17.DROGMA SEOL [A Becky Rafa Story]

17.DROGMA SEOL

Ziaktu: Becky Rafa Renthlei

[Recap]

'Ka Lalngaihzuala' tia ka sawi fo theih nan a nupui nih ngei ka tum tur a ni dawn lawm ni? Ani aia thlan tur mipa ka nunah an awm lo.

Nui var var chungin ka melh chho hau a, ani pawhin a mit thim raih chuan min lo melh let ve chiah a, min duhna leh min thlâkhlelhna, phûrna nen lam a mitmenga lang chung hian min kuah leh ta nge nge e.

Kan buaina leh kan harsatna dah ṭhaa ka nuih theihna chhan chu amah Ngaihzuala hi a ni si a...

-B®® Stories

Nî a ral a, kâr a liam a, ka u Hmingmuana pawh a thiltih dik loh man tuarin Jail-ah a lut tawh bawk a, amah biakna hun kan nei hlauh a, kan hmel a hmuh veleh hnuailam a bih daih a, a mittui a parawl ṭeuh mai. A zak tih a hriat hliah hliah bawk.

"Mama, engkim a nih tur ang a ni vek tawh a, i rilru tihnual lo la, Pathian bêl tlat ang che, i nau tana ṭha tur i ngaihtuah tih ka hria, kan nufain ngaihtuahawm kan ni lo a nia," dam thlapin ka nuin a ti a, u Hmingmuana chuan, "Nu..." tih bâk a sawi hleithei lova, a hnuk a ulh tlat.

Zawh belh tur leh hriat duh tam tak ka la nei nain inzawh vek sên a ni si lo a, Court-a an kal niah biak theih dan a awm mahna, a nih loh pawhin amah kan tlawh hunte pawh a la awm anga chumi hun chu ka la nghâk theiin ka ring.

Ka nu hnenah ka naupai chungchâng hrilh chi a la ni lova, "Tuna a phurrit phurh hi a rit lutuk êm a, keiniin kan belhchhah leh chuan a hriselna thlengin a tlâkhniam phah thei a; kan ngawih rih a ngai a nih hi, "I u Hmingmuana boruak han dâi deuh sela sawi chhuah hun a awm ve mai ang, tunah a puar zawt zawt dawn hleinem," tiin Ngaihzuala'n a sawi a, ka pawmpui hle.

A hma kha chuan ka hna bansan kha Ngaihzuala hian a phal lo kha a ni a, ka râi tih a hriat hnu hian kal a phal ta lo.

"Mi sawi sep avanga hna bansan kha a ṭûl ber lo a, tlanchhia ang ziazânga awm lah a ṭûl hek lo. Mahse, hetiang i lo nih tâk siah chuan i kal loh a ngai dawn ta a nih hi, a hmain i lo chhiat tawh bawk nen fimkhur a ngai tlat, i mamawh zawng zawng pe vek thei lo che mah ila, ka châwm thei che," a ti hmiah.

Ngaihzuala duh dan ang takin tunkâr tîr khan bânna ka theh lut ta a. Siami leh u Zarin rang lutukin min lo call a, "I tan bân kher eng nge a ṭûlna, thil tisualtu pawh i ni lova, Bawihi, inngaihtuah chiang rawh, hna hmuh a harsat êm hi.." an rawn ti lawm lawm a, a rûk tak chuan ka ui ve reng. Ka dinhmun hian zir îk sela chuan ka la kal ve lâwp lâwp tur a nia.

Ngaihzuala ber hi a tâlbuai titih. Kan inhmuh loh kârah min call sek a, a duh tâwk a sawia kan titi hnuah pawh whatsapp lam aṭangin min chhu zui leh hrâm zel. Min ngaihtuah êm êm a, zantin khêl lovin a lo lêng bawk a, nupa êm ni lo mahila min ngaihsak vet vet tak a ni. 

Ka nu hian a hrethiam lo ang tih ka hlau zâwk. Mipa ti huam huam chi ka lo ni lo hlauh zawk a, hemi vang hian a ngawi mai mai niin ka hria.

Inrinni zan a ni a, Rammuana hnen aṭangin call ka dawng a, "I u in kut min thlâk chungchângah khan kei chuan ka ngaidam thei a, nu Rami te lam an lung a awi thei ngang si lova, Bawihi, dik tak chuan ka khap dai thei hlawl lo a ni," tia a rawn sawi chuan, "Engtia hmalâk nge an tum a?" Tiin ka lo zawt vat a.

"Jail-a a tân bâkah hian ka inenkawlna senso zawng zawng hi tum tîr an tum a, Akimi pawhin ṭûl a tih loh avangin a hnial ve bawk tak nain min bengkhawn duh tlat lo a..." a ti ta a.

"An duh ang chu rawn ti rawh se, kan tihtur a nia lawm, a nachang kan lo hre lo zâwk a ni," awlsam têin ka lo ti a, "Bawihi, i u Ngaihzuala nun dan kha i hre vek tawh tiraw?" A rawn ti teh daih a.

"Hre vek lo, hriat vek pawh ka duh lo, bâkah amah vangin hunkhirh tam tak ka paltlang a ngai a, a tawpa ka hlawh chhuah chu mualpho leh zah, mi hmuhsit a ni mai, chuvangin a hming lam sek pawh ka châk lo..." ka ti bawrh bawrh a, "Ngaihzuala tih hmingpu tho alawm i kawp leh, i duhzawng mipa ka ni ve thei ngang lo em ni?" A tih chuan, "Ni lo a ni ang e.." ka ti tlang hmiah.

A thaw huai a, "Ka duh che tih ka sawi ve ni rawh se, i rilrute i la thlâk theih tâk mialin, i tan ka awm aw..." a tih chuan, "Helam chu duhtawk ang..." ka ti ta zâwk a, Rammuanawma hi a tîra ka lo ngaih ang a sual leh rilru kâwi pu chu a ni bik lo tih ka hria. Pa ṭha tak a nih pawh ka ring.

Rammuana nen kan inbiak dan ka nu ka hrilh leh vek a, "A damdawi in awmna bill kan tum dawn nia, kan tih awm tak pawh a ni, Bawihi, Champhai chhuahsana pêm bo vang vang ka duh ber," hmai tuai puat chung hian a ti a, ka nu meuhin kan khua chhuahsan duhna rilru a pu a nih chuan hrehawm a ti hle tihna a ni mai. Ka pa lu nghahna hmun a ni a, englai maha chhuahsan duh ngai lo tu a ni tlat. Tun hnaia kan thil tawn zet zawng a râpthlâkin a zahthlâk lutuka kan khawvel a tawp a ni hrim mai.

Ka nu bulah erawh chuan, "Rammuana hospital bill pe tur chuan ka va kal ang e, nang chu inah lo awm rawh.." ka ti a, "A zât an rawn sawi tawh em ni?" Tia min zawh chuan, "Amah hmuha zawh ka tum hleinem, bill counter-ah ka chhût tîr mai dawn alawm, hospital a chhuahsan hma ngeia pek fel a ṭha," ka tih chuan a bu nghat nghat a, a mit meng dul raih ka hmuh hian ka khawngaihna a zual ṭhin. Nakin lawkah ka rai thu a hre leh ang a, huphurhawm tîktêk tak a ni.

Chumi hnu chuan ka nuin pawisa fai a kawl ang ang min pe a, a Card min ken tîr bawk a, Rammuana hi private hospital-a awm a nih vangin a bill a tlêm chhe lovang tih hriatsa a ni bawk.

Keima Card ka keng tel bawk a, nei ṭênṭûn lo mahila kan intuamhlawmna tur chu kan nei ve tih ka sawi tawh kha.

Ngaihzuala thil awmzia hrilh ka tum ûk naa office lamah a buai ka rin avangin engmah hrilh lovin ka inkhalh chhuak ta a, a dik a dik chuan mihrang hmêl hmuh hi ka châk viau lo. Min melh dan a dik lo vel vekin ka hriaa nuam ka ti hlawl lo a ni ber e.

Hospital kawtah mi an lo awm nial a, atu amah en lovin bill counter ka pan ding chat a, a lo thâwl phian mai. Ka tih duh leh ka tum dan ka hrilh chuan ner sak chung hian, "Tuna a awm tawhna chin pawh hi a tam riau asin, in pe vek thei dawn em ni?" A lo ti nghat a.

"Han chhût chhin phawt la, kan neih ang ang ka pe rih mai dawn alawm, kan daih loh leh nidangah ka rawn kal leh mai ang," ka ti zawi raih a, min hmuhsit hmel lutuka ka ngei angreng.

Rammuana bill chu ka rin ang chiahin a lo tam tawh a, ka ken sa te chuan a daih teuh lo. Mahse, Card an swipe theih avangin ka nu Card aṭangin ka pe tlâk ta tho va, ka pa pension hi ka nuin a la ka tih tawh kha aw, ka u nena kan hlawh chhetê hi chu Pathian ram tih loh keimahni mamawhah kan hmang ve mai a, mahse; ka nu kan díl ngai lo thung.

Kan intihfel hnuah damdawi in ka chhuahsan leh ta a, Rammuana te lamin an hriat hunah engtin tak ngai ang maw..nu Rami leh lek phei chuan mak a ti nasa khawp ang. 

Scooty-ah ka lawn fel chiah tihin ka phone a rawn ri a, Ngaihzuala a lo ni.

"Lo hawi teh, min hmu em?" A rawn tih tâkah chuan ka hawikual chiam a, ka dinna aṭanga hla lutuk lovah hian mipakhat nen an lo ding dun chu niin! Ka hmu a ni tih a hriat theih nan bân ka phar zeuh a, ani pawh ka lam panin a rawn phei nghal a, phone a off tawh thung.

"Eng nge i tih a helaiah?" tia min zawh chuan dik takin ka chhâng a, ner nawk chung hian, "In chhungkaw thil mah nise i tih tur min hrilh nachâng hre ṭhin rawh, a hrim hrimin tuna bill lo va pêk thawt thawt pawh a ṭul em mawni?" A ti hluk a.

"Ka nu rilru a nuam thei lo a, bâkah ka u vanga hetianga awm hi a ni a, kan tih ngei ngei tur a ni," tiin amah Rammuana ka hmuh loh thu leh bill counter lamah ka tifel tih ka sawi chuan a thaw huai a, "I pum chhunga mi kha ngaihtuah nachang hria la, Scooty khalh ka remti tawh rih lo a nia, a hmaa i awm dan pawh i hriat vek kha, i fimkhur lo ṭhin em mai," a ti a, ka lo ngawi reng ringawt.

"Zanah ka rawn lêng ang, i nu pawh hrilh a hun tain ka hria, chuti lo chu a tîr kual leh che emaw a ni ang a, a nih tur ang hi ni vat teh se," tiin, kan awmna lam pana mipakhat lo phei chu a hui zauh a, "Duhte, nangmahin office-ah va lêt la, Bawihi hi ka'n dah phei lawk ang e," a ti liam puat a, helai hmunah eng nge an tih zawh ka tum hran lo. 

Nui var var chungin Duhtea pawh a kal sawn ve mai bawk a, ani kha kan office-ah a thawhna a la rei lo lutuka mi âi a kal niin ka hria. A hmel ka hrechiang lo pawh kha a áwm reng mai.

A vawikhat nan Ngaihzuala'n Scooty a khalh a, a hnungah ka ṭhu ve ta. A inhmeh ve hlawl lo, "Pawnah chhuah tam loh tur tih ka sawi zin tehlul nen duh aiin i chhuak tam a, miin an sawina che leh i u chungchâng an sawi i hriatin i na leh si," a ti phei bawrh bawrh a, "Chhuak lova awm theih ninghal lo chuan i ti mak lutuk em mai.." thinrim pawh ni chuang lo hian ka ti a.

"A ṭha lam zawng a ni emaw a chhia pawh nisela miin min sawina kan hriat loh hi chuan nat vak ngaihna a awm lo, kan hriat chiah hian min tina ṭhin a, tunhnuah chuan in veng i chhuahsan dawn a nih pawhin min hrilh zêl tawh la ka duh, in dinhmun thlir hian tawh sual tawh palh a hlauhawm a nia, i u Ngaihzuala chhungte hian an ngaidam duh kher lovang che u.." a ti leh zel a, ka lo thaw chhuak hak ringawt.

Kan in kawt kan thleng a, thingpui in tura ka sâwm ngial pawhin a duh lo fithla ṭhak a, "Scooty hi ka keng rih ang aw, office-ah tih tur ka la ngah lutuk.." tiin ka mitah min en vang vang a, "In enkawl ṭha hle ang che, i hmel a dik lo a nia," ti sup chung hian a kal a ni deuh nghal mai.

A tlan liam thleng ka thlir a, ka tana a ṭhatna leh min ngaihsakna zawng zawng ka ngaihtuah lêt hian zah hle tur ka ni. Min hliahkhuh nasa tawh êm asin.

Ka nu hnenah bill chungchâng vel ka sawi a, Rammuana ka hmuh loh thu pawh ka sawi tel nghal bawk a; "Bawihi, i u heti hi a ni ta si a, i pa lu nghahna hmun mah nise kan in leh lo hralh vek ila pêm daih ang hmiang," ngui nghiai chung hian a ti a, ka lo meng phar nasa mai.

"A ang lo lutuk, khawi hmunah pawh awm ila, ka u thiltih sual hi a reh phah dawn lo, helai hmuna kan awm hi a ngai alawm," ka ti ve tlat a.

"Ka nun hi a hah a ni, ka kawchhung thleng hian a dik lo vel vek, ka fapa neihchhunin hetiang thil a ti duh hi ka ngaithiam thei thlâwt lo a ni e," mittui tling pam chunga ti lehin a mit a nuai zauh a.

"Khatiang lam kha chu theihnghilh daih rawh, zaninah Ngaihzuala a lo lêng dawn a, eng emaw sawipui tur che a nei a nia," tia ka sawi veleh rang fahran hian, "Mama chungchâng a nih chuan engmah ka ngaithla duh rih lo a nia," a ti nghat a, "Chutiang lam a ni hleinem, Ngaihzuala nen thil hrilh che kan tum a, ka û chungchâng a ni miah lo a nia," tiin ka hnêm a.

Zaninah hian ka naupai thu ka nu kan hrilh dawn chu a nia, engtin tak ngai ang maw?

A theih ang angin inchhung ka tifai a, u Ngaihzuala nen kan inngaihzawn lai ka ngaihtuah kîr a, khati khawpa min duata min ngaihsak nisi khan a der vek tihna em ni ang? Vawi tam sex min hmanpui tumin a bei a, a hlawhchham zêl a,  a beidawng tihngaihna hre lo hian nupui atan min sâwm ve ringawt a nih te ka ring rum rum tawh. 

Amah avanga ka tawrhna leh ka mittui zozai te, zu leh mipat hmeichhiatna kawnga ka tâl luh dan ka ngaihtuah chhuah phei hi chuan mahni indemna leh u Ngaihzuala demna hlirin ka khat ṭhin. Ka thin a rim hluah hluah ti ila a dik ber ang.

Zanriah eikham hnu lawkah Ngaihzuala a rawn lang ve nghal a, "I Scooty ka rawn dah a, ka haw tur min thlah a ngai leh dawn a nih kha," tiin nui chung hian ṭhuthmun a rem a, ka nu bathroom aṭangin a lo chhuak ve chiah bawk a.

Kan ina a lokal hian ka nu a awm ve chuan kan ṭhu dun ngai meuh lo. Midang hmuh laia induat emaw intih hliau hliau a duh lo tih ka sawi tawh kha. Ngaihzuala danglamna tak pawh a ni a, min thlahlel lo tihna a ni lo a, midang mit tikham zawnga awm hi a duh riau lo.

Ka nu a rawn ṭhu phei a, a hmel en réng réng pawhin a hlim lo tih a hriat hliah hliah a; "Azual, keini nufa tan hi chuan khawhawi ngaihna a vâng teh e, Champhai chhuahsan te hi ka duh rum rum.." tiin a bul aṭang bawkin a ṭan ṭha leh ta. Ka lo ner sak a, ka nu ka melh kâwk a, eng he-huah a ngaih hmel loh.

"Ka pi, i rilru tur ka hrethiam a nia, tuna ka sawi tur pawh hi sawi lova ngawihbopui theih nise ka ti ngawt mai," a ti dam thlup a, ka nu a meng phar âwk mai.

"Mama chungchâng a nih chuan ngaihthlâk loh ka duh zâwk, kan boruak engkim hretu i ni a, a chanchin chhe lam hriat belh hi ka châk hlawl lo a ni e," a ti zawi raih a, kan thil sawi tur pawh sawi chhuah a huphurhawm mang e.

Mahse, Ngaihzuala chuan dam thlap hian, "Hmingmuana chungchâng ni lovin Bawihi nen kan pahnih hian inneih kan duh a, in dinhmun ka hriain ka hmu a, sawi a hun lo tih hre mahila thup hlen theih a nih dawn loh avangin a rang lama hrilh che hi ka tih tur dik tak a ni," nghet charha tiin ka nu meng buai nak chu a thlêk vang vang a, kei erawh thinphu dup dup chungin ka lo ṭhu ngawi reng thung.

"Bawihi a awm loh leh lek phei chuan engtin nge awm se min tih, pasal neih nan a la tlai lo, kum upa pawh a la ni hek lo," a ti a. Ngaihzuala chuan tihian a sawi chhunzawm ta a.

"Innei lo thei dinhmunah kan ding lo atin ni, tunah hian i fanu hian ka fa a pâi mek a..." tia a sawi zawh hmain ka nu a ding hluai a, "Eng a?..Eng thil nge maw in sawi leh tâk le.." thinrim awki vin ṭhaka a tih chuan ka phu zawk a, Ngaihzuala ka va melh vat a, a hmel a thim mâk a, a thutak ngei mai.

"Inbengdai hrâm rawh, i fanu hi ka hmangaih a, ka tum dan chuan mawihnai deuh zawka inneihna buatsaiha dan pangngai ang tala tih ka duh lutuk. Mahse, kan heti ta si a, Hmingmuana boruak hre chung rengin sawi ngei ṭha ka ti bawk si, kan inneih min phalsak la, in tan in chhungkaw tan ka awm dawn alawm, râlkhat aṭanga indawr ai chuan nangmah ngei hrilh che hi ka duh avangin zanin hian ka rawn kal a ni," bahlah chhin eih lo leh inringtawk taka tiin ka nu chiah a en a, ka nu nise a âwm dawm chungin a la ding reng a, mak tihna, awih theih lohna a mitmenga lang dawt zut chu ka hmu reng.

Chutah muangchâng hian a ṭhu thla riai riai a, "Ka fate enkawl kawngah ka hlawhchham a ni, ka hlawhchham let dér a ni," ti sapin a hmai a hup a, nichina a thinrim sa phat ang kha chu hmuh tur a awm tawh lo, a hmai a tuai puat a, ka lam a rawn hawi a, "Bawihi, ka ring tawk che asin le.." a ti leh sap a, a va han hrehawm tak.

"Nu..." ka'n ti dêk dêk a, "In duh ang ang khan awm teh u, ka hah tawh, ka chau a ni, i nu hi nu nih ka lo tling hlawl lo a ni e, pakhat tualthah vangin Jail-ah a tâng a, pakhat lahin sâwn a pai bawk a, i pa kha lo tho leh pawh nise a fate pahnih vang hian rilru nain a thi leh tho ang," a ti chang fak a, a mitmeng a dur khap a, a lawm lo tih a hriat hliah hliah bawk. 

Ngaihzuala a lo inrawlh vat a, "I tan a hrehawm ang tih ka hria, in boruak tawn aṭang ringawt pawhin hriatthiam a harsa dawn tih pawh ka hriatpui che, Bawihi hi nupuiah neih ka duh a, inrûk emaw i thu hmu miah lo leh engmah hrilh lo chea ka duhdan kaltlangpui ka duh loh avangin ka sawi chhuak rêng a ni," a ti dam leh thlup a, ka nu a ṭawng chhunzawm ta rih lo.

Kan ngawi ṭhap a, kan inkawta motor tlan thawm bâk ri dang hriat tur a awm lo. Mittui far fap fap chunga ṭhu ka nu chu ka va melh a, min lo melh lêt ve chiah bawk a, "Thla eng zat nge a nih tawh?" Tiin min zâwt thut a, ka hawihai hmel Ngaihzuala'n a lo hmu hman a ni ang, "Thlakhat a pum âwrh" tiin min lo chhânsak a, ka nu a thaw chhuak halh mai. "Lalngaihzual, ka fanu hi a rai vanga neih tum i ni em?" Tia zawh pahin Ngaihzuala chîk zetin a en a, tun hi Ngaihzuala hmingpum a vawikhat lamna a ni ngei ang. 'Azual' ti hlirin a ko ṭhin.

"Ni lo e, a hma aṭanga ka tum dan a ni a, kan accident hma khan neih duhna rilru ka pu tawh; chuti a nih rualin khatiang harsatna neuh neuh kha kan tawk chho a, i fanu hian ka fa a pai a nih chuan ka thlahthlam dawn lo, ka damchhung hian kalsan tumna ka nei lo," a ti hmiah.

"Bawihi, i u Ngaihzuala thihna a la rei loh tehlul nen ani hi i hmangaih em ni, pasal atan i duh takzet maw?" Tiin min zawt leh a, ka lo bu nghat nghat a, "I nu Rami te hmaizah a va na dawn ve, anni chang ni lo, vantlângin min en dan tur a hniam leh zual dawn a nih hi, dam reng hi eng nge maw a sâwtna le! I u in Jail bang a zûtna pawh kâr tam a la ni lo a, nang lehzelin hmingchhiatna tur i han siam belh hi hriatthiam chi rual a ni lo," tiin a tho chhuak leh a, chhuatah a vei tawn sek a, a thinrimna bengdaih a tum tih ka hriatsak. 

"Bawihi hi neih i phal chuan a rang lamin Aizawlah ka chhuk thla ang a, palai ka rawn tîr ang, kan chêt vat vat loh chuan tun ai hian mualphona a hnai a, in nufa mualphona leh zahna hliahkhuh tur hian i mâkpa ka nih a ngai, Hmingmuana chungchâng ngaihtuaha chhuizui tur pawhin mihrang tan thil theih loh tluk a ni, i fanu pasal ka nih chuan ka tan thiltih a awlsam sawt ang," tiin Ngaihzuala chuan ka nu a hrilh leh a, a rilru hmin ngei a tum a ni ber.

Ka u chungchangah chhuizui vak tur a awm lo tih kan hre ve ve a, mahse, ka nu rilru hnehna tur a nih chuan engpawh a huam tih a sawilanna ni turah ka ngai ve tawp.

"Eng pawh nise Azual, lo va haw phawt la, kan nufain kan lo sawi dun ang a, heti ve mai kan nih tawh hi, naktuk zanah chanchin kan inhrilh dawn nia, Bawihi, Azuala hi a in thleng va thlah rawh," thinrim lo ang maiin ka nu a ṭawng dam leh thlap tawh a, Ngaihzuala ka va melh zauh a, a lo bu nghut ringawt.

Chumi hnu chuan Ngaihzuala in lam panin kan inphur phei a, atu amah kan ṭawng tawh lo. A in luah awmna hi a va hla ve deuh hlek a, kea kal phâk chu nise thlah kher pawh ka tum lo a nia, ka nu mitmei ven a na êm mai.

A in kawt kan thleng a, "Lo pêng kâwi lo mai rawh aw, engtin pawn tiin hau che mahsela thinrimin chhâng lêt reng reng suh ang che, a rilru hah dan tur i hriat vek kha, theihtawp ka chhuah ang a, inneih a phal em em ang, a phal ta ngang lo a nih leh ka ru tawp mai ang che," tiin a kiai suk a, "Rinduhawmi hi chuan min va tihah ve tak, ka ûmzui duan duan reng chu a ni si a," tia nui chhuak hawk hawk chung hian ka biang a tawk zauh a.

"Ka nuih a za ve lo, ka u a awm tawh si lova kan inneih a phal lo maithei a ni, nau ka pai hi chu zak viau mah se a rûkin a lawm ang," ka ti a, a hma aia nasa zawkin a nui leh a, "I han ât zia hi aw, tu nu mah an fanu sâwn pai vangin an nui vur vur lo tawp ang, ka awm ve avangin a thinrimna a bengdai mai chauh a ni, ka sawi ang khan a rilru natna turin eng mah ṭawngka nei suh aw..." a ti leh a.

"Umn...min hau nasa viau ang," ka lo ti ṭha ve mai.

"Naktuk zanah lokal ka tum dawn nia, i nu thutlûkna azirin Aizawl kal ka tumin ka tum lovang," a ti a, tlêm chuan a rilru a buai ve deuhin ka hria.

Ngaihzuala kalsanin kan in lam ka pan a, zanrei a la ni hran lo. Keimah chauha ka nu hmachhawn ka huphurh ngei mai, a duh lohnaah a âng hlâwk ve thei si a, huphurh taktein a nia ka huphurh ni.

Ka rin ang chiahin sitting room-ah ka nu a lo ṭhu a, thingpui hâng a in pah bawk a.

Biak mai dan tur ka'n hriat loh chu le! Ka inthlahrung dâk mai.

"Hetah hian lo ṭhu teh," a ti chang fak a, thuawih deuhin ka ṭhu ve mai bawk a.

"Azuala nen khan inngaihzawnna innei nge in mudun satliah?" Tia min zawh chuan, kan inngaihzawn thu leh a hma pawha inneih a duh thu a sawi tih ka hrilh a.

"Ka rinhlelhna che u a rei tawh a, mahse, i u Ngaihzuala khan i rilru a luah hneh êma ka hriat avangin hetiang thleng thlenga in kal hi ka ring pha lo, i u Hmingmuana pawhin Azuala nena in inkawp a duh loh thu min hrilh tawh a, engvanga Azuala hi duh lo nge a nih hriat sak mah suh ila, i u duh loh mipa hi ka mâkpa atan ka ît vak lo, chhan ṭhatê a awm a ni ngei ang," tiin ka rin loh lutukin min chhâng ta tlat.

"Mama'n a duh loh chhan te chu a thiltih dik loh thup nan Ngaihzuala hi hman a tum a, Rammuana nen chhui dun ang te khan a lang vela ama tih a ni reng si a," ka ti ve ngat a.

"Rinduhawm, i u hian tual a thah tak tak i ring em ni?" Tia min zawh chuan, "Ring e, Rammuana leh Ngaihzuala khan an chhui chhuak tawh tih a hriat vangin Rammuana thah a tum leh a, Ngaihzuala hnaih lo turin vawi tam min hrilh bawk, thah a tum ve te pawh a ni mahna.." ka ti hmak a, ka nu a lo ter at mai.

"Azuala i duh luatah i mitin khua a hmu lo a nih kha, Sangtei leh a nu lokalna pawh thla tam a la nih loh kha maw le, i thluak kha hmang la, a hnuaia thawk satliah hmeichhe pangngai ve mai mai a ngaihven khuchûk che a, i lakah hian eng emaw tak duh a nei a ni." A ti ram hmak a.

Ner nak chung chuan, "A hma kha zawng zawngah pawh ka tana a ṭhat thu leh kan inkawp i phal thu i sawi a, tun hun hi kan thleng a, amah duh lo ang takin i ṭawng leh si, nu...i rilru hi hriatthiam a har e, i be chhe ngai lo a, i duhsak em em bawk a..." ka la ti ṭâlh a.

"Misual a ni ang ka ti hran lo. I u in heti em ema i kawp a duh loh chhan hi eng nge ni ang tih ka ngaihtuah zawk, i u Ngaihzuala thih hnuah lehnghal i hmakhua a ngai dawn lovem ni i u hian, a hmangaih êm che kha.." tih pahin ka ṭhutna lamah a rawn phei a, ngun deuha min en chung hian, "I râi tak tak em?" Tiin min zâwt nawn leh sak a, ka nu mize mak ta lutuk hi ka hriatthiam phâk bâk a ni ta!

"Rai tak tak e, dâwt ka hrilh che i ring deuh em ni?" Ka ti sap a, "Ring chuang lo e.." a ti leh lawi si.

"Bawihi, ngun takin ka thusawi tur hi ngaithla ang che, i rilru i siam theih nan," tihpahin a ṭhut dan a siamrem tê tê a, chutah, min rawn thlêk vang vang phawt a, a mitmeng a fîm ngang mai.

"Azuala nen in inneih ka rem ti dawn lo, tunah i rai tak tak a nih phei chuan pasal neih kher i tân a ṭûl miah lo a nia, i pa pension ringin kan damchhung hian kan khawsa naw naw thei ang, zankhat mitchhin pawh lo tâwk ila tlêm azawng chu i la chang dawn tho tho. Pasal neiha nang leh kei kan inṭhen hran kher hi a ṭûlna ka hre ve miah lo," thutak lutuka a tih chuan mak ka tih êm avangin ka thaw chhuak hak a. 

"Nu...eng nge maw i hriat le?" Ka lo ti hlar a, mitko sán âk chung hian, "I u a awm tawh lova nang leh zel chân che ka duh lo, Lalngaihzuala tih hmingpu hrim hrim hi kan tân ânchhia a nih hi, kan nunah an rawn lang a, chhiatna bâk min thlen lo. Azuala, Lalngaihzuala pawh hi eng teh ual a ni leh chuang lovang, chuvangin kalsan tum la, ṭhen rawh..." zu han ti a, fiamthu mai maia sawi a ni ta hauh lo. 

"A ang lo lutuk, ka fa hi fahraha siam ka tum reng reng lo," ka ti vin ṭhat a, rum deuha min melh chung hian, "Fahrah siam rawh ka ti lo, Rammuana hi i tân a ṭha dawn a nia, i nu Rami te'n i u Hmingmuana an tihdan zawng zawng leh an ngaidam duh lo tih i hriat kha, i naupai lai kha thlakhat chauh a la nih chuan Rammuana i u Ngaihzuala ṭhianpa hmang hian kan bei lêt thei a nia," a tih chuan râpthlâk ti lutukin ka nu ka melh a, ani pawhin chiang takin ka mitah tak min en lêt a.

Pasal neih a phal lo hrim hrim emaw ka ti a, mahse, hmanruaah min hman a tum tih ka hriatna hian min tina a ni. 

"I â tawh a nih kha..." ka ti sap a.

"Ka fapa tân ât a ngai a nih chuan ka â mai ang, kan tan Pathian hi a awm lo tepawh a ni mahna," a la ti tak deuh deuh a, ṭawng ngaihna reng reng ka hre tawh lo.

Hnuailam bihin ka kun tlawk tlawk a, ka nu Pathian ṭih mi leh ṭawngṭai bansan ngai lo mihring hian a fapa vangin sual kawng zawh a thlang a nia, a mak ka ti lutuk.

"Rinduhawm, ka thil sawi zawng zawng kha ka ti mai mai lo a nia, chhungkua kan kima kan dam tlan tluka hlu a awm lo, i rai a nih pawhin i râi a ni ve mai, hei aia mualpho lehna tur dang kan nei tawh chuang lo, Ngaihzuala pawh khan eng atan tak tak a ti chuang lovang che, an dinhmun leh kan dinhmun a inthlau nasa mai si a, nuam pawh i ti nek lovang," duhthawh takin a ti leh bawrh bawrh a, a ṭhutna aṭanga tho chhuak chung hian, "Naktuk zanah a inah va kal la, pasal nei thei i ni rih lo tih hrilh ang che, Rammuana chungchâng leh ka thusawi zawng zawng kha vawikhat pawh i kâ aṭangin a ri chhuak tur a ni lo a nia, ka duh loh dana i kal luia min palzam luih i tum chuan nu i nei tawh lovang," chang belbawla tiin ka chhânna pawh ngaichâng tawh lo hian a room ah a lut ta a.

Kha kha ka nu, min hringtunu chu a ni si a, hun reilote chhunga a mize inthlâk danglam ta vek hi ka u Hmingmuana vang vek a ni.

Ni lo, Seol aṭangin ka tâlchhuak dawn chauh a, a aia hrehawmah keima nu ngeiin min hnuhluh a tum leh si.

"Lalpa, min ṭanpui lul teh..." ka ti chhuak sap a, ka nu ka hmangaih zia chu tupawhin an hria ang chu. Mahse, a thu vaithlâk dan ka rilrem zawng a ni si lo.

Hemi zan zankhua hian chhinkhat mah ka chhing lo. Ka phone takngial pawh ka bih lo va, ka nun hrehawm lutuk hi engtia tih reh chi nge ka hre der bawk si lo.

Ngaihzuala nen kan hma hun tur te kan thlir ve a, ka nuin min dâl ka ring lo reng reng kha a ni a, ka ring sual chiang hle a ni.

Ngaihzuala hnenah engtin nge ka sawi tâk ang, ani ang mipa luhlul leh tihmawh hian a fa a thlahthlam dawn lo tih ka hrechiang nasa mai si. Lehlamah ka nu a lo ni bawk, â...ka thluak a alh chhuak dawnin ka hria.

Zing dar riat velah Rammuana'n min lo call a, hospital bill kan pe tih a hrechhuak ta tih ka hre mai.

"Damdawi in ka chhuahsan veleh inbiak ka duh dawn a nia, tunah chuan bill chungchang engmah sawi ka tum rih lo," a rawn ti ta chiah a, "Eng mah sawi zui ka duh lo a nia," ka ti nghat a, "Kan sawi ang, kan sawi ngei ngei ang," tih leh phone off a rual a, ka thaw a ipik zual.

Ka nu nen inbe miah lovin tûkṭhuan kan kîl a, a hmel a danglam chhin eih lo te hi a mak ka ti tulh tulh!

Ngaihzuala'n min lo call a, office a thlen tawh thu a rawn sawi chuan, "Chaw kan eikham deuh chiah, zaninah hun i neih chuan inbiak kan ngai aw, hun i nei ang em?" Ka ti zuai raih a, ka lungngaihna ka thup thei ngang lo chu a ni e.

"Bawihi, i ṭha em?" A lo ti vat a, ka ṭhat thu ka sawi pawhin, "I âw a dik tlat lo, ka rawn phei ang aw.." a la ti hrâm a.

Ka ṭhat thu leh zan lamah ka muhil ṭha lo tiin ka inpha mar thei hrâm.

"I nu khan eng pawh sawi se, min dâl a tum phawt chuan Lalngaihzuala hi eng ang mipa nge a nih tih a hriat theih nan hma ka la ang, ka ti mai mai lo a nia, a fanu pasal atan ka tling tâwk a ni tih ka lantîr ngei bawk ang," a ti hmiah.

Nizana ka nu nen kan inbiakna ka ngaihtuah kîr a, Ngaihzuala hian chuti maiin min bansan dawn lo tih ka hre ve si. 

A vawihnih nan dam thlâkhlelh lohna ka nei leh ta, ka nu leh ka fa pa nimai turah hian duhthlan a ngai dawn ta chu a nia, ka chung a pik nawn leh e...ka hah...Rinduhawmi hi mi vanduai ka nih hi....

B+>[BeckirafARenthleI]<+®