11.DROGMA SEOL [A Becky Rafa story]

11.DROGMA SEOL

Ziaktu: Becky Rafa Renthlei

[Recap]

"I awm lohna hmunah hian ka awm tui thei lo," ti sup chungin ka kutah a vuan a, inchhungah kan inzui lût ta a.

Khawvel zau mah se keini pahnih khawvel hi chu a zím êm asin. 

Kan duh tawhnaah chuan atu ve ve mah tlanchhe miah lovin kan inpan hmiah a, hei hi kan danglamna pakhat chu a ni.

Ngaihzuala hmel fai sar melh vang vang chungin ka nui ve leh thei ta...

-B®® Stories

Ngaihzuala nen Sitting room-ah kan ṭhu dun a, "I lokal hun turte sawi lâwk ve tur a nia," tiin a bân tliak lam chu ka melh pah zauh a.

Ani pawhin ka ke a en ve tho. "Ka lo hrilh lâwk che chuan awm dan tur i thiam dawn si lo a, ka surprise châk che," tia nui suk chung hian ka mitah min en a.

"Bawihi, keini pahnih hi chu maw inngai tak leh inhmu châk ngawih ngawih pawh ni ila, kan chapona hian sawi chhuah a ti harsa ṭhin a, hetiang kawngah hi chuan kan rilru sûkthlêk hi a inang ka ti ṭhin, in ina lo lên ka peih loh chhan ber pawh ka duh hunah ka fâwp thei ngai lo che a, insûm ngai ziah hi a hneawm.." a'n ti daih a, a thil sawi inpersan zet avang chuan ka lo nui hak a.

"I inthlahrung a nih kha, hun remchâng te chu a awm ve ṭhin tho, kan duh leh duh loh a ni mai," tihpahin a inrin hman hmain keimah zawkin ka fawp thut a, a meng buai nak naa a insiam rem lehnghal vat tho. Rei ngial kan infawh hnuah, "A hunah chuan kan in pawh ni se kha kha a ni mai aw, helai thleng thleng min ngaih vanga lokal ve ta chu i phû lutuk tlat," tiin ka nui var var a.

"Tun kha nangma duhthu ngeia min fawhna hmasaber a ni tih i hria em?" tia min zawh chuan ka lo bu nghat a.

"Ka Ngaihzuala i ni miau alawm, i hun tam tak sêngin min rawn pan a, i hna i ṭan rih dawn lo tih ka hre bawk a, chuvangin, khati ang tala ka lo tih ve loh chuan," kan ti ngial a, thutak deuh zawk hian, "Valtea inah ka awm rih dawn a, keimahin ka inkhalh chhuak thei lo bawk a, naktukah hian hun thawl ṭha kan nei thei ang em, in ina ka lokal chuan i nu a awm zel bawk si," tiin a sana bun lai a bih zauh a.

"Zaninah ka nu bia la, ka ke vang hian a phal chiah pawh ka ring lo," ka lo ti ṭha ve mai.

"Tunah khawiah nge a kal a?" Tiin min zawt leh hnuhnawh a.

An inkhawm thu leh an bân ṭêp ka rin thu ka sawi a, "I u hian min rinhlelhna a la nei lo chu a nia, engkim hi hrilh hriata zalen taka inkawm theih ka châk ngawt mai," a ti sup a, ka khawngaih angreng.

A sawi hi a dik chiah bawk a, tlangval hawklak ang mai mai a ni lo a, nula rîma nupui neih pawh ngam tawh a ni. Chutih lai kâra a rûka inkawp leh inthup tih vel hi a ngaithei viauin ka ring lem lo. 

"Hetiang a kan awm reng chuan an hriat chhuah hunte pawh a la awm lutuk ang, i hmanhmawh a nih kha," tia ka ṭawng mawlh mawlh laiin ka nu inkhawm bâng a rawn lut a.

Ngaihzuala a hmuh rual rualin, "Ehe, Azuala chu i lo chho elaw..." tiin a be nghal a, ani pawhin zanin tlaia a lo thlen thu leh hna laklawh thawh ngei ngei ngai a neih thu a hrilh a.

"Nangmah ber i rawn chhoh tho chuan Bawihi bânna thehluh tur chungchâng sawipui che ka duh," tih pahin thingpui kan in tawh leh tawh loh min zawt a.

"A lo luhna a la rei lo a, engmah a la in bik lo..." ka ti sap a.

"Ka pi, Bawihi hna chungchâng chu kan sawi nual tawh khan ka hria a, atan bân kher a ngai lo, a dik taka sawi duh chuan lehkhathiam tak tak hna hmu zo lo an tam lutuk, a kum a tam chho telh telh a, mihringin kan hma hun kan hriat loh êm hi, zankhat mitchhin tawk ta la, a u hian nupui a chhia a ṭha a neih hunah mahni intuamhlawmna tur êm pawh a neih loh chuan a khawngaihthlak lutuk ang," dam thlup hian a ti a.

Ka lo ngawi reng ringawt.

Ka nu chuan, "I thlir dan pawh a dik reng, mahse, a u Ngaihzuala boral aṭang khan a nun a buaichuar zo a, a hnaah pawh hian tuina tak tak a nei lo, chuvangin atan bân mai hi a ṭha zawka hriatna ka nei ve tlat." A lo ti ve si.

Ngaihzuala a ngawi mai dawn emaw ka ti a, "Insiamrem nan hun a mamawh ve bawk ang chu, mihring tho a ni a, a hun tawngin a zir lo nen tunah harsa mah se a ti thei em em ang, a hna a thiama an pu ka nih angin eng emaw chen hi chu ka hre ve asin, tun ṭum atan chuan bâng rih lo phawt se, a tlin dawn lova a thei ta ngang lo a nih leh keimahin tihdan ka lo ngaihtuah dawn nia, tun rup rupa thutlûkna siam a ṭha ka tihpui lo che u," a la ti fan a.

"Á..ama thu thu hi ni teh se.." ka nuin a tih tâkah chuan ka thaw huai a, Ngaihzuala hian ka bân a phal lo bur, min hmuh theihna tur hmun a nih vang ringawta phal lo chu a ang lem lo, eng emaw tak ka tan ruahmanna a siam pawh a ni mahna.

Thingpui kan in laiin Ngaihzuala phone a rawn ri a, a bih zuk hnuah a silent daih a, ka nu ṭhu ve lo se chuan 'tunge a' tiin ka zawt ngei ang, Sangtei tih loh hmeichhe dang a nunah an awm ka hre lo.

"Mâmbawihi -u Ngaihzuala kha i hre ve hman em?" Tia ka nuin Ngaihzuala a zawh chuan, "An sawi chiah ka hria a, joining report pea ka lokal lai vel kha a niin ka hria," a lo ti ṭha ve mai.

"Innei mai tawh tur an ni a, Biak inah pawh an puang hman tawh a, tikhan a thihsan ta kha a nia, ka fanu tawrhna zawng zawng hi a nu hian ka chhâwk zangkhai thei lo; nang i rawn lang a, a tan i awm zela kan lawm tak tak a ni," tiin Ngaihzuala a hrilh bawrh bawrh a, a hriat tawh hnu vek a ni tia lo sawi lan chi ni hek suh, amah Ngaihzuala pawhin a hre lo der ve hmak tho a, hria ang pawhin a awm duh ṭhak nâng.

Ka nuin min mutsan hnuah, "Ka haw chho dawn ang aw, Valtea min lo hruai turin a lokal mêk a, naktukah hun neih hram kan tum dawn nia, damdawi ei tur ka la nei nual a," tiin a ding chhuak a, ka nu thil sawi vang nge a mood a dang ve deuh tlatin ka hria.

"Ka ke ti hi a ni si a, eng chhuanlam nge ka hman ang aw," ka ti zawi sap a, "Ka rawn hruai dawn che alawm, i nu ka dil dawn nia, lo lungngai suh.. bâkah a dam lek lek tawh a nih kha, " a ti tluangtlam purh a, ka chhâng zui ta lo.

Valtea pawh a vawikhat nan ka hmu ve ta a, "Bawihi, min hre lo ang tiraw?" Tiin nelawm deuh hian a nui a, "I hming chiah ka hria," tia nui chunga ka chhân chuan, "Nang chu i lâr aw, ka hmu zeuh zeuh ṭhin che, tunlai hian ka zin tam deuha ka hmu khât ta deuh che a, ṭhianpa hian i hming a thup tlat si a, zaninah loh theih lohva ka hriat a ngai ta a nih hi," tiin a zial zuk lai dustbin ah a paih a.

"Lo kal mai mai teh, i ṭawng thui leh dawn.." tiin Ngaihzuala Bike dahna bulah a kal phei a, Valtea pawhin a zui ve mai.

Kan inmangṭha hnuah ka luhsan ta a.

Hemi zan hian min rawn call zui lo a, ka nu leh ka u an mut tawh avangin kei pawh khumah ka insawn ve ta a, rin âi takin ka ke pawh ka rap ngam deuh tawh a, Champhai hi chu a vawh deuh ṭhin avangin thlasik hmain dam fel hram se ka ti hle.

A tuk zing hma deuh takah ka nuin min rawn kâi tho a, "Vawiin hi i u Ngaihzuala thihcham thla lina a ni a, a nuin nichinah min lo call a, kan lêng phei ve dawn em ni ang, chaw ei kham lamah" tia min hrilh chuan ka hrilh a hai ru hle, vawikhat mah a thihcham leh a thih ni, a piancham pawh ka theihnghilhsak ngai lo a, engtin nge ka hriat loh theih le?

Inthiam lo takin, "Ka hria alawm, mahse, len tumna pawh ka lo nei hran lo a, nu..dik tak chuan an ina kal fo pawh hi nuam ka ti tawh lo, a beidawn thlâk ka ti.." ka ti ringawt a.

"Chutiang zawngin ngaihtuah mah ta che, anni chhungkua te saw chuan an  famo angah an ngai hmiah che a, pasal neia i awm ta lo a nih ngawt loh chuan an ta neihna chen che a awm  ve ang, an fapa nupui atana an pawm thlap i ni a, kal hram a ṭha, anmahniin rawn sawi lo sela chuan thuhran a nia," tiin tui lum in tur min pe a.

"Eng lo..vawiin chu Ngaihzuala nen chhuah kan tum ve deuh a..." ka tih chuan meng phar âwk chung hian, "Ngaihzuala a?" A ti hluai a. Ka ṭawng sual tih ka hrechhuak leh nghal.

"Ih..ka sawi sual a nih kha.." tiin ka riat nawi kual a, min rinhlelh hmel zet hian, "I u Ngaihzuala ni lo midang an awm em ni?" a ti hrâm.

Kei lah chuan awlsam fê hian, "U Ngaihzuala hming i lo sawi lan vang a nih kha, ka rilruah a awm a, ka sawi ve mai mai," tia mar pâta ka phat tâkah chuan, "Chaw eikhamah kan va leng ve lawk dawn nia, min rawn hrilh ve ta chénga kal loh ringawt te chu thil mawi pawh a ni lo," a ti leh tlat tawh.

Ngaihzuala nen chhuah dun tum angreng deuh khan kan awm si a, ka nu bulah ka sawi lang ngam tawh dér si lo. Â..a va buaithlâk ṭhin e, thla hmasa a thihchamah pawh lêng turin min sawm tawp si lo a, tuna taka han tih leh chu ka hrethiam pha chiah lo, a kum khatna cham te chu nise thuhran a nia.

Ngaihzuala ka text nghal a, "Ka nu nen chhuah lawkna tur kan nei a, ka hman rih dawn lo a nia," tiin.

Tukṭhuan kan eikham hnuah min lo reply chauh a, "A hmanhmawhthlak loh, in tih tur chu ti phawt ula, chumi chhungin hna ka lo thawk dawn nia." A rawn ti thlap. Min zâwt dîlchhût ang tih ka hlau ngei mai.

Ka insiam laiin min rawn call a, "Bawihi, dar khat velah hman lo tum ve la, ka in luahah ka awm a, i hman hunah Valtea ka lo hruaitir mai dawn che em ni ang," a tih chuan, "Ka hre lo le, ka hman veleh ka lo sawi ang aw, ka nuin tukin aṭangin a sawi tawh a, hnial a nuam lo," ka ti a.

"Aw le, aw le, kan inbe ṭha leh mai dawn nia," dam duama tiin kan inbiakna a titawp ta a.

Ka nu nen Auto Rickshaw in  u Ngaihzuala te in lam kan pan a, "Azuala kha eng ti tura lo kal nge, a dam ṭha tawh em ni?" Tia ka nuin min zawh chuan tîmna nei map lo hian, "Kan zin laia kan hna vel kha tihfel ngai a nei nual a, chu chu vawiin hian min tihpui rawh a ti a, office- a kal tak tak turin a bân lehlam a la hmang ṭha ngam si lo alawm," ka ti a.

"Chawlh a la a ni lawm ni?" A la ti zel a, "La e, mahse, MDO a nia, Aizawlah lehkha pawimawh eng mah a kawl hleinem, helam office-a File nena en kawp ngaite a awm bawk a, ama inah thawh dun kan lo tum deuh a," tiin dâwt ka sawi leh ta.

"Kan leng rei vak dawn lo nia, bâkah nangmah kher lo midang sâwm tur a nei lo nge?" tih pahin a bag a zen rak rak a, "Kan pahniha zin kan nih kha maw le, midang ai te chuan ka tihpui thei daih zawk ang," ka ti zel a, a ngawi zui ve mai bawk a.

U Ngaihzuala te in kan thleng a, hun dang chu nise kein kan kal mai tur a ni a, a nih loh pawhin Scooty in. Mahse, ka ke vang hian a enga mah ka ti ngam lo a, hnaitê mah nise Auto hman a ngaih phah.

U Ngaihzuala te inchhung kan lut chu ka rin aiin an lo tam a, anmahni chhungkhat hnai an ni deuh ber. Kan hmel a hmuh veleh nu ber chuan, "Bawihi, i damlo kan rawn kan ve thei si lo chea min hrethiam a ni ang chu," tiin ṭhutna tur min kawh hmuh a, ka nu leh u Ngaihzuala nute Dini an ṭhu tlâng a, kei nu ber bulah ka ṭhu thung.

Ka dam ṭhat tawh thu ka sawi ve luam a, "I u Ngaihzuala room-ah khan a ṭhianpa a mu a, nizanah a rawn thleng hlawl a, a la tho lo a nih kha," tia a sawi chuan tunge ni ang tih ka ngaihtuah nghal. Hmun danga hnathawka awm a ni a, kan khuaa a kawm tih loh midang hriat ka nei tam lo viau. Chu erawh ka sawi lang kher lo.

Kan accident dan vel min zawt a, "In pu thar saw a fel an ti riau, a hmel ka la hmu miah lo nain an fak tlat.." a tih chuan ka nu a rawn inrawlh vat a, "Bawhi tan hlei hlei hian a nia ṭha ni, a hrethiam em em a, a damloh chungchângah pawh amahin a ngaihsakin a buaipui vek a, tuna a inenkawlna senso pawh a pain a tum vek," tia ka nuin a sawi bawrh bawrh lai chuan u Ngaihzuala room aṭangin mipakhat a lo chhuak a, a hmel ka hmuh rualin mak tih luat vang hian ka meng phâwk nasa mai.

Engah nge mak ka tih loh teh lul ang ni.

Ngaihzuala nen Seol kan daina hmun Lodge neitupa Rammuanawma a ni miau a lawm, min hmuh rualin a nui tawi tak a, kei lah inthlahrung lutukin ka hawisawn nghal daih bawk.

Ngaihzuala nuin, "Bawihi, i u Ngaihzuala lehkha zirpui ṭhin Rammuana a nih hi, Ramte, ani hi Rinduhawmi a nia, Bawihi tiin kan ko mai, i ṭhianpa nupui tur kan sawi ṭhin kha a nia, vawiinah leng turin kan sawm a nih hi, hei heta hi a nu aw.." tiin ka nu ṭhutna lam a kawhhmuh nghal bawk a, Rammuana hmel a danglam chhin eih lo. Mahse, chîk zetin min en a, ka awm a nuam thei tawh lo reng reng. 

Polite takin min chibai naa a mitmeng a thîp râma kan inhmuh hnuhnun ber laia a hmel leh tuna a lan dan chu inpersan tak a ni. 

"Room-ah inbe lawk teh ang," ka hlauh ang ngeiin a ti ta chiah a, midangin a ṭawng an hre pha lo maithei. 

Ngaihzuala nu lam a hawi a, Bawihi hi eng emaw zawh duh ka nei a, ṭhianpa room ah kan kawm fâl lawk ang e," tiin a nui a, midang tan ngaih loh lama ngaih chi a ni der si lova hreh zetin ka zui lut ta a.

Room chhung pawh a la pangngai reng, ka hawi kuala mit han la deuh tur eng thil mah ka hmu hek lo. Mahse, banga u Ngaihzuala thlalak intâr ṭhin kha a dangin an lo thlâk daih a, tuna mi hi chu Coat dum leh kamis var haa a dinna a ni a, heta a inbel hi kan inneihni-a a hâk tura kan thlan kha a ni. 

A thar an siam tîr tihna a nia, a en a nuam viau lo.

"I pasal tur thihna a la rei loh tehreng nen engtin nge mipa dang nen tiang ang khan in awm dun theih nghal le?" Ngaihno bei lo zet leh thu pehhêl nei miah lo hian a ti chang fak a.

"I sawi awmzia ka hre lo a nia," ka lo ti sap a.

"Min bum tum duh suh, kha Lodge-a ka hmuh hmasakber che khan ka hmuh hnu ang ka ti che a, ka hmuhna hmun che erawh ka hrechhuak zo lo. Mahse, mak deuhin ka phone ah i thlalâk a awm tlat," tiin a nui lui huk a.

"Eng a?" ka lo ti vin hlar.

A phone phawrhin min en tir a, u Ngaihzuala nen kan ding dun lai thlalâk a ni. Phat rual a ni lo.

"Ka ṭhianpa khan a nupui tur ka hmuh ve a duh a, in inneihni ah ka lo telpui theih che u ka rin loh avangin Sâwmna tal min la rawn thawn hrâm a, Rinduhawm, ka hai hlek lo che a nia, engtin nge ani phatsanin kha mihring kha i kawp theih, thil dik lo hi chu thup tumin ṭan han khawh ve ṭhin mahila lan chhuah hun a awm a nia," a ti leh hmuk hmuk a, a hmel a dur khup a, a ṭhianpa phatsan anga min ngaihna chuan min tina ru vawng vawng thei alawm maw le.

"Rammuanawm, i duh duh sawi ringawt suh..." ka lo ti vin tâk a, ner sawk chung hian khumah a ṭhu thla a, "Ka logde-a in rawn awm lai kha ka sawi chhuah leh kher a ngai dawn em ni, room chhunga in chetdan ka hmu lo. Mahse, room pawnlam chin chu CCTV in a cover vek," a ti leh a, sawi tur ka va han nei tlêm tak.

"I duh ang anga mipa nen inawm hnuah tihian ṭha awm takin leh amah ngai ber ang ziazângin i la rawn lang ngam a nia, hmeichhe tenawm tak i ni," a ti khawl khawl mai.

Thiamthu sawia insawi fiah châk viau mah ila, ani bulah sawi ka tum miah lo.

Dâk vah chung hian, "Ka pasal tur a thih tawh ber a hnu, ka duh duh danin ka awm ve ang chu, kan inkawp laia phatsan ka ni lo a, engmah sawi tur i nei lo," tiin ka chhâng a, nichina ka hlauhthawnna ang kha ka nei tawh hran lem lo.

Keimah Rinduhawmi zia dik tak ka lan chhuahtir a hun tih ka hre bawk.

"A thih aṭanga hun reiloteah mipa dang nen nuam chên turin i kal chhuak leh nghal a nia, ka ṭhianpa thlarau kha i zah ve îk lo em ni? A ti hmuk mai.

"Ka nunah inrawlh theihna dan i nei lo, u Ngaihzuala khan min hmangaih a, kei pawhin ka hmangaih bawk, a liam tawh sawi chhuah fo pawh ka duh lo," ka ti nghat a.

A ngaihdan a ni lo lutuk a ni ngei ang, "I lo hetih vang a nih dawn hi ka ṭhianpa nunna khan a tuar, a nupui tur lepchiahna hi a hmuh kân thei a nia, chunglamin a laksak che a, a hre tur ber a kal tâk si ah chuan i landan phena i khawsak dan hi thup hlen theih inring suh..i nun a nuam chuang lo ang. A nu leh pa, a unaute lah chuan an la duat kal zel che a, inthiam lohna i nei miah lo em ni?" A la ti leh zel a, a ṭawngkam a na fak fak khawp mai.  

Rammuanawma ṭawng dan ngeiawm tak avang chuan mit ka khap fak fak a, chhân ka châk rualin tun hi sawina hun a ni si lo.

"I sawi zawh tawh chuan ka lo va chhuak ang e," tia ka pensawn rualin ka kutah nghet deuh hian a rawn vuan a, "Ka ngawih bopui ring suh, i nau chhiat kha tu fa nge?" A'n ti chiah chu ka kut a phe vuai a, Rammuana a hawi sawk mai.

"Sawi tur i nei thlâwt lo a ni tiraw, i chanchin hi hriat hmaih ka nei tlem viau a nia, tunah phei chuan Champhaiah RM Lodge ka din dawn a, ka ṭhianpa accident chhan pawh chhui chhuah ka tum tih lo hria ang che, inhnamhnawihna i neih vaih chuan ka chhuah che inbeisei suh," tiin min nawr nawk a, ka lo ding nghet si lo nen ka pai dawt a, bangah ka intauh lo chauh alawm maw le.

"I duh tawk khan chhui rawh, ka hlau chhete eih lo, Rammuan, mipa ka kawp leh kawp loh chungchângah pawh i lo inrawlh a ngai lo ang, chuan, ka nau chhiat chungchâng kha i sawi chhuak vel amaw, kha ka fa khan pa a nei aw, nang thil hretheiah a pa lo zawng chhuak ang che," ka ti sak sak a, ka thinrimna ka bengdai hleithei lo, ka thâ a khûr hial mai.

U Ngaihzuala room aṭanga ka chhuah hnuin Corridor tawpah ka ding khawmuang a vawi thum zet thâw ka lak zawh hnuah ṭhutkhawmna pindan ka pan ve ta chauh a, ka rilru erawh a nuam thei lo rêng rêng, kha pa Rammuanawma kha mi hlauhawm a nih kha, kan khuaah a la awm dawn zui a nia, ka khawvel a zîm sâwt mang e. 

Rilru pangkhing zetin dârkar chanve vel ka ṭhu leh tawh a, kha Rammuana kha hmuh zui tur a awm lo hlauh zawk a, ka beisei loh deuhin chaw eikhawm an la buatsaih dawn zui.

"Nu, hnathawh tur ka la nei si a, ka haw hmasa mai dawn em ni?" Tia ka nu ka zawh chuan u Ngaihzuala nu zawkin min lo chhâng vat a, "A awihawm lo thei em mai, nangmah berin i ei loh te chuan, i hna chu a pawimawh viau leh tunah khan va ti vat vat la, zanriah ei hmanin i lokal mai dawn nia," a lo ti zung zung a, ka va hah ru tak. He inah hian dârkâr khat lek pawh awm châkna ka nei tawh rih lo, ka kawchhung a dik tlat lo. Eng tin emawni ka awm.

Khatiang khan Rammuana chhâng mahila hlauhthawnna hlirin ka khat tho. Naute chungchâng u Ngaihzuala chhungten an hriata ka nuin a hriat vaih chuan ka nuamsa dawn lo hrim hrim.

Lalngaihzuala hnenah sawi chi a ni dawn bawk si lo.

Zanriah kil ngei tura min duh si avangin tuna chhuah ka tum ta zawk a, Veranda lamah chhuak pheiin Ngaihzuala ka call ta a, "Ka hman tawha mahse, hun ka nei rei dawn lo a nia, engtin nge ni ang," ka tih chuan, "Valtea ka lo hruai tir ang che, khawiah nge i awm?" A rawn ti a.

"Eng lo, u Ngaihzuala te inah ka awm a, ka awmna hrilh mai rawh.." ka tih veleh, "Rinduhawm...eng nge i rawn sawi kha," a ti nghut a, "Nakinah ka hrilhfiah ang che, Valtea chu lo be phawt mai teh," tih leh phone dah ka rual a, keimaha va pan turin ka huaisen tawk lo, Valtea erawh chu ka nu leh midangin hmu pawh nise a pawina vak a awm lo turah ka ngai ve ringawt.

Minute 15 hnu velah Valtea a rawn thleng a, ka nuin min zawh thui hmain ka chhuahpui nalh a, Bike hnungah ka ṭhu fel hman chiah tihin Rammuana a rawn lang a, "Mipa dang an ni leh tlat tawh mai a, khu laia i rawn kalpui kha chu a ni lo tiraw?" Tiel zet hian a rawn ti a, kei lah ngawi ta mai lo chuan, "A thar ber a nih hi, nang ai chuan a ṭha fê..." ka lo ti ngat a, a meng kal rulh ringawt.

Valtea nen chak fe hian kan tlanchhuak zui ta a, ka thin phu dup dup tih reh tumin ka âwm ka dawm vang vang a, ka thaw a ipik ru tlat.

Ngaihzuala in luah kan thleng a, Valtea'n, "Ka rawn lut kâwi lo mai ang, tikhan lo inkawm rawh u, i haw duh hunah ama'n min lo phone mai rawh se aw," tiin biak zui hman miah loh hian a tlan leh nghal a, pa fel tak a ni. A bula awm a nuam ngawtin ka ring.

Inchhungah ka lut a, Ngaihzuala tukverh bulah a lo ding a, a bân a awrh tawh lo nain a la intuam chhah hle.

Ka thâwm a hriat pawhin a rawn che chhuak eih lo a, mûk taka thil ngaihtuah hmel a pu.

"Ngaihzual..." ka ti sap a.

"An inah khan eng ti turin nge i la kal fo a, i bulah thil sawi a har hle mai," a ti hmuk a.

Hei vang chiah hi a nih hi a thin a lo rim. U Ngaihzuala te ina ka kal vang khan.

"Vawiin hi a thihcham thla lina a ni a, ka nu hnenah an lo hrilh a, leng turin min phût tlat atin ni," tiin awki dam thlap hian ka chhâng a, "Tukina kan inbiak lai pawh khan i sawi thei reng alawm, ka laka zêp i neih hian ka lawm lo, inzui satliah kan ni tawh lo a, inngaizâwng dik tak kan ni tih hi i theihnghilh em ni?" A ti sup a.

"Thinrim tawh teh suh, a hneawm thei e.." ka ti hliai a.

"An ina va inlan fo pawh a ṭul lo, i rilru a ti thar a, kei min ngaihthah phah bawk, i u Ngaihzuala hlimthlâ hian a uaibet reng dawn che a nih chuan engtikah mah kan inrem thei lovang, i laka ka rilru puthmang khati zât ka sawi tawh chung pawhin i kal dan pangngai thlah tumna i nei lo reng reng," lawm lo tih hriat hliah hliah hian a ṭawng leh a.

"Hriatthiam tum rawh, a thihcham thla lina a ni ka tih mawlh mawlh chu.." ka lo ti a, ka thin a rim sa ve bawk nen ka zaidam vak thei tawh bik lo achhâ chu a ni e.

"Thla tin a thihcham a thleng ziah dawna i va kal zel dawn em ni?" A tih leh chuan, "Lalngaihzual..." ka ti vin hlak a.

"Ani âiawh tumna kha ka nei lo a nia, i hmanruaa min hman hun lai chu a tawp tawh, kan inkâr a ṭhat theih nan theihtawp chhuahin ka bei a, kalsan ngai ka kalsan bawk a, nang chu i nunhluiah i la tâng tlat, mitthi tawh thíka râk râk rual ka ni hek lo, an inah i kal tam lutuka ka lung a awi lo," a ti hmiah a.

"Ka kal lo thei ngawt bîk si lo a nih hi..." tia zawitea ka chhânna chu a lo hre pha tho a ni ang, rang zetin min rawn pan a, a kut dinglamin ka dârah nghet zet hian a hmer a, "I duh chuan i kal lo thei, i thu thu a ni, a nupui êm i la ni hleinem maw le," tih pahin min sâwi nawk a.

"Ngaihzual, a na a nia.." ka lo ti sep a.

"I na sa reng alawm, dam i tum ngai hleinem, vawi engzat nge ka hrilh tawh che, ka rilru tur te hi i ngaihtuah ngai miah lo, ka na lo bîk em ni? Mawh...sawi rawh," a ti thâm ṭuak a, ka inthiam lo lutuk tlat.

Min vawnna a thlah thuta amah si chêt hian min kuah a, "Hetiang em em hian ka buaipuiin ka ngaihven dawn che tih inhria ila chuan ka hnaih hauh lovang che, tunah chuan ka duh aiin ka duh nasa che a, keimah leh keimah ka inti nâ a nih hi.." a ti zawi ruih a, a thil sawi chhuah avang chuan ka ding khawng at a.

"I hrethiam lo a nih kha, a thihcham hi ka lo theihnghilh daih a, thla thum chhung khan ka theihnghilh sak ngai lo, thlanmualah kalin ka va ṭap ṭhin. Mahse, nang ka nuna i lo lan ngheh tâkah hian vawiin ni hi ka theihnghilhsak ta a ni. Ka nu hnenah sawi lo phei se chuan ka hrechhuak lovang, kal lo thei lova ka nuin min nawr avanga kal mai chauh ka ni.

"Ih..hriatthiam tum hrâm la, zanin tlaiah pawh zanriah kîlho tur a ni a, chhuanlam siamin ka lo chhuak alawm, thinrim tawh suh.." tiin thudik ka hrilh ve ta a.

A thaw hawk a, inlahrang deuh chung hian, "Kan hlim ve dawn pawhin ani khan min dâl zel zawng a ni e, khati khawpa i mipa hmangaih kha ka thîk lo thei lo, ka ta i ni tia ka inhrilh nawn fo a ngai a, i thinlung zawng zawng ka duh ka tih kha, i pangkhing chauh chan ka duh lo," tih pahin kan dinna bula ṭhutthleng hnai berah chuan min ṭhut tîr a, a hmela rilru natna niawm tak lo lang chhuak ka hmuh hian keimah ka indem leh si.

"Hun min pe deuh la, ka insiamrem thei lutuk ang, inhauna atana hun khawh ral a uiawm lutuk.." tiin a hmuiah ka fawp zeuh a, a lo duhkhawp lo nasa mai.

"Bawihi," ti sup chung hian duhthawh zetin min fawp nawn ta a, nidang zawng aia uarin a nia min fawh ni!

Mipat hmeichhiatna lamin kan rilru a luah lo a, kan inthlâkhlelhna lantir nana infawp mai chauh kan ni. Ngaihzuala mipa rim fai sar hian min hîp lo thei lo.

"Zanin tlaiah an in ah chaw i ei ang maw?" Tiin a hnu deuhah min zawt a, ka lo bu nghat, "Tun ṭum chauh hi ni tawh rawh se, i kal dawn a nih pawhin min hrilh hre hmasa la, a rûka kal ka rem ti lo, i pum chhungah hian ka fa tur a awm nge awm lo tih hriat a la ni lo a, mahse, ka hauh bur che, kumin chhung tal chu a lo berah duat che ka duh a, ngaihsak che ka duh bawk, a bâk chu hunin a hril mai ang," ti duahin a malchungah min ṭhut tîr a.

"Rinduhawmi vang hian ka nunphung a inthlâk vek.." ti supin ka shirt hak lai hnuai lam aṭangin a zen a, ka puma chûl dan dan chung hian, "Hetah hian naute awm sela, tichuan i nghet ve deuh mahna.." nui lek lek chungin a ti a, ka lo nui ve tawp.

Ka Lalngaihzuala hi chuan midangte hriatthiamna a ngah êm asin. A mize hrang hrang ka hriat belh zela amah ka duhna pawh a pung ve tial tialin ka hria.

Rammuana chungchâng sawi ka tum deuh úk a, ka ngawi ta rih. Tun dinhmun atan hi chuan buaina dang neih belh ka châk lo êm a ni.

A khât tawkin kan infawp sek a, thildang erawh kan chi-cut hmak. 

"Ka khumah reilote mu ve lawk ang aw, kuah chung chea mut hi ka châk ziah, a rei lo ang," tihpahin a malchung aṭang chuan min chhuk tîr a, a room lamah kan inzui phei ta a.

A khum pawh a zau hran lo, kan pahnihin kan lêng tâwk chiah chiah a ni mai. A sawi ang chiahin min kuah a, "I taksa ka deha ka nghen hian ka thla a muang ṭhin, Bawihi, inneih lam ka sawi kha ka ti tak tak a nia, engmah i tan hlauh tur a awm lo, ka hliahkhuh em em ang che," tiin min thlêm leh ṭan ta.

A sawi liam mai mai lo tih ka hriat tawh avangin, "Thla thar han chuangkai ila, nau ka lo pâi a nih hlauh chuan kan ngaihtuah dawn nia," ka ti ve ta a.

Nui kur kur chung hian, "A innghahna tlâk loh e, khatia kan accident hnuah phei kha chuan beiseina ka nei chau lutuk, tha tharin tum ṭha leh zawk ila.." a la ti hrâm.

"Naa, sawi danglam reng mah ta che, a hunah chuan tuma dal theih kan nih loh kha, ka Ngaihzuala tan hun leh thâ ka sengral hnem tawh e.." nui chungin ka lo ti a, ani pawh a nuih ve leh tâk hi.

Eng eng emaw sawia kan ṭawng mial mial laiin ka phone a rawn ri a, zanriah ei a hun hnai tawh a, ka nu a nih ka ring ve tawp. Mahse, min rawn call tu chu Rammuanawma misual lek.

Pick up loh ka tum zet naa Ngaihzuala'n a lo hmuh hman si avangin ka phone min chhuhsak thut a, amahin a chhâng ta a.

"Atu a pawh chu ni la, Bawihi hi hnaih suh ang che, chuti lo chu.." tia sawi zawm tawh lovin phone a off hmak.

Min kuahna a bân dah sawnin a ṭhu chhuak a, hriam hrâka min melh chung hian, "I nunah mipa engzat chiah hi nge maw awm le?" Thinrim sehchilh nawkin a ti a, a ngaihna hre lo deuhin ka melh hâ a, "I sawi awm zia ka hre lo," ka lo ti a.

"Ka in kawtah a nghak che a nih chu, Rammuana kha i eng eng a nih? Sawi rawh..." a ti hniam ruih a.

"U Ngaihzuala ṭhianpa..." ka lo tih chuan a aia rumin min melh leh a, "A ṭhianpa chu eng atan nge i tih, kei nena inremsiamna kan neih ang khan neihpui i tum deuh em  ni? A ti chang fak a, ka thin tertek a chhuak ve ta.

"Min rinna tlem tal nei la chuan khatiang thu kha i kâ aṭangin a chhuak hauh lovang," ka ti vin ṭhat a.

"A nih chuan kal ta che, Rammuana chu va inphurh tîr rawh, kal rawh..." a ti leh tu tu nia. A thinrim tih ka hria, mahse, bengdaih dan ka hre rih si lo.

"Valtea ko la, ka va indah tîr ang e," ka tih chuan, "I u Ngaihzuala ṭhianpa chu va zui rawh, ka dang lovang che," tih leh min pawh thawh a rual a, zui ve mai loh chu tihtheih dang ka nei ta lo.

Ṭawngkam khat mah chhâk chhuak tawh lovin Veranda thleng min thlah a, Rammuana hmel nui sâwng ka hmuh hian ben chawrh ka châk.

"Kan tlai dawn a nia, lo hmanhmawh rawh, thlanmual tepawh min tlawhpui ve ang chu, ka la hmu ve si lo a," tiin eng mah hrethiam lo ang chiah hian zu han awm thiam a, tenawm lutuk.

"Kal rawh, zaninah engkim kan inkâr zawng zawng hi i nu hnenah ka sawi ang, a tawk ta e..." a ti hmiah.

"Ngaihzual..." ka ti sap a.

"Ka sawi ang chiahin ka awm ang, a hretu tur ten an hriat loh avanga nat nawn fo ka tum lo...kan inngaihzawnna hi thup buai a ṭul tawh lo a ni ang e.." ti nghut chung hian a inher a, inchhungah a lut nghal daih.

Rammuana'n min en reng a, Ngaihzuala hi a la hria tih pawh a hmelah a lang reng.

Engtin nge helai hmunah hian ka kal a ni tih leh min rawn lam nachâng a hriat theih tih hi ka zawhna neih chhun a ni ta.

Ka Lalngaihzuala rilru na leh thinrim hmel buai nak kha ka theihnghilh thei dawn em ni?...

B+>[BeckirafARenthleI]<+®