3.DROGMA SEOL [A Becky Rafa Stories]

3.DROGMA SEOL

Ziaktu: Becky Rafa Renthlei

Kan inkârah eng thil dang mah a awm lo. Zu leh Sex chiah a ni. 

Kan bul ṭanna ang chiaha a tawp kan khar a ngai tih kan hre dun ve ve a, inngaihzawnna lam rawng a kâi eih lo. Tisa inthlâkhlelhna satliah mai chauh a ni.

Mittui nena ka thlah liam kha u Ngaihzuala a ni a, tunah Lalngaihzuala vêk mittui nen ka kal tir a ngai leh ta. Mahse, ani laka ka mittui tlâk chhan erawh thil dang vang daih a ni thung.

Eng tin tak awm zêl ang i maw!?

-B®® Stories

Ka ṭahna avangin ka mit a thîp hlur a, min kuah chungin a la mu reng naa a ṭawng chhuak lem lo. A ngaihtuahna hriatsak tumin a hmel ka en ngam lo hrim hrim a, nghet takin min kuah mah se kan rilru hmunkhatah a awm lo a ni mahna.

"Kalsan che mahila vawikhat chauh tal chu i chanchin hriat leh ka duh ang," zâwi fiah takin a ti a, ka thaw halh a, 'ka kuah tawpna tur pawh a ni maithei asin' tih rilru pu chungin ka kuah lêt a, "A tawp nan vawi khat dang kan tum leh chhin dawn em ni?" Tia ka sawi chuan a insiamrem zui zat a.

Khua a la var lo deuh. Mahse, hun tam kan nei tawh chuang lo.

Inhmu leh ngai tawh lo tur niawm taka min fawh mawlh mawlh lai pawhin amah thlâkhlelhna leh hun reilotê ka kianga awm leh tura ngen ka duh hial. Ka thinlungin ti tura min duh hi ka kâin a sawi chhuak hreh si a ni.

A saruakna zahpui hauh lovin a che chhuak leh ta a, tun ṭum zet zawng a dan a dang ta. A tawpna tur tak tak a ni tih kan hriat dun avanga duhthawh pawh a ni rêng a, tlangval fit leh hrisel ṭha tak a ni a, a duhah a chianga a tihtur a hrechiang em em bawk. Hei tak hi Lalngaihzuala danglamna pakhat chu a ni.

Ka mittui a tla leh ta, u Ngaihzuala kha chu mihring chelh din zawh rual lohvin thihna kut vawtin a man a, ani erawh hi chu mihring damlai a ni. Hun tiam neia inkawp kan nihna avangin chelh a rem lo a, nakin lawkah nupui a nei mai dawn, a hmasa zawk kalsana kei min vawn kha atan a rem lo angin mitthi tawh âiawhtu atan a ni hi ka lâk luh a rem hlawl lo.

Ka ṭap khûr ngat ngat a, dim leh duat taka ka mittui min hruksak lai pawhin ka la ṭap zel tho. Min thlêma min thlamuan tumna a nei hran lo a, thutiam chu thutiam a ni tia vawng tlattu mipa thinlung sak a ni tih ka hre ve tho.

Tin, ka sawi hmaih miah loh tur chu kan inkâr a hla lutuk hi a ni. Ani Aizawlah a awm a, kei Champhaiah, inngaizawngin lo inkawp ta tehreng pawh ni ila, kan tan thil a harsa em em tih kan hmu tlang ve ve a, chuvangin, a tîra kan thu zam ang kha kan zawm dun a ngai ve ve bawk. 

Hnunglam kan lehhawi thiang lo a ni tawp mai.

"Bawihi..." a tih rualin a hming ka lo lam ve chiah a, kan ngawi leh rih a, chutah, "Ka kal dawn ta, helai hmun hi i chhuahsan duh hunah Taxi ko mai rawh aw, koh tur i hria ang em, a nih loh pawhin Valtea ka bia ang a, in in thleng a dah thei tho che a nia," tiin a tho chhuak a, kei pawh ka ṭhu chhuak ve nghal bawk a.

Thlah ka ngaih loh thu leh keimahin ka haw ve thei tih ka hrilh a, "Vawikhat chauh tal i chin hriat ka duh ang aw.." a la ti hrâm a, ka lo bu nghat nghat ringawt.

Chumi hnu chuan a insiam zui mial mial a, han tihpui dan vak ka hriat loh avangin ka lo en tawp a, mipa thothâng ṭha tak hi chu a ni ve chiang a ni.

Lalngaihzuala a kal dawn ta.

Ka ṭhutna bulah a rawn kal hnai a, ka kutah vuanin min pawt tho a, rei vak lo min fawh hnuah min kuah zui leh vang vang phawt a, "Kal tawh rawh le, ngaihtuah ka ngai lo a nia," ka ti sap a. 

Mitmeng danglam deuh taka min en vang vang hnuah ka sam tuai zauh chung hian a inlahrang ta nghal a, mâwl hmel zetin ka lo en hau a, sawi tur ka hre tawh lo a ni ber.

Dimtein kawngkhar a rawn nem khar a, a Car tlan liam thâwm a reh fel hma chuan chêt chhuah zai ka rêl bîk lo. A hma khan chahbi dahna leh thil ṭul dang min hrilh a, eng mah zawh nawn tur îk a awm lo, ka ban phâkah amah a awm tawh lo bawk a, thaw chhuak hliai chung hian ka insiam ve ta a, khua a vâr fel chiah bawk.

Khawvel hi chu inṭhenna ram a ni a, thihna vang kher lo pawhin inṭhenna hi chu a awm tur a ni. Ka palbuak leh ka duhdana awm ka ni a, rilru na taka awm tumna ka nei lo hrim hrim. Kha hun reilotê kha kan pahnih tana chhinchhiah tlâk em em leh ropui a ni lo bawk a, na lo turah ka indah ve tawp.

Kan in ka thlenin a lo reh ṭhiap a, ka taksa a chau ve deuh bawk nen khumah eng dang mah ngaihtuah lovin ka mu hmak a, kâr lovah ka muhil ve mai bawk.

Ngaihzuala haw aṭangin nikhat leh zan khat a liam tawh a, biak tumna ka nei lova ani pawhin min rawn be bik lo. Ka nuin eng zawhna mah min zâwt lo a, min en chîk em em a, chuzawng chu a ni mai. Ka u Hmingmuana erawh chuan, "Bawihi, engtikah nge i hna i zawm dawn?" Tiin min zawt a.

"Thla thar veleh hian ka zawm ang, kâr hnih aia tam chawlh ka la nei," tiin ka chhâng a.

"I nun dan pangngaiah lêt tawh rawh aw, hetia i tâl mai mai hian a tuartu nangmah chiah i ni lova chhungkuain kan tuar tlâng a, hmalam pan tum tawh la ka duh khawp mai," muang ban charhin a ti a, ka u ka hmaizah hle.

"Ka tum alawm, ka chhuak tawh lo ang..." tih chiah ka sawi.

Min en vung vung a, "I kiu te, i khûp te kha a va pilh nasa ve eng ati nge?" Tia min zawh chuan ka in en nghal vat a, Ngaihzuala nen Bike a kan tlukna kha a ni tih hrilh hranpa ka ngai lo. Nui lui ngial chung hian, "Ka tlukna a nih hi, a na lo.." ka ti liam puat a, a na hran em em lo tak tak a, ka lo ngaihsak vak lo ve bawk.

"Tun chinah chuan chhungkuain kan tawrh theihna tur ang hi chuan awm tawh lo hrâm la ka duh, ka nu a khawngaihthlak em mai, Ngaihzuala pawh kha la dam se i awmdan hi a duh dawn lo, amah i hmangaih tak tak a nih chuan a dam laia a duh dan kha zawmsak i tum dawn nia," tia a sawi zawh hnuah a kal chhuak zui daih a, ka chhân thui a ngai lo hlauh.

Nilengin ka room ka tifai a, ka hna ka zawm leh dawn tawh avangin khawih neuh neuh tur ka nei bawk. 

Zu in leh tumna ka nei tawh lo a, Ngaihzuala nena kan awm dan pawh ngaihtuah loh hrâm hrâm ka tum ngar ngar, ka thawhpuite tih loh a hranpaa han kawm em em ka nei lo bawk a, ka khua a har ru ve deuh.

Ka phone ka phawrh chhuak a, u Ngaihzuala boral aṭanga a vawikhat nan Status ka dah chhuak ve ta.

"Ka kiu a pilh niai a, ka khûp a pem bawk. Ka hmui nise a rêp lo chauh bawka eng ka ti ta nge?" Tih hi inrinlawkna awm miah lovin ka va dah teh ngawt a, a va ho mai mai e.

Mahse, ka status rawn reply tu chu tudang ni lovin Lalngaihzuala a ni tlat. Phone number kan innei tawn reng chungin kan inbe eih lo tihna a nih ber chu! 

"Kei pawh ka ngalah pem ka nei" tih zawng hian min lo chhâng a, ka reply ta chuang lo a, a hnu minute tam pawh a ral hmain, "Lalngaihzuala hi ngaih ka hlawh lo hle mai.." a rawn ti leh a, chhân dan tur ka hre leh pek lo. 

"Biak tlang theihna tur che ka nei lo," tiin ka chhâng ve ta tho a, "Ka whatsapp-na kha view la, ka number dang a lo awm ang, khatah khan ka call tlang theih," a la ti leh zel a, thil thui tak sawi tur kan va nei lo si ém.

Ni e, ani nen chuan a tawp tawh a, inbiak leh tumna kan nei lo ka tih tawh kha aw...

Chuti a nih rualin min lo call thut a, ka pick ang nge pick lo ang tih ka ngaihtuah fe hnuah, 'Kan awmna hmun pawh a inang tawh chuang hleinem," tia mahni inthiam chawp chungin ka chhâng ve ta zawk a.

"Rinduhawm, min va ngai lo ve," a rawn ti a, "Ka ngaih leh ngaih loh che i hria em ni?" Ka tih chuan, "Kan awm dun dan chu kan pahnihin kan hrechiang ber a, mahse, biak hmasak ka hlawh lo," kha faka tiin a ngawi zui vang vang a, "Inbe leh tura thu pawtchat kan ni lo a, bâkah kan sawi tawh ang khan inbiak thar thawh leh a ṭul ber ka ti lo a nia," tiin tluangtlam tak hian ka chhang ve mai.

"Ka lakah eng mah inthlahrunna tur a awm lova min be duh a nih chuan engtik hunah pawh min lo call thei aw, inthlahrung miah suh ang che," tia min chah thlap hnuah kan inbiakna a ti tawp ta rih a, thu tam kan sawi lo, sawi tur pawh ka nei chuang hek lo.

Hemi hnu aṭang hi chuan ka whatsapp status rawn view zeuh zeuh a ching a, min be chuang lo nain min ngaihsak derna a tilang ka ti mai.

Ni a ral a, kan inkalsan aṭangin ni ruk lai a liam ta. Kei pawh nitin ka insiamrem chho hret hret zel a, vawikhat mah ka pâwn chhuak tawh lo a, zû pawh ka in ta lo. Inchhungkhurah ka theih ang angin ka nu ka pui a, kan boruak pawhin ngai a awh chho lek lek tawh a, ka tan chuan thla thar a nghahhlelhawm hle.

A chhan pawh ka thlatin hunbi ka neih leh neih loh hriat hlan ka nghâkhlel a, Ngaihzuala nena kan hun hman rah chhuah hriat ka châk a ni ber e.

Zan tîr aṭangin ka online ngat ngat a, phone khawih bâk zan lamah tih tur ka nei lem lo. 

Ka room banga u Ngaihzuala nen kan thlalâk dun ka târ chu ka melh tlawk tlawk a, "I thihna hian ka nunah nghawng a va nei thui ve tiraw, fa ka nei a nih phawt chuan a pa hmingah Lalngaihzuala ka tih dawn avangin i hming hi a dâi ngai lovang, i rila rah ni lo mah se i hming ang pu leh nangmah min hriatchhuah tîrtu mipa hian i hlimthlâ a hliahkhuh zo dawn lo a, ka Lalngaihzuala i ni zel tho ang," tia ka ngaihtuah lai tak chuan ka phone a rawn ri a, amah Ngaihzuala a ni teh tlat.

Tun hi kan vawihnih inbiak lehna tur chauh a ni a, atu ve ve pawh kan in umzui châk lo a ni ang e.

"Hello" ka tih rual rualin, "Bawihi i ngaihawm," hniam raiha tiin a âwki a dik lo deuh tih ka man nghal mai.

"Ngaihzual, i ṭha maw?" Ka ti liam puat a.

"Sangtei nen kan inkâr a ṭha thei tlat lo, min ringhlel a," a ti a.

"A zia lo hle mai, keimah vang a ni. Hetia min rawn biak zel chuan hriat chhuah hun a nei palh ang e aw, ka duh miah lo a nia, i dik lohnaah tlâwm a ngai a nih pawhin tlawm ngam la, a thinrimna tur siam belh lo hrâm rawh," tia dam thlapa ka chhân chuan, "A thîkthu a chhe bawr lawk lutuk a, ka thinlung a uire lo asin maw le," a ti zawi ruih a, ka khawngaih ang reng. Hetiang dinhmuna a din nachhan hi keimah vang a ni bawk si a, ka inthiam chiah lo deuh.

Khatiang inremsiamna pawm tlâk loh lutuk leh ka rilru let but kal sual khan thil a tihnawk tam ṭan tih a lang reng.

"Eng pawh nise keini pahnih tan kawng a awm lo a, induhna leh inhmangaihna pawh kan nei lo ve ve, chuvangin Sangtei lakah khan i rilru zawng zawng dah rawh.." ka'n ti leh tawp a, "Bawihi, inngaihzawnna tel lovin hun kan hmang dun a, vawikhat tal hmuh leh che ka duh.." thâm ṭuaka tiin a thaw hawk a, a sawi awmzia ka man chiah lo.

"Inhmuh leh nachhan tur kan nei tawh lo.." tia ka chhân veleh, "Tunah khan i râi nghal lo maithei, i tum i hlawhtlin theih nan vawikhat dang awm leh tum ila, a nemnghehna ni pahfawmin..." a tih zêl takah chuan ka ngaihtuah zui rauh rauh a, "Eng nge i sawi awmzia?" Ka ti héháw a.

"Ka hnaah min transfer a, ka zawm a la hun loh avangin hun âwl ka la nei, nang engtikah nge i hna i zawm dawn?" Tia min zawh chuan, thla thara ka zawm tur thu leh ka chhuah ngai tawh loh thu te, zu pawh ka thlah hmak tih ka hrilh ve ta a, nui hawk hawk chung hian, "A va mak ve...zu i in zui zel ka la ring a nia," a rawn ti a.

"A hun lai a zo tawh a, ka nu hnena ka intiam angin in leh tumna ka nei tawh rih lova.." tiin ṭha takin ka hrilh ve mai.

"Dik tak chuan ka la thlahlel che a ni ber, vawikhat chauh inhmuh leh tum ang," a la ti tak deuh deuh a, kei pawhin a nihna tak sawi duh chuan ka la kham lo a, kan inkalsan danah khan ka lung a dam zân lo. Khati khawpa awm dun ve si-ah chuan inthlah liam emaw invai liamna kan nei lo a, inhre ngai lo ang maia ka kal tîr kha a dikin ka hre bik lo a ni.

"Inngaihzawnna a tel tur a ni lo," ka ti sap a.

"I duh dan ka hria alawm, in khua kha i rawn chhuahsan thei ang em?" Tia min zawh chuan, "Ka nu leh ka u rilru hmin a ngai dawn a, Aizawl kal tur anga ka insawi chuan an phal ve maithei bawk'' ka ti ve ta a, ka â leh ṭan ta tih ka inhre reng.

"A nih chuan a hmaa kan contract ang chiah khan kan kal thei reng a nia, eng mah buaina dang a awm phah lovang, tum ang aw.." tia min nawr tâk sekah chuan ka phûr thar leh ta deuh. 

"Sangtei kha.." ka'n ti dêk dêk a, "Ani chu ka kutah dah rawh, nangmah berin i ngaihtheih chuan ani chu ka thunun thei," inringtawk takin a ti a, "Aw le, ka chhungte bulah chhuanlam tur ka lo zawng anga ka rawn confirm ang," ka ti ve ta a. Rei vak lo thildang kan sawi leh hnuah kan inbiakna kan titawp ta a, mak deuh maiin ka chhungril a hlim tlat, amah ka thlâkhlelhna hi a la zo lo tak tak a nih ka ring.

U Ngaihzuala thihna hian thil âtthlâk tak tak min ngaihtuah tîrin ka suangtuahna kha atakah chantîr ka tum ta zêl hi ka âtna leh ka tih dik loh a ni tih ka ngaihtuah thiam lo rêng rêng.

Ka nu leh ka u hnenah Aizawl kal an phal ngei theih nan chhuanlam tur ka'n dap khâwm ta tehreng a nih kha, kum li lai Champhai ka chhuahsan tawh lo a, zin chhuah tumna pawh ka nei ngai hek lo, â...eng ber nge maw ka han sawi tâk ang le? Heti ang kawngah hian dâwt sawi ka thiam lo ropui si, ka huphurh ru viau. Min man chhuah vaih chuan a pawi thui dawn em asin.

A tawp a tawpah ka hna chhuanlama zin dan tur kawng ka dap chhuak ta mial a, keimahin ka nui var var mai alawm maw le.

A tuk zingah tûkṭhuan kan kîl laiin ka nu bulah ka sawi chhuak ta a, tunkar chhung zawnga ka nun danah mark ka hmu ṭha thawkhata min phalsak ve mai ka beisei ru hle.

"Kal ta la, engtika kal nge i tum?" Tia min zawh chuan, "Vawiinah hriat chian ka lo tum ang a, naktukah ka hrilh mai dawn che nia," ka ti a, "I hnaah chiah i rilru dah la, nakinah a ngheta thawh dan tepawh a la awm ve maithei asin," tiin chaw ka duh belh leh belh loh min zâwt a, ka ei ve tâk nual hi.

Ka u pawhin hnialna thu a chhâk chhuak lo a, "U Ngaihzuala avang hian nat nawn tum tawh suh, i khawsak danah a nu leh pa beng a thleng rih lo hlauh zawk a, chuti ni lo se chuan i mualpho khawp ang maw le, an fapa i hmangaih vanga khatiang dinhmuna ding i ni tih an ngaihtuah miah lo ang, kan fapa kha a lo hmangaih ngai reng reng lo zawk a nih hi, tia an sawi che kan duh lo, i hmangaih tak tak a nih chuan u Ngaihzuala duhthusam tih hlawhtlin tum zawk ta che," tiin min hrilh nek a, ka lo ner nasa mai.

"Anni thusawi eng atan mah ka ti lo, vawikhat pawh eng nge i an i ṭha em? tih ka hlawh lo, a hlimchhawnah bâk khan min ngaihsakna an lan tír hleinem.." ka lo ti nghat nghat a, a dik chiah bawk.

Khatia a boral khan innei mai tawh tur kan nih avang leh Biak inah hial an puan tawh vang khan anni lam te chuan min ṭawng thlamuana min ngaihsak ve ka ring a, chutiang ni ta lo chuan kârkhat a liam ta maw tihah min be zui lo reng reng, kan inah an rawn lêng lo a, keimah zawk vawihnih ka kal lui hrâm a, mitmei ṭha pawh min hmuh lo. Min hua chu ka ti lo naa min ngaihthah hmin hmak tih ka hre ve kar.

Kha khan ka rilru a tina zual a, an fapa dam laia min duatna ang kha hmuh tur a awm lo, thlanmualah ka kal tam phah rêng bawk, "Kan fapa a awm tawh lo a, i hma lam hunah sawi theih kan nei lo," tiin ka rilru tur dâwn miah lo khan ṭawngkam an nei a, u Ngaihzuala vang chauhin ka chhâng lêt ta lo kha a nia.

Han ngaihtuah ve mah teh u, an mo ni mai tawh tur ka ni a, ka thuam chhawm tur zualpui pawh kan lei tawh. An inah lâwi lût chiah lo mah ila, an fapa nupui tur ka nih angin min thlamuana min hnem ve te ka beisei a. Keimaha tuar chhuak turin min thlahthlam ka ti lo thei lo. Hei hian alawm helna rilru min put tîr tlat ni. 

A vawikhat nan Ngaihzuala whatsapp aṭangin ka va be hmasa ve ta a.

"Ka nu te chuan an phal ka ring a, engtik hunah nge kan tum ang, khawi hmunah nge?" tih ka thawn nghal a, a seen rang ngang mai. Min rawn call zui nghal bawk.

"Bawihi, tun Friday lo awm tur hi kan tum mai dawn em ni ang, Sunday châm ta ila, Monday-ah kan haw leh nghal ang a," a rawn ti a.

"I tih dan dan a ni mai mahse, khawi hmunah nge kan awm ang a, a buaithlâk riau lo ang maw?" ka lo ti a, hmanniah kha chuan a ṭhianpa in kha a remchâng a, khatiang ang hmun ṭha leh hun ṭha kha a awmin ka ring bawk si lo.

"Lo lungngai lo la aw, keiman engkim ka ngaihtuah vek ang, chanchin kan inhrilh zel ang a," dam dapa tiin a âw pawh a zangkhai viau.

"Ka tum tawh chu ka tum tlat zel a, damlohna leh harsatna dangin min tlâkbuak a nih loh chuan ka rawn tum ang, contract kan pawtseiah inngai mai rawh," nghet charha tiin ka nui hak hak a, ani pawh a rawn nui ve tho.

"Mi rilru nghet tak i ni tih ka hria alawm, chuti ni lo se, i u Ngaihzuala theihnghilhin kei hi min duh tawh ngei ang, mahse, chutiang mi chu i ni lo, Sangtei laka ka rilru a danglam lo ang chiah hian nangmah ka en dan leh ka hmuh dan che a hrang hlak a nia," a ti a, thu khuh leh zêp ṭhen a nei bik lo. 

A bialnu chungchâng pawh min hrilh ve mai zel bawk a, hei hi a felna pakhat a nia, a duh phawt chuan, 'Ngaihzawng ka nei lo' tiin a inpha mar thei reng. A nihna dik tak tlang taka min hrilh hian ka lawm daih zawk.

Lalngaihzuala nen inremsiamna thar kan nei leh ta. Inngaihzawnna a la tel ta lo fo, kan tisa inthlâkhlelhna ti famkim turin Aizawlah inhmuh kan tum ta chu a ni a, kan tum a ruh dun ti ila a dik ber ang, eng thlarau sual hnathawh tak ni leh ang maw!

Ni thar kan chuangkai a, kan inhmuh hun a hnai telh telh a, zankhat chiahin min dang tawh a, a hmaa kan sawi dun kha chuan Aizawla inhmuh tum kan ni a, amaherawh chu, Ngaihzuala'n ruahmanna dang a rawn nei leh ta tlat.

"Aizawl khua ka ni a, ka hna leh kan chhungkua hrim hrim hi hriat hlawh pâwl kan nih avangin khawi Hotel emaw a awm kâwi mai mai kha a fuh dawn lo riau, ka mimal chanchin hriat i nei lo naa eng emaw palha hmingchhiatna awm thei a ni, Aizawl khaw chhungah ni lovin khaw pawnah kan kal dawn nia a pawi em?" Tiin min râwn thlap a, ka duh dan chiah a lo ni ve bawk nen, a dâwn hnaihah hmun dang inhmuhna tur kan dap chawp leh ta chûk chûk a, hetianga a rûka han tih kual vel hi a nuam vei phian.

Ka awm danah rinhlelhna tur eng mah a awm lo a ni tehchêk ang chu ka nu leh ka u pawh ngaihṭha takin an awm a, kan office-ah file lain ka han kal nghe nghe, min rinhlelh loh nana ti ka ni a, ka hlawhtling bawk.

Scooty-a kal ka ni a, ka lêt leh lamah u Ngaihzuala nu nen kan inhmu a, tlanpelh mai ka tum deuh kha a nia, mâwi chiah lova ka hriat vangin ka ding ta a.

"Bawihi, i lo lang khât hle mai.." tiin min lo bia a.

"Khawiah mah ka chhuak châk lo, theih nise thih ve daih ka duh.." ka ti sap a, tun ṭuma a hmel ka'n hmuh hi chuan an fapa thihna a tuar na hle tih ka hriat belh phah.

"Khatiang zawngin ngaihtuah mah ta che, rawn lên ve pawh hi ka duh a, mahse, i hmel ka hmuh hian ka fapa hmel a lang tel ṭhina a hrehawm em mai.." ṭap lek leka a tih tâkah chuan a hmaa ka rilru puthmang kha ka thlâk dâwrh.  

"Aizawlah zin lawk ka tuma chumi zawh lamah chuan lo len ka tum dawn nia, min hua emaw ka ti a.." ka ti niah niah a, "A teuh lo, kan fanu ang maiin kan en chea i tawrhna kan hrethiam a, hnem dan che kan hre si lo, thihna hi chu a tâwp chiang êm a ni," tih pahin min kuah a, "Tluang takin kal la, i lo haw hunah min rawn tlawh ngei ngei dawn nia," tiin min kuahna a thlah a, an ina len intiam chungin ka tlan san ta rih a.

Ka nu hnenah u Ngaihzuala nu nen kan inhmuh chungchâng ka hrilh a, "A sawi chu a dik chiah alawm,  a fapa nupui tur engkim tihfel vek tawh kha nikhat thilthuah ṭhulh fai vek a ni a, keini aiin an na zawk maithei asin, nang chu a dam zawk i ni a, i hmel hmuh an hreh pawh hi thil awm lo a ni reng reng lo," a lo ti dam thliam a, ka nu nge nge a thil thlir dan a zau ṭhin a nia.

Zan lamah ka thawmhnaw ken tur ka siam a, Sumo-a kal tur ka nih vangin thawh hma a ngai dawn bawk nen a rûk tak chuan ka huphurh viau. Lalngaihzuala ring tawk angin lang mah ila min ṭhulhsan ka hlau thar leh hnuhnawh a, ka rilru a nuam chiah bik lo.

Ani lah a reh zui vang vang a, a nihna takah chuan inbe ngai lo ang vel kan ni. Chhunah phei chuan chuti hlauh, kan inngai lo viau a ni mahna le. Mahse, inhmuh kan tum lawi si.

Ṭhenkhat ngaihdanah chuan 'a rinawm loh thlâk, a thihna a la rei si lova mipa dang han ngaihtuah leh te chu ka awih zâwng pawh a ni lo. Amah hian a lo hmangaih miah lo a nih hi' tih ngaihdan an nei ngei ang.

Mahse maw, tihian ka'n sawi ang e, ka Lalngaihzuala'n min awm lohsan khan ka khawvel a tawp ve chiaha hriatna ka nei a, ka innghahna; khawvela kan awm chhunga chhungkua ka dinpui tura ka thlan ka hmangaih ngawih ngawih a ni. Koh eih phâk a ni tawh lova a taksa leh lek phei chu engtikah mah ka dam chhung hian ka hmu leh ngai dawn tawh lo tih ka hriatna khan beidawnna khurah min hruai lût a, eng mah pawisak lohna lian tak ka neih phah rêng bawk. Ka khawvel a tawp miau alawm.

Min laksaktu chunglam dem ngam silovin Zû ah inhnemna ka zawng a, ka tlân a, chutih lai tak chuan, han en reng reng pawha u Ngaihzuala min hriat chhuah tîr nghal thei, an nui hmel leh lan dan inang zet, an pianni leh thla pawh thuhmun, an hming la inang zel mipa ka hmu thut kha u Ngaihzuala a rawn kîr leh ta angah ka chan tlat atin ni. Ka thinlungin amah a ni lo tih hre mah se keia rûi ngaihsam khan ka hmehbel a, hnaih ka tum ruh hle. 

Chuti a nih mêk laiin, u Ngaihzuala lak aṭangin engtikah mah fa ka nei ngai dawn lo a, mitthi tawh lakah fâ ka nei thei dawn em ni? Mahse, tuna Lalngaihzuala nen hian fa kan nei a nih ngat chuan a pa hming tur chu Lalngaihzuala a ni dawn tlat. He ka thurûk hi a ni tuna ka tawn thar Ngaihzuala hian a chhût thlen phâk loh chu. 

Aizawla kal turin ka inpeih thlap tawh a, zan dar kua a pêl fel awrh tihah Ngaihzuala hnen aṭangin phone call ka dawng a, "Bawihi, Aizawl aṭanga hla vak lovah kan awmna tur ka be fel tawh a, whatsapp-ah address ka lo thawn ang che, tikhan keimah min nghâk lovin kha hmun kha i pan ding nghal ang a, ka hrilh sa vek tawh aw," fel fai takin a rawn ti a.

"Min ṭhulhsan ang em?" Tiin tlaia ka rinhlelhna kha ka sawi chhuak ta nge nge a.

"A teuh lo mai, thihna leh damlohna a nih loh chuan ka tum nghet a nia, min ringhlel mah ta che," a ti a, ka awih ve mai bawk a, "I ṭhulh dawn a nih chuan Aizawla ka awm lai ngeiin sawi ang che," ka la tih hrâm avangin, "Rinduhawm, min rinhlelhna kha paih bo rang rawh, in call sek te a harsat palh tâkah i thlen chin min lo hrilh zel dawn nia," tiin min chah thlap a, ka ngaih a ngam ta deuh.

Ngaihzuala pan turin rilru ka siam fel a, kan kal kawng a va thui dawn si ve le. Amah hnaih duhna ka nei zêl mai hi keimah ngei pawhin ka hrethiam tawh bîk lo.

A tûk khua a var a, ka nuin min ngaihtuah ru em em tih ka hriat avangin, "Chanchin ka lo hrilh zel ang che," ka ti a, ka u nen min vai liam ve tâk hi. Fanu mal ka ni a, ka zin chhuak khât ve bawk nen min ngaihtuah pawh nise a âwm hliah hliah ka ti.

Ka zin kawng hi chu ka sawi thui tam lo mai ang. Whatsapp aṭangin kan awmna tur hmun min rawn hrilh tawh a, a sawi tawh ang khan keimah ka thleng hmasa ang a, ani tlailamah a rawn chhuak ve dawn chauh a ni. Ngaihzuala a fimkhur em em a, ka hmingpum pawh sawi lo turin min hrilh nghe nghe.

Dârkâr tam kan tlân hnuah Aizawl ka lut ve ta a, Counter kawtah Taxi-in min lo nghâk reng tawh bawk. Hei pawh hi ka thlen chin Ngaihzuala ka hrilh zel vang a ni a, ka tâlbuai loh nan a lo ruahman lâwk vek tih a sawi.

Muang khawtlai lovin Aizawl kan chhuahsan leh ta nghal a, driver pawh a fel hle, "Azuala khan a ngaihtuah lutuk chea i thlen hmaa lo awm turin min hrilh a, ka nghâk rei viau che a nia, 'Zote' tiin min ko mai rawh aw," a ti suam suam a, kei ai chuan a upat hmel zawk.

"Ngaihzuala ṭhianpa i ni em ni?" tia ka zawh chuan a nih thu leh an inkawm ngeih thu a sawi a, "Champhaia a kal sek nachhan hi i lo hmelṭha em atin ni," a'n ti ngial a, ka lo nuihpui vel mai mai.

Champhaia a bialnu angah min ngai tih ka hrethiam a, sawi buai ka tum duh bik ṭhak nâng.

Dârkar hnih zén záwn kan tlan leh hnuah Ngaihzuala sawina hmun Lodge chu kan thleng ta a; "Bawihi, inpa chu ka nghah chhuahpui lo mai ang che aw, ka lêt leh a ngai si a, ka tlai lutuk palh ang," nui vur vur chungin a ti a, chutih lai chuan Lodge neitu nge an Manager zawk ka hre lo a rawn chhuak a, min hmuh veleh, "Helai hi in room tur a ni a, chahbi ka lo pe ang che," nui sângin a ti a, ka lo bu nghat ringawt.

Zotea tlan liam hnuah nichina nu kha ka bulah a lokal a, Chahbi min pêk pahin, "Mamawh i neih chuan hemi number ah hian i lo call dawn nia," nelawm taka tiin phone number inziahna min pe a, kan room tur min kawhhmuh leh a, a nawm hmel khawp mai.

Lalngaihzuala'n min kalsan aṭanga kâr khat leh ni thumnaah chiah amah nen kan inhmu leh dawn ta. Thil mak an sawi zingah chhiar tel tlâk a ni hial ta ve ang.

Ka phone a rawn ri a, Ngaihzuala a ni tih ka hriat veleh pawnah ka chhuak nghal a, Main gate aṭangin ka awmna lam panin a lo phei mêk tih ka hmuh chuan ka lâi lutuk tlat.

Kan awmna inhlat deuh mah se amah a ni tih ka hriat avangin ka lo hlauhthawnna zawng zawng kha vawm bo ang duak a ni ta. A lo thlen hma loh kha chuan thin thiin ka awm thei lo reng reng, ka thlâ a muang thei lo a ni ber.

Nui suk chung hian, "A kawng a thui, a turtu a nâ," ti sup chung hian min kuah thuak a, "Duh aiin ka rawn tlaia min hrethiam rawh aw," tih pah hian a hmuiin ka sam a núl thuak a; a hmelṭha tak pawh a la pangngai reng.

"Him dam takin i rawn thleng theia a lawmawm," tiin kan room lam kan pan a, Bike a rawn keng tih ka hmuh rual khan kan inphurh lâwp lâwp laite ka mitthlâah a rawn lang nghal vek. 

Room chhung fai leh zau ṭha zet chu a melh kual a, "Thlâm âi kha chuan helai hmun hi chuan duhthu a sâm tawh zawk ang," tiin a nui ruh ruh a, Seol vawi tam kan dai thlenna hmun Thlâm a rawn sawi chhuah leh kher avang chuan zah avangin ka biang a sa ham ham thei alawm maw le. 

"Bawihi..." a ti leh sup a, min la hmu ngai miah lo niawm takin a nia min en chîk ni.

"Inbual la, kei chu ka inbual tawh," lai zeta ka lo tih chuan, "Ok..ka inbual chhungin hei hi i lo ti thei ang," tih pahin a bag aṭang chuan Whisky ûm a rawn phawrh chhuak a, Zû aṭangin bul kan ṭan leh dawn e. Mahse, in loh tumna ka nei chuang der lo, ani nen hun kan hmang dun dawn a nih chuan harhfima awm ka zuam lo a ni ber.

"Rinduhawm, i zak deuh em ni?" Tiin ka bulah a rawn ṭhu a, "Zak duh mah ta che, nang leh kei hian thil thar danglam eng mah tih tur kan nei hran lo, tisaah kan inzawm tawh kha.." inring tawk hmel taka tiin a nui lek lek a, "I chhe lutuk..." tih bâk sawi tur ka hre ṭhak nâng.

Ngaihzuala inbual turin a lût a, keiin Whisky in tur ka thli chhuak thung a, zin kawng ka zawh thui bawk nen rûi hnâpa ina muthilh ka châk ber. A no hnihna tur ka dawm laiin Towel veng chung hian a rawn chhuak a.

"Ka lo thlen hlim aṭanga ka tih châk tawh kha kan ti hmasa phawt ang e," tih pahin ka inrin hman hma hian ka hmuiah a rawn fâwp a, rei tak phei chu a ni lo, "Lalngaihzuala hian a bialnu thlimin Contract no.2 a zawm leh dawn a nia, kan ropui dun teh e.." tia nui suk suk chung hian ka no ken lai min chhuhsak a, a thâwk khat nghal hmiah. 

"Sangtei hnenah engtin nge i hrilh, helaia i kal tur hi a hria em?" Tiin ka zawt thut a, rang fahran hian, "Hrilh ka tum lo, tunlai chu kan inkâr a nghîng tlat, a ṭul chuan inṭhenna pawh a awm maithei," awlsam zeta tiin no a ban a, a in tur a thli chhuak a, ka no pawh min thlit khahsak leh diam tawh.

"I bialnu laka rinawm lo hmasa zawk i ni a, nangmah ngei hian in inkâr khi lai chu châr phui ang che, mipa tak tak i nih chuan..." ka ti nghat a, ner sawk chung hian, "Tun hi ka bialnu chungchâng sawina hun a ni lo, min ngai lo mah la kei chuan ka ngai che.." a ti sup a. 

A kut veilamin ka khabeah a rawn tuai a, "Nang leh kei hian kan duhkhawp kan la nei lo, inngaihzawnna awm lo pawh nise khumah na na na chuan kan inmil thlap," tiin khum zaupui chu a melh zauh a, "Ngaihzual..." tia a hming ka lam veleh, "Min ngai lo pawh ni la, Ngaihzual tia min koh hian engtin emaw tak keimahah danglamna a siam si..." tia a sawi zawh rualin a rawn kun hniam a, dam leh duat takin min fawp ta.

Thawchham dawna kan infawh hnuah, "Bawihi, zanriah ei hmasa lova khum lam panpui mai che ka duh.." hniam raiha tiin amah si chêtin min kuah hnai a, kuah lêt ve pah hian, "Hun tam tak kan la nei dawn alawm, inthun puar hmasa phawt ang," ka tih chuan thuawih takin a inthiarfihlim ve mai bawk a...

Zanriah ei hmain in tur kan dawm hmasa leh tê tê a, chumi hnu chuan sawi buai nei miah lovin dawhkan kan kîl dun leh a, engkim amahin a ruahman fai vek a, keia tan ngaihtuah buai tur eng mah a awm lo. Ngaihzuala bula awm nge nge a hahdam thlak ru riau.

Inbe lumlam vak lo mah ila kan boruak nuam leh zangkhai ru riau chu kan hrethiam ve ve a, mu tura kan inbuatsaih meuh chuan dár 11 a hnai kuar tawh.

"Kan contract thar hian nihnih leh zan thum a awh dawn a, chumi chhung chuan kan pahnih inkâr tihnawk thei leh min dîp dáltu eng mah insiam loh tur," Fiah faka tiin khumah a lawn a, min melh zuk chung hian, "Mu phawt ang le, i chau awm em mai," a'n ti ve ngei a(h)

Mipa dang nena tehkhin chi a ni lo Ngaihzuala hi chu a dang zar bik ti ila dâwt ka sawi tlêm khawpin ka ring.

Min kuah bet chial a, a bawp pahnihin min khuap bawk a, a taksa lum ham ham chu ka hre rang kher mai.

"Rinduhawmi hi ka kham thei dawn lo a nih ber hi, tuna kan kalphung ang hi tu emaw tak nunah a thleng ve tawh ang em le, keini pahnih inkâr hi chu a 'Cial' viau a nia, thil awm zen zen lo a nih ngei pawh ka ring," tih pahin ka thawmhnaw inbel lai min hlihsak a, underwear nen chauhva ka awm hnuah a thawmhnaw a phelh zui zat a.

"Sign loh contract hi a lo ṭha ber mai, intih vuivaina a tlêm a, inrem a awl zawk, i u Ngaihzuala luah lan tumna ka la nei lo cheu a nia, i thinlung neitu nih ka tum lo a, nang pawhin neih tumna i nei hek lo, kan taksa erawh hmun khatah a awm dun lawi si, Bawihi..." ti sup chung hian min rawn fawp leh ta nge nge e.

Ni e, tisa inzawmna kan nei hmasa a, kan thinlung leh ngaihtuahna inhre tawn ve ve kan nihna avang hian kan inkârah thîkthu a tel lo a, tisa danin kan kal mai chauh a ni.

Lalngaihzuala leh Rinduhawmi tisa inzawmna hian khawi hmun nge min hruai thlen dawn tih hriat va ni suh. 

Mihring thluak pangngai nei tan chuan hetiang inzawmna mak hi duha thlan chi rual a ni lo. Mahse, keini pahnih hian chu chu kan thlen tîr mêk si.

Hringnun a ni si a, kan thinlung kan thunun theih miau chuan a bâk thil dang kan mamawh belh rih lo. Kan taksa hmun khatah a awm miau alawm...

Note: He thawnthu hi episode 1 note-a ka tarlan angin a kalphung a dang daih dawn tih ka sawi tawh kha. Tun lai kan khawvel nunphungah hian thil thleng thei lo leh âwm lo anga kan ngaihte pawh a thleng zel a,   ruihtheih thil leh Sex a hluar  em em bawk a, a tawpa kan awmna tur tumahin kan hre lâwk ngai lo aw.. 

I chân loh khânah a chhuak mai lovang maw? A ngaihnawmna phenah eng nge zirtur awm tih in lo chîk ve hrâm hrâm ka beisei takzet.

 B+>[BeckirafARenthleI]<+®