25.NAOM[Mizo Love Story]-B®®

25.NAOM [Mizo Love Story]

Ziaktu: Becky Rafa Renthlei

B®®

Shadow of the life

Rei fe ka ṭhut hnuah kan room lam ka pan ve chauh a, an pafain khumah an lo mu a, Bawihtei tak chu a muhilin ka hria, Liansangzuala'n phone a khawih a, chhe te eih pawhin min en lo, ka thawmhnaw pawh thlâk lovin khum mawng lam aṭangin ka lâwn a; ka biak hmasak a tâkah.

Khua han var se putea te inah ka kal loh pawhin ka pazawn pa Ropuia te inah ka kal hrim hrim ang. He laiah chhung leh khat ka nei lo tih a hrereng a, mi han eng emaw hi a châk ni berin ka hria.

Ka thiam chu ka ti vek bik lo. Mahse, inhauna awm hi a awm ve. Lutuk hian a...

B®®  270721

Varṭianah ka tho a, Sangzuala te pafa tui taka muhil chu ka en a, nizanah chhin khat mah ka chhing lo. Inṭhen hi ṭha ka ti hauh lo va; mahse, ka lungawi lohnain min hneh zawk miau avangin ka mamawh tur dimtea la chhuakin bag-ah ka khung a, Bawihtei hnute hnêk tur chokaah ka va siam leh phawt a, hetiang em em hian thawm ka dim thiam tih pawh ka hriat si loh.

Dâr nga a pêl hret tihah Chawngdingpuii paw chungin putea te in lam ka pan ta a, Scooty Mimtei'n a keng daih si a, kein ka kal phei hnak hnak a, ka lung a awi bik lo a ni tih hi hre rawh se. Pa Ropuia te inah kal ka tum zet naa ka ṭhulh leh ta zâwk; ka pazawn ni tho mah se chuti luain kan inpawh lo, an sual tihna ni lovin chhungkaw boruak an hriat kher kha ṭul ka ti lo a ni ber.

Pitei a lo tho tawh a, min hmuh veleh, "Ehe! Naom, eng tizia nge?" Tiin min lo zâwt a, "Lo ṭhu rawh, thingpui in ve nghal rawh aw," a lo ti sawk sawk.

"Nakinah ka hrilh ang che, putea a la tho lo em ni, Lungleia haw ka duh a, counter thlengin min thlah thei ang em le?" Ka tih chuan mitko san âk chung hian, "I lung a awi chiah lo a ni maw? I putea chu ka'n kai tho ang e," tiin an room lamah a kal nghal.

Putea a rawn tho chhuak a, a intih fel fai chhungin thingpui ka lo in a, ka phone ka switch off nghal vek.

"Pute, a tlai hmain counter-ah min dah lawk thei ang em, dâr ruk leh a chanve chhuak ka la nang hmanin ka ring a," zawi sap hian ka ti a.

"Chuti vut vut tur a ni ngai lo, ngun takin thil ngaihtuah a ṭha, eng nge i lungawi lohna ni rêng rêng?" Tia min zawh chuan nizana kan inhnialna ka sawi chhuak ta a, "Inṭhen kher hi ṭha ka ti lo a, amaherawh chu kan in lamah rei lo tê awm ve rih ka duh a, fa enkawl kawngah ka nêp tih pawh ka hria a, ka nu kiangah ka zuk inzir ṭha leh ang e," ka tih chuan pitei a nui hak.

"Kha tin lo nui vak vak suh, i ti hrilhhai dawn alawm," tiin putea'n a lo khap vat, mahse, ani pawh a nui tho. 

"Vawiin chu hetah awm la, naktuk lamah kan ngaihtuah ṭha dawn nia, hmun dang pan lova min rawn pan nachang i hria te hi ka lawm hrim hrim, nupa te chu inhau leh inhnial châng a awm lo thei lova Mama pawh zilh a ngai, upa zawk a ni a, dawhtheihna neih te hi a ṭha," a ti dam thluam.

Kan in lamah haw rih lo tura min ngen deuh tlat avangin an thu ka awih rih ta phawt, helaia ka awm chhunga min hmangaihtu leh min buaipui tam bertu an ni a, Sangzuala putea ni mah se engkim ka sawi ngamna chhungkua an nih avangin an hmai ka zah lutuk tlat, vawiin chu tihian ka awm ve phawt ang a, a ṭul a nih leh naktuk lamah haw dan tur min dappui turah ka ngai.

Tûkṭhuan kan kîl laiin Bawihpuia'n, "U Naom, kan inah lo awm char char la, u Sangzuala a thinrim ngawt ang," a ti pek a, pitei'n, "He laiah a awm tih an la hre fuh lo mai mai a nih hi, an hriat chuan rei a awm lo tawp ang," tiin a nui a, a sawi lâi mêkin Kimkima leh Mimtei an lo lang nghal.

"U Naom, kan rawn ko dawn che," tiin Mimtei a nui ṭhâ a, "Lungleiah ka haw dawn," ka lo ti hmak.

"I lamah kan ṭang tlat dawn alawm, khawi, Bawihtei kha ka lo pawm ang," tia Kimkima lo kal hnaiin Bawihtei lâk a tum a, "Ka ei kham ṭêp," ka ti leh nghat.

"I û pawh hi a ti awm ang lo ṭhin lutuka eng emaw hleka phun ânna tur zawn te, naupang chungchanga inhau fo te hi thil ṭha a ni lo a, damlohna thuah tumah indem tur a ni lo, kan thua dam thei leh damlo thei kan ni lo, midang puh mawh tur zawn hi pa ber tih dan tur a ni lo hrim hrim," ka thlavang hauhvin putea'n Kimkima leh Mimtei a hrilh a. 

"Naomi a hau laiin ka awm ve alawm, lo ṭawng ve kha a mawi si lo a," Kimkima'n a lo ti ve bawk a, "I rawn haw hma chu kan haw dawn lo a nia, tihian kan awm ve reng mai ang, Bawihtei kan ngai ve alawm," tih zawm lehin Bawihtei a pawm ta a.

Chaw an la ei bîk loh avangin pitein ei ve nghal turin a hrilh a, an pahnihin an bâr ve luklak. Min ko tura lokal ni ve bawk siin an lêt leh duh lo a, nilêngin putea te inah kan awm a, Kimkima phei chu inhnuaiah hna a thawk zui daih; Bawihtei a nîin a pua a, pitei nen kan titi ta vel mai mai.

Phone ka on miau loh avangin ka chhungte eng mah ka hrilh ta bîk lo a, nizana ka thinrimna kha a bo duak tawh. Mimtei hnenah, "I u in a hau ang che u, haw phei tawh rawh u," ka ti a.

"I lo haw ve dawn loh chuan kan haw dâwn bik lo, bâkah Mama'n min hau hrep dawn asin, kan vaiin haw zawk ang u, chu ti lo chu kan riak ve a nimai," Mimtei'n a ti tlat bawk si.

"In â siah, naktukah Lungleia haw ka tum," ka ti leh a, meng phar âwk chung hian, "I mak e, ka kal ve tho tho ang," a ti leh a.

A hnuah thutak deuh zawk hian, "Keimah vang vek a ni, ka ṭangkai lo lutuka i buaizia hrereng chungin mi âi ka kal ṭalh a, u Saitei ka lo bia anga ka kal zawm tawh lo mai ang, chhungkua inṭhen darh phahna tur a nih ai chuan hna neih loh ka thlang," inthiam lo deuh hian a ti ta a.

"Nangmah vang a ni lo, ka nêp em a, mi inchhungkhura awm ve tlâk ka ni lo," ka ti sap.

Tlailam dâr nga a ri tawh a, Mimtei leh Kimkima an haw duh ṭhak lo, kei pawh haw ka tum chuang lo. Putea te nupain engmah an sawi tawh lo a, "In vaiin riak mai rawh u," a'n ti teh ngawt.

Chutih lai tak chuan Sangzuala túm hmuk chungin a rawn lut a, "Kimkim, Mimte, a kotu tur zawk in tâng nilêng ṭhak a, lo haw rawh u, Naom, nang pawh..." tiin min melh kual den den a, hnuailam ka bih daih.

"Haw ang u.." a ti leh nghut.

"Nia, Kimkim, Mimte, i û rualin va haw rawh u, kei chu ka haw dawn lo, ka ti tak tak.." dam thlapa ka tih chuan Sangzuala'n rum deuhin min melh a, ka hawisawn hmak.

"Mama, puitling i ni tawha nupa inrem reng te hi thil theih a ni bik lo a, upa ber leh rilru puitling putu tur ber i nih angin inchhungkhur enkawl hi i mawhphurhna a ni, nupui kan nei a nih chuan dawhtheih te a ngai a, fate avanga intih thiam loh te, innghirngho fo te hi a ṭha lo," putea'n a tih chuan Sangzuala a ngawi reng. 

"In unau khan va haw phei ula, zanin chu hetah innu hi riak rih phawt rawh se," a tih zawm leh a. Sangzuala'n min rawn hnaih ruak a, "A teuh lo, khawiah mah a riak sawn dawn lo hrim hrim, Naom, lokal rawh," tiin ka bânah a rawn vuan a, ka lo ṭang ṭung.

"Ka lo haw dawn lo, tikhan min pawt vak vak suh," ka lo ti ṭhat.

"Mimte, Bawitei nen khan in lamah va phei rawh u, Kimkim nang pawh.." Sangzuala'n a ti hluk a, min vawnna a la thlah chuang lo.

"AuMam, i ti mak ve e, inṭhen i duh lo a, u Naomi haw i phal loh te chuan ṭha takin sawi ve mai ta che, inṭhen ka duh lo, ka hmangaih che.. tih a har viau em ni, luhlul hun a awm, ka thiam lo a ni ti la u Naomi pawhin a hrethiam lutuk ang che, khatia inpawh vak vak, âtthlâk lutuk," a ti bawrh bawrh a, hun dang chu nise ka nui nasa hle ang.

Sangzuala'n a nau a en vang vang a, bu nghut chung hian, "I sawi dik, ka thiam loh a ni," a ti zawi ruih a, min vawnna thlahin ka mitah chiang deuhvin min en phawt a chutah, "Nám, lo haw rawh aw, inṭhen hi a ṭha lo a, ka duh lo bawk, ka thiam loh a ni e," a ti dam thluam. Ka ngawi reng.

Putea a khuh kharh a, "Ngaidamtu awm lovin inremna a awm thei lo a, kârah fa a awm tawh phei chuan tawrhchhel te, dawhtheihna neih te hi a pawimawh, tun ṭum chu a vawikhatna a ni a, Naom, i putea ka nih angin ka thu min zawm sak la, haw phei ve phawt rawh aw, hun harsa in paltlang tawh zawng zawng kha chhût lêt ula, hetiang mai maia chhungkua intihthiam loh a ṭha ngai lo ve, Mama, i nupui hian helaiah chhungleh khat a nei lo a, engkimah nangmah rinchhan tak meuh meuhva awm a ni tih theihnghilh tawh suh, a pazawn pan lova a pasal putea a rawn pan te hi mifing awm dan a ni a, tikhan lungawi takin haw phei ula, boruak dang rawn nei tawh lo hram ula ka duh," a ti dap dap a, hnial ngam chi ninghal lo chuan.

Kimkima'n haw a rawt a, thingpui kan in leh hnuah kan vaiin kan inzui chhuak ta a, engmah ka sawi ve lo. Putea te nupain veranda thleng min thlah a, Sangzuala'n ka bânah nghet zetin a chelh a, ka sawisel ta bik lo.

In kan thlen hnuah pawh atu amah be lovin kan room-ah ka lut nghal a, "AuMam, Bawihtei hi zanin chu ka riahpui mai ang aw," a tih ri ka hre pha reng. "A nu dîl la, a phal te chuan," a ti sup.

Kan room-ah Mimtei a rawn lut a, Bawihtei riahpui ka phal em tih min lo zâwt. "I û dîl la, a phal te chuan," ka lo ti ve kher.

"Ui ui, insual dun zia hi, in phal tihna a nih chu, u Naom, ka ṭan tlat che ka tih kha, a hau leh che chuan ka room-ah i lokal daih dawn nia," tiin a nui var var a, ka nui ve tawp.

Sangzuala lo luh hmain inbual turin bathroom-ah ka lut daih. Ka thin pawh a rim lutuk tawh lo a, ka nuih te a za deuh, ka style han ṭhin dan kha, mahse, kha tia min han koh ve liam liam te khan ka hlut hmel ve deuh.

Ka inbual zawh hnuah Sangzuala sitting room lamah a awm nge awm lo ka va bih dêk dêk a, a ruak huai. Mimtei leh Kimkima pawh an lo awm tawh lo a, Bawihtei kha an riahpui dawn ta a nih hmel.

Sawi tur a vâng dawn riaua ka hriat vangin ka khawmuang lui zel a, dâr sawmpakhat a rîk tawh pawhin sitting room-ah phone khawihin ka la awm.

"Nám, rawn mu tawh rawh, sawi fel tur kan nei," tia Sangzuala'n min koh chuan ka ngawi reng a, "Ka pawm kher che i phût pawhin ka hreh chuang lo," tiin choka leh sitting room inkal pawhna laiah a ding a, ka tho chhuak ve ta nge nge e. Ka va hreh si êm.

Ngawi renga kal pelin khumah ka lawn a, a kil têah ka va mu ta a, engmah sawi lo hian khumah a rawn lâwn ve a, min si chêtin a lo tawlh pheia ka che duh ṭhak náng.

"Ka thu sawi eng lai ber kha nge i huat le," a ti dam thlup.

Ka ngawih reng avangin, "Nám, nupa kan ni a, pumkhat kan ni bawk, mihring ve tho ka ni a, i lo awm tirh tê aṭangin harsatna leh rilru natna tur tam tak i hmachhawn a, i diknaah chuan ka ṭan chea i thlavang ka hauh ṭhin tih nang pawhin i hriain ka ring," tiin a ngawi dat a.

"Sawi thui vak a ngai lo, ka muhil dawn," ka lo ti hmak a.

"I tana ṭha lo tur hi ka sawi khât khawp asin, nizana ka ṭawngkam hman chungchangah i lung a awi lo a nih chuan ka thiam loh a ni. Mahse, eng emaw hleka tihtauha tlân mai mai te hi a ṭha lo a, min nei peih ngang tawh lova inṭhen i duh tak tak a nih chuan hmaichhanah chiang takin min hrilh mai rawh, inṭhen hi i duh rêng em ni?" Tiin min zâwt ta a.

"Inṭhen hlen duh ila ka lo haw dawn em ni?" Ka ti nghat.

"Ṭhu lawk teh, ṭha takin thil sawi dun ang," tih pahin ka puansin a theh hlim a, min pawt tho zui nghal. Thinrima chë erawh a ni lo.

"Nupa chu inhau châng a awm lo thei lo, ka fel famkim bik lo a, i dik lohna leh i fel lohna te pawh i pasal ka nih angin ka hauvin ka zilh ang che, chutiang chiah chuan nang pawhin ka lakah i ti thei bawk, kan hmangaih loh te hi kan zilhin thu ṭha kan hrilh khât teh asin; kei aiin i naupang zawk a, unau zinga naupang ber leh duat rawn i ni a, kei erawh chu upa ber leh ka nau te enkawltu ka ni tih i hriat kha, hau i haw em em a, ka ṭawngkam khat lek pawh i haw hlur zela hetiang tur a ni lo, a ṭha lo lai siam ṭha tur chuan inhaua inhnial chângte pawh a awm tur a ni." A ti leh a.

"I ṭawngkam a ngeiawm thei em alawm, helaiah chhungkhat pakhat mah ka nei lo a, min hmusit niin ka hria," ka ti ve tlat.

"I ngaihdan a dik lo a nih chu, ṭawngkam ka thiam lo a, ka lung a awi lo a nih chuan ka nupui bulah lo khawiah nge ka sawi ang a, ngawi rengin ka en liam tawp thei lo che, insiam ṭhat kan ngai ve ve a, ka hmangaih che avang leh kan mawhphurhna a san êm avang hian puitling ve la ka duh êm a ni," ti lehin min kuah a, ka lo ṭang ru ṭeuh.

"Ka hmangaihna che hi tun hnaia thil thleng a ni lo tih ka sawi tawh kha, nangin min hmangaih hma daih khan 'Naom Lalmuanpuii' hi ka lo hmangaih tawh che, chuvangin thil ho mai maia ṭhen tumna che ka nei lo a, i hrehawmna leh natna thlentu nih ka tum hek lo, ka damchhung leh a piah lam ram thlenga hmangaih zel tur chein Liansangzuala hian thu ka tiam asin," zawi supin a ti ta a, ka insût hraih.

"I ṭap elaw?" A ti leh a.

"Aih," ka lo ti.

"Pathian ruat kan nih loh chuan Setana a inrawlh thûk hle a ni ang kan inkârah hian tih ka sawi tawh kha, kum kha leh chen pasal neiin fa i nei lo a, kei nen kan inneia Pathian malsawmna dawngin Chawngdingpuii kan nei tih i theihnghilh ta em ni, kan mihring ṭhatna ringawt hi nupa inkârah a tâwk zo lo va, rei a daih dâwn bawk lo.

Mihring inhmangaihna hi chu a chuai theia a dal thei bawk, Pathian aṭanga chhuak hmangaihna kan neih ve ve a ngai a, chu chuan ngaihdamna te khawngaihna leh lainatna, dawhtheihna chenin a keng tel vek; chu nun chu kan nupa leh kan chhungkua hian kan mamawh ber a ni," dam thluama tiin ka tukkhumah hmai a phum a, thaw hawk chung hian, "Ka hmangaih che asin Naom," a tih leh meuh chuan amah en turin ka in her a, mittui parawl ṭeuh chung hian,

"Kei pawhin ka hmangaih che," ka ti ve sap.

"Chhungkaw vanram siam turin kan pawimawh a, mihring tih theih loh titheitu Pathian kan belh tlat a ngai," ti leh supin a rawn kun hniam a, "Ka nupui i nih vang pawh ni lovin mi rilru ṭha tak i ni a, keimah zawk ka dik lo fo ṭhin, i rilru ka tihnatna zawng zawngah khan ngaihdam ka dil a che," a tih chuan, "Eng lo, i sawi thui thei êm mai, keimah zawk ka dik lo, ka sawi ve thiam bawk si lo a, tihian a ni mai," tia ka sawi zawh rualin a hmuiah ka fawp ta zawk a, uar deuhin min lo fawp lêt ve nghal.

Thaw hawk chunga min thlahin, "Ka sawi uluk teh reng nen i ti ho zo vek, nangmah hi a nih hi mi ho chu..." tiin a nui huk a, "Liansangzual," ka lo ti hlak.

"Kan pahniha a vawikhatna turin ka ṭawngṭai ang a, zan dangah chuan kan inchhâwk tawh dawn nia," thutak deuh zawka tiin ka kut pahnih vuan chung hian a ṭawngṭai ta a. 

A mizia ka ngaihtuah a, a nun dan ka hria a, ka tana a inpekna leh min hmangaihna thûkzia ka hrechiang bawk, a dik lo zawk leh huatthu chhe zawk chu keimah ka ni, rilru ṭawngṭaina te, chaw ei dawn ṭawngṭaite nei ve fo mah ila; tuna a tih ang hi vawikhat mah tih tumna ka nei ngai lo a, ka nun min kaihruai tur leh thutaka min hruai thleng theitu tur chu ka pasal Liansangzuala ngei hi a ni. 

A piangthar ṭha hluah, a chuti khati tih sawi ngai lovin kan tun hun hi a pawimawh ber. Nun nghet, rilru puitling leh tum ruh, hmangaihna ngah tak a ni a, a chhungkua humhim tur hian tlâwm zawk nih a hreh hek lo. Chu a tlâwm theihna chu Pathian aṭanga chhuak a ni si a. Ka zah thar sawt a, ka ngaisang bawk.

Min kuah hlu hlu chung hian, "Paradise i kal khât ropui sia ka hruai ang che chu i duh em?" A ti a, zinglam dar hnih a ri tawh.

"Eng nge i sawi awmzia?" Ka lo ti a.

"Leiah hian Paradise kan nei ve tho tih i hre na nge?" Tiin a nui huk a. "Fiamthu thawh hun a ni lo," ka lo ti.

"Kan la hria ang chu," a sawi zawh rualin a taksa chungah min hlang chho nawlh a, "Ex Regiment nupui chu a fit hle tur a ni," nui suk chunga tiin a lamah min kuah hnai a, dam thlap, phüt let nei rana min fawhna chuan ka chhungril a fan raih raih. 

Kan thawmhnaw inbel chhun chhuata a vawm thlak zawh meuh chuan phurna mitmenga min enin, "Ka ta i ni tih i hriat nawn fo theih nan i pasal hian chêt ka la hmasa ang," thâm supa tiin min fawp zui leh zat a, ka lo insiam rem ve vat.

Ni e, kan inneih hma khan Seol kan dai hmasa a, chunglam duh loh zawng ber sual lian tak, hremhmun tlâkpui tham a ni. Mahse, tunah chuan chunglam hriatpuina ngeiin ka pasal nen Lei Paradise kan dâi dun zo chiah. Liansangzuala ta ka ni a, ka ta a ni bawk.

"I thinrimna niin tlâkpui suh se, tih a nih kha, chu chu kan nupa hian kan vawn reng a ngai, inhnial châng kan neih pawhin a ṭha zawk nghâk chhuak tur tala tlawmna nun kan neih theih hi a pawimawh ber," tiin a mah si chêt hian a âwmah min kuah bei a, "Muhil rawh le," tiin light a off zui ta a.

Ka harh leh chuan nî a chhuak ut tawh a, dar riat a ri ṭep.

Choka lamah Mimtei a zâi rât rât a, midang thawm ka hre lo. Kan room kawngkhar a rawn inhawng a, Sangzuala te pafa an rawn inpawm lut a, "Chief Minister fanu i nih loh kha thawh a hun," tiin a nui suk.

"I chhia, nge min kaih thawh loh," ka lo ti a.

"Tu emaw kha chu nimin zingah kaih thawh ngai lovin varṭianah a tho a(h)..." tia a nuih kur kur chuan ka run lutuk, lukham pakhat lain ka vawm a, a thle sawn zauh. 

"Bawihte, i nu mizo hming dik tak chu Muanthinawrhi," tia nui hawk hawk chung hian room an chhuahsan ta a.

Tûkṭhuan hlim takin kan kîl a, Kimkima'n, "Masiamin a dawr hnuai luahtu Hmuna a luhkhung a nih chu," tiin a ner nawk.

"I rilru a na em?" Mimtei'n a lo ti hmanhmawh a, ka nui hak.

"A teuh lo, ka tâng laklawh mai mai a nih kha," tiin a nui a, "Monu hual kan nei alawm, an hming tawp a in ang," ka tih chuan an pathumin min en ṭhap.

"Tu nge a?" Sangzuala leh Mimtei'n an ti rual ṭhawt a, nui chung hian, "Ka sawi duh lo," ka lo ti a, Kimkima a sen awp awp.

"Nupui/pasal in nei duh a nih pawhin kan chhungkaw dinhmun min hriatpuitu leh min hmusit lo tu ni hrâm rawh se, in thlan sual chuan chhungkua kan hlim lo ang a, in thlan thiam erawh chuan chhungkua hlim tlang takin kan chêngho zel thei ang, chu mi ni tur chuan Pathian a pawimawh hmasa ber," Sangzuala'n a ti ta a.

KUM HNIH HNUAH.

A nuam vek neiin hausa thûr lo mahila tu chhungkua mah kan awt bik lo. 

Mimtei Christian hospital Lawngtlaiah nurse niin, kum chanve dâwn a thawk ve tawh a, Tlanhlua pawhin discharge dilin a rawn chhuak fel tawh bawk, Mimtei nen an inzui nghet ve ta, tlangval ho tak leh pâwt peih deuh a la ni ta fo. A rawn zin ve fo a, Sangzuala a strick thei ṭhak ṭhak khawp mai, "Zu in mi mâkpa atan kan duh lo," a ti deuh ngei. Tlanhlua huat tâwk a tling thei a nia.

Inneih lam te pawh an sawi ve zauh zauh tawh a, chutih laiin Tlanhlua pa hriselna dinhmun a tlâkhniam avangin an tawlh lo thei lo a; Pathian zarah an la innei ve thuai thoin ka ring.

Kimkima pawhin 'Bar Exam' a pass tawh a, sual lam kawng áwn lova hmalam a pan zel avangin kan lawm hle. A hnena ka lo sawi tawh ang khan a pass tih kan hriat hnu lawkah ka ngaidam tluantling tih ka hrilh a, min kuah chung hian, "Naom, kan chhungkaw tana i hlutzia hi ka theihnghilh tawh ngai lovang, ka û nupui i ni satliah lo a, Mama nen hian ka nu leh pa tlukin ka zah che u a ni tih min hriatsak dawn nia" a ti ve ngei. Ka va lawm si êm.

A dan pangngaiin Chawngdingpuii a hauh hlur a, pate Duhsanga'n Sangzuala tana in a dah kha Kimkima'n Lungleia a awm chhungin a luah a, hetia a advocate tâk hnu hian hnathawhna hmun atana a duh thu sawiin a hnuai zawk mi kan luah tir a, a luah man pawh ama'n húiin a chungah aniin office tênau deuh hawn ve a tum thung. 

Lawmkimi nen an inngaizawng tih ka sawi ngai miah lovin ama'n a û leh Mimtei a hrilh a, a tîr chuan an lawm lutuk lo. Mahse, an inhmangaih zia an hriatchian tâk hnu kha chuan an sawisel ta bik lo. 

"Lawmi ber kher, a dang i hmu awm reng si a," tiin Mimtei'n a u a ner khum nasa hle. Ani lah chuan, "Ka hmuh ve tâwk a nia, min pawmpui mai a ngai, Tlanhlua pawh ka sawisel sak bik lo che," tiin a lo chhâng a. Thu leh awm miah lovin a zo der.

Ruatdika'n dan ang thlapin nupui a nei a, Sangzuala ṭhianah a hmang deuh ngei. Kan thinlung takin kan lawmpui a, kan hnena awm ve ṭhin Bawihpuia kha Chennai-ah awmin nakum lamah a rawn chhuak thei turah kan ngai. Putea te nupain min ngaihsakna an la ti lang renga kan tan nu leh pa nih an tling hle. Chawngdingpuii pi leh pu an ni miau a.

U Chhanhima te nupa an inrem leh tawh a, u Diki pawh kum chanve meuh koh lova a awm hnuah amahin a lo haw leh tawp a, fapa ninhlei leh ṭahbelh zet an nei! Mahse, a hmelṭha vei fu. Ka nu leh pa pawh an hlim a, an thu ka awihna rah chhuah a lang mêk. Pathian zara kan dam a nih chuan kumin Krismas chu an kiangah hman ve ngei kan tum tih Sangzuala'n a hrilh a, an lawm hle.

U Chhandama te chhungkua ve thung chu Champhaiah zawk an transfer ta daih a, kan inbe pawp reng tho nain kan inhmu thei ngang lo, video call in Dingpuii an rawn be ṭhin a, thawmhnaw leh neuh neuh an rawn thawn fo bawk. Ka ngai viau ṭhin a, Sangzuala laka ka lungawi loh deuh pawhin anni nupa hi ka hrilh hmasa bera min zilh nek zel. Û ber na na na chu engkimah a puitlingin a ráwn tlak a, ka thlamuanpui viau bawk.

Kan fa pahnihna tur ka pâi leh tawh a, tunah thla li a pum ve chiah. A hmaa ka lo sawi tawh Wholesale dawr siam kha kan puitlin ta rih lo, kan in hnuai ber kan sa pum a, Sangzuala kutkawih deuh vek a ni bawk. A thâ a sêng hnem hle, a puitlin zia leh a rilru ṭhatzia ka hmu tam telh telh a, inhnial châng te, in hmuh fuh loh châng nei ve ṭhin mah ila; kei teh ngawt âi chuan dawhtheihna a ngah fê.

Lungleia kan in patea pêk tih loh hmun dangah eng in hmun mah kan nei lo a, tuna kan awmna hi a ni leh tawp. Chuvangin a naute pahnih hriat lêm lohvin a ṭhen hrang thlap. A hnuai ber tuna kan khawih mêk hi Mimtei pualin a dah a, a lai tak; tunhmaa kan awm khâwmna ṭhin kha Kimkima tan a dah bawk a, tuna kan luah lai hi ama hming a ni thung. Engkim ka hriatpui thlap.

"Nakinah kan chhangchhiat han reh deuh se, eng emaw thawh tur kan la ngaihtuah dawn nia, Wholesale dawr siam nan a la tlai hleinem," a tih chuan, "Ka rai theih chhung hi chu kan siam nguar ang," ka lo ti a.

Nui hawk chungin, "Naom leh.. chutiang ka ni bîk em em lo, i hriselna dinhmun ka hria a, Bawihtei zai chhuah a ni bawk a, a âwm tawk ka hria, tun bâk kha chu khawvela i awm chhungin pâi loh tir che ka tum ang," tiin a nui kur kur.

Kimkima'n palâi tirh ve a rawt a, a nupui hlui Masiami khan pasal dang a neih tâk avangin dan angin a nei thei tih a sawi a, Lawmi'n hna nghet a nei a, an ngaihtuahawm lo turah ka ngai. 

Amah Kimkima tak pawh mi inzir mi a ni a, ukil ṭha tak a ni tih sawi nawn ngai lovin ka hria; a buaithlâk lai ber chu Lawmi hnathawhna hmun hi Lawngtlai a ni a, Kimkima'n Lungleiah office angreng deuh a nei ve bawk si a, an insawi rem thei êm ang chu maw. Nupa awm hran nghal kha ṭha kan tihpui vak lo.

"Nám, lokal teh..." tiin Bathroom aṭangin Sangzuala'n min ko dút dút a, hmanhmawh takin ka phei nghal a, eng thil nge tia ka zawh chuan, "Ka nupui nen inbual rual ka châk deuh thut.." zuk ti a, ho sihsah ve.

Mahse, a thu awihin ka inphelh sawk sawk a, kan inbual dun ta nge nge e, ka pum puar âk chu chûlin, "Tuna mi hi chu Bathroom-a kan siam a nih ka ring," tiin a nui huk a, "Liansang..." ka sawi zawh hma hmain a hmuiin ka ṭawng leh tur a khar chhilh hmiah. 

Ni e, ani nen hi chuan nupa kan ni bîk hliah hliah a, Bawihtei a awm ve bawk si avangin kan nupa khum kan sawn zing hle.

Kimkima leh Lawmi inneih aṭanga kâr thumnaah fapa pahnih kan nei ta, phir ka pai tih kan hre lâwk a, a unaute lakah kan zêp deuh ngei. Mimtei thawhna hospital-ah min zai leh ta a, min siam nghal vek bawk.

"Nám, ka lawm e, ka hmangaih che," ti supin ka sam pawr chap chu min chúl mâm sak a, a fapa te pahnih enin, "Pakhat zawk hi Regiment-ah ṭang se, pakhat zawk hi BA máwl tur," a tih chuan thei leh thei lovin ka nui a.

"I chhe em mai, ni lo lo hian ṭawng ṭhin teh suh," ka lo ti a.

Nui ruh ruh chung hian, "A nu emaw a pa zawk pawh nise a tu emaw zawk zawk hi chuan min chhun dawn alawm, lo ngai reng rawh," a la ti cheu.

Mimtei a buai ṭhin si a, a hunawlah Dingpuii a chang deuh chawt. Lawmi a fel khawp mai, keimah vang liau liauin chawlh a la, inhnuai kha room-atan an hmang a, inchungah ei leh in kan infin thung. Min buaipui hnehsawh khawp mai, Sangzuala a âwl let ling a, tunah chuan neuh neuh awm lovin chhungkua dik tak kan ni ta.

Ka nu leh pa te pawhin min ngai mah se keimah avanga rilru hahna an nei ta lo tih an sawi.

"Naom, ka nupui ni tura ka sawm lai che khan, Chatuan daih turin asin thutlûkna ka siam, ka hmangaih hmasakber leh hnuhnung ber i ni a, i ni kumkhua ang, ka fate tana nu ṭha ber nih tum la, kei pawh in tân pa ṭha ber nih ka tum bawk ang, chhungkua tidarhtu ni lova huikhawmtu ni turin i pawimawh si a..." nghet charha ka pasal Liansangzuala ṭawng chuan min hneh kher mai.

"Sipai pa, ṭawng reng lo khan kan fate hnêk tur hnute siam rawh le," tiin ka nui hak a.

A lo nui ruh ruh ringawt.

Ni e, chhungkuaah hian sual rawng pakhat chauhvin a bawl pawhin chhungkua a keh darh thei a, pakhat tê chauhvin a ṭha lam kawng a zawh pawhin chhungkua a siam ṭha ṭhin.

Chapona leh thei ve ni-a kan inhriatna te, u leh nau inhmangaihna vawnghim zo lo a, duhâmna leh îtsîkna thinlung kan put rân chuan engtik ni-ah mah Kristian chhungkua kan din thei ngai lovang.

Chhungkaw Vanram siam tur hian kan chhehvel ami te ni lovin a chhunga chêngte ngei hi kan pawimawh si a, pakhat ringawt ṭhat a tâwk zo lo fo ṭhin; inhmangaih tlâng taka kan awm hian khawvelah chu aia hlu leh ropui a awm thei dawn em ni?

Nang leh kei kan pawimawh si a.

Nu leh pa thuawih hi dam reina leh malsawm dawnna a ni a, keima duh dan khan lokalin Liansangzuala hi nei lo ta ila tun dinhmun hi ka thleng dawn si lo.

Kan chhungkua, ka pasal fanau te hian 'Naom Lalmuanpuii' dik tak an la hmu chho zel ang. Thlâkthleng nun ka nei ta si a.

B®®

B+>[BeckirafARenthleI]<+®®

NOTE: He thawnthu ka ziah theih nâna ka tih buai te, ṭhianpa Rosiama leh Hmangaihsanga, u Saitei leh nu Hlutei, Sangtei te leh Mimi-i te chungah lawmthu sawisen loh ka bâ. Anni awm lo se keini ve teh lam hi kan âk thei dawn si lo a, an chungah ka lawm takzet.

*He thawnthu hi a tak behchhana ziak ka ni lo a, ka ṭhianpa em em Assam Regiment-a min ṭansan ta, a thi tawh emaw ka lo tih ve char char hriatrengna atana ka ziak a ni a, happy ending tur a tana ka duan a ni lo. Chapter 14-naah mittui nen Liansangzuala thlah liam tumin ka ziak a; mahse, ka ṭhianpa bera kha a lo la thi awzawng si lova amah nen kan inbe thei ta hlauh. Chumi zarah chuan hlim takin a tawp kan khar thei ta a ni e. Ama chanchin ziakna pawh a ni chuang lo.

Kan Mizo mipate hi tamtak sipaia ṭang an awm a, rilru nei fe fe tam tak an awm tih tar lan nana ka ziah a ni pakhat. 

Ka thawnthu 'NAOM' min chhiarsaktute leh youtube lama min ngaihthlâksak ṭhin tute chungah ka thinlung takin lawmthu ka sawi a, in tân thawnthu thar nen rawn lêt leh vat ka tum dawn nia.

Duhthusam lo lai, felhlel leh ngaimawh a lo awm a nih pawhin in mi hriatthiamna ka ngen a, hmasawn zel tur kan nih angin ka lo inzir belh zel turah ngai ang aw..

A thawnthuin a tum ber hi min bawhkân sak êm lovang chu.

Thawnthu Lawrkhawm channel neitupa hi Ex-Regiment a ni lova a ziaktu pawh hi sipai nupui ka la ni ta lo fo...🤭😬😬

Min chhiarsak/ngaihthlâksak tute zawng zawng chungah lawmthu ka sawi nawn leh e.

Gracias (Ka lawm e)

-B®®

Becky Rafa Renthlei

B+>[BeckirafARenthleI]<+®®