16.DROGMA SEOL [A Becky Rafa Story]

16.DROGMA SEOL

Ziaktu: Becky Rafa Renthlei

[Recap]

"Tuna ka sawi bâk thil dang tam tak a la awm a, chu erawh i û kâ aṭang ngeiin hria la ka duh, eng anga harsatna leh mualphona pawh tawk la, i Lalngaihzuala hian phatsan che ka tum lo a, a chhan chu maw i u Ngaihzuala anga phatsantu che nih ka duh lo, ka hnaihah ka enkawla ka ngaihsak phâkah i awm zel ang," inring tawk takin a ti hmiah.

Ka Lalngaihzuala thusawi tlemte chuan ka rilru hahna leh pikna a chhâwk huai theiin a nia ka hriat. A mitah tak ka en a, "He hun hrehawm hi min paltlangpui thei a nih chuan i tan ka awm kumkhua ang," ka ti ve ta a...

-B®® Stories

Damdawi in kawta ka Scooty dahna lamah kan inzui phei a, ka nuin chanchin min rawn zâwt zuai a, ka haw hun nghâk turin ka hrilh, engtia hrilh tur nge tih ka hrethiam lo a, a rilru nat dan tur ka ngaihtuah ngam lo zâwk. Zaninah te khan min zui tum ta ang sela nu Ramin min ṭawngkhum dan kha a ngawihbopui hauhin ka ring lo. Zaidam viau e ti lo hian a duh loh naah a nasa ve phian a nia.

"Tikhan Scooty kha khalh haw la, i hnungah ka lo zui dawn che nia," tiin Ngaihzuala ka bul hnaihah a rawn ding a, a Car-in min va hruai ta kha a ni a, "Ka nu hrilh ka huphurh êm mai, kan inah lo lût kâwi ve mai la, a rilru a na dâwn êm asin," ka tih chuan a chal a chuar nak a.

"I nu lam reng reng ka lo ngaihtuah chang lo, keiman ka sawi ang e, hlauthawng lo la, a dam thei ang bera hrilh ka tum ang, a chipchiara sawi kher a ngai hleinem," tih pahin ka sam chhâwllêng ka hmai zartu chu min hûikiansak a, a ṭawng dam thlup vei nen ka thawveng huai thei nia.

Chumi hnu chuan kan in lam panin kan inchhawm phei ta a, ka u chungchâng ngaihtuah duh lo lui tlat chung hian ka tlan par par a, ka kawchhung a la dik hleithei lo.

Kan in kan thleng a, mitmeng dul raiha min lo hmuaktu ka nu hmel ka hmuh chuan ka lo insûm vena zawng zawng kha ṭhiahin a awm a, ka nu kuah thlawp chung hian ka ṭap chhuak ta phawng a, "Bawihi, hahdam rawh.." tia ka sam a chûl leh lek phei chuan ka ṭah a chhuak zual sauh.

"Azual, a room-ah hruai phei la, khumah mu hahdam rih teh se, ka rawn lut ve dawn nia," tiin ka nu chuan a kut pahnihin ka hmai a khuap a, "Ka fanu, chak taka kan awm a ngai a, i u tan theihtawpa kan ṭawngṭai a ngai a nih hi, sualin a nunah hmun a chang thûk lutuk tawh a, keima thiam loh vek a ni e," tiin a inhnît hraih a, kan sawi ngai miah lovin ka u chungchâng a lo hre vek tawh a nih hmel.

Ngaihzuala'n ka room-ah min hruai phei a, ka mittui ka dang zo meuh lo, ka u thiltih vang a nih rualin u Ngaihzuala ka hmangaih em em a thihna avanga nun pangngai pawh nei hleithei lova ka tâlna mipa ngei chuan min bum let dêr a, a chhia zawng zawng leh natna ka tuar a, mi pangngai ni ṭhin kha ka pangngai lo zo tawh a, ka na lutuk hi ka â thei hialin a nia ka rin.

"I nu hriat laia ṭah kha a ṭha lo asin, intipachang hram hram la ka duh, ka tan hlei hlei hian a nuam lo a nia," tih pahin Ngaihzuala chuan khumah min mut tîr a, hun kha leh chen duattu leh hnemtu mumal awm lovin hrehawmna ka paltlang a, tunah a aia rit zawk leh na zawkin min delh leh si.

"I duh chuan min hawsan tawh mai la, ka nu berin engkim a hriat tawh si chuan nang pawhin chawlh hahdam i mamawh a nia, eng angin nge he thil hian min la nghawng dawn tih hriat a ni lo a, ka hna pawh zawm tumna ka nei tawh lo a nia, naktukah bânna ka rawn theh lut ang," tia ka sawi chuan Ngaihzuala hmel a danglam nghal vek.

"Rilru nêp deuh pu mah ta che, i hna i chawlhsanin eng nge i tih ang a, inngaihtuah chiang rawh," a ti nghut a.

"Mi hmai êng ka hmu ngam dawn em ni? Tupawhin kan chhungkaw chanchin an sawi dawn a, thiamthu sawi tur lah kan nei dawn si lo. Rinduhawmi pasal tur Lalngaihzuala kha a u Lalhmingmuana thah a ni, tiin khawpumin an sawi luih luih dawn, Ngaihzual, ka tuar chhuak zo hian ka ring lo," tiin ka ṭap leh ta a.

"Bawihi," ti sup chung hian khumah a rawn ṭhu a, "Eng anga tuihnai lo pawhin sawi  mah se, tel vena i nei lo, i u zawk alawm tidik lotu, eng pawh hmachhawn ngai se i tan ka ding zel ang, min ring rawh, nangmaha i hmachhawn huam lo a nih pawhin ka nei ang che, i pasal ka nih chuan i mawi lohna ka hliahkhuh dawn asin, min nei mai rawh," a ti hmiah.

Ngaihzuala hmel tak ngâk chu mittui kâr aṭangin ka melh a, ani pawhin min lo en ve chiah bawk.

"Tualthattu nau ka nih hi..." ka ti sap a.

Ner sawk chung hian, "Tualthattu nau ka duh a nih mai chu.." a'n tiah. A nui lek lekin ka hria.

Bawnghnute no hnih leh biscuit tray-a chawi chungin ka nu a lo lut a.

"Azual, zanin chauh chu i lo riak ve mai dawn em ni, kan nufa chauha awm zawng ka zuam chiah lo deuh a ni e," tia ka nuin Ngaihzuala a sâwm chuan ka lo meng phar âk a, engkimah Azuala a ring titih ringawt hi a mak ka ti ve deuh. A rin zawng tak mipa a ni tepawh a ni ang.

"Nia, ka rilruah a lo awm a, Bawihi hian min sâwm ngam lo a nih ka ring a," tiin kan boruak tih zangkhai tum tak hian a nui a.

"Mama chuan engtiang chiahin maw i u Ngaihzuala chu a tih a?" Tiin min zawt thut a, chhân mai dan tur ka haihchham hlê...

Ngaihzuala zawk a rawn inrawlh vat a, "Ka pi, khawvelah hian kan duh ang diak diakin kan awmin kan nung thei lo a, Hmingmuana pawh dem lutuk loh tur, a rilru kal sual let butin a ti a nih ka ring ber, kha Truck driver kha pawisa pein khatia Lalngaihzuala hna kal tur rawn tlan chhuak kha a su ta a, a hun lai ngaihtuah kîr ula kei aiin in hrechiang zawkin ka ring, a bul tumtu chu i fapa a ni a, tunah police lamin an kawl tawh avangin pi Rami te chhung pawhin an tina thei dawn chuang lo, an diriama an ṭawngkhumna dawng tam bertu tur chu Bawihi leh nangmah in ni, chuvangin rilru paukhauh tak in put a ngai dawn a nia," a ti duah a, a thutak hlê bawk.

"Hetiang thil hi ka mumangah pawh ka la mang chhin lo a nia, a pa lu nghahna hmun ni lo se chuan tlanbo daih a ni ka duh ni..." ka nuin a tih chuan a rilru hrehawm turzia ka hriatthiampui mai. Nu zawk nge nge a intipachangin a ṭap lo mai chauh a ni. 

"Ê, chutiang zawngin ngaihtuah duh miah suh u, khawi hmunah pawh awmin bîkbo tum mah ula, i fapa tihsual hi nuairehin a awm dawn chuang lo, helai hmuna tuar dai ṭhak tur hian inpuahchah ula, in tan ka awm zel ang, harsatna inneih phawt chuan min hrilh hreh lo ula, Bawihi pawhin a nunphung pangngaia awm tum zawk rawh se," duhthawh taka tiin bawnghnute a in zawm nghal a, Ngaihzuala thu sawi dan kalhmang avang chuan ka nu hmel pawh tlêmin a danglam phah deuh.  

"Naktuk lamah ka fapa tlawh tur chuan ka kal dawn nia, Bawihi inthing harh la, tikhan lo inkawm rih rawh u, ka ṭawngṭai a hun tlat," tiin kan no ruak a senghawia ka room aṭangin a chhuak ta a.

 

Khumah ka ṭhu chhuak a, Ngaihzuala thung chuan uluk deuhin ka room a enkual a, a hmelṭha tak pawh a thim ve khap mai. Ka hun tawng avang hian amah pawh inngaihtuah hleithei lovin keimah min buaipui a, a sawi ang khan ani hian min duh tak tak tih ka hriatchian phah.

A rawn inher thut a, chîk zeta min en chung hian, "Test kit i lei tawh em?" Tiin min zawt teh daih a, ka hrilhhai hmel a hmu tehchêk a ni ang chu, "Intest tawh la ka duh, a result a zirin kan awm zel dan tur a hriat theih dawn a," tiin khum lam a rawn pan a.

"Lei sa pakhat chu ka la nei a, a hmaa ka hman tâk loh kha a nia, nihnih khat hnuah test ka tum deuh," tia ka sawi chuan, "A pawi chuang lo, eng dinhmunah pawh ding la i hnena ka sawi tawh kha hlenchhuah ngei ka tum," a ti nghet churh.

"Sangtei ka huat dan em em hi, tun hunah hian hmu ta ngat ila, a samah ka kêk hrep duhin a nia ka rin, tiang em ema hmeichhe nasa hi an awm thei dawn em ni?" tiin ka âng bawrh bawrh a, Ngaihzuala a nui suk a, "Inbengdai rawh, i thin tertek a chhuak leh ang e," a ti duh chauh.

"Naktuk chanchin tharah an puang ang a, Mizoram chhung sawi loh, kan thawhpui te'n an hriat hunah ka zak dawn lutuk, a zawng zawng an hre ve vek dawn si lo a, ka huphurh ngawih ngawih," ka ti zâwi raih a.

"An puang ve bawk ang chu, News a nia lawm maw le, ka sawi tawh ang khan a hlimchhawnah an ri hluai ang a, an sawi rei peih hauh lovang, naktukah i dan pangngaiin office kal la, hemi hun chhung hi chu i duh leh châwl mai rawh, i hna khawih lai midang kutah ka lo dah rih dawn nia, i bialpa hian maw thil ka tithei ve riau a nia," tiin a nui ruh ruh ringawt.

"I duhnaah hi chuan i fel mawle.." ka lo ti a.

"Ka duh lohnaah pawh ka fel tho, min ṭhen inpeih at reng hian awm tawh lo la, a bâk chu ka kutah engkim dah ngam rawh," tiin a kiai suk a, Ngaihzuala puitlin zia zanin hian ka hriat belh hnem viau. Innghahna tlâk mipa a ni chiang alawm. 

Ka nu ṭawngṭai zo a rawn lut a, "Azual, Mama room-ah i riak hreh em?" tiin a rawn zawt a, a hreh loh thu a lo sawi ve mai a.

"Khawtlângin min en dan tur ka ngaihtuah hian ka zak sa hluah hluah, Rami te hmel pawh kan hmu thuaiin ka ring a, kan mâkpa tur ka fapain a that chu a ni ta mai si a, a râpthlâk lutuk deuh a ni Azual, lungngaiin thlanmualah ka kal dawn a nih tâk ber hi," ka nuin a tih chuan, "Nu, khatiang zawngin inthiam lo duh reng reng suh, ka u hian chhan nei lovin thil a ti bik lo a, u Ngaihzuala'n min lo bum nasat zia remchangah ka hrilh ang che," ka lo ti a.

"Eng ang pawhin bum che mahsela, nunna hi a hlu a, i u Ngaihzuala te chuan i nunna êm a la hleinem, keini chhungkua erawh chu kan damchhung ni hian hlim ni hmel kan hmu ve tawhin ka ring lo, tualthattu chhungte kan ni tawh a, Mama..i ngaihtuah chiang lo deuh a ni," tiin a ṭap chhuak ta. Ka nu ṭap hmel ka hmuh rualin ka hnuk a ulh ṭha leh a, Ngaihzuala pawhin tih vak ngaihna min hre lo nge a chhuak daih a, kan nufain kan inkuah a, kan ṭap dun ta tlawk tlawk a.

Tuna kan hun tawng ngei hi a ni SEOL dik tak chu..

Ka unaupa neih chhun leh ka hmangaih em em Lalhmingmuana chêt dan hi a râpthlâk lulai deuh chu a ni. Mihrang daih emaw kan la hmelhriat ve miah loh that ta se chuan thuhran a ni a, ka pasal tur, a nau pasal hual kher kher chunga hetiang thil a ti ta mai hi hriatthiam theih chi a ni lo. 

Thu chiang hriat châkin kan inah an lokal hlawm ang a, pa nei tawh lo, nu enkawlna hnuaia seilian kan nihnate hi mi min hmusitna tur a la ni zel a, ka thinlung a nâ a ni.

"Azuala mutna tur va en fel pui rawh le, zanin chu i bulah ka mu dawn a nia," rei fe a ṭah hnuah ka nuin a ti a, mahni chauha mut âi chuan ka nu âwm nghêng chunga mut hahdam ka mamawh ber. Inhnema inthlamuan leh tur chuang kan awm lo reng reng.

Ngaihzuala sitting room-ah a lo ṭhu a, min hmuh veleh, "In ṭah in ṭah khan awmzia a awm lo, inrilru tipaukhauh zawk ta che u," a lo ti nghut a, thinrimna nei ang mai hian a hmel a dur riau.

"Kan ṭah a chhuak a nimai a, eng nge maw i sawisel chhên le...!" Ka tih chuan, "Ka sawisel châk vang che a ni lo, thil hrang hrang buaipui tur a la tam dawn a nia, tun aṭanga khatia in awm nghal te chuan mi tupawhin an diriam ang che u, " a ti hmuk a, a ngaihdan a ni vak lo tih hriat reng reng.

"Ka u room-ah chuan va mu tawh rawh, ka nu nen keini kan mu ang a," tiin thildang ka sawi daih a, ani pawh thuawih deuh hian a tho ve mai a, "In muthilh theih loh chuan min rawn ko mai dawn nia," tia a sawi zawh rualin room-ah a lut daih a, u Ngaihzuala hming kan sawilan apiang hian ka Ngaihzuala hmel lan dan a dang deuh ziah tih hi ka hriat chhuah thar a ni.

Kum tam tak hnuah ka nu nen khum khatah kan mu dun leh ta. 

Ka laka Ngaihzuala rilru puthmang dik tak ka hre tawh a, a inrawlh ve anga ka ngaihtuah chhin lai pawh khan a dik thei lo tih ka hria; mahse, ka rin loh lutukin min dêng ta si a, he thihnaa bul tumtu ber chu Sangtei ka ti lo thei lo. Ani hi hremna pêk tlâk hialah ka ngai. 

Ngaihzuala nupui nih tumin ṭan la mah se a ni ngai dawn lo tih ka hria a, thil an han chhuizauin Court-ah ka u a ding anga Sangtei hming a lam ri bawk ang, tuna zalen taka a awm ang hian a awm thei tawh bikin ka ring lo a; a hming sawilan tel a ngai dawn hrim hrim.

Engtin tin emaw ka lo muhil ve mial a ni ang, hmui lum thar tharin ka hmui a rawn sîk chuan rang zetin ka meng chhuak a, hnaiféah Ngaihzuala'n min lo en reng chu niin.

"Ka kal a hun tawh a, ka rawn kâi tho che nih hi, office-ah ka awm a ngai si a, ka kalsan rih che a ngai tlat, thil danglam a thleng a nih chuan rang takin min rawn hrilh dawn nia, i nu hi ngaihsak ṭha hle rawh aw, na lutuk angin lang lo mah se a chhungril a hliam a, a taksain a tuar phah hlauh ang e," tiin ka puansin a rawn keu a, ka nu a tho chhuak leh daih tawh thung. Tlem tal a muhil ve turah ngai ang..

Ngaihzuala a haw ta rih a, ka ruak huaiin a nia ka hriat ni.

Ka rin dan ang chiahin tûkpumin inlêng kan nei a, kan chanchin an hre darh vek tawh tih a hriat mai.

Kan ṭhenawmte leh ka ṭhiannu Siami, kan thawhpui u Zari pawh an rawn tei phei ve a, an thiam ang tâwkin min hnem ve a, ka lawm takzet.

"I u hian chhan nei lovin thil a ti dawn lo tih kan hria a nia, amaherawh chu, thihna hial a thlen avang leh i pasal tur a lo nihna khan mi sawi a ti tam dawn a, chhel taka tawrh hram hram i tum dawn nia," tia min hrilh chuan ka thaw halh a, ka tana an hlutna ka hriat chhuah phah bawk.

Tukṭhuan pawh mumalin kan ei thei lo.

Ka phone a ri reng bawk a, a tawpah phei chuan ka switch off ta daih a.

Ka nu nen ka u hmel hmuh ngei kan tum avangin, Police station lam panin kan chhuak a, mi mit kan chungah a fu ṭhupin a nia ka hriat.

A hmun kan va thlen hian u Ngaihzuala cousin mipate leh an chhungte dang dang pawh ka hmu nual a, kan nufa hmel an hmuh rualin hmuh theih hian an hmel a danglam vek thei a, huatna mitmeng an pu ṭheuh bawk; nute Dini kan dinna bulah a lo phei a, ka inrin hman hmain ka biangah hawisawk khawpin min bêng a, ka nu a lo ṭê ṭhat mai, nute Dini lam hawi hian, "Ka fanu kutthlâk theihna dan i nei lo, i pawi a sawi lo..." a ti chang fak a.

"Awi awi, in han zah loh nufa zia hi, in chhungkua hian jail-ah thawn liam vek che u sela kan him ang," a ti a, a râwl a ring si, tuma mitmei a veng hek lo.

Chutih lai tak chuan, Constable pakhat a lo chhuak a, "Lalhmingmuana chhungte in awm chuan inchhungah rawn lut rawh u." Tihpahin a hawi kual a, nute Dini lam pawh ngaihtuah chang lo lêkin ka nu nen kan lut ta rih a.

Pawnlam thawm a ṭha hulh hulh mai si a, u Ngaihzuala vuavang zinga pahnih khat hi chuan min lainatna hmel an tilang ve tal alawm.

Ka u kutthlâk an châk tih ka hre bawk a, ka lo hlauthawng zek zek a ni ber e.

OC room-ah minute sawm dawn kan ṭhu tawh a, sawi tur a vang duh ngei mai.

A tawp a tawpah tihian a sawi ta a, "Hmingmuana hian tualthah thubuai a nei a, tualthah tum thubuai a nei bawk, a kut tuartu zawk damdawi inah a awm si a, tihian ani hi kan kawl ang.

"A thubuai awrh hi a namai dawn lo a nia, nangni pawhin inhriatthiam ka ring, amah a la inpuang duh tlat si lova hei hian thil a tibuaithlâk zual," nelawm lem loh tak hian a ti a. 

"Rei lotê tal amah kan hmu thei ang em?" Tia ka dîlna erawh min pawmpui lo nasâ.

Ka u kan hmuh theih tâk silovah chuan rilru hrehawm takin kan chhuak ta a, pawnlamah ka u hmel hmuh tum kan veng lam leh u Ngaihzuala te veng ami ka hmu nual a, mi hmai êng zah a na ngei mai.

Ka nu nen ngawi rengin in lam kan pan ta a, u Ngaihzuala nute Dini min benna erawh a na ka ti lo thei lo. Ka tel ve miah lohnaah kut ka tuar a, ṭawngkam chhe tinreng ka dawng bawk a, ka mize chhia a chhuak ṭêp ṭhin a ni.

Ngaihzuala a haw hnu khan chanchin kan inhrilh zui ta miah lo a, office lamah ka khawih âi khawih tur midang a tirh dawn thu a sawi tak nain inthlahrun a na ka ti a, bân law law ka duh tawh, ka nu sawipui ka tum nghe nghe a, a hma aṭang tawhin ani pawhin bâng turin min nawr tawh a, tunah pawh min pawmpui mai ka ring deuh.

Damdawi dawr kawtah ka nuin din a rawt a, ka ding ve mai bawk a.

Dâwr chhung aṭanga hmeichhe pakhat lo chhuak hmel ka hmuh veleh Scooty aṭangin ka chhuk sawk sawk a, ka awmna lam pana lo phei mêk Sangtei chu ka lo nghâk ta a, ka nu erawh damdawi lei turin a kal nghal a, Sangtei'n min han hmuh thut tâkah chuan a hmel lan dan a inthlâk hlawk tih ka hmu a.

"Ding rih lawk teh.." fiak ṭhakin ka ti a, a ding chawt a, mak min tih hmel taka min en hâ chung hian, "Rini..." a ti sap a.

Pehhêl kual hnihne awm lo hian, "Ka u nena inthurûk ka hre fai vek tawh a, u Ngaihzuala nena inthu zêp rûk pawh, Azuala nen inneih kan tum tiin min hrilh tiraw, en teh, i damchhung zawngin ani saw i pasal a ni ngai lovang, chuan, i nundan kha zêpa thupbo hlen theih inring suh..." zawi fiah taka ka tih chuan hmuh theih hian a hmai a dâng sâwp sâwp a, a mitmeng nen lam a pha dui mai.

"I â tawh a nih kha, i duh duh sawi ve ringawt suh.." tia min kalpelh mai a tum a, a banrêkah nghet takin ka hmer a, "Thil dik lo hi chu thup tumin ṭan han khawh ve ṭhin mah ila, lan chhuah hun a awm châwk a nia, ka u Hmingmuana Court-a a din hunah chuan i hming a ri tel tawh ang, midang nun i tihchhiat man hi nangman i la têl dawn a nia," ka ti a. 

Min chhâng ngam lo reng reng, hnuailam a bih daih a, ka vawnna ka thlah hnuah, "Nun nuamin i lêng rei tawh dawn si lova, i theih lai khân âm takin chên mai rawh, i luck êm kha," ti zui leh salhin ka kalsan ta a.

A kal tur hmel kha a ṭah a chhuah hmel.

Ka sawi ang chiah kha a ni mai, eng mah ni lovin nêp inti viau ṭhin mahila, mipa hrang hrang ka kawp lâwrin Sex ka hmang mai mai lo. U Ngaihzuala a thih khan ka rilru na lutukin khawvel ka pal bawrh bawrh tih a ni mai a, chu pawh a hmaa ka sawi tawh ang fa pakhat tal neih ve ka duh vang a ni pakhat.

Sangtei erawh chutiang chu a ni tlat lo. Ngaihzuala nen an inṭhen fel hnuah pawh inṭhen lo ang maiin a la zar buaiin a la intitatu a, dâwt chiang lutukin an inneih mai tawh tur thu a sawi chamchí bawk a, ka ngaihtuah thui deuh hlek phei chuan Ngaihzuala ina ka kal ṭum a mipa la mutpui miah lo anga min hrilh lai te, kei hi Ngaihzuala'n hmanruaa min hman a tum dan zawng zawng nen a sawi phiar phiar a nih kha, tunah amah avanga natna tuartute an kun tlawk tlawk laia enghelh nei miah lova a tâl ka hmuh khan ka thin a sa ve phat atin ni.

Ka hmel lan dan dur khap chu ka nuin a lo chhiar thiam a ni ngei ang, "Bawihi, thil dik lo dang hriat belh i nei leh em ni?" Tiin min zâwt hial. 

Sangtei ka hmuh thu leh ka ṭawngdan tlângpui ka hrilh thuak thuak a, "Keini nufa chu ṭawng ve ngam tur kan awm lo, tihian boruak a daih hun nghâk ngat ngat ila, nun dan pangngaia kan nun theih hun a la thleng ve mai ang," a ti ta a.

Kan in kan thleng a, mahni room-ah ve ve kan lut nghal a, ka phone ka bih zuaia Ngaihzuala leh Rammuana missed call pakhat ve ve a lo awm a, Ngaihzuala ka call-back hmasa ta zawk a.

"Bawihi, khawiah mah lo chhuak tawh rih suh u aw, pawnlama kal kha a la him rih lo a nia, ka lo hrilh theihnghilh che a," a ti a.

"Inah kan awm," tih chiah ka sawi.

"Police station lamah in kal a ni lawm ni, i u hmuh an phal rih dawn lo a, keiman in hmuh theih dan tur ka lo dap dawn nia, chhuah tam rih loh kha a ṭha ber," a ti leh zung zung a. 

"Office-ah min sawi em?" Tia ka zawh chuan a nui kur kur a, "A va ho ṭhin e, chutianga sawi sawi rual an awm hleinem, bâkah i tihsual ni lovin i u zawk a ni a, nang an sawi vul chûkna chhan tur che a awm lo, zawhna âtthlâk deuh deuh hi nei ṭhin lo la.." a ti dam thluam a.

"Zanriah kan inah lo ei daih rawh.." ka ti teh daih a.

"Â, chu zawng sâwmna pawmawm tak a nih chu, min mamawh tih ka hriat rual hian puih che ka châk ṭhin, ka Rinduhawmi hlatsan hi ka tum lo teh mai a nia," tiin a nui a, Ngaihzuala ngaihawmna chu hei hi a ni reng a ni, a duh hunah min ti thinrim thei a, a hnu lawkah ka hlimna tur a ngaihtuah leh a, ka tan hian a ṭha thlâwt.

Zanriah ei tura kan insawm fel hnuah kan inbiakna kan titawp ta rih a, châk viau lo chungin Rammuanawma ka call-back ve ta tho a.

Aw thâm ṭuak hian, "Bawihi, ka haw lo che a nia aw.." tiin bul a rawn ṭan a, ka thaw chhuak halh ringawt.

"Eng nge i an, damdawi inah ka lo kal ngam ve tawh si lo a," ka ti sep a.

"Hmâ ka sâwn viau mai, Bawihi, ka ti tak tak a nia, ka dinhmunin a zir ngang si lova a hun hmain kan thurûk a irh chhuak a, nu Rami te lam an inbengdai hleithei lo a.." a ti a.

"A nih tur ang a ni zo tawh a, kan tawrh a ngai a nih pawhin kan tuar zel mai ang, mahse, u Ngaihzuala khan min bum reng chungin nupuia neih min tum tlat a, engvang nge? Engkim i hriatpui awm si a," tia ka zawh chuan, "Khalam kha chu nakinah kan sawi dawn nia, i ṭhat leh ṭhat loh hriat ka duh mai chauh a ni, kei chuan i u Hmingmuana kha ka ngaidam thei a nia," a ti nghet charh.

"Ngaihzuala i ringhlel teh ringawt kha a mak ngawt mai," ka lo tih chuan, "A lan dan ang a nih chuan rinhlelh hmasak ber tur a ni alawm, mahse, thil a kal a kal a, kan chhui zau telh telh a, Ngaihzuala a fihlim ta zawk a nih kha, i u Hmingmuana a ni dawn tih hria ila chuan hetiang hian ka chhui lovang.." tia a ṭawng chhuah chuan, "Eng nge i sawi awmzia?" Ka lo ti vat a.

"Hmingmuana'n i u Ngaihzuala a huatna chhan kha thil awm rêng a ni a, ka ṭhianpa kha a dik famkim lo tlat a ni, tuna i hriat aia tam ka la hria pawh a ni mahna.." tia a sawi mek laiin, nurse niawm tak hian, "Muthilh tum rih tawh la...i dam ṭhat hunah phone te chu duhtawkin i la hmang thei dawn alawm," tia nui hak hak chunga a be ri ka hriat chuan ka off zui daih, a polite loh thlâk tih hre tho mah ila ka off tho...a va ho ṭhin e.

Thil dang tih tur em em ka nei lo bawk a, bathroom-ah test kit nen ka lut ta a, ka nih tur lam lam ka niha ka hawi a ngai tawh hrim hrim. 

Ka rin dan ang chiahin ka Lalngaihzuala fa ka pum chhungah a awm tih ka hriat rualin ka mittui ka khap per sak a, ka u hetiang dinhmunah hian ding lo se chuan ka lâwm dawn vei nen, tuna kan awm dan angah hi chuan ka zahna thlen belhtu tur leh mualphona dang ka hmachhawn hmasak leh phawt a ngai dawn tihna.

Test kit-a rin sen pahnih chu ka thlêk vang vang a. 

Zu leh sex-a ka tâlna rah chhuah a ni tih ka hria, hei pawh a bul aṭanga chhui chuan u Ngaihzuala thihnain a nghawng chhuah a ni a, u Ngaihzuala thihna kha ka u vang a ni bawk a, ka u in a thah chhan chu Sangtei a nih rualin u Ngaihzuala a che fair lo tlat atin ni. A inkhaidiat chho vek a, a tawp bera tuartu chu keimah hi ka ni lawi si. Ka la thi ve si lo.

Ka nuin min rawn koh tâk avangin hmanhmawh zet hian ka chhuak a, test kit pawh Ngaihzuala en tir ka tum ve. A nghâkhlel nasa mai si a, lungngaiin hrehawm han ti viau dawn pawh ni ila, ka Lalngaihzuala thlazar hnuaiah ka awm dawn tih ka hriatna hian min thlamuan tlat a ni. 

"I pa thlânah ka kal dawn a, chhunglamah kawngkhar kalh tlat rawh aw.." a ti teh daih a, chhuak rih lo tura ka hrilh pawhin a duh bau lo. "Ṭah bawrh bawrha inbunruah ka duh," a ti deuh tlat.

Ngaihzuala kan inah chaw a ei dawn tih ka sawi chuan, "A ṭhat hlauh chu, a rintlâk tih ka hriaa ka ring sual lovang," inring tawk zet hian a ti a, ka nu nge nge thil a ngaihtuah kim thei phian a nia.

A sawi ang chiahin a chhuah veleh kawngkhar chhunglamah ka kalh nghal a, Ngaihzuala lo thlen hun ka nghâk a ni deuh ber, ka rai thu ka hrilh châk tawh a; a hma ang ngawt kha chuan ka tâl liam mai mai dawn bik lo, ka chhiat hmasak khan rilru nain ka awm a, tun ṭum chu a awm ta sa sa theihtawp chhuah ve ka tum hrim hrim.

Ka nu aiin Ngaihzuala a rawn thleng hmasa a, a rawn luh veleh, "Hma kan sawn tlat, chaw eia min sawm nachâng te i hria a nia," tiin ka dârah min kuah a, "Kan ina chaw ei i châk tih ka hria alawm," ka lo tih chuan, "I bula awm hrim hrim ka châka vawiin pawh i ṭhutna ruak ka hmuh khan ka kim lo tlatin ka hria," tia la nui reng chungin ka chalah a fawp zauh a.

"Ka nu lo haw hmain thil en tîr tur che ka nei," tihpahin ka room lamah ka pawt phei dat dat a, a ngaihna hre vak lo hmel tak hian min en a, min zui lut ve tho.

"Eng tak chu ni ang maw?" A ti ringawt.

Test kit chu a kutah hmehbelin, "I rilru tak tak min hrilh ṭhin a nih chuan i duhthusam pakhat chu a hlawhtling ta," ka ti sap a.

"Bawihi...ka duat.." tiin a mah hnaih thei ang ber hian min kuah hnai a, "Tunah chuan hmun khatah kan awm dun thei ta.." a ti a.

"Maw, kan awm dun ang maw?" Ka lo ti hehaw a, nui suk chung hian, "Nau i pai a nih chuan kan innei ang ka tih kha, i natna te ka natna a nih theih nan leh i hlimna pawh ka ṭawmpui ve theihna tur che in nupaa kan insiam a ngai a, ka thlazar hnuaiah ka enkawl phakah i awm tawh ang," nghet chet chawtin a ti ta a.

"Ngaihzual..." ti chhuak hliaiin a nghawngah ka kuah a, ka kuai kun zui zat bawk, a meng buai nak a, duhthawh taka ka fawh tâkah chuan insiamremin ka kâwngah min kuah a, rei ngial kan infawh hnuah kan inlahrang ve ta chauh a.

"A rang thei ang berin hma ka la ang a, Aizawlah ka chhuk a ngaiin ka ring, ka chhungte thil awmzia ka hrilh a ngai dawn bawk a, ka kutah engkim dah rawh.." tia ka banah vuanin Sitting room-lamah min kâi phei a.

"Kan buaina hi.." ka tih chuan, "Hengte avang hian alawm kan inneih ran a ngaih, sawisep in kai ta sa sa, in mawi lohna hliahkhuha tuam dam turin kei hi in mâkpa ka nih a ngai a, ka duh ang thâla hma ka laka ka inrawlh theih nan i pasal ka nih a ngai bawk, Bawihi...min ring rawh...ka phatsan ngai lovang che..." a ti hmiah.

Ni e, Ka Lalngaihzuala hi chu mipa dik tak a ni a, a mawhphurhna hlen chhuah duh mi a ni. 

"Ka nei ang che," tiin a sawi a, a kâ a âng tawh a nih chuan a sût leh mai mai dawn lo tih ka thinlung hian a hria a, keimah Rinduhawmi hi a zái ngaia ka pên thiam a ngai tawh zawk.

'Ka Lalngaihzuala' tia ka sawi fo theih nan a nupui nih ngei ka tum tur a ni dawn lawm ni? Ani aia thlan tur mipa ka nunah an awm lo.

Nui var var chungin ka melh chho hau a, ani pawhin a mit thim raih chuan min lo melh let ve chiah a, min duhna leh min thlâkthlelhna, phûrna nen lam a mitmenga lang chhuak chungin min  kuah leh ta nge nge e.

Kan buaina leh kan harsatna dah ṭhaa ka nuih theihna chhan chu amah Ngaihzuala hi a ni si a...

B+>[BeckirafARenthleI]<+®