6.DROGMA SEOL [A Becky Rafa Stories]

6.DROGMA SEOL

Ziaktu: Becky Rafa Renthlei

[Recap]

"A nih ka rawn lêng dawn a nia, i u Hmingmuana kha biak ka duh.." a rawn tih tâkah chuan rang lutuk hian, "A teuh lo kan inah lokal lovang ka duh lo," ka lo ti zung zung a, a nui hawk a, "A nih lo chhuak ang che, kalna tur ṭha deuh ka hria," a ti a, ka 'Aw' leh ta nge nge e.

Tuna kan kal dan hi chu tisa lam thil a tel vak ta lo. Ka naupai effect zawk a ni. Mi puitling, ngaihtuahna thui tak nei a ni a, pa nihna dinhmun luah tum lo mah se, ka rai lai na na na hi chuan min thlahthlam tumna a nei lo tih ka hre tawh.

Lalngaihzuala mize dik tak leh ka laka a rilru puthmang dik tak hriat chhuah hi ka tih hmasakber turte zinga mi a ni.

A hun laia chelh theih loh mipa kha a hun lovah a rawn inlan a, hei hian chhan mumal tak a nei ngei tur a ni dawn lo'm ni?

Ngaihzuala nen kan contract no.3 záwm turin ka tei chhuak leh dawn ta nge nge e.

-BRR Stories

Zan dar riat a rîk pawhin Ngaihzuala hmel reng reng a rawn lang lo a, vawi hnih ka call a, a pick up bawk si lo, kan in piahah darkâr khat deuhthaw ka awm tawh a nia. A mak em em hi ka ti.

Ka nghah loh chuan a lokal thut ka hlau bawk si, rilru pangkhing deuhin kan ṭhenawmte veranda-ah ka ṭhu a, ka phone a rawn ri ve chiah, ka en rualin amah Ngaihzuala a lo ni a.

Phone a pick rual rualin, "Ka nghâk rei tawh lutuk che eng ati nge a?" Ka ti vin nghal hlar a, "Bawihi..." a ti zawi sup ringawt.

"I lokal dawn loh chuan ka haw dawn a nia, pawnah ka la awm char char," ka tih tâkah chuan, "Ka lokal ang, lo awm rawh," a ti leh lawi si.

"A tlai tawh a nia... haw hma ka.."  tia ka sawi zawh hma hmain a dah nghal daih.

A hnu rei vak lovah a lo lang ve nghal mai a, a hmel a dik vak lo deuhvin ka hria.

"Ka duh aiin ka tlai a, kan rei dawn lo nia," a ti ṭha ve mai a, min hruaina tur hmun pawh a sawi chuang lo a, Valtea inah kan kal dawn a nih ka ring ringawt, mahse, min hruaina hmun chu ka rin loh lam daih! Ama chênnaah a ni.

"Ngaihzual, a chi loh lutuk, miin min hmu ang e," ka ti a, Car aṭanga chhuak duh lova ka ṭhut tlat avangin amah zawk ka ṭhutna lamah a rawn kal kual a, "Eng mah hlauhthawn tur a awm lo, an hmu dawn hleinem che," a ti awlsam puat ringawt.

Kei lah ṭan taktein ka ṭang bawk si a, "I lo chhuah duh loh leh ka pawm chhuak che anga a ni mai alawm, i duh zawk thlang rawh," a ti hmuk a.

A in luah bul velah in dang a awm neuh neuh a, hreh tak têin a nia ka hreh ni.

"En teh, hmundangah kalna tur i hre ngang lo em ni, i ina ka lut lai midangin min hmuh vaih chuan ka hmingchhe vek dawn," tih pahin kâwng dawma ding Ngaihzuala chu ka en ngar a, koki san âwk chung hian, "Min ring rawh, tumah rawn hmu tur che an awm lo," tih leh Car kawngkhar hawn a rual a.

Pawh luih ngai khawpa ṭan ka duh bîk si loh avang leh amah hmu tura kal ka nih tlat avangin rilru nuam chiah lo chung hian, a hnungah hawikual zak zak chungin ka zui ve leh ta nge nge a.

Tuna a in luah hi kum hmasa lama an sak zawh chauh kha a ni a, in mal ding a ni nghe nghe.

Inchhungah bungrua a kim ve biai a, mipa awmna tih takah a fel fai viau lo. A ṭawp tihna phei chu a ni chuang lo a, a in hi a la thar hrim hrim bawk nen rin ai tak chuan a luah nuam vei fu.

"Lo ṭhu rawh, ka ina ka hruai che avang hian ka zuan thut dawn che tihna a ni lo a nia, khatia hlauthawng hmel pu zek zek lo khan awm hahdam tum rawh," awki pangngai taka tiin filter-a tui a inthlit zui zat a, "I duh ve em?" Tih pahin ka lam hawi hian no a rawn lek lang zauh a, 'Ka duh lo' tih nan lu ka lo thing mât mât a, no hnih zet a in hnuah ka ṭhutna ep chiahah ṭhut hmun a rem ve a, a hma ang thoin kan inkâr a hla leh duai tawh.

"Sawi tur pawimawh i nei em ni?" Tia ka zawh chuan, "Nei e, nau i pâi tâk si-ah chuan eng ang ruahmanna nge i neih ka hre duh a ni." A ti dam thlup a, a hmain kan sawi dun hrep tawha a theihnghilh ka ring dêr si lo.

"Ngaihzual, hetia kan thar thawh leh zel hi a ngai em ni, a tîra kan sawi tawh ang khan kal tlang mai ila, inremsiamna ka neihpui lai che pawhin i sawi nawi miah lova tunah tihian a hranpain i sawi lang leh kher zel hi a ngaihna ka hre lo a nia," ka lo ti a.

"A hma a hma tih a ngai tawh hleinem, pa neih tîr i tum lova, mahse, khang hunlai kha chuan i la râi lo bawk a, sawi te kha chu a awlsam lutuk tlat; tunah chuan atak takin i tawng chho dawn, i ngaih anga awlsam hian engmah a thleng dawn lo," nghet churha tiin a sam a tuai puat a, a sawi awmzia ka man thiam chiah lo.

"Ngun deuhin ka sawi tur hi lo ngaithla rawh aw, tun bâk sawi nawn ka duh tawh lo a nia," tia ka ṭhut dan ka siam rem hnuah ka ruahmanna dik tak Ngaihzuala hrilh tumin ka ngawi deuh vang vang a, ani pawh a ngawi ngul mai.

Kan ngawih vang vang hnuah chuan, "Sawi ta che," a ti hmuk a.

"Tunah hian thlakhat a tling chang chang chauh a ni a, pasal neih tumna rilru ka pu lo, inneih lam i lo ngaihtuah a nih chuan theihnghilh hmiah la, a pa ni mah la, a pa hming ka dah dawn lo," ka tih chuan a ner nawk a, a mitmeng a danglam nghal vek.

"Ka ruahmanna dik tak i hriat duh chuan tihian damtea ka pâi tluang thei a niha ka hriselna dinhmun a ṭhat chuan thla li vel thleng chu ka thup theiin ka ring a, u Ngaihzuala thihna a la rei loh avangin kan khuaa mualphopui ka tum reng reng hleinem, Goa-ah ka ṭhiannu a awm a, tuna ka hna hi a nghet lo a nih angin ka bansan anga Goa ka pan ang, ka râi chhung leh nautê ka neih hnu thlaruk vel thleng awm ka tuma chumi hnuah chuan Mizoramah lo hawin ka fa hi 'Falâk' angin ka rawn hawpui mai dawn a ni. Rinduhawmi fa hrin nilovin 'Adopt' aw..' tia mar ṭha taka ka sawi lai chuan che lo hian min en ngur a, ka lai lek lek mai.

"I ngaihtuahna te kha ka ngaihtuahna a ni si lova, i suangtuah apiang ataka chantîr tumna i nei zel hi thil âtthlak a ni, i rila rah kan pahnih fa kha midang fa anga kal tir ka remti lo," thinrim insûm takin a ti zawi ruih a.

"En teh, kan inzawmna dan i hriat vek kha, a hnuleh awm tawh ngai lo tura inzawmna siam ve mai kan ni a, tunah rilru hran kan put kher a ngai lo, nupui i nei duh anga nakinah buaina i tawh ka duh lo," ka tih chuan, "Inneih puia sawm che ka tum bik lo, mahse, a pa ka nih angin ka hnam hming a chhawm tur a ni a, a pa hmingah ka hming a chuang tur a ni. Pa nei lova siam tumna ka nei reng reng lo," a ti hmiah.

"A harsa zawngin awm lo hram rawh, u Ngaihzuala lo mipa dang ka nunah an awm ka remti lo a, fa ka duhna chhan pawh mipa dang laka ka invenna tur hmanrua a ni, khawngaih takin ka nunah inrawlh lo hram rawh aw," tiin ngenna mitmeng hian ka en a, kut kuangkuah thûnin min en tlawk tlawk a, eng nge a ngaihtuah awm ka ring chhin thiam lo.

"Heti hian ruahmanna ka'n siam ve ang e, thla li a tlin hma chuan khawiah mah i kal hranpui tur a ni lo a, kan hmaah eng nge lo thleng dawn kan hre lo va, nupaa insiam turin kan duh lo ve ve a; mahse, kan hma kan sial tur a ni lo, naute pawisawi lo kha kan tuartir dawn em ni? Ngaihtuah chiang la, inngaizawng anga kan awm kher a ngai lova ka theihna chinah ngaihsak che erawh ka tum ang, min hnial suh ang che, a bâk chu a tlachawpin kan sawi dawn nia," mar pât a tiin a ding chhuak a, "I nu leh i u hrilh i tum lo tih ka hria a, kei pawhin a hun hma chuan ka kâ ka âng lovang," a tih zawm leh a.

"Nupui nei daih rawh.." ka lo ti hmanhmawh a, rum lutuka min melh chung hian, "Sangtei nen kan inkâr a tawp tawh a, i awm dan tur leh i chin tur a chian hma chuan chamâng dang kân ka tum lo a nia, ka ta i nihna a la bo lo, Contract-in inzawmna kan la nei reng a, chu chuan thlakaw chhung a huam ang, tihdanglam tumna ka nei miah lo bawk,"  tiin ka ṭhutna lam a rawn pan phei vut a.

"Tihian tawp mai ila ka la duh zawk," zawitea ka tih chuan, "A tawp ngawt thei lo, i theih tawkin inenkawl ṭha la, nangmah chauh i ni tawh lo tih inhre bawk rawh, kha hei hi la phawt teh le," tih pahin a wallet aṭang hian pawisa a rawn phawrh a, lâk tumin ka che eih lo.

"Bawihi, incheck up ang che, i chhungte i dil ngam dawn si lo a, mamawh i neih pawhin ka hnenah sawi zel rawh aw, inthlahrunna tur a awm lo," dam deuh zawka tiin pawisa chu ka kutah a rawn hmehbel châwt châwt a, ka lo ṭang kawh tlat thung.

"Ngaihzual, eng nge i hriat a? ka in enkawl thei ka ti mawlh mawlh a ni lawm ni, min ngaihsak awm taka awm kha bansan rawh," ka ti vin hlar a, a ngaihdan a ni lo hle a nih ka ring, ka ṭhu lai min pawt tho a, chiang fek fawk hian, "I lakah thuneihna ka nei thiang a nia, i duh dan dana min kawih her tum suh, ka ngaihtheih zawng a ni lo," ti hmuk hmuk chungin min vawnna a thlah thut a, ka tlu ṭêp alawm maw le.

"Inhnial ka peih tawh lo, hetia thil ṭul lova lo inhnial ve reng hi a ninawm, engkim sawi dunin thu kan zam a, i laka ka inpek avang khan i ta ka nihna tur a awm chuang lo, inremsiamna awm lo se nang leh kei hi kan inzawm hek lo ang," duhthawh taka tiin ka kalsawn nghal a. 

"Ka haw dawn a nia, i duh danin awm la, kei pawh ka duh danin ka kal ang," tia la ṭawng bawrh bawrh chung hian kawngkhar lam ka pan a, Lalngaihzuala pawh ngaichãng îk lovin ka chhuak ta a.

A ṭûl a nih leh kan in thleng rakin kein ka kal mai ang. 

Midangin min hmu nge hmu lo tih hriat tumin ka hawikual leh a, a reh ṭhap mai. 

Ka theihtawpa chak hian ka kal sauh sauh a, zan thil a ni bawk si, mi min hmuh ka hlau ve bawk nen thinrim rilru helhkam nei ṭun chungin ka kal ve zel a, "I han luhlul dan em em hi, ding tawh rih teh.." tia Ngaihzuala aw ka hriat thut avangin ka pen tawp chawt a.

"Min rawn zui tawh suh, i bulah thil sawi a har si," tih pahin kal leh nghal mai ka tum a, ka bânah a rawn vuan vat a. 

"Bawihi, engtin nge ka han hrilhfiah ang che le, i ngaih anga awlsam hian thil a thleng zung zung thei dawn lo tih tal hre ve la, i ngaihtuahna a tawi ṭhin em mai," dam deuh zawkin a ti ta a, ka lo ngawi reng ringawt.

"Ka thlah ang che, zanah hmeichhia mahnia tei vah loh tur, a him lo," tisupin ka kutah min kai a, kan in lam min panpui ta a.

Ni e, eng ang pawhin hnialin atira kan dan zam kha sawi sawi pawh ni ila, Ngaihzuala thutlûkna chu a pangngai reng, inngaizawng angin awm lo mah ila a ngaihven phâka ka awm a duh a ni tawp mai, hahthlâk hian a!

Hetia kan inhmuh zan aṭang hi chuan a fâla min koh chhuah a nei ngai ta rih lo a, office-ah pawh min be tuitam lo nain min mitmei ru zel tih ka hre ve kar. Ka naupai avanga insawiselna engmah ka la nei lo a, inchhungkhurah pawh ka awm dan pangngai rengin ka awm miah miah a, a hma aiin ka ngawichawi lehzual.

Nitin ka hnaah ka kal ve tlauh tlauh a, Food Preservation chungchângah tihtur leh thawh tur kan ngah êm avangin keini lam phei chu min tîr kat reng a, Ngaihzuala pawh a buai hle.

Nitin min call sek lo mahsela, a khât mawi tawkin min ngaihvenna a ti lang reng tho a; mahse, tun nithum chhung khan vawikhat mah min call miah lo, kei pawhin biak hmasak tumna ka nei bik lo a, office lamah pawh hmuh tur a tam lo khawp mai.

Ka room-ah thawmhnaw suk fai sa thlep pahin khumah ka ṭhu a, chutih lai tak chuan ka phone a rawn ri ve teh mial. Ngaihzuala a ni tih ka hriat veleh ka chhâng thuai a, tunlai hian min be khât ka tih tawh kha.

"Hello," tia ka chhân rual rualin, "Bawihi, inzawmna kan neih i hlau bawk a, i duh ang chuan ni rawh se, Sangtei nen kan inkâr a ṭha leh tawh e," zawi fiah taka a tih chuan engtin emawni ka awm. 

Ṭawngka erawh chuan, "A ṭhat chu, tikhan nang leh kei hian sawi dun leh tur kan nei tawh lo a, Sangtei lakah i rilru pe la, hlim taka in awm theih ka duhsakpui che u a nia," tia dam thlapa ka ṭawng lai chuan, "Mahnia paltlang tumna rilru i put tlat avangin ka tibuai zui lovang che," a ti sup a.

"Aw le, ni rawh se, mahse, kan thurûk a ni tih hria la, khawngaih takin a hun hma chuan min vawnhim sak rawh aw.." ka ti a, a rûm nghut ringawt.

Sangtei nen an inkâr a ṭha leh ta tih ka hriatna hian min tih lawm emaw, min tih lungawi lohna em em a nei hran lo nain Ngaihzuala zawk nep ka ti ru viau.

Keima u Ngaihzuala nen khan inhau châng nei ve ṭhin mah ila, inṭhena in kawp leh tih vel kha kan nei ngai lova tuna Ngaihzuala te inkawp dan hi hriatthiam a har lek lek ka ti. 

A tawi zawngin kan sawi lawk ang e, ka naupaiin thla hnih hmel a hmu ve ta a, Ngaihzuala nen kan inbe ngai meuh lo ti ila ka sawi sual lo ang, Office khata thawk dun kan nih tlat avangin inhmuh fuh ṭum leh inbiak ve zauh chu vawi hnih khat kan nei ve tho nain kan inpehhêl dun a ang ber, ani pawhin min hmuh fo hi a châk lo tepawh a ni mahna.

"Mâmbawih, tunlai i awm dan hi engtizia nge, rilru hrehawmna i nei em ni?" Tia ka nuin min zawh chuan kan hnaah ka buai thu leh zan ka mu tlem tiin ka pha tlat a, a awih nge awih lo pawh ka hre lo, zan lamah muthilh ka harsat em em a, u Ngaihzuala ka ngaihtuah chhuah loh leh Ngaihzuala nen kan awm tawh dan ka chhuikîr a, zan eng emaw zat chu ka muhil hleithei lo.

Thihnain ka nun a nghawng dan leh ka rahbi zawh a dik loh hmasak avang hian ka chhungril a dam kim lo tih ka inhre rân a, thil thup leh zêp ngah lutuk hi chu keimahni kan inti hrehawm mai mai a ni zawk.

Fa ka duh vanga Ngaihzuala nen khatia awm kan nih rualin, a nihna tak sawi duh chuan u Ngaihzuala min hriat chhuahtirtu a nih vang ringawt khan hnaih ka duh a, ka khawharna min chhâwk zangkhaia min hnêmtu atana hman ka tum vang a ni pakhat. Mahse, thinlung inhmu si lova tisa dan zawh hmasak hi hlimna min thlentu a ni lo tih ka hriatchian phah bawk. 

Nunphung pangngaiin ka kal ve bek bek a, vawiin hian office chhung leh a chhehvel tihfai hna kan thawk a, kei pawh ṭhahnem ngai takin ka thawk ve a, Siami nen kan inkawm tam deuh ber a, kan inzui châwt a ni mai.

Ngaihzuala leh hmeichhe pakhat hi kan awmna lamah an rawn inzui phei a, an ṭawng mawlh mawlh bawk a, an sawi erawh ka hre pha lo. 

Siami chuan, "Kan pu bialnu a nih saw, kan veng ami a nia, an sawi dan chuan kum tawp lamah inneih an tum an tia," tiin min hrilh sar sar a, "Tunge a hming?" Tia ka zawh chuan, "Lalnunsangi a nia, Sangte tiin kan ko mai zel, boss nen hian kum hnih vel chu an inzui ve tawh an tia," tia a ṭawng mawlh mawlh lai chuan Ngaihzuala te pahnih inzui phei chu ka thlêk leh hram a, anni pahnih ka hmuh dun avang hian keimahah eng danglamna mah a awm pawh ka hre lo. Chu chuan min ti thâwl huai thei nia.

"Bawihi, i lo chîk ve ngai em, kan boss leh i u Ngaihzuala khan inanna an nei deuh i ti ve lo maw, a mak lutuk ka hmuh zin poh leh an inang ka ti tulh tulh a, i rilru ka tih hrehawm ka hlau a, ka sawi chhuak duh lo mai a ni.." tiin min en chîk viau.

Nui lui chung hian, "An inang pawh ka ti lo, u Ngaihzuala a hmelṭha daih zawk," tiin ka hawisawn daih a, keimah lo pawhin inang an lo ti ve tih ka hriatna hian min tihhnual rawih thei tak tak. 

"Theihnghilh daih rawh..a ho lutuk, Ngaihzuala avanga i natna te kha dam thuai thuai se tih ka duh ber," tiin min kuah a, ani hi chu a rilru a ṭha tih ka hria, min tuarpuitu tak tak te zinga mi a ni ve.

Chawhnu dâr hnih vel aṭangin ka tâi a rawn na riai riai a, hna pawh thawk zawm lovin keimahni office lamah ka phei a, dawhkan bawh hian ka ṭhu deuh vang vang a, a reh mai thei lo, ka pum a na em em bawk a, ka thlanfim a tla hial, midang hrilha tihbuai ka duh loh avangin ka tuar deuh ngat ngat phawt a, haw dil mai ka tum rilru tawh.

Chutia ka awm lai chuan vawilehkhatah a rawn lum pup a, zun ka cheh emaw ka tia ka'n in en nâk chuan thi fîm tam vak lo hi ka malah a rawn luang thlaa ka hlauhthawn êm avangin ché lo hian ka ṭhu tawp a, ka thâ a khur titih.

"Bawihi..." tia min lo kotu chu en tumin ka dâk chhuak a, Ngaihzuala a lo ni. 

"Bawihi, i ṭha em?" tih nawn pahin chak zet hian min rawn pan a, "Ngaihzual,...ka awm dan a dik lo," ka ti sap a, ka ṭhutna bulah a rawn ṭhu a, "Engtin nge i awm, i eng nge na?" Tih zung zung pahin min ngaihtuah hmel tak hian ka chal a rawn dawm a, "Thí a lo chhuak ..ka tâi a na lutuk.." tih ka sawi hman ṭawk.

"Eng maw?" A ti hluk a, a tho chhuak nghal bawk a, "Car ka lâk chhung chauh min lo nghâk rawh aw, ka rei lo ang," a ti tu tu a, kan thawhpui dangte pawn lamah hna an thawk veka ka awm dan min hmu an awm lo turah ka ngai.

Ngaihzuala kal chhuah hlanin bathroom lam ka pan a, a din pawh ka ding ngîl hleithei lo, nichin âi kha chuan tlemin a zia deuh a, mahse, ka ngaih a ṭha lo hulhual, ka naupai a chiang lo tih hrilh hranpa ka ngai lova; midang hriattir chi lah a ni bawk si lo, chuvang a nia khatia Ngaihzuala'n min buaipui a tum pawha ka hnial duh miah lo. Kan inkâr ngaihtuah chuan min buaipui miah lo mah se a demawm loh a, tun hun atan chuan ani ngaihsakna dawn ka duh ber.

Bathroom-ah ka insil thuak a, ka chhuah leh chuan, "Hospital-ah kal ang aw, midangin min zui loh nan chhuanlam ka siam tawh a nia, hlauthawng suh," a ti sup a, a ngaihtuah kim thei phian mai.

Amaherawh chu, pawnah kan inzui chhuak chiah tihin Siami a lo lang vat a, "Sir, ka lokal ve ang," a rawn ti a.

"Eng mah ngaih ṭhat lohna tur a awm lo a nia, tihian Casualty ah ka va hruai ang a, ka rawn buaipui mai ang," Ngaihzuala'n a tih deuh tlat avangin Siami pawhin min ngaihtuah viau naa a nawr lui ngam ta bik lo a, "Bawihi, nakinah ka lo call mai ang che," tiin Car kawngkhar min hawnsak a, ka ṭhu lut ta a.

Staff dangte'n makti hmel taka min en ka hmuh chuan, Siami ka hui zauh a, "An zawh che chuan a pum a na a, puin a hruai a nih kha, lo ti mai rawh aw..a nuam lo em mai.." ka ti sap a, a lo bu nghat nghat. Ngaihzuala pawh driver seat-ah a rawn ṭhu lut a, kan tlan chhuak zui nghal a ni mai.

"A na viau em i pum chu.." tia min zawh chuan seat hnung nghengin ka maimitchhing a, "Na lutuk lo e, ka tâi a na zawk..." ka lo ti zàwi raih a.

"Midang hriat kan duh si loh chuan engtin nge kan tih ang aw.." tiin ngaihtuah mûk hmel tak hian a chal a chuar nûng a, "Kan inah min dah mai rawh, ka mu hahdam anga a zia mai ang, hospital-ah chuan a hre lo tur turin an hriat phah ang a, Sangtei beng a thleng palh ang e," ka ti hniam raih a, ngaihdan ni lo lutuk tih hriat fahran hian, "Ani sawi kai hun a ni lo, i duh ber naute kha a ṭha a ni tih ka hriat hma chuan rilru nuamin ka awm dawn lo," a ti nghut a.

"Ngaihzual, hriatthiam tum rawh, kan inah ka awm anga tihdan tur kawng ka lo dap mai dawn alawm," ka la ti hrâm a, a va buaithlâk êm ka dinhmun hi.

"Private hospital pan ila, a ruk deuhin tihdan ka dap dawn nia, tuman an hre lovang," nghet churh hian a ti leh lawi si a, a thluak a fîm ta a nih ngei ka ring. Nichina a chiâi hmel kha hmuh tur a awm tawh lo.

Chumi hnu chuan inbe tawh lovin kan ngawi dun reng a, ka pum lah chu a rawn na telh telh ka ti mai. Ka inseh ruh ngat ngat a, ka tâi bawr vel a sa hut hut nimaiin ka hria.

Private hospital pakhat kawtah car a tiding a, hospital hming hi tarlan a rem chiah loh avangin ka'n thup mai ang e.

"Tikhan rei lote lo ṭhu lawk la, ka va thlithlai hmasa ang e, lo tuar hram hram rawh aw.." a ti sup a, a chhuak zui nghal a ni mai.

Ka nu leh ka u hrilh ngamna chi a nih rih loh avangin ka ṭhu ngawi tlawk tlawk a, minute 10 dawn ka ṭhut hnuah, Ngaihzuala a rawn lét leh a, ka ṭhutna aṭanga min pawm chhuak nawlh chung hian, "Ka be fel tawh a, midang hriat kan duh rih lo tih pawh ka sawi a nia, ngaih ṭha deuhin awm rawh, Staff te leh i chhungten zawhna an lo nei a nih pawhin a thí a pût tih bâkin tumah chhân loh tur," a ti a. 

A thil sawi dan a dik thlup mai. 

Rinduhawmi hi ka awm lohna tur hmunah ka awm tam lutuk a, harsatnain min delh tam telh telh a nih ber hi.

Ngaihzuala duhdan thlapin Cabin-ah min dah lut a, doctor a rawn lang rang khawp mai. Keimah chauh chuan inbuaipui ta ila a enga mah hi ka tikaw ve thei dawn si lova, a vawikhat nan Lalngaihzuala min buaipui phâka ka awm hi ka lawm hle.

Doctor-in min check lai hi chuan Ngaihzuala pawn lamah a awm a, phone a hmangin ka hria.

"I naupai hian duhthu a sâm tlat lo, tluang takin i pai tlang ang em tih hriat a ni lo a, tla thei dinhmunah a ding tlat mai a, eng pawh nise a tlâk danna te hian enkawl hmasa ta phawt che ila a bâk chu Pathian thu thu a ni," dam dapa a tih chuan rilru nat luat vangin ka mittui a tling pam mai.

"Engvang nge ni ang, i beisei vak lo tihna em ni?" ka la ti hrâm a.

"Nia, sawi thiam a harsa a, zanin chu hetah riak ve phawt la, theihtawp ka chhuah ang, kan ngaichâng rih dawn nia," a ti ta a.

Ka beiseina chhetê neih ve chhun te kha eng mah lo ah a chang zo dawn em ni? He nautê avang hian ka hmalam hun thui tak ka thlir ve phah asin. Malsawmna ka dawng thei lo a nih pawhin hetiang zâwng khera tawrh leh hi chu ka zuam bik ngang lo a ni.

Insût hraih chung hian hmai ka hup a, ka mittui ka dang zo lo. Mualpho hmingchhiat leh zahna zawng zawng paltlang huamin khatiang khan ka tâl a, engmah lova a thâmral tur hi ka ngaingam thlâwt lo a ni ber.

Cabin chhungah ka awm leh tawh a, ka melh ngai melhin Ceilling ka en tlawk tlawk a, Ngaihzuala erawh chu doctor be turin a chhuak leh rih a, ka rilru a hrehawm êm avangin nichina a lo luh pawh khan ka be lo. 

Ka nuin min lo call a, "Bawihi, ka rin aiin i lo haw har a, bazarah thil rawn lei haw rawh tih ka tum a," tiin lei tur a sawi zung zung a.

"Nu..." ka tih chuan, "Bawihi, ka ṭawng i hre thei em?" A rawn ti leh a, "Ka thí a put thuta office aṭangin damdawi in kan pan a, tunah ka la awm, ngaihtuahawm ka ni lo a nia," ka ti zung zung a, "Eng a, eng maw i sawi?" a ti nghal a, a âw a hlauhthawnna lo ri chhuak chu ka man nghal vek.

Office aṭanga kan kal dan leh ka awm dan tlangpui ka hrilh a, "Kan puin min hruaia ka ngaihtuahawm loh tak tak, duh leh ka u kha inthlakna tur kengin lokal mai rawh se," ka tih chuan, "Keimah ka lokal ang, rawn phone lo che ila tun thlengin ka la hre dawn lo tihna a nia, i nu hi i nu ka ni zo ta lo em ni?" A rawn ti duah a, ka thaw chhuak hliai ringawt.

Ka hah hluah hluah a ni ber mai.

Ka nu nen kan inbiak zawh hnuah Ngaihzuala a lo lut a, khum bulah a rawn ṭhu hniam a, "I u Ngaihzuala vanga i natnate a reh fel hmain thil dangin a tlâkbuak leh ta si che a, Bawihi, sawi dan pawh ka thiam lo," a ti sup a, hrehawm a tih hmel hle.

"Ka tan khawvel hi engmah lo mai a ni rêng asin, ka khawvel a tawp tawh tia ka hrilh lai che kha i la hria em, tun hi eng pawh huama beiseina nen hmalam ka thlir ve theihna a ni a, chhe lo hrâm se aw.." ka ti vawng vawng a, ka kutah nghet takin a chelh a, "Bawihi, thil tam tak ka tiam thei lo che, mahse, i hrehawmna paltlangpui che erawh ka duh ber a ni," a ti a, min khawngaihna mitmeng hi ka chhiar thiam ve lutuk tlat.

Zankhat riak tura tih ka nih angin ka riah ngei a ngai a, ka mamawh tur ṭul ang te ka nuin a rawn keng dawn tih Ngaihzuala ka hrilh a, "Zanin chu keiman ka awmpui ang che, eng emaw palh a awm pawhin keini chuan kan hre sa veka midang awmpui theih i ni rih lo, i nu pawh keimahin ka lo bia ang," a ti hmiah a, pawi ka ti bik miah lo. Hetia ka kianga a awm hian ka thlâ a muang ru tlat zawk.

Nachhawknain min chhawk ta deuh a, tlem chuan ka harh ve deuh. Ka nu a lo thlen lai pawhin Ngaihzuala a la awm a, "Azuala'' tiin a hming ka hrilh a, kan MDO thar a nih thu leh amah vekin min buaipui tih ka sawi a, "Azual, zanin chu ka lo awmpui ang a, i duh chuan hawsan tawh mai la, kan tibuai em mai che," tia ka nuin a tih chuan Ngaihzuala'n min melh zauh a.

"Ka pi, kum 60 chin chunglam tan chuan damdawi in boruak hi a hrisel vak lo a nia, bâkah ka hnuaia thawk a ni a, office hour-a damlo a ni bawk nen zanin chu keimah ka lo awm ang e, amah ngaihtuahawm lutuk a ni hran lo a, min ring thei ang," a ti dam thlup a.

"Â..chutiang a ni thei ngawt lo, a u tal ka rawn kal tîr dawn nia, kei pawh riak turin ka inhuam reng, zankhat mai maiah eng êm ka ti bik nâng," tiin ka nuin a hnial ve tlat a, Ngaihzuala'n theihtawpa a thlêm hnuah a rilru a sawhsawn ve ta chauh a.

"A nih Bawihi, ka haw phawt ang a, naktuk lamah lokal ka tum dawn nia," tiin ngaihngam takin min hawsan ve ta a, a duh chuan Lalngaihzuala hian ṭawngkam ṭha a ui lova midang rilru hneh theihna mak deuh a nei ve tlat.

Ka nu te ang mi strick lutuk pawh a hmin thei a nia, a mak ve a ni. 

Ka nu thlaha Ngaihzuala a chhuah hlanin Siami chanchin ka hrilh ve zuai a, staff dangte khan min sawi zui ka rin vangin hriat belh ka châk a ni ber.

"Engtin vak mah an sawi lo, kan pu fel an tih thu leh an khawngaih thu che an sawi a, u Zodini khan, Bawihi hi chuan hlim a phu a ni, a tawrh ang kha tuar ve dawn ila ka paltlang theiin ka ring lo a ti a, tuman an sawi chhe lo che," a rawn tih tâkah chuan ka thaw huai mai.

Zankhat ka riah a ngaih thu leh ka hna min lo kêp rih tura ka chah hnuah kan inbiakna ka titawp ta a. Siami nge nge a fel teh a nia.

Ngaihzuala a rawn lut a, ei tur leh in tur a rawn lam nual bawk a, nui lek lek chung hian, "Inzawmna neih ka duh tawh lo, keimaha paltlang ka duh, i han ti ve bawk a, ngaihtuah loh theih loh leh ngaihsak loh theih miah lovin inzawmna tur kan nei leh zel si, Bawihi, kan inhlat hi a la rem lo a ni zawk ang a," a ti a.

"Kan taksa a inzawm a ni mai a, kan thinlung a inzawm chuang hleinem," ka lo ti nghauh a, nui hawk chung hian, "I pangngai ṭan a nia, tuna mi hi a lo awm ta lo a nih leh a dang siam tumin ṭan kan la leh ang a, a awlsam êm kha.." tiin a nui ruh ruh a.

"Lalngaihzual, i nupui ka nih loh hi aw...i duh duh sawi suh.." ka ti hlar a.

"Ka hmei i nia lawm, Lalngaihzuala hmei tharlâm ber chu Rinduhawmi mihuaibâk..." a'n tiah. Hmelchhe hnap a nia.

"I ṭawng theih dan em em hi..." ka ti sap a, "Ka ṭawng theih vang alawm i nu pawh ka hmin zân theih, ka laka hmin thei lo awm chhun chu nangmah chiah hi i ni, i sak ṭung mai a, i harsa aw.." tih pahin ka in tur min siamsak a, "Naute i duh vanga inzawmna nei kan ni a, kan contract a la tawp lo bawk a, beidawng reng reng suh, a dang pathum siam i duh pawhin ka tlanchhe miah lovang," tiin a nui kur kur a, ka lo nui ve tawp.

Damdawi in chaw kan ei dun a, ka rin aiin ka ei tam phian, nâ sawi em em tur ka nei rih lo a, mahse, thi fîm erawh a chhuak leh zauh zel tih ka hria.

Ka nuin ka inthlâkna tur a lo ken kha ka la a, Ngaihzuala puihnain bathroom ah ka lut a, ka inthlak fel diam tawh a, ka harh sawtin ka hria.

Nau chhiat tur anga ka ngaihtuah chhin ringawt pawhin ka âwm a tâwt a, a na ngut ngut nimaiin ka hria, beiseina ka nei chau nain beidawn loh ka tum ve ṭâng ṭâng a, khua a lo var anga a ngai ang khan ka awm leh dawn ang tlata hriatna ka nei bawk. Eng tak ang ang maw!?

Khum ruak pakhat zawkah Ngaihzuala a mu a, zan dar 11 a pel tawh a, phone khawihin a la meng a, kei pawh ka mut a la chhuak viau lo.

Ka tâi bâwr a na riai riai a, chuti lutuka nâ vut vut ni lo mah se hlauhthawnna ka neih nasat em avangin Ngaihzuala ka ko ta nge nge a, rang takin a rawn tho a, ka serh aṭanga thí a rawn chhuah leh tâkah chuan, "Ngaihzual, nurse emaw doctor pawh ko vat rawh.." ka ti a.

Tunah chuan thi pût dik tak angin ka awm tawh, ka lu a hai em em bawk a, Ngaihzuala chhuah hlanin thei leh thei lo hian ka inbengkâng a, ka mutna zâwna thi val kulh chu hmuh hmaih chi rual a ni tawh lo.

Nau ka chhiat ta tih ka hriatna chuan min tina êm a ni.

'Piang lo ngaiin kan ṭap lo ve' tiin sawi ṭhin mah se, ka tan chuan a nat dan a in ang reng, Lalngaihzuala laka ka inpekna kha tunah chuan eng mah lo ah a chang zo ta vek a, ka thianghlimna hloh ngam ṭhaka ka tâlna chuan rah ṭha rêng a chhuah lo, a chhe lam kawng leh a âia rilru natna thûk zawkah min hruai lût a lo ni reng si. Ka nâ a ni.

Ka khaw hmuh a hla telh telh a, ka lu a hai em em bawk a.

Kawngkhar inhawng thawm leh ṭawng nawk nawk te, Ngaihzuala'n, "Rinduhawm, i harh em?" Tia min biakna pawh hla tak aṭanga lo ri chhuak ang mai a ni.

"A blood group eng nge, thisen unit hnih pek a ngai nghal dawn," tia an ṭawng nawk nawk thawm te pawh ka râlkhat hriat reiruai a, ka thinlung natna hian dam min ti châk hlawl tawh lo a ni.

"U  Ngaihzual..." tia phun sap chung hian ka maimitchhing ta a...

B+>[BeckirafARenthleI]<+®