14.DROGMA SEOL [A Becky Rafa Story]

14.DROGMA SEOL

Ziaktu: Becky Rafa Renthlei

[Recap]

Sangtei leh a nu kan sitting room-ah an lo ṭhu a, ka nu hmel dur khap avang chuan an boruak a ṭha tehchiam lo tih ka rin hriat ve mai.

"Hei, amah a lo haw tawh alawm..." tia ka nuin min rawn en chuan rilru natna hmel ka hmu. 

"Bawihi, Sangtei te nufa hian an be duh che a, Azuala chungchângah a ni awm e.." a ti dam thlap naa a lung a awi miah lo tih ka hria.

He mite nufa hian kan inah eng thil ropui mah tih tur an nei lo. Lalngaihzuala chungchâng min sawipui an tum vaih chuan an duh aia tam a nia ka sawi dawn ni...

Mai mai a...Rinduhawmi hi a ngawi reng bik dawn lo a nia...

-B®® Stories

Sangtei nu hi Biaklawmi a ni a, an fanu neihchhun a ni tih kan sawi tawh kha aw.

Khaw khata awm kan ni nain kan inhmu zing tehchiam lo a; u Ngaihzuala te veng lama awm an ni nghe nghe.

"Eng thil nge ni a, zing zingah a va pawimawh awm ve?" Tihpahin anmahni ep zawng hian ṭhut hmun ka rem ve a, nizana ka zu in vang khan ka lu a na ru viau mai, Siami khan kan in kawt thleng min thlah ta kha a ni a, anni nufa a hmu lo hlauh chu a tihzia phian. Chuti ni lo sela chuan zawhna chhân sen loh min zawt ngeiin ka ring.

Sangteiin chîk zetin min en a, engmah phei chu a sawi lo. 

Nu Biaklawmi zawkin, "Rini, a nihna takah chuan lokal hi kan tan a nuam lo a, a inthlahrunawmin a zahthlak bawk a, chuti a nih rual chuan Azuala leh ka fanu chungchang i hriat vek avanga lokal ngam kan ni a, anni pahnih hi innei mai tawh tur an ni tih i hriat ka duh, mi pangngai tak i ni a, sawisep in kâi zui loh nan leh nangmah i inven thiam theih nana hrilh hrim hrim che hi kan tih turah kan ngai ve a ni," zaidam zet hian a ti ta a, ka nu ka va melh a, a biang a sen awp awpin ka hria.

"Chuan..." ka lo ti sap a. An thil sawi hi eng teh ualah ka ngaihsak lo. A chhan chu Ngaihzuala khan an pahnih chungchâng min hrilh chiang êm a, anni thusawi âi hi chuan Ngaihzuala ka ring daih zawk. 

"Office khata awm dun, kal dun in ni a, hna chungchânga zin leh neuh neuh thil a awm fo a, vantlâng hmuhah pawh nula leh tlangval in ni a, ka fanu thlenga an hmer tel hi ka duh lo a, keini lam tan tak hian mi sawi hriat fo hi thil nuam a nih loh avangin kan lo kal tawp mai a ni, in inkawpa in inngaizawng tih vanga lo lêng kan ni hran lo a nia, an pahnih inkâr chiang tak hian hre ve la kan duh vang a ni pakhat," tiin nichin aia dam zawk khan a la ṭawng a, a âw a nêm si, keia tan pawh han huat viaua thinrim hluai theih ninghal lo chuan.

"Amah Azuala hnenah sawi ula, kei chu a hnuaia thawk ve mai ka ni a, kan pu a nih angin 'kal rawh, ti rawh' tia hna chungchânga min tîr a nih chuan ka tân hnial a rem lo a, amah hrilh mai teh u, keia lo sawi ve chi pawh a ni lo," tiin dam thlap hian ka chhâng a.

Nu Biaklawmi bawkin, "Ka hrethiam alawm, mahse, hmanzanah pawh a in luahah i va kal a ni awm a, hna thila kal chu i nih loh hmel, khatiang tê tê te kha mi sawi leh khel a ni a, amah Sangtei awm lai a ni hlauh zâwka an sawi tui tam lo mai chauh a ni," a la ti hrâm.

Chutia min tih deuh kher avang chuan, fiah fel fak hian, "An pahnih inkâr chu anmahni chin fel tur a ni, an inṭhen daih tawh a, Azuala pawhin min hrilh chiang bawk, kan pahnih inkârah hna thil emaw mimal thil pawh nise thurûk kan nei vak lo a nia, u Ngaihzuala nen kan chanchin ka hrilh vek a, chutiang chiahin Sangtei chungchâng pawh a sawi ve nual asin," ka lo ti hmiah.

U Ngaihzuala hming ka sawi laia Sangtei hmel danglam zar chu ka hmuh hmaih lo a, eng emaw ti taka danglamna a neih ka ring rêng a ni. 

"Eng pawh nise an inṭhen lo, an inṭhen dawn lo a, amah Azuala hi han dam chiang deuh se palâi hmel hmuh thuai kan inbeisei," tiin a ding hluai a. 

"Mami, hawh le, i kal teh ang," tihpahin a fanu a melh a, "Rini, kan inkarah inrawlh lo hrâm la ka duh, chuti lo chu i inchhír palh zawk ang e," tia Sangtei a ṭawng chuan, "In inṭhen tawh si a, nizanah pawh amah ngeiin min hrilh, i sawi aiin ka boss thusawi ka awihin ka pawm zâwk," ka ti sak a, a ner nasa mai, min chhâng zui lovin an chhuak ve mai bawk a... ka zahpah duh bik tawh lem lo atin ni.

Nu Biaklawmi te nufa chhuah hnuah pawh ka ṭhutna ngaiah ka la ṭhu ngar a, ka bulah ka nu a rawn kal hnai a, "Eng nge thil awmzia, Sangtei leh Azuala an inngaizawng em ni?" A ti hehaw a, "A hma chuan an inzui ve ṭhin, mahse, an inṭhenna a rei ve leh deuh tawh," tiin Ngaihzuala leh Sangtei chungchâng ka hriat ang ang ka hrilh a.

"Azuala hi chuan a duh che alawm, a melh danah che a hai theih loh a, i hna bansan a phal miah loh danah leh a ngheta thawk pawh ni lo lehnghal heti em ema a ngaihsaka a ngaihven che hi amaha eng emaw a awm a ni mai, ka hai bik lo a nia," a ti ve ta a.

Ka tan sawi chhuah hun remchâng tak a ni.

"Nia, a hma aṭang daih tawhin min duh a, kei pawhin ka duh bawk, mahse, u Ngaihzuala thihna avang leh ka tawrhna zawng zawng avang khan ngaihzawng nghet neih ka ngam tawh lo a, ani a beidawng duh bawk si lo, nu, ka tan hian a harsa asin, u Ngaihzuala nen an hming a in ang a..." tia ka sawi chuan...

"Eng maw i sawi...?" Tiin ka ṭawng lai min pawt chat a.

"U Ngaihzuala hming leh Azuala hmingpum a inang a, an pianni leh thla pawh a inang chiah," tia ka sawi tâkah chuan a chal a chuar nâng a, meng buai nak chung hian, "A va han mak lehzel ve, Bawihi, i u Ngaihzuala vanga i tawrhna te kha Pathianin a hriatpui che a, han tâl ho hman viau mah la, ka ṭawngṭaisakna che hi a rah chhuah i hmuh ngei ka ring ṭhin. Azuala hi i natnate hliahkhuhtu atana Pathianin a pek che pawh a ni thei," a ti ta duah a, ava buaithlâk ṭhin e. Ka nu tak hi chu aw...

"Â, nu..chutiang zawngin ka ngaihtuah ngai lo, mipa hrim hrim hi ka thinlung taka hnaih ka ngam lo a, Azuala phei hi chu Sangtei nen an hmehbel zel si a, ka tan a nuam lo alawm.." tiin dik takin ka hrilh ve mai.

"An inṭhen tawh ber a hnu, anni nufa pawh khan Azuala an duh lutukna lamah leh chân an hlauhna lamah kan in thleng thleng an rawn rap a ni a, Bawihi, ngaihtuah chiang ve ta che, Sangtei aia nangmah a ngaihsak zawk che avangin helaiah an rawn kal a, Azuala'.n a hriat ka ring miah lo," a ti ve zêl a, a dik pawh ka ring.

"An inṭhenna a rei deuh tawh.." ka lo ti a.

"I u Ngaihzuala kha engtikah mah i nei lêt leh tawh dawn lova nangma hmakhua tur i ngaihtuah ve a ngai a nia, ka dampui reng dawn lo che a, i u lah heti hi a ni a, ngun takin thil ngaihtuah ang che," a ti dam thlap a, Ngaihzuala min duhpui tih a langin sawi ri lo mah se ngaihdan ka nei thiam ve lutuk tlat.

Tûkṭhuan kan kîl lai pawhin a la sawi zawm a, "Biaklawmi tezawng zaidam angin a lang a, a nasa a nia, Sangtei pawh chuti tho, an ân a chhe si, tukina an hmel ka hmuh tirh khan ka bangbo viau a, Azuala hming an sawi lan tâkah kha chuan ngaihdan chin ka nei thiam mai, i nu hi mi â ka ni lo a nia," nui chungin a ti a, ka thâw a veng deuh huai.

"Sangtei hian a duh ve êm a, inṭhen hlen tak tak a ngam loh avangin keimahah an rawn ṭuan a nih kha," ka ti a, a lo bu nghat nghat.

"I u Ngaihzuala theihnghilh a harsa dawn tih ka hria a, mahse, tuna i awm ang mai maia i awm chuan rilru hrehawmna leh natna dangin a delh rit zel ang che, a êng zâwnga thlir thiam te hi a pawimawh a nia," tia a sawi leh hnuah a thleng sengin a tho chhuak ta a, Sangtei te nufa lokal zârah ka nu nen kan titi dun thei a, nuam pawh ka ti viau.

Ka nu vawk chaw chhumin a buai a, keiin inchhung ka thian a, Rammuana'n vawikhat min lo call a, "Bawihi, Ngaihzuala nen in inkâr chu i ching fel tawh em?" Tia min lo zawh chuan, "Tun atan chuan a harsa rih a, rei lote ka nghâk ang," tiin ka chhâng a, "Aw le, ka kutah engkim dah la, min ring rawh aw.." a ti a, ka "Aw..e.." liam ve tawp.

A dik chiah rêng bawk a, ngun taka thil ka ngaihtuahin Ngaihzuala sawi kha zawm mai ka duh, ka râi a nih chuan ani khan min thlahthlam a tum dawn lo a, ka rai lo a nih tâk leh awlsam tein min kal tîr theih ka beisei ve thung.

Mak min lo tiviau ang e, ka thlîrna zâwn aṭang hian han thlír ve chhin ula, ka dinhmun inhrethiam ang.

A tîr phata ka rilruah khan u Ngaihzuala ka ngaih luat avang leh beidawn lutuk vangin pasal neih tumna rilru ka pu tawh lo a, zu hmunah ka tlan a nih kha, ka nun a buaichuar bawk a, ka hriatchian miah loh mipa ka hnaih phah bawk a.

Lalngaihzuala ka hnaih dan leh a laka ka inpêk tâk dan te, fa neih tumin ka bei a, vanduaithlak taka ka chhiat hlauh avangin a aia thûk zâwkah ka inbarh lût zel a, khatih hun lai khan atan ka thinlung ka hawng ngai lo. Mahse, amah zawkin kan inremsiamna kalpelin inngaihzawnna khurah min hruai lût a, ka invenna leh ka rilru puthmang min thlâksak dawrh a, ka tâng ta a nih ber hi. A taka tawngtu leh dâitu i nih loh chuan hriatthiam a harsa lutuk dawn tih ka hria.

Tisa thila Ngaihzuala nen kan inzawm lai khan ruihtheih thil leh Sex chauh a ni kan nunah awm. Mipa leh hmeichhia awm duna kan dâi thûk tâk viau chinah  chuan kan thinlung a inhnaih ṭan a, inhmangaihna êm la thleng lo mah se kan induh tawnna phat rual a ni lo. 

U Ngaihzuala hlimthlâ kha ka Lalngaihzuala hian a hliah mêk laiin Rammuana a lo lang a, a thil sawi tam tak avangin ka rilru a pelhê mai chauh a ni. Ngaihzuala ka duhna a la pangngai reng bawk.

Chuti a nih rualin Rammuana duhna chhetê mah ka nei lo a, zu in in han rui ve bawk ṭhin mahila, mipa kawp lawr duat chi ka ni lo. Ka ni ngai hek lo ang; tin, zu hi ka in chatuan dawn lova; keimah Rinduhawmi dik tak kha tunah ka ûm ṭan mêk bawk. Ka ûm phâk hunah keimah tak tak ka ni leh ngei dawn a ni. 

Chawhnu dar hnih velah ka phone a rawn ri a, Ngaihzuala a lo ni.

"Bawihi, Sangtei te nufa in inah an lokal elaw?" Tiin pehhel kual pawh awm lo hian min lo zawt nghal a.

Kei lah chuan, "Engtin nge i hriat?" Ka lo ti hmanhmawh pek a. Nui huk chung hian, "I awmna hmun apiangah ka thinlung a awm ṭhin, ka ngaihven reng che a, tukina i haw pawh kha i nuin a hau che nge hau lo che tih hriat ka tum vek alawm, mahse, in in aṭanga an lo chhuak lai hmutu an awm a, in boruak tur ka rin hriat mai," a ti zung zung a, kan Lalngaihzuala ṭhin hi a...

"I bialnu hlui hian min thîk lutuka a buaithlâk," tiin ka nui hak hak a, "Thík tham i nia lawm le, nang ang êma ngaihven leh umzui ka nei ngai lo. Dam ṭha lo chung leh ka hna pawh zawm lovin nang ka rawn umzui chea chhuanlam fahrah tê tê ka la nei zui, Bawihi, ka sawi hi awih mai rawh, i kianga hun reilote awm pawh ka thlahlel a, nang lahin ka rilru i hrethiam chai si lo," uar takin a rawn ti bawrh bawrh a, ka tan a dawnsawn a nuam hle.

"Tukinah kan sawi vek tawh kha, u Ngaihzuala thihnaah thuchiang ka hriat a ngai a, ka tan hriat ngei ngei a ṭûl bawk, inrawlhna i nei emaw i hming a lang ve a nih ngat chuan ka ngaidam ngai dawn si lo che a, chuvangin tun dinhmun atan chuan ka thinlung tak taka hnaih tumna che ka nei lo, mahse, ka duh ta lo che a ni bik lo a nia, i hriatthiam a ngai," ka ti  a, "Ka inhnamhnawih lo..." tih chiah a sawi.

"Finfiahna ka neih a ngai alawm, Sangtei pawh hrilh rawh, kei min bei zawnga a chê a nih chuan ka ngawi hlen dawn lo a nia, i kalsana in inṭhen tak tak a nih chuan a hnaiha i awm ka duh lo," ka ti leh a.

A nui hawk a, "Thîkthu kan nei ṭan ta em ni, nasa deuhin han thîk ve teh.." a ti duh lek.

"I chhia a nih chu a..." ka ti hlak a.

"Rinduhawm, ka chhe lo aw.. vawikhat min hmuh rualin i rawn tlan awt awt alawm le," a'n tiah.

"Min ît a nih mai chu..." nui chungin ka lo ti a, kan inbiak dan a pangngai leh ṭan ta.

Kan hna zawm hun turte kan sawi dun leh a, "Rai la ka ti..i rai loh chuan ka chan a chau tlat.." tiin a nui kur kur a, ka lo nui ve hak hak a, nizana kan boruak ngaihtuah chuan hmâ kan sâwn leh det.

Zan lamah lokal a tum thu a sawi a, "Ka nu awm laiin nu Biakliani te kha an lokal si a, zawhna a zawt nasa ngawt ang che," ka tih chuan, "A duh duh min zâwt ang hmiang, a fanu ka duh tih hi hre mah se pawi tihna ka nei lo, Rinduhawm, râwlthar ka ni tawh lo a, nupui nei rual ka ni ve tawh, a fanu neih ka tum tih hria se a ṭha daih zawk," inring tawk lutukin a ti a, hei hi Lalngaihzuala miziaa ka duh pakhat a ni. A duh lamah a kal na hle tih hi...

"A nih te chuan lokal la, ka nu nen in inkawm dawn nia," ka tih chuan, "I hmel ka hmuh phawt chuan pawi ka ti chuang lo," a la ti hrâm.

Ngaihzuala nen kan inbiak zawh hnu daihah ka inbual a, ka pum thêp zaih mai chu ka chûl kual a, "Ka tuh rah seng ngam tura huaisen ka mamawh a, Ngaihzuala nen kan awm zel dan tur chu he ka pum aṭang hian a hriat dawn chauh a ni," tih ka ngaihtuah a, râi ka châkna leh ka peih lohna a inchen deuh reng. A hma ang khan fa neih châkna pawh ka nei lutuk tawh lo a ni ber e.

Ka u Hmingmuana a rawn haw a, a hmel lan dan a dang lutuka ka ngaih a ti ṭha lo hial.

"Bawihi, ka room-ah min lo zûi lawk teh.." zawitein a ti a, zanriah ei nan a la hma deuh a, ka u nen a room panin kan phei ta a.

Khumah a ṭhu a, kei dawhkan bulah ka ding thung a, "Bawihi, i u Ngaihzuala kha thah a ni," tih pahin a mit a nuai a. A sawi dan teh tawp avang chuan ka lo hawi â hû mai.

"Mam, eng nge i sawi a?" ka ti a, a thu sawi ka hriat chian loh vang ni lovin ani ber kherin hetia a rawn sawi lan avang hian mak ka ti êm a ni.

"Amah sutu truck driver kha police lamin hun eng emaw ti chen an chhuiin an dâwp a, mahse, tihpalh anga a lan tlat avangin nu Rami te khan an ngaidam ta kha a nia, mahse, tunah Ngaihzuala ṭhianpa hian a thar thawh leh a, hmâ an la mêk..." tiin a sawi ta a.

Rammuana'n a hna a ṭan tawh tih ka hrethiam mai.

"Driver chu tunah khawiah nge a awm?" Tiin ka zawt a, "Thu zawh fiah turin Police lamin an kawl mêk, he thihnaah hian tu emaw a inrawlh a ni, a tîr aṭang tawh khan min mawlhtu a awm a, ka farnu neihchhun na lutuka a awm lai ka hmuh khan u Ngaihzuala thihna hi ka phâk tawkin ka chhui ve zel, i ṭap ri ka hriat apiangin ka lo na a, ka lo hrehawm ṭhin, ka nu hriatah eng mah sawi rih lo la, a hmâwr kan bâwk ṭep tawh.." a ti leh a. 

"Nangmahin i lo chhui ve amaw?" Ka tih chuan, "Rammuana nen hian kan inkawp alawm, Ngaihzuala nen an Lodge-a inkhawsak lai khan keimah min rawn be pawp daih tawh, i nau chhiat thu leh i chanchin kimchang pawh ka hrilh vek a, a chhan chu thudik zawn chhuah ka tum vang a ni," a'n ti chiah chu ka sa zak a, ka u melh rum âl chung hian, "Hetiang thil i tih hma hian min hrilh thei lo em ni? ka mimal thuruk midang hnena sawi turin dikna i nei lo," ka ti ṭhat a.

"Ka hria alawm, mahse, min mawlhtu a na êm a, ka ti lo thei lo," a ti ve tlat si. Hetiang a lo nih vang a nih chiah hi ka u hlim hmel ka hmuh ngai loh nachhan leh a chhuah tam tâk viau. Ngaihzawng a neih vangah ka lo puh hman deuh a nia, a va hriat loh theih ve le.

"Rammuana hi i ring tawk viau em ni, nau ka chhiat tih a hria a, min vau nan a hmang a, ka lawm lo, Mama, ka lawm lo takzet..." thinrim takin ka ti a, "Khatiang khawp khan u Ngaihzuala i hmangaih a, kei pawhin ka ngaina bawk,"  a ti dam thlup ringawt.

"Thil dang eng pawh sawi la ka hrethiam ang, khatiang leh em em mihrang bula sawi te chu a chi loh lutuk em mai," ka ti a.

"Rammuana hi misual a ni lo, i tana ṭha lo pawh a ni lo a, in pu Ngaihzuala ai kha chuan a lâktlâk daih zawk, ani saw hnaih tam suh, he thihnaah pawh hian a inrawlh ve lovang tih hriat a ni lo a nia, Rammuana leh kei tih loh mipa dangah rinna nghat lo la ka duh a ni," tia a sawi laiin ka nuin chaw ei turin min rawn ko ta a, eng mah kan sawi zawm ta rih lo.

Ka thil hriat duh pakhat ka hrechhuak ta tho a, ka u leh Rammuana an lo inbe daih daih hi a mak ve ngawt mai. Ngaihzuala an ringhlel ve ve bawk si a, ka ṭan vang pawh ni lovin ka Lalngaihzuala hi hetiang ti duh tur khawpa sual leh rilru chhia niin ka hre thei tlat lo.

Bâkah, ka u hian eng atan nge u Ngaihzuala thihna hi a lo chhui ve chiam chiam tih hi ka zawhna neih tel a ni bawk.

Zanriah kan kîl laiin ka nuin ka u a zilh leh a, kei erawh ka ngawi reng a, "Fa pahnih chiah ka nei che u a, rilru tihah zawng hlira khawsak hi bansan tawh rawh u," a ti a, ka khawngaih ang reng.

Zan dar sarih velah Ngaihzuala leh Valtea an lo lut a, thingpui hâng kan in lai a nih vangin ka siam kêp ve nghal a, "Bawihi, Aizawl kal ka ngai a, ka lêng rei ve lo mai teh ang, insiam a ngai bawk nen ṭhiana hi an in thleng i lo thlah mai dawn em ni?" Tiin Valtea'n min zawt a, ka nu zawkin, "Lo ngaihtuah duh suh, a va thlah thei reng alawm, a u pawh a awm alawm," a lo ti awlsam êt.

Sawi tawh ang khan Ngaihzuala hian a bân nat vangin lirthei a la khalh ngam lo a, ama inah a riak dawn a nih chuan kan thlah haw ngei a ngai ang, kan awmna a inhlat ve deuh si a.

Veranda thleng Valtea ka thlah a, "Bawihi, a rilru natna tur thlensak lo hram rawh aw, ka ṭhianpa hian a zawng zawngin a duhin a ngaihsak che tih ka hria a nia," a ti a, ka lo bu nghat ringawt.

In chhunga ka luh leh laiin ka nu leh Ngaihzuala an lo ti ti a, "Nangmahni in inhmangaiha in induh tawn phawt chuan midang sawiah ka buai lo, ka fanu awm dan leh nih dan i hre tawh a, tih kual mai mai a rem dawn lo a nia," tia ka nu a ṭawng chuan nuam lo ka lo ti ve ringawt.

"Nia, Sangtei nen kan inṭhenna pawh a rei leh deuh tawh a, Bawihi laka rilru ka pêk tawh avangin ngaihdam min rawn dil khan ka kir tawh lo, i fanu hian min duh anih phawt chuan nupuia neih ka duh," nghet charhin Ngaihzuala'n a ti a, sawi ve tur ka hre lo reng reng, an pahnihin ka melh tawn sek ringawt.

"Tikhan lo inkawm ula, ka mutsan ang che u, i haw dawnah a va thlah dawn che nia," a ṭhutna aṭanga tho chhuak pahin ka nuin a ti a, Ngaihzuala a ring tawk hle tih ka hria, ka nu hi ama tawkah a fing fel a, ka ngaisang ka tih tawh kha.

Kan pahnih chiaha kan awm dun tawh hnuin ka bulah Ngaihzuala a rawn insawn phei a, "Sangtei te nufa an lokal tih ka hriat khan ka thin a sa phat hman a nia, mahse, an lokal lovang tih a hlauhawm, a chhan chu ka sawi chhuah kher ngai lovin i nuin ka rilru puthmang a hriat phah a, thawven khat chuan ka thawveng ta," tia nui suk chungin ka hmai a tawk zauh a.

"Nizan i rui hmelhmang han chhiat zia kha, kan inkawp chhung hi chuan zû in tawh loh tur, kei pawhin ka in lovang," a ti ta a.

"Tihian kan la inngaizawng reng tihna em ni?" Tia ka zawh chuan ka chalah na lo tê hian a rawn pen a, "Kan la inṭhen chhin lo hrim hrim, nangmahin thutawp i siam zung zung a, ka la pawmpui reng reng lo che, inngaihzawnnaah mipahnih an pawimawh ang chiahin inṭhen dawnah pawh kan inpawmpui tawn a ngai, kan la inngaizawng reng aw Rinduhawm," tiin a kiai suk a, dik tak chuan ka Lalngaihzuala kiangah hi chuan ka thlâ a muang a ni.

"Mahnia haw thei mang si lo hian i lêng daw daw a, i dam chian hma chuan rawn lang ve sek tawh suh ang che," fiamthu titak deuhin ka ti a, a nui ṭha duh mang dér lo nia.

Ka u thil min hrilh kha Ngaihzuala hnena sawi ka duh viau a, kan awm dun lai chuan ka ringhlel lo, a hranga kan awm chiah hian u Ngaihzuala thihnaah a inrawlh ka ring leh si, ka hahthlâk a nia kei pawh hi...

Thlah lêt a ngai bawk nen rei lutuk lêng lovin an in lam kan pan ta a, a vawikhat nan scooty-ah ka phur ve ta. Nghet zetin ka kâwngah min kuah a, "Rinduhawmi Scooty khalhah te ka chuang ve a nia.." tiin ka tukkhumah a rawn thaw lum ham ham a, ka lâi leh ringawt.

"Ngawi mai mai teh, mahni inngaihtuah thei mang silova nula rim tum tlat kha a ṭhing aw..." tiin ka nui hak hak a, "Nakinah chuan, nitin office kan kal dun ang a, kan haw rual leh ang a, inkhatah leh khum pakhat inṭâwmin kan awm thuai tawh ang," a ti ta a.

A sawi dan hmangah kei min neih hi a tum hle niin a lang.

A in luah kan thleng a, rei lote lût kâwi tura min sâwmna chu ka hnial na a, "A rei dawn lo ka ti tak tak, minute thum chiah a ni mai," a tih deuh tlat avangin kan inzui lut ta a.

Inchhung kan luh rual rualin amah si chêt hian min pawt hnai a, "Kan awm hranin ka ngai che a, kan awm dun pawhin ka ngai tho che, englai pawhin ka ngaihtuahna i luah reng tihna a nih chu," tiin ka khabeah a rawn dawm a, a mitmeng thim raih chuan ngun takin min en a, chutah dam leh dim fahran hian min fâwp ta a.

Hun rei tak inhmu tawh lo niawm tak hian a duhthawhin a uar a, a taksa thlâwp zaihin min kuah bawk a, ka Lalngaihzuala hi eng ang mi pawh nisela chuti maia hlatsan theih a ni dawn lo tih ka hriat chhuah phah.

Min fawhna a thlah hnuah a kut pahnihin ka biang a dawm a, "Bawihi, kan inkâra inhîp tawnna leh induh tawnna hi chuti maia dah bo chi a ni lo a nia, kan pahnih hian kan chhêm alh tawn thei reng aw," a ti sup a.

"Tihian a tlachawpin tâl nawk nawk rih ang, thil thui tak sawi ka duh lo a, hmabâk êng kan nei ve ngai a nih chuan hunin hril rawh se," tihpahin ka inlahrang a, min dan a tum lem lo.

"Sangtei leh a nu tih velah buai lo la, ka duh ber leh ka suangtuahnaa ka telh ve awm chhun chu ka Rinduhawmi chauh hi i ni.." nghet churha tiin Veranda lamah min nawr kal dat dat a, "Lêt tawh rawh le, i nuin a lo ngaihtuah ang che, thla thar aṭangin kan hna ve ve kan zawm ang a, tun aia inhmuh theihna hun ṭha kan nei turah ngai ang," tia a sawi zawh hnuah Scooty hûnna ka pan phei a, min kal tîr hreh ngar ngar hle.

Ka tlanliam hma loh min thlir zui reng tih side glass aṭangin ka hmu vek a, ngaihtuahna sêng duh îk ni ila chuan Ngaihzuala hian a tider mai mai lo tih ka hriatna hian amah min rintîr ngei ang. Mahse, hriat fiah tur tam tak ka la neih avangin ka thinlung ka thunun mai chauh a ni. Eng chen tak daih ang maw?

Nunphung pangngai kan zawh chho a, Rammuana hnen aṭangin thu thar danglam eng mah hriat belh ka nei lo a, ka u Hmingmuana pawhin min sawi nawn pui tawh hek lo. 

Sangtei te nufa ṭawngkam erawh ka hre leh zauh ṭhin a, u Ngaihzuala thlân pawh a hma ang khan ka tlawh tlut tlut ta lo deuh.

Ka nu nen inpawh takin thil kan sawi dun thei tawh a, ani hi chuan Ngaihzuala nen kan inngaizawngah a ngai nghet hmiah tawh a, "Fimkhur la, mipat hmeichhiatna lam rawngkâiah inhnamhnawih suh ang che, thianghlim taka inngaihzawnna hian rah ṭha a chhuah châwk a nia, Pathian malsawm tlâka in awma in inkawp chuan a malsawmna in dawng ngei ang," tiin min fuih sauh sauh a, Ngaihzuala a duh lohna a lan tîr lova nu Biaklawmi te lokalna khan amahah danglamna a siam teh ual lo tih a hriat reng. Ka nu hi chu a heti ve tlat.

Siami pawhin a khât tâwkin min rawn call fo a, a thupui ber chu Ngaihzuala tho a ni. "Tuma hnenah ka la sawi miah lo a nia, Bawihi, i vanneih zia hi inhria la chhuah hlek suh ang che," tih vel kha a ṭawng duhdan a nia, nuih a tiza ṭhin mang e.

Zan dar sarih a ri tawh a, Ngaihzuala'n a lo len theih dawn loh tur thu min hrilh zo chiah a, Khawhaiah Valtea nen vawiin khan an kal a, an haw tlai bawk nen a hma lamin min lo hrilh thlap a, "Tleirawl inngaizawng ang maia intext chhen hi ka nin ṭhin vei nen, i lakah hi chuan ka peih loh ngawih ngawih ṭhin pawh ka ti ve zel ta a nih hi.." a ti a, ka awih viau. 

A chhan chu kan inbiak tirh lai khan whatsapp vela intext kha a peih tehchiam ngai lova, sawi duh a neih pawhin min call mai zel a, tun hnai aṭang hian hetia daily routine inhrilh vel hi a ti ve ta zauh zauh a, amah nen a inhmeh viau lo. 

Rammuana hnen aṭangin message ka dawng a, "Bawihi, Ka ṭhianpa sutu Truck Driver kha naktukah biak ka tum a, eng emaw tal zawh chhuah theih ka inbeisei, i u Hmingmuana'n a hrilh thâwi tawh chein ka ring a, kan pahnihin hmâ kan la ang, tumah midang ka ring zo lo," tih a lo ni a.

"A ṭha alawm, kha lam kha chu in kutah awm rawh se," tiin ka chhâng a, inrawlh tum viau mahila ka hriat chin a tlêm ve si a, Rammuana leh ka û kuta dah hi a him ber mai. U Ngaihzuala chanchin erawh ka hriat theih ang ang chhui zui ve erawh ka tum thung.

Thla thar kan chuang kâi a, kei leh Ngaihzuala pawh a hma ang khan kan inpawh leh viau tawh a, vantlâng hmuha inzui erawh atu ve ve mahin kan duh lo a, kan inah a lo lêng tawp a, ka nu hriatpuina thlap a nih tâk avangin kan boruak a nuam vei phian.

"Bawihi, i rai ang em le?" tiin vawithum ngawt Ngaihzuala'n min zâwt a, "I hmanhmawh fâl lutuk em mai," tiin fiamthuah ka lâk sak a, a ngawi ve mai bawk a.

Ka râi loh a hlau tih ka hre ve kar, kan thutiam kha kan pahnihin kan hre kar a, a hlauthawng a ang zâwk mahin ka hria.

Office kan kal ni hmasaberah kan thawhpui ṭhenkhat ten kan accident chungchâng vel min zâwt liam liam a, Ngaihzuala zawkin chhânna a pe a, mi hmuh lai hi chuan a hnuaia thawk pangngai ang chiahin min en a, min ngaihsakna a lan tír viau lo, Siami bâk hretu kan nei chuang lo a, a hahdam thlâk a nia.

"Ka room-ah min lo zui lawk hman em?" Tiin Ngaihzuala'n min rawn bia a, "A hmanhmawhthlâk viau loh chuan ka thil tih lai hi ka zo lawk ang aw," tiin ka hmaa paper inchap darh nuai chu ka kâwk zauh a, a lo bu nghut ringawt.

Minute sawm hnu velah a room-ah ka lût ta chauh a, a bân pawh a zia ta a ni ang a chêtpui thei viau tawh. 

"Eng nge ni ta?" Tiin a dawhkan bulah ka ding hnai a, "Rammuana leh i u Hmingmuana'n i hnenah eng nge an sawi?" Tia min zawh thut chuan ka bangbo ru viau, tun hnaiah eng mah anni nen sawi dun kan nei si lo a.

"Eng ati nge?" Tia ka zawh let chuan nelawmna tel miah lo hian, "I u Ngaihzuala chungchângah tho a nih ka ring, zanin tlai hian Police station-ah kal a ngai dawn a, ka ngaihdan a ni lo viau mai, hetianga an ti dawn a nih chuan keipawhin hma ka la ve ang," a ti chang fuk a.

"Aw...thu an zawt fiah duh che a ni ang chu, i inrawlh tlat loh te chuan engmah hlauhthawnna tur a awm lo.." ka lo ti dam thlap a.

"Ka hming a lang tel ve emaw min kan kai tîr an tum ṭâlh a nih chuan Lalngaihzuala hi an chân loh khânah ka chhuak ang, i u lo hrilh ang che, anni chauh hi i u Ngaihzuala thihna chhuia ngaihven thei an ni lo," a ti leh hmuk a, ka u a inrawlh nia a hriat vang emaw ni ka lakah thinrim a tum ringawt.

"Ngaihzual, nangmah an huat vang che a ni lo a nia, thudik hriat an tum mai chauh alawm, kei pawhin hriat ka duh a, kha driver kha ngaihdam ni vek tawh mah se tunhnai hian an tharthawh leh a, u Ngaihzuala kha thah a lo nih tak tak chuan a thattu hian hremna a bawhpelh tur a ni lo," ka lo ti a, a ner sawk mai.

"Nangte chuan a tîr aṭangin min ringhlel nghal a, thudik zawn chhuaha min zawh âi chuan kan inkâr ṭha sa tihchhiat i thlang zâwk alawm, Bawihi, min ring rawh tia insawi rinawm ka tum miah lo a nia, mahse, thu chiang i hriat hma loh chuan ka lakah thutlûkna siam suh ang che," a ti ta a.

Ka lo ngawi rauh rauh thung.

"Office chhung hi mimal nun sawina hmun tur a ni lo a, chuti a nih rualin tlailamah ka chin ka sawi hman loh tâkah ka ko ta ngawt che a ni e, kal tawh rawh..." a ti dam thlup a, nichina a thinrim sa phat hmel kha hmuh tur a awm tawh lo, a inbengdai rang khawp mai.

Rilru nuam fahran lovin ka awm nilêng ṭhak a, hna ka thawk sâwt meuh lo.

Tlailam dâr thum velah Ngaihzuala a chhuak vut a, ka ṭhutna aṭangin a tlanliam tur ka thlir reng a, lainatna chin ka nei ve tho. Sangtei nen an inkawp tawhna avanga hetiang thila buai hi a nihna chen a awm ve a, Rammuana lahin a ringhlel bur bawk si, â...ngaihtuah chhuah dan pawh ka thiam nek lo a ni ber mai.

Zan dâr 10 a rik pawhin Ngaihzuala hnen aṭangin emaw Rammuana pawh nise chanchin eng mah ka hre lo a, va phone hmasak kha thil tihchi-ah ka ngai si lo. Ka mut chhuak a reh vek a, ka u Hmingmuana nise zanriah eikham aṭangin a bibo hmak bawk a, tunlai kan boruak zet zawng a hneawm tak tak a ni.

Zinglam dâr thum bâwr velah niin ka hria ka u Hmingmuana'n min rawn kai tho a, "Bawihi, tho lawk mai teh..." tiin ka mutui lai chu min rawn sawi nawk nawk a, ka ṭhu chhuak hlawl a.

"Eng...eng nge a?" mit nuai nawk nawk chunga ka zawh chuan, "Rammuana an Lodge sakna hmunah nikhaw hre lova a awm lai an hmu a, tunah DM hospital panpui mêk a ni, insiam la, kal ve nghal ang..." a rawn ti bawrh bawrh a, a hlauhthawng hmel chu a khawngaihthlâk letling zawk.

"Maw...?" Tih hluai pahin ka tho chhuak a, ka phone leh bag ka ban hman hrâm, ka u in min kâi chhuak hlawk hlawk a, ka nu pawh hrilh tawh chuang lovin DM hospital kan pan ta a.

"Eng tin chiah nge Rammuana chu a awm?" Tiin ka zawt a, thuchiang eng mah a hriat bik loh thu leh nu Rami hnen aṭanga hria a nih thu a sawi a, "Bawihi, tlaiah khan Azuala leh Rammuana Police station-ah an inhnial deuh a..." tia a sawi laiin Hospital kan thleng ta si a, a sawi zawm ta rih lo.

Ngaihzuala message leh call pakhat mah a awm bawk si lova ngaihṭhat loh rûkna lian deuh ka nei a, ka lung a phu rang sauh.

Casualty-ah kan lut a, Rammuana chu khumah muin nikhaw hre lo tih hriat fahran hian a maimitchhing tlat a, a lu an tuam vâr lûk a, engtia hliam nge tih kan hriat miau loh avangin a bula ṭhu nu Rami chu ka kheuh zeuh a, rilru hah hmel tak hian a ṭhu kun lap a, ka hmel a hmuh veleh, "Bawihi, kan hun tawng hi a harsa ṭhin khawp mai, hmelma nei ang ziazânga hetia kan awm leh tâk ni, Ramtea hian mi kut a tuar a, a titu zawn mêk a ni," tiin min lo hrilh a.

"Rinhlelh deuh te in nei em?" Tia ka zawh chuan an neih loh thu a sawi bawk si.

Chutih lai tak chuan Lalngaihzuala pawr fap chung hian a rawn pên lût a, office-a a thawmhnaw inbel ngai reng kha a inbel bawk a, ka u Hmingmuana'n Ngaihzuala hmel a hmuh veleh, "Zâwnga, helaiah hian rawn inlan reng reng suh, eng mah tih tur i nei lo," tih pahin Ngaihzuala kawr âwmah a ṭhâm a. Ka thaw chhuak halh mai.

"Mama...' tih pahin an dinna bulah ka phei vat a, anni pahnih erawh rum lutukin an inmelh a, midang mitmei ven nachang hre lêk lova an awm hi ka huat tâwk a tling hle.

An inkârah ka va ding a, "Helai hmunah eng inhnialna mah tichhuak suh u aw, Ngaihzual, in lamah va haw rih mai rawh.." tia ka ṭawng chuan a thaw hawk a, "Hmingmuan, i kuang lo i nawr palh vaih chuan i inchhir dawn a nia," ti sup chung hian a inher nghut a, a chhuak zui nghal daih.

Ka u erawh inhûm ruh ṭeuhin a ding khawng at a, a thinrimna beng daih a tum hle tih ka hria.

"Ani hnaihah sawn i awm leh a nih chuan a pawi viau ang, hlatsan ang che.." tiin Rammuana mutna bulah a phei ta a.

Ka hah hluah hluah, ka thaw a ipik a, ka tâwt ru ṭûn mai.

Lalngaihzuala leh ka u hian eng buaina nge an neih ka hriatpui bawk si lo.

Â...nun hahdam hi ka nei ve ngai dawn lo a ni ang, harsatna pakhat a kianga a dangin min nangching leh si...

"Rinduhawm...i ngaihtuahna hmang rawh" tia infuih chungin nu Rami bulah ka phei ve ta rih a...

Hospital-ah ka taksa awm mahsela, ka thinlungin ka Lalngaihzuala a umzui zel si...

B+>[BeckirafARenthleI]<+®