10.DROGMA SEOL [A Becky Rafa Story]

10.DROGMA SEOL

Ziaktu: Becky Rafa Renthlei

[Recap]

A hmai thisenin a bual huh zùih a, a meng lo. Chêt chhuah tumin ka'n insangmar a, ka ke a rit churh mai.

'Ka Lalngaihzual' tiin ka ko a, ka âw rêng a chhuak zo si lo. 

Ka khaw hmuh thim tial tial leh ka ke ruh na ut ut te, Ngaihzuala hmel thisenin a bual nuai te nen ka hriatna a tâwi turh a...

Nia, keini pahnih hian accident kan tâwk a ni. 

Eng tianga lo thleng nge tih ngaihtuah tur pawhin ka thluak ka sâwr thei hlawl lo a, Ka Ngaihzuala hming lam chung zelin ka maimitchhing ta riai riai a...

-B®® Stories

Thâwm ri bengchheng awm tawh miah lohna hmunah ka meng chhuak a, ka mit veilam a vûng phui vek tih hriat takin khua ka hmu lo a, dinglam erawh a fiah ṭha viau thung.

Ka awmna hi khawi lai nge tih hriat tumin ka hawi hrek hrek a, a lo vâr vûk a, ṭawng thawm a awm lo a, khâwl ri bengchheng zet chu thâwm dang ka hriat chhun a ni rih.

Ka thluak a fîm telh telh a, ka awmna lai pawh kâr lovah ka hrechhuak chawpchilh nghal a, damdawi in a ni. 

Ka ke chêt ka tuma a rit mai piah lamah a chêtin ka ti che thei ṭhak lo. Ka dang a ro huam naa tuma hmel ka hmuh loh avanga ka ngaih ṭhat lohna a nasat êm avangin chil lem khalh chung hian kawngkhar lam ka melh a, a inhawng lawi bawk si.

Kan zin kawng zawh laia hetiang thil hi thleng a ni tih ka hriat chhuah rualin Ngaihzuala hmel kha ka mitthlâah a lo lang a, thil thlen dan kim chang hmuin hre vek hman lo mahila accident râpthlâk tak kan tâwk tih hrilh hranpa ngai lovin ka hre ve mai.

Chutia ka lo inngaihtuah lai chuan doctor leh nurse pakhat bâkah Ngaihzuala nau Apuii kha an rawn inzui lût a, ka harh tih an hre ve mai bawk a.

"Rinduhawmi maw kha?" Tih pahin doctor ka bulah a rawn ding hnai a, nurse in ka Bp leh thil dang ṭûl a rawn ti nghal mawlh mawlh a, zawhna ka ngah vei nen ṭawng chhuak turin chakna rêng ka nei si lo.

"I ngalrêk i tauh na deuh tih loh chu hliam dang lian tham i nei lo a nia, i mit pawh kha ni hnih khat hnuah a zia mai ang, hlauthâwng suh aw," tia dam duama doctor-in min ṭawng thlamuan lai chuan Apuii ka mutna khum bulah a rawn ding hnai ve bawk a.

Zawitê hian, "Khawiah nge Ngaihzuala?" Tiin Apuii chu ka zâwt a, ka ṭawng a hre pha lo nge, ka hmai bula rawn kûn hniam chung hian, "I sawi ka hre thei lo reng reng, ka u pawh a ṭha a nia, a ngaihtuahawm lo turah ka ngai," dam thlapa tiin mamawh ka neih leh neih loh min zâwt nghal a. Thû a khuh deuhin ka hria, ka hlauhthawn vang nge ka hre lo thung.

"Ka tui a hâl.." ka ti sep a, ka âw chu le(h)

Tui in tur min rawn lâksak a, ka lo ban vat, mu chunga in ka harsat avangin Apuii bawk chuan ka tukkhumah a rawn châwi kâng det a, ka in ta khawlh khawlh a, ka harh deuh kâwkin ka hria.

"I nu leh i u an lo kal mêka an rawn thleng ṭêp tawhin ka ring, Mama pawh reilote a lo harh ve a, nachhawkna an pek hnuah a muhil leh ta rih a nih kha, Rini, in accident dan i hria em?" Tiin min zâwt a, ka hriat loh thu ka lo hrilh a.

"Chiang taka hmutu che u an awm si lo a, Mama'n a hrechiangin ka ring, Aizawl in la hlatsan lo hlauh zawk a, helamah an rawn phur thla ta che u a nih hi, a car erawh a chhe ve nual mai, in insu na thawkhat a nih ka ring," tiin a hriat ang ang kimchang lo zetin min hrilh a. 

Ka ngaihtuah ngial pawh hian engmah ka hre tlat lo, Ngaihzuala'n ka lu a rawn nem vak kha ka hriat chian ve awm chhun chu a ni mai, kawng thlang lamah kan liam thla nge, eng mah hriat ka nei lova, ka muhil em mawni zawk ni? Â, ka ngaihtuah peih rih lo. Mahse, motor dang nen kan insû tihna a nih chu! 

"Mama a lo la harh chuang lo a, ka awmpui rih dawn che nia, a zia lo em mai," tiin locker-ah eng thil thil emaw a rem mawlh mawlh a, Ngaihzuala te chhungkaw chanchin eng mah hriat ka nei lo a, a hmaa min hrilh a tum lai khan ka lo duh lo tumhrang nen ka zawt zui ta lo kha a ni a, ka hawi buai ta nak mai alawm maw le.

Mamit kan chhuahsan dawna kan hlimna neih chhun tlêmtê kha mitkhap kâr lekah a zo vek a, a aia natna thûk zâwk tisaah kan tuar leh si. 

A hma deuha ka lo sawi tawh angin ka tan hian 'Pathian a awm lo' tia ka lo ngaihtuah fo ṭhin khán ka rilru a luah leh ngat ngat a, Seol aṭangin Seol dang kut vawtin min man nawn leh nimaiin ka hria, ngaihtuah thui tlâk a awm lo. Mittui hnâm sak chung hian, "Eng ati nge ka la thih loh fo le!'' tih zawhna hi ka inzâwt lo thei lo a ni.

Champhai aṭangin ka nu leh ka u an lo chhuk tih ka hriatin ka inthlahrung nghal ringawt a, a bîk takin ka û lakah a ni lehzual. Ka zin san hma pawh khan boruak ṭha kan nei tawh lo a; tunah buaipui loh theih lohvin tihian ka awm leh bawk si. Rinduhawmi hi chhungte tan chuan phurrit mai ka ni e.

"In lamah kan nula leh ka pa chiah an awm si a, ka ngaihtuah hle mai," tiin Apuii chuan ka hmai min hruk fai sak a, kei ai chuan kum hnih velin a upa zawk maithei.

"I nu te an awm lo em ni, i naute pawh.." ka ti ve ringawt a, meng hnuai raih chung hian, "Ka nu chu a boral tawh a, Mama nen chiah hian unau piang hmun kan ni a, ka pain kutkal a nei," tiin za lo deuh hian a ṭhen sak a, a pa fa hmasa a sawina tih ka hrethiam ve mai.

"Eng mah i u chanchin leh in chhungkaw chanchin hriat ka nei lo a, ka zâwt mai mai che a ni e.." ka tih chuan, "A ho lutuk, i tan ka u mimal nun hriatsak vek a theih bik nang, tikhan lo awm lawk la, Mama ka va en ve lawk ang e aw," tiin a tho chhuak a, ka en chian deuh tâkah chuan Ngaihzuala nen inanna lai an nei ve tho mai.

Ka nu te an lo thlen laiin ka lo muhil a ni ang, ka harh leh chuan ka bulah an pahnihin an lo ṭhu a, an hmêla hlauhthawnna lang chhuak pawh ka hmuh hmaih bik lova an pawr fap mai.

"Mâmbawih, Bp sâng min neihtîr mai dawn alawm maw le, tun hnai hian chhiatna hrang hrangin a tlâkbuak che a, Pathian pawi kan sawi ta mai em ni tih te ka ngaihtuah rum rum, i dam a ngai a nia," tiin ka sam pawr phang chu min hûi mâm sak a; ka mit lehlam a nawm loh avangin mittui a luang ngiai ngiai a, ka û a la ngawi ngat ngat thung.

Ka landan chhe zet tur pawh ka ngaipawimawh hran lo a, ka chhungkaw neih chhunte hi ka khawngaih lo a ni lo, ka duh danin eng mah a thleng ngai lova, hmabâk hlimawm suangtuah tur ka nei hek lo.

"Lo thi ve daih ila a ṭha tur a nia," ka ti sap a.

"Bawihi, khatiang thu kha vawikhat mah sawi chhuak tawh suh, i duh hun huna thi thei i ni em ni, mi dâwihzep te tihdan a ni a, eng anga harsatna leh manganna, natna pawh tâwkin tuar mah la, i nu ka la dam alawm, ka thlahthlam dawn reng reng hleinem che, khatiang rilru nêp lutuk kha pu nawn tawh suh," chiang fakin a ti a, ka ngawi reng ringawt.

"Azuala pawh kan la hmu lo a, a lû-ah hliam a nei tih leh a bân veilam a tliak a, chu bâk chu an sawi lan pawh ka hre lo, in vanduai a nih kha, nakinah a harh hunah ka va tlawh ve dawn nia," a ti leh a, "A lu chu a hliam thûk em le?" Tia ka zawh chuan, "A farnu kha chuan a ngaihtuahawm tawh loh, vanduaiah rau rau pawh an vannei alawm,' a tih cheu kha," a ti leh bawrh bawrh a.

Ngaihzuala hmel hmuh ka châk ngei mai, engtia accident ve ringawt nge kan nih tih tepawh hriat ka châk ve bawk. A dinhmun a hlauhthawnawm loh tih ka hriatna ringawt pawh hian min tizangkhai hawk nia.

In lam a ngaihtuahawm deuh an tih avangin ka u Hmingmuana nihnih hnuah a haw chho a, ka nu nen kan awm ta rih a, tun nihnih chhung khan Ngaihzuala ka hmu lo a, ani pawh chêt chhuah an la phal lo tih ka nuin min hrilh a, a harh ruala a lam hmasakber ka ni tih ka hriatna hian min tilawm hle, mahni rilru puthmang sawi duh lo leh sawi ngam lo tura mipa nêp leh puitling lo a ni lo. 

Ka Lalngaihzuala ka ngai ru veng veng a, ka mit lehlam vûng hi a reh deuh chuan wheelchair nen a awmna Cabin-ah tlawh ve ka tum.

Apuii pawhin min rawn tlawh âwl lo a, ka ei theih tur ang min lo kensak nual zel a, hospital chaw kan ei naa chawhmeh pawh kan nufa ta tur a rawn keng tel hrâm hrâm zel.

"Mama vanga hetiang tuar hi i ni a, a âiawhin ngaihdam ka dil a che, a pawi tak tak a ni, inchhungkaw tan buaina kan thlen a ni ringawt," tiin a ṭawng siam siam a, chutih lai chuan a phone a lo ri a, "Min lo hrethiam lawk," tih pahin a chhuak zui nghal a, ka nuin, "An fel unau em mai, Apuii kha i u Hmingmuana nupui atan a ṭha riau ang a," tiin a nui kar kar a, a fiamthu mah nise ka nuihpui hleithei lo.

Kan accident aṭangin ni li lai a liam tawh a, hma ka sawn chho viau mai. Ka ke pawh ka duh duhin ka lek kâng thei tawh a, kal erawh ka la harsat deuh, ka mit vûng a reh ṭan tawha mahse, thi chhia a la tlin avangin a sen râm a, ngaihṭhat lohna tur a awm hran lo.

Ngaihzuala chanchin pawh ka hre ve zel a, ka nuin nitin a tlawh vang a ni. A bân kha an lo zai chu niin, a hlimchhawna zai nghal an nih avangin a ṭha turah ka ngai ve tawp a, an zai tih pawh ka lo hre miah lo a, a hnuah ka nuin a sawi chauh. 

Chawhnu dâr hnih a ri tawh a, ka zia chhoh viau chuan kâr tawp lamah chhuah min phalsak tur thu doctor khan a sawi a, Champhaiah kan haw dawn hnai tihna a nih chu.

Ka mut dan siamremin ka inlet kuala ka nu pawh inbual turin ka nutei te inah a kal a, Ramhlun South-ah ka nu te unau zinga naupangber te hi an awm a, fa an neih loh avangin kei pawh eng emaw chen an inah ka awm ve tawh nghe nghe.

"Bawihi.." tia tu emawin min lo koh avang chuan kawngkhar lam ka hawi a, ka Lalngaihzuala hmel ka hmu hlawl mai! A dâng deuh tih lohah chuan a hmêl lan dan a pangngai rengin ka hria.

A bek leh a tukkhumah an la plaster a, a bân veilam a awrh bawk. Mitmeng danglam deuh tak hian min en a, atu amah ṭawng lovin kan inmelh reng ringawt.

Sawi tur leh zawh tur ka ngah tehreng nen, ṭawng mai nachâng ka hre lo leh tlat, ani erawh a harhchhuak hmasaah ṭangin ka mutna khum sirah a rawn ṭhu a, "Ka ngaihtuah lutuk che a, a hrehawm em?" Hniam ruiha tiin ka mitah min en tlat a, min khawngaihna leh min duatna mitmeng hi ka chhiar thiam ve chiang alawm.

"Hrehawm loh e, ka ṭha lutuk tawh," ka lo ti vat a, a bân na lo lam rawn phar chhuakin ka biangah a tawk a, "Nang leh kei hian kan theihnghilh theih tawh ngai loh tur thil tam tak kan tuarin kan paltlang dun ta. Hetiang em em hian ka ngaihtuahna i luah ang tih ka ring phâk ngai lo," tia a sawi laiin a kutah ka lo vawnsak vat a.

"Na dang i nei em, i ṭha takzet maw?" Tia ka zawhna chu a mitmei hmangin min chhâng a, ṭawng chhuah harsa tih hmel tak hian, "Bawihi..." a ti thâm leh ṭuak a, ka lo melh chho kar a, "Ka harh ruala ka awmna hmun ka hriat chhuah khan nangmah ka rawn ngaihtuah nghal che, i thi nge i dam tih ka hre si lo, kha hun ang kha tawn leh ka duh tawh miah lo," tiin a thaw chhuak hawk mai.

"Khatiang zawngin ngaihtuah mah ta che, engtin nge khatiang thil kha kan tawh theih reng reng le, eng mah hriat ka nei ve bawk si lo," ka lo ti a.

A mitmeng a danglam nghal veka lungawi lo tih hriat tak hian, "I muhil tui ang reng si a, i phone a ri sek bawk nen, ka koh chein i harh mai si lo a, chutih lai tak chuan Bolero chak lutukin a rawn tlan a, kan speed a hniam chhe lutuk bik bawk si lo nen kan insu ta a nih kha, a driver kha a rui viau an tia," 

I nunna atana hlauhawm leh kan pahnih tana pawi lutuk tur a thleng lo hlauh a, ka la inbengdai rih a nih hi, mahse, ka ngawi hlen dawn chuang lo," a tih zawm leh a, amah damdawi inah a la awm vangin engmah a la buaipui lo tih a sawi tel bawk.

"Ka lu-a i rawn nem lai chiah kha ka hria," ka lo ti a.

"A thleng rang lutuka engmah chiangkuangin ka hre tawh bik lo, ka harh leh te chuan damdawi inah ka lo awm tawh a, Apuii i chanchin ka zawt a, ka rilru a hahdam ve thei chauh,'' tiin min la hmu ngai lo niawm tak hian min en vawng vawng a, tuna a lan dan zet hi chu a duhawm thlâwt. Khawngaih ngai ngawih ngawih hmel a pu ve tlat.

"Ngaihzual, hahdam tum la, hei ka ṭha reng alawm," dam thlapa ka tih chuan, "Min ngaihtuah ve em, kan inhmuh theih loh chhung khan min ngaihtuahna chhetê tal i nei ve ang tiraw?" tia min zawh chuan, "Eng vangin nge ka ngaihtuah loh tehlul ang che, i thi emaw ka tih lai khan ka chhungril a na aw, ih maw, ka Lalngaihzuala hi a thi tur tur a ni lo, tiin ka ngaihtuah asin," tiin a hmel ka hmuh tirh laia thisen nena a awm nuai lai kha ka mitthlâah a rawn lang a, ka mittui a tla lo chauh.

"Dam taka hospital kan chhuahsan thei a nih chuan rei rial lovin innei mai ang, inneih ka duh.." zu han ti a!

"Eng a?" Ka lo ti vak a, ka duh aiin ka râwl a ring.

"Inneih ka duh tih ka sawi a nih chu, Rinduhawm, innei ila ka hahdam thei chauh ang, nang nen fa kan nei dawn a nih pawhin inneihna kârah ni rawh se, ka rilru puthmang hi a dik a nih chuan nang kalsan che tumna ka nei lo," a ti leh a.

Mit khap zak zak chung hian, "I â mi a, u Ngaihzuala thihna a la rei loh em kha, engtin nge pasal ka neih ngawt theih ang, ang lo lutuk mai.." ka ti bawrh bawrh a.

"I u Ngaihzuala a thi tawh, keimah Lalngaihzuala ka la dam, ani nen khan kum tam tak inzui mah ula, kei nena kan awm dun ang hian in awm lo tih ka hria, mitthi tawh na na na thîk loh ka tum ṭhin, ani hmel i hriatchhuaha kei min theihnghilh pawh ka duh lo, kan innei ang, i thluak lo hmang ve ang che," a ti leh hmuk hmuk a, a thinrim deuh em maw ni.

"Chutiang ringawta awlsam a ni lo aw, a theih rih lo," ka lo ti nghat a, ner sawk chung hian, "I thinlung kawngkhar kha hawng la a theih a ni mai, lo ngaihtuah ang che," tih pahin khum a thawhsan a, hepa hi a na â zawk em maw ni, a lu lama a hliam hian a thluak a khawih deuh a nih ka ring rum rum mai.

Kawngka biang nghengin a tâwi khawmuang leh a, "Rinduhawmi nei tur hian thluak hman vak ka ngai lo, tisa thila inremsiamna dangdai tak neih i duh lai khan ka tlanchhe lo aw, i chanchin ka chhuiin ka hria a ni hek lo, risk takmeuhin ka kal a, tunah chuan ka duhah ka chiang a, kum tam ka lo zui tawh kalsanin i hnen ka thleng lovem ni, nupui nei rual ka ni tawh a, a châwmna tur hna pawh ka nei, i tana ka awm reng theih nan kan innei ang, chu chu hmangaihnain a zui ngei ka beisei." Inringtawk lutuka tiin ka chhânna pawh ngaichâng lo hian a chhuak nulh a, ka thaw chhuak halh ringawt.

Kei hian ani kha pasalah ka nei ang maw? Awi awi! Ka ngaihtuah chhin ringawt pawhin ka âwmah hnawhtu a awm nghal. 

Vantlâng ngaihdan tur chu thuhran ni se, u Ngaihzuala chhungte hmai êng ka zah lutuk tlat, bâkah thil ni thei a ni ngang lo. Â...kum khat êm pawh a ral hmaa hetiang thil ngaihtuaha ruahman chhin pawh hi a duhin ka duh lo rêng rêng. 

Amah Lalngaihzuala ka duh huam lo nain ka rilru puthmang a dang hret hret tih ka hria, chumi a nih rual erawh chuan inneih lam ka ngaihtuah thleng pha lova, neih tumna em em pawh ka nei chuang lo.

A thluak lamah diklohna eng emaw a awm a nih ka ring tlat a, doctor zawh chhuah ngei ka tum bawk.

Ni e, Ngaihzuala nen inzawmna kan neih aṭang hian engkim a harsain a khirh zo vek a, ka duh dan ka sawi ve te kha eng mah lo maiah a chang fai vek a ni ber mai. 

Damdawi in kan chhuahsan hun tur a inrual a, an inah zankhat tal riak turin ka nu a thlêm ngat ngat peih nia. 

"Ka pi, keimah avanga hetiang thil hi tâwka buai phah in ni a, ka pa rilru dam nan tal pawh zan khat chauh in lo riah ka beisei, chawhlui kilho tepawh a ṭha a, hun dang remchang a awm tawh loh takah," tia ka nu ngenngâwl zeta a sawipui leh hnuah mi rilru ṭha ta ngang ka nu pawhin a 'Aw' ve leh tâk hi.

Private hospital-a awm kan nih avangin kan bill pawh Ngaihzuala pa pu Zothana'n a tum vek a, eng ang pawhin hnial mah ila kan hnial hneh ngang lo, Ngaihzuala car kha workshop lamah an dah rih avangin a pa Scorpio-in Lalngaihzuala te in lam kan pan ta a, ka nutei te lam pawhin "A âwm ve reng alawm' an lo ti awlsam thên.

An chhungkaw chanchin ka hriat chhun tlêm ka'n târlang ve lawk ang aw...

Ngaihzuala pa Zothanhlira hi Lecturer a ni a, a nupui erawh kum 7 liam ta khan a boral tawh a, Apuii hian hna nghet a nei lo nain thawmhnaw dawr leh Silver dawr changtlung zet a nei bawk. A pa fa hmasa Damtei hi chu Education lamah eng angin nge a awm tih ka hre lo.

An chhungkaw khawsak dan tur in hriatthiam mai ka ring; Lalngaihzuala hi inpui nghâktu tura ngaih a ni a, Champhaia a lo awm hma hian Kolasib lamah a awm tawh bawk. Apuii a fela an unau hian an inhmangaihin an inngaihsak tih ka mitin ka hmu thung.

Duh anga ka ke ka hman ṭhat theih loh avangin ṭhutkhawmna pindanah ka ṭhu a, ka nu leh Ngaihzuala pa an inkawm a, an titi dun thei phian. Apuii leh an nulain eirawng an bawl a, Ngaihzuala'n phone a hmanga a lo la chhuak lo.

Siami nen whatsapp aṭangin kan intext ngar ngar a, "Bawihi, inpahnih hian inngaizawng daih ula ka ti, tum lâwkna awm miah lovin awm dun theihna chance in ngah bik e," a rawn ti a.

"Ngawi mai mai teh, i duh duh sawi ringawt zel suh," tiin ka reply a, ani hian u Ngaihzuala nen khan inang a ti mai si a, min hmehbel ṭâlh a tum niin ka hria.

Ngaihzuala phone hmang zo a lo lut a, "Veranda lamah hian ṭhu chhuak ang hmiang, a dái nuam zawk," tih pahin ka ṭhutna lamah a rawn phei a, hmannia khatiang thil a sawi hnu khan mumala inbiakna hun kan nei tawh lo a, message type turin a bân lehlam a hmang thei rih lo bawk nen, kan inbe tuitam viau lo.

Veranda thengthaw nuam zetah kan insawn chhuak ta a, khawhawina a rem khawp mai.

"Naute siam hna kan thawk zo chiah a, ṭhahnem ka ngaih tehreng nen a lungawi thlâk loh khawp mai," tiin a phun hluk a, a ṭawng hre pha tur an awm nge awm lo tih hriat tumin ka'n hawikual ngial a, nui suk suk chung hian, "Tumahin min ngaihven lo a nia, Sangtei nen kan inṭhen thu an la hre hleinem, nang nen chuan min ringhlelin ka ring lo," a ti liam puat ringawt.

"Eng lo, Sangtei khan a rawn be ngai tawh miah lo che em ni?" Tia ka zawh chuan a dâr a sân âwk a, "Ka birthday khan min lo wish a, Thank you... tiin ka reply," a ti ṭha ve mai.

"Ngaihdam min rawn dîl lêt bawk a, ka thiam loh a ni, inṭhen hlen ka duh lo," tih vel te pawh a awm nual. Mahse, damdawi ina kan awm lai kha a nia ka chhâng lo eng mah," tiin a sawi zawm leh a.

"In ngaidam tawn ula in inkawp rem leh mai dawn alawm," ka lo ti sap a, ngaihdan ni vak lo hmel pu chung hian, "Ani nen hi chuan insuihzawm a harsa tawh ang, kan inkârah hnawk a tam lutuk tawh a, midang tlazep satliah ang mai mai a ni lo, engkim tiduna awm dunpui che ka nih avangin keimah tak pawh hian nuam ka ti tawh lo a, a hun laiin hmangaih viau angin lang mah ila, tunah chuan ka rilru a danglam tawh, nangmah avang hian tih danglamin ka awm aw..." tih duah pahin a nui hawk a, nuihna chhan tur pawh ka hriat ve si loh...

"Inneih chungchâng ka sawi pawh kha ka ti tak tak a nia, mitmei vêng rêng rênga inzui leh inkawp ka peih ve lo. Bâkah, pasal neih i ngam ve tawh tho a, keimah lo midang i neih chuan i virgin tawh lo tih an hria anga chu chu i duh em ni, hmeichhe laka ka awmhlei loh nachhan pawh Virginity hi ka ngai hlu a ni," a ti leh a.

"Chutiang sawi chhuah kher pawh a ngai lo, i ṭawngthei lutuk," ka lo ti hlak a.

"Thudik alawm ka sawi le, inremna kan neih lai khan thil thui tak i dâwn lo nge, tunah hian i mumal lovin i rilru puthmang a inthlâk zung zung a, hmeichhe dang chu ni sela inneih loh an hlau ngawt ang, mahse, i danglam bikna riau ka hmuh avanga ûmzui zel che ka ni rêng a, hrethiam ve rawh, a nih loh pawhin hriatthiam tum rawh.." tiin a phone a phawrh a.

Eng emaw a hmeh mawlh mawlh hnuah, "En chhin teh.." tiin ka hmai bulah a rawn lek hnai a, Valtea te ina kan mu dun lai thlalak a lo nei reng chu niin. Saruaka awm ni mahila, kan taksa a lang lo thung, kei phei chu Ngaihzuala kuah chungin ka muhil a, ka landan zet chu a...zahthlak ve det a ni. 

"Paih nghal rawh..." ka ti vin ṭhat a, nui ruh ruh chung hian, "I thinlung nei si lovin i taksa ka nei a, thlamuang taka i muhil hmel ka hmuh hian ka hlatsan thei lo che tih ka hriat chhuah phah, a chhan chu maw, ka kiangah i thlâ a muang ṭhin tih ka hriatchian vang a ni. Rinduhawm, nangmah i inhriat chian aia nasa hian ka hrechiang ang che, awih hmiah rawh..." a ti a, sawi belh tur a vâng ngat ngat a nia.

"Pasal ka neih duh loh vanga nang mah thlang che ka ni rêng alawm, tuna kan kal dan hi a ṭha reng," ka lo tih chuan, 

"Nula thianghlim ka tichhiaa chu ka tihchhiat hmeichhia chu ka duh zui ta em em bawk a, a hming a pu zovin a duhawmna ka hmu tam telh telh, hlatsan tumna ka neih tâk loh achinah kha chuan ka fâ a pai theih nan ṭan ka khawh leh a, chuti chung chuan a rilru a hmin ṭha thei si lo, ani chuan mitthi tawh nen min khaikhin reng a, a vawikhat nan ka hming mawi tak hi put loh ka châk phah hial, min hnaihna hmanruaah a hmang a, keimah ni lovin ka hming vang chauhin inkungkaihna min neihpui a tum a, mipa tan a tha nat thlak aw..." tiin lawm lo tih hriat hliah hliah chung hian a ding chhuak hluai a.

"I hmanrua nih reng ka tum tawh lo," a ti hmiah.

"A nih a hnu, tunah hian kan inkâr titawp ila, ka hmanrua i ni tawh lo mai dawn alawm, tâwp rawh se," ka lo tih veleh a rawn inher zawk a, "Rinduhawm, inrûk i duh loh chuan i kâ kha chîp mai rawh, ṭha tê têa thil sawipui theih reng reng loh mai, i u Ngaihzuala chu i va han duh awm ngawih ngawih ve, anih chuan a hnena kal tumin rilru huaisen pu la, mipa dang tumah hmanruaah hmang tawh suh, i hnunglamah an nuihzat lutuk ang che," a ti hrâwk a, tun ṭum a thinrim dan chu a dang ta zak mai.

"U Ngaihzuala hming sawi lan pawh a ngai lo, Mamitah kan inrem fel tawh a, kumin chhung atan min pumbilh i duh thu i sawi bawk, kha thil kha ka hnial reng reng lo, inneih erawh chu ka la zuam lova neih tumna rilru ka pu chhin lo bawk, i rilru thlâk sek lo la, inrem takin kan awm thei reng alawm," ka lo ti ve tlat a, a ner sawk mai.

Zanriah ei hma deuhin min rawn ko ta a, thil dang sawi zawmna chi a nih tawh loh avangin bâi salh salh chung hian inchhungah ka lut ta a, Ngaihzuala erawh chu a dinna ngaiah a la ding reng a, che chhuak tur áwm ang pawhin a awm lo.

Amah Ngaihzuala nen kan boruak nuam chiah lo mah se, a farnu nen kan inkâwm chhunzawm daih a, an nula Biakdiki pawh a fel reuh khawp mai.

Zanriah kan kîl lai pawhin kan Lalngaihzuala a ṭawng mawh ngar ngar viau a, kan accident chungchâng vel an sawipui tâk avang leh thlakhat chawlh la tura a pain a tih avangin an biakna  pawh a kam rûl tawk lek lekin a chhâng a.

"Bawihi pawh office kal thei dinhmunah a ding rih si lo a, chawlh lâk a inthlahrunawm tawh em mai a, a hna hi chawlhsan mai se ka ti deuh," tia ka nuin a rawn sawi veleh, rang lutukin Ngaihzuala'n min rawn en a, a mitmeng a thim raih bawk. 

"Hna thil avanga zin kan ni a, thla thum pawh châwl sela atan inthlahrunna tur pakhat mah a awm lo, mahni pawipang ti-a kal kan ni satliah lova Agriculture department hmasawnna tur leh a changtlun zawk theih nana tirh chhuah kan ni a, bânna tih vel kha chu theihnghilh hmiah rawh u," a ti hmuk hmuk a, a ṭawngin ngaihno a bei tehchiam si lova kei tih loh midang zawng chuan Ngaihzuala an en ṭhap a, nuam lo ka lo ti ru hle. 

Pu Zothana pawhin, "Ni e, vanduaina thil a ni a, an hrethiam lutuk tlat ang," a lo ti ve bawk a, thu dangah an pakâi ta rih a.

Thingpui hâng kan in laiin ka nu phone a rawn ri a, ṭhutkhawmna pindana kan awm vek lai a ni nghe nghe.

"Aw le, Bawihi tan veivah a harsa rih si a, kan lo inbia anga ka lo hrilh leh mai ang che," a tih hnuah min rawn en a, "I nutei a nia, i pa Sanga bp a chiang lo lehpek a nih chu, tunah hospital panin an kal dawna engtin nge ni ang, kan phei mai dawn em ni?" Tiin min hrilh a.

Ngaihzuala zawkin, "Bawihi chu hetah awm mai sela indim a ngai bawk nen, nangmahin kal ta mai la a ṭha zawk lo maw?" A lo ti zung zung a, a pa pawhin a lo tuihnih ve bawk a.

"Nia, fa an nei ve mang si lova ka va buaipui mai loh chuan..." ban deuh charhin a ti a, Ngaihzuala te ina keimah min hnutchhiah bîk kha a hreh deuh niin ka hria, a âwm ve reng bawk a; mahse, amah Ngaihzuala hian ka nu a be thiam laklawha hnial a hreh ru tho tih ka hre ve kar.

Chumi hnu chuan pa Zothana'n ka nu a thlah a, Apuii hla zir turin a chhuak bawk a, an nula leh keini pahnih chiah kan awm ta. Boruak a ṭang ru leh at tawh, ka ning chiang a nia.

"Mikhual room-ah hian i mu mai dawn nge, Apuii bulah zawk?" Tiin Ngaihzuala'n min zâwt a, ner sak chung hian, "Apuii bula mut te chu a, a chi loh lutuk," ka ti a.

"I ke a na si a, zanah zunram thiar tura veivah a harsat tâkah ka ti maw le, a nih loh pawhin ka bulah a mut theih tho bawk a..." tiin a nui suk a.

"I hmelchhia a nih chu a.." ka lo tih chuan, a nui huk a, "Hmelṭha min ti tih hi chu maw i hming ka hriatchian tlukin ka hria, hmanzanah pawh, 'Ka Lalngaihzual' tiin ka hmai i rawn chûl dan dan a, ka hre lo der a nih kha," a'n tiah. 

"Daw lo mai rawh... i daw peih lutuk.." uar zetin ka lo ti a, "Lalngaihzuala pahnih i nei bîk hi chu i vannei ngawt mai, a hun lai na na na chuan kan duh em em bawk si che a, inchhuanna tham a ni, in chhuang hle rawh," min tiel tih hriat taka a ṭawng chuan ka ngei êm avangin insum hman lêk lo hian ka ṭhutna sira 'throw pillow' chu banin ka vawm ta a, a bân a na tih a theihnghilh a ni ngei ang, lo dawn tumin a bân a lek chhuak a, "A va na ve..." ti supin a bân dinglamin veilam a dawm vat a, ka va inthiam lo si ém.

"Ngaihzual," tih pahin ka ding thut a, a ṭhutna lamah ka bâi phei auh auh a, a na ngang a ni ang, a chalah thlanfîm a bawl ṭak ṭak thei nia.

"Tihpalh," tiin a bân na lo lamah ka vawnsak a, ner nawk chung hian, "I thinchhe bawrlawk hi sim teh, ka duhzawng a ni lo," a ti hmuk a, ka ngawi reng ringawt.

A na zualpui a reh hnuah pawh a bulah ka la ṭhu ta reng a, "Inkhuaa i haw hunah pawh râlkhat aṭanga min ṭhente kha i lo tum ngawt ang e, ka pawm dawn chuang lo, ka sawi lâwk a nih chu.." tiin a intlawhkhalh leh hmak tawh.

"Chutiang ka ngaihtuahnaah a awm lo," ka ti ve mai a.

"I ngaihtuahnaa awm lo hi alawm i ngaihtuah chawp ṭhin, i suangtuahna ang apiang ataka thlen tîr i tum a, a lo thlen lohvin i na leh si, tunah ngat phei chuan contract tel miah lova inngaizawng kan ni a, i duh hun hunah min rawn ṭhen tum buai lo ang che, chhan ṭha tâwk tak a awm a nih loh chuan inṭhenna a awm lovang, inneihna a awm thuai zawk ang," tiin a la belh leh hrâm.

"Sawi nawn tawh suh, inneih tih ringawt pawh hi ka ngaithla ning, kan awm zel dan tur chu hunin hril rawh se," ka ti ve ta zawk a.

"I room kawngkhar kalh suh aw, reilote i bulah mut ka châk, engtin mah ka ti lo ang che," a ti teh daih a.

"Aih, a chi loh.." ka ti sap a.

"Kha zawng zawng i taksa lumna temin ka mu tawh a, damdawi inah pawh nangmah ngaihtuah chung zelin ka muhil a, ka muthilh pui chea ka harhpui leh che, â...i eng lai hi nge ka thlâkhlelh em em le," a'n ti leh rih.

Ka Lalngaihzuala tak hi chu aw, a bulah rei a thinrim theih loh. Thiam deuhin eng eng emaw hi a sawi a sawi a, a tawpah ka nui leh nge nge ṭhin.

A sawi ang tak takin an ina ka riah zanah hian ka mutnaah a rawn phei ta a, zanlai a ni vel tawh ang.

Thawm dim zetin khumah a rawn lawn a, ka bengbulah, "A rûka hetia han awm vel hi a nuam ka ti, nang nen hi chuan a rûk zela thil tidun kan ni a, ka zawngchhang hle bawk," a ti sup a, a nui lek lekin ka hria.

"Bengchheng hlek suh.." ka lo ti a, ka biang leh a biang sîktírin, "Kan awm dun leh lawk thei tawh dawn si lo a, ka peih lo lâwk..." a ti ve ngei.

"Lungngai mah ta che, kan dam anga i lo chhoh theih hunah hun a awm lutuk ang," tiin ka hnem ve ngiala chutah meuh chuan ṭawngkâa min chhâng lo hian duhthawh leh uar zetin min fawp ta a, a duh angin a bân a hmang thei bawk si lo, ka khawngaih a nia, ka ke tihpalh a hlau ve tho bawk nen a rem teh ṭeuh lo chu a ni e.

"In rualin ka chho ve ang a, ka inah khan ka awm zawk mai dawn em mawni?" A ti a, "Eirawng pawh i bâwl thei chuang dawn hleinem, i dam ṭhat deuh hunah i lo chho dawn nia, ka tlân bosan dawn lo che aw.." tiin ka nui hak a, ka hmui a rawn kharchhilh leh hmiah.

Khawvar hma loh zawng ka bulah a mu a, chhin khat mah chhing lovin zawitê tê hian kan inbia a, a kut na lo lam pawh a la hmang ṭangkai ta fo. Ka âwmbâwr leh ka nâk nêm a chûl lâwr dan dan a, tisa châkna nei mah se, a tilang duh bik ṭhak nang.

A duh hunah chuan a insûm thei viau tih ka hriat chhuah phah.

"Hmun nuam kan ban tlang nghal thei lo a, nau i lo pai hlauh a nih chuan kan ngaihtuahna kan sêng zau leh dawn nia, a hmaa kan sawi tawh tih vel kha chu theihnghilh mai tur, nang leh keiah hi chuan a thar zel a ngai a, lo rinawm ang che, duhawm deuha awm ringawt lovin Rinawmna a ngai tel aw, Rinduhawm," a ti zawi ruih a. Ka lo kuah nghet sauh thung. 

Kâwl a êng dêt dêt tihah min chhuahsan ta a, ka ngai lo ka tih chuan dâwt muhlum a ni, ka ngai ru veng veng a, dârkâr hnih khat tal muthilh tumin ka maimitchhing ve ta a.

Ni hnih hnuah kan khua Champhai panin kan haw chho ta a, Ngaihzuala te pafain kan hawna tur Taxi fare tum leh an tum chuan ka nuin a duh lo fithla ṭhak a, an nawr lui ta bik lo.

"Ka bân tuamna an phelh veleh lo chhoh ka tum dawn nia, ka sawi kha hrereng la, mipa dang lakah thîkthu ka nei hran lo. Mahse, i u Ngaihzuala thlânah kalin va ṭap tawh suh aw, a dam zawk ka la awm a, i Lalngaihzuala hi min thlahthlam thiang lo a nia, ka ngai ngawt ang che," tih pahin a sam a tuai puat a, ka kalsan tur hi a huphurh tak tak a nih ka ring. A hmel lan dan cool ruih pawh thup a tum hran lo.

A nihna taka sawi duh chuan kei pawhin ka ngai dawn a, inhmu reng lo mahila khaw khata kan awm tih ka hriatna pawh hian min ti thlamuang ve a nia. District hran daiha han awm dâwn tâkah chuan ka huphurh ru ve tho.

Ka nun dan inthlâk dâwrh dâwrh reng hi keima thiam loh vek a ni a, tunah chuan ka tum dan ang lo deuhin ngaihzawng nghet ka nei leh ta. Inthiam lohna nei ru fo chungin ka inthiam lawi si, â...a hahthlâk..ka ngaihtuah thui peih lo.

Lalngaihzuala ka pasal tur anga ka ngaihtuah chhin apiangin ka zak ringawt zel. A ho thei si...

Hun a kal a, ni pawh a ral ve zel a, ka nuin bâng turin min nawr ṭan ta. "Eng mah thawk lo hian inah awm hle hle la, ngaihtuah i na lo deuh, i hlawh tel lo pawh hian kan tâl thei lutuk ang," tiin rilru hran a rawn nei leh ta a.

Rang takin Ngaihzuala ka hrilh nghal a, "Lo hnial char char rawh, i hna i bansan chuan inhmuh a harsa lehzual dawn asin, ka thei lo ang, mi hmuha inzui i ngam bawk si lo," a rawn ti ta chiah a, "Ka nuin min nawr na telh telh a, hnial dan tur pawh ka hre tawh lo," ka ti a.

"Kârlehah ka lo chho dawn nia, i nu ka sawipui ngei a ngai a nih chu," a ti nghet charh.

Eng mah ti lova awm mai mai kan ni bawk a, kan inbe ve deuh reng ti ila ka sawi sualin ka ring lo, ka haw chhoh aṭanga a vawikhatna tur a tan zan dâr 11 velah status ka update ve leh ta, amah ka ngaih êm vang a ni.

"Kha huna ruahsur dan kha chu a dan a dang ta, hlauhna ni lovin lungawina zawk a ni. Khatia ruah a rawn sûr tâk chiamah khan tawmhulna tur zawngin a remna apiang kan pan a, a tâwp bera kan tlan luhna hmunah khan kan duhthusam kim biai awm lo mah se, duhthusam dangin min nangching ta si. Kan ngaih apiangte hmu thei lovin hnaih thei lo mahila, ka Ngaihzuala ka ngaihzual châng leh kha hmun mitthla chung zelin; ruah a lo sûr apiang hian ka ngai zual zel ang," tih ka dah chhuak ta a.

Ka Lalngaihzuala nen Seol rahbi kan rahna hmun ngei kha.

Status ka dah hnu aṭanga minute sawm velah amah ngeiin min rawn call a, "Bawihi.." tiin a rawn thaw hawk a.

"Ka ngai lutuk che.." a ti leh tawp a, "Kei pawh..." tia ka chhân veleh, "Ka lo chho mai dawn aw, a harsa em mai, ka ngaihtuah lai tak chein status i rawn nei keuh a, Rinduhawm, ka thluak i tibuai vek," a ti sup a, ka lo lâi leh ringawt tawh.

"I dam ṭha deuh tawh em ni," tia ka zawh chuan, "Ka ṭha lutuk tlat, keimaha ka awm peih loh leh Valtea inah ka awm rih mai ang," a rawn ti awlsam thên a, ka lo nui hak.

"Zan tina lo len kher ka tum lova, ka hmuh phâka i awm kha ka duh a ni mai, tuna kan awm dan hi chu maw, a hla lutuka ka ning ngawih ngawih, ka thin a chhe zo vek dawn," tiin a nui huk a, "I zaidam ngai em ni?" fiamthua ka tih chuan, "I bulah chuan zaidam e, ka dawhthei bawk," a ti ve mai.

Khawvar thleng rakin kan inbia a, kan thusawi zawng zawng kha sawi chhawn tur ka hre chuang der si lo, a va ho mai mai e.

Nia, inngaihzawnna kawngah hi chuan dawhthei zawk leh tlâwm zawk an awm a, hriatthiamna nena kan kal phawt chuan inrem lohna leh inhauna tur a vâng pharh rêng a ni.

Tun huna ka thil ngaihtuah chhuah tâk chu Lalngaihzuala hian a zawng zawngin min duhin min thlahlel tih hi a ni. Keimah zawk ka inhawng zîm a, chu chuan rah ṭha a la chhuah thei lo mai chauh a ni.

A tuk zan dar riat velah kan doorbell a ri a, ka nu inkhawm ala bâng lova Mama pawh a lo la haw chuang lo, kawngkhar ka hawn ruala ka hmachhawn mipa hmelṭha zet chu 'Ka Lalngaihzuala' ngei a ni.

"Surprise" tiin a nui ruh ruh mai.

A lokal dawn tih sawi mah se a hun tur a sawi lang lo a, tunah inkhatah kan inhmachhawn ta rân chu ania, a mak nawn leh ta.

"I awm lohna hmunah hian ka awm tui thei lo," ti sup chungin ka kutah a vuan a, inchhungah kan inzui lût ta a.

Khawvel zau mah se keini pahnih khawvel hi chu a zím êm asin. 

Kan duh tawhnaah chuan atu ve ve mah tlanchhe miah lovin kan inpan hmiah a, hei hi kan danglamna pakhat chu a ni.

Ngaihzuala hmel fai sar melh vang vang chungin ka nui ve leh thei ta...

B+>[BeckirafARenthleI]<+®®