25.24-89[A Becky Rafa story]

25.24-89 

Ziaktu: Becky Rafa Renthlei

[Recap]

"Sameer an kâp hliam a, Lalngurmuana pawh an hmu zo lo..." tia a sawi veleh, "Eng a...eng maw i sawi..." Vansangi nen kan ti rual ṭhawt.

"Kan hnathawktute kha Arun te nen an haw hmasa a, Farm house chhungah Sameer nikhaw hre lovin a lo awm a, Mawitei chu a la awm, Buatsaiha pawh a la awm a, kan fapa Lalngurmuana zawk an hmu zo ta lo a ni." Tia Jeho a ṭawng lai chuan ka khaw hmuh a fiah lo a, ka âwmah hnawhtu a rawn awm nghal a, boruak khamkhawp ka hip thei lo titih...

"Ka fapa..." tiin ka phun sep a, ka mit sulh a, ka fapa mitthla chungin ka chhing ta riai riai a...

-B®®

Ka harh leh chuan ka lu a rit lûk a, ka pasal Jehomalsawmkima âwm nghêngin ka lo awm a, Gurkha hnung seat-ah kan lo ṭhu dun reng tawh chu niin, ka ṭhut dan siamrem paha inlâkhran ka tum veleh Jeho a che hrut a, "Ngurthan," tia phun sup chung hian min kuah leh tum niawm takin a bân a ti chê a, ka lo tawlh hla dâwrh thung.

Bartho Saingurpuia'n motor a khalh a, a bulah Raguel Sainghinglova pawm chungin Vangsangi a ṭhu bawk a, ka thluak a fîm telh telh a, nichin maia Jeho thil sawi ka fapa Lalngurmuana a bo tih thu khan min dêng leh dawt mai.

"Ka fapa.." tiin ka phun leh sep a, Jeho a thaw chhuak hrawih ringawt, min rawn kuah tumin ka ṭhutna lamah a lo tawlh phei a, mittui tling pam chung hian, "Samuel vuinaah kan nufain kan kal lovang ka tih lai khan ka thusawi min ngaihthlâksak vein ngaipawimawh ni la chuan tun dinhmun hi kan thleng lo tur, kan fapa aia hlu thil dang eng nge awm?" ṭap lek lek chunga ka ṭawng lai chuan Jeho a lo ngawi reng ringawt.

"Lalngurmuana hruai lova min chhuah tîr i tum tiraw? Ti ta che, keini nufa ai hian i lo hlu bík êm a ni," zawi fiah taka ka tih leh pawhin ṭawngkam khat mah a chhâkchhuak chuang lo.

Bartho zawkin, "Ngurthan, intipachang hrâm hrâm rawh, infapa kan hmuh hma loh chuan kan zawng zêl ang," tiin a hma aia chak hlekin a tlan leh ta a, Umiam kan thleng lek lek tawh bawk.

"Kan laka ṭhat chhuah ngai reng reng lotu leh min tinaa min hliam rengtu i pa kan thlah liamna rah chhuah chu kan fapa kan chân hi a ni, nausen thlakhat pawh tling ṭha ṭhum lo a ni a, engtin nge a awm ang le..." tiin ka ṭap chhuak phawng a, chutah a aia nasa zawkin ka ṭap khur ta ngat ngat a, ka kawchhung hi hnawh khattu awm ang maiin a tâwt ṭun a, "Ngurthan, Mate.." tiin Jehomalsawmkima chuan a mah hnaih thei turin min kuah a, ka lo ṭang ṭung.

Ka ṭah chhuak zualpui a reh hnuah ka mittui ka hru hul sawk sawk a, Vansangi vawi khat mah a la ṭawng chhuak ve lo.

Bamos farm house kawtah motor pali zet a lo ding a, Jeho chuan Bartho ding turin a hrilh a, ani pawh a ding ve mai bawk a, Richard leh Shisha chuan Gurkha an hmuh veleh an rawn pan hnai a, Jeho pawh a chhuk nghal bawk.

"Pawi ka ti lutuk Jeho, ka thiam loh a ni," tiin Richard chuan Jeho dârah a vuan a, a thusawi awmzia pawh ka hre lem lo.

"I thiam loh eng mah a awm hleinem, in ram chhung zawng zawng, in chawlhbûk leh mihring tawm theihna tur ang chi kha kan hriat theih nan i hnathawk paruk vel kan mamawh dawn a, min puih mai loh chuan," tiin Richard a chhâng a. 

Ani pawh chuan awlsam têin, "Tehreng mai, MAP ber i kawl tawh a, kan ram chin a lang vek bawk a, ka ṭhian i ni a, engkimah kan ṭang rual zel tur a ni alawm, muang khawtlai lovin Dingngheti chu kan zawn ran a ngai a ni." A ti ta a, Richard thil sawi avang chuan motor kawngkhar ka hawng sawk sawk a, Jeho min dan hman hmain Richard ka hnaih nghal ruak mai.

"Ka fapa ru botu hi Dingngheti a ni tih sawi hlek suh," tiin a kawrah ka pawt a, dam thluam hian, "Ngurthan, Dingngheti bâk rinhlelh tur kan nei tlat lo, ka cousin mah ni se, i fapa a ru bo tak tak a nih chuan ka ngaidam dawn miah lo," a ti sup a. 

Shisha a rawn ṭawng chhuak ve ta a, "Khatia ṭawng khawmuang lo khan kal vat ta che u, hun in khawhral zel a nia," tia a sawi lai mekin Scorpio a rawn ding dat a, driver seat lam aṭangin Omar a rawn chhuk ta a, a hmel a nelawm loh khawp mai.

Jehomalsawmkima'n Omar hmel a hmuh rual rualin, "Ka rin aiin i lo thleng hma daih, Richard pawh ka hrilh tawh tho a, in ram chhung kan en dik a ngai dawn a, a hmuna kal tur mi paruk vel tal kan mamawh belh dawn," tiin a hrilh zung zung a. 

"Keiman ka nauteho ka lo hruai dawn nia, ka kal tel ve ang," tiin ngawi renga ka lo ding chu min thlêk vung vung a, "Ka hnathawkte zinga hel ta Pankash kha i la hria em?" Tiin min zawt teh daih a, ka hawihai hmel a hmuh veleh, "Barua kut aṭanga i tlan chhuah ṭuma umzuitu che leh a malpuia i vihsak pa kha Pankash chu a ni a, Dingngheti nen intiam rualin in farm house-ah khan an lokal tih kan hre tawh," tiin chiang fek fawk hian min hrilh ta a.

Omar chhân ka tum lai tak chuan Jehomalsawmkima'n ka bânah a rawn vuan a, "Kan kal a ngai, anniho hian JK ah min zui dawn a, ro hran kan rêl ang," tia a sawi zawh hnuin Gurkha dinna lam min panpui ta a.

Jeho farm house lam panin kan tlan chhuak leh ta, kan hnungah Omar leh Richard te chuan motor dangin min lo zui bawk a; ka fapa ru botu chu tudang ni lovin Dingngheti leh Pankash an nih chu!

Ka ṭah a chhuak tawh lova, ka fapa Lalngurmuana ka ngaihtuah êm avangin ka kawchhung a na vek nimaiin ka hria; Jeho ka hua a, biak nawn ka tum lem lo, Vansangi leh Bartho pawh ka be tuitam lo khawp mai, anni pawhin sawi tur an hre lo nge an ngawi ve rauh rauh ringawt.

Farm house kawt kan thleng a, an vaiin an hmanhmawh em em vek tawh, Samuel Pamei thurochhiah pawh chhiar chhuah a ni rih dawn lo a, amah Jeho ber a awm loh vang a ni. A fapa bo chungchângah Police station lam a hrilh tawh nge an inbiak dan chiah ka hre bik lova, a mah pawh Shillong chhuahsan rih loh tura tih a ni tho bawk. En thlâk mêk a ni tihna a nih ber chu.

Sameer kutah kan fapa kan hnutchhiah ta kha a ni a, Arun leh hnathawktute va haw hmasa khan chhuatah Sameer nikhaw hre lova lo tlu reng an va hmu mai chauh a ni a. Arun tân pawh tih theih dang awm hek lo, Jeho a rawn hrilh hnu khan Bolero Camper-in hospital hnai ber an panpui nghal a, kan va nang hman tawh lo. Arun pawh a lo lêt ta chuang lo fo.

Tunah hian, JK farm house ah buaina namên lo a thleng ti ila a dik ber, Jeho thupêk angin tumahin hna an thawk dawn lo a, Aryan, Sameer, Mawitei leh Buatsaiha, Badrul Islam pawh tiamin enkawl ngai an awm a, Arun leh Rishan chiah an bâng ta. Thaw a va ipik si êm.

Omar, Richard leh Jeho, Bartho teho nen Dingngheti leh Pankash zawn ṭan dan tur an rêl mêk a, helai ram hi a zau êm avangin an kal hlat an ring lo ve tawp. A chhan chu Bamos lam gate duty in motor dang rawn tlân lut pakhat mah a awm loh thu leh Dingngheti kha kea kal chhuak a nih thu chiang takin an sawi thei tlat atin ni. Chu chuan tlêmin beiseina chhetê min siam sak a, motor hmanga an chhuak a nih chuan keini lam tan zawn hmuh a harsa dawn lutuk tih a hriat vek bawk. "Lalpa, ka fapa min venhim sak rawh.." tia ṭawngṭai bâk tih theih ka nei lo.

Kan room-ah ka lut a, kan khuma ka fapa mutna kan siam ruak hiai ka hmuh chuan hmai hup chungin ka ṭap chhuak leh ta, Tleipuii pawh a ṭap pûr a, Buatsaiha  enkawltu tur atana dah a ni a, Habib nen nipui chawlhbukah an lêt phei leh tawh bawk. Mahni chanpual ṭheuhah kan buai vek a ni ber.

Vansangin min rawn kuah a, "U Ngurthan, i tawrhna hi ka hriatthiampui lutuk che a nia, ṭap vak vak mah la i demawm loh.." tiin ka sam pawr phang chu min hûimâm sak a, "I u hi ka haw ngawih ngawih," ka lo ti teh tawp. Jeho rûm nghut ri ka hriat avangin ka dâk chhuak thuai a, kan room kawngkhar bulah ngawi reng hian a lo ding chu niin!

"Kan rualin i lokal ve dawn nge tikhan i indawm kun reng dawn? Ka thiam loh a ni tiin ka sawi tawh a, min hua a nih pawhin ka fapa ka hmangaih tih tal hi chu min hriatsak dawn nia, ka hmuh hma chuan he farm-house ah hian ka rawn kîr tawh lo ang," ti hmiahin kan ṭhutna lamah a rawn phei a. 

"Bawihi, Mawitei saw i kutah ka dah a nia, tunah chuan a muhil rih a, tumah kan bâng thei lo, Bartho pawh kan ruala a lokal a ngai," tiin a farnu a bia a.

"Mama, inbuaina chingfel tur hian i theih tawp chhuah rawh aw.." tih chiah Vansangin a sawi.

Ka fapa zawnnaah kal ngei ka tum avangin an unau mitmei pawh veng lo hian ka inthlâk sawk sawk a, ka bag-ah chemtê leh tui bottle, biscuit pack pahnih ka khung leh hnuah Lalngurmuana thawmhnaw pahnih khat ka thun tel a, a hnute hnek tur ka siam leh zung zung a, ka chevel chu an unauin min en reng tih ka hria.

Thermo flash-ah Nan siamsa ka thun leh tê tê a, Jeho lam hawiin, "Ka inpeih e," ka ti sap a, Vansangi hnenah thung chuan, "Mawitei saw a lo harh hlauh a nih chuan eng emaw tal lo zawh chhuah i tum dawn nia," tiin ka chah ve ngial a, a lo bu nghat nghat.

Omar leh an naute hovin Umiam aṭanga Raitong Woodstock farm ram chhung zawng zawng an zawng dawn a, Richard leh a naute hovin Bamos ram an hrût dawn bawk. Bartho leh Jeho nauten JK huam chhung Bamos nen an inkâr chin zawngah an zawng ve thung ang a, kei, Jeho leh Rishan ten GS road lam kan pan ve ang.

Jeho sawi dan hmangin, GS road-a Motor tlan luh phak tho si-ah hian Gang ho tawm rûkna in a awm a, thing hmun zau tak a awm bawk. Pankash kha Gang member a nih vangin Umiam an chhuahsan lo rau rau a nih chuan chulai hmun chu an pan mial maithei tiin Omar a hrilh a ni.

Rishan chuan chak zetin Gurkha a khalh par par a, tuman Samuel Pamei hming kan lam ri tawh lo. Police lamin Lalngurmuana bo chungchang an hre tawh emaw ka tih kha a zîk tluakin an lo la hre lo chu niin! Jeho hian eng chhuanlam tak hmang ang maw, amah Sardar Police station-a koh a ni a, a va inlan dêr bawk si lo. 

Inthing nak chung hian kawng lam chiah ngun takin ka en a, Jeho leh Rishan an ṭawng mawlh mawlh a, an thusawi pakhat mah ka hre lova, ka ngaihtuahna ka lo kâwm leh veng veng zel.

Tlailam dar li a pel tawh a, "Ngurthan, thui tak kein i kal ve thei dawn si lo a, motor tlan tawpna chinah hian i lo awm mai dawn em ni, i hlau em?" Tiin Jeho chuan min zawt a, "Eng mah hlauh leh chuan tur ka nei tawh lo, ka fapa min pekir la a ni mai," ka lo ti nghat a.

Ner sawk chung hian, "Damin ka lo hruai lêt leh ngei ang tiin thu ka tiam thei lo che, kan fapa a thi emaw a dam emaw ka hmuh hma loh chuan ka zawng zel dawn tih erawh ka sawi thei thung," tiin a sam a tuai puat a, a hmel a pawr ve fap mai.

Thing lian pui pui dinna hmun kan tlan thleng ta a, Rishan chuan motor tidingin, "Boss, helai hmun aṭang hian zawng ṭan ila, a aia thui chu kan tlan thei tawh lo ang, tun hmaa mitthi hâlna hmun piahah khan in rám tawh pakhat chu a awm ngei mai a," a ti sup a.

"Pankash te riahbûk lam kan hrût hmasa zawk dawn nia, mitthi hâlna hmuna Temple hlui kha chu kan lêt leh lamah kan en chho ang a, khaw thim hmaa kan chêt vat vat a ngai, Riffle keng tel bawk ang che," tia Jeho leh Rishan an inbiak lai chuan ka lo hawi kual vak vak a, 'ka fapa khawiah nge maw i awm le.." ti rilru chungin kan piah hla féah Temple niawm tak lo lang dêt dêt chu ka thlir vang vang mai.

"Ngurthan.." tiin Jeho chuan ka kutah Pistol min hum tîr a, "I invenna tur atan kawl ang che, a ṭûl tâwpah lo chuan hmeh puah loh tur, indim ngai i la ni a, helai hmunah hian kan lo let leh hma chuan lo awm reng rawh aw," tih pahin ka mitah min en chat a, a mitmeng thim mâka tumruhna lo lang chhuak chu ka chhiar thiam ve.

"Aw le, min lo ngaihtuah suh," zawi sapa ka tih chuan, "Min huatna thinlung i put kha dah ṭha la, huaisen taka engkim hmachhawn ngam turin i rilru ti paukhauh ang che," ti sup chung hian ka chalah a fâwp thawi thuak a, ka lo insangmar ru nghal ṭeuh.

Khua a tlai tawh hle a, Jeho te kal liam aṭangin dârkâr a liam tawh bawk.

Rannungin thâwm an rawn chhuah ṭan a, Gurkha chhunga ṭhut reng ai chuan tiin ka chhuak thla ve ta a, ka bag pawh ka ak nghal vek a, ka phone ah lai ka bih zawk a, signal a bo hmiah, rannung hrâm thawm tih loh ri dang hriat tur awm lo hian a reh tlawk tlawk a ni ber.

Engvangin nge Dingngheti hian ka fapa a rûk bo tih hi ka zawhna lian tak neih a ni bawk. 

Eng thilin nge min mawlh ka hre lo, Temple hlui râlkhat aṭanga ka hmuh kha panin hmanhmawh lutuk lo hian ka kal zêl a, ka rin aiin a hla phian mai. 

Jeho te lam ngaihtuah chang lêk lo hian ka hmazawnah ka kal mawp mawp a, Bâwng kawng ṭum niawm tak a ni, hnahthel leia tla te chu ka pal phei bawrh bawrh a, ka rilruah hlauhnain hmun a chang eih lo. Jehomalsawmkima nuna ka lan ve aṭangin buaina hlirin min nangchinga ka thihna tur kawng pawh nise, ka fapa a him phawt chuan a tawp thlenga beih ka tum ruh hle.  Ka fapa tih loh dam chhan ka nei lo, eng mah ka nei lo.

Thaw halh halh chung hian ka hmazawna Mitthi hâlna in lo lang chu uluk fe hian ka thlir a, chutih lai tak chuan râlkhat aṭanga silai puak ri ka hre zui zat. Mahse, ka awmna a hla em a, ka ngaipawimawh hran lo.

Chu in kawtah chuan ka ding chat a, Thing in niin tukverh dârthlalang a keh nual tawh a, ka tih tum ber pawh hre chuang lovin ka pan hnai zel a, tukverh dârthlalang phên aṭang chuan inchhung chu ka bih ta a, a hnawk viau mai.

Mahse, tlawh pawh ṭhan niawm tak hian a chhung chu a bel hnûm hlurh a, tun hmain Raitong wood-stock farm lam mitthi te phum lovin helai hmunah hian an hâl ral ṭhin tih Rishan Songbet khan a sawi thuak a, tlem chuan hlauhna rilru ka pu ve deuh bawk.

Kawngkharpui lian tak chu a chul rup nain a ngheh hmel chut chut viau lawi si. Inchhung chu uluk leh ngun zawkin ka bih a, pawnlama a lan dan ang ngawt a ni lo, pindan hrang pathum zet a awm a, kawngkhar hran an nei vek bawk; mahse, a inkhar phui ṭhap a, eng thawm danglam mah ka hre chuang hlei lova.

Ka duh tawka ka ena ka thlir kual hnuah ka piah lawka thingkung buk zet chu a che dar dar tih ka va hmu ta. Ka dinna aṭanga tawlh sawnin ka ṭhu hniam vat a, thli chhem avanga chê a ang lo miau alawm.

Thinphu dap dap chung hian, ka nghâk deuh vang vang a, chutih lai tak chuan mipa na tuar ṭê thawm a rawn awm a, silai puak ri hriat tur a awm miah lo thung. Thingkung phen aṭang chuan mipakhat a rawn vâk chhuak a, a hnunga rawn zuitu chu tudang ni lovin Rishan Songbet ngei a ni.

Kan awmna inhlat deuh mah se, a hmel leh a pianphungah hai theih rual a ni lo. Ka en reng laiin Rishan chuan chu pa chu a pêt let tawp a, chutah a kawr âwmah ṭhâmin a pawt tho nawk a, ka awmna lamah a rawn hnûk phei a ni hrim mai. Jeho ka hmu ve miah lo.

An lo hnai zel a, Rishan leh chu pa chu ka piah lawkah an rawn ding ta a, a sawisak pa hmel ka hmu thei ta chiah. Pankash a lo ni, a hmai a thî hnuang a, a bân puamah Silaia kahna a awm bawk a, thisen nen a inchiahpiah nuai mai.

"Rishan.." tia ka koh veleh a phu zawk a, ka ṭhutna aṭangin ka ding chhuak ve ta a, min hmuh veleh, "Madam," tiin a phun hluk a, "Helaia awm tur i ni lo asin," tih pahin Pankash chhîp samah ṭhâm lehin a kêk bu dâwrh a, hmuh a nuam viau lo.

"I boss khawiah nge?" Tia ka zawh chuan, "Râl lehlamah a kal a, helai hmunah hian innghah kan tum, i ṭha em?" a ti leh hnuhnawh a, ka ṭha tih ka hrilh veleh, "Ani hian i fapa awmna chu min hrilh thei ngei ang," a ti nghut a, Pankash chuan Rishan ke bulah chil a chhâk phurh a, hlau hmel a pu miah lo chu mak ka lo ti zâwk.

Rishan thin a thawk ta nge dimna pakhat mah tel lovin Pankash chu a sawisa zui ta a, ka en rei thei lo, ka dinna aṭanga pensawnin inchhung bawk chu ka bih leh ta a, inhnît hraih ri niawm tak ka hriat tâkah chuan ngun leh zualin beng ka chhi a, ka fapa kha a ṭah belh lo, Dingngheti a suala a fing viau a nih phei chuan muthilhnain a jection thei bawk, a nih loh pawhin an that tawh hial maithei a ni.

Chu êm chu a thlen ka phal lova ngaihtuah pawh ka ngaihtuah chhin ngam lo a ni ber. Thâwm dang hriat belh tur a awm mial mahna tiin ka ngaichâng leh vang vang phawt a, "Ngurthan.." tia min lo kotu an awm avangin ka lehhawi vat a. Jehomalsawmkima a lo thleng chawpchilh a, ka thinrimna dah ṭhain, "En teh, he inah hian awm an awm a ni, kan en fiah ngei a ngai," ka lo ti sawk sawk a, a mitko a sân âwk duh chauh.

"Jeho.." tia ka tur sek tâkah chuan min hnial lovin ka kutah a chelh a, inchhungah chuan min luhpui ta a, Rishan te pahnih kha chu ngaihtuah ngai an ni lo a, he in hi en fiah ve hrim hrim ka duh vang a ni pakhat.

Inchhung pindan tin kan en kual vek a, eng mah hmuh tur a awm lo, Maimawm rîl zâm leh chukchu a tam em em a chuzawng chu a ni mai. Beidawng zet hian ka thaw chhuak hliai ringawt.

"Helai hmunah hi chuan hmuh tur an awm lo, signal kan nei si lo a, Omar leh Richard te tal be thei ila a ṭha tur a nia, i rilru tihrehawm suh aw, a bul kan ṭan dêk dêk chauh a ni a, him dam takin kan fapa hi kan hmu kîr leh ngei ang," tiin a vawikhat nan min ṭawng thlamuan ve ta.

"Pankash hian a sawi duh tlat lo hi kan buaina a ni," a ti leh a, "Na lua awm lovin nghaisa ula a sawi lutuk tlat ang," tia ka ṭawng mêk laiin Rishan chuan Jeho a rawn ko a, chu in aṭang chuan kan chhuak ta rih. Khua a thim ṭan tawh bawk.

Pankash bulah Jeho a ṭhu hniam a, "Ka fapa awmna hmun i sawi loh chuan i vun ka lip ngei ang," ti ram hmukin chemte a phawrh nghal a, Pankash a la ngawi rûn a, Rishan khan a sawisa nasain a dâwp nasa thawkhat a nia, a luhlul ngei mai.

Jeho chuan Pankash a kezungpui chu chemte hmâwrin a zai kual a, "I ke aṭangin i châwnah, vun tel lova awm i duh loh chuan ka fapa leh Dingngheti awmna sawi rawh," ti ṭhawt chung hian kan misuala châwnpuar chu chemte hmawr zumin a rin chho tâwk a, thi a chhuak ṭuam ṭuam a, Pankash natuar rum dut chu dimna nei hauh lo hian a taksa hmun hrang hrangah a rin kual a, ka lo ṭim ur ur.

Eng anga nasa pawhin kut thlâk se, ani hian a kâ a âng duh chuangin ka ring lo, "Boss, kal phawt mai ang u.." tiin Rishan a ding chhuak a, kei pawhin tui bottle ka phawrh a, ka dang ro huam tih reh nan tlem ka in a, Rishan ka pe veleh chhawng.

Chutia kal tuma kan intintuah lai chuan naute ṭap ri ka hre thânin ka hria, ka ngaihbel nge ka hre lo, khua a la thim chiang lo a, Rishan leh Jeho melh chung hian, "Naute ṭap ri ang deuh ka hria, Jeho, ngaithla ve mah teh.." ka ti chhuak hliai mai, mitmeng danglam deuh hian, "Ngurthan, kan awmna hmun a inang renga keini pawhin ṭap ri kan hriat loh hi maw le," a ti nghut a, mâwl min tih hmel hle bawk.

"Jeho, vawikhat chauh khaw thim hmain helai hmun hi en leh ang u," ka tih chuan, "Kan fapa ṭap ri ka hai theih i ring em ni, he hmunah hian an awm lo a, in lamah kan haw vat a ngai zawk," a ti zawi sup.

Mahse, mak deuhin ka pen sawn thei tlat lo! Ngenna mitmengin ka pasal ka melh a, "Vawikhat chiah en leh ang," ka la tih ṭalh avangin min nin hmel zet hian, "Kan lo hruai ta kher kher che a ni, hun kan khawhral zel," tiin a ding khawng luh a. 

"Rishan, ani kha, Motor lamah lo va hruai phei rawh, i madam luhluli hi kan en kual pui leh lawk ang e," nelawmna tel miah lo hian a ti sup a, a ṭawngkam ngeiawm tak pawh tun ṭum atan chuan ka haider ta rih.

In hlui rep rup chhungah chuan kan lut leh ta nge nge a, phone flash light a on a, ka kutah nghet takin a chelh a, chutih lai tak chuan kan piah lawkah darthlalang a keh ri chhuai a, naute ṭap thawm a rawn awm nghal bawk.

Ka âwm dawmin ka thaw chhuak kâwk a, Jeho pawh a insangmar nghal ṭawlh ṭawlh mai.

Ni e, Lalngurmuana nu ka ni a, ka thinlung hian ka fapa ṭap ri kha a hai mawlh lo.

A hnu leha thil thleng chu a rang teh vut lutuk a, ka inring hman lo a chhâ chu a ni e, Laldingngheti chuan ka fapa a pawm a, a ṭap nasa ngei mai, a kut lehlamin Pistol a hum a, blanketa kan fapa intuam phui tlat chuan ka mit a la chat bawk.

"Ngurthantluang, i fapa hi i duh tiraw?" Nui sâwng chung hian a ti a, a awkâ a dam vei phian, chhâng lova ka ngawih tlat avang chuan, "Malsawmkim, i fapa hi mit khap kâr lek chhungin ka that thei a nia," ti lehin Jeho a rawn melh a, kei min en dan leh ka pasal a melh dan chu inpersan tak a ni.

"Dingnghet, ka fapa kha a nu pe rawh," hriam hrâka Jeho ṭawng chhuak chu eng teh vakah a ngai lo a nih hmel.

"Ngurthantluangi kutah hian ka dah lul lovang, ka chan âi min chhuhsaktu a nih hi.." tia nui lui ngial chung hian Pistol-in min tin rân a, sawi ber tur pawh ka hriat si loh.

Ka hamhaih êm atin ni. 

Ani hian nichina kan chevel te kha hmuh hmaih pakhat mah a nei lo bawkin ka ring a, kan zawn chiam laite khan khawi hmunah emaw tak hian a lo tawm bopui tih a hriat mai.

Dam thlap hian, "Ka fapa kha min pe rawh, khawngaih takin min pe rawh.." tia pan hnaih ka tum chuan, "Che tawh suh, thih i duh em ni?" A rawn ti fiak ṭhak a. 

Pistol-in Jeho a tin leh a, "JK ram MAP kha ka kutah min pe la, in fapa hi nung damin ka pe lêt ang che u," a ti ta a, Jeho a rum nghut  ringawt.

Dingngheti rum taka melh chung hian, "He thil hi tuin nge tih tîr che, Bamos ramah chan i nei a, 

ka ram min chuhpui tur i ni lo, Richard hian i thil tih a hre vek tawh a nia," tiin a pan hnai a, zâm map lo hian Dingngheti a ding a, "In fapa nge hlu JK ram MAP.." tia a sawi zawh rualin Lalngurmuana chal leh Pistol a chuktuah a, ka lo râk ṭhat.

"Khawngaihin ani kha tina suh, ka fapa a thih âi chuan i duh leh min that zawk mai rawh," ka ti tuar a.

"Ngurthantluang..." tiin Jeho chuan min vin ṭhawt. Atan pawh chêt ngaihna a awm bik lo a, Dingngheti kâp dawn se kan fapa a pawm tlat si. A la ṭap ngâk ngâk a, a aw pawh a thâm ṭiak tawh mai, a ṭap hnang thei mai dawna ka hriat avangin ka chêt chhuah ngei a ngai.

Jeho ka va melh a, mit khap miah lovin Dingngheti a melh rum ûl a, "Ram MAP chu pe mai rawh, kan fapa aia hlu eng mah a awm lo ka tih tawh kha," ka ti sap a, a ngawi ngul a, chêt chhuah emaw ṭawng tum hmel a pu lo hrim hrim.

"Dingnghet, ka fapa kha min pe phawt la, i duh ang chu tihsak che kan tum ang, khawngaih takin.." zai dawh deuh zawka ka biak leh pawhin a rilru sawh sawn a tum loh hmel kher mai, kan dinna a inhlat lutuk lo a, Pistol hum lo se chuan thih leh thihin ka pan chilh ngei ang maw le.

"Jeho, tunah khan Farm house-ah kîr la, ka thil duh chu va la rawh, a nih loh pawhin i naute zinga mi tir la, hetah rawn keng rawh se," tia Dingnghetin Jeho a biak lai chuan ka che sawn hret a, chu veleh, Jehomalsawmkima aw fiak ṭhakin '24' a rawn lam rîk rualin ka ṭhingṭhi thla zui hnawk, '24 number tlem zawk ka lam chuan hnuai lamah aw' tih kha ka ngaihtuah hman tlat! Pistol puak riin a zui nghal a, vawi hnih lai a ni.

Ka dâk chhuak a, Dingngheti chhuatah a zangthal zawngin a tlu thla a, Lalngurmuana a la pawm tho, a âwmah a kuah bet ti ila a dik zawk ang. 

Rishan Pistol hum chungin a rawn lang ta a, nui hmel a pu lek lek, keiin hliam ka tuar lo a, Jeho pawh a him pial. 

Rishan chuan Dingngheti lak aṭangin ka fapa a la sawn a, chêt nachang hre lova ka awm reng lai chu min rawn pan hnaiin, "Madam, in him tawh e," tih pah hian Lalngurmuana min pawm tir ta a, mittui luang ngiai ngiai chungin Rishan ka chhoh melh a, "Ka lawm e," ṭah aw ṭiauvin ka ti sep a. Ka fapa ka kuah nghal vawng vawng mai. 

"Boss..ani saw engtin nge ni ang?" Tiin Jeho a be zui leh daih a, ani lah chuan, "A rawn harh hmain Richard kutah kan dah dawn nia," a lo ti awlsam êt.

Dingngheti malpui aṭanga thisen luang chhuak chu ka hmu ve chiah. Amah kâptu pawh Rishan tih hrilh hranpa ka ngai lo.

"Nakina thiam thu sawi tur inneih theih nan, in ṭawngkam tin leh inchevel zawng zawng kha video-in ka cover vek a, a tâl chhuak hauh lovang, ka duh aiin ka che tlai hret a ni," ngaihsam awkâ zetin Rishan chuan a ti a, a phone a lek lang zeuh bawk. 

"Hmeichhe laka kut thawh hi ka chin ṭhan a ni hauh lo mai," tia a ṭawng zawh hnuah Dingngheti mu hlawm reng chu dimna nei miah lo hian a pu nawlh a, a chhuahpui nghal hmak.

Dârkar hnih hnuah farm house kan thleng a, Bamos farm ah Dingngheti kha an dah a, Richard pawhin in a lo thleng fel tawh a, thil awm dan Jeho chuan a hrilh vek hnuah, "Enkawlna a dawn a ngai a, a ke a bâi tawh mai thei a ni," tia a hrilh veleh Richard a ner nûng a, "Nunna hlut lotu chu a thi mai tur a ni, a phu tawk hremna pe ang che," a ti hmiah. 

Rishan khan a duh chuan a kâp hlum thei lutuk tlat. Mahse, tualthah duhna rilru a put loh vang chauha that lo a ni a, Pankash pawh Omar kutah an dah tawh a, a lak aṭanga hel a nih angin hremna pawh Raitong wood stock farm lam chan tho a ni. Keini inrawlhna tur a awm ve lo a nih tâk ber chu.

Khalai hmun kan chhuahsan hnu khan ka fapa hnute ka pe a, ka ngaihtuahna a kal thui ngei mai. Duhâm luat avanga naute pawisawi lo han tawrhtîr ngawt mai chu a râpthlâk a ni. A hliam han dam fel sela a phu tâwk hremna ka pe dawn khawp mai. Tun atan erawh chuan thil ṭul ber a la ni lo, zawh chhuah tur leh hriat belh tur kan la ngah em mai.

Sameer pawh a inhliam thûk lutuk lo niin Arun khan a sawi a, tlem chuan ka ngaih a ṭha ta deuh. Nakinah a chipchiarin zawhna ka la zawt ang.

Bartho, Omar leh Richard tepawhin min pui nasa a, Jehomalsawmkima'n lawmthu a sawi turah ngai ang aw, Lalngurmuana hnute hne lai chu mit tla dâwnin ka thlir a, Vansangi leh Tleipuii pawh an lawm ve hle, an pahnih inkâr boruak pawh a hma âi ngawt kha chuan a ṭha tawh zawk.

Kan nupa room-ah kan awm tawh a, Jeho inbual zo a rawn chhuak chiah a, "Inbual ve phawt la, Bawiha kha ka lo awmpui ang e," tiin thawmhnaw a inbel pah a, Jeho hmel ka hmuh hian ka lung a awi thei tlat tawh lo, inhaua inhnial leh ka peih tawh loh avang chauha ngawih chuh mai ka ni a, kan chengdun kumkhua dawn lo a nih hmel viau.

"A muthilh hunah ka inbual mai ang," ka lo ti nghauh a, meng hniam ruih chung hian, "Samuel Pamei vuinaa kan kal dawna ka thil sawi kha i la hria em?" Tia min zawh thut chuan rang fahran hian, "Hria e, farm house chhuahsan tura tih ka ni a, ka chhuahsan ngei bawk ang, ka fapa pawh ka hruai tel bawk ang," ka lo ti zung zung a, "Kha ta ka thusawi kha ka sût leh vek, ka hlatah innufa hian awm tîr che u ka tum lo hulhual.." ti lawi siin khumah a rawn ṭhu hniam a, a fapa samah a chûl hauh hauh a. 

"Kan inṭhen a la ngai dawn tho tho, nang nena kan awmdun hian buaina hmachhawn tur kan neih belh zel a, hetiang nun hi ka kham thawkhat tawh, mipa i nih angin i thusawi tawhah ding tlang la, keini nufa pawh Mizoramah kan haw ang," ka lo ti hmiah. Ka rilru tak tak a ni bawk.

"Ngurthantluang, inṭhenna a awm lo ang aw, kan inṭhena kan awm hran a ngaih dawn ai chuan kan thi dun mai tur a ni," a ti hmiah a, ka lo ner sak.

Khumah inhlat fein kan mu a, Lalngurmuana a laiah ka mut tîr tlat a, Jeho nui suk suk chu rum taka melh chung hian, "Ka awmna tur hmun lovah ka awm a, ka ban phâkah hlimna a awm ve lo, ka fapa nunna thlengin a derthawng bawk a, chuvangin i duh emaw duh lo pawh ni la, kan inṭhen a ngai," tiin ṭan ka khawh ve tlat.

"Muhil rawh, i thluak a vâk darh nasa lutuk a, khawvar hunah ngai i awh leh mai ang," a ti duh lek.

Farm house-a buaina thleng zozai leh Samuel Pamei thihna te, Lalngurmuana ruk bo a nih dan tepawh a chin chhuaka sawi tur a tam. Mahse, ngaihtuah loh hram hram tumin ka maimitchhing ve ta a.

A tûk khua a var a, Mawitei pawh a harh ṭha hle tawh tih Vansangin a sawi avangin a mutna room-ah ka lut a, khumah tûm bûr hian a lo ṭhu a.

"Mawite, ṭha takin ka zawhna che chhâng la, ka unaunu i nih angin a chhe ber thleng lo tura puih che ka tum dawn nia," tia ka biak chuan min melh zawk a, "Ngurthan, engkim ka khawih pawi zo vek tawha min chhanhim thei chuang lovang," pangngai taka tiin a kut zungpui a tuai a tuai a, khawngaihthlâ a la ve deuh. 

"Chuvang tak chuan thudik tak min hrilh rawh, an hremna tur che pawh a nêp thei mai thei asin," tiin ka thlêm ve ta a, rei fê a ngawih hnuah, mit khap zak zak chung hian min en a, "Sawi ṭan dan tur ka hre lo," ti sap chungin khum bula tui bottle a ban leh rih.

"Ka u Vanlalṭana kha eng hmangin nge i thah, tuin nge tihtîr che?" Tia ka zawh laiin Jeho a rawn lut a, "Ngurthan, helaiah zawhna engmah zawt duh tawh suh, ka rualin Police station-ah ka hruai dawn," a rawn ti ta, Mawitei hlauthawng hmel chu a khawngaihthlâk zawk.

"Jeho, Police kutah chuan min dah lo hrâm rawh u, engkim, a vaiin ka sawi vek ang," a ti ta a, mahse, Jeho thung chuan, "Insawi fiah lam chu nakinah le, Samuel thih danah investigation a kal mek a, mita hmutu i nih angin ka hruai che a ngai tlat, dâwt tel miah lova thudik i sawi thlap chuan Mizorama i lêt leh thuai theih nan hma ka la ang," nghet churhin a ti ta a, Mawitei a meng dul raih mai, a tan tâl chhuahna kawng a ping tawh tlat atin ni.

A duh ang a sawi zawh hnuah Jeho a chhuak vut a.

"Buatsaiha hi i eng nge a nih, i pasal a ni tak tak em?" Tiin Mawitei ka zawt a, bu nghat chung hian, "Kum 6 kan innei tawh a, Samuel hnuaia a thawh aṭang hian kan inkâr a ṭha lo viau, mahse, Jeho nen in inneih aṭanga thlakhat hnuah Buatsaiha hian min lo call a, i chanchin min rawn zawt a, ṭha takin ka hrilh vek, rilru kâwi pu-a hrilh erawh ka ni bîk lo a nia," a ti a. Tuna a sawi tak hi chu ka awih ve teh tlat.

"Ka u kha nangma thah tiraw, khalai hunah khan Buatsaiha kha Mizorama a lokal lai a ni a, engvanga that nge in nih? Tu thupêk nge?" tia nelawm lutuk lova ka zawhna chu min chhân a hre hmel hle, rei fê a ngawih hnuah tihian a sawi ta a.

"JK farm neitu dik tak hi Jehomalsawmkima a ni a, nu Pianmawii aṭanga a chhawm a ni. Samuel Pamei mi duhâm lutuk kutah khan Jeho nu hian a dah duh lo hulhual a, Tleipuii pa Ramhmachhuana kha tûra hrai hlum a ni bawk a, a titu chu Samuel a ni; Buatsaiha JK manager a nih tirh khan heng zawng zawng an thurûk hi Samuel leh Jeho nuin an sawi dun lai a hre ta a, anmahni blackmail nana hmangin tihian sual a chhuah chho ta a, kan nupa kâr a chhia a, JK ram Samuela'n a hminga dah a tum laiin Buatsaiha hian Tleipuii hmanga neih a tum ve ta thung a ni, a ngaizawng der ti ila a dik ber ang, Zonunthara pawh a fa a ni lo tih a hre vek," a ti ta mai.

"A nih ka u that tura titu che kha atu ber nge?" Tia ka zawh chuan, fiah kalh hian, "Buatsaiha, ka fapa châwmna tur pawisa ka mamawha ka pasalin ralkhat aṭangin min rawn ṭhen a, ka sum hmuhna hnar a tawp mai bâkah Tleipuii nupuiah a nei zui ta bawk a, i u ka thah a, nangmah Mizorama ka haw tîr thei che a nih chuan sum tam tak min pe dawn tih a sawi bawk, Ngurthan, ka nun dan i hre vek lo mai thei a, ka nunkhaw nawmna tur atan Buatsaiha pawisa min pek tur kha ka mamawh êm a ni," a ti hmiah.

Mawitei nen kan lo inbiak lai chuan Arun a lo lang hlawl a, "Madam, Aryan a harh tawh," hlim hmel takin a ti a, a nui var var bawk a, Jehomalsawmkima'n min koh zui tâk avangin Mawitei thusawi pawh ngaithla zawm tawh lo hian choka lamah ka chhuak phei ta a.

'Aryan a harh tawh' ka thinlung takin ka lawm a ni. Vawikhat mah damdawi inah ka kan ve lo a, a lo harh tawh a nih chuan kal ve ngei ka tum ruh hle.

"Ngurthan, Police station lamah ka inlan a ngai dawn a, i unaunu pawh ka rualin a kal ve ang, a tâwp kan khar thei ṭep a nia," tiin a nui suk a.

"Aryan a harh tawh a, ka tlawh ve thei ang em?" Ka lo ti teh daih a.

"Ka lo haw hunah ka hruai dawn che nia, tunah chuan farm house i la chhuahsan thei lo tlat, Dingngheti leh Pankash inpuanna ngaithla turin i thluak kha lo tât hriam la, Buatsaiha pawhin eng emaw chu a sawi lan ve tawh kha," ngaihsam âwkâ zeta tiin khum lamah min nawr phei dat dat a.

"Tun aṭanga ni nga a ral leh chuan kan buaina hi a hmâwr kan bâwk tawh ang, lo lungngai lo la.." ti leh supin amah si chêt hian min kuah a, "Buaina i hmachhawn tam poh leh kei min mamawhna a sâng ang tih ka sawi tawh kha, chumi letling chiah chu, buaina a kian hunah tun aia nasa hian min hmangaih ang," inringtawk taka tiin ka hmui a tawk zauh a.

"Jehomalsawmkim, eng maw i sawi, kei hian ka hmangaih che a maw?" Ka lo ti hê-hâw a.

Nui huk chung hian, "I doctor thluak kha hmang turin ka hrilh ṭhin che a ni lawm ni, min hmangaih tih inhre chhuak zo lo tur khawpin buainain min nangching a, a reh fel rual rual hian min hmangaih tih i hrechhuak thung ang, chumi hun chu ka lo nghâk ang aw..." a tih leh lek phei chuan ka thluak a buai tulh tulh.

Kei hian Laljehomalsawmkima hi ka hmangaih maw, inṭhen tum lai laia hetiang thu âtthlâk sawi chhuah, thil awihawm pawh va ni suh. 

Dr.Nguthantluangi hian ka pasal ka hmangaih leh hmangaih loh pawh ka hre tawh lo chu a nih ber hi, chuta kârah amah ka pasal zâwkin ka hmangaih tih a sawi thei a nia! â..ka â thei takngial dawn alawm maw le.

010523

B+>[BeckirafARenthleI]<+®®