15.DROGMA SEOL [A Becky Rafa Story]

15.DROGMA SEOL

Ziaktu: Becky Rafa Renthlei

[Recap]

"Ani hnaihah sawn i awm leh a nih chuan a pawi viau ang, hlatsan ang che.." tiin Rammuana mutna bulah a phei ta a.

Ka hah hluah hluah, ka thaw a ipik a, ka tâwt ru ṭûn mai.

Lalngaihzuala leh ka u hian eng buaina nge an neih ka hriatpui bawk si lo.

Â...nun hahdam hi ka nei ve ngai dawn lo a ni ang, harsatna pakhat a kianga a dangin min nangching leh si...

"Rinduhawm...i ngaihtuahna hmang rawh" tia infuih chungin nu Rami bulah ka phei ve ta rih a...

Hospital-ah ka taksa awm mahsela, ka thinlungin ka Lalngaihzuala a ûmzui zel si...

-B®® Stories

Rammuana harh hma loh zawng damdawi inah kan awm a, khawvar veleh ka nu ka call a, thil awmzia ka hrilh ve bawk a, "I hna kal hmanin lo haw i tum dawn nia, i u erawh chu a duh dan dan khan awm rih mai teh se," a rawn ti a.

Nu Rami bulah ṭhut hmun ka rem a, on call duty doctor a awm tho avangin a khât tawkin a rawn check reng a, tuna a harh chhuah lohna chhan hi chu muthilhna damdawi an pêk vang a ni awm e.

"Bawihi, Ramtea hian Matea thihna chungchângah hma a la tih i hriat ka ring a, tihian amahin a tuar leh daih si a, lo ngawih bopui mai mai ila ṭha mai tur, ka fapa kha a lo nung leh dawn pawh a ni si lo a, a ṭhianpa tana a inpekna hi a thûk êma ka inthiam lo ngawih ngawih," a ti sap sap a, ka u Hmingmuana a ṭhu ve renga ngun taka thil ngaihtuah hmel a pu.

"U Ngaihzuala kha thah a nih i ring tak tak em, engtin nge he ngaihdan hi inneih theih reng reng, a hlimchhawnah engmah in sawi si lo a, tunah thla a ral tam tawh a, ka hrethiam pha ve lo a ni e," ka ti thlâwt a. 

Rammuana kut chûl hauh hauh pah hian, "Matea phone-ah tu emaw nena an inbiakna a awm a, Rammuana hian message thawntu kha a ringhlel tlat a, a chhuizui ta a ni, number lâwng a ni a, bazara sim card lei chawp mai mai a ni a, pawi khawihtu hi an man har tawhin ka ring lo," tia a ṭawng lai chuan amah Rammuana a rawn che ṭalh ṭalh a, a sawi zawm ta rih lo.

A rawn meng diar diar a, a maimitchhing leh nghal daih tho a, doctor sawi dan chuan a hnunglam aṭangin a tukkhumah an vua a, a khêlah hliam a tuar bawk, CT Scan leh MRI an tih zawh hnuah result kimchang a hriat theih ang tiin a sawi a, a hriatna a hloh êm chu an ring lem lo tih a sawi tel bawk.

Khua a var fel tawh a, hna nei ka nih avangin haw zâi ka rêl ta rih a, "Nu Ram, a harh veleh min lo hrilh ve dawn nia, ka châwl rei tawh si a, han kal loh leh ngawt pawh ka inthlahrung zozai tawh, duh leh ka u hi lo awm rih mai rawh se," ka ti.

Ani pawhin min hriatthiam hmel takin, "Lo ngaihtuah lutuk mah ta che, Pathian zarah eng êm a ti lo ang," a ti dam thlap a, ani hi chu tunhma aṭang tawh khan ka ngaina riau a, u Ngaihzuala nu a nih vang pawh ni lovin amah hrim hrim hi a zaidama a ngainat awm bawk.

Ka u ṭhu kun lup chu ka ko a, "Ka haw a ngai dawn sia, nang tal i lo awm thei ang tiraw?" Ka tih chuan mit sen rûm chung hian min en a, "A harh chhuah hma ka awmpui ang, i hnaah bânna theh lut la ka duh a nia, ka nu pawh ka la sawipui ang," a ti ta a, ka lo ner nasa mai.

"Chuti maia bansan theih a ni hleinem, hna hmuh a harsat êm hi, i hlawhin min châwm thei dawn em ni?" Ka ti hlak hlak a, damdawi in kawtah kan awm a, "Azuala nen office pakhata thawhdun kha a ṭûl ber lo, i rilru siam la, ani saw hlatsan rawh," a ti nawn leh ngat.

"Eng nge maw ani pawh chu i hmuh mawh em em le, finfiahna in neih hun leh a inrawlh ve a nih phawt chuan ka hlatsan ang, mahse, tunah chuan eng thil mah tih ka tum lo," ti bawrh bawrh chung hian Scooty-ah ka lawn a, ka u lungawi lo hmel chu ka haider hmiah.

A dik a dik chuan Ngaihzuala an hmer tel ve fahran zel hi ka hua a, u Ngaihzuala kher kher pawh hi ka lakah zêp a ngah lutuka a nupui ni mai tawh tur lakah hian thurûk a lo nei ṭeuh tepawh a ni mahna.

Chak fein kan in lam panin ka tlan chhuak ta a, zing dâr riat a hnai kuar tawh alawm maw le.

Ka nuin chanchin min zâwt a, Rammuana kha chuti teh ualin a hrechiang lo bawk a, "Rami te tan tak pawh a nuam duh dawn lo mang e, an fapa ṭhianpa a nih si chuan an buaipui a ngai ngei dawn bawk a, i u lah hi chhuangkuaah eng mah sawi ṭha duh mang si lo hian thil hrang hrangah a inhawlh lawr a, a hahthlak ka ti tlat," a ti bawrh bawrh a, chaw ei kan siam zui nghal a, Ngaihzuala chungchâng eng mah ka sawi ri lo thung.

"Azuala lakah pawh fimkhur la, ka sawi tawh ang khan Sangtei te nufa an ṭawng chak si, pawnlamah midang hriatthiam theih tura inzui ang chi te pawh ti miah suh ang che u, office khata thawk dun in nih avangin mualpho a hnai bîk a nia," tiin min zilh leh a, ka pawmpui theih chi hlir a ni ve tlat.

Office ka thleng a, ka tlai lek lek, Project hmanhmawh thlak tak tak khawih tur kan neih avangin Rammuana leh Ngaihzuala ngaihtuahna hman ka nei îk lova, lunch break-ah Ngaihzuala'n office a kal lo tih ka hre ve chiah a, khatia thinrim taka hospital a chhuahsan hnu khan vawikhat mah min rawn be lo, a message pawh hmuh tur a awm lo a, kei lah ka lo buai ve bawk nen a kal leh kal loh ka ngaihven hman lo a ni ber mai.

Ka thawhpuite awm lohna hmunah ka inthiarfihlim thuai a, Ngaihzuala ka call ta a.

Vawi hnih a ring zawh dawnah min rawn chhâng ve hrâm. 

"Eng nge?" a rawn ti vin hlur a. Ka phu zawk thei alawm maw le.

"I rawn kal si lova eng ati nge?" dam thliam hian ka ti a.

"Ka kal leh kal loh tur te chu ka thu thu a ni mai alawm, min ngaihsak der vak a ngai lo," a ti leh hmuk.

"Ngaihzual, i rilru a hrehawm ang tih ka hria, chuvangin midang kuta innghat lo hian nangmah ngeiin thudik zawn chhuah tum la a ṭha lo maw?" Ka tih leh chuan a nui lui huk a, "Rinduhawm, kei te chuan a hmâwr ka bâwk ṭêp tawh zawk," a ti teh daih nia.

"Eng i sawi tumna nge?" Tia ka zawh chuan, "Rammuana kha harh chhuak sela thudik chu a hriat mai dawn alawm," a ti awlsam mai a, "Nangman kut i thlâk chu a ni êm lo maw?" Tia ka zawh veleh, "Rinduhawm, i tan kei min rin hi a harsa viau em ni? I mi rinna tel lo pawh hian ka kal thei e," vin lutukin a rawn ti nghek a, phone a off zui hmiah. 

Ngaihzuala ringhlel ang ziazânga ka ṭawng chhuah avangin ka inthiam lo ru lutuk a, Rammuana leh ka u in an rinhlelhna pawh engtia tih thu loh, kei talin ka rin a ngai a, ka rin anga a lo awm ta lo a nih chuan ama thiam loh liau liau a ni dawn a, tun dinhmunah chuan amah ka hnem a ngai tih ka hrechhuak chawpchilh.

Han haw ringawt dawn ila hna khawih laklawh kan la nei si a, call nawn tawh lovin rilru pangkhing zet hian ka hna ka chhunzawm a, Hospital lam aṭangin thu thar eng mah hriat ka la nei bik lo.

Ka thlatin hunbi pangngai ka zawh lo tih ka inhria a, ni hnih dang ka nghak leh ang a, chuta a la awm loh fo chuan ka intest tawh ang tiin rilru ka siam nghe nghe.

Tlailam dâr ngaah kan bâng ve ta ṭâwk a, ka nu hnenah hospital lama ka tlang tur thu ka hrilh a, "I u pawh a la rawn haw reng reng lo, inpahnihin lo haw rual rawh u aw, Rami te chhungkua an awm a, an buaipui ve mai dawn alawm," a ti a.

Damdawi in panin ka tlan chhuak ve ta a.

Casualty-ah awm tawh lovin Cabin lamah an lo sawn fel vek chu niin. Chulam pan chuan ka tlan chho leh ta a, nu Rami leh hmeichhe pakhat an lo ṭhu a, amah Rammuana tak chu a lo muhil a.

Min hmuh veleh, "Bawihi, i rawn kal leh thei elaw?" Tih pahin ṭhutna tur min kawhhmuh a, Khuma mu Rammuana hmêl thlêk vang vang chung hian, "Tihian a awm reng tihna em ni?" Tia ka zawh lêt chuan, "Vawi hnih a rawn harh a, a muhil leh nghal zel a, a result a chhuah kim hunah a chin a hriatin ka ring," tihpahin a bula ṭhu hmeichhia chu a melh zeuh a, "Ramtea nau Akimi a nih hi..." a ti ta a.

"Akim, ani hi kan nau a nia, Bawihi, Rinduhwmi a nia, i u nen pawh an inkawm ṭhin," a ti leh a, Akimi nen kan inchibai a, Rammuana nau tih a hai theih loh, an inang lutuk tlat.

"Ka u hi khawiah nge a awm a?" Tia nu Rami ka zawh chuan, "I haw hnu khan rei vak lo a awm a, a chhuak ve ta a nih kha, Hmingmuana hi chu a dan a dang ve a, tih theih eng mah a awm lo bawk nen in in lamah a haw taah ka ngai ringawt," a ti liam puat a, ka ngawi zui ve mai.

Inah a la haw lo tih ka hria a, a khawsak dan maksak zet hi ka hriatthiam phâk bâk a ni.

"Nu Ram, ka haw phawt ang a, inah haw hmasa lovin hetah ka rawn tlang a, a rawn harha a biak theih veleh min lo hrilh rawh aw," tiin ka ding chhuak a, "I buai ve si, rawn ngaihtuah lutuk duh suh, doctor pawhin ngaihṭhat lohna a neih hran loh kha, rilru nuam deuh khan pheisan rawh," a ti a, ani hi chu a felin midang hriatthiamna a ngah ṭhin reng a ni.

Damdawi in aṭanga ka chhuah hnuah Ngaihzuala in lam panin ka tlân leh ta a, ka rilru a nuam thei thlâwt lo a ni ber.

Kawngkhar pawh kik buai duh lo hian ka lut nghal a, dawhkanah Laptop inchhawpin a bulah file a awm ṭeuh bawk a, ka thawm a hriat veleh a rawn dâk chhuak a, a makti hmel haiderin, "I va buai awm ve?" Ka ti a, "Eng nge hetah i rawn tih dawn," a ti chang fuk mai.

"I damlo em ni?" tiin min zawhna pawh chhâng lo hian a bulah ka ṭhu a, "Ka dam tih i hmu reng alawm, tun ang hunah eng ti tura lokal nge i nih hre lo mah ila, i hmuh ang hian hnathawh tur ka ngah a nia," nelawmna tel miah lo hian a ti hmuk hmuk a, ka lakah a lawm lo tih hrilh hranpa ka ngai bîk lo.

"Ngaihzual, ka lakah thinrimna i nei em ni?" Tih pahin a malpuiah ka tawk zauh a, a ṭhut dan siamremin chiang zet hian min rawn en a, "Tuna kan buaina leh i u Ngaihzuala thih dan chungchângah nang ngei pawhin min ringhlel a, ka inrawlh lo tia ka sawi chung pawhin min rinna chhetê mah i nei lo, Rinduhawm, ka lakah hian eng chiah hi nge i duha i beisei?" A ti ta a.

"I hrethiam lo a nih kha, ka ring lo che tihna a ni lo, midang ringhlel tur pawhin ka hriat chin a tlêm em mai, i inrawlh lo a nih chuan a lawmawma a ṭha a nimai alawm, thinrim teh hluaina tur a awm lo a nia," zaidam taka ka tih chuan a hmel a rum zual sawt a.

"Tukina i u in min tihdan kha paidam mai mai ka tum lo a, a hman hmanin ka lakah ṭawngkam chhia inrawlh a, finfiahna pakhat mah awm si lovin min burbun a, nang pawh i bâng chuang lo, heti khawpa ka duh chea ka ngaihven chung che pawhin min rin i harsat em hi maw, i rin ngam loh mipa hi min ngaihven der a ngai tawh lo ang," a ti hmiah. Tun ṭum chu a thinrim tak tak tih ka hria a, tukina ka u in a ṭawngkhum dan ngaihtuah phei kha chuan lungawi a har ve viauin ka ring bawk.

"Khawngaihin hriatthiam tum rawh, ṭawngkain ka rin thu che sawi lo mahila, ka thinlung hian i tih a ni lo tih a ring asin," tiin a kutah ka vawnsak a.

Che lo leh min chhâng lovin a ṭhu ngawi tlat a.

A hnu feah, "Na ve thei ka ni a, lungngai thei ka ni bawk, helai hmunah hian mikhualin ka rawn awm a, nang lo hi tumah hnaih tak tak leh rinngam pawh ka nei lo, ka hna leh ka nihna i hria a, nang ka hnaih theih nan che kalsan tam tak ka nei bawk, ka ṭhian ṭha ngawih ngawih Valtea pawh ka hlat phah a, a chhan chu i kianga hun tam zawk ka hman duh vang a ni, Bawihi, hetiang hunah te chuan ka lamṭang tur i nia sin," a ti hniam ruih a, ka khawngaih lutuk tlat.

Mipa strong tak a ni a, a rilru a paukhauhin a tum a ruh bawk. Hetiang thu a sawi avang hian a nêp ta tihna a ni lo a nia. A sawi zawng zawng hi a dik vek tih ka hria a, keimah zawk hi ka dik lo a ni.

"Ka tihpalh a ni, ka tihpalh tak tak aw, i rilru tur ka lo ngaihtuah ngai lo a, zanah kan sawi ṭha dawn nia, tunah chuan a tlai tawh si a, haw a hun tawh, zanah lokal ka tum ang," dam thlapa tiin a kutah ka chûlsak a, a thaw chhuak hawk ringawt.

"Bawihi..." a ti sup a. Eng mah phei chu a sawi zawm lo.

"Zanah lokal ka tum dawn nia, ka nuin min ngaihtuah tawh lutuk ang," tih nawn leh pahin ka ding chhuak a, min chelh tumna emaw pawh a nei hran lo.

"I tan lokal a harsat chuan rawn tum lui duh suh," tih pahin a thiltih lai a chhunzawm leh nghal daih a, "Kha chu ka thu thu.." tiin kawngkhar lam panin ka phei a, amah ka va en leh pawh chuan a rawn dâk chhuak tawh lo hrim hrim. Lalngaihzuala hi chu a tih lohnaah a luhlul tih ka hriat chian êm kha maw..

Ka nuin chaw eiah min lo la nghâk a, ka u a la haw loh avangin a phun char char a, "Mahni in aia pawnlam nuam tih tlat mai, Lalhmingmuana chu rawn haw teh se, a duh dan ang ang hi chuan a khawsa miah lo ang," a ti hlak hlak a.

Damdawi inah a awm loh thu leh a kalna chin ka hriat loh thu ka sawi phei chuan thinrim taktein a thinrim tawh a, "Nang tal hi chuan rilru puitling put tum ang che, i u hi eng mah a nih loh hi.." a ti thûl. Kan zanriah kîl boruak a nuam lo a nia, nuam lo tak a ni.

Chaw eikham hlimah kan doorbell a rawn ri a, Ngaihzuala a lokal ta emaw ka ti hman a, mahse, chutiang ni ta lo chuan Police hmel kan hmachhawn ta tlat!

Ka nu hmela hlauhthawnna lo lang avang chuan ka kuah vat a.

"Lalhmingmuana a awm em,?" tia police pakhatin min zawh chuan a awm loh thu ka lo sawi vat a, "Sir, eng thil nge ni ta, eng eng a awmzia?" Ka lo ti sawk sawk a, ka thin a phu zawih zawih thei nia.

"Thu zawh fiah tur kan nei a, khawiah nge kan hmuh thei ang?" a ti leh a.

Ka nu Sofa-ah a ṭhu hnawka eng mah a sawiin a zâwt lo.

Nilênga a lo haw loh thu leh a awmna chin kan hriat loh thu ka sawi chuan, "A nih tak chu maw le, keimahniin hma kan lo la mai ang, inah a rawn haw a nih chuan rang takin police station-in lo phone dawn nia," tiin ka nu a en a, "Ka pi, i fapa awmna chin i hre miah lo maw?" Tiin a zawt thut a, ka nu lah chuan, "Vawiinah a hmel ka la hmu lo reng reng, tunhnaia a khawsak dan hi ka hriatthiam phâk bâk a ni e," a lo ti ve mai. 

Police lam an chhuah fel hnuah ka u number hmet chhuakin ka call nghal a, switch off a inti hmiah. A number pakhat zawk pawh chuti tho.

"Bawihi, eng thilah nge i u chu an hmuh duh, eng nge an zawh fiah dawn i hriatpui em?" Tiin ka nuin min zâwt sek sek a, a chiâi vek a ni ber mai. A hmel a dâng lap a, a âwm dawm chung hian a thaw chhuak halh a, engkim thil kal dan hrilh a hun tawh tih ka hria a, a ṭhutna bulah ṭhuin ka kuah a, "Nu, Mama te chu thu zawh fiah a ni ringawt dawn alawm eng thil pawi mah a ti lovang," tiin ka hném a, kei pawhin ngaihdan ka nei thiam rih tlat lo. 

"U Ngaihzuala kha accident pangngai ni lovin tum reng vanga thah a ni," tia bul ṭanin tun thlenga thil kal dan Rammuana chungchâng te, ka u nena an inkungkaih dan engkim ka hrilh ta vek a, Ngaihzuala an rinhlelh tel dan te leh tukina ka u in hospital-a a ṭawngkhum chungchâng nen lam ka sawi fai ta phiar a, a makti hmel chu keiin mak ka lo ti veleh chhawng.

"I nu lakah hetiang thu lian tham hi in zêp a nia, in mak unau ngawt mai," thinrim ṭah chhuak insûm bawk siin a ti a.

"Mama'n sawi a phal lo alawm, i rilru tihhah kan duh loh vang a nia," dam thlapin ka ti a, "Hmingmuana chuan eng pawi nge maw a khawih le? Police station-ah kan va kal mai dawn em ni?" A ti leh a, a rilru a hrehawm lutuk dawn tih ka hriat avangin, "Nu, keimah ka va kal ang a, Azuala ka sâwm mai dawn em ni?" tia ka zawh chuan, "Azuala chu kan ina lokal turin han hrilh teh," a ti ta a. 

Chutih lai tak chuan nu Rami'n min lo call a, ka chhâng hmasa leh rih.

"Bawihi, Ramtea a harh chiang tawh a, a biak tlâk tawh a nia, hmaichhanah kan inbiak a ngai, a thilsawi hi thudik a nih chuan in lakah ka lung a awi mai mai dawn lo, i u Hmingmuana pawhin a thiltih sual man phu tawk hremna a hmu ngei ang," a rawn ti a, a ngaihna hre lovin ka phone kan en ringawta nu Rami ngei chu a ni bawk si.

"Aw le, tunah ka lokal nghal ang," tia ka sawi zawh rualin phone ka off a, ka thaw a va han ipik tehreng êm, kil tin aṭangin ka hrehawm kual vel vek a ni e.

Ka nu hnenah thil awmzia ka sawi a, "Nu Rami meuhin khatia a tih chuan ka u hian thil pawi liantham tak a ti a ni ngei ang, lokal rawh, nu..kan pahnihin thuchiang tak hriat tum law law teh ang," ka ti ta zawk a, ka rilru a chiâi buai nuai mai.

"Keimah ka kal tel ve a ngai hleinem, tikhan nangmahin emaw a nih loh pawhin Azuala chu sawm la, va kal rawh u, rilru hahna hlir min thlen a, va inchingfel teh u," a ti ta a. 

Ngaihzuala ka call nghal a, phone a pick up thei lo reng reng.

Ka insiam sawk sawk a, damdawi in panin ka tlan chhuak leh ta. 

U Ngaihzuala thihna chungchângah ka u a inhnamhnawih ka ring lo bur a, Rammuana khawihtu a nih lah ka ring hek lo. Ka rin dan berah chuan hetiang thuartham vela a inhnamhnawih avang leh Rammuana nena thawk dun an nihna zawnah thu an zâwt fiah ni turah ka ngai ve hmak a; amah Rammuana berin tawhsual a tawh tâk siah hian Police lamin thu zawh fiah atan an la dawn a nih ka ring ber. Mahse, nu Rami ṭawngkam khan ka ngaihtuahna a tibuai lawi si.

Ngaihzuala inah ka pêng kâwia a lo inkalh ṭhap mai, a kalna chin min hrilh turin ka phût lo naa khatiang zât zât missed call a hmuh te chuan min rawn callback ve turah ka ngai.

DM hospital kawtah Scooty ka hung fel a, u Ngaihzuala chhungte lam ka hmu nual. Inkan hun a nih tawh loh avangin nu Rami ka call hmasa tê tê a, "Tikhan lo awm la, ka rawn chhuk ang" tia min hrilh avangin ka lo nghâk ta a.

Kâr lovah ani pawh a rawn thleng thla a, min hmuh veleh, "Ramtea kutthlâktu kha tudang ni lovin i û a ni, Bawihi, i u Hmingmuana hi i rin ang a ni dawn hauh lo a nia," a ti chang fak a, ka lo ter nghal at.

"Awihawm loh lutuk, fiamthu thawhna chi a ni lo," ka ti vin ṭhat a. Ka insûm hman thlâwt lo a ni e.

"Fiamthu mai mai sawi turin ka ko lo che, Ramtea'n engkim a sawi a, Police lam pawh kan hrilh tawh, i u hian kan pawi lian tak a khawih a, eng vanga ti nge a nih tih leh ka fapa leh a nau pasal ni mai tur thah duhna rilru a pu hi ka ngaidam ngai dawn lo a nia, tunah hian i u pawh police lamin an la tawh a, thu zawh fiah turin an kawl mêk," ram hmak hian a ti leh zung zung a.

Ka awih loh êm avangin chhân ngaihna ka hre lo a, ka âwm tâwt up up chu zawitein ka chûm dat dat a, "Nu Ram..." tih bâk ka kâ aṭanga chhuak tur a awm lo.

"Ramtea hian a ṭhianpa thattu Hmingmuana a ni tih a hriat chhuah tâk avangin nizanah i u nen lodge sak tharna hmunah inhmuin chutah chuan a inrinloh laiin kut a thlâk ta a ni. Eng pawh nise, thuchiang i la hre thuai dawn tho alawm, i u inpuanna kan la ngaithla ang chu," min tiel awkâ tak hian a ti leh a.

"Amah Rammuana chu tunah a biak theih em?" Tia ka zawh chuan a ner nawk a, "A biak theiha mahse, a be ve duh kher chein ka ring lo, nang pawhin ka fapa bumin ngaihzawng dang i nei a, keiniin eng mah kan hriat loh avangin inneihna kaltlangpui kan la tum kha a ni a, in unauin inṭang dun ang tih rin ngaihna ka hre lo, lemchan thiam tak in ni," insum kârna awm hauh lo hian a ti leh bawrh bawrh mai. Nu Rami thinrim ka vawikhat hmuhna a ni a, ka tan a nawm loh tur zia chu inhriatthiam ka ring.

"I ngaih ang a ni lo, u Ngaihzuala kha ka hmangaih asin, ka u thiltih engmah ka hriatpui lo," tia ka lo chhân chuan, "Min bum lovang, tenawm lutuk..." tia a la ṭawng laiin tu emaw hian ka hnunglam aṭangin min rawn kuah a, nu Rami hmel danglam nghal vek ka hmuh chuan min kuahtu en tumin ka inher a, ka Lalngaihzuala lek a lo ni.

"Ka pi, i duh tawk i sawi tawh chuan Bawihi hi biak ve lawk ka duh a," tiin Ngaihzuala chuan nu Rami a en a, "E, i duh tawkin be rawh, anni chhungkua hnaiha biak châkna ka nei tawh reng reng lo, ka fapa thlauhthlaa mipa dang pantu hi eng atan mah ka ti lo a nia, Rinduhawm, eng ang pawhin zêpin ṭan khawh mah la, inunau hian in tâl chhuak chuang lovang..rilru chhe lutuk mai," thinrim eng phiara a tih leh lai chuan kan bula lo dingte'n min rawn melh hû hlawm a, ka zak ngawih ngawih.

"Nu Ram, i hriat dan a dik lo, u Ngaihzuala ka phatsan lo.." tih pahin a kutah vawn ka tum a, ka bân a lo vaiper lawp a, "I hmel hmuh leh pawh ka duh tawh lo, ka fapa khan in pawi eng nge a sawi? Mitthi tawh i kaitho thei em ni...?" ṭap ṭiaua tiin min sâwi nawk nawk a, ka mittui a hnâm sak mai.

Ngaihzuala a che chhuak phat a, "Ka pi duh tâwk tawh rawh, Bawihi, min lo zui rawh le," ti ram hmukin ka bânah min chelh a, "Ka u vangin ngaihdam ka dil a che, kei erawh ka tel ve tlat loh avangin ngaihdam dîlna chhan tur che ka nei ve lo," ti sap chungin ka tawlh hnung det a, Ngaihzuala'n min lo kuah vat a, nu Rami a meng râng hle. Min sawisak hrep châkna a nei tih ka hmuhhmaih lo chiang kher mai.

Mittui tling pam chungin ka insût hraih a, ṭawng ngaihna pawh ka hre ve tawh lo reng reng.

"Ngaihdam min dîl eng ang mah la, ka ngaidam dawn lo che, ka fapa thisen mawh i phur ngam dawn em ni, engtin nge in unau hian hetiang thil inruahman theih zawk le," a ti tlawk tlawk a, Ngaihzuala chuan, "Kal ang, zankhua a ânkhum che chuan i thidang mai anga sin, ka pi, thu chiang tak i hriat hma chuan Bawihi khatia tih vak vak kha a ṭha ber lo a nia," tiin a rawn inrawlh a.

Ngaihzuala melh râm râm chung hian, nu Rami chuan, "Kalsawn pui rawh, khatiang hmeichhe tenawm lutuk ka fapain a lo hmangaih kha a nunnain a tawrh phah ta a nih kha," ti hlawih hlawih chung hian a kal sawn ta a, phone-a min lo biak laia a ṭawngkam nêm te kha chu an thlâwk bo zo tawh a ni ang, hmaichhana min ânkhum a châk vang a lo nih chiah hi...

Ka mittui far fap fap chu dankir tumin ka insût leh hraih a, Ngaihzualan min rawn kuah nghet sauh a, "Lungngai mah ta che, i kiangah ka awm zel dawn alawm," ti sup chung hian min pensawn pui a, ka ṭah a chhuak lutuk a, insûm ka harsat ngei mai. Ka damchhung niah hian khatiang em ema ṭawngkam nâ kha ka la dawng ngai lo, a nâ êm a ni.

Ngawirengin a car chhungah min ṭhut luhtîr a, ka kutah rawmawl min hmehbel a, "Chak lo taka i awm lai hmuh ka duh lo a nia, ka inah phei ila thil awmzia dik tak ka hrilh dawn che nia, i u pawh lock-up ah a awm tawh a, zanin atan engmah tih theih a awm chuang lo," a ti ta a.

Engtin nge a nih theih? Ka u Hmingmuana ka thisen zawmpui ngeiin u Ngaihzuala engtin nge a thah theih, a ni thei lo, thil dik lo dang a awm a ni.

Ngaihzuala lam ka hawi a, "Ka u awmnaah min hruai rawh, biak ka duh," ka ti láwi rât a, "Bawihi, zanin atan chuan engmah a tih theih tawh loh, inbeng dai la, biakna hun ala awm dawn chauh alawm, chumi hunah chuan i duh ang takin zawhna i zâwt dawn nia." Dam thlupin a ti a.

"Aih, tunah ka u ka hmu duh.." ka la ti ve fan a, "Ka thusawi awih rawh, i hriat duh zawng zawng ka hrilh ang che, i u chuan i bulah engmah a sawi duh lo ang," a ti deuh tlat a, a in lam panin min tlanpui ta zêl a, ka ṭawng chhunzawm ta lo.

Khawvel hi a mak a ni. Ka dâi dik loh avanga ka tawrhna a nasat tawh tehlul nen tunah a aia hrehawmnain min chîm leh a, u Ngaihzuala leh ka u hi an lo inhaw sa ve rêng zâwk nge tih pawh ka hre lo, ka hrethiam lo êm a ni.

Ngaihzuala in kan thlenin zan dar riat a pêl chauh a, ka nu biak tumna pawh ka nei hran lo.

Ngawirengin kan inzui lut a, Fridge-a mi tui bottle la chhuakin min pe a, "Hahdam tum rawh, khatia i chiâi vak chuan naute tân a ṭha lo a nia," nui lek lek chung hian a ti a, kei ka lo sa ve phat thung.

"Lalngaihzual, eng nge i sawi kha..?" Ka ti vin ṭhat a.

"I thlatin hunbi i la zawh lo tih ka hria a nia, i pum chhungah khan kan pahniha fa tur a awm tih i hre lo em ni, intest vat ang che," a ti leh a, ngaihdan ni lo lutuk hian ka melh a, "I duh duh sawi ringawt suh, tun hi khatiang thu âtthlâk sawina hun pawh a ni lo," tih pahin tui ka inkhawlh khawlh a, engtin nge ani hian ka period lo tih a hriat tih lam ka ngaihtuah buai peih rih lo.

"U Hmingmuana hian u Ngaihzuala chu a that tak tak em ni?" Tiin Ngaihzuala ka zâwt a, rei fê a ngawih hnuah, "Ama kutzâl chuan that lo e..." a ti sup a.

"Ih...engtin nge chutiang chu a nih theih, chiang taka i sawi theih, ka tihna a nih chu," tiin ṭhutthlengseiah ka ṭhu thla hnawk a, ani erawh a la ding reng thung.

"Ka sawi tur hi ngun takin ngaithla la, ka sawi kâr lakah min lo pawt chat suh ang che, a chhan chu ka sawi nawn dawn tawh loh avangin," nghet churh hian a ti a, ka lo bu nghat nghat mai.

"I u Ngaihzuala leh Sangtei inngaihzawn hma khan Hmingmuana leh Sangtei hi a rûkin an lo inkawp hrep tawh a, i u fa pawh Sangtei hian a lo titla tawh nghe nghe," tia a sawi chuan mak tih luat vangin ka lo meng bial kal a, ka awih lo tia lo hnial ka tum chuan a kut phar hian ngawi rih turin min lo khap a.

"Sangteiin nau a titla tih a hriat veleh i u hian a bansan nghal a, chumi kârah chuan i u Ngaihzuala a tlazep ta a ni. Mahse, Hmingmuana'n Sangtei a hmangaih êm avangin neih lêt leh a tum ruh hle a, chuti maia a kîr duh tâk si lovah chuan i u Ngaihzuala hnenah engkim a hrilh ta vek a, khatih lai hunah khan i u Ngaihzuala leh Sangtei inkâr tumah hria an awm lo, khatiang thil zawng zawng i û kâ aṭanga a hriat tâkah khan Ngaihzuala a thinrim hle bawk. Hmingmuana chuan Sangtei a neih lêt leh theih nan i u Ngaihzuala inremsiamna a neihpui a, chutah chuan a farnu neihchhun a tawktarh ta che a, "Sangtei kalsan la, Bawihi hi ngaizawng mai rawh, ka nau rilru ka lo hmin ang, nang chuan Sangtei i la kalsan theiin ka ring, keiin ka thei ve si lo," tiin." 

"I u Ngaihzuala khan Sangtei a hmangaih hman a, khatiang thu a hriat tâkah khan a rilru na bawk si leh tenawm ti chung reng khan a kalsan ta kha a ni a, amah Sangtei tak pawh khan Hmingmuana aiin i u Ngaihzuala kha a hmangaih zâwk, tiang teh nuai kârah khan Sangtei runluih nan nang hi a ngaizawng ta che a, bul a ṭanpui ta che a ni." Tia a hmai tuai puat chung hian min rawn en a, ka thu hriat mak kikawi lutuk hian ka thluak a ti â takngial dawn.

Mahse, a hun lai ka ngaihtuah kîr a, ka u in u Ngaihzuala a fak theih zia leh ani aia ṭha midang i hmu tawh lovang tia min sawipui fo ṭhinte kha ka ngaihtuah kâia hetiang vang lek a lo nih mai mai hi. U Ngaihzuala leh ka u kha an inkawmngeih phian bawk.

"Bawihi, i rin aiin he buaina leh thihna hi a hnawk aw, i rin em em i u Ngaihzuala khan nang kher lo pawh a hnathawhna hmunah ngaihzawng nghet a nei bawk," a tih leh tâkah chuan ka ding chhuak hluai a, "Dâwt belh kher a ngai lo, chutianga ani puh chhiat pawh a ṭûl lo," ka lo ti a, ka ṭap lo chauh tawh. 

Tute tan mai pawh hian hmanrua ka ni zêl mai hi a makin a râpthlâk ka ti.

"Dâwt ka hrilh tawh ngai che em ni? He buainaa rinhlelh ka nih aṭang khan engkim ka chhui ve vek a, midang ka ruai hial; ka hriat duh aia tam ka hre ta rêng bawk a, i nat ka duh vanga sawi ka ni lo, thudik hria la ka tih vang a ni," a ti zawi ruih a, hmai hup chungin ka ṭhu leh riai riai a, zahna leh mualpho intihna avangin ka tâwt vek a ni ber mai.

Muangchânga dâk chhuakin Ngaihzuala ka melh a, "Ka u in u Ngaihzuala a thah chhan ber chu eng nge ni ta?" Tiin ka zâwt a, hriat fai vek law law ka duh tawh.

"Nang nen in inkawp lai zawng pawh khan Sangtei a bansan hlen lo a, Hmingmuana hnenah erawh chuan Sangtei kha a kîr lo hlen thung, kei leh Sangtei kan inzui lai zawng zawng pawhin i u Ngaihzuala hian a rawn be fo a, amaherawh chu, Sangtei khan keimah min thlang ve tlat tawh si atin ni, mi lerh leh pawisak nei lo chu Sangtei leh i u Ngaihzuala zâwk hi an nia." Inseh ruh ṭeuhin a ti ta a, u Hmingmuana dem ang zâwng pawhin a ṭawng chhuak lem lo.

"Tikhan, engvangin nge i u Ngaihzuala ka huat em emna chhan chu i hrethiam tawhin ka ring, chuta kârah i u Hmingmuana hian Ngaihzuala khawsak phung leh nun dan a hre vek a, vawi tam a nau rilru tina lo tur leh hmeichhe dang kawpsan lo turin a hrilh a, pakhat lahin engah mah a ngai si lo, inneih hial in tum tâkah khan i u hian engmah sawi chhuak ngam si lovin a farnu pasal a tan a duh lo leh hnuhnawh a, nangin tih takzetin ani kha i hmangaih tih a hriat rual khan dan chah tumin theihtawp a chhuah a, i u Ngaihzuala te chuan a bum hlum ṭhak duh ang che chu, nang lahin i ring tâwk em em a, i u hian chu chu a hmuh hmaih si lo, engtikniah emaw chuan a la tina dawn che tih a hriat vangin a thinrim rilru let but khan Ngaihzuala thah a duh tihna a ni mai, a farnu i ni tlat a, a tih sual lian ber zawk chu nang leh i u Ngaihzuala a lo suihfin che u kha a ni," a ti duah a. Ka hrethiam deuh uar.

"Engtin nge a thah le? Truck nen an insu bawk si a..." ka lo ti sap a.

"Truck driver kha hlawh neiin a ruai alawm, nimin lamah a inpuang fai vek tawh." A ti a.

"Rammuana hian heng zawng zawng hi a hria tihna a nia," ka tih chuan, "Ni chiah e, ama chhui chhuah deuh vek zawk a nia, a tîrah kei min ringhlel a, mahse, chiangtaka kan inbiak hnuah a chhui chho zel a, i u Ngaihzuala thih hma chiaha number dang aṭanga betu kha Hmingmuana hi a ni," a tih leh chuan mak tihna em em pawh ka nei tawh lo.

Sangtei, ka u, u Ngaihzuala..an pathum hian tumah an dik lo.

"Rammuana hi a fing hle a, i u a rinhlelh hnu khan a thawhpui ta daih a, i chungchânga hriat duh a neih pawhin i u a zâwt zel, ani lahin amah an hriat chhuah a hlauh êm avang khan Rammuana hriat duh a hrilh zel a, nizana an pahniha an inhmuh dunnaah a ṭhianpa thattu hming a sawi chhuak ta a, a bâk zawng chu i hriat ang kha a ni mai, Rammuana'n engkim a hrechhuak tih a hriat rualin a inrin loh lai chuhin a bei a, thah a tum ta zâwk tihna a nia, a thi ta lo erawh i u Vanduaina a ni ber e..." tiin a tawp a khar a, a ngawi zui hmiah.

Kan ngawi dun vang vang a, Ngaihzuala ka va en a, mûk taka thil ngaihtuah hmel a pu.

Ka sana bun lai ka bih a, zan dâr sawmpakhat a lo hnai kuar tawh.

"Ngaihzual, Damdawi in kawtah ka Scooty ka dah daih kha, engtin nge ka hriat chhuah loh theih le?" Ka ti a, "I rilru a buai êma chuvang a nih kha, kan va la dawn nia, i tan ka awm reng a, ka la awm zel dawn bawk." Ti supin ka biang a rawn dawm a, ka lo ṭang mar at. 

"Tuna ka sawi bâk thil dang tam tak a la awm a, chu erawh i û kâ aṭang ngeiin hria la ka duh, eng anga harsatna leh mualphona pawh tawk la, i Lalngaihzuala hian phatsan che ka tum lo a, a chhan chu maw i u Ngaihzuala anga phatsantu che nih ka duh lo, ka hnaihah ka enkawla ka ngaihsak phâkah i awm zel ang," inring tawk takin a ti hmiah.

Ka Lalngaihzuala thusawi tlemte chuan ka rilru hahna leh pikna a chhâwk huai theiin a nia ka hriat. A mitah tak ka en a, "He hun hrehawm hi min paltlangpui thei a nih chuan i tan ka awm kumkhua ang," ka ti ve ta a...

B+>[BeckirafARenthleI]<+®