8.DROGMA SEOL [A Becky Rafa Stories]

8.DROGMA SEOL

Ziaktu: Becky Rafa Renthlei

[Recap]

"I u Ngaihzuala kha ka thîk ngawt mai, ka thîk takzet..." tiin phone a dah zui daih.

Lalngaihzuala khan eng thil nge a sawi kha! Keima u Ngaihzuala ka thik a ti em ni? 

Inthing nak chungin ka call lui leh a, vawi 3 zet ka call pawhin a pick up duh der lo. 

Ni e, mipa a ni a, mipaah pawh pa tak a ni, tuna ka awm dan hi atan chuan a huatawm viauin a nia ka rin. 

Kan contract-ah khan thikthu neih a thiang lo a, mahse, ani chuan ka lakah thikthu a nei ta. Eng rilru tak pu ang maw...?

-BRR stories

Khatia 'U Ngaihzuala ka thik' tia a sawi aṭang khan ni hnih a ral leh tawh a, kei pawh keimahni in lamah ka lêt phei ta bawk a, u Ngaihzuala nuin, "Bawihi, i tan kan in kawngkhar hi a inhawng reng a nia, kan fapain a hmangaih em che kha, pasal i lo nei duh ta a nih pawhin ṭha takin min hrilh ang a, keini lam pawhin kan tih theih tawkah tlanchhiat loh kan tum ang," tiin min hrilh thlap.

Kan Lalngaihzuala ve thung a reh ngar ngar a, a hma aṭang tawh hrim hrim khan ka be hmasa khât angreng, amah zawkin a duh hunah min rawn call-in message a lo hnutchhiah mai zel a, tun ṭum chu a reh ru tlat. Biak hmasak tumna ka nei lem lo. 

Ka laka thikthu nei ngam tur hi chu a ni lo maw le, ani chuan Sangtei a nei a, an inkâr ṭhain nghet tlut lo mah se an inthlah thei tak tak lo tepawh a ni mahna, 'Ka ṭhen dawn' tichung reng siin  tun hun hi an thleng a, amah a dik loh vang hi a ni ang u Ngaihzuala pawh a thîk em em ni.

Zan dar sarih velah doorbell a rawn ri a, ka nuin a va chhâwn a, zanin chu chhungkua kan kim ve tlat, ka u pawh a room-ah a tawm leh tawh a, min be lumlam lo ve khawp mai, a pawi pawh ka tih si loh.

Ngaihzuala leh ka nu an rawn inzui phei a, "Bawihi, Azuala a lo lang ve hlawl mai, thingpui hâng va lum rawh le," tiin min tîr nghal a, Ngaihzuala melh zauh chung hian, "I lo leng ve teh mial a.." tihpahin choka lam ka pansan a, min chhâng lovin a kiai suk ringawt.

Kan ina lokal ka remtih miau loh avangin min nawr lui ngai miah lo a, ka thu a awih phian. Tun hi ama duhthu renga a vawikhat lokal ve na a ni nghe nghe.

Thingpui nen ṭhutkhawmna lam ka pan a, "Lokal ka tumna a rei tawh a, hun ka nei lo lutuk nen zanin ka âwl deuha ka rawn leng a nih hi," tia Ngaihzuala'n ka nu a hrilh lai chuan thingpui ka pe a, "Bawhi, i zia zel em?" Tiin polite tak hian min bia a.

Ka ṭhat thu leh ngai ka awh tih ka sawi chuan, "Mamita kan zin tur chungchâng kha i nu sawipui ka duh deuh a, i theih loh chuan midang dap chawp a ngai ang a, i kal thei dawn nge dawn lo tih hriatchian ka duh vang a ni pakhat," a ti leh a.

Ka nu zawkin, "Zin chhuahna tur a awm tihna em ni?" Tiin Ngaihzuala a zawt a.

Ani lah chuan awlsam deuh hian, "Focus Project lam aṭangin Bawihi an thlang a, thla thar hian Mamitah ka hruai a ngaih hmel, ama hriselna dinhmun a ṭhat chuan," tiin a hmaa ka bula a sawi ang chiah kha ka nu a hrilh ve vek a, "A ngheta thawh dan te pawh a la awm maithei a nia," tia a sawi zeuh chuan ka nu beng a verh zar tih ka hre mai.

"A u lah hi a nghet hleithei si lo a, tihian an pahnihin hlawh nei mah se anmahni an intum tâwk vel a ni mai a, Bawihi tal hi han nghet thei se chu ka duh mang e," a lo ti ve bawk.

"Mamita kal tur chuan lo inring ve phawt sela tiraw, amah pawh a ṭha chho zel turah ngai ila, thla thar ni 21 hian kal tur a ni a, ni li vel châm a ngaiin ka ring," tiin ka nu a hrilh leh a, "Nia, amah a inhuam te chuan theih lohna chhan tur a awm hleinem, hna thila zin tur in ni a, keini lo dan theih ngawt pawh a nih loh chu.." ka nuin a ti dam thlap a, Ngaihzuala a rintawk zia a lang leh ta. Kan inkâr boruak hre lo a ni bawk a, sawi buai a tum loh hmel viau.

Chumi hnu chuan eng eng emaw sawiin an titi luam a, "Tikhan lo inkawm ula, ka mutsan ang che u," tia ka nu a thawh chhuah chuan Ngaihzuala a nui suk tih ka hmu. Mi hneh theihna dan riau te hi a nei a, ka nu rinhlelhna tur angin ṭawngkam khat mah a chhâkchhuak lo.

Kan pahnih chiaha kan ṭhut hnuah, "I u Ngaihzuala te ina va riah chu a nuam bawk maw?" A ti sup a.

"A nawmna sawi tur ka hre hran lo, mahse, min duata min ngaihsaka an fanu ang chiaha min en avangin hrehawm ka ti lem lo," ka lo ti ve mai.

"Thil ṭul ber chu a ni lo alawm, i va riah khan eng hlâwkna mah i chhar chhuah ka ring lem lo, rilru natna leh lunglênna i neih belh ang a, i nunhluiah a hruai kír leh ang che tih ka hlau ber," tiin chîk zet hian min en a, a mitah pawh ka en lêt ngam lo.

"U Ngaihzuala hi min theihnghilh tîr tum duh suh, ka thinlung phêkah a hming a chuang tawh a, nawhreh mai mai chi a ni tawh lo," ka ti hmak a, a ner sawk hmel ka hmuh chuan, "Nang leh kei kan inang lo a nia, nang chuan Sangtei i nei a, amahah chiah i rilru pe rawh," ka ti leh a.

"Mamitah min zui dawn a nih chuan zakkep nei lovin kan kal dun ang tih ka sawi tawh kha, Sangtei pawh ṭhen ka tum fel tawh a, hetianga nun hman hi ka ning ve tho, a bul berah chuan keima thiam loh vek a ni a, nangmah ka thlah thei chuang si lo che nen ngaihzawng neih loh law law ka thlang tawh, a hahthlâk em mai," a ti ta a, a dik pawh ka ring.

"Ani kalsan la, kei nen inngaihzawn a rem chuang hleinem, contract anga kan kal a, inngaihzawnna hming kan put loh hian a nuam zawk," tia ka chhânna avang chuan a nui hawk hawk a, "Tuna kan awm dan hi inngaizawngte awm dan a ni, a hranpaa sawi kher a ngai em ni, engkim kan tidunin kan sawi dun a, mihrang lakah kan inkâr kan thup a, a nihna takah chuan inngaizawng ang kan ni aw..." tihpahin ka ṭhutna lamah a rawn insawn a, ka lo tawlh hla det. 

"Kan inngaizawng dawn chuang lo," ka'n ti ṭha leh a, a nuih a zat hmel hle.

"Aw le, inngaihzawnna a awm lo ang, mahse, kan inkawp zeuh zeuh ang aw," a'n tiah. A nui ruh ruh bawk nen a ngeiawm thei a nia.

"I â tawh a nih hi nang pawh hi.." ka tichhuak hliai a.

"Nangmah vanga ât ka pawisa hleinem, finna ka neih chhun hi i tan ka dah anga kei chu ka lo â zel mai ang," zu han ti a!

"I chhe zet zut..." tih bâk sawi tur ka'n hriat miah loh chu le.

"I nu hnenah dil la, naktuk tlaiah chaw lo ei ta che, chhuanlamah tu emaw i ṭhian sawm la, ka inah zanriah min kilpui la ka duh," a ti teh daih a.

"Awi awi, i sawi duh zawk e a, i inah hian maw chaw ei tumna ka nei lo hrim hrim, tu inah mah ka ei chhuak ngai lo, a der pawhin min sâwm duh tawh suh." Ka lo ti bawrh bawrh a, "Êm em che hian a, ka ina chaw i ei avang khan i thih phah lovang," tiin a nui a.

"Ka thih phahna tur zawk nise ka lo ei mial mahna.." tia ka ṭawng lai chuan, "Rinduhawm," a ti hluk a, a ner sawk bawk.

"Eng nge? Thil awm ang ve deuh te hi sawi la, nang nen vantlâng hmuha inzui ka duh lo," ka ti tawl a, "I khirh dan em em te hi a, i ning ve lo em ni, nangmah leh nangmah pawh kha em ema i intih ka ring hial, u Ngaihzuala de dei dei tih fo pawh kha ka ning," a ti nghut a, ka lo ter ve at.

"I nin leh min be tawh suh, lo leng tawh lo la, min hre ngai angin awm lo ngam rawh, u Ngaihzuala hming ka lam rîk theih lohna leh ka sawi ngam lohna turah ka awm peih lo aw...i duh leh haw daih rawh," ka tih veleh, "I thin bawrlawk a chhuah leh hmain ka haw ang e, tui vawtin inbual la a reh deuh mahna.." tiin a ding chhuak a, a haw tak tak dawn a nih ka ring, ani pawh hi a thinchhe ve tho tih ka hria.

Kan veranda thleng ka thlah a, "Inngaizawng kan ni bawk si lo a, fawh che ka châk tehreng nen," ka bengbulah a ti sup a, keilah chuan, "Châk kha a tawk, i duh leh Sangtei kha lo va fawp rawh," ka'n tiah.

"Thîkna chhetê tal i nei ve lo em ni?" a ti nghut a, koki san âk chung hian, "Amahin min thîk tawh a, kei lehzel chuan thîk ka tum lo, a ho..." ka tih chuan a nui huk a, "Rinduhawmi tak hi chu aw, thîk la, min hau la, Sangtei hi ṭhen rawh te min ti ve ta che, i tih phawt chuan ka ṭhen nghal ang," a la ti tak deuh deuh a, "Kal mai teh...ka damchhung hian ṭhen rawh tiin ka nawr ngai lovang che," ka ti sap a.

"Min nawr la ka ti..." tiin a nui leh kur kur a.

"Ṭhen rawh ka tih vanga i ṭhen chuan i nêp aw, inṭhen i duh ve hrim hrim a nih leh thuhran nise, ti rawh, ti suh, tih avanga nawr kal theih mipa ka ngaisang lo. Kan inkârah thikthu neih a rem lo angin tumah thik tumna pawh ka nei lo a, u Ngaihzuala pawh thîk tawh suh.." ka ti leh a, "I sawi thui thei si, muttui le.." tihpahin ka inrin hman hmain ka chalah a fawp zeuh a, a kal a ni nghal deuh mai.

Hemi zan aṭang hi chuan zan dârkua a rik dêk dêkah min call ziah a, zantin a ni tawp mai. Chhun lamah kan inbe ngai miah lo tih theih a ni thung a. Office-ah pawh kan inhmu khât a, kan inhmuh ve chhunah pawh a mawi tawk chauhin kan inbia a, midang tan hriat a har ve ngawtin ka ring. Tuman min ringhlel chhin eih lo.

A chhan chu u Ngaihzuala thihna khan min hliahkhuh hneh êma tunah Ngaihzuala pawh a phênah a awm theih phah tih ka hre ve kar.

Zu ka in tawh ngai lo a, khatia Aizawl aṭanga kan haw hnu aṭang phei kha chuan thlanmualah pawh ka kal tlêm ta. Mahse, ka dam a nih chuan kâr khatah vawihnih tal chu ka la tlawh hram hram a, nu Hruaipuii zu zuar pawh khan min lo call ve ngei a, "Bawihi, i nun pangngaiah i lêt leh tawh em ni, ka ngai reuh hle mai che," a rawn ti a.

"Nia, tun atan chuan in ka tum tawh rih lo, mahse, remchangah ka lo tlawh dawn che nia," tiin ka chhâng a, ka chhiat ber lai leh nat laia min ngaihsaktu a ni a, zu zuar ni mah se, ka ngaina em em tih ka inhria.

Khumah muin ka online ngat ngat a, messenger aṭanga min lo betu chu hmeichhia a nih teh tlat avangin ka open nghal a.

"Azuala nen in la inbe ṭhin em?" Tih zawng hi a ni. Mak ka tih êm avangin a profile ka check vat a, Sangtei a lo ni.

Engtin nge keimah thleng thlenga a rawn tinzawn theih dan ka hre châk a, Ngaihzuala'n a sawi ka ring bawk si lo.

"Kan inbe khât khawp mai, hna thil leh thil ṭûl bîk a nih loh chuan inbiak chhan tur kan nei lo, eng ati nge a?" Tiin ka chhâng a, "Ka hre duh mai mai, theihnghilh daih rawh," a ti leh lawi si.

"A bialnu i ni maw?" Tiin ka hriatsa ka sawi lang leh kher a.

"Umn...ni e, tun lai hian hmeichhe dang biak a nei a, damdawi inah te khan a riahpui che avangin in inbiak zawm leh zawm loh ka hre duh a.." a ti leh a, a rilru hliamsak ka duh kher loh avangin, "A hnuaia thawk ka nihnaah min ngaihsak der ve a nih kha, engmah inngaihzawnna kan nei lo, i rilru tihrehawm lo la, inrem taka in awm ka duh" ka tih leh chuan, "Ka lawm e, mahse, rilru a ti hah ve ṭhin em a ni, nangmah nen in inbiak si loh chuan hmeichhe dang an la awm a nih ka ring," a ti ve zel a.

"Innei mai tawh tur in ni a, inrem hram hram tum rawh u.." tia ka chhan lehna chu min reply tawh lo, Sangtei ka khawngaih thar ta riau bawk.

Kei leh u Ngaihzuala kha chu thihna hmanga pawh ṭhen kan ni a, a hmangaih ngawih ngawih Ngaihzuala va chuhbuaia pawh ṭhen ang chi kha ka rilrem zawng a ni tlat lo. Sualin tâl puat puat mah ila, mi inngeih ṭha lai emaw mi nupa pawt ṭhentu nih hi ka thil duh loh ber te zinga mi a ni.

Ngaihzuala'n min lo call ve chiah a, Sangtein a rawn bia che em?" Tiin thu dang sawi hmasa lo hian min zâwt pawp a, kan inbiak dan ka sawi thuak thuak hnuah, "I duh leh zawt rawh ka ti a nih kha, Bawihi, nang chu ka ring tawk che a, amah ang hmeichhia i nih tlat loh avangin chhân dan tawk tur i thiamin ka ring reng a ni. A helh ber chu kan inngaihzawn leh zawn loh a ni a, kan inngaizawng lo lai hi a ni, thiamthu ka neih ve chhun chu.." tiin a nui hawk hawk a.

"Eng tin nge min hriat theih?" Ka lo ti a.

"Keiman ka hrilh, inzawmna kan neih tirh khan ani phatsan angah ka inngai lo, i tawrhna kha a na em a, ngaihtuahna fîm hmang hman lovin thutlûkna ka siam a, amah ṭhen tumna rilru ka pu lo tak tak. Mahse, tunah chuan ka peih tawh thlâwt lo, ka kham lutuk tawh, pasal neih emaw i duhna hmuna i awm hma chuan khawdangah pensan che tumna ka nei tawh lo a nia," a rawn ti duah a.

"Sangtei kha ka khawngaih," ka ti a.

"Ka khawngaih avang leh ka hmangaih avangin inṭhen ka duh lo rêng a, nang pawh a hun lai khan duhna leh hmangaihna che ka nei lo, i tumah i chiang êma ka pui mai chauh che a ni, kan duhdan ang veka kan awm theih lohna chin a awm ve a, tunah chuan min biak peih chhung leh kan contract anga kal i duh chhung na na na chuan i tan awm ka duh, ka fâ nu i ni ṭhelh a nia," tia a nui hawk hawk ri chuan ka chhungril a fan raih raih thei alawm maw le.

"Ka fâ nu..." ka lo ti nawn sap a.

"A nia lawm, he khawvelah hian nupui ka neih hma loh chuan chi thlah tumna ka nei ngai lo hulhual a, Rinduhawmi natna khan ka awm lohna tur hmunah min dah a nih tâk ber hi.." thutak deuh zawkin a ti a, "Pasal neih i duh emaw, kawppui dang i neih duh hunah puitling takin min hrilh la, chumi hunah chauh chuan ka kalsan ang che," a tih zawm leh a, a rilru put hmang hriat thiam a va har tehreng êm...

Zinglam dar thum thleng rak kan inbia a, amah nen tak hi chuan inhauna lian tham kan la nei em em bik lo. Thil chi hrang hrang kan sawi dun thei a, nulat tlangvalna lam hawi zawngin eng thil mah kan sawi dun lo.

Ni thar kan chuangkai a, Office lamah nitin hun hmangin kan zinna tur atana inbuatsaihna kal zelah kan buai dun hle.

Siami leh u Zarin min pui bawk a, a châng phei chuan thim rak thlenga kan thawh châng a awm bawk.

"Boss hian hna a thiamin a taima si a, in zin dun hunah pawh nêp deuhvin awm miah suh aw, an sawi danah hna a uluk em em a, tihdik loh neih hi a tihdan a ni ve lo an tia, fimkhur takin i zu awm dawn nia," tia u Zarin min hrilh chuan ka nui lui ngial a, atu ate pawh hian Ngaihzuala nen zin dun se min tih hmel hi ka tia, a chhan hriat va ni suh.

"A hnai telh telh a, ka huphurh tulh tulh," tia ka la ṭawng lai mekin Ngaihzuala a lo lut a, "Rinduhawm, Siami nen khan va bazar ula zanin tlai chu office ah chaw ei siam mai teh ang, kan hma hmel loh em mai," tiin Siami nen min melh zauh a, Focus hnuaia mite hi min khawtlai pui zeuh zeuh a, tunlai tak hian kan hah zual ka tih tawh kha.

Ngaihzuala vêk chuan ka kutah pawisa min pe a, "Siami, âwm in tih kha lei mai rawh u, mi panga vel ei tur a ni mai, Zari, ka room-ah min lo zui lawk teh," a ti leh zung zung a, keini pahnih lam a rawn ngaihven tawh lo hrim hrim.

Chumi hnu chuan ka Scooty in bazâr hnai berah kan kal a, Arsa, bai tur leh thil dang tlem kan lei a, rei pawh kan thang lo.

"Dik tak chuan a chhe lo ve thlâwt, a bialnu pawh kha a chhe chuang lo," tia Siami a ṭawng mawlh mawlh lai chuan a rûkin ka lo ner sak a, "A bialnu hmel ka la hmu chiang ve hleinem," tih chiah ka sawi.

"Kan office-a a lo hruai ṭumin ka kawh hmuh reng che kha," a la ti ṭâlh a, khatih lai hunah khan a hmel chiang taka hmuhna ka nei lo a, fb-a a profile picture-ah zawk ka hmu a, a chhe vak lem lo tih chu ka hria.

Eirawngbawl tur dang an awm chuan loh avangin kei leh Siami bawk kan buai leh a, Ngaihzuala ten meeting an neih avangin zalen deuh hian kan awm a, "Bawihi, beer i in duh em?" Tia Siamin min zawh chuan mak tih luat vangin ka mengphar âwk a, a inhmeh thlâwt lo.

"Naa, ve a che," nui chungin ka ti a.

"I awih lo em ni, Zokhawthar ami ka ṭhianten an rawn hawn a, min pe alawm, keimaha in ka peih loh avangin ka dah ṭha char char a, i in ve duh chuan kan inah va la ila.." a la ti tak deuh deuh a, ka lo nui tawp.

Zu in rûk ka chîn lai khan a nawmna ka pawh hman a, chutia Siamin a sawi lan tâkah chuan ka in châk ka ti mai. Beer in ringawt te chu a pawi chuang lo tia mahni inthiam chawp chungin chaw chhum chhunga va lak kan tum ta a, Siamin Scooty a khalh thiam loh avangin kan pahniha kan kal a ngai bawk si.

Dar nga leh a chanve velah kan inphur chhuak dun leh ta a, Ngaihzuala te meeting an la bâng lo fo.

A sawi ang tak takin Beer a lo ngah ngang mai, 'Can' li kan keng phei a, a room-ah pahnih kan la in ta lehnghal, ka rin aiin a ti thei zêk lehnghal vei nen, keimah zawk hian ka in ṭhang ve si lova a tui pawh ka ti tehchiam lo.

Office-a kan lêt leh lamin kawng lakah 'Can' khat kan in leh a, ka puar awk nimaiin ka hria, Siami a ṭawng barh barh a, Ngaihzuala hmelṭha a tih thu te keima u Ngaihzuala nen inang a tih thu bawk a sawi leh ta.

"Bawihi, a châng phei chuan ka lo en leh veng veng zel, in anna mak deuh an nei chiang alawm, an hming a inang chiah bawk si a," a ti leh a, "En teh, u Ngaihzuala chanchin sawi chhuah hi ka duh tawh lo, boss nen inang i ti a nih pawhin sawi chhuak tawh lo hrâm rawh," ka ti zawi raih a, "I rilru tihhrehawm ka tum vang a ni lo a nia," inthlahrun hmel takin a ti a, a rûi deuh em maw ni.

Zanriah ei hmain Ngaihzuala room-ah mipa pathum an inkhung a, keini u Zari leh Siami nen beer kan in ru bawk a, a va nuam mai mai e.

"Min hrechhuak ang e aw," tiin ka hawi zek zek a, u Zari lah chuan, "A ho lutuk, anni pawhin an in tho ang," a lo ti awlsam êt.

Kan rûi chhe chuang lo bawk a, zanriah kan eikham fel meuh chuan zan dâr riat a hnai kuar tawh. U Zari leh Siami an haw dun a, Zothana leh Rinthara an haw rual bawk a, kei chu Scooty ka ken a vang leh kan awmna a hlat ber avangin ka chhuak tharh a, "Bawihi," tia Ngaihzuala'n min lo koh chuan ka tâwi khawmuang leh rih.

Ngaihzuala nghakin ka lo ding a, ka bul a rawn thlen veleh, "Zu i in em?" Tiin min zawt thut a, meng buai nak chung hian, "Khawia mi nge maw in se min tih ni, eng mah ka in lo," ka ti nghat a, ner sawk chung hian, "Vawi tam i zu in leh i rui lai hmutu hian i mize danglam ka hriat loh ring suh, tu nen nge in in?" Vin lek lek hian min zâwt leh a.

"Ngaihzual, a ninawm aw, zu ka in lo ka tih mawlh mawlh chu," vin hlar chunga ka chhanna chuan a thin a ti rim deuh nge, ka inrin hmain a rawn kun hniam thut a, ka hmuiah a rawn fawp ta a, rei phei chu a ni lo.

Mitmeng danglam deuh taka min en chung hian, "Zu i in lo a ni mahna, beer i in thung," nghet charhin a ti ta a. Amah hian zu far khat mah a in lo a ni chiang mai.

"Beer te chu beer a nia, zu pawh zu a ni mai.. a ho..." ti liam puatin Scooty-ah ka lawn a, min chelh buai pawh a tum hran lo, "Nia, zu duh i nia lawm," ti hmuk chung hian a kalsawn a, ka run ngei mai. Ka lo kâi ve sek bawk nen Scooty aṭangin ka chhuk leh ngat a, Ngaihzuala kal liam tur chu ka ûm a, a hmaa va din khalh chung hian, "Nangmah alawm zu duh le, Lalngaihzual zuheh.." tih pahin ka kal leh nal nal a.

Min rawn umzui ka ring lo kha a nia, kan in ka thlen dawnah min tlanpel fua a, ka hma lawkah a rawn ding chawt a, kan insu teuh a nia, a han polite loh dan em em te hi a. 

Car kawngkhar a nem khar bur a, ka dinna lamah chak fe hian a rawn kal a, "Rinduhawm, nichinah khan eng maw i sawi?" a ti hmuk a, tlan chhuak thut lo turin ka insûm nasa hle, â..tlan tum pawh ni ila, a car in min dang tlata tlan luih chi ninghal lo chuan...

"Lalngaihzual zuheh..." ka'n ti leh hrâm a, thinrim inseh ruh ṭeuh chung hian, "Nang leh kei hi kan zu duh dan a inang reng, zanin tlaiah pawh a mipa zawkin ka in lo a, beer pawh ti mah la zu a tel tho tho," ti hmuk hmuk chung hian min en ngur a, "I  Car va hung sawn la a nih chu.." ka ti a.

"Rinduhawm, vawikhat mah min tham lo deuh deuhin ṭawng tawh suh, chuti a nih loh chuan..." tia sawi zawm duh lo lui ngat chung hian a kalsawn ta a, ka in thiam lo ve det.

A car tlan liam tur ka thlir zui vang vang a, zuheh tia koh chu a duh ngang bik lo a nih dawn kha, ho sihsah em mai.

Ka nuin min lo la nghak a, ruichhia ka nih loh avangin a hre kherin ka ring lo. Ka inbual a, biak zui tur awm miah lo hian ka mu nghal daih. Rinduhawmi hian eng thil thui mah a ngaihtuah tawh lo a ni tawp mai.

Thla thar kan chuang kai a, Mamita kan zin hun tur pawh nihnih chiahin min dang tawh a, insiam leh tih neuh neuh tur ka ngah avangin chawlh min pe a, ka thawmhnaw ken tur vel leh hna thila kan mamawh tur inchinfel nan ka nilêng a ni deuh ber.

Khami zan bâk kha Ngaihzuala nen mumalin kan inhmu tawh lo a, tun hi ka nauchhiat aṭanga thlakhat leh kârhnihna cham chiah a ni bawk.

Hun a ral chak mang e.

Ka zin hmain u Ngaihzuala thlan ka tlawh hrâm a, "I awm lohna hmunah ka tân hlimna a awm lo a, i ruala ka kal min phalsak ve lo hi a nâ ka ti. Nang zawng, natna leh hrehawm tuar tawh lovin i awm a, kei hian hrehawmna leh natna ka hmachhawn nitin a nih si hi.." tia ka ngaihtuahna ka kawm laiin ka phone a rawn ri a, ka rin lo deuhin Rammuanawma Lodge neitupa kha a lo ni. Teh tlat chuan.

"Bawihi..." a rawn ti thâwp sat a.

Thlanmuala ka kal thu leh nakina ka biak tur thu sawiin kan inbiakna ka titawp rih a, min lo be nawlh kha a mak ve êm asin. 

Ka nunah mipa mamawhna ka nei tlêm ve fahran lutuk a, fa neihna atan bâk ka duh lo ti ila ka sawi sual tam lo viau ang.

Zan lamah rin loh deuhin Ngaihzuala a rawn lang a, ka nu nen an titi leh luam tâk kha.

"Ka pi, kan awm dan tur a la chiang hleithei lo a, ni li châm tur angin ruahmanna kan siam taknaa sunday kan ban tlang a ngai thut mai thei bawk, duh leh nakinah kan rawn hrilh ṭha mai dawn che nia, Bawihi i ngaihtuah dawn si a, ka lo sawi lâwk a ni e," tia dam thluama ka nu a hrilh chuan kei ka lo meng buai nak thung.

Ka hnenah Sunday châm thut a ngai dawn tih a la sawi lang lo reng reng a, tunah lem ka nu bulah a sawi lang leh si. A ngaihna ka hrethiam mai mai lo e a.

Ka nu lah chuan, "I bula a awm chuan ka ngaihtuah nêp deuh, fimkhur takin awm ula midang mit tikham zawng leh sawi sep kai lo tura awm in tum dawn nia, khawi hmunah nge in innghah dawn?" Tiin a zawt a.

Ngaihzuala chuan awlsam têin, "Kan thlenna tur chu an lo ngaihtuah fel tawhin ka ring, Bawihi nen hmun khatah kan awm ang a, District hran aṭanga lokal te nen kan inchîm buaiin ka ring lo," tiin ṭha tak hian a chhâng a, tuna a sawi zawng zawng pawh hi ka hnenah vawikhat tê pawh a la sawi lang lo.

"Bawihi, theihnghilh te kha i nei ang e," tia min biak veleh, "Dâr engzatah nge kan chhuah dawn?" Tih ka zawt a.

Zing dar ruk aia tlaia chhuah a duh loh thu leh Aizawlah rei vak lo tih tur a neih thu min hrilh a, zin tur kan ni bawk nen a lêng rei lo ve teh tlat.

"Bawihi, Azuala ka ring tawka in pu a nih angin zah hle ang che, i tana a ṭhat tawhna zawng zawng kha ngaihtuah la, a mualpho theihna turin eng thil mah ti suh ang che," tiin min la hrilh hrâm. Ka "Aw, e.." liam ve tâk hi...

Ni e, inzawmna chhut chah tumin ṭan han khawh ve ṭhin mah ila, thlahnih khatah kan awm dun theihna tur kawng a lo kaw ve leh tlat zel.

A tuk hma takah Champhai kan chhuahsan ta a, ama Car a keng a, a hmaa kan lokal tawhna thlâm dinna zawn kan thlen chuan a ding dat a, "Duhthusam awm lohna hmuna duhthu kan sâmna hmun kha a nih hi, helai hmunah hian i 'Pro' aw.." tiin a nui huk a, ka va ngei mai mai tak.

"I ṭawng thei..." ka ti hlak a.

"Vawi engzat nge i virgin tawh kha Rinduhawm.." nui chungin a la ti cheu a, "Vawi thum leh tlêm.." tia nui chunga ka lo chhân avang chuan a nui nasa zual sauh a, "Ruah a lo sur hian ka hrechhuak ṭhin che, a sur thut hian.." thutak deuh zawk hian a ti ta a.

"Chuti chu Fur lai tih lohah chuan min hriatchhuah dawn loh chu.." ka lo ti ngial a, "Nang pawhin min hrechhuak ṭhin tih ka hria a nia, i luhlulna leh i chapona khan i hriat rengna thaibo a tum mai chauh a ni, i tan a hmasaber ka ni a, i thinlungah ka awm tawh," inringtawk taka tiin a tlan chhuak leh ta a, ka chhâng zui ta lo.

Aizawla an inpuiah kan pêng zuai a, a farnu Apuii a lo awm a, min han en chîk leh mai mai khawp a, a nuam lo duh teh a nia.

"Apui, ka ṭhiannu hi Bawihi a nia, Rinduhawmi.." tiin min inhmelhriat tîr a, "I hmelṭha reuh hle mai," tia a nuih var var tâkah chuan ka ngainat zawng a nih ka ring nghal mai.

Thingpui kan in a, muangchâng lovin kan tlan chhuak leh ta a.

Kan zin kawng a thui leh dawn mang e.

"Bawihi, Hotel-ah kan innghat dawn a, double room ka hauh a nia, tuna kan kal chhan hi hna thil a nih rualin thla khat liam taa i hloh tâk kha a dang siam leh tumna rilru ka pu a nia, ka hnenah i inpe ta sa sa, a tawp thlengin kan bei chhin a ni ang chu," tiin tlang hrêk hrâwk hian a sawi ta a.

"Hun kan nei dawn em ni?" Ka lo tih chuan, "Chhun lamah chuan kan nei kher lovang, zanah kan âwl thung dawn alawm, tun ṭum chu rilru inhawng takin aw," a ti sup a.

"Ka hre lo le, a kâr a la rei lo si a, a hlauhawm ang em?" Tia ka zawh chuan, "Eng mah hlauhthawn tur a awm lo, a hmaa a chhiatna chhan pawh kha zu i in nasat vang a nih ka ring, damdawi te kha i ei bawk si a, tum ṭum chu theihtawpa fimkhur kan tum dawn nia," dam thlupa tiin kawng a en uluk hle a, ka mitsirin ka melh ru zeuh zeuh zel.

Dârkar kua ṭha zénzâwn kan tlan hnuah Mamit khawchhung kan lut ve ta a, kan thlenna tur Hotel pawh a pangngai hmel khawp mai.

Ka nu kan thlen chin ka hrilh zel a, Ngaihzuala kianga ka awm vang nge a ngaih a ṭhat hmel viau. Nidang angin min zilh vak vak ta lo.

Kan room tur min kawhmuhna lamah kan inthiar lut a, khum pahnih a hranga awm chuan ka mit a la hmasaber.

Ngaihzuala a che vat a, "Hetiang hi ka ngaina lo.." tih pahin khum pakhat chu a nawr tawlh a, a dawhzawm hmak. Ka nui chhuak ta hak hak a, kan kal lama boruak rit churh ang kha vawmbo ang duak a ni leh lawi si.

Ei leh in mahnia insiam theihna a lo ni lehzel nen ka phur ru ta phian a, "A theih chin leh kan hun neih dan azirin ei tur kan insiam anga kan hman ta lo a nih leh a order theih tho.." tiin min hrilhfiah a, ka huphurh ang aia a nawm hmel avangin ka awm a nuam ta deuh.

"Lady first, inbual hmasa la chumi chhungin eng emaw ei tur ka lo order ang e," tiin a thawmhnaw dahna bag a hawng a, naktuk zing dar kuaa in report chauh tur a nih vangin a hmanhmawh thlak loh tih a sawi bawk.

Thuawih deuh hian bathroom ka pan a, zin kawng kan zawh thui bawk nen ka taksa a kham ut ut a, ka nuam tehchiam lo a ni ber e.

Ngaihzuala sawi dan hmangah kha chuan helai hmunah hian kan contract angin naute siam hna kan thawk leh dawn a nih hmel a, a hma aṭanga ka lo ngaihtuah lâwk tawh a nih vangin zâmna rilru ka pu miah lo.

Ka inbual zawh veleh Ngaihzuala a lut ve nghal a, hun liam tawha kan awm dun ang kha chu a ni ta lo. Tlemin kan innêlin kan inpawh deuh tawh a, kan boruak a zangkhai bawk.

Kan zanriah tur nghâka kan ṭhut laiin Ngaihzuala a thutak deuh thut a.

"Bawihi, helai hmun kan kal hmaa ka lo sawi lawk tawh ang khan zak kep nei chung leh midang ham tel chunga nang nen hun hman ka duh tawh lo. Chuvangin nizan hmasa mai khan Sangtei nen kan inkâr ka titawp ta a ni. Tunah chuan min pumbilh thei ta, Seol kan dâi dar leh dawn a nih rau rau chuan, nangmah nen chiah ka duh aw..." a ti hniam ruih a.

Mit khap fak fak chung leh sawi ber tur hre lo hian ka che sek mai.

Kan Lalngaihzuala hian nupui atana a lo hual lâwk, kum tawp lama 'tiam tlat e' tia a chhampui tur a ngaihzawng a kalsan tih ka hriatna hian min shock êm a ni.

An inkâr ṭhat tawk tawh loh vang pawh a ni thei, ka rilru a hmin theih nan inṭhen anga insawi fihlim a tum pawh a ni thei bawk.

A thusawi hi awih tur nge awih loh tur ka hriat miau loh avangin ka ngawi zui ta vang vang a....

Helai hmuna kan awm chhung hian engkim ka hriatchian ngei ka beisei, dâwt nge thutak tih hi....

B+>[BeckirafARenthleI]<+®