28.24-89 [Last Episode A Becky Rafa Story]

28.24-89 [Last Episode]

Ziaktu: Becky Rafa Renthlei

[Recap]

Shisha a rawn harh ṭan a, a u leh kei min hmuh veleh a ṭap chhuak ta a.

A cousin Dingngheti bula a awm ve ngawt dan leh helai farm house-a an lo luh dan zawh ka châk zek zek a; mahse, ka fapa a ṭah tâk avangin ka inthiarfihlim ta rih.

Khua a var ang a, Police kuta a luh hmain engkim a chinchhuakin kan hre thuaiin ka ring bawk.

Ka fapa ru boa ka thinlunga hliam min siamsaktu leh ka rilru luaha kam rengtu Dingngheti zawkin min rawn pan ta si a, thil mak a ni ve hrim hrim! chunglam ami ka lamah a ṭang a ni ngei ang. 

Mi duhâm ho vanga kan tawrhna te hian a tawp a tawpah chuan min kiansan ve dawn ta a nih hmel hle mai..

Thaw hak chungin ka fapa ka kuah ta vang vang a..

-B®®

Dingngheti buaipuitute thawm a la ri nak nak a, ka pasalin ka inrawlh nawn rem a tih tawh loh avangin kan room-ah min luhpui hmak. Shisha pawh a nuṭapa Richard nen Bamos lamah an haw phei tawh a, hliam pawi tham a nei lo nain a pilh phengphung a, a hmai a khem nasa viau bawk. A hlauh luatah a thidang ni berin a lang.

Omar leh Shisha kha an lo inhual reng chu niin! Jeho chuan, "Kan naupan lai aṭanga inkawmho vek kan ni a, Shisha hi chu a naupang fâl deuha Omar hian a duat ṭhin hle, zirna avangin Delhi-ah kum eng emaw zât a awm bo ta a, heta a lo haw hnu aṭang hian Omar nen an inkawm ngai ta lo," tiin min hrilh a.

"Shisha khan i pa kha engtin nge a duh theih zawk le?" Tia ka zawh chuan a hmel a lang rum sawt a.

"Omar hian Shisha a duh tih a hria a, Raitong woodstock farm lamin MAP an kawl tih a hriat khan Omar blackmail nan Shisha a ngaizawng ta a, Samuel tenawmzia hi chu sawi chhuah leh fo pawh ka duh lo, Shisha lah bum a nuamin Samuel khan a thlêm lungawi thiam si a, thlaruk zet an inkawp hman," zawi fiah takin a ti ta a.

Khuma kan fapa muhil biang leh sam dimtein a chûlsak a, "Richard khan Omar hnenah Samuel Pamei leh a farnu inkawp chungchâng a hrilh ve ta a, Omar thinrimin kei min rawn bia a, Bamos-ah ka kal tâk rum rum kha i la hriain ka ring, Shisha naupai kha chu vanduai thilthu takmeuha paih ngai a ni thung, Omar hian a hmangaih êm a, a haider sak ta a ni." Tia a sawi zawm leh hnuah, a bula mu ve turin min mitmei a, pawn lamah thawm a la ṭha hle.

Jeho thupêk angin Dingngheti chu 'Aryan bee' ah dârkâr hnih khung hran tur a ni a, Islam leh Rishan an phûr fâl hle. Dingngheti duh lo râk ri a bengchheng viau a, ka bengkhawn duh eih nâng.

"Sawlai hmuna khung kher kha chu a ṭul ber em maw ni le," ka tih chuan, "A thih phah dawn hleinem, ka nupui leh ka fapa tina tura a lokal man a nih hi, naktukah te chuan Inspector Ramos kutah a awm tawh dawna keini tan inrawlh a rem tawh dawn lo asin," a ti hmiah.

Ka taksa a chau ve deuh a nih ka ring. Jeho nen kan titi lai rengin ka lo muthilh san daih a, a phone hmang thawmah ka harh leh chauh.

Insiam peih diamin tukverh bulah a lo ding a, a thei tui ken in hlek hlek pah hian min lo en reng a, ka harh tih a hriat veleh, "Nizanah min muthilhsan daih a, tukinah i harh hma leh chuang dêr bawk si lo, Rishan kutah kan fapa hi lo awm lawk sela, tho la insiam rawh le, Dingngheti hmu turin i va kal teh ang, Police lam an rawn thleng har tawhin ka ring lo," tiin a in tur ken a thâwkkhat pawp a.

"Dar eng zatah nge an rawn lâk dawn?" Tiin ka zâwt a, "Video kha ka thawn tawh a, Richard te lam aṭangin report a lut tawh bawk a, an rial rei lovang," tiin bathroom lama kal turin min nawr phei dat dat a, ka lut ve nghal mai bawk a.

Rei vak lo hnuah chuan Rishan kutah Lalngurmuana kan dah a, 'Aryan bee' lam panin kan nupain kan chhuak phei ta a.

Jeho chuan ka kutah nghet takin a chelh a, a hnuaia thawk kan kal pelh a piang te'n bu nghauh chung hian an zah derna an lan tîr zel a, Farm house aṭangin a hla lem lo bawk a, kan thleng chu a ni dêr. 

Islam leh Sameer pâwn lamah an lo duty a, dârkar hnih khung tura thupêk an nih laiin Islam zawkin Jeho a lo call a, Dingnghetin eng mah a sawi ṭha duh lo tia a rawn report avangin zankhuain an khung ta ni awm tak a ni. 

Jeho chuan Sameer hnenah, "Va hruai chhuak tawh rawh ule, khuaiin a zûk loh nan cheu hei hi inhnawih rawh u," tiin a kekawr ipte aṭangin bottle tetakte a rawn phawrh chhuak a, Sameer kuta hmehbel pah hian, "Buhpawl inah in lo hruai phei dawn nia, luhlul a chhuah pawhin dim vak a ngai hran lovang," tia a sawi zawh hnuah, "Lokal rawh le, ani lak aṭang khan kan hriat duh zawng chu kan hre ngei tawh ang," tia khi suk chungin buhpawl dahna hmunah min lêtpui leh ta a.

Dingngheti hmel ka han hmu chiah chu nui chhuak lo turin ka hmui ka hup nghal chawt mai. 

Khuaiin a zûk nasa thawkhat a ni ang, a hnar a vûng mar vek a, a hmui a kawh luah bawk, a mit erawh a la meng ve hrâm a, a biang a sen mar ṭûn bawk.

Sameer chuan a rawn nam lut rawk rawk a, a kut pawh an phuarsak chuang hlei lova, an dim lo ang reng. Min hmuh rual rualin a meng râng leh nghal a, a rilru huaisenna hi a fakawm ve hrim hrim.

Jehomalsawmkima a ding hluai a, "Ka nupui leh ka fapa hian i eng pawi nge an sawi, nun nuam tak neia khawsa thei tur i nih laia hetianga sual i chhuah tlat nachhan hi hriat a châkawm khawp mai," a ti nghut a, Dingngheti buhpawl bula ding chu a melh rûn bawk.

"Jeho, ani hian ka chan âi min chhuhsak a ni.." tiin thinrim vanga khur dar dar chung hian min rawn kâwk a, ka lo ter ve at.

"He khawvelah i piang ve tih pawh ka hriat loh lai hian i chan âi ka chhuhsak ang che maw, khatiang zawng kha chuan fiamthu thawh lul suh," tih pahin ka nui lui hak a, a mit sen râm chuan khap miah lovin min melh rum âl a. 

"Ka chan âi chu Jehomalsawmkima i pasal hi a ni, i rawn lan hma zawng kha chuan ani lakah hian beiseina ka nei a, Richard pawhin zin turin min chah hial a nih kha; Jeho laka ka rilru put hmang hrechiangtu a ni bawk.." tia a sawi pahin, Jeho ding khawng luh chu a melh zuk a.

"Malsawmkim, ani aia ka ṭhat loh bîkna hi eng nge, ka hmangaih che asin, Ngurthantluangi hi kalsan la, Bamos rama ka chanvo neih zawng zawng i kutah ka dah ang," a la ti ngam nia maw le! Bêng nawn leh lo turin ka insûm nasa hle. 

Jeho a rûm nghut a, "In leh lo ram, hausakna âi chuan ka nupui leh ka fapa ka thlang zawk, ka nupui ṭhat bîkna chu i nun dan en la, nang aia ka thlan zâwk nachhan chu i hriat mai ka ring," ti nghut chung hian ka dârah min kuah a.

"Bamos ram tel lo hian kum 37 ka lo dam ve tawh, i ram chhetê avanga ka chhungkua kalsan ka tum rêng rêng lo," a tih veleh, Dingngheti chuan rang fahran hian, "Ka hmangaih che," ṭap lek lek chunga tiin Jeho a hnaih ruak a, ani a lo tawlh sawn thung.

"Min hmangaih dan a dik lo a ni, âtna chikhat a nih kha, engtin nge hospital aṭang khan i chhuah theih rêng rêng?" Tiin a zâwt daih a, nui lui ngial chung hian Dingngheti chuan, "Thil harsa a awm hleinem, ka doctor hnenah ni hnih leh zan thum atan discharge ka dil a, pawisa a awm chuan a fel vek a ni mai," a ti leh ham ham a, a ṭawngkam a pangngai leh fu tawh.

"Shisha laka i chêt dan avang khan Richard hian a ngaidam duh dawn lo che tih i hria ang chu maw," a tih leh chuan, "Shisha khan ka pawi a sawi a ni. A unaupa mawngkawhur pawh eng atan mah ka ti lo," a ti hlawih hlawih a, a mitmenga min huatna lang chhuak chung hian, "In fapa ka that ta lo kha tun thleng hian ka la inchhir," tia a sawi zawh rualin ka che chhuak phat a, Jeho pawhin min dan tum hmel a pu lo.

Dingngheti samah ṭhâmin ka phih nawk a, chhuatah a tlu thla a, "Ngurthantluang mihur nu," tia a sarâk chiam lai chuan 'Police siren' a rawn ri ta. 

Dingngheti lak aṭangin ka inthiarfihlim vat a, "Tikha chuan Bamos rama i chanvo la awm chhun pawh Shisha kutah an dah ang a, kei min neih chu sawi loh, ka nupui leh ka fapate laka i chêt dan avang khan hlim ni hmel i hmu tawh kherin ka ring lo bawk, Inspector Ramos bulah khan dâwt sawia inphat mar i lo tum ngawt ang e, finfiahna video kan thawn vek tawh, chân loh khâna chhuak ṭhin chu nang ni lovin keimah Jehomalsawmkima zawk hi ka ni," ti hmiah hmiahin nelawmna tel miah lo hian chhuata Dingngheti ṭhu sawp nuai(h) chu a melh vung vung a, ka lo ngawi hmiah thung.

"Jeho, jail-ah ka awm duh lo.." ṭah aw ṭuauin a ti a, ka lo ner sak.

"I awm lohna tur hmuna i awm avanga tawrh leh nat kan tum tawh lo, hremna chu i hmu ngei ang," tiin khawngaihna nei lo tih hriat takin a ṭawng hmuk hmuk a, buhpawl in lam pana lokal mek Inspector Ramos leh a naute chu a pan phei ta a, ka zui ve nghal vat.

"Mr.Jeho, ani hi em ni?" Tiin Ramos chuan Dingngheti a thlêk vung vung a, "Hmêl hmuh tlâk in la put tîr duha in va fel ve, a thil tih tawh ngaihtuah chuan a vun lip vek mah ula inthiam lohna a awm miah lovang; mahse, dan hnuaia awm kan nih angin hremna a pumpelh dawn lo a nia," nui suk chungin a ti a.

"Madam, i ṭha em? I fapa a ṭha maw?" Tih pahin ka vawn theih nan a kut a rawn phar chhuak a, kan inchibai ta a, a fel hmel suah suah khawp mai.

Dingngheti Handcuff an bun tir dawnah a tâl phat a, eng tik laiin nge a lo phâwi hman tih pawh hriat loh hian a kutah pistol a hum a, inspector Ramos a tin chat a, "I kâ a kaw mah mah a ni, second khat lek chhungin i chal kha ka verh thei tih i hria ang chu maw?" A ti chang fak.

Kan hamhaih tlâng lutuk a, atu amah ṭawng nachang hria kan awm lo. Jeho a harh chhuak hmasaberah a ṭang a, Dingngheti mitah tak en chung hian, "Police i that a nih chuan tun âi hian i chan a chhe zawk ang," tih pahin Inspector Ramos a din hliah a, za lo zeta nui lui chungin keimah min rawn tin leh ta.

"Police ka that dawn hleinem, i nupui hi thi zâwk rawh se," tia a sawi mêk laiin vawilehkhatah Dingngheti a eu âwrh a, a Pistol hum lai lek kân tumin ṭan khawh mah se thâ a nei tawh lo, nizan lawkah Islam khan a bânah hliam a siamsak tawh a, a tuarchhel ka ti ve thlâwt, a kaw tawpa ṭang a ni bawka pawisak a nei lo salh salh khawp mai.

Dingngheti âwma chemte bûr vâ chu tu nge a neitu kan hre vek. Islam bâkin Chemte fawng dum an hmang ve ngai lo, buhpawl in tukverh inhawng aṭang chuan a rawn dâk heu a, "A thi lo ang, hlauthawng suh u," a ti duh chauh.  

A hnu leha thil thleng chu sawi thui vak ngaiah ka dah lo. Inspector Ramos thupek angin Dingngheti hliam ka tuam ve luklak a, amah pawh a harh ṭan. 

"Mr.Jeho, i nau kha lawm thu min lo hrilhsak dawn nia, hmeichhe pawisak nei tawh lo chin hi chu mipa aiin an tawrhhlelhawm daih zawk, tihian keini lam kutah a awm tawh ang a, eng emaw biak duh leh thu zawh duh che kan la neih dawn avangin kan biak pawh phâkah awm hrâm i tum dawn nia," dam thluama tiin Jeho dârah a bêng thuk thuk a. 

Keimah min rawn en leh a, "I pasal tan i ṭangkai hle mai, hospital-a thawh buangbâr ai chuan tuna i awmna hmuna i awm hian i him zawk ang," a ti ve ngial.

Inspector Ramos leh an naute an tlan liam hnuah Farm house panin kan lêt phei ve ta a, Jeho hmel a la pangngai thei lo. Nichina Dingnghetin Pistol-a min tin lai khan police pahnihin Pistol an chuh ve rap hman kha a ni a, Ramos khan Dinngheti hmela pawisak neih lohna lian tak lang chhuak kha a chhiar thiam ve a nih ka ring, a naute pahnih a khap dai vat a, a fing ka ti hle.

Rishan chuan kan fapa hnute a lo pe a, Aryan leh Sameer, Arun te chuan wood stock farm lam aṭanga lokal khum siamna tur thingzai an thiar tlauh tlauh a, hetiang thil vel hi chu Rishan hian a thawk khât, driver a nih angin a ṭûl hun apianga chhuak mai thei tura a inrin reng a ngai thung.

Tûkṭhuan tlai zetah kan ei a, Vansangin min lo call a, "U Ngurthan, Tleipuii leh a nu hi an buaithlak lutuk em mai, Mama nen lokal thei ula ka duh," a rawn ti a, "I u hi be rawh aw, ka bulah a awm," tih pahin Jeho phone ka pe a, keini lamah nu Pianmawiin harsatna min siamsak lo mah se, an in lamah a hrâng hle tih a hriat mai, a fanu Tleipuii nen an inrem thei hlawl bawk si lova a buaithlâk ka tih zawng tak a ni.

Ka û thihnaah a bultumtu angin lang mah se, Mawitei leh Buatsaiha sawi ringawt kha thu belhchian tlâkah an ngaihsak lo a. Tin, amah nu Pianmawii pawh thu an zâwt fiah a, a thluak lam a fel loh avangin chhânna pawm tlâk a chhâkchhuak tlat lo. Chuvangin, a lakah lawm lovin na viau mah ila, ka pasal hringtunu a nih vangin ngawih ka chuh a ni deuh ber, kum upa lam a ni tawh a, amah vang chauh hian a fapa Jeho pawhin JK farm a rochun theih phah a, a lakah sual chhuah a har deuh chu a ni e.

Vansangi te unau an inbiak zawh hnuah Jeho chuan Mawkasiang lamah kal a ngai tiin min tur sek sek a, a nu chungchâng erawh eng mah a sawi chhuak lo.

Lalngurmuana ka bual fai a, helai hmun hi chu sawi tawh angin a changkang hran lo a, anmahni inpui nena khaikhin râlah phei chuan inthlau tak a ni. Mahse, ka lo chêng rei ve ta a, ngaiah ka nei hman titih tawh.

Rishan hruaiin an inpui lam panin kan tlan chhuak ta a. Nu Pianmawii hmel hmuh ka châk fahran lo hle.

Jeho ka melh zeuh a, a fapa a kuah hlu hlu a, mûk taka thil ngaihtuah hmel a pu.

"Ka nu hian enkawlna ṭha a dawn a ngai a, in unau laka a rilru put hmang dik lo pawh ka hria, mahse, natna nei a nih vang leh ka nu a nih tlat avangin ka haider a ngai dawn a, min haw viau em, ka laka i rilru puthmang a danglam phah lo maw?" Tiin inthlahrun hmel takin min zawt a.

A kuta vawnsak pah hian, "I rilru tihrehawm duh suh, ka kianga i awm chhung chuan min venghim zel dawn tih ka hria a nia, i nuin a lo enkawl tawhna che ngaihtuah phei chuan ngaihdam a ngai zawk a ni, ka pasal Jehomalsawmkima hi ka hmangaih a, a natna chu ka natna a ni, i nu lak aṭanga la hrangtu che ka ni si a.." tia ka sawi chuan a ṭhut dan siamremin mak tih hmel tak hian min en a, a mita zawhna rawn lang dawt zut chu ka lo melh let ve kar a.

"Ngurthan, eng maw i sawi, tunah khan eng thil nge i sawi?" Tiin min zawt nghal sek sek a, "Ka sawi ṭeuh kha maw le.." ka lo ti hlar.

"Ni lo, nang hian min hmangaih thu i sawi chiang a ni," zawi supa a tih tâkah chuan, ka nui chhuak ta a.

"Ka hmangaih che a nih chuan eng hunah pawh ka sawi chhuak thei alawm, khum laizawla sawi tur a ni kher lo, ka la hriat reng danah chuan ka Laljeho pawh khan hmangaihna kan chendun lai ni lovin, Fâr hmunah min hmangaih tih a sawi ve tho," ka lo ti a, nui ruh ruh chung hian, "Chimawm viau lo mai teh.." a ti sup ringawt.

Rishan pawh motor khalh chungin a rawn nui chhuak huk a, "Madam, nakinah hrilh ṭha mai rawh, Boss khan a dawngsawng thiam lo a nih kha," a lo ti pek a.

Jeho zawk chuan, "Doctor, i thil sawina hmun hi a dik chiah lo deuh a ni, zaninah kha thu ngei kha hriat nawn leh ka duh dawn a nia," a ti ta a, "Ka hmangaih che tih thu kha maw?" Ka tilui ve ngat, a nui hawk a, "Rishan, tlemin tlan chak deuh rawh le, i madam hian inpuia kan room-kha a ngai deuh a nih dawn hi.." a'n tiah. Malsawmkima tak hi chu(h).

Dârkar khat hnuah an inpui kan thleng ta a, Tleipuii leh a fapa pawnah an lo awm a, "Aryan in lo hruai ve nange?" Tiin Rishan a zawt a, ani lah chuan, "A khum thar siamna tur thingzai a thiar," nui chunga tiin Zonunthara a pawm a, inchhungah kan luhsan ta a.

Vansangi leh Bartho an lo ṭhu dun a, Raguel a muhil tih an sawi.

Thildang tikhawmuang miah lovin Jeho chu a nu room-ah a lut nghal a, Vansangi chuan, "U Ngurthan, kan haw a hun dawn hnai tawh si a, kan lo zin leh har tawh ngawt ang," tiin a pasal a melh zeuh a.

Bartho chuan, "Tâwli hi chu a lungngai hma ve thei a, Raguela chhang a pai a nih a ring a, Jorhat-a kan lêt hunah kher intest a duh miau si a.." a lo ti chuar chuar a, "Hetah test mai la, a harsa lo em mai," ka lo tih chuan, "Kan haw hunah le, chanchin ka lo hrilh zawk dawn che u nia," a ti deuh tlat.

Dârkar chanve hnu velah Jeho a rawn lang a, a hmel aṭangin eng nge a ngaituah tih a hriat theih loh, mahse, rilru hahna nei ang maiin a meng dul ruih a, ka ṭhutna bulah a rawn ṭhu hnawk a, "Ka nu hi a rang lama enkawl a ngai dawn ka tih kha, Mami, nang pawhin ngaidam thei la ka duh khawp mai," a ti ta a. Vansangi a ner nak a, eng mah phei chu a sawi lem lo.

Kan vaia hriatah, "A hma aṭang daih tawh khan ka lo ngaihtuah lâwk diam a, Meghalaya-ah hian Mental hospital, a bîkin ka nu te awmna tur ang chi hi a vâng riau mai a, Jorhat-a ka ṭhianpa Dr.Sagar Mantry ka va bia a, aniin an hospital a ṭhat thu min lo hrilh a, Psychiatrist ṭha tak a ni bawk; chutah chuan kan dah mai dawn em maw ni, heti ringawta a awm chuan pawi lian tham zawk a khawih ang tih a hlauhawm a ni," tiin tih bik pawh nei lo hian a thuphungin a sawi chhuak ta a, kei chuan ka lo pawmpui hmak.

Tleipuii kan ko lut a, kan han sawi khâwm nak nak hnuah, nu Pianmawii chu Jorhat hmuna 'Cinamara Central Hospital'-a dah kan titlu ta a ni. 

Vansangi te nupain a khât tâwkin an ngaihven ang tih an sawi a, a doctor bîk atan Jeho ṭhianpa Psychiatrist thiam leh lar tak Dr.Sagar Mantry chu kan thlang fel nghal bawk a, kan sawi tawh ang khan, Jorhat-ah hian nu Pianmawii nau fanu Angelika a awm tih kan hriat kha, ani pawh Jeho chuan a hrilh dawn tho a, a nu a hmangaihzia ka hriat thar phah bawk.

Bartho te chhungkua an haw rualin Jehomalsawmkima leh Rishan chuan a nu an hruai tel ve dawn ta chu a nia.  

Hetia a nu chungchânga kan ṭhutkhawm lai pawh hian ama room-ah thawm bengchheng a siam reng a, a room-a bungraw awm a hmuh phâk apiang a tichhiain amah leh amah a inbe mial mial zel tih Tleipuii kâ aṭangin kan hre bawk.

Kan laka sual chhuah leh kan chhiatna tur dapa min beitute zawng zawng tawpna ka ngaihtuah a, ka thâwl hawk thei. Tual thahna êm kan tawng baw lova; Samuel Pamei, Jeho pa bâk nunna chân an awm lova, ani thihdanah keini kan fihlim hlauh thung. Chunglam rorel dan hi a mak ngawt mai.

Ni a ral a, Jeho te inpuia kan haw aṭangin ni li a liam tawh bawk. 

Vawiin hian Vansangkimi te chhungkua pawh Jorhat lamah an lêt tawh dawn a, kan buaina zualpui a kian tawh vang a ni. Kan lo rêl lâwk tawh angin Jeho leh Rishan pawh a nu hruai turin an insiam peih thlap a, Mawkasiang-a kal tel ve turin min phût lo hlauh.

"Ngurthan, kan tan chuan fimkhur tluk a awm lova, a rang lama lo haw kan tum dawn nia, ka nu laka i rilru put hmang hriat sak vek lo che mah ila, khawngaihna i lan tîr avangin ka lawm e," tiin min kuah hlu hlu a, a kâwngah ka lo kuah lêt ve vat a. 

"Ka hmangaihna che hian hriatthiamna nasa tak a keng tel a, i nu i hmangaihzia ka hria alawm, nang leh ka fapa lo chu chhungkaw dang ka nei hleinem," tiin ka dingdihlip zui âk âk a, ani pawh a rawn kûn hniam a, "Ka Ngurthantluangi hi ka ngai ngawt ang, ka hmangaih che," ti supin min rawn fawp ta a, ka lo chhâng rang teh a nia.

Gurkha tlan liam tur chu ka thlir reng a, ka Laljeho nge nge, khawngaihna leh lainatna nei miah lo chu a lo ni bik lo e.

Sangeeta hnen aṭangin phone call ka dawng a, Rishan a biak tlang theih loh thu min lo hrilh ve ngei. 

Jorhat-a an kal thu ka lo sawi a, "Rishan Songbet han nikhua loh dan hi chu aw, a kalna tur chin sawi a har loh tehlul nen aw.." tiin a phun nang nang a, "I ngaihtuah lutuk a nih kha," ka lo tih chuan, "My dear, i hrethiam lo zawk a ni, min biak hmasak hi a hreh ngar ngar lutuk a, ka buai ve bawk si a, a hahthlâk lutuk," tiin a phunnawi leh a. 

Rishan hmel ka ngaihtuaha ka nui ta hak hak mai, an boss zia hi an copy nachen a awm ve a, hmeichhia an ngaihsak khuchûk lo tih Sangeeta hian a la hre chho ve zel mai ang. Jeho pawh a bâng chuang lo, kan inneih tirh ngaihtuah phei chuan tuna a mizia hi chu dang tawh tak a ni. Rishan pawh a danglam chho ve mai ang tiin Sangeeta ka hrilh ve tâk kha.

Richard hnen aṭangin Shisha chanchin ka hre ve zel bawk a, khatia Dingngheti tlan chhuak khan Bamos gate duty pawisa pein Shisha a va luhchilh a, ani Shisha mi rilru ṭha ta ngang chuan a lo khawngaih a, kan chênna hmuna Dingnghetin kalpui tura a sawm khan a lo 'aw' ve mai niawm tak a ni. 

Farm house lama kalpui hmasa lovin Fâr hmunah a hruai a, a duh anga kut a thlâka a sawisak hnuah kan awmna lam panin a rawn hruai leh a, Riffle vawi hnih hmet puaktu kha chu Dingnghetin pawisaa a tham tâk, Bamos Main gate vengtu a ni. Richard pawhin engkim a hriat hnuah a bân ta kha a ni a, a hmêl rawn lan leh tawh lo tura thupêk a ni bawk.

Jeho pawhin an chin min rawn hrilh zel a, a tihdan pangngai angin Farm house chhuahsan lo tur leh number dang aṭanga message ka dawn reng rengin, amah Jeho anga insawi pawh nise 24-89 a tel loh chuan engmah awih lo turin min hrilh leh thlap tawh. Angelika a biak tawh thu leh Cinamara Central Hospital-ah a lo hmuak dawn tih a sawi tel a, Mental hospital-a dah ngai khawpa a nu a awm hi pawmzam thiam a har ve ngawtin ka ring.

Arun leh Islam, Sameer te'n min riahpui a, Aryan erawh Jeho thu angin Mawkasiang-a an inpuiah Tleipuii a riahpui thung a, "Ka farnu lakah i mipatna chelek hauh suh ang che," tia Aryan a hrilh lai khan ka lo zak ringawt. Thu khuh a thiam ṭhin si lova Aryan zak hmel hmuh a nuam viau lo.

Ka fapa nen khumah kan inchhaih a, min zaina pawh a dam a ni tawh mai. Mahse, a chhunglam dam kim tur erawh chuan hun a duh rei deuh dawn tih ka hria.

Buatsaiha leh Mawitei Meghalaya Central Jail-ah dah luh an ni tawh a, Dingngheti erawh chu Islam kut a tuar vang khan hospital-ah enkawl a la ni rih a, Inspector Ramos puihnain engkim a fel duak ti ila ka sawi sual lovang. 

Omar leh Shisha inhual lai an nih angin a dam ṭhat veleh inneih an tum tih Richard hnen aṭangin thu lawmawm kan dawng bawk.

Arun leh Sameer erawh chuan hmeichhe lam an ngaihsak lo hrim hrim a, anmahni min ngenna angin Jeho ka sawipui hnuah Badrul Islam pawh Farm house-a duty tura lâk a ni ta a, Deepak ve thung kha chuan rinawm taka awm tura intiam chungin a hna ngai JK Farm Gate keeper a ni chhunzawm leh ta a ni.

Ni thum hnuah Jeho leh Rishan pawh tluang takin an rawn haw thleng ve ta a, an thu thar rawn hawn chu Vansangkimin Raguela chhang tur a pâi tih kha a ni. Bartho Saingurpuia a lawm fâl hle tih a sawi tel hrâm.

"Mate, hetah lokal teh.." tiin khumah Jeho chuan ṭhu turin min hrilh a, a kuta a thil ken chu ka lo en daih thung, Envelope uk kharh a ni a, Samuel Pamei thurochhiah chhiar zana lawyer Jibu Hussin pêk kha a ni tih ka hre thei mai.

"He thil hi ka lo mangnghilh daih mai a, a chhungah eng thu pawh inziak se, kan chhiar ngei chu a ngai ang,'' tiin envelope chu a hawng ta a.

Samuel kut ziak hraw hraih chu Jeho nen kan chhiar ta a.

"Ka fapa neihchhun Laljehomalsawmkima, i lo pian chhuah ni khan i pa Lalsiamthara biangah lawm avangin mittui a luang asin, ka fa hming koh i ni a, Jehova malsawmna kan dawn liau liau i nih avangin 'Laljehomalsawmkima' tih i lo ni ta a ni. Jeho ka fapa, Tleipuii pa Ramhmachhuana khan i nu a uire lai phâwk lo ila chuan chhungkua hlim tlâng takin kan chêng tur a ni a; Ramhmachhuana kha tûrin ka hrai hlum ta a nih kha. I nu erawh ka fapa nu a nih angin a nunna ka zuahsak a, in la naupang a, i nu nen inremsiamna kan neih angin Ramhmachhuana thih thu kan zêp ta a, i pa 'tualthattu' tia i hriata i nat âi chuan tiin i Patea angin ka inchhâl ta a ni. Samuel Pamei hi chu ka Khasi hming leh ka inthupna hming mai a ni a. I pa hming dik tak chu Lalsiamthara a ni e.

Ka enkawlna hnuaia seilian ni mah la, i pa nihna dinhmun ka luah theih tâk silovah khan kawng dang ka zawh chho ta a, ka enkawl dan che leh ka sum hai luhna te, mi ka thah tâk fo aṭang kha chuan ka nunin awmzia a nei lo telh telh a, îtsikna leh duhâmnain ka khat zo a ni ber. Thil thui tak sawi ka tum lo, min ngaihdamna chauh lo chu eng thil dang mah ka duh belh lo a, i tana ka hnutchhiah zawng zawng kha chu sum thianghlim lo engmah a awm lo. Khawngaih takin min ngaidam ang che aw ka fapa, i farnu Vansangkimi i hmangaih tih ka hria, thlahthlam reng reng suh ang che..." tih ka chhiar lai chuan Samuel Pamei hmel ka mitthlâah a rawn lang a, ka thâ a khûr lo chauh.

Jeho che lovin a ṭhu ngawi reng a, a kuta a pa thu hnutchhiah lehkha chu nghet takin a hûm a, ka chhiar zo lo nain chhiar zawm châkna ka nei lo hrim hrim.

Tleipuii pa a thah nachhan erawh thudik tak a nih chuan nu Pianmawii a demawm ta zâwk a ni.

Rei fê ngawi renga kan ṭhut ngat ngat hnuah, Jeho a ding hluai a, "Sameer leh Rishan teho kha va ko lawk teh, Aryan pawh.." a ti a.

"Jeho.." ka lo ti sap a, "Hlauthawng mah ta che, naktuka an hna tur ka hrilh ringawt dawn alawm," a ti dam thlup a, ani chuan lehkha kha a chhiar zo vekin ka hria.

A thu sawi zawmin Rishan te ho chu kan room-ah ka ko phei ta a, zan a rei tawh si a, an hawihai viau mai.

Aryan, Arun, Sameer, Rishan leh Islam te chu an ding tlar ṭhap a, "Naktuk zing hma takah hnathawktu dang mi 10 hruaiin 'KHATAM' in kha ṭhiah vek tur a ni, Aryan, nang erawh chuan i khuai khâwi 'Aryan bee' kha Fâr hmunah chhuah zalen thung ang che," tia a sawi lai chuan mak ka tih êm avangin ka lo thaw halh a, a nauteho hmelah pawh mak tihna a lang chhuak tho.

"JK farm-ah hian ralthuam, Silai emaw Chemtê pawh tiamin midang hliamna atan chelek a rem tawh lovang, misual an lo awma kan pawi an sawi a nih pawhin mipa rual awmkhawm kan ni a, kan tan eng mah hlauh tur a awm lo, thinlunga huaisenna hi a pawimawh zawk, dan hnuaiah, danin a phal chinah zel chêt kan thawh tawh ang," tih pahin a kâwng hnunglama a Pistol pai chu a phawrh chhuak a, "Min lo zui rawh u," tia a sawi zawh rualin a chhuak vut a, Rishan teho pawhin thuawih deuhin an zui nghal vat.

Kei erawh chu Veranda thleng chiah ka kal a, JK farm aṭanga Bamos ram inrina lamah an inzui phei ṭhâm ṭhâm a, an vaiin Pistol an hum vek bawk. Ka hmuh zui theih tâk loh avangin kan room-ah ka luhsan ta a.

Kan fapa Lalngurmuana thla thum a pum ve ta.

A pa Jehomalsawmkima duh dan angin naktuk tlaiah hnathawktute tan zanriah a buatsaihsak dawn a, nunphung pangngai kan zawh ve tak tak tawh a, kan nun pawh a râlmuang chho ṭan viau e.

Sangeeta min tlawh turin a lokal a, Rishan nen hun thâwl kan pêk hnuah kan fapa pawm chungin Kêl in lamah an phei ta kha a ni a, chumi remchang chu kan lo chuh ve vat.

"Inbual rual ila," tiin Jeho a nui suk a, "Bathroom-a tawm chhung a rei duh em mai inbual hmasa rawh," ka lo tih chuan a lamah min pawt hnai a, "Nilêng zankhuaa kan inkhung nghal loh, kan fapa lahin a nu hnute tui a ring si lo a, nakinah chuan kan bula mut aiin uncle Sameer kianga riah a la thlang zawk ngei ang," a ti a, a dik hmel viau. 

Sameer kut aṭanga rûk bo a nih vang khan midang zawng aiin a ngaihsakin a duat a, hunawl a neih îk chuan ka chang hman meuh lo. Arun hian ei leh in tur a siam deuh ber a, kan fapa a pawm khât deuh. A duat lo tihna phei chu a ni hauh lo.

Ka pasalin min tur chhên avangin inbual dun turin kan lut leh ta poh e.

Ka thawmhnaw inbel ka hlih rualin, "A tîr berah thisena inremna kan nei a, ka hmangaih hmasak ber i ni bawk, tharum hmanga i taksa ka neih lai pawh khan chân che ka hlauh vang a ni, ka ta, keima ta chauh i niha pumbilh che ka duh a, Ngurthan, ka tana i hlutna hi ka sawi chhuak thiam lo," a ti ve thlâwt.

"Ka hna ka ngainat em em leh kum tam tak tha leh zung sênga hun ka khawhralna bansan ṭhak khawpin i kiangah ka chêng a, doctor hmantlâk loh leh nikhua lo ti pawhin min sawi mah se, i hmangaihna ka hlawh chhuak a, ka hmangaihna che i pumbilh thung;

Jehomalsawmkim, nangmaha hmangaihna leh dawhtheihna, khawngaihna inphûm ru hmu thiamtu hian ka thlah thiang lo che a, ka nun chhanhimna tur atan i nupui ni turin min sawm a nih kha, khalai hunah khan min khawngaihna leh lainatna i neih vang chauh a ni a. Ka lungphu ti pangngaia min hliahkhuhtu chu ka Laljeho chauh hi a ni," ti ve duahin a taksa huh hluam chu ka kutin ka chûl lâwr dan dan a, ka kut che lai a dawm bet chat a, a mit thim raih chuan chiang taka min enin, "Hmangaihna hi sawia fiah chi a ni lo a, thiltiha lan chhuah tîr hian a fiah zual bîk," ti supin ka kut chu a kâwng hnuai lamah a dah thla a, a nui suk suk bawk.

Ni e, Super Care Hospital-a thla hnih ka thawh hnu aṭangin Jehomalsawmkima salah ka tâng a, phuba lâk tuma amah neih tumtu kha hmangaihnain min hliahkhuh a, ka hmangaih a ni tih ka hriat ve hma aṭang daih tawhin hmangaihna kutin min chelh reng a lo ni si.

Bathroom-ah a duh khawp a hmu lo nge, nui kur kur chung hian, "A remchâng zawk khum zau ṭha tak a awm reng a, a chêp zâwka inkhung tlat te chu a," ti hluk chung hian khum lamah min pawm phei nawlh a, kan taksa huh hliam chu inhru hul thuak thuakin a nupui dik tak ka nihzia a nemnghet leh ta.

Kan fapa an zai chhuahna ka pum ser phei raih chu a hmuia chhui zai zaiin, "Tawrhna phenah malsawmna a awm tih hrechiangtu ve ve kan ni, kan nun buaichuar leh ralṭi zet a kiang ta ang chiah hian, kan fapa Lalngurmuana'n khawvel êng a hmuh theih nan he ser hi i put a ngai a ni, ka nunna chhanhimtu i ni mai lova, kan fapa nunna pawh i humhim tel a ni, doctor, hospital-a thawk reng angah inngai rawh," a ti ve ngei.

"Jeho.." tia a hming ka lam rik veleh, "Malsawmkim..tih i lam tel hunah chêt ka la ang," a'n tiah. 

A mitmenga phurna leh tisa châkna lang dawt zut ka hmuh rualin, "Jehomalsawmkim," tiin ka ko leh ta nge nge a.

24-89 Khaikhawmna

Kum khat a ral leh meuh chuan kan fapa Lalngurmuana pawh Farm house kawtah a duh tâwkin a tlan kual thei tawh a, Badrul Islam leh uncle Sameer te kaihhruaina hnuaiah a seilian dawn a nih tâk ber hi.

Buatsaiha leh Mawitei pawh court-in an chungthu a rêl fel tawh a, Meghalaya Central Jail-ah an damchhung hun zatve aia tam an hmang dawn ta. An fapa erawh Mawitei nu leh pain an enkawl ta a, a nu leh pa duhâmna leh suahsualna avangin fahrah nun a tem ka ti lo thei lo. A tan chuan a nu leh pa hi mitthi tawh nen an danglamna a awm chuang lo, ka lainat khawp mai.

Thlaruk liam ta khan Omar leh Shisha pawh an innei ve ta a, Raitong wood-stock farm-ah an chêng zui zel a, ka nunna chhanhimtu Barua kha an Manager atan lâk a ni bawk. Richard erawh chu Gay a nih tlat avangin nupui lam a ban phâkah an awm lo a, ama ṭhat ṭhatin Bamos Farm-a la enkawl zui zel bawk.

Ka sawi hmaih miah loh tur chu Dingngheti khan hospital a chhuahsan hnuah Jail-a dah tur a ni a, ani mi luhlul leh pawisak nei lo chuan amah vengtu Police chu beiin a Pistol pai lai a chhuhsak a, police pakhat a kah hlum hnuah amah pawh a inkâp hlum ve ta a ni. Mita hmutute chuan a thluak a darh vek niin an sawi.

"Midang nunna hlut lotu chuan ama nunna pawh a hlut zo ta lo a nih hi.." tiin ka pasal Jeho a ṭawng chhuak a, pawiti hmel a pu lem lo.

Rishan Songbet leh Sangeeta Kar an inhual fel tawh a, Sawlad-a kan in luah kha an chhawm zui ta nghe nghe a, kan bungrua farm house-a an rawn dah ni-ah, "Ngurthan, Rishan hian zu inrûk a ching riaua lo kamkhat ve deuh teh, a pumpui ka zai hawng lovang tih a sawi theih miah loh," a ti a, ani hi General Surgeon tho a ni a, a sawi awmzia kan hre ve ve.

Jeho farnu naupang zawk Laltleipuii pawh Buatsaiha chungthu rel fel a nih hnu khan inṭhenna mumal an nei thei ta chauh a. 

A nuṭapa Jehomalsawmkima thu awih a zir ve mêk bawk, Aryan nen an inzui pangngai ve leh tawh a; mahse, inneih phalna a û in a pe duh rih lo. 

Aryan hnenah, "A nun dan luhlul leh tihmawh zual hi reh phawt se, in fapa Zonunthara a awm tawh bawk a, inneih lam intintuah ve dawn nia, Mawkasiang-ah weekend a piangin i haw thei ang, a driver Habib kha inchhawr zui thei bawk ang a," tiin Jeho chuan Aryan a hrilh thlap. JK farm manager a la ni zui zel dawn tihna a nih chu.

A farnu upa zawk Vansangkimi erawh chuan fanu thar a nei tawh a, thlalâka ka hmuh bâk kei chuan atakah ka la hmu lo. Bartho Saingurpuia'n a duat hlum lo chauh a, Raguel Sainghinglova erawh chu a pite khua Aizawlah a zin a, Bartho nu leh pain an duat hle a, an ngaih êm avangin an zuk hruai a ni awm e.

"Mama, i nu pawh a ṭha chho ve zel a nia, remchang hmasa berah inchhungkuain lo zin ula, i rin aiin i hmu ṭha daih ang," tiin Vansangin a u a hrilh a, Jeho lah chuan, "A ṭhat zawh poh leh a hlauhawm dawn tih a doctor-in min hrilh, fimkhur ang che u, Angelika pawh kan hnena awm turin kan la hruai phei daih ang," a ti hmiah. 

A nu a hmangaih lo a ni lo, chanchin thar apiang a doctor Sagar Mantry- Jeho ṭhianpa ni bawk khan a rawn report zel a, vawikhat chiah Jeho leh Tleipuiin a nu an la tlawh a, Vansangi nau neih hlim kha a ni nghe nghe. Tleipuii leh Vansangi pawh an inngeih chho ta zela kan boruak a zangkhai ta.

Samuel Pamei thurochhiah kha a tîrah Jehomalsawmkima te unau khan an pawm duh loh kha a ni a; mahse, an pa a nih tlat avang leh lawyer Jibu Hussin khan pawm mai a ṭhat thu a sawi chhên takah chuan kei min sawipui hnuah Lalsiamthara'n (Samuel Pamei) a fate a hnutchhiah ang ang chu an unauin an pawm ve ta a ni.

Super care hospital-a share tam ber neitu chu Laljehomalsawmkima a ni a, a pa chanvo leh ama chan te nen Director a ni ta a, kei a nupui Dr.Ngurthantluangi (MBBS, MS, General Surgeon) pawh ka thawk chhunzawm dawn ta nge nge e, ka pasal phalna thlap lehnghalin..

"Ka venhim phâkah i la awm zel dawn a, i damchhunga i nih châk em em leh i zir hahna a thlâwna liam tîr ka tum lo, ka hmangaih che a, i hlimna hi ka duh ber," tiin ka pasal Jeho chuan min hrilh a, nitin amah nen Super Care hospital-ah kan kal dun tawh dawn a ni. Kan fapa awmtu tur atan Angelika kan be fel tawh bawk a, kan tan hlim ni a her chhuak ve tak tak dawn ta a va ang ve.

Sameer, Islam leh Arun erawh chu an dan panngaiin farm house tan an duty leh ngar ngar dawn a, Lalngurmuana uncle te vek an ni bawk.

"Ngurthan, hetah lokal teh," tia ka pasalin min koh chuan, nui var var chungin ka pan phei a, a malchunga min ṭhut tîr hnuah, "Thla thar ni 24 hian Mizoram panin kan chhuak ang a, Serchhipa i nu leh pa, i u Vanlalṭana te thlanlung phun kan tum ang, inbuatsaih chhung a rei deuh dawn avangin thlakhat aia rei kan châm a ngai dawn a, a thla thar ni 24 ah vêk chhungkaw chaw eikhawm kan siam dawn nia, a thawhpuite pawh kan sawm vek ang," a ti ta a.

"Ka lawm e, ih..ka hmangaih che.." tiin ka melh chho hâ a.

Nui suk chung hian, "24-89 awm lo se chuan kan pahnih hian pumkhat kan ni ngai dawn lo tih ka sawi tawh kha, chuvangin kan nunah 24 number tlem lam zawk hian hmun pawimawh a luah fai vek a, chumi a nih vang chuan i chhungkuate hun hnuhnung khâr nan ni sawmhnihpali tho hi ka thlang a ni. I chhinchhiah reng theih nan," a ti ta a.

Mittui parawl ṭeuhin ka melh chho a, a kut pahnihin ka biangah a dawm a, "Mittui tih tlâk awih loh, Lalngurmuana nau pawh ni Sawmhnihpali-a piang thei tura siam ka duh, chutiang tur chuan i doctor thluak kha han hmang la, hmeichhe lam chan a ni deuh bawk a, a theih phei chuan tunah ṭan nghal ka duh dawn a nia," a'n tiah.

Ka nui ve leh ta nge nge e.

Kan inhmangaih ṭanna hre lo mah ila, kan nupa pian ni, kan fapa piancham leh ka nu leh pa, ka u Vanlalṭana ka tana mi pawimawh zawng zawng te ka hriat chhuah fo theih nan 24-89 hi ka theihnghilh thiang lo. Ka theihnghilh ngai hek lo ang.

Hrehawmna tam tak min paltlangpuitu, thihna nena inremsiamna ka neihpui; ka pasal Jehomalsawmkima hi thihnain min ṭhen hma loh chuan nghet takin ka vuan zel ang.

"Doctor..kan fapa lo a lêt leh hmain a nau tur siam hna thawk ang, a siam lam chu a awlsam tih i hriat kha.." tia nui leh suk suk chungin khumah min kuai mu a, a mitmeng tak leh thim raiha min en chung hian ka hmuiah a rawn fâwp ta a.

"24-89" tia phun sep chungin Jeho âng chhungah ka tlu lût leh ta nge nge e..

Kan hnunglamah eng thil ropui mah a awm lo, kan hma lamah zel hlimna leh lungawina a awm tawh zawk tih ka hria a, kan tawrhnate kha insalbeh tir ka tum lova; chumi tur chuan ka pasal Jehomalsawmkima rin tlat hi ka tih tur dik tak a ni. Rintlâk a ni si a.

B+>[BeckirafARenthleI]<+®®

Thu belh: Zum leh hriam kârah 24-89 long story chu episode 28 ah a tawp kan lo khâr leh ta.

He story hi a tîra ka rawn sawi ang khan ka tluang lo lutuk a, a plot ka la thlâk zui vei nen hun dang zawng aiin ka regular lovin kâr khat tawp ka chawlhsan a; dawhthei taka min nghâktute leh ka thawnthu min hlutsaka min chhiarsak/ ngaihthlaksaktute zawng zawng chungah lawmthu ka sawi takmeuh.

A dik lo lai leh sawi nawi tur tam tak a awmin ka ring a, mihring ve tho ka nih avangin leh thawnthu a nih angin min hmuh kân sak ve mai dawn nia, min chhiar mâm sak fo ṭhin tih ka hria a, sawisel tur a tam dawn vei nen.

Thluak a hehin a hautak hle mai bawk si a, kei mi hrisel lo leh a chîmchin sâng lo hian ka bânsan lo chauh chu a ni e. Eng pawh nise, a tawp kan khar thei hi ka lawm a, min chhiarsaktu thawnthu lawrkhawm channel neitu Mr.Jeru pawh ka ti khaihlak nasa hle, min hriatthiamnaah lawmthu ka sawi bawk e.

Pathian zarah kan dam ang a, Long story thar 'Drogma Seol' nen inhmuh leh kan tum dawn nia. 

Obrigado (Ka lawm e)

-B®®

040523

B+>[BeckirafARenthleI]<+®®