5.DROGMA SEOL [A Becky Rafa Stories]

5.DROGMA SEOL

Ziaktu: Becky Rafa Renthlei

"Kal la, hnunglam hawi lovin..." tih chiah ka sawi a, amah pawh ka en tawh lo hrim hrim.

Nia, a tlan liam tur chu parda keu kauin ka en leh hram a, ka duhna avang leh ka hmangaih vanga chelh tum ka ni bik lo a, a rilru puthmang dik tak hriat ka duh ve pakhat atin ni.

A chhânna pawh ka nei nghal a, atan eng mah ka ni lova mitthi ni silovah chuan mittuiin a koh din theih loh mipa a ni tih ka hrechhuak nghal bawk.

Rilru ka siam fel a, Champhaia haw tur leh vawikhat mah Lalngaihzuala kianga lêt leh tawh lo turin thu ka pawt chat ve hmak...

Ka thei êm ang chu maw.. minute khat lek rei titu tan ka thinlung kawngkhar hawn ka tum lo ruh sauh sauh thung...

-B®® Stories

Lalngaihzuala kal liam aṭangin minute tam a ral tawh a, ka rilru tâwt zualpui a reh tawh bawk. Zotea pawh room chhungah a lo lut a, "Bawihi, kan kal ve mai loh chuan a tlai zel si a," tiin inthlahrung dêk hian min rawn bia a, Zotea'n min nghâk tih lam reng reng ka lo ngaihtuah chang tawh lo.

"Aw le, ka'n insiam zung zung anga kan chhuak dawn nia," tiin ka che zawm nghal a, "Pawnah zial ka lo zu ang e," tihpahin a chhuak zui nghal daih.

A ṭhianpa nen kan boruak a ṭha viau lo tih a hre êm lo turah ngai ang.

Kâr lovah ka insiam peih vat a, Ngaihzuala nen kan mut dunna khum zaupui mai chu kut kuangkuah meuhin ka en vawng vawng a. A nawm chhung rei loh zia leh  kâr khat daih pawh hlimna min pêk loh zia ka hre chhuak chiang kher mai, nizan lawkah he khumah ngei chintâwk awm lovin kan sapatál a; darkar 24 a ral hma hmain mittuiin min hual vel si.

Hetiang huama pan ni mah ila, a tawp kan khâr dan hi a chhe ve thlâwt.

Minute thum vel khum thlira ka din hnuah room chhung ka melh kual a, engkim a ruak vek. Zu nen mipat hmeichhiatna nena kan tâlna hmun hi ngaih tumna ka nei lo hulhual. Mahse, mihring ka nih angin ka thil pal buak hi rût leh thei ka ni tawh lo tih ka hre chiang êm a ni.

Ani pawh a kal tawha kei ka kal a hun ta bawk. Zotea'n ka bag vel Taxi-ah a dah lut vek tawh a, chutih lai tak chuan Rammuanawma a rawn chhuak phei a, ka dinna bula lo din ve pahin, "I kal tawh dawn em ni Bawihi?" Tiin min zawt a, "Umn...ka hawna tur a la hla si a, muangchán chi a ni lo a..." tia ka chhân chuan, "I phone number min pe phal em?" nui lek lek chunga tiin min en vang vang a.

Ka number ka hrilh hnuah, "Tluang deuhin in kal dawn nia," a ti ve ngeia a fel viauin ania ka rin hepa hi! A nelawm khuchûk lo naa a hawiher a changkâng ru riau...

Lodge kan chhuahsan fel a, tukṭhuan ka ei loh vang nge ka pum a na riai riai mai. Zotea'n min biak pawhin a kam rûl tawk zel chauhin ka chhâng a, ka boruak tawn a fuh lo nen ka pum lah a na telh telh si. Keima thu phei chuan ka ṭawng hmasa lo rêng rêng.

Dârkâr khat dawn kan tlan leh hnuah ka pum a let but but a, luak chhuakin min hnawh up up a ni ber mai. Ka pum leh tâi bâwr vel a na ut ut vei nen ka thlanfim a tla bawrh bawrh a, a va han hrehawm tak.

Ka awmdanah zêp ngaihna ngang a awm tawh loh avangin Zotea chu ding lawk turin ka hrilh a, a ding ve mai bawk a, Taxi-aṭangin rang takin ka chhuak a, zah pawh a sawi theih tawh loh, chintâwk awm lovin ka luak leh ta a, Zotea hrihhai hmel kha a khawngaihthlâk zawk.

Ni e, ka awm dan aṭangin ka taksa zawh táwk aia tam zu ka in a, ka awm tawh dan chhûtin phunnawi ngam tur ka ni lo hulhual.

"I zia deuh em?" Zotea'n tui in tur min pêk paha min zawh chuan mittui parawl ṭeuhin kawng sîrah ka ṭhu a, ka thaw a hah lo chauh alawm maw le. 

"Bawihi, Azuala ka call ang aw..." a tih chuan zawitê hian, "Aih, ani tihbuai ka duh lo," ka lo ti thuai a, ka rilru dik tak pawh a ni, hrilh tumna ka nei dêr lo.

Tlema ka zia tâk deuh hnu chuan muangchângin kan tlan chhuak leh ta a, Aizawl kan lut lek lek tawh, Champhaia haw tlang tur phei chuan ka taksain a tlin dawn lo tih ka hre sa vek a, Aizawlah zan khat riah mai pawh pawi ka ti lo.

"Ka lo sawi ve tur a awm lo nain ṭhiana nen khan in inhau deuh em ni, a hmêl a dik tlat lo," tiin min zawt thut a, awlsam fe hian, "Inhau hran nang, zanin chauh châm leh ang ka tia a thei tawh si lova kan inhnial deuh a," ka ti ṭha ve mai.

"Azuala zawng a buai em a, a hna a thawkrim bawk si, tunhma ang khan keini pawh kan inkawm ṭha mumal thei tawh lo," a ti ve a, ka chhâng tawh lem lo.

Ka pum na a ziaawm ṭan a, ka luak chhuak erawhin min kiansan lutuk lo.

Ngaihzuala hnen aṭangin min ngaihvenna eng mah ka dawng lo a, ka thlen chin hrilh tumna pawh ka nei chuang bik lo. A ruahman dan kha chuan Aizawl ka thlen veleh chawhnu chhuak Champhai Sumo-a haw tura tih ka ni a, phone number pawh min pein min biaksak vek tawh; mahse, motor chuan leh ka zuam ngang tawh si lo a, driver biain ka ṭhulh fel der.

Ka nu ka bia a, "Thawhṭanah lo haw rawh ka tih kha, Bawihi, chhuanlam fahrah tê tê rawn hmang tawh suh, vawi eng zat nge thu ṭha ka hrilh dawn che," thinrim takin a ti a, "Nu, ka ti tak tak, ka pum a nuam lo lutuka motor chuan ka zuam ngang lo a ni," ka tih chuan, "I duh dan dan hian i awm a, Rinduhawm, ka ngaihdan a pel viau tawh a nia," a ti hmarh hmarh a, "Ka pum a na ka tih chuan a na a ni mai, ka zia deuh leh naktuk zing chhuakah ka lo haw ang," ti nghauh chungin phone ka dah daih a, tun ṭum chauh chu dâwt ka hrilh lo ve teh tlat.

Zotea hmai pawh zah zo lovin tikhan ka ṭawng bawk si a, a nuam lo ve det.

Ebenezer hospital-ah min drop turin ka hrilh a, "Zote, ka pum a nuam lo ema damdawi eng emaw ka'n ngaihtuah lawk ang e," ka tih chuan, "Ka lo kalpui ang che, inthlahrung mah ta che i awm dan aṭang khan ka hrethiam alawm," a lo ti awlsam êt a, hetia ka ṭawng mawlh mawlh lai pawh hian ka pum na a châwl mang tawh lo.

Thlanfimin min buala Hospital kan thlen meuh chuan ka taksa a chauin ka zawi vek a ni mai. Ka thluak fímin harh mah se, pumnâ nen luak chhuak nen ka fâwmkém vek a, ka tilui thei ngang tawh lo.

Zotea puihnain Ebenezer hospital-ah kan lût tawp a, ka rin phak bakin ka Bp a lo hniam bawk a, ka zu in luatah ka pum a na bawk a, ka chhungril tak chuan hrehawm a ti ngei mai.

Doctor in, "Tikhan drip bur hnih vel khai ve lawk la, injection pahnih khat ka chawh ang che," a ti a, Zotea'n lei ngai leh a ṭul ang angah min buaipui fai vek a, damdawi in khumah ka mu chu a ni der.

Ka duhthlanna angin ka kal lui ngat ngat a, mahni khua êm pawh ka thlen hmain a sawhkhâwk ka tuar ṭan der chu a ni ta.

Ka phone a rawn ri a, ka pick theih loh avangin Zotea zawkin min lo chhânsak a.

"A haw thei dawn ta lo a nih hi. Tunah Ebenezer hospital-ah kan awm mêk a,  ngaihtuahawm a ni lo nain a chau ve reuh a.." tia a ṭawng mawlh mawlh lai chuan mitmeiin 'Tunge' tih ka lo zawt a.

"Aw le, lo ngaihtuah duh suh, an khua thlengin ka thlah chho law law mai ang," tia an inbiak zawh hnuah min rawn en a, "Azuala a nih kha, a ngaihtuah viau che a nia, i haw duh a nih pawhin Sumo-a haw lovin keiman ka dah chho ang che aw," a ti dam thluam a, ka ngaihdan a ni vak lo.

"Kan inkalsan tawh a, ani min ngaihtuah ka ngai lo, ka zia deuh chuan naktuk zingah ka haw mai dawn alawm," ka lo ti a, min chhâng zui lem lo.

Ngaihzuala kal turin min ṭawngkhum dan kha ka thinlungah a châm reng a, nâ ka ti ru tlat.

Dârkar 5 zet damdawi ina ka awm hnuah ka pum nâ a zia a, ka luak chhuak reh fel lo mah se ka harh ṭha viau tawh, zan dar 8 bawr velah Zotea nen Champhai lam panin kan chhuak ta a, Ngaihzuala'n insenso a huam bawk a, tun bak ka tana insenna tur pawh a nei tawh dawn chuang lova ka tum dan hmasa thlâkin kan zan haw ta a.

Kan haw kawng leh a behbawm hi chu ka sawi thui lo mai ang, a chângin ka muhil a, Zotea nen pawh a ṭul tawpah lo chuan kan inbe lo.

Ngaihzuala nen kan inkalsan aṭang khan kâr a liam tawh a, vawikhat mah kan inbe zui tawh lo reng reng.

Ka kal hmaa ka intiam angin u Ngaihzuala te inah vawikhat ka lêng ve a, a nuin, "Bawihi, tunah chuan rilru dang put a harsa rih maithei a, mahse, ka fapa avanga i hma hun a chhiat loh nan ani kha chu hrereng duh tawh suh, kei chuan ka fanu ang chiahin ka en che a, i nat hi ka duh ngai lo ang," tia min hrilh chuan inthiam loh rûkna lian deuh ka nei a, Ngaihzuala nen kan khawsak dan ka ngaihtuah chhuah vang a ni pakhat.

"Nu Ramte, u Ngaihzuala kha ka tan engkim a ni a, hetia min awm lohsan hnu hian awm dan tur leh tih ber tur ka hre tawh lo, ka khawvel hi a ruak vek nimaiin ka hria," ka ti sap a, min hriatthiam hmel takin, "A la hlimchhawn ve a, kum te han vei se a dan a dang deuh maithei asin, keini chuan pasal nei pawh ni la kan lawmpui zawk ang che, a dama te hi kan pawimawh alawm," dam thlapin a ti a, kei ka lo inthiam lo tulh tulh thung si.

"Nia, tunah chuan ka hna te pawh ka zawm ve tawh anga nakinah damtea kan awm chuan a lungphun hunah ka tih theih tawk tih ka duh ve ang aw," ka tih chuan lainat hmel takin min en a, "Bawihi, i hmel ka hmuh hian ka lo na tlat ṭhin," tiin a insût hraih a, ka khawngaih letling zawk.

Zanriah ei tura min sâwmna erawh ka hnial a, an ina kala a sulhnu chhui hi ngaiah ka la nei thei meuh lo chu a ni e.

U Ngaihzuala room-ah ka lut a, pakhat mah an la khawih danglam lova a lo len ṭhin laia a thawmhnaw inbel uar deuhte pawh a wardrobe-ah a lo inkhai fel thlap a, ka mittui a hnai leh kuar tawh. Mahse, ṭah êm chu ka ṭap bik lo.

Hetia room-a ka awm lai hian ka phone a rawn ri a, ka nu a nih tawh ringin phone ka phawrh chhuak a, ka'n en nâk chuan Ngaihzuala lek chu niin! Tlat mai a! 

Pick duh lovin ka ring ral tir ṭhak. 

Vawi li lai a rawn call a, a tawpah phei chuan phone ka switch off phah ringawt.

Nu Rami te in aṭanga ka chhuah hnuah kein kan in lam ka pan a, ka thawhpui Siamtei nen kan intâwk, "Awi, Bawihi chu engtikah nge i lo haw a?" Tiin min zawt a, ka haw chin leh kâr thar aṭanga hna ka zawm tawh tur thu ka hrilh veleh, "MDO thar kan nei dawn asin, hmanni khan a lokal zuai a, a hmel ka hmu ve hman lova," tia min hrilh chuan, "Khawi ami nge? Eng tikah nge a rawn join dawn?" tiin tluangtlam tak hian ka zâwt a. 

"Kâr tharah ve tho a nih ka ring," tihpahin kan piah lawka Taxi lokal chu a phar a, ka chhánna pawh ngaichang lo hian a kal a ni chawpchilh mai.

Agriculture Department-a Focus hnuaiah a nghet lovin ka thawk tih ka sawi tawh kha.

MDO thar kan neih leh phei chuan a ninawm leh ngawt ang chu.

Hun a kal a, ni a ral a, Ngaihzuala phone call ka lâk loh aṭang khan vawikhat mah a rawn call nawn tawh lo a, kei phei chuan biak enah ka en lem lo. 

Ka thlatin hun bi neih hun ni thumin ka pêl ta. Inrinhlelhna em em sawi tur ka nei lo nain ka thiltih rah chhuah kha hmuh ngei ka inbeisei ve tlat. Khatiang zât mualpho leh zah pawh dâwn lovin ka tâlkual ve a, a lo thlâwna a luan ral mai mai ka hlau takzet a ni.

Inrinni zing a ni a, ka period hun a pelh thui deuh tâk avangin test kit lei turin ka chhuak a, ka nuin bazar tura min tirh tho avangin a zia phian. 

Ka u Hmingmuana Chalrângah Sunday hmang turin a kal bawk a, kohhran thilah a ni nghe nghe, karleh Thawhṭan ni hian hnaah ka kal ve dawn bawk a, Ngaihzuala nen kan awm tawh danin ka rilru a luah thui tawh lem lo, han ngaihna em em pawh ka nei chuang lo a, Lodge kan chhuahsan dawna amah ka uibehna leh ka thlâkhlelhna ang kha tunah chuan a awm tawh meuh lo bawk a, ka thawveng huaiin ka hria.

Chawhmeh leh inchhungkhur mamawh ka lei zawh hnuah Test kit pathum tawp ka lei a, a rûk tak chuan ka huphurh ve hle, kan awm dun hmasak ber aṭangin thlakhat a liam ve tawh a, a hnuhnung zawka kan awm dun ṭum khan zu ka in nasat bâkah damdawi ka ei bawk nen beiseina ka nei sâng viau lo. Ka beidawng tihna phei chu a ni chuang lo a.

Sunday zing a ni a, hma takah thovin ka intest ve ta. Fiah vak lova rin sen pahnih lo lang ka hmuh chuan ka thaw chhuak halh a, rinhlelhna leh awih ngam lohna nen vawi hnih dang ka test leh hnuah phat rual lohvin nau ka pai tih hrilh hranpa ka ngai bik lo.

Rinduhawmi khawvelah hian mithar dang an lo awm belh dawn tih ka hriatna hian min tilawm a, chuti a nih rualin u Ngaihzuala phatsan ang tlata inhriatna ka nei lawi si. A hma khan hetiang rilru hi ka pu ngai miah lo kha a ni a, tuna ka ngaihtuah dan hi ka duh loh dan ber a ni. 

Lalngaihzuala hrilh tumna ka nei lo tih erawh ka inhrechiang. 

Ka chhungte hrilh dan turah ka buai ta pang a, hun te han kal deuh se, a tihdan a awm mai turah ngai ang aw.

"Bawihi, enteh saw saw a nih saw kan MDO thar tur chu," tia Siami kawhna lam ka en chuan ka lungphu a châwl hialin a nia ka hriat!

Mit khap fak fak chung hian ka ennawn leh a, kan Office Main building pana rawn kal mêk chu hai rual lohvin Lalngaihzuala a ni. 'Ni lo, Ni lul suh se,' tiin keima hriat tham lekin ka phun chhuak sap a.

Mahse, hmanni lawka duhdah taka ka awmpui, zan tam ka riahpui leh vawi tam tak zu no ka dawmpui ngei mipa kha a ni si.

Kan ṭhutna lam panin a rawn phei a, a hmaa a lan dan ang lo takin a rawn smart hle. Kamis paw duk raih leh kekawr dum a inbel a, a sam pawh a dan pangngaiin a fai hmel leh khawp mai.

"Siam, bathroom-ah ka kal lawk dawn a nia," tih leh thawh ka rual a, "A lo thleng ṭep a nia, nghak chhuak law law rawh," tih pahin ka kutah a rawn chelh a, ṭan buaina hman a awm tawh lo. Hnial tuma ka ân zuau laiin Ngaihzuala kan dawhkan bulah a lo ding fel at tawh a, muangchângin ka ṭhu thla leh ta riai riai a, ka thâ a khûr deuh titih. A chhan ka hre bik lo.

"Sir, file hi chu Bawihi hian i room-ah a rawn dah mai dawn nia, kan peih ṭep.." tiin ka chung chiaha mi Zari chuan a lo ti a, ka lo ner ru nasa mai. Ngaihzuala hmel ka en duh lo lui tlat a, min en ang tlata hriatna ka nei bawk.

"Aw le, Fruit preservation chungchânga report tur in siam kha ka en duh nghal dawn a nia," khauh fur leh nelawmna tel miah lo hian a ti a, a hmaa ka hriat ṭhin Ngaihzuala anna reng a nei tawh lo. Tuna kan kianga ding hi chu hna thiam tak leh induhtawk tak angin a lang a, ka ngainat zawng a ni tehhrep lo e a.

A hnu darkâr chanve a ral leh meuh chuan Ngaihzuala room-ah zum dâkin ka ding a, file pathum ka pek chu a keu thuak thuak a, min en miah lo hian, "Rinduhawm, ṭhu ta che, khatia i din reng chuan i tlu mai ang," tiin min deusawh hmel tak hian a ner nawk a, ka run tawk a lo tling leh hman.

"Ṭhu rawh pawh min ti chuang bik hleinem," ka lo ti sap a, a rawn dâk chhuak ta nge nge a, a mitmeng hriam leh thim ruih chuan chîk zetin min en a, "Nang leh kei hian sawi dun tur kan nei a nia, min pehhél emaw tlanchhiat i tum chuan in inah ka rawn kal chilh ang che, Rinduhawm, engvangin nge ka phone call vawikhat mah i lâk duh loh?" Hniam leh zawi fiah taka a tih chuan chil ka lem khalh a, ka la ṭhu ta chuang lo.

"En teh, sawi dun tur eng mah kan nei lo, bâkah kan mimal nun sawina hun pawh a ni lo a, File kha i check zawh tawh chuan ka lêt thei ang em?" Dam thlapa tiin ka en let ve kar a, ka kawchhungah engtin emawni ka awm. Ka ning...

"Tunah chuan kan sawi dawn lo reng alawm, zanin dâr sarihah a hmaa ka lo nghahna ṭhin cheah khan lo awm ang che, Valtea inah kan kal anga chutah chuan ka sawi tur ka sawi chauh dawn, i rawn chhuak lo a nih pawhin in inah ka lokal ngei ngei dawn tih hria ang che," nghet churh leh hnial theih miah loh hian a ti ta a.

"Ngaihzual, thil ṭha ber a ni lo, kan inremsiamna a zo tawh a, inzawmna kan nei tawh lo a nia," ka lo tih chuan, file min pe a, "Kan inbiak fel hma poh leh a ṭha a ni mai; min hnial chuan ka sawi ang ngei khan ka ti bawk ang," a ti leh a, ka sawi buai ngam tawh lo. Kan ina a rawn kal ka hlau bawk si.

Nilêngin Ngaihzuala thil sawi khan ka rilru a luah ngat ngat a, engvanga min hmu duh nge a nih, amah ngeiin ka chelh chung chung leh kal lo tura ka ngenna pawh a hnial fithla ṭhak a, tunah thupe awkâ takin inbiak a duh thu a sawi leh si. Â...Khawvel han zim zia hi chu aw..a mimal chanchin ka lo zawt hmasa ta lo kha ka inchhir hluah hluah tawh.

Min 'transfer' tih a sawi laite khan lo zawh chian tur a ni a, thil thui tak ka ngaihtuah lohna man ka têl zel zawk a ni.

Zanriah kan kil lai pawhin ka ei hleithei lo, ka raino vanga ei theih loh lam nilovin Ngaihzuala nen kan inhmu tur hi ka huphurh êm a, ka chaw lem a tisak vek thei alawm maw le.

Ka nu hnenah chhuah lawk ka tum tih ka sawi a, "Thlanmualah te khan i va kal leh ngawt ang e, ka remti tawh miah lo a nia," a ti a, "U Ngaihzuala te inah zawk kal lawk ka tuma ka rei lovang," tiin dâwt ka sawi leh ta.

Vanneihthlak takin min zawt dilchhut miah lo teh tlat a, zan dar sarih a rík meuh chuan a hmaa ka lo nghahna ṭhin kan inpiah lawkah Ngaihzuala nghakin ka ding rân tawh.

Ani pawh a rawn thleng deuh nghal mai a, "Lo lut rawh, midangin min hmuh tam ka duh lo a nia," a ti sup a, thuawih deuhin ka ṭhu lut vat a, kan tlanchhuak zui nghal a, kan inbe eih tawh nâng.

Valtea in kawtah Car a tiding a, "Ka hrilh lâwk tawh a, amah a awm lo aw," a ti a, a âw pawh a dam deuh tawh, a hmel erawh a nelawm chuang der si lo.

Thlakhat hnuah kan pahnih bawkin chu inah chuan kan inzui lût leh ta a, kan awm tawh dan mitthlâah a lang zut zut a, a va hrehawm mai mai e.

"I sawi tur chu sawi la, haw hma ka ngai a nia," tiin tukverh bula ding khawng luh Lalngaihzuala chu ka melh zauh a, "Sangtei nen kan inṭhen tawh.." a rawn ti teh daih a, mak ka ti ngei mai.

"Eng ati nge, keimah vang em ni?" Ka lo ti vat a.

Ka ṭhutna lam rawn pan pah hian, "Ni deuh tho, whatsapp-a kan inbiakna leh call list aṭangin min man chhuak a, kan inngaizawng lo tih vawi tam ka sawi chung pawhin a awih duh tlat si lova, kan inkâr a titawp ta a ni." Zawi sup hian a ti a.

"En teh, in inṭhen chu pawi ka ti lutuk, a tidik lotu zawk i nih angin ngaihdam dil la, in inrem leh thei mai lovang maw?" Ka lo ti a, ngaihdan ni lo tih hriat deuh hian, "Ngaihdam ngai ni ila, ngaihdam dil ka hreh lo, mahse, ka lak aṭangin thinrimna tur leh tihtauhna tur thildang a zawng zel tho, chuvangin hetia kan awm rih hi a ngai a ni, i rai em?" A'n tiah. Min han zawh dan teh tawp te hi a, a hawihhai lo a nia.

"Rai lo, chutiang eng mah a awm lo," ka lo ti zung zung a, nui hawk chung hian, "Rinduhawm, dâwt sawi i thiam lo hle mai, i hmelah khan a lang vek, nang hian ka fa i pai a ni." Inring tawk lutuka tiin ka bulah a rawn ṭhu a, ka kuta vuan chung hian, "Chuhpui che ka tum lo tih ka sawi tawh kha, mahse, he hun i paltlang chhung chauh hi chu i tana awm ka duh, ka rai lo tia dawt sawi tum buai lo la, ka hre vek, min bum lovang," a ti hmiah hmiah mai si a, ka hrilhhai letling zawk. 

"Ngaihzual, khawngaih takin a harsa zawng hi chuan awm lo hrâm rawh, mahnia paltlang ka huam avangin alawm kha dan kha kan siam a, kan inrem, a bâk sawi belh ka duh lo," ka tih chuan, "Kan contract kha a la tawp reng reng lo. Khalai hunah khan zan thum leh nihnih atan kan awm dun a ni mai a, contract awmzia chu i hriat kha," a ti leh a.

Beidawng zet hian, "Engtia min tih nge maw i tum le, a hnuleh awm lo tura inremsiam kan ni a, i sawi buai thei lovang," ka la ti ve fan a. 

Thinrim insum tih hriat fahran hian, "Eng hmeichhia nge maw i nih zawk le? I u Ngaihzuala thihna la rei loh zia i hria a, tunah nau i pai a, tuma hnenah sawi chhuah ngamna tur i nei lo, i nu leh i nuṭapa hnenah takngial pawh i sawi ngam dawn em ni? Ngaihtuah chiang rawh, he hun i paltlang chhung hian i tana awm ka duh mai a nia, ka hnenah bâk inbunruahna tur i nei hek lo, nge mipa dang i u Ngaihzuala hriatchhuah tîrtu che i lo tawng leh tawh zawk," vîn lutuka tiin a ding chhuak a, chhuata vei nghauh nghauh chungin a thaw hrâwk a, ka thin phu dup dup tih reh tumin thawk ka la hap. A sawi ṭhenkhat hi chu a dik ve bawk si.

"Ngaihzual..." ka lo ti sap ringawt a.

"I hlawh zat ka hria, in dinhmun pawh ka hria, thla thum êm pawh a ral hmain mipa dang fa i pai a, tumah hian thiam an chantîr dawn lo che, inngaizawngin inkawp ang tih ka sawi lo. A hma kha zawng zawngah pawh inngaihzawnna tel lovin khatiang thil kha kan tidun a, kan contract hi pawt fânin kan inngaihsak tawn thei bawk, ka fa a nih kha..." a ti hmuk hmuk a, sawi ve tur a va vâng si êm.

"Kan inngaihzawn dawn loh chuan i hmei ka ni dawn tihna maw, Lalngaihzuala hmei ka ni dawn tihna em ni?" tiin ka nui lui ngial a, rum fahrana min melh chung hian, "Nang hian hmei awmzia pawh i hre lo, i duh tak leh i Ngaihzuala âiawh tur i hmuh hma chuan ka hliahkhuh ang che, ngaihzawng ka nei duh a nih pawhin ka nei ang a, nang pawh i zalen tho ang, chumi a nih rualin a hmaa kan dan zam ang khan kan kal thei reng," a la ti zel a, a sawi thiam si ka ngei a nia.

"I â tawh a nih hi..." tih chiah ka sawi.

"Âtna thlarau ka dawn vang alawm nang nen pawha khatia kan awm, Sangtei pawh i thik chuang lova i tan eng mah harsa a awm lo, Champhaiah hian ka awm chin tur ka hre lo va, ka hnuaia thawk i ni bawk, min pehhêl kumtluan thei dawn em ni, ka fa pai reng chung hian min hmu nitin thei ang maw, kan inrema a hma anga kan awm chuan nuam pawh i ti zawk daih ang, hmelma ang maia in en nan Office pakhat hi a zîm lutuk, inngaihtuah harh rawh," duhthawh zetin a ti leh bawrh bawrh a, Officer tih takah ṭawng hmang a thiam si a, ka dang titih dér nia.

"Umn..eng pawh nise hun min pe hlek rawh, ka thluak ka hmang thei lo," ka ti tawp a, nui suk chung hian, "A tîrah kha chuan i thluak a chak viau kha maw le, i u Ngaihzuala ka an avang leh kan pianni leh thla a inan vang te khan rang takin nula thianghlim kha ka lakah i inpe rawk rawk mai a nia, tuna taka thluak han hman theih loh chu thil awihawm pawh ni nghal lo chuan," a ti sak sak a.

"I chhe zet zut...'' ka lo ti hlar a, "I nunah mipa dang i seng lut dawn a nih rau rau chuan kei hi a hmasaber tur ka ni, i thinlungin min hlat mah se, i taksa kha ka ta a ni, kha naute pawh kha ka siam tho a nia, keimah Lalngaihzuala a pa dik tak hian ngaihven theihna leh ngaihsak theihna dan ka nei, chu chuan a nu pawh a huam tel, min hnial min hnial tawh suh," tih pahin ka dârah a vuan a.

"Lodge kan chhuahsan dawna i mittui khan min chelh teuh a nia, kalsan loh che ka duh, mahse, kalsan lo thei lo che ka nihna pawh a awm bawk, Bawihi, i lakah rilru chhia leh tenawm ka pu lo, he thil nangmaha i paltlang tur hi ka ngaingam lo a ni ber e, hriatthiam tum zawk rawh," dam thluama tiin ka sam a chûl a, ka lo insangmar ru ṭeuh thung.

"A ṭha e, a hma ang khan kan awm leh ang, inngaihzawnna tel lovin, kan duh hunah hun kan insiam tawn ang a, mi hmuhah induatna leh inngaihsakna tih lan a rem lo a nia, tumahin kan inremsiamna leh kan inkungkaihna an hre tur a ni lo bawk, i duh chuan ngaihzawng pawh i nei thei aw..." ka tih chuan a meng phar âwk a, rei phei chu a ni lo.

"A nih leh ka hmeia ṭan chu i duh em ni? Nupui pawh nei ila, nang hi chu ka hriat reng tawh tur hmeichhia i ni, i u Ngaihzuala angah min ngai mai la.." a ti a, nui chunga sawi ni mah se ka run tâwk a tling lutuk tlat.

"Engtikah mah ani kha i tluk ngai lovang," tia inrin lawkna awm miah lova ka ṭawng chhuah tâkah chuan a insangmar ṭawlh ṭawlh a, "Kan la hria ang chu, pasal atana i thlan, i engkimin a kalsan che avanga i natna thûk tak hi ka paltlangpui thei che tih i la hre chho mai ang, i duh phawt chuan min fiah thei aw," tiin cho zet hian min en a, hnuailam ka bihsan daih.

"Ka haw duh tawh," tiin thudangah ka pakai a, "Ka ru daih mai tur che a nia," a la ti tak deuh deuh a.

"I zah loh chu a..." ka lo ti hlar a, a nui suk ringawt.

A chângin kan inhnial a, a châng leh min vîn ṭhawt ṭhawt a, "Hetiang em ema thinlung sehhel han put mai chu, Rinduhawm, i hmabâk thim zia hi i chhût ve îk lo em ni, mâwl lutuk mai," a ti leh nek a.

"Nia, ka mâwl, mi mâwl ka nih hi..." ka lo ti fiak ṭhak a.

"Thinchhe bawrlawk lutuk mai, tichung khan keimahin ka enkawl thei te chu i la ti ve a nia, a ngaihna a awm lo, i kawchhungah hian Acid a tam viau ang, i u Ngaihzuala boral aṭang hian i thûr tawh a nih hi..." a'n tiah. 

"U Ngaihzuala hming rawn sawi ve chhen suh..." ka ti hmak a.

"Ka hming ve tho a nia, nang aiin ka upa zawk bawk a, u Ngaihzual tiin min ko ve mai ta che, a har viau em ni, mahni hming sawi sawi hi ka peih miah lo a nia," a la ti hrâm.

"Haw ang, ka haw dawn...ka ning..." ka ti hlak hlak a, kiai suk chung hian, "Kha maw...i Acid pai a rawn chhuak ṭan a nih kha," a ti duh lek.

Zan dar kua a pel tihah min thlah haw ve ṭâwk a, "Office-ah pawh min nêl takin awm ang che, min pehhêl tumna emaw min hriat loh der i tum chuan in inah Lalngaihzual tia min koh ngei ngei theih nan ka rawn leng ang, hria maw.." tih pahin ka lamah a rawn âwn phei a, ka lo tawlh det a hmuh veleh, "Min hlau ang te khan lang hlek suh, nang hian min hlau eih lo tih ka hria a nia," zu han ti a.

Ka ṭhutna lam kawngkhar min hawnsak a, "Naktuk aṭangin kan contract no.3 angin kan kal zawm ang a, i tan zu in a rem lo a, in rûk te kha i lo tum ṭâlh ang e, i pum chhunga mi khan a ngaina dawn miah lo a nia," tiin a nui huk a, ka nuih pawh a za mai mai lo e a. 

In mangṭhana thu pawh sawi lovin polite lo zet hian ka kalsan nal nal a, a tlan thawm a reh hnuah chiah inchhungah ka lut ve ta a.

Ka nun dan a inthlâk leh ta dâwrh a, nitin office kalin Ngaihzuala pawh ka hmu zeuh zeuh a, inbiakna mumal kan nei lo. Kan MDO a nih tlat avangin thil ṭul leh pawimawhah lo chuan a room-ah pawh kan lut meuh lo a, khatia inremsiamna mawlmang zet kan neih zan aṭang khan zan tin dâr 9 hnu lamah min lo call ve ziah bawk.

"I ṭha em? In sawiselna i nei em?" Tih min zâwt chámchî a.

Zanah inbe ziah mah ila a tûk khua a lo var hi chuan kan in 'chu e kha' zui tawh lo hrim hrim a, kan thider dun ziah bawk. Kan inkârah induhtawnna a awm miau lova a hmaa kan awm dun tawhna khan min phuar ti ila a dik ber zawk ang.

Tûkkhat chu luak chhuakin min ṭham a, tukpumin ka uak a ni ringawt. Ka nuin, "Kan thusawi i zawm duh lova i zu in nasat vang a nih kha, i pumpui a khawngaihthlak ngawt mai," a ti a, ka ngai haw lem lo. Ka zu inah a puh daih hi ka lawm fê zawk.

"Rinduhawm, zaninah reilote chhuak lawk ang hmiang, ka hmeinu ka ngai deuh tlat," tia Ngaihzuala'n min rawn biak chuan a kam nam tih ka hre mai.

"Ka hman lo, hna ka ngah lutuk.." ka lo ti a.

"A nih ka rawn lêng dawn a nia, i u Hmingmuana kha biak ka duh.." a rawn tih tâkah chuan rang lutuk hian, "A teuh lo kan inah lokal lovang, ka duh lo," ka lo ti zung zung a, a nui hawk a, "A nih lo chhuak ang che, kalna tur ṭha deuh ka hria," a ti a, ka 'Aw' leh ta nge nge e.

Tuna kan kal dan hi chu tisa lam thil a tel vak ta lo. Ka nau pai effect zawk a ni. Mi puitling, ngaihtuahna thui tak nei a ni a, pa nihna dinhmun luah tum lo mah se, ka rai lai na na na hi chuan min thlahthlam tumna a nei lo tih ka hre tawh.

Lalngaihzuala mize dik tak leh ka laka a rilru puthmang dik tak hriat chhuah hi ka tih hmasak ber turte zinga mi a ni.

A hun laia chelh theih loh mipa kha a hun lovah a rawn inlan a, hei hian chhan mumal tak a nei ngei tur a ni dawn lo'm ni?

Ngaihzuala nen kan contract no.3 záwm turin ka tei chhuak leh dawn ta nge nge e.

B+>[BeckirafARenthleI]<+®