13.DROGMA SEOL [A Becky Rafa Story]

13.DROGMA SEOL

Ziaktu: Becky Rafa Renthlei

[Recap]

"Ngaihzual..." tia ko chungin ka ûmzui a, a ding duh ṭhak nang. Chak fe hian a pên pâwk pâwk a, midangin min hmuh ka hlau bawk nen ko zui tawh lovin inchhungah ka lut ta zawk a.

Nunphung pangngai ka zawh ṭan dawn chauh a, Hremhmun dangah ka inbarh lut leh dawn ta.

Ka ṭhu hnawk a, hmai hup chungin ka maimitchhing a, ka hun liam tawhin min uai rit telh telh mai si.

Lalngaihzuala hian chuti maiin min kal tîr dawn lo tih ka hria a, ka hah ngawih ngawih. 

Beidawng ru zet hian ka mittui ka hru a, ngaihtuah tur ka ngah si, ka awmna tur nilovah ka awm tam lutuka ka tuar zel dawn a nih tâk ber hi...

-B®® stories

Siami lah chuan vawi tam min lo call tawh a, zan lamah a birthday lawm a tum tih ka sawi tawh kha aw, kei lah mood chhe lutukin ka awm a, ka nu a lo la haw bawk si lo.

Ka u Hmingmuana nise a reh vang vang a, Ngaihzuala nen min ringhlel ṭan tih ka hria a, a hriat chhuah hunah engtin tak min ti ang maw? Ngaihzuala nen bul kan ṭan ve chauh a, a fa ka pâi dawn nge dawn lo tih ngaihtuah a ngai bawk a, Rammuanawma a la awm tel cheu. A tum a ruh hmel nasa mai si a, dan chêpin ka awm a, Jail tâng angah ka inchan hial.

U Ngaihzuala thihnaah Ngaihzuala leh Sangtei inrawlh angin ka'n suangtuah chhin a, a ni thei ngang lova hriatna ka nei lawi si. 

Mahse, awlsam taka Rammuana thah a hreh loh thu a ṭawngkâ ngei ka hre bawk a, kan Lalngaihzuala hi a lan dan phênah hian tu chiah nge maw a nih rêng rêng le!?

Thluak buai nuai nuai chungin eirawng ka bâwl a, ka nuin min lo call a, a rawn haw hma dawn lo tih a sawi chuan ka thaw huai mai. 

Ka sawi hmaih miah loh tur chu Ngaihzuala nen kan awm tawh dan zawng zawng vawi tam ka chhuikîra ka ngaihtuah lêt ngial pawh hian, fâ a duh vanga min kawp leh kha Contract phuahchawp kha min remtihpui niin ka hre thei tlat lo. A tîr têah khan amah ni lovin keimah zawk hian kha dan kha ka zam a, chu chu min ṭâwmpui mai chauh a ni.

Rammuana ka ngaihtuah kâi zui leh a, Lodge-a kan inhmuh bâk kha hmun dangah kan la inhmu lo, u Ngaihzuala nen kum hnih lai kan inzui ve a, chuti chunga a ṭhian ṭha êm êm hming vawikhat mah a lam ri ngai miah lo hi thil mak pakhat a ni bawk; Sangtei leh u  Ngaihzuala an inngaizâwng ṭhin tih erawh ka ring hmiah. A chhan chu veng khat an ni a, kan intawn hmaa thil thleng a nih bawk avangin ka hnena sawi lan ngaiah a dah lo tepawh a ni mahna. 

Mahni 'X' te hming sawi zuah zuah duh ang chi mipa a nih ka ring lo a, mahse; kei nen kan intawn hma chiahah Sangtei hi a awm tih ka hriatna hian tlêm chuan ka awm a tinuam lo ve deuh. 

Thim dâwn aruaiah ka nu a lo thleng ta bawk a, Vawk note pakhat a rawn hawn chu kan ṭhenawm tlangval nen a in tura kan sakah an dah lût tê tê a, chumi hnuah muangmarin zanriah kan kîl a, ka u Hmingmuana a la haw ta lo fo.

"Nu, Siami birthday a ni a, kal turin min phût ve tlat a," tiin Siamin min sawm dan leh kal a phal ve em tih ka zãwt nghal a.

"Zan chhuah ka remti tehchiam lo asin, bâkah i ke kha la dim deuh la, dam angin lang mah la indim tluk a awm lo," tih chiah a sawi.

"Siami bâk ṭhian hmeichhia sawi tur ka neih loh hi, kan inah min rawn sâwm tho tho ang, i phal loh chuan ama hnenah sawi rawh aw, keiin ka hnial a nih chuan a lungawi dawn lova, office-a ka kawm ve ber a ni bawk si," ka ti leh niah niah a.

"Anmahni an lokal te chuan thuhran a nia," a ti leh lawi a, ka u call tura min nawr sek avangin ka call nghal a, ka rin loh deuhin rang fê hian min rawn chhâng a, "Bawihi, chaw min lo eisan rawh u, ka ṭhiante inah ka riak dawn," dam angreng tak hian a ti a.

"Ka nuin a ngaihtuah chea lo haw la, zan rei deuh pawh nise hmun danga riah ai chuan rawn haw a ṭha zawk," ka tih chuan, "Hnathawh hlek tur kan nei a, chuvang mai mai, min lo ngaihtuah suh u," a ti tluang purh a, a hmaa min biak dan nena khaikhin chuan tlêmin ka rilru a nuam deuh.

Ka u nen kan inbiak dan ka nu ka hrilh leh phawt a, chutih lai chuan Siami âw ka hre chawpchilh a, "Bawihi..." tih pahin kan ṭhiannu tho Julie nen an lo lut a, "I la insiam miah lo elaw? A mak e..." ti lehin ka nu hnenah dil taktein a dîl ta a, "Kan lo thlah leh vek ang, kan mengrei lovang," a ti thûl. A tawp a tawpah ka nuin a phal leh tâk hi..ka boruak tawn nen ka châk khuchûk lo khawp mai.

Siami leh Julie nen kan inzui chhuak leh ta nge nge e.

"Bawihi, nu Hruaipuii kha i hmelhriat tiraw? zanin na na na chu kan bushing ve ang chu," tih pahin a nui ar ar a, a sawi awmzia kan man vek. Nu Hruaipuii te inah zu lâk an duh tihna.

"Ka kal lohna a rei tawh sia ka phone hmasak loh chuan ka inthlahrung deuh," ka ti ṭha ve mai a, Julie zâwkin, "Kan pathuma kal vek ai chuan Siami nen han kal ula in lamah ka lo awm ang, ei tur vel ka lo siam dawn nia," a lo ti a, bu nghat nghat chungin Siami chuan min mitmei a, "Lokal rawh, Scooty in kan tlan zuai dawn nia," a ti ta a.

A hmaa lo in ve zuk zuk ka nih tawh avangin zanina han in leh pawh hnialna ka nei miah lo. Ka rilru pik lutuk chhâwk zangkhaitu ni lo mah se hun reilote atana engthawl taka awm ve ka châk a ni deuh tawp.

Hemi hnu hian Siami nen nu Hruaipuii te in lam panin kan tlan ta a, zan a la rei lo bawka tu mitmei mah kan vêng tehchiam lo.

Nu Hruaipuiin min lo hmuh veleh, "Bawihi, i ngaihawm hle mai, eng nge in rawn tih dawn?" Tiin nui var var chung hian min lo chiauau a, ani hi zawng ka lakah a ṭha ṭhin rêng a ni.

Kan kal chhan ka hrilh zuai zuai a, "I ti tawh dawn lo emaw ka ti a," tia nui chungin min pe ve tho a, room lamah min kuah lût a, "Azuala hian a duh tak tak che a nia, ka lo inrawlhna tur a awm lo viau nain Azuala kher hi chu i tan a ṭha a nia, i u Ngaihzuala pawhin i hlim hi a duh dawn, chuvangin ani nen insawifel teh u..." a ti teh daih a, ka lo mengphar âwk mai.

"Naa...teh ngawt a che..." ka lo ti hliai a, nu Hruaipuii hian engkim a hria tihna em mawni le?

"In inkâr a ṭhat chuan a lo lang tlêm a, a ṭhat loh chuan a lo lang zing thung, in inhriat hma daiha lo hre tawhtu ka ni a, i chanchin min zawt fo bawk, Bawihi, ka ti tak tak a nia, inrem takin awm teh u, zanin tlai pawh khan a rawn awm renga a rilru a hrehawm tih ka hria," a ti leh zel a, zawh thui ka duh viau naa Siami bosan rei lutuk ka hlauh vangin, "Umn..nidangah kan sawi ṭha dawn nia," ka ti ta ringawt a, ani pawhin a lo hrethiam ve mai. 

Zu in hi ka tan a ṭha lo tih ka hria, chuti a nih rualin hun eng emawti chen kha ka lo birh ve a, zu heh tia sawi tur ni lo mahila zu duh chu ka ni tho tho. Heti lam kawngah hian ka nêp a ni ta ber e.

Siami nen an in lam panin kan tlan leh nghal a, kei ta pek chuan, "A latu nih manah no hnih khat chu ti hmasa ila," ka'n ti zeuh a, min pawmpui rang teh a nia.

An in thlen hma lawkah rem lo zetin kan lem dun a, kan chaw eikhamna a la rei lutuk lo bawk nen in a har ngâng ngâng a nia, mahse; a tuma tum ta na na na chuan no hnih kan in ve mai.

Ka rin loh deuhin an inah mi an tam phian a, kan thawhpui pahnih khat ka hmu bawk a, min lo be ve liam liam a, khatia Ngaihzuala nen accident kan tawh hnu aṭang khan office ka la kal miah lo a, helaia min lo hmu hi mak an ti deuh a ni mahna hriat va ni suh.

Rammuana'n min lo call avangin Veranda thlang lamah ka ṭhu chhuak a, zan dar kua a pêl tawh.

"Bawihi," a rawn ti zâng vah a.

"Tunah chuan ka chhuak rih lawk a, nakinah kan inbe ṭha dawn nia," ka ti zung zung a, "Phone dah rih suh aw, khawiah nge i awm, a va han bengchheng em em ve a?" A rawn ti a.

Siami birthday kan lawm thu ka hrilh ṭha ve mai.

"I boss a tel ve em?" Tiin min zâwt hrâm a, a tel loh thu leh keimahni ṭhianho mai mai kan ni tih ka sawi leh a, ka thil in vang nge Rammuana min zawhna ṭha tea ka chhâng ve zel hi a mak a nia, a thil sawi tam tak avang khan amah huatna rilru ka pu ta vak lo a ni maithei.

"I haw dawnah lo sawi la, ka lo hruai dawn che nia," tiin kan inbiakna a titawp ta rih a, a duhnaah chuan a felin biak a nuam tih a hma khan ka hre tawh a, tuna min rawn biak danah pawh hian ngaih huat tur eng mah a awm lem lo.

Siami chhungte hmel ka la hmu lo teh tlat a, an fanu an thlah zalen viau. Amahin a lo zir ve bawk a, a chhungte hian zu a in ve tih an hriat kher ka ring lo bawk. 

Veranda thlang lamah ka la ṭhu ta reng a, inchhung lam thawm a ṭha ang reng, hetiang boruak thuartham vel hi ka ngaina ngai lo kha a ni a, hun reilote chhungin ka mizia leh ka nun dan a inthlâk hlawk a, u Ngaihzuala vang a ni tih pawh ka hria.

"Rinduhawm..." tia min lo kotu chu Ngaihzuala a ni.

Chîk zetin min en a, "Helai hmunah hian i awm ka ring reng a," tih pahin ka ṭhutna bulah a rawn ding a, mit khap fak fak chung hian ka melh chho hâ a, a hmelṭha tak leh thar sar chu ka en a, eng nge a ngaihtuah tih a hmelah a lang eih nâng.

"Eng nge i lo tih ve dawn?" Tia ka zawh chuan a ner sawk a, "Nangmah ang tho khan sâwm ka ni, i kal ngei dawn tih ka hriat vanga lokal ka ni bawk," tiin ka hmai bulah a rawn kun hniam a, "Zu i in elaw?" A ti sup a, ka ngawi hmak thung.

"I pum chhungah khan kan fa tur a insiam maithei, i chin i hriatchian hma chuan zu in tur i ni lo asin, Bawihi, eng ati nge hetianga i awm tlat mai le, ka lakah eng lungawi lohna nge i neih?" hniam ruiha tiin a meng dul ruih a, min hnaih fe hian ṭhut hmun a rem nghal a, tawlhsawn tuma ka chêt veleh, ka bânah a rawn vuan a, "Bawihi, kan inkâr ṭha lai tihchhiat vek duh tur khawpin i lakah sual ka chhuah em ni?" A ti ta a.

"Ngaihzual, hriatthiam tum rawh, helai hi khatiang sawina hmun leh hun a ni lo a nia," ka ti sap a.

"A nih chuan, kan inkâr sawi fel theihna hmunah kal ang, ka hrilh chiang tâwk tawh che," ti nghutin min pawt tho a, "Eng nge i hriat a?" Ka lo ti vin hlar a. 

"Sawi fel ngai kan neia kan sawi ngei bawk ang, i tan hun leh thâ tam tak ka sengral tawh a, hetiang mai maia tawp tir ka tum lo a nia, Rammuanawma kha hnaih tum hlek suh.." nelawm loh taka tiin inchhungah min kai lut a, midang an awm ve ṭeuh avang leh kan thawhpuite mitmei vêng ru tak chung hian Ngaihzuala ka zui dat dat a, ka thin a rim ṭûn mai.

Siami te awmna bulah min hruai phei a, "I ṭhiannu hi thil zawh lawk tur ka nei a, midang awm lohna hmunah ka'n hruai lawk ang aw," tiin dam thluam hian a bia a, Siami lah chuan, "Aw le, ka room-ah inbia ula, engmah ei lova in chhuah ka remti dawn miah lo a nia," kâi phelhphawlh chunga tiin a nui sâng a, Ngaihzuala a kiai suk ringawt.

Chumi hnu chuan Siami room inchung lamah min chhohpui ta a, nichina ka zu  in ve te kha chu eng tihna mah a ni tawh lo, ka harh kur tho.

Ka ṭhiani room felfai zetah chuan a hranpaa ṭhutna tur a awm loh avangin khumah min ṭhut tîr a, ani erawh tukverh bul hnaihah a ding thung a, a bân na lo lam chuan a jeans kekawr ipte a zen a, a hmel a nelawm viau loh.

"A tîr phat aṭanga kan awm dan, kan hun hman dan kan hre dun ve ve a, engkimah ka thiam vek ka ti lo, nangmah avanga kalsan ka neih pawh i hria, tisa inzawmna aṭangin kan thinlung kan zawm a, i laka ka rilru puthmang pawh zêp awm lovin ka hrilh fai vek che, accident kan tawh hnuah pawh a hmaa kan awm angin kan la kal dun zel a, min duh huam huam lo tih ka hria, mahse, nang leh kei hian inzawmna nghet tak kan nei tawh, tun hnaia i awm dan hriatthiam har lutuk hi ka pawmzamin ka en liam thei lo a nia, Bawihi, eng hian nge i rilru tibuai a min hlatsan ṭalh i tum chhan hi han sawi teh," ti duahin min rawn en a.

"Inzawmna neih ka duh tawh lo..." tih chiah ka sawi.

"A chhan mumal tak i sawi loh chuan ka kal tîr dawn lo che, a ṭûl a nih tâk leh ka ru hreh lo che a nia, i lakah hian thil holam mai mai ka sawi lo.." a ti hmuk a.

"Ngaihzual, kan pahnih hian inkawp tur kan ni lo a ni ang, inngaihzawnnaah chuan mi pahnih chiah an ni tur a ni a, nang chuan a ruala pahnih neih i duh, Sangtei hnenah i kîr leh tawh tih pawh ka hria a nia, zêp buai tum duh suh..." ka ti ve hmak.

"Rinduhawm, Sangtei sawi kâi lovin kan pahnih chungchâng chauh sawi mai rawh, ani khan tel vena a nei lo," a ti chang fak a.

"Anih leh u Ngaihzuala kha i hre sa em? Kei min hriat hma hian ani kha i hria tiraw?" Tia ka zawh chuan a meng buai nak a, rei erawh a ni lo thung.

"I u Ngaihzuala hming sawi lang teivet suh, mitthi tawh khin khin ka duh lo a nia," tih pahin tukverh a hawng a, pawnlam a thlir zui daih.

"Ka lakah hian eng chiah nge i duh, u Ngaihzuala te ina chaw ka ei hnu khan i inluahah ka rawn kal a, Sangtei a lo awm tih ka sawi lovem ni, in inṭhen tawh a nih si chuan i inah engti tura lokal nge a nih si, chupawh zanah lehnghal..." ka ti ve sak a.

"Khami tlai khan ka thin a rim êm avangin zu ka in a, tam tak ka in bawk, ka ruih viau hnuah khumah ka insawna a bâk eng mah hriat ka nei lo, Sangtei a lokal tih phei chu a hriatin ka hre lo hulhual, Bawihi, eng lai mah hian dâwt muhlum ka hrilh ngai lo che, nang ka thlang tawh chea ani ka kalsan tawh bawk.." a ti nghet churh mai.

"Hriatthiam tum zawk rawh, tihian inṭha ṭhen ila kan pahnih tan pawh a ṭha zawk ang, Sangtei nen hun kha leh chen inzuia inkawp, inneih tum hial in ni a, u Ngaihzuala theihnghilh hmin ṭhaka nangmah kawp che hi ka thei lo a ni e," tia ka sawi zawh rualin min rawn hnaih ruak a, "Dawt min hrilh suh, Mamita kan awm chhung zawng pawhin tuna i thil sawi kha i sawi lang lo, eng hian nge i rilru tidanglam min hrilh rawh...Rammuana vang em ni?" A ti leh a.

"U Ngaihzuala phatsan ang tlatin ka inhria a, a thihnaah khan thil felhlel a awm bawk, accident satliah nilova hriatna ka nei," tiin Ngaihzuala mitah ka en chat a, a danglam chhin eih lo nia!

"I sawi awmzia ka man lo, han sawi chiang deuh teh." A ti sup a.

"U Ngaihzuala thihnaah khan midang inhnamhnawih an awm a ni, tunge tih hriat chhuah ngei ka tum bawk, chuan, i bialnu Sangtei leh u Ngaihzuala kha an inngaizawng ṭhin tih hre lo der tawh bawk suh, nang hian engkim i hria tih ka hria a nia," ka ti chang fak a. 

A meng rum sawt a, a sam tuai puat chung hian, "Ngaihzuala, Sangtei, tih reng mai, anni pahnih hi ka buaina a ni lo, i rilru rang taka i sawhsawn leh kan inkâr ṭha lai thâwklehkhata tih tawp i tum ringawt hi a ni ka hriatthiam loh chu, i u Ngaihzuala kha thah a ni emaw, accident a ni emaw ka tan a pawimawh ber lo, nang mah Rinduhawmi hi i pawimawh zawk," a ti vin hlur a, thinrim a tum zawk em mawni!

"Ngaihzual..." ka ti hliai a.

"Vawi tam sex kan hmang tawh a, kan inzawm dan chu a enga pawh nisela inṭhen mai mai ka duh hleinem, tunah nau lo pai ta la, a hmaa ka sawi ang chiah khan awm ka tum bawk, Bawihi, inṭhen ka duh lo, mipa hrang hrang kawp lâwr chi i ni ve lo tih ka hria a nia," dam deuh zawka tiin a thaw chhuak hawk a.

"A nih leh thil ka zawt ang che, thudik tak min hrilh la, chu chuan kan inzawmna neih hi a tinghet lo a nih pawhin a pawt chat tal ang," ka lo ti hmiah.

"I duh duh min zawt rawh.." a ti zawi sup a.

"Champhaia an lo transfer hma che khan u Ngaihzuala hi i hria em?" ka ti nawn leh ngat a.

Min chhâng lova a ngawih vang vang hnuah, "A hming chu hria e, a hmêl erawh vawikhat mah ka hmu lo," a ti zâwi ruih a, a hmel ngun takin ka en tlat a, ani pawhin min en lêt ve tho.

"Sangtei nen an inngaizawng ṭhin tih i hria em?" Ka ti leh a.

"Hetiang thil sawi chhuah kher hi a ṭûl lo maw le?" a ti sup a.

"Ka hriat duh min hrilh thei dawn lo a, i sawi duh lo a nih chuan sawi dun tur kan nei tawh lo a nih chu.." ti hmakin ka ding chhuak a, a che phat a, min nem ṭhu lehnghal a. 

"I u Ngaihzuala leh Sangtei kha kum khat aia tam an inzui a, an inṭhen hnuah chauh kei leh Sangtei hi kan inkawp bawk, dik tak chuan nang leh Lalngaihzuala in inkawp lai reng khan vawi tam tak i u Ngaihzuala khan a rawn text ṭhin.. Bawihi, thil ṭûl lo min sawi tír tum hi a ṭha lo a nia," a ti a, nichin ai chuan a thutak tawh zâwk.

"Dâwt sawi suh, u Ngaihzuala khan chutiangin a ti hauh lovang, i bialnu ṭan viau pawh a ngai lo," ka ti vin ṭhawt a.

"Ka hmu a, ka hria a, vawi tam kan inhau phah bawk, mahse, a hun lai khan Sangtei ka duh a, ani pawhin min duhin min thlahlel em ema kan tan chuan i u Ngaihzuala kha a hnawksak." A ti hmiah.

"Lalngaihzual, ṭawng fimkhur rawh.." ka ti khar khar a, a lo ner nasa mai.

"Inneihpui hialah a sâwm chea chuti chung chuan a bialnu hlui a thlah hlen thei lo lai kha ka tan amah huatna tham a ni." A ti leh a.

"Chuan, amah i huat avang chuan thah i lo duh ta a, accident anga kal tîrin hma..." tia ka sawi zawh hma hmain, "Rinduhawm, ṭawng tawh hlek suh, kha pa kha ka kut hmawr pawhin ka tawk lo e, inseh ruh ṭeuh chung hian a ti a, a vei nghut nghut a, insum a tum hle tih a hriat mai.

"A nih chuan joining report i pek hun lai khan ani a thi bawk a, thil kal dan hi a mak i ti ve lo maw, nupui nei mai tawh tur a ni a, mipa dang bialnu lo be zuk zuk duh khawpa mipa nêp a ni lo keima u Ngaihzuala kha, dâwt phuahchawp i thiam lo em mai," ka ti zêk a, a pen lai tawp chawtin min rawn en a.

"Ani kha i duh huam huam lutuka a ṭhat lohna i hmuh hmaih a ni e, a chhungkua leh nangin i hriat miah loh hian engtin nge a khawsaka a awm tih chhui chhuak rawh, a hnathawhna hmunah an hrechiang viau a nia," inringtawk taka tiin min rawn thlêk vung vung a.

"I u Ngaihzuala kha chuan i lakah thil a tisual ve thei lo, tisual pawh nise i hriat hmain a nâwt reh leh vek ang," a ti chang fuk a, a ṭawng dan hmangah hian u Ngaihzuala a haw hle tih a hriat reng.

"A thihnaah hian i inhnamhnawih ve em? Tel vena i nei em?" Tia ka sawi zawh rualin ka biang a ri sawk a, Ngaihzuala thinrim thaw ri hrawih ka hre chhunzawm a, a kut na lo lam a la lek kâng uaih a, a mitmeng a hriam ṭha ngang mai.

"Sangtei laka i thikthu chhiat vanga inṭhen i duh niah ka lo ngai a, insawifiah ngei ka tum bawk, mahse, chutiang ni lovin i u Ngaihzuala thihnaah tel vea min hriat avangin min kawp a, ka lakah i inpea inremsiamna mak leh awihawm loh zet hmangin min bum a, ka awih thei lo...Rinduhawm, eng ang hmeichhia nge maw i lo nih le! Kha aia nâa ben kha i phu..." a ti hmiah hmiah a, a thinrim hle tih hrilh hranpa ka ngai lo.

Ka tum loh deuh deuh ka sawi chhuak a, a hun hmain ka kâ ka âng ta a nih hi...ka biang sa hat hat chu ka kutin ka dawm a, Ngaihzuala khumah a ṭhu hnawk a.

A hmai hup chung hian a thaw hawk hawk a. Atu amah kan ṭawng tawh lo.

Reife ngawi renga kan ṭhut hnuah, "I la hriat ngai miah loh mipa i mutpui a, nula thianghlim ni chung siin ka lakah awlsam tein i inpe a, ka fa pai tumin i bei a, ṭan i khawh a, i lo chhiat hlauh te kha Pathian hnenah lawmthu awm rawh se, i u Ngaihzuala thihnaa mawhphurtu ka nih i rin avangin min tâl-awh tîrna tur thang i lo kam lek chu niin. Ka ring che a, mi rinawm ni ṭhin rinawm lova min chhuahtu ka hnaih bawk che a, min lo hmakhalh char char si...i mak lutuk, kha pa nen khan inkawp awm reng in lo ni e..." chiang fek fawka tiin a ding chhuak a.

"Kal ang che, ka nun aṭang hian kal la, ka thinlung ata hi Seol dangah va insawn rawh, mahse, i taksa erawh ka kiangah a awm ang, Rinduhawm min va tina em em ve," tiin ka inrin hman hma hian amah si chêtin min pawt thut a. 

"Ka hmeichhia i nih hi.." ti sup chung hian, dîm map lovin ka hmuiah min rawn fawp ta a, ka duh lo tâl vel pawh eng teh ualah a ngai lo, ka tukkhum samah pawtin min kuai dâk sawk a, na zet hian min fawp bawrh bawrh a, lo ṭanga lo dang tur pawhin thâ ka nei lo.

Ka hmui thîp hlur chu ka tuai a, tukverh bulah bawk a va ding leh a, "Tunkâr thar lo awm turah hian palai hmel i hmu ang, i u Ngaihzuala thattu kiangah i chêng dawn tihna a nih chu, min lo hnar emaw min dodal a nih chuan a tîr aṭanga tun hun thleng hian zêp awm miah lovin i nu leh i nuṭapa ka hrilh ang, ka ti ngei ang," a ti ta a.

"Lalngaihzual, min vau suh..." ka lo ti thâm ṭiak a.

"Vau lah lo e, i lan dan phena i mizia hi i chhungte hian hriat an phû ve a ni, kei anga mipa dang i bum kual mai mai loh nan leh Rammuanawma'n a hnaih theih lohna tur chein ka thununna hnuaiah i awm dawn, a chhan chu maw, eng anga chhia leh tenawm pawhin min puh mah la, ka la duh tho che, Rinduhawmi hi ka la duh tlat..." tiin za lo tih hriat takin a nui lui ngial a, ka run a nia.

Chhân tuma ka ân zuau laiin Siami âw ka hre ta a, "Bawihi, lo hawng teh u, in laklawh loh chuan," tiin kawngkhar a bêng dat dat a, Ngaihzuala a kal vut a, kawngkhar kalhna a hawng zui a, Siami chuan Ngaihzuala nen min melh tawn sek hnuah, "Engmah in la ei ve si lo a.." tih pahin a tray châwi lai dawhkanah a rawn dah a, Whisky ûm khat a la tel hram.

"Sir, kha chiah kha a awm tawh a, midangin min dil hmain ka thukru a nih kha.." nui chungin a ti a, Siami tan chuan Ngaihzuala biak ṭhat a ngai reng ang chu.. kan boss a ni miau a, a hnial ngam tawp nâng.

"Siam, min lo nghak rawh, i rualin ka lo chhuk ve ang," zawi sap hian ka ti a.

"Chhuksan rawh, nakinah keiman ka thlah dawn nia," tia Ngaihzuala a ṭawng lai mêkin ka phone a rawn ri a, ka en vat a, Rammuana a lo ni.

Pick up lovin ka hmet busy a, Ngaihzuala mitmeng fing zet chuan eng mah a hmuh hmaih lo tih ka hria. 

Siami pawh nuam ti vak lo chung hian a chhuak leh ta a, zan dar 11 a pelh tawh avangin haw a hun tawh hrim hrim.

"Min thlah duh suh, keimahin ka haw thei.." ka ti nghat a.

"Zu in i duh a ni lawm ni, no kan dawm dun leh ang chu.." tiel awkâ taka tiin whisky ûm a lek chhuak a, a thli zui zat bawk.

"Ka haw dawn..." tih leh kawngka lam pan ka rual a.

Kei aiin a ṭuan a rang fe. Min pawt lêt dâwrh a, "I duh ang angin i awm dawn tawh lo, thunun i ngai aw, ka thunun phâkah i awm tawh ang," a ti sup a, khum lamah min pawt phei a, ka phone min chhuhsak hmiah a, "Rammuana kha call rawh, tunah be rawh," a ti sek sek a, zu no khat a in pawp a, a ner nasa mai.

Che lova ka la awm reng avangin ka phone min pe a, "Rinduhawm, call rawh, ka tih chu..." a tih leh pawhin ka la che chhuak ta chuang lo, "Luhlul si, thinchhe bawrlawk si, heti chung hian ka thlah phal chuang lo che a nia, ka â tawh a nih ber hi..." a ti hmuk a.

Dawhkana whisky a inthlit leh lai chuan, "Ka in tur min thlit kêp rawh.." ka ti a, mak tih hmel fe hian min melh a, eng mah sawi lovin a thli ve mai.

Chumi hnu chuan inbe miah lovin zu no kan dawm a, Siami ei tur rawn dah chu tlem tlem kan ei pah bawk a, kei Rinduhawmi zu duh pawhin ka in leh tâk ṭeuh hi...ka la in leh bawk ang.

Ngaihzuala erawh chuan no khat a tlâk pawp tih loh chu muangchângin a in a, a ṭawng lo hrim hrim.

Ka ruih tawh êm avangin ka meng chhuak thei lo a chhâ chu a ni e, tun hma ang chiah khan eng mah pawisak lohna lian deuh ka nei a ni ber. Mi beidawng leh mi nêp ka lo ni e.

Lalngaihzuala kalsan dawn ila a lakah ka lo inphalrai tawh si, ani lahin sawi chhuah a châk et et a, ka chhungte hrilhah min la vau ta lehnghal. U Ngaihzuala thihnaah a tel ve emaw tel lo pawh ni se amah ka hlatsan theih lohna turin ka inbarh lût thui tawh a, tâl chhuah leh a harsa tawh si.

Rammuana pui turin ka lo intiam tawh bawk a, ka dinhmun a khirh kikawi vek.

"I kal thei em?" Tia min biak pawhin ka bu nghat a, ka kâwngah a rawn kuah a, inhnuai lam kan pan lai ka mang hriat reiruai chauh a ni.

"A nu hnenah lo phatsak rawh aw, hetianga a haw chuan a nu a lungawi lovang, in ina riak tur angin sawi mai rawh," tia Siami a hrilh lai pawh ka la hria a, a bâk hriat zui ka nei ta lo.

Ka harh leh chuan ka lu a rit lûk a, luak rim ka nam huam bawk. Ka awmna lai hriat chhuah tumin ka hawikual a, Ngaihzuala khumah a vângtan zawngin ka lo mu a, amah ka hmu lo thung. Khua a la var lo a, thim chhah erawh a kiang tawh a ni ngei ang, kâwl a êng lek lekin ka hria.

Ka tui a hâl êm avangin ka ṭhu chhuak a, khum bula tui bottle chu ka ban a, a zatve dâwn ka in khawlh khawlh hnuah ka harh deuh huai mai.

Khum thawhsanin sitting room lamah ka phei a, ṭhutthlengseiah Ngaihzuala a lo ṭhu a, a hmai a hup tlat avangin zawité hian ka ko a, a rawn dâk chhuak rang a nia.

"I harh ṭha em?" A ti a. Ka lo bu nghat ringawt.

"Khua a var ṭep tawh a, dar sarih velah Siami a rawn kal anga in inah a thlah phei dawn che nia," a ti leh mai a, a mit a sen râm a, a mu ve miah lo a nih ka ring.

"I duh chuan khumah va mu leh rawh, Siami lokal hunah ka rawn ko ang che," a ti leh a.

"Aih, ka haw zâwk mai ang," ka lo ti a.

"Bawihi, i nu ngaihdan a ni dawn lo lutuk, ka thu vawikhat tal zawm hi a harsa viau em ni?" A ti sup a.

"Heta awm reng a ṭha lo, khawvar huna ka haw chuan i ṭhenawmten min hmu anga a fuh lo zawk ang," inthlahrung ru deuh hian ka ti a, "Khatiangah ka buai ve lo, kar lehah palâi ka lo tîr dawn ka tih kha, ka ti tak tak a nia," a ti leh ta.

"Lalngaihzual, fiamthu hun a ni tawh lo," ka ti hlak a.

"Ka fiamthu bik hleinem, ka kalsan thei lo che, inṭhen a ṭúlna ka hre lo a, i pum chhungah ka fa a awm em tih ka hriat phawt loh chuan inṭhenna a awm lovang, a lo awm ta lo a niha kal i duh ṭâlh a nih leh chumi hunah chuan i kal dawn nia," a ti nghet churh. 

Rammuana thusawi ka hrechhuak zawk mai. "Sangtein fa a nei thei lo a, nang hi hmanruaah an hmang che," a tih kha.

Mahse, tunah sawi chhuah ka tum miah lo a, chuti maiin Ngaihzuala hian min kal tîr dawn lo tih pawh ka hre tawh, hmangaihna tel lova nupa nih âi chuan ka tlân khalh ve mai tur a ni dawn lawm ni!

A ṭhutna bulah ka va kal hnai a, "A nih leh tihian ti ang, nau ka pâi chuan palai i lo tîr ang a, ka lo pâi ta lo a nih chuan kan inkâr a tawp thung ang, atu ve ve mahin sawi chhuah loh tur ti ta ila i ngam em, i duh em?" Ka ti ve ta zâwk a.

Mak tih hmel tak hian min rawn en a, "I titla duh mai lo ang maw?" Zu han ti a!

"Tu emaw angin tualthah duhna rilru ka pu ve lo, a tîr phat aṭanga ka tum ber leh ka duh chu fa neih a ni a, tunah pawh chu rilru chu ka la pu reng, a lo awm a nih ngat chuan ka titla hauh lovang," ka ti hniam raih a, "umn...ni rawh se, i thutiamah ding la, kei pawh ka ding ang, i tan a hmasaber ka ni a, tu mipa mah hnaih suh ang che, a bik takin kha pa Rammuanawma kha ka hmu mawh riau a nia," a ti hmiah.

"Nang pawhin Sangtei hnaih suh ang che, tisa thilin inzawmna nei nawn dawn tawh lo mahila, hmeichhe dang kan mamawh belh lo, kan awm dan tur a chian hma chuan pahnih chiah kan ni tur a ni," ka ti a, a nui suk ringawt. 

Ka thil sawiah khan eng mah nuihzat tur a awm pawh ka hriat siloh.

"Khua a var hmain reilote mu hahdam ang hmiang, Bawihi, a hmaa ka rilru puthmang kha ka la thlak chhin eih lo a nia, miin eng thil pawh sawiin hrilh che mah se, thudik zîktluak i hriat hma chuan ngaihdan siam mai mai suh ang che, Sangtei pawh hmanzanah ka inah a lokal tiin i sawi a, amah ka la zawt fiah ang, kei hian ka ko dêr si lo," inringtawk takin a ti a, ka awih ru deuh titih nia. Hahthlak thei siah...

A khumah kan mu phei ta a, kan taksa erawh a inhlat hle. Amah rinhlelhna ka la neih nasat êm avangin hnaih tumna rilru ka pu tawh lo a, Rammuana khan hma a la ve zel bawk anga thudik kan la hre thuaiin ka ring bawk.

"I u Ngaihzuala leh Sangtei chungchâng kha engtikah nge i hriatchhuah?" Tiin min zâwt thut a.

"A rei tawh mai..." tiin dâwt ka hrilh a, ka thil hriat zawng zawng hrilh kher ka tum lem lo.

"Sangtei pawh hian min hrilh ṭha duh lo a, mahse, ka hriat duh chu engkim ka hre vek, an inṭhen chhan nen lam.." a la ti zel a.

"Eng vanga inṭhen nge an nih a?" Tia ka zawh chuan, a nui huk a, "An induh tawh lo tihna a ni mai alawm, induha inhmangaih nise an inṭhen lovang," a'n tiah. A va han ngeiawm thiam tak. 

"U Ngaihzuala kha i thîk ṭhin em?" Tiin ka zâwt thut a.

"Thîk ṭhin e, mipa ka ni a, thîkthu ka nei ve alawm, nupui a neih dawn hnaih thlenga a lo la biak reng avangin ka ngaihdan a ni lo hle, mahse, amah Sangtei berin engtin mah a chhâng lêt ngai loa chuvangin ka inrawlh lo mai chauh a ni," a ti a, a ṭawng dan aṭangin u Ngaihzuala a ngaina lo tih a hriat hliah hliah.

"Thudik zawng chhuaka finfiah turin amah a thi tawh si a, ka awih lo nimai teh se.." ka lo tih chuan a nui hawk a, "I Hero a nih ber hi...a dik lohna pawh i hmu thei ngai lo a, i ring em em a, â...a ṭha vek e..." ti leh lawi siin a saisir zui daih a, ka chhâng tawh bik lo.

Zinglam dâr sarih pelh hretah Siami a rawn thleng a, nui kar kar chung hian, "In lo inhmangaih hle mai," a'n ti ngial a, ka nui liam ringawt. Sawi thui chi pawh ninghal lo chuan...

Ngaihzuala zawkin, "Siami, midang hriat kan duh lo a, kan thawhpuite beng a thleng tur a ni lo aw..." tiin a hrilh a, ṭhiani pawhin a hriatthiam hmel viau.

Kan in panin kan tlan chhuak ta a, kawngtluanin Siamin min chhaih ngar ngar a, ka nuih liampui vel ta mai mai.

Mahse, in kan thleng a, ka mi hmuhte avang chuan ka rilru a nuam lo lehzual. 

Sangtei leh a nu kan sitting room-ah an lo ṭhu a, ka nu hmel dur khap avang chuan an boruak a ṭha tehchiam lo tih ka rin hriat ve mai.

"Hei, amah a lo haw tawh alawm..." tia ka nuin min rawn en chuan rilru natna hmel ka hmu. 

"Bawihi, Sangtei te nufa hian an be duh che a, Azuala chungchângah a ni awm e.." a ti dam thlap naa a lung a awi miah lo tih ka hria.

He mite nufa hian kan inah eng thil ropui mah tih tur an nei lo. Lalngaihzuala chungchâng min sawipui an tum vaih chuan an duh aia tam a nia ka sawi dawn ni...

Mai mai a...Rinduhawmi hi a ngawi reng bik dawn lo a nia...

B+>[BeckirafARenthleI]<+®