1.DROGMA SEOL [A Becky Rafa Stories]

1.DROGMA SEOL

Ziaktu: Becky Rafa Renthlei

Rhapsody-[Sawi hawnna]

"Minute khat lek pawh a rei ka ti tawh, ka kal a ngai," tih pahin ka kianga ding mipa chuan hriam hrâk hian min melh a, a lung a awi tawh hlawl lo tih hrilh hranpa ngai lovin ka hmu thiam lutuk tlat; mahse, a kal phal lovin chelh luih ka la tum ve fan tho. 

A kuta vuan chung hian, "Kal rih lo mai rawh, i kal kher a ngai em ni?" Tiin ka melh chho hâ a, khua a lum si, a kalna tur a la hla hle tih hriatsak mah ila; reilotê a kut vawn ka la thlahlel miau a; mahse, mipa a ni a, a thinlung neitu dik tak ka nih tlat loh avangin a kal lui ta. 

En liam emaw thlir liam ka duh a; mahse, ka mittui avangin ka khaw hmuh a fiah lo a; hmai hup chung leh awrâwl chhuah meuha ka ṭap ri chuan a thinlung a tawk che pha dêr si lo.

"Kal rawh, kal ta poh che..." tia phun sap chung hian Veranda thlanglamah ka pen chhuak a, ka thlir liam thei thlâwt lo a ni ber. Ka âwmah hnawhtu a rawn awm a, ka ṭap chhuak leh ta nge nge e.

Ni e, ani hi ka hmangaih lo, ani pawhin min hmangaih bîk lo. Mahse, tisa inzawmna satliah nei tura thuthlung kan nih angin atu ve ve mahin hnunglam kan hawikîr thiang lo atin ni. Indem tur chuang kan awm si lo.

  

B®® stories

"Mambawih, hmanhmawh rawh," tiin ka nuin min lo tur sek a, ani pawh a phî ruai tho. Kei lah chuti bawk.

Mittui parawl ṭeuhin ka thawmhnaw inbel lai ka hlip sawk sawk a, ka thâ a khûr nasa ngei mai, ka chhungril tâwt ru ṭûn avang chuan chhuak lutuka ṭah hawm hawm ka châk a; mahse, awrâwl chhuaha ṭahna chi a la ni lo tih ka hre ve kar, a chhan chu ṭhenawmte an hrilhhai dawn êm asin. Ka ṭah chhan lah an hre dawn lo nasa mai si.

Ka û mipa leh ka nu chu insiam peih diamin sitting room-ah an lo awm tawh a, ka hmel an hmuh veleh, "Mambawih, eng pawh thleng sela chhel taka awm i tum dawn nia," tia ka nuin min chah nawn leh hnuah pawnlamah kan inzui chhuak ta a.

Champhai Civil hospital lam panin hmanhmawh takin kan tlân chûk chûk a, damdawi in thlen ka huphurh êm avang chuan ka thaw chhuak leh halh a, ka ṭah a chhuak et et bawk si. 

Kâr lovah damdawi in kan thleng thuai a, Casualty kawtah mi an lo vei suau suau tawh mai, ka nuin ka kutah nghet takin a hmer a, "Hawh le, an hmuh laiin ṭah loh hrâm hrâm i tum dawn nia," tia a sawi zawh veleh Casualty-ah min luhpui ta nghal a.

Oxygen hîp a thaw kâwk kâwk damlo mu hmel ka hmuh veleh ka thâ a khur ṭha leh a, ka nuin min melh zeuh a, khum lam ka pan phei nghal vat a. 

Ka pasal nimai tawh tur Lalngaihzuala chu thei leh thei lo hian a rawn meng ṭâwk ṭâwk a, hlim hmel min hmuh tîr tum teh mah se a thei lo achhâ chu a nih si hi..! 

A hmelṭha tak ṭhin kha a chul rap a, a biang leh a khabe vel a pem nual bawk a, thla tharah Biak in hawnga innei mai tur kan ni. Mahse, vanduaithlâk takin tukin khan a hnathawhna hmun pana a kal tur chu Truck nen an insu hlauh mai a, a dinhmun a ṭha lem lo tih sawi lan kher ngai lovin kan hre vek.

A kutah nghet takin ka hûm a, sawi tur tam tak nei hmêl a pu naa ṭawng chhuak chi ziazâng a ni si lo. Ka mittui far tur chu duh lovin ka khap per sak sak a, ka kut dinglamin a kutah ka chelh a, veilamin a chal ka dawm thung. 

Zâwitê hian, "U Ngaihzual, i dam dawn a nia aw, i dam a ngai," tia ka phun sep ri chu a hre pha tih hriat takin a kut a rawn ti chê a, a hmui a tiche naa a sawi hriat theih a ni chuang lo; a maimitchhing leh ta riai riai a, kei erawh ṭap chhuak hawk lo turin ka insûm nasa hle.

U Ngaihzuala hi kei aiin kum liin a upa zawk a, kum hnih pum ṭhak kan inzui hnuah inneih kan tum ve ta kha a ni a; Biak inah vawi hnih an puang tawh nghe nghe, mahse, tuna a lan danah hi chuan inneih lam chu beisei chi rual a ni lo, kan chhungte ve ve pawhin beiseina an nei sâng lo tih a lang reng mai.

Ngaihzuala nu leh ka nu pawnlamah an inbia a, kei a bulah ka awm thung a, a hmel dam thluam phênah chuan na tak tuar a ni tih a hriat a, oxygen hîp mah se boruak khamkhawp hmu zo lo niawm takin a thaw leh hrâwk hrâwk zel a, a bulah awm tam an phal lo bawk.

Tlailam dâr thum a ri a, kan rin dan ni tho mah se; ka hmangaih leh min hmangaihtu 'Tiam tlat e' ka tihpui tur Lalngaihzuala hnukchat tur hmel chu mittui luang zawih zawih chungin ka en a, chelh din theih nise ka va han ti tak, eng anga nasain ko pawh ni ila, min chhângtu tur a awm ta si lo.

"Ka Lalngaihzuala a kal ta, a awm ta lo."

A thî tih ka hriatna ringawt pawh hi âtpuina tham a ni. A tel lovin khua ka hawi ngam dawn em ni, ṭap hawm hawm chungin a nuin min kuah a, "Ka fapa..." tia a nu ṭap ri chuan ka chhungril a fan chhuak vek.

'Pasal sûn' tia sawi theih ni lo mahila, ka tan chuan danglamna a awm  tehchiam lo, u Ngaihzuala ka ngaihtuah chhuah apiangin ka biangah mittui a luang a, a thih sarhu lai hi chu sawi chhuah kher ngaiah ka dah lo aw, a hrehawm lulai êm a ni.

Tute pawhin min khawngaihin min lainat a, amah tlangval fel leh mi hawiher zau, midangte hriatthiamna ngah tak mi a nih avangin uitu leh sûntu pawh a ngah hle, accident-a thi a lo ni kher bawk nen inlêng pawh an nei rei hle bawk.

U Ngaihzuala'n min kalsan aṭangin thlakhat a liam tawh a, nunphung pangngai zawh ka harsat êm avangin a rûka zu in zeuh zeuh ka ching chho ṭan a, ka nu leh ka û pawhin min khak hial. Mahse, ka nun ruak lutuk leh khawhar min hnêmtu chu zu ina ruih chiah a ni, Pathian ka dem ngam lo a, a hnena tlûk luh ai chuan khawvel thilah inhnemna ka zawng ti ila a dik ber awm e. Seol ka dâi ṭan mêk zel a ni.

Kei hi Rinduhawmi ka ni a, 'Mambawih' tia koh ka hlawh ber. Agriculture Department-a Focus project hnuaiah Project Assistant in ka awm ve a, a ngheta thawk ni lo mah ila, mahni intuamhlawmna atan a ṭha ve alawm tiin ka thawk ve lâwp lâwp a, a nuam ka ti ve viau mai.

"Kan inneih hnuah chuan hna i thawh ka remti tawh dawn lo a nia," tia u Ngaihzuala'n min hrilh ṭhin lai pawh khan bân ka hreh ru riau a; mahse, ka sawi chhuak lem lo. 

Unau pahnih kan ni a, ka pain min boralsan hnuah ka nu hovin kan tâl ve nawk nawk a, ka u Lalhmingmuana hian sawrkârah hna chhetê a vuan ve bawk a, ka pa pension ringa khawsa kan ni deuh ber. Ka nu hi ka ngaisang a, inchhungkhur enkawl leh a fate enkawl hi a hnapui ber a nih avangin hetia zu in rûk ka chíng pawh hi a ngaithiam lovin a ngaihdan a ni lo hle.

"Mâmbawih, Ngaihzuala kha rawn tho leh ta se i awm dan a hmuh hian a lawm miah lovang, zû in tawh hlek suh, midangin an hre palh reu reu ang e, i mualpho nasa dawn a nia," tiin min hrilh a, a dik ka tih rualin ka zawm chhete eih lo. Ka bei a dawng a ni tawp mai.

Ka u pawhin vawikhat min khak bâk kha chu a sawi nawn tawh miah lo a, ani hi chuan ruihtheih thil eng mah a ti lo. Ka khawharzia leh u Ngaihzuala avanga ka tawrhna te kha min hriatthiampui a ni tehchêk ang chu a ngawi thei ru riau nia.

Inrinni tlailam a ni a, ka tihdan pangngaiin u Ngaihzuala thlanah ka kal leh ta a, a hma anga ṭah vak vak kha chu ka ti ta lo deuh, reifé ka ṭhut hnuah veng thlang lama zu zawrhna hmun ka pan leh ta nge nge e. 

Khua a thim chhawlh tawh a, ka rûi duh a nih pawhin midang tibuai miah lo hian zu zuar in ka pan ve hmak zel. Hmeithai a ni a, nu Hruaipuii a ni, a tîrah chuan min pe ngam mai lo va; mahse, ka hrehawmna min hriatsak ka ti mai, vawithum ka kal hnuah min pe ve ngam chauh a, a ruka in kher kha ṭul ka ti lem lo bawk.

A fapa kum 10 mi nen an khawsa a, min lo hmuh veleh, "Mâmbawih, chaw ei ve nghal daih rawh aw," tih pahin an room lam a melh zeuh a, ka lo man thiam lutuk tlat. Zu lam ve ṭhin an rawn lawr sek avangin min hmu tam lo se tih a duh a, ka in ve dawn chuan an room-ah min luh tîr mai zêl.

Khum bul chair-ah ṭhuin no khat ka tlâk pap a, ka phone a ri zui zat bawk. Ka nu bâk a ni leh dawn chuang lo tih ka hriat vangin ka en buai vel peih lo, luhlul chhuahin ka in belh leh a, choka lamah ṭawng thawm a rawn awm zui bawk nen ka phone chu phawrhin ka switch-off zui hmak a, ka awm dan a ṭha lo tih hre mahila duhthlan tur dang ka nei miau lo atin ni.

Nu Hruaipuiin zanriah ei turin min rawn ko a, kâi chhalh chungin ka chhuak phei ve ta. Mahse, an nufa chiahin an lo awm awzawng lo! Mipakhat hi ṭhutthlengseiah bân phar duai chung hian a lo chhing siar siar a, kan thawm hria ang pawhin a lang hek lo.

A hmaifang dik zet pawh ka hmu hman vek a, en rei duh lovin dawhkan ka kîl ve ta zawk a, "Bawihi, puar deuh khan ei rawh aw, i nuin min hmuh hunah min ṭim leh nek dawn a nih kha," nuam lo tihhmel takin chaw a bâr zui nghal a.

"Ka bansan ṭêp tawh alawm, ka hna ka zawm leh hunah ka sim ang," bah deuh nakin ka lo ti a, a awih hmel vak chuang loh.

"Ngaihzuala i ngaihna leh i sûnna tireh tur hi chuan khuarei a ngai a nia, hetianga zu i in zel chuan a ngawl i vei thuai mai ang," tia duhsak taka min hrilh lai chuan ṭhutthlenga ṭhu pa khan, "Nu Hruaipui.." hniam ruiha tiin min melh kâwk a, a melh a na hrep lehnghal.

Nu Hruaipuii chuan zaidam deuh hian, "Azual, Mâmbawihi anih hi, khatia ṭhu khawmuang lo khan chaw rawn bâr ve rawh,'' tiin a nuih var var a. Kei erawh che lovin ka ṭhu ngil at a, ka chaw bar tur ṭhulh meuhin chu pa chu ka en ta reng a.

Ani pawh chuan ngun deuhin min en lêt a, rui hmel a pu ve ṭhak nâng. Kan veng a mi chu a ni lo tih ka hria, mikhual ti dawn ila, nu Hruaipuii nen an inhriat ṭhat hmel viau lawi si a, inthing nak chungin ka tho chhuak ta ringawt a, ka la pai dat zui.  

"Zual, Mâmbawihi hi an in thleng zuk thlah ta che," tiin nu Hruaipuii chuan chu pa chu a hrilh a, "Thlah ka ngai lo ka haw ve thei," zawi tea tiin room lamah ka lut phei leh a, nichina ka thil in bâng kha ka bag-ah ak ṭhain ka chhuak leh nghal vat a, nu Hruaipuii pawh a lo kham fel tawh bawk. 

'Azual' tia a koh pa kha kawngkhar bulah kawisawi zetin a lo ding a, ka chevel min en chîk ngang mai.

"Ka hmanhmawh deuha ka kal mai aw, nu Hruaipui, ka nuin a hau leh che anih chuan min hrilh dawn nia," tiin kan chaw eina pawh seng fel lo hian ka chhuak nulh a, "Inthlah tîr mai la aw..." a tih lawm lawm pawh chuan ka ngaihsak duh dêr tawh lo. Muangchângin ka pen chhuak ta chhat chhat a.

'U Ngaihzuala, Lalngaihzuala, ani chuan min kalsan tawh, a thi tawha a lo nung leh dawn lo,' tiin keima hriat tham lekin ka phun sep sep a, ka mitthlâah ka Lalngaihzuala hlim hmel a rawn lang a, ka rui lungpuam deuh bawk nen ka ṭah a chhuak leh ringawt tawh. Ka inhnît hraih a, thlanmual lam bawk ka pan leh ta.

Nichina mipa hmel ka hmuh rual khan, 'Ka Ngaihzuala' ka hrechhuak miau atin ni.

"Thlanmual lamah eng nge i tih dawn?" Tia min rawn zawttu an awm avangin ka ding chat a, ka lehhawi rang ngei mai.

Azuala chu ka hnungah a lokal ve zel chu niin!

"U Ngaihzuala thlanah ka kal dawn, min lo zui duh suh," tiin ka chhâng nghauh a.

"Eng maw i sawi, u Ngaihzuala thlanah ka kal dawn i tia mi?" tiin mak tih hmel takin min zâwt let hû a, ka lo bu nghauh.

"Ka la thih loh hi, i rûi tawh a nih kha..." tiin za zet hian a nui chhuak hawk hawk a, ka hrilhhai letling zawk.

"Min rawn zui tawh suh ka tih chu, ka rui kher lo..." tih pahin ka kal chak sauh sauh a.

"I kiangah Ngaihzuala ka kal ve reng a, thlanmual pan ṭalh te chu a, i ruih dan a ṭhing tlat," a la ti hrâm.

Inherin rum deuh hian ka melh a, "Fiamthu ka thawh lo aw, Lalngaihzuala thlanah ka kal dawn tih ka sawi a nih chu," ka tih veleh ka bânpuamah a rawn man a, "Kei hi Lalngaihzuala ka ni, thlanmuala kal lovin ka kiangah awm la, i him ang," hniam chhakin a ti ta a, ka lo mengphâwk vak ringawt.

'Lalngaihzuala' he hming avanga ka ṭah tam tawh zia leh nunphung pangngai ka zawh loh phahna hming a rawn sawi lanna chuan ka chhungrilah eng emaw ka hriatthiam siloh hian thu a sawi tlat!

"Lalngaihzuala i ni tihna maw?" Ka'n ti ṭha veleh hnuhnawh a, nui suk chung hian, "Chu chu ka hming a ni, ka pian tirh aṭangin tun thleng hian ka la pu ngar ngar bawk," a ti a, min vawnna a la thlah ta chuang lo.

Amah vêk chuan, "Helaia ding khawmuang reng lo hian min rawn zui rawh, zanah hmeichhe tan thlanmuala kal a him lo a nia, hawh le.." tiin dam deuh zawk hian min pawt det a, ka zui ve mai bawk a.

Ni e, mak deuh maiin amah ka hmuh rual khan engtin emaw tak ka awm chiang a ni. Ka zu in vang zâwk nge, â...ka hrethiam teh nuai lo e a.

Ka ban phâk, ka hmuh phâk leh ka khawih theiha awm Lalngaihzuala hi engvangin nge ka zui mai loh ang. Ka tana mipa awm chhun hming ngei kha.

Thuawih deuh leh sawi buai nei miah lo hian min hruaina tur lam pawh ngaihtuah miah lovin leh mâwl inti rilru reng chungin ka zui ve ta tho a.

Nu Hruaipuii te in lamah min lêtpui leh tê tê phawt a, "Tikhan lo awm la, khawiah mah lokal sawn suh aw, i kal dan te kha a dik miah lo a nia," tiin ka chhânna pawh ngaichang lo hian nu Hruaipuii te inchhungah a lut zui nghal daih a, keiin pâwnah ka lo nghâk thung.

Rei vak lo hnuah eng emaw khâi chung hian a rawn chhuak leh vat a, ka dinna ngaiah ka la ding ren avangin koki sán âwk chung hian, "In inah i haw duh zawk em, ka thlah ang che aw," dam thluama tiin ka bulah a rawn ding a. 

"Aih, ka la haw duh lo, ka duh hunah ka haw ve mai dawn alawm," ka tih veleh, "A nih min lo zui rawh le, khawlaia inkaih emaw inkuah tih vel kha i duh ka ring chiah lova ngîl taka kal i tum hrâm hrâm a ni ang chu," tihpahin a nui suk a, ka lo nui liam ve mai.

A car dahna hmun thleng kan inzui phei a, driver seat-a a ṭhut luh rualin ka ṭhutna tur lam kawngkhar a rawn hawng zui nghal a, ka vawikhat hmuhna leh hriatna ni mah se misual tak chu a nih ka ring lem lo.

Amah melh zeuh chung hian, "Khawiah nge kan kal dawn?" tiin ka zâwt sap a, "I la haw duh lo tak tak maw?" Tiin chîk deuh zawk hian min en vang vang a, ka lo bu nghat nghat mai.

"Vengsang lamah kal ang aw, ka ṭhianpa hi Aizawlah a kal a, a inah tumah an awm lo, duh leh chutah chuan i thil pâi kha kan in dawn nia," tiin a nui leh suk a, engmah sawi chhunzawm tawh lo hian Vengsang lam panin kan tlan chhuak ta a, ka maimitchhing zui daih.

Car ding dat thawmah ka meng chhuak a, Ngaihzuala chuan min rawn en zuk a, "Tikhan lo ṭhu lawk la, kawngkhar ka'n hawng ang e," tih pahin a chhuak zui nghal vut a, ka hawikual ngiala kan awmna hmun fâl angreng takah hian in pahnih chiah a awm, Champhai khua ni mah ila helai hmunah hian ka kal awm ka la hre miah lo.

Minute reilote hnuah ka ṭhutna lam kawngkhar a rawn hawng a, "Hawh le, i chhungte'n an ngaihtuah ru viau ang che, haw hma kan tum dawn nia," tiin passenger seat-a ka ṭhu lai chu min kai chhuak a, a kut lum thar thara min vawnna melh zauh chung hian ka chhuak ve mai bawk a, vawikhat ka hmuhna chauh a ni a, chu pawh darkar tam kan la inhre lo, tihian ka zui ve ngawt chu a nia, ngaihtuah chian chuan a âtthlâk ru tlat.

A 'ṭhianpa in' tia a sawi chu a zau lo nain a felfai reuh hle. Polite takin ṭhutna tur min kawhhmuh a, "Thil tam zawh che ka tum lo, mahse, hriat duh pakhat ka neia chu chauh chu min hrilh la ka duh," tiin chîk leh uluk zet hian min thlêk a, ka lo bu nghat nghat ringawt.

"Ngaihzuala i tih kha i tan eng nge a nih, i pasal nge, i unau nge i ṭhian?" a ti ta a.

Rei fê ka ngawih hnuah, "Ka pasal tur a ni a, accident in a thi," zawitea tiin hnuailam ka bih zui nghal daih a, ani pawhin zawhna dang min zawh belh tawh lovin a ngawi zui hmiah.

Rei tak inbe lova kan ṭhu ngar ngar hnuah a ning ta deuh nge, zu in tur a thli chhuak a, "I duh chuan i inbelh thei ang, i hun a inṭan e," zawi supa tiin a thlit sa no khat chu min pe a, îhe lovin ka lo ban vat a, zu ka in ṭhin tih a hre tawh ta sa sa, inthlahrung hauh lovin ka in mai a ni ang chu.

Tlailamah ka lo lem nial tawh bawk nen tam phei chu ka in thei tawh lem lo. 

"I ṭhianpa kha a lo lêt tawh dawn lo a, ka sawi phâk ni lo mah se, rilru thar nen khawvel hmachhawn thei la ka duh khawp mai," tia Ngaihzuala ṭawng lai chu ka lo en ve kar a, ka Lalngaihzuala min ti hrechhuak ka ti mai, inngaihtuah lâwkna hman awm miah lo hian, "Inremsiamna nei ang, Lalngaihzuala i nih tak tak chuan," ka ti hluai a, min rawn en lêt ve chiah bawk.

Mak tih hmel taka min la en reng chung hian, "Eng inremsiamna maw?" Tiin min zâwt lêt hû a, eng nge ka thluakah hian awm pawh ka hre tawh bîk lo.

"U Ngaihzuala boral hnu khan ka nunah mipa dang seng luh tumna ka nei tawh lo a, ka nei leh tawh kher pawhin ka ring lo, a hmun ruak hi a zau lutuka tu mipa mahin an hnawhkhat hek lovang, chuvangin ka Ngaihzuala ka theihnghilh loh nan leh ka hriatrengna aṭanga a bo hlen loh nan nang leh kei hian inremsiamna felfai tak nei ila ka duh a ni," tia tîmna nei nei miah lova ka ṭawng lai chuan ngun lutuk hian min en a, mak tihna leh hriat thiam lohna a hmêla lo lang dawt zut chu ka hmu reng nain ka haider sak hmak.

Ka thil sawi lai nena inpersan zet hian, "I hmingpum eng nge?" Tiin min zawt daih nia.

"Rinduhawmi" ka lo ti vat a. Chal chuar nûng chung leh kut kuangkuah thûn chung hian, "Rinduhawm, ka lak aṭangin eng inremsiamna nge i duh?" Tia min zawh lêt chuan rang fahran hian, "Pasal neih tumna ka nei tawh lo a, fâ erawh ka awt ve, pakhat tal neih ve ka duh a, mipa dang ngaihzawng tur emaw pasal tur pawh nise kei hian ka hmu zo lo a ni lo, chuti a nih rualin min ûmzuia keimah min beisei lêt tur mipa ka mamawh lo a, nang hian chu chu i ti theiin ka ring, fa min pe rawh.." tia ka sawi zo chiah chu a reh hian a reh nghal tlawk tlawk mai.

Lalngaihzuala kâ aṭangin eng mah a ri chhuak lo a, mâwl min tih hmel lutuk leh awih theih lohna mitmeng nena min melh rûn hnuah a ner sawk a, "Tuna i thil sawi kha i rui ṭawngah ka ngaihsak ang che, khatiang thu belhchian tlâk loh leh âtthlâk lutuk kha i kâ aṭangin chhuak nawn tawh suh se, i rûi tawh a nih kha," awki hniam ruiha tiin a ṭhutna aṭangin a ding chhuak a, ka awmna lam rawn pan pah hian, "A thihna a la rei lova i rilru a chiâi rih a nih ber kha, fîm taka thil ngaihtuah ni la, khatiang thil sawi mai mai rual i ni lo, hawh le..ka thlah ang che," zu han ti daih a, ka hrilhhai letling zâwk alawm maw le.

"Ngaihzual..." ka lo ti hap a.

"Lokal rawh, inremsiamna tih vel ngaihtuah hman ka ni lo, zu i in a nih pawhin khatiang thil âtthlâk lutuk kha sawi chhuak tawh hlek suh..." ti hmuk chung hian min pawt tho a, ka lo ṭang ṭung ringawt.

"Engvangin nge i duh loh, fiamthu mai mai ka sawiah i ngai em ni?" Ka ti nghat a.

A ner sawk rualin, "I fiamthu chu a ni lo maithei mahse, i ruih vang a nih kha," ti nghut chung hian ka ṭhu lai min pawt tho lawp a, "Zu in ve tlâk pawh i nih hrep loh hi a..nawi lutuk mai.." tia phun leh sup chung hian min chhuahpui a tum nghal ringawt a, ka lo ngaithei der si lo.

"En teh, mipa ka mamawh ngawih ngawih vanga sawi ka ni lo, ka Lalngaihzuala tana ka rinawmna tilangtu pakhat a nih hi, a chhan chu nang pawh Ngaihzuala tho i nih vang a ni. Ngaihzawng i nei em?" Tia ka zawh thut chuan dar san âwk chung hian, "Nei e," tih chiah a sawi.

"A ṭhat chu, ka thil sawi kha i pawm chuan i bialnu thlah kher a ngai lo, hun reilotê atan chauh nise, tlang takin ka sawi ang aw..." ka la ti tak deuh deuh a, a lo bu nghut ringawt.

"Nupui nei lai i ni lova, ngaihzawng erawh i nei, he ka contract sawiah hi chuan inngaihzawnna lam a tel lo, fa pakhat ka neih theih nan min pui dawn tihna a nih chu, hlawh a awm lo," tiin ka nui lui ngial a, ani pawh a nui ve tho.

"Lokal phawt teh, khatiang ngaihdan kha i nei tak tak a nih chuan naktukah rui lo hai lovin i sawi dawn nia, tun atan chuan i thusawi eng mah pawm ka tum lo hulhual," tiin hnial zui theih miah loh hian pawnlamah min hruai chhuak ta a, ka va ngei mai mai tak, ka rui pawh a reh vek nimaiin ka hria.

Kan in awmna ka hrilh bâk chu kan inbe nawn ta lo. Ngun taka thil ngaihtuah hmel a pu a, ka mitsira ka melh rûk zeuh zeuh pawhin a hmaifang hi chu a ṭha ve thlâwt. 

Mut chhuakin min zêm a, ka lo chhing sek a ni ang, "Kan thleng tawh a nia, i chhungte'n min hmuh i duh loh chuan chhuk vat vat rawh," tiin Ngaihzuala chuan ka dârah min sâwi pah dat dat a, kan in lan phâknaah kan lo ding reng tawh chu niin!

"Aw le, ka thil sawi kha fiamthuah min ngaihsak suh aw, naktukah kan inhmu thei ang em?" Tiin ka zahtheih lohna sawmkhawmin ka'n zawt leh pawp a, mitko san âwk chung hian, "Ka phone number la rawh," tih chiah a sawi leh.

Chumi hnu chuan a phone number ka saved a, muangchâng tawh lovin kan in lam panin ka kal phei ta a. Ani pawh rang takin a tlan lêt nghal daih, in mangṭhana thu takngial pawh a chhâkchhuak eih nâng. Mipa mak ve tak chu a ni.

Zan dar 11 a ri tawh a, ka nuin min lo la nghâk tih ka hmuh rualin inthiam lohna lian tak ka nei leh nghal.

"I khawsak danah leh i awm danah sawisel tumna che ka nei tawh lo a nia, i hlimna tur leh nuam i tih ang chuan han tâl chhin ta poh che, Bawihi, i tânna salah hian tâng reng lo la, harhchhuah tum hrâm rawh aw," tiin zaidam takin min lo bia a, ṭawngkam khat mahin ka chhâng lo. Ka room lam ka pan nal nal a, nuam lo tihna ka neih tam hmaa muthilh ka duh ber.

Varṭianah ka harh zuai a, tui ka in hnuah ka muhil zui leh ta a ni ang, ka harh nawn leh chuan zing lam dar 10 a lo pel thui tawh hle.

Rang takin ka ṭhu chhuak a, nizana ka chhar thar Lalngaihzuala ka hrechhuak  nghal vat. 

Ni e, ani hnena ka thusawi kha ka ruih vanga sawi mai maiah min lo ngai palh ang e, a teuh lo a nia. Kei hian engtikah mah u Ngaihzuala ni lo mipa dang hi ka thinlung taka hnaih tumna rilru ka nei tawh lo a, tuna ka ngaihtuah chhuah chawp a ni lo, a thih aṭanga thlakhat a liam khan he ngaihdan hi ka lo nei daih tawh zawk.

Mahse, nizana a hming anpui ka hmuha ka hnaih khan keimahah eng emaw tak ka hriat fiah si loh hian min kam nghal a, amah kha ka va duha ka ngaizawng ta tihna a ni reng reng lo a, 'Ka Lalngaihzuala' min hriat chhuah tîr theitu mipa a ni tih hi ka hriat chhun chu a ni rih mai. 

Mitthi tawh âiawh tîr ka tum a ni lo. Amaherawh chu, mittui nena ka thlah liam tâk hming ang chiah neitu leh an pianphung inang lutuk maite avang khan hnaih châkna rilru ka pu a ni mahna.

Rang takin phone ka phawrh nghal a, Ngaihzuala number ka hmet chhuak a, ka call ta a. Vawi hnihnaah chiah ani pawhin a rawn pick a, "Rinduhawm, i tho chiah a ni maw?" a tih chuan, "Ka number ka pe si lo chea engtin nge min hriat  nghal theih a!" Ka lo ti vat a, nui ri hawk chung hian, "Min rawn be dawn tih ka hria alawm," inring tawk takin a ti hmiah. 

"Nia, nizana ka thil sawi kha ka la ṭhulh lo a nia, hmaichhana sawi dun ka la duh fan aw, hun i neih chuan kan inhmu thei ang em?" Ka ti nghal zung zung a, khuh kharh chung hian, "Lo insiam la, ka rawn chhuak ang, i contract sawi hi tu mipa pawhin an hnawl phal loh tur a ni a, kei kher min thlan chhan hre vek lo mahila kan sawi dun ngei ang," nghet charha tiin thudang sawi buai nei eih lovin phone a dah zui nghal daih. 

Chumi hnu chuan ka inbual zuai zuai a, thil eina hun neia ka inhriat loh avangin ka nu hnenah, "Nu, ka chhuak leh lawk dawn a nia, ka lo haw har lovang," ka ti liam puat a, "Mâmbawih..." a ti zawi raih ringawt.

Nizana min drop na hmunah khan ka lo nghâk ta rân a, minute rei pawh ka din hmain a rawn thleng chawpchilh nghal a, "Kal ang, midangin min hmuh tam hmain," tihpahin rang fahran hian car chhungah ka ṭhu lut vat a, a tlan chhuak zui nghal a ni mai.

Hmun dangah min hruaina tur a hre lo nge, nizana kan kalna Vengsang lam bawk kha min panpui leh ta a. Kan inbe tuitam lo ve chiang a nia; kâr lovah kan thleng a, "I duh ang i sawi theihna atan he hmun tluka remchang hi a awm lo a nia," ti supin kawngkhar a hawng a, tîmna rilru ka nei lek lek naa ka haider lui hmak thung.

"Kum engzat nge i nih?" Tia min zawh thut chuan, ka kum zât dik tak ka hrilh ve mai.

"I pasal turin a boralsan che hi pawi ka ti a, tuna i thil sawi tur pawh ngun taka i ngaihtuah tawh ka beisei, kum 27 i nih chuan rilru puitling pu rual i ni tawh bawk, helai velah nangmah hrechiangtu che mipa tam tak an awm laia kei kher min thlan nachhan hi a hmasaberah chuan hriat ka duh," tiin ṭhut hmun a rem nghal a. Kei pawh ṭhu tura min mitmeiin amah ep chiah single chair-ah ka ṭhu ve nghal a.

"Engtik ni leh thlaah nge i pian?" Tia ka zawh thut chuan, ṭhatein a sawi ve mai a, ka lo rin rilrûk dan a dik chiah. U Ngaihzuala nen an pian ni leh thla a lo inang chiah a, mahse, tuna Ngaihzuala hi kum 2 in a naupang zawk thung. Thil mak ka tawng a ni ringawt alawm le.

"Nangmah kher ka thlan nachhan che chu Lalngaihzuala i nih ve vang a ni a, tuna inremsiamna ka sawiah hian hmangaihna lam a tel lo, induhna emaw in ûmzui pawh thil thiang lo a ni tih i hriat ka duh," tiin a mitah tak ka en chat a, min lo en lêt ve chiah bawk.

"Chuan..." a lo ti sup ringawt.

"Ngaihzawng nei lai i nih thu i sawi a, i chhunzawm zel thei bawk ang, mikhual i ni tih ka hria a, kan khuaah i châm rei dawn em?" Tiin ka zawt leh phawt a.

"Vawiin tiam lo hian ni hnih leh zan hnih ka la awm thei ang, chumi chhung chuan tuna i thilsawi âtthlâk ru zet hi tihhlawhtlin ṭâlh i duh chuan hun a awm tihna a nih ber chu. Ngaihzawng nei satliah ka ni bik lo a, nakin lawka innei mai tur kan ni tih i hriat tel a ngai bawk," tia min chhân chuan ka thaw huai a, ka thil sawi tur a ti awlsam sawt bawkin ka ring.

"Aw le, helaia i châm chhung hian fa pakhat tal ka neih theih nan min pui la, mipa vawikhat mah ka la mutpui lo tih i hriat ka duh a nia, nula thianghlim i mutpui hi i hlawh tur chu a ni mai," zawi angreng taka ka tih chuan makti hmel a pu hran lo.

"Mipa ka ni a, mipaah pawh pa ka inti ve a nia. I pasal tur i sûnna avang leh i tum leh duh ber hrechiang hle lo ila chuan tuna i thil ruahman hi ka pawm hauh lovang, ka thinlung a uire dawn lo tih hre tel ang che," nghet charha tiin a hma aia uluk zawkin min en leh a. 

"Rinduhawm, i thil sawi hi i ti takzet a nih chuan, helaia ka châm chhung chauh atan ni rawh se, inbiak zui emaw inngaihven zui ka duh dawn lo a, chutiang ang chu i huam tho ang maw?" Tia rinhlelhna mitmenga min melh tâkah chuan dam thlap hian, "Nau ka lo pai ta a nih pawhin ka rawn hrilh lovang che, keima ta tur a ni mai, i hnam hming a chhawm lo ang a, a pa hmingah pawh i hming ka ziak hek lo ang," ka lo ti awlsam êt a, a nui huk ringawt.

"Nula thianghlim i nih tak tak chuan tuna i thil sawi hi âtna chikhat a nih loh pawhin i Lalngaihzuala kha i hmangaih hle tihna a ni thei ang, kei nena tisa inzawmna neih i duh chhan lah kan hming, pianni leh thla a in an vang mai mai a nia, i in ngaihtuah chiang meuh maw?" A'n ti ṭha leh a, a rilru a hmin zân lo deuh chuan ka hria.

"Ka ngaihtuah fel vek tawh, i pawm dawn a nih chuan kan thuthlun ang chiah chiaha awm ka tum ang a, nang pawhin a bâk pelh i tum bik tur a ni lo. Chuti a nih rualin harhfim chuan ka hmachhawn ngam dawn lo tih min hriatsak la, ka ruih a ngai," ka ti tlang leh hmiah a, a lo bu nghut ringawt.

A mimal chanchin engmah ka zawt lo a, an khua leh a hnathawh ka zawt hek lo. Risk takmeuhin ka kal ve a ni. Hriat belh tumna em em pawh ka nei chuang lo kei mimawl hian...!

Ni e, a hnu leh awm lo tur leh Sign loh Contract tihlawhtling turin keini pahnih hian thu kan pawt chat fel ta der mai. Atu ve ve mahin hlawh kan nei dawn lo a, inremsiamna dik tak leh dân hnuaiah nihnih leh zan hnih kan inkawp dawn a nih ber chu. 

Hetiang thuthlun dan mak lutuk ka ngaihtuah chhuak hi keimah min ti keimahtu dik tak ni se tih hi ka duhthusam ber a ni. 

"U Ngaihzual, nikhat pawh ka la hmelhriat loh Lalngaihzuala tho ka thlang a nia, thinlung pakhat chauh neitu Rinduhawmi hian i hming, i engkim mai ka hriatchhuah fo theih nan leh i damlaia kan tih hlawhtlin theih tak loh ka tih theih nân ani hi ka thlang a nia, min dem suh aw.." tiin ka ngaihtuah vang vang a, dik ka va inti si êm. 

"I chhungte phone la, zanriah eia i haw loh tur thu hrilh rawh le, hetah ngei hian bul kan ṭan ang a, a tawp ngaihtuah thleng suh ang che, khuarkhurum mawng nei lova tlaah inngai hmak la a finthlak a ni mai ," fiah fek fawka a tih hnuah a ding hluai a, "Tikhan i chhungte chu lo bia la, kan mamawh tur lamin ka'n chhuak lawk ang e," tih leh kal chhuah a rual a ni mai.

Ngaihzuala Car tlan thawm a reh rualin ka nu ka call ve ta a, zanriah eia ka haw loh tur thu leh ngaihtuahawm ka ni lo tia ka hrilh fiah fe hnuah, "Mambawih, i nun danah inchhir suh ang che, thu ṭha hrilh eng ang che mah ila, i zawm chuang si lo... i kawng zawh hi Hremhmun tenau tih i hriat chhuah hunah i tlai tawh maithei a nia," tia inhnît hraih chung chian phone min dahsan ta a. Ka khawngaih ve lutuk, mahse, rilru sawhsawn ka tum chuang der si lo.

A hnu leha thil thleng chu ka rin phâk bâk a ni ta. 

Lalngaihzuala mi thar zawk chuan kan zanriah tur atan eng eng emaw a rawn lei chiam a, kan dan zam tifamkimtu atan Zu a rawn hawn tel bawk. Thluak fîma ka ngaihtuahna ka sawi chhuah tawh kha thluak nu butin ka paltlang dawn a nih hmel. 

"Rinduhawm, inchhir suh aw.." tiin ka infuih ru sauh sauh a. Ka thâwl huai chuan ka inhria, ve ringawtin...

"Bawihi..." tia min kohna avang chuan ka phu zuk a, ka hnung maiah Ngaihzuala lo dingin Whisky nokhat pap ka kutah a rawn hmehbel a, "Tunah tlailam dar thum a pêl tawh a, muangchângin kan ṭan ang a, i thutiama ding turin i rilru buatsaih ang che," a ti sup a, ka lo bu nghat nghat mai.

"I bialnuin a hriat chhuah loh nan fimkhur la, phone call leh msg pawh i ti thei vek aw, min vengthawng lo la, chuan, kan sawi tawh ang chiah khan helai hmun i chhuahsan rualin kan inzawmna a tawp ang, chumi chhung na na na chuan ka Lalngaihzuala angin awm ang che aw," tia ka sawi zawh rualin ka no ken lai ka lekkâng zauh a, a mit thim leh hriam ru angreng tak chu en ve reng mah ila, eng nge a ngaihtuah ni ang tih hriat har khawpa mipa inthup thei a ni ngeiin ka ring.

Amahin zanriah tur a buatsaih vek a, min be lumlam lo chiang a nia, ka ngaihtuahna kâwmin ka lo awm vel mai mai a, u Ngaihzuala hnukchat tur hmel ka ngaihtuah chhuah apiangin ka mittui a lo hnai ṭhin. 

Tuna ka ruahmanna min pawmpuitu Lalngaihzuala che vel chu ngun takin ka en a, a dik thlup lawi si. A bialnu lakah a rinawm lo ṭhin em tih ka hre lo na a, mi rinawm sa kha rinawm lova siamtu ka ni thei bawk. Ka hming Rinduhawmi a la ni zui. Â...a ho..ka thil ngaihtuah hi a.., ka zu in in hna a rawn thawk ṭan a, ka ṭahbelh leh ṭan dawn chiah. 

A chhan chu maw, engkim mai hi u Ngaihzuala min ngaihzual tîrtu an ni zel atin ni.

Pangngai takin zanriah kan kil dun a, zawhna min zawt pheuh pheuh tih loh chu ani pawh a ṭawng mang meuh lo a, "Tuna ka bialnu nen hian kum hnih ṭha zet zawt chu kan inkawp ve tawh, a lakah ka rinawm a, ka tan a rinawm bawk, i mu tânna leh i natna aṭanga khai chhuak tur chea i duh ang ka pawmpui che avang hian rinawm lovah ka inngai lova, ani nena kan inkârah i tlazep tur a ni lo," tia min hrilh nawn leh chuan ka ning lek lek tawh. Sawi peih lutuk mai.

"Ka duh huam huam cheah inngai lo la, Contract no.1 tihhlawhtlin ka duh mai a ni," ka lo ti nghauh a, a nui suk duh chauh.

"A siam lam tumtu ka ni a, a senghawi leh sil fel vel chu i hna aw.." tiin room lamah a inthiarfihlim zui daih a, a hnunglamah ka melh kâwk ringawt. 

Hun a ral a, dâr bi ka chhiar a, ka chaw ei kha ka puar leh puar loh pawh ka hre mai mai lo e a, Ngaihzuala luhna room-ah tîm ru angreng tak hian ka lut phei ve ta a; khumah a zangthal zawnga muin a tukkhumah kut a suih a, han en thuak chuan a muhil emaw tih mai tur a ni. Ka thâwm hriain a rawn meng a, "A ṭan hmasatu i ni ngam dawn si lo a, i duh chuan in belh leh rawh," a la ti cheu.

Ka nui lui ngial a, "Kan tih tur ang ang chu tihian ka hmachhawn zawk ang e..." tisap chungin ka thawmhnaw inbel lai muangchângin ka phelh a, mitkhap miah lova min entu mitmeng chu ka en lêt ve ngar tho.

Mipa a ni a, tisa phurna nei mi a ni. Kei hmeichhia ka ni bawk.

Ka tana a hmasaber tur leh engkim huama ka thianghlimna ka hlan tur mipa hi Lalngaihzuala thi ta âiawhtu ni lo mah se, amah Lalngaihzuala tho a nih vang zâwk a ni. Vawikhat ka hmuhnaah khan he ka rilru puthmang maksak zet hi a lo piang chhuak a, mitkhap kâr lekah hremhmun hmahruai kan dâi lût dawn chu a lo ni ta reng si.

Zu hmuna intawng leh inhria kan ni a, chu hmun chuan tuna kan tih tum mêk, nupate inkâr chauha hman tur zahawmna chu kan paldarh dawn ta. Eng chen tak min hruai thleng ang maw!? 

Ngaihzawng nei lai a ni a, kan inkârah hmangaihna a awm lo mai nilovin induhna pawh a awm chuang lo. Tisa in îttawnna pawh a la awm ta lo fo. A lakah fa neih ka duh a, aniin chu ka duhthlanna chu min pawmpui mai chauh a ni. 

A hnu leh atan eng ruahmanna mah a awm lo a, nihnih leh zan hnih atan dán kan zam mai zâwk tihna aw..

Ka taksa ruak kâng chu a thlêk vang vang hnuah, a mutna aṭanga rawn tho chhuakin mitmeng danglam deuh tak hian min en a, mipa vawikhat mah tisa thilah inzawmna ka la neihpui ngai loh avangin ka bangbo ti ila ka sawi sual lovang.

Seol zuankahlen thei khan kan mihring duhna tilianin Pathian duh loh zawng ber mai mipat hmeichhiatna sual khur kan dai dun dawn ta chiah. 

A zu in hnathawh avanga a mitmeng phî chiai te, a hmel thim mâk mai ka en nawn leh tâkah chuan ka tiril a khûr dar dar thei nia. 

Ka Lalngaihzuala hmel mitthla chungin ka maimitchhing a, dam thlapa min rawn fawhna chuan ka hlauhthawnna a tikiam hret hret naa thinlung inhawng sarh erawh ka la ni lo.

Keimaha rawn lut tur hi tunge a nih? Chiang taka ka hriat theih nan vawikhat ka meng chhuak leh a, mittui hnâm sak chung leh zâwi fiah tak si hian, "Ka Ngaihzual" tiin ka phun chhuak ta sap a.

Note: Drogma Seol Long story thar nen ka lo lêt leh dawn ta a, he thawnthu hian tum mumal tak a neih chu thuhran nise a kalphung a dang leh hlak dawn. Tin,  sex leh ruihtheihthilin kan nun a nghawng dan danglam tak rawn tarlan hi ka tum ber a ni bawk.

B+>[BeckirafARenthleI]<+®

®