4.DROGMA SEOL [A Becky Rafa Stories]

4.DROGMA SEOL

Ziaktu: Becky Rafa Renthlei

Ni e, tisa inzawmna kan nei hmasa a, kan thinlung leh ngaihtuahna inhre tawn ve ve kan nihna avang hian kan inkârah thîkthu a tel lo a, tisa danin kan kal mai chauh a ni.

Lalngaihzuala leh Rinduhawmi tisa inzawmna hian khawi hmun nge min hruai thlen dawn tih hriat va ni suh. 

Mihring thluak pangngai nei tan chuan hetiang inzawmna mak hi duha thlan chi rual a ni lo. Mahse, keini pahnih hian chu chu kan thlen tîr mêk si.

Hringnun a ni si a, kan thinlung kan thunun theih miau chuan a bâk thil dang kan mamawh belh rih lo. Kan taksa hmun khatah a awm miau alawm...

-BRR Stories

Lalngaihzuala nen inhmuh tum tawh lova thu kan pawhchah fel vek tawh hnuah tihian kan awm dun zui leh ta mai si a, kan thû kan zûka kan inngaizâwng ta tihna a la ni lo fo a nia. A hma aiin kan inkâr a ṭhat belh chuang lo angin a chhiatna sawi tur pawh a awm hran lo.

Tisa nawmna inpek tawna ka ruahmanna pakhat fa neih kha tihhlawhtlin ngei tumin ṭan kan la dun mai a ni. Thui tak lirtheia chuang ka nih avangin min dimdawi vei phian a, min ngaihsakna leh min duatna tilang vul chûk lo mah se, kan khuaa kan awm dun âi ngawt kha boruak a dang ta deuh.

"Bawihi, tlem tal muthilh tum rawh i chau lutuk ang, Sunday thleng induatna hun kan la nei a nia," tiin a diary a phawrh chhuak a, zu in in rui ṭhin pawh ni se mi invawng tak chu a ni ve hrim hrim.

A note bu kâwm uk kharh chu ka va hmu zuai a, khum mawng lamah ṭhuin eng emaw a ziak ni ngei tur a ni. Kei erawh ka meng lui thei ngang tawh lova inlet thak chungin ka maimitchhinsan ta a.

Mumang bo ṭhaka ka muthilh hnuah ka harh hlawl a, zan lama ka zu in effect avangin ka lu a ri tluk tluk bawk a, ka kiangah Ngaihzuala muin a muhil thaw sâk sâk ri chu ka ngaithla reng a, a bialnu kalsana ka hnen a rawn pan leh tlat hi mak ka ti lo a ni bik lo. A landanah phei chuan min duhna chhete tal nei ang pawhin a awm chuang bawk si lova mipa mak danglam tak chu a ni ve a ni.

Damdawi ka hmawm zauh a, ka lu na lutuk chhâwk nâna ei ka ni ber; ka'n ngaichâng deuh vang vang a, a reh theih lawk si loh avangin a vawikhat nan zîng zu ka inve ringawt! Ka lu na pawh chawplehchilhin a reh mial a, inbual tumin bathroom ka pan ta rih a.

Fai sersawra ka inbual hnuah ka sam ka hru thuak thuak a, Ngaihzuala a la tho ta lo fo! 

Mihring hi kan lo mak khawp mai, a mak zingah chuan kei ngei pawh hi chhiar tel theih ka ni bawk. Ngaihzuala muthilh lai chuan eng emaw ei tur dap kualin zu no hnih ka in leh hrâm a, kan pahnih chauha awm kan ni a, pakhat tui taka a muthilh hlana ruihsan kha ka châk tlat pek a nih chu.

A hmain damdawi ka lo ei khanglâng bawk nen chutia kawruaka ka'n in leh tâkah chuan a men hian ka meng thei hlawl tawh lo.

Ngaihzuala bulah ka inthawlh sawk sawk a, ani pawh a la mutui ngat ngat viau, thil dang tih tur awm lo ta chu mut kha kan hna a ni leh mai.

"Bawihi, inthing harh teh, a ni em em tawh lo," tia Ngaihzuala ṭawng ri ka hriat chuan peih lo fe hian ka meng chhuak a; ka hmai bul chêtah rawn kun hniamin, "Eng ati nge i damlo em ni? I harh theih miah loh a!?" Tiin ka puansin a rawn keu a.

Ka meng naa rei phei chu a ni lo, a ṭawng ka hre hla tial tial a, ka sam min chûlsak thâna hriatna ka nei bawk.

"Sunday ka châm ang tih ka sawi tawh kha, kan inkâr boruak khamawm lutuk hi ka hne a ni ber, i thu thu le," tia Ngaihzuala ṭawng ri ka hriat rualin ka ṭhu chhuak ve ta a, khua a tlai ruih tawh.

Tûkṭhuan pawh ei lovin ka zing zu in kha ka bantlang tih a hriat reng reng.

Veranda thlanglama Ngaihzuala ding thlêk zeuh chung hian ka tho chhuak ta a, ka sam pawh a ngai ngaiin ka chhipah a lo inbâwk a, a la hnawm deuh bawk. Khatia ka inbual zawh khan han khuih ṭhat ve îk pawh awm lovin khumah ka lawn ringawta ka harh chhin tawh lo hrim hrim.

Lukham sira a note bu dah chuan ka mit a la zar a, ensak tumna phei chu ka nei hran lo. 

Room chhungah a rawn pen lût a, a hmel a nelawm fahran lo, khum bul chair-a ka ṭhu chu min en vung vung hnuah, "Helai hmunah hian hun hlimawm tak hmang turin kan kal a, nang lah tukin zing aṭangin biak theih lohvin i awm char char a, eng nge a awmzia?" Tia min zawh chuan inthiam lohna rûkna ka nei nghal.

"Nimin ka Motor chuang kha ka chau deuh a nih ka ring, ka harh thei hlawl lo, tihpalh lutuk.." tiin hnuailam ka bih tlat a, a nuam lo ka ti ve deuh tak tak, niléng ṭhakin ka mut bosan a ni a, chu pawh a muthilh hlana zu ka inrûk vang lehnghal. Ka sawi chhuak ngam teuh si lo.

"Vawi tam tihharh che tumin ka ko chea min ti mangang alawm, i rawn meng a, i harh ve dawn tawh emaw tih laiin i chhîng leh nghal zel si a, Bawihi, nawmsam lohna i nei miah lo tak tak maw?" A'n tiṭha leh rih.

"Aih, ka ṭha reng, ka zin chhuak khât a, ka zo lo ve deuh a nih hi...thil i ei em?" Tiin ka zawt a.

A ei tawh thu sawiin, "Pahnih chiah kan awm a, nang lah biak theih loh, ka ning lutuka pawnah te ka chhuak thul, â..Rinduhawmi vangin ka tâlbuai mai dawn alawm.." tia nui suk chung hian, "Intifai la, ka hna ṭan ka duh aw.." tiin dawhkana ka zu in bâng la awm kha a thli chhuak leh a, khap pawh ka tum buai peih lo.

A sawi ang chuan thil tlêm ka ei hnuah bathroom ka pan san ta a, bathrobe nena ka chhuah phei laiin tukverh bulah a lo ding a, ka thawm a hriat veleh, "Hmelṭhanu.." zawi ruiha tiin min hnaih rüak a, ka kuta no hmehbel chung hian, "In rawh le, harhfimin eng mah i hmachhawn ngam lo tih ka hriatsak che aw.." a ti a, a sawi dik em avangin a hmuh lai ngei chuan ka in vei khalh a, mipa kianga ka zu inna hmasaber chu amah hi a ni a, vawi tam no kan dawm dun tawh avangin inthlahrunna pawh ka nei bîk chuang lo.

"Thawmhnaw inbel buai duh suh, kan mamawh dawn lo.." tia nui ruh ruh chung hian min rawn ban a, ka bathrobe suihna a pawt phelh a, "Keini pahnih tan thil uchuak a awm lo, hmangaihna chendun kan ni lo a, tisa thil vek a ni, chuti a nih rualin mite aia kan va nasat bikna a awm lo a, zakin inthiam lo duh suh, engkim kan tidunin kan inhriatsak tawn vek tawh kha..." inringtawk leh nghet churha tiin khum lam min panpui ta a.

Vawiin ni a a vawikhat nan tlailam dar li bâwr velah "Seol kalkawng" kan zawh dun leh ta.

Tun ṭum chu ruichhia ka nih loh avangin a hmel chiang takin ka en a, a taksa engkim hmuhhmaih ka tum bik lo.

A bân thahrui ngah tih hriat taka phiar fat mai chu a inbengkhalh avangin a bân bul pawh a sek ṭalh a, a hmaifang ṭha zet chu thlanin a bual hnâwng tho nain a landan danglam tak chuan min hîp kher mai. 

"Bawihi..." a ti thâm sup a.

Zak duh lovin ka lo en let ve kar, ani pawhin ka mitah chiang takin min en a, min duhna leh min thlâkhlelhna ang chi hmuh tur a awm chuang miah lo, a inthunun theih dan em em hi a mak zâwk.

Nawm chenna chikhat a ni tih ka inhrilh nawn a ngai hial.

A rûm dat a, nghet taka min kuah hnuah a inlahrang ve ta nge nge e. Kei pawh eng ti ve mang si lo hian ka lo hah ve ringawt, a ho ṭhin a nia...

Zanriah ei turin min kai tho a, a hun takah an rawn dah thlap thlap zel a, a order lai awm ka hre ve ngai lo reng reng. Puar taka kan ei hnuah pawnlamah inkai rialin kan chhuak dun a, "Main gate pelh loh tur, midangin min hmuh dun kher a ngai lo aw.." tiin Lodge leh a chhehvelah min teikualpui a, pa ṭawngtam lo tih takah sawi tur a van ve ṭhin a nia aw.

Zan lam kan hun hman dan pawh a ngai reng. Thil thar danglam tih tur a awm loh bâkah kan inbe mang lo a, a hma aia kan inpawhna sawi tur a tam chuang dêr lo. 

"I diary hi ka chhiar chhin châk..." tihpahin lukham bula a dah chu ka la a, ka keu châk zek zek nia.

Nui suk suk chung hian, "A va ho mai mai e, i chhiar te chuan a chi nâng.." a ti a, "Kan inkârah thup tur a awm chuang hleinem ngaihzawng i nei reng chung pawhin tihian ka la awm thei a nia, chuvangin he diary ah hian eng thil pawh inziak se, ka tan chhiar a hrehawmna tur a awm chuang lo," ka ti deuh tlat a.

"Chhiar ta poh che..." tiin zu bawk a in chhunzawm a, in thei ve ngar ngar tak a ni.

Ngaihzuala diary chu ka keu a, chipchiar tak chuan ka chhiar lo. Mahse, ka hming, 'Bawihi, Rinduhawmi' tih inziahna lai ka hmuh chuan ka en chiang a.

"Hmeichhe mak tak a ni, a rilru puthmang ka hre thiam thei ngai dawn lo a nih hi. Sangtei nen kan inkâr hrereng chungin inremsiamna kan nei dun a, hun rei atan a ni lo," tih vel a lo tháikâwi ve nial.

Hemi ni hi ka muthilh avangin ka tibo ṭhen nasa lutuka sawi theih alawi ka nei lo. Amah Lalngaihzuala sawi hi ka hriat chhun a ni mai.

Chutia diary ka lo bih ngar ngar lai chuan Ngaihzuala phone a rawn ri a.

"Ka lo tum dawn nia, mahse, tlailamah ka lêt leh ngei ngei a ngai dawn a nia," tia a ṭawng hmuk hmuk lai chu ka thlir reng a, ngaiven viau anga lan ka duh loh avangin khumah lawnin phone ka bihsan ve ta a.

"Bawihi, naktukah hian Aizawla lêt ngei ngei ka ngaia nangmahin i lo awm lawk thei ang em, dâr hnih velah lo kir hman ka tum ang a," tiin phone a hman zawh hnuah khumah a rawn lawn ve nghal a.

"A va pawimawh awm ve," tia ka zawh chuan, "Nia, hna thilah a ni a, ka kal ngei a ngaih vangin nangmaha lo awm chu i hreh viau em?" Tiin min zâwt leh a.

"Min bopil san dawn loh te chuan ka lo awm mai a ni ang chu, rei lo la..." ka ti ṭha ve mai.

Ka biang tawk zeuh chung hian, "Pawnah lo chhuak lo la, chhung lamah i inkalh hnan tlat dawn nia," tia a sawi zawh hnuin ka kâwngah min rawn kuah a, "Kan naute tur hetah hian a awm tawh mai thei a ni. Thlâma kan siam kha.." tih pahin a nui huk a, ka zak leh ringawt tawh.

"I ta tur a ni ve lo, keima ta tur liau liau.." tiin nui chungin ka chhâng a, "A ṭan leh dawn e, ka tel lovin a awm thei lo aw, ka thawh rah zawk a nia, nang te chu..." tia a sawi zawh hman hmain, "Lalngaihzual, muhil rawh i chhe lutuk.." ka lo ti a, "Aw le, aw le, zingkarah chhuah ka tum si a, muthilh tum teh ang," a ti ve ta zawk a.

Inbe zui tawh lovin kan ngawi zui ve mai bawk a.

Ka thlatin hunbi neih hun a hnai tawh a, hetia kan awm dun leh tâk hnu hian fa ka awhna a zual telh telh. Ka neih hlu ber ka pe a ni a, a lo thlâwna a ral mai mai ka hlau takzet.

Ka harh lehin khua a lo var fel vek tawh a, ka mutna ep chiah Sofa-ah Ngaihzuala ṭhuin pheikhawk a lo bun mêk a, khuh kharh chung hian, "I kal tawh dawn em ni?" Tia ka zawh chuan a rawn dâk chhuak vat a, "Umn..ka insiam zo chu a ni mai, tûkṭhuan pangngai taka ei tum la, ka sawi ang khan pawnlamah lo chhuak miah suh aw," tiin min chah nawn leh hrâm.

"Lo haw hma i tum dawn nia, mahni chauha helai hmuna awm hi nuam ka ti viau lo," ka lo ti a.

"Pawimawh hle lo sela chuan ka kalsan lo tur che a nia, kal ngei ngei a ngai si a ni," inthiam chiah lova tiin a tho chhuak a, dining table-a Juice inchhawp sa chu a inthlit leh tê tê a, tukin atan chuan zu a in lo ve teh tlat.

"Min ngaihtuah suh, puitling ka ni ve alawm, ka lo awm thei lutuk ang," ka ti ve ngial a, a rûk tak chuan mahnia awm ka huphurh hle.

Ngaihzuala kal tur Veranda thleng ka thlah a, lo haw hma intiam chungin ani pawh a tlan liam ve ta.

Mak deuhin ruak huai leh mal ta riaua inhriatna ka nei zui nghal a; ka nu leh ka u chanchin hrilhin ka call zui nghal a, "Mambawih, kan ngaihtuah lutuk che a, biak pawh theih reng reng loh mai,'' tiin a rawn phun hlak hlak a, ka awmna laiah signal a ṭha tawk lo tiin chhuanlam ka lo siam thung.

"I chhungkua aia thlan tur eng mah i nei lo tih inhria la, zu te kha in tawh hlek suh, Thawhṭanah rawn haw ngei ngei ang che," thupe aw taka tiin lungawi lo tih hriat deuh hian rum dat a, rei pawh ka be zui ta lo.

Tih tur engmah a awm bawk si lo. Zu in pawh tum ila no khat vel bak a awm tawh lo a, ka in peih tingtang lo a, Ngaihzuala thusawi zawm lovin room ka chhuahsan ta a, pawnlama ka kalh thlap hnuah kan room piaha in lian zet awmna lamah ka tei phei ve ta ringawt a.

Helai hmunah hian room hrang pali vel ka hmu a, luahtu an nei vek bawk. Atu amah kan inhre pawh lo a, tuna ka kalna in hi chu Restaurant niin helai hmuna thlengte ei tur lamna ber a ni tih ka luh rualin ka hre mai.

Tumah hmuh tur awm lovin a lo reh ṭhiap a. Ka hawi kual fe hnuah, "Tumah in awm nange?" Ka'n ti ve ngawt a, thlanglam kawngkhar a rawn ri rak a, mipakhat a rawn chhuak ta a. A sângin a hmelṭha viau mai, hnamdang rawng a kâi deuh bawk.

"Miss, eng nge i duh le?" Tiin dam thlap hian min lo zawt a, tui vawt in tur ka duh thu ka hrilh chuan, îhe lovin min pe vat a, "In tawm thei ngar ngar hle mai, in lo thlen aṭangin ka vawikhat hmuhna che a ni." Tiin nelawm tak hian a lo nui suk a.

"Nia, pawna chhuah kan châk vak lo a ni ang e," ka ti ṭha ve mai.

"I ṭhianpa kha khawiah nge a kal dawn a, i khua a har chuan helaiah kawm tur kan awm a nia," tiin ṭhutna tur min kawhhmuh a.

Restaurant chhung dai raihah chuan chupa nen chiah chuan kan awm a nih hmel.

Ngaihzuala kalna chin leh a lo lêt hun turte ka hrilh ve luam a, ka piah chiah single chair-ah ṭhut hmun a rem a, coffee ka in duh leh duh loh min zawt leh a, ka duh thu ka lo hrilh chuan, "Rammuanawma ka ni a, he lodge neitu hi ka ni e," tia min hrilh chuan ka ngaih ngam loh rûkna kha a kiang hawk mai.

"I duh phawt chuan nilengin i lo awm thei a nia, vawiin chu Bazar lamah ka tei chhuak dawn a, 12 vel hian kal ka tum," tih pahin a phone a bih zeuh a, Coffee tem hlak chung hian, "Helaiah bazarna tur hmun a awm em ni?" Tia ka zawh chuan, "Awm e, thil a chikim ve riau a nia, i lokal ve duh em, khatia mahnia awm ngawt ngawt ai chuan nuam i ti zawk daih ang, i ṭhianpa lo let leh hmain kan haw hmanin ka ring," a ti a.

"Nia, ka lo kal ve duh dawn chuan ka lo hrilh ang che," tih pahin ka tho chhuak a, "Ka kal phawt ang..." tih leh pen ka rual a, "Bawihi, i duh phawt chuan min zui thei aw..." tia ka hminga min koh tâkah chuan ka pen tawp chawt!

Rammuanawma hmel ka en a, midangin min koh dan anga min ko thei nghal mai hi a mak ka ti êm a ni.

Nui hawk chung hian, "Mak ti mah ta che Register-ah hian i ṭhianpa hming leh i hming a awm alawm, i hmingpum ka hre lo nain Bawihi tih chu ka hmu ngei," tia min hrilhfiah veleh nui var var chung hian, "Aw le, ka zui ve duh che leh ka lo sawi hma dawn nia," tiin min chhânna pawh nghak lovin ka chhuahsan ta a.

Ngaihzuala a reh vung vunga a thlen chin tal min lo hrilh ka rin tehreng nen a ngawi thei viau mai. Kei pawhin zawh tumna ka nei ve bik lo a, kan room-ah lutin ka online daih a, ni a rei dawn mang e.

A diary ka chhiar bâk zawng kha chhiar leh ka tum ta zawk a, a phal ta sa sa, a kut ziak felfai zet chu ka bih leh ta nge nge e.

Sangtei nen an intawn ṭan dan leh an awm tawh dan a ziak tam viau a, a ṭhenah phei chuan nuihna tur a tam ve hle.

"Ani hi ka nupui tur atana chunglamin min pek dik tak a nih chuan nghet taka vawn ka tum," tih angreng.

"Rinduhawmi duhawmna ka la hmuh hmaih ta fo" tih ka chhiar thlen lai chuan ka nui hak a, Lalngaihzuala hi mipa rilru sak tak a ni tih ka hriat phah bawk. Heti ang zât kan khawsaka kan awm dun hnuah pawh a tîra kan dan zam bâk a la pel eih lova rilru dang a pu hek lo.

Kei pawh ka chuti tho. U Ngaihzuala min hriat chhuah tir fotu ni mah se a lakah ka thinlung kawngkhar hawn tumna ka la nei bik chuang lo a, kan sak dun ṭalh ṭalh a nia. Mi luhlul pahnih kan intawng a ni ber.

Chawhma dâr 11 a pel duai tawh a, Rammuanawma min sawmna kha zawm mai ka duh ut ut tawh, mahnia awm reng zawng ngaihtuahna dik lo pui pui put a awl si, hreh zet chungin Ngaihzuala ka call ta a.

"Aizawl i lut tawh em?" Ka'n ti nghal tawp a(h)

"Lut tawh e, rawn hrilh che ka tum chiah a..min lo ngai tawh em ni?" Tia min zawh chuan, "Ngai lutuk lo e, i lo la lêt dawn loh chuan bazar lamah tei chhuah ka lo tum a," tiin Rammuana chungchang ka hrilh nghal a, a phal ve mai ka rin vang a ni. Ka duh phawt chuan amah hrilh lovin ka chhuak thei reng, ka va duh huam vang nilovin heti ang lamah hi chuan ka fair ve tlat.

"Aih, kal lovang, Rammuana tih vel zui ka remti lo, kal ka phal lo aw..." a rawn ti nghut a, "Enteh, Ngaihzual, a ninawm ve em a ni, i lo haw hmain kan lo lêt leh hman daih ang," ka la ti hram a, ngaihdan ni vak lo aw hian, "A ṭul lo, theihnghilh daih rawh, i duh leh ka diary te kha lo chhiar zo la, i inrin loh laiin ka lo thleng thut mai ang," a'n tiah. Awihawm loh thei a nia.

"I sual siah..." ka ti naa kal luih tumna ka nei ta lo. Ani nena hun kan hmang dun thei rih lo a nih pawhin mipa dang bula kal kher chu a remti bik chiah lo tih ka man thiam ve mai.

"Bawihi, min hrethiam rawh aw...ka lo haw vat ang," a tih leh hnuah kan inbiakna ka titawp ta a.

Rammuana awmna lamah ka phei leh a, ka kal ve dawn loh thu ka hrilh chuan, "Inpain a phal lo a ni maw? Ka hruai châk che asin maw le," nui kur kur chungin a ti a, ka lo nuih liam ve tâk kha.

Khumah ka mu ngil at a, ka nina ka nin zia hi sawi ngaihna ka hre lo zawk. 

Ka phone ka la a, hnai setsawtah ka in-selfie a, Ngaihzuala ka thawn hmak. "Hetia awm reng hi ka peih bik lo aw.." ka ti deuh khera min kalsan daih hi ka thin a rim lek lek tawh bawk.

Dâr khat pelhah min lo reply chauh a, "Ka rawn chhuak dawn chiah, lo tuar hram hram rawh," a ti ve ngial. 

"Ka kal a nia, bazarah chuan.." ka tilui leh kher a, a rawn call rang ngei mai.

"Rinduhawm, i kal lui a nih chuan ka lawm dawn miah lo a nia," a ti hniam chhak a, nêk luih chi rual a ni lo. Kan hun neih a tlem tawh si nen inrunluihna chi pawh ninghal lo chuan...

Ka lo chhing sek a ni ang, ka hminga min ko ri ka hre zui zat a, Ngaihzuala aw a ni.

Rang takin ka tho chhuaka room kawngkhar ka hawn rual rualin a rawn pen lut a, min kuah nghal chat.

"I kal lui ta lova.." a tih rualin a thaw chhuak hawk bawk. Ka kal tak tak a ring tepawh a ni mahna.

"Kal lo e, i phalna tel lova kal luih tumna ka nei lo," ka lo ti ṭha ve mai.

"Ka rawn thlâwk thla a ni ringawt alawm mawle," tia nui hawk hawk chung hian a bag aṭangin eng eng emaw a phawrh chhuak a, Whisky ûm hnih a la tel hram. Hepa tak hi chu aw..

"Hun kan nei tam tawh lo a, mipa dang bula kal turin ka duh lo che, midang i biaa min hlatsan duh a nih pawhin helaia kan awm tawh loh hnuah ni rawh se, thikthu ka nei thiang lo a, mahse, he hmunah hi chuan ka ta i ni, ka ta liau liau," tih pahin a shirt inbel lai a hlip a; "Ka intleuh zuai ang a, zu kan in ang," a ti hmiah.

Ei tur neuh neuh min lo hawn nial a, tlem tal chuan min ngaihtuah ve a ni maithei. Chu pawh ka rindan mai mai a nia.

Ngaihzuala inbual hlanin room chhung ka tifel thuak thuak a, a lo thlen hian tlailam dar li a ri tawh bawk.

"Le, kan ṭan thei e..." tiin whisky no khat pap min pe a, "In ve lo mai rawh" intih te chu a hla ve e . Ka in loh a hlau zâwk emaw tih mai tur a ni.

"Kan inkarah hmangaihna awm lo mah se kan inthlâkhlelhna a zawh raih thlenga chetpui che ka tum, min dâl suh aw.." a ti tlang hmiah a, ka lo bu ve nghat nghat mai.

Thu tam sawi dun tur hi kan nei lo êm zawk a, kan titi luam ngai lo ti ila a dik ber ang. 

Engtin nge hetiang hian in awm theih? Tih zawhna in nei maithei. A chhânna chu mahni tâwka chapo leh induh tawk ve ve kan ni a, kan dan siam chin bâk pela innêl kan tum lo. Ka tum ber zawk a laka fa ka neih theihna tura min puihna hi thildanga hliahkhuh tir tumna kan nei lo ve ve. Thutiam chu thutiam a ni ka tih tawh kha.

Zu kan in dun hnu hi chuan sawi tur tehvak a awm lo, kan tawpna pawh khumah zel a ni a, duhtawk leh khamkhawp awm lova vawi tam kan inthlâkhlelhna kan lantir hnuah Lalngaihzuala âwm nghengin ka bei chial a, ka rilru put hmang danglam hret hret pawh ka haider a ngai ṭan.

Thawhṭan zinga inkalsan tur kan ni a, a ruahman dan chuan ani a chhuak hmasa anga kei a hnungah, Taxi min biaksak sa vek a, ka haw leh lam Champhai ka thlen theihna tur pawh engkim a ngaihtuah fel vek tawh bawk.

A tuk sunday pawh khumah kan awm nilêng ti ila a dik ber ang, ei in tur leh inbual tur tih vel bâkin kan tho chhuak mang lo a, inngaihzawnna lam chi reng rêng kan pahnih kâ aṭangin a chhuak lo. 

Sangtei nen vawihnih khat an inbia tih loh chu phone a khawih meuh lo a, kei pawhin ka nu ka be ve zeuh tih loh phone mamawhna ka nei bik lo.

Misual pahnih, mahni duhdan dah lal ve ve awm dun kan ni bawk a, kan ngaihtuahawm loh teh a nia.

"Bawihi, Sangtei ṭhen ka tum deuh..." a rawn ti chhuak hlawl a, ka lo meng buai nak.

"Engvangin? A ṭul lo nasa ang aw, keimah avanga midang an nat ka duh lo a, ka inthiam lohna tizual turin engmah ti suh, tihian helai hmun kan chhuahsan rualin nang nen kan inzawmna chu a tawp leh mai dawna kan sawi fel tawh ang khan hmabâk thlir tur kan nei lo," tia duhthawh taka ka ṭawng mial mial lai chuan, min lo dang chat a.

"Inṭhen ka duh bik reng reng lo, ka thiam lo a ni tih ka pawm a, inṭhen a sawi pawhin ka dawh hram hram zawk a ni. I harsatna leh kei min mamawhna ka hriatchian em avangin ka pui che a, Sangtei thlauhthlâk tumna ka la nei chhin hek lo. Dik taka sawi duh chuan nang ka puih che avang hian thil dik lo ti ah ka inngai lova thihna avanga kalsantu che laka i natna tihdam ka duh mai chauh a ni." A ti ve duah a, ani leh ni lo anga a sawi thui ṭum ber a ni ang.

"Keimah vang vek a ni, inṭhen lo hrâm rawh u.." ka ti chhuak sap a.

"Rinduhawm, khatiang zawngin nangmah indem suh. Ka duhthlannaa he thutlûkna hi siam ka ni a, Contract ah chuan mipahnih inremsiamna a ni tur a ni, nangmah chauha siam theih a ni hleinem, fa pakhat tal i neih ve theih nana i hmanrua atan ka inpe a, i thianghlimna hlu tak min petu i ni, inthiam lo duh tawh reng reng suh..." a tih leh chuan, "A va hrehawm ve le, innei mai tawh tur innih phei chuan inṭhen suh u..." ka la ti ve fan.

Thaw hawk chung hian, "Inṭhenna a awm a nih pawhin nangmah vang nilovin inṭhen kan duh ve hrim hrim vang a ni ang," a ti nghet churh.

A thil rawn sawi chhuah avang chuan kan boruak a inthlâk hlawk a, zanriah ei hunah pawh kan ngawi dun reng a, a nuam viau lo.

Zan dar sarih a ri a, a phone a ri leh ta, naktuk maia inkalsan tawh tur kan nih avangin boruak ṭha lo neih a duh bik lova a phone a switch off daih. Ka khak duh lova kei pawhin a tih ang chiahin phone ka off ve bawk. Kha kha a nimai Rinduhawmi zia dik tak chu.

Khumah kan awm leh tawh a, zu pawh kan dan pangngaiin kan in leh hlek hlek tawh. Luak chhuakin min ṭhâm ru et et a, ka insûm nasa viau. Mahse, dârkua a rik chhoh meuh chuan tih takzetin ka luak ta a. Ngaihzualan min ngaihtuah hle.

"Zu in ve chi pawh i ni lo, thil i ei tlem si a, keimah ang turah ka lo dah ve ngawt che atin ni," tih pahin ka chalah a dawm a, ka luak chhung zawngin ka chalah min dawmsak ngar ngar a, chutia ka'n luak tak hrepah chuan ka harh deuh hawkin ka hria.

Ka inrin hman hmain min pawm nawlh a, khum lam min panpui a, dim taka min mut ṭhat tîr hnuah, "Darkar hnih khat muthilh tum la, i zia mai ang," dam thluama tiin ka sam min huimamsak a, u Ngaihzuala ka hrechhuak leh ta. Hetia min duatna leh min ngaihsakna hian u Ngaihzuala min hriat chhuah tîr zel zawng a ni e.

"Bawihi..." tia min sawi det dettu an awm avangin ka meng chhuak a, Ngaihzuala  aw tho a ni. 

"I zia deuh em, i muthilh daih chuan ka khua a har," tiin min kuah a, ka lo nui tawp.

Pahnih chauha awm tih takah khawhar kan hre hma dun hle. 

"Ka ṭha aw, zu chu ka in ve tawh lovang," ka ti sap a, nui ruh ruh chung hian, "A ṭha, i tana ṭha lo tur tilui duh tur khawpa hmeichhe â leh nikhua lo i ni hleinem," tiin ka ṭhut chhuah theih nan min pui a, lukham nghengin ka ṭhu âwn a, ani pawh ka kiangah ka ṭhut ang chiahin a ṭhu a, kawr ha lovin a nia a la awm ni.

"Zingkarah kan chhuak mai dawn nia, Zotea ka call tawh a, i hawna tur a la hla bawk nen tlai chhe lutuka chhuah kha a ṭha ka ti lo, tun bâk kan inhmu thei tawh dawn si lo a, kan tawpna tur tak tak a ni tih kan pawm a ngai a, chanchin inhrilh hriat erawh chu kan tum dawn nia," tia a thuphunga a sawi chuan engtin emawni tak ka lo awm. Ka sawi fiah thiam bik chiah lo.

"Nau ka lo pai a nih chuan ka rawn hrilh che ang a, a bâk chu inbiak zui loh kan tum dawn nia, min chuhpui dawn lo tih ka hria a, Sangtei nen pawh inrem hram intum dawn nia aw, in inkârah engmah inrawlh tumna ka nei lo a, ka rawn tibuai hek lo ang che u.." dam thliamin ka ti a, a lo ner sawk.

Tlema ka zia tak avangin theitui intur min siamsak a, mipa ta na na na chuan ka harh hmel a hmuh rualin beiseina a nei lehnghal mai.

"A tawpna tur atan vawikhat chiah ka taah siam leh che ka duh, i thei ang em?" Inthlahrung awka deuh hian a ti a, ka hnial duh teuh lo. A tawpna tur tak tak tih ka thinlungin a hria a, ka tho chhuak ve leh ta.

"Ngaihzual, tun ṭum chu a dawngtu ni lovin pe chhuaktu a ṭan ka tum a nia," nui var var chunga ka tih chuan angaihna hre lo hmel a pu deuh.

Mahse, ka thawmhnaw inbel lai hlipa ka awmna tur dik taka ka awm tâkah chuan maktih luat vangin a mengphar âwk a, "Bawihi..." tih chiah a sawi. A âwm leh dár ruak kûng chu ka chûl lawr dan dan a, mitmeng danglam tak leh phûrnaa khata min en chuan ka zah rûkna kha zah loh theihnaah a inthlâk ta chiah.

"Rinduhawm..." tia ka hming a lam zawh rualin ka kun hniama uar leh duhthawh taka ka fawhna chu min lo dawngsawng ṭha kher mai.

Zinglam dar hnih bâwr velah, "Hei mah mah Lei" tiin pumkhatah kan insiam zui ta a.

Kan hun tawn leh hmun a zira insiamrem hi mifing zia dik tak a ni.

Thil ri bengchheng zetin ka mutui lai min tiharh hlawl a, kan room piah lawkah motor tlan thawm a rawn awm a, chu chuan min lo tiharh chu niin!

Rang taka ṭhu chhuak chung hian ka hawikual a, Ngaihzuala hmel ka hmu mai si lo. Chhuata ka thawmhnaw tla darh nuai chu chhar khawmin ka inbel sawk sawk a, tukverhah ka dâk vat a.

Kan room piah deuhah Zotea leh Ngaihzuala an lo ding duna an ṭawng ka hre pha lo. Amah Lalngaihzuala tak phei chu a insiam peih diam tawh a nih hmel a, min kai tho lova a kal êm chu ka ring si lo.

A hnu deuhah amah chauhin a rawn lût a, ka tho tawh tih a hmuh veleh, "Ka kal a hun tawh a, i la mut tui em avangin ka nghâk leh rih che a nih hi," ti supin a hâkthlâk dahna bag zipper a zip ṭha mawlh mawlh a, tuna a lan danah chuan mihrang hlak a ni leh tawh.

"Ih...eng lo..." tia sawi chhuak ṭha ngam si lova ka ṭawng bah deuh nak lai chu min rawn en a, "Ih..Ngaihzual, zanin chiah kan awm leh thei ang em?" Tiin ka rilru min kap rengtu chu ka sawi chhuak ta a.

A ngawi vung vung a, a hnu feah, "A pawi ka ti khawp mai, ka kal a ngai si a ni, ka ṭhulh a rem tawh lo," a ti sup a, chutah a bag khaiin a chhuak vut a, Zotea Taxi-ah a va dah leh tê tê phawt a, amah Zotea tak phei chu ka hmu lo.

Lalngaihzuala kal tur hi ka thinlungin a phal tlat lo. Ka harh hlima ka hmuh mai loh lai pawh khan ka hrilh a hai a nia, min kalsan tur anga ka ngaihtuah phei chuan ka na ru sa tlat.

"Bawihi...min lo thlah ta che  ka kal dawn a nia," tia min biak pawhin ka la ngawi ngal a, ka chelh ngei tur a ni tiin rilru ka lo siam ve mek.

Mahse, theihtawpa ka chelha ka ngen pawhin a rilru a sawhsawn duh chuang lo. Nghet chet chawt hian, "Rinduhawm, a tawp kan thleng tawha kan thutiama kan din a ngai, i u Ngaihzuala ang khan thi tawhah min ngai mai rawh," a ti chang fak.

Chutah ka chhânna pawh nghak lo hian a chhuak zui nghal a, hmanhmawh lutukin ka ûm chhuak a, a Bike dahna a lo thleng fel hman der tawh.

"Ngaihzual, chawhma tal, nilenga i theih loh pawhin darkar reilote tal min awm pui leh rih rawh," tia ngenna mitmenga ka en pawhin, "A theih tawh loh hriatthiam tum hram rawh,'' tiin a hawisawn hmak a.

"A rei tawh lovang, ka chelh rei lo ang che..." ka la ti ṭâlh.

Heta a thu rawn sawi chhuah hi alawm ka thinlung tina em emtu chu...

"Minute khat lek pawh a rei ka ti tawh, ka kal a ngai," tih pahin ka kianga ding Lalngaihzuala chuan hriam hrâk hian min melh a, a lung a awi tawh hlawl lo tih hrilh hranpa ngai lovin ka hmu thiam lutuk tlat; mahse, a kal phal lovin chelh luih ka la tum ve fan tho.

A kuta vuan chung hian, "Kal rih lo mai rawh, i kal kher a ngai em ni?" Tiin ka melh chho hâ a, khua a lum si, a kalna tur a la hla hle tih hriatsak mah ila; reilote a kut vawn ka la thlahlel miau a; mahse, mipa a ni a, a thinlung neitu dik tak ka nih tlat loh avangin a kal lui dawn ta. 

En liam emaw thlir liam ka duh a; mahse, ka mittui avangin ka khaw hmuh a fiah lova; hmai hup chung leh awrâwl chhuah meuha ka ṭap ri chuan a thinlung a tawk che pha dêr si lo.

"Ngaihzual, kal rawh, kal ta poh che..." tia phun sap chung hian Veranda thlanglamah ka pen chhuak a, ka thlir liam thei thlâwt lo a ni ber. Ka âwmah hnawhtu a rawn awm a, ka ṭap chhuak leh ta nge nge e.

Ni e, ani hi ka hmangaih lo, ani pawhin min hmangaih bîk lo. Mahse, tisa inzawmna satliah nei tura thuthlung kan nih angin atu ve ve mahin hnunglam kan hawikîr thiang lo atin ni. Indem tur chuang kan awm si lo.

"Bawihi, hriatthiam tum rawh ka tih chu, tisa thil a zo tawh a, kan thuthlun dan anga kan awm a ngai," tia min rawn biak leh pawhin ka chhâng eih tawh lo.

U Ngaihzuala a kal tawh a, ani kha chu chelh theih a ni lo, tuna Ngaihzuala hi chelh din theih a la ni thung a, hun rei pawh ka ngen lo asin maw le; mahse, thinlung sak pu mi leh mahni thutiama din tum hi minute khat lek pawhin ka chelh khawtlai thei miah lo. A mak a ni.

"Kal la, hnunglam hawi lovin..." tih chiah ka sawi a, amah pawh ka en tawh lo hrim hrim.

Nia, a tlan liam tur chu parda keu kauin ka en leh hram a, ka duhna avang leh ka hmangaih vanga chelh tum ka ni bik lo a, a rilru puthmang dik tak hriat ka duh ve pakhat atin ni.

A chhânna pawh ka nei nghal a, atan eng mah ka ni lova mitthi ni silovah chuan mittuiin a koh din theih loh mipa a ni tih ka hrechhuak nghal bawk.

Rilru ka siam fel a, Champhaia haw tur leh vawikhat mah Lalngaihzuala kianga lêt leh tawh lo turin thu ka pawt chat ve hmak...

Ka thei êm ang chu maw.. minute khat lek rei titu tan ka thinlung kawngkhar hawn ka tum lo ruh sauh sauh thung...

B+>[BeckirafARenthleI]<+®