18.DROGMA SEOL [A Becky Rafa Story]

18.DROGMA SEOL

Ziaktu: Becky Rafa Renthlei

[Recap]

"I nu khan eng pawh sawi se, min dâl a tum phawt chuan Lalngaihzuala hi eng ang mipa nge a ni tih a hriat theih nan hma ka la ang, ka ti mai mai lo a nia, a fanu pasal atan ka tling tâwk a ni tih ka lantîr ngei bawk ang," a ti hmiah.

Nizana ka nu nen kan inbiakna ka ngaihtuah kîr a, Ngaihzuala hian chuti maiin min bansan dawn lo tih ka hre ve si. 

A vawihnih nan dam thlâkhlelh lohna ka nei leh ta, ka nu leh ka fâ pa nimai turah hian duhthlan a ngai dawn ta chu a nia, ka chung a pik nawn leh e...ka hah...Rinduhawmi hi mi vanduai ka nih hi....

-B®® Stories

Nilêngin ka engtih mah a tui lo a, Ngaihzuala nen inṭhen tur anga ka indah chhin pawhin ka mittui a hnai kuar thei nia. 

A tîra ka tum ang leh ka ruahman ang ngawt kha chuan thil a kal thei tawh lo a, thinlung inhawng miah lo tisa inzawmna ringawta kan awm dun lai, zu hmuna kan tâl hun ang te kha chu nise a tih dan dan a awm mahna. Mahse, chutiang ang chu tunah a ni tawh bîk si lova; ka thinlung, ka rilru leh ngaihtuahna a la fai vek a, amah ngaihtuah loh lai ka nei lo ti ila ka sawi sual lovang.

Pasal nei lova fa neih tih vel ka suangtuahna âtthlâk tak mai te kha ka nu hian a hre ru em mawni ka ti hial tawh zawk! 

Khatiang ka ngaihtuah lai khan Ngaihzuala hi ka thlang ta kha a ni a, tunah inngaihzawnna tak tak kan nei ve ta chèng a, ka nu rilru a dang ta hlawk si. Ka nu thusawi ka ngaihtuah chhuah apiangin a thluak a buai a nih ka ring deuh rum rum. 

Khumah ka ṭhu a, khua a thim lek lek tawh a, zaninah hian Ngaihzuala bulah pasal ka neih theih loh tur thu sawi a ngai dâwn ta chu a ni a, ka nu thusawi zawng zawng sawi tel lovin a rilru ka hmin thei dawn em ni? Inṭhen hlen lah ka ngaingam bawk si lo, ka ṭah a chhuak ru et et a, ka nu ka haw hlur tawh bawk. 

Ka room kawngkhar a rawn inhawng a, ka ngaihtuahna luah mêktu ka nu a rawn pên lût ve chiah a, khuma ka ṭhu chu min lo pan a, a hmaa min duatna leh min ngaihsakna mitmeng ang kha hmuh tur a awm tawh lo. A thîp râm a, a fanu hi min haw hluah hluah a ang ber ka ti.

"Zaninah Ngaihzuala i va pan dawn a ni a, inrûk emaw ka duh loh tur ang chi ruahmanna eng mah siampui suh ang che, a nih loh chuan kan in leh lo hralhin Ngaihzuala hmuh phâk lohah kan pêm ang, inzawmna in neih chhung pawh hun rei a la ni lo a, i tan nat ngawih ngawihna tur pawh a awmin ka ring lo," a ti a. 

Chhâng lova ka lo ngawih reng avangin, ka room a melh kual a, la hmu ngai lo niawm tak hian a en chîk em em a, a awm dan han mak zia hi aw..mak ka ti thlâwt.

"A fa hi chuti maiin a thlahthlam duh dawn miah lo a nia," ka ti a.

"Chutianga a ti dawn a nih chuan i naupai kha ka paihsak ang che.." a ti hmak a, kei ka lo sa ve phat thung.

"Ka nu.." ti fiak ṭhak chung hian ka ding chhuak a, kawng dawm âl chungin amah ka hmachhawn a, "Ngaihzuala i hua a nih pawhin ka pum chhunga naute hi chu pawi sawi lo a ni, tihnat tumna i neih vaih chuan fanu i nei tawh bîk lovang," ka ti chang rât a, a ner sawk duh chauh.

"I u Hmingmuana hian thil sual tiin tual a that tak tak thei lovang, a tâl awhna tur thang an kam mai mai a ni. Rammuana pawh kha kut a thlâk ngei tih hriat a ni em ni? Mit a hmutu pakhat mah sawi tur an awm lo, Bawihi, keini nufa phênah hian midang an la awm fo tih ka hria a nia, chuvangin Ngaihzuala bansan la, Rammuana hi hnaih rawh, i bianga bêngtu che Ngaihzuala nute Dini kut thlawn te kha i tuar dam dawn em ni?" Tiin a hmaa thil thleng a sawi chhuak leh a, ka nu hi zaidam angin lang mah se kan hun tawn zawng zawng kha pakhat mah hriat hmaih nei lovin a thinlungah a lo khâwlkhâwm vek tih a hriat mai.

"Ka u chungchângah engmah dik lo a awm lo, i fapa a ni a, thil sual ti ve thei lo turah i dah vangin midang puh i tum a nih kha, ka nu, phuba lâk tih vel ai chuan keini pahnih leh ka fa hmakhua hi ka ngai fe zawk, Ngaihzuala ka neih hi min phalsak la, hma kan sâwn em em ang, hmeichhe pahnih thluak ringawt ai chuan Ngaihzuala thlazar hnuaia kan awm hian kan him ang," nghet charhin ka ti ve zel a. A meng nûr nasa ngang mai.

"Pasal neih pawh chu i va châk awt awt ve, va kal la, luhkhung law law rawh, i nu leh i nuṭa aia i thlan zâwk te chuan ka dâl hauh lovang che, i u Ngaihzuala thih hlimah mihur ang maiin i tâl kual a, Ngaihzuala nen hian in lo awm dun ṭhin tih a hriat reng alawm, kal rawh, Rinduhawm, Lalngaihzuala chu va ûm rawh," a ti hlawih hlawih a, thinrim hmaisen ṭâna min melh nghek hnuah ka room a chhuahsan ta a.

Khatiang êm êma a ṭawng hlâwk kha ka pian leh tun inkârah ka vawikhat hriatna!

Muangchângin ka insiam a, eng ang pawhin ka nu hmin tum mahila tun dinhmunah chuan a theih dawn loh tih ka hrechiang tawh khawp mai. Amah Ngaihzuala hmu phawt ila a chingfel thei turah ngai ang.

Zan dâr riat rîk hma hretin Ngaihzuala in luah ka thleng a, kawngkhar pawh kik buai lovin ka lut tlang pawp a, hnathawh tur a lo inchhawp hnawk leh nuai(h) tawh. Ka thâwm hriain a rawn dâk chhuak a, "Bawihi..." a ti sup a, chîk zetin min en bawk a, a nuam ka ti viau lo.

"I hmel aṭang kha chuan i nu nen in inhau hrep tih a hriat mai, lokal teh ka bulah hian," tiin a bân a rawn lek chhuak a, a hmel dam thlup ka hmuh hian ka ṭah a chhuak ringawt.

"Ngaihzual..." tia kovin ka pan hnai a, dawhkan a nawr tawlh hnuah a malchungah min ṭhut tîr a, "I nu chuan engtin chiah nge a tih che, zêp lova ka hrilh avang khan a lung a awi dawn lo tih ka hria alawm, mahse, ka mawhphurhna hlenchhuak tur chuan ka hrilh ngei a ngai si atin ni.." tiin min kuah hlu hlu a, ka ṭap chhuak ta nge nge e.

Duat takin ka samah a chûl a, rei fê ka ṭah hnuah, "Duhtawk tawh la, i ṭah hian ka lo na ṭhin a nia, ka kutah engkim dah rawh," a ti dam thluam a, kei erawh ṭah chhuak insûm takin ka la inhnît faih faih a, Ngaihzuala kiangah hian ka thlâ a muang ṭhin tih hria se ka nu hian min dang lovang maw le.

"I nu chuan kan inneih a phal lo tihna a nia," a ti a, ka lo bu nghat nghat a.

"Ngaihzual, ka u heti hi a ni tawh si a, kei leh zel ka awm loh chuan ka nu engtin nge a awm ang, chuvang chuan tun rum rumah hi chuan inneih tum lo mai ila, nakinah naute pian hunah tepawh a tihdan a awm maithei asin," tiin ka nu thusawi loh dan angin ka sawi chhuak ta a. 

Ngaihdan ni vak lo tih hriat takin min melh a, "I nu hian a hmâ a sial lutuk a ni, nakinah i pum a rawn lian anga tun aia nasa hian miin an sawiin an diriam ang che u, ka hmangaih êm che avangin i mualpho ka duh lo a, inneih ka ti ta chûk chûk a nih hi..." a ti hniam ruih a, dâwt a sawi lo tih a hmêlah a lang reng mai.

"Ka hria alawm, kan mualpho ta sa sa, duhthlan tur dang ka nei tawh chuang lo a, tihian ka awm ve tawp mai ang," beidawng zeta ka tih chuan min kuah nghet sauh a, "I nuin a phal ngang lo a nih chuan ka ru mai ang che, ṭha taka sawia dila a phal loh a hnu, ka fa leh a nu ka enkawl theihna tur a nih chuan eng pawh ka ti ang, mi tlahlang ka ni lo a, a châwmna tur thawk chhuak thei lo ka ni hek lo, nangmahin i ngama i duh phawt chuan zaninah pawh i haw lo ang," a ti hmiah.

"Aih, ka nu hi ka neih chhun takmeuh meuh a ni tawh a, tunah ka u vangin rilru hah reng rengin hun a hmang a, a kum a tam telh telh bawk si, inneih nan khua a la tlai hleinem.." tiin Ngaihzuala rilru hneh ngei tum hian ka ṭawng a, mit zim san chunga min enin, "A tîra i rilru ang kha i pu leh te hi a ni lo maw?" Tia min zawh thut chuan ka meng phar âk a.

"Kan inhmuh hmasak ber leh kan mut dun hmasak ber kha chuan pasal nei lova fa neih i duhthu i sawi kha, kha tih lai hunah khan a hmasaber a tan damdawi inah an paih sak che a, tihian a bul aṭanga ṭan ṭha lehin kan inkawp zui ta a, nau i han pai tâkah hian kei min mamawh tawh lo a ni ang e," a ti hmuk hmuk a. A lawm lo tih a ṭawng dan aṭangin ka hre ve mai.

"Engmah chutiang ka ngaihtuah lo, kalsan tumna che ka nei lo a, tunah innei rih lo ang ka ti mai chauh a nia, chu pawh ka nu vang a ni e, a rilru dam hun nghâk ila min phalsak em em ang, inṭhen ka duh hleinem," ka lo ti vat a, a hmel ka en a, eng nge a ngaihtuah tih hriat a har hle, a thutak rúna thil dang sawi belh pawh a châkawm viau lo.

"Keiin tunah inneih ka duh alawm, i nu chu vawikhat ka be leh chhin ang, lokal rawh, in inah phei ang," a ti leh tu tu tawh. Kan Lalngaihzuala hi chu a heti tlat zel.

"Ka nu rilru a sak rih êm mai, vawikhat chauh ka thusawi min zawmsak ve rawh, a fanu ka ni a, min hmangaih em em bawk. Mahse, tunah chuan rilru hahna dang a ngah lutuka nawr lo hrâm ang aw, a thu awiha kan ngaihchan phawt chuan min phalsak hun a nei lutuk tlat dawn, min ring rawh, ka ti tak tak..." ngenngawl taka ka tih chuan a ngawi vung vung a, a thinrim tih ka hai hek lo.

Chutah a malchung aṭanga min chhuktîrin, "A nih chuan haw rawh, rei ka nghâk dawn miah lo a nia, ka nuin min boralsan avanga nu koh tur ka neih loh khan hrehawm ka ti ṭhin, chutiang chiah chuan nang pawhin pa koh tur i nei tawh lo a, thihna êm a nih loh chuan kan fa lo la piang tur hian nu leh pa koh tur a nei ngei tur a ni, theihnghilh miah suh.." a ti chang fuk a, a zaidam viau ngai lo naa tuna a ṭawng dan erawh ngaihzam mai mai chi a ni dawn lo tih ka hre ve bawk.

"Chanchin kan inhrilh zel dawn nia, kan inah pawh i duh chuan lokalin lo lêng zêl rawh, ka nu hi misual a ni lo a nia," tiin ka la phat marsak hrâm hrâm a, ka nu ṭawng dan zawng zawng kha a bula sawi chi nihek lo. Ka sawi ngam bawk lova Ngaihzuala te ang tih tawh lama rilru pe tlat ang chi hi chu nawrluih chi an ni lo.

"Bawihi, i bula muta i kianga awm reng hi ka châk ve tawh asin, i duh phawt chuan i nu hi chu i pallui thei tih ka hria, mahse, nghâk tura min duh a nih chuan ka nghâk mai ang che. Rei erawh nghah che ka tum lo a nia, a reng rengah i nu hian tum dang a nei zâwk a ni lo maw?" A ti leh a.

"Engmah chutiang a neih awm pawh ka hre lo, a rilru hahin tun chûk chûka inneih a remti lo nimaiah ka ngai," ka lo ti thuai a, a awih hmel vak loh.

"Inṭhen emaw inbiak duh loh tih vel kha ka rilrem zawng a ni dawn lo a, tunkar chhoah i nu rilru lo hneh ngei tum ang che aw, chuti a nih loh chuan ka sawi ang tak tak khan chêt ka la ang," tia min pawt thovin amah hnaih thei ang berin min kuah a.

"Eng harsatna pawh awm sela thlahthlam che ka tum lo, ka tana i hlutna hre lo khawpa mipa mâwl ka ni lova chutiang chiah chuan i tan ka hlu bawk, chhungte tih vel mai maia buai rual lah ka ni hek lo," ti nghet charh chung hian min kuahna a thlah a, "Vawikhat tal fawp lo chea kaltîr che ka tum miah lo a nia," tih leh min fawh a rual a, ka lo ngai ve tawh bawk nen duhthawh takin kan infawh leh tâk hi.

Ka Lalngaihzuala hi chuan mi hîp theihna mak deuh a nei miau alawm.

Ka nu sawi anga Ngaihzuala ṭhen nghal tum te chu thil theih a ni lo hrim hrim. Hei leh chen amah nen hun harsa kan paltlang dun tawh a; chuti maia min bansan tura tih chi ninghal lo chuan. Âtthlâk lutuk mai.

Ka Scooty dahna thlengin min thlah a, "Inneihna hi awlsam taka buatsaih theih a awm a, harsa deuh hleka tih ngai pawh a awm, nang nena kan awm dun theihna tur a nih chuan eng harsatna pawh awm rawh se, neih che tumin ṭan ka la em em ang tih hi theihnghilh miah suh ang che," ti nawn lehin ka tlân liam hma loh min thlir reng a, ka chhungrila lawmna leh lungawina lo awm hi amah Ngaihzuala vang a ni. Ka ring tâwk êm asin.

Kan in ka thleng a, ka nuin min lo la nghâk reng chu niin!

"I Ngaihzuala te pahnih hi chuan i nunphung an tikhaihlak vek che chu a nih ber hi, mipa tel lova khawsa thei lo ang maiin i tâlkual vel chu a ni si a," a lo ti leh tawh. Ṭawngkam ṭhaa min biak ka phût miah lo nain dêngkhâwng deuh deuha min ṭawngkhum erawh ka thil beisei loh ber a ni.

"Ka nu, eng ati nge tihian i awm tlat a..?" Tih chiah ka sawi.

"Ka fanu pasal tur chu Lalngaihzuala a ni a, ngaihngam tak leh ngaihṭha taka thlah liam ka tum laiin ka fapain a that a, chumi hnu kâr pawh awm hman lovah ka fanu neihchhunin Lalngaihzuala vêk midang fa a pâi leh a, nang pawh hian i u Ngaihzuala kha i lo hmangaih tak tak lo a nih ka ring, rilru pelhê i pu hma êm mai," a ti leh bawrh bawrh a.

Ka chhâng ang nge chhâng lovang tih ka inngaihtuah fê hnuah ka ngawihsan ta zawk a, a Bp te hi a chiang lo leh a ni maithei. Heti em ema ṭawngkam duhtui lo hian tunhmain a la awm ngai lo reng reng a, en liam harsa ka ti bawk.

Ka room-ah ka lut a, min la rawn zui hrâm nia.

"I ṭhen em?" A'n ti nghal tawp a.

Ka thinchhe bawrlawk a chhuak ve ta.

"En teh ka nu, duh duha ṭhena kawp theih mipa a ni rêng rêng lo, ani khan nau a pai lova keimah a ni pâi tu zawk, a chan chhe zawk leh rethei zawk chu keimahni kan ni a, ka u vangin mualpho pherh erhin kan awm tawh hi, sual i chhuah reng chuan chhungkua kan keh darh vek ang," ka ti hlaih hlaih a, min en kar a, min ben a châk hmel khawp mai.

"Rinduhawm, i nu hi zah lo takin min be rêng rêng suh, ka enkawl seilen i nih hi, tun dinhmun i thlen theihna chhan te hi i nu leh pa vang a ni a, min do zawnga i tâl a nih vaih chuan kei aia nasa an awm lovang," thinrim sehchilh nakin a ti a, ka ngawi leh ta nge nge e.

Tûm bûrin room a chhuahsan a, kan inbe ṭha thei rih ngang lo a ni ber.

Kâr tâwp kan hnaih a, Rammuana hospital aṭangin a chhuak tih ka hriat veleh an bill hriat tumin ka call nghal a.

"Bawihi, i nuin a rawn pe vek tawh alawm, in ina lêng tura sâwmna ka dawng bawk a nia," tiin hlim zet hian a rawn nui a.

"Engtikah nge a lokal?" Tia ka zawh chuan nimina a kal thu leh Akimi nen an inkawm thu te a sawi bawrh bawrh a, ka nu hian thil a ti mai mai dawn lo tih ka hriat chhuah phah. 

Nu Rami te lakah phuba la turin min duh a, chuta ṭangkai ber tur chu u Ngaihzuala ṭhianpa Rammuana hi a ni tih hriatsa a ni. An duat hlê tih pawh ka hria a, an fapa ang chiahin an en a, a thlavang pawh an hauh na hle bawk.

"Nia, lo lêng rawh, sawi tur tepawh i nei ve ṭeuh ang chu.." ka ti ta zâwk a, ka nu hian Ngaihzuala a pawm thei rih dawn lova a langah tal Rammuana ka biak ṭhat loh chuan tûk zan ṭha kan nei thei dawn lo tih ka hriat vang a ni pakhat.

Zan lama lo len a tum thu sawiin kan inbiakna ka titawp ta rih a.

Khatia Ngaihzuala in ka chhuahsan zan aṭang khan vawikhat mah min rawn be lo a, zan thum a rawn lang tawh lo bawk. Call chu sawi loh whatsapp-ah pawh min be chuang lova kei pawhin ngai viau mahila biak tumna ka nei rih lo, ka boruak a rit lutuka tuma chîmbuai lohva awm hahdam ka châk ber.

U Hmingmuana pawh kâr thar hian Court-ah a inlan dawn a, ka nu a phî buai leh chung tawh.

"I duh leh kal la, i duh leh kal lo la," te min ti thûl, kei ai thlâwt chuan ka u hi a lo ngaihsakin a lo hmangaih zawk em mawni ka ti hial. Ka ngaihtuah thui duh lo mai pawh a...

"Kan pahnihin kan kal ang chu, ka u pawh ka ngai tawh alawm," tiin ṭhatê hian ka chhâng ta zawk a, a ngawi zui ve mai.

Siamin min lo call ve teh tlat a, "Inpa hi engtikah nge a lo haw dawn?" nui kar kar chungin a ti a, ka bangbo angreng.

"Tu kan pa maw?" Ka ti hâ a.

"Naa, kan boss maw le, Aizawlah a kal alawm, hre lo der vel suh," tiin Ngaihzuala zin thu leh an buai thu a rawn sawi leh a, "A nih chu, a zin tih ka hre lo reng reng.." tia ka chhân pawhin a awih duh dér hleinem.

"Inthup reng te hi i ning ve lo em ni, langtlang teh u..." a la ti hrâm a, ka awm lo hrehawm an tih thu leh an khawhar thute a sawi luam a, rei fê kan inbiak hnuah a dah ve ṭâwk a, ani biak hi chu a heti ziah. Mahse, a hlimawm ṭhin.

Hna ka nei tawh bawk si lo, inchhung tihfel leh eirawngbawl kha ka hna a ni tawh mai a, a ho a nia.

Ka nuin vawk chaw a chhuma kei ka room-ah thawmhnaw thlepin ka awm a, Ngaihzuala hian a zin tur thu min hrilh miah lo hi mak ka ti deuh! Kan inhau pawh a ni si lo a; an ina ka kal khan lungawi chiah lo mah se thinrim viau angin a lang bawk si lo, amahin min rawn be hmasa a nih loh chuan call hmasatu nih ka la tum ta lo fo.

Mahni ngaihtuahna kâwma ka ṭhut ngawih reng lai chuan ka phone a rawn ri leh a, ka Lalngaihzuala a ni.

Phone ka pick veleh, "Bawihi, Duatnu..." a rawn ti hniam ruih a, a aw ka hriat ringawt pawh hian ka chhungrilah chê a awm ṭhin.

Ka hriat tawh sa ni mah se, "Khawiah nge i awm?" Tiin ka zâwt ta tho a.

"Kan inah maw le, Aizawlah ka chhuk lawk a, naktuk hian lo chhoh hman ka tum a, min lo ngai em?" A ti a.

"Ngai leh ngai lo tur che pawhin i zin tih pawh ka hriat siloh," ka lo ti nghat a, a nui huk ringawt.

"I nu khan mâkpa atan min ît mang si lova min hnar theih miah loh dan tur ka rawn ngaihtuah chhuak tawh a nia," tiin a nui kur kur a, "Ngaihzual...fiamthu mood ah ka awm lo," ka lo ti zawi raih a, la nui hawk hawk chung hian, "Ka pain i nu a rawn be dawn a, palai pawh kan lo tîr ang, lo inring ang che u..." a la ti tak deuh deuh lehnghal. 

"Khatiang eng mah lo buaipui rih suh, eng ang pawhin palai vawi 10 pawh lokal sela tun dinhmunah hi chuan ka nuin a rilru a sawhsawn chuang lovang, ka thusawi awih rawh," uar takin ka lo ti a.

"I hlauthawng a nih kha Bawihi, ka tih tur chin ka ti ang a, i nu rilru ka hneh em em ang," a la ti ve zel bawk si.

Rei vak lo kan inbiak leh hnuah phone a off a, naktuk zing hma takah a lo chhuak dawn tih a sawi a, a zin thu min hrilh lo kha titau tur ka nih tehreng nen titau hman pawhin ka khawsa lo a nih ber hi.

Phúr lo zetin zanriah tur ka buatsaih a, ka nu ṭawng lâwng lâwng ri pawh ka hre pha reng. Tunge a biak rin chhin ngaihna ka hre lo a, Ngaihzuala pa nen an inbia tepawh a ni mahna.

Zanriah kan kîl laiin, "Ngaihzuala chu a che rang hle mai, a pain min lo bia a, naktuk zanah palai lokal an tum a nih chu," tiin dam thlap hian a sawi a, ani leh ni lo angin thinrim hmel pawh a pu lo.

"Kan inneih i duh loh takzet chuan i lo hnar thei alawm, nu..i hlimna hi ka duh ber a nia, kei chu min ngaihtuah suh.." ka ti sap a.

A chaw bar ṭhulh ṭhak hian min thlêk a, "Ngaihzuala tih hming hrim hrim hi ka hre ning lutuk, a pa hmai ka zah êm a, damdawi ina i awm chhunga kan tana a ṭhat tawhna te ka ngaihtuah kîr a, thinrima lo chhâwn chi niin ka hre lo," a ti leh lawi si.

"A nih kan inneih chu i phal lo tak tak em ni, Rammuana nei turin min duh zawk amaw?" Ka tilui ve ngat a, a ner sawk ringawt.

"Engah nge maw nau i lo pâi thawt thawt le?" A'n ti leh rih. A rilru a hah tih ka hria a, chhân enah ka en ta lo. Chaw ka bâr mial mial a, a tui leh tui loh pawh ka ngaihtuah lo, ka chhâw chhuih niberin ka hria.

Zanriah eikham reivak lovah Rammuana te unau an rawn lang hlawl a, amah chauhin a lokal dawn emaw ka ti a, Akimi hmel ka nuin a hmuh chuan a nui var var mai.

"Ka rin aiin in lo thleng hma.." tiin ṭhutna tur a kawh hmuh sawk sawk a, nichina a hmel leh tuna a lan dan hi chu inpersan tak a ni ringawt. 

Akimi chuan chîk takin min en tih ka mitsîrin ka hmu ru reng. 

Rammuana nen kan ṭhu duna Akimi leh ka nu an titi bawrh bawrh a, an thusawi ka bengkhawn lem lo.

"Bawihi, i hmêl a va dâng ve?" Tia Rammuana'n min zawh chuan nui lui chung hian, "Ka ṭha reng, tunlai kan boruak tawn vel vang hi a ni ang," ka ti liam puat a.

"I u khan a chanchin chhe lam ka hre tawh tih a hriat zan khan inhmuh a duh thu a rawn sawi a, khatiang rilru a pu ang tih ngaihna hre lovin kan inhmu ta kha a ni a, ka sawi chhuah a hlauh êm avangin min thah a tum ta a nih kha," tiin pehhêl nei map lo hian a sawi tlang hrâwk a, a hmain lo hre thâwi tawh mahila amah Rammuana kâ aṭang ngeia han hriat nawn leh chu a nuam viau lo. Dâwt sawi hmel a pu lova thinrim ang pawhin a lang chuang lo.

"I ngaidam thei lo a nih pawhin Court-a a inlan hunah thudik tak i sawi ka beisei, u Ngaihzuala a thah danah pawh thuhretu i ni a, i kutah a innghat thui hle tih i hriat kha, dâwt ka ngaina lova thudik tak chauh sawi ang che," ka tih chuan a bu nghut a, ka nu a va melh zuk hnuah, "I nu hian i u thiltih sual hi a pawm thei lo tiraw?" tia min zawh chuan, "Aw, a ring phal lo a ni ber mai," ka ti a.

"Ngaihzuala nen inla inkawp em?" Tiin thil dang min zawt daih a, ka lo bu nghat a hmuh chuan, "I hmangaih ka ring lo a, lodge-a in lokal ṭum khan in hmelah induh tawnna ka hmu lo, Bawihi, engvangin nge ani kha i zui tlat!" Tiin min zawt chat a, Rammuana han finzia hi chu aw...

"Ka duha ani pawhin min duh.." tiin ka chhâng a, mitko san âwk chung leh bân vai zauh chung hian, "I u Ngaihzuala thlâktu tur atan i duh vang a ni ang, an hming leh an birthday a inang si a.." a la ti zel a, ka lo thaw hak ringawt.

"Ngaihzuala bansan la, i tan ka awm ang, i u Hmingmuana tan ka ding bawk ang," a ti ta a. Ka nu duhthusam a thleng dik ṭan dawn e.

"Rammuan..." ka ti sap a.

"Ka hriat chin leh ka hmuh chin ka sawi chhuah chuan i u hi a la him thei a nia, chuti a nih rualin ka ṭhianpa erawh chuan thiam loh a chang thung ang, mitthi tawh khin hi a namai lo a nia, finfiahna zawng zawng nen ka din chhuah a ngai dawn bawk," fiah fakin a ti a, min blackmail titih ringawt nia.

"Naktuk zanah Ngaihzuala'n palai a rawn tîr dawn," tiin ka tum loh lutuk hian ka ṭawng chhuak a, hmuh theihin Rammuana hmel a danglam nghal vek.

"Bawihi...inngaihtuah ṭha leh rawh, vawikhat chauh i ngaihtuahna hmang leh rawh.." a ti nghut a.

"An lokal ngei a ngai alawm.." ka ti sap a.

"Eng nge i sawi awmzia?" A ti a.

Chhânna ka pe thei lo, ka rai thu engtin nge ka sawi duh ang ni..âtthlâk lutuk.

Mahse, hepa hi a fing êm a, thil a man thiam leh vek tawh, "Nau i pai tiraw, a fa i pai tiraw?" Tiin min zawt sek sek a, ka ngawi ngal a, min rawn ṭhut hnaih sauh a, "Thla engzat nge a nih tawh?" Tia min zawh chuan 'Thlakhat leh kâr hnih' ka ti ta nge nge e.

Rei fê a ngawih hnuah, "I nu hi lungngaia thlanmuala liam tîr i duh loh chuan i u Hmingmuana sahimna tur leh dam chhunga a tân loh nan ṭan la ta che, kei min nei la, ka ṭhianpa Lalngaihzuala mitthi tawh leh lo nung tawh ngai lo tur hi keiman ka bei mai ang, nu Rami te tan an fapa dik lohna hmuh a harsa dawn a, kei, a ṭhianpa hian ka sawi a nih chuan an pawm em em ang, nithum inngaihtuahna hun ka pe ang che, i nu, i u..an dam tlân nan kei min neih a ngai thung." A tih chuan a â ta emaw tiin ka melh vak a, a lo thutak hle si.

Kil tin ruam tin aṭangin tute pawhin min nawr chêp a nih ber hi. Ka u, ka nu, keimah ka inngaihtuah a, hmingchhe kumkhua tawh tur anga ka inngaihtuahin Rammuana thil sawi hi ṭha ka ti si. Ngaihzuala fa ka pai bawk si, huis...ka thluak a buai leh ṭan ta.

Akimi'n thingpui a lum ve ngial a, a u nen min rawn pêk rualin a nui sak a, he nau hi chu a ngainatawm reuh a nia. A zaidam hmel bawk si.

Rammuana'n topic dang a vawrh ta daih a, ka hna chungchâng leh hna dang zawn leh ka tum em tih vel te kan sawi kâi a, ka phone a rawn ri chhên bawk nen haw vat vat se ka ti. Ngaihzuala missed call vawi thum zet a awm tawh a, Rammuana hriat laia biak ka duh loh vangin ka silent daih.

"Bawihi, ka thusawi kha aw..i naupai kha chu inbahbuai tîr duh suh, keiman ka chingfel thei a nia, i u leh i nu aia pawimawh an awm lo," tiin an haw dawnah min la hrilh hrâm a, chhân enah ka en lo.

Akimi chuan, "U Bawih, in kan luah ve tawh a, lo lêng rawh aw.." tiin a nui var var a, ka 'Aw e' liam vel mai mai.

Champhaiah Rammuana hian Lodge dang a din dawn tih kan sawi tawh kha, in te hial an luah chuan inbenbel ve deuh an tum a ni maithei.

Dârkâr 18 hnuah Ngaihzuala car kan inkawtah a rawn ding dawt a, pawnah puanpho senga ka lo awm lai tak a ni nghe nghe.

Nelawm loh fe hian min rawn pan a, ama inah tlang hmasa lovin a rawn pêng tih hriat reng reng!

"I phone kha eng atan nge i tih?" vîn hlukin a ti a.

"Ngaihzual..." tiin a hming ka lam ri teh ngawt a.

"Khatiang zât zât kha ka rawn call a, eng nge i tih, ngaihṭha taka min awm tîr hi i va hreh ve maw le.." a ti hmuk mai.

"Ka buai lutuka..phone pawh.." tia ka sawi zawh hma hmain, "Eng buaina mah i nei lo, rilru haha min siam i châk a nih kha, ka ngaihtuah zia che pawh i hria, Rinduhawm, ka ngaihtuah che tih i hrechiang lutuka min runluih a nih hi.." tih pahin inchhungah min pawt lût a, vanneihthlâk takin ka nu a awm lo hlauh.

Ka bânah nghet takin a hmer a, "I himna tur leh hlim taka kan awm dun ve theih nan tiin ka hna ṭul kalsanin ka zin a, vawikhat lek min call-back emaw ka phone lo chhân kha a harsa viau em ni?" A ti vin leh hluk hluk a.

"Tihpalh..." ka ti sap a.

"Min chawhbuai hi i châk a nih hi, a tîr aṭang rengin ka nunah i rawn inbarh lût a, min duhna tak tak i nei lo a nih chuan ṭha takin sawi mai ta che, ka dawngsawng thei lutuk alawm," thinrim insûm taka a tih leh chuan, "I hrethiam lo a nih kha, chutiang eng mah ka ti lo.." tiin ka ṭang ve tlat a, min vawnna thlah pah hian, "Bawihi, inneih i châk lovem ni, min kalsan hi i duh zâwk em ni?" A ti ta a. A aw a hniam ruih vei nen biak a châkawm hlawl loh.

"Inneih lam chu sawi ri lo teh ang.." ka ti teh ngawt a, a lo ner sawk a.

"Zaninah palai ka rawn tîr dawn, i nu lo hrilh ang che," a ti leh tawp ringawt.

"A remti chuang lovang," ka ti a, "A rem tih loh leh ka ru chhuak che anga a ni mai, sawi buai theih vak a nei lo, a chhe ber thlen i ngam chuan ka inhuam thui ve tho," tih pahin min nam det a, amah a ding sawn nghal bawk.

"Va haw phawt teh, ka nuin a hmuh hma che hian," tia ka sawi lai mêkin kawngkhar a rawn inhawng ta a, Rammuana leh ka nu hmel ka hmu zui zat bawk.

Keini pahnih ding dun min hmuh chuan ṭawng mai nachâng an hre bik lo a ni ang, min en reng ringawt a. 

Ka nu a harhchhuak hmasaah ṭangin, "Azual... i lo léng elaw?" A ti dam leh thlap tawh.

"Ka pi, zaninah palai an rawn lang dawn a, i lo awm ngei ka beisei," tiin kawngkhar lam a pan a, Rammuana a kalpelh dawn laia a hmel kha a ngainat awm viau loh.

"Rinduhawm, ani kha kan inah pawh rawn dâk tawh suh se aw...tiin Ngaihzuala chhuah hnuah ka nu a ṭawng a, Rammuana a awm ve avangin a hrehawm ka ti hle.

Ngaihzuala chuan palai an lokal tur thu ka nu a hrilh ta kha a ni a, eng tak ang ang i maw...

Lalngaihzuala leh Rammuana te pahnih inkârah ka ding ta, thlan tur a vang em mai. 

Ka chhungkaw himna nge hlu ang ka Lalngaihzuala!?

B+>[BeckirafARenthleI]<+®