20.DROGMA SEOL [A Becky Rafa Story]

20.DROGMA SEOL

Ziaktu: Becky Rafa Renthlei

[Recap]

"Ka nu hi ka haw ngawih ngawih," ka ti chhuak phawng a.

Ka bulah a rawn ding hnaia ka sam chûl pah hian, "I nu âi chuan ka ṭhianpa Lalngaihzuala thil tih dik lohna khan a nghawng thui zawk, ka kiangah awm ang che," nghet tlutin a ti ta a.

Keima u Ngaihzuala ka huat rualin a thi tawh miau si a, tu thusawi nge dika dik lo tih pawh ka thliar thiam tawh lo. 

Tihian, a ṭhianpa ngawih ngawihin a ti leh bawk si.

Kei ve mai mai tan hi chuan a harsa kual vek vek a ni ber e...

-B®® Stories

Rammuana ṭhianpa ina kan awm chhan ber Ngaihzuala a rawn lan tâk avangin a hmaa ka nu ruahmanna kha kan tidanglam ta a, keimahni inah vawiin hian kan lêt leh dawn a ni. 

Ngaihzuala nen kan inkâr a chhe ta vek tih ka hriatna hian min ti na a, hmeichhe âwmnêm zawk na na na chu ka mittui a far leh zauh zel. Chuti a nih rualin ka nu ka thlahthlam thiang lo a, a fapa neihchhun himna tur atan kei hi ka inpêk a ngai si a nih hi.

Rammuana Car-in kan in lam kan pan a, "Bawihi, ka chêt dan a fair tawk lo tih ka hria, mahse, duhthlan tur dang ka nei tlêm a, ka lo duh ve ngawih ngawih che hi thil sual a ni bîk dawn em ni?" Tih pahin ngun tak hian hmalam a en a, nizana Ngaihzuala'n a hnekna kha a biang a duk raih a, dawihzep ni lo mah se damkawr a nihna a lang ka ti mai, a che hman thlâwt lo a ni ber e.

"Sawi nawn tawh lo teh ang, tihian a tlachawpin awm ila, ka nu hmaichhanah biak ka duh a, inrawlh loh hrâm i tum dawn nia," tiin ka hrilh lâwk a.

"Hmangaihthuah che chuan Ngaihzuala khan a hmangaih che tih ka hria, chuti a nih rualin chhungte phal loh lutuk pasala neih hi a ṭha lo a, tluan loh te pawh a awl duh, i tana ṭha tur chauh ka ngaihtuah tih tal min hriatsak la ka duh a ni." A ti a, sîr zawngin a hmel ka va en a, khawngaih thlâ a la angreng. 

Kan in kawt kan thleng a, "Ka rawn lut kâwi lo mai ang aw, zanlamah duh leh lokal ka tum dawn nia, vawiin hian ka hnathawk ten hna an ṭan tawhin ka ring a, reilote va lan ve zawk a ngai tlat," a ti a, "Aw le" tia bu nghat chung hian Car aṭangin ka chhuk a, ani pawh a tlan zui ve nghal mai.

Inchhungah ka lut a, ka u room aṭangin ka nu a rawn chhuak chiah a, makti hmel taka min en chung hian, "In va rawn lêt hma ve, engtizia nge?" A ti nghat a.

"Ka nu, hei leh chen hi hriatthiam tum chein ka bei a, i thu zawng zawng awih vek lo mahila, ka naupan lai aṭang leh vawiinni thleng hian i zah ngawih ngawihna tur emaw i ṭah tlawk tlawkna tur ka thlen ka hre ngai lo," tia ka ṭawng lai chuan mitmeng danglam deuh tak hian min rawn melh zuk a.

"U Ngaihzuala boral hlima zu ka in leh thlakhat bâwr vel nunphung pangngai lo anga ka tâl tih loh kha i nat ngawih ngawihna tura ka awm ka hre hek lo. I fanu, i hrin ngei muthilhna damdawi pêk ngai khawpa rilru kâwi leh chhia i pu hi ka damchhungin ka theihnghilh thei dawn em ni?" Tia sehchilh naka ka ṭawng chuan, "Sawi sawi lo mai teh.." a ti hluk a.

"Kan duh phawt chuan nangmah hrilh miah lo che khan Ngaihzuala nen kan inruin kan innei daih thei, nimahsela, ka u vanga i natna leh i tawrhna zawng zawng kan hriatsak che avangin puitling takin tikhan kan hrilh tlang vek che a, mahse, i fanu laka i rilru puthmang erawh a lo dang hlak si! I duh angin Ngaihzuala nen kan inkâr i ti chhe vek tawh a, Rammuana kutah min hnutchhiah ta a, eng kawng pawh zawh ila min dâl emaw min dan tum suh ang che, i fanu Rinduhawmi kha a thi tawh..." ka ti sak sak a, inthiam lo hmel a pu ve deuh chuan ka hria.

"Bawihi, i hrethiam lo a nih kha.." a ti zâwi raih a.

"Ni e, engmah hi hriatthiam tumna leh duhna ka nei tawh lo a, Rammuana kuta min dah ngawt nachhan pawh hmaifai i duh vang a ni, Ngaihzuala hi a ngawi hlen dawn lova; a fa, ka pum chhunga awm hi a rawn ngaihven dawn tih hria ang che..." ka tih leh tâkah chuan tukverh bulah a va ding a, "Ka ruahmanna hi engmahin a dâl tur a ni lo," a la ti hrâm.

Ka room-ah lutin khumah ka ṭhu a, ka phone ka biha Ngaihzuala a reh tlawk tlawk mai. Min be leh ngai dawn tawh lo tih ka thinlung hian a hria a, a tan ka thih tawh thu chiang takin a sawi a, a ti mai mai lo bawk ang.

Rammuana ṭhianpa inah khan a hmingin zankhat ang chu kan riak ve a, Ngaihzuala chhuah hnu khan khumah kan mu tawh bîk lova choka ṭhutthlengah kan tlaivar ṭhak. 

Ka lo chhing sek a ni ang ka harh leh chuan chawhnu dâr hnih a lo ri tawh a, choka lamah ṭawng thawm a awm a, ka inphih fai hnuah ka chhuak phei ve ta a, ka rin loh deuhin nu Rami a lo ni tlat!

"Bawihi, biak lawk che ka duh a.." tiin a hmaa min biak ṭhin anga dam thlap hian min bia a, kâr hmasa leh a hmasa leh lamte khan chuan thinrim engphiarin min ânkhum kha a nia, tunah lém a kâ pawh zen ila min seh lovang tih tur ang vel a ni leh lawi si.

"Eng thil nge ni ta?" tiin ka nu ka melh zauh a, kan thusawi eng atan mah a ti lo tih hriat deuh hian thildang a tihsan hmiah hmiah a, a runawm ve ṭhin a nia.

"I u Ngaihzuala khan a hnathawhna hmunah fa a lo nei reng alawm le," tia a sawi chuan mak ka tih êm avangin ka mengphâwk vak a, nu Rami ka en a, dâwt sawi hmel a pu si lo.

"Chu chu engtin nge a nih theih, a hmain inhre miah lo tihna maw?" Ka ti a.

"In hnena lo sawi tur hi ka ni miah lo a, mahse, ṭawngkam tuihnai lo leh chhe tawpin ka ṭawng a, ka fapa lahin thurûk liantham lutuk a lo nei si, a fate chu phìr an ni a, hmeichhia ve ve an ni nghe nghe, Bawihi, i u Hmingmuana lam dah ṭhain ka fapa hian a bum lêt dêr che a ni, a pawi ka ti lutuk.." a ti ta a.

Sawi ber tur hre lovin ka lo ngawi reng ringawt.

"Rammuana hnen aṭanga ka hriat lehzel dan chuan ka fapa kha a che nikhua lo hle tih leh tuna a thihnaah pawh hian i u kan han burbun tak naa thil felhlel chu a la awm a ni, eng pawh ni se, hun kha leh chen ka fanu ang maia ka lo en che i ni a, rilru na rêng rêng leh inthiam lo taka i awm tur hi ka duh lo, i u pawh Court-ah a inlan ṭep tawh a, thil inthup hi hailanin a awm zel ang, dikna ka duh a, ka fapa Lalngaihzuala hian thil dik lo tak a ti a nih phawt chuan ka tlâwm hreh rêng rêng lo," tiin ka kutah a rawn vuan a, lâksawn pawh ka tum bik chuang lo.

"U Ngaihzuala fa a nih leh nih loh in la hrechiang lo tihna em ni a?" Tia ka zawh chuan, "Hrechiang turin naktuk hian kan kal ang, chumi hma chuan engkim hre ve la ka duh a, i laka kan lo chêt tawh dan mawi lo tak avang khan ngaihdam ka dil a che, i nute Dini pawh a inthiam lo viau a nia, thil tisualtu nangmah i ni lova i lo tawrha i nat ve zel nachhan tur a awm lo," a ti dam thlap a, nu Rami zia dik tak ka hmu leh tain ka hria.

"Rammuana hi i ring tâwk em?" Tiin ka zawt a.

"Ring tawk e, mi dik a ni alawm, i u Ngaihzuala âi thlâwt chuan a puitlingin pasal a tan pawh a thlanawm zawk," tiin a nui deuh a, a sawi awmzia ka hrethiam ve bawk.

Nu Rami chu veranda thleng ka va thlah a, "Bawihi, ka fapa thihna hi ka tuar lo a ni lo a, amah khan a lo zir lo viau a nih ka ring ta rum rum, eng pawh nise thudik a rawn lang chho mai ang," a ti leh a.

"Ngaihdan pawh ka nei thiam lo e a.." ka ti a, ani pawh a kal zui ve ta a.

Thil mak dang a lo thleng leh ta. U Ngaihzuala'n fa a lo nei a nih chu, chu pawh tuman an hriatpui lo a, tunah a thih aṭanga thla fê a ral hnuah a rawn irh chhuak chauh a, thil kal dan hi a mak kual vel vek.

Inchhungah ka lut a, ka nu nen a ngai tê bawkin kan awm dun leh ta, min biak a tum loh hmel êma kei pawhin ka be châk bik lo. Ka phone a ri a, Ngaihzuala a ni tih ka hriat veleh room-ah ka luhpui vat a, biak ngei ngei ka tum bur.

"Bawihi..." thâm ṭuak hian a rawn ti a.

"Eng nge ni ta, i tan ka thi tawh si a, mitthi biak duhna i la nei a ni maw?" Tiel awka taka ka tih chuan a nui lui huk a.

"Rammuana nen khan in mu dun em?" A rawn ti a.

"Mu dun lo, chuti em ema mipa thlahlel ka ni em ni?" ka lo ti nghat a, "I nu ruahmanna kha ka hriat loh ring reng reng suh, kha pa Rammuana kha i duh tak tak lo tih pawh ka hria, ka ngaihdam theih lai che hian ka hnenah rawn kîr rawh," a ti ta a.

"Ngaihzual...i tan ka thi tawh." Ka lo tih chuan a thaw hrâwih a, "Ngaihdamna hi ka ngah asin, i duh rêng vanga kha hmuna kal kha i ni lo, Bawihi min bum tum mah la thudik ka hria a nia, i nu kalsanin kei min zui dawn nge tikhan an hmanruaah ṭan reng i tum zawk?" A ti ram hmuk a.

"Nang leh kei hi chu inzawmna nghet nei chi kan ni lo, min thlah zalen la, kei pawhin ka thlah ang che," ka ti dam thliam a, ngaihdan ni lo tih hriat tak hian, "Kan pahniha fa i pai a, rilru pelhê i pu dawn lo tih ka hria, nizan kan boruak kha theihnghilh ve ve ila, nun pangngai kan nei thei reng a nia," a ti leh a.

"Aih, a theih tawh loh...duh tawk ang.." ka ti tlat a, "Ka ngaidam thei che tih vawi engzata tam nge ka sawi dawn, ka hmangaihna che hian ngaihdamna a keng tel asin, Bawihi, i pum chhunga naute vang tal pawh khan inngaihtuah ṭha leh rawh," tia Ngaihzuala áw hniam raih leh tlâwmna ṭawngkam chuan ka chhungril a fan raih raih mai.

"A harsa a ni, ka tân hian a harsa ngawih ngawih.." tih chiah ka sawi. 

"Tun aṭanga darkar chanve hnuah ka rawn hruai ang che, Valtea inah tal inbe ṭha teh ang, ka ina lokal i hreh a nih pawhin, hmaichhanah sawi dun hrim hrim ila kan inthlah hlen dawn a nih pawhin fel fai takin ni rawh se," a ti hmiah.

Ka rindan vel a nia, nizanah khatiang khawp khan thinrimin ka lakah lungawi lo mah se, Rinduhawmi hi hmeichhe khawlo leh tâl kual mai mai hmeichhia ka ni lo tih a hre ngei ang.

Ni e, a tawp nan Lalngaihzuala hmuh ka tum poh a ni ang chu.

Ka nuin eng nge a tih tih leh min thlithlai em tih ka va ngaihven leh tê tê a, kawmthlang huanah a awm tih ka hriat rualin veranda lamah ka chhuak phei a, Ngaihzuala hmel a hmuh ka duh lo hulhual. 

A tîrtea min lo hruaina ṭhin kan inpiah kâwiah ka lo ding a, kâr lovah Ngaihzuala pawh a rawn thleng ve mai a, office aṭangin a rawn chhuak a ni ngei ang, nizana a lan dan ang lo takin a hmel a dam thlup a, chîk zeta min en hnuah, "Midangin an hmuh che i duh lo chuan rawn lut rawh le," a ti a.

Thuawih takin ka lut ve mai bawk a.

Valtea te in lam kan pan dawn emaw ka tih laiin a tlantlang ta daih si. Amah melh hâ chung hian, "Khawiah nge min hruai i tum?" Ka ti a.

"Valtea te in kha a rem leh lo a, kalna tur dang ka hria alawm," a ti awlsam puat a, "Hla deuha kal ka duh lo a nia," ka la ti hrám a.

"Lo ngawi rih phawt rawh, tikhan ngawireng khan lo ṭhu la a ṭha a ni mai," a ti nghut ringawt.

A hnu dârkâr chanve a liam hnuah Hotel pakhat kawtah car a tiding ta a, a fâl ṭha reihrawih khawp mai. Ngaihzuala bulah ni lo se chuan ka hlauthâwng nghal ringawtin a nia ka rin.

"Ṭhianpa Sangkima hotel a nia, engmah hlauhthawn tur a awm lo," tih pahin car aṭangin a chhuk a, ka ṭhutna lamah a rawn hêl a, kawngkhar min hawnsak thlap hnuah ka kutah vuanin min hruai chhuak ta a.

Room a lo hauhsa a ni ngei ang, a ṭhianpa Sangkima chuan nui vur vur chung hian chahbi a pe a, "Han che na lutuk lo ula," a tih chuan ka lo zak ru chem chem.

A room hauh chu a faiin a thianghlim sar a, Double bed leh dawhkan, Single sofa leh Tv a awm a, mini fridge a awm tel bawk.

"Helai thleng thlenga kan kal kher a ngai em ni, car chhungah pawh kan inbe thei reng si a," ka ti leh hnuhnawh a, "Car chhunga sawi mai mai chi a ni lo, Bawihi vawi tam i tana ka inhuam thui zia pawh ka sawi a, min rin hi engvanga harsat em em nge i nih?" Zawi ruiha tiin khumah a ṭhu thla hnawk a, a chauh hmel hle bawk.

"Ngaihzual, a bul aṭanga ṭan ṭhat leh zel ka duh tawh lo a nia, nangmah ka huat vang che leh ka duh loh vang che a ni lo tih vawi tam ka sawi ve tho. Kan chhungkaw boruakin a zir ngang si lo a, kan duhdanin engmah a thleng thei bawk si lo," tiin ka thaw halh a, ka hah hluah hluah.

"A nih leh zawhna ka zâwt che anga dik takin min chhâng rawh aw.." a ti a, "Ka chhan theih zâwng che a nih chuan.." ka lo ti ve a.

"Rammuana hi i duh em?" Tia min zawh chuan rang fahran hian ka duh loh thu ka sawi vat a.

"Niminah khan engvanga zui nge i nih, a hruai luih che ka ring si lova, Rammuana hian ka duh ang zât zet chein a duh ve che tih pawh ka hria, pasal i nei duh a nih te chuan i fa paina pa ka awm renga eng ati nge ani kha i hnaih ṭâlh.." thinrim awki hniam chhaka a tih chuan thudik hrilh mai ṭhain ka hre ta a.

Rammuana nen khalaia kan awm dun theih dan te, ka nu ruahmanna a nih thu leh ka thingpui in turah damdawi an telh tih zawng zawng ka sawi fai ta vek a, ka ṭawng chhung zawngin uluk fe hian min thlira dâwt ka hrilh nge hrilh lo tih hriat a tum tepawh a ni mahna.

"Tunah chuan a kaw tawpah kan ṭang ve ve tawh a, kei min kalsana i chhungkua venhim i duh takzet chuan ka damchhung atan ka kalsan hlen ang che, chuti nilova keimah engkim huama min zui a nih pawhin inchhungkaw tan theihtawp ka chhuah thung ang, Rammuanawma hian ka hriat loh a hriat ring mahta che, a tikual vel mai mai che a nih hi, nula tam tak an awm laia nang, mipa dang fa paia awm hi a hmangaih viau che i ring reng reng em ni?" A ti zui bawrh bawrh a, ka lo ngawi reng ringawt.

"Ngun takin ka thusawi tur hi ngaithla ang che, a ruh lang râwt râwta hrilh i nih loh hi chuan eng mah i man thiam ngai lo, nang leh kei hi tumahin min pawh ṭhen ka remti dawn lo a, i nu ka ngaihtuahin ka vêngthawng lo a ni lo a nia, a theihna chin chinah ka chhawmdawl zel dawn bawk," tia a sawi lai chuan ka ṭhutna bulah a rawn insawn phei a.

"I u Ngaihzuala khan a hnathawhna hmunah sâwn a thlâk a, hmeichhia pakhat âia tam kawp a nei reng bawk, chumi hriatpuitute chu i u Hmingmuana leh Rammuanawma hi an ni. Kha truck driver i u Ngaihzuala su hlumtu pawh khan a tîr tu dik tak a la sawi lo, tunge he thihna phênah hian awm tih hriat a la ni miah lo a, Rammuana thah tuma i u in a beih tâkah khan tihian finfiahna mumal tak tak awm lovin thil a kal zung zung a, Hmingmuana kovah a tla ta a ni. 

Ngaihzuala sâwn thlâkna kha mi nasa lutuk chhungkua an ni a, khatia nupui nei tur anga a tlangthan takah khan chêt an la pawh a ni maithei, tu hriat va ni suh, ka chhui theih ang apiang ka chhui ve zela i nuin hmanruaa hman che a tum hi dâl rawh, do la hnial ta che, an bum kual mai mai theihin awm tawh hlek suh," a ti duah mai.

"Helai hmuna kan kal chhan leh u Ngaihzuala chungchâng a inpersan em mai," ka lo ti nghauh a.

"Nizanah khan Rammuana nen sex inhmang dun lova, ka inthiarfihlim theih nana an ruahmanna siam a ni tih pawh ka hria, tunah hian ka haw tîr dawn tawh lo reng reng che," a ti zui leh.

"Ngaihzual..." ka lo ti chhuak hliai a.

"Ka ti tak tak a nia, tupawhin min demin min sawisel rawh se, ngun taka ka ngaihtuah hnuah nang leh kei hi nupaah kan insiam ang a, chuta ṭang chuan engkim kan chhui chhuakin hma kan la dun ang," nghet charhin a ti ta a.

"Inneih ka duh lo..ka nu.." tia ka la ṭawng lai mêkin, "I nu sawilang teivet suh, eng atan mah a ti lo che, Bawihi, i nu thluak hi a chiang tawh lo," a la ti tak deuh deuh a.

"I duh emaw, duh lo pawh nila i haw dawn tawh lo, a ṭul a nih leh chawlh ka la anga Aizawlah kan chhuk mai dawn nia, ka ti mai mai lo tih hria ang che," a ti hmiah.

"I â tawh tak tak a nih hi.." ka lo ti vak a.

"Kan inneih theihna tur a nih chuan ka â nawn tlut tlut anga a ni mai, eng mah ka pawisa tawh lo," a ti zel si.

"Min hruai haw phawt mai rawh, ka haw duh..." ka tih pawhin ka thusawi eng atan mah a ti lo rêng rêng. 

A phone phawrh chhuakin tu emaw a call a, a phone hman hlan hian ka chhuak thut dawn em mawni. Tukverh bula a la din laiin ka tho chhuak tharh a, kawngkhar ka thlen hman hmain ka kokiah a rawn man a, nghet zetin min kuah bet zui nghal bawk a, ka che thei tawh ṭhak nâng.

"I fanu mah ni se i duh duha i tihkuala i chawhkawi tur a ni lo, i duh leh police hnenah chuan kal la, i duh duh va sawi rawh, ṭha takin palai ka rawn tîr a, min hnar fithla ṭhak a, khatah khan duh tawk mai ta che, mipa dang bulah a duh lo chung i kal luih tîr a, a chin chhuaka police ka hrilh chuan nangmah kha i tâlâwk dawn a nia, ka pi..fimkhur rawh," tia Ngaihzuala thinrim awki hriam hruih chu a ngainatawm loh ngei mai.

Ka nu a va bia tih hrilh hranpa ka ngai bik lo a, nizan lawkah Rammuana bulah ka khawsa a, tunah Ngaihzuala bulah ka awm leh daih a, nizanah thinrimin thutawp a sawi a, khua a vâr a, tihian a kianga ka chên theih nan hmâ a la leh si. Lalngaihzuala rilru puthmang hi ka hrethiam nek lo e.

Ka nu a biak zawh hnuah min vawnna a thlah dul a, "Tikha chuan inrûk chiah kan hmabâk ta..." tia nui suk chung hian ka biangah a rawn tawk a, a kut pahniha ka hmai khuap chung hian, "Ka thutiamah ka ding zel ṭhin, Rinduhawm, rin che ka duh asin, na dang min siam belh tawh suh," ti sup chung hian a rawn kun hniam a, hawisawn nachang pawh ka hre lo, a mitah ka lo en lêt ve ngar ngar a, ani pawhin min eng chiang ngang mai.

"Thutiam chu thutiam a ni a, ka hlenchhuah theih loh tur ka tiam ngai lo, nau i pai a nih chuan kan innei ang tih ka sawi tawh kha," a ti nawn leh a, "Mahse.." ka'n ti dêk dêk a, "Mahse, mahse, lo ti suh, min dâltu tur engmah a awm lo, min duha kei pawhin ka duh che a, chu chu a tawk," a ti hmiah tawh si.

"Lalngaihzual...eng ati nge i luhlul em em mai le.." ka ti ringawt a, eng danga min chhâng lo hian ka hmuiah a rawn fawp a, dam leh uluk taka min fawhna chuan ka chhungril thlengin a fan chhuak vek a, ka ngaia ka thlahlel ngawih ngawih tih ka inhria, ka Ngaihzuala a ni tlat alawm.

"Zanin chu hetah kan riak ang a, ka ina kan inhruai phei chuan i nu a rawn lang dawn chiangsa a, tun dinhmunah hian ka hmuh duh loh berte zinga mi a ni, i nu mah ni se mi rilru kâwi lutuk hi ka ngaina lo," tih pahin min vawnna a thlah a, khum lamah min hruaipheiin, "I rai tih ka hriat aṭang khan duatna hun che pawh ka nei reng reng hleinem, ka duat phâkah awm rawh.." tih pahin khumah min hlâng chho va, min zo nalh nalh khawp mai.

"Inruk kher chu ka duh lo asin maw le," ka ti nang nang a, a lo ner nasâ.

"Duhthlan tur dang awm hek lo, ṭha taka kalpui theih a nih lai khan i nu rilru sak tlat lo se a ṭha tur a nia, kan palaite a lo hnar pawh khan beidawn ka la tum chuang lo, mahse, a tihsual lian ber chu ka hmeichhe duh, ka âtchilh thawthâng mipa dang bula a kal tîr kha a ni, Rammuana nen in ingaizawng lo tih ka hria a, a duh pawh i duh lo, min diriam tuma a phone number leh in awmna hmun a sawi chhuah chiah khan mipa rilru sak a kai tho zawk a ni, ka kal tîr dawn reng reng lo che," tiin min kuah a, a ti tak tak tih pawh a aw nghet churh aṭang hian a hriat theih bawk.

"Ka luck hle mai..." tiin ka nui chhuak ta a.

"Rinduhawm, over lo mai rawh," a ti hluk ringawt.

"Nge, a nia lawm maw le, nizanah mipa dang bulah ka awm a, i rawn hnek hrep a, tunah i bulah ka awm leh daih a," tiin ka nui hak hak a, "Rammuanawma ka that lo kha chu a vannei ngawt mai," tiin a nui duh ṭhak nâng.

"Kan inru tih a hriat hunah mak a ti ang chu aw..." ka ti nang nang a.

"Ani khan kan inkârah sawi ve tur a nei lo, a inrawlh lohna turah a inrawlh tam lutuk a, nakinah chuan a la tâlbuai ang, i nu pawh duh aiin a che nasa mah mah, i tana ṭha tur a ngaihtuah vang nilovin i u Hmingmuana ringawtin a ngaihtuahna a luah a, thil dik leh dik lo pawh a thliar thiam tawh lo a nih hi.." tiin khumah a zangthal zawng hian a mu phar duai a, a maimitchhing zui daih.

"Office-ah va lêt rawh, hetah hian ka lo awm anga ka chhuak miah lovang," ka tih chuan a rawn meng chhuak a, "Office chuan min la nghâk thei, i kianga awm ka duh alawm," tiin a bula mu ve tur hian min mitmei a, lukham nghengin ka la ṭhu lui tlat thung.

"Mi fate pawh chhan mumal sawi tur awm lovin an inru a, keini tezawng kan changkâng lutuk tlat, ka fa i paia i nuin inneih a remti lova ka ru che a ni mai, sawi buai thui vak tur a awm lo," tiin a nui deuh a, a hmela lungawina lo lang chhuak chu ka hmuh hmaih lo, Ngaihzuala hmel ngaihawm zet chu ka thlir vang vang a, min duhna, min duatna leh min ngaihsakna rawn lang dawt zut chu ka hmu reng.

Mut chhuakin min rawn zêm a, ka rilru hrehawmna leh natna dahṭhain ka chhîng ta riai riai a, ka thin zâwnah Ngaihzuala'n min rawn kuah a, a bân lum vung vung leh a mipa rim chuan ka hnar a verh zar mai. Tisa lam thil tel miah lovin kan inkuah a, a thlazar hnuaia muthilh siai siai hi ka thlahlel êm asin.

"Duatnu..harh ve tawh la.." tia Ngaihzuala'n min rawn sawi dat dat chuan peih lo zetin ka meng chhuak a, ka hmai bulah a rawn kûn hniam a, a lo inbual fai vek tawh a ni ngei ang; a sam tepawh a la huh hlap a, a kut vawt ruih chuan ka biangah chûlin, "Zanriah tur ka chah a, an lo dah ṭep ang intiharh rawh le.." ti supin min kuah tho a.

Khum mawng lamah ka hakthlak tur thawmhnaw a lo awm a, ka muthilh hlan khan min lo ngaihtuahsak a nih ka ring.

"Inbual la, zanriah kan ei dawn nia, chutia mut tluk tluk ringawt te chu a ho em mai," tiin a nui kur kur a, towel min rawn pe a, "Ka bual châk teh mai che a nia, i kal vat vat loh chuan ka pawm lût hreh miah lo che," tiin ka ṭhutna sîrah a rawn ding a, "Chimawm lo mai teh," ka ti sap a, bathroom lam panin ka phei ve ta a.

Uluk takin ka inbual a, nizan lawkah Ngaihzuala kalsan tumin rilru ka siam a, ka mittui te ka lo sêng ve hman a nia, dârkâr 24 pawh a ral hma hmain a kiangah ka awm leh daih a, tihian kan inru chu a ni ta ber a, nautelem ang maiin a tu ate pawh hian min sawp kâwi niberin a lang.

Zanriah tuihnai tak kan kîl dun a, kan ṭawng meuh lo. Mahni ngaihtuahna ve ve kan kâwm ti ila a dik ang.

"I lakah i nu a lungawi dawn lova hetah kan awm reng thei dawn hek lo, inneih a phal hma loh chuan ka kiangah i chêng reng ang, Rammuana pawh a rawn langin ka ring a, chhân dan tur chu i hriatthiam ka ring, i nu tak hi chuan a tuithlar duh maithei che a ni," a ti a.

"Khawiah nge kan kal ang a?" Ka lo ti hehaw a.

"Zanin chiah helai hmunah hian kan awm ang, naktuk zingah ka in luahah kan lêt anga an lo zawnna hmasaber tur chu ka in a ni. Chuvangin, ka inah Valtea kan awm tîr anga keini a inah kan chêng rih ang, kârkhat atan chawlh ka la a, chumi chhung chuan thil tam tak kan chingfel hmanin ka ring," a ti leh zung zung a, hnial pawh ka tum lêm lo.

Zanriah eikhamah pawh tih tur dang awm hek lo, khumah bawk kan awm leh ta a.

Amah si chêtin min kuah a, "Nang nei tur che hian thil harsa tam tak ka paltlang a, chuti maia bansan che hi ka tum lo, atira kan inremsiamna ang khan inkawl ni ta ila, tuna ka rilru puthmang hi ka nei pha dawn lova, Rinduhawm, ka nunphung zawng zawng i chawkbuai vek tih i inhre lo hi i âtna a ni," tih pahin ka kawr âwm chhungah a kut a rawn zen lût a, ka lo îp cháwih mai.

"Ngaihzual, i kut..." ka lo ti halh a.

"Ka ta i ni a, i engkim hi ka ta vek a nih hi, mipa dang an awm ka duh miah lo a nia," thutak zet hian a ti a.

Kei lah chuan, "Ka nuin a hrechhuak tawh awm si a, a thinrim nasa ngawt ang," tia ka sawi lai chuan, "I nu hi sawiselsak kher che ka duh loh nen, ama hamṭhatna turah chuan eng mah pawisak a nei si lo a, a vena ka ven a ngai dawn," a ti a, ka nu a ring zo hlawl lo tih a ṭawng dan aṭangin a hriat mai.

"Sawi tawh lovang, kan inrûk tawh hi..." ka tih chuan a nui huk a, "Inruk zanah chuan eng emaw an ti ṭhin," tiin a nui leh a, "Lalngaihzual, uang reng suh," ka lo ti a, a nui nasa zual sauh thung.

Eng eng emaw sawiin kan titi a, ka mut chhuak a reh hleithei lo nen ka lo muhil leh daih chu niin!

"Nia, fimkhur la, kan awmna chin a zawh che pawhin hrilh miah suh ang che, ka ring tawk che," tia Ngaihzuala ṭawng ri ka hriat chuan a mutna lam ka hawi phei vat a, a lo ruak hiau mai. Mahse, tukverh bulah dingin phone a lo hmang a, zinglam dar li a ri ṭêp.

Ka khuh kharh a, ani pawh a rawn hawi nghal a, ka harh tih a hriat tâkah chuan, "Valte, nakinah ka rawn be leh ang che, kan mamawh tur ka sawi ho kha min lam khâwm sak dawn nia," tia a ṭawng leh hnuah phone off in khum lam a rawn pan a, "I nu chu a awm mai mai lo khawp mai, ka in luah kawtah mipahnih a duty tîr a nih chu," a ti ta a, ka lo ner nasa mai.

"A ho em mai, siam ṭhat theih eng mah a awm tawh hleinem, inneih i duh tak tak a, tun dinhmun kan thleng ta bawk a, tlanchhe thei ka ni tawh lo, hei hi chu ka nu ruahmanna a ni lo, kan pahnih inremna zawk a ni, lokalin min hruai chhuah pawh tum mah se ka haw lovang," ka ti ve ta a.

Chuveleh Ngaihzuala'n min hnaih ruak a, ka âwmah a hmai phûmin, "Ka Rinduhawmi hi chu ka hlatsan thei thlâwt lo che a ni e," tih pahin a rawn dâk chhuak a, min fawp leh ta nge nge e.

Ni e, inngaizawng lai leh inthlahlel ngawih ngawiha induhtawn kan ni a, ani mipa a ni a, kei hmeichhia ka ni bawk. 

Kan inrûk zanah hian eng emaw taka tisa inzawmna chu kan neih ngei a ngai a ni. Ngaihzuala hmel thim mâk leh tisa châkna mitmeng chu hai theih rual a ni lo, a ta ka nih ang ngeiin ka inpe nawn leh ta. Ka Lalngaihzuala tan hian engmah ui ka nei ngai lo rêng a ni.

"Ka hmangaih ang chea min hmangaih ve hunah tun aia nasa hian kan hlim ang, kan hlim em em ang," tiin ka chalah a fawp zauh a, a hmai thlanin a bual hnâwng chap a, ka hrukfai sak lai pawhin a mit a lasawn duh eih lo. 

A taksa ruak kûng chu zahpui hauh lo hian a tho chhuak a, "Seol dai dun tawh lovin nupa pawmpuina certificate kan nei thuai ang," a ti ta a. Ka lo nui ringawt.

Khua a var fel a, ama in lamah lêt chi a nih loh avangin Valtea te inah kan tlang nghal a, Ngaihzuala bula thlamuanna ka neih ang hi tu mipa lakah mah ka nei ngai lo.

Mahse, Valtea te in kawt kan thleng a, Ngaihzuala a chhuk fel hman tawh tihah Valtea te in piah aṭang chuan ka nu leh Rammuanawma an rawn pên chhuak ta a.

Car chhungah luh leh ka tum ûk a, Ngaihzuala zawkin ka kutah a rawn vuan a, "Hlauthawng mahta che, ka venghim zel ang che," ti chung hian a hnungah min awm tîr a, inlekkhawng luh chung hian ka nu leh Rammuana a hmachhawn ta a.

"Lalngaihzual, ka fanu kha min pekîr leh rawh.." chang faka ka nu a ṭawng chhuah chuan ka thâ a khûr ru der der mai.

"Ka ta midangin min chuhpui ka duh lo, mipa dang kutah pawh i hlan theih chuan kei a fá pa hian ka neih theih lohna chhan tur ka hre miah lo a nia, i fanu hi bungrua nilovin mihring a ni, a na thei a, a ṭap thei bawk.." tiin ka nu a chhang ram hmuk a, Rammuana nen kan lo ngawi reng thung.

Chutah ka nu chuan, "Rinduhawm, ani kiangah hian i awm hlen dawn tak tak a nih chuan, vawikhat mah ka nu tiin min ko tawh suh ang che, i nu nih tumna ka nei tawh lo," tiin Ngaihzuala phena ka ding chu min rawn thlêk a, en pawh ka en ṭha ngam lo. 

"Nangin i duh loh pawhin keimah hian ka duh alawm, tuna i thusawi kha i ti tak tak dawn a nih chuan min kalsan tawh rawh u, Bawihi natna chu ka natna a ni a, a tawrhna pawh ka tawrhna a ni, a dam chhunga nu koh tur a nei lo a nih pawhin a thih phah lovang," Ngaihzuala'n a ti hmiah.

Ṭawng ve tur ka hre lo a, Rammuana hmel dâng lap chu ka en a, zak hmel a pu ve deuh chuan ka hria.

Heti em ema min ngaihsaka min hliahkhuh tumtu ka Lalngaihzuala kiangah hian ka awm mai tur a ni. Hnunglam ka hâwi lêt tawh lovang. 

Ngaihzuala phén aṭangin ka pen chhuak a, ka nu mita en kalh chung hian, "Ka nu nih i duh loh chuan i fanu nih pawh ka duh bîk lo e, tihian kan nufa inkâr chu tawp rawh se." ka ti ve ta hmiah a, Rammuana'n "Rinduhawm..." a lo ti fiak ṭhak a.

"Mi chhungkaw buainaah inrawlh duh suh, ka nu hmanrua tho i nih kha.." ka ti leh sak a.

Nia, ka Ngaihzuala phatsana rilru naa awm tir leh ai chuan a nih nih ni turin ka chhungkua chu ka kalsan mai ang..

Ka kal ngei ang...ka thlen chin tur erawh ka hre si lo..

B+>[BeckirafARenthleI]<+®