7.DROGMA SEOL [A Becky Rafa Stories]

7.DROGMA SEOL

Ziaktu: Becky Rafa Renthlei

[Recap]

Ka khaw hmuh a hla telh telh a, ka lu a hai em em bawk a.

Kawngkhar inhawng thawm leh ṭawng nawk nawk te, Ngaihzuala'n, "Rinduhawm, i harh em?" Tia min biakna pawh hla tak aṭanga lo ri chhuak ang mai a ni.

"A blood group eng nge, thisen unit hnih pek a ngai nghal dawn," tia an ṭawng nawk nawk thawm te pawh ka râlkhat hriat reiruai a, ka thinlung natna hian dam min ti châk hlawl tawh lo a ni.

"U  Ngaihzual..." tia phun sap chung hian ka maimitchhing ta a...

-BRR Stories

Ni e, thih ve mai châkna ka nei fo ṭhin a nih kha, u Ngaihzuala boral hlimchhawn lai vel phei kha chuan dam reng tumna rilru ka pu lo ve tawp a; mahse, ka duh hunah ka thi thei si lo lai hi a ni. 

Eng emaw ri bengchheng leh ṭawng nak nak thawmah ka meng chhuak riai riai a, ka mit a phê vek, men fiah tumin ka khap fak fak a, ka mutna khum sira ṭhu chu ka mitsirin ka melh a, ka lu a rit lûk mai.

Ngaihzuala ka hmu hmasabera khum mawng lamah min hnungchhawn zawngin a ding a, vei lama ṭhu hi chu ka u Hmingmuana a ni. 

Ka thluak a fîm chho telh telh a, ka taksa nâ pawh ka hre ṭan, ka tâi leh mawngbâwr a na ut ut bawk.

"Tui ka duh.." thâm ṭiaka ka tih chuan Ngaihzuala a rawn inher nghal vat a, "Bawihi," a tih rual vêkin min rawn pan hnai ruak a, a mitmenga lawmna niawm tak lo lang chhuak chu ka hmu hman vuai.

"Nâ i la nei em, i harh ṭha tiraw?" zawi ruiha tiin tui in tur min pe a, ka lo ban vat, ka u erawh rem lo zet hian a muhil a, a awm ve char char tihna a nih dawn hi.

"Ka tâi bâwr vel a la na a," tiin ṭhut chhuah ka tum a, "I awm dan kha a rem lo viau a nih loh chuan che phut phut rih lo la aw.." tih pahin khum sîrah a rawn ṭhu hniam a, a lang pawr ve fap mai. Mutmu tuah ṭha lo hmel a pu hliah hliah bawk.

"I harh lawk si lo a, nizana khatia i awm aṭang khan vawikhat mah i rawn meng tawh lo nen min ti hlauthawng hman alawm, i nu kan hrilh ngam lo a, i u zawk a lo kal ta a nih hi," tiin ṭhutthlenga ka u muhil chu a melh zuk a, "Tunah chuan i u lakah ka zêp thei ngang tawh lo a, i dinhmun dik tak a hriat a ngai a, thisen unit hnih an pe tawh bawk che aw.." tia a sawi lai chuan, "Tuin nge min pe?" Tih ka lo zawt thuai a.

"Kan blood group a inan loh avangin ka pe thei lo che a, mahse, blood bank-a awmsa pakhat an pek bâkah che i u hian unit khat dang a pe leh che a, keiin blood bank a mi ka hnawhkhat thung... " tiin dam thlup hian min hrilh a.

"Nautêkha..?" Tia ka zawh chuan, "A awm tawh lo, tunah chuan nangmah chiah i ni leh ta, i ruala kal ve i phal chuan mal takin i awm ngai lovang," a tih zawm zat a, ka lo ner nasa mai.

Mit khap sak sak chung hian, "Ka nautê chu aw..." tiin ka insût hraih a, ka ṭah a chhuak ru lutuk tlat, khatia thí a lo chhuah khan hlauthawng tho mahila beiseina ka la nei ve fan a, hetia thukhuh awm lova 'A awm tawh lo' tia min han hrilh tlang tâkah hi chuan min den dan a dang zar ka ti mai. Awih loh ngawt chi a ni bik si lo.

Ka u a rawn harh a, ka mutna lam a lo en nghal thuai a, "Mâmbawih, i ṭha tiraw," tiin Ngaihzuala lam a hawi zui daih a, "Azual, intihfai tepawh i duh ve ang, ka awm tawha ka lo buaipui ve ang e, kan tibuai nasa em mai che," tiin inthlahrung tak hian a bia a. 

Ngaihzuala lah chuan, "Ka haw lawk ang a, zan lam chu keimah ka riak leh phawt ang, zanina a awm dan a zirin naktuk lama kan awm dan tur kan rêl ṭha dawn nia, engmah inthlahrunna tur in tan a awm lo aw," a ti dam thlup a, a fâla Ngaihzuala biak ka duh takzet.

"Mama, eng emaw in tur min leisak lawk la, Azuala awm lai hian," ka ti ve zaih a, "Eng nge i duh a?" Tia min zawh chuan Nestea ka inchâk thu ka lo sawi ve tawp a, îhe lovin a kal mai bawk a.

Ka u a chhuah veleh Ngaihzuala hnenah, "Mama khan nau ka chhiat tih a hria em ni?" Tiin ka zawt vat a, bu nghut chung hian, "A tan hriat loh theih a ni tawh lo, a farnu neihchhun i ni a, a ngaihtuah zia che leh a hmangaih zia che ka hmu alawm, doctor chîk takin a zawt vek," a ti ta a. Ka kawchhung engtin emawni  awm.

"Keimah min zawt a, engmah ka hriat loh thu leh damdawi in kan kal hnua hre ve chauh angin ka insawi a, a awih mai chuan ka ring, tuma hnena sawi lo turin min ti bawk a, nakinah pawh a zâwt ngei ngei dawn chea i inrinlawk thiam theih nana hrilh che ka ni. Bawihi, i u hi a lung a awi miah lo a nia, ka hnuaia thawk i nih vanga buaipui che anga ka insawi a ngai te kha a hrehawm lutuk tlat, fimkhur takin i tâl awh lohna tur tawk ṭawngkam chhâkchhuah i tum dawn nia, i nu phei chuan eng mah a la hre lo, hrilh a tum rih lo niawm tak a ni." Ti leh duahin min en vang vang a.

"Lungngai suh, eng mah a hre chhuak lovang, nangmah phei chu a ringhlel lo ang che, mahse, naute pa hi tunge tih min zawt ngei ngei ang," ka ti sap a.

"Kha kha chu thil chiangsa a ni a, engtin nge i tih tâk ang aw," a ti sup a.

"Tihdan tur chu a awm ve mai dawn alawm, va haw phawt la, chanchin ka lo sawi zel ang a, ka u in a hriat tawh tho tho chuan riak ve mah se a pawi lo," ka ti ta zawk a, ner deuh suk chung hian, "Keiman ka riahpui dawn che tih ka sawi tawh kha, midang mitmei ven ka tum miah lo a, tuna i tawrhnaah hian kei pawhin tel vena ka nei a, i tawrhna tinêp thei lo mahila ka fa a ni ve tho," tia a ṭawng laiin ka u a rawn lut ta si a, kan ṭawng zawm ta lo.

Nestea no hnih kengin pakhat zawk Ngaihzuala a pe a, "Bawihi, i ṭhu thei em?" tiin ka mut dan siam rem tum hian min lo hnaih a; mahse, ani aiin Ngaihzuala a che rang zâwk. Min rawn kuah tho a, lukham nghenga min ṭhut rem tir hnuah, "Ka haw phawt ang a, zan dâr 8 velah lo thlen hman ka tum dawn nia," tiin ka u a bia a.

U Hmingmuana pawhin hnial tumna a nei bik lo nge ṭha tê hian, "Zan lamah hna tlêm thawh tur ka nei a, inthlahrunawm viau mah se  i lo awm theih chuan ka lawm khawp ang, ka nu amah chiaha riah tîr kha a ngaihtuahawm ka ti deuh bawk si a," a ti a, ka u min riahpui ai chuan Ngaihzuala kianga awm ka la thlahlel fan tho.

Hemi hnu hian kan Ngaihzuala pawh a chhuak zui ve ta, ka u nen chiah kan awm a, a sawi tur ka huphurh êm avangin muthilh der mai ka duh hial. 

"U Ngaihzual, min ngaidam rawh aw, tun hunah hian dâwt ka sawi leh a ngai dawn ta si a, i hming Lalngaihzuala a lo ni kher kher hi chu ruat lâwk ang mai a ni," tia ka rilru ka kawm lai chuan ka u in âw a thian kharh a.

"Ka ngaihtuah ngun poh leh ka awih thei tlat lo, Bawihi, thudik tak min hrilh ang che, tuna i naute pa hi tunge, ngaihzawng i nei lo tih ka hria a, i u Ngaihzuala nen innei mai tawh tur innih laiin tikhan vanduaina a tâwk ta si a; tunah lah a thih aṭanga thla tam a ral hmain nau i paia i chhiat zui bawk a, zu nena i tâl lai khan mipa dukdak lo i awmpui tihna em ni?" Lungawi lo tih hriat tak hian a ti a.

"Ka fâ pa kha mi dukdak lo a ni lo, a ni ngai bawk lo ang," tih chiah ka sawi a.

"A nih, engvangin nge a ngaihsak loh che, i rai tih a hre lo nge nangmah chiaha tuar tura a kalsan che hi ka hua a ni, in boss hi awm lo phei se chuan i mualpho nasa dawn a nia aw, tu nge i laka hetiang titu hi..." tiin min zawt leh a. Ka ngawi ngal mai.

"Sawi ta che, i sawi hma loh chuan ka zawt zel dawn che tih hria la, ka nu beng a thlen hmá leh i mualpho tam hma hian thudik min hrilh rawh, kei talin thudik ka hriat hi a ngai a ni, tunge he naute pa hi?" Tiin min zawt nawn leh ngat a, a mitmenga thinrimna leh lungawi lohna nasa lutuk lo lang avang chuan awm nuamin ka awm lo.

U Hmingmuana hi keimah ang thova luhlul a ni a, ka sawi hma loh chuan min zawt sek sek dawn tih pawh ka hria.

"Kha nautê khawvel êng hmu ve thei lo tura chunglamin a lâk tak kha ka thisen ringa lo ṭhanglian tur a ni a, a pa chu Lalngaihzuala a ni," hniam raih leh zawi fiah taka ka ṭawng lai chuan ka u a rawn ding chhuak thut a, "Rinduhawm, eng thu lawi lo nge i sawi?" Tiin min vin ṭhawt a, a insûm hman lo a ni ber e. Vawikhat mah ka hmingpum hian min ko ngai lo asin maw le.

"Ka sawi ang chiah kha a ni mai, Lalngaihzuala fa a ni." Tia ka sawi nawn leh tâkah chuan a reh zui tlawk tlawk a, ka u hmela maktihna leh awih theih lohna lang dawt zut chu ka hmu vek. Kha aia thui khan sawi fiah ka tum tawh lo reng reng, a pa hming min zâwt a, thudik takin ka chhâng bawk a, a tawk.

"Engtin nge hetiang thil hi a thlen theih, a thih hma khan in lo chesual a maw, Biak in hawnga inneih te chu inla tum veleh ta nghal a, Pathian pawi in sawi avangin leh mihring buma inneih intumna kha chunglam hian a lo remti lo a ni ang e," tiin a kut a hûm ruh ṭeuh a, "Mama, ṭawng fimkhur rawh," tih chiah ka sawi leh.

"Ka farnu neihchhun hi hetiang turah hian ka lo dah chhin ngai lo che a, i landan phenah hian mizia engzata tam nei ang che maw? ani a thi a, tunah a fa i pum chhunga ṭhanglian tur lehzel pawh a lâksak ta che u a nih hi, na taka tuar tur reng i lo ni e.." tia a ṭawng leh hmuk hmuk pawh chuan thiamthu emaw sawifiah tumna ka nei lo hulhual. A ngaihdan danin ngai mai teh se.

"I duh duh sawia min dem ngat ngat dawn a nih chuan haw rawh, eng mah hi ka thlahlel lova dam châkna pawh ka nei lo, mualpho eng ang dawn mahila ka tumah ka chiang," ka lo ti hmiah.

"Bawihi, hetianga nun hmana hrehawm taka awm hi nuam i ti em ni, hmalam pan tumna pakhat mah nei lova beidawng ringawt tur i ni em ni a?" Dam deuh zawka a tih tâkah chuan, "Pathian hi ka tan a awm ve lo a ni ang e," ka ti chuai raih a. 

U Ngaihzuala boral aṭang khan he ngaihdan hi ka nei tawh, min hmangaih em emtu leh kan innghahna ka pa min lâksak a, kan tuar dam ve deuh ta maw tihah ka hmangaih ngawih ngawih u Ngaihzuala nat lâwkna pawh awm lovin tikha a ni leh a, hmalam pan tumin hetiang ruahmanna mak leh dangdai hi ka buaipui leh a, ka hlawhchham leh bawk. Pathian hi a awm tak tak lo a ni ang tih thlengin ka ngaihtuah kâi lo thei lo a ni.

"Damdawi in aṭanga ka chhuah hnuah Mizoram hi ka chhuahsan dawn, i farnu hi ka lo nêp em mai a, engmah palbuak leh chuan tur te, nat leh dan tur pawh ka hre tawh lo, chuvangin ka duh lam kawngah ka'n tlan law law ang e aw," chiang faka ka tih chuan, "I lo danglam ta hle mai," tiin a chhuak nulh a, a thinrimna bengdaih a tum tepawh a ni mahna.

Khum thawhsanin bathroom ka pan a, khua a thim a ni tawh mai. Chaw châkna pakhat mah ka nei lo a, Ngaihzuala lokal hun ka nghâkhlel ngei mai, ani bâk min hrethiamtu ka nei lo a, a lo sawi fo tawh angin, ka natna min ṭawmpui leh min paltlangpui huamtu a ni bawk. 

Ka u a lo lêt leh vat a, zanriah tur eng emaw a lo keng lut bawk a, inbe miah lovin kan ei a, kei phei chuan lem ka harsat lehzual.

"Tuna hetianga i awm avang hian zu hmuna tâl te kha i lo tum leh ang e, i mualphona i hliahkhuh zo tawh lovang," tia min hrilh chuan, "Mualpho huamin alawm maw le ka awm le," ka ti sak sak a, ka u mah nise ka zah peih tawh rih lo. Ka natna thûk tak hi engtikah mah ka tuardamin ka ring tawh lo hial.

"I rilru ti paukhauh la, rilru nêp deuh pu mah ta che kum 30 êm pawh i la tling lo a, u Ngaihzuala aia hmangaihtu che pawh i la tawng thei, a awm tawh lo na na na ngaia mahni intihhrehawm tlat tur a ni lo," tia min zilhna pawh ka bengkhawn duh eih nâng.

Ka ngaihtuahnaah Ngaihzuala a awm daih thung. Ani nen khan kan contract a la zo lo a, Sangtei nen inkawp leh mah se a hma ang khan kan awm leh thei tho tih ka lo ngaihtuah daih a, a fa hial pai tawhtu ka ni. Han dam ṭha deuh ila, vawikhat tal beihchhin duhna rilru ka pu chawpchilh nghal a, rilru inhawng taka Ngaihzuala nen vawikhat tal fa neih duhna rilru ka pu leh ta tlat. Á...ka thluak hi a chawmawlhin a â zo tawh a ni ngei ang.

Zan dar riatah chiah chiah ka lo ngaihtuah mek Ngaihzuala a rawn lut a, ka u a haw zui ve bawk a, khatia kan inhniala min zilh hnu khan ṭawngkam khat mah a chhâk chhuak tawh lo a, Ngaihzuala a mangṭha hnuah a haw ta kha a nia, a rawn inlan duh tawh pawhin ka ring lo. 

A farnu hi min duat viau mah se inneih hmaa u Ngaihzuala nen kan chesual anga a hriatna leh Biak ina inkutsuih kan tum ni-a a hriatna khan a tina viau ta ve ang. Thudik tak sawi chhuah tumna erawh chu ka nei lo a, ka ngawihbopui turte zinga mi a ni.

"I lo zia deuh em?" Tiin ka mutna bulah a rawn kal hnai a, "Zia ve reng mai, councelling class ka kal zo chiah," tia ka lo chhan chuan a nui ruh ruh a, "Ka rin dan vel a ni, a hmel aṭang khan a hriat vek alawm," a ti awlsam êt a, a lan dan thar sur leh fai hmel tak chu hmuh a nuam phian.

"Engtikah nge ka chhuah theih ang?" Tiin thu dangah ka pakai daih a, "Naktuk chawhnu lamah i zia deuh chuan i chhuak theiin ka ring," a ti ṭha ve mai.

"Ngaihzual, bânna theh luh ka duh a..." tia ka sawi veleh rang fahran hian min rawn en a, "Bân i duh amaw?" A ti hû mai.

"Umn...Goa-ah kal ka tum, helai hmunah hian ka leng ve lo," ka ti sap a, meng phar âwk chung hian, "Bawihi, thil hi ti rum rum zel lo la ka duh, mite pawhin nau an chhiata an beidawng kher lo, an hmangaih ngawih ngawih chân ta te pawh an awm ve bawk, mahse, beiseina nen hringnun hi an hmachhawn ve asin," tiin khumah a lo ṭhu a, ka sam pawr phang chûl mâm pah hian, "Tunlaiah hna hmuh a harsa a, nakin lawkah a ngheta luh dan te pawh a la awm maithei, bân tumna rilru pu rih suh.." a ti dam thluam a, ka chhâng lem hlei lo a..

A la hma bawk nen ka muhil tam tawh angreng si a, ka meng harh ṭha viau. Nautê lampang ka ngaihtuah duh lo lui tlat a, ka ngaihtuah vaih chuan beidawnna leh eng mah pawisak lohna lian tak hian min chîm nghal zel.

"Phone ka hman chhungin hei hi lo in rawh," tih pahin Ngaihzuala chuan Bawnghnute min thlitsak a, min duat huam angin a lang hran lo. Mahse, min ngaihsakna a tilang ve zeuh zeuh tih ka hmuh kân bik lo a, chhungkaw pa han ni ta se a mawhphurhna a hlen chhuak ṭha ngawt ang tih vel mai mai ka lo ngaihtuah daih.

Cabin Veranda-ah a chhuak phei a, khumah ka lo ṭhu thung.

"Ka staff te zinga mi a ni a, office hour-ah hetiang harsatna hi a tâwk a, ani kher lo atu a pawh nise ka ngaihvenin ka thlahthlam chuang lovang, thîkna rilru put ṭâlh tum tur a ni lo, i duh leh ani lo midang thîk tur zawng mai rawh," tia Ngaihzuala ṭawng ri ka hriat tâkah chuan Sangtei nen an inhnial leh tih ka hre mai.

"Tetaktê tê i khera huat tur i zawng zel dawn a nih chuan zawng ta che, ka ngawih reng avang hian ka dawhtheihna fiah tum tawh suh," tia a sawi zawh hnuah phone a off a nih ka ring, rawn lêt ta mai lo chuan a la ding khawmuang a, Ngaihzuala tan hi chuan a hahthlâk ru ve ngawtin ka ring.

Keima u Ngaihzuala ka ngaihtuah chhuak a, ani kha chu mipa famkim ni lo mah se, a theihna chin apiangah min ngaihsakin min hliahkhuha ka naupang zawk bawk nen keh thei dawmin min dawm ka ti mai. Chuvangin ka rilru zawng zawng ka pe a, a thihnain ka lakah nghawng a nei thui hle pawh hi a âwm ngawih ngawih asin, min hmangaihzia hrechiangtu ka ni tlat a ni.

Ngaihzuala a rawn lut a, nichina a ṭawng dan ang lo takin dam thlup hian, "Ngaihzawng neih hi ka tlin tawh lo a nih hi, Sangtei pawh a hma ang kha a ni thei tawh bik lo, kan inkârah eng emaw tak a awm a, kan inhnial deuh reng mai," tiin khum bulah a rawn ṭhu a.

"Keimah vang a ni, i nunah ka rawn lang a, kan inremsiamna midang hriattîr kan duh loh avang hian i tawrh phah a, in inkâr ṭha sa a buai phah vek bawk a, ka inthiam thei lo," ka ti sap a. 

"Bawihi, khatiang zawngin ngaihtuah tawh suh ka tih kha, i bulah Sangtei chanchin pawh sawi lang miah lo tur ka ni a, mahse; ngaihzawng ka nei tih hrereng chunga inzawmna siam dun kan nih kha, chuvangin, i lakah ka duh duh sawiin ka inbunruak theia hei hi nuam ka ti, englai mahin thîkthu i nei ngai lova, i phunnawi ngai hek lo, chuvangin Sangtei nena inhaua inhnial reng ai chuan i bula awm hi ka thlang daih zawk, ka hahdam ṭhin," ti duahin khumah a rawn ṭhu kâng a, "Zanin chu kuah ka châk hle mai che," tiin ka biang a tawk zauh a, ka lai leh ringawt tawh. 

"Rilru dang puin min duhna thinlung nei lo mah la, i ngaihzawng nen in inrem loh phahna tur ka nih chuan min thlah mai rawh, kan contract pawh thlakua nghah kher a ngai tawh lo a nia; kan nghah ve ber naute ti hi a ni zo tawh a, tawp rawh se aw..." ka lo tih chuan chîk zetin min en a, "Aih, ka la thlah phal lo che, Sangtei hi ka ṭhen mai ang," a ti ta a.

Ka thaw chhuak hak a, "Ngaihzual, thil ni lo pui pui sawi chhuak teh suh, ngaihzawng ka neih duh loh vanga nang nen dan zam kan ni, u Ngaihzuala lo kha chu tu mipa mah a ngheta kawp ka tum tawh lo, ka thinlung kawngkhar ka khâr tawh tih ka hrilh che kha..." ka ti bawrh bawrh a.

"Khâr sangsawm mah la, ka lo lut duh a nih chuan ka kik char char mai ang," a'n tiah. 

"I rilru hi a nghet lo lutuka chuvang a nih hi Sangtei nen in inkâr pawh a ngheh theih loh, nangmah hian i tihdik lohnaah ngaihdam dil la, a thik tur angin tumah hnaih tawh suh, tichuan in boruak a ṭha mai ang," duhthawh taka ka tih chuan, "Tuna kan awm dan hi a nuam ka ti a, inhau leh thikthu tih vel a awm bawk si lo, ka kalsan phal rih lo che a, kan contract hi a theih chhung kalpui ka duh...umn.." tiin ani leh ni lo angin a sawi fiah ve mial a, ka lo nui tawp.

"Mi inngaizawng ṭha lai pawt ṭhena luahlantu nih ka duh lo," ka ti leh a.

"I luahlan dawn hleinem, Lalngaihzuala hmei i nih avangin hmeiah pawh number one hauh lai i ni, i thu zawk châng pawh a awm ang, hrethiam em?" Nui chungin a ti a, a ho leh zo ta vek mai.

Nurse a rawn luh takah chuan khum aṭangin a insaseng a, Injection leh damdawi ei ngai te ka ei hnuah a chhuak ve leh mai a.

"Na deuh tuar lo hian damdawi inah awm la, tihian riahpui chein keimah lo midang buaipuitu tur han nei lo vel la.." tiin a nui ruh ruh a, "I rilru a chhia nih chu a.." ka lo ti hlar.

"Eng nge, chimbuaitu kan nei lo a, duh duh sawiin kan awm dun thei bawk a, in inah te chuan i u leh i nu an awm ve a, ka zalen hleinem, bâkah i u Ngaihzuala avang khan tlangval inleng han neih leh pawh a nuam chiahin ka ring bik lo," a ti a.

"Lo leng duh suh, ka duh lo.. kan inah engmah tih tur i nei lo hrim hrim.." thutak deuh zawka ka tih chuan, "In ina tih tur ka neih chhun chu nangmah Rinduhawmi kha i ni mai," tih pahin za fe hian a nui a, ka ngei a nia.

"Lalngaihzuala han zah loh dan em em hi, khatiang ringawt kha ngaihtuah mah ta che, daih rei ropui si.." tiin keia pawh chuan kan tuihnih veleh hrâm a, a nui nasa zual sauh.

"Ka lo mu ve ang aw, ka kuah ringawt che anga a bâk ka pêl dawn lo," tih leh thawh a rual a, kawngkhar chhunglamah a kalh fel phawt a, ka mutnaah a rawn mu ve ta a.

Khum a tê in a chêp viau naa kan leng ve mai, min kuah a châk thu a sawi leh hnuah ka insiamrema Ngaihzuala âwmah ka lu nghatin a bân veilam ka khêlah a nghat a; ka lai leh hû tawh.

"Muthilh tum la, zanin anga i harh ṭha a nih chuan naktuk chawhnu lamah i chhuah theih mai ka ring," ti sup a.

"Office ka kal thei rih dawn si lo a engtin nge ni ang?" tia ka zawh chuan, "Indim i ngai a, thil hahthlak thawk lo mah la, kârkhat tal chawlh hahdam i mamawh, keiman ka lo buaipui dawn nia, khalamah kha chuan i rilru tihah duh suh, ka hmei damlo chung chung hi ka phût lui lo a nia," tiin a nui suk a.

"Khati khan min ti ve ziah suh aw, i hmei nih châkna pawh ka nei tawh lo," tiin ka lo fiam zeuh a, "Lalngaihzuala hmei of Rinduhawmi, i thluakah khung tawh ang che.." tih pahin ka chhipah a khabe a nghat a, ka rilru puthmang a dik lo leh ṭan dawn, hetia engtin emaw min tih apiang hian u Ngaihzuala zâwk ka ngaihtuahnaah a lo lang vat zel. Ka thinlung a uire tihna em ni ang?

Ka lo mutui hle a nih ka ring damdawi ei tur pawha kaihthawh ka ngai hial a, "Nakinah ei se a pawi ang em, a muthilh ve theih chhun a ni si a," tia Ngaihzuala ṭawng ri ka hriat chuan ka meng chhuak a, nurse nen an lo ding dun a, min kaihthawh a lo phal chiah lo deuh a nih hmel.

"A hun takah damdawi ei chat chat a ngai," tiin nurse chu ka mutna bulah a rawn phei a, ka harh chiang ta e.

Office lamah a buai thu leh kal ngei ngei ngai a ni tih min hrilh a, "Doctor lo kal zawhah ka chhuak ang a, nangmahin i lo awm hreh em?" Tia min zawh chuan ka hreh loh thu leh a ṭul a nih pawhin ka nu ka ko mai ang tih ka hrilh a.

"Engmah a thim zawngin ngaihtuah miah suh ang che, i duh vanga titlaa paih i ni lo a, i duh ngawih ngawih laiin a kal zawk a ni, Bawihi, i nuna pawimawhna neite pahnihin an kalsan tawh chea kei hian an âi ka awh zo kher lo ang, mahse, kan pahnih hian fa dang neih tumin ṭan kan la leh thei ania," thutak zeta tiin kekawr ipte zen chung hian tukverh bulah a ding a, a thil sawi hian ka ngaihtuahna a ti thui hle.

"Ka dam ṭhat hunah kan la sawi dun dawn nia, tunah chuan engmah ka ngaihtuah thei lo," ka ti tawp.

A hmaa Ngaihzuala sawi tawh angin doctor rawn kal hnuah ka chhuah theih tur thu leh inlamah indim chhunzawm turin min chah a, "Insawiselna hranpa i neih loh chuan thla hnih khat han ral se a dang neih leh tumin ṭan in la ang chu maw le, nau vawikhat chhiat vanga beidawn tum tur a ni lo, in la ṭhalai lutuk.." nui var var chungin a ti a, nupa kan nih a ring tihna a nia, a va buaithlak e...

Ngaihzuala ka va melh zauh a, nui chung hian min lo en ve chiah bawk a, ka hawi sawn rang teh a nia, atu ve ve pawhin doctor hrilh fiah kan tum lem lo.

Chawhnu dar hnih velah hospital kan chhuahsan ta a, Ngaihzuala'n ka awmna bill vel a tum vek bakah kan in thlengin min hruaiin min buaipui vek a, ka nu pawh a lawm hle, "Azual, lawmthu sawi ngaihna kan hre lo, kan lawm a ni tawp mai," tiin thingpui a pe a, zanriah kîl ve turin a sawm naa pakhat lahin a hnar fithla ṭhak.

Ngaihzuala pawhin min rawn tlawh leh intiam chungin min hawsan ta a.

"Bawihi, ka hmuh hnu ang tlata hriatna ka nei a, ka hmuhna hmun ka ngaihtuah chhuak zo tawh si lo, i u Ngaihzuala te pawh a ang dâwn dâwn alawm le, pu fel tak i hrawn a, i vannei hlauh a nih kha," tih pahin ka room lamah kan inzui phei a, ka u Hmingmuana a awm lo hlauh a, ka lawm ru hle.

U leh nau kârah neuh neuh a awm hi chuan a nuam duh viau lo.

Damdawi in ka chhuahsan aṭangin ni thum a liam tawh a, ka hnaah kar khat chawlh pek ka ni bawk. Ngaihzuala'n bâng lo tura min nawr nasat em avangin bânna ka theh lut ta em lo.

Kan in lamah a rawn lang zui ta lova chu pawh amah ka ngen vang chauh a ni. Call leh whatsapp-ah kan inbe thei tho a, mi min rinhlelh theihna tura awm ka tum lo bur. U Ngaihzuala nuin min rawn kan a.

"Bawihi, kan fapa vanga i tawrhna zozai ka hmuh hian ka khawngaih che a, tihdan ka hre si lo, kan in lamah rawn riak pheiin a room te hi kârhnih khat han luah ve la, i dam deuh maithei asin," a ti a, min khawngaih tak tak tih pawh ka hria.

"Han dam ṭha deuh ila, ka la rawn riak dawn nia," ka ti ve mai a, thil ṭha ber a ni em tih erawh ka hre bik lo. Mipa dang lakah heti hian ka awm si a, u Ngaihzuala phatsan ang tlata inhriatna ka nei leh thut zel.

Ka nau chhiat avang hian ka ṭap fo lo naa Pathian laka ka helna a nasa zual sauh. Ka tihdik loh leh tih dik tur pawh thliar thiam hleithei lo khawpin ka ngawhngawl zo tawh a, engmah pawisak lohna leh mahni inkiltawihna ka nei tam tulh tulh bawk. 

A hmaa Ngaihzuala sawi, naute dang siam hna ka thawk peih reng a nia tia min hrilh tepawh ka bengah a châm reng a, ka ti ta sa sa ka thluak bûrah khung khawmin vawikhat tal beih chhin leh duhna ka nei leh tlat. Kei misual bawrlawk hian.

Kârkhat lai in lamah ka awm tawh a, keimah pawh ka chak ṭha sâwt a, ka hmel a dawldâng deuh e tih mai lohah chuan insawiselna em em ka nei hran lo.

Ngaihzuala ka hmu ngai miah lova, chhun lamah inbe lo mahila zan dar 9 a rik hi chuan kan inbe ngei ngei, thil ropui leh belhchian tlak eng mah kan sawi ngai lo a, mahse, rei deuh deuh chu kan inbe ve ziah tho. A mak ve êm asin.

Zan dar sarih a ni a, whatsapp message ka clear laiin Ngaihzuala dp a rawn bo thut a, kan inhriat tirh ata a dp vawikhat mah a la thlak ngai loh avangin ka text hmasa ve mial.

"Ka number i delete em ni?" Tiin.

Rang takin a rawn reply a, "Bawihi, lo hrethiam mai rawh aw, chhuah lawk kan tuma Sangtei hian a thîk em che avangin i number ka delete lawk a ni e, inhau buai ai chuan," tia thudik min hrilh chuan ka sa ve zak.

Mahse, lungawi lo anga lang duh si lo hian, "Nia, a ṭha alawm, ka rawn biain ka lo call hmasa ngai miah lo chea ka number delete ngai khawp khawp chu chhan a awm ngei ang," tiin ka reply a, ka ngaihdan a ni lutuk lo deuh.

"Ka lo be hmasa che a nih loh chuan message emaw call pawh nise lo ti rih suh aw," a la ti hrâm a, ka ngawihsan zui ta. 

Biak hmasak tumna ka nei tawh lo a, ka hua tihna ni lovin a dinhmun a khirh vel veka a inchingfel hleithei lo hi ka khawngaih ve deuh. Kei min thlah dawn se, ngaihsak zui loh theih lohvin ka awm zel a, mipa rilru ṭha leh gentleman tak a ni a, a tan a harsa ve ngawt chuan ka ring.

Nunphung pangngai zawhin kan kal chho ve zela ka hnaah pawh ka kal ve leh ṭan tawh a, kan thawhpui te an fela a naupang lam ka nih vang hian atu te pawhin min dawhin min hrethiam viau ṭhin. 

Ngaihzuala room-a kal tura koh ka ni a, ka va luh lai hian file nen a lo inchhawp hnawk nasa mai.

"I ṭha zel tiraw, lo ṭhu rawh.." a ti sup a, ka lo bu nghat.

"Ka lo biak loh che hi chuan i ngawi reng zela i chin tal min hrilh ve ṭhin la, engtin ti thei lo che mahila i chanchin hre lova awm reng hi chu ngaih a ṭha ṭhin lo," a ti leh a.

"Ka lo biak hmasak loh che chuan lo ti suh i tia nih kha," ka lo ti ve nghauh.

"Kha thil kha chu khami zan atan chauh khan alawm maw le, ka sawi kha i hriat reng pawh ka lo ring tawh lo a nia," a ti a.

"Minute khat lek rei ti a min kalsan lai leh hmanzana rawn call hmasa lo tura min hrilhna kha chu ka vawn rei ber turte zinga mi a ni." Ka ti hmak a, ka sawi chhuah zawng pawhin khatiang ṭawngkam min hman khum laia a hmel kha ka ngaihtuaha ka ngei lutuk tlat.

"A Rinduhawmi thlak thei em mai, theihnghilh daih rawh.." a ti leh a, ka lo ner nasa mai.

"Ka koh luhna chhan che kan sawi lawk ang aw, thil dang ka sawi leh hmain.." tiin a rawn ding chhuak a, "Zin chhuak theia i fit hman chuan ka rualin Mamitah kal ta che, kan pahnih chiah kan ni dawn a, hna chungchâng a nih rualin a hmaa ka sawi kha kan try leh ang chu ka ti, eng nge i ngaihdan.?" Tia min zawh thut chuan chhân mai dan tur ka hre lo.

"Mitmei ven a na awm em mai." Ka lo ti ringawt a.

"Chutiangah buai duh suh, Focus lam aṭangin nangmah an rawn theh chhuak che a, a naupang ber i nih vang leh i thil tawn te avang hian chhuak harha boruak dang hîp turin an duhsak che alawm, kei chu Sangtei hian min hliahkhuh hneh em a engmah khalamah buaina ka nei lo." A ti hmiah.

"Sangtei hian keimah min hria em?" Tia ka zawh chuan, dâr san âwk chung hian, "Hre nâng, i number chiah a hria a, tunge i nih a hre lo, i hming pangngai ka save lova Mâmbawhi tiin ka dah si a, i dp ah i hmel dah la chuan a hre maithei, mahse, i dah ngai si loh avangin tunge i nih rinchhin ngaihna a hre lo, nangmah zawt a be turin a chapo ve tawk," a ti leh a, a bialnu mizia a hrechiang thawkhata a lawmawm e.

"A ṭhat chu, kan inzawmna tuihnai lo zet hi midang hriat chi va ni suh, kan pahnih aia tamin an hriat chuan kan chhe vek a ni mai," ka ti a, dik a tih hmel viau.

"I rilru lo sêng zau la, Mamita kan kal thei a nih chuan tun ṭum chauh chu zakkep nei lovin kal ka tum dawn nia, ka birthday kâr a ni a, i kianga hman ka duh, a bâk ka beisei lo, i bula awma duat che ka châk a ni ber," thutak zeta tiin min en vung vung a, ka hmel chhinchhiah tum ang maiin a nia a lan ni.

Ka inngaihtuah tur thu ka hrilh hnuah ka chhuahsan ta rih a, a thil sawi khan nilengin ka ngaihtuahna a luah ngat ngat bawk.

Ka chhungte phalna thlapin zan hnih u Ngaihzuala te inah ka riak phei ve ta a, tuman min sawiin min rêl dawn lo tih ka hrechiang ve tlat.

An vaiin min duatin min ngaihsak em em a, u Ngaihzuala room-ah ka riak a, tisa thilah inzawmna kan nei hran lo, kan inhmangaihna khan inneih hun min nghah tir thei chauh zawk a ni.

A khumah ṭhuin ka ngaihtuahna ka kâwm a, "Tun ṭum chauh ka tum leh chhin ang aw, hmalam pan turin min duh dawn tih ka hria, ka damchhunga pasal ka neih loh nan fa ka mamawh a, chumi ka tihhlawhtlin chu min phalsak ka ring tlat," tiin u Ngaihzuala thlalâk ka bia a, a mak khawp mai, inthiam lohna ka neih rûk ṭhinna kha vawmbo ang duakin a awm thei nia.

Kâr khat tal awm tura min tihna erawh ka hnial a, nihnih leh zan hnih an kiangah an fanu angin ka tâl a ni ber.

Ka phone a rawn ri a, Ngaihzuala a lo ni.

"Tunah zan dar 9 a ri tawha khawiah tehhrep nge i awm? in inah i awm lo aw, dâwt rawn sawi duh suh," a ti hluk hluk a.

"Teh vak zel a che, u Ngaihzuala te inah ka riak a, naktukah ka haw chauh ang,'' dam thlapin ka ti a, a thaw hulh ri ka hre pha reng.

"Rinduhawm, eng nge maw i sawi le? Khatah khan eng mah tih tur i nei lo, i va riah avanga lo tho leh tur a ni em ni?" A ti chang fak a.

"Ngaihzual.." ka ti sap a.

"I u Ngaihzuala kha ka thîk ngawt mai, ka thîk takzet..." tiin phone a dah zui daih.

Lalngaihzuala khan eng thil nge a sawi kha! Keima u Ngaihzuala ka thik a ti em ni? 

Inthing nak chungin ka call lui leh a, vawi 3 zet ka call pawhin a pick up duh der lo. 

Ni e, mipa a ni a, mipaah pawh pa tak a ni, tuna ka awm dan hi atan chuan a huatawm viauin a nia ka rin. 

Kan contract-ah khan thikthu neih a thiang lo a, mahse, ani chuan ka lakah thikthu a nei ta. Eng rilru tak pu ang maw...?

B+>[BeckirafARenthleI]<+®