22.24-89[A Becky Rafa Story]

22.24-89 

Ziaktu: Becky Rafa Renthlei

[Recap]

Heti khawpa ti thinrimtu leh Sakawlh ang maia a awm thut nachhan hi kan hriat ve a ngai a ni.

"Samuel Pamei khan ka farnu pawngsual a tum a nih chu..ni lo..a pawngsual tawh zawk mai thei.." ti supin a meng rum ûl a, a bâk zawh belh ngai ka ti ta lo.

Lalngurmuana ka pawm nawlh a, "Kha, ani hi lo pawm lawk rawh," tiin Rishan kutah ka fapa ka hlan a, kan mamawh tur zualpui ka khâwm sawk sawk a, Jeho hmanhmawh lutuk phi sek chu, "Motor va la chhuak rawh," ka ti leh a, a rum dut ringawt.

Samuel Pamei a thih phawt loh chuan keini nupa hian nun hahdam kan nei ngai dawn lo a nih hi...

-B®®

A farnuin buaina a tawh meuh chuan kan Laljeho thluak a buai vek tih theih a ni. Samuel Pamei hi Tleipuii tan chuan a pahrawn a ni a, an naupan lai aṭanga a nuin "an patea" anga a chhâl vangin "Pate" tiin an ko vek a, hmanni lawka Jeho pa dik tak a ni tih hriat chhuah a nih aṭang khan Samuel Pamei hian an patea a ni lo tih a tilang ta ni maiah ka ngai.

"Rishan, kha ai khan kan tlan chak thei lo em ni?" Tiin Jeho chuan a tur sek a, kan fapa Lalngurmuana nausen buchip lutuk pawh khawvar dawn hnaihah kan chhuahpui a, zai chhuah a nih bâkah thlakim lova piang a la ni zui. Ka ngaihtuah em em a, kei ngei pawh tihi ka la ni a, ka pasal hmai ka zah avang leh Tleipuii ka ngaihtuah vangin ka zui ti ila a dik ber ang.

Mawkasiang thlen nân dârkâr khat erh awrh hun kan hmang a, zinglamah traffic jam a awm loh vang a ni pakhat. 

Jehomalsawmkima hmel ngêng ngulh leh hriam fahran chu han hnema han biak lumlam ka tum bik lova, a hma lawka kan inkâr boruak ṭha tak te kha chu mumang ang mai a ni leh tawh.

An inpui kan thleng a, Rishan nen kan chhuk fel hma hmain Jeho chu rang lutukin motor aṭangin a chhuak nghal a, ṭîk pawh tih hman loh hian inchhung lam panin a tlân a ni hrim mai; Rishan chuan, "Madam, nautê kha ka lo pawm rih ang e," tiin inchhunga kan luh veleh Lalngurmuana min lâk chhawk nghal a, îhe lovin ka pe ve mai.

Inhnuai room aṭangin thâwm bengchheng tak a rawn chhuak a, Rishan melh zeuh chung hian, "Ka chhuk ve dawn a nia," tih leh step zawh thlâk ka rual a, Rishan erawh chhungkaw thil a nih vangin a inrawlh lem lo.

Inhnuaia pindan pakhat, Tleipuii nau neihna room bulah khan Jeho a lo ding a, kawngkhar chhunglamah a inkalh nge a tlawh bur bur a,  "Rawn hawng ta che u maw le.." ti tuar tuar chung hian, a tlawh leh bur a, vawilehkhatah kawngkhar a inhawng rawp mai. Jeho a lut nghal a, room chhunga ka thil hmuh chuan ka thluak a tinghîng dawt.

Tleipuii chu bangkil lamah a lo ṭhu tawm chaih a, mi â ang maiin a meng buai vek bawk a, a thawmhnaw a ṭet phung bawk, a kawr âwm thlêr duai aṭang chuan a âwmbâwr a ngai ngaiin a lang huai a; a khurh nasat êm avangin ka pan phei vat, Jeho ve thung chuan chhuata nikhaw hre lova let reng Samuel Pamei chu a din chilh a. 

Engtin chiah nge an lo intih hre lo mah ila, Tleipuii lan dan ṭha fahran lo aṭang chuan Samuel sa huatah engtin emawni tak a ti a nih ka ring, thisen hmuh tur a awm lova a lang thei chinah pem leh hliam a awm si lo.

"Tleipui," tia ka koh veleh a phu zawk a, min en naa min hmu angin a awm lo. Jeho chuan a farnu chu a pawm nawlh a, "Ngurthan, min lo zui rawh, a room lamah ka pawm chho dawn a, i lo awmpui dawn nia, ani hi chu tihian awm rih rawh se, a harh lawk lovang," tiin chhuata Samuel mu hlawm reng chu a melh zuk a, khawngaih hmel a pu lo.

Tleipuii room kan thlen hnuin khumah dimte hian a mut a, "I u hian engkim ka ching fel ang, inthing harh rawh le," tiin a nau samah a chûl a, Tleipuii a ṭap chhuak ta phawng mai, Jeho chuan a kuah ta a, "I rilru damna tur a nih chuan ka pa pawh nise a thi mai tur a ni," tia a sawi zawh hnuah, "Tikhan lo inbuaipui ula, a thawmhnaw te kha i lo thlâksak dawn nia, ka nu ka'n zawng lawk ang e," tiin a chhuak zui nulh.

A ni dawn teh tak e, min lo call tu nu Pianmawii kha ka la hmu hauh lo a, a tlan bo êm lovang chu maw.

Tleipuii ṭap hliam hliam chu a thawmhnaw ka hlihsak a, Zonunthara pawh ka la hmu ta lo fo, an driver Habib kha a riak ve lo nge eng mah ka hrethiam tawh lo. Angelika pawh a rawn lang chuang lo, ruahmanna fel fai tak hnuaia thil thleng a va ang si ve le.

"U Ngurthan..." tiin Tleipuii a ṭap leh a, a kawr ka thlâk zawh fel hnuah ka âwm nghengin ka kuah ta a.

Minute sawm aia rei kan ngawih hnuin a ṭah chhuak zualpui a reh ta a ni ang, a inla hrang a, khum kil lamah tawlh pheiin, "Samuel kha a thi ang em?" Tiin min zawt a, "Ka hre bik lo le, thil thlen dan chiang zawkin min hrilh ta che," ka lo ti sap a.

A khuh kharh kharh a, a mittui parawl ṭeuh a hrûk fai leh hnuah heti hian a sawi ta a, "Samuel khan Buatsaiha Aizawla kal turin a tîr a, nupui angreng deuh a nei tih ka hriat thâwi tawh avangin Buatsaiha kal tur chu ka lo dang ta a ni. Mahse, ka nuin zan hnih bâk a riak dawn lo tih min hrilh a, keiin kal ka phal chuang si lo a, Buatsaiha a kal lui ta a," tiin boruak hîp tumin a thaw kâwk a.

"Buatsaiha kal tur chu, i kal lui a nih chuan nang nen hian kan inṭhen ang tiin ka hrilh a, min chhâng lovin a kal lui ta tho. Chumi hnu chuan ka fapa nen room-ah kan awm a, a mut fel hnuah Samuel Pamei a rawn lut hlawl a, Zonunthara muhil lai pawmin, 'I nu hnenah zanin chu riak rawh se' a ti a, amah ka lo ngei ve sa bawk si nen kan inhnial ta alawm," tia a sawi mêk laiin Jeho leh a nu an rawn lût a, nu Pianmawii chuan Zonunthara a pua a, a hmel a chul rap rap khawp mai.

"Tleipui..." tia kovin a pan hnai ruak a, a nu melh rum âl chung hian, "Ka mamawh lai che khan khawiah nge i lo awm, i pasal hlui Samuel hi engvanga ṭanpuia a lam ṭang tlat nge i nih?" A ti khûr dar dar a, Jeho chuan a nu lam hawiin, "Tunah chuan i chhanhim zo tawh lovang, zanin la la hian Samuel hi Khatam hmunah ka hruai dawn, a ṭul a nih chuan ka that hreh lo a nia," a ti hmiah.

Nu Pianmawii chuan, "Bawiha, i pa a nih hi.." tih chiah a sawi.

Jeho a ding khawng luh a, "Ka pa chu a thi tawh, ani kha ka pa a ni kumkhua dawn lo," tih pahin a farnu a melh a, "A tina che em, a pawngsual tak tak che em?" Tiin a zawt tlang pawp a, thu khuh te hi a thiam lo ṭhin si a, a aw lah ngaihno bei tak a ni hek lo.

Tleipuiin a u chu a en a, hniam leh zawi raih hian, "Min pawngsual âi chuan thih ka thlang zawk, a serhah damdawi bûrin ka vuak sak a, tikhan a awm zui ta a nih kha," tia a sawi lai chuan ka nuih a lo za deuh a, nu Pianmawii a awm ve reng bawk nen a zia viau lo.

"Ka nu, hei hi lo hria ang che, kan unau laka i thil zêp lian tham zet avang hian buaina leh harsatna, natnain min tlâkbuak a, nun râlmuanga kan awm theih lohna chhan hi nang leh Samuel vang a ni, Buatsaiha hmanruaah in la hmang tel cheu a, tunah chuan in pathum hian nun hrehawm reng rengin in damchhung ni in chhiar tawh ang," zawi fiah taka a tih hnuah min rawn melh a, "Rishan va ko rawh le," tiin min tîr a, khum aṭangin ka tho chhuak vat.

Rishan kut aṭangin ka fapa ka la a, Tleipuii te room-ah kan inzui lût ta a, nu Pianmawiin Tleipuii fapa chu khumah a lo mut mek a, ka pasalin Rishan hmel a hmuh veleh, "Samuel khu a kut leh ke-ah phuar la, Gurkha hnungah kan dah dawn nia, Khatam hmunah a dam chhung ni a hmang tawh ang," nghet churhin a ti a. 

Nu Pianmawiin, "Bawiha, i farnu a pawngsual hlawh tling pawh a ni lo a, a chungah zah ngai hrâm rawh," tia a ngensak ṭâwk ṭâwk pawhin Jeho chuan a chhâng duh lo reng reng.

Beidawng zeta a nu kal chhuak tur chu ko ding leh rihin, "Buatsaiha lokir hunah kan boruak leh kan thil tawn hi sawi hlek suh ang che, Samuel Pamei chhanchhuah emaw a awmna chin i sawi chhuak a nih chuan i lakah zahngaihna ka lan tîr dawn miah lo a nia," a ti leh ta a, a nu hmel ka va en a, a ṭah a chhuah hmel hle.

Chumi hnuah Rishan leh Jeho chuan Samuel Pamei an rawn zawn chhuak a, a harh ṭan deuh nge a rûm dut dut a, thlanin a bual huh chup bawk, Gurkha hnungah an dah hlawm tawp a, mahni pa te hetia han tih chu Jeho rilru engtin tak awm ang maw.

Tleipuii pawhin ngai a awh ṭan tawh a, a hlauhna te khan a kiansan ta deuh a ni ngei ang, a tho thut a, a wardrobe a hawng a, a dap ngial hnuah Chemte a rawn phawrh chhuak a, meng ling hlar chung hian, "Tumah pawngsual thei lo tur leh a damchhunga a mipatna a hman zui tawh loh nan ka'n hleh sak ang e," a ti ta a, a tum a ruh hmel hle.

Nau ka pawm bawk si a, khuma a fapa mu pawh ngaihsak lo hian room a chhuahsan a, ka koh lawm lawm pawhin a hre lo der tlat tawh. 

Nu Pianmawii kha ama room-ah a kal ta a niang a reh zui hmak a, Jeho thil tum a dâl zo dawn chuang lo tih a inhria tepawh a ni mahna.

Minute sawm hnu velah Jeho, Rishan leh Tleipuii an rawn lut a, a farnu bânah nghet takin a chelh a, Tleipuii Chemte ken chhuah kha aman a rawn hûm lut bawk a, "Ka kutah engkim dah rawh, ka chhuah zalen dawn hleinem, tihian inpuiah lo khawsa leh phawt la, Buatsaiha lokir hma chu i la chen rih a ngai, engkim a chinchhuaka kan hriat hunah, i awmna tur ka ngaihtuah dawn nia, nipui chawlhbûkah pawh i tan hmun a awm reng aw," tia a farnu a hrilh mial mial laiin Lalngurmuana hnute châk a ṭap ta a, a uar mai bawk siah. 

Khua a var titih tawh a, ka mit a thial ûrh mai.

Ka fapa hnute hnek tur siamin ka buai zui ta a, Jeho te lam pawh ka ngaihven ta lo. Tleipuii ber a pangngai chho tawh bawk a, kan ṭha tlâng turah ngai ang.

In puiah tukṭhuan ei law law kan tum ta a, chumi hma chuan Rishan khan JK Farm-ah Samuel a va dah dawn a ni, Arun pawh Jeho khan a be vek tawh a, "Khatam-ah lo dah ula, ka lo haw hunah keiman ka dâwp ang," tiin a hrilh vek.

Angelika hmel ka la hmu lo fo chu mak ka tih êm avangin Tleipuii ka zâwt ta tawp a, "A ṭhiante inah weekend hmang turin nimin tlai khan a chhuak tawh a, u Ngurthan, ka fapa ngaihtuah hle lo ila chuan thih ve daih ka châk," a ti sap a.

"Khatiang zawngin ngaihtuah mah ta che, chhel taka i awm a ngai zâwk a nia, Buatsaiha leh i nu ruahmanna hre tur tal pawha i dam hi a la ngai asin," ka tih chuan, "Rawn haw teh se, a châk lo khawp ang," a ti ta.

Tleipuii room ah Zonunthara leh Lalngurmuana kan mut tîr a, an mutui hle bawk. Nu Pianmawii leh Jeho dârkâr chan ve aia rei an inkhung tawh a, an driver Habib pawh kan boruak hre miah lovin a lo lut a, Tleipuiin, "Naupang pahnih kan khumah an mu a, lo ngaihven lawk mai teh," tiin a tîr zui a, ani pawh a kal ve mai bawk a.

Jeho phone dawhkana awm chu a rîk chhên avangin ka thil tih lai kalsanin ka va chhânsak ta a, Aryan a lo ni.

Hello, ka tih veleh, "Madam, kan rawn chhuak tawh a, Sawlad-ah em ni in la awm?" a rawn ti a, inpuia kan awm thu leh vawiinah farm house kan pan dawn tih ka hrilh a, "A ṭhat chu, kan thlen chin ka lo sawi leh dawn nia," tiin phone a dah ta rih.

Jeho te em em pawh chu eng nge an sawi tehreng ni!

Tleipuiin phone a hmang a, a ṭawng dan aṭangin Vansangi nen an inbia a nih hmel, "I pa lakah hian ka lung a awi lo hle a ni," tia a ṭawng laiin a bulah ka va ding a, hmui phunin, "Ani va be buai tawh suh," ka ti a, koki san âwk chung hian phone a dah ta a.

"Samuel hi chu ka ngaidam ngai dawn lo a, Mama'n a that hreh a nih pawhin tûrin ka hrai hlum tal ang, ka pa a that tak tak a nih phei chuan dam tlâk niin ka hre lo," a ti hmak hmak a, a hmaa Tleipuii kha anna a nei tawh lo, Jeho farnu te pahnih hi an duai lo ru riau mai.

"Kei pawh min sual a tum a nih kha, a thil tih dik loh zawng zawng hi a phur zo dawn si lova, ka khawngaih lâwk.." ka lo ti a, Habib a rawn chhuah tâk avangin kan ṭawng zawm ta rih lo.

Tûkṭhuan ei dawnah Jeho a rawn lang hlawl a, a hmel a dur khup a, "Ngurthan, chaw ei kham veleh Jk ah kan lêt a ngai dawn a, Sawlad-ah pawh kan pêng khawtlai lovang, Tleipui, ka nu khi ngaihven hlek suh ang che, a luhlul a chhuah tlat a, ṭha tea zawhna ka zawh pawhin min hrilh ṭha duh dêr lo, ka nu ni lo se chuan kut thlâk hial a nia ka duh.." a ti nghut nghut a, a lung a awi hlawl lo a ni ber.

Naupawm chungin chaw ka ei a, Habib pawhin kan zîngah dawhkan a kîl ve a, Zonunthara a kuah rân a, a nu a âwl letling.

Tumah kan ṭawng zawm tawh hek lo.

Rishan khan Gurkha a khalh haw avangin Tleipuii Car kan hman a ngai dawn a, dik tak chuan ka fapa ka ngaihtuah lutuk tawh a, ka chau em em bawk si.

"Buatsaiha lo thlen veleh Samuel Pamei awmna a zâwt ngei dawn che a, eng mah lo sawi suh aw, i himna tur ka ngaihtuah a, i pasal lâktlâk loh lutuk leh duhâm zet lak aṭang hian tâl chhuah dan dap ang che," tiin Tleipuii a hrilh leh tê tê a.

"I u Ngurthani pawhin chawlh hahdam a mamawh lutuk, niminah a ṭhuina kan phelh tîr chauh a, hetiang boruak kan tawn leh tâk si avang hian kan duh ang pawhin kan awm thei lo, tun ṭum chu Samuel Pamei lakah zahngaihna lan tîr ka tum thertê lo," tia a sawi laiin a nu a rawn lang ve ta.

"Ngurthantluang, ka fapa thluak neihsakin hruai kâwi tum mah la, ka fapa a nihna a bo chuang dawn lo," tiin ka hma zâwnah tak a rawn ding a, Jeho ka va melh a, inrawlh tum hmel a pu si lo.

Nu Pianmawii chuan min melh ngar a, "He in chhunga i rawn luh hma kha chuan eng buaina mah kan nei lo, chhungkua kan hlim a, i rawn lan aṭangin buaina, chhungkaw inṭhen darhna a thleng a nih ber hi, nangmah avangin ka fapa hian hawtu leh hmelma a ngah phah bawk, Ngurthan, ka en liam che inring duh suh," tia tham lo zeta min ṭawngkhum lai chuan ka ding ngawi reng a, sawi ber tur ka hre ve miau lo alawm.

"I hmel hmuh pawh hi ka kham ta, Malsawmkim hre rawh, i pa Samuela kut i thlâka nungdama a awm lo a nih chuan, JK ram i hminga ka dah hi ka thlâk vek ang, hre reng ang che," tiin Jehomalsawmkima ngawi run chu a vau leh nek a. 

Ani lah chuan eng danga chhang lo hian, "I thlâk theih phawt chuan thlâk la, tun aṭang hian buaipui nghal rawh, mahse, Ngurthani unaupa i thahtîrna man kha i têl dawn, Jail bang i zût hunah JK ram chu ka nei lêt leh mai ang," deusawh awkâ zeta tiin a nu chu rum takin a melh a, "Buatsaiha i tîr tlai hlek a ni ka nu, Aryan leh Sameer an lo thlen hunah innupain Khatam ah ka khung lo ang che u tih ka sawi thei lo," a ti hmiah hmiah a.

Nu Pianmawii a nui lui ngial a, a mitmeng erawh a pha dui thung. Nêp lutuk.

"Tleipui, i nu hi lo duat khuchûk duh suh, Angelika ka be tawh a, Jorhat-ah a lêt dawn, he inah hian mi â pakhat chiah kan hnutchhiah a ngaih hmel," tia ngeiawm zeta nui lui chung hian a nu a melh leh a.

Nu Pianmawii a che phat a, "Laljehomalsawmkim, i nu ka nih hi i hria em, mi â ka ni lo.." tiin a sarâk chiam a, ka ngaithla thui peih tawh lo, Tleipuii ka mitmei zeuh hnuah, a room- pana kan kal tur chu Jeho nuin ka tukkhum samah a rawn man a, ka eu awrh thei nia. Ka inring lo lulai ve bawk a ni.

"I sam ka'n pawt kawlh vek law law ang e," tih pahin min phih dawt a, Lalngurmuana ka la pawm si, Jeho ka va melh ṭâwk ṭâwk a, a nu a pawt hrang dawn emaw ka tih laiin a fapa a chuh nulh a, zawi fiah tak hian, "I hun a inṭan e, i duh angin chêt la rawh," zu han ti a! Ka thin a va han rim mai mai tak 

Jeho nuin ka sam a ṭhâmna chu a na thîp vut vut a, a tha a chak phian lehnghal, kei inzai zo hlim tân chêt lâk ngaihna a vâng lutuk. Min phih leh lawp a, chutah Tleipuii a insum thei ta ngang lo a ni ang, a nu samah a ṭhâm ve ta a.

"Midang puh mawh tur zawng lovin i dik lohna hmuh tum rawh, u Ngurthani hi i thlah loh chuan i sam ka pawt kawlh zawk ang," vin ṭhakin a ti ve ta. Jeho a inthiarfihlim hmak a, Tleipuiin a nu a pawh sawn tâkah chuan min ṭhâmna pawh a thlah ve ta chauh.

"Laltleipui, nang hian kut min thlâk i tum ve amaw?" Tia a nu tâl buan buan lai chu Ramhuai man nen ka tehkhin ber.

"I â tawh tak tak a nih hi, Mama hian mi â dah khawmnaah dah che sela a ṭha ang," ti nghat nghat chungin a phih kal dáwr dáwr a, kei erawh chu chhuatah ka ṭhu thla a, ka pum dawmin boruak ka hîp kâwk kâwk a, Habib a rawn lang a, "Madam, i ṭha em?" Tia min kaih thawh a tum chuan ka mittui a far ta. 

Hrehawm rêng rêng leh nun hahdamna awm reng reng lo hmuna inbenbel ka tum hi ka â tawh a nih zâwk hi. 

Habib kut vuanin ka ding chhuak a, "Ka lawm e," ka ti sap a, nu Pianmawii la râk düai düai ri chu hriat nawn leh pawh ka duh tawh lo, beng hup chungin pâwnah ka chhuak ta a.

Thingbuk hnuaiah ka ṭhu vang vang a, ama tih dik lohah kei min han puh daih a, nu sual tak a ni. Ka kekawr iptea ka phone dah a lo ri ve chhên bawk si.

Vansangi a lo ni a, "U Ngurthan, buaina in nei em ni?" Tia min zawh chuan ka thaw hak a, inpuia thil thleng zawng zawng leh tun lawk ami nen lam ka sawi fai vek, "Awi awi, an va han râpthlâk ve leh.." a ti thlâwt.

"Hetiang chuan rei ka tlin lovang, Lalngurmuana hi tlêmin han leikâng deuh se Mizorama haw ka duh," tiin ka hrilh ta nge nge a, "Mama sawipui la, inṭhen chu a ṭha ka ti lo; mahse, rilru hahdam i mamawh lutuk.." a rawn ti a, min zaina lai zawn vel a na thîp a, ka thaw halh a, ka pum dawmin, "Ka dah rih ang aw, ka nuam lo vel vek," ka ti ta a, ani pawhin min hrethiamin phone a dah ve mai bawk.

Ka inher chiah tihah ka hnung maia Jehomalsawmkima lo ding reng ka hmuh chuan rum deuhin ka'n melh teh ngawt a, "Nâ i nei em ni?" Tia min zawh chuan, "Min be hlek suh," ti ṭhatin pum dawm chung hian thing hnuaia ṭhutthlengah bawk ka ṭhu thla leh a, kan fapa a pawm si loh avangin, "Khawiah nge ka fapa?" ka ti hmak a, a ner suk ringawt.

"Farm lama kan lêt a hun tawh, Samuel a harh tawh a, thawm bengchheng a siam reng avangin ka thlen vat a ngai," tia min kaih thawh a tum chuan a kut ka vai per lawp a, "Min dek hlek suh, i duh chuan farm house-ah let la, kei chu Sawlad-ah ka awm dawn," ka lo ti nghauh.

"Thinrimna tur zawng lo hrâm rawh, nang leh kei tal hi chu inrem taka kan awm a ngai, i tuar chhuak ṭêp tawh aw.." dam thluama tiin ka dârah a rawn vuan a, ka chalah thlan fim a bawl ṭak ṭak mai, ka kawchhung hi a dik lo vel vek nimaiin ka hria.

"Kan haw vat anga farm house-ah i châwl hahdam dawn nia," ti sup chung hian ka inrin hman hmain min pawm a, Car dahna lamah min pawm phei ta a, a front seat-ah min ṭhut tîr phawt a, chutah a hnung kawngkhar hawngin kan fapa a rawn pawm chhuaka ka malchunga a dah hnuah, "Thlakhat êm pawh a la tling lo a, a khawngaihthlak zozai lutuk.." tiin driver seat-ah a ṭhu lût nghal a, ka pum nuam lo pawh ka sawi lang tawh lo.

"Car hnung seat-a mut rual pawh a ni lo, i pawm peih lo a nih chuan ka kutah dah mai ta che," ka ti nghat a, min chhâng lovin a tlan chhuak zui nghal daih.

Ka lung a âwi thei ngang si lo a, "Kalsan che hi ka duh lo, tum pawh ka tum chhin tawh ngai lo, mahse, nichina i nuin min tihdan kha chu paidam harsa ka ti a ni, Mizorama kan lêt theihna tur ngaihtuah rawh," ka ti leh ta a.

"Ngurthan, ka nu lak aṭanga ka chhan loh vang che khan i lungawi lo em ni?" thinrim pawh ni chuang lo hian min zawt a, ka ngawi reng.

"I duh anga i chêt theih nan hun ka pe che a nih kha, ka nupui hi dawihzep taka awm turin ka duh lo, hmeichhe buainaa inrawlh hi ka chin dan a ni lo bawk a, mahni inveng turin i huaisen tawk tih ka hria alawm," a ti leh a.

Ner sak sak chung hian, "Kei, zai zawh hlim leh hliam dam fel lo nei hi che chhuak turin min beisei a maw? Malsawmkim, nimin lawkah min ṭhuina an phelh a, chuti chung chuan i nu sual lêt turin min beisei a nia, min khawngaihna i nei lo," ṭap lek lekin ka ti ve ta.

Dam thlupin min melh a, tukverh lam ka hawi daih.

"An zai che tih ka theihnghilh daih alawm," a'n tiah.

"Kha maw, min han ngaihsak loh dan êm êm hi, i buaina chiah i hria a, ka natna erawh i hre leh si lo, i kiangah ka chêng reng duh pawh ti ila, nangman i zir miau loh chuan kan la hawsan tak tak ang che," ka ti leh hlak hlak a, a nui huk a, "Ngurthan, duhtawk tawh la, ka thiam loh a ni e," a tih pawhin ka thin a rim tulh tulh.

Ka tûm bûr a, ka thinrim zualpui erawh a kiang ta deuh.

"I pa kha engtia tih nge i tum?" Tiin ka hriat châk em em chu ka zâwt leh ta nge nge a, "Ka pa a ni lo, vawikhat mah i pa tiin sawi tawh suh, a hming chu Samuel Pamei a ni," a ti hmuk a, a thinrim lehnghal dawn ringawt.

"A nih Samuel Pamei chu engtia tih nge i tum a?" Ka ti ṭha leh ngat; min melh zuk chung hian, "A hnen aṭanga ka hriat duh ka hriat hma chu a nunna ka zuah ang, chumi hnuah chuan dam châkna nei miah lo turin ka siam ang a, ka nun mai ni lo, ka farnute pahnih leh ka nupui natna thlentu a ni a, dam tlak a ni lo," ti duahin a fapa muhil a melh leh zuk a, "Ka thachhang dawltu Aryan pawh tunah a lokir mêk a, he buaina hian tawp lam a hnaih tawh.." a ti ta a.

"In buai chhung hian Sawlad-ah kan lo awm mai dawn em ni, nge Serchhipah kan haw zawk dawn?" Ka ti ve zel a, min melh kâwk chung hian, "Buaina tlan chhiatsan tum hi mi dawihzep hna a ni, Mizoram tih vel kha chu lo sawilang ve chhên lo la, a tira kan inremna ang khan thihna a nih loh chuan eng vang mahin kan inṭhen hrang dawn lo," hnial zui theih miah loh hian a ti hmak a, ka ngawi ta rauh rauh mai.

Dar khat bâwr velah Farm house kan thleng a, Rishan leh Arun an rawn lang nghal a, "Boss, Samuel hian thawm bengchheng a siam reng a, a hneawm khawp mai," tiin report an pe nghal a, "Inchhungah lo va lut rawh," tiin min hrilh a, kâwng dawma ding chung hian Arun hnenah, "Khatam hmunah va kal la, Samuel rawn hruai chhuak rawh," tiin thu a pe ta a, engtia tih nge maw a tum ni.

Inchhungah ka lut a, ka fapa ka bual fai leh tê tê phawt a, khumah ṭhuin hnute ka pe a, chutih lai chuan pawn lamah ṭawng thawm a rawn awm a, kei mi hâwkdâk hian en ka châk leh tlat pek.

"Malsawmkim, min kal tîr ringawt mai rawh, JK farm ka hâl darh i duh loh chuan kha hmunah khan min dah tawh suh," tia Samuela aw vin zet ka hriat chuan nau pawm chungin tukverh bulah ka va ding a, Farm house kawtah Jeho leh Samuel an lo inhmachhawn siah a. 

Jeho chuan, "Dam chhung ni i chhiar dan tur chu a nuam tawh ngawt ang, nangmah ngeiin misual dahna tur atana i siam Khatam-ah khan i awm tawh ang, a hun lai khan nangmah hi i la awm dawn tih hre lâwk ila chuan tun aia hrehawm sawn ka siam tîr ngei ang," a ti hmuk a, Samuel chuan Jeho hmaiah chil a chhâk a, "Ka fapa i ni ngai reng reng lo, nang ang fapa hi ka mamawhlo," tia au tuar tuar chungin a bawp pahnih a tichîp a, a mipatna Tleipuiin a vuak sakna kha a la na a ni ngei ang. 

"Rishan, a ni hi ni thum leh zan thum eng mah pe suh ang che u, tui far khat pawh a kâ-ah a lut tur a ni lo," khauh fura tiin, "A awmna ngaiah dah let ula, a thawmhnaw kha in phelh vek dawn nia, tu emaw pawngsual dawn chuan thawmhnaw phelh a ngai ṭhin, Saruak tangkâwng khan han dah ve  phawt mai teh u," tia nui lui huk chung hian in lam a rawn pan ta a.

"Laljehomalsawmkim, i pa hi hetiang hian min ti thei lovang," tia Samuel ṭawng ri a hriat chuan a pên lai a tawp chawt a, inherin a patea chu a en vung vung a, "I sawi fo ṭhin kha, misual chu hrem lohvin an chhuak tur a ni lo, i pa phubâ i lâk theih nan i rilru tipaukhauh rawh tia min hrilh ṭhintu kha tunge? Ka pa phuba chu tunah hian ka la ṭan mêk a ni, i hming dik tak Lalsiamthara tia koh nge i duh Samuel Pamei tiin," chang khelkhawla Jehoa'n a tih chuan Samuel a meng phâwk vak a, kei pawh chuti tho.

Jeho inchhungah a rawn lut a, min be miah lovin bathroom a lut nghal hmak. 

Kan nupa hian inrem tumin ṭan han khawh ve ṭhin mah ila, a harsa lam hret a ni. Jeho inbual chhungin khumah kan nufain kan mu a, ka chau ngang a ni ang, muthilh tumin ka maimitchhing ta a.

"Aryan, dâwt hmangin helai thleng tur hian min hruai a maw, Zâwnga thi rawh..." tia hmeichhe âu vak vak ri ka hriat chuan ka harh chiang kher mai, "Min thlah rawh, Ngurthantluang, rawn chhuak ta che.." rawn titu chu ka cousin Mawitei a ni.

Khum aṭangin zawimuang hian ka tho chhuak a, ka fapa muhil chalah fâwp zauhin, "Buaina dangin min delh leh dawn ta, ka fapa, nun hahdam kan neih hma chu thuawih takin tihian muhil rawh le.." ka ti sap a, ka thawmhnaw inbel lai ka thlâk a, kan room ka chhuahsan ve nghal.

Aryan hmel pawr fap leh Sameer, Jeho, Rishan leh Arun te Veranda-ah an lo ding ṭhap a, Mawitei chair-ah a lo ṭhu bawk a, a kut an phuarsak vek bawk.

Min lo hmuh veleh, "Tenawm nu, eng ruahmanna nge i neih?" Tia min melh râm râm chung hian din chhuah a tum a, Aryan chuan rang zetin a nem ṭhu leh nghal hmiah.

"Ka nuṭa neih chhun that duh tur khawpin i eng pawi nge ka sawi?" Chang fakin ka ti ve ta.

"Ngurthan.." a ti hliai a.

"Ka unaunu i ni lawm ni, ka u khan i eng pawi nge a sawi, mawh..sawi ta che," tiin ka pan hnai a, Jeho chuan, "Aryan, in vai khan in kalsawn thei tawh ang, ani hi chu ka nupui kutah dah rawh u.." a ti sup a, Mawitei kut thlâk lo turin ka insûm nasat a ngai viau.

"Buatsaiha nupui maw i nih, ka u that tur khan pawisa eng zat nge an pêk che," tih pahin a khabeah na zet hian ka hmer a, "I kal (Kidney) pahnih kha ka phawrh sak ve dawn che em ni, nge, ka u i tih ang khan i in turah tûr ka telh ve zâwk dawn?" Tia thinrim khur dar dar chunga ka ṭawng lai chuan ka pasalin ka dârah a rawn vuan a, "Mate, duh tawk tawh rih rawh, kan hnen aṭang hian a tlanchhuak dawn hleinem, zanin hian a sawi duh loh thleng thleng sawina hun a nei dawn, lungngai lo la.." dam duama tiin kawngkhar lamah min nawr phei dat dat a.

"Jeho, min lo dang suh.." ka ti nghat a, ka ding deuh dat bawk.

"Tunah chuan ni rih lo e, Samuel nen hmun khatah kan dah ve ang chu, inhmu miah lovin ruahmanna an siam dun thei a, han inhmu ta se eng nge maw an an dawn ni? Samuel lah Saruaka awm sa a ni a, hmeichhia a mamawh ang kan pe dawn alawm, ani pawh hi Saruakin a nia ka dah luh dawn.." a ti hem mai.

Jeho ka melh vat a, a fiamthu emaw ka ti a, mahse, a teuh lo; a hmel a thutak rûn a, pawisak nei lo tih hriat fahran hian a ner nawk a, "Inchhungah lut la, kan fapa bulah lo awm rawh, Aryan te kha inpeih fel se, Khatam-ah kan dah tîr dawn nia, hmeichhe Saruak an hmuh pawhin an nghîng ve lovang," a ti hmiah.

Mawitei a ṭawng tawh miah lova Jeho nen kan inbe lai chu ngun deuh hian min en a, a hmela hlauhthawnna awm chu hai theih rual a ni lo.

Keiman kut ka thlâk âi chuan Jeho ruahmanna zawm mai hi a finthlâk zawk. Hospital-ah la thawk ila chuan a Kal pahnih phawrhsak hial a nia ka duh, ka unaunu ang pawhin ka en tawh lova, tualthattu hmuhin a nia ka hmuh. Khawngaihna deré pawh ka nei ta miah lo hi a mak khawp mai.

Zanriah ei hmain ka inbual zuai a, nachhawkna pakhat ka hmawm a, Jeho leh a fapa inpawm chu pan hnaiin, "Samuel Pamei kha engtin nge Lalsiamthara a ni tih i hriat theih?" Tiin ka zawt a, ngaihsam zet hian, "Ka nuin min hrilh alawm, Lalsiamthara niin Tleipuii pa Ramhmachhuana a that a, Mizoram aṭanga tlanchhiain Shillong-ah a biru a, Samuel Pamei tih hming a lo pu ta a ni. Tun hma chuan mihausate hnuaiah thawkin a eizawnna chu tual thah a ni." Tia min hrilh fiah tâkah chuan ka vâr uar mai.

Zanriah ei tura min lo koh tâk avangin, Jeho chuan, "Lo va ei hmasa la, Bawiha hi ka lo awmpui ang, a khawngaihthlâk tawh em mai," a ti ve a, Lalngurmuana ṭahbelh lo lutuk hi a mak ka ti ngawt mai. 

Jeho thu awihin choka lamah ka phei ta a, thil ei tam thei lo mah ila, in chi erawh ka ti thei phian zel.

Dârkâr thum a ral leh hnuah Aryan te an rawn lut a, Jeho chuan a ruahmanna engkim a hrilh lai chuan Sameer a nui hawk a, "Sir, keiman a thawmhnaw chu ka phelh dawn," tiin a phur hle.

"Mipat hmeichhiatna lam hawi zawngin a taksa eng mah in khawih tur a ni lo a, a thawmhnaw chu amah phelh tîr intum hmasa anga a duh lo a nih leh Sameer chuan phelh rawh se," tia Jeho a ṭawng lai chuan farm house kawtah Car a rawn ding dawt a, kan hawi rual ṭhap.

Lalbuatsaiha a rawn thleng a, a meng sen rûm mai. 

Aryan lo dinna pan ding chat chung hian, "Ka nupui kha i kut hmawr pawhin khawih hlek suh, a nih loh chuan ka that ang che," a rawn ti ta a, za zetin Jeho a nui a, a nuih a za tak tak a nih hmel. 

"Buatsaih, ka mâkpa i ni lawm ni, khawilam nupui nge i rawn sawi tâk mai," tiin a nui leh huk a, Buatsaiha thinrim hmel chu a nelawm loh ngei mai, Jeho pawh chhâng lo hian a che thut a, Pistol rang taka phâwi chhuakin Aryan âwmah a kâp ta a, a thleng rang êma mit khap kâr lek tak tak a ni. 

Aryan tlu tur chu Sameer an a dawm a, chuta Jeho thinrim inhrosa thawm chu râpthlâk tak a ni.

Buatsaiha kawr âwmah ṭhâmin, "Tenawmpa, keimah hi min kâp ta che  ti rawh, kâp rawh" tih pahin Buatsaiha Pistol chu a kut nen hmehbelin a chalah a chuktuah a, ka lung a phu dup dup.

"Jeho..." ka lo ti ṭhat a, eng thil nge maw a hriat teh hrep ni. Aryan inchhungah an rawn zawn lut a, a hliam aṭangin thi a chhuak nasa hle. Ka buaipui ngei a ngai.

Hnathawktute an rawn pung khâwm a, Jeho chuan Buatsaiha melh rum ûl chung hian, "Kei chuan ka that dawn lo che, mahse, Aryan unaupa chu Arun a ni tih i hriat kha.." tiin Buatsaiha kut chu a inrin hman hmain hnunglamah a herh sak a, Pistol chhuatah a tla bal mai.

Arun inbual zo thaw hlawp hlawp chungin a rawn tlan thleng a, a unaupa ka lo buaipui lai chu a melh zawk a, Buatsaiha lamah a pen phei a, Jeho awkâ pawh ngaichâng tawh lovin a hnek thal tawp a, Jeho a ding sawn nghal bawk.

Duh tawka Arun a chêt laiin an kîl tuau a, ṭhelh tum an awm lo.

"Sameer, tih tur ka hrilh che kha va ti rawh le, Rishan nen Aryan hi hospital-ah kan tlanpui a ngai dawn a.." tia a sawi zawh hnuah, chhuata Aryan bula ka lo ṭhu chu min kuah tho a, "Intifai la, room ah lut rawh le, keiman ka lo buaipui tawh dawn nia," a ti ta a.

Pawn lamah insual thawm a la awm a, Aryan thaw kâwk kâwk chu lainat taka melh lehin, "Jeho, hmanhmawh rawh u.." tiin ka tur a, îhe lovin an che chhuak nghal.

A thiput tihrehna turin ka jection tawh a, rem lo zeta ka tuam nawk nawk hnuah Gurkha hnung seat-ah an hlang lut a, keimah pawh min be nawn tawh lovin hospital an panpui ta a.

Jeho leh Rishan tlanliam tur chu ka thlir a, "Aryan thi suh aw.." tia phunsap chungin room-ah ka lut ta a.

Buatsaiha leh Arun lam pawh ka ngaihsak tawh lo.

Duh leh lo insual mai mai teh se...

270423

B+>[BeckirafARenthleI]<+®®