12.DROGMA SEOL [A Becky Rafa Story]

12.DROGMA SEOL

Ziaktu: Becky Rafa Renthlei

[Recap]

"Ngaihzual..." ka ti sap a.

"Ka sawi ang chiahin ka awm ang, a hretu tur ten an hriat loh avanga nat nawn fo ka tum lo...kan inngaihzawnna hi thup buai a ṭul tawh lo a ni ang e.." ti nghut chung hian a inher a, inchhungah a lut nghal daih.

Rammuana'n min en reng a, Ngaihzuala hi a la hria tih pawh a hmelah a lang reng.

Engtin nge helai hmunah hian ka kal a ni tih leh min rawn lam nachâng a hriat theih tih hi ka zawhna neih chhun a ni ta.

Ka Lalngaihzuala rilru nâ leh thinrim hmel buai nak kha ka theihnghilh thei dawn em ni?...

-B®® Stories

Rammuana Car-ah chuang duh lo viau pawh ni ila, ani hian thil a hriat tam bâkah eng emaw sawipui ka duh vangin lungdam lo zet hian ka chuang lut ve ta a, car kawngkhar na zetin ka khâr bur a, a ṭhen sawk mai.

Ngaihzuala khan min en zui nge zui lo hriat ka châk viau rualin a thinrim hmel hmuh nawn leh âi chuan tiin hawi lêt tawh lo hian hmalam ka en ding ngar a, Rammuan misuala a ṭawng chhuak lo teh tlat!

"Hetah ka awm tih eng tin nge i hriat?" Tia thinrim lo niawm taka ka biak chuan, "I nuin min hrilh, Bawihi, i u Ngaihzuala nen khan intih thiam lohna emaw inhauna in nei hrim hrim em, a thih hma vel khan," tiin min zâwt teh daih a, min hua angin lang mah se 'Bawihi' tiin min la ko ve hrâm tho. Ka hmingpuma min ko lo ringawt pawh hi ka lawmna tâwk a ni. Ani kâ aṭanga hmingpum dawn zawng a nuam viau lo.

"Engmah chutiang intih thiam lohna kan nei lo, innei mai tawh tur kan ni a, u Ngaihzuala tluka min duata min hmangaihtu an awm hleinem," tiin dik tak hian ka chhâng a, kawng lam chauh a en a.

"A nih leh tuna inpu nen hian engtia inzui ve ngawt nge in nih? Ka lo hriat dan chuan Champhaia an transfer-na pawh a la rei lo hle a, i u Ngaihzuala boral hma ni thum vel khan joining report pein a lo kal.." muang ban charha a tih chuan sír zawngin ka melh kâwk a, "Eng i sawi tumna nge?" Ka lo ti hmak a.

"Sawi tum ka nei lo, thil kal dan ka chhui mêk a ni," a ti duh lek.

"U Ngaihzuala thihna leh aniin inkaihhnawihna a nei lo, ka duhthlanna hmanga ka umzui a ni a, eng mah khati ang lam hawiin ngaihtuahna sêng suh, a vanduai vanga accident tawk a ni mai a, amah nen pawh kan accident ve tho, vanduaina chikhat a nih kha," ka lo ti hmak hmak a, "Kan la hria ang chu,'' tih chiah a sawi.

U Ngaihzuala te in kan thlen tâk avangin engmah sawi zui theih a ni ta lo hlauh a, anmahni chhung leh khat bâkah u Ngaihzuala ṭhian hnai pahnih thum an tel ve bawk a, Rammuana leh nu Rami an inbe thei viau a, nu Rami hi u Ngaihzuala nu a ni tih a hmain ka sawi tawh kha aw.

A hma khá zawng zawngah khan u Ngaihzuala thih danah eng rinhlelhna mah ka nei ngai lo a, a hnaa a kal tur Truck nen an insu tih zawng kha a ni mai. Mahse, tunah hian ka hriat ve miah loh thil inthup awm anga ngaihna lian deuh ka nei a, chu pawh Rammuana a rawn lan tâk vang hi a ni. A lan dan dam thlup phênah hian eng emaw a ti riau a, a fing thawkhat tih a hriat bawk. 

"Bawihi, zanin chu hetah riak ve mai la," tiin nu Rami chu ka bulah a rawn insawn phei a, ka chhân hmain ka nuin min lo chhân khalh hlauh, "A u a awm dawn lo a, keimah chiaha ina riah ka châk vak lo, bâkah amah hi a dam a la chiang lutuk si lova," tiin min lo sawi khalh hlauha ka lawm teh a nia, Rammuana nen inkhata riah dun ka peih awzawng lo, englai pawhin min chîkin min hawisan lo a, ka nun a ti chêp vek.

Nu Rami pawh chuan min sawm lui ta bik chuang lo a, Ngaihzuala zâwkin ka rilru a luah tlat avangin zanriah eikham hnu rei vak lovah kan haw phei ve ta a, Rammuana'n min thlah a tum ngial nain ka hnial fithla ṭhak.

"I u Ngaihzuala ṭhianpa nen khan in inhresa em?" Tia ka nuin min zawh chuan, "Ka râlkhat hriat?" Tiin ka chhâng a, "Tlangval fel tak a ni ngei ang, Rami pawh khan a ngainat hmel viau kha maw le," a ti leh a.

"Rammuana tak kha chu ka ngainat zawng a ni lo," tiin ka sawi tlang hmiah.

"Mai mai ṭhin che hian, heti reng hian i awm thei dawn lo a nia, ngaihzawng nei rawh ka ti lo, i u Ngaihzuala i ngaihna leh i tawrhna te hi kalsan hret hret tum la, hmalam pan i tum loh chuan i na kumkhua mai ang," tia min hrilh chuan ka nui hak a, a zat vanga nui erawh ka ni lo. 

"Azuala hian a beisei deuh che em ni?" Tih pahin chahbi a phawrh a, Tala-a hawlh lut rak rak chung hian, "Pa ṭha tak a nih ka ring, i lakah eng emaw rilru pu lo se chuan heti taka a buaipui che hi ka ring lo," a ti leh bawrh bawrh a, "A fel alawm, nakinah phei chuan kan la inngaizawng daih maithei a ni," ka ti a.

"Bawihi, i ti tak tak em?" Tiin inchhungah kan inzui lut a, thutak deuh zawka min en chung hian, "Azuala te ang hi chu an ṭha alawm, i u Ngaihzuala nen khan ka lo khaikhin ve hman ziah lehnghal.." tiin a nui kar kar a, ka lo nuih liampui ve mai bawk a.

"Tun laia i u awm dan hi ka ngaih a ti ṭha lo, biak lohvin min biak a tum lo a, kan ruala chaw ei a nei mang lo bawk a, ina a awm ve chhunah pawh room-ah a tawm tlat zel a, eng harsatna nge a neih sawi ve ṭhin tur a nia," a ti leh a. 

A sawi dik chiah bawk a, ka nauchhiat chungchâng vel a hriat aṭang khan a mizia a dang em em a, keimah nen tak phei chuan kan inbe ngai lo tih theih a ni. Aizawl damdawi ina ka awm lai pawh khan a hmingin a lokal ve mai mai a ni ber. Ka nu bulah eng mah sawi ngam a ni si lova ka haider lui mai chauh a ni.

Ka nu hriatah erawh chuan, "Tlangval a ni ve a, a bialnu nen intih thiam lohna te an nei a ni mahna, a zia ve mai ang," tiin ka chhâng liam puat a, ka room-ah ka luhsan ta a.

Ngaihzuala hnen aṭangin call emaw message eng mah ka la dawng lo a, a sawi dan kha chuan zanina lokala engkim ka nu hrilh kha a tum dan a nia; tun thlengin a la reh vang vang a, tun dinhmunah chuan ka nu hriat ka duh lo bur. 

Ka inbual zawh hnuah sitting room lamah ka chhuak phei a, ka nuin TV a lo en a, "Nu, nangmahin reilote lo awm lawk ta che, Azuala inah thil ka theihnghilha ka va lam lawk ang," tiin ka inbual laia ka thil ngaihtuah chhuah avangin Ngaihzuala ina kal ka tum chawpchilh a.

"Naktukah te a lam theih mai loh em ni, zanah kher kher te chuan.." a ti nang nang a, mahse, dam thlap hian, "Ka rei dawn lo, Scooty in ka va tlan zuai anga ka lo lêt leh nghal ang," ka tih deuh tlat avangin, "Rei lo la.." a ti ve ta nge nge a.

Ngaihzuala ina kal ka tum thut nachhan pawh eng dang vang a ni lo. Ka nu hnenah engmah hrilh rih lo tur leh Rammuana thil hriat leh min tih dan kha hmaichhana sawipui ka duh a, zêp lova ka hrilh hian mipa na na na chuan tihdan a hriat mai ka ring. Ka nau chhiat chungchâng mawlh mai kha a irh chhuah ka hlau hlê a ni.

Scooty la chhuakin Ngaihzuala in lam ka pan ta a, ka ke a nat chhung khan vawikhat mah ka hawl chhuak lo a, zanin chu Auto hman tur a vâng bawk nen ka inhawl chhuak ve ta nge nge e.

Ngaihzuala in pawh a la êng pap a, zan dâr riat a pêl chauh bawk a. Ka lakah a lawm lo tih ka hria a, min biak hmasak tumna a nei lo tepawh a ni mahna.

Kawngkhar ka kik dat dat a, vawi thum ka kik hnuah pawh min hawnsaktu zu han awm miah lo a, ring deuh hlekin vawi hnih dang ka chûm leh a, amah koh kha ka ngam chiah lo deuh a, a hnu lawkah kawngkhar kalhna a ri rak a, ka pawt deuh hrâwk bawk a, mahse, kawngka bula ding ka hmuh meuh chuan ka meng bial kal mai, ka hmuh tum loh lutuk nen kan inhmachhawn ta si a, sawi mai tur hre lovin ka ngawi rauh rauh a, ani pawh a hamhaih a ni teh chêk ang chu, meng buai nak chung hian min en a.

"Khawiah nge Ngaihzuala?" Tia ka ṭawng chhuah chuan a nui lui sak a, ka lak aṭangin a mit a lasawn eih lo.

"Eng nge i rawn tih dawn?" A ti sap a.

"Biak lawk ka duh a, amah a awm em?" tiin dam thlap hian ka zâwt leh a, chal chuar nâng chung hian, "Azuala chu a muhil, tiharh lo mai rawh," a ti leh mai a, ka luhna tur dâl takin a ding sawn a, "Rini, Azuala nen hian kan inṭhen hlen i ring tak tak em ni? I lo lan ve hma pawh khan hetiang ang buaina hi chu kan nei fo alawm, a reh leh mai zel, kan inkârah inrawlh tum lo zawk mai rawh," a ti chang fak a, ka nuih a za viau lo.

Ni e, an inkâr ṭha lo se tun ang hunah Sangtei hi Ngaihzuala inah a awm hauh lo ang, tlaiah khan ka lakah a lung a awi lo a, zanah a bialnu hlui a inah a ko zui lehnghal thei a nia, eng ang mipa nge maw a nih le?

"Ka be lawk ang, a rei dawn lo," ka la ti ṭâlh a.

"Tibuai duh suh, kei min ṭhena nang hi a vawn ngheh che i ring tak tak em ni, Azuala hian sex hmanpui atan bâk a duh lo che, vawikhat mah amah nen sex kan la hmang lo, ka thianghlimna tih chhiat a duh lo a, Biak in hawng ngeia min neih a duh..." tia a sawi lai chuan ka lo dang chat a.

"I thilsawi kha ka hriat kher a ngai lo, amah biak ka duha chu chu a ni mai," ka lo ti hlar a, "Keimah min mutpui phal si lovin nang erawh a duh duh hunah a mutpui che a, kan sawi dun ṭhin alawm, mipa a ni a, tisa châkna nei thei a ni, ka thîk lo che a nia, mahse, tunah chuan i lak aṭangin a duh ang a hmu tawha a mamawh tawh lo che, kan inkâr a ṭha leh vek tawh," inringtawk lutuka a tih zêl tâkah chuan chhân ngaihna hre lo hian ka ngawi vang vang a, ka thluak a nu but but a ni ber mai.

"A ṭha e, hlim takin awm in tum dawn nia, mahse, hei hi theihnghilh ngai suh ang che, i bialpain nangmah mutpui lova midang a pan zel chuan nakinah hri ṭha lo tepawh a vei mahna, i thusawi zawng zawng kha ka awih vek lo nain ngaihzawng nei reng chunga hmeichhe dang kawp ching mipa nen pumkhatah in insiam dawn zu nia, a nuam ngawt ang, i la ring tawk êm ang chu maw.." ti ve sak sak chung hian ka hnungtawlh a, Sangtei thinrim hmel dur khap chu hmuh a nuam fahran lo, ka hlau dêr si lo a.

"Kal sawn vat vat mai teh, ani nen kan inkârah sawi tur i nei lo," thinrim âwka vin ṭhata a tih laiin Scooty awmna ka thleng fel der tawh. 

Lalngaihzuala nen sawi dun tur kan la nei. Eng pawh chu nise zaninah ni lovin hun dang ka nghah mai a ngai a ni. 

Aizawl aṭanga a lo kal chhan kha keimah vangah ka lo ngai ve a, Sangtei nen an inkâr siam ṭhat a duh vang a nih ka ring ta rum rum mai. 

Â, ka nun a chêp, ka hah hluah hluah.

Ka tum aia hmaa ka haw leh tâk avangin ka nuin engmah min zawt dilchhut lo a, rilru nuam lo zetin khumah ka ṭhu vang vang phawt a, Lalngaihzuala khawsak dan kha palzam chi a ni dawn em ni, inngaihzawnna fel fai tak kan nei tawh a, kâr lovah Sangtei a rawn lang leh bawk si. Hriatthiam a har ve êm asin, ka chhungril a hliam tih pawh ka inhre reng.

Ka phone a rawn ri a, Rammuana a la ni zui!

Ka pick up rual rualin, "Bawihi, naktuk hian hun i nei em? Thil zawh tur che ka nei a, hmaichhana sawi ngei ka duh si a, in inah ka lokal mai dawn em ni?" Pangngai tak hian a rawn ti a.

"Eng lam nge ni a?" Ka lo tih chuan, "Hun i neih leh neih loh sawi tawp mai rawh, tuna sawi nghal ka tum miah lo a nia, i nu kha tirh bo dan lo zawng bawk la," thupe âw taka a tih chuan ka ngaithei ṭhak náng.

"En teh, min zawh tur emaw sawi tur nei pawh ni la, thu min pe suh, a nihna takah chuan nang nen hian sawi dun tur kan nei tam lo em mai," ka ti nghat nghat a, nui lui huk chung hian, "I nau chhiat kha tu fa nge tih i nu bula ka sawi i duh kher em ni, a hriat laia sawi lan i duh te chuan ka hreh hauh hleinem," ngeiawm lutuka a rawn tih tâkah chuan, "Rammuanawm," ka lo ti vin hlar a, "Naktukah ka rawn kal ang," ti nawn leh sup chung hian phone a off zui daih.

Ka thâ a khûr dar dar a, Phone keng reng chungin ka melh ngai ka melh tlawk tlawk a, kha private hospital-a thawk atu emaw berin Rammuana an hrilh tihna a ni mai. Zawh chhuah lah ka ngam ngang si lo a, ka hun kal tawhin min tibuai zawm leh dawn tih ka hriatna hian min ti thlamuang lo chu a ni ber e.

U Ngaihzuala boral aṭangin ka nunah thil áwm ang lo tak tak leh awihawm loh deuh deuh ka tawng chho zut a, Ngaihzuala nen kan intawn dan leh kan inhmuhna hmun thlengin ka ngaihtuah kâi a, nu Hruaipuii khan Ngaihzuala hi a hrechiang viaua hriatna ka nei tlat bawk. U Ngaihzuala thihna kha accident ni lovin tum lâwk reng avanga thihna tepawh a lo ni reng thei bawk a, ka hriatpui loh hian hmelma a lo nei reng zawk em ni ang? 

Ka ngaihtuah kual nasa lutuka khawvar hmain ka lo chhing sek a nih ka ring, ka harh leh chuan nî a lang uar tawh a, choka lamah inbe thawm niawm tak ka hre bawk a, ka u leh ka nu an nih ka rin vangin ka tho chhuak duh lawk lo a, ka phone ka'n bihsan leh tê tê a, 7 missed call a lo awm chu niin! Chu pawh Ngaihzuala hnen aṭang vekin a ni.

Callback tumna pawh ka nei chuang lo, mut luih leh ka tum lai takin, "Bawihi, lo tho teh, Azuala a lokal a nia" tia ka nuin min rawn koh tâk avangin ka ṭhu chhuak hlawl a.

"Hetah, kan inah a awm a maw?" Ka ti he-haw a.

"Awm e maw le, rawn tho teh.." tih leh chhuah a rual a, rang fahran hian bathroom lam ka pan a, engti tura lokal nge a nih hriat va ni suh. Phone ka pick up loh vanga lokal a nih ka ring ber zawk.

Ka inpeih fel hnuah ka chhuak phei a, sitting room-ah thingpui no dawm chung hian a lo ṭhu a, min hmuh veleh, "I phone kha eng atan nge i tih a, khatiang zât zât call pawha lâk duh loh, i nu hnenah engkim ka sawi dawn ka tih kha," zawi supin a ti a, ka nu chokaah a awm reng si a, a lo sawi tawh tihna em maw ni le.

"Ngaihzual, tun hi khatiang sawina hun a ni lo, nakinah zanah lokal la kan sawi zawk dawn nia, ka nu hriatah eng mah sawi suh, ka duhlo," tiin a bulah ka ṭhu thla a, ka nu erawhin keini pahnih thusawi a rawn ngaihven lutuk lo a nih hmel. A thil tih lai a chhunzawm mawlh mawlh a.

"A hriat a ngai alawm, inthup reng te hi i ning ve lo em ni?" a tih chuan ka melh kâwk a, "Zak ve deuh rawh aw, nang leh kei hian eng mah sawi dun tur kan nei tawh lo, kan awm tawh dan avanga min hmusit i nih chuan ka dah sâng bík lem lo che," ka ti ve ngat a, a ngaihdan a nih loh hmel hle.

"A hma ang mai maia min namnûl theih inring suh, tunah chuan tu mitmei mah ven ka tum tawh lo a nia," a la ti tak deuh deuh a, keimah zawk ka hawihai mai dawn alawm.

"En teh, nakinah kan sawi ṭha dawn nia, va haw phawt rawh," ka ti ta ringawt a, Sangtei chungchâng sawi lanna chi pawh ninghal lo chuan, ka nu a awm ve kur bawk si.

"Aw le, ka phone i chhân theih loh avanga lokal ka nia, i u Ngaihzuala te inah i riak nge riak lo ka hre duh bawk a, i nuin i riak lo tih min hrilh tawh, nang leh kei kan inkawp chhung hi chuan saw inah sawn i kal ka remti tawh lo a nia," ti hmuk chung hian a tho chhuak a, "Nakinah ka lokal leh ang, sawi dun tur tam tak kan nei," ti lehin choka lamah a phei a.

"Ka pi, vawiinah tih tur i nei em?" Tiin ka nu a zâwt daih a, ka nu lah chuan, awlsam tê hian, "Vawk note lak ka rilruk ve deuh a, Zotlâng lamah kal ka tum deuh, a neitupain a hmunah lo thlang rawh a ti a," tiin a lo hrilh a.

"Chuti chu Bawihi nen in inah hian hna tlêm a záwng lo khawih ila i rem ti em, office kal theih huna hman nghal tur a nia," a ti leh a.

Ka nuin a lo remti leh thlap tawh, Lalngaihzuala nen vawiin hian eng hna mah kan thawk lul lovang, a han phakar dan em em te hi a...

Ngaihzuala haw hnu lawkah ka u a rawn lut a, min melh zuk chung hian, "In pu chu a va dam ṭha tawh awm ve a, Rinduhawm, a ngaihven mah mah che nge nang hian i lo ngaihven zâwk, mipa hi hnaih tam lo la a ṭha ang," a ti kher a. 

Makti zetin ka u ka en hâ a, mit sen rûma min melh chung hian, "Kan thlah zalen lutuk chea awm dan mawi pawh i hre tawh lo a nih hi," a tih leh tâkah chuan ka ding hliai a, "Eng nge i hriat a khatia min ṭawngkhum kher le, nizanah khawiah nge i riah?" Ka ti lui ve ngat a.

"Ka duh duhnaah ka riak ang, ka nunah inrawlh tum suh," a ti chhum hmuk a, ka chhâng zui ta lo. Ani hian thil ṭul lo leh ṭangkai lo sawi chhuah a châk hmel tlat, ngawih ka chuh ta ringawt a. Ka nuin kan ṭawng a hre pha lo hlauh zawk a.

Tûkṭhuan kan kîl laiin ka nuin ka u a zilh a, "Harsatna i neih chuan inchhungkhurah sawi ta mai che, zana riah bo mai mai te kha thil mawi pawh a ni lo," a ti a.

"Rinduhawmi a duh ang anga a tâl kual pawhin i ngawi thei a, kei ka nih avanga min han hau kher," tia ka nu a chhân lêt chuan, "Hmingmuan, ka zilhna leh hauna i ngai hua a, i ngaithei dawn lo a nih chuan nangmahin tâl hrang ang che, i nau tawrh ang hi eng mah i tuar lo, in pahnih hian insiam ṭhatna tur in ngah lutuk," a ti ta a, ka u nen kan ngawi reng a, kan chaw ei boruak a nuam viau lo.

Zotlângah Vawk note a la dawn tih a sawi leh hnuah chaw ei dawhkan a thawhsan a, ka u in a zui a, rei vak lo hnuah a chhuak nghal daih a, a khawsak phung a mak sâwt hle, ka ngainat zâwng lah a ni hek lo.

"Bawihi, ka kal dawn a nia, ka rawn haw hma lo maithei a, tlailam eirawngbawl i kutah ka dah a nia, Azuala nen hetah hna in thawh dawn phei chuan chaw eiah te sawm ve la," tia ka nuin a sawi laiin thleng ka sil mawlh mawlh a.

Ngaihzuala nen eng thil mah kan ti dun dawn lo tia sawi ka châk zek zek. Sangtei a nunah a awm leh tawha pahnih pawh tam intih tawh nâk alaia pathum tezawng a peih hian ka peih lo a ni tawp mai.

"Chaw ei kher chu a duh lo ang, a ṭhianpa hnenah a awm a..." ka lo ti khawmawi ve a, engtin phei chuan min chhâng hran lo.

Ka nu Taxi ka chânpui a, a kal liam hnuah ka room ka tifai leh ta a, tumah lokal lo se tih ka duh ber.

Ka phone a rawn ri a, zinglam dar 10 a pel tawh, Siami a lo ni a, "Zaninah ka birthday kan lawm dawna lokal tum rawh aw, mi hrang vak ka sawm lo a nia," a rawn ti a. 

Zan lama chhuah ka harsat thu leh ka dam a ṭha lo tia chhuanlam ka siam chung pawhin, "Kan lo sawm che anga kan thlah leh thlap ang che," a la tih hrâm avangin ka 'Aw' ve ringawt a, ka nuin a phal ka ring chiah lo naa a lo phal hlauh chuan kal ka tum thung.

Siami nen kan inbiak zawh hnuah phone ka charge a, doorbell a ri zui zat bawk. Ngaihzuala a nih ka rin avangin ka ûksàk duh lawk lo a, muangchânga kawngkhar ka nem hawn chuan Rammuanawma nen kan inhmachhawn ta a, a enga mah hmain min han en chîk êm êm ringawt a, kiai suk chung hian, "I beisei loh zawk ka rawn lang a ni maw?" Tih pahin ka sawm hun pawh nghâk lo hian inchhungah a lut tlang a, ka zui ve nghal tho.

"Eng lai mahin nang hi chu ka beisei lo ang che," ka ti nghat a, intivei zet hian Sofa lo hnai berah a ṭhu a, "Rinduhawm, inpu nen inhmuh in tum tih ka hriat loh i ring em ni?" A ti sup a. 

Hriat chian hle tum ang mai hian inchhung a melh kual ngial a, chutah, "Ani saw hnaih suh ang che, nupui nei mai tur a nih saw, i u Ngaihzuala i chân tawha holam mai maia tâl kual rual pawh i ni lo," nelawmna tel miah lova tiin min en vung vung a, ner sak chung hian a ep chiahah ṭhut hmun rem pah hian, "Rammuan, i lokal chhan sawi mai rawh.." ka ti nghat a. A thusawi engmah awihsak tumna ka nei lo.

"Nang leh kei hian inremsiamna kan neih a ngai a nia, ka ṭhianpa Lalngaihzuala thihnaa mawhphurtu hi kan hriat chhuah ngei a ngai, accident satliah ni lovin ruahmanna tenawm tak hnuaia thah a ni," nghet churha tiin a inseh ruh ṭeuh a, a hmai a sen awp awp bawk.

Kei lah a ngaihna hre lo lutuk leh awih theih lohna avangin ka meng kâwk a, Rammuana hmel tak rûn chu ngun lehzuala ka en hnuah, "Finfiahna emaw rinhlelh pakhat tal i nei em ni?" Tia ka zawh chuan koki sán âwk chung hian, "Rinhlelh te chu nei e, ka neih vang alawm helai thleng thlenga ka lokal, kei chauh hi ringhleltu awmchhun ka ni lo a nia," tia a sawi lai mêkin kawngkhar tu emawin a rawn kik a, Ngaihzuala a nih tawh ngei ka beisei.

Ka ring dik chiah bawk, amah Ngaihzuala a rawn lut zui nghal a, Rammuana nen min melh tawn sek hnuah ka mitah min rawn en chat a, a mitmenga zawhna chhân sen loh lang dawt zut chu ka chhiar thiam ve.

"Inleng ka lo nei a," ka ti sap a. Rammuana lam ka hawi pah zeuh bawk.

"In va sawi mûk awm ve!" Tih pahin tlângnêl tak hian ka bulah a rawn ṭhu a, a bân na lam pawh a awrh tawh lo a; mahse, Crepe bandage-in a la tuam chhah lûk tho.

Sangtei nen nizana an awm dan chungchângah lawm lohna ka neih tlat avangin ka biak ṭhat thâ a tho lo a, a lak aṭanga hriat duh tam tak nei chung siin ka la zâwt der eih lo thung. Ka duh chuan whatsapp aṭangin emaw phone call hmang pawhin ka zâwt thei tho taknain ka la ngawi ta rih chu a nia, ka chhungril tâwt ru ṭûn avang chuan ka thaw chhuak halh a, mipa pahnihte lah an in ngainat loh hmel nasa mai si.

Rammuana zâwk a rawn ṭawng hmasa a, "Bawihi nen hian thlanmual lamah tih tur kan nei a, i lokal ve duhte a nih loh chuan kal mai kan tum deuh," tiin Ngaihzuala hmêl thim mâk chu pawhlah zet hian a bia a, tiel lam rawng a kâi deuh.

"Keini pawhin hna tlêm khawih tur kan nei a, tukin lamah ka sawi lâwk tawh avanga rawn kal ka ni, Bawihi, ka inah kan phei dawn em ni ang?" Nelawmna tel miah lo hian a ti ve ngat a, a va buaithlâk e. Tun dinhmunah hi chuan Ngaihzuala lakah ka lawm loh miau avangin leh Rammuana thil sawi tur hriat ka duh avangin duh ka thlan a ngai tih ka hria.

Ngaihzuala pawh en chuang lo hian, "Rammuana nen nizan lamah kan lo sawi lâwk tawh si a, hna chuan a la nghâk thei alawm tiraw, ani hi chu a haw leh thuai dawna u Ngaihzuala thlan ka zuk tlawhpui hmasa ang e," tia ka sawi zawh veleh Ngaihzualan min rawn en vat a, mitmeng hriatthiam har zeta min en chungin, "Bawihi..." a ti sup ringawt.

Ngawirenga Rammuana ṭhu melh zeuh pahin, "Nizanah vawiin chungchâng sawipui tum chein ka lokal a, Sangtei nen in lo awm bawk si a, i nupui tur khan min lâwm viau lo," tia ner sak chung hian Rammuana ka mitmei a, a lo man thiam ngang mai.

Ngaihzuala a ding hluai a, "Bawihi, zaninah sawi fel tur kan nei aw, i u Ngaihzuala ṭhianpa chu ni lo se chuan a ruala i kal ka remti hauh lovang, thlanmualah chuan kal rawh u, kan mimal nun sawilanna hun a ni lo e..." ti hmuk hmuk chung hian kawngkhar lam a pan a, han en rêng rêng pawhin a lung a âwi zân lo tih a hriat reng mai.

Ngaihzuala chhuah hnuah Rammuana nen kan inmelh zuk a, "Thlâna kal tih vel kha chu ka chhuanlam a nih kha, Bawihi, i nau chhiat kha tu fâ nge?" Tiin min zâwt thut a, ka meng tâl tap a, chhân mai dan tur hre lova ka khap zak zak hnuah, "Chhui chhuak rawh," ka ti nghat a, a nui huk ringawt.

"Ṭhiana fa kha a ni em? Nge tuna i mipa kawp lai nena in fa zâwk?" A la ti ṭalh a, rum âla melh chung hian, "Nau ka chhiat tih i hriat chhuah theih chuan a pa pawh chhui tel law law rawh, ka damchhung hian i hnena sawi tumna ka nei lo," ka ti hmak hmak a, a hmel lan dan chang ta sawt chu ka thlir reng a, a thin a rim tih ka hrethiam mai.

"Ngun deuhin ka thusawi tur hi ngaithla ang che, tunah chhânna ka mamawh nghal lo a, ngun taka inngaihtuah nan ni thum hun ka pe ang che," tia a ṭhut dan siamremin ka lam a rawn hawi a.

"I u Ngaihzuala ka ṭhianpa leh Sangtei hi kum thum kal ta khan an inkawp ṭhin a, nang nena in inkawp hma thil a nih chu ka sawi, khawkhat an nih bâkah College khata kal dun reng an ni a, keimah nen pawh kan inkawm ṭhin tho. Inṭhenna mumal awm lovin an inkâr ṭha lai kha thâwklehkhatah a tawp thut a, tumahin an inṭhen chhan kan zawt chhuak zo lo, vawiin ni thleng pawh hian ka la hre ta chuang lo a," tia a sawi lai chuan mak tih luat avangin ka lo thaw halh a, u Ngaihzuala leh Sangtei inngaizawng tur anga ka ngaihtuah ringawt pawh hian ka âwmah hnawhtu a awm nghal.

Tihian a sawi zawm leh a, "Khatia an inṭhen fel hnu khan nangmah nen in inzui leh ta mai a, chutih lai chuan Sangtei kha Aizawlah a awm a, tuna i boss Azuala nen hian reilote hnuah an inkawp tih kan hre nghal vek bawk, ka ṭhiana pawh khan a hre vek a, ka sawi awmzia chu Azuala Champhaia an lo transfer hma hian i u Ngaihzuala nen an inhre tawh a, an boruak a ṭha lutuk lo tih kei hian ka hriatpui bawk," a tih leh zel tâkah chuan awih loh ngawt chi ni hian a lang lo tlat, dâwt sawi hmel a pu lova a thutak em em si.

"U Ngaihzuala khan Sangtei chungchâng a sawilang ngai lo reng reng," ka ti sap a.

"Sawi lang lo tawp ang, kei leh a chhungte bâk hria an tam lo, an inthup nasa reng bawk a, tikhan in inneih dawn a ruaiah accident a tawk a, Azuala helaia a awm lai a ni bawk," tiin a kut a hûm ruh a. 

''Helai hmunah Azuala transfer a nih dawn thu pawh ṭhiana khan min hrilha ka hre vek, i laka Sangtei chungchâng a zêp nachhan hi kei chuan ka hre lo, chuvangin a thihnaah hian felhlel awm ang tlata hriatna ka nei a, ka chhuia ka dap bawk a, tihpalh thilthu niin a lang tlat lova," a ti leh dap dap a, a sawi danah hi chuan u Ngaihzuala thihnaah khan ka Lalngaihzuala a ringhlel tih a lang reng mai.

"Eng nge sawi i tum, Azuala i ringhlel nge, keimah zawk nge Sangtei?" Ka lo ti a.

"Nang chu ka ringhlel lo che, Sangtei leh Azuala hi a ni ka rinhlelh, finfiahna tel lovin eng mah ka sawi ngawt thei si lo a, Azuala nen in inkawp rûk dan pawh ka hre nual tawh, chuti a nih laiin Sangtei a lo lang leh chiah a, nang hi alaiah i awm aw, i thluak hmang la, anni pahnih hian eng emaw ruahmanna an nei zawk nge hriat va ni suh, ka ṭhianpa Lalngaihzuala thih chhan diktak kan hriat theih nan nang hian min pui la ka duh, i boss hian a ngaizawng chea a duh bawk che, nang pawhin chu chu i hria a, in kal thûk tawh viau a nih loh chuan a lak aṭang hian eng emaw tal hriat chhuah kan tum dawn em ni ang, chumi atan chuan nang leh kei hi inngaizawng anga kan lan a ngai dawn," fiah fai faka a tih leh chuan ka ngawi rauh rauh a, ka thluak a buai nuai nuai ti ila ka sawi sualin ka ring lo.

"Eng mah ka hrethiam lo," ka ti thlâwt a. Min hriatthiam hmel tak hian, "Ka thusawi zawm la, i tana ṭha lo leh i chhiatna tur eng mah ka ngaihtuah lo a nia, ka ṭhianpa ni bawk hun kha leh chen i zui leh i pasal ni mai tur thihna hi chhui chhuah ka duh mai a nia, Bawihi, rorelna dik hmu se i ti lo em ni?" Tia min zawh chuan ka mittui ka khap per sak mai.

U Ngaihzuala hmel ka mitthlâah a lo lang a, a natuar hmêl leh min thlahlel tak chunga a kal tur lai ka ngaihtuah lêt hian ka na leh ngawih ngawih tawh. Rammuana rin dan hi a dik a, thah a nih takzet chuan ka inrawlhna ngei ngei tur a ni tih ka hria. Ka tlânchhe hauh lo ang.

"Eng nge ti tura min duh?" Tiin Rammuana ka en hâ a.

"Azuala hi bansan la, Sangtei nen hun thâwl siamsak rawh, an inṭhen hlen tak tak thei dawn lo a, mahse, Azuala nen in awm tawh dan ngaihtuahin Sangtei ai chuan tun dinhmunah hian nangmah a duh zawk che, a duh pe theitu i ni tlat..." a ti leh zel a, ka lo bo hû thung.

"Eng nge ka lak aṭang chuan a duh a?" tia ka zawh chuan, "Fâ maw le, Sangtei hian fa a nei thei lo," a ti zâwi sup a, Rammuana thil hriat theih dan leh a lo chhui nasat turzia ka hrethiam uar mai.

"Eng lo, ih...engtia awm tur nge ka hre lo, ka hre lo takzet," ka ti a.

"Zanin hian Azuala ṭhen la, kei nen inkawp angin kan lang ang, i tih dan tur leh i hmalâk dan tur ka hrilh zel ang che, min ring rawh," a ti dam thluam a, sawi ve tur hre lovin ka ngawi reng ringawt.

Ngaihzuala laka ka rilru puthmang ngaihtuah phei chuan inṭhen ka zuam hlawl lo. Tunah pawh a fa ka pâi lovang tih hriat a la ni lo a, ka laka a awm dan kha a der nithei hian ka hre si lo. U Ngaihzuala thihnaah a lo inhnamhnawih rêng em tih hriat ka duh tho bawk si. Â..ka â thei takngial dawn.

"Rammuan, eng tik thleng nge helai hmunah hian i awm ang?" Tiin ka zâwt daih a, rang fahran hian, "A lo berah thla hnih khat chu châm ka tum, RM Lodge din ka tum tih ka sawi tawh kha..." a ti ṭha ve mai.

"Ngaihzuala chu zaninah hmuh ka tum a, tu mipaah mah rinna nghah ka tum lo, mahse, i rinhlelh a dik nge dik lo tih fiah tur erawh chuan puih che ka inhuam e," ka ti ve ta a, inngaihtuah thui vak ka tan a ngai lo, ka hmangaih ber u Ngaihzuala avang chauh tal pawhin Rammuana hi ka puih a ngai a ni tih hi ka hriat chhun a ni mai.

Chumi hnu chuan thil dang sawi thui tawh lovin leh la inbe zui zel tur angin kan inthlah ta rih a, Rammuana tlanliam tur ka thlir a, ka nun chêp si zia ka hriat phah bawk.

Sofa-ah khûp tawm cháihin ka ṭhu a, Ngaihzuala nen kan intawn dan leh a hnua kan awm dun dan ka ngaihtuah kim dap a, "Vawikhat kan tum leh chhin thei alawm, i duhthusam fa nei tur hian ka pui ang che," tia Ngaihzuala thusawi khan ka beng a luh ngut ngut a, Sangtei a râi theih loh vangin hmanruaah min hmang tihna a va nimai awm ve...!

'Seol' tia an sawi ṭhin hi ka hringnunah a takin ka dâi mêk chu a ni ber e.

Ka ngaihtuahna kâwmin ka lo awm rei deuh a ni ang, ka phone a rawn rîk chuan ka phu zawk a, Ngaihzuala a la ni zui.

'Hello' ka tih rual rualin, "Rinduhawm, in haw tawh em?" A rawn ti vin hlur a, a hma aia nasain ka phu leh zawk alawm maw le.

"Haw tawh," tiin dâwt ka sawi teh ngawt a, "Ka rawn kal dawn" tih leh phone off a ruala call nawn tumna ka nei lem lo, a lokal ngei ngei dawn tih ka thinlung hian a hria a ni.

Minute 10 hnu velah Lalngaihzuala hmel dur khup nen kan inhmachhawn ta a, thinrim insûm tum tak hian, "Inngaizawng lai kan ni a, satliah taka inkawp kan ni hek lo, ka ta i ni tih hrilh nawna hriat nawn tîr kher che a ngai leh dawn em ni?" A ti hniam ruih a, chîk lutuk hian min en bawk a, ka awm a tinuam lo nghal ringawt.

A langah erawh chuan, "Nang leh kei hian sawi dun tur kan nei tam tawh lo, nizanah Sangtei nen inriak dun a, in inkârah inrawlh tumna ka nei lo ang chiah hian Rammuana chungchâng sawi chhuah ka duh lo a nia," ka ti ve hmak.

"Sangtei nen kan riak dun lo," a ti tâwi tuk ringawt.

"Lalngaihzual, mit ka neia beng ka nei bawk, nizana i ina lo awm kha i bialnu hlui nia i sawi Sangtei ngei a ni, nang ka biak phal lova hauh burtu che bialnu i nei a, i lawm viau ang chu..." ka ti sak sak a, a ngaihna hre lo hmel a pu nain ka haider hmak.

"Rinduhawm, thu lawi lo sawi mai mai tura lokal ka ni lo a nia, kha pa kha tunge, i eng nge a nih? I u Ngaihzuala ṭhian satliah a ni tih sawia min bum tum hlek suh," a ti leh khur khur a, a hmel ṭha tak ṭhin kha ṭo haw tur ang maiin a thim khup a, a nelawm loh a ni tawp mai.

"Ani chungchâng sawi ka tum lo, tun aṭang hian nang leh kei hian inzawmna kan nei tawh lo aw, i hnaiha awm tumna pawh ka nei tawh lo, Ngaihzual, pakhatah lungawi la, ka nunah rawn inrawlh tawh suh," tia ka sawi zawh rualin ka dârah nghet zet hian a rawn man a, "Nangnena kan inzawmna hi awlsam taka pawhchah theih a ni lo aw, inṭhenna a awm dawn a nih chuan thihna ni rawh se..." a ti hmiah.

"Eng a?" Ka ti vin ṭhat a.

"Nang leh kei hian hmabâk thui tak thlir tur kan nei a, inṭhenna a awm lovang, kan inṭhen dawn a nih chuan THIHNA hmangin aw..." tih pahin min thing nawk nawk a.

"Ka hlata awm tumna rilru i put leh chuan kan pahnih hian kan thi dun ang," nghet churha tiin min vawnna a thlah a, sam tuai puat chung hian, "Ka nunah midang seng luh tumna ka nei tawh lo, Rinduhawm, rilru dang i pu thiang tawh lo a nia," ti leh supin a vei tawn sek a, ṭawng ngaihna hre lovin ka lo ngawi tawp.

Hetianga a awm lai hi ka vawikhat hmuhna a ni a, 'Thihna' tia a sawi zawh chiah khan ka chhungril a fan chhuak vek.

Lalngaihzuala mize dik tak hi ka lo hre âwzâwng lo a nih ber hi. 

"Inṭhenna thu sawi tur hian minute tam ka mamawh lo, kan inkâr a tawp tawh..." ka ti chhuak sap a.

Rum lutuka min melh chung hian, "Rammuanawma kha ka thah kher ngai suh se, ka ti hreh hauh lo a nia.." a ti ta a.

"Ngaihzual...eng nge i sawi?" Ka ti lâwi rât a...

"Ka sawi chu i hriat kha, kha pa hnaihah khan i awm leh emaw i u Ngaihzuala te inah i kal leh tih ka hriat vaih chuan Lalngaihzuala dik tak i hmu tawh ang," tiin hnunglam hawi map lo hian a chhuak zui nghal a, ka hrilh a va hai si êm...

"Ngaihzual..." tia ko chungin ka ûmzui a, a ding duh ṭhak nang. Chak fe hian a pên pâwk pâwk a, midangin min hmuh ka hlau bawk nen ko zui tawh lovin inchhungah ka lut ta zawk a.

Nunphung pangngai ka zawh ṭan dawn chauh a, Hremhmun dangah ka inbarh lut leh dawn ta.

Ka ṭhu hnawk a, hmai hup chungin ka maimitchhing a, ka hun liam tawhin min uai rit telh telh mai si.

Lalngaihzuala hian chuti maiin min kal tîr dawn lo tih ka hria a, ka hah ngawih ngawih. 

Beidawng ru zet hian ka mittui ka hru a, ngaihtuah tur ka ngah si, ka awmna tur nilovah ka awm tam lutuka ka tuar zel dawn a nih tâk ber hi...

B+>[BeckirafARenthleI]<+®