dum a bûr vâ a, Dingngheti hamhaih chhung reilote kâr chuhin chhuata Pistol tla chu ka thai sawn zauh a.

Veranda lam pana lo chho mek Badrul Islam hmel dur khup chu a rapawm lek lek. Inhnung lam kawngkhar aṭangin a chhuak tih hrilh hranpa ka ngai bik lo. 

"Madam, awm sawn rawh le," tia a sawi zawh rualin Dingngheti tukkhum samah manin a kêk dâk âwrh a, a lo râk ṭhawt..

Veranda kil lamah ka insawn phei a, chutih lai chuan Motor a rawn tlan lut a, Islam kut aṭanga Dingngheti tal chhuah tum tâl buan buan chu ka lo thlir reng ringawt.

'I thluak a thawl em mai, ka lo thun belh sak ang che," tiin Islam chuan Dingngheti sam a vawnna man nghet leh zualin a phih lawp a.

"Ani kha chu ka kutah dah rawh, a nung chungin ka lo hlep ral raih ang e.." rawn titu chu Omar a ni.

A mit a sen rûm a, a hriam ṭha hle bawk. A hnungah a naute pathumin an rawn zui bawk a, chhuata Shisha let reng chu inchhunga zawn lut turin ka hrilh a.

"Ngurthan, khawngaihin ka nupui hual kha min lo enkawl sak thei ang em," tiin Omar chuan min rawn melh a, ka lo bu nghat.

"Ngurthantluangi kha ka la that khawp ang," tia Dingngheti a âu vak vak tâkah chuan Omar ka ko a, "Ani kha kalsawn pui rih suh.." tiin Sofa lo hnai berah chuan ka fapa ka mut a, veranda lamah ka chhuak leh ta.

Omar chuan nghet zetin a samah a man a, Islam a inthiarfihlim thung.

"Rishan khan lo kâphlum law law che se i tan a nuam zawkin ka ring, nunna hlut lotu chuan dam a phu lo," zawi raiha tiin a biang ding lamah hawi sawk khawpin ka bêng a, a meng sen râm mai.

"Tuna mi kha ka fapa i rúk bona man chauh a la ni, Shisha tan ve thung aw," ti lehin a biang veilamah ka bêng leh a, ka kut phah a thîp ṭhak thei nia. Nutlingin theihtawpa naa bêng ka ni bawk a, a na thawkhat turah ngai ang.

"Omar, ani hi hruai sawn rih lo ula ka duh, Richard leh ka pasal Jeho pawhin an hmuin an be ve duh ngei ang," ka ti ta a, Dingngheti ding ngawi ngal chuan zâm leh hlau hmel a la pu chuang eih lo. Hmeichhe mak tak a ni.

Islam chuan ka fapa a lo awmpui a, chumi chhungin keiin Shisha hliam leh pem ka lo ti fai thung a, Minute nga kal ta khan Jeho pawh ka be diam tawh bawk.

Hospital aṭanga chhuak ruin kei min rawn pan leh ngat a nia, eng tianga nasain nge min huat tih leh engvanga min thah tum tlat nge a nih tih hi khawvar hmain kan hre hman em ang chu. Omar kha chuan thah a duh nghal rum rumin ka hria.

Jeho leh Richard te lo luh laiin Shisha bulah ka lo ṭhu a.

"Ngurthan, ka farnu aiawhin lawmthu ka sawi e," tiin a farnu biangah dimtein a chûl a, Richard hi Gay a ni tih ka hriatna a la rei lo. A hmel nen a inrem hlawl lo bawk.

Shisha a rawn harh ṭan a, a u leh kei min hmuh veleh a ṭap chhuak ta a.

A cousin Dingngheti bula a awm ve ngawt dan leh helai farm house-a an lo luh dan zawh ka châk zek zek a; mahse, ka fapa a ṭah tâk avangin ka inthiarfihlim ta rih.

Khua a var ang a, Police kuta a luh hmain engkim a chinchhuakin kan hre thuaiin ka ring.

Ka fapa ru boa ka thinlung hliam min siamsaktu leh ka rilru luaha kam rengtu Dingngheti zawkin min rawn pan ta si a, thil mak a ni ve hrim hrim! chunglama mi ka lamah a ṭang a ni ngei ang. 

Mi duhâmho vanga kan tawrhna te hian a tawp a tawpah chuan min kiansan ve dawn ta a nih hmel hle mai..

Thaw hak chungin ka fapa ka kuah ta vang vang a..

030523

B+>[BeckirafARenthleI]<+®®