19.DROGMA SEOL [A Becky Rafa Story]

19.DROGMA SEOL

Ziaktu: Becky Rafa Renthlei

[Recap]

"Ka pi, zaninah palâi an rawn lang dawn a, i lo awm ngei ka beisei," tiin kawngkhar lam a pan a, Rammuana a kalpelh dawn laia a hmel kha chang ṭha tak a ni. 

"Rinduhawm, ani kha kan inah pawh rawn dâk tawh suh se aw," tiin Ngaihzuala chhuah hnuah ka nu a ṭawng a, Rammuana a awm ve avangin a hrehawm ka ti hle.

Ngaihzuala chuan palai an lokal tur thu ka nu a hrilh ta kha a ni a, eng tak ang ang i maw...

Lalngaihzuala leh Rammuana te pahnih inkârah ka ding ta, thlan tur a vang em mai. 

Ka chhungkaw himna nge hlu ang ka Ngaihzuala!?

-B®® Stories

Mihring hi kan lo mak khawp a, kan hamṭhatna tur leh kan tana hlâwkna turah chuan pawisak hi kan nei tlêm khawp mai. 

Ka nu ngei pawh a bâng chuang lova a fapa sualna hmu thei lêk lovin midang bûrbun a tum tlat a, chutih rualin kan chhungkaw hmai a fai theih nan a fanu hmanruaah min hman a tum bawk a, ka naupai lai hian a nunah hmun a chang ve îk lo em maw ni? Mak ka ti lo thei lo.

Inkhawm leh ṭawngṭai a bansan hek lo. Zantin deuh thaw a room-ah a ṭawngṭai ve ziah tho si a, kei misual hriat thiam theih chi hi a ni lo rêng rêng. Kei erawh a ṭha lo lam kawng ka zawhin ka kal puat puat a, ṭawngṭai mi ka sawiselna ni lo se, keima nu ngei a nih tlat avanga sawi chhuak ngam ka ni.

Ngaihzuala lo sawi tawh ang ngeiin palâi hmêl kan hmu ta a, Aizawl lama an hnaivai an rawn tîr dawn emaw ka ti a, chutiang ni ta lo chuan Champhai lama Ngaihzuala pa ṭhiante pahnih an lokal a, ka tan lo ṭhut ve reng a mawi si lova ka inthiarfihlim ta rih. An ṭawng hre phaa awm erawh ka tum tlat a, ka u Mama khumah ka ṭhu rân a, an ṭawng ri pawh a hriat theih viau.

"Bawihi chiah hi ka neih chhun a ni tawh a, pasal min neihsan daih chuan ka awm thei lo ang, kum upa lam ka lo ni tawh bawk nen eng pawh nise tun dinhmun atan hi chuan a rem lo ni mai teh se," tia ka nu ṭawng dam thlap ka hriat chuan kut ka lo hûm ruh ngat ngat a.

Palai pakhat zawk chuan, "Chutiangah harsatna tur a awm dawn em ni, Ngaihzuala hnathawhna hmun a ni a, mi in luaha khawsa a ni thova nangmah chauh chuan a awm tîr hauh lovang che, a neitu tur berte an induha an inhmangaih te chuan lo dan emaw lo dâl kha thil tihchi a nih ka va ring lo e, kan fate hian thil ṭha lo leh mualphona dang min thlen zawk ang tih pawh a hlauhawm," tiin ka nu chu dam zet hian a chhâng a, ka va han inrawlh châk tak.

"Eng pawh nise tun dinhmun atan chuan pasal neih ka remti lo ni mai teh se," ka nuin a ti deuh tawl a, Ngaihzuala palaite tan pawh sawi leh tur a awm lo reng reng. Innawr luih chi a ni lo tih an hrethiam a, kan Lalngaihzuala'n a hriat hunah engtin tak ngai ang maw!

A nihna takah chuan ka râi avang leh ka remtihnaa palai hi lokal an nihna chen a awm ve a, hmeichhe lam thuhmu hmasa lova kal ngawt thu awm bîk hek suh. Ka lo ngaihtuah danah chuan palai hmel te ka nuin a hmuh chuan a rilru a dang deuha rinna te ka nei ve a nia, chuvangin Ngaihzuala'n palai tirh a sawi chhên pawh khan ka hnial fithla ṭhak bik lo. Mahse, mumang ang lek a ni ta. 

Ka nu rilru a sak êm a, keimah hi a hmanruaah min hman a tum nghet bur tawh tih ka hriatna hian min tina lo thei lo.

Zan dâr 10 velah ka u room aṭangin ka chhuak phei a, ṭhutthlengah ngawi reng hian ka nu a lo ṭhu a, ka thâwm a hria a nih pawhin a rawn dâk chhuak lo hrim hrim. 

Keimah zawkin ka be hmasa ta a. 

"Chuti em ema Ngaihzuala nena kan inneih i remti lo a nih chuan ka nei lui lovang, amaherawh chu, Rammuanawma min hmehbel tum tawh lo la, ka pum chhunga naute hi Ngaihzuala fa a nih ang ngeiin mipa dang lakah inhnamhnawih tumna ka nei lo," thinrim awki hniam raihin ka ti a, muangchâng hian a rawn dâk chhuak a, ka mitah min en chat bawk.

"Ka sawi ang zelin i awm ang, ka thu i hniala min kalh zawnga i awm lui a nih chuan he in chhungah hian i tân hmun a awm lo a nia, rilru hahna leh zahna bâk min thlen lo a, vawikhat tê chauh ka thu zawm harsa i ti a nih chuan i duh danin kal ang che, Hmingmuana nau i nihna hi engtikah mah i nâwt reh thei dawn lo a, i u thilsual tih hian a umzui zel zâwk ang che," mar pâta tiin a tho chhuak a. 

"Ka fate pahnih vang hian nat nawn ka tum tawh miah lo a nia," ti nawn leh ngatin a room lam a pan nghal a, a mize ngêng ngalh leh induhtâwk tak hi engtik aṭanga a neih nge ka hre lo, a inrintawk hmel nasa mai si a, hmâna ka nu ka hriat ṭhin nen khan inanna pakhat mah an nei tawh lo. A inthlâk hlawk a ni ber mai.

Rilru hah nuam lo takin ka room ka pan ve ta a, Ngaihzuala palaite khan amah an hrilh tawh ngeiin ka ring a, call emaw message tala min rawn biak ka rin tehreng nen a reh zui vang vang a. A thin a rim viauin ka ring bawk, ka nu lo chhân dan teh tawl kha a dawnsawn a nuam viauin ka ring lo.

Khumah ka ṭhu vang vang a, ka pum la puar miah lo chu ka chûl a, "Ka tuh rah sengin natnain min tlâkbuak mêk chu a ni si a, he leia ka neihchhun ka nu thu hnial ka hreh bawk si.." tia ka inngaihtuah neuh neuh laiin ka phone a rawn ri a, rang lutukin ka ban nghal a, Ngaihzuala a lo ni ngei e.

"Hello..." ka tih rual rualin, "Min neih hi i tum tak tak nge tak tak lo, min duhna leh min hmangaihna i nei tak tak em?" A rawn ti ram hmuk a.

"Ngaihzual..." tia a hming ka lam ri hman ṭâwk tihah...

"Bawihi, vawi tam i bulah hian ka sawi tawh, neih ngei che ka tuma ka bei bawk a, i naupai chungchângah i nu a lawm lovang tih ka hria, pallui ve ngam tur chu i ni maw le, min hmangaih tak taka chendun i duh a nih chuan a fanu i nih tlat avangin a haw kumkhua lovang che," a rawn ti a. Thil awmzia dik tak ka hrilh ngam der si lo, a va hahthlâk tak.

"Min hrethiam mai rawh, min nghâk thei a nih loh chuan tun dinhmunah pasal ka neih a rem lo a ni e, kan hman liam zawng zawng ngaihtuah kîr la, ka nu rilru natna siam belh emaw a phal lo chunga kal luih ka tum ta lo, hun te han ral deuh sela kan inkar hi chu kan chingfel ṭha dawn nia," tiin dam thlap hian ka chhâng a, a thaw ri hrawih a, ṭawngkam khat mah chhâk chhuak tawh lovin phone a off zui daih. Call nawn ka tum lem lo bawk.

Hemi zan hian ka muhil tlem khawp mai. Ngaihzuala ka ngai em em a, Seol dai duna engkim tidun kan nih tawh avang leh tisaa inzawmna nghet tak kan neih tawh avang te hian ṭhen a harsa dawn tih ka hmu lâwk vek a, ka tan mipa hmasaber a nih tlat avangin kalsan ka huphurh em em bawk, a duh dan anga inrûk pawh ka duh rum rum hial! Mahse, ngaihtuahna fîm zawk ka hmanin a ni thei ngang si lo.

Zan lamah ka mut tlem êm avangin a tûk zingah pawh ka harh tlai hle a, ka men chhuah rualin phone ka ban nghal a, Ngaihzuala missed call awm lovin Rammuanawma deuh vek a ni!

Ni thum chhung hun min pe kha a ni a, Inneih lam a sawi lo nain amah nen inkawp tur ang khan min blackmail ti ila a dik ber ang.

Rang takin ka call-back vat a, vawi hnih a ring zawh dâwn lamah min lo chhâng ve hrâm.

"I va han mu tui awm tluk tluk ve.." tiin enghelh nei lo zet hian a nui hawk hawk a, zan lamah ka mut ṭhat loh thu ka sawi chuan, "I Ngaihzuala palaite chu an va beidawng awm ve," a rawn ti a.

"Eng nge hriat i neih?" Tia ka zawh lêt chuan zing lamah ka nu nen an inbiak thu zêp awm lovin a rawn sawi vek a, "I u Hmingmuana kumkhuaa a tân i duh loh chuan i thluak kha hmang mai rawh, Ngaihzuala fa kha titla turin ka ti lo che a, ngun taka ka ngaihtuah vek hnuah ka fa angin ka pawm thei ang, i tan hian ka inhuam thui teh mai a nia, i rin phâkbâkin a nia kal thui ka huam," a ti leh a, mak ka ti lutuk tlat.

"Phone-a sawi chi pawh a nih loh hi, nangmah lokal la hmaichhanah kan sawi dawn nia," ka ti ta a, a lo 'Aw' rang kher mai.

Ni e, ka hawina lam lamah ka hawi a ngai tawh a, Ngaihzuala hmangaihin duh mahila ka chhungkua an dam tlan a ngai si. Rammuana ngaihzawng anga va ena va duh lam ka tinzawn lo a, ka unaupa neihchhunin a dam chhung hun jail-a a hman ral ai chuan leh ka nu rilru hliam na taka a awm ai chuan kei hian ṭangkaina emaw tih theih ka nei ve a nih chuan huaisen takin ka pên chhuah mai a ngai dawn a ni.

Ngaihzuala thinrim rilru na tur erawh ka ngaihtuah ngam lo thung.

Tûkṭhuan ei turin ka tho chhuak a, ka nu vawk in tifai chu ka thlêk vang vang a, ka lainat thar thut. A hmain ka khawngaih lo e tihna a ni lo a, a kum a tam chho telh telh a, ka pa a sûn hnuah a fate pahnih vangin lungngaiin a kun leh a, a hlimna tur leh amah dik tak kha a nih leh theih nan Seol kawtchhuah chu ka tem leh poh a ni ang chu.

Ka inthun puar ve luklak a, raino luak chhuak leh thil huat engmah ka la nei lo bawk a, ka rin ai chuan ka ei tam ta tho.

Rammuana lo luh laiin ka lo insu a, tlangnêl tak hian bathroom-ah a rawn lut tlang a, "Ka lo pui ang che, indim tur i ni asin," tih pahin ka dârah a rawn vuana ka lo phu zuk a. 

"Lo awm hahdam rawh, a tihdan tur te chu ka hre ve lutuk a nia," tiin Machine-a thawmhnaw chu phawrhin a tleuh zui nghal a, kekawr bul var leh shirt dum a rawn inbel a, a lan dan holam zet chu ngaipawimawh ang pawhin a lang chuang lo.

"Ka ti ve thei," ka ti tak naa a che zung zung a, kâr lovah 'spin' theihin a dah vek a, ka bâna vuan chung hian, "Bawihi, intih fel emaw in lâk mark ṭhat ka tum vang a ni lo a nia, i bula awm hrim hrim ka châk a, vawiin chu nilêngin ka lo awm ang che," a la ti tak deuh deuh a, huatah pawh châng lovin ka lo nui ve tawp.

Chutia Rammuana nen kan lo awm dun lai chuan ka nu a rawn lang a, kan pahniha min melh tawn sek hnuah, "Nangni pahnih chu eng nge in lo tih a?" Tih pahin a kut a sil a, Rammuana chuan, "Bawihi hian min insûk pui rawh a ti deuh tlat a," tiin a nui ṭhâ a, a hmel hi chu a ngaihawm ve chiang alawm, mahse, 'ka Lalngaihzuala a tluk chuang lo.' Tiin ka lo ngaihtuah leh hmanhmawh pek a.

Lunch tur kan buatsaih dun leh a, ka nu pawh inbual faisarin kan bulah a rawn ṭhu ve a, kan che vel min en uluk hle, ka hre lo der hmak thung.

Chawhnu dár hnih velah ka mut a chhuak selh selh a, Rammuana hnenah reilote mut lawk ka duh thu ka hrilh a, "I nu nen kan lo inkâwm ang, va mu hahdam rawh," a ti liam puat a, ka room lamah ka phei a ni deuh nghal mai.

Phone ka bih zuai a, Ngaihzuala a reh vung vung a, nizan lama kan inbiak dan a fuh tawk loh avangin biak hmasak loh hrâm ka tum a, ka mut han chhuah dan em em hi, a mak zâwk.

Zawi supa mipa ṭawng ri ka hria a, mit nuai nawk nawk chung hian ka ṭhu chhuak a, ka mut chhuak a la reh hleithei lo. 

Ka hawikuala ka awmna hmun avang chuan maktiin ka meng deuh kâwk a, ka khumah khan ka mu ngei tih ka hria; tuna ka mutna room leh khum hi chu nidanga ka la hmuh ngai reng reng loh a ni a, a zîm nain a fai thar sur thung.

Ṭawng ri ka hriatna lam panin ka kal phei a, ka lu a rit lûk bâkah ka taksa a chhah rit churhin ka hre bawk.

Choka zîmtêah ka va chhuak phei a, tukverh bula ding chu ka rin loh lutukin Rammuanawma a ni tlat! Phone hmangin a la ṭawng ngar ngar a, ka chhuak phei tih a hre lo a ni ngei ang.

"Nia, i ruahmanna anga a kal dik a nih chuan engkim a fel duak mai ang, i fanu hi kei chuan ka duhin ka hmangaih a, tih nat emaw midangin an tih nat pawh ka phal hek lo, Lalngaihzuala chuan eng pawh sawi sela ka inrawlhna tur a ni lo a nia, nangma chinfel atan ka dah tih i hriat ka ring," tia a ṭawng chu ka ngaithla reng a, ka nu ruahmannain maw helai hmunah hian ka awm. A va mak ngai dawn ve!

Ka khuh kharh a, Rammuana a rawn inher zawk a, rum lutuk hian ka lo melh teh ngawt a, kiai suk chungin phone a off a, ka lam a rawn pan lai chuan zâm hmel leh inthiam lo hmel reng reng a pu lo. 

"I lo harh tawh a.." a ti duh chauh.

"Engvangin nge helai hmunah hian min hruai, khawi hmun nge, ka lakah eng nge tih in tum?" Tiin thinrim tak hian ka vin ṭhat ṭhat a, ka bânpuama min lo hmer pahin, "I lakah rilru chhia pakhat mah ka pu lo, ka kut hmâwr pawhin ka tawk lo che," a ti sup a.

Chutia a sawi lai chuan ka bânpuama min hmerna a kut chu ka en zauh a, rang takin min thlah thuai a, nelawmna tel miah lo hian, "I tan duhthlanna siam a harsa a, Ngaihzuala fa i pai a, i u i ngaihtuah bawk si, tuilâi rapa dah reng che ai chuan tihian ka hnenah i awm rih dawn a ni, Ngaihzuala chuan kan inru emaw a ti ang," tiin a nui lui deuh a, min nuihsawh hmel erawh a pu hran lo.

"I â tawh a nih hi, hetiang ruahmanna âtthlâk lutuk hi engtia siam thei nge maw in nih le, min hruai haw vat la a ni mai," thinrim hmai sen ṭâna ka tih chuan, "I nu duhdan a ni a, i mit a men chhung kha chuan i duh dawn lo tih a hriat avangin i thingpui in turah muthilhna damdawi tlem tê a telh a nih kha, zêp buai kher ka tum lo a nia, a nihna takah chuan dârkâr li bâk i muhil lo hrim hrim," tia a sawi chuan Sana ka lo bih vat a, dâwt a sawi lo tih pawh ka hre nghal.

"Rammuan, hetiang zawng khera Ngaihzuala rilru tihnat ka duh lo, khawngaihin min hruai haw rawh, ṭha takin ka ṭhen thei reng alawm," dam deuh zawk hian ka ti a. 

"Ni lo e, Ngaihzuala sawn inrûk mai pawh a pawisa lo tih ka hria alawm, i nu hi han en la, ani inrûk tir ta la, mahni nunna hlut zo lova a awm tepawh i hlau lovem ni, kei chuan nunna ka hlut êm avangin i nu leh i u an dam theih nan nang hi ka hnaih che a ni. Hmeichhe dang hmu zo lo ka ni bîk miah lo a nia," zawi sup hian a ti a, hei hi chu a sawi dik ang ka ring. 

A luck dawn vei nen kei min buaipui tlat hi âtna thlarau sual a dawng a tih loh theih loh.

"Eng pawh nise zan a rei hmain min hruai haw phawt mai teh," tiin pawnlam ka thlir a, khua a thim chhulh tawh a, chhuna kan thil ei bâk kha eng mah ka ei tawh loh avangin ka pum a ri rak rak reng a, helai hmunah hian dârkâr engzat chiah nge ka mut bo tih pawh ka chhut thiam lo.

"Ni hnih leh zan hnih a liam hnuah kan haw chauh ang, chu chu i nu duhdan a ni a, Ngaihzuala beidawn nan leh a fa hi a ta hauh hlur lohna turin mipa dang kiangah i awm a nih ber hi, ka sawi tawh ang khan ka kut hmawr pawhin ka khawih lovang che, mipat hmeichhiatna lamah hian ka fihlim teh mai a nia," a ti deuh kher a, chhân enah pawh ka en lo.

Nichina ka mutna khumah khan ka lêt phei leh a, ka phone ka zawn ngial pawhin ka hmu zo ngang si lo a Rammuana ka zâwt ta a.

"Ngaihzuala leh i nu bâk tu vak mah i be ngai chuang hleinem, helai hmuna kan inkhung hran chhung hi chuan i phone hman inbeisei suh, ka kawl rih ang," a ti hmuk a.

Vîn lutukin, "Rammuanawm.." ka lo ti ṭhak a, a nui suk ringawt.

"I thinrimna bengdai la, i tana ṭha tur ngaihtuaha duhtu i nu ti beidawng suh, ka duh chea mualpho huamin i nu thu ka hnial bik lo. A nihna takah chuan i u in thah min tum tih vantlâng hriat a ni a, chuti chung chuan Rinduhawmi te chhungkua venhim ka la tum a nia, ka fel zawk ngawt alawm le.." a tih chuan ka lo ner nasa mai.

A thinrim duh si lo a, ṭawngkam dam leh ṭha takin min chhâng zêl bawk si. Chuta kârah ka nu ruahmanna a la ni zui a, ka tan sawi tur hi a vâng êm asin.

Ngaihzuala'n Rammuana nen kan awm dun tih a hriat hun chuan engtin tak ngai ang maw, a fa hi midang fa ni turin a phal dawn lo tih hriatsa a ni a, a lêt leh tur ka tuar zo dawn em ni? 

Ka Lalngaihzuala rilru na hmel tur ka ngaihtuah zâwng ringawt pawhin ka thinlung a na ngawih ngawih thei. Inṭhenna fel fai tal nei ila a zia tur hi a ni a. 

Khumah ka ṭhu rènrâwn a, Rammuana choka lamah a che rak rak bawk a, chhuah luih emaw nawr luih tumna ka nei hran lo. A chhan chu tlanchhuakin haw ringawt pawh ni ila, kan inah ka nu ka hmachhawn leh dawn tho. Ngaihzuala pan dawn ila min lo pawm lo thei bawk. Chuvangin hrehawmna paltlang tur leh a nih nih ni tura rilru ka siam mai a ngai tawh a ni.

Tlai zetah zanriah kan ei a, kan awmna lai hi Champhai khaw chhung tho niin, Rammuana ṭhianpa in a lo ni a, Hotel emaw ka ti ve ringawt a, a lo ni awzâwng lo. 

Khatia ka chhun mu kha ka nu nen Rammuana motor-ah min dah lut a, muhil satliah ka ni lova damdawi hmanga tih mut ka nih miau avangin an duh ang angin min sawp tihna a ni ber mai. 

Helai hmun thleng hian ka nu pawh a kal ve vek a, Taxi-in Rammuana'n a haw tîr ta niawm tak a ni. Mahni fanu rai lai mipa dang bula dah ngam tu hi eng ang nu chiah nge maw a lo nih le, a râpthlâk ka ti lutuk tlat. Ruahmanna fel fai tak an nei dun tih a hriat vek a, kei, ngaihtuahna hmang zau lo tak mai hian rinhlelhna chhetê mah ka nei si lo, ka lo mâwl êm a ni.

Inbe miah lovin kan ei mial mial a, ka rilruah eng dang mah a lut thei lo, Ngaihzuala'n a hriat chhuah huna a awm dan tur mawlh ka lo ngaihtuah a, ka kawchhung a dik hleithei lo, ka nuin inneih phal lo pawh nise kawng dang a dap dâwn tih ka hria a, tunah chuan atan pawm tlâk ka awm tawh lova, eng ang pawhin insawifiah mah ila min awihsak kher lo bawk ang.

"I lu bûr aṭang khan Ngaihzuala paih chhuak tawh rawh.." tih pahin Rammuana a tho tharh a, "Ka thu thu, ka taksa hetah awm mah se ka thinlung neitu chu amah chiah a ni," ka ti ve sak a, a meng dur khup mai.

"Bawihi, ka ti tak tak a nia, ani hnaihah saw chuan awm lo la ka duh, ka thîk vang nilovin i nuin mâkpa atan a duh ngang si lova hriatthiam tum zawk la a ṭhain ka hria," dam thlupin a ti leh a.

"I thik vang a nih kha..." ka lo ti nghauh a.

"Ka thik lo.." a ti leh a, a ngaihdan a nih tawh loh hmel hle.

Ring deuh hian, "Rammuanawm, Lalngaihzuala i thîk aw.." ka ti vîn vak a, ka bulah a rawn kal hnai a, "I han chimawm zia hi aw, hei hi chu i hlawh chhuah liau liau a ni," tihpahin ka inrin hman hma hian ka hmuiah a rawn fawp a, ka duh lo tâlkual vel chu engah mah a ngai teuh lo, ka kut pahnih a hmer kawp a, na zetin min fâwp tâwk a, min thlah zui vat a, a mitmeng a thim ruih a, a thin a rim tih hrilh hranpa ka ngai lo.

Rammuanawma thin tertek ka kâi chhuak a ni ber e.

"Vawikhat pawh kha ti ang khan min han ti leh teh, Rinduhawmi nasatzia i hre mai ang," tihpahin ka kut hnunglam hian ka hmui ka hru puat a, a meng rum sawt.

"Khum dang a awm chuang lova, mut bu dang a awm lo bawk a, khum khatah kan mutdun ngei a ngai ang, khatiang thil kha a thlen nawn leh i duh loh chuan min cho chhuak tawh suh," ti nghut chung hian choka a chhuahsan a, ka thinrimna bengdaih tumin thaw ka lo la ve nasa. Ka tâwt up up a ni e.

Phone khawih tur a awm bawk si lo, TV en tur a awm hek lo. Chokaa ṭhutthleng sei pakhatah ka ṭhu ngawih ngawih a, Rammuana hmel ka hmu nawn tawh lo, inbual fai tur takngial pawhin ka thawmhnaw a awmin ka hre bawk si lo a, engkim hi ka kham hluah hluah.

"Kha, i duh chuan i intifai thei ang," tiin ka ṭhutna sîrah towel leh underware leh bra, ka pyjama nen lam a rawn theh thla a, ka makti hmel a hmuh chuan, "I nuin engkim a dahsak vek che, ka tih a ni lo," tih chiah a sawi.

Ngawi rengin towel leh ka mamawh tur a lo dah chu ka ban a, bathroom lam ka pan ta a. Ka nun dan han hrehawm zia hi sawi ngaihna ka hre lo reng reng.

Ka intleuh thuak thuak a, Rammuana huat ringawt pawh a ni ber lo, a bul tumtu chu ka nu a ni a, mipa a la hriatchian loh lakah tihian min tâl tîra chu pawh a fapa thil tih sual a pawm theih loh avangin. A fanu hi min lo hmangaih ngai reng reng lo a nih ka ring rum rum tawh.

"Ka bulah a awm, tunah chuan a inbual rih a, lo ngaihtuah duh suh, eng mah huatna che ka nei hran lo a nia, amaherawh chu, kan hmeichhe duhzawng a in ang hi thil pawi ber chu a ni, Bawihi nuin mâkpa atan a duh ngang si lo che a, ka kutah a dah ta a ni e, Ngaihzual, officer fing fel tak i ni a, Bawihi aia ṭha i hmu ṭeuhin ka ring..." tia Rammuana ṭawng chu hmaih nei miah lo hian ka ngaithla a, tuna a biak mêk hi ka Lalngaihzuala a ni.

Ngaihzuala lo chhân dan ka hre lo nain Rammuana ṭawng dan kal hmangah ka rin hriat thei mai.

"Nau a pai tih ka hriat loh i ring em ni? Engkim ka hre vek," tia Rammuana ṭawng lai tak chuan hnunglam aṭangin a phone ken lai ka phihthlâksak a, "I ṭawng tam lutuk.." tih pahin ka off a, a ngaihdan ni lo hmel chu hmuh a nuam viau lo.

"Rinduhawmi tak hi chu aw..." a ti bul bul a, eng dang mah a sawi chhunzawm bik chuang lo.

Zanah pawh mut hranna tur îk a awm loh avangin khum khatah kan mu ta nge nge a, a kil tâwpah kei ka mut laiin Rammuana a sîr teah a mu bawk a, ṭawngkam khat mahin kan inbe lo.

Rei fê kan ngawih hnuah, "Tih tak takah te chuan mipa dangin ka lodge-ah duh tawkin sex an hmanpui che a, vawikhat nau i chhiat tawh bawk a, chu mai nilovin tunah i râi bawk a, hmangaihtu tak tak tan lo chuan Rinduhawm, pawm i har ve asin, ka dinhmunah hian han indah chhin la, tuna ka ngaihsak ang che leh in chhungkaw tana ka inpêkna ang hi i thei ve dawn em ni?" Tia Rammuana a ṭawng chuan ka ngawi ngal a, ka zak ru chem chem.

"I u in i pasal tur a thah vanga buai kal zelah kei hi min kangkâi a, a tih sual thup nana min thah a tum pawhin ka ngaidam lovem ni? Heng zawng zawng ka tihna chhan leh ka ngawih tlatna chhan chu nangmah ka duh vang che a ni a, eng mah hi i hrethiam duh lo.." a tih zawm leh a.

"Duhtawk teh, engmah ka ngaithla peih rih lo," ka tih chuan, "I neihchhun i nu leh i u aia Ngaihzuala hi i ngaihlu a nih chuan kal rawh, hun ka pe ang che, i nu lakah chuan ka insawi fihlim thei lutuk tlat ang, tunah hian ka call sak dawn che em ni? Engmah hriatthiam tum reng reng lo mai," thinrim insûm ṭeuha a ṭawng chhuah lai chuan kan awmna in kawngkhar tu emaw hian a rawn kik a, thâwm a dim lo em em mai lehnghal. 

"Tunge, i ṭhianpa a lo haw tihna em ni?" Ka ti nghal sawk sawk a, "Ani chu a ni lovang, ka va en lawk anga tikhan lo awm rawh," tia a thawh chhuah chuan a kutah ka vuan a, "Rammuan..." ka ti sap a.

"Hlauthawng mah ta che, misual an ni lo tawp ang," tia min thlamuanin ka samah a chûl thuak a, ka vawnna ka thlah ve nghal bawk. Khum mawng lamah ka ṭhu a, tu tak ni ang maw, tunah zan dar sawm a pel tawh a nia.

Kawngkhar kalhna a ri rak a, a inhawng zui nghal bawk a, ṭawng thawm pakhat mah ka hre lo. A ri bur a, a ri leh ṭhuai a, thin phu dup dup chung hian room aṭang chuan ka tlânchhuak a, ka thil hmuh chu leh...!

Kawngka bulah Lalngaihzuala hian Rammuana a lo rêk châwt châwt a, a hmel lan dan hlauhawm zet chu hmuh hmaih chi rual a ni lo. Rammuana a âng chawp chawp a, a that thei takngial dawna ka hriat avangin ka ṭê ṭhawt a, chuta Ngaihzuala rawn dâk chhuak hmel chu ka damchhung hian ka theihnghilh theiin ka ring lo.

Thinrim hmai sen awp awp chung leh mitmeng hriam lutukin min rawn melh a, Rammuana a phih tho lawp bawk a, "Ka ta min chuhpui lo turin vawi engzata tam nge hrilh i ngaih dawn, ka'n that law law teh ang che," tih pahin hawi sawk khawp hian a biangah a kut veilamin a hnek bur a, a dinglamin a hrawkah a la rêk bawk.

"Ngaihzual, duh tawk rawh..khawngaihin..." khûr dar dar leh ṭap ṭiau chunga ka ṭawng chu engah mah a ngai lo. Rammuana a rawn insangmara Ngaihzuala'n a nghâwnga a rehna chu phihthlâk tumin ṭan a la a, a thinrim mitmeng chu a râpawm a nia.

"Khawngaihin duhtawk rawh u..." tia ka ṭê tâk chûl avang chuan Ngaihzuala a inla hrang vat a, Rammuana thaw kâwk kâwk chu panhnaiin, "I ṭha em?" Tiin ka zawt a, Ngaihzuala a rawn che leh phut a, min nam sawn dawrh a, "Rinduhawm, i thi tel ve duh em ni?" A ti vawt ruih a, mahse, Rammuana hmel ka enin puih ngai ka ti si.

"Lalngaihzual, tualthaha Jail bang zût i duh loh chuan chhuak rang rawh.." thinrim awki fiak ṭhakin ka ti a, za miah lo hian a nui huk a, "Rinduhawmi hi a lo ropui ber e...i ropui e.." tih pahin a hmai a tuai puat puat a, Rammuana ka kuah vat a, a thâwk dan a la dik hleithei lo.

Damdawi in a chhuahsanna a la rei si lova ka ngaihtuah viau a ni. Amah ka ṭan em em vang pawh ni lovin.

"Ka fa pai chungin ani hi i lo awmpui thei a nia, i u Ngaihzuala khan i mize dik tak a hriat vang hi a ni ang, midang a kawpsan reng che. Nang hi chu maw mipa te'n duh duha an mutpui theih turin awm la a tawk chiah, Rinduhawm, hmangaihtu rilru i hliam a nia, mahse, ka dam ang," ti nghut nghut chung hian a kut a sil a, chhuah tum awm ang pawhin a lang lo.

"I ṭha tiraw, tui in rawh aw..." tiin Rammuana ka bia a, Ngaihzuala thil sawi pawh ka bengkhawn hman lo. 

Chutia amah ngaihven lova Rammuana ka ngaihsak zawk te chu a ngaithei lo a ni tehchêk ang chu, "Ani kha buaipui chûk duh suh, a thi lovang, a hnuk a hlat lutuk tlat..." nuihsawh zet hian a ti hmuk a, Rammuana erawh chuan eng mah a sawi lo.

Minute nga ṭha vel kan inbuaipui a, a Hnar aṭangin thi tlêm a chhuak a, Lalngaihzuala lah choka zimtêah chuan khawng zet hian a ding a, a hmel a rum ûl bawk.

"In pahniha in awm lai khan ka'n sawi law law ang e, tun bâk ka sawi nawn dawn tawh loh avangin," tiin a ngawi dat a, a ṭawng chhunzawm leh dawn emaw ka tih laiin kan mutna room lamah khan a phei vut a, Rammuana a lo rûm chhuak nghat a.

Zawitê hian, "I duh chuan ani kha zui rawh, min vengthâwng duh suh, i nu bulah ka lo sawi fel vek ang," a ti sup a.

"Aih, anih tur a ni zo tawh a, min rinna a chhe vek tawh...zui ka tum lo," ka ti ve tlat.

A ni rêng bawk a, ka duhthu rênga Rammuana bula awm ka ni lo a, ka nu ruahmanna ni mah se ka nu a nih tlat avangin leh a ni lo nu dang ka neih loh avangin tihian ka awm ve naw naw a ni a, Rammuana'n engtin min ti a ni hek lo. 

Ka Lalngaihzuala zawk hian ngaihdan leh rindan a lo neiin a siam fel sa vek tawh a, a hnaihah ka tân awm a rem tawh lo zawk a ni.

"Rinduhawm, in khum saw a tê mah mah a nih saw..." tiel zetin Ngaihzuala'n a ti a, room aṭangin a rawn chhuak chiah bawk a, filter bula ding Rammuana en ngur chung hian, "A u in thah che a tum a, nangin a nau i lo ru kâwi leh vel a, phuba lâk dan ṭhing ber a nih kha, mipa dang fa pawh mahni faa pawm duh tur khawpa rilru hniam han neih mai chu, Rinduhawmi hi ka ta a nia, ka ta liau liau.." a ti siah siah a, ka va han hrehawm ngawih ngawih tak.

"Ngaihzual, thil awmzia hrechiang hmasa lovin tikhan ṭawng mai mai suh, i duh chuan Bawihi hi ka lak aṭangin i hruai hrang thei reng a nia, ka dang hauh lovang che, a hlimna ka duh a, i bulah a hima a hlim dawn a nih phawt chuan ka kal tîr thei reng," tiin Ngaihzuala hmazawnah tak a va ding a, an inchen si, an ruakhau dun nasa mai si a, hlauhawm lamah an kal lek lek zawk.

"Ni lo ve, a tan ka thinlung kawngkhar ka khâr tawh, neih tuma ka beih lai leh hun harsa tak tak ka paltlangpui chung pawhin tihian a la tâl thei a nia, ka fa chu ka fa a ni, a nu erawh ka tân a thi tawh nimai teh se, in awmna hmun ka hmu a, khuma in mutna sûlhnu pawh a la bo ṭhen êm hleinem, hlim takin awm zawk rawh u," tih pahin min rawn melh a.

A mitah ka lo en lêt ve siah bawk.

"Hmangaihtu thinlung i ti na a, hliam i siam a, chi i phul belh bawk a, lo ngâi reng mah rawh, heti reng hi ka ni dawn lo a nia, i u Ngaihzuala ang mai mai kha ka ni ve lo," a ti nghut a, a la hawisawn chhin lo reng reng.

"Ngaihzual, i rin dan ang hi eng mah a ni lo..." ka lo tih chuan a ner sawk a, "I nu ngeiin Rammuana bulah i awm thu a sawi alawm, a phone number min pe bawk a, ka mitin a hmuh hi ka bengin a hre bawk, ka fa erawh ka thlahthlam hauh lovang," ti hniam ruih chung hian Rammuana a en leh a, "I tâl awhna tur a thui mai mai, bansan la a finthlâk ang," ti leh ngatin a chhuak zui ta a.

Dan emaw chelh tumna pawh ka nei lo. Ka âwm dawmin ka thaw chhuak halh halh a, Lalngaihzuala a kal ta. 

Hnuchhawn ka ni a, chu pawh ka nu vang liau liau a ni. 

A Car tlân thawm a reh hma loh atu ve ve mah kan chesawn eih lova; "A hmangaih tak tak che a nih kha," tia Rammuana a rawn ṭawng chhuah chuan ka inhnît hraih a, ṭah loh tumin ka heh ka pet fan fan a, Ngaihzuala rilru na hmel kha ka hmuh hmaih si lo.

"Min hmangaih mah se kan tan kawng a awm si lo alawm," ka ti sap a.

"Tunah chuan nang leh kei hian bul kan ṭan ṭha ang, ani theihnghilh tîr che ka tum lova mahse, i chhungkaw keh darh mêk remkhâwm turin hma ka la ang a, chuta tan chuan nangmah i pawimawh tel a nia," a ti ta a.

"Ka nu hi ka haw ngawih ngawih," ka ti chhuak phawng a.

Ka bulah a rawn ding hnaia ka sam chûl pah hian, "I nu âi chuan ka ṭhianpa Lalngaihzuala thil tih dik lohna khan a nghawng thui zawk, ka kiangah awm ang che," nghet tlutin a ti ta a.

Keima u Ngaihzuala ka huat rualin a thi tawh miau si a, tu thusawi nge dika dik lo tih pawh ka thliar thiam tawh lo. 

Tihian, a ṭhianpa ngawih ngawihin a ti leh bawk si.

Kei ve mai mai tan hi chuan a harsa kual vel vek a ni ber a.

B+>[BeckirafARenthleI]<+®