9.DROGMA SEOL [A Becky Rafa Story]

9.DROGMA SEOL

Ziaktu: Becky Rafa Renthlei

[Recap]

Mit khap fak fak chung leh sawi ber tur hre lo hian ka che sek mai.

Kan Lalngaihzuala hian nupui atana a lo hual lâwk, kum tawp lama 'tiam tlat e' tia a chhampui tur a ngaihzawng a kalsan tih ka hriatna hian min shock êm a ni.

An inkâr ṭhat tawk tawh loh vang pawh a ni thei, ka rilru a hmin theih nan inṭhen anga insawi fihlim a tum pawh a ni thei bawk.

A thusawi hi awih tur nge awih loh tur ka hriat miau loh avangin ka ngawi zui ta vang vang a....

Helai hmuna kan awm chhung hian engkim ka hriatchian ngei ka beisei, dâwt nge thutak tih hi....

-B®® Stories

Zanriah tuihnai tak kan kil dun a, zu a in dawn emaw ka ti a, a in lo teh mial! 

"I taksain a ṭhatpuina tham ei rawh aw, hmalam pan i tum a nih takzet chuan rilru, taksa a fit ṭhat a ngai a nia, Bawihi, ka ti tak tak, i na lai vawi tam hmu tawhtu che ka ni a, i nat nawn leh ka duh lo," tia min enin a hmelah tihderna reng a lang lo. 

"Hmalam pan duh mah ila, ka lo awm tawh danin a zir miau si lova ka ngaihtuah chhuah a piangin ka nautê kha ka lainat ṭhin, a nihna takah chuan naupâi ka ni tih ka inhriat lohna leh ka duh dan ka dah pawimawh hmasak avanga khatianga thil thleng kha niin ka hria a, ka inngaidam thei ngai dawn lo a nih hi.." ka ti a.

Rei fê a ngawih hnuah, "Kan ta tur ni lo hi chu uibetin chelh din pawh tum ila kan chelh theih an ni lo, nangmah indem eng ang mah la, nunna chunga thuneitu i ni tlat si lo atin ni.." a ti hniam ruih a, a thil thlir dan pawh a dik ve pah reng.

A hmaa kan awm dan leh tuna kan awm dan chu inpersan tak a ni ta. Kan fel famkim ta e tihna lam a ni lo a, Ngaihzuala pawh a biak tlâkin kan pahniha fa tur mihring chang zo ta lo khan kan nun a sawi danglam deuh a ni mahna. Chhungrila dam kim si lo hian a tu ve ve pawh kan awm ni berin a lang.

"Sangtei hnenah chuan kîr leh mai rawh," ka tih thut chuan, min en vang vang a, "Min rinhlelh a bâng dawn chuang lo a, ngaihdam dila siam ṭhat ka tum pawhin a duh lo, ka dik lohna ka pawm ngam a, ngaihdam harsa min ti a nih pawhin ka dem lo, nang ka kalsan thei ngawt bik si lo chea a bul ka ṭan tawh a, a rilru tihnat belh leh âi chuan kal mai hi a finthlâk zawk," a ti ta a.

A sawi dan hmangah pawh diklohna a awm hran lo.

"Sangtei chuan a ngaidam thei ngang si lo che a maw?" Ka la ti hrâm a.

"Thei lo, kan awm dan engkim hre si se lo mah se, ka danglamna hmu thiam tur khawpin kan inzui tam ve tawh a, in pahniha tih nat che u âi chuan ka kawng tur thlan fel hi ka tih mâkmawh a ni, i insiamrema nunphung pangngai i zawh theih hma chu i tan awm reng ka duh," a ti nghet churh a.

"Ngaihzawng neih ka duh si lo alawm, hetia hmanruaa ka hmang che hi ka inthiam lo lutuk tho. Mahse, nang chuan khawiah mah min sawi chhuahsak dawn lo a, heti kawngah hi chuan ka ring tawk che," ka ti leh lawi si a. 

Chal chuar nak chung hian, "Kan inkârah hian eng thil mak nge thleng tih tun thleng hian ka la hrethiam thei lo," tih pahin a tho chhuak a, "I chau lutuk ang, zanin chu hahdam taka mut kan tum dawn nia," dam thlapa tiin bedroom lam a pan a, kan inbiak dan pawh a dik chho ṭan viau chuan ka hria.

Khum erawh a pawh zawm vek tawh a, rui lo hai lova han mut tâkah chuan ka zum dûk mai.

"Muthilh tum rawh aw, thinthi leh enghelh nei miah lova mut tum la, i kiangah ka awm zel dawn alawm," tiin min rawn kuah a, mak deuh maiin ka thlâ a muang huai huai thei nia.

Tisa thil tenawm leh ṭawp, ruihtheih thil nena ṭangkawpin bul kan ṭan a, kan awm tawh dan kha sawi leh tlâk pakhat mah a awm lo. Meidîl kalna kawng dik tak kan zawh dun a, inhmangaih chu sawi loh tisa in îttawnna mai maiin kan tâl dun a, fa neih te chu kan la tum leh ta nghal a nia, ka ngaihtuah thui poh leh ka zuanluhna khur kha a râpthlâk ka ti tawlh tawlh.

Ka thaw halh a, zin chau viau e ti lo chuan ka mut a chhuak thei hlawl lo. Tunah lah tù khaw kha hriatpui lohvin khum khatah kan mu dun leh a, tâl chhuak leh tur pawhin Ngaihzuala lakah hian ka intât lût thûk tawh tih ka hre ve kar bawk si.

Ka muthilh theih ngang loh avangin zinglam dar hnih velah ka tho chhuak a, Ngaihzuala pawh a rawn harh vat tho.

"Bawihi.." tia min koh chuan, "Muhil leh rawh.." ka lo ti a.

"Engin nge i rilru tibuai, i u Ngaihzuala i hrechhuak leh em ni?" zawi ruih hian a ti a. 

"Tuna kan awm dan hi a ṭha thlâwt lo, kan contract pawh hi ka ning tawh, a siam ṭhat dan tur ka hre bawk si lo, fá pakhat tal ka duh vanga awmpui che ka ni a, chu lah ka hlawhchham si, i bialnu kalsanin keimah min venhim duhna i nei a, Ngaihzual, kan awm tawh dan kha siam ṭha thei lo mahila kan awm leh zel dan tur hi ka ngaihtuah thiam tawh lo.." ka ti tlang pawp a, ka thaw chhuak hliai a, ka tâwt up up.

A rawn ṭhu chhuak a, a sam tuai puat chung hian, "I duh dan sawi rawh, Contract anga kal i duh tawh si loh chuan engtia awm turin nge min duh, thil pakhat chiah ka sawi ang aw, tun dinhmun atan hi chuan ka kalsan thei lo che, i natna leh i tawrhna ṭawmpui che ka duh ka tih tawh kha, keimaha i tum ber leh i duh ber nautê neih kha vawikhat tal kan beichhin leh anga eng nge i ngaihdan?" a ti ta a.

"A nih leh naute chu nei ta ila min chuhpui ang em, a hma pawhin mawhphurhna lâk i tum tlat a, keimaha paltlang i rem ti si lo a nih kha, min chuhpui dawn lohva ka pumbilh thei a nih chuan ka ti ta sa sa vawikhat dang beih leh chhin chu ka tum ang, a ṭha lo tih ka hria a, mahse, duhthlan tur ka nei ngang lo a ni. Tichuan, ka duh ang a thleng dik a nih chuan he SEOL ṭawp leh ngaihawm loh zet hi ka kalsan vang vang tawh ang,'' ka ti ve ta a.

"Ka chuhpui lo ang che, kei pawh hetiang thil thluak tibuai vek thei angah hian ka intât lût leh tawh lo ang a, i hriat tura ka duh chu, pasal neih tumna emaw mipa dang pan duhna i nei a nih chuan min hrilh hmasa ang che aw, i tan ka huam thui hle a nia, ka sawi chhuak thiam chiah lo nain Rinduhawmi duhawmna ka hmu thiam chho ṭan mêk bawk, pangngai taka inngaihzawnna kawng zawh ve ka duh khawp mai," tia a sawi chhuah tâkah chuan thâwl huai hmel a pu deuh.

"Inngaihzawn i duh a maw?" Ka lo ti hâ a.

"Duh e, kan inngaizawng a nih loh chuan i lakah thîkthu neih a rem lo, zu i in pawhin ka khap ngam lo che a, i thinlung ka duh tel, i taksa ringawt ka khawpkham lova a vaiin ka duh, nangmaha awm zawng zawng kha ka duh vek aw, ka rilru puthmang danglam ta dâwrh hi keimah pawhin ka hrethiam tawh bik lo," meng hniam raih chung hian a ti leh a.

"Zanin hun min pe la, naktuk chawhnu lamah ka thutlûkna ka hrilh ang che, ka zawng zawng pék che erawh tun dinhmunah chuan ka thei dawn si lo a, a tawp awm lo inngaihzawnna a thleng leh ang tih ka hlau êm a ni," tia ka sawi lai chuan ngun lutukin min en a, "A tawp ngaihtuah thleng mah ta che, kan thlir theih chin thui ber erawh beiseina nen kan thlir dun ang a, kumin chauh hi chu ka lo pumbilh ve ang che, hmeichhe dang pakhat mah seng lût lovin kumin chauh..." ngenngâwl taka tiin khum aṭangin a tho chhuak a. 

Ka ṭhutna Semi Sofa lamah a rawn phei a, min hnaih chêta lo ṭhuin, "I eng ber hi nge ka thlah theih loh ka hre lo, kalsan tur ang chea ka ngaihtuah a piangin," tia ka kut vuanin a âwmah a nghat a, "Helai hi a na ṭhin, Bawihi, ka inhrethiam lo," tiin ka kutah nghet takin a hûm a, lâksawn tumna pawh ka nei bîk hek lo.

"Ngaihzual.." tiin ka chhoh melh teh ngawt a. "Kan awm tawh dan leh kan inremsiamna ṭenghneng zet kha zuankahlênin bul kan ṭan thei a nia aw, kan tân thil thar danglam tih leh tur a awm tawh chuang lo, i thianghlimna lâksaktu che Lalngaihzuala hian i lakah thluak fîm a hmang thei si lo a nih hi.." fiah fai thlupa tiin a lamah min pawt hnai a, "Ka va han fâwp châk tak che," a'n ti leh rih. 

"U Ngaihzuala âiawh tîr che ka tum lo a, i lakah feelings ka nei tam hran lo. Mahse, i thil sawi zawng zawng te avangin ka ngaihtuahna ka lo sêng zau dawn nia," tia ka chhânna chuan a tilawm nge lawm lo pawh ka hre bik chuang lo a.

A ni rêng bawk a, ka taksa neiin vawi tam mipat hmeichhiatna hmang dun mah ila, Lalngaihzuala hmel hi u Ngaihzuala zâwk khan a hliah tlat atin ni. Chuti ni lo se hetiang mipa hmelṭha, eizawnna kawngah pawh zahpuiawm lo tak leh chhungkaw pangngai aṭanga seilian hi ka ban pha hauh lo ang, awm duna hun hmang tam ta chu han ngaih châng ka nei ve bawk, mahse, rei a ni ngai lo, ka thinlung sak tak hi a chhu keh zo lo ni berin a lang.

Zinglam dâr thum thleng rak kan titi dun a, vawikhat pawh kan infawp lo, inpawh hûrh lo mahila a rilru puthmang a sawi chhuak ngam te hi mi puitling a ni tih lantirtute zinga mi a ni.

Ka lo muhil ve daih a ni ngei ang, ka harh leh chuan keimah chiahin ka lo mu tawh a, a reh hian a reh tlawk tlawk a, rang taka ṭhu chhuakin Ngaihzuala ka ko a, min chhângtu an awm lo. Ngaihtuahna ṭha lo deuh ka put hmain bathroom leh choka lam ka en kual zung zung a, a hmêl reng reng hmuh tur a awm lo.

Bedroom lamah ka let leh a, a phone nizana a charge kha a lo awm tawh bawk si lo nen ka hrilhhai viau a ni. A rilru thlâkin min kalsan em ni ang? Â chutiang êm chu a tiduhin ka ring bawk si lo.

Sana ka ena zinglam dar sawm a lo pêl tawh lehnghal, vawiin hi kan inreport hun tur a ni tih ka hriat chhuah meuh chuan rang lutukin ka intifai nghal a, dârkâr chanve dang a ral hnuah pawh Ngaihzuala a la rawn lang ta lo fo!

Ka phone phawrh chhuakin ka call nghal a, vawi 5 zet a ring ral ṭhak. Chutah meuh chuan ngaihṭhain ka awm thei tawh reng reng lova pawnah ka va chhuak thul, tu hmel mah hmuh tur awm lovin a reh hian a reh tlawk tlawk si. Tuna kan thlenna hotel neitute biak pawh theihna number lah ka nei chai si lo.

Khumah ka ṭhu leh hnawk a, helai hmuna ka kal ve nachhan hi ka hna chungchângah a ni a, vawiinah tih tur ka nei ve em tih hriat tumin Ngaihzuala zawhna châng ka lo hre si lo, Meeting neihna tur hmun lah ka hre lo nasa mai bawk a, Mamit hi ka vawikhat kalna a ni a, a mual bovin ka bo a ni tawp mai.

Ka beidawng tihngaihna hre bawk si lo chuan Siami ka han call teh ngawt a, "I reh rei ka ti rêng a, a nuam em?" Tiin a nui hawr hawr a,  "U Zari kha han zawt lawk teh, kan meeting na tur kha khawi lai nge tih ka hre duh a, Boss zawh zel chu a nuam lo," ka ti ve zaih a, "Awi, in la kal nange?" Tiin mak tih hmel takin min zawt lêt hu a, Ngaihzuala a kal tawh thu ka sawi ve tawp. Keimah kal a ngai rih lo angin dâwt ka la hrilh zui. Hahthlâk thei mai sia maw.

U Zarin min rawn hrilh ngial pawhin ka man fuh hleithei chuang lo a, ka 'Aw, e' liam ta vel mai mai.

Eng mah ka la ei lo a, ei tur pawh ka hmu lo, order na hmun tur leh an number pawh ka nei chuang lo ka tih tawh kha, a khât tawkin tui vawt ka in leh ringawt zel a, ka thin a rim tak tak ṭan tawh, Ngaihzuala lahin min callback a tum hek lo.

Hotel kawtah ka chhuak thla a, a hmun a fâlin mi teivâk hmuh tur an awm lo a, a hnu fêah hnamdang pakhat hi hotel chhehvel tifaiin a lo awm mial a, ka pan hnai a, "Khawi laiah nge eitur ka lam ang? mi thar ka nia," ka'n ti ngial a, a nui suk suk ringawt. 

English-a ka biak pawhin a hrethiam chuang lo, Hindi kâwi khat mah ka thiam lo ve thung a, ner sak chungin ka kalsawn leh ta a.

Tlailam dâr thum bâwr velah inkhâi bâwr ṭeuhin Ngaihzuala a rawn lut a, en pawh ka lo en duh lo, khum mawng lama Sofa-ah ṭhuin pawnlam ka thlir a, ka rilru a na tlat, helaiah amah rinchhana kal ka ni a, hmeichhia keimah chauha min hnutchhiah leh a kalna chin sawi lova a bo vang vang hi ka ngaithiam thei lo hulhual...

"Bawihi..." tia min rawn koh pawhin ka checháng eih náng. Ka ṭhut ngaiin ka ṭhu ngar a, "Rinduhawm," tihpahin min rawn hnaih ruak a, ka ṭhutna hmaah tak a lo ding a, "Sorry..." tih chiah a sawi. 

"En teh, min ngaihsak peih dawn lo a nih chuan engahnge min hruai? Nizana i thil sawi zawng zawng te kha dâwt vek a nih kha, nang hi chu maw chawplehchilha danglam thei, nun nghet nei lo mipa i nih hi, hei vang hi a ni ang ka hnaih theih tak tak loh che," tiin insûmkârna awm lêk lo hian ka ri nghal bawrh bawrh a, rilṭam avanga ka pum ri raih raih pawh chu hre mah se pawi tihna ka nei lo hrim hrim.

"Bawihi,..." tia min rawn ban a tum chuan rang fahran hian a kut ka vai sawnsak a, "Min dek hlek suh.." ka lo ti hlar mai.

"A mak, i thinrim a nih pawhin hetiang zâwng lo hian aw, ka insawifiahna te ngaithla ve phawt la maw le," dam duama a tih pawhin ka thin a rim tulh tulh thung.

"Ka awm lohna tur hmuna ka awm apiangin ka heti leh tlat ṭhin.." ti leh ngatin ka ding hluai a, Ngaihzuala a che rang zawk, ka pensawn tur chu min lo kuah vat a, "Thinchhe bawrlawk tichhuak hmasa lovin inbia ang, ka thiam loh a ni, umn..ei tur ka siam phawt anga chumi zawhah kan sawi dun dawn nia," tia min duatna ṭawngkam a chhâkchhuah tâkah chuan ka rilru no a chhuaka ka mittui a hnâm sak mai.

"Eng mah ka ei peih lo," ṭap áw lek leka ka tih chuan min kuahna a thlah dul hlek a, "I thinrim chhan ka hria alawm, thil ei phawt la ka hrilh fiah ang che," dam thluama tiin choka lamah min kuah phei a, ṭang buai lovin ka kal ve mai bawk a.

Dining table kílin min ṭhut tîr a, engmah sawi hran lo hian ei tur a lo hawn chu ka hmaah a rawn chhawp a. 

"Ka harhin a tlai tawh si, nang lah i mutui bawk nen, nizan lamah i mu ṭha lo tih ka hre ve si a, vawiina kan tih hmasak tur kha ka lo hrilh loh che avangin i tel lovin ka va kal alawm, ka rin aiin kan rei ta phian a, phone ka silent daih bawk nen; i lo call kha chu ka hre lo hrim hrim, kan zawh fel hnuah i missed call ka hmu chauh a, ka lo haw nghal tawh dawn tho avangin ka lo callback ta lo a nih kha, naktukah chuan kan pahniha kal a ngai tawh dawn a, vawiin chauh chu ka la kêp thei che aw," ti duahin Juice in tur min thlit sak a, ka thinrimna leh ka hrilhhaina kha chuti maia lungawipui mai ka tum teuh lo, kei mi ngawhngawl hian... 

Chhâng lova ka la ngawih reng avang chuan, "Bawihi, ka awm lo tih i hriat rual khan engtin nge i awm?" Tiin min zâwt teh daih a.

"Ka thin a rim, ei tur eng mah a awm lova order lâkna tur ka hre lo bawk a, keimah chiaha hnutchhiah ka ni kha ka hrethiam lo, ka lawm lo a ni tawp mai," ka ti fak fak a, kiai suk chung hian, "Tikhan i hrethiam tawh em, inzawmna nghet nei lo pawh ni ila, a tu emaw zawk zawk chin inhre tawn lova kan awm hian ngaih a ṭha thei lo, i awm lohnaa ka awmin ka ngaihtuah che a, ka kianga i awm reng chung pawhin ka thlâkhlelhna che a kiam chuang lo, keimah leh keimah zawhna ka inzâwt fo ṭhin asin." Tia a sawi tâkah chuan a nih duh hmel viau.

Ngaihzuala ngaih loh tuma rilru ka siam a piangin ka ngai zual a, ka inpawm duh lo mai chauh a ni. Ani erawh mipa a nih angin keimaha a feelings neih dan a hriat chhuah khan a sawi ngam mai a, u Ngaihzuala hlimthlâ khan engkim hi a hliah vek zâwk tih ka hria. A thih tawhna hian midang laka ka rilru pelhê tur a ngaingam lo bawk a, a tîr aṭang phatin amah hian min hîp tih ka pawm ngam a ngai. 

"Eng ati nge min kaihthawh mai loh? ka hrilh a hai dawn tih i hre ve reng awm si a," ka la ti hrâm a, tlêm chuan ka thinrim zualpui a reh ta deuh.

"I rilru puthmang i hriatthiam ka beisei vang a ni pakhat, kei nen inzawmna nghet nei duh lo angin lang mah la, kan awm dun tam tawh, i mizia zawng zawng hre lo mahila i u Ngaihzuala vanga min kawp i nihna hi chu a tîr têah chauh khan a nia, i lakah hian keimah hi keimah ka nihna ang chiaha min en hun a thlen beiseiin ka rilru ka hrilh rêng che a, i hriatthiam duh leh duh loh chu i thu a ni mai." Inring tâwk takin a ti hmiah.

"Ka hlauthâwng a.." ka ti sap a.

"Ka hrethiam che, mi rinawm kha rinawm lo anga min lan tîrtu chu nangmah Rinduhawmi hi i ni a sin, inremsiamna mak tak mai i sawi laia ka lo pawm ve ringawt te kha thil âtthlâk angin lang mah se ruat lâwk kan nih ka ring, a mak êm a ni," a ti ve tawp. A hmel a thutak em em a, holam mai maia thil sawi liam chi mipa a ni lo tih hi chu ka hre ve tlat.

"Ih...min kalsan thut tawh suh..ka duh lo.." ka tih veleh a nui suk suk a, "Ka kalsan dawn che a nih pawhin puitling takin ka sawi zel tawh ang, tunah hian nang leh kei hi inngaizawng dik tak anga awm ka duh aw, Contract i hnê ang chiah khan keipawhin ka ning lutuka mahse, nangmah hlatsan che ai chuan ka pawt fân leh mai chauh a ni," tia a inphawrh fai kêlh tâkah chuan awihsak lo chi ninghal lo chuan...

Engkim sawia kan titi dun hnuah hian kan inhnaih sawt anga hriatna ka nei. 

Kan thil eina vel pawh amahin a seng fel vek a, "Ka duh che a, hmangaihna erawh a tel lo, mahse, hetiang renga kan awma kan inhnaih a nih chuan ka hmangaih har lovang che," a ti leh hmiah a, sawi ber tur pawh ka hre lo. Ka chhungrilah hian ka hriat fiah thiam silohvin lungawina chu ka nei.

Eng mah tih tur a awm lo bawk a, khumah muin a âwm ngheng hian min kuah a, "Kan pahnih inkârah induhna ringawt a awm a nih pawhin lungawi tum rih ila, chak taka kal bawrh bawrh a ṭha ber lo aw, kan hun liam tawh thlir lêt tlâk a awm mang si lo a, innawr kal ni si lovin a tahtawla awm dan tawk kan zir dun dawn nia, min ring rawh," ti sup chung hian a rawn kun hniam a, a tih tur ka hre sa vek.

U Ngaihzuala ngaihtuah chhuah tum tawh lovin amahah chiah insawrbing ka tum ve ta zawk a, mi nghet inti ka ni alawm, engah nge ka theih loh bîk lem ang le, mipa duhna leh kawppui neih duhna rilru ka pu a nih chuan amah Lalngaihzuala hi a hmasaber hauhtu tur dik tak a ni.

Duhthawh taka min fawhna pawh ka thiam ang tâwkin ka chhâng ve zel a, zu hmuna kan tâl laia kan khawsak dan leh tuna mi hi chu a dan a dang ta zar mai. Nupa anga khawsaka mut dun a ṭha e tihna lam ni lovin kan lo rahpelh tawhna hian kan inkâr zawm nghet tak tak se tihna thinlung ka neih ve tawh avangin Ngaihzuala ta nih hrehna chhan tur ka hre tawh lem lo.

Naute thar siama neih ngei tumin zanriah ei hma loh hun kan insiam a, kan inpawh ta viau e tia sawi nghal theih a ni lo, harhfima duhthlanna siam fel kan nih angin engkim a dik thlap ti ila ka sawi sual tam lo ang.

"Ka lakah thikthu i nei thiang tawh a nia, thîkna rilru pu miah lova i han awm ṭhin kha chu ka ngaithiam thei lo," tih pahin a hmai hnâwng chap chu a hru thuak thuak a, "Ka sawi tawh kha aw, aniin min thik ngawih ngawih a, a tawk viau a ni," ka lo ti sam êt.

"Tihian kumin chhung atan pumbilh che ka tum a, a bâk chu hunin hril rawh se, engmah intiamkamna ka neihpui dawn lo che a, kan inkârah hian a tawp a la awm lo a nia, nang pawhin a tawp ngaihtuah thleng lo la, keimahah rinna nghat bur rawh tiin ka hrilh hek lovang che, kan awm dan azirin kan tawngbaw zel mai dawn a ni," a ti a. Ka pawmpui hle.

"Nau lo pai leh ta ila..." ka ti sap a.

"I duh dan ang thlapa i kalpui ka remti ang, ka dâl lovang che, inneih i duh a nih pawhin ka tlanchhe lo ang, i duh loh pawhin ka nawr kher dawn lo che, Bawihi, engkim hi i duhthlanna thlapa tih ka duh, i natna a thûk êm a, a belhchhahtu nih ka tum lo a nia," a ti leh a, Lalngaihzuala rilru put hmang mak zet hi ka hriatthiam theih chi pawh niin ka hre lo.

Kan mak dun a ni ber e.

Min kuah reng chunga a ṭawng laiin mut chhuakin min zêma ka lo muhil daih chu niin! 

Mamita kan awm chhung nihnih hi chu 'awm dun e' ti lovin kan buai ta char char a, kan awmna hmun pawh a inang hleithei lo, zan lamah kan inhmu hram a ni ber, Agriculture department-a Marketing Development Officer a ni a, a pawimawh em avangin kei nena tehkhin chi a ni lo a, a buai loh kârah min ngaihsak zeuh zeuh tih chauh a ni.

"Kan thawhpui Rinduhawmi.." tiin midang hnenah chuan a sawi mai zel.

Ni hnih leh zan thum kan châmna a ni tawh a, vawiin hi kan zawhna tur a ni nghe nghe, a chipchiara tarlan kher a ṭul ka tih loh avangin tihian a tawi zawngin ka sawi ta mai a ni.

"Bawihi, naktuk ka birthday,"  tih pahin min rawn en a, inngaizawng anga han awm vel kha ka zak thar leh vel. Ngaiah ka nei hleithei lo.

"Engtia lawm nge i duh, kan haw dawn nge..?" Ka lo ti a.

"I nu ka lo bia ang e.." tiin ka zawhna pawh chhâng lo hian ka phone a ban zui zat a.

"Sunday châm law law ang aw, tun aia hun thâwl ṭha kan nei har tawh awm em mai," tiin ka nu a call ta a. 

"Monday zingah lo haw kan tum a, Bawihi pawh a ṭha aw, tun ni hnih khat hi kan buai deuh a, tunah chuan kan zia chho ṭan tawh a nia," tia ka nu a hrilh chuan ka lo lâwm ve tawp. A duhnaah a felin a puitling em em a, hei hi chu ka hriat hnu a ni.

Hemi tlaiah hian kan pahnihin eirawng kan bawl dun a, "Zu in i châk em?" Tiin min zawt thut a, rang fe hian, "Aih" ka lo ti thuai a.

"Kei pawh in châkna ka nei bik lo, 'Lalngaihzual zuheh' tia inkoh kha a dawnsawn a nuam mang si lova," tiin a nui ruh ruh a, "I duh ve êm alawm," ka lo tih hmanhmawh a, "Duh te chu duh e, mahse, ka heh kher lo, fa neih chungchângah kan thu a awm lo nain zu lam chi hrim hrim i in ka remti tawh lova, kei pawhin ka in loh phah a nih hi.." a ti ta a.

"Min control vek i tum nghal tihna em ni?" Fiamthu paha ka lo tih chuan, "Midang thunun kan duh chuan keimahni kan inthunun hmasa tur a ni a, ka famkim lo a, ka famkim ngai dawn hek lo, mahse, nangmaha ka famkim hun tur ka thlir chauh zawk a ni," tia a sawi zawh rualin ka mitah chiang tak hian min en a.

"Kan inhmuh chhung leh kan thil tih dun chhung rei lo mah se hun tam tak daih kan inpe tawn thei tih theihnghilh ngai suh ang che," a ti leh a, min duhna tak tak thinlung a pu ve anga hriatna ka nei ṭan. Ve chauh mai a...

Zu tel lovin zanriah kan ei dun a, zu tel miah lovin kan titiin kan inkâwm a, tisaa pumkhat kan nihna turah pawh Zu in hmun a chang ta rih lo. Hei ringawt pawh hi kan pahnih tana hmasawnna chikhat a ni ve hrim hrim.

Tui taka ka muhil lai chu kartu leh turtu awm ang maiin ka harh hlawl a, Ngaihzuala pawh phone bih chungin a lo la meng a, ka rilrua lo lang hmasaber angin ka ṭawng chhuak nghal a, "Happy birthday, dâr engzat nge?" Ka ti sap a, meng buai nak chung hian, "I la hria elaw, ka pianchama min wish hmasabertu hmeichhia i ni. Ka lawm e, Bawihi..." tih sup pahin ka chalah a fawp zeuh a.

"Lawk, status ka neih a ngai," tih pahin thawhphan awm miah lo hian whatsapp ah ka lut nghal a, ka rilrua thu awm ang ang ka dah ve pawp mai. 

"Vawiin i pianchamphaphâk a lo thlen hian thil ropui leh ṭha hnutchhiah tur che ka nei lo, mahse, i tan ka awm ṭhin angin ka tan awm zêl ang che, Lalngaihzual ka ngai che tih vawi tam sawi ka châk aw.." tih ka dah ta.

Ni e, u Ngaihzuala birthday a nih ang chiahin ka Lalngaihzuala piancham a ni bawk. A inang tih a hmain ka sawi tawh kha aw...

Tuna ka thil ngaihtuah kha.. Ngaihzuala hi 'Ka Lalngaihzual' tiin ka sawi amaw? 

Ka status view hmasatu pawh ka kianga mu mipa, rin ngam ka tum mêk hi a ni.

"Bawihi..." tiin a phone lukhamah a nawr lut a, "I thuziah kha thîk loh ka tum, a va har ve.." a ti zawi sup a, a rilru ka hrethiam lutuk tlat, amah inngaihbel ngam silovin u Ngaihzuala tana ka dah angah a ngai tih ka hria a, a bianga chûl zeuh pah hian, "In pahnih tana dah ka ni, thlankhura an zalh tawh thîk reng tura nep mipa ni lul suh.." ka ti a, a thaw chhuak hrâwih a, ka âwma hmai phûm chung hian eng emaw a sawi leh a, a sawi tak erawh ka hre fuh chiah lo thung.

"Ka Lalngaihzual" tia ka phun sap ri a hriat rualin a rawn dâk chhuak a, "Eng nge i sawi kha?" A ti hniam ruih a.

Tîmna nei map lo hian, "Tun hun aṭang chiah hian ka Lalngaihzuala i ni tawh ang, a hun rei chhung tur ka sawi thei lo a, tiam chin a awm dawn hek lo. Keima u Ngaihzuala thik tawh suh tia sawi kher ka tum lo a nia, a hlimthlâin min uaibet tawh lo sela, i hlimthla chauh ka hmuh theihna turin ṭan la rawh le.." inring tawk lutuka ka ṭawng chhuah tâkah chuan a kiai suk a, "Rinduhawm, i duhawm thlâwt," a'n tiah.

Keilahin, "Ka Lalngaihzual ka ngai che," nui chungin ka lo ti ve bawk a, kan boruak a inthlâk nghal dawrh. Inthiam lohna bo vek si lo leh thiam inchantîr ru ṭâlh chungin kan Seol leh ta nge nge e. 

Nakinah remchang a awm veleh 'Seol' ka hman ve ziahna chhan hi ka rawn thailang dawn nia aw. 

Khua a vâr ṭan dêt dêt tihah inkuah chial chungin kan ṭawng char char a, "Nupui i nei hmasa duh a nih chuan min hrilh la, kan nautê nen 'I pain nupui a nei dawna kan kal ve dawn nia' ka lo ti ang," tih pahin ka nui kar kar a.

Fiamthu titak deuh hian, "Ka lo duat ngawt ang che u, ka nupui tur hnenah Champhaia ka hmei nufa te an nia lo ngaihsak ṭha rawh ka ti ve ang," a ti zui zat a. A nui hawk a, "A va ho mai mai e, Saruaka awm lai laia hetiang han sawi te chu..a zia lo det.." a ti ta a, ka nuih a za zual sauh.

A ni rêng asin, thinlung inhmu hmasa lovin tisa kan in zawm a, kan thlen chin tur hre hawt lovin kan sapatál a, kan dâi bawrh bawrh a, a chhuahna tur kawng a ping si. Tuna kan thlen chinah hian lungawi kan zir dun mai loh chuan engkim hi a harsa kual vel vek a ni.

A birthday nileng hian Mamit khaw chhung min fan kualpui a, kan inkârah neuh neuh a tlem ta. Kan ṭawng tuitam duah lo nain kan hlim ve thawkhat viau chuan ka hria.

"Khawlaia inkaih leh inkuah tih vel hi ka duh loh zawng tak a ni," tiin chawhmeh bazara kan tei kual laiin ka sawi a. Rang fahran hian, "Kan inang a nih chu, kei pawh mi hmuh laia inngaizawng hliah hliah anga lan hi ka zah zâwng tak a ni," a lo ti thên mai.

Tlai lamah chaw eia chhuah a duh thu a sawi nain ka lo hnial a, kan thlenna hotel-ah kan pahnih chiaha hun hman ka duh thu ka sawi lan chuan rang takin min pawmpui tho. 

'Ka Lalngaihzuala' tia ka ngaihtuah a piangin a hmel a lo lang a, 'Keima u Ngaihzuala' tia ka ngaihtuahin mitthi tawh hmel ka hmu thung. Ka rilru léloh vang a ni lo a nia aw, an pahnih hian ka tana mi hlu an ni ve ve a, an hlutna zâwn a inang lo mai chauh a ni.

Mamita kan kal aṭang hian, Hmangaihna hi eng nge a lo nih chiah tih ka ngaihtuah nawn leh hnuhnawh a, ka hrefiah thiam ta lo.

Champhaia kan lêt hun a lo her chhuak ve ta a, Ngaihzuala peih lo lutuk hmel ka hmuh chuan, "Kal lamah i phûr em em a, tunah i hreh leh ngar ngar a, hun thawl ṭha tam tak kan nei lutuk ang, mahse, vantlâng hmuhah kan inzui a rem dawn lo a, a bâk engmah tirawh, ti suh, tih ka nei lo,'' ka lo ti a.

"Kha kha alawm mawle ka peih loh chu ni, in ina len a ninawm si" a'n tiah. A nui duh ṭhak lo lehnghal a.

"I lo len duh loh leh kan inhmu thei lo tihna a ni mai a, office ah phei chuan thider char char ang che.." ka lo ti a, "Rinduhawm, duh khirh viau zel suh, ka ru daih tak tak mai tur che a nia,'' a lo ti a.

"I chhe hnap a nih chu a...nupui neih tum zing viau bîk suh.." tih pahin Car-ah ka ṭhu lût a, ani pawh kan bungrua vel a dah fel hnuah a lo lut a, kan tlan chhuak a ni deuh mai.

Mamit hi ka tan theihnghilh tik ni a awm dawn lo a, chutiang ang chiah chuan ani nena kan hun hmasa lama kan chêt tlatna Thlâm pawh kha ka hriat chhuah fo tur a la ni cheu.

Ani nena hun kan hman chhung hi a rei viau ngai lo nain hun tam tak daih turin kan khawsa zel thung. 

Aizawl kan luh hma zawng ka muhil tih theih a ni a, hmabâk thui tak suangtuah tur kan nei hran lo. Mahse, beiseina chhete min hnutchhiah tal alawm.

An in puiah pawh kan pêng khawtlai ta lo a, kan thlen chin ka nu ka hrilh ve zel a, Aizawl kan chhuahsan aṭanga dârkâr hnih vel a ral leh hnuah ka dam chhung atana tawn leh ka duh miah loh thilin min nangching ta si!

"Bawihi..." tia Ngaihzuala bánin ka lu a rawn nem chuan eng nge thleng dawn tih ka hre hman îk lo, a ri bur a, a ri leh ṭhuai a, hmun sâng tak aṭanga tla thla vawn vawn ang mai hian ka taksa a insâwi phe hliau hliau niin ka hria. 

Ka mit vun chhah lûk avangin ka meng chhuak hleithei lo a, ṭawng thawm leh ri nuai nuai chuan ka beng a luh a, "Ngaihzual" tiin ka phun sep a, thei leh thei lo hian driver seat niawma ka rin lamah lû ka her a, eng nge ka hmuh hi..?

A hmai thisenin a bual huh zùih a, a meng lo. Chêt chhuah tumin ka'n insangmar a, ka ke a rit churh mai.

'Ka Lalngaihzual' tiin ka ko a, ka âw rêng a chhuak zo si lo. 

Ka khaw hmuh thim tial tial leh ka ke ruh na ut ut te, Ngaihzuala hmel thisenin a bual nuai te nen ka hriatna a tâwi turh a...

Nia, keini pahnih hian accident kan tâwk a ni. 

Eng tianga lo thleng nge tih ngaihtuah tur pawhin ka thluak ka sâwr thei hlawl lo a, Ka Ngaihzuala hming lam chung zelin ka maimitchhing ta riai riai a...

B+>[BeckirafARenthleI]<+®®