2.DROGMA SEOL [A Becky Rafa Stories]

2.DROGMA SEOL

Ziaktu: Becky Rafa Renthlei

[Recap]

Seol zuankahlen thei khan kan mihring duhna tilianin Pathian duh loh zawng ber mai mipat hmeichhiatna sual khur kan dai dun dawn ta chiah. 

A zu in hnathawh avanga a mitmeng phî chiai te, a hmel thim mâk mai ka en nawn leh tâkah chuan ka tiril a khûr dar dar thei nia. 

Ka Lalngaihzuala hmel mitthla chungin ka maimitchhing a, dam thlapa min rawn fawhna chuan ka hlauhthawnna a tikiam hret hret naa thinlung inhawng sârh erawh ka la ni lo.

Keimaha rawn lut tur hi tunge a nih? Chiang taka ka hriat theih nan vawikhat ka meng chhuak leh a, mittui hnâm sak chung leh zâwi fiah tak si hian, "Ka Ngaihzual" tiin ka phun chhuak ta sap a...

-BRR Stories

Tuna kan awmna hi a ṭhianpa in tih ka sawi tawh kha aw, mitmei ven tur emaw thawm dang hriat tur a awm miah lo a, ka tawn Sabawp dik tak lakah ka thianghlimna kum tam tak ka lo vawn ṭhat tawh kha ṭhiah fai a ni ta.

Mittui tling pam chungin Ngaihzuala ka melh chho hâ a, kan taksa a inzawm tâkah chuan ani pawh a thaw chhuak hawk a, châwl dat chung hian, "I sawi lai khan ka awih lo a, mahse, dâwt min hrilh lo tih ka hriatna hian min tilawm a ni," fiah faka tiin ka hmai hliahtu ka sam chhâwllêng min huikiansak a. 

Nui hak chung hian, "Kha kha i hlawh tur chu a ni mai, nula thianghlim ka nihna leh ka neih hlu ber pek duhna che ka nei hi Lalngaihzuala i nih vang ka tih tawh kha aw, hun tlemtê kan la nei a, âm takin hmang mai rawh le..." ka ti sap a, a nui lek lekin ka hria.

Ka tan a vawikhatna a nih avangin a nawmna sawi vul chûk tur ka hre hran lo. Ka tumah ka chiang a, chu chuan inchhira rilru ka thlâk mai loh nan min nawr kal mai chauh a ni. 

Nupate inkar chauha hman tur keini pahnihin kan pal buak tâkah chuan zan dar 11 thleng rakin khumah kan awm dun a, Ngaihzuala ka en a, a lungawi a ni tih a hmelah a lang reng mai.

"Bawihi, naktukah hian kal chhuahna tur ka nei a, min zui ve duh ang em? I kal dun ang hmiang, kan inremsiamna anga kan kal tak tak dawn a nih chuan kan hun neih chhun tlemtê hi nangmah nena hman ka duh," dam thlupa tiin a tho chhuak a, kei pawh khumah ka ṭhu chhuak ve nghal bawk a, a ruangâm dik thlurh chu hnunglam aṭanga ka en vang vang hnuah intifai turin bathroom ka pansan ta rih a. Min zawhna pawh kha ka chhâng ta chuang hlei lo a.

"Bawihi," tia min kohna hi min koh duat vang emaw min duh hluah hluah vangah in lo ngai ang e, a ni lo a nia, mi nâwlpuiin min koh dan a nih vanga min ko ve mai chauh a ni a, ka'n sawi fiah lawk a ni e.

A lak aṭanga ka tum ber leh ka duh ber chu fa neih a nih angin ka inpêkna hi a thlâwn ang tih ka hlau ngawih ngawih a, chuvang chuan naktuka a bula kal ve tura min sawmna pawh hnial ka tum lo hrim hrim. Chhungte mitmei veng lêk lovin a hun lai hi chuan tâl law law ka duh a ni tawp mai. 

"Engtin nge ni dawn, zankhuaa i kianga mut duh mahila i chhungten an lo ngaihtuah che ka hlau si a, ka thlah haw phawt ang che aw," tiin a sam dum huh hlap chu a rawn tuai phei mawlh mawlh a, a dik a dik chuan a hmelṭhain a lang thar sar mai.

"Umn...aw le, naktukah chuan i ruala kal ve ka tum a nia, chhuanlam ṭha tak ka mamawh dawn avangin kan inah rawn lut la, ka nu min dilsak thei ang em?" ka tih chuan, "Aih, chutiang ang thil tih tumna ka nei lo, inzawmna nghet nei kan ni lo va, i chhungte hmelhriat tumna ka nei lo," zu han ti deuh tlat a.

Nichin lawka khuma kan chêt dan leh tuna kan inbiak dan hi chu inang lo tak a ni tawh. Kan inmihran hlauh a ang ber.

"A nih leh le, ka inpe ta sa sa, i awm chhung na na na chuan hmun dangah pensan che ka tum lo a nia," tia nghet charha ka ṭawng chuan min thlêk vang vang a, "Nangmahah hian eng thlarau sual nge maw thawk le," a ti sup a, ka chhâng buai vel ta lo.

A hnuah kan in lam panin kan inphur chhuak leh ta a, a dan pangngaiin min biak tumna a neih hmel loh. Kei pawh ka ngawi ve ngat ngat a, kan inkawmngeih loh zia leh kan inpawh loh zia tilangtu chikhatah ka ngai mai.

"Muttui le..naktukah i lokal ve thei dawn a nih chuan min rawn call mai dawn nia," tiin kan in piah deuhah Car a tiding a, "Ngaihzual, harhfimin eng mah ka hmachhawn duh lo tih ka sawi lâwk tawh kha," ti nghat chung hian min chhânna pawh ngaichâng lovin ka chhuak ve ta a.

In chhungah ka lut a, a lo reh ṭhiap mai. Ka khawsak danah ka nu a beidawng titih tawh a, min hau tumna leh min zilh tur takngial pawhin a lo ṭhu chhuak lo tih ka hmuh hian thâwl huai tur ka nih vei nen, chumi letling hlauh chuan ka tâwt ru ṭûn si.

Ka zu in ve te kha chu eng teh ualah a thawk lova a reh fel hmak lo nain ka rui tehchiam tawh lo bawk. Ka room-ah ka lut a, khumah a vângtan zawnga muin ka maimitchhing zui hmak a. Ka mut erawh a chhuak si lo.

U Ngaihzuala'n min boralsan aṭanga ka nun dan inthlâk ta dâwrh hi thil mak tak chu a ni. Ka beidawnna hian a ṭha lo lam kawngah min hruai lût zel a, nula thianghlim kha a mawngphahah ka awm ta tih ka inhria. Ka pasal tur tana ka lo inserh thianghlim vena te kha thlîin a chhêm bo ta a ni ngei ang, hetiang rilru maksak lutuk ka pu ta mai hi keimah ngei pawh hi mak ka inti ve tho. A mak thlâwt a ni!

Ka mittui a rawn hnám a, "Mâmbawih, chhungkua kan din ve theih hunah fa eng zat nge neih i duh?" Tia u Ngaihzuala'n min zawh lai te kha ka hrechhuak a, "Kan nei ve thei a nih chuan pathum tal ka duh," tiin ka chhâng ta kha a nia, kan inzui chhung khan tihtakzeta inhau kan nei meuh lo. Min dawhtheiin min duat em em a, a chhungkuate pawhin min ngaihsak em em bawk.

Ka phone riin min tiharh a, darkar 5 zet ka lo muhil ve tho, Ngaihzuala'n min lo call chu niin! Vawi thum lai lehnghal.

Eng pawh chu nise tihian ka'n sawi fiah lawk ang e, a pahniha ka sawi pawlh nuai avang hian in lo hrethiam lo palh ang tih ka hlau.

Ka pasal tur thi ta kha Lalngaihzuala a ni a, u Ngaihzual tiin ka ko ṭhin. Tuna ka tawn sabawp hi Lalngaihzuala tho ni mah se, 'Ngaihzual' tiin ka ko thung. Tikhan u Ngaihzuala tia ka lam chuan a thi tawh hming kha a ni a, 'Ngaihzual' tia ka lam tawp erawh chuan tuna inremsiamna ka neihpui pa hi a ni tih in lo hrethiam mai dawn nia.

Ngaihzuala phone call pawh pick ta lo chuan ka tho chhuak a, ka nuin eirawng a lo bâwl a, ṭawngkam khat mahin min be lo.

"Nu.." tia ka koh veleh muangchângin a rawn inher a, chîk zeta min en hnuah, "Bawihi, thla thar aṭangin i hna zawm ang che, hetianga duhdah taka i tâl hi en liam a harsa em mai, ka thinlung i ti nâ.." tih pahin a âwm a dawm vang vang a, nuam ka ti chiah bik lo.

"Nu, thil pakhat chiah ka dîl che anga i phal chuan i duh angin ka awm tawh ang, ka hna pawh kal zawm ka tum dawn nia," ka ti ta a.

"Sawi ta che..." dam thlapa tiin ka mitah min en a, tlem chuan ka tîm deuh.

Khuh kharh chung hian, "Vawiin leh naktuk chiah hi zalen taka ka ṭhiante ina ka awm min phalsak la, zan pawh ka riak ang, a bâk zawngah chuan nunphung pangngai zawh ka tum tawh dawn nia.." fel fai zeta ka tih chuan a thaw chhuak hliai a, "Tu i ṭhiante maw..!?" Tia min zawh chuan, "Ka College kalpui ṭhin a nia, Ngur-ah a lo zin a," tiin dâwt ka sawi ringawt. 

"Ngur-ah chuan i va kal ang maw?" A ti hâ a, ka thusawi a awih chiah loh hmel!

"Umn..Ngur ah kan kal dawn a, zanin leh naktuk zan chiah kan awm ang a, chu chauh chu min phalsak rawh aw," tia ngenna mitmenga ka en chuan a ngawi rauh rauh a, keiin ka lo tur sek thung.

A tawpa tawpah chuan, "Tun chauh ni tawh rawh se, i va rui kual mai mai dawn lo a nih chuan ka phalsak ang che, hei bâk hi chu hetiang thil hi min dil nawn tawh miah suh, pâ tel lova ka enkawl che u in ni a, i pa thlarau tal zah ve ang che aw, Ngaihzuala han thi kher kher hi chu i nun a chhiat phah vek zawng a ni e, a pawi em mai.." a ti tlawk tlawk a, ka thaw chhuak huai mai.

Chumi hnu chuan tûkṭhuan pangngai takin kan kîl a, Ngaihzuala pawh whatsapp aṭangin chanchin ka hrilh tawh bawk. Thu danga min chhâng tam lo hian, "I hâkthlâk tur chiah rawn keng la a tawk." tih ringawtin min rawn chhang a. Zawhna ka zawh belh bik lo.

Ka insiam chhungin ka nuin min zilh leh mial mial a, tun ṭum chu pawisa min pe ve teh tlat. "Ka phalna thlapa kal i ni a, fimkhur hle ang che, mipa lakah rinhlelhna che ka nei hran lo nain zu mawlh mai hi a ni, a ngawl i vei ka hlau teh a nia," a la ti hrâm.

"Tun chiah tih ka sawi chu..." ka ti hlar a, min chhâng zui ta lo.

Ka insiam peih thlap a, thil tam ka keng lo. Kan awm dan tur ka hriat rûk kiau avangin ka hmela a lan chhuah loh nan inthup ka tum ve hle a, ka nu ngaihdanah chuan zu in char char turah min ngai, mipa ka nunah a tel tih a ringhlel chhin lo hi ka vanneihna pakhat a ni.

Lalngaihzuala chuan min lo nghâk reng tawh a, Car a rawn keng turah ka'n ngai deuh ngawt a, tun ṭum chu Bike nen min lo nghâk teh daih a, ka hawihai deuh...

Denim Jacket dum dak hlarh a inbel a, a hnuaiah Shirt vut buak rawng leh Jean dum da lam nen a rawn inthuam a, Helmet full face a khum vangin mihrang chuan tunge a nih an hriat kher ka ring lem lo. Kei pawhin hmundangah hmu ila ka hre kher chuang lo ang.

"Hawh le, duh aiin kan tlai det.." a ti sup a, îhe lovin Bike-ah ka lawn ve nghal a, kan kalna tur lam kan la sawi chhin lo. Ka nu hnena ka sawi 'Ngur' tih vel te kha chu ka phuahchawp mai mai a ni.

"Valtea inah khan i thawmhnaw hi dah ila, vawiin chu kan chhuak thawveng dawn nia, nileng em emin naute siam hna ka thawk peih bik lo," tiin a nui hawk hawk a, nimin ang lo tak khan vawiin chu a zangkhai hmel deuh.

"Bike hian em ni kan kal dawn?" Ka lo ti a.

"Valtea Bike a nia, Car ken ai chuan nuam i ti zawk daih ang," a ti ṭha ve mai.

A ṭhianpa inah ka thawmhnaw ken tlemte chu kan dah a, "Kan kalna tur hi darkar thum tlan vel a nia," tia min hrilh pahin zu bawk a in leh ta. "Kal lam aṭanga in ṭan chu a va ṭha lo e," tia ka lo khak zeuh chuan, "Hlauthawng suh, ka in tam dawn lo," a ti leh mai a, a sawi ang tak takin a in tam lo rêng bawk a, kei chuan far khat mah ka in lo. Zuheh ka ni tlat lo a, ka khawharna leh lunglenna min chhâwk zangkhai theia ka hriat vangin ka in a ni mai a, tunah chuan ka khua a har lo miau a, in tumna rilru ka pu ve lem lo.

Lalngaihzuala taksa thlâwp zaihin Bike-ah ka chuang a, a taksa lumna ka tem pha hial. Mipa ṭawng tam a nih loh bâkah kan inkárah eng thil danglam mah a awm bawk si lova sawi tur a vâng ve em asin.

Dârkâr khat vel kan tlan ta maw tihah ruah a rawn tla ṭan a, chawlhna tur mai kan hmu si lo, khaw kâr kawngah kan awm tawh a, "Bawihi, kan piah deuhah sawn thlâm pakhat a awmin ka hria chulai hmun chu tlan thleng law law mai ang aw.." tiin a ṭawng lâwng lâwng a, a sawina lai hmun pawh ka hriat ve si loh. Ka lo 'umn e' vel mai mai a.

Champhai hi ka chhuahsan khât ve a, bâkah chutiangin thlâm a awm leh awm loh pawh ka lo ngaihven ngai lo reng reng ve bawk a, ruah lah a tla tam telh telh mai si, a car te kha ken ve mai awm tak a nia, tih ka lo ngaihtuah daih.

Minute 10 dâwn kan tlân leh hnuah a sawina lai hmun chu kan thleng ta a, thlâm ṭha tak lian lem lo a lo awm ngei a, kawngpui aṭanga pèn ve hlek a ngai a, bike erawh a tlan lut thei lo thung, a piah deuhah chuan kan ding ta a, ruah pawh a sur tam ngang mai. "Hawh le.." tihpahin ka kutah a chelh a, thlâm awmna lamah min tlanpui ta a, ka huh hman nual.

Mahse, tawmhulna tur atana kan pan thlâm chu a lo inkalh vek a, Tala lian vak lo a inkhâi a, ka hrilh a hai angreng.

"Kal leh zawk mai ang, kan lut thei dawn chuang si lo a, ruah do te chu a nuam alawm," ka ti ve ngial a, kiai suk chung hian, "Lo lungngai lo la, ka hawng thiam alawm," a la ti zui.

Awih lo zet hian thlâm bang pawnlam nghêngin ka ding a, Ngaihzuala erawh chu ruahsur hnuaiah a va kal chhuak leh rih a, lungtum lian vak lo a rawn keng phei bawk a, "Naa, eng atan nge i tih a?" Tia ka zawhna chu, "Hetiang hian awlsam deuhin ka hawng thiam," pawh-lah zeta tiin Tala inkhai chu a chhu ta a, vawi thum zet Lunga a chhut hnuah pawh a la inhawng ta chuang lo!

Nui hak hak chung hian, "A awlsam lo tawp a nih kha, kal mai ang," ka ti leh a, "Hostel-a kan awm lai chuan hetiang hi kan chin dan a nia lawm, i beidawng hma lutuk," a la ti tak deuh deuh a, a thiltih lai a ṭhulh phah der lo.

Kei erawh ka hlauthawng ru zek zek a, a neitute an lokal ang tih mawlh ka lo hlau.

Vawi thum dang a chhut leh tlauh tlauh hnuah a hawng thei ta. "Rinduhawm, lut rawh le.." tiin a lung ken lai a paih a, a hmela intih theihna rawn lang chhuak chu a naupangchhia tawp. A nui lek lek a, a landan danglam zet chu a inhre der  bawk si lo.

Thlâm chhung fai zetah chuan kan inzui lut a, a Rucksack ah lai dahin thlâm chhuatah a ṭhu duai a, a bulah min ṭhut tîr ve mai bawk a, "Helai hmunah hian kan duhthusam engkim a awm dawn lo; mahse, duhthusam awm lohna hmunah duh thu kan sâm thei aw.." tih pahin a bag a hawng a, Whisky ûm khat leh ei tur eng eng emaw a rawn phawrh chhuak a, ka lo meng buai nak mai.

"Lalngaihzual..." ka'n ti deuh hluai a, nui ruh ruh chung hian, "Ka hmingpumin min ko lawl lawl suh.." la nui reng chunga tiin ka in tur min pe nghal a, "I hmingpum avanga hnaih che ka ni alawm," ka tih chuan, chîk zet leh thutak zawkin min en a, ka lâi titih. Rui lo hai lova ka awm chuan hetiang mizia hi ka nei ṭhin rêng a ni. 

"Bawihi, pasal neih tumna pakhat mah i nei tawh lo tak tak maw?" A'n ti ṭha leh a, "Umn....u Ngaihzuala kha ka zawng zawnga ka hmangaih leh duh a ni a, mipa dang tan ka thinlungah hmun a awm tawh lo, thinlung pakhat chauh ka nei si.." tia ka sawi zawh rualin no khat ka tlâk pap a, ka hrawk a sa thla nghal ham ham alawm maw le.

Tihian pawisak nei miah lovin zu ka in ve ta tihna a nia. A hma zawng zawngah vawikhat mah ka la tem chhin ngai lo a, ka in ve ringawt hi ka chhungte tan chuan hriatthiam a har ngawt ang.

"Ka chanchin min zawt dawn lovem ni?" Tia min zawh chuan, "Aih, engmah hriat belh ka duh lo, helai hmuna kan awm chhung chauh atana inkawp kan ni a, engmah ka tan hriat a ngai lo, min hrilh duh suh.." ka lo ti tlang hmiah.

"Ngaihzawng ka nei tih i hrereng chung pawhin i pawmzam thei a nia, hmeichhe mak tak i ni..." ngaihtuah mûk hmel taka tiin a no ken lai a tuai a tuai a, "A nih i bialnu chu khawi ami nge, nangmahni khawiah nge in awm?" Tiin ka zawt ve ta zawk a.

"Aizawlah kan awm a, tuna ka ngaihzawng nen hian kum tawp lamah inneih kan tum, Champhai khua tho hi a nia.." tia a sawi chhuah tâkah chuan, "Ka hriat zawng a ni ang em le, hetia i awm hi a hria ang em?" Tiin ka zawt sek sek a, ka rilru a nuam thei chiah tawh lo. 

"Hre lovang, min ring tawka i harsatnaah ka pui che a ni mai a, a bâk rilru pelhé ka pu lo, mahse, nang nena hun kan neih theihna tura dâwt hrilh a ngai erawh pawi ka ti. Ani ngaihdanah chuan Aizawlah ka lêt tawh. Haw tawh angah min ngai tihna a nih ber chu," tiin ṭha tê hian min hrilh a, ka va inthiam si lo êm...

Ruah lah a bâng duh chai lo nen hetia kan awm reng chuan ka duh aia tam thil ka sawiin ani pawhin a sawi ang tih ka hlau a, a chanchin kimchang hriat ka duh lo hulhual.

Khawpui a ri dur dur a, keini pahnihin zu kan in miah miah a, "Tuna kan awmnaah hian i duh phawt chuan kan thil tih tur kha kan chhunzawm thei a nia, a hmun leh a hunah buai a ngai lo aw, i thianghlimna i hloh chhan mipa hian i duh pêk ngei che ka tum tur a ni dawn lawm ni?" bah naka tiin min ṭhut hnaih sauh a, a jacket hâk lai hlipin chhuatah a theh phei zui daih a, chutiang zelin a thawmhnaw dang leh a pheikhawk pawh a tlawh phelh nghal a.

Keimah zawk ka zak thar leh hnuhnawh vel.

Dimtein ka hmai a rawn chûl a, ruahsur thawm leh ka zu in hnathawh nen tihdanglamin ka awm ṭan. Amah hmachhawn thei turin min kuaiher a, ka mitah chiang lutuk tak maia min en hnuah, "Kei kher min thlang hi mak ka la ti..." ti supin a rawn kun hniam a, uluk leh dam fân raihin min rawn fâwp ta a.

Ka thiam ang tâwkin chhâng lêt mah ila, in-pro hleih tak kan ni. Ngaihzuala mipa rim faisar chuan ka hnar a verh zar a, a kut pawh a awm mai mai bik lo. Ka âwmbâwrah chûlin a hma aia uar leh duhthawh zawkin min fawp chhunzawm zel a, hmeichhia ka ni a, mipa a ni leh dawn ta nge nge e.

Khum nuam leh thil changkâng awm lohna hmun, Carpet phah chu sawi loh dâp chhuatah Lalngaihzuala ta ni turin saruak leh inhawngsain ka awm leh ta. Duhthusam awm lohna hmunah kan tisa mamawh inpe tawnin duhthusam dangin min nangching ta si. 

Hmangaihna tel lo, tisa induh tawnnain min chîm pil a, kan tum ram thleng tura kan beihna hian rah ṭha a chhuah dawn nge dawn lo tih kan hre phâk dér si lo.

A chalsam sei filawr bik rawn uaithla ka huikiansak rualin a hmel chiang takin ka en a, lungawina ka hmuh avanga ka chhungrila lawmna lo awm chu thup buai ka tum lo. Thaw halh chungin a nghâwngah ka kut pahnih ka suihzawma keimah zawkin ka fawp nawn leh ta. He hunah kher hi chuan a hmelṭha êm a ni. 

"Bawihi..." thâm ṭuaka tiin a thaw hawk a, ka sirah min kuah chungin a mu a, a lungphu dat dat ri pawh ka hre pha hialin a nia ka hriat.

'Drogma Seol' tia ka phun sap ri chu a hre pha lo a ni ngei ang, min zawt lo teh tlat.

"Hey, tho tawh la..." tih ri ka hriat veleh peih lo zetin ka meng chhuak a, thawmhnaw inbel thlap chungin ka kiangah Lalngaihzuala a lo ding reng tawh. Kei erawh ka lo pian chhuah hlima ka awm angin ka la mu kawm ngal a, ka zak buai vel peih tingtang tawh lo.

"Dar eng zât nge?" tih pahin ka ṭhu chhuak a, hetia ka awm lai hian pawnlam a thlir daih a, min en tawh lo hrim hrim. Hei ringawt pawh hi ka lawmna tâwk a tling. A polite hle tih ka hriat phah bawk. 

"Dár thum a ri ṭep a, kan haw dawn nge kan la kal leh dawn.." tia min zawh chuan, haw mai ka duh thu ka hrilh a, "Nia, khaw awm dan a nuam lo em mai, Valtea inah kan awm zawk dawn nia, i ril a ṭâm em?" Tiin min zawt zui zat a, lu thing nâ nâ chung hian, "Eng mah ka ei châk lo," tiin thawmhnaw ka inbel pah mawlh mawlh a, ani erawh chuan a dan pangngaiin zu a in leh tawh.

A rûk tak chuan mak ka ti! Vawikhatah in tam lo mah se a in thei ve riau tih a lang reng.

Kâr lovah kan inpeih a, ka dâra kuah chung hian min chhuahpui ta a. Mahse, pawna mipakhat lo ding kan hmuh veleh Ngaihzuala a ding khawng luh a, min vawnna thlahin a phênah min din tîr a, kan hmaa mipa ding nen chuan an inhmachhawn ta a.

"Kawngkhar ka kalh veka engtin nge in luh theih?" Thinrim awki hniam ruiha titu mipa chu ka melh ṭha ngam meuh lo.

Ngaihzuala'n dam thlup hian, "Nia, kan tihpalh a ni, ruah a sur nasa tawh si a, tawmhulna tur kan mamawh bawk nen kan tichhe ta mai a nih hi, min hrethiam la Tala thar leina tur ka pe mai ang che aw.." tia chu pa a chhân chuan ka lo ngawi rân a, an inhau buai ang tih mawlh ka lo hlau. 

"A neitu phalna lova luh kha thil sual a ni..." chu pa chuan a ti hmuk a, mahse; Ngaihzuala chuan âwka dam tak hian, "A dik alawm, kan thiam loh a nia, Tala thar man chu kan pe ang che aw, min lâksak hram rawh," a tih leh hnuah chu pa chu a nui huk a, "Zu in neih chuan min pe ve rawh u.." a ti ta a, ka nui chhuak teuh a nia.

Chumi hnu chuan Thlâm neitupa nen kan pathumin kan inzui lût leh ta a, Ngaihzuala'n Tala man tur a pek bâkah kan pathumin lungawi zet hian zu kan in ho ta dial dial a, eirawng a bâwl pah a, a khât tawkin thingpui kan duh leh duh loh min zawt sek vei nen kan boruak a nuam ta phian.

Tlailam dar nga bâwr velah chuan, "Naktukah lokal leh rawh u aw.." kâi chhelhchhawlha tiin kan invai liam thei ṭâwk. 

Kan hun hman dan kha holam ang takin lang mah se a nuam ru lawi si. Chuti a nih rualin Lalngaihzuala duh aiin a rui ta. Amah lah chu a inla confi em em a, kei pawh ka bâng chuang lo nain ani ang êma rûi chhia chu ka ni lem lo.

Khua a thim ṭan tawh tihah chulai hmun chu kan chhuahsan ta a, sual lam kawng zawh hi chuan rilru hi a huaisen thei mawlh lo. Ngaihzuala phone a ri sek a, rilru a nuam duh lo viau bawk.

Minute 40 vel dawn kan tlân hnuah kawng khuar lai kan Lalngaihzuala'n a lo hmuh kân pek chu niin! Inrinlawkna hun awm miah lovin kan tlu ta a, a thim bawk si, amah lah a tho thei lawk bawk si lo.

Keimah ka tho chhuak a, eng mah nâ ka nei hran lo, Ngaihzuala pawh a rawn tho chhuak ve bawk a, kan pahnihin Bike kan tung ding a, chutih lâi tak chuan Rod phur Truck lian zet a rawn tlan a, a head- light in kan awmna lai a chhun chian êm avangin Ngaihzuala hmel pawh ka hmu chiang hle, han en rêng rêng pawhin a rûi tih a hriat hliah hliah a; 'kan haw thleng zo lovang ang a' tih thlengin ka ngaihtuah kâi hman.

Mahse, rin loh deuhin Bike-ah a lâwn a, "Hlauthâwng mah ta che, him dam takin ka thlenpui ang che," a la ti hrâm a, kei pawh thuawih deuhin ka chuang ve leh mai bawk a, amah rinna mak deuh ka nei zel hi a mak lehchhawng.

A sawi ang tak takin khati khawpa rui chhia anga lang si kha tluang takin kan thleng a, misual vanneihna a kal tluang a ni ber.

Valtea in kan thleng a, thil dang tikawi miah lovin khumah a let tawp a, biak zui tur awm miah lo hian a chatthla zui hmak. A phone lah a ri reng bawk si, pick-up sak tumna ka nei chuang bik der lo.  

A hnuah phei chuan ka switch off sak ta daih a, ka nuin min ngaihtuah dawn êma ka hriat avangin chanchin ka hrilh zuai a, "Mambawih, ka sawi kha hrereng la aw, zu i in khan nangmah leh nangmah i inti hrehawm mai mai a nia," tia min rawn hrilh leh hnuah insawi thiam pawh tum chuang lovin ka dah san ta rih a.

Ka inbual zawh hnuah ei tur eng emaw tal siam ṭhaa ka hriat vangin ka hmuh chhun ang siam awlsam tur ka dap khâwm zung zung a, mipa nena hetia han awm dun ngawt mai chu ka thinlung hian 'A dik lo' tih min hrilh nawn fo mah se, u Ngaihzuala min lâksaktu chunglama mi duh dana awm tumna ka neih phah chuang lo, ka rilru a hel a ni ber mai.

"Rinduhawm, hetah lokal teh..." pawr angreng taka Ngaihzuala'n min koh avangin hmanhmawh fe hian room lamah ka phei a, khumah a lo ṭhu a, min hmuh veleh, "Ka phone khawiah nge i dah?" Tiin min zawt a.

"A ri zing lutuka ka switch off a nih kha" tih pahin lukham bula a phone chu lain ka pe a; a lo ban rang ngei mai.

"Sangtei a ni tawh ang, nimin leh vawiinah vawikhat mah ka la be lo," a ti sup a, "Tikhan inbia ula, ei tur ka lo va siam ang e," tiin ka inthiarfihlim zui nghal daih.

'Sangtei' tia a sawi kha a bialnu a nih ka ring ve ringawt a, thîkna chhetê pawh ka nei lo, mi inkâr ṭha lai tibuai duh tur khawpa nêpah ka indah lo tepawh a ni mahna.

"Naktuk pawh ka hnaah ka buai dawn a, ka rawn be hman lo ang che, duh leh message i lo hnutchhiah ang a," tia Ngaihzuala ṭawng mawlh mawlh ri chu ka ngaithla reng a; keimah vangin dâwt a sawi leh ta. A hmangaihin a duh ve ngang a nih ka ring.

Kei pawhin ka hun liam tawh anih vangin ani hi ka hnaih a, an ṭawng dan leh an nuih dan thlenga inanna lai an nei leh zel te hi Lalngaihzuala min hnaih zual tîrtu a ni lawi si.

Chuti a nih rualin amah hrim hrim hi ka duhin ka va hmangaih hran lo. Kan dân zam anga awm kha ka tum ber a ni tawp.

Pangngai takin zanriah kan kîl dun a, "Sangteiin min ringhlel deuh a, hei leh chen atan ka lo awm ve tawh a, nikhat leh zankhat ka be lo a, a ngaihdan a ni lo a.." tiin min hrilh ve thlap.

"Ka awm avangin i biak ṭhulh phah duh reng reng suh, keini pahnih chu Contract-anga kal kan ni a, ani thlah phah nana kei min hman ka duh lo a nia aw, a rilru damna tur ngaihtuah hmasa zel ang che," tih pahin chaw ka bâr a, lem a har ṭalh ṭalh khawp mai. Ani thung chuan ka thil siam tui tih hmel takin a ei a, "I mak ve ngawt mai, nang ang hmeichhia hi an awm leh thei pawhin ka ring lo," a ti ve hial. 

"Ka tawn ang tawng ve emaw, keimah anga hmangaih châna nun beidawng ta an awm ve a nih chuan ka rilru ang hi an pu ve thovin ka ring, nang pawh i thutiamah ding la, kei pawh ka ding nghet ang," chiang fek fawka tiin ka tho chhuak nghal a, ka chaw ei a tui hlawl bawk si lo.

"I duhthlanna hian i beidawnna lak aṭangin chhan chhuak mawlh che rawh se," tih chiah a sawi.

Hemi hnu hian khumah inhlat fein kan mu a, zu in lam kan ngaihsak tawh lo a, mahni phone ve ve khawihin inbiak pawh kan tum lem lo, kan inhua tihna phei chu a ni lo a nia.

Ka mut a chhuah zui tâk avangin hám bái bâi chungin ka maimitchhing ta riai riai a.

Ka bân mu churh churh leh rit lûk avangin ka harh hlawl a, ka awmna hmun ka hre lo deuh dawn a, thaw ri sâk sâk ri ka hriat veleh ka mut dan siamrem pahin ka hawi kual a, min kuah chung hian Ngaihzuala tui takin a lo mu chu niin.

Hriat chian tum takin a hmel ka en a, a mit hmul dum buk ṭha tak te, a hnar ngul sâng ṭha tak leh a hmui chhah lam deuh te chuan a hmelṭhatna a ti chiang ka ti mai. A khabe hmul tlem a zuah a, a sam pawh enkawl uluk tih hriat takin a fai sar bawk.

U Ngaihzuala kha a hmelṭha ka ti viau ṭhin a, tuna ka bula mu Ngaihzuala hi hmêlah na na na chuan a ṭha zâwk daih. Mahse, ka thinlung neitu a ni lo ang chiahin han thlâkhlelhna emaw duhna pawh nise ka nei hran lo. Ka duh neihna tur hmanrua mai chauh a ni.

A taksa a inphut mawi hle bawk, a khawsak phungah chhungkaw harsa tak aṭanga rawn chawr chhuak a nih ka ring chiah lo deuh. Eng hna nge a thawh a, eng nge a tih ṭhin tih vel phei chu hriat tumna ka nei lo rêng rêng. Kan pahnih tân vawiin leh zanin bâk hun a awm tawh lo a, kan tawpna tur kan lo hnaih ta reng mai.

Ka lo muhil leh a ni ngei ang ka harh leh chuan a tlai duai tawh a, Ngaihzuala pawh a lo tho daih tawh. Choka lamah a ri rak rak a, min ngaihven khuchûk lo nain tuna kan awm dan hi a nuam ka ti pah ve reng.

Bawnghnute in tur a rawn châwi lût a, "Vawiin chu zu kan in lovang, harhfim kêk kâwkin kan inhmachhawn ve ngam tawh turah ka ngai a nia," tiin a nui suk a.

"I thawhna a rei tawh em?" Tia ka zawh chuan, "Ka muhil lai i duh tawka min thlir hnu khan ka tho ve nghal daih," a'n tiah. A va han chhe mai mai tak. Ka en reng tih a lo hriatna chuan min tizak viau, ka biang a sen vekin a nia ka rin.

Khumah a rawn ṭhu a, "Bawihi, zak duh mah ta che i Lalngaihzuala tluk zo lo mah ila, ani tana i lo vawn ve ṭâng ṭâng kha keimahin ka chang ta tih ka hriatna hian min tilawm asin." Thutak deuh zawka tiin ka kutah a rawn hûm a, "I natnate, i tawrhna te chhâwk zangkhai thei lo mah ila, hun reilote tal hi chu i tan ka awm ang," dam thlupa tiin ka kut a chûl a, chhân mai dan tur ka hre leh pek lo. Ka va nep ṭhin tak e aw.

"Tunah hian i duh angin nau lo pâi ta la engtia tih nge i tum?" Tiin min zâwt leh a, hei erawh hi chu chhânna dik tak pêk ka tum ruh hle.

"Ka lo rai ta a nih chuan ka hrilh dawn lo che a, i chanchin hriat zui ka duh lova nang pawhin min hre zui lo la ka duh bawk," tiin hmalam ngun takin ka en a.

"A pa hriat tuma min zâwt a nih chuan chhânna ka pe lo ang, pa a nei dawn lo tihna a nih chu. Pathian zarah ka dam anga fa pakhat enkawl ka huphurh lo," tia ka sawi lai mekin a thaw huai a, "Chutiang ringawt a ni thei lo, chanchin a chhia a ṭha hriat ka duh," a ti chang fak a, ka ngaihdan a pel det.

"Enteh, a tîr aṭangin kan sawi dun tawh a, a hnu leh awm lo tur ka duh vanga nangmah hi thlang che ka ni, helai hmunah hian engkim tawp rawh se, naute a lo awm a nih pawhin hmingchhiat leh mualpho ka huam a, ka ta tur a ni bawk, tumah an inrawlh ka remti dawn lo, i thu zûk hlek suh," ka ti ram hmak a, a ngaihdan a ni chiah lo deuh nge room chhungah a vei nghut nghut a, a hmel a dur khup bawk.

"I hma i sial deuh a ni, ka chuhpui ang che ka ti lo, amaherawh chu, nau i pai a nih chuan min hrilh ve hrim hrim tur a ni. Ka tibuai zui dawn lo che," a ti hmuk a, "Min tihbuai dawn loh chuan engmah hriat tum lo law law rawh, Phone hmanga inbiak zui pawh ka duh lo a nia," ka la tih zel avangin, a pen tawp chawt a, "Rinduhawm, i thluakah khan eng nge awm le, i mak lutuk.." a ti leh nghut a, a lawm lo tih a hriat hliah hliah bawk.

"Ngaihzual, helam hi chu sawi zawm tawh lo ang, inhau ka duh lo, a hunah chuan i hre em em ang," ka ti ve ta zâwk a, min chhâng duh der lo nia.

Rei fê ngawirenga kan awm hnuah, "Ni rawh se, a hmeichhia zawkin i duh tlat chuan dâl che ka tum lo, contract chu contract angin kal rawh se," a ti ta a. Ka lo thaw huai mai.

Hemi hnu hi chuan kan awm dan pangngai angin kan awm ve leh mai a, a lo sawi lâwk tawh ang khân zu pawh kan in lo. Harhfima vawikhat tal mut dun a duhna pawh ka dang lo a, vawikhat chu nupa nun kan hman leh tâk kha. Zahna em em pawh ka nei tawh bik chuang lova ani pawhin ka laka a lawm lohna dah ṭhain nui hmel min hmuh tîr ve leh ta.

Khawiah mah kan chhuak lo a, zanriah tur kan buatsaih dun a, ka rin ai daihin a che peih lehnghal a, keimah ka âwl letling zawk.

"Zanin hi kan hun tawp a ni a, naktuk aṭang chuan mahni kawng ve ve kan zawh tawh dawn avangin inhau emaw inhnial ka duh lo aw..Valtea a lo haw dawna kan sulhnu pawr a hmuha a hriat chhuah loh nan a theih ang ang ka tifel dawn nia," dam thlapin a ti a, ka rilrem zawng tak a ni.

Ni e, inremsiamnaah chuan mahni kuang lo nawr a rem lo a, dân hnuaia inkawp lailâwk kan nih angin chutiang chiah chuan kan awm mai tur a ni tih hi ka ngaihdan dik tak a ni bur.

A theih ang ang kan tih fel dun hnuah ka inbual hmasa a, ka zawh meuh chuan whisky a lo inchhawp leh rap tawh. Em em hian a!

Ngaihzuala inbual chhungin kei pawhin ka lo lem leh fe tawh a, ka in ṭan tirh âi ngawt chuan ka in adjust thei tawh zawk. 

"Inngaizawng chu ni ila kan inbual dun tur a nia," tiin nui lek lek chung hian no a rawn dawm ve leh a, "Ka ngaihzawng i ni lo nain min la ngai zawk mai thei a ni,'' ka'n ti ve ngial a, za zet hian a nui a, "A Rinduhawmi thlâk em mai..ngawi mai mai rawh," a ti liam puat ringawt.

Kan inzawmna chhan kan hrechiang dun bawk a, Ngaihzuala pawh a che âm hle, kan pahnih tan a tawpna tur a nih vangin zanriah eikham hnu lawkah intiam rual ang mai hian khum kan pan nghal a, "Seol dai thleng leh turin kan inpeih thlap".

Duhthawh leh chin tawk bithliah siam lova kan chêt dun hnuah inkuah chialin kan mu a, "Kan intawnna hmunin a zir lo nge keimahni hian kan zir lo zawk nge hetia kan awm dun ta mai hi ngaihtuah tham a tling a ni" tia a sawi pahin ka hmai a chûl a, chil lem khalh chung hian, "Eng mah Plan kan nei lo a, kan pahnih inkârah hian Setana a inrawlh thûk hle a ni ta ve ang," ka lo tih chuan a nui suk a, "Chutiang êm chu ni suh se.." a ti duh chauh.

Khua a vâr dawn hnai a, ka thluak a rawn fim ṭan a, Ngaihzuala mu meng reng melh zauh pah hian, "I kal a hun dawn hnai ta, chelh thiang lo mipa i ni a, hnunglam hawi lovin kal ang che," tiin zawite hian ka ṭawng a, ka mittui tla tur dan beh tumin mit ka khap fak fak a, khawharna leh mal intihna ka nei leh ṭan ta.

Ka âwmah a hmai a rawn phûm a, eng mah phei chu a sawi lo. Keimah zawk ka dik lo a, u Ngaihzuala hnuk chat tur hmel chiang takin ka mitthlâah a rawn lang iar iar a, Lalngaihzuala te pahnih hi ka ta tur an ni lo tih ka hriatna hian min ti na a ni ber e.

Vawilehkhatah ka mittui a rawn far zung zung a, ka kut hnunglamin ka hru tâwk a, thup tum eng ang mah ila, Ngaihzuala chuan a lo hre rang ngei mai.

"Bawihi, i ṭap elaw?" Tih pahin a rawn dâk chhuak a, mittui tling pam chunga ka mu chu min melh vang vang phawt a, chutah, "I ṭah chhan kha min hrilh thei ang em? ka tan a nuam miah lo a nia," a ti sup a.

"Ka nunah u Ngaihzuala a pawimawh angin nangmah Ngaihzuala tho hian pawimawhna i nei asin, tisa thil a ka zawm hmasakber i ni a, i kal a ngai ve tho si, kalsan tu nilova kalsan zâwk ka ni zel hi ka hrethiam lo..." tih pahin ka insût hraih a.

"Ka hrethiam alawm.." a ti leh mai a, mittui kârah amah ka melh a, "Keini pahnih hi chu inzawm tur kan ni lo, kan thutiam angin ding ang aw... " ka la ti ve fan a, ka sawi dik chiah bawk. 

Kan inkârah eng thil dang mah a awm lo. Zu leh Sex chiah a ni. 

Kan bul ṭanna ang chiaha a tawp kan khar a ngai tih kan hre dun ve ve a, inngaihzawnna lam rawng a kâi eih lo. Tisa inthlâkhlelhna satliah mai chauh a ni.

Mittui nena ka thlah liam kha u Ngaihzuala a ni a, tunah Lalngaihzuala vêk mittui nen ka kal tir a ngai leh ta. Mahse, ani laka ka mittui tlâk chhan erawh thil dang vang daih a ni thung.

Eng tin tak awm zêl ang i maw!?

B+>[BeckirafARenthleI]<+®®